Ha Yehowa Gbi lɛ Ahi Ojwɛŋmɔ Mli
“Naagbee gbii lɛ anɔ lɛ hefɛoyelɔi aaaba.”—2 PETRO 3:3.
1. Mɛɛ oyaiyeli henumɔ ŋmɛnɛŋmɛnɛ beaŋ Kristofonyo ko ná?
BE-FƐƐ sɔɔlɔ ko ni kɛ nɔ ni fe afii 66 esɔmɔ lɛ ŋma akɛ: “Minuɔ bɔ ni ehe hiaa ni akɛ oyaiyeli atsu nii lɛ he jogbaŋŋ. Yɛ mijwɛŋmɔ mli lɛ, Harmagedon ebafee tamɔ wɔsɛɛ nɔŋŋ. (Kpojiemɔ 16:14, 16) Taakɛ mitsɛ, kɛ lɛ hu etsɛ ni tsɔ ehiɛ lɛ fee lɛ, mihi shi taakɛ bɔ ni bɔfo [Petro] wo hewalɛ lɛ, ‘mɔ ni kwɛɔ gbɛ ni eshweɔ Yehowa gbi lɛ baa lɛ.’ Mitee nɔ misusu jeŋ hee ni awo shi yɛ he lɛ he akɛ ‘nii ni yɔɔ diɛŋtsɛ, tsɛbelɛ anaaa.’ ”—2 Petro 3:11, 12; Hebribii 11:1; Yesaia 11:6-9; Kpojiemɔ 21:3, 4.
2. Mɛni Yehowa gbi lɛ ni aaaha ehi jwɛŋmɔ mli lɛ tsɔɔ?
2 Petro wiemɔ ni ji ‘ha ehi jwɛŋmɔ mli,’ ni ewie kɛkɔ Yehowa gbi lɛ he lɛ tsɔɔ akɛ wɔjieee kɛjɛɛɛ wɔjwɛŋmɔ mli. Esaaa ni wɔhiɛ kpaa nɔ akɛ gbi ni Yehowa baakpata nibii agbɛjianɔtoo nɛɛ hiɛ, ákɛ shishijee nifeemɔ ni ekɛaato jeŋ hee ni ewo shi yɛ he lɛ shishi lɛ ebɛŋkɛ kpaakpa. Esa akɛ efee nɔ ni yɔɔ diɛŋtsɛ kɛha wɔ, aahu akɛ wɔnaa lɛ faŋŋ, akɛ ekã wɔhiɛ nɔŋŋ kɛmiiba. Nakai ji bɔ ni efee nɔ ni yɔɔ diɛŋtsɛ kɛha Nyɔŋmɔ gbalɔi ni hi shi blema lɛ, ni amɛwie he akɛ ebɛŋkɛ.—Yesaia 13:6; Yoel 1:15; 2:1; Obadia 15; Zefania 1:7, 14.
3. Eka shi faŋŋ akɛ mɛni kɛ Petro ŋaawoo ni kɔɔ Yehowa gbi lɛ he lɛ ba?
3 Mɛni hewɔ Petro wo wɔ hewalɛ ni wɔbu Yehowa gbi lɛ tamɔ nɔ ni ebaaba, kɛ́ wɔɔkɛɛ lɛ, “wɔsɛɛ nɔŋŋ” lɛ? Ejaakɛ eka shi faŋŋ akɛ mɛi komɛi ebɔi ba ni Kristo eba ni awo shi yɛ he, ni ji be mli ni abaagbala efɔŋfeelɔi atoi lɛ he susumɔ lɛ he fɛoyeli. (2 Petro 3:3, 4) No hewɔ lɛ Petro hã nɛkɛ hefɛoyelɔi nɛɛ anaafolɔmɔ wiemɔi lɛ ahetoo, yɛ ewolo ni ji enyɔ, yitso 3 ni wɔbaasusu he agbɛnɛ lɛ mli.
Henumɔ ni Akɛwoɔ Ekãa ni Akai
4. Mɛni Petro taoɔ ni wɔkai?
4 Mɔ hedɔɔ ni Petro yɔɔ kɛha enyɛmimɛi lɛ jeɔ kpo yɛ bɔ ni etsɛ amɛ shii abɔ yɛ yitso nɛɛ mli akɛ “suɔmɔ mɛi” lɛ mli. Beni ekɛ henumɔ woɔ amɛ ekãa akɛ amɛhiɛ akakpa nibii ni atsɔɔ amɛ lɛ nɔ lɛ, Petro je shishi akɛ: “Suɔmɔ mɛi, . . . mikɛ kaimɔ tsĩɛɔ nyɛjwɛŋmɔ krɔŋŋ lɛ hiɛ, ní nyɛkai gbalɔi krɔŋkrɔŋi lɛ awiemɔi ni amɛwie sá lɛ, kɛ Nuntsɔ kɛ yiwalaherelɔ lɛ kita ni bɔfoi ni atsu nyɛŋɔɔ lɛ kɛha nyɛ lɛ.”—2 Petro 3:1, 2, 8, 14, 17; Yuda 17.
5. Mɛni gbalɔi komɛi wie yɛ Yehowa gbi lɛ he?
5 Mɛɛ “gbalɔi krɔŋkrɔŋi lɛ awiemɔi ni amɛwie sá lɛ” Petro woɔ ekanelɔi lɛ hewalɛ ni amɛkai lɛ? Ojogbaŋŋ, nɔ ni kɔɔ ba ni Kristo eba yɛ Maŋtsɛyeli hewalɛ mli kɛ gbɔmɛi ni sheee Nyɔŋmɔ gbeyei lɛ akojomɔ lɛ he lɛ. Petro etsɔ hiɛ egbala jwɛŋmɔ kɛtee wiemɔi nɛɛ anɔ momo. (2 Petro 1:16-19; 2:3-10) Yuda wie Henok, ni ji klɛŋklɛŋ gbalɔ ni aŋma akɛ ebɔ kɔkɔ yɛ fɔbuu kojomɔ ni Nyɔŋmɔ kɛbaaba efɔŋfeelɔi anɔ lɛ he lɛ he. (Yuda 14, 15) Gbalɔi krokomɛi nyiɛ Henok sɛɛ, ni Petro sumɔɔɔ ni wɔhiɛ akpa nɔ ni amɛŋmala lɛ anɔ.—Yesaia 66:15, 16; Zefania 1:15-18; Zakaria 14:6-9.
6. Mɛɛ Kristo kɛ ebɔfoi lɛ awiemɔi komɛi hɛleɔ wɔ shi yɛ Yehowa gbi lɛ he?
6 Kɛfata he lɛ, Petro kɛɔ ekanelɔi lɛ ni amɛkai “Nuntsɔ kɛ yiwalaherelɔ lɛ kita” lɛ. Nɔ ni fata Yesu kita lɛ he hu ji ŋaawoo ni ekɛha nɛɛ, akɛ: “Nyɛhiɛ ahia nyɛhe nɔ, koni . . . haomɔi akahe nyɛtsuii, ni nakai gbi lɛ miibati nyɛ shi trukaa . . . tamɔ tsɔne.” “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ.” (Luka 21:34-36; Marko 13:33) Petro woɔ wɔ hewalɛ ni wɔbo gbalɔi lɛ hu awiemɔi atoi. Akɛ nɔkwɛmɔnɔ lɛ, bɔfo Paulo ŋma akɛ: “[Yehowa, NW] gbi lɛ baaba tamɔ julɔ baa nyɔɔŋ lɛ. Belɛ no hewɔ lɛ nyɛkahãa wɔmiiwɔa tamɔ mɛi ni eshwɛ lɛ, shi moŋ nyɛhaa wɔshia kpe ni wɔhiɛ akãa shi.”—1 Tesalonikabii 5:2, 6.
Hefɛoyelɔi Akɔnɔi Lɛ
7, 8. (a) Mɛɛ gbɔmɛi mɛi ni yeɔ Nyɔŋmɔ kɔkɔbɔɔ shɛɛ saji lɛ ahe fɛo lɛ ji? (b) Mɛni hefɛoyelɔi lɛ kɛɔ?
7 Taakɛ wɔna kɛtsɔ hiɛ lɛ, yiŋtoo kome hewɔ ni Petro kɛ ŋaawoo lɛ ha lɛ ji akɛ, mɛi komɛi ebɔi kɔkɔbɔi nɛɛ ahefɛoyeli, tamɔ bɔ ni Israelbii ni hi shi blema lɛ ye Yehowa gbalɔi lɛ ahe fɛo lɛ. (2 Kronika 36:16) Petro tsɔɔ mli akɛ: “Ni nyɛle enɛ tsutsu, akɛ naagbee gbii lɛ anɔ lɛ hefɛoyelɔi aaaba kɛ hefɛoyeli, mɛi ni aaanyiɛ yɛ amɛ diɛŋtsɛ amɛkɔnɔi anaa.” (2 Petro 3:3; wɔma efã ko nɔ mi.) Yuda wie nɛkɛ hefɛoyelɔi nɛɛ akɔnɔi lɛ ahe akɛ ‘akɔnɔi fɔji.’ Etsɛ amɛ akɛ ‘heloo gbɔmɛi ni ediii mumɔŋ nibii asɛɛ.’—Yuda 17-19.
8 Eeenyɛ efee akɛ amale tsɔɔlɔi ni Petro wie akɛ “[amɛnyiɛɔ] heloo sɛɛ yɛ hebulemɔ akɔnɔ mli” lɛ fata nɛkɛ hefɛoyelɔi ni bɛ mumɔ nɛɛ ahe. (2 Petro 2:1, 10, 14) Amɛkɛ hefɛoyeli biɔ Kristofoi anɔkwafoi lɛ akɛ: “Nɛgbɛ ebaa lɛ he shiwoo lɛ yɔɔ? ejaakɛ kɛjɛ beyinɔ ni tsɛmɛi lɛ yawɔwɔi nɛɛ, bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ.”—2 Petro 3:4.
9. (a) Mɛni hewɔ hefɛoyelɔi bɔɔ mɔdɛŋ akɛ amɛaafite hehiamɔ henumɔ ni yɔɔ Nyɔŋmɔ Wiemɔ lɛ mli fɛɛ lɛ? (b) Yehowa gbi lɛ ni wɔhaa ehiɔ wɔjwɛŋmɔ mli be fɛɛ be lɛ feɔ hebuu kɛhaa wɔ yɛ mɛɛ gbɛ nɔ?
9 Mɛni hewɔ amɛyeɔ fɛo ni tamɔ nɛkɛ? Mɛni hewɔ esa akɛ awie akɛ ekolɛ Kristo baŋ kɔkɔɔkɔ, ákɛ Nyɔŋmɔ kɛ ehe woko adesai asaji amli pɛŋ, ni efeŋ nakai kɔkɔɔkɔ hu? Ojogbaŋŋ, yɛ bɔ ni amɛfiteɔ hehiamɔ henumɔ ni yɔɔ Nyɔŋmɔ Wiemɔ lɛ mli lɛ hewɔ lɛ, nɛkɛ hefɛoyelɔi ni tamɔ kooloi nɛɛ bɔɔ mɔdɛŋ akɛ amɛaawɔle mɛi krokomɛi amɛwo mumɔŋ shikpilikpiifeemɔ mli, koni amɛtsɔ pɛsɛmkunya lakamɔi anɔ ní amɛnine ashɛ amɛnɔ yɛ gbɛ ni waaa nɔ. Kwɛ hewalɛwoo nɔ kpele ni eji kɛha wɔ ŋmɛnɛ koni wɔya nɔ wɔshi kpe yɛ mumɔŋ! Eba akɛ wɔɔha Yehowa gbi lɛ ahi wɔjwɛŋmɔ mli be fɛɛ be, ni wɔkai daa akɛ ehiŋmɛii jwere wɔnɔ! Ni no lɛ, ebaatsirɛ wɔ ni wɔsɔmɔ Yehowa kɛ ekãa ní wɔhiɛ wɔ jeŋba hetsemɔ lɛ mli.—Lala 11:4; Yesaia 29:15; Ezekiel 8:12; 12:27; Zefania 1:12.
Nifeemɔi Gbohii ni Hiɛ Kãa He
10. Mɛɛ gbɛ nɔ Petro mãa nɔ mi yɛ akɛ hefɛoyelɔi lɛ etɔ̃?
10 Nɛkɛ hefɛoyelɔi nɛɛ kuɔ amɛhiɛ amɛfɔ̃ɔ anɔkwale ko ni he hiaa nɔ. Amɛjeɔ gbɛ amɛkuɔ amɛhiɛ amɛfɔ̃ɔ nɔ, ni amɛbɔɔ mɔdɛŋ ni amɛha mɛi krokomɛi ahiɛ akpa nɔ. Mɛni hewɔ? Bɔni afee ni amɛnyɛ amɛlaka gbɔmɛi lɛ yɛ gbɛ ni waaa kwraa nɔ. Petro ŋma akɛ: “Ejaakɛ kwa amɛkwaa amɛjieɔ amɛhiɛ yɛ enɛ nɔ.” (Wɔma efã ko nɔ mi.) Yɛ mɛni nɔ? “Ákɛ ŋwɛi yɛ kɛjɛ blema beebe, ni shikpɔŋ hu jɛ nu mli, ni etsɔ nu mli ebama shi yɛ Nyɔŋmɔ wiemɔ naa; nomɛi nɔŋŋ nɔ etsɔ ni nu ŋɔ no be lɛŋ je lɛ ni ehiɛ kpata lɛ.” (2 Petro 3:5, 6) Hɛɛ, Yehowa jie efɔŋfeemɔ kɛjɛ shikpɔŋ lɛ nɔ kwraa yɛ Noa gbii lɛ amli Nu Afua lɛ mli, ni enɛ ji anɔkwale sane ko ni Yesu mã nɔ mi. (Mateo 24:37-39; Luka 17:26, 27; 2 Petro 2:5) No hewɔ lɛ, ákɛ nɔ ni teɔ shi woɔ hefɛoyelɔi lɛ awiemɔ lɛ, nɔ fɛɛ nɔ eyako nɔ tamɔ “bɔ ni nibii yɔɔ kɛjɛ jeŋbɔɔ shishijee mli lɛ.”
11. Mɛɛ mra be mli Kristofoi lɛ agbɛkpamɔi ni be shɛko hã mɛi komɛi ye amɛhe fɛo lɛ?
11 Ekolɛ hefɛoyelɔi ye anɔkwale Kristofoi lɛ ahe fɛo ejaakɛ no mli lɛ amɛyɛ gbɛkpamɔi ni bako mli lolo. Beni eshwɛ fioo ni Yesu baagbo lɛ, ekaselɔi lɛ “[susu] akɛ amrɔ lɛ nɔŋŋ Nyɔŋmɔ maŋtsɛyeli lɛ baapue.” Kɛkɛ ni, yɛ eshitee lɛ sɛɛ lɛ, amɛbi akɛ ani abaato Maŋtsɛyeli lɛ amã shi amrɔ nɔŋŋ lo. Agbɛnɛ, aaafee afii nyɔŋma dani Petro ŋma ewolo ni ji enyɔ lɛ, mɛi komɛi hã “wiemɔ ko” loo “wolo ko” ni awie akɛ ejɛ bɔfo Paulo loo ehefatalɔi lɛ adɛŋ, “ákɛ [Yehowa, NW] gbi lɛ eshɛ etã” lɛ ‘hao’ amɛ. (Luka 19:11; 2 Tesalonikabii 2:2; Bɔfoi lɛ Asaji 1:6) Shi kɛlɛ, Yesu kaselɔi lɛ agbɛkpamɔi nɛɛ jeee amale, amɛbe kɛkɛ ni shɛko. Yehowa gbi lɛ baaba!
Anyɛɔ Akɛ He Fɔ̃ɔ Nyɔŋmɔ Wiemɔ Nɔ
12. Nyɔŋmɔ Wiemɔ lɛ efee nɔ ni anyɛɔ akɛ he fɔ̃ɔ nɔ yɛ egbalɛi ni kɔɔ ‘Yehowa gbi lɛ’ he lɛ gbɛfaŋ yɛ mɛɛ gbɛ nɔ?
12 Taakɛ wɔna kɛtsɔ hiɛ lɛ, gbalɔi ni hi shi kɛtsɔ Kristofoi abe lɛ hiɛ bɔ kɔkɔ yɛ bei babaoo mli akɛ Yehowa oweletɔɔ gbi lɛ ebɛŋkɛ. ‘Yehowa gbi’ lɛ he nɔkwɛmɔnɔ bibioo ko ba yɛ afi 607 D.Ŋ.B. beni Yehowa tɔ ehe owele yɛ ewebii ni ekɔ gbɛ fɔŋ lɛ anɔ lɛ. (Zefania 1:14-18) Sɛɛ mli lɛ, jeŋmaji krokomɛi, ní Babilon kɛ Mizraim fata he lɛ, na amanehulu yɛ ‘Yehowa gbi’ ni tamɔ nakai nɔŋŋ nɔ. (Yesaia 13:6-9; Yeremia 46:1-10; Obadia 15) Agba klɛŋklɛŋ afii oha lɛ mli Yudafoi anibii agbɛjianɔtoo lɛ hu naagbee afɔ̃ shi, ni eba mli beni Roma asraafoi kpata Yudea hiɛ kwraa yɛ afi 70 Ŋ.B. lɛ. (Luka 19:41-44; 1 Petro 4:7) Shi Petro gbala jwɛŋmɔ kɛtee ‘Yehowa gbi’ ni baaba wɔsɛɛ, ni baaha Nu Afua lɛ po afee bibioo kwraa lɛ nɔ!
13. Mɛɛ yinɔsane mli nɔkwɛmɔnɔ tsɔɔ akɛ nibii agbɛjianɔtoo nɛɛ naagbee lɛ baaba kɛ̃?
13 Petro je bɔ ni ewie nakai hiɛkpatamɔ ni baa lɛ he eha lɛ shishi, ni ekɛɛ: “Lɛ nɔŋŋ ewiemɔ.” Etsɛko tsɔ ni ewie akɛ “Nyɔŋmɔ wiemɔ naa” shikpɔŋ ni hi shi dani Nu Afua lɛ ba lɛ “jɛ nu mli, ni etsɔ nu mli ebama shi.” Nɛkɛ shihilɛ nɛɛ, ni awie he yɛ Biblia mli adebɔɔ sane lɛ mli lɛ, hã Nu Afua lɛ nyɛ eba beni nui lɛ fɔse eshwie shi yɛ Nyɔŋmɔ gbɛtsɔɔmɔ, loo wiemɔ naa lɛ. Petro tsa nɔ akɛ: “Shi ŋwɛi kɛ shikpɔŋ ni yɔɔ nɛɛ, lɛ [Nyɔŋmɔ lɛ] nɔŋŋ ewiemɔ akɛto amɛ aha la, ni akɛ amɛ eto kɛyashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ nɔ.” (2 Petro 3:5-7; 1 Mose 1:6-8) Wɔyɛ Yehowa wiemɔ ni anyɛɔ akɛ he fɔ̃ɔ nɔ lɛ! Ekɛ “ŋwɛi kɛ shikpɔŋ”—nibii agbɛjianɔtoo nɛɛ—baaba naagbee yɛ egbi kpeteŋkpele lɛ nɔ mlifu ni tsoɔ tamɔ la lɛ mli! (Zefania 3:8) Shi mɛɛ be?
Shwe ni Ashweɔ ni Naagbee lɛ Aba
14. Mɛni hewɔ wɔbaanyɛ wɔná hekɛnɔfɔɔ akɛ “naagbee gbii” lɛ amli wɔyɔɔ bianɛ lɛ?
14 Yesu kaselɔi lɛ miitao ni amɛle be mli ni naagbee lɛ baaba, no hewɔ lɛ amɛbi lɛ akɛ: “Mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?” Eka shi faŋŋ akɛ amɛmiibi be ni Yudafoi agbɛjianɔtoo lɛ baaba naagbee lɛ he sane, shi Yesu hetoo lɛ mã be mli ni akɛ hiɛkpatamɔ baaba amrɔ nɛɛ “ŋwɛi kɛ shikpɔŋ” lɛ nɔ lɛ nɔ mi titri. Yesu gba efɔ̃ shi akɛ nibii tamɔ tai wuji, hɔmɔ, shikpɔŋhosomɔi, hela, kɛ awuiyeli baaba. (Mateo 24:3-14, NW; Luka 21:5-36) Kɛjɛ afi 1914 kɛbaa nɛɛ, wɔna akɛ okadi ni Yesu kɛha yɛ “nibii agbɛjianɔtoo lɛ naagbee lɛ” he, kɛ agbɛnɛ hu, nibii ni bɔfo Paulo tsĩ tã akɛ ebaakadi “naagbee gbii” lɛ fɛɛ miiba mli. (2 Timoteo 3:1-5) Lɛɛlɛŋ, odaseyeli ni tsɔɔ akɛ wɔyɛ nibii agbɛjianɔtoo nɛɛ naagbee be mli lɛ fa babaoo!
15. Mɛni Kristofoi etao akɛ amɛaafee, yɛ Yesu ŋaawoo lɛ fɛɛ sɛɛ?
15 Yehowa Odasefoi ebɔ mɔdɛŋ aahu akɛ amɛaale be mli ni Yehowa gbi lɛ baashɛ. Yɛ amɛ mɔdɛŋbɔɔ lɛ mli lɛ, bei komɛi lɛ amɛkaa akɛ amɛaatsɔɔ be ni ekolɛ ebaaba. Shi nakai feemɔ tsɔɔ akɛ, amɛbooo ŋaawoo ni amɛ-Nuntsɔ lɛ kɛha akɛ ‘wɔleee beyinɔ ni be lɛ shɛɔ’ lɛ toi, taakɛ Yesu mra be mli kaselɔi lɛ fee lɛ. (Marko 13:32, 33) Hefɛoyelɔi eye anɔkwa Kristofoi ahe fɛo yɛ amɛ gbɛkpamɔi ni be shɛko lɛ hewɔ. (2 Petro 3:3, 4) Shi kɛlɛ, Yehowa gbi lɛ baaba, taakɛ Petro mã nɔ mi lɛ, yɛ lɛ diɛŋtsɛ E-be naa.
Esa akɛ Wɔkɛ Yehowa Susumɔ Akpã Gbee
16. Mɛɛ ŋaawoo eeefee nilee kɛha wɔ akɛ wɔɔbo toi?
16 Esa akɛ wɔkɛ bɔ ni Yehowa susuɔ be he lɛ akpã gbee, taakɛ Petro kaiɔ wɔ agbɛnɛ lɛ: “Shi, suɔmɔ mɛi, nyɛhiɛ akakpaa sane kome nɛɛ nɔ, akɛ [Yehowa, NW] hiɛ lɛ gbi kome tamɔ afii akpe, ni afii akpe hu tamɔ gbi kome.” Kwɛ bɔ ni wɔ wala sɛɛkɛlɛ ni ji afii 70 loo 80 lɛ yɔɔ kuku kwraa ha kɛ́ akɛto he! (2 Petro 3:8; Lala 90:4, 10) No hewɔ lɛ kɛ́ Nyɔŋmɔ shiwoi lɛ amlibaa fee tamɔ nɔ ni esɛɛ miitsɛ lɛ, esa akɛ wɔbo Nyɔŋmɔ gbalɔ lɛ ŋaawoo nɛɛ toi, akɛ: “Kɛ́ [be ni ato lɛ shashao] shi hu jiŋŋ, mɛɛ lɛ kɛ; ejaakɛ ebaaba lɛɛlɛŋ, ekpeŋ sɛɛ.” (Wɔma efã ko nɔ mi.)—Habakuk 2:3.
17. Eyɛ mli akɛ naagbee gbii lɛ asɛɛ etsɛ fe bɔ ni mɛi pii kpaa gbɛ moŋ, shi mɛni mli wɔyɔɔ hekɛnɔfɔɔ yɛ?
17 Mɛni hewɔ nibii agbɛjianɔtoo nɛɛ naagbee gbii lɛ ehi shi be kakadaŋŋ fe bɔ ni mɛi pii kpa gbɛ lɛ? Yɛ yiŋtoo kpakpa ko hewɔ, taakɛ Petro tsɔɔ mli kɛtsa nɔ lɛ: “Jeee tsɛ [Yehowa, NW] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) Yehowa susuɔ nɔ ni hi fe fɛɛ kɛha adesai fɛɛ he. Gbɔmɛi awala he hiaa lɛ waa, taakɛ ekɛɔ lɛ, akɛ: “Minaaa efɔŋfeelɔ gbele he miishɛɛ, shi moŋ akɛ efɔŋfeelɔ akpale kɛjɛ egbɛ lɛ nɔ, ni eyi aná wala!” (Ezekiel 33:11) No hewɔ lɛ wɔbaanyɛ wɔná hekɛnɔfɔɔ akɛ, naagbee lɛ baaba yɛ be ni sa pɛpɛɛpɛ mli, koni eha wɔ Bɔlɔ ni yɔɔ suɔmɔ, ni ele nii fe fɛɛ lɛ yiŋtoo aba mli!
Mɛni Baaho Aya Lɛ?
18, 19. (a) Mɛni hewɔ Yehowa etswa efai shi akɛ ebaakpata nibii agbɛjianɔtoo nɛɛ hiɛ lɛ? (b) Te Petro wie gbɛjianɔtoo nɛɛ naagbee lɛ he eha tɛŋŋ, ni mɛni diɛŋtsɛ abaakpata hiɛ lɛ?
18 Akɛni Yehowa sumɔɔ mɛi ni sɔmɔɔ lɛ lɛ lɛɛlɛŋ hewɔ lɛ, ebaabɛɛ mɛi ni haoɔ amɛ lɛ fɛɛ kɛya kwraa. (Lala 37:9-11, 29) Beni ewieɔ, taakɛ Paulo fee kɛtsɔ hiɛ, ákɛ hiɛkpatamɔ nɛɛ baaba be ni akpaaa gbɛ lɛ, Petro ŋma akɛ: “[Yehowa, NW] gbi lɛ baaba tamɔ julɔ baa nyɔɔŋ, ni no mli lɛ ŋwɛi lɛ aaaho aya kɛ gbɛɛmɔ, ni je nɛŋ shishijee nii lɛ aaasere yɛ la mli, ni shikpɔŋ kɛ emli nitsumɔi lɛ aaashã.” (2 Petro 3:10; 1 Tesalonikabii 5:2) Ŋwɛi kɛ shikpɔŋ lɛ diɛŋtsɛ hiɛ kpataaa yɛ Nu Afua lɛ mli, ni amɛhiɛ kpataŋ yɛ Yehowa gbi lɛ nɔ hu. Belɛ, mɛni ‘baaho aya,’ loo abaakpata hiɛ lɛ mɔ?
19 Adesai anɔyelii ni eye adesai aweku lɛ nɔ tamɔ “ŋwɛi” lɛ baaba naagbee, ni nakai nɔŋŋ ji “shikpɔŋ” lɛ, loo adesai ni bɛ Nyɔŋmɔ gbeyeishemɔ lɛ hu. Ekolɛ “gbɛɛmɔ” lɛ tsɔɔ bɔ ni ŋwɛi lɛ baaho aya oya. “Shishijee nibii” ni feɔ adesai agbɛjianɔtoo ni efite nɛɛ “aaasere,” loo abaakpata ehiɛ. Ni “shikpɔŋ” lɛ, ní “emli nitsumɔi lɛ” fata he lɛ, “aaashã.” Yehowa baakpa gbɔmɛi anifeemɔi fɔji lɛ ahe mama kwraa kɛmɔ shi, beni ekɛ jeŋ gbɛjianɔtoo muu lɛ fɛɛ baa enaagbee ni sa lɛ jogbaŋŋ lɛ.
Hã Ojwɛŋmɔ Ahi Ohiɛnɔkamɔ lɛ Nɔ Daa
20. Te esa akɛ nibii ni jwere wɔhiɛ ni baaba lɛ he nilee ni wɔyɔɔ lɛ asa wɔhe eha tɛŋŋ?
20 Akɛni nifeemɔi ni yɔɔ naakpɛɛ nɛɛ ebɛŋkɛ hewɔ lɛ, Petro kɛɔ akɛ esa akɛ wɔkɛ wɔhe awo “jeŋbai krɔŋkrɔŋi kɛ Nyɔŋmɔjamɔi amli, mɛi ni kwɛɔ gbɛ ni amɛshweɔ [Yehowa, NW] gbi lɛ baa lɛ.” Anyɛŋ aje he ŋwane ko kwraa! “Ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli.” (2 Petro 3:11, 12) Esa akɛ anɔkwale ni eji akɛ nɛkɛ nibii ni yɔɔ naakpɛɛ nɛɛ baanyɛ aje shishi wɔ́ nɔŋŋ lɛ asa nɔ fɛɛ nɔ ni wɔfeɔ, loo wɔtoɔ gbɛjianɔ akɛ wɔɔfee lɛ he.
21. Mɛni baaye amrɔ nɛɛ ŋwɛi kɛ shikpɔŋ lɛ najiaŋ?
21 Agbɛnɛ Petro kɛɔ wɔ nɔ ni baaye gbɛjianɔtoo momo lɛ najiaŋ, akɛ: “Shi yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13; Yesaia 65:17) Ah, mɛɛ heyeli po nɛ! Kristo kɛ ehefatalɔi nɔyelɔi 144,000 lɛ baafee “ŋwɛi” nɔyeli gbɛjianɔtoo “hee” lɛ, ni gbɔmɛi ni yi baaná wala kɛfo je nɛɛ naagbee lɛ baafee “shikpɔŋ hee” lɛ.—1 Yohane 2:17; Kpojiemɔ 5:9, 10; 14:1, 3.
Hiɛmɔ Hehiamɔ Henumɔ kɛ Jeŋba Hetsemɔ Mli
22. (a) Mɛni baaye abua wɔ koni mumɔŋ muji loo kpa ko akahi wɔhe? (b) Mɛɛ oshara Petro bɔ kɔkɔ yɛ he?
22 Petro tee nɔ akɛ: “No hewɔ lɛ, suɔmɔ mɛi, akɛni nyɛkwɛɔ nii nɛɛ agbɛ nɛɛ, nyɛbɔa mɔdɛŋ, koni ana nyɛ ni muji loo kpa ko bɛ nyɛhe yɛ ehiɛ, yɛ hejɔlɛ mli; ni nyɛbua wɔ-Nuntsɔ lɛ tsuishitoo lɛ akɛ yiwalaheremɔ ni.” Gbɛkpamɔ ni mli wa ni wɔkɛmɛɔ kɛ bu ni wɔbuɔ tsɛ ní Yehowa gbi lɛ tamɔ nɔ ni etsɛ lɛ akɛ ŋwɛi tsuishitoo kpojiemɔ lɛ baaye abua wɔ ni mumɔŋ muji nii loo kpa ko akaba wɔhe. Shi kɛlɛ, oshara yɛ! Petro bɔ kɔkɔ akɛ nibii ni “wɔ suɔmɔ nyɛmi Paulo lɛ hu ŋma . . . lɛ . . . amli nibii komɛi ashishinamɔ miijara, nii ni mɛi ni ekaseko nɔ ko lɛ kɛ mɛi ni nane mɔko shi lɛ tsɔɔ shishi ekroko, taakɛ bɔ ni amɛfeɔ ŋmalɛi ni eshwɛ lɛ hu, kɛkpataa amɛ diɛŋtsɛ amɛhiɛ lɛ.”—2 Petro 3:14-16.
23. Mɛni ji Petro naagbee ŋaawoo?
23 Eka shi faŋŋ akɛ amale tsɔɔlɔi lɛ tsɔmɔ Paulo niŋmaai ni kɔɔ Nyɔŋmɔ duromɔ ni wɔsaaa lɛ he lɛ, ni amɛkɛtsu nii akɛ naajiemɔ kɛha jeŋba shara. Ekolɛ enɛ yɔɔ Petro jwɛŋmɔ mli beni eŋmaa amɛ enaagbee ŋaawoo lɛ: “Agbɛnɛ nyɛ lɛ, suɔmɔ mɛi, akɛni nyɛle momo sá hewɔ lɛ nyɛsaraa, koni akɛ gbɔmɛi fɔji alakamɔ sane lɛ akashãtã nyɛ hu, ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi.” Kɛkɛ ni agbɛnɛ emu ewolo lɛ naa, ni ewo amɛ hewalɛ akɛ: “Nyɛshwerea yɛ wɔ-Nuntsɔ kɛ yiwalaherelɔ Yesu Kristo duromɔ kɛ nilee lɛ mli.”—2 Petro 3:17, 18.
24. Mɛɛ subaŋ esa akɛ Yehowa tsuji fɛɛ aná?
24 Eyɛ faŋŋ akɛ, Petro miitao ni ewo enyɛmimɛi lɛ hewalɛ. Eesumɔ ni mɔ fɛɛ mɔ aná subaŋ ni Odasefonyo anɔkwafo ni eye afii 82, ni atsɛ́ ewiemɔ sɛɛ kɛjɛ shishijee lɛ jie lɛ kpo lɛ eko, akɛ: “Mihi shi taakɛ bɔ ni bɔfo lɛ wo hewalɛ lɛ, ‘mɔ ni kwɛɔ gbɛ ni eshweɔ Yehowa gbi lɛ baa lɛ.’ Mitee nɔ misusu jeŋ hee ni awo shi yɛ he lɛ he akɛ ‘nii ni yɔɔ diɛŋtsɛ, tsɛbelɛ anaaa.’ ” Eba akɛ wɔ fɛɛ wɔɔhi shi yɛ nakai gbɛ nɔŋŋ nɔ.
Te Obaaha Hetoo Tɛŋŋ?
◻ Mɛni Yehowa gbi lɛ ni ‘aaaha ehi jwɛŋmɔ mli’ lɛ tsɔɔ?
◻ Mɛni hefɛoyelɔi jeɔ gbɛ amɛkuɔ amɛhiɛ amɛfɔ̃ɔ nɔ, ni mɛni hewɔ?
◻ Mɛɛ yiŋtoo hewɔ ni hefɛoyelɔi yeɔ anɔkwa Kristofoi ahe fɛo lɛ?
◻ Mɛɛ susumɔ ehe hiaa ni wɔhiɛ mli be fɛɛ be?
[Mfoniri ni yɔɔ baafa 23]
Ha Yehowa gbi lɛ kɛ jeŋ hee ni . . .
[Mfoniri ni yɔɔ baafa 24]
. . . baanyiɛ sɛɛ lɛ ahi ojwɛŋmɔ mli be fɛɛ be