Kpɔmɔnɔ Lɛ​—“Nikeenii Ni Hi Kɛwula Shi” Ni Jɛ Tsɛ Lɛ Ŋɔɔ

 1. Kpɔmɔnɔ lɛ hewɔ lɛ, mɛɛ jɔɔmɔi wɔbaaná?

YESU KRISTO kpɔmɔ afɔle lɛ hãa wɔnáa jɔɔmɔi babaoo. Kpɔmɔnɔ lɛ nɔ Yehowa baatsɔ ehã adesai fɛɛ ni yeɔ lɛ anɔkwa lɛ abafata eweku lɛ he ekoŋŋ yɛ be ni sa mli. Kpɔmɔnɔ lɛ hewɔ lɛ, wɔyɛ hiɛnɔkamɔ akɛ wɔbaahi shi kɛya naanɔ yɛ miishɛɛ mli. Shi nibii krokomɛi hu yɛ ni Kristo kpɔmɔnɔ lɛ tsuɔ. Yesu suɔmɔ mli ni ejɛ eye Yehowa anɔkwa kɛtee gbele mli lɛ hã ana saji komɛi ni he hiaa ni kɔɔ mɛi fɛɛ ni yɔɔ ŋwɛi kɛ shikpɔŋ lɛ nɔ lɛ ahe lɛ anaa.​—Heb. 1:8, 9.

 2. (a) Mɛɛ saji ni he hiaa waa ni kɔɔ mɛi fɛɛ ni yɔɔ ŋwɛi kɛ shikpɔŋ lɛ nɔ lɛ ahe Yesu wie yɛ esɔlemɔ lɛ mli? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni he wɔbaasusu yɛ nikasemɔ nɛɛ mli?

² Aaafee afii enyɔ dani Yesu baagbo ni ekɛ ewala ashã afɔle akɛ kpɔmɔnɔ lɛ, etsɔɔ ekaselɔi lɛ ni amɛsɔle akɛ: “Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee osuɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mat. 6:9, 10) Yɛ nikasemɔ nɛɛ mli lɛ, wɔbaakwɛ tsakpãa ni yɔɔ kpɔmɔnɔ lɛ kɛ nibii ni nyiɛ sɛɛ nɛɛ ateŋ: Nyɔŋmɔ gbɛ́i lɛ he ni abaatse, e-Maŋtsɛyeli lɛ, kɛ bɔ ni ebaafee ehã yiŋtoo hewɔ ni ebɔ shikpɔŋ lɛ kɛ adesai lɛ aba mli. Enɛ baahã wɔhiɛ asɔ kpɔmɔnɔ lɛ waa diɛŋtsɛ.

 3. Mɛni Yehowa gbɛ́i lɛ hãa wɔnaa yɛ ehe? Mɛɛ gbɛ nɔ Satan wo gbɛ́i krɔŋkrɔŋ nɛɛ he muji?

³ Nɔ klɛŋklɛŋ ni Yesu bi yɛ esɔlemɔ he nɔkwɛmɔnɔ lɛ mli ji, ni Nyɔŋmɔ gbɛ́i lɛ he atse. Yehowa gbɛ́i lɛ hãa wɔnaa mɔ tuuntu ni eji, akɛ, lɛ ji mɔ ni je agbo fe fɛɛ ni nɔ kwɔ fe fɛɛ ni yɔɔ krɔŋkrɔŋ fe fɛɛ yɛ ŋwɛi kɛ shikpɔŋ fɛɛ. Be kroko be ni Yesu sɔleɔ lɛ, etsɛ Yehowa akɛ “Ataa Krɔŋkrɔŋ.” (Yoh. 17:11) Yehowa yɛ krɔŋkrɔŋ, no hewɔ lɛ emlai kɛ eshishitoo mlai lɛ fɛɛ hu yɛ krɔŋkrɔŋ. Satan le enɛ jogbaŋŋ, ni kɛ̃lɛ, etsɔ ŋaa gbɛ nɔ ewie akɛ Nyɔŋmɔ bɛ hegbɛ ni etsɔɔ adesai nɔ ni amɛfee kɛ nɔ ni amɛkafee. Satan wo Nyɔŋmɔ gbɛ́i ni yɔɔ krɔŋkrɔŋ lɛ he muji.​—1 Mose 3:1-5.

 4. Mɛɛ gbɛ nɔ Yesu tse Nyɔŋmɔ gbɛ́i lɛ he?

⁴ Yesu sumɔɔ Yehowa gbɛ́i lɛ waa. Etamɔɔɔ Satan. (Yoh. 17:25, 26) Yesu tse Nyɔŋmɔ gbɛ́i lɛ he. (Kanemɔ Lala 40:9-11.) Bɔ ni ehi shi ehã be ni eba shikpɔŋ lɛ nɔ lɛ hã ana faŋŋ akɛ, nilee yɛ mli, ni eja gbɛ hu, akɛ Yehowa baawo mlai ehã adesai kɛ ŋwɛibɔfoi. Yɛ piŋmɔ ni Satan piŋ lɛ kɛtee gbele mli lɛ fɛɛ sɛɛ lɛ, etee nɔ eye e-Tsɛ ni yɔɔ ŋwɛi lɛ anɔkwa yɛ nɔ fɛɛ nɔ mli. Bɔ ni Yesu ye anɔkwa yɛ nibii fɛɛ mli lɛ hã efee faŋŋ akɛ, adesai ni eye emuu baanyɛ abo Nyɔŋmɔ toi ni amɛye emlai lɛ anɔ be fɛɛ be.

 5. Mɛni wɔbaanyɛ wɔfee kɛtse Nyɔŋmɔ gbɛ́i lɛ he?

⁵ Mɛni baatsɔɔ kɛji wɔsumɔɔ Yehowa gbɛ́i lɛ aloo wɔsumɔɔɔ? Wɔjeŋba. Yehowa miisumɔ ni wɔfee krɔŋkrɔŋ. (Kanemɔ 1 Petro 1:15, 16.) Eesumɔ ni wɔjá ekome too pɛ ni wɔjɛ wɔtsui muu fɛɛ mli wɔbo lɛ toi. Kɛ́ awa wɔ yi po lɛ, esa akɛ wɔmia wɔhiɛ wɔhi shi yɛ emlai kɛ eshishitoo mlai lɛ anaa. Kɛ́ wɔfee nibii ni ja lɛ, no tsɔɔ akɛ wɔmiihã wɔla lɛ miitso, ni no baahã awo Yehowa gbɛ́i lɛ hiɛ nyam. (Mat. 5:14-16) Kɛ́ wɔfee krɔŋkrɔŋ lɛ, no baahã ana akɛ, Yehowa mlai lɛ hi, ni nɔ ni Satan wie kɛfolɔ enaa lɛ ji amale. Wɔ fɛɛ wɔtɔ̃ɔ. Shi kɛ́ wɔtɔ̃ lɛ, esa akɛ wɔtsake wɔtsui ni wɔkwa wɔnifeemɔi gbohii ni gbeɔ Yehowa he guɔ lɛ.​—Lala 79:9.

 6. Mɛni hewɔ Yehowa baanyɛ abu wɔ jalɔi yɛ emuu ni wɔyeee lɛ fɛɛ sɛɛ?

⁶ Kristo kpɔmɔ afɔle lɛ hewɔ lɛ, Yehowa kɛ mɛi fɛɛ ni jieɔ hemɔkɛyeli kpo lɛ ahe eshai keɔ amɛ. Ehãa mɛi fɛɛ ni jɔɔ amɛhe nɔ amɛhãa lɛ lɛ hegbɛ akɛ amɛsɔmɔ lɛ. Yehowa buɔ mɛi ni afɔ amɛ mu lɛ kɛ “gwantɛŋi krokomɛi” lɛ fɛɛ jalɔi. Eŋɔɔ mɛi ni afɔ amɛ mu lɛ akɛ ebii, ni ebuɔ “gwantɛŋi krokomɛi” lɛ akɛ enanemɛi. (Yoh. 10:16; Rom. 5:1, 2; Yak. 2:21-25) Enɛ hewɔ lɛ, kɛtsɔ kpɔmɔnɔ lɛ nɔ lɛ, wekukpaa kpakpa baanyɛ ahi wɔ kɛ wɔ-Tsɛ lɛ teŋ amrɔ nɛɛ po, ni wɔbaanyɛ wɔwa kɛtse egbɛ́i lɛ he.

 7. Kpɔmɔnɔ lɛ hewɔ lɛ, mɛɛ jɔɔmɔi Nyɔŋmɔ Maŋtsɛyeli baahã wɔná?

⁷ Yesu sɔlemɔ he nɔkwɛmɔnɔ lɛ mli nibimɔ ni ji enyɔ lɛ ji: “O-Maŋtsɛyeli lɛ aba.” Mɛɛ tsakpãa yɔɔ kpɔmɔnɔ lɛ kɛ Nyɔŋmɔ Maŋtsɛyeli lɛ teŋ? Kpɔmɔnɔ lɛ ji nɔ ni hãa mɛi 144,000 lɛ náa hegbɛ akɛ amɛbaafata Kristo he yɛ ŋwɛi kɛsɔmɔ akɛ maŋtsɛmɛi kɛ osɔfoi. (Kpoj. 5:9, 10; 14:1) Yesu kɛ mɛi 144,000 nɛɛ ni feɔ Nyɔŋmɔ Maŋtsɛyeli lɛ, ni amɛbaaye shikpɔŋ lɛ nɔ afii akpe. Yɛ amɛnɔyeli lɛ shishi lɛ, shikpɔŋ lɛ baatsɔ paradeiso, ni adesai fɛɛ ni boɔ Nyɔŋmɔ toi lɛ baaye emuu. Naagbee lɛ, mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ lɛ baafee ekome akɛ Nyɔŋmɔ weku lɛ mli bii. (Kpoj. 5:13; 20:6) Yesu baamɛnyɛ Satan, ni ji onufu lɛ yitso, ni ejie nibii gbohii fɛɛ ni ejɛ Abonsam atuatsemɔ lɛ mli kɛba lɛ kɛje je lɛ mli.​—1 Mose 3:15.

 8. (a) Mɛɛ gbɛ nɔ Yesu ye ebua ekaselɔi lɛ ni amɛna akɛ Nyɔŋmɔ Maŋtsɛyeli lɛ he miihia waa? (b) Ŋmɛnɛ lɛ, mɛni wɔbaanyɛ wɔfee kɛtsɔɔ akɛ wɔfiɔ Maŋtsɛyeli lɛ sɛɛ?

⁸ Be ni Yesu yɔɔ shikpɔŋ lɛ nɔ lɛ, eye ebua ekaselɔi lɛ ni amɛna akɛ Nyɔŋmɔ Maŋtsɛyeli lɛ he miihia waa. Ebaptisimɔ lɛ sɛɛ nɔŋŋ lɛ, eshiɛ “Nyɔŋmɔ Maŋtsɛyeli lɛ he sane kpakpa lɛ” yɛ hei babaoo. (Luka 4:43) Dani ebaaya ŋwɛi lɛ, efã ekaselɔi lɛ ni amɛye ehe odase “kɛyashi shikpɔŋ lɛ nɔ hei ni yɔɔ shɔŋŋshɔŋŋ lɛ.” (Bɔf. 1:6-8) Kɛtsɔ Maŋtsɛyeli lɛ he sane kpakpa lɛ ni amɛbaashiɛ lɛ nɔ lɛ, adesai ni yɔɔ shikpɔŋ lɛ nɔ hei srɔtoi fɛɛ baakase kpɔmɔnɔ lɛ he nii ni amɛbatsɔmɔ Nyɔŋmɔ Maŋtsɛyeli lɛ shishi bii. Ŋmɛnɛ lɛ, kɛ́ wɔye wɔbua Kristo nyɛmimɛi lɛ ateŋ mɛi ni eshwɛ yɛ shikpɔŋ lɛ nɔ lɛ koni amɛnyɛ amɛshiɛ sane kpakpa lɛ yɛ je lɛŋ fɛɛ lɛ, no tsɔɔ akɛ wɔfiɔ Maŋtsɛyeli lɛ sɛɛ.​—Mat. 24:14; 25:40.

 9. Mɛni hewɔ wɔbaanyɛ wɔná nɔmimaa akɛ yiŋtoo hewɔ ni Yehowa bɔ adesai lɛ efeŋ efolo?

⁹ Yɛ Yesu sɔlemɔ lɛ mli klɛŋklɛŋ nibimɔi enyɔ lɛ asɛɛ lɛ, ewie akɛ: “Afee osuɔmɔnaa nii.” Mɛni wiemɔi nɛɛ tsɔɔ? Yehowa ni bɔ nibii fɛɛ. No hewɔ lɛ, kɛ́ ewie akɛ ebaafee nɔ ko lɛ, ebaafee. (Yes. 55:11) Ehaŋ Satan atuatsemɔ lɛ atsake yiŋtoo hewɔ ni ebɔ shikpɔŋ lɛ kɛ adesai lɛ. Eesumɔ ni shikpɔŋ lɛ nɔ ayi obɔ kɛ Adam kɛ Hawa bii ni eye emuu. (1 Mose 1:28) Eji Adam kɛ Hawa fɔɔɔ dani amɛgboi kulɛ lɛ, Nyɔŋmɔ yiŋ ni eto akɛ amɛfɔ ni shikpɔŋ lɛ nɔ ayi obɔ lɛ baafee efolo. No hewɔ lɛ, be ni Adam kɛ Hawa fee esha po lɛ, Yehowa ŋmɛ amɛ gbɛ ni amɛfɔ bii. Kɛtsɔ kpɔmɔnɔ lɛ nɔ lɛ, Nyɔŋmɔ hãa mɛi fɛɛ ni jieɔ hemɔkɛyeli kpo lɛ hegbɛ ni amɛye emuu ni amɛhi shi kɛya naanɔ. Yehowa sumɔɔ adesai, ni eesumɔ ni mɛi ni boɔ lɛ toi lɛ ahi shi bɔ ni eto akɛ adesai ahi shi kɛjɛ shishijee lɛ.

10. Mɛɛ gbɛ nɔ gbohii lɛ baaná kpɔmɔnɔ lɛ he sɛɛ?

¹⁰ Ni mɛi akpekpe toi akpei abɔ ni náaa hegbɛ amɛbale Yehowa ni amɛsɔmɔ lɛ dani amɛgboi lɛ hu? Kpɔmɔnɔ lɛ hewɔ lɛ, abaatee amɛ shi. Wɔ-Tsɛ ni yɔɔ ŋwɛi lɛ kɛ amɛ baaba wala mli ekoŋŋ. Ebaahã atsɔɔ amɛ yiŋtoo hewɔ ni ebɔ shikpɔŋ lɛ kɛ adesai, ni amɛbaaná hegbɛ amɛhi shi kɛya naanɔ. (Bɔf. 24:15) Yehowa miisumɔ ni adesai ahi wala mli. Lɛ ji mɔ ni hãa wala, ni ebaatsɔ mɛi fɛɛ ni abaatee amɛ shi lɛ a-Tsɛ. (Lala 36:10) Yɛ Yesu sɔlemɔ he nɔkwɛmɔnɔ lɛ mli lɛ, ewie akɛ Yehowa ji “wɔ-Tsɛ ni yɔɔ ŋwɛi.” (Mat. 6:9) Yehowa baatsɔ Yesu nɔ etee gbohii ashi. (Yoh. 6:40, 44) Yɛ Paradeiso lɛ mli lɛ, wɔbaana faŋŋ akɛ, Yesu ji “gbohiiashitee lɛ kɛ wala lɛ.”​—Yoh. 11:25.

11. Mɛɛ hegbɛ Nyɔŋmɔ miisumɔ ni “asafoku kpele” lɛ mli bii lɛ aná?

¹¹ Yehowa miisumɔ ni mɛi babaoo abajá lɛ. Yesu wie akɛ: “Mɔ fɛɛ mɔ ni feɔ Nyɔŋmɔ suɔmɔnaa nii lɛ, lɛ ji minyɛmi nuu kɛ minyɛmi yoo kɛ minyɛ.” (Mar. 3:35) Mɛi ni Yehowa miisumɔ ni amɛná hegbɛ nɛɛ ayi fa aahu akɛ, Biblia lɛ tsɛ amɛ “asafoku kpele.” Ekɛfata he akɛ, amɛjɛ maji kɛ wekui kɛ wiemɔi srɔtoisrɔtoi amli, ni “gbɔmɔ ko gbɔmɔ ko nyɛŋ akane” amɛ. Amɛheɔ Kristo kpɔmɔ afɔle lɛ nɔ amɛyeɔ ni amɛfeɔ Nyɔŋmɔ suɔmɔnaa nii. Wɔsɛɛ lɛ, amɛbaabolɔ kɛ gbee ni wa akɛ: “Wɔyiwalaheremɔ lɛ jɛ wɔ-Nyɔŋmɔ lɛ, mɔ ni ta maŋtsɛ sɛi lɛ nɔ lɛ, kɛ Gwantɛŋbi lɛ ŋɔɔ.”​—Kpoj. 7:9, 10.

12. Mɛɛ tsakpãa yɔɔ Yesu sɔlemɔ he nɔkwɛmɔnɔ lɛ kɛ yiŋtoo hewɔ ni Nyɔŋmɔ bɔ adesai lɛ teŋ?

¹² Nikasemɔ nɛɛ ehã wɔna tsakpãa ni yɔɔ Yesu sɔlemɔ he nɔkwɛmɔnɔ lɛ kɛ nɔ ni Nyɔŋmɔ eto eyiŋ akɛ ebaafee ehã adesai fɛɛ ni boɔ lɛ toi lɛ teŋ. Ehã wɔna akɛ, esa akɛ wɔmia wɔhiɛ waa wɔtse Yehowa gbɛ́i lɛ he, loo wɔfee lɛ krɔŋkrɔŋ. (Yes. 8:13) Gbɛ́i Yesu lɛ shishi ji, “Yehowa Ji Yiwalaheremɔ.” Yesu kpɔmɔ afɔle lɛ nɔ Yehowa baatsɔ ewo E-gbɛ́i lɛ hiɛ nyam ni ewó nɔ gojoo kɛtsɔ wɔyiwala ni ebaahere lɛ nɔ. Nyɔŋmɔ baatsɔ E-Maŋtsɛyeli lɛ nɔ ehã adesai fɛɛ ni boɔ lɛ toi lɛ aná kpɔmɔnɔ lɛ he sɛɛ. Sɔlemɔ he nɔkwɛmɔnɔ lɛ ehã wɔná nɔmimaa akɛ, bɔ fɛɛ bɔ ni fee lɛ, abaafee nɔ ni Nyɔŋmɔ sumɔɔ.​—Lala 135:6; Yes. 46:9, 10.

13. Kɛ́ wɔhã abaptisi wɔ lɛ, mɛni no tsɔɔ?

¹³ Nɔ kome ni he hiaa waa ni wɔbaanyɛ wɔfee kɛtsɔɔ akɛ wɔhiɛ sɔɔ kpɔmɔnɔ lɛ ji, ni wɔbaajɔɔ wɔhe nɔ wɔhã Yehowa, ni wɔhã abaptisi wɔ. Wɔbaptisimɔ lɛ hãa efeɔ faŋŋ akɛ, “Yehowa nii ji wɔ.” (Rom. 14:8) No nɔ wɔtsɔɔ wɔkpaa Nyɔŋmɔ fai ni ehã wɔ henilee kpakpa. (1 Pet. 3:21) Yehowa boɔ faikpamɔ nɛɛ toi, ni etsɔɔ Kristo lá ni efɔse eshwie shi ehã wɔ lɛ nɔ etsuɔ wɔhe. Wɔyɛ nɔmimaa akɛ, Yehowa baaduro wɔ nibii fɛɛ ni ewo shi akɛ ebaaduro wɔ lɛ.​—Rom. 8:32.

14. Mɛni hewɔ Yehowa efã wɔ akɛ wɔsumɔ mɛi krokomɛi lɛ?

¹⁴ Mɛni ji nɔ kroko ni wɔbaanyɛ wɔfee kɛtsɔɔ akɛ wɔhiɛ sɔɔ kpɔmɔnɔ lɛ? Suɔmɔ ji nɔ ni kudɔɔ Yehowa yɛ nɔ fɛɛ nɔ ni efeɔ lɛ mli, ni eesumɔ ni mɛi fɛɛ ni jáa lɛ lɛ hu ajie su nɛɛ kpo yɛ nɔ fɛɛ nɔ ni amɛfeɔ lɛ mli. (1 Yoh. 4:8-11) Kɛ́ wɔsumɔɔ mɛi krokomɛi lɛ, no tsɔɔ akɛ wɔmiisumɔ ni wɔtsɔmɔ ‘wɔ-Tsɛ ni yɔɔ ŋwɛi lɛ bii.’ (Mat. 5:43-48) Kitai enyɔ ni he hiaa fe fɛɛ lɛ ateŋ klɛŋklɛŋ nɔ lɛ ji, wɔsumɔ Yehowa, ni nɔ ni ji enyɔ lɛ ji, wɔsumɔ wɔnaanyo gbɔmɔ. (Mat. 22:37-40) Nɔ kome ni he hiaa waa ni wɔbaanyɛ wɔfee kɛtsɔɔ akɛ wɔsumɔɔ wɔnaanyo gbɔmɔ ji, ni wɔbaashiɛ Nyɔŋmɔ Maŋtsɛyeli lɛ he sane kpakpa lɛ. Kɛ́ wɔjie suɔmɔ kpo wɔtsɔɔ mɛi krokomɛi lɛ, ehãa anaa Nyɔŋmɔ anunyam lɛ. Kɛ́ wɔbo Nyɔŋmɔ famɔ lɛ toi, ni wɔsumɔ mɛi krokomɛi, titri lɛ, wɔnyɛmimɛi lɛ, esuɔmɔ lɛ ‘baaye emuu yɛ wɔmli.’​—1 Yoh. 4:12, 20.

15. (a) Mɛɛ jɔɔmɔi wɔnáa kɛjɛɔ Yehowa dɛŋ ŋmɛnɛ? (b) Mɛɛ jɔɔmɔi wɔbaaná wɔsɛɛ?

¹⁵ Kɛ́ wɔjie hemɔkɛyeli kpo yɛ kpɔmɔnɔ lɛ mli lɛ, Nyɔŋmɔ kɛ wɔhe eshai lɛ fɛɛ baake wɔ. Biblia lɛ kɛɔ akɛ, ‘ebaagbe wɔhe eshai lɛ.’ (Kanemɔ Bɔfoi 3:19-21.) Taakɛ wɔna momo lɛ, kpɔmɔnɔ lɛ hewɔ lɛ, Yehowa ŋɔɔ etsuji ni afɔ amɛ mu lɛ akɛ ebii. (Rom. 8:15-17) Yɛ “gwantɛŋi krokomɛi” lɛ agbɛfaŋ lɛ, Yehowa kɛ miishɛɛ baaŋɔ amɛteŋ mɛi fɛɛ ni baaye lɛ anɔkwa yɛ naagbee kaa lɛ mli be ni amɛye emuu lɛ akɛ ebii ni esumɔɔ. (Rom. 8:20, 21; Kpoj. 20:7-9) Yehowa baaya nɔ esumɔ ebii lɛ kɛya naanɔ, ejaakɛ amɛjara wa hã lɛ. Wɔbaaná kpɔmɔnɔ lɛ he sɛɛ kɛya naanɔ. (Heb. 9:12) Nikeenii nɛɛ baaya nɔ atsu yiŋtoo hewɔ ni Nyɔŋmɔ kɛhã wɔ lɛ he nii, ni mɔ ko mɔ ko bɛ ni baanyɛ ashɔ̃ kɛjɛ wɔdɛŋ.

16. Mɛɛ gbɛ nɔ kpɔmɔnɔ lɛ hãa wɔyeɔ wɔhe?

¹⁶ Kɛ́ wɔtsake wɔtsui lɛ, nɔ ko nɔ ko bɛ ni Abonsam baanyɛ afee kɛtsĩ wɔnaa koni wɔkatsɔmɔ Yehowa weku lɛ mli bii wɔsɛɛ. Yesu bagbo “shi kome nyɔŋlo.” No hewɔ lɛ, kpɔmɔnɔ lɛ yɛ kɛhã wɔ kɛmiiya naanɔ. (Heb. 9:24-26) Kpɔmɔnɔ lɛ baahã wɔnine ashɛ nibii fɛɛ ni Adam hã eŋmɛɛ wɔ lɛ anɔ ekoŋŋ. Kristo afɔle lɛ hewɔ lɛ, wɔye wɔhe kɛjɛ Satan kɛ eje lɛ dɛŋ, ni wɔsheee gbele gbeyei dɔŋŋ.​—Heb. 2:14, 15.

17. Mɛni Yehowa suɔmɔ lɛ tsirɛɔ bo ni ofee?

¹⁷ Wɔyɛ nɔmimaa akɛ, Yehowa shiwoi fɛɛ baaba mli. Kɛ́ wɔkɛ wɔhiɛ fɔ̃ enɔ lɛ, wɔnine enyɛŋ shi kɔkɔɔkɔ, ejaakɛ bɔ ni adebɔɔ naa mlai lɛ tsakeee lɛ, nakai nɔŋŋ lɛ hu etsakeee. (Mal. 3:6) Jeee wala pɛ Yehowa eduro wɔ. Ejieɔ suɔmɔ hu kpo etsɔɔ wɔ, ni enɛ jara wa kwraa fe wala. “Wɔbale ni wɔhe suɔmɔ ni Nyɔŋmɔ sumɔɔ wɔ lɛ wɔye. Nyɔŋmɔ lɛ, suɔmɔ ji lɛ.” (1 Yoh. 4:16) Etsɛŋ, shikpɔŋ lɛ baatsɔ Paradeiso, ni mɛi fɛɛ ni baahi nɔ lɛ baaná miishɛɛ ni amɛbaajie Nyɔŋmɔ suɔmɔ lɛ kpo. No hewɔ lɛ, nyɛhãa wɔkɛ Nyɔŋmɔ tsuji anɔkwafoi ni yɔɔ ŋwɛi lɛ afea ekome, ni wɔkɛ gbee ni wa akɛɛ akɛ: “Yijiemɔ lɛ kɛ anunyam lɛ kɛ hiɛshikamɔ lɛ kɛ shidaa lɛ kɛ woo lɛ kɛ hewalɛ lɛ kɛ nyɛmɔ lɛ ahã wɔ-Nyɔŋmɔ lɛ kɛya naanɔi anaanɔ. Amen.”​—Kpoj. 7:12.