Okɛ Tsuishitoo Amɛ

TOOKWƐLƆ ní bolɔɔ “Klaŋ!” yɛ be kɛ bei amli, beni klaŋ ebatutuako lɛ lɛ na akɛ abooo ebolɔmɔ kɛha yelikɛbuamɔ yɛ sɛɛ mli lɛ toi dɔŋŋ. Nakai nɔŋŋ hu ŋmɛnɛ, mɛi pii kuɔ amɛhiɛ amɛfɔ̃ɔ bɛŋkɛmɔ ni Yehowa gbi lɛ ebɛŋkɛ lɛ nɔ ejaakɛ amɛnu kɔkɔbɔi babaoo ni ebafee hegbeyeiwoo wiemɔi ni baaa mli lɛ aahu. Anɔkwale ni eji akɛ mɛi babaoo diɛŋtsɛ nyɛɛɛ ayoo nɔ̃ kɔkɔbɔɔ ni ji anɔkwale koni amɛbo no toi lɛ, haa amɛyagbeeɔ Nyɔŋmɔ henyɛlɔ kpeteŋkpele, ni ji Satan, nakai amale “la bɔfo” lɛ dɛŋ.—2 Korintobii 11:14.

Anyãgbafeemɔ mumɔ baafee oshara kɛha mɛi ni kɛ be saŋŋ esɔmɔ Yehowa lɛ po. Mɛni hewɔ? Susumɔ kɔkɔbɔɔ ni bɔfo Petro kɛha yɛ klɛŋklɛŋ afii oha lɛ mli lɛ he okwɛ.

Susumɔ Nii Ahe Jogbaŋŋ

Petro wolo ni ji enyɔ ni jɛ mumɔŋ lɛ ji kaimɔ kɛha mra be mli Kristofoi lɛ, ni nakai nɔŋŋ eji kɛha wɔ hu. Eŋma akɛ: “Agbɛnɛ, suɔmɔmɛi, woji enyɔ sɔŋŋ miŋmaa nyɛ nɛɛ, ni fɛɛ mli lɛ mikɛ kaimɔ tsĩɛɔ nyɛjwɛŋmɔ krɔŋŋ lɛ hiɛ.” (2 Petro 3:1) Mɛɛ nɔdaamɔ nɔ Petro yɔɔ kɛha amɛhe susumɔ nɛɛ? Petro ma ba ni hefɛoyelɔi eba, ní amɛkɛ amɛ hefɛoyeli lɛ fiteɔ hiamɔ henumɔ ni kɔɔ be ni Nyɔŋmɔ tsuji yɔɔ mli lɛ he lɛ nɔ mi. Amrɔ nɛɛ ji be ni esa akɛ wɔhiɛ ahi wɔhe nɔ ní hefɛoyelɔi akalaka wɔ. Enɛ hewɔ lɛ Petro woɔ ekanelɔi lɛ hewalɛ ní “[amɛkai] gbalɔi krɔŋkrɔŋi lɛ awiemɔi ni amɛwie sa lɛ.” (2 Petro 3:2; Bɔfoi lɛ Asaji 3:22, 23) Mɛni gbalɔi lɛ ewie?

Nyɔŋmɔ tsuji anɔkwafoi lɛ egbala jwɛŋmɔ kɛtee bɔ ni ŋwɛi kojomɔi kɛ efɔŋfeemɔ ba naagbee lɛ nɔ yɛ bei babaoo mli. Petro kaiɔ ekanelɔi lɛ yɛ Noa gbii lɛ amli Nu Afua ni Nyɔŋmɔ kɛtsu nii akɛ gbɛ ni etsɔ nɔ ekɛ ehe wo adesai asaji amli beni shikpɔŋ lɛ nɔ yi obɔ kɛ nɔ fɔŋ feemɔ lɛ he. Nakai Nu Afua ni nɛ eshwie shi lɛ kɛ jeŋ ni yɔɔ yɛ nakai beaŋ lɛ ba naagbee kɛmɔ shi. Shi Nyɔŋmɔ báa Noa kɛ eweku lɛ yi yɛ lɛlɛ ko mli, kɛfata “heloo fɛɛ mli sɔrɔtoi” ni ji wala bɔɔnii anajiaŋdamɔlɔi ahe. Blema saji ni agbaa yɛ je lɛŋ he fɛɛ he lɛ yeɔ bɔ ni Biblia lɛ mli sane nɛɛ ji anɔkwale ha lɛ he odase.a—1 Mose 6:19; 2 Petro 3:5, 6.

Petro tsɛɔ Nyɔŋmɔ he ni ekɛwo adesai asaji amli nɛɛ akɛ anɔkwa sane ní mɛi komɛi ‘jie amɛhiɛ yɛ nɔ.’ No sɛɛ lɛ nakai gbii lɛ amli hefɛoyelɔi lɛ laka mɛi krokomɛi amɛwo anyãgbafeemɔ mli. Shi kɛlɛ, esaaa akɛ wɔhiɛ kpaa nɔ ni Yehowa efee momo lɛ nɔ kɔkɔɔkɔ. Petro kɛɔ wɔ akɛ: “Ŋwɛi kɛ shikpɔŋ ni yɔɔ nɛɛ, lɛ nɔŋŋ ewiemɔ akɛto amɛ aha la, ni akɛ amɛ eto kɛyashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ nɔ.” (2 Petro 3:7) Hɛɛ, Nyɔŋmɔ he ni ekɛbaawo adesai asaji amli lɛ baaba ekoŋŋ.

Jeee Tsɛ Nyɔŋmɔ Sɛɛ Tsɛɔ

Be falɛ ni ji afii akpei abɔ eho momo. Mɛni hewɔ ni Nyɔŋmɔ emɛ aahu be kakadaŋŋ dani ebaatsu adesai anaagbai lɛ ahe nii lɛ? Petro gbalaa jwɛŋmɔ kɛyaa anɔkwa sane kroko hu nɔ shikome ekoŋŋ. Ekɛɛ: “Suɔmɔmɛi, nyɛhiɛ akakpaa sane kome nɛɛ nɔ, akɛ [Yehowa, NW] hiɛ lɛ gbi kome tamɔ afii akpe, ni afii akpe hu tamɔ gbi kome.” (2 Petro 3:8) Esoro bɔ ni Yehowa susuɔ be he ehaa lɛ yɛ wɔnɔ he. Kɛha Nyɔŋmɔ ni yɔɔ kɛmiiya naanɔ lɛ, be sɛɛjɛkɛmɔ kɛjɛ be ni abɔ Adam aahu kɛbashi amrɔ nɛɛ shɛko otsi po. Shi bɔ fɛɛ bɔ ni wɔsusuɔ be he wɔhaa po lɛ, afii akpe fɛɛ afii akpe kɛ gbi fɛɛ gbi ni hoɔ lɛ kɛ wɔ bɛŋkɛɔ Yehowa yiŋtoo he nitsumɔ he.

“Atsirɛɛɛ be yisɛɛ” ji wiemɔ ko ni awieɔ ni tsɔɔ akɛ kɛ aakpa nɔ ko gbɛ sɔŋŋ lɛ, efeɔ tamɔ nɔ ni emlibaa sɛɛ tsɛɔ. Shi kɛlɛ, Petro jieɔ yi akɛ ‘wɔkwɛ gbɛ ni wɔshwe Yehowa gbi lɛ baa lɛ.’ (2 Petro 3:12) Mɛɛ gbɛ nɔ wɔɔtsɔ wɔná jwɛŋmɔ ni baaha wɔhiɛ ahi bɛŋkɛmɔ ni be ni Nyɔŋmɔ kɛ ehe baawo adesai asaji amli lɛ ebɛŋkɛ lɛ nɔ be fɛɛ be?

Nifeemɔi Tsɔɔ Babaoo fe Wiemɔi

Petro gbalaa jwɛŋmɔ kɛyaa nitsumɔi kɛ nifeemɔi anɔ. Ewie “jeŋbai krɔŋkrɔŋi” kɛ agbɛnɛ hu, “Nyɔŋmɔ jamɔi” ahe. (2 Petro 3:11) Mɛni fata enɛɛmɛi ahe?

Nyɔŋmɔ tsulɔ diɛŋtsɛ lɛ feɔ enii yɛ gbɛ ni saa E-hiɛ nɔ. Anɔkwa jalɔ ni tamɔ nɛkɛ lɛ hemɔkɛyeli jeɔ kpo yɛ ejeŋba mli. Enɛ haa esoroɔ lɛ yɛ mɛi ni wieɔ kɛkɛ akɛ amɛheɔ Nyɔŋmɔ kɛ eshiwoi amɛyeɔ lɛ ahe. Ekolɛ okadi akɛ Yehowa Odasefoi amaŋ shiɛmɔ nitsumɔ lɛ haa amɛfeɔ mɛi ni esoro amɛ kwraa. Amɛbaa oshia lɛ koni amɛbagbala ojwɛŋmɔ kɛba Nyɔŋmɔ shiwoi ni aŋmala yɛ Biblia lɛ mli lɛ anɔ. Shi amɛyeɔ amɛ hiɛnɔkamɔi kɛ hemɔkɛyelii hu ahe odase yɛ he fɛɛ he ni amɛkɛ gbɔmɛi kpeɔ yɛ.

Odasefonyo ni kɛ edekã fɛɛ tsuɔ nii ni ekɛjajeɔ ehemɔkɛyeli etsɔɔ mɛi krokomɛi lɛ wajeɔ ehemɔkɛyelii ni ewoɔ mli hewalɛ. Wiemɔ haa sane kaa mɔ jwɛŋmɔ mli jogbaŋŋ, ni yɛ nakai beaŋ nɔŋŋ lɛ ekɛ mligbɛ miishɛɛ kɛ tsui ni nyɔɔ mɔ mli hu baa. Kɛ wɔtswa Nyɔŋmɔ Maŋtsɛyeli lɛ he sanekpakpa lɛ he adafi lɛ, wɔsaa Yehowa hiɛ hu. Wɔle akɛ ‘ejeee mɔ ni yeɔ sane ni ejaaa ni ehiɛ aaakpa wɔnitsumɔ lɛ kɛ suɔmɔ ni wɔjie lɛ kpo yɛ egbɛi lɛ he lɛ nɔ,’ taakɛ Petro naanyo bɔfo Paulo jaje lɛ.—Hebribii 6:10; Romabii 10:9, 10.

Mɛni jɛɔ wɔhe fɛɛ ni wɔkɛwoɔ Maŋtsɛyeli lɛ he sanekpakpa lɛ jajemɔ mli yɛ nibii agbɛjianɔtoo fɔŋ nɛɛ naagbee gbii nɛɛ amli lɛ mli baa? Gbɔmɛi akpei ohai abɔ ni yɔɔ jalɛ tsuii lɛ miikase bɔ ni amɛaafee ni wekukpaa ni bɛŋkɛ kpaakpa aba amɛkɛ Yehowa teŋ, ní amɛná emlihilɛ ni wɔsaaa lɛ he sɛɛ, ní amɛná anɔkwa miishɛɛ yɛ naanɔ wala yɛ paradeiso shikpɔŋ nɔ lɛ he gbɛkpamɔ mli.

Nilee ni Aaaná Kɛtsɔ Hiɛ

Eyɛ mli akɛ wɔle kɛjɛ Biblia lɛ mli akɛ Yehowa Nyɔŋmɔ kɛ ehe baawo adesai asaji amli yɛ lɛ diɛŋtsɛ ebe mli moŋ, shi ehe miihia ni wɔbo kɔkɔbɔɔ ni Petro tee nɔ ekɛha lɛ toi. “Akɛni nyɛle momo sá hewɔ lɛ nyɛsaraa, koni akɛ gbɔmɛi fɔji alakamɔ sane lɛ akashãtã nyɛ hu, ni nyɛjɛ nyɛ diɛŋtsɛ nyɛshifimɔ lɛ mli nyɛgbee shi.”—2 Petro 3:17.

Eka shi faŋŋ akɛ Yehowa le kɛtsɔ hiɛ akɛ bɔ ni abaajɛ ŋwɛi akɛ he awo adesai asaji amli lɛ tamɔ nɔ ni esɛɛ miitsɛ tsɔ̃ lɛ baaha mɛi ni bɛ hemɔkɛyeli ni mli wa lɛ anijiaŋ aje wui. Ele hu akɛ hewalɛ ni gbɔmɛi ni sheee Nyɔŋmɔ gbeyei lɛ náa yɛ mɛi anɔ lɛ baanyɛ afite enɔkwa tsuji, aloo kɛ hoo lɛ, ebaagbɔjɔ hemɔkɛyeli ni amɛyɔɔ akɛ Nyɔŋmɔ gbɛi lɛ hetsemɔ ebɛŋkɛ kpaakpa lɛ kwraa. Kwɛ dɔlɛ sane ni eeeji akɛ aaagbee shi kɛjɛ shifimɔ mli yɛ nɛkɛ naagbee gbii nɛɛ amli!

Jeee be ni wɔyiŋ kɛaafee wɔ kɔshikɔshi loo enyɔnyɔɔnyɔ yɛ nɔ ni Yehowa baafee lɛ he nɛ. (Hebribii 12:1) Shi moŋ, amrɔ nɛɛ ji be ni esa akɛ wɔha hiɛsɔɔ ni wɔyɔɔ kɛha nɔ ni Yehowa tsuishitoo lɛ kɛba—yiwalaheremɔ he gbɛkpamɔ kɛha akpekpei abɔ ni ebatsɔ majimaji ateŋ asafo babaoo lɛ fã, ní amɛhiɛ kã nɔ akɛ amɛyi baaná wala kɛfo amanehulu kpeteŋkpele lɛ ada. (Kpojiemɔ 7:9, 14) Petro woɔ ŋaa akɛ: “Nyɛshwerea yɛ wɔ-Nuntsɔ kɛ yiwalaherelɔ Yesu Kristo duromɔ kɛ nilee lɛ mli. Lɛ nɔŋŋ aŋɔ anunyam aha agbɛnɛ kɛ daa!”—2 Petro 3:18.

“Nyɛtoa Nyɛhe yɛ Nyɔŋmɔ Suɔmɔ lɛ Mli”

Wɔ dekã fɛɛ ni wɔkɛwoɔ Maŋtsɛyeli shiɛmɔ nitsumɔ lɛ mli kɛ Kristofoi akpeei ni wɔyaa daa kɛha jamɔ kɛ Nyɔŋmɔ Wiemɔ lɛ kasemɔ lɛ kɛ hebuu haa wɔ. Enɛ hewɔ lɛ, wɔnaŋ be ni wɔkɛaasusu shihilɛi ni yaa nɔ efiteɔ yɛ ŋmɛnɛ gbɛjianɔtoo fɔŋ nɛɛ mli lɛ he fe nine. Esaaa akɛ gbeyeishemɔi kɛ yeyeeyefeemɔi náa gbɛhe titri ko yɛ anɔkwa Kristofoi ashihilɛ mli. (1 Korintobii 15:58) Babaoo ni wɔkɛ wɔ dekã fɛɛ sɔmɔɔ Yehowa lɛ, babaoo ni be hoɔ oya yɛ wɔhiɛ ji no.

Yuda, ni kɛ Petro hi shi yɛ be kome mli ni eji Yesu nyɛ binuu hu lɛ woɔ wɔ ŋaa akɛ: “Suɔmɔmɛi, nyɛ lɛ nyɛhaa nyɛnane amɔa shi yɛ nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ Mumɔ krɔŋkrɔŋ lɛ mli, ni nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuntsɔ Yesu Kristo mɔbɔnalɛ lɛ gbɛ, koni nyɛná naanɔ wala.” (Yuda 20, 21) Kadimɔ bɔ ni jwɛŋmɔ kpakpa ni aaaná, ní hiɛmiamɔ yɛ sɔlemɔ mli lɛ woɔ he hewalɛ lɛ he hiaa ha lɛ. (1 Tesalonikabii 5:17) Kɛkɛ ni Yuda kɛfata he akɛ: “Nyɛfea sɔrɔto yɛ mli: mɛi komɛi lɛ, nyɛnaa amɛ mɔbɔ; shi mɛi komɛi hu, nyɛkɛ hegbeyeiwoo aherea amɛ yiwala, ni nyɛshaa amɛ kɛjɛa la lɛ mli, ni nyɛhia atade ni akɛ heloo ewo he muji lɛ tete.” (Yuda 22, 23) Kwɛ bɔ ni ehe hiaa waa akɛ wɔɔwowoo wɔhe hewalɛ yɛ nɛkɛ bei ni mli wawai nɛɛ amli! Ni kwɛ bɔ ni ehe hiaa hu ni wɔkagbee kaa mli, koni wɔkɛ nɛkɛ “walaheremɔ gbi” ni akpã mli nɛɛ akatsu nii akɛ naajiemɔ kɛha ‘nyenyeŋtswibɔɔ’ ní amrɔ nɛɛ egbɛ eshwã ŋmɛnɛ jeŋ ni ekpɔtɔ yɛ jeŋba mli nɛɛ mli lɛ.—Yuda 4; 2 Korintobii 6:1, 2.

Kɛ obo Petro, Paulo, kɛ Yuda ŋaawoo ni jɛ suɔmɔ mli lɛ toi ní okɛ odekã fɛɛ tsu nii yɛ Nyɔŋmɔ sɔɔmɔ mli kɛ ekãa lɛ, obaanyɛ oto otsui shi ni omɛ be ni Yehowa kɛ ehe baawo adesai asaji amli lɛ. Shi ani obaafee nakai?

Kaashashao shi akɛ ooobɛŋkɛ Odasefoi ni yɔɔ he ni oyɔɔ lɛ kɛha yelikɛbuamɔ ní baawo hemɔkɛyeli ni oyɔɔ yɛ Bɔlɔ lɛ naanɔ wala he shiwoo lɛ mli lɛ mli hewalɛ. Kasemɔ nɔ ni ataoɔ koni otsɔ̃ mɔ ni sa akɛ onáa nɛkɛ jeŋ muu fɛɛ odaseyeli nitsumɔ ni atsuŋ eko dɔŋŋ wɔsɛɛ, ní baaba naagbee yɛ amanehulu kpeteŋkpele ni ebɛŋkɛ lɛ mli nɛɛ mli gbɛfaŋnɔ. (Marko 13:10) Ni no lɛ oooná gbɛkpamɔ akɛ ooohi shi yɛ jalɛ jeŋ hee ni Yehowa wo shi yɛ he lɛ mli. (2 Petro 3:13) Bó ekaimɔi lɛ atoi! Okɛ tsuishitoo amɛ! Okɛ odekã fɛɛ atsu nii!

[Shishigbɛ niŋmai]

[Mfoniri ni yɔɔ baafa 7]

Kasemɔ Nyɔŋmɔ Paradeiso he shiwoi lɛ ahe nii bianɛ

[He ni Mfoniri ni yɔɔ baafa 5 lɛ Jɛ]

Klaŋ: Animals/Jim Harter/Dover Publications, Inc.; gbekɛ nuu tookwɛlɔ: Children: A Pictorial Archive from Nineteenth-Century Sources/Grafton/Dover Publications, Inc.

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)