Kwɛmɔ Jogbaŋŋ yɛ Amale Tsɔɔlɔi Ahe!
“Amale tsɔɔlɔi baaba nyɛ hu nyɛteŋ.”—2 PETRO 2:1.
1. Mɛni kulɛ Yuda taoɔ eŋma he sane, ni mɛni hewɔ ni etsake esaneyitso lɛ?
MƐƐ nii ni hãa mɔ he jɔ̃ɔ ehe nɛ! Amale tsɔɔlɔi yɛ klɛŋklɛŋ afii oha lɛ mli Kristofoi asafo lɛ mli! (Mateo 7:15; Bɔfoi lɛ Asaji 20:29, 30) Yesu nyɛmi nuu Yuda le nɛkɛ nii ni tee nɔ nɛɛ. Ewie akɛ kulɛ eto eyiŋ akɛ ebaaŋma enanemɛi heyelilɔi lɛ “wɔ fɛɛ wɔyiwalaheremɔ lɛ he sane,” shi etsɔɔ mli akɛ: “Ehe miijara mi akɛ maŋma nyɛ ni mikɛsɔle nyɛ, koni nyɛpele hemɔkɛyeli . . . lɛ he.” Mɛni hewɔ Yuda tsake saneyitso ni ewieɔ he lɛ? Ejaakɛ, ewie akɛ, “gbɔmɛi komɛi eju shi ebabote [asafoi lɛ a]mli, . . . ni ŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi.”—Yuda 3, 4.
2. Mɛni hewɔ 2 Petro yitso 2 lɛ kɛ Yuda wolo lɛ je amɛhe nakai lɛ?
2 Eka shi faŋŋ akɛ, beni Petro ŋma ewolo ni ji enyɔ lɛ sɛɛ nɔŋŋ ni Yuda ŋma ewolo lɛ. Ŋwanejee ko bɛ he akɛ Yuda le wolo nɛɛ. Eka shi faŋŋ akɛ, ejie susumɔi ni tamɔ enɔ lɛ kpo yɛ lɛ diɛŋtsɛ eŋaawoo wolo ni hewalɛ yɔɔ mli lɛ mli. No hewɔ lɛ, beni wɔsusuɔ 2 Petro yitso 2 he lɛ, wɔbaana bɔ ni etamɔ Yuda wolo lɛ pɛpɛɛpɛ hã.
Nibii ni Jɛɔ Amale Tsɔɔmɔi Amli Kɛbaa
3. Mɛni ba yɛ blema ni Petro wie akɛ ebaaba ekoŋŋ lɛ?
3 Beni Petro wo enyɛmimɛi lɛ hewalɛ ni amɛbo gbalɛ toi sɛɛ lɛ, ewie akɛ: “Shi amale gbalɔi hu te shi [yɛ blema Israel], taakɛ bɔ nɔŋŋ ni amale tsɔɔlɔi baaba nyɛ hu nyɛteŋ lɛ.” (2 Petro 1:14–2:1) Nyɔŋmɔ webii ni hi shi blema lɛ anine shɛ anɔkwa gbalɛ nɔ, shi ehe bahia ni amɛwu amɛshi amale gbalɔi atsɔɔmɔi fɔji hu. (Yeremia 6:13, 14; 28:1-3, 15) Yeremia ŋma akɛ: “Mina gbeyei nɔ ko yɛ Yerusalem gbalɔi lɛ ahe: amɛfiteɔ gbala, amɛnyiɛɔ yɛ amale mli.”—Yeremia 23:14.
4. Mɛni hewɔ amale tsɔɔlɔi sa hiɛkpatamɔ lɛ?
4 Beni ewieɔ nɔ ni amale tsɔɔlɔi baafee yɛ Kristofoi asafo lɛ mli lɛ he lɛ, Petro kɛɛ akɛ: “Mɛi [nɛɛ] kɛ hiɛkpatamɔ tsɔɔmɔi aaabahɔ mli nigii, ni Nuntsɔ [Yesu Kristo] lɛ ni kpɔ̃ amɛ lɛ po, amɛaakwa lɛ, ni amɛkɛ hiɛkpatamɔ ni he yɔɔ oya aaaba amɛ diɛŋtsɛ amɛnɔ.” (2 Petro 2:1; Yuda 4) Nɔ ni jɛ nɛkɛ klɛŋklɛŋ afii oha lɛ mli mligbalamɔ kuu nɛɛ mli kɛba ji Kristendom taakɛ wɔle lɛ ŋmɛnɛ lɛ. Petro tsɔɔ nɔ hewɔ ni amale tsɔɔlɔi lɛ sa hiɛkpatamɔ jogbaŋŋ lɛ mli, akɛ: “Mɛi pii aaanyiɛ amɛ nyenyeŋtswibɔɔi lɛ asɛɛ, ni amɛ hewɔ lɛ aaawie anɔkwale gbɛ lɛ he musubɔɔ wiemɔi.”—2 Petro 2:2.
5. Mɛni amale tsɔɔlɔi lɛ kɛba?
5 Susumɔ enɛ he okwɛ! Hewalɛ ni amale tsɔɔlɔi lɛ náa yɛ mɛi anɔ lɛ hewɔ lɛ, asafo lɛ mli bii lɛ ateŋ mɛi pii kɛ amɛhe baawo nyenyeŋtswibɔɔ mli. Hela wiemɔ ni atsɔɔ shishi akɛ “nyenyeŋtswibɔɔ” lɛ tsɔɔ ahoshwibɔɔ, naatsii ni bɛ, subaŋ ni he tseee, jeŋba shara, hiɛgbejianii. Petro wie kɛtsɔ hiɛ akɛ Kristofoi “[ejo] je nɛŋ fitemɔ ni yɔɔ akɔnɔ mli lɛ naa foi.” (2 Petro 1:4) Shi mɛi komɛi baaku amɛsɛɛ kɛya nakai fitemɔ lɛ mli, ni amale tsɔɔlɔi ni yɔɔ asafoi lɛ amli lɛ ji mɛi titri ni kɛ enɛ baaba! Enɛ hewɔ lɛ ebaaha awie anɔkwale gbɛ lɛ he heguɔgbee wiemɔ. Kwɛ bɔ ni eyɔɔ dɔlɛ hã! Eka shi faŋŋ akɛ, enɛ ji sane ko ni esa akɛ Yehowa Odasefoi fɛɛ asusu he jogbaŋŋ ŋmɛnɛ. Esaaa ni wɔhiɛ kpaa nɔ kɔkɔɔkɔ akɛ, wɔbaanyɛ wɔtsɔ wɔjeŋba nɔ wɔkɛ yijiemɔ aha Yehowa Nyɔŋmɔ kɛ ewebii lɛ, aloo wɔkɛ heguɔgbee aba amɛnɔ.—Abɛi 27:11; Romabii 2:24.
Bɔ ni Afee Akɛ Apasa Tsɔɔmɔi Bawo Mli
6. Mɛni kanyaa amale tsɔɔlɔi lɛ, ni mɛɛ gbɛ nɔ amɛtsɔɔ koni amɛná nɔ ni amɛtaoɔ lɛ?
6 Wɔkɛ nilee yɔseɔ gbɛ ni amale tsɔɔlɔi lɛ tsɔɔ nɔ amɛkɛ amɛsusumɔi fɔji baa lɛ. Petro kɛɔ klɛŋklɛŋ akɛ amɛfeɔ yɛ gbɛ ni yɔɔ nigii nɔ, aloo gbɛ ni bɛ faŋŋ nɔ, yɛ ŋaa mli. Ekɛfataa he akɛ: “Amɛkɛ hiɛjoomɔ aaaye nyɛ amim kɛ amale wiemɔi.” Pɛsɛmkunya akɔnɔ tsirɛɔ amale tsɔɔlɔi lɛ, taakɛ shishitsɔɔmɔ ni yɔɔ The Jerusalem Bible lɛ mli lɛ maa nɔ mi lɛ: “Amɛkɛ hiɛdɔɔ baabɔ mɔdɛŋ akɛ amɛaahe nyɛ amɛha amɛhe kɛ wiemɔi ni yeɔ awui yɛ teemɔŋ.” Nakai nɔŋŋ hu James Moffatt shishitsɔɔmɔ lɛ kɛɔ yɛ biɛ akɛ: “Amɛbaaye nyɛ amim yɛ amɛ hiɛkɔ̃ɔ lɛ mli kɛ sane naataamɔ ni yɔɔ nigii.” (2 Petro 2:1, 3) Amale tsɔɔlɔi lɛ awiemɔi baafee tamɔ nɔ ni saa mɛi ni hiɛ bɛ amɛhe nɔ yɛ mumɔŋ lɛ ahiɛ, shi amɛhala amɛwiemɔi lɛ jogbaŋŋ ni ‘amɛkɛheɔ’ gbɔmɛi lɛ, ni amɛlakaa amɛ amɛwoɔ shishiulɔi lɛ apɛsɛmkunya yiŋtoi ahe nitsumɔ mli.
7. Mɛɛ jeŋ nilee bagbɛ eshwã yɛ klɛŋklɛŋ afii oha lɛ mli?
7 Ŋwanejee ko bɛ he akɛ, je lɛŋ bii asusumɔi ni egbɛ eshwã yɛ nakai beaŋ lɛ ná klɛŋklɛŋ afii oha lɛ mli bii lɛ anɔ hewalɛ. Aaafee be mli ni Petro ŋma ewolo lɛ, no mli lɛ jeŋ nilee ko ni atsɛɔ lɛ Gnosticism, loo teemɔŋ nilee hemɔkɛyeli lɛ miigbɛ kɛmiishwã waa. Gnostikbii, (loo mɛi ni yɔɔ teemɔŋ nilee hemɔkɛyeli lɛ) heɔ yeɔ akɛ heloonaa nibii fɛɛ ji efɔŋ, ni nibii ni kɔɔ mumɔ he lɛ pɛ ji ekpakpa. Enɛ hewɔ lɛ, amɛteŋ mɛi komɛi wie akɛ nɔ ni mɔ ko kɛ ehelooŋ gbɔmɔtso lɛ feɔ lɛ he ehiaaa. Amɛtsɔɔ mli akɛ, yɛ be ko sɛɛ lɛ, gbɔmɔ ehiŋ nɛkɛ gbɔmɔtso nɛɛ mli dɔŋŋ. No hewɔ lɛ, amɛmu sane naa akɛ, gbɔmɔtsoŋ eshai—ni bɔlɛnamɔ fata he lɛ—ahe ehiaaa. Eka shi faŋŋ akɛ nɛkɛ susumɔi nɛɛ bɔi mɛi ni kɛɔ akɛ amɛnyiɛɔ Kristojamɔ sɛɛ lɛ ateŋ mɛi komɛi anɔ hewalɛnamɔ.
8, 9. (a) Mɛɛ susumɔ ni egba afã sa mra be mli Kristofoi lɛ ekomɛi ahe? (b) Taakɛ Yuda tsɔɔ lɛ, mɛni mɛi ni yɔɔ asafo lɛ mli lɛ ekomɛi feɔ?
8 Biblia he woloŋlelɔ ko wie akɛ “mɛi komɛi yɛ Sɔlemɔ lɛ mli ni tsake tsɔɔmɔ ni kɔɔ duromɔ” loo ‘duromɔ ni wɔsaaa’ lɛ he lɛ kwraa. (Efesobii 1:5-7) Taakɛ etsɔɔ lɛ, amɛteŋ mɛi komɛi asane naataamɔ ji akɛ: “Ani okɛɔ akɛ Nyɔŋmɔ [duromɔ ni wɔsaaa] lɛ fa babaoo bɔ ni etsĩmɔɔ esha fɛɛ esha nɔ? . . . No lɛ nyɛhaa wɔyaa nɔ wɔfea esha, ejaakɛ Nyɔŋmɔ [duromɔ ni wɔsaaa] lɛ baanyɛ atsumɔ esha fɛɛ esha. Yɛ anɔkwale mli lɛ, babaoo ni wɔfeɔ esha lɛ, babaoo ni Nyɔŋmɔ [duromɔ ni wɔsaaa] lɛ baaná hegbɛ ni ekɛtsu nii ji no.” Ani onu susumɔ ni ekɔ̃dɔ̃ fe enɛ dã?
9 Bɔfo Paulo ku susumɔ ni ejaaa ni ayɔɔ yɛ Nyɔŋmɔ mɔbɔnalɛ he lɛ naa beni ebi akɛ: “Aso wɔɔhi esha lɛ mli, koni duromɔ lɛ afá?” Esaa ebi hu akɛ: “Aso wɔɔfee esha akɛni wɔbɛ mla shishi shi duromɔ moŋ shishi wɔyɔɔ lɛ?” Paulo kɛ nɔmimaa hã sanebimɔi lɛ eko fɛɛ eko hetoo akɛ: “Dabida!” (Romabii 6:1, 2, 15) Eyɛ faŋŋ akɛ, taakɛ Yuda wie lɛ, mɛi komɛi “ŋɔɔ wɔ-Nyɔŋmɔ duromɔ lɛ amɛbɔɔ nyenyeŋtswi.” Shi kɛlɛ, Petro tsɔɔ mli akɛ nɛkɛ gbɔmɛi nɛɛ ‘ahiɛkpatamɔ hu wɔɔɔ wɔdɔ̃i.’—Yuda 4; 2 Petro 2:3.
Kɔkɔbɔɔ Nɔkwɛmɔnii
10, 11. Mɛɛ kɔkɔbɔɔ nɔkwɛmɔnii etɛ Petro kɛhaa?
10 Bɔni afee ni ekɛma nɔ mi akɛ Nyɔŋmɔ baafee nii eshi mɛi ni jeɔ gbɛ amɛfeɔ efɔŋ lɛ, Petro kɛ kɔkɔbɔɔ nɔkwɛmɔnii etɛ hã kɛjɛ Ŋmalɛi lɛ amli. Klɛŋklɛŋ lɛ, eŋma akɛ: “Nyɔŋmɔ eŋɔɔɔ bɔfoi ni fee esha lɛ ahe ekeee amɛ.” Yuda kɛɔ akɛ mɛnɛɛmɛi “ehiɛɛɛ amɛ diɛŋtsɛ amɛnukpayeli lɛ mli, shi moŋ amɛshi amɛ diɛŋtsɛ amɛshihilɛ he lɛ” yɛ ŋwɛi. Amɛba shikpɔŋ lɛ nɔ dani Nu Afua lɛ ba, ni amɛŋɔ helooŋ gbɔmɔtsei bɔni afee ni amɛkɛ gbɔmɛi abiyei lɛ aná bɔlɛ. Ákɛ toigbalamɔ kɛha amɛ jeŋba ni esaaa, ni jeee adebɔɔ naa nɔ nɛɛ, ashɛrɛ amɛ awo “Tartarus” (gbohiiaje bu) lɛ mli, aloo taakɛ Yuda sane lɛ kɛɔ lɛ, “ekɛ naanɔ kpaai efimɔ amɛ eto duŋ kpii mli eha gbi wulu lɛ nɔ kojomɔ lɛ.”—2 Petro 2:4; Yuda 6; 1 Mose 6:1-3.
11 No sɛɛ lɛ, Petro wie gbɔmɛi ni hi shi yɛ Noa gbii lɛ amli lɛ ahe. (1 Mose 7:17-24) Ewie akɛ yɛ Noa gbii lɛ amli lɛ, Nyɔŋmɔ “eŋɔɔɔ blema je lɛ he ekeee lɛ . . . ni ekɛ nu afua ba mɛi ni kwa Nyɔŋmɔ lɛ aje lɛ nɔ.” Yɛ naagbee lɛ, Petro ŋma akɛ Nyɔŋmɔ to “mɛi ni baakwa Nyɔŋmɔ lɛ okadi” kɛtsɔ “Sodoma kɛ Gomora maji lɛ hu [ni] eshã ni eha amɛtsɔ lamulu” lɛ nɔ. Yuda kɛ saji krokomɛi fataa he akɛ nakai gbɔmɛi aŋkroaŋkroi lɛ “bɔ ajwamaŋ aahu . . . ni amɛyanyiɛ heloo kroko sɛɛ.” (2 Petro 2:5, 6; Yuda 7) Jeee akɛ hii kɛ yei ná bɔlɛnamɔ fɔŋ kɛkɛ, shi moŋ amɛná akɔnɔ fɔŋ kɛha hii krokomɛi hu, ekolɛ amɛná bɔlɛnamɔ he akɔnɔ kɛha kooloi po.—1 Mose 19:4, 5; 3 Mose 18:22-25.
12. Taakɛ Petro tsɔɔ lɛ, mɛɛ gbɛ nɔ awoɔ subaŋ ni ja he nyɔmɔ yɛ?
12 Ni kɛlɛ, Petro tsɔɔ yɛ nakai beaŋ nɔŋŋ akɛ Yehowa ji mɛi ni kɛ anɔkwayeli sɔmɔɔ lɛ lɛ anyɔmɔwolɔ. Akɛ nɔkwɛmɔnɔ lɛ, egba bɔ ni Nyɔŋmɔ “[baa] Noa ni ji jalɛ shiɛlɔ lɛ, mɔ ni gbe yi fee mɛi kpaanyɔ lɛ” yi beni E-kɛ Nu Afua lɛ ba lɛ he sane. Ewie bɔ ni Yehowa jie “Lot, jalɔ lɛ” yɛ Sodom lɛ hu he, ni emu sane naa akɛ: “[Yehowa, NW] le bɔ ni efeɔ ejieɔ jalɔi yɛ kaa mli, kɛ bɔ ni efeɔ etoɔ mɛi fɔji yɛ piŋmɔ mli kɛyashi kojomɔ gbi lɛ nɔ.”—2 Petro 2:5, 7-9.
Nifeemɔi ni Sa Toigbalamɔ
13. Namɛi titri akɛto kɛha kojomɔ, ni eka shi faŋŋ akɛ amɛkɛ amɛhe woɔ mɛɛ lamɔi amli?
13 Petro kadiɔ gbɔmɛi titri ni aje gbɛ akɛ amɛ eto kɛha Nyɔŋmɔ kojomɔ lɛ, ni ji, “mɛi ni nyiɛɔ heloo sɛɛ yɛ hebulemɔ akɔnɔ mli, ni amɛgbeɔ nɔyeli he guɔ lɛ.” Wɔbaanyɛ wɔnu Petro mlifu kɛ dɔlɛ lɛ he, beni ewie akɛ: “Tsuishalɔi kɛ yibulɔi ni kɛ́ amɛmiiwie gbɔmɛi agboi ahe efɔŋ ni amɛhe kpokpooo.” Yuda ŋma akɛ “mɛnɛɛmɛi . . . buleɔ heloo lɛ yɛ amɛlamɔi lɛ amli, . . . ni amɛwieɔ gbɔmɛi agboi ahe wiemɔi fɔji.” (2 Petro 2:10; Yuda 8) Ekolɛ amɛlamɔi lɛ kɔɔ bɔlɛnamɔ he yaka yiŋsusumɔi ni woɔ amɛ hewalɛ ni amɛtiu bɔlɛnamɔ mli akɔnɔ fɔŋ sɛɛ lɛ ahe. Shi, mɛɛ shishinumɔ naa “amɛgbeɔ nɔyeli he guɔ” ni amɛwieɔ “gbɔmɛi agboi ahe wiemɔi fɔji” yɛ?
14. Mɛɛ shishinumɔ naa amale tsɔɔlɔi ‘gbeɔ nɔyeli he guɔ’ ni amɛwieɔ “gbɔmɛi agboi ahe wiemɔi fɔji” yɛ?
14 Amɛfeɔ nakai ejaakɛ amɛgbeɔ hegbɛ ni ajɛ ŋwɛi ato he gbɛjianɔ lɛ he guɔ. Kristofoi onukpai damɔ shi kɛha Yehowa Nyɔŋmɔ ni hiɛ yɔɔ nyam lɛ kɛ e-Bi lɛ, ni no hewɔ lɛ, ahã amɛ woo loo anunyam ko. Eji anɔkwale akɛ amɛtɔ̃ɔ, taakɛ Petro diɛŋtsɛ hu tɔ̃ lɛ moŋ, shi Ŋmalɛi lɛ woɔ asafo lɛ mli bii lɛ hewalɛ ni amɛba amɛhe shi amɛha nɛkɛ gbɔmɛi ni hiɛ yɔɔ nyam nɛɛ. (Hebribii 13:17) Amɛ gbɔjɔmɔi lɛ jeee yiŋtoo ni aaadamɔ nɔ awie amɛhe efɔŋ. Petro kɛɔ akɛ ŋwɛibɔfoi “[ewieee amale tsɔɔlɔi lɛ ahe] efɔŋ amɛkɛkojooo amɛ,” eyɛ mli akɛ eeefee nɔ ni sa jogbaŋŋ akɛ amɛaafee nakai. Petro tee nɔ akɛ: “Shi nɛkɛ gbɔmɛi nɛɛ tamɔ kooloi ni leee wiemɔ ni afɔ́ amɛ aha mɔ̃mɔ̃ kɛ gbee yɛ amɛfɔmɔsu lɛ naa, amɛwieɔ nii ni amɛleee he nɔ ko lɛ he efɔŋ, ni amɛhiɛ aaakpata yɛ amɛ diɛŋtsɛ amɛfitemɔ lɛ mli.”—2 Petro 2:10-13.
“Beni Amɛkɛ Nyɛ Yeɔ Nii Lɛ”
15. Mɛni ji gbɛ̀i ni amale tsɔɔlɔi kɛtsuɔ nii, ni nɛgbɛ amɛtsuɔ amɛ lakamɔi lɛ ahe nii yɛ?
15 Eyɛ mli akɛ nɛkɛ gbɔmɛi fɔji nɛɛ “[buɔ] daa ahoshwibɔɔ akɛ nii ni ŋɔɔ,” ni “mujiatsɛmɛi ni he yɔɔ taŋ” ji amɛ moŋ, shi amɛyeɔ kutumpɔo hu. Amɛfeɔ amɛnii yɛ gbɛ ni yɔɔ “nigii” nɔ, ni amɛwieɔ “kutumpɔo wiemɔi,” taakɛ Petro wie kɛtsɔ hiɛ lɛ. (2 Petro 2:1, 3, 13) Enɛ hewɔ lɛ ekolɛ amɛteŋ shi amɛwoŋ mɔdɛŋ ni onukpai lɛ bɔɔ akɛ amɛaahiɛ jeŋba he tɛi ni Nyɔŋmɔ efolɔ eshwie shi lɛ amli lɛ yɛ faŋŋ mli, loo ni amɛaatiu amɛ bɔlɛnamɔ akɔnɔi asɛɛ kpetekplee. Shi moŋ, Petro kɛɛ akɛ “amɛbɔɔ ahoshwi yɛ amɛgbɛdui lɛ amli, beni amɛkɛ nyɛ yeɔ nii lɛ.” Ni Yuda ŋma akɛ: “Mɛnɛɛmɛi ji tɛsaai ni eteetee amɛhe yɛ nu shishi yɛ nyɛ suɔmɔ niyenii ashishi lɛ.” (Yuda 12, NW) Hɛɛ, taakɛ bɔ ni tɛsaai ni he yɔɔ kpɔikpɔi, ni yɔɔ nu shishi lɛ baanyɛ ajwa lɛlɛ shishi, ni eha amlakui ni hiɛ bɛ amɛhe nɔ lɛ ashiu lɛ, nakai nɔŋŋ amale tsɔɔlɔi lɛ miifite mɛi ni hiɛ bɛ amɛhe nɔ, ni amɛkɛ osatofeemɔ kwaa akɛ amɛsumɔɔ amɛ yɛ “suɔmɔ niyenii” ashishi lɛ.
16. (a) Mɛni ji “suɔmɔ niyenii” lɛ, ni mɛɛ shihilɛi ni tamɔ nakai mli gbɔmɛi fɔji lɛ baatsu nii yɛ ŋmɛnɛ? (b) Namɛi amale tsɔɔlɔi lɛ gbalaa amɛjwɛŋmɔ kɛyaa amɛnɔ, no hewɔ lɛ mɛni esa akɛ nakai mɛi lɛ afee?
16 Eka shi faŋŋ akɛ nɛkɛ “suɔmɔ niyenii” nɛɛ ji hiɛtserɛjiemɔ bei ni klɛŋklɛŋ afii oha lɛ mli Kristofoi lɛ kɛbuaa amɛhe naa, ní amɛnaa niyenii kɛ naanyobɔɔ mli ŋɔɔmɔ. Bei komɛi lɛ, Yehowa Odasefoi hu buaa amɛhe naa ŋmɛnɛ kɛhaa hiɛtserɛjiemɔ, ekolɛ yɛ yookpeemɔ okpɔlɔŋmɛɛ shishi, yɛ shisharamɔi amli, loo kɛha naanyobɔɔ yɛ gbɛkɛnaashi ko. Mɛɛ gbɛ nɔ gbɔmɛi fɔji tsɔɔ amɛkɛ nifeemɔi nɛɛ tsuɔ nii ni amɛkɛlakaa mɛi ni amɛnine shɛɔ amɛnɔ lɛ? Petro ŋma akɛ: “Amɛhiŋmɛii amli eyimɔ obɔ̃bɔ̃ kɛ gbalafitemɔ . . . , ni amɛlakaa susumai ni nane mɔko shi lɛ.” Amɛkɛ amɛ “tsui ni he esa kɛ hiɛjoomɔ” lɛ mãa mɛi ni naji mɔko shi yɛ mumɔŋ, ni kɛ anɔkwale lɛ efeko amɛ diɛŋtsɛ amɛnɔ̃ lɛ anɔ titri. No hewɔ lɛ hã nɔ ni ba yɛ Petro gbii lɛ amli lɛ afee kɔkɔbɔɔ kɛha bo, koni ohiɛ ahi ohe nɔ! Tee shi owo kanyamɔi ni he tseee, ni okahã mɔ ko ni kɛ jeŋba shara he kanyamɔi baa lɛ gbɔmɔtsoŋ hefɛo loo akɔnɔ lɛ miilaka bo!—2 Petro 2:14.
‘Bileam Gbɛ Lɛ’
17. Mɛni ji ‘Bileam gbɛ lɛ,’ ni te esa Israelbii 24,000 ahe eha tɛŋŋ?
17 Nɛkɛ ‘mɛi ni alomɔ’ amɛ nɛɛ ele anɔkwale lɛ yɛ be ko mli. Ekolɛ amɛbaafee tamɔ mɛi ni yɔɔ ekãa lolo yɛ asafo lɛ mli. Shi Petro kɛɛ akɛ: “Amɛje gbɛ ni ja lɛ nɔ, ni amɛdu gbɛ kɛyanyiɛ [Beor, NW] bi Bileam, mɔ ni sumɔɔ nɔshafeemɔ mli nyɔmɔwoo lɛ, gbɛ lɛ nɔ.” (2 Petro 2:14, 15) Gbalɔ Bileam gbɛ lɛ ji akɛ, ewo ŋaa ni alaka mɛi kɛyabote jeŋba shara mli kɛha lɛ diɛŋtsɛ esɛɛnamɔ. Ekɛɛ Moab Maŋtsɛ Balak akɛ kɛ́ abaanyɛ alaka gbɔmɛi lɛ ní amɛbɔ ajwamaŋ lɛ, no lɛ Nyɔŋmɔ baalomɔ Israel. Nɔ ni jɛ mli ba ji akɛ, Moab yei laka Nyɔŋmɔ webii lɛ ateŋ mɛi babaoo, ni akpata mɛi 24,000 hiɛ yɛ amɛjeŋba shara lɛ hewɔ.—4 Mose 25:1-9; 31:15, 16; Kpojiemɔ 2:14.
18. Te Bileam kã he etee nɔ eha tɛŋŋ, ni nɔ ni jɛ mli ba lɛ feɔ mɛni he mfoniri kɛha amale tsɔɔlɔi?
18 Petro wie akɛ atsĩ Bileam naa beni eteji lɛ kɛ lɛ wie lɛ, shi kɛlɛ Bileam “sumɔ nɔshafeemɔ mli nyɔmɔwoo lɛ” aahu akɛ beni enɛ ba po lɛ, ekã he etee nɔ yɛ ‘ekwashiafeemɔ’ gbɛ lɛ nɔ. (2 Petro 2:15, 16) Kwɛ efɔŋ ni eji! Kpoo hã mɔ fɛɛ mɔ ni tamɔ Bileam, ni bɔɔ mɔdɛŋ akɛ eeefite Nyɔŋmɔ webii kɛtsɔ lakamɔ ni eeelaka amɛ ni amɛkɛ amɛhe awo jeŋba shara mli lɛ nɔ! Bileam gbo yɛ enɔ fɔŋ lɛ hewɔ, ni enɛ feɔ nɔ ni baaba mɛi fɛɛ ni ekɔ egbɛ lɛ anɔ lɛ he mfoniri.—4 Mose 31:8.
Amɛ Abonsamii Alakamɔi Lɛ
19, 20. (a) Akɛ mɛi ni tamɔ Bileam lɛ toɔ mɛni he, ni mɛni hewɔ? (b) Namɛi amɛlakaa, ni yɛ mɛɛ gbɛ nɔ? (d) Mɛni hewɔ wɔbaanyɛ wɔwie akɛ amɛ lakamɔi lɛ ji Abonsam nifeemɔi lɛ, ni mɛɛ gbɛ nɔ wɔɔtsɔ wɔbu wɔ diɛŋtsɛ kɛ mɛi krokomɛi ahe kɛjɛ amɛhe?
19 Beni ewieɔ mɛi ni tamɔ Bileam lɛ ahe lɛ, Petro ŋma akɛ: “Mɛnɛɛmɛi ji nu bui [loo nu hiŋmɛii] ni nu bɛ mli, atatui [loo afuai] ni ahum looɔ kɛyaa.” Nu bu ni mli egbi baanyɛ atsɔɔ gbele kɛha gbɛfalɔ ni kumai miiye lɛ yɛ shia-ŋa nɔ. Ebɛ naakpɛɛ akɛ “akɛ duŋ kpii lɛ eto” aha mɛi ni tamɔ nɛkɛ nibii nɛɛ! Petro tee nɔ akɛ: “Ejaakɛ akɛni naafuu wiemɔi wuji jɛɔ amɛnaa hewɔ lɛ, amɛtsɔɔ heloo akɔnɔi anɔ amɛkɛ nyenyeŋtswibɔɔ lakaa mɛi ni je mɛi ni baa amɛjeŋ yɛ shishiumɔ mli lɛ adɛŋ etsɛko lɛ.” Amɛlakaa mɛi ni bɛ niiashikpamɔ lɛ, ni “amɛwoɔ amɛ shi akɛ amɛaaye amɛhe,” taakɛ Petro kɛɛ lɛ, yɛ be mli ni “amɛ diɛŋtsɛ lɛ fitemɔ nyɔji ji amɛ.”—2 Petro 2:17-19; Galatabii 5:13.
20 Nɛkɛ tsɔɔlɔi fɔji nɛɛ alakamɔi lɛ ji Abonsam nifeemɔi. Akɛ nɔkwɛmɔnɔ lɛ, ekolɛ amɛaakɛɛ akɛ: ‘Nyɔŋmɔ le akɛ wɔgbɔjɔ ni wɔhenumɔi yeɔ wɔnɔ. No hewɔ lɛ kɛ wɔkɛ wɔhe wo nifeemɔ ko mli kɛtsu wɔ bɔlɛnamɔ akɔnɔi ahe nii lɛ, Nyɔŋmɔ baana wɔ mɔbɔ. Kɛ́ wɔjaje wɔ esha lɛ, ekɛbaake wɔ tamɔ bɔ ni efee beni wɔba anɔkwale lɛ mli klɛŋklɛŋ kwraa lɛ.’ Kaimɔ akɛ Abonsam kɛ gbɛ ni tamɔ nakai nɔŋŋ tsu nii beni etee Hawa ŋɔɔ lɛ, ni ewo lɛ shi akɛ ebaanyɛ efee esha ni enaŋ toigbalamɔ ko. Yɛ Hawa gbɛfaŋ lɛ, ewie akɛ esha ni eeefee eshi Nyɔŋmɔ lɛ baaha ena sɛɛyoomɔ kɛ heyeli. (1 Mose 3:4, 5) Kɛ́ eeeba akɛ wɔkɛ mɔ ko ni efite nakai, ní kɛ asafo lɛ bɔɔ lɛ aaakpe lɛ, gbɛnaa nii kã wɔnɔ akɛ wɔbu wɔ diɛŋtsɛ kɛ mɛi krokomɛi hu ahe kɛtsɔ nakai mɔ aŋkro lɛ he sane ni wɔɔha mɛi ni akɛ gbɛnaa nii ahe nitsumɔ ewo amɛdɛŋ yɛ Kristofoi asafo lɛ mli lɛ ale lɛ nɔ.—3 Mose 5:1.
Anɔkwa Nilee Buɔ Mɔ He
21-23. (a) Mɛni jɛɔ anɔkwa nilee ni akɛtsuuu nii lɛ mli kɛbaa? (b) Mɛɛ naagba kroko Petro wie he ni wɔbaasusu he yɛ enɛ sɛɛ?
21 Petro tsɔɔ nibii ni baa kɛ́ akɛ nilee ni ewie he kɛtsɔ hiɛ akɛ ehe miihia kɛha “wala kɛ Nyɔŋmɔjamɔ” lɛ tsuuu nii lɛ, ni ekɛmu ewolo lɛ fã nɛɛ naa. (2 Petro 1:2, 3, 8) Eŋma akɛ: “Ejaakɛ kɛ́ amɛtsɔ Nuntsɔ kɛ yiwalaherelɔ Yesu Kristo he nilee lɛ nɔ amɛjo je nɛŋ muji nii lɛ anaa foi, ni nomɛi amli nɔŋŋ asaa adũ amɛ yɛ ni aye amɛnɔ ekoŋŋ lɛ, amɛ naagbee shihilɛ etsɔ efɔŋ fe tsutsu nii lɛ.” (2 Petro 2:20; wɔma efã ko nɔ mi.) Kwɛ bɔ ni eyɔɔ mɔbɔ! Nakai gbɔmɛi ni hi shi yɛ Petro gbii lɛ amli lɛ eshɛ ŋwɛi shihilɛ ni gbele bɛ mli he hiɛnɔkamɔ ni jara wa lɛ amɛfɔ̃ kɛha bɔlɛnamɔ he miishɛɛnamɔ be kukuoo kɛkɛ.
22 No hewɔ lɛ Petro kɛɛ: “Faŋ nɔ ni amɛnaaa amɛle jalɛ gbɛ lɛ, fe nɔ ni amɛle ni kɛlɛ amɛkpale kɛjɛ kita krɔŋkrɔŋ ni atu awo amɛdɛŋ lɛ he lɛ. Shi anɔkwa abɛ lɛ eba mli yɛ amɛhe akɛ: ‘Gbee kuɔ esɛɛ kɛyaa lɛ diɛŋtsɛ eshwee he, ni kpolokoo ni aju ehe lɛ yakokoloɔ ŋmɔtɔ mli.’ ”—2 Petro 2:21, 22; Abɛi 26:11.
23 Eka shi faŋŋ akɛ naagba kroko hu ni ebɔi mra be mli Kristofoi lɛ ahe saa lɛ tamɔ nɔ ni saa mɛi komɛi ahe ŋmɛnɛ lɛ nɔŋŋ. Nakai beaŋ lɛ, eka shi faŋŋ akɛ mɛi komɛi miiwie bɔ ní ba ni Kristo eba lɛ he shiwoo lɛ efee tamɔ nɔ ni ebaaa mli lɛ he. Nyɛhaa wɔpɛia bɔ ni Petro tsu sane nɛɛ he nii lɛ mli wɔkwɛa.
Ani Okaiɔ?
◻ Mɛɛ kɔkɔbɔɔ nɔkwɛmɔnii etɛ Petro tsĩ tã?
◻ Amale tsɔɔlɔi ‘gbeɔ nɔyeli he guɔ’ yɛ mɛɛ gbɛ nɔ?
◻ Mɛni ji Bileam gbɛ lɛ, ni mɛi ni nyiɛɔ nɔ lɛ baabɔ mɔdɛŋ ni amɛlaka mɛi krokomɛi yɛ mɛɛ gbɛ nɔ?
◻ Mɛni jɛɔ anɔkwa nilee ni akɛtsuuu nii lɛ mli kɛbaa?
[Mfoniri ni yɔɔ baafa 17]
Bileam feɔ kɔkɔbɔɔ he nɔkwɛmɔnɔ