Nɔ ko Nɔ ko Nyɛŋ ‘Agbála Wɔkɛ Nyɔŋmɔ Suɔmɔ lɛ Mli’

 1. Mɛɛ nijiaŋwujee henumɔi komɛi mɛi komɛi, ní Kristofoi komɛi po fata he lɛ náa?

ANI Yehowa Nyɔŋmɔ sumɔɔ bo diɛŋtsɛ? Mɛi komɛi kpɛlɛɔ nɔ akɛ Nyɔŋmɔ sumɔɔ adesai fɛɛ, taakɛ Yohane 3:16 lɛ kɛɔ lɛ. Shi bɔ ni amɛnuɔ he lɛ tsɔɔ akɛ: ‘Nyɔŋmɔ nyɛŋ asumɔ misane kɔkɔɔkɔ akɛ mɔ aŋkro.’ Bei komɛi lɛ, ekolɛ anɔkwa Kristofoi po ayiŋ feɔ amɛ kɔshikɔshi fioo yɛ no gbɛfaŋ. Nuu ko ní nijiaŋ eje wui lɛ kɛɛ akɛ: “Ewa waa diɛŋtsɛ kɛha mi akɛ mahe maye akɛ Nyɔŋmɔ susuɔ mihe bibioo kwraa po.” Ani yiŋkɔshikɔshifeemɔ ni tamɔ nakai nɔŋŋ haoɔ bo bei komɛi?

2, 3. Namɔ taoɔ ní eha wɔhe wɔye akɛ wɔhe bɛ sɛɛnamɔ ko yɛ Yehowa hiɛ loo enyɛŋ esumɔ wɔsane lɛ, ni mɛɛ gbɛ nɔ wɔɔtsɔ wɔwuu wɔshi nakai henumɔ lɛ?

² Satan miisumɔ waa ní eha wɔhe wɔye akɛ Yehowa Nyɔŋmɔ sumɔɔɔ wɔsane ni ebuuu wɔhe akɔntaa hu. Lɛɛlɛŋ, bei pii lɛ Satan lakaa gbɔmɛi kɛtsɔɔ henɔwomɔ kɛ hewoo mumɔ ní eteeɔ lɛ shi yɛ amɛmli lɛ nɔ. (2 Korintobii 11:3) Shi enáa bulɛ ní mɛi ní he waaa lɛ yɔɔ kɛhaa amɛhe lɛ fitemɔ hu he miishɛɛ. (Yohane 7:47-49; 8:13, 44) Enɛ ji anɔkwale titri yɛ nɛkɛ “naagbee gbii” nɛɛ amli. Mɛi pii daraa ŋmɛnɛ yɛ wekui ní amɛmli bii “edɔɔɔ mɔ he” lɛ amli. Mɛi krokomɛi hu yɛ ní mɛi ní amɛkɛnáa sharamɔ daa lɛ ji mɛi ní hiɛ yɔɔ la, pɛsɛmkunyatsɛmɛi, kɛ yiwalɔi. (2 Timoteo 3:1-5) Ekolɛ afii abɔ ní gbɔmɛi nɛɛ kɛhi yiwalɛ, hewolonɔ sui amli hetsɛ, loo nyɛ̃ɛ shishi lɛ etsɔ̃ amɛyiŋ akɛ amɛhe bɛ sɛɛnamɔ ko loo anyɛŋ aná suɔmɔ aha amɛ.

³ Kɛ́ onuɔ henumɔi gbohii ní tamɔ nɛkɛ he yɛ omli lɛ, onijiaŋ akaje wui. Wɔteŋ mɛi pii buɔ wɔhe fɔ́ yɛ gbɛ ní nilee bɛ mli nɔ yɛ be kɛ bei amli. Shi kaimɔ akɛ, aŋma Nyɔŋmɔ Wiemɔ lɛ kɛha “mɔ saamɔ,” kɛ agbɛnɛ hu, ní ‘akɛkumɔ mɔji wuji.’ (2 Timoteo 3:16; 2 Korintobii 10:4) Biblia lɛ kɛɔ akɛ: “Wɔɔtsɛ wɔtsuii wɔŋmɛ wɔmli yɛ ehiɛ, akɛ, kɛji wɔtsuii buɔ wɔ fɔ lɛ, Nyɔŋmɔ da fe wɔtsuii, ni ele nii fiaa.” (1 Yohane 3:19, 20) Nyɛhaa wɔsusua gbɛ̀i srɔtoi ejwɛ ní Ŋmalɛi lɛ tsɔɔ nɔ eyeɔ ebuaa wɔ koni ‘wɔtsɛ́ wɔtsuii wɔŋmɛ wɔmli’ yɛ Yehowa suɔmɔ lɛ hewɔ lɛ ahe wɔkwɛa.

4, 5. Yesu abɛbua ní kɔɔ afilimatai lɛ ahe lɛ tsɔɔ akɛ wɔjara wa waa yɛ Yehowa hiɛ yɛ mɛɛ gbɛ nɔ?

⁴ Klɛŋklɛŋ lɛ, Biblia lɛ tsɔɔ tɛ̃ɛ akɛ Nyɔŋmɔ naa etsuji lɛ ateŋ mɔ fɛɛ mɔ akɛ ehe yɛ sɛɛnamɔ. Ákɛ nɔkwɛmɔnɔ lɛ, Yesu kɛɛ akɛ: “Ani afilimatai enyɔ lɛ jeee hiɛbii nyɔŋma ahɔɔ aheɔ? shi amɛteŋ ekome folo enyɔŋ shikpɔŋ, ja ejɛ nyɛtsɛ lɛ dɛŋ. Shi nyɛyiteŋtsɔi po lɛ akane fɛɛ. No hewɔ lɛ nyɛkashea gbeyei; nyɛjara wa aahu fe afilimatai babaoo.” (Mateo 10:29-31) Susumɔ nɔ ni nakai wiemɔi lɛ tsɔɔ kɛha Yesu toibolɔi ní hi shi yɛ klɛŋklɛŋ afii oha lɛ mli lɛ he okwɛ.

⁵ Ekolɛ wɔbaasusu nɔ hewɔ ni mɔ ko baahe afilimata lɛ. Ojogbaŋŋ, yɛ Yesu gbii lɛ amli lɛ, no mli lɛ afilimata ji loofɔji ní ayeɔ, ní ahɔ̃ɔ lɛ ateŋ nɔ ni jara waaa kwraa. Kadimɔ akɛ kɛ́ nihelɔ lɛ hiɛ hiɛbii nyɔŋma lɛ, ebaaná afilimatai enyɔ. Shi Yesu tsɔɔ mli yɛ sɛɛ mli akɛ kɛ́ mɔ ko miitao ní ekɛ shika ni ji hiɛbii nyɔŋmai enyɔ ahe nii lɛ, jeee afilimatai ejwɛ ebaaná, shi moŋ enumɔ. Akɛ loofɔlɔ kome lɛ fataa he kɛhaa lɛ tamɔ nɔ ni no bɛ jara ko kwraa. Benɛ ekolɛ nɛkɛ bɔɔ nii nɛɛ ajara waaa kwraa yɛ adesai ahiɛ, shi te Bɔlɔ lɛ buɔ amɛ ehaa tɛŋŋ? Yesu kɛɛ akɛ: “Nyɔŋmɔ hiɛ kpaaa amɛteŋ ekome folo [kɛ nɔ ni akɛfata he akɛ mliwoo lɛ po] nɔ.” (Luka 12:6, 7) Ekolɛ wɔbɔi oti ní Yesu wieɔ he lɛ shishinumɔ. Kɛ́ afilimata kome jara wa yɛ Yehowa hiɛ nɛkɛ lɛ, kwɛ bɔ ni adesa jara baawa kwraa fe nakai! Taakɛ Yesu tsɔɔ mli lɛ, Yehowa le wɔhe saji fɛɛ fitsofitso. Ejaakɛ, wɔyiteŋ tsɔi tete po lɛ akane fɛɛ!

 6. Mɛni hewɔ wɔyɔɔ nɔmimaa akɛ nɔ ni Yesu wie lɛ baahi feemɔ diɛŋtsɛ beni ewie wɔyiteŋ tsɔi kanemɔ he lɛ?

⁶ Ákane wɔyiteŋ tsɔi? Ekolɛ mɛi komɛi baasusu akɛ nɔ ni Yesu wie nɛɛ jeee nɔ ko ní baahi feemɔ diɛŋtsɛ. Shi, bo diɛŋtsɛ susumɔ gbohiiashitee hiɛnɔkamɔ lɛ he okwɛ. Kwɛ bɔ ni esa akɛ Yehowa ale wɔ jogbaŋŋ diɛŋtsɛ kɛmɔ shi, bɔni afee ní enyɛ ebɔ wɔ ekoŋŋ! Wɔjara wa kɛha lɛ aahu akɛ ekaiɔ wɔhe saji fɛɛ, ni nɔ ni fata he ji wɔ fɔmɔ su mli nibii kɛ saji ní wɔkɛto wɔjwɛŋmɔ mli afii abɔ kɛ wɔ niiashikpamɔi fɛɛ fitsofitso.a Wɔyiteŋ tsɔi—ní kɛ́ aja mli lɛ, aaashɛ 100,000 tsaa yɛ yitso kome nɔ lɛ—kanemɔ baafee nitsumɔ bibioo kwraa kɛ́ akɛto he.

7, 8. (a) Mɛɛ sui komɛi Yehowa náa he miishɛɛ akɛ eeena beni etaoɔ adesai atsuii amli lɛ? (b) Mɛni ji nitsumɔ ní wɔtsuɔ, ní jara wa waa yɛ Yehowa hiɛ lɛ ekomɛi?

⁷ Nɔ ni ji enyɔ lɛ, Biblia lɛ tsɔɔ wɔ nɔ ni haa Yehowa tsuji ajara waa yɛ ehiɛ lɛ. Kɛ́ wɔɔwie he kuku lɛ, enáa wɔsui kpakpai lɛ kɛ mɔdɛŋ ní wɔbɔɔ ní wɔjie nakai sui lɛ akpo lɛ he miishɛɛ. Maŋtsɛ David kɛɛ ebinuu Salomo akɛ: “Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ.” (1 Kronika 28:9) Beni Nyɔŋmɔ taoɔ adesai atsuii akpekpei akpei abɔ lɛ amli yɛ jeŋ ní yiwalɛ, kɛ hetsɛ eyi lɛ obɔ nɛɛ mli lɛ, kwɛ bɔ ni emii baashɛ ehe aha kɛ́ ena tsui ko ni sumɔɔ toiŋjɔlɛ, anɔkwale, kɛ jalɛ nifeemɔ lɛ! Mɛni baa kɛ́ Nyɔŋmɔ na tsui ko ní eyi obɔ kɛ suɔmɔ kɛha lɛ, ní taoɔ akɛ ekase ehe nii koni egba mɛi krokomɛi nakai nilee lɛ hu lɛ? Yehowa kɛɔ wɔ akɛ ekadiɔ mɛi ní kɛ mɛi krokomɛi gbaa ehe sane lɛ. Eyɛ “kaimɔ wolo” po kɛha mɛi fɛɛ “ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.” (Maleaki 3:16) Nɛkɛ sui nɛɛ ajara wa waa kɛha lɛ.

⁸ Mɛni ji nitsumɔi kpakpai ní jara wa waa yɛ Yehowa hiɛ lɛ ekomɛi? Eka shi faŋŋ akɛ, mɔdɛŋ ní wɔbɔɔ ní wɔkase e-Bi, Yesu Kristo lɛ fata he. (1 Petro 2:21) Nitsumɔ ko ní he hiaa waa, ní jara wa waa yɛ Nyɔŋmɔ hiɛ ji e-Maŋtsɛyeli lɛ he sanekpakpa lɛ shiɛmɔ. Wɔkaneɔ yɛ Romabii 10:15 lɛ akɛ: “Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!” Ekolɛ efɔɔɔ kaa akɛ wɔɔsusu wɔnaji foji nɛɛ ahe akɛ ‘amɛyɛ fɛo.’ Shi nɔ ni amɛdamɔ shi kɛha yɛ biɛ ji mɔdɛŋ ní Yehowa tsuji bɔɔ yɛ sanekpakpa shiɛmɔ lɛ mli lɛ. Nɛkɛ mɔdɛŋbɔɔi nɛɛ fɛɛ hi jogbaŋŋ ni amɛjara wa waa yɛ ehiɛ.—Mateo 24:14; 28:19, 20.

9, 10. (a) Mɛni hewɔ wɔbaanyɛ wɔná nɔmimaa akɛ Yehowa buɔ wɔ tsuishiŋmɛɛ yɛ jaramɔ shihilɛi srɔtoi ashishi lɛ akɛ ejara wa waa lɛ? (b) Mɛɛ susumɔi fɔji Yehowa náaa yɛ etsuji anɔkwafoi lɛ ahe kɔkɔɔkɔ?

⁹ Yehowa buɔ wɔ tsuishiŋmɛɛ lɛ hu akɛ ejara wa waa. (Mateo 24:13) Kaimɔ akɛ, Satan miitao ní okpa Yehowa sɔɔmɔ. Gbi fɛɛ gbi ní ohiɔ shi anɔkwafo ohaa Yehowa lɛ feɔ gbi kroko hu ní okɛyeɔ obuaa ni akɛnáa hetoo ahaa Satan ahorabɔɔ wiemɔi lɛ. (Abɛi 27:11) Bei komɛi lɛ, tsuishiŋmɛɛ jeee nɔ ko ni yɔɔ mlɛo. Gbɔmɔtsoŋ hewalɛnamɔ mli naagbai, ohia, henumɔŋ haomɔi, kɛ gbɛtsii nii krokomɛi baanyɛ aha efee kaa gbi fɛɛ gbi. Gbɛkpamɔi ní baaa mli oyá lɛ hu baanyɛ ekɛ nijiaŋwujee aba. (Abɛi 13:12) Wɔ tsuishiŋmɛɛ yɛ nɛkɛ kaai nɛɛ fɛɛ ashishi lɛ jara wa waa yɛ Yehowa hiɛ. No hewɔ ni Maŋtsɛ David bi ní Yehowa kɛ ehiɛ yaafonui lɛ ato wolo “tɔ” mli lɛ, ni ekɛ hekɛnɔfɔɔ bi akɛ: “Ani amɛbɛ owolo lɛ mli?” (Lala 56:9) Hɛɛ, Yehowa buɔ yaafonui kɛ amanehului ní wɔŋmɛɔ wɔtsui shi yɛ mli, ní wɔkɛhiɛɔ anɔkwayeli mli wɔhaa lɛ lɛ akɛ ejara wa waa, ni ekaiɔ fɛɛ hu. Nomɛi hu jara wa waa yɛ ehiɛ.

¹⁰ Shi agbɛnɛ, ekolɛ tsui ní buɔ ehe fɔ́ lɛ baate shi awo nɛkɛ odaseyeli ní tsɔɔ bɔ ni wɔjara wa waa yɛ Nyɔŋmɔ hiɛ nɛɛ. Ekolɛ eeeya nɔ ewie ablɛbi ewo wɔtoiiaŋ be fɛɛ be akɛ: ‘Shi bɛ mɛi krokomɛi babaoo yɛ ní feɔ nɔkwɛmɔnɔ kpakpa waa yɛ nakai sui lɛ amli fe mi. Kwɛ bɔ ni Yehowa nijiaŋ baaje wui aha kɛ́ ekɛ mi to amɛhe!’ Yehowa kɛ mɔ ko etooo mɔ kroko he; nakai nɔŋŋ hu ejeee mɔ ni yɔɔ kpɛŋŋ loo shɛii yɛ esusumɔ mli. (Galatabii 6:4) Ekɛ sɛɛyoomɔ kɛ nyɛmɔ kpele tsuɔ nii ni ekɛleɔ tsuii amli saji, ni ebuɔ sui kpakpai—ní ajieɔ lɛ kpo yɛ gbɛ̀i bibii kwraa po nɔ lɛ akɛ amɛjara wa waa.

11. Mɛni wɔbaanyɛ wɔkase yɛ Yehowa he, kɛjɛ bɔ ni etsu Abia sane lɛ he nii eha lɛ mli?

¹¹ Nɔ ni ji etɛ lɛ, kɛ́ Yehowa miitao wɔmli lɛ, ekwɛɔ wɔmli jogbaŋŋ, ni etaoɔ nibii kpakpai lɛ. Ákɛ nɔkwɛmɔnɔ lɛ, beni Yehowa wo akpɔ akɛ akpata Maŋtsɛ Yerobeam maŋtsɛmɛi aweku ní ekwa hemɔkɛyeli lɛ fɛɛ ahiɛ lɛ, E-fã akɛ afũ maŋtsɛ lɛ bii lɛ ateŋ mɔ kome, ni ji Abia pɛ yɛ gbɛ kpakpa nɔ. Mɛni hewɔ? “Lɛ ehe ana nɔ̃ kpakpa ko yɛ, yɛ Yehowa, Israel Nyɔŋmɔ lɛ, hiɛ.” (1 Maŋtsɛmɛi 14:1, 10-13) Enɛ tsɔɔ akɛ, Yehowa kwɛ nakai oblanyo lɛ tsui mli jogbaŋŋ ni ena “nɔ̃ kpakpa ko” yɛ jɛmɛ. Bɔ fɛɛ bɔ ni nakai nɔ̃ kpakpa lɛ yɔɔ bibioo loo etamɔ nɔ ni he ehiaaa po lɛ, Yehowa na akɛ eji nɔ ni sa akɛ aŋma awo e-Wiemɔ lɛ mli. Ewo he nyɔmɔ po, ni ejie mɔbɔnalɛ ní fa bɔ ni sa kpo etsɔɔ nakai hemɔkɛyeli kwalɔi awe lɛ mlinyo kome lɛ.

12, 13. (a) Yɛ mɛɛ gbɛ nɔ Maŋtsɛ Yehoshafat sane lɛ tsɔɔ akɛ kɛji wɔfee esha po lɛ, kɛlɛ Yehowa taoɔ nɔ̃ kpakpa ní yɔɔ wɔmli lɛ? (b) Yehowa feɔ nii tamɔ Fɔlɔ ní yɔɔ ebii ahe miishɛɛ yɛ wɔsui kpakpai lɛ agbɛfaŋ, yɛ mɛɛ gbɛ nɔ?

¹² Anaa nɔkwɛmɔnɔ ní sa kadimɔ waa po yɛ Maŋtsɛ kpakpa Yehoshafat gbɛfaŋ. Beni maŋtsɛ lɛ fee kwashiai anii ko lɛ, Yehowa gbalɔ lɛ kɛɛ lɛ akɛ: “Enɛ hewɔ lɛ Yehowa mlifu kã onɔ!” Mɛɛ susumɔ ní hiɛdɔɔ yɔɔ mli waa nɛ! Shi Yehowa shɛɛ sane lɛ waaa jɛmɛ. Etee nɔ akɛ: “Shi kɛlɛ ana nibii kpakpai komɛi yɛ ohe.” (2 Kronika 19:1-3) No hewɔ lɛ Yehowa jalɛ mlifu lɛ haaa eku ehiɛ efɔ̃ ekpakpa ní yɔɔ Yehoshafat mli lɛ nɔ. Kwɛ bɔ ni enɛ tamɔɔɔ adesai ní yeee emuu lɛ anifeemɔ kwraa! Kɛ́ mɛi krokomɛi ha wɔmli fũ lɛ, ekolɛ no baaha wɔku wɔhiɛ wɔfɔ̃ nibii kpakpai ní yɔɔ amɛmli lɛ anɔ. Ni kɛ́ wɔfee esha lɛ, ekolɛ nijiaŋwujee, hiɛgbele, kɛ fɔyeli ní wɔnuɔ he lɛ haa wɔkuɔ wɔhiɛ wɔfɔ̃ɔ ekpakpa ní yɔɔ wɔ diɛŋtsɛ wɔmli lɛ nɔ kwraa. Shi kɛlɛ, kaimɔ akɛ kɛ́ wɔshwa wɔhe kɛjɛ wɔhe eshai lɛ amli ni wɔbɔ mɔdɛŋ waa ní wɔkafee nakai eshai lɛ dɔŋŋ lɛ, no lɛ Yehowa kɛkeɔ wɔ.

¹³ Yɛ be mli ní Yehowa taoɔ omli jogbaŋŋ lɛ, ejieɔ eshai ní tamɔ nɛkɛ kɛjɛɔ mli, tamɔ bɔ ni shika-taolɔ ní miifɔ́ shika he kɛmiijɛ sũ mli lɛ jieɔ ŋmlitsa ní he bɛ sɛɛnamɔ lɛ yɛ mli eshɛrɛɔ eshwieɔ lɛ. Shi osui kpakpai kɛ onitsumɔi kpakpai lɛ hu? Hɛɛ, enɛɛmɛi ji “shika kpɔbii” ní ekɛtoɔ lɛ! Ani okadi bɔ ni fɔlɔi komɛi kɛ nibii ní amɛbii lɛ tɛŋ loo aha amɛfee yɛ skul lɛ toɔ waa kɛ miishɛɛ, ní bei komɛi lɛ eyeɔ afii nyɔŋmai abɔ yɛ be mli ní gbekɛbii lɛ ahiɛ ekpa nɔ po sɛɛ lɛ dã? Yehowa ji Fɔlɔ ní yɔɔ ebii ahe miishɛɛ fe fɛɛ. Bei abɔ ní wɔyaa nɔ wɔyeɔ lɛ anɔkwa lɛ, ehiɛ kpaaa wɔnitsumɔi kɛ wɔsui kpakpai lɛ anɔ kɔkɔɔkɔ. Yɛ anɔkwale mli lɛ, ebaabu lɛ akɛ eji nɔ ni ejaaa gbɛ akɛ ehiɛ aaakpa enɛɛmɛi anɔ, ni ejeee mɔ ni feɔ nii ní ejaaa. (Hebribii 6:10) Etaoɔ wɔmli jogbaŋŋ yɛ gbɛ kroko hu nɔ.

14, 15. (a) Mɛni hewɔ emuu ní wɔyeee lɛ haaa Yehowa aku ehiɛ efɔ̃ nɔ̃ kpakpa ní yɔɔ wɔmli lɛ nɔ kɔkɔɔkɔ lɛ? Okɛ enɛ he nɔkwɛmɔnɔ aha. (b) Mɛni Yehowa kɛ sui kpakpai ní enaa yɛ wɔmli lɛ baafee, ni te ebuɔ ewebii anɔkwafoi lɛ ehaa tɛŋŋ?

¹⁴ Yehowa kwɛɔ nii kɛtekeɔ emuu ní wɔyeee lɛ ni enaa nibii ní wɔbaanyɛ wɔfee. Ákɛ nɔkwɛmɔnɔ lɛ: Gbɔmɛi ní sumɔɔ nitɛŋmɔi loo mfonirii lɛ bɔɔ mɔdɛŋ fɛɛ ní amɛaanyɛ ni amɛkɛsaa nitɛŋmɔi loo nitsumɔi krokomɛi ní miihe afite lɛ. Ákɛ nɔkwɛmɔnɔ lɛ, beni mɔ ko kɛ tũ fite mfoniri ko ní Leonardo da Vinci tɛŋ, ní ejarawalɛ aaashɛ dɔlai akpekpei 30, yɛ National Gallery yɛ London, England lɛ, mɔ ko mɔ ko ewieee akɛ akɛni afite mfoniri lɛ agbɛnɛ hewɔ lɛ, esa akɛ ashɛ́ afɔ̃ he ko. Aje nitsumɔ ní ji nitɛŋlɔ ní he esa fe fɛɛ nɛɛ ninenaa nitsumɔ ní eye afii 500 nɛɛ saamɔ lɛ shishi amrɔ nɔŋŋ. Mɛni hewɔ? Ejaakɛ ejara wa waa yɛ mɛi ní sumɔɔ nitɛŋmɔi lɛ ahiɛ. Ani ojara waaa kwraa fe mfoniri ní akɛ tsɔɔki kɛ ŋãi etɛŋ lɛ? Eka shi faŋŋ akɛ ojara wa waa yɛ Nyɔŋmɔ hiɛ—ni bɔ ni emuu ní wɔyeee ní wɔná kɛjɛ fɔmɔ mli lɛ efite bo eha lɛ kɔɔɔ he eko. (Lala 72:12-14) Yehowa Nyɔŋmɔ, adesai aweku lɛ Bɔlɔ ní he esa lɛ, baafee nɔ fɛɛ nɔ ni he hiaa koni ekɛ mɛi fɛɛ ni here ekwɛmɔ ní suɔmɔ yɔɔ mli lɛ nɔ lɛ aku sɛɛ aba emuuyeli mli ekoŋŋ.—Bɔfoi lɛ Asaji 3:21; Romabii 8:20-22.

¹⁵ Hɛɛ, Yehowa naa nɔ̃ kpakpa ní yɔɔ wɔmli ní ekolɛ wɔ diɛŋtsɛ wɔnaaa yɛ wɔmli lɛ. Ni yɛ be mli ní wɔsɔmɔɔ lɛ lɛ, ebaaha nakai nɔ̃ kpakpa lɛ ada aahu kɛyashi be mli ní wɔɔye emuu yɛ naagbee kwraa. Yɛ bɔ ni Satan je lɛ kɛ wɔ eye eha lɛ fɛɛ sɛɛ lɛ, Yehowa buɔ etsuji anɔkwafoi lɛ akɛ amɛjara wa waa.—Hagai 2:7.

16. Mɛni ji suɔmɔ ní Yehowa yɔɔ kɛha wɔ lɛ he odaseyeli kpele fe fɛɛ, ni te wɔfeɔ tɛŋŋ wɔleɔ akɛ, akɛ nikeenii nɛɛ ha wɔ diɛŋtsɛ pɔtɛɛ lɛ?

¹⁶ Nɔ ni ji ejwɛ lɛ, Yehowa feɔ nibii babaoo ni ekɛmaa suɔmɔ ní eyɔɔ kɛha wɔ lɛ nɔ mi. Eka shi faŋŋ akɛ, Kristo kpɔmɔ afɔleshaa lɛ ji hetoo ní mli wa fe fɛɛ ní akɛhaa amale wiemɔ ní Satan wie akɛ wɔhe bɛ sɛɛnamɔ ko loo asumɔɔɔ wɔsane lɛ. Esaaa ní wɔhiɛ kpaa nɔ kɔkɔɔkɔ akɛ piŋmɔ gbele ní Yesu gbo yɛ sɛŋmɔtso lɛ nɔ, kɛ hejaramɔ kpele diɛŋtsɛ ní Yehowa ŋmɛ etsui shi yɛ mli beni ekwɛɔ esuɔmɔ Bi lɛ gbele lɛ ji suɔmɔ ní amɛyɔɔ kɛha wɔ lɛ he odaseyeli. Dɔlɛ sane ji akɛ, ewa kɛha mɛi pii akɛ amɛaahe amɛye akɛ, akɛ nɛkɛ nikeenii nɛɛ ha amɛ diɛŋtsɛ pɔtɛɛ. Amɛnuɔ he akɛ amɛhe bɛ sɛɛnamɔ ko. Shi, kaimɔ akɛ tsutsu ko lɛ, kulɛ bɔfo Paulo ji Kristo sɛɛnyiɛlɔi lɛ ayiwalɔ. Shi kɛlɛ, eŋma akɛ: ‘Nyɔŋmɔ bi lɛ sumɔ mi ni eŋɔ ehe eha yɛ mihewɔ.’—Galatabii 1:13; 2:20.

17. Mɛɛ gbɛ nɔ Yehowa tsɔɔ egbalaa wɔ kɛbɛŋkɛɔ lɛ diɛŋtsɛ kɛ e-Bi lɛ he?

¹⁷ Yehowa maa suɔmɔ ní eyɔɔ kɛha wɔ lɛ nɔ mi kɛtsɔ yelikɛbuamɔ ní ekɛhaa wɔ aŋkroaŋkro koni wɔná Kristo afɔleshaa lɛ mli sɛɛnamɔi lɛ ahe sɛɛ lɛ nɔ. Yesu kɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” (Yohane 6:44) Hɛɛ, Yehowa diɛŋtsɛ gbalaa wɔ kɛbɛŋkɛɔ e-Bi lɛ kɛ naanɔ wala hiɛnɔkamɔ lɛ he. Yɛ mɛɛ gbɛ nɔ? Kɛtsɔ shiɛmɔ nitsumɔ lɛ, ní shɛɔ wɔ ŋɔɔ aŋkroaŋkro lɛ nɔ, kɛ agbɛnɛ hu kɛtsɔ emumɔ krɔŋkrɔŋ lɛ, ní Yehowa kɛtsuɔ nii ní ekɛyeɔ ebuaa koni wɔnu mumɔŋ anɔkwalei lɛ ashishi ní wɔkɛtsu nii hu, yɛ wɔ fatɔɔi kɛ emuu ní wɔyeee lɛ fɛɛ sɛɛ lɛ nɔ. No hewɔ lɛ, Yehowa baanyɛ akɛɛ yɛ wɔhe, taakɛ ekɛɛ yɛ Israel he lɛ, akɛ: “Naanɔ suɔmɔ mikɛsumɔo hewɔ lɛ mikɛ mlihilɛ miigbalao.”—Yeremia 31:3.

18, 19. (a) Mɛni ji gbɛ ní mli wa fe fɛɛ ní Yehowa tsɔɔ nɔ ejieɔ esuɔmɔ lɛ kpo etsɔɔ wɔ, ni mɛni tsɔɔ akɛ lɛ diɛŋtsɛ etsuɔ enɛ he nii? (b) Nyɔŋmɔ Wiemɔ lɛ maa nɔ mi kɛhaa wɔ akɛ Yehowa ji sane toibolɔ ní yɔɔ mlitsɔlɛ yɛ mɛɛ gbɛ nɔ?

¹⁸ Ekolɛ wɔnáa Yehowa suɔmɔ ní mli wa waa kɛha wɔ lɛ mli niiashikpamɔ kɛtsɔɔ sɔlemɔ hegbɛ ní wɔyɔɔ lɛ nɔ. Biblia lɛ fɔ̃ɔ wɔteŋ mɔ fɛɛ mɔ nine ní ‘wɔsɔle’ wɔha Nyɔŋmɔ ‘ní wɔkafɔ̃ɔ.’ (1 Tesalonikabii 5:17) Eboɔ toi. Atsɛɔ lɛ po akɛ ‘sɔlemɔ Toibolɔ.’ (Lala 65:3) Ekɛ nɛkɛ gbɛhe nɛɛ woko mɔ kroko dɛŋ ní etsu he nii, ekɛwoko lɛ diɛŋtsɛ e-Bi lɛ po dɛŋ. Bo diɛŋtsɛ susumɔ he okwɛ: Jeŋ muu fɛɛ Bɔlɔ lɛ woɔ wɔ hewalɛ ní wɔbɛŋkɛ lɛ yɛ sɔlemɔ mli, kɛ wiemɔ mli heyeli. Ni mɛɛ sane toibolɔ nɛkɛ eji? Mɔ ni náaa mɔ he miishɛɛ, ní jeee ehe sane ji nɔ ko, ní esusuuu mɔ he? Dabi kwraa.

¹⁹ Yehowa jieɔ mlitsɔlɛ kpo. Mɛni ji mlitsɔlɛ? Kristofonyo anɔkwafo ko ní eda yɛ afii amli wie akɛ: “Mlitsɔlɛ ji ní manu opiŋmɔ lɛ he yɛ mitsui mli.” Ani wɔ piŋmɔ lɛ saa Yehowa he lɛɛlɛŋ? Wɔkaneɔ yɛ amanehulu ní emaŋ Israel na lɛ he akɛ: “Amɛhaomɔi lɛ fɛɛ mli lɛ, lɛ hu ehao.” (Yesaia 63:9) Jeee na kɛkɛ Yehowa na amɛ naagbai lɛ; enu he eha emaŋ lɛ. Afee bɔ ni Yehowa nuɔ he waa ehaa amɛ lɛ he mfoniri yɛ lɛ diɛŋtsɛ ewiemɔi ní ekɛ etsuji lɛ wie lɛ mli, akɛ: “Mɔ ni taa nyɛhe lɛ eeta [mi]hiŋmɛiŋ ajaŋmalaatɛ he.”b (Zakaria 2:12) Kwɛ bɔ ni ebaawa mɔ he eha! Hɛɛ, Yehowa nuɔ he ehaa wɔ. Kɛ́ wɔmiipiŋ lɛ, lɛ hu epiŋɔ.

20. Mɛɛ susumɔ ko ní eŋmɛɛɛ pɛpɛɛpɛ esa akɛ wɔkwa kɛji wɔaabo ŋaawoo ní anaa yɛ Romabii 12:3 lɛ toi?

²⁰ Kristofonyo ko kwraa bɛ ní ŋmɛɔ pɛpɛɛpɛ, ní kɛ Nyɔŋmɔ suɔmɔ lɛ kɛ bɔ ni etsuji ajara wa waa yɛ ehiɛ lɛ he odaseyeli nɛɛ baatsu nii akɛ naajiemɔ kɛha henɔwomɔ loo yaka anunyam taomɔ. Bɔfo Paulo ŋma akɛ: “Mikɛ duromɔ ni aŋɔduro mi lɛ miikɛɛ nyɛteŋ mɔ fɛɛ mɔ akɛ, ekabu lɛ diɛŋtsɛ ehe tuutu fe bɔ ni sa akɛ ebuɔ ehe; shi moŋ ejwɛŋ hiɛshikamɔ jwɛŋmɔ, mɔ fɛɛ mɔ lɛ taakɛ bɔ ni Nyɔŋmɔ esusu hemɔkɛyeli susumɔ eha lɛ lɛ.” (Romabii 12:3) Shishitsɔɔmɔ kroko ko kɛɔ yɛ biɛ akɛ: “Makɛɛ nyɛteŋ mɔ fɛɛ mɔ akɛ ekabu ehe fe bɔ ni ejarawalɛ ji diɛŋtsɛ, shi moŋ ebu lɛ diɛŋtsɛ ehe kɛ nɔkwɔlɛ ní baa shi.” (A Translation in the Language of the People ní Charles B. Williams fee lɛ) No hewɔ lɛ, yɛ be mli ní wɔkɛ miishɛɛ náa wɔŋwɛi Tsɛ lɛ suɔmɔ lɛ mli ŋɔɔmɔ lɛ, nyɛhaa wɔjwɛŋmɔ mli akãa shi ní wɔkaia akɛ wɔsaaa Nyɔŋmɔ suɔmɔ lɛ.—Luka 17:10.

21. Mɛɛ Satan amale wiemɔ ko esa akɛ wɔte shi wɔwo be fɛɛ be, ni mɛɛ anɔkwale ko ní jɛ ŋwɛi wɔbaanyɛ wɔya nɔ wɔkɛwaje wɔtsuii be fɛɛ be?

²¹ Nyɛhaa wɔteŋ mɔ fɛɛ mɔ afea nɔ fɛɛ nɔ ní wɔɔnyɛ ní wɔkɛkpoo Satan amalei, ní amale ní tsɔɔ akɛ wɔhe bɛ sɛɛnamɔ ko ní asumɔɔɔ wɔsane hu lɛ fata he lɛ fɛɛ. Kɛ́ oshihilɛ mli niiashikpamɔi eha onaa ohe akɛ oji gbɛtsii nii ní da tsɔ fe bɔ ni Nyɔŋmɔ suɔmɔ kpele lɛ baanyɛ aye nɔ kwraa, aloo onitsumɔi kpakpai lɛ yɛ bibioo kwraa tsɔ fe bɔ ni ehiŋmɛii ní naa nɔ fɛɛ nɔ lɛ baanyɛ akadi, aloo ohe eshai lɛ fá kwraa tsɔ fe bɔ ni e-Bi ní jara wa lɛ gbele lɛ baanyɛ atsĩmɔ nɔ lɛ, no lɛ bɔ ni onaa ohe lɛ ji amale kwraa. Jɛɛ otsui muu fɛɛ mli oshɛrɛ nɛkɛ amalei nɛɛ oshwie! Nyɛhaa wɔyaa nɔ wɔkɛ anɔkwale ní jeɔ kpo yɛ Paulo wiemɔi ní jɛ mumɔŋ nɛɛ amli lɛ awajea wɔtsuii, akɛ: “Miyɛ hewalɛ yɛ nɔ, ákɛ gbele jio wala jio, ŋwɛibɔfoi jio nɔyelɔi jio hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio shishi jio, aloo nii ní abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ní yɔɔ Kristo Yesu, wɔ-Nuntsɔ lɛ, mli lɛ mli.”—Romabii 8:38, 39.