Yitso 4
Mɔ ni Gbalɔi lɛ Fɛɛ Ye Ehe Odase Lɛ
1. Anɔkwalei ni kɔɔ Yesu shihilɛ dani ebatsɔ adesa lɛ he lɛ tsɔɔ mɛni yɛ wekukpaa ni ka ekɛ Yehowa teŋ lɛ he?
BENI Yesu tsɔɔ wekukpaa kpakpa ni ka ekɛ Yehowa teŋ lɛ mli lɛ, ekɛɛ: “Tsɛ lɛ sumɔɔ Bi lɛ, ni etsɔɔ lɛ nii fiaa ni lɛ diɛŋtsɛ efeɔ lɛ.” (Yoh. 5:19, 20) Nakai wekukpaa ni mli wa lɛ je shishi beni abɔ lɛ, ni no sɛɛ afii akpekpei abɔ dani afɔ lɛ akɛ adesa lɛ. Nyɔŋmɔ suɔmɔ Bi koome ji lɛ, mɔ ni ekome too pɛ Yehowa bɔ lɛ tɛ̃ɛ. Atsɔ kromɔ Bi ni asumɔɔ lɛ jogbaŋŋ nɛɛ nɔ abɔ nibii krokomɛi fɛɛ ni yɔɔ ŋwɛi kɛ shikpɔŋ nɔ lɛ. Agbɛnɛ hu etsu nii akɛ Nyɔŋmɔ Wiemɔ aloo Otsaamɛ, mɔ ni atsɔ enɔ ajaje Nyɔŋmɔ suɔmɔnaa nii atsɔɔ mɛi krokomɛi. Nɛkɛ mɔ nɛɛ, ni ji Bi ni Nyɔŋmɔ sumɔɔ lɛ jogbaŋŋ lɛ batsɔ gbɔmɔ Yesu Kristo.—Kol. 1:15, 16; Yoh. 1:14; 12:49, 50.
2. Biblia mli gbalɛi tsiɔ Yesu ta kɛyashiɔ nɛgbɛ?
2 Dani abaafɔ lɛ yɛ naakpɛɛ gbɛ nɔ akɛ adesa lɛ, no mli lɛ aŋmala gbalɛi nyɔŋmai abɔ ni jɛ mumɔŋ ni kɔɔ ehe lɛ ashwie shi. Taakɛ bɔfo Petro ye he odase etsɔɔ Kornelio lɛ, “Lɛ ehe odase gbalɔi lɛ fɛɛ yeɔ.” (Bɔf. 10:43) Bɔ ni awie gbɛfaŋnɔ ni Yesu naa yɛ jamɔ krɔŋŋ mli yɛ Biblia lɛ mli babaoo aha hewɔ lɛ, ŋwɛibɔfo ko kɛɛ bɔfo Yohane akɛ: “Nyɔŋmɔ moŋ oja! Ejaakɛ Yesu odase lɛ ji gbalɛ mumɔ lɛ.” (Kpoj. 19:10) Nakai gbalɛi lɛ haa ayɔseɔ lɛ faŋŋ ni amɛgbalaa jwɛŋmɔ kɛyaa Nyɔŋmɔ yiŋtoo ni kɔɔ ehe ni wɔnyaa he waa ŋmɛnɛ lɛ nɔ.
NƆ NI GBALƐI LƐ JIE LƐ KPO
3. (a) Yɛ gbalɛ ni yɔɔ 1 Mose 3:14, 15 lɛ mli lɛ, namɛi akɛ enɛɛmɛi damɔ shi aha: “onufu lɛ”? “Yoo lɛ”? ‘Onufu lɛ seshi lɛ’? (b) Mɛni hewɔ Yehowa tsuji sumɔɔ ni amɛle ‘onufu lɛ yitso nɔ ni abaatswa’ lɛ he nɔ ko lɛ?
3 Agba gbalɛi nɛɛ ateŋ klɛŋklɛŋ nɔ lɛ yɛ Eden atuatsemɔ lɛ sɛɛ. Enɛ fata kojomɔ wiemɔ ni Yehowa kɛha onufu lɛ he. Yehowa kɛɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ, ni bo hu oootswa enanetsitsi nɔ.” (1 Mose 3:14, 15) Mɛni enɛ tsɔɔ? Gbalɛi krokomɛi batsɔɔ enɛ shishi ni amɛlɛɛ mli yɛ Nyɔŋmɔ be ni sa mli. Yɛ enɛ hewɔ lɛ, wɔle akɛ mɔ ni atsɔ onufu lɛ nɔ awie enɛ atsɔɔ lɛ lɛ ji Satan Abonsam. “Yoo lɛ” ji Yehowa diɛŋtsɛ ŋwɛi gbɛjianɔtoo ni yeɔ lɛ anɔkwale, ni tamɔ ŋa anɔkwafo kɛha lɛ lɛ. Nɔ ni fata ‘onufu lɛ seshi’ lɛ he ji ŋwɛibɔfoi kɛ adesai fɛɛ ni jieɔ Abonsam su kpo, mɛi ni teɔ shi woɔ Yehowa kɛ ewebii lɛ. Yɛ bɔ ni Abonsam kɛ onufu lɛ tsu nii yɛ Eden lɛ hewɔ lɛ, anyɛɔ ayɔseɔ kɛjɛɔ gbalɛ nɛɛ mli akɛ, tswa ni ‘aaatswa onufu lɛ yitso nɔ’ lɛ tsɔɔ Nyɔŋmɔ bi atuatselɔ kɛ Yehowa heguɔgbelɔ ni kɛ awerɛho babaoo eba adesa nɔ nɛɛ hiɛkpatamɔ kwraa. Shi yɛ mɔ ni “seshi” ni baatswa eyitso nɔ lɛ ji lɛ he lɛ, enɛ tee nɔ efee teemɔŋ sane krɔŋkrɔŋ yɛ be kakadaŋŋ mli.—Rom. 16:25, 26.
4. Yɛ mɛɛ gbɛ nɔ Yesu wekukpaa lɛ ye ebua ni ayoo lɛ akɛ Seshi ni awo shi yɛ ehe lɛ?
4 Yɛ adesa yinɔsane be aaafee afii 2,000 sɛɛ lɛ, Yehowa kɛ enɛ mlitsɔɔmɔ babaoo ha. Etsɔɔ akɛ Seshi lɛ baapue yɛ Abraham wekukpaa lɛ mli. (1 Mose 22:15-18) Shi, wekukpaa ni kɛ mɔ yaa Seshi lɛ ŋɔɔ lɛ damɔ mɔ ni Nyɔŋmɔ baahala lɛ, shi jeee heloonaa seshi nɔ. Yɛ suɔmɔ ni Abraham yɔɔ kɛha ebi Ishmael, ni ji tsulɔyoo Hagar binuu lɛ fɛɛ sɛɛ lɛ, Yehowa gba mli kpoo etsɔɔ akɛ: “Mikpaŋmɔ lɛ, Isak mɔ ni Sara kɛo aaafɔ . . . lɛ mikɛaakpaŋ.” (1 Mose 17:18-21; 21:8-12) Yɛ sɛɛ mli lɛ, ama nakai kpaŋmɔ lɛ nɔ mi aha Yakob, mɔ ni Israel akutsei 12 lɛ jɛ emli lɛ, shi jeee Isak kromɔ bi Esau. (1 Mose 28:10-14) Yɛ be ni sa mli lɛ, atsɔɔ akɛ abaafɔ Seshi lɛ yɛ Yuda akutso lɛ mli, yɛ David we lɛ.—1 Mose 49:10; 1 Kron. 17:3, 4, 11-14.
5. Yɛ Yesu shikpɔŋ nɔ sɔɔmɔ lɛ shishijee gbɛ po lɛ, mɛni ye he odase akɛ lɛ ji Mesia lɛ?
5 Biblia lɛ tsɔ hiɛ fe afii 700 ni etsɔɔ he ni abaafɔ Seshi ni ji adesa nɛɛ yɛ lɛ akɛ Betlehem, shi ejie lɛ kpo hu akɛ ehi shi kɛjɛ blema “kɛjɛ naanɔ gbii lɛ amli,” beni abɔ lɛ ni eyɔɔ ŋwɛi lɛ. (Mika 5:2) Atsɔ gbalɔ Daniel nɔ agba be ni ebaapue yɛ shikpɔŋ nɔ akɛ Mɔ ni Yehowa Efɔ lɛ Mu, ni ji Mesia lɛ afɔ shi. (Dan. 9:24-26) Ni beni akɛ mumɔ krɔŋkrɔŋ fɔ lɛ mu lɛ, gbee ko jɛ ŋwɛi etsɔɔ mɔ ni eji. (Mat. 3:16, 17) No hewɔ lɛ, yɛ sɛɛ mli beni Filipo batsɔ Yesu sɛɛnyiɛlɔ lɛ, enyɛ ewie kɛ nɔmimaa akɛ: “Wɔna mɔ ni Mose ŋma ehe sane yɛ Mla lɛ mli lɛ, kɛ Gbalɔi lɛ hu lɛ, Yesu, Yosef [ŋa] bi ni jɛ Nazaret lɛ.”—Yoh. 1:45.
6. (a) Yɛ Yesu gbele sɛɛ lɛ, mɛni ekaselɔi lɛ bayɔse? (b) Namɔ pɔtɛɛ ji ‘yoo lɛ seshi’ lɛ, ni akɛ eeetswa onufu lɛ yitso nɔ lɛ tsɔɔ mɛni?
6 Kɛjɛ enɛ sɛɛ lɛ, Yesu sɛɛnyiɛlɔi lɛ bale akɛ aŋmala gbalɛi nyɔŋmai abɔ ni tsiɔ eta ashwie shi yɛ Ŋmalɛi ni jɛ mumɔŋ lɛ amli. Yɛ egbele kɛ eshitee lɛ sɛɛ lɛ, lɛ diɛŋtsɛ “etsɔɔ amɛ nibii ni yɔɔ Ŋmalɛi lɛ fɛɛ mli yɛ ehewɔ lɛ ashishi.” (Luka 24:27) Amrɔ nɛɛ ebaka shi faŋŋ akɛ Yesu ji ‘yoo lɛ seshi’ titri ni baatswa “onufu” lɛ yitso nɔ yɛ gbɛ ni baaha afo Satan sɛɛ kwraa kɛjɛ shihilɛ mli lɛ. Shiwoi fɛɛ ni Nyɔŋmɔ kɛha adesa, kɛ nibii fɛɛ ni wɔkpaa gbɛ lɛ baaba mli kɛtsɔ Yesu nɔ.—2 Kor. 1:20.
7. Kɛfata mɔ ni atsi eta yɛ gbalɛi nɛɛ amli lɛ yɔsemɔ he lɛ, mɛni ekoŋŋ esa akɛ wɔsusu he?
7 Beni okane nɛkɛ gbalɛi nɛɛ ekomɛi klɛŋklɛŋ lɛ, ekolɛ obi tamɔ bɔ ni Etiopia piafonyo lɛ bi lɛ nɔŋŋ akɛ, “Namɔ he gbalɔ lɛ wieɔ nɛɛ?” Shi piafonyo lɛ kɛ sane nɛɛ waaa jɛmɛ beni aha lɛ hetoo lɛ. Beni ebo mligbalamɔ ni Filipo kɛha lɛ lɛ toi jogbaŋŋ sɛɛ lɛ, nuu nɛɛ na akɛ hiɛsɔɔ ni eeena aha bɔ ni Yesu wo gbalɛ nɛɛ obɔ lɛ biɔ ni efee he nɔ ko, kɛtsɔ baptisimɔ ni eha abaptisi lɛ lɛ nɔ. (Bɔf. 8:32-38; Yes. 53:3-9) Ani wɔ hu wɔfeɔ nakai nɔŋŋ? Yɛ bei komɛi amli lɛ, gbɛ ni atsɔɔ nɔ akɛ gbalɛ ko haa lɛ ji nɔ ni tsirɛɔ wɔ babaoo lɛ, aloo ekolɛ bɔ ni amuaa wiemɔ lɛ naa ahaa yɛ Biblia lɛ mli diɛŋtsɛ beni atsɔɔ gbalɛ ko mlibaa lɛ ji nɔ ni tsirɛɔ wɔtsui lɛ.
8. Asusu gbalɛi okadii ejwɛ ni kɔɔ Yesu Kristo he yɛ biɛ. Susumɔ sanebimɔi kɛ ŋmalɛi ni akɛha lɛ ahe ni otsɔɔ bɔ ni gbalɛi nɛɛ kɔɔ wɔhe lɛ mli. Asusu ekome he yɛ be kome mli.
8 Kadimɔ bɔ ni enɛ ji anɔkwale ha lɛ yɛ gbalɛ shiwoi kɛ nɔkwɛmɔ nii ni kɔɔ Yesu Kristo he ni nyiɛ sɛɛ lɛ mli. Abi saji lɛ ni ŋmalɛi ni atsɛ lɛ aye abua bo ni oha hetoo.
(1) Ka ni Abraham ka akɛ ekɛ Isak aaasha afɔle lɛ ni aŋma afɔ shi lɛ yeɔ ebuaa wɔ ni wɔhiɛ sɔɔ nɔ ni Yehowa fee yɛ e-Bi lɛ ni ekɛha akɛ kpɔmɔ nɔ lɛ he lɛ yɛ mɛɛ gbɛ nɔ? (Yoh. 3:16; 1 Mose 22:1-18 [kadimɔ bɔ ni awie Isak he yɛ kuku 2 lɛ mli lɛ.])
Mɛɛ hekɛnɔfɔɔ esa akɛ enɛ aha wɔna? (Rom. 8:32, 38, 39)
Shi mɛni enɛ biɔ yɛ wɔgbɛfaŋ? (1 Mose 22:18; Yoh. 3:36)
(2) Mɛɛ gbɛnaa nii ni hiɛdɔɔ yɔɔ mli Biblia lɛ kaiɔ wɔ yɛ Yesu ni wɔyɔseɔ lɛ akɛ gbalɔ ni tamɔ Mose lɛ he? (Bɔf. 3:22, 23; 5 Mose 18:15-19)
Mɛni ji nibii ni Yesu ekɛɛ wɔ lɛ ekomɛi, ni mɛni hewɔ amɛba mli bianɛ yɛ ebe naa pɛpɛɛpɛ lɛ? (Mat. 28:18-20; 19:4-9; 18:3-6)
(3) Beni etsɔɔ wɔ nɔ he mfoniri ni Aaron osɔfoyeli lɛ feɔ lɛ, mɛɛ Yesu sui kpakpai, akɛ osɔfonukpa lɛ, Biblia lɛ gbalaa wɔjwɛŋmɔ kɛyaa nɔ? (Heb. 4:15–5:3; 7:26-28)
No hewɔ lɛ te esa akɛ wɔnu Nyɔŋmɔ ni wɔɔya eŋɔɔ yɛ sɔlemɔ mli kɛtsɔ Kristo nɔ kɛha yelikɛbuamɔ ni wɔkɛye wɔgbɔjɔmɔi anɔ lɛ he wɔha tɛŋŋ?
(4) Yɛ bɔ ni Yesu afɔleshaa lɛ nɔ kwɔ ha (akɛni akɛto fɛɛ ni akɛha yɛ Mose Mla lɛ naa lɛ najiaŋ) hewɔ lɛ, mɛni hewɔ esa akɛ wɔkwɛ jogbaŋŋ koni wɔkwa su ni aaaha wɔfee nɔ ko ni wɔle akɛ esaaa Nyɔŋmɔ hiɛ lɛ? (Heb. 10:26, 27)
Kɛji akɛ wɔhiɛ sɔɔ wala he hiɛnɔkamɔ ni atsɔ Yesu afɔleshaa lɛ nɔ akɛha lɛ lɛlɛŋ lɛ, mɛɛ nibii wɔkɛ anɔkwayeli baatsu? (Heb. 10:19-25)
MƐƐ GBƐ NƆ WƆƆTSƆ WƆJIE HEMƆKƐYELI NI WƆYƆƆ YƐ KRISTO MLI LƐ KPO WƆTSƆƆ?
9. Mɛni hewɔ yɛ Yesu Kristo sɛɛ lɛ, yiwalaheremɔ bɛ mɔ ko mɔ ko mli lɛ?
9 Beni bɔfo Petro wie bɔ ni gbalɛ lɛ eba mli yɛ Yesu nɔ lɛ etsɔɔ Yudafoi akuashɔŋ ni yɔɔ Yerusalem lɛ sɛɛ lɛ, ekɛ ekaa mu ewiemɔ lɛ naa akɛ: “Yiwalaheremɔ bɛ mɔ ko mɔ ko mli; ni asaŋ gbɛi kroko bɛ ŋwɛi shishi ni aŋɔha gbɔmɛi ni esa akɛ atsɔ nɔ ahere wɔyiwala.” (Bɔf. 4:11, 12; Lala 118:22) Eshafeelɔi ji Adam seshibii fɛɛ, no hewɔ lɛ, amɛna gbele akɛ esha he nyɔmɔwoo ni amɛbɛ najiaŋtoo nɔ ko ni amɛkɛbaaha akɛ kpɔmɔ nɔ kɛha mɔ ko. Shi Yesu yeɔ emuu, ni ewala ni ekɛsha afɔle lɛ jara wa. (Lala 49:7-10; Heb. 2:9) Ekɛ kpɔmɔ nɔ ni kɛ nɔ ni Adam laaje kɛha eseshibii lɛ yeɔ egbɔ ha. Enɛ he eba sɛɛnamɔ kɛha wɔ yɛ mɛɛ gbɛ nɔ?—1 Tim. 2:5, 6.
10. Tsɔɔmɔ gbɛ kome ni Yesu afɔleshaa lɛ he eba sɛɛnamɔ kɛha wɔ babaoo lɛ mli.
10 Enɛ eha wɔna henilee ni mli tse yɛ eshaifaa hewɔ—nɔ ni fe nɔ ni Israelbii lɛ na beni amɛkɛ kooloi sha afɔle yɛ Mose Mla lɛ shishi lɛ kwraa. (Bɔf. 13:38, 39; Heb. 9:13, 14) Shi enɛ biɔ ni wɔye anɔkwale ni wɔna Yesu Kristo mli hemɔkɛyeli diɛŋtsɛ. Ani wɔ diɛŋtsɛ lɛ, wɔle bɔ ni Kristo afɔleshaa lɛ he hiaa wɔ? “Kɛji wɔkɛɛ akɛ esha ko bɛ wɔhe lɛ, wɔ diɛŋtsɛ wɔhe wɔshishiuɔ, ni anɔkwale lɛ bɛ wɔmli. Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.”—1 Yoh. 1:8, 9.
11. Mɛni hewɔ numiimɔ he hiaa jogbaŋŋ yɛ henilee kpakpa ni aaana yɛ Nyɔŋmɔ hiɛ lɛ mli lɛ?
11 Shi, mɛi ni kɛɔ akɛ amɛle akɛ eshafeelɔi ji amɛ ni amɛkɛɔ akɛ amɛyɛ Kristo mli hemɔkɛyeli, ni amɛshiɛɔ Nyɔŋmɔ Maŋtsɛyeli lɛ amɛtsɔɔ mɛi krokomɛi taakɛ Yesu fee lɛ, yɛ gbɛ ko nɔ lɛ jieɔ amɛhe kpo akɛ mɛi ni bɛ Yesu mli hemɔkɛyeli ni yeɔ emuu. Yɛ mɛɛ gbɛ nɔ? Taakɛ Biblia lɛ tsɔɔ lɛ, kɛ mɛi komɛi batsɔmɔ heyelilɔi yɛ klɛŋklɛŋ afii oha lɛ mli lɛ, mɛni ji gbɛ ni amɛtsɔɔ nɔ amɛjieɔ enɛ kpo amɛtsɔɔ yɛ faŋŋ mli? Amɛhaa abaptisiɔ amɛ. Mɛni hewɔ? Ejaakɛ Yesu efa akɛ abaptisi ekaselɔi lɛ. (Mat. 28:19, 20; Bɔf. 8:12; 18:8) Kɛji gbɛjianɔ ni suɔmɔ yɔɔ mli ni Yehowa etsɔ Yesu Kristo nɔ eto lɛ tsirɛ mɔko tsui lɛ, eshashaoŋ shi. Ebaafee tsakemɔi ni he hiaa lɛ yɛ eshihilɛ mli, ebaajɔɔ ehe nɔ eha Nyɔŋmɔ ni ekɛ numiimɔ baafee enɛ he okadi. Taakɛ Biblia lɛ tsɔɔ lɛ, hemɔkɛyeli ni ajieɔ lɛ kpo atsɔɔ yɛ nɛkɛ gbɛ nɔ lɛ ji nɔ ni haa ebiɔ ‘Nyɔŋmɔ koni eha lɛ henilee kpakpa lɛ.’—1 Pet. 3:21.
12. Kɛji wɔyoo akɛ wɔfee esha lɛ, mɛni esa akɛ wɔfee yɛ he, ni mɛni hewɔ?
12 Shi yɛ enɛ sɛɛ po lɛ, eshafeemɔ sui baajie amɛhe kpo. Kɛkɛ lɛ mɛni? Bɔfo Yohane kɛɛ: “Miiŋma nyɛ nii nɛɛ, koni nyɛkafee esha.” No hewɔ lɛ, esaaa akɛ wɔbuɔ eshafeemɔ akɛ nɔ ko bibioo, ni ekɔɔɔ he eko kɛji enɛ jeɔ kpo yɛ wɔnifeemɔ, wɔwiemɔ, aloo wɔjeŋba mli. “Ni kɛ mɔ ko fee esha jiŋŋ, wɔyɛ mlidamɔlɔ yɛ Tsɛ lɛ ŋɔɔ, Yesu Kristo, jalɔ lɛ; ni lɛ ji wɔhe eshai lɛ ahe kpatamɔ nɔ; shi jeee wɔ nɔ lɛ kɛkɛ he, shi moŋ jeŋ muu lɛ fɛɛ nɔ lɛ hu he.” (1 Yoh. 2:1, 2) Ani enɛ tsɔɔ akɛ yɛ nɔ fɛɛ nɔ ni wɔfee mli lɛ, kɛ wɔsɔle wɔha Nyɔŋmɔ akɛ, ‘Okɛ wɔnɔtɔmɔi lɛ ake wɔ’ lɛ, kɛkɛ lɛ nɔ fɛɛ nɔ eja? Dabida. Nɔ ni kɛ eshaifaa baa ji heshwamɔ diɛŋtsɛ. Ekolɛ yelikɛbuamɔ kɛmiijɛ Kristofoi asafo lɛ mli onukpai lɛ aŋɔɔ hu he baahia wɔ. Esa ni wɔle tɔmɔ ni wɔfee lɛ ni wɔshwa wɔhe yɛ he yɛ anɔkwayeli mli, ni wɔbɔ mɔdɛŋ ni wɔkafee nakai dɔŋŋ. (Bɔf. 3:19; Yak. 5:13-16) Kɛji wɔfee enɛ lɛ, wɔbaana yelikɛbuamɔ kɛjɛ Yesu ŋɔɔ. Hemɔkɛyeli ni wɔyɔɔ yɛ efɔleshaa ni kpataa haa esha lɛ mli lɛ hewɔ lɛ, wɔbaana Yehowa hiɛ duromɔ, ni enɛ he hiaa waa kɛji akɛ wɔjamɔ lɛ baafee nɔ ni sa ehiɛ.
13. (a) Tsɔɔmɔ gbɛ kroko ni Yesu afɔleshaa lɛ he eba sɛɛnamɔ kɛha wɔ lɛ mli. (b) Mɛni hewɔ sɔɔmɔ ni wɔkɛhaa Nyɔŋmɔ lɛ nyɛɛɛ ekɛ nyɔmɔwoo nɛɛ abaha wɔ lɛ? (d) Shi kɛ wɔyɛ hemɔkɛyeli diɛŋtsɛ lɛ, mɛni wɔbaafee?
13 Yesu afɔleshaa lɛ hu gbeleɔ naanɔ wala gbɛ kɛhaa wɔ—“asafoku bibioo” lɛ yɛ ŋwɛi kɛ gbɔmɛi akpekpei toi akpei abɔ krokomɛi hu yɛ Paradeiso yɛ shikpɔŋ nɔ. (Luka 12:32; Kpoj. 20:11, 12; 21:3, 4) Enɛ jeee nyɔmɔwoo ni wɔ diɛŋtsɛ wɔna. Nitsumɔi fɛɛ ni wɔɔtsu yɛ Yehowa sɔɔmɔ mli lɛ nyɛŋ aha wɔtsɔmɔ mɛi ni Nyɔŋmɔ hiɛ wɔ wala he nyɔmɔ. Naanɔ wala ji “Nyɔŋmɔ duromɔ keenɔ . . . yɛ Kristo Yesu wɔ-Nuŋtsɔ lɛ mli.” (Rom. 6:23; Efes. 2:8-10) Shi, kɛ wɔyɛ nakai duromɔ keenɔ lɛ mli hemɔkɛyeli kɛ gbɛ ni atsɔ nɔ akɛha lɛ he hiɛsɔɔ lɛ, wɔbaajie enɛ kpo. Kɛ wɔsusu naakpɛɛ gbɛ ni Yehowa tsɔ nɔ ekɛ Yesu tsu E-suɔmɔnaa nii ahe nii kɛgbe naa kɛ bɔ ni ehe hiaa ni wɔ fɛɛ wɔnyiɛ Yesu nanemaa hei asɛɛ kpaakpa lɛ he lɛ, wɔbaaha Kristofoi asɔɔmɔ lɛ afee nɔ ni he hiaa wɔ fe nɔ fɛɛ nɔ yɛ wɔshihilɛ mli lɛ ateŋ ekome. Wɔhemɔkɛyeli lɛ baaje kpo faŋŋ yɛ nɔmimaa ni wɔkɛwieɔ Yehowa duromɔ keenɔ ni yɔɔ nyam nɛɛ he wɔtsɔɔ mɛi krokomɛi lɛ mli.—Okɛto Bɔfoi lɛ Asaji 20:24 he.
14. Mɛɛ gbɛ nɔ Yesu Kristo mli hemɔkɛyeli ni tamɔ nɛkɛ lɛ feɔ wɔ ekome yɛ?
14 Mɛɛ ekomefeemɔ mumɔ fɛfɛo nakai hemɔkɛyeli lɛ kɛbaa nɛkɛ! Wɔtsɔɔ enɛ nɔ wɔtsiɔ wɔbɛŋkɛɔ Yehowa kɛ e-Bi lɛ kɛ wɔhe yɛ Kristofoi asafo lɛ mli. (1 Yoh. 3:23, 24) Enɛ haa wɔnaa miishɛɛ akɛ Yehowa ejɛ mlihilɛ mli eha e-Bi lɛ “gbɛi ni ta gbɛi fɛɛ gbɛi nɔ [ja Nyɔŋmɔ gbɛi lɛ pɛ] koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi yɛ Yesu gbɛi lɛ mli, ni lilɛi fɛɛ lilɛi agba mli kpoo akɛ Yesu Kristo ji Nuŋtsɔ kɛwo Tsɛ Nyɔŋmɔ lɛ hiɛ nyam.”—Fil. 2:9-11.
Sanegbaa Ni Akɛtiɔ Mli
● Beni Mesia lɛ pue lɛ, mɛni hewɔ mɛi ni he Nyɔŋmɔ Wiemɔ lɛ amɛye lɛ nyɛ amɛyɔse lɛ lɛ?
● Te esa akɛ gbalɛ okadii ni ba mli yɛ Yesu nɔ, ni afee he mfoniri yɛ baafa 34 lɛ, asa wɔhe aha tɛŋŋ?
● Yɛ mɛɛ gbɛi anɔ Yesu afɔleshaa lɛ he eba sɛɛnamɔ kɛha wɔ bianɛ? Mɛɛ gbɛ wɔbaanyɛ wɔtsɔ nɔ wɔjie hiɛsɔɔ kpo wɔha enɛ?
[Akrabatsa/Mfonirii ni yɔɔ baafa 34]
Gbalɛ Okadii Ni Kɔɔ Yesu He—Te Esa Akɛ Amɛkɔ Ohe Amɛha Tɛŋŋ?
Abraham kɛ Isak afɔleshaa
Mose akɛ otsaamɛ kɛha Nyɔŋmɔ
Aaron akɛ osɔfonukpa
Kooloi afɔleshaa