Ani Abaanyɛ Aná Shihilɛ ni Gbɔmɛi Akui Amlijiemɔ Bɛ Mli?

JOHN ADAMS, ni batsɔ United States nɔyelɔ ni ji enyɔ lɛ ji mɛi ni kɛ amɛwaonaa gbɛi wo yinɔsane mli Maŋ Heyeli He Sanejajemɔ lɛ ateŋ mɔ kome, ni nɔ ni fata he ji nɛkɛ wiemɔi ni hi jogbaŋŋ nɛɛ akɛ: “Wɔbuɔ nɛkɛ anɔkwalei nɛɛ akɛ odaseyeli ni mli kã shi faŋŋ, ákɛ abɔ gbɔmɛi fɛɛ akɛ mɛi ni yeɔ hegbɔ.” Shi kɛlɛ, John Adams yiŋ feɔ lɛ kɔshikɔshi lolo yɛ faŋŋ mli akɛ ani gbɔmɛi yeɔ hegbɔ lɛɛlɛŋ lo, ejaakɛ eŋma akɛ: “Nyɔŋmɔ Ofe lɛ ji mɔ ni to Jwɛŋmɔ kɛ Gbɔmɔtso ni yeee hegbɔ lɛ shishi nakai yɛ bɔ ni efee Adesa Su lɛ He Gbɛjianɔtoo lɛ eha lɛ naa, ni yɛ no hewɔ lɛ hesaa loo nifeemɔ gbɛ ko nyɛŋ aha amɛye hegbɔ gbi ko gbi ko.” Nɔ ni tamɔɔɔ nakai lɛ, Britania yinɔsaneŋmalɔ H. G. Wells nyɛ esusu adesai aweku ko ni mɛi fɛɛ baaye hegbɔ ni damɔ nibii etɛ nɔ lɛ he akɛ: jamɔ ko ni ale yɛ jeŋ fɛɛ shi eyɛ krɔŋŋ ni ehe bɛ muji, nitsɔɔmɔ kome kɛha mɛi fɛɛ, kɛ asraafoi ni bɛ.

Kɛbashi amrɔ nɛɛ, yinɔsane ejieko adesai aweku ko ni mɛi fɛɛ baaye hegbɔ yɛ mli ni Wells fee he mfoniri lɛ kpo etsɔko. Eka shi faŋŋ akɛ adesai yeee hegbɔ kwraa, ni gbɔmɛi akui amlijiemɔi kã he eji nɔ titri yɛ shihilɛ mli lolo. Ani nɛkɛ kui nɛɛ kɛ sɛɛnamɔi komɛi eba shihilɛ mli? Dabi. Kwasafoŋ shihilɛ mli kui agbɛjianɔtoi gbalaa gbɔmɛi amli, ni nɔ jɛɔ mli kɛbaa ji nyɛ̃ɛ, hetsɛ̃, tsuiŋdɔlɛ, kɛ láshishwiemɔ babaoo. Tsutsu ko lɛ, jwɛŋmɔ ni ahiɛ yɛ Afrika, Australia, kɛ Amerika Kooyigbɛ akɛ mɛi yɛji anɔ kwɔlɔ fe mɛi diji lɛ kɛ amanehulu ba mɛi ni amɛjeee mɛi yɛji lɛ anɔ—ni nɔ ni fata he ji Shikwɛɛbii ni yɔɔ Van Diemen’s Land (amrɔ nɛɛ Tasmania) lɛ ashishibulemɔ kwraa. Yɛ Europa lɛ, Yudafoi ní atsɛ amɛ akɛ mɛi ni baa shi lɛ ji nɔ ni tée Hiɛkpatamɔ Kpele lɛ shi. Ninamɔ kpele ni nɔyelɔi akuu lɛ ená, kɛ tsui ni enyɔɔɔ mɔ mli ni yɔɔ kuu ni baa shi lɛ kɛ kuu ni kã teŋ lɛ mli bii ateŋ lɛ, ji nibii ni kɛ French Maŋ Hiɛtsakemɔ ni ba yɛ afii ohai 18 lɛ mli lɛ ba kɛtsa nɔ kɛtee Bolshevik Maŋ Hiɛtsakemɔ lɛ nɔ yɛ Russia yɛ afii ohai 20 lɛ mli.

Nilelɔ ko ni hi shi yɛ blema beaŋ lɛ ŋma akɛ: “Gbɔmɔ yeɔ enaanyo gbɔmɔ nɔ ni ekɛyeɔ ehe awui.” (Jajelɔ 8:9) Ewiemɔi lɛ ji anɔkwale kɛji mɛi ni yeɔ nɔ lɛ ji aŋkroaŋkroi aloo kui. Bɔ fɛɛ bɔ ni fee lɛ, kɛji kuu kome wó ehe nɔ yɛ kuu kroko nɔ lɛ, nɔ ni jɛɔ mli kɛbaa ji amanehulu kɛ piŋmɔ.

Mɛi Fɛɛ Yeɔ Hegbɔ yɛ Nyɔŋmɔ Hiɛ

Yɛ fɔmɔsu naa lɛ, ani adesai akui komɛi anɔ kwɔ fe kui krokomɛi? Jeee nakai eji yɛ Nyɔŋmɔ hiɛ. Biblia lɛ kɛɔ akɛ: “Lá kome [Nyɔŋmɔ ŋɔfee] gbɔmɛi adesai fɛɛ, ni amɛhi shikpɔŋ lɛ fɛɛ hiɛ.” (Bɔfoi lɛ Asaji 17:26) Kɛfata he lɛ, Bɔlɔ lɛ “kwɛɛɛ onukpai ahiɛ, ni ebuuu niiatsɛ fe ohiafo; ejaakɛ eninenaa nitsumɔ ji amɛ fɛɛ kwa.” (Hiob 34:19) Wekumɛi ji adesai fɛɛ, ni yɛ fɔmɔ naa lɛ, amɛ fɛɛ amɛyeɔ hegbɔ yɛ Nyɔŋmɔ hiɛ.

Kaimɔ hu akɛ, kɛ gbɔmɔ gbo lɛ, hegbɛ fɛɛ ni eyɔɔ akɛ mɔ ni nɔ kwɛ fe mɛi krokomɛi lɛ laajeɔ. Blema Mizraimbii lɛ heee enɛ amɛyeee. Beni Farao ko gbo lɛ, amɛkɛ nibii ni jara wawai woɔ egbonyobu lɛ mli bɔ ni afee ni ená amɛmli miishɛɛ be mli ni eyaa nɔ ehiɛɔ ehegbɛ ni nɔ kwɔ lɛ mli yɛ gbele sɛɛ shihilɛ ko mli lɛ. Ani ená amɛmli miishɛɛ? Dabi. Julɔi ni juɔ gbohiiabui amli nii lɛ yaju nibii lɛ ateŋ babaoo, ni abaanyɛ ana nibii lɛ babaoo ni julɔi lɛ anine shɛɛɛ nɔ lɛ ŋmɛnɛ yɛ blema nibiiatoohei.

Akɛni egbo hewɔ lɛ, Farao lɛ naaa nakai nibii ni jara wawai lɛ ahe sɛɛ ko kwraa. Kui ni nɔ kwɔlɔ loo nɔ ni baa shi ko kwraa bɛ gbele mli, ninamɔ bɛ lɛ ohia hu bɛ. Biblia lɛ kɛɔ akɛ: “Esa akɛ nilelɔi agboi; kwashiai kɛ buului fɛɛ hiɛ kpataa. Ejaakɛ gbɔmɛi tamɔ tsinai ni wala sɛɛ etsɛɛɛ, amɛtamɔ tsinai ni hiɔ shi be kukuoo.” (Lala 49:10, 12, The New English Bible) Kɛji wɔji maŋtsɛmɛi loo nyɔji lɛ, nɛkɛ wiemɔi ni jɛ mumɔŋ nɛɛ ji nɔ ni kɔɔ wɔ fɛɛ wɔhe akɛ: “Gbohii lɛ, amɛleee nɔ ko nɔ ko, ni amɛbɛ nyɔmɔwoo ko dɔŋŋ . . . Nitsumɔ loo yiŋshwiemɔ loo nilee loo ŋaa ko bɛ gbohiiaje he ni oyaa lɛ.”—Jajelɔ 9:5, 10.

Afɔ wɔ fɛɛ ákɛ mɛi ni yeɔ hegbɔ yɛ Nyɔŋmɔ hiɛ, ni wɔ fɛɛ hu wɔbaaye hegbɔ naagbee kwraa yɛ gbele mli. Belɛ, kwɛ bɔ ni efeɔ yaka mɔ akɛ abaawo kuu kome nɔ kɛteke kuu kroko yɛ wɔwala be kukuoo nɛɛ mli!

Shihilɛ ni Gbɔmɛi Amlijiemɔ Bɛ Mli—Yɛ Mɛɛ Gbɛ Nɔ?

Shi kɛlɛ, ani hiɛnɔkamɔ ko yɛ akɛ gbi ko baashɛ ni adesai agbɛjianɔtoo ko baahi mɛi ni yɔɔ wala mli lɛ ateŋ ni kwasafoŋ shihilɛ kuu mlijiemɔ ebafeŋ nɔ ni he hiaa? Hɛɛ, hiɛnɔkamɔ yɛ. Nɔ ni miihe ashɛ afii 2,000 ni eho nɛ beni Yesu yɔɔ shikpɔŋ nɔ lɛ, atswa shishitoo nɔ̃ kɛha nakai adesai agbɛjianɔtoo lɛ. Yesu kɛ ewala ha akɛ kpɔmɔ afɔleshaa kɛha adesai fɛɛ ni heɔ amɛyeɔ lɛ koni “mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”—Yohane 3:16.

Bɔni afee ni Yesu atsɔɔ akɛ esaaa akɛ esɛɛnyiɛlɔi lɛ ateŋ mɔ ko woɔ amɛhe nɔ yɛ amɛnanemɛi heyelilɔi lɛ anɔ lɛ, ekɛɛ akɛ: “Nyɛ lɛ, akatsɛ nyɛ Rabi; ejaakɛ mɔ kome ji nyɛtsɔɔlɔ (lɛ ji Kristo); shi nyɛ fɛɛ lɛ, nyɛmimɛi ji nyɛ. Ni nyɛkatsɛa mɔ ko nyɛtsɛ hu yɛ shikpɔŋ lɛ nɔ; ejaakɛ mɔ kome ji nyɛtsɛ, mɔ ni yɔɔ ŋwɛi lɛ. Asaŋ akatsɛ nyɛ nuntsɔmɛi hu; ejaakɛ mɔ kome ji nyɛnuntsɔ, lɛ ji Kristo. Shi mɔ ni ji agbo yɛ nyɛteŋ lɛ, etsɔ nyɛtsulɔ. Ni mɔ fɛɛ mɔ ni aaawo ehe nɔ lɛ, aaaba lɛ shi.” (Mateo 23:8-12) Yɛ Nyɔŋmɔ hiɛ lɛ, Yesu anɔkwa kaselɔi lɛ fɛɛ yeɔ hegbɔ yɛ anɔkwa jamɔ lɛ mli.

Ani mra be mli Kristofoi lɛ bu amɛhe akɛ mɛi ni yeɔ hegbɔ? Mɛi ni nu Yesu tsɔɔmɔ lɛ shishi lɛ fee nakai. Amɛbu amɛhe akɛ mɛi ni yeɔ hegbɔ yɛ hemɔkɛyeli lɛ mli ni amɛfee enɛ kɛtsɔ tsɛmɔ ni amɛtsɛɔ amɛhe akɛ ‘nyɛmimɛi’ lɛ nɔ. (Filemon 1, 7, 20) Awooo mɔ ko hewalɛ koni ebu ehe akɛ ehi fe mɛi krokomɛi. Ákɛ nɔkwɛmɔnɔ lɛ, susumɔ bɔ ni Petro tsɔ heshibaa gbɛ nɔ etsɔɔ bɔ ni eji lɛ mli eha yɛ ewolo ni ji enyɔ lɛ mli akɛ: “Simon Petro, ni ji Yesu Kristo tsulɔ kɛ bɔfo lɛ, ŋma yaha mɛi ni nine eshɛ hemɔkɛyeli ni jara wa tamɔ wɔnɔ lɛ nɔŋŋ nɔ” lɛ he okwɛ. (2 Petro 1:1) Petro nine shɛ tsɔsemɔ nɔ kɛjɛ Yesu dɛŋ, ni ákɛ bɔfo lɛ, ehiɛ nɔkwɛmɔ hegbɛ ko ni he hiaa. Ni kɛlɛ, ebu ehe akɛ tsulɔ, ni eyɔse akɛ Kristofoi krokomɛi hu hiɛ hemɔkɛyeli ni ehiɛ ni kɔɔ anɔkwale lɛ he lɛ nɔŋŋ eko.

Ekolɛ mɛi komɛi baakɛɛ akɛ nɔ ni teɔ shi woɔ hegbɔyeli he shishitoo mla lɛ ji anɔkwale ni eji akɛ yɛ be ni tsɔ Kristofoi abe lɛ hiɛ lɛ mli lɛ, Nyɔŋmɔ fee Israel emaŋ krɛdɛɛ. (2 Mose 19:5, 6) Ekolɛ amɛbaakɛɛ akɛ enɛ feɔ hewolonɔ su ní nɔ kwɔ he nɔkwɛmɔnɔ, shi jeee nakai eji. Eji anɔkwale akɛ, ákɛ Abraham shwiei lɛ, Israelbii lɛ ná amɛkɛ Nyɔŋmɔ teŋ wekukpaa krɛdɛɛ ko mli miishɛɛ, ni akɛ amɛ tsu nii akɛ gbɛ ni atsɔɔ nɔ ni nine shɛɔ Nyɔŋmɔ kpojiemɔi anɔ. (Romabii 3:1, 2) Shi yiŋtoo ni yɔɔ enɛ mli lɛ jeee koni akɛwó amɛnɔ. Yɛ no najiaŋ lɛ, bɔni afee ni ‘ajɔɔ jeŋmaji lɛ fɛɛ.’—1 Mose 22:18; Galatabii 3:8.

Nɔ ni jɛ mli ba ji akɛ Israelbii lɛ ateŋ mɛi babaoo ekaseee amɛ blematsɛ Abraham hemɔkɛyeli lɛ. Amɛyeee anɔkwa ni amɛkpoo Yesu akɛ Mesia lɛ. No hewɔ lɛ Nyɔŋmɔ kpoo amɛ. (Mateo 21:43) Shi kɛlɛ, nibii kpakpai ni awo shi yɛ he lɛ eŋmɛɛɛ heshibalɔi ni yɔɔ amɛteaŋ lɛ. Afɔ́ Kristofoi asafo lɛ yɛ Pentekoste afi 33 Ŋ.B. Atsɛ Kristofoi ni mumɔ krɔŋkrɔŋ lɛ efɔ amɛ mu lɛ agbɛjianɔtoo nɛɛ akɛ “Nyɔŋmɔ Israel lɛ,” ni ebafee nɔ ni nɔ ni abaatsɔ ni akɛ nakai jɔɔmɔi lɛ aba.—Galatabii 6:16.

Tsɔsemɔ he miihia nakai asafo lɛ mlibii komɛi yɛ sane ni kɔɔ hegbɔyeli he. Ákɛ nɔkwɛmɔnɔ lɛ, kaselɔ Yakobo kɛ ŋaawoo ha mɛi ni kɛ Kristofoi ni yɔɔ nii lɛ yeɔ yɛ woo babaoo mli fe ohiafoi lɛ. (Yakobo 2:1-4) Nakai feemɔ ejaaa. Bɔfo Paulo tsɔɔ akɛ Kristofoi ni jɛ Jeŋmajiaŋbii lɛ ateŋ lɛ jeee mɛi ni baa shi fe Yudafoi Kristofoi lɛ, ni yɛ anɔkwale mli lɛ Kristofoi yei jeee mɛi ni baa shi fe hii lɛ. Eŋma akɛ: “Ejaakɛ nyɛ fɛɛ lɛ Nyɔŋmɔ bii ji nyɛ yɛ Kristo Yesu mli kɛtsɔ hemɔkɛyeli lɛ nɔ; ejaakɛ nyɛ mɛi abɔ ni abaptisi nyɛ awo Kristo mli lɛ, nyɛwo Kristo. Yudanyo bɛ lɛ, Helanyo hu bɛ dɔŋŋ; nyɔŋ bɛ lɛ, odehe hu bɛ dɔŋŋ; nuu bɛ lɛ, yoo hu bɛ dɔŋŋ: ejaakɛ nyɛ fɛɛ, mɔ kome ji nyɛ yɛ Kristo Yesu mli.”—Galatabii 3:26-28.

Gbɔmɛi ní Niiamlijiemɔ Bɛ Amɛteŋ Ŋmɛnɛ

Yehowa Odasefoi bɔɔ mɔdɛŋ koni amɛhi shi yɛ Ŋmalɛ naa shishitoo mlai anaa. Amɛle akɛ yɛ Nyɔŋmɔ hiɛ lɛ kwasafoŋ shihilɛ mli kui amlijiemɔ jeee nɔ ko ni he hiaa. No hewɔ lɛ, amɛbɛ osɔfo kɛ asafoŋbii amligbalamɔ, ni agbálako amɛmli yɛ bɔ ni amɛ hewolonɔ su ji ha loo ninamɔ yɔɔ ha lɛ naa. Eyɛ mli akɛ amɛteŋ mɛi komɛi yɛ nii moŋ, shi amɛkɛ amɛhiɛ efɔ̃ɔɔ “shihilɛ lɛ mli hewoo lɛ” nɔ, ejaakɛ amɛle akɛ nibii ni tamɔ nakai baaho aya. (1 Yohane 2:15-17) Yɛ no najiaŋ lɛ, Jeŋ Muu Fɛɛ Maŋtsɛ, ni ji Yehowa Nyɔŋmɔ ni amɛjáa lɛ lɛ efee amɛ fɛɛ ekome.

Amɛteŋ mɔ fɛɛ mɔ kpɛlɛɔ gbɛnaa nii akɛ ebaaná gbɛfaŋnɔ yɛ nitsumɔ ni ji shiɛmɔ ni ebaashiɛ Maŋtsɛyeli lɛ he sanekpakpa lɛ eha enaanyo gbɔmɔ lɛ mli lɛ nɔ. Taakɛ Yesu ji lɛ, amɛkɛ woo haa mɛi ni anaanaa amɛnɔ ni akpoo amɛ lɛ kɛtsɔ saramɔ ni amɛsaraa amɛ yɛ amɛshiai amli lɛ nɔ, ni amɛkɛ amɛhe haa akɛ amɛaatsɔɔ amɛ Nyɔŋmɔ Wiemɔ lɛ. Mɛi ni baa shi yɛ shihilɛ mli lɛ kɛ mɛi ni ekolɛ mɛi komɛi baabu amɛ akɛ amɛyɛ kui ni nɔ kwɔlɔ mli lɛ feɔ ekome kɛtsuɔ nii. Mumɔŋ sui lɛ ji nɔ ni he hiaa, shi jeee kwasafoŋ shihilɛ mli kuu. Taakɛ eji yɛ klɛŋklɛŋ afii oha lɛ mli lɛ, amɛ fɛɛ amɛji nyɛmimɛi hii kɛ yei yɛ hemɔkɛyeli lɛ mli.

Hegbɔyeli Eteee Shi Ewooo Nibii Srɔtoi

Eji anɔkwale akɛ, hegbɔyeli etsɔɔɔ akɛ mɛi fɛɛ baaye hegbɔ pɛpɛɛpɛ. Hii kɛ yei, onukpai kɛ gbekɛbii fɛɛ yɛ nɛkɛ Kristofoi agbɛjianɔtoo nɛɛ mli, ni mɛi ni fata he ji gbɔmɛi ni jɛ hewolonɔ sui, wiemɔi, maji, kɛ shika helɛtemɔ shihilɛi srɔtoi amli. Ákɛ aŋkroaŋkroi lɛ, amɛyɛ jwɛŋmɔŋ kɛ gbɔmɔtsoŋ nyɛmɔi srɔtoi. Shi nakai srɔtofeemɔi lɛ efeee amɛteŋ mɛi komɛi mɛi ni nɔ kwɔlɔ loo mɛi ni baa shi. Yɛ no najiaŋ lɛ, nɔ ni jɛɔ srɔtofeemɔi ni tamɔ enɛ mli kɛbaa ji nibii ahe srɔtofeemɔi ni haa mɔ náa miishɛɛ. Nakai Kristofoi lɛ yɔseɔ akɛ hesaa fɛɛ hesaa ni amɛyɔɔ lɛ ji nikeenii ni jɛ Nyɔŋmɔ ŋɔɔ ni ejeee nɔdaamɔnɔ kɛha amɛ akɛ amɛbaanu he akɛ amɛnɔ kwɔlɔ.

Mligbalamɔi ni yɔɔ kui ateŋ lɛ jɛ mɔdɛŋ ni gbɔmɔ bɔɔ koni eye lɛ diɛŋtesɛ ehe nɔ yɛ nɔ najiaŋ ni eeenyiɛ Nyɔŋmɔ gbɛtsɔɔmɔ sɛɛ lɛ mli. Etsɛŋ, Nyɔŋmɔ Maŋtsɛyeli lɛ baaye shikpɔŋ nɛɛ nɔ, ni nɔ ni baajɛ mli kɛba ji kui amlijiemɔi ni adesa kɛba lɛ naagbee, ni nɔ ni baafata he ji nibii krokomɛi fɛɛ ni haa apiŋɔ yɛ yinɔi lɛ fɛɛ amli lɛ naagbee. Kɛkɛ lɛ, ‘mɛi ni he jɔ lɛ baahi shikpɔŋ lɛ nɔ’ diɛŋtsɛ. (Lala 37:11) Yiŋtoi fɛɛ ni adamɔɔ nɔ ashwãa yɛ bɔ ni mɔ susuɔ akɛ enɔ kwɔ eha lɛ sɛɛ baafo. Aŋmɛŋ gbɛ kɔkɔɔkɔ ni kwasafoŋ shihilɛ mli kui agbála adesa jeŋ muu fɛɛ nyɛmifeemɔ lɛ mli dɔŋŋ.

[Wiemɔ ni akɔ ni akɛmiitsu nii ni yɔɔ baafa 5]

Bɔlɔ lɛ “ebuuu niiatsɛ fe ohiafo; ejaakɛ eninenaa nitsumɔ ji amɛ fɛɛ kwa.”—Hiob 34:19.

[Mfoniri ni yɔɔ baafa 6]

Yehowa Odasefoi kɛ woo haa amɛkutsoŋbii

[Mfonirii ni yɔɔ baafa 7]

Mumɔŋ sui ji nɔ ni he hiaa yɛ anɔkwa Kristofoi ateŋ