Kwɛmɔ Jogbaŋŋ yɛ Hefɛoyelɔi Ahe!

Gbalɛi efa babaoo ŋmɛnɛ, ni wɔsɛɛ be nibii ni atsɔɔ hiɛ agbaa lɛ etsɔ nitsumɔ ni miishwere waa. “Beni afi 2000 lɛ bɛŋkɛɔ lɛ,” taakɛ The Daily Telegraph ni aŋmaa yɛ London lɛ wie lɛ, “nɔ ko ni efɔɔɔ kaa, ni kɛlɛ ejeee nɔ ni akpaaa gbɛ hu miiya nɔ. Gbɔmɛi akpei abɔ ni yɔɔ je lɛŋ he fɛɛ he miiná wɔsɛɛ be he ninaai komɛi ni efɔɔɔ kaa, ni bei pii lɛ ewoɔ mɔ he gbeyei waa.” Yɛ mɛi ni kwɛɔ enɛ lɛ ateŋ mɛi pii agbɛfaŋ lɛ, nɛkɛ wɔsɛɛ be he miishɛɛ ni ayɔɔ waa nɛɛ ji tsakemɔi ni hiɛ kã nɔ tsutsu ko, ní baaa mli lɛ amlitĩi ekoŋŋ.

BENI shwiilii ni okpɔŋɔi gbalaa lɛ bafa saŋŋ yɛ afii ohai 19 lɛ mli lɛ, nuu ko gba akɛ yɛ naagbee lɛ, Europa maŋtiasei fɛɛ amli baayi kɛ okpɔŋɔ wamɔ. Shi yɛ anɔkwale mli lɛ, egbalɛ nɛɛ baaa mli anɔkwale. Enɛ hewɔ lɛ, beni The Times ni aŋmaa yɛ London lɛ maa bɔ ni wɔsɛɛ be he gbalɛi baaa mli yɛ bei babaoo mli lɛ nɔ mi lɛ, ewie akɛ: “Wɔsɛɛ be eyi obɔ kɛ okpɔŋɔ wamɔ sɔŋŋ kɛkɛ.”

Mɛi krokomɛi yeɔ mɛi ni naa akɛ oshara baaba wɔsɛɛ lɛ ahe fɛo. Ákɛ nɔkwɛmɔnɔ lɛ, nitsumɔ saji ahe tsɔɔlɔ nukpa ni yɔɔ U.S. univɛsiti ko tswa mɛi ni bɔɔ kɔkɔ yɛ nibii ni ebɔle wɔ kɛkpe lɛ afitemɔ he lɛ mpoa akɛ amɛta abasa kɛji bɔ ni nibii yaa nɔ lɛ mli baawo wu. Taakɛ abɔ amaniɛ yɛ New Scientist wolo tɛtrɛɛ lɛ mli lɛ, nuu nɛɛ wieɔ akɛ “bɔ ni wɔshihilɛ ji lɛ miiya hiɛ, ni ebaakã he eya hiɛ aahu ni esɛɛ efooo.”

Mɛi pii heɔ yeɔ, yɛ wiemɔi ni awieɔ kɛ wiemɔi krokomɛi ni akɛteɔ shi awoɔ nomɛi lɛ ahe yiŋfutumɔ ni yɔɔ lɛ mli ákɛ, nɔ fɛɛ nɔ baahi shi bɔ ni eyɔɔ lɛ nɔŋŋ ni etsakeee. Akɛni amɛyeɔ susumɔ ni ayɔɔ akɛ Nyɔŋmɔ kɛ ehe baawo adesai asaji amli lɛ he fɛo hewɔ lɛ, amɛjieɔ su ni tamɔ Ŋ.B. klɛŋklɛŋ afii oha lɛ mli hefɛoyelɔi lɛ anɔ̃ lɛ pɛpɛɛpɛ kpo.

Ani Nɔ Fɛɛ Nɔ Yɛ Bɔ ni Eyɔɔ lɛ Nɔŋŋ?

Kristofonyo bɔfo Petro wolo ni ji enyɔ ni jɛ mumɔŋ, ni eŋma aaafee afi 64 Ŋ.B. lɛ, bɔ kɔkɔ akɛ: “Naagbee gbii lɛ anɔ lɛ hefɛoyelɔi aaaba kɛ hefɛoyeli, mɛi ni aaanyiɛ yɛ amɛ diɛŋtsɛ amɛkɔnɔi lɛ anaa.”—2 Petro 3:3.

Hefɛoyelɔi bɔɔ mɔdɛŋ akɛ amɛaaha nɔ ni amɛyeɔ he fɛo lɛ afee nɔ ni yɔɔ ŋmɔlɔ. Ekolɛ mɔ ni ŋmɛɛɔ ehe ehaa hefɛoyeli lɛ miigbee pɛsɛmkunya tsɔne mli ejaakɛ bei pii lɛ, hefɛoyelɔ lɛ taoɔ ni mɛi ni boɔ lɛ toi lɛ akpɛlɛ esusumɔi anɔ. Ekolɛ hefɛoyelɔi ni Petro bɔ kɔkɔ yɛ amɛhe lɛ ateŋ mɛi komɛi tamɔ nɛkɛ, ‘ni amɛnyiɛɔ yɛ amɛ diɛŋtsɛ amɛkɔnɔi anaa.’ Beni ehɛleɔ ekanelɔi lɛ ashi lɛ, bɔfo lɛ kɛ wiemɔ su ni akɛmaa sane nɔ mi tsu nii. Ebɔ kɔkɔ akɛ “hefɛoyelɔi aaaba kɛ hefɛoyeli.” (Wɔma efã ko nɔ mi.)

Nakai klɛŋklɛŋ afii oha lɛ mli hefɛoyelɔi lɛ je anɔkwale ni Kristo ‘ba ni eba lɛ he shiwoo’ lɛ ji lɛ he ŋwane, ni amɛkɛɛ: “Nɛgbɛ ebaa lɛ he shiwoo lɛ yɔɔ? ejaakɛ kɛjɛ beyinɔ ni tsɛmɛi lɛ yawɔwɔi nɛɛ, bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ.” (2 Petro 3:4) Etamɔ nakai kɛha amɛ. Shi kɛlɛ, Yesu gba amanehulu ni baaba Yerusalem maŋtiase lɛ nɔ lɛ efɔ̃ shi yɛ afi 33 Ŋ.B. tɔ̃ɔ. “Ogbii miiba,” taakɛ ejaje lɛ, “ni ohenyɛlɔi lɛ aaatsa bu awo ohe, ni amɛaabɔleo kpula ni amɛaasa oyi yɛ he fɛɛ he, ni amɛaaŋɔo amɛtswa shi kɛ obii ni yɔɔ omli lɛ, ni amɛshiŋ tɛ kome yɛ ekroko nɔ yɛ omli.” Kwɛ bɔ ni mɛi ni ye nakai kɔkɔbɔɔ lɛ he fɛo lɛ etɔ̃ kwraa amɛha! Yɛ afi 70 Ŋ.B. lɛ, Roma asraafoi lɛ bawo Yerusalem he ka ni amɛkpata maŋtiase lɛ hiɛ, ni maŋbii lɛ ateŋ mɛi babaoo diɛŋtsɛ laaje amɛwala. Mɛni hewɔ maŋtiase lɛ mli bii lɛ ateŋ mɛi ni fa esako amɛhe kɛhako amanehulu nɛɛ? Ejaakɛ amɛyooo sɛɛ akɛ Nyɔŋmɔ ebakwɛ bɔ ni amɛyɔɔ kɛtsɔ e-Bi, Yesu nɔ.—Luka 19:43, 44.

Bɔfo Petro wie Nyɔŋmɔ Ofe lɛ he ní ekɛbaawo adesai asaji amli wɔsɛɛ lɛ he. “[Yehowa, NW] gbi lɛ baaba tamɔ julɔ baa nyɔɔŋ,” taakɛ Petro bɔ kɔkɔ lɛ. (2 Petro 3:10) Nyɔŋmɔ baajie mɛi ni sheee Lɛ gbeyei lɛ kɛjɛ shikpɔŋ lɛ fɛɛ nɔ yɛ nakai beaŋ, ni ebaabaa mɛi ni abaakojo amɛ akɛ jalɔi lɛ ayi. Taakɛ wolo tɛtrɛɛ nɛɛ etsɔɔ mli yɛ be kɛ bei amli lɛ, Kristo Yesu ‘ba ni eba’ lɛ je shishi yɛ afi 1914. Shi nii ni ebaatsu akɛ Nyɔŋmɔ Oblafo ni ekɛjie efɔŋfeemɔ kwraa lɛ baaba mli wɔsɛɛ. Enɛ hewɔ lɛ, kɔkɔbɔɔ ni bɔfo lɛ kɛha akɛ wɔkwɛ jogbaŋŋ yɛ hefɛoyelɔi ahe lɛ kɔɔ wɔhe bianɛ kɛ hiamɔ babaoo.

Ekolɛ okɛ be babaoo emɛ aahu ni Nyɔŋmɔ kɛ ehe awo adesai asaji amli. Mɛni baaye abua bo ni oya nɔ okɛ tsuishitoo amɛ, ní okafee mɔ ni hefɛoyelɔi anine nyɛɔ shɛɔ onɔ? Ofainɛ kanemɔ kɛtsa nɔ.

[Wiemɔ ni akɔ ni akɛmiitsu nii ni yɔɔ baafa 4]

“Ogbii miiba, ni ohenyɛlɔi lɛ . . . amɛaabɔleo kpula ni amɛaasa oyi yɛ he fɛɛ he, . . . ni amɛshiŋ tɛ kome yɛ ekroko nɔ yɛ omli.” Enɛ jeee kɔkɔbɔɔ ni esa akɛ ayeɔ he fɛo. Roma asraafoi lɛ kpata Yerusalem hiɛ, ni gbɔmɛi babaoo diɛŋtsɛ laaje amɛwala.