Gbɛ Kome Pɛ Ni Kɛ Mɔ Yaa Naanɔ Wala Mli
“Mi nɔŋŋ ji gbɛ lɛ kɛ anɔkwale lɛ kɛ wala lɛ.”—YOHANE 14:6.
1, 2. Yesu kɛ gbɛ ni kɛ mɔ yaa naanɔ wala mli lɛ to mɛni he, ni mɛni ji enɔkwɛmɔnɔ lɛ shishinumɔ?
YESU kɛ gbɛ ni kɛ mɔ yaa naanɔ wala mli lɛ to gbɛ ni kɛ mɔ boteɔ agbó fintɔ̃ɔ ko mli lɛ he yɛ e-Gɔŋ nɔ Shiɛmɔ ni ehe gbɛi lɛ mli. Kadimɔ akɛ Yesu ma nɔ mi akɛ nɛkɛ wala gbɛ nɛɛ nɔ nyiɛmɔ bɛ mlɛo, akɛ: “Nyɛbotea agbó fintɔ̃ɔ lɛ mli! Ejaakɛ agbó ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ni boteɔ mli lɛ fa pii. Shi agbó fintɔ̃ɔ kɛ gbɛ ni etsa ji nɔ ni kɛ mɔ yaa [naanɔ] wala mli lɛ, ni mɛi fioo ji mɛi ni naa no.”—Mateo 7:13, 14.
2 Ani onu bɔ ni nɔkwɛmɔnɔ nɛɛ he hiaa hã lɛ shishi jogbaŋŋ? Ani ejieee lɛ kpo akɛ gbɛ kome pɛ ji nɔ ni yɔɔ ní yaa wala mli, ni ákɛ ebaabi henɔkwɛmɔ jogbaŋŋ yɛ wɔ gbɛfaŋ koni wɔkagba afã kɛmiijɛ nakai wala gbɛ lɛ nɔ? Belɛ, mɛni ji gbɛ kome pɛ ni kɛ mɔ yaa naanɔ wala mli lɛ mɔ?
Yesu Kristo Nitsumɔ
3, 4. (a) Biblia lɛ tsɔɔ gbɛfaŋnɔ ni he hiaa ni Yesu tsuɔ yɛ wɔ yiwalaheremɔ mli lɛ mli yɛ mɛɛ gbɛ nɔ? (b) Mɛɛ be Nyɔŋmɔ jie lɛ kpo klɛŋklɛŋ kwraa akɛ adesai baanyɛ aná naanɔ wala?
3 Eka shi faŋŋ akɛ, Yesu yɛ gbɛfaŋnɔ ni he hiaa ni kɔɔ nakai gbɛ lɛ he, taakɛ ebɔfo ni ji Petro jaje lɛ, akɛ: “Yiwalaheremɔ bɛ mɔ ko mɔ ko mli; ni asaŋ [yɛ Yesu gbɛi lɛ sɛɛ lɛ] gbɛi kroko hu bɛ ŋwɛi shishi ni aŋɔhã gbɔmɛi ni sa akɛ atsɔ nɔ ahere wɔyiwala.” (Bɔfoi lɛ Asaji 4:12) Nakai nɔŋŋ hu bɔfo Paulo jaje akɛ: “Nyɔŋmɔ duromɔ keenɔ lɛ naanɔ walaŋ yɛ Kristo Yesu, wɔ-Nuntsɔ lɛ, mli.” (Romabii 6:23) Yesu diɛŋtsɛ jie lɛ kpo akɛ gbɛ kome pɛ ni kɛ mɔ yaa naanɔ wala mli lɛ tsɔɔ enɔ, ejaakɛ ejaje akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ.”—Yohane 14:6.
4 No hewɔ lɛ, ehe miihia waa akɛ wɔkpɛlɛ gbɛfaŋnɔ ni Yesu náa yɛ naanɔ wala ni baanyɛ aba lɛ mli lɛ nɔ. No hewɔ lɛ, nyɛhaa wɔsusuɔ gbɛfaŋnɔ ni enáa lɛ he jogbaŋŋ wɔkwɛa. Ani ole be ni Yehowa Nyɔŋmɔ hã ale, beni Adam fee esha lɛ sɛɛ, ákɛ adesai baanyɛ aná naanɔ wala mli ŋɔɔmɔ lɛ? Yɛ Adam shigbeemɔ lɛ sɛɛ nɔŋŋ. Nyɛhaa wɔpɛia bɔ ni agba Yesu Kristo ni akɛ lɛ ha akɛ adesai a-Yiwalaherelɔ afɔ̃ shi klɛŋklɛŋ lɛ mli wɔkwɛa agbɛnɛ.
Shiwoo Seshi Lɛ
5. Te wɔɔfee tɛŋŋ wɔyoo onufu ni laka Hawa lɛ?
5 Yehowa Nyɔŋmɔ ha ale Yiwalaherelɔ ni awo shi yɛ ehe lɛ yɛ mfonirifeemɔ wiemɔ mli. Efee enɛ yɛ be mli ni ejaje fɔbuu wiemɔ eshwie “onufu lɛ” ni kɛ Hawa wie ni ka lɛ koni ekabo Nyɔŋmɔ toi kɛtsɔ yibii ni agu eyeli lɛ ni eye lɛ nɔ lɛ. (1 Mose 3:1-5) Shi, nakai onufu lɛ jeee onufu diɛŋtsɛ. Eji mumɔŋ bɔɔ nɔ ni yɔɔ hewalɛ waa ni ayoo lɛ yɛ Biblia lɛ mli akɛ “shishijee onufu lɛ, mɔ ni atsɛɔ lɛ Abonsam kɛ Satan lɛ.” (Kpojiemɔ 12:9, NW) Satan kɛ kooloo ni baa shi nɛɛ tsu nii akɛ enaawielɔ koni ekɛlaka Hawa. No hewɔ lɛ, beni ebuɔ Satan fɔ lɛ, Nyɔŋmɔ kɛɛ lɛ akɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; [yoo lɛ seshi lɛ] eeetswa oyitso nɔ̃, ni bo hu oootswa enanetsitsi nɔ̃.”—1 Mose 3:15.
6, 7. (a) Namɔ ji yoo ni fɔ́ “seshi” lɛ? (b) Namɔ ji shiwoo Seshi lɛ, ni mɛni etsũɔ?
6 Namɔ ji “yoo” ni Satan nyɛɔ lɛ, loo ehe tsɛ̃ɔ lɛ nɛɛ? Taakɛ bɔ ni atsɔɔ mɔ ni ji “blema onufu lɛ” yɛ Kpojiemɔ yitso 12 lɛ, nakai nɔŋŋ hu atsɔɔ mɔ ni ji yoo lɛ ni Satan nyɛɔ lɛ nɛɛ. Kadimɔ yɛ kuku 1 lɛ akɛ akɛɛ “[ekɛ] hulu eha ehe, ni nyɔɔŋtsere yɔɔ enajiashi, ni ŋulamii nyɔŋma-kɛ-enyɔ akekere fĩ eyitso.” Yoo nɛɛ feɔ Nyɔŋmɔ ŋwɛibɔfoi anɔkwafoi lɛ aŋwɛi gbɛjianɔtoo lɛ he mfoniri, ni “binuu” ni efɔ́ lɛ feɔ Nyɔŋmɔ Maŋtsɛyeli, ni Yesu Kristo yeɔ nɔ akɛ Maŋtsɛ lɛ he mfoniri.—Kpojiemɔ 12:1-5.
7 Belɛ, namɔ ji yoo lɛ “seshi,” loo eshwie nɛɛ ni atsĩ etã yɛ 1 Mose 3:15 ni baatswa Satan ‘yitso nɔ̃,’ ní ekɛ nakai feemɔ apila lɛ gbele pilamɔ lɛ? Lɛ ji mɔ ni Nyɔŋmɔ tsu lɛ kɛjɛ ŋwɛi kɛba, ní oblayoo fro ko fɔ́ lɛ yɛ naakpɛɛ gbɛ nɔ lɛ, hɛɛ, nuu ni ji Yesu lɛ. (Mateo 1:18-23; Yohane 6:38) Kpojiemɔ yitso 12 lɛ jieɔ lɛ kpo akɛ, ákɛ ŋwɛi Nɔyelɔ ni átee lɛ shi lɛ, nɛkɛ Seshi, ni ji Yesu Kristo nɛɛ baanyiɛ hiɛ yɛ Satan nɔ kunimyeli mli, ni taakɛ Kpojiemɔ 12:10 kɛɔ lɛ, ebaato ‘wɔ Nyɔŋmɔ lɛ maŋtsɛyeli lɛ kɛ e-Kristo lɛ hegbɛ lɛ’ ema shi.
8. (a) Mɛɛ nɔ̃ hee ko Nyɔŋmɔ kɛha ni kɔɔ eshishijee yiŋtoo lɛ he? (b) Namɛi feɔ Nyɔŋmɔ nɔyeli hee lɛ?
8 No hewɔ lɛ, Maŋtsɛyeli ni yɔɔ Yesu Kristo dɛŋ nɛɛ ji nɔ̃ hee ko ni Nyɔŋmɔ kɛha yɛ eshishijee yiŋtoo ni eyɔɔ akɛ adesai aná naanɔ wala mli ŋɔɔmɔ yɛ shikpɔŋ nɔ lɛ gbɛfaŋ. Yɛ Satan atuatsemɔ lɛ sɛɛ lɛ, Yehowa to gbɛjianɔ amrɔ nɔŋŋ koni esaa nibii fɔji fɛɛ ni ejɛ efɔŋfeemɔ mli eba lɛ, kɛtsɔ nɛkɛ Maŋtsɛyeli nɔyeli hee nɛɛ nɔ. Beni Yesu yɔɔ shikpɔŋ nɔ lɛ ejie lɛ kpo akɛ jeee ekome pɛ ebaahi nɛkɛ nɔyeli nɛɛ mli. (Luka 22:28-30) Abaahala mɛi krokomɛi kɛjɛ adesai ateŋ, ni amɛbaafata ehe yɛ ŋwɛi koni amɛkɛ lɛ aye maŋtsɛ, ni no baahã amɛfee yoo lɛ seshi lɛ fã ni ji enyɔ. (Galatabii 3:16, 29) Akɛ nɛkɛ Yesu hefatalɔi nɔyelɔi—ní ahala amɛ fɛɛ kɛjɛ adesai eshafeelɔi ni yɔɔ shikpɔŋ nɛɛ nɔ lɛ ateŋ lɛ—ayibɔ hã yɛ Biblia lɛ mli akɛ amɛfeɔ 144,000.—Kpojiemɔ 14:1-3.
9. (a) Mɛni hewɔ ehe hiaa ni Yesu apue yɛ shikpɔŋ nɔ akɛ gbɔmɔ? (b) Yesu fite Abonsam nitsumɔi lɛ loo etsɔ lɛ sɛɛsɛɛ yɛ mɛɛ gbɛ nɔ?
9 Shi, dani nakai Maŋtsɛyeli lɛ baanyɛ aje enɔyeli shishi lɛ, ehe bahia ní Seshi lɛ klɛŋklɛŋ fã lɛ, ni ji Yesu Kristo, apue yɛ shikpɔŋ nɔ dã. Mɛni hewɔ? Ejaakɛ Yehowa Nyɔŋmɔ ehala lɛ akɛ Mɔ ni ‘baafite Abonsam nitsumɔi lɛ [loo, etsake lɛ sɛɛsɛɛ].’ (1 Yohane 3:8) Satan nitsumɔi lɛ ekomɛi ji lakamɔ ni elaka Adam ní efee esha, ní kɛ esha kɛ gbele fɔbuu ba Adam shwiei fɛɛ nɔ lɛ. (Romabii 5:12) Yesu tsake Abonsam nitsumɔ nɛɛ sɛɛsɛɛ kɛtsɔ E-wala ni ekɛha akɛ kpɔmɔnɔ lɛ nɔ. Enɛ hewɔ lɛ, ekɛ nɔdaamɔ nɔ ni akɛaahã adesai aye amɛhe kɛjɛ esha kɛ gbele fɔbuu shishi lɛ hã, ni egbele gbɛ kɛha naanɔ wala namɔ.—Mateo 20:28; Romabii 3:24; Efesobii 1:7.
Nɔ ni Kpɔmɔnɔ lɛ Tsũɔ
10. Yesu kɛ Adam je amɛhe yɛ mɛɛ gbɛ nɔ?
10 Akɛni ajie Yesu wala kɛjɛ ŋwɛi ni akɛbawo yoo ko fɔmɔ kotoku mli hewɔ lɛ, afɔ́ lɛ akɛ adesa ni eye emuu, mɔ ni Adam esha lɛ woko ehe muji. Ebaanyɛ ehi shi kɛya naanɔ yɛ shikpɔŋ nɔ. Yɛ nakai gbɛ nɔ nɔŋŋ lɛ, abɔ Adam akɛ adesa ni yeɔ emuu, kɛ gbɛkpamɔ akɛ ebaaná naanɔ wala mli ŋɔɔmɔ yɛ shikpɔŋ nɔ. Bɔfo Paulo yɛ bɔ ni hii enyɔ nɛɛ je amɛhe lɛ yɛ ejwɛŋmɔ mli beni eŋma akɛ: “ ‘Adam ni ji klɛŋklɛŋ gbɔmɔ lɛ tsɔ̃ susuma ni hiɛ kã,’ naagbee Adam lɛ [Yesu Kristo] tsɔ̃ susuma ni hãa mɔ yi náa wala. Klɛŋklɛŋ gbɔmɔ lɛ ni jɛ shikpɔŋ nɔ lɛ, shikpɔŋ nɔ nyo ni; gbɔmɔ ni ji enyɔ lɛ, ji Nuntsɔ ni jɛ ŋwɛi lɛ.”—1 Korintobii 15:45, 47.
11. (a) Mɛɛ hewalɛ Adam kɛ Yesu ná yɛ adesai anɔ? (b) Te esa akɛ wɔbu afɔle ni Yesu shã lɛ wɔha tɛŋŋ?
11 Biblia mli sane jajemɔ akɛ Yesu “ŋɔ ehe eha akɛ kpɔmɔnɔ ni yeɔ egbɔ eha mɛi fɛɛ” lɛ maa mɛi enyɔ ni je amɛhe nɛɛ—hii enyɔ pɛ ni yeɔ emuu ni amɛhi shikpɔŋ lɛ nɔ lɛ—nɔ mi. (1 Timoteo 2:6) Namɔ Yesu kɛ lɛ yeɔ egbɔ lɛ? Ojogbaŋŋ, ekɛ Adam beni eji gbɔmɔ ni yeɔ emuu lɛ! Esha ni klɛŋklɛŋ Adam lɛ fee lɛ kɛ adesai aweku muu lɛ fɛɛ wo gbele fɔbuu mli. “Naagbee Adam lɛ” afɔleshaa lɛ kɛ nɔdaamɔ nɔ hãa kɛha kpɔmɔ kɛmiijɛ esha kɛ gbele mli, bɔni afee ni wɔnyɛ wɔhi shi kɛya naanɔ. Kwɛ bɔ ni Yesu afɔleshaa lɛ jara wa hã! Bɔfo Petro wie akɛ: “Jeee nibii ni fiteɔ, taakɛ jwiɛtɛi loo shika, aŋɔkpɔ̃ nyɛ.” Shi moŋ, Petro tsɔɔ mli akɛ: “Kɛ Kristo mɔ ni tamɔ toobi ni he bɛ kpa loo ŋmamɔnɔ ko lɛ lá ni jara wa lɛ.”—1 Petro 1:18, 19.
12. Te Biblia lɛ tsɔɔ bɔ ni afiteɔ gbele fɔ ni abu wɔ lɛ loo atsɔɔ lɛ sɛɛsɛɛ lɛ mli ahaa tɛŋŋ?
12 Biblia lɛ kɛ wiemɔi ni yɔɔ miishɛɛ tsɔɔ gbɛ ni abaatsɔ nɔ atsake adesai aweku lɛ gbele fɔbuu lɛ sɛɛsɛɛ kwraa lɛ mli akɛ: “Bɔ ni atsɔ mɔ kome shigbeemɔ [Adam nɔ̃ lɛ] nɔ abu gbɔmɛi fɛɛ fɔ́ lɛ, nakai nɔŋŋ kɛ̃ atsɔ mɔ kome jalɛ [Yesu emuuyeli shihilɛ gbɛ lɛ fɛɛ ni yagbe naa kɛ gbele lɛ] nɔ abu gbɔmɛi fɛɛ wala bem. Ejaakɛ taakɛ bɔ ni atsɔ gbɔmɔ kome [Adam] toigbele lɛ nɔ ahã mɛi pii tsɔmɔ eshafeelɔi lɛ, nakai nɔŋŋ kɛ̃ aaatsɔ mɔ kome [Yesu] toiboo lɛ nɔ ahã mɛi pii hu atsɔmɔ jalɔi.”—Romabii 5:18, 19.
Anunyam Gbɛkpamɔ
13. Mɛni hewɔ mɛi pii nuɔ shihilɛ kɛmiiya naanɔ he taakɛ amɛnuɔ he lɛ?
13 Esa akɛ gbɛjianɔ ni Nyɔŋmɔ to nɛɛ ahã wɔná miishɛɛ waa diɛŋtsɛ! Ani omli efiliii bo ákɛ akɛ Yiwalaherelɔ eha? Beni Amerika maŋtiase wulu ko mli adafitswaa wolo ko bi sane yɛ nibii amlitaomɔ ko mli akɛ, “Ani onáa gbɛkpamɔ akɛ ooohi shi kɛya naanɔ lɛ he miishɛɛ?” lɛ, ebaafee bo naakpɛɛ akɛ ooole akɛ, mɛi ni ha hetoo lɛ amlijaa oha mli 67.4 hã hetoo akɛ, “Dabi.” Mɛni hewɔ amɛkɛɛ akɛ amɛsumɔɔɔ ni amɛhi shi kɛya naanɔ lɛ? Eka shi faŋŋ akɛ, akɛni amrɔ nɛɛ shikpɔŋ nɛɛ nɔ shihilɛ eyi obɔ kɛ naagbai babaoo lɛ hewɔ. Mɔ ko kɛɛ akɛ: “Minaaa he miishɛɛ akɛ masusu he akɛ miye afii 200.”
14. Mɛni hewɔ shihilɛ kɛmiiya naanɔ baafee miishɛɛ nɔ̃ kɛmɔ shi kwraa lɛ?
14 Kɛlɛ, jeee shihilɛ kɛmiiya naanɔ yɛ jeŋ ni gbɔmɛi naa amanehulu yɛ helai, gbɔlɛ, kɛ osharai krokomɛi ahewɔ lɛ he Biblia lɛ wieɔ lɛ. Dabi, ejaakɛ ákɛ Nyɔŋmɔ Maŋtsɛyeli lɛ Nɔyelɔ lɛ, Yesu baasaa nɛkɛ naagbai ni Satan kɛba nɛɛ fɛɛ. Taakɛ Biblia lɛ tsɔɔ lɛ, Nyɔŋmɔ Maŋtsɛyeli lɛ ‘baajwara’ je nɛŋ yiwalɛ nɔyelii lɛ “fɛɛ wɔtsɔwɔtsɔ, ni ebaakpata amɛhiɛ.” (Daniel 2:44) Yɛ nakai beaŋ lɛ, yɛ sɔlemɔ ni Yesu tsɔɔ esɛɛnyiɛlɔi lɛ hetoohamɔ mli lɛ, abaafee Nyɔŋmɔ ‘suɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ.’ (Mateo 6:9, 10) Yɛ be mli ni ájie efɔŋfeemɔ fɛɛ kɛjɛ shikpɔŋ nɔ sɛɛ lɛ, akɛ Yesu kpɔmɔnɔ lɛ mli sɛɛnamɔi lɛ baatsu nii kɛmɔ shi yɛ Nyɔŋmɔ jeŋ hee lɛ mli. Hɛɛ, akɛ mɛi fɛɛ ni sa lɛ baaku sɛɛ aba gbɔmɔtsoŋ hewalɛ ni eye emuu mli ekoŋŋ!
15, 16. Mɛɛ shihilɛi baahi Nyɔŋmɔ jeŋ hee lɛ mli?
15 Biblia lɛ mli sane kuku nɛɛ baakɔ gbɔmɛi ni yɔɔ Nyɔŋmɔ jeŋ hee lɛ mli lɛ ahe, akɛ: “No lɛ eheloo lɛ aaatsɔ efɔ́ fe gbekɛ nɔ̃; eeeku esɛɛ eeetsɔ oblanyo ekoŋŋ.” (Hiob 33:25) Biblia mli shiwoo kroko hu baaba mli, akɛ: “Aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ.”—Yesaia 35:5, 6.
16 Susumɔ he okwɛ: Yɛ afii abɔ ni no mli lɛ wɔ gbɔmɔtso eye lɛ fɛɛ sɛɛ lɛ, kɛji akɛ wɔye afii 80, 800, loo wɔtsɛ fe nakai hu lɛ, wɔ gbɔmɔtsei baahi hewalɛ ni yeɔ emuu mli be fɛɛ be. Ebaatamɔ bɔ ni Biblia lɛ woɔ shi lɛ, akɛ: “Maŋbii lɛ ateŋ mɔ ko ekɛɛŋ akɛ: Migbɔjɔ!” Shiwoo nɛɛ hu baaba mli yɛ nakai be lɛ mli: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Yesaia 33:24; Kpojiemɔ 21:3, 4.
17. Mɛɛ nitsumɔi wɔbaanyɛ wɔkpa gbɛ akɛ mɛi ni yɔɔ Nyɔŋmɔ jeŋ hee lɛ mli lɛ baatsu?
17 Wɔbaanyɛ ni wɔkɛ wɔ ansɔ ni yɔɔ naakpɛɛ lɛ atsu nii yɛ gbɛ ni wɔ Bɔlɔ lɛ to eyiŋ yɛ he lɛ nɔ, beni efee lɛ kɛ nyɛmɔ ní ekɛaakase nii ni husu bɛ he lɛ yɛ nakai jeŋ hee lɛ mli. Ejaakɛ, bo diɛŋtsɛ feemɔ naakpɛɛ nibii ni wɔbaanyɛ wɔfee lɛ he mfoniri okwɛ! Adesai ni yeee emuu lɛ po enyɛ amɛjɛ nibii ni yɔɔ shikpɔŋ lɛ nitoohe lɛ mli amɛfee nɔ fɛɛ nɔ ni wɔnaa ni ebɔle wɔ lɛ—tɛlifoŋ ni kpãa bɛ sɛɛ, ní anyɛɔ akɛyaa hei srɔtoi, tsɔnei ni awieɔ awoɔ mli ni egbɛɛɔ waa, watsii, frijii, kɔmpiutai, kɔɔyɔŋ lɛji, hɛɛ, tsĩi nɔ fɛɛ nɔ ni osumɔɔ lɛ tã. Amɛteŋ eko kwraa bɛ ni amɛkɛ nibii ni akɛjɛ he ko ni yɔɔ shɔŋŋ yɛ jeŋ muu nɛɛ fɛɛ mli lɛ fee. Akɛni naanɔ wala kã wɔhiɛ yɛ shikpɔŋ nɔ Paradeiso ni baa lɛ mli hewɔ lɛ, husu ehiŋ hegbɛ ni wɔyɔɔ akɛ wɔkɛ ŋaalee baafee nibii srɔtoi lɛ he!—Yesaia 65:21-25.
18. Mɛni hewɔ shihilɛ efeŋ nɔ ni jeɔ mɔ tsine yɛ Nyɔŋmɔ jeŋ hee lɛ mli lɛ?
18 Shihilɛ efeŋ nɔ ni jeɔ mɔ tsine. Wɔmiikpa niyenii ni nyiɛ sɛɛ ni wɔbaaye lɛ gbɛ bianɛ po, eyɛ mli akɛ ekolɛ wɔye nii aahu shii akpei nyɔŋmai abɔ. Kɛ́ wɔye emuu akɛ adesai lɛ, wɔbaaná Paradeiso shikpɔŋ lɛ nɔ nibaanii ni ŋɔɔ lɛ amli ŋɔɔmɔ jogbaŋŋ diɛŋtsɛ kɛmɔ shi. (Yesaia 25:6) Ni wɔbaaná miishɛɛ ni baahi shi kɛya naanɔ yɛ shikpɔŋ lɛ nɔ kooloi srɔtoi babaoo lɛ anɔkwɛmɔ mli, ni wɔna ehulu shinyɔɔ fɛfɛji, gɔji, faai, kɛ jɔɔi lɛ ahe miishɛɛ. Lɛɛlɛŋ, shihilɛ efeŋ nɔ kome too lɛ nɔŋŋ be fɛɛ be yɛ Nyɔŋmɔ jeŋ hee lɛ mli!—Lala 145:16.
Nyɔŋmɔ Taomɔ Nii ni Wɔɔshɛ He
19. Mɛni hewɔ shishinumɔ yɔɔ mli akɛ wɔɔhe wɔye akɛ taomɔ nii komɛi yɛ Nyɔŋmɔ nikeenii ni ji wala ni wɔnine aaashɛ nɔ lɛ he?
19 Ani obaakpa gbɛ akɛ onine baashɛ Nyɔŋmɔ nikeenii ni yɔɔ nyam, ni ji naanɔ wala lɛ nɔ yɛ Paradeiso ni tamɔ nɛkɛ mli, ní obɔɔɔ he mɔdɛŋ ko kwraa koni onine ashɛ nɔ? Ani nilee bɛ mli akɛ Nyɔŋmɔ baatao nɔ ko kɛjɛ wɔdɛŋ? Eka shi faŋŋ akɛ nilee yɛ mli nakai. Enɛ tsɔɔ akɛ, Nyɔŋmɔ kɛ nikeenii lɛ hãaa wɔ efolo kɛkɛ. Ekpãa mli ehãa wɔ, shi esa akɛ wɔ hu wɔkpã wɔmli ní wɔnine ashɛ nɔ. Hɛɛ, mɔdɛŋbɔɔ baa sane lɛ mli. Belɛ, ekolɛ obaabi sane ni nɔyelɔ obalanyo niiatsɛ lɛ babi Yesu lɛ nɔŋŋ pɛpɛɛpɛ, akɛ: “Mɛni mafee ni maná naanɔ wala?” Aloo ekolɛ obaabi sane lɛ yɛ gbɛ ni Filipinyo gbokɛlɛfoi anɔkwɛlɔ ko tsɔ nɔ ebi Paulo sane lɛ, akɛ: “Te mafee tɛŋŋ ni maná yiwalaheremɔŋ?”—Mateo 19:16; Bɔfoi lɛ Asaji 16:30.
20. Mɛni ji taomɔ nii ni he hiaa kɛha naanɔ wala?
20 Gbi gbɛkɛ dani Yesu baagbo lɛ, etsɔɔ shishijee taomɔ nii ko beni ekɛɛ eŋwɛi Tsɛ lɛ yɛ sɔlemɔ ko mli akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Ani enɛ jeee taomɔ nii ni nilee yɔɔ mli, ákɛ wɔná Yehowa, mɔ ni hã naanɔ wala fee nɔ ni wɔnine baanyɛ ashɛ nɔ lɛ, kɛ Yesu Kristo, mɔ ni gbo ehã wɔ lɛ he nilee? Ni kɛlɛ, aatao babaoo fe nilee ni tamɔ nɛkɛ ni wɔɔná kɛkɛ.
21. Te wɔfeɔ tɛŋŋ wɔtsɔɔ akɛ wɔmiitsu taomɔ nii ni ji hemɔkɛyeli ni ajieɔ lɛ kpo lɛ he nii?
21 Biblia lɛ kɛɔ hu akɛ: “Mɔ ni heɔ bi lɛ nɔ eyeɔ lɛ, eyɛ naanɔ wala.” Kɛkɛ ni ekɛfata he akɛ: “Mɔ ni booo bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.” (Yohane 3:36) Obaanyɛ otsɔɔ akɛ oohe Bi lɛ ooye kɛtsɔ tsakemɔi ni ofeɔ yɛ oshihilɛ mli kɛ Nyɔŋmɔ suɔmɔnaa nifeemɔ ni ohaa ekɛkpãa gbee lɛ nɔ. Esa akɛ okpoo gbɛ fɔŋ fɛɛ gbɛ fɔŋ ni ekolɛ onyiɛ nɔ lɛ, koni ofee nii ni saa Nyɔŋmɔ hiɛ. Ehe miihia ni ofee nɔ ni bɔfo Petro fã lɛ, akɛ: “No hewɔ lɛ nyɛtsakea nyɛtsuiiaŋ, ni nyɛkua nyɛsɛɛ, koni agbe nyɛhe eshai lɛ, beni afee ni hejɔɔmɔ yinɔ ajɛ [Yehowa] hiɛ aba.”—Bɔfoi lɛ Asaji 3:19.
22. Mɛɛ nifeemɔi fata Yesu nanemaahei asɛɛnyiɛmɔ lɛ he?
22 Eba akɛ wɔhiɛ kpaŋ nɔ kɔkɔɔkɔ akɛ Yesu mli hemɔkɛyeli ni wɔɔná lɛ pɛ nɔ wɔɔtsɔ wɔná naanɔ wala mli ŋɔɔmɔ. (Yohane 6:40; 14:6) Wɔtsɔɔ akɛ wɔnáa Yesu mli hemɔkɛyeli kɛtsɔɔ ‘enanemaahei asɛɛ ni wɔɔnyiɛ kpaakpa’ lɛ nɔ. (1 Petro 2:21) Mɛni fata nakai feemɔ he? Ojogbaŋŋ, Yesu kɛ Nyɔŋmɔ wie yɛ sɔlemɔ mli akɛ: ‘Naa! miba ní mibafee osuɔmɔnaa nii, oo Nyɔŋmɔ.’ (Hebribii 10:7) Ehe miihia ni okase Yesu yɛ Nyɔŋmɔ suɔmɔnaa nii ni oookpɛlɛ nɔ akɛ obaafee lɛ mli koni ojɔɔ owala nɔ oha Yehowa. Yɛ no sɛɛ lɛ, ehe baahia ni okɛ nu mli baptisimɔ afee nakai henɔjɔɔmɔ lɛ he okadi; Yesu hu kɛ ehe ha kɛha baptisimɔ. (Luka 3:21, 22) Shishinumɔ diɛŋtsɛ yɛ nifeemɔ ni tamɔ nɛkɛ mli. Bɔfo Paulo wie akɛ, “Kristo suɔmɔ lɛ nyɛɔ wɔnɔ.” (2 Korintobii 5:14, 15) Yɛ mɛɛ gbɛ nɔ? Ojogbaŋŋ, suɔmɔ tsirɛ Yesu koni ekɛ ewala afɔ̃ shi aha wɔ. Ani esaaa akɛ enɛ anyɛ wɔnɔ koni wɔná emli hemɔkɛyeli? Hɛɛ, esa akɛ enyɛ wɔnɔ koni wɔnyiɛ enɔkwɛmɔnɔ ni suɔmɔ yɔɔ mli ni ji ehe ni ekɛha kɛha mɛi krokomɛi ayelikɛbuamɔ lɛ sɛɛ. Kristo hi shi kɛha Nyɔŋmɔ suɔmɔnaa nifeemɔ; esa akɛ wɔfee nakai nɔŋŋ, wɔhiii shi wɔhaaa wɔhe dɔŋŋ.
23. (a) Esa akɛ akɛ mɛi ni nine shɛɔ wala nɔ lɛ afata namɛi ahe? (b) Mɛni ataoɔ yɛ mɛi ni yɔɔ Kristofoi asafo lɛ mli lɛ adɛŋ?
23 Jeee sane lɛ naagbee nɛ. Biblia lɛ kɛɔ akɛ beni abaptisi mɛi 3,000 yɛ Pentekoste afi 33 Ŋ.B. lɛ, akɛ amɛ ‘fata amɛhe.’ Akɛ amɛ fata namɛi ahe? Luka tsɔɔ mli akɛ: “Ni amɛhiɛ bɔfoi lɛ atsɔɔmɔ lɛ kɛ naanyobɔɔ” lɛ mli. (Bɔfoi lɛ Asaji 2:41, 42) Hɛɛ, amɛkpe kutuu kɛha Biblia kasemɔ kɛ naanyobɔɔ, ni enɛ ha akɛ amɛ bafata amɛhe, loo amɛbafee Kristofoi asafo lɛ fã. Klɛŋklɛŋ Kristofoi lɛ yaa kpeei daa kɛha mumɔŋ tsɔsemɔ. (Hebribii 10:25) Ŋmɛnɛ, Yehowa Odasefoi feɔ nakai nɔŋŋ, ni amɛbaasumɔ ni amɛwo bo hewalɛ koni okɛ amɛ aya nɛkɛ kpeei nɛɛ.
24. Mɛni ji “anɔkwa wala lɛ,” ni mɛɛ gbɛ kɛ mɛɛ be nine baashɛ nɔ?
24 Amrɔ nɛɛ gbɔmɛi akpekpei abɔ nyiɛ gbɛ ni etsa ni kɛ mɔ yaa wala mli lɛ nɔ. Ebiɔ mɔdɛŋbɔɔ diɛŋtsɛ dani anyɛ anyiɛ gbɛ ni nɔ etsa nɛɛ nɔ! (Mateo 7:13, 14) Paulo tsɔɔ enɛ yɛ ehewalɛwoo wiemɔi ni miishɛɛ yɔɔ mli lɛ mli akɛ: “Wu hemɔkɛyeli he ta kpakpa lɛ, mɔ naanɔ wala lɛ mli, nɔ̃ he hu ni atsɛo kɛba [lɛ].” Ta ni awuɔ nɛɛ he miihia koni anyɛ amɔ “anɔkwa wala lɛ mli.” (1 Timoteo 6:12, 19) Nakai wala lɛ jeee ŋmɛnɛŋmɛnɛ wala ní hewaa kɛ piŋmɔ kɛ amanehulu ni Adam esha lɛ kɛba wɔnɔ lɛ. Shi moŋ, eji wala yɛ Nyɔŋmɔ jeŋ hee lɛ mli, nɔ ni etsɛŋ ni ebaaba, beni akɛ Kristo kpɔmɔ afɔleshaa lɛ tsũɔ mɛi fɛɛ ni sumɔɔ Yehowa Nyɔŋmɔ kɛ e-Bi lɛ ahe nii, beni ajie nibii agbɛjianɔtoo nɛɛ kɛtee kwraa sɛɛ lɛ. Eba akɛ wɔ fɛɛ wɔɔhala wala—“anɔkwa wala lɛ”—naanɔ wala yɛ Nyɔŋmɔ anunyam jeŋ hee lɛ mli.
Te Obaaha Hetoo Oha Tɛŋŋ?
◻ Namɛi ji onufu lɛ, yoo lɛ, kɛ seshi ni yɔɔ 1 Mose 3:15 lɛ?
◻ Yesu kɛ Adam yeɔ egbɔ yɛ mɛɛ gbɛ nɔ, ni kpɔmɔnɔ lɛ ha mɛni ba?
◻ Mɛni obaanyɛ okpa gbɛ ni baaha Nyɔŋmɔ jeŋ hee lɛ afee nɔ ni baaŋɔɔ waa kɛha bo?
◻ Mɛɛ taomɔ nii ehe hiaa ni wɔshɛ he koni wɔhi shi yɛ Nyɔŋmɔ jeŋ hee lɛ mli?
[Mfoniri ni yɔɔ baafa 10]
Yesu ji gbɛ kome pɛ ni kɛ mɔ yaa naanɔ wala mli kɛha gbekɛbii kɛ onukpai fɛɛ
[Mfoniri ni yɔɔ baafa 11]
Yɛ Nyɔŋmɔ be ni sa mli lɛ, mɛi ni egbɔlɔ lɛ baaba oblahii kɛ oblayei agbɔmɔtsoŋ hewalɛnamɔ mli ekoŋŋ