Nyɛhaa Wɔmɔa Wɔhemɔkɛyeli ni Jara Wa lɛ Mli Kpɛŋŋ!
“[Kɛyaha] mɛi ni nine eshɛ hemɔkɛyeli ni jara wa tamɔ wɔnɔ lɛ nɔŋŋ nɔ.”—2 PETRO 1:1.
1. Mɛni Yesu wie ni ekɛbɔ ebɔfoi lɛ kɔkɔ, ni kɛlɛ mɛni Petro shwã ekɛɛ?
GBI gbɛkɛ dani Yesu baagbo lɛ, ewie akɛ ebɔfoi lɛ fɛɛ baakwa lɛ. Amɛteŋ mɔ kome, ni ji Petro, shwã akɛ: “Kɛji mɛi lɛ fɛɛ nane aaatɔ̃tɔ̃ yɛ ohe lɛ, mi lɛ minane etɔ̃tɔ̃ŋ gbi ko gbi ko.” (Mateo 26:33; wɔma efã ko nɔ mi.) Shi Yesu le akɛ enyɛŋ. No hewɔ ni ekɛɛ Petro yɛ nakai be lɛ mli nɔŋŋ akɛ: “Mi lɛ mikpa fai mihao, koni ohemɔkɛyeli akatã; ni bo hu, beni oookpale lɛ, wo onyɛmimɛi lɛ hewalɛ.”—Luka 22:32.
2. Yɛ Petro he ni ekɛfɔ̃ ehe nɔ fe nine lɛ fɛɛ sɛɛ lɛ, mɛɛ enifeemɔi komɛi ha ana akɛ ehemɔkɛyeli lɛ egbɔjɔ?
2 Petro, ni kɛ ehe fɔ̃ɔ ehemɔkɛyeli nɔ fe nine lɛ, kwa Yesu nakai gbɛkɛ lɛ nɔŋŋ. Ekpoo shii etɛ sɔŋŋ akɛ eleee Kristo po! (Mateo 26:69-75) Beni ‘ekpale’ lɛ, eka shi faŋŋ akɛ wiemɔi ni e-Nuntsɔ lɛ wie akɛ, “wo onyɛmimɛi lɛ hewalɛ” lɛ, saa ejije faŋŋ yɛ etoii amli ekoŋŋ. Nakai ŋaawoo lɛ sa Petro shihilɛ be ni eshwɛ lɛ he waa, taakɛ ewoji enyɔ ni eŋmala ni abaa yi yɛ Biblia lɛ mli lɛ yeɔ he odase lɛ.
Nɔ Hewɔ ni Petro Ŋmala Ewoji Lɛ
3. Mɛni hewɔ Petro ŋma eklɛŋklɛŋ wolo lɛ?
3 Aaafee Yesu gbele sɛɛ afii 30 lɛ, Petro ŋma eklɛŋklɛŋ wolo lɛ, ni ekɛyaha enyɛmimɛi ni yɔɔ Ponto, Galata, Kapadokia, Asia, kɛ Bitinia, ni ji hei ni feɔ amrɔ nɛɛ Turkey kooyigbɛ kɛ anaigbɛ lɛ. (1 Petro 1:1) Ŋwanejee ko bɛ he akɛ, Yudafoi lɛ, ni amɛteŋ mɛi komɛi batsɔmɔ Kristofoi yɛ Pentekoste afi 33 Ŋ.B. lɛ, fata mɛi ni Petro ŋma wolo lɛ eyaha lɛ ahe. (Bɔfoi lɛ Asaji 2:1, 7-9) Amɛteŋ mɛi pii ji Jeŋmajiaŋbii ni kɛ kaai ni mli wa waa miikpe yɛ shitee-kɛ-wolɔi adɛŋ. (1 Petro 1:6, 7; 2:12, 19, 20; 3:13-17; 4:12-14) No hewɔ lɛ Petro ŋma wolo eyaha nyɛmimɛi nɛɛ koni ekɛwo amɛ hewalɛ. Oti ni mã ehiɛ ji ni eye ebua amɛ ni amɛnine ashɛ ‘amɛhemɔkɛyeli naagbee ni ji amɛsusumai ayiwalaheremɔ lɛ nɔ.’ Enɛ hewɔ lɛ, ewo amɛ hewalɛ, yɛ ŋaawoo ni ekɛha amɛ, beni ekɛ amɛ yeɔ shɛɛ lɛ mli akɛ: “Nyɛdamɔa shi shiŋŋ yɛ hemɔkɛyeli lɛ mli nyɛtsĩa [Abonsam] gbɛ.”—1 Petro 1:9; 5:8-10.
4. Mɛni hewɔ Petro ŋma ewolo ni ji enyɔ lɛ?
4 Sɛɛ mli lɛ, Petro ŋma wolo ni ji enyɔ eyaha Kristofoi nɛɛ. (2 Petro 3:1) Mɛni hewɔ? Ejaakɛ hegbeyeiwoo nɔ kpele ko yɛ. Aŋkroaŋkroi komɛi ni bɛ jeŋba kpakpa lɛ baabɔ mɔdɛŋ akɛ amɛaaha amɛsubaŋ ni buleɔ mɔ lɛ agbɛ ashwã heyelilɔi lɛ ateŋ ni amɛbaalaka mɛi komɛi! (2 Petro 2:1-3) Kɛfata he lɛ, Petro bɔ kɔkɔ yɛ hefɛoyelɔi ahe. Eŋma yɛ eklɛŋklɛŋ wolo lɛ mli akɛ “nibii fɛɛ anaagbee lɛ eshɛ etã,” ni agbɛnɛ, eka shi faŋŋ akɛ mɛi komɛi miiye susumɔ ni tamɔ nɛkɛ he fɛo. (1 Petro 4:7; 2 Petro 3:3, 4) Nyɛhaa wɔpɛia Petro wolo ni ji enyɔ lɛ mli ni wɔkwɛ bɔ ni ewo nyɛmimɛi lɛ hewalɛ eha koni amɛdamɔ shi shiŋŋ yɛ hemɔkɛyeli lɛ mli. Wɔbaasusu 2 Petro yitso 1 lɛ he, yɛ klɛŋklɛŋ nikasemɔ nɛɛ mli.
Yiŋtoo ni Yɔɔ Yitso 1 lɛ Sɛɛ
5. Petro saa ekanelɔi lɛ kɛha naagbai ahesusumɔ yɛ mɛɛ gbɛ nɔ?
5 Petro tsuuu naagbai ni hiɛdɔɔ yɔɔ mli lɛ ahe nii amrɔ nɔŋŋ. Shi moŋ, esaa gbɛ kɛha naagbai nɛɛ ahesusumɔ kɛtsɔ hiɛsɔɔ babaoo ni eha ekanelɔi lɛ ná kɛha nɔ ni amɛnine shɛ nɔ beni amɛbatsɔmɔ Kristofoi lɛ nɔ. Ekai amɛ yɛ Nyɔŋmɔ shiwoi ni yɔɔ naakpɛɛ kɛ bɔ ni anyɛɔ akɛ he fɔ̃ɔ Biblia gbalɛi anɔ lɛ he. Efee enɛ kɛtsɔ tsakemɔ lɛ, ni ji Kristo ni yɔɔ Maŋtsɛyeli hewalɛ mli lɛ he ninaa ko ni lɛ diɛŋtsɛ ená, ni egba etsɔɔ lɛ nɔ.—Mateo 17:1-8; 2 Petro 1:3, 4, 11, 16-21.
6, 7. (a) Mɛni wɔbaanyɛ wɔkase kɛjɛ Petro wolo lɛ hiɛkpamɔ wiemɔ lɛ mli? (b) Kɛ́ wɔkɛ ŋaawoo miiha lɛ, mɛni ekolɛ eeeye ebua akɛ wɔɔkpɛlɛ nɔ yɛ wɔ diɛŋtsɛ wɔ gbɛfaŋ?
6 Ani wɔbaanyɛ wɔkase nɔ ko kɛjɛ Petro hiɛkpamɔ wiemɔ lɛ mli? Ani ŋaawoo efeee nɔ ni akpɛlɛɔ nɔ babaoo kɛji akɛ wɔkɛ toibolɔi lɛ wie Maŋtsɛyeli hiɛnɔkamɔ ni yɔɔ nyam ni wɔ fɛɛ wɔbuɔ akɛ ejara wa kɛha wɔ lɛ he nibii komɛi ahe klɛŋklɛŋ? Ni wɔ diɛŋtsɛ wɔ niiashikpamɔ kɛ nitsumɔ hu? Ekolɛ, yɛ Yesu gbele sɛɛ lɛ, Petro gba nakai ninaa ni kɔɔ Kristo ni yɔɔ Maŋtsɛyeli hewalɛ mli lɛ he lɛ etsɔɔ yɛ bei babaoo mli.—Mateo 17:9.
7 Kaimɔ hu akɛ, eeenyɛ eba akɛ, ekolɛ beni Petro ŋma ewolo ni ji enyɔ lɛ, no mli lɛ aja Mateo Sanekpakpa lɛ kɛ bɔfo Paulo wolo ni eŋma eyaha Galatabii lɛ yɛ hei babaoo momo. No hewɔ lɛ, ekolɛ ale Petro gbɔjɔmɔi akɛ adesa, kɛ anɔkwayeli ni ejie lɛ kpo lɛ he saji jogbaŋŋ yɛ eyinɔbii lɛ ateŋ. (Mateo 16:21-23; Galatabii 2:11-14) Shi kɛlɛ, enɛ heee wiemɔ mli heyeli ni eyɔɔ lɛ kɛjɛɛɛ edɛŋ. Yɛ anɔkwale mli lɛ, ekolɛ eha mɛi ni hiɛ yɔɔ amɛ diɛŋtsɛ amɛgbɔjɔmɔi anɔ lɛ ná ewolo lɛ he miishɛɛ babaoo. No hewɔ lɛ, kɛ́ aaye aabua mɛi ni yɔɔ naagbai lɛ, ani efeŋ nɔ ni mɔɔ shi jogbaŋŋ akɛ wɔɔkpɛlɛ nɔ akɛ wɔ hu wɔtɔ̃ɔ?—Romabii 3:23; Galatabii 6:1.
Ŋamɔ ni Woɔ Mɔ Hewalɛ
8. Mɛɛ shishinumɔ naa ekolɛ Petro kɛ wiemɔ “hemɔkɛyeli” lɛ tsu nii yɛ?
8 Agbɛnɛ susumɔ Petro ŋamɔ lɛ he okwɛ. Ewie hemɔkɛyeli he sane lɛ he amrɔ nɔŋŋ, ni ewie mɛi ni kaneɔ ewolo lɛ ahe akɛ “mɛi ni nine eshɛ hemɔkɛyeli ni jara wa tamɔ wɔnɔ lɛ nɔŋŋ nɔ.” (2 Petro 1:1) Ekolɛ wiemɔ “hemɔkɛyeli” ni yɔɔ biɛ lɛ miitsɔɔ “yiŋtsɔmɔ ni yɔɔ shiŋŋ,” ni ekɔɔ Kristofoi ahemɔkɛyelii loo tsɔɔmɔi akuu muu lɛ fɛɛ, ní bei komɛi lɛ atsɛɔ lɛ yɛ Ŋmalɛi lɛ amli akɛ “anɔkwale lɛ” he. (Galatabii 5:7; 2 Petro 2:2; 2 Yohane 1) Akɛ wiemɔ “hemɔkɛyeli” lɛ tsuɔ nii yɛ bei babaoo mli yɛ shishinumɔ nɛɛ naa, moŋ fe shishinumɔ ni tsɔɔ hiɛnɔkamɔ loo hekɛnɔfɔɔ ni anáa yɛ mɔ ko loo nɔ ko mli.—Bɔfoi lɛ Asaji 6:7; 2 Korintobii 13:5; Galatabii 6:10; Efesobii 4:5; Yuda 3.
9. Mɛni hewɔ Jeŋmajiaŋbii lɛ titri ná Petro ŋamɔ lɛ he miishɛɛ lɛ?
9 Petro ŋamɔ lɛ baafee nɔ ni Jeŋmajiaŋbii ni kane ewolo lɛ titri ná he miishɛɛ waa. Yudafoi kɛ Jeŋmajiaŋbii efeee nɔ ko kwraa, ni amɛgbeɔ amɛhe guɔ po, ni Jeŋmajiaŋbii lɛ ahe jwɛŋmɔ fɔŋ ni amɛná lɛ tee nɔ waa yɛ Yudafoi ni ebatsɔmɔ Kristofoi lɛ ateŋ. (Luka 10:29-37; Yohane 4:9; Bɔfoi lɛ Asaji 10:28) Ni kɛlɛ, Petro, ní eji Yudanyo yɛ fɔmɔ naa kɛ Yesu Kristo bɔfo lɛ, wie akɛ mɛi ni kaneɔ ewolo lɛ—Yudafoi kɛ Jeŋmajiaŋbii lɛ—yɛ hemɔkɛyeli kome, ni amɛkɛ lɛ fɛɛ náa hegbɛ ni ŋmɛɔ pɛpɛɛpɛ mli ŋɔɔmɔ.
10. Mɛni wɔbaanyɛ wɔkase kɛjɛ Petro ŋamɔ lɛ mli?
10 Susumɔ nibii kpakpai ni Petro ŋamɔ lɛ tsɔɔ wɔ ŋmɛnɛ lɛ ahe okwɛ. Nyɔŋmɔ jeee mɛi ahiɛaŋkwɛlɔ; edurooo hewolonɔ su loo maŋ kome mli bii fe maŋ kroko mli bii. (Bɔfoi lɛ Asaji 10:34, 35; 11:1, 17; 15:3-9) Taakɛ Yesu diɛŋtsɛ tsɔɔ lɛ, nyɛmimɛi ji Kristofoi fɛɛ, ni esaaa ni wɔteŋ mɔ ko nuɔ he akɛ enɔ kwɔ. Kɛfata he lɛ, Petro ŋamɔ lɛ mãa nɔ mi akɛ jeŋ muu fɛɛ nyɛmifeemɔ, ni hiɛ hemɔkɛyeli “ni jara wa” tamɔ nɔ ni Petro kɛ enanemɛi bɔfoi lɛ ná lɛ ji wɔ lɛɛlɛŋ.—Mateo 23:8; 1 Petro 5:9.
Nilee kɛ Nyɔŋmɔ Shiwoi
11. Yɛ ŋamɔ lɛ sɛɛ lɛ, mɛɛ nibii ni he hiaa Petro mã nɔ mi?
11 Yɛ eŋamɔ lɛ sɛɛ lɛ, Petro ŋma akɛ: “Duromɔ kɛ hejɔlɛ afá aha nyɛ.” Mɛɛ gbɛ nɔ abaatsɔ ni aha duromɔ kɛ hejɔlɛ afá aha wɔ? Petro hã hetoo akɛ: “Yɛ Nyɔŋmɔ kɛ wɔ Nuntsɔ Yesu he nilee lɛ mli!” Kɛkɛ ni ekɛɛ akɛ: “Enyɔŋmɔ hewalɛ lɛ eŋɔ nii fiaa ni hi hã wala kɛ Nyɔŋmɔjamɔ lɛ eke wɔ.” Shi te wɔfeɔ tɛŋŋ ni wɔnine shɛɔ nɛkɛ nibii ni he hiaa nɛɛ anɔ? “Yɛ mɔ ni tsɔ̃ lɛ diɛŋtsɛ enunyam kɛ enikpakpai anifeemɔ nɔ etsɛ wɔ lɛ he nilee mli.” Enɛ hewɔ lɛ, Petro mã nɔ mi shii enyɔ sɔŋŋ akɛ Nyɔŋmɔ kɛ e-Bi lɛ he anɔkwa nilee he miihia.—2 Petro 1:2, 3; Yohane 17:3.
12. (a) Mɛni hewɔ Petro mãa bɔ ni anɔkwa nilee he hiaa lɛ nɔ mi lɛ? (b) Kɛ́ wɔɔná Nyɔŋmɔ shiwoi amli ŋɔɔmɔ lɛ, mɛni esa akɛ wɔfee klɛŋklɛŋ?
12 “Amale tsɔɔlɔi” ni Petro bɔ kɔkɔ yɛ amɛhe yɛ yitso 2 lɛ kɛ “kutumpɔo wiemɔi” tsuɔ nii ni amɛkɛlakaa Kristofoi. Amɛtsɔɔ nɛkɛ gbɛ nɔ amɛbɔɔ mɔdɛŋ akɛ amɛaalaka amɛ kɛya jeŋba shara ni ajie amɛ kɛjɛ mli lɛ mli ekoŋŋ. Nɔ ni jɛɔ mli baa mɔ fɛɛ mɔ ni ahere eyiwala kɛtsɔ “Nuntsɔ kɛ yiwalaherelɔ Yesu Kristo he nilee” lɛ nɔ, ni sɛɛ mli lɛ eŋmɛɛɔ ehe ehaa nɛkɛ lakamɔ nɛɛ nɔ lɛ yɛ oshara. (2 Petro 2:1-3, 20) Eka shi faŋŋ akɛ akɛni eekpa gbɛ akɛ ebaawie naagba nɛɛ he yɛ sɛɛ mli hewɔ lɛ, Petro mã gbɛfaŋnɔ ni anɔkwa nilee yɔɔ yɛ shidaamɔ ni he tse mlihiɛmɔ mli yɛ Nyɔŋmɔ hiɛ lɛ nɔ mi, yɛ ewolo lɛ shishijee nɔŋŋ. Petro wie akɛ Nyɔŋmɔ “[eŋɔ] shiwoi kpeleikpelei ni jara wa lɛ [eke] wɔ, koni nyɛtsɔ nɛkɛ nii nɛɛ anɔ nyɛná Nyɔŋmɔ fɔmɔsu lɛ eko.” Ni kɛlɛ, kɛ́ wɔɔna nɛkɛ shiwoi nɛɛ, ni ji wɔhemɔkɛyeli lɛ fã lɛ mli ŋɔɔmɔ lɛ, Petro kɛɔ akɛ, esa akɛ “[wɔjo] je nɛŋ fitemɔ ni yɔɔ akɔnɔ mli lɛ naa foi” klɛŋklɛŋ.—2 Petro 1:4.
13. Mɛni Kristofoi ni afɔ amɛ mu lɛ kɛ “tooi krokomɛi” lɛ fɛɛ etswa amɛfai shi akɛ amɛbaahiɛ mli kpɛŋŋ?
13 Te osusuɔ Nyɔŋmɔ shiwoi ahe ohaa tɛŋŋ? Tamɔ bɔ ni Kristofoi ni afɔ amɛ mu lɛ ateŋ shwɛɛnii lɛ susuɔ he lɛ nɔŋŋ? Yɛ 1991 lɛ, Frederick Franz, ni ji Buu Mɔɔ Biblia kɛ Woji Bibii Asafo lɛ sɛinɔtalɔ yɛ nakai beaŋ, ní kɛ nɔ ni fe afii 75 etsu be-fɛɛ sɔɔmɔ nitsumɔ lɛ, mu bɔ ni mɛi ni hiɛ kã nɔ akɛ amɛkɛ Kristo baaye maŋtsɛ lɛ nuɔ he amɛhaa lɛ naa akɛ: “Wɔhiɛ mli kpɛŋŋ aahu kɛbashi nɛkɛ ŋmɛlɛtswaa nɛɛ nɔ, ni wɔbaaya nɔ wɔhiɛ mli kpɛŋŋ aahu kɛyashi be mli ni Nyɔŋmɔ baamã nɔ mi lɛɛlɛŋ akɛ eye ‘eshiwoi kpeleikpelei ni jara wa’ lɛ amli anɔkwa lɛɛlɛŋ.” Nyɛminuu Franz tee nɔ ekɛ ehe fɔ̃ Nyɔŋmɔ shiwoo ni ji gbohiiashitee kɛmiiya ŋwɛi lɛ nɔ, ni ehiɛ hemɔkɛyeli lɛ mli kpɛŋŋ aahu kɛyashi egbele mli beni eye afii 99. (1 Korintobii 15:42-44; Filipibii 3:13, 14; 2 Timoteo 2:10-12) Nakai nɔŋŋ hu akpekpei abɔ hiɛ hemɔkɛyeli lɛ mli kpɛŋŋ, ni amɛkɛ amɛjwɛŋmɔ fɛɛ ema Nyɔŋmɔ shiwoo ni kɔɔ shikpɔŋ nɔ paradeiso ni gbɔmɛi baahi shi yɛ mli kɛya naanɔ yɛ miishɛɛ mli lɛ he lɛ nɔ. Ani oji mɛnɛɛmɛi ateŋ mɔ kome?—Luka 23:43; 2 Petro 3:13; Kpojiemɔ 21:3, 4.
Nyɔŋmɔ Shiwoi lɛ Anɔheremɔ
14. Mɛni hewɔ Petro tsĩ jeŋba kpakpa tã akɛ klɛŋklɛŋ su ni esa akɛ akɛfata hemɔkɛyeli he lɛ?
14 Ani wɔdaa Nyɔŋmɔ shi yɛ nɔ ni ewo shi yɛ he lɛ he? Kɛ́ nakai lɛ, Petro kɛɔ akɛ esa akɛ wɔha ana. “Belɛ enɛ nɔŋŋ hewɔ hu lɛ” (akɛni Nyɔŋmɔ kɛ shiwoi ni jara wa waa eha wɔ hewɔ lɛ), esa akɛ wɔbɔ mɔdɛŋ diɛŋtsɛ ni wɔtsu he nii. Wɔmii nyɛŋ ashɛ wɔhe yɛ hemɔkɛyeli lɛ mli ni wɔyɔɔ loo Biblia mli anɔkwale ni wɔle lɛ kɛkɛ he. No kɛkɛ faaa! Ekolɛ yɛ Petro gbii lɛ amli lɛ, mɛi ni yɔɔ asafoi lɛ amli lɛ ateŋ mɛi komɛi wie hemɔkɛyeli he babaoo, shi amɛkɛ amɛhe wo jeŋba shara mli. Esa akɛ amɛsu kɛ baŋ ajie jeŋba kpakpa kpo, no hewɔ lɛ Petro wo hewalɛ akɛ: “Nyɛkɛ jeŋba kpakpa afataa nyɛhemɔkɛyeli lɛ he.”—2 Petro 1:5, NW; Yakobo 2:14-17.
15. (a) Mɛni hewɔ atsĩ nilee tã kɛnyiɛ jeŋba kpakpa sɛɛ akɛ su ni esa akɛ akɛfata hemɔkɛyeli he lɛ? (b) Mɛɛ sui krokomɛi baawula wɔ ni wɔhiɛ hemɔkɛyeli lɛ mli kpɛŋŋ?
15 Beni etsĩ jeŋba kpakpa tã sɛɛ lɛ, Petro to sui ekpaa krokomɛi ni esa akɛ wɔkɛfata wɔhemɔkɛyeli he lɛ anaa. Enɛɛmɛi ateŋ eko fɛɛ eko he miihia kɛji ‘wɔɔdamɔ shi shiŋŋ yɛ hemɔkɛyeli lɛ mli.’ (1 Korintobii 16:13) Akɛni hemɔkɛyeli kwalɔi ‘miitsɔmɔ Ŋmalɛi lɛ’ ni amɛmiigbɛ “shishiumɔ tsɔɔmɔi” amɛmiishwã hewɔ lɛ, Petro tee nɔ ni etsĩ nilee tã yɛ no sɛɛ akɛ ehe miihia, ni ekɛɛ: “Nyɛkɛ nilee afataa nyɛ jeŋba kpakpa lɛ he.” Kɛkɛ ni etsa nɔ akɛ: “Nyɛkɛ henɔyeli afataa nyɛ nilee lɛ he, ni nyɛkɛ tsuishiŋmɛɛ afataa nyɛ henɔyeli lɛ he, ni nyɛkɛ Nyɔŋmɔjamɔ hetuu-kɛhamɔ afataa nyɛ tsuishiŋmɛɛ lɛ he, ni Nyɔŋmɔjamɔ hetuu-kɛhamɔ mli hu lɛ nyɛmimɛi ahedɔɔ, ni nyɛmimɛi ahedɔɔ mli lɛ suɔmɔ.”—2 Petro 1:5-7; 2:12, 13; 3:16, NW.
16. Kɛ́ akɛ sui ni Petro tsĩ tã lɛ fata hemɔkɛyeli he lɛ, mɛni baaba, shi mɛni baaba kɛji akɛfataaa he?
16 Mɛni baaba kɛji wɔkɛ nɛkɛ nibii kpawo nɛɛ fata wɔhemɔkɛyeli lɛ he? Petro haa hetoo akɛ: “Kɛji nɛkɛ nii nɛɛ yɛ nyɛmli ni efá lɛ, ehaŋ nyɛfee hejɔ̃lɔi aloo mɛi ni wooo yibii yɛ wɔ-Nuntsɔ Yesu Kristo he anɔkwa nilee lɛ gbɛfaŋ.” (2 Petro 1:8, NW) Nɔ ni tamɔɔɔ nakai lɛ, Petro kɛɔ akɛ: “Mɔ ni bɛ nɛkɛ nii nɛɛ lɛ, lɛ lɛ shwilafo ji lɛ, ni enaaa shɔŋŋ nii, akɛni ehiɛ ekpa ehe eshai ni efee sá lɛ ahetsuumɔ nɔ lɛ.” (2 Petro 1:9) Kadimɔ akɛ Petro tsake kɛjɛ “bo” kɛ “wɔ” ni ekɛtsuɔ nii lɛ nɔ kɛtee “mɔ ni,” “lɛ,” kɛ “e” nɔ. Eyɛ mli akɛ eji dɔlɛ sane akɛ mɛi komɛi eshwila, amɛhiɛ ekpa amɛhe nɔ, ni amɛhe tseee moŋ, shi Petro kɛ mlihilɛ etsɔɔɔ akɛ nikanelɔ lɛ ji mɛnɛɛmɛi ateŋ mɔ kome.—2 Petro 2:2.
Enyɛmimɛi lɛ Ahewalɛwoo
17. Mɛni ekolɛ etsirɛ Petro ni ejɛ mlihilɛ mli ewo ŋaa akɛ afee “enɛ lɛ”?
17 Akɛni ekolɛ eyɔse akɛ abaanyɛ alaka mɛi heei lɛ titri yɛ gbɛ ni waaa nɔ hewɔ lɛ, Petro kɛ musuŋtsɔlɛ wo amɛ hewalɛ akɛ: “Anyɛmimɛi, nyɛbɔa mɔdɛŋ ni nyɛwajea nyɛ tsɛmɔ kɛ halamɔ lɛ; ejaakɛ, kɛ́ nyɛfee enɛ lɛ, nyɛtɛrɛŋ gbi ko gbi ko.” (2 Petro 1:10; 2:18) Kristofoi ni afɔ amɛ mu, ni kɛ nibii kpawo nɛɛ fataa amɛhemɔkɛyeli lɛ he lɛ baaná nyɔmɔwoo ni yɔɔ nyam mli ŋɔɔmɔ, taakɛ Petro kɛɛ lɛ: “Aaaŋmɛ nyɛ wɔ-Nuntsɔ kɛ yiwalaherelɔ Yesu Kristo naanɔ maŋtsɛyeli lɛ mli gbɛ aahu.” (2 Petro 1:11) “Tooi krokomɛi” lɛ anine baashɛ naanɔ gboshinii anɔ yɛ Nyɔŋmɔ Maŋtsɛyeli lɛ nɔyelihe ni yɔɔ shikpɔŋ lɛ nɔ lɛ nɔ.—Yohane 10:16; Mateo 25:33, 34.
18. Mɛni hewɔ Petro sumɔɔ ni ‘ekai’ enyɛmimɛi lɛ “daa nɛɛ” lɛ?
18 Petro kɛ anɔkwayeli miitao nyɔmɔwoo ni yɔɔ nyam ni tamɔ nɛkɛ kɛha enyɛmimɛi lɛ. Eŋma akɛ: “No hewɔ lɛ daa nɛɛ mikɛ mihe efɔŋ shi ní makai nyɛ yɛ nɛkɛ nii nɛɛ ahewɔ, tsɛ nyɛle momo ni nyɛnane emɔ shi yɛ anɔkwale ni yɔɔ lɛ mli.” (2 Petro 1:12) Petro kɛ Hela wiemɔ ste·riʹzo tsu nii, ni atsɔɔ shishi yɛ biɛ akɛ “nyɛnane emɔ shi,” shi atsɔɔ shishi akɛ ‘wo hewalɛ’ yɛ Yesu ŋaawoo ni etsɔ̃ hiɛ ekɛha Petro lɛ mli, akɛ: “Wo onyɛmimɛi lɛ hewalɛ.” (Luka 22:32) Nakai wiemɔ lɛ ni ekɛtsu nii lɛ tsɔɔ akɛ ekolɛ Petro kaiɔ ŋaawoo ni mli wa ni e-Nuntsɔ lɛ kɛha lɛ lɛ. Agbɛnɛ Petro kɛɛ akɛ: “Shi gbii abɔ ni miyɔɔ nɛkɛ buu [adesa gbɔmɔtso] nɛɛ mli nɛɛ, mibuɔ akɛ eja, akɛ mikɛ kaimɔ atsĩɛ nyɛhiɛ; ejaakɛ mile akɛ mibuu lɛ kpamɔ lɛ baafee oya.”—2 Petro 1:13, 14.
19. Mɛɛ yelikɛbuamɔi ahe hiaa wɔ ŋmɛnɛ?
19 Eyɛ mli akɛ Petro kɛ mlihilɛ wie akɛ ekanelɔi lɛ “[anane] emɔ shi yɛ anɔkwale ni yɔɔ lɛ mli” moŋ, shi eyɔse akɛ amɛhemɔkɛyeli lɛ baanyɛ esha shi. (1 Timoteo 1:19) Akɛni ele akɛ etsɛŋ ni ebaagbo hewɔ lɛ, ewo enyɛmimɛi lɛ hewalɛ kɛtsɔ nibii ni amɛbaanyɛ amɛkai yɛ sɛɛ mli, koni eha amɛhe awa yɛ mumɔŋ lɛ ni etsĩ tã etsɔɔ amɛ lɛ nɔ. (2 Petro 1:15; 3:12, 13) Nakai nɔŋŋ kaimɔi ahe hiaa wɔ hu ŋmɛnɛ, koni wɔya nɔ wɔdamɔ shi shiŋŋ yɛ hemɔkɛyeli lɛ mli. Mɛi ni wɔji, loo afii abɔ ni wɔkɛhi anɔkwale lɛ mli lɛ kɔɔɔ he eko, wɔnyɛŋ wɔku wɔhiɛ wɔfɔ̃ daa Biblia kanemɔ, teemɔŋ nikasemɔ, kɛ asafoŋ kpeeiyaa nɔ. Mɛi komɛi jieɔ amɛnaa yɛ kpeei ni amɛyaaa lɛ he, ni amɛkɛɔ akɛ etɔ amɛ tsɔ̃ aloo awieɔ nɔ kome lɛ nɔŋŋ yɛ kpeei ashishi, loo ahãaa wiemɔi lɛ jogbaŋŋ bɔ ni amɛaaná he miishɛɛ, shi Petro le bɔ ni wɔteŋ mɔ fɛɛ mɔ baanyɛ alaaje hemɔkɛyeli oya nɔŋŋ kɛji wɔkɛ wɔhe fɔ̃ wɔhe nɔ fe nine.—Marko 14:66-72; 1 Korintobii 10:12; Hebribii 10:25.
Nɔdaamɔ Nɔ ni Yɔɔ Shiŋŋ Kɛha Wɔhemɔkɛyeli Lɛ
20, 21. Tsakemɔ lɛ wo Petro kɛ mɛi ni kaneɔ ewoji lɛ, ní wɔ hu wɔfata he ŋmɛnɛ lɛ ahemɔkɛyeli hewalɛ yɛ mɛɛ gbɛ nɔ?
20 Ani wɔhemɔkɛyeli lɛ damɔ blema adesãi ni akɛ ŋaa fo atã kɛkɛ lɛ anɔ? Petro kɛ nɔmimaa haa hetoo akɛ dabi: “Ejaakɛ jeee adesãi ni atã yɛ ŋaa mli asɛɛ wɔnyiɛ wɔjaje wɔ-Nuntsɔ Yesu Kristo hewalɛ kɛ ebaa lɛ he sane wɔtsɔɔ nyɛ, shi moŋ wɔji odasefoi ni na enunyam kpeteŋkpele lɛ kɛ wɔhiŋmɛii.” Petro, Yakobo, kɛ Yohane fata Yesu he beni amɛna ninaa ni kɔɔ ehe yɛ Maŋtsɛyeli hewalɛ mli lɛ. Petro tsɔɔ mli akɛ: “Ená woo kɛ anunyam kɛjɛ tsɛ Nyɔŋmɔ lɛ ŋɔɔ, beni nakai gbee lɛ jɛ anunyam kpeteŋkpele lɛ mli ba eŋɔɔ akɛ: ‘Mɔnɛ ji misuɔmɔ bi, ni mináa ehe tsui lɛ.’ Ni nɛkɛ gbee nɛɛ wɔ diɛŋtsɛ wɔnu akɛ ŋwɛi ejɛ, beni wɔkɛ lɛ yɔɔ gɔŋ krɔŋkrɔŋ lɛ nɔ lɛ.”—2 Petro 1:16-18.
21 Beni Petro, Yakobo, kɛ Yohane na nakai ninaa lɛ, eka shi faŋŋ akɛ Maŋtsɛyeli lɛ batsɔ nɔ ni yɔɔ diɛŋtsɛ kɛha amɛ! Petro wie akɛ: “Ni amã gbalɛ wiemɔ lɛ nɔ mi aha wɔ fe tsutsu lɛ, nɔ ni kɛji nyɛŋɔ nyɛhiɛ nyɛto nɔ . . . lɛ, no lɛ nyɛmiifee jogbaŋŋ.” Hɛɛ, mɛi ni kaneɔ Petro wolo lɛ, ni wɔ hu wɔfata he ŋmɛnɛ lɛ, yɛ yiŋtoo ni mli wa ni amɛaadamɔ nɔ amɛbo gbalɛi ni kɔɔ Nyɔŋmɔ Maŋtsɛyeli lɛ he lɛ atoi. Mɛɛ gbɛ nɔ ehe hiaa ni wɔbo toi yɛ? Petro haa hetoo akɛ: “Ákɛ la ni tsoɔ yɛ he ko ni woɔ duŋ, kɛyashi beyinɔ ni je aaatsɛre ni toloo lɛ aaate shi yɛ nyɛtsuii amli.”—2 Petro 1:19; Daniel 7:13, 14; Yesaia 9:6, 7.
22. (a) Mɛni esa akɛ wɔha wɔtsuii ahiɛ ahi amɛhe nɔ yɛ he? (b) Mɛɛ gbɛ nɔ wɔɔtsɔ wɔbo gbalɛ wiemɔ lɛ toi?
22 Wɔtsuii baawo duŋ kɛji akɛ gbalɛ wiemɔ lɛ mli la kpɛmɔ lɛ bɛ. Shi kɛtsɔ etoiboo nɔ lɛ, eha Kristofoi atsuii ahiɛ etee nɔ ehi amɛhe nɔ yɛ gbi ni “toloo,” Yesu Kristo baate shi yɛ Maŋtsɛyeli anunyam mli lɛ jetsɛremɔ lɛ he. (Kpojiemɔ 22:16) Mɛɛ gbɛ nɔ wɔtsɔɔ wɔboɔ gbalɛ wiemɔ lɛ toi ŋmɛnɛ? Kɛtsɔ Biblia kasemɔ nɔ, kɛtsɔ hesaamɔ kɛ wɔhe ni wɔkɛwoɔ kpeei amli lɛ nɔ, kɛ agbɛnɛ, kɛtsɔ ‘nibii nɛɛ ahesusumɔ, kɛ wɔhe ni wɔkɛwoɔ mli kwraa’ lɛ nɔ. (1 Timoteo 4:15) Kɛji gbalɛ wiemɔ lɛ baafee la ni tsoɔ yɛ “he ko ni woɔ duŋ” (wɔtsuii amli) lɛ, no lɛ esa akɛ wɔha esa wɔhe kɛyashɛ shɔŋŋ—wɔ akɔnɔi, henumɔi, kanyamɔi, kɛ otii ni mamɔ wɔhiɛ. Ehe miihia ni wɔfee Biblia kaselɔi, ejaakɛ Petro mu yitso 1 lɛ naa akɛ: “Ŋmalɛ lɛŋ gbalɛ fɛɛ gbalɛ lɛ ejɛɛɛ gbɔmɔ ko shishitsɔɔmɔ mli. Ejaakɛ gbalɛ ko bako yɛ gbɔmɔ suɔmɔ naa pɛŋ, shi moŋ Mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”—2 Petro 1:20, 21.
23. Mɛni 2 Petro lɛ klɛŋklɛŋ yitso lɛ efee ekanelɔi lɛ klalo kɛha?
23 Petro ha wɔ hewalɛwoo nɔ̃ ni mli wa yɛ ewolo ni ji enyɔ lɛ klɛŋklɛŋ yitso lɛ mli, koni wɔhiɛ wɔhemɔkɛyeli ni jara wa lɛ mli kpɛŋŋ. Wɔfee klalo kɛha saji ni hiɛdɔɔ yɔɔ mli, ni nyiɛ sɛɛ lɛ ahesusumɔ agbɛnɛ. Nikasemɔ ni nyiɛ sɛɛ lɛ baasusu 2 Petro yitso 2 lɛ he, hé ni bɔfo lɛ wie jeŋba shara ni náa mɛi anɔ hewalɛ, ni ebote asafoi lɛ amli lɛ he kaa lɛ he yɛ lɛ.
Ani Okaiɔ?
◻ Mɛni hewɔ Petro mã bɔ ni anɔkwa nilee he hiaa lɛ nɔ mi lɛ?
◻ Mɛni hewɔ ekolɛ atsĩ jeŋba kpakpa tã akɛ klɛŋklɛŋ su ni esa akɛ akɛfata hemɔkɛyeli he lɛ?
◻ Mɛni hewɔ Petro sumɔɔ ni ekai enyɛmimɛi lɛ be fɛɛ be lɛ?
◻ Mɛɛ nɔdaamɔ nɔ ni yɔɔ shiŋŋ Petro kɛha yɛ wɔhemɔkɛyeli lɛ he?
[Mfoniri ni yɔɔ baafa 9]
Petro gbɔjɔmɔi lɛ haaa eŋmɛɛ ehemɔkɛyeli lɛ he