Tsi Obɛŋkɛ Nyɔŋmɔ
Mɔ ni Buɔ Wɔ akɛ Wɔjara Wa Waa Lɛ
“WƆTSUII buɔ wɔ fɔ.” Biblia mli wiemɔi nɛɛ tsɔɔ akɛ, bei komɛi lɛ wɔtsuii baanyɛ aha wɔbu wɔhe fɔ fe nine. Yɛ anɔkwale mli lɛ, ekolɛ ebaaha wɔnu he akɛ, wɔsaaa Nyɔŋmɔ suɔmɔ kɛ ekwɛmɔ lɛ. Kɛlɛ, Biblia lɛ maa nɔ mi kɛhaa wɔ akɛ: “Nyɔŋmɔ da fe wɔtsui, ni ele nii fiaa.” (1 Yohane 3:19, 20) Nyɔŋmɔ le wɔ fe bɔ ni wɔ diɛŋtsɛ wɔle wɔhe. Bɔ ni enaa wɔ ehaa lɛ baanyɛ afee srɔto kwraa yɛ bɔ ni wɔ diɛŋtsɛ wɔnaa wɔhe wɔhaa lɛ he. Kɛ́ nakai ji sane lɛ, belɛ te wɔjara wa ha tɛŋŋ yɛ Yehowa Nyɔŋmɔ, ni ji mɔ ni nɔ kwɔ fe fɛɛ lɛ hiɛ lɛ? Abaanyɛ ana sane nɛɛ hetoo yɛ nɔkwɛmɔnɔ ko ni taa mɔ tsuiŋ ni Yesu kɛtsu nii yɛ shihilɛi srɔtoi enyɔ amli lɛ mli.
Yɛ shihilɛ lɛ ekome mli lɛ, Yesu wie akɛ ‘ahɔɔ aflimatai enyɔ aheɔ pesewa.’ (Mateo 10:29, 31, Ga Biblia Hee) Taakɛ Luka 12:6, 7 lɛ tsɔɔ lɛ, Yesu wie hu akɛ: “Ani jeee kpãi [pesewai] enyɔ ahɔɔ aflimatai enumɔ aheɔ? shi Nyɔŋmɔ hiɛ kpaaa amɛteŋ ekome folo nɔ. . . . Nyɛkashea gbeyei; nyɛjara wa fe aflimatai babaoo.” Nɔkwɛmɔnɔ ni shishinumɔ waaa shi efeɔ sane lɛ faŋŋ nɛɛ haa wɔnaa bɔ ni Yehowa buɔ ejálɔi lɛ ateŋ mɔ fɛɛ mɔ ehaa.
Loofɔji ni akɛhoɔ niyenii ni jara waaa kwraa lɛ ateŋ ekome ji aflimata. Yesu ekpa shi ena ohiafoi—ni emami po fata he lɛ—yɛ jara lɛ nɔ akɛ amɛmiihe loofɔji bibii nɛɛ eko kɛha amɛweku lɛ kwɛmɔ. Abaanyɛ akɛ assarion, ni ji kaplɛ kome ni shɛɛɛ ŋmɛnɛŋmɛnɛ beaŋ Ghana pesewai enumɔ lɛ ahé aflimatai enyɔ. Nɛkɛ loofɔji nɛɛ ajara waaa aahu akɛ, kɛ́ ohiɛ pesewai enyɔ lɛ, abaaha bo aflimatai enumɔ shi jeee ejwɛ, ni tsɔɔ ákɛ akɛ ekome gbeɔ yi ni aheee shika.
Yesu tsɔɔ mli akɛ “Nyɔŋmɔ hiɛ kpaaa” aflimatai nɛɛ ateŋ eko eko “nɔ,” aloo akɛ “amɛteŋ ekome folo enyɔŋ shikpɔŋ” ni Tsɛ lɛ leee he nɔ ko. (Mateo 10:29) Be fɛɛ be ni aflimata ko baanyɔ shikpɔŋ yɛ ekolɛ pilamɔ ni epila loo kɛha niyenii taomɔ hewɔ lɛ, Yehowa yɔseɔ lɛ. Bɔ ni loofɔji ni etamɔ nɔ ni amɛhe ehiaaa lɛ jeee nibii ni daraaa tsɔ kɛha Yehowa akɛ eeebɔ amɛ lɛ, nakai nɔŋŋ hu ehiɛ kpaŋ amɛnɔ akɛ ebaakwɛ amɛ. Yɛ anɔkwale mli lɛ, ebuɔ amɛ akɛ sɛɛnamɔ yɛ amɛhe ejaakɛ bɔɔ nii ni yɔɔ wala mli ni jara wa waa ji amɛ. Ani ona nikasemɔ ni yɔɔ Yesu nɔkwɛmɔnɔ lɛ mli lɛ?
Yɛ Yesu nitsɔɔmɔ mli lɛ, ekɛ nii ni akɛtoɔ nii ahe tsu nii ni ekɛtsɔɔ bɔ ni abaanyɛ akase nii babaoo kɛjɛ nɔ ko bibioo mli. Ákɛ nɔkwɛmɔnɔ lɛ, Yesu wie hu akɛ: ‘Kwaakwaalabitei lɛ, amɛduuu nii, asaŋ amɛkpaaa, ni amɛbɛ nitoohe loo aboŋo po, shi Nyɔŋmɔ lɛɔ amɛ; nyɛkwɛa bɔ ni nyɛjara wa aahu fe loofɔji!’ (Luka 12:24) Agbɛnɛ nikasemɔ ni yɔɔ Yesu wiemɔi ni kɔɔ aflimatai ahe lɛ bafeɔ faŋŋ akɛ: Kɛ́ Yehowa kwɛɔ loofɔji bibii nɛɛ, enyiɛ nɔŋŋ ni ekwɛŋ adesai ni sumɔɔ lɛ ni jáa lɛ lɛ!
Yɛ Yesu wiemɔi lɛ anaa lɛ, esaaa akɛ wɔnuɔ he akɛ sɛɛnamɔ bɛ wɔhe bɔ ni Nyɔŋmɔ ni “da fe wɔtsui” lɛ yɔseŋ wɔ ni ekwɛ wɔ. Ani ejeee nɔ ni shɛjeɔ mɔ mii akɛ wɔɔle akɛ wɔ-Bɔlɔ lɛ baanyɛ ana nɔ kpakpa ko yɛ wɔhe, ni ekolɛ wɔnyɛŋ wɔna nakai yɛ wɔ diɛŋtsɛ wɔhe?
[He ni Mfoniri ni yɔɔ baafa 9 lɛ Jɛ]
Aflimatai: © ARCO/D. Usher/age fotostock