Nɔkwɛlɔi Gbɛfalɔi—Gbɔmɛi Ateŋ Nikeenii
“Beni ekwɔ kɛtee ŋwɛi lɛ, eŋɔ nomii kɛtee; ekɛ gbɔmɛi ateŋ nikeenii hã.”—EFESOBII 4:8, NW.
1. Mɛɛ nitsumɔ hee wolo tɛtrɛɛ nɛɛ tswa he adafi yɛ 1894?
NƆ NI fe afii oha nɛ, ni Buu Mɔɔ lɛ tswa nɔ ko hee ko he adafi. Atsɔɔ mli akɛ eji “Shiɛmɔ Nitsumɔ lɛ Nine Kroko.” Nitsumɔ hee nɛɛ kɔɔ mɛni he? Eji ŋmɛnɛŋmɛnɛ beaŋ nɔkwɛlɔi gbɛfalɔi anitsumɔ lɛ ni ato shishi. Wolo tɛtrɛɛ nɛɛ mli Blɔfo nɔ̃ ni je kpo September 1, 1894 lɛ tsɔɔ mli akɛ, kɛjɛ be nɛɛ nɔ kɛyaa lɛ, nyɛmimɛi hii ni he esa baaba abasara Biblia Kaselɔi akui lɛ ‘kɛ yiŋtoo akɛ amɛaatswa amɛ amɛma shi yɛ anɔkwale lɛ mli.’
2. Mɛɛ nitsumɔi kpokpaa bibii kɛ kpokpaa wuji anɔkwɛlɔi tsuɔ?
2 Yɛ Ŋ.B. klɛŋklɛŋ afii oha lɛ mli lɛ, nɔkwɛlɔi tamɔ Paulo kɛ Barnaba sara Kristofoi asafoi lɛ. Yiŋtoo ni hii anɔkwafoi nɛɛ hiɛ ji ni ‘amɛtswa’ asafoi lɛ ‘amɛma shi.’ (2 Korintobii 10:8) Ŋmɛnɛ, akɛ hii akpei abɔ ni miifee enɛ yɛ gbɛjianɔtoo kpakpa nɔ ejɔɔ wɔ. Yehowa Odasefoi a-Nɔyeli Kuu lɛ ehala amɛ akɛ kpokpaa bibii kɛ kpokpaa wuji anɔ nɔkwɛlɔi. Kpokpaa nɔkwɛlɔ sɔmɔɔ asafoi aaafee 20, eko fɛɛ eko otsi, aaafee shii enyɔ yɛ afi mli, ni ekwɛɔ asafo lɛ he saji kɛ akɔntaabuu ni aŋmala ashwie shi lɛ amli, ehaa wiemɔi, ni ekɛ asafo lɛ mli Maŋtsɛyeli shiɛlɔi lɛ naa sɔɔmɔ nitsumɔ lɛ mli gbɛfaŋnɔ. Kpokpaa wulu nɔkwɛlɔ lɛ feɔ sɛinɔtalɔ kɛhaa daa afi kpokpaa nɔ kpeei lɛ kɛhaa kpokpai abɔ, ni ekɛ asafoi ni afeɔ kpokpaa nɔ kpee yɛ amɛ shikpɔŋkuku mli lɛ amli bii naa sɔɔmɔ nitsumɔ lɛ mli gbɛfaŋnɔ, ni ekɛ hewalɛwoo wiemɔi ni damɔ Biblia lɛ nɔ haa amɛ.
Amɛ He-kɛ-Afɔleshãa Mumɔ Lɛ
3. Mɛni hewɔ ehe hiaa ni nɔkwɛlɔi gbɛfalɔi aná he-kɛ-afɔleshaa mumɔ lɛ?
3 Nɔkwɛlɔi gbɛfalɔi fãa gbɛ be fɛɛ be. Enɛ diɛŋtsɛ biɔ he-kɛ-afɔleshãa mumɔ. Gbɛfãa kɛmiijɛ asafo kome mli kɛmiiya ekroko mli lɛ baanyɛ afee nɔ ni wa yɛ bei pii amli, shi nɛkɛ hii nɛɛ kɛ amɛ ŋamɛi feɔ nakai yɛ miishɛɛ su mli. Kpokpaa nɔkwɛlɔ ko kɛɛ: “Miŋa fiɔ misɛɛ waa ni huhuuhu wiemɔ bɛ mli . . . Esa yijiemɔ waa yɛ ehe-kɛ-afɔleshãa mumɔ lɛ hewɔ.” Kpokpaa nɔkwɛlɔi komɛi fãa gbɛ fe kilomitai 1,000 yɛ asafoi lɛ asaramɔ mli. Amɛteŋ mɛi pii kudɔɔ tsɔnei, shi mɛi krokomɛi hu kɛ maŋ lɛ mli gbɛfãa tsɔnei yaa, kɛtsɔ baisikel, loo okpɔŋɔ-nɔtamɔ, loo kɛtsɔ nyiɛmɔ nɔ. Afrika kpokpaa nɔkwɛlɔ ko wó eŋa eta ekɔŋ nɔ kɛfo faa bɔni afee ni enyɛ eyashɛ asafo ko mli. Ehe bahia ni bɔfo Paulo adamɔ latsaa kɛ fɛ̃i, hɔmɔ kɛ kumai, kpeshii, osharai sɔrɔtoi, kɛ yiwaa ni naa wa naa yɛ emaŋsɛɛ sanekpakpa shiɛmɔ gbɛfãai lɛ amli. Agbɛnɛ ‘ehaoɔ, yɛ asafoi lɛ ahesusumɔ’ hewɔ—niiashikpamɔ ni ŋmɛnɛ nɔkwɛlɔi gbɛfalɔi naa be fɛɛ be.—2 Korintobii 11:23-29.
4. Mɛɛ hewalɛ gbɔmɔtsoŋ hewalɛnamɔ mli naagbai baanyɛ aná yɛ nɔkwɛlɔi gbɛfalɔi kɛ amɛ ŋamɛi ashihilɛ nɔ?
4 Taakɛ Paulo hefatalɔ Timoteo ji lɛ, nɔkwɛlɔi gbɛfalɔi kɛ amɛ ŋamɛi ahe yeɔ yɛ bei komɛi amli. (1 Timoteo 5:23) Enɛ kɛ nɔnyɛɛ kroko baa amɛnɔ. Kpokpaa nɔkwɛlɔ ko ŋa tsɔɔ mli akɛ: “Nyɛmimɛi ni mikɛ amɛ hiɔ shi be fɛɛ be lɛ haa etɔɔ mi kɛ mibɛ hewalɛ. Akɛni miikpa tsũiasɛɛyaa hewɔ lɛ, minaa akɛ enɛ waa diɛŋtsɛ kɛhaa mi. Wɔ nibii fɛɛ ni wɔɔto ekoŋŋ daa otsi, ni wɔfã gbɛ kɛya he kroko lɛ ji kaa diɛŋtsɛ. Bei pii lɛ, esa akɛ mamɛ ni masɔle maha Yehowa koni eha mi hewalɛ ni mikɛya nɔ.”
5. Mɛɛ mumɔ loo su nɔkwɛlɔi gbɛfalɔi kɛ amɛ ŋamɛi ejie lɛ kpo yɛ kaai sɔrɔtoi lɛ fɛɛ sɛɛ?
5 Yɛ gbɔmɔtsoŋ hewalɛ mli naagbai kɛ kaai krokomɛi lɛ fɛɛ sɛɛ lɛ, nɔkwɛlɔi gbɛfalɔi kɛ amɛ ŋamɛi naa miishɛɛ yɛ amɛ sɔɔmɔ lɛ mli, ni amɛjieɔ he-kɛ-afɔleshãa suɔmɔ kpo. Mɛi komɛi kɛ amɛ wala ewo oshara mli yɛ yiwaa loo tawuu be mli koni amɛkɛ mumɔŋ yelikɛbuamɔ aha. Kɛ amɛmiisara asafoi lɛ, amɛjieɔ mumɔ ni tamɔ Paulo nɔ̃ lɛ kpo, mɔ ni kɛɛ Tesalonika Kristofoi lɛ akɛ: “Wɔmli jɔ yɛ nyɛteŋ, taakɛ bɔ ni biianyɛ hiɛɔ lɛ diɛŋtsɛ ebii dɔdɔɔdɔ lɛ. Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔyɛ he tsui akɛ jeee Nyɔŋmɔ sanekpakpa lɛ kɛkɛ wɔkɛaaha nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa” lɛ.—1 Tesalonikabii 2:7, 8.
6, 7. Mɛni ni naa mɔ nɔ hewalɛ kpakpa nɔkwɛlɔi gbɛfalɔi ni tsuɔ nii waa lɛ baanyɛ amɛkɛha?
6 Taakɛ onukpai krokomɛi ni yɔɔ Kristofoi asafo lɛ mli lɛ ji lɛ, nɔkwɛlɔi gbɛfalɔi “bɔɔ wiemɔ kɛ tsɔɔmɔ he mɔdɛŋ.” “Esa akɛ aŋɔ woo toi enyɔ awo” onukpai fɛɛ ni tamɔ nɛkɛ lɛ. (1 Timoteo 5:17) Amɛ nɔkwɛmɔ nɔ lɛ he baanyɛ aba sɛɛnamɔ, kɛji akɛ ‘yɛ be mli ni wɔkwɛ amɛ jeŋba lɛ sɛɛ lɛ, wɔkase amɛ hemɔkɛyeli lɛ.’—Hebribii 13:7.
7 Mɛɛ hewalɛ kpakpa nɔkwɛlɔi gbɛfalɔi komɛi ená yɛ mɛi krokomɛi anɔ? Yehowa Odasefonyo ko ŋma akɛ, “Mɛɛ hewalɛ ni yɔɔ naakpɛɛ Nyɛminuu P—— ná yɛ mishihilɛ nɔ nɛkɛ! Eji nɔkwɛlɔ gbɛfalɔ yɛ Mexico, kɛjɛ afi 1960 kɛyaa. Ákɛ gbekɛ̃ lɛ, mimɛɔ esaramɔ lɛ kɛ gbɛkpamɔ kɛ miishɛɛ. Beni miye afii 10 lɛ, ekɛɛ mi akɛ, ‘Bo hu obaatsɔ kpokpaa nɔkwɛlɔ.’ Beni mibote jaramɔ bei ni ji afii nyɔŋma kɛ etɛ kɛyaa lɛ amli lɛ, mifɔɔ esɛɛ gbɛ taomɔ, ejaakɛ eyɛ nilee wiemɔi ni ekɛaaha be fɛɛ be. Nɔ ni ehi shi kɛha ji tooi lɛ akwɛmɔ! Amrɔ nɛɛ ni mitsɔ kpokpaa nɔkwɛlɔ lɛ, mibɔɔ mɔdɛŋ be fɛɛ be ni matuu be maha gbekɛbii lɛ, ni mikɛ teokrase otii amamɔ amɛhiɛ taakɛ efee kɛha mi lɛ. Yɛ eshihilɛ be lɛ naagbee afii lɛ amli po, yɛ tsuihela ni miigba enaa lɛ fɛɛ sɛɛ lɛ, Nyɛminuu P—— bɔɔ mɔdɛŋ ni ekɛ hewalɛwoo wiemɔ aha be fɛɛ be. Beni eshwɛ gbi kome ni eeegbo yɛ February 1995 mli lɛ, efata mihe kɛtee gbi kome kpee krɛdɛɛ, ni ekɛ otii ni hi jogbaŋŋ mamɔ nyɛmi nuu ko ni yɔɔ tsũmaa he nilee hiɛ. Amrɔ nɔŋŋ ni nyɛmi nuu lɛ kɛ Betel sɔɔmɔ he gbɛbimɔ wolo ha.”
Hiɛ Sɔɔ Amɛ
8. Namɛi ji “gbɔmɛi ateŋ nikeenii” ni atsɔɔ mli yɛ Efesobii yitso 4 (NW) lɛ, ni amɛhe baa sɛɛnamɔ kɛhaa asafo lɛ yɛ mɛɛ gbɛ nɔ?
8 Atsɛɔ nɔkwɛlɔi gbɛfalɔi kɛ onukpai krokomɛi ni kɛtsɔ Nyɔŋmɔ mlihilɛ ni esaaa wɔ lɛ nɔ lɛ, akɛ sɔɔmɔ hegbɛi eduro amɛ lɛ akɛ “gbɔmɛi ateŋ nikeenii.” Ákɛ Yehowa najiaŋdamɔlɔ kɛ asafo lɛ Yitso lɛ, Yesu kɛ nɛkɛ mumɔŋ gbɔmɛi nɛɛ eha, bɔni afee ni atswa wɔ aŋkroaŋkro ama shi ni wɔdara yɛ mumɔŋ. (Efesobii 4:8-15, NW) Nikeenii fɛɛ nikeenii sa hiɛsɔɔ wiemɔ. Enɛ ji anɔkwale, titri lɛ yɛ nikeenii ni wajeɔ wɔ koni wɔya nɔ wɔsɔmɔ Yehowa lɛ he. No hewɔ lɛ, te wɔɔfee tɛŋŋ wɔjie wɔ hiɛsɔɔ kɛha nɔkwɛlɔi gbɛfalɔi lɛ kpo? Mɛɛ gbɛi anɔ wɔɔnyɛ wɔtsɔɔ akɛ ‘wɔbuɔ nɛkɛ gbɔmɛi nɛɛ akɛ mɛi ni sa woo’?—Filipibii 2:29.
9. Mɛɛ gbɛi anɔ wɔɔtsɔ wɔjie hiɛsɔɔ kpo wɔha nɔkwɛlɔi gbɛfalɔi?
9 Kɛ atswa kpokpaa nɔkwɛlɔ lɛ saramɔ he adafi lɛ, wɔbaanyɛ wɔje shishi wɔto gbɛjianɔ koni wɔna asafo lɛ nitsumɔi kɛha nakai otsi lɛ mli gbɛfaŋnɔ kɛmɔ shi. Ekolɛ wɔbaanyɛ wɔto be kroko wɔma shi ni wɔkɛfi sɔɔmɔ nitsumɔ he gbɛjianɔtoo lɛ sɛɛ yɛ saramɔ be lɛ mli. Ekolɛ wɔbaanyɛ wɔsɔmɔ akɛ gbɛgbalɔi awalɔi yɛ nakai nyɔŋ lɛ nɔ. Yɛ anɔkwale mli lɛ, wɔbaasumɔ ni wɔkɛ kpokpaa nɔkwɛlɔ lɛ ŋaawoi lɛ atsu nii koni wɔha wɔ sɔɔmɔ lɛ aya hiɛ. Mumɔ ni kpɛ̃lɛɔ sane nɔ ni tamɔ nɛkɛ lɛ he baaba sɛɛnamɔ aha wɔ, ni ebaama nɔ mi kɛha lɛ akɛ sɛɛnamɔ yɛ esaramɔ lɛ he. Hɛɛ, nɔkwɛlɔi gbɛfalɔi saraa asafoi lɛ koni amɛtswa wɔ amɛma shi, shi ehe miihia ni atswa amɛ hu ama shi yɛ mumɔŋ. Bei shɛɔ ni hewalɛwoo he hiaa Paulo, ni efɔɔ nanemɛi Kristofoi lɛ abimɔ akɛ amɛsɔle amɛha lɛ. (Bɔfoi lɛ Asaji 28:15; Romabii 15:30-32; 2 Korintobii 1:11; Kolosebii 4:2, 3; 1 Tesalonikabii 5:25) Wɔsɔlemɔi kɛ hewalɛwoo he hiaa ŋmɛnɛŋmɛnɛ beaŋ nɔkwɛlɔi gbɛfalɔi lɛ hu.
10. Te wɔɔfee tɛŋŋ wɔye wɔbua ni nɔkwɛlɔ gbɛfalɔ lɛ nitsumɔ lɛ afee miishɛɛ nɔ̃?
10 Ani wɔkɛɛ kpokpaa nɔkwɛlɔ lɛ kɛ eŋa lɛ bɔ ni wɔhiɛ sɔɔ amɛ saramɔi lɛ waa wɔhaa? Ani wɔdaa lɛ shi yɛ ŋaawoo ni yeɔ buaa ni ekɛhaa wɔ lɛ he? Ni kɛ ŋaawoo ni ekɛhaa yɛ shiɛmɔ nitsumɔ lɛ mli lɛ ha wɔmiishɛɛ fa yɛ sɔɔmɔ lɛ mli lɛ, ani wɔhaa eleɔ? Kɛ wɔfee nakai lɛ, enɛ baaye abua ni eha enitsumɔ lɛ afee miishɛɛ nɔ̃. (Hebribii 13:17) Kpokpaa nɔkwɛlɔ ko ni yɔɔ Spain je gbɛ ewie bɔ ni ekɛ eŋa fɛɛ buɔ shidaa he woji ni amɛnine eshɛ nɔ yɛ asafoi lɛ asaramɔ sɛɛ lɛ he. Ekɛɛ, “wɔkɛ nɛkɛ woji nɛɛ toɔ ni wɔkaneɔ beni wɔnuɔ he akɛ wɔnijiaŋ eje wui lɛ. Amɛji hewalɛwoo jɛɛhe diɛŋtsɛ.”
11. Mɛni hewɔ esa akɛ wɔha kpokpaa bibii kɛ kpokpaa wuji anɔkwɛlɔi aŋamɛi lɛ ale akɛ asumɔɔ amɛ sane ni hiɛ sɔɔ amɛ?
11 Yɛ anɔkwale mli lɛ, yijiemɔ wiemɔi he baa sɛɛnamɔ kɛhaa nɔkwɛlɔ gbɛfalɔ lɛ ŋa lɛ. Ekɛ nibii pii eshãshãa afɔlei koni eye ebua ewu yɛ sɔɔmɔ nitsumɔ nɛɛ mli. Nɛkɛ nyɛmimɛi yei anɔkwafoi nɛɛ ŋmɛɛɔ adebɔɔ naa nibii ni amɛshweɔ akɛ amɛaana amɛ diɛŋtsɛ amɛshia, ni yɛ shihilɛi pii amli lɛ, amɛna amɛ diɛŋtsɛ amɛbii hu lɛ he. Yefta biyoo lɛ ji Yehowa tsuji lɛ ateŋ mɔ kome, ni jɛ esuɔmɔ mli eŋmɛɛ hegbɛ ni ekɛaana wu kɛ weku, yɛ shiwoo ko ni etsɛ kɛha hewɔ lɛ he. (Kojolɔi 11:30-39) Te asusu efɔleshãa lɛ he aha tɛŋŋ? Kojolɔi 11:40 kɛɔ akɛ: “Daa afi lɛ, Israel obalayei lɛ yaa amɛyakafoɔ Yefta, Gileadnyo lɛ biyoo lɛ, gbii ejwɛ yɛ afi mli.” Kwɛ bɔ ni ehi jogbaŋŋ, kɛ wɔbɔ mɔdɛŋ wɔkɛɛ kpokpaa bibii kɛ kpokpaa wuji anɔkwɛlɔi lɛ aŋamɛi akɛ asumɔɔ amɛ ni hiɛ sɔɔ amɛ lɛ!
“Nyɛhiɛ Akakpaa Gbɔfeemɔ Nɔ”
12, 13. (a) Mɛɛ Ŋmalɛ naa nɔdaamɔ nɔ yɔɔ kɛha nɔkwɛlɔi gbɛfalɔi kɛ amɛ ŋamɛi ni afeɔ amɛ gbɔ lɛ? (b) Feemɔ bɔ ni gbɔfeemɔ ni tamɔ nɛkɛ he baanyɛ aba sɛɛnamɔ aha mɔ fɛɛ mɔ lɛ he nɔkwɛmɔ nɔ.
12 Gbɔfeemɔ ni ajieɔ lɛ kpo lɛ ji gbɛ kroko ni atsɔɔ nɔ ajieɔ suɔmɔ kɛ hiɛsɔɔ kpo kɛhaa mɛi ni yɔɔ Kristofoi agbɛfaa nitsumɔ lɛ mli lɛ. (Hebribii 13:2) Bɔfo Yohane jie Gaio yi yɛ gbɔ ni efee mɛi ni saraa asafo lɛ akɛ maŋsɛɛ sanekpakpa shiɛlɔi gbɛfalɔi lɛ hewɔ. Yohane ŋma akɛ: “Suɔlɔ, nɔ ni otsuɔ ohaa nyɛmimɛi ni ji gbɔi lɛ, anɔkwale mli ofeɔ yɛ. Mɛi ni baye osuɔmɔ lɛ he odase yɛ asafo lɛ hiɛ lɛ; ni kɛ oowo amɛ gbɛ bɔ ni sa yɛ Nyɔŋmɔ hiɛ lɛ, oofee jogbaŋŋ. Ejaakɛ egbɛ́i lɛ ahewɔ amɛje kpo kɛtee, ni amɛheee nɔ ko yɛ jeŋmajiaŋbii lɛ adɛŋ. No hewɔ lɛ, esa akɛ wɔhereɔ nɛkɛ gbɔmɛi nɛɛ atuu, koni wɔtsɔmɔ anɔkwale lɛ he nanemɛi nitsulɔi.” (3 Yohane 5-8) Ŋmɛnɛ, wɔbaanyɛ wɔha Maŋtsɛyeli-shiɛmɔ nitsumɔ lɛ aya hiɛ, kɛtsɔ gbɔfeemɔ ni tamɔ nakai nɔŋŋ ni wɔɔkpã mli wɔha nɔkwɛlɔi gbɛfalɔi kɛ amɛ ŋamɛi lɛ nɔ. Shi kɛlɛ, esa akɛ asafo lɛ mli onukpai lɛ ana nɔmimaa akɛ amɛ wɔɔhe hi, shi kpokpaa wulu nɔkwɛlɔ ko kɛɛ akɛ: “Wɔhe ni wɔkɛbɔɔ nyɛmimɛi lɛ ahe lɛ nyɛŋ adamɔ mɔ ni baanyɛ afee nɔ ko aha wɔ lɛ nɔ. Wɔsumɔŋ po ni amɛna jwɛŋmɔ ni tamɔ nɛkɛ. Esa akɛ wɔsumɔ akɛ wɔɔkpɛlɛ wɔnyɛmimɛi lɛ agbɔfeemɔ nɔ, kɛ amɛji niiatsɛmɛi loo ohiafoi.”
13 Gbɔfeemɔ he baanyɛ aba sɛɛnamɔ aha mɛi enyɔ lɛ fɛɛ. Jorge, tsutsu kpokpaa nɔkwɛlɔ ko ni miisɔmɔ bianɛ yɛ Betel kaiɔ akɛ, “nɔ ni wɔfɔɔ feemɔ yɛ wɔ weku lɛ mli ji nɔkwɛlɔi gbɛfalɔi ni wɔfɔ̃ɔ nine wɔtsɛɔ amɛ ni amɛbahi wɔshia. Minuɔ he akɛ nɛkɛ saramɔi nɛɛ ye bua mi babaoo fe bɔ ni miyɔse. Mikɛ mumɔŋ naagbai kpe beni mi ji obalanyo fioo lɛ. Minyɛ hao waa yɛ enɛ he, shi eleee nɔ̃ diɛŋtsɛ ni esa akɛ efee ni ekɛye ebua, no hewɔ lɛ, ekɛɛ kpokpaa nɔkwɛlɔ lɛ ni ekɛ mi awie. Klɛŋklɛŋ lɛ, misumɔɔɔ ni enaa mi, ejaakɛ miishe gbeyei akɛ ebaawie eshi mi. Shi yɛ naagbee lɛ, enaanyobɔɔ su lɛ tsɔ̃ miyiŋ. Efɔ̃ nine etsɛ mi koni mikɛ lɛ abaye nii Ju ko, kɛkɛ ni migbele mitsui mli ejaakɛ minu he akɛ aanu mi shishi. Ebo mi toi jogbaŋŋ. Eŋaawoo ni anyɛɔ atsuɔ he nii lɛ ye bua mi diɛŋtsɛ, ni mije shishi mishwere yɛ mumɔŋ.”
14. Mɛni hewɔ esa akɛ wɔhiɛ asɔ onukpai gbɛfalɔi lɛ moŋ fe ni wɔɔwie wɔshi amɛ lɛ?
14 Nɔkwɛlɔ gbɛfalɔ bɔɔ mɔdɛŋ ni eye ebua gbekɛbii kɛ onukpai fɛɛ yɛ mumɔŋ. Belɛ, esa akɛ wɔjie hiɛsɔɔ kpo yɛ emɔdɛŋbɔi lɛ ahe. Shi, kɛji akɛ wɔwie wɔshi lɛ yɛ efatɔɔi komɛi ahewɔ, aloo wɔkɛ lɛ to mɛi krokomɛi ni ebasara asafo lɛ he bɔ ni esaaa hu? Eka shi faŋŋ akɛ, enɛ baaje enijiaŋ wui. Ejeee nɔ ni wo Paulo hewalɛ beni enu ni aawie aashi enitsumɔ lɛ. Eyɛ faŋŋ akɛ, Korinto Kristofoi lɛ ateŋ mɛi komɛi miiwie kɛmiishi bɔ ni eyɔɔ kɛ enyɛmɔ yɛ wiemɔ mli lɛ. Lɛ diɛŋtsɛ etsɔɔ nɔ ni mɛi ni wieɔ shiɔ lɛ lɛ kɛɔ lɛ, akɛ: “Woji lɛ amli saji tsii ni amɛmli wa moŋ; shi kɛ lɛ gbɔmɔ lɛ diɛŋtsɛ eyɛ biɛ lɛ, no lɛ ehe waaa, ni ewiemɔ he bɛ akɔnɔ ko.” (2 Korintobii 10:10) Shi, eyɛ miishɛɛ moŋ akɛ nɔkwɛlɔi gbɛfalɔi fɔɔ suɔmɔ kɛ hiɛsɔɔ wiemɔi anumɔ.
15, 16. Suɔmɔ kɛ ekãa ni nɔkwɛlɔi gbɛfalɔi kɛ amɛ ŋamɛi lɛ ananemɛi heyelilɔi lɛ jeɔ lɛ kpo lɛ saa amɛhe yɛ mɛɛ gbɛ nɔ?
15 Kpokpaa nɔkwɛlɔ ko ni yɔɔ Latin America kɛ tɔlɛ nyiɛɔ gbi muu fɛɛ, yɛ gbɛ̀i ni ŋmɔtɔ eyi nɔ obɔ nɔ, bɔni afee ni eyasara emumɔŋ nyɛmimɛi hii kɛ yei ni yɔɔ shikpɔŋkuku ko ni maŋ hiɛ atuatselɔi yeɔ jɛmɛ nɔ lɛ mli lɛ. Eŋma akɛ, “bɔ ni nyɛmimɛi jieɔ amɛ hiɛsɔɔ kɛha saramɔ lɛ kpo lɛ naa mɔ nɔ hewalɛ waa. Eyɛ mli akɛ mibɔɔ mɔdɛŋ waa dani mishɛɔ jɛmɛ, ni mikɛ osharai kɛ naagbai pii kpeɔ moŋ, shi suɔmɔ kɛ ekãa ni nyɛmimɛi lɛ jieɔ lɛ kpo lɛ tsɔɔ nyɔmɔwoo kɛhaa mi.”
16 Kpokpaa nɔkwɛlɔ ko ni yɔɔ Afrika ŋma akɛ: “Yɛ suɔmɔ ni nyɛmimɛi lɛ jie lɛ kpo amɛtsɔɔ wɔ hewɔ lɛ, wɔsumɔɔ Tanzania shikpɔŋkuku lɛ waa diɛŋtsɛ! Nyɛmimɛi lɛ efee klalo akɛ amɛaakase nii kɛjɛ wɔŋɔɔ, ni amɛyɛ miishɛɛ akɛ amɛaana wɔ yɛ amɛshiai amli.” Suɔmɔ kɛ miishɛɛ wekukpaa kã bɔfo Paulo kɛ klɛŋklɛŋ afii oha lɛ mli Kristofoi gbalashihilɛ mli hefatalɔi Akwila kɛ Priska teŋ. Yɛ anɔkwale mli lɛ, Paulo wie amɛhe akɛ: “Nyɛŋaa Priska kɛ Akwila, ni ji minanemɛi nitsulɔi yɛ Kristo Yesu mli lɛ, nyɛhaa mi, mɛi ni kɛ amɛhe wo gbele mli yɛ miwala hewɔ, ni jeee mi kɛkɛ midaa amɛ shi, shi moŋ jeŋmaji lɛ amli asafoi lɛ fɛɛ hu daa amɛ shi lɛ.” (Romabii 16:3, 4) Nɔkwɛlɔi gbɛfalɔi kɛ amɛ ŋamɛi daa shi akɛ amɛyɛ ŋmɛnɛŋmɛnɛ beaŋ Akwila kɛ Priska, ni bɔɔ mɔdɛŋ diɛŋtsɛ akɛ amɛaafee amɛ gbɔ ni amɛkɛ amɛ ahi shi lɛ.
Asafoi lɛ Ahewalɛwoo
17. Mɛni hewɔ abaanyɛ akɛɛ akɛ, nilee hɔ gbɛjianɔtoo kɛha nɔkwɛlɔi gbɛfalɔi lɛ sɛɛ, ni nɛgbɛ amɛnaa amɛ fãmɔi kɛjɛɔ?
17 Yesu kɛɛ: “Abu nilee jalɔ kɛtsɔ enitsumɔi anɔ.” (Mateo 11:19, NW) Nilee ni yɔɔ nɔkwɛlɔ gbɛfalɔ gbɛjianɔtoo lɛ sɛɛ lɛ jeɔ kpo faŋŋ akɛni eyeɔ ebuaa ni awoɔ Nyɔŋmɔ webii asafoi lɛ hewalɛ lɛ hewɔ. Yɛ Paulo maŋsɛɛ sanekpakpa shiɛmɔ gbɛfãa ni ji enyɔ lɛ mli lɛ, lɛ kɛ Sila ‘tsɔ Siria kɛ Kilikia amɛyawo asafoi lɛ hewalɛ.’ Bɔfoi lɛ Asaji awolo lɛ kɛɔ wɔ akɛ: “Shi beni amɛkpaa maji lɛ anɔ lɛ, amɛkɛ mlai ni bɔfoi lɛ kɛ onukpai ni yɔɔ Yerusalem lɛ wo lɛ haa amɛ koni amɛye nɔ. Agbɛnɛ asafoi lɛ na hewalɛ yɛ hemɔkɛyeli mli, ni amɛyi faa daa nɛɛ.” (Bɔfoi lɛ Asaji 15:40, 41; 16:4, 5) Ŋmɛnɛŋmɛnɛ beaŋ nɔkwɛlɔi gbɛfalɔi anine shɛɔ mumɔŋ gbɛtsɔɔmɔi anɔ kɛtsɔɔ Ŋmalɛi lɛ kɛ “tsulɔ anɔkwafo kɛ nilelɔ lɛ” woji amli, taakɛ Kristofoi fɛɛ ji lɛ.—Mateo 24:45.
18. Nɔkwɛlɔi gbɛfalɔi wajeɔ loo amɛwoɔ asafoi lɛ hewalɛ yɛ mɛɛ gbɛ nɔ?
18 Hɛɛ, esa akɛ onukpai gbɛfalɔi lɛ aya nɔ aye nii yɛ Yehowa mumɔŋ okpɔ̃lɔ nɔ. Esa akɛ amɛle gbɛ̀i kɛ gbɛtsɔɔmɔi ni Nyɔŋmɔ gbɛjianɔtoo lɛ nyiɛɔ sɛɛ lɛ jogbaŋŋ. Kɛkɛ lɛ nɛkɛ hii nɛɛ baanyɛ atsɔ jɔɔmɔ diɛŋtsɛ aha mɛi krokomɛi. Yɛ amɛ ekãa yɛ sɔɔmɔ nitsumɔ lɛ mli lɛ he nɔkwɛmɔ nɔ fɛfɛo lɛ hewɔ lɛ, amɛbaanyɛ amɛye amɛbua nanemɛi heyelilɔi ni amɛya amɛhiɛ yɛ Kristofoi asɔɔmɔ lɛ mli. Wiemɔi ni damɔ Biblia lɛ nɔ ni nɛkɛ onukpai saralɔi nɛɛ haa lɛ tswaa toibolɔi lɛ emaa shi yɛ mumɔŋ. Kɛtsɔ yelikɛbuamɔ ni amɛkɛhaa mɛi krokomɛi koni amɛkɛ Nyɔŋmɔ Wiemɔ lɛ mli ŋaawoo lɛ atsu nii, ni amɛkɛ Yehowa webii ni yɔɔ jeŋ fɛɛ lɛ atsu nii yɛ ekomefeemɔ mli, ni amɛkɛ mumɔŋ nibii ni Nyɔŋmɔ eto he gbɛjianɔ kɛtsɔ “tsulɔ anɔkwafo” lɛ nɔ lɛ atsu nii lɛ nɔ lɛ, nɔkwɛlɔi gbɛfalɔi woɔ asafoi ni amɛnaa hegbɛ akɛ amɛaasara amɛ lɛ hewalɛ.
19. Mɛɛ sanebimɔi eshwɛ ni abaasusu he?
19 Beni Yehowa gbɛjianɔtoo lɛ to onukpai gbɛfalɔi lɛ anitsumɔ yɛ Biblia Kaselɔi lɛ ateŋ lɛ he gbɛjianɔ aaafee afii oha ni eho nɛ lɛ, nɛkɛ wolo tɛtrɛɛ nɛɛ wie akɛ: “Wɔbaakwɛ nɔ ni baajɛ mli aba kɛ hiɛnyiɛmɔ lolo ni jɛɔ Nuntsɔ lɛ ŋɔɔ kɛbaa.” Hiɛnyiɛmɔ ni jɛɔ Yehowa ŋɔɔ lɛ eje kpo faŋŋ. Yɛ ejɔɔmɔ kɛ Nɔyeli Kuu lɛ nɔkwɛmɔ hewɔ lɛ, álɛɛ nitsumɔ nɛɛ mli ni atsuu he ni etee hiɛ yɛ afii abɔ lɛ amli. Yɛ enɛ hewɔ lɛ, aaha Yehowa Odasefoi asafoi ni yɔɔ jeŋ fɛɛ lɛ miifi shi shiŋŋ yɛ hemɔkɛyeli lɛ mli, ni amɛ yifalɛ miiya hiɛ daa gbi. Eyɛ faŋŋ akɛ Yehowa miijɔɔ nɛkɛ gbɔmɛi ateŋ nikeenii lɛ ahe-kɛ-afɔleshãa mumɔ lɛ nɔ. Shi te nɔkwɛlɔi gbɛfalɔi aaafee tɛŋŋ atsu amɛ nitsumɔ lɛ yɛ omanyeyeli mli? Mɛni ji otii ni mamɔ amɛhiɛ? Te amɛaafee tɛŋŋ ni amɛhe aba sɛɛnamɔ babaoo kɛha asafoi lɛ?
Te Obaaha Hetoo Oha Tɛŋŋ?
◻ Mɛni ji kpokpaa bibii kɛ kpokpaa wuji anɔkwɛlɔi lɛ anitsumɔi lɛ ekomɛi?
◻ Mɛni hewɔ ehe hiaa ni nɔkwɛlɔi gbɛfalɔi aná he-kɛ-afɔleshãa mumɔ?
◻ Mɛɛ gbɛ nɔ aaatsɔ ajie hiɛsɔɔ kpo aha onukpai gbɛfalɔi kɛ amɛ ŋamɛi lɛ anitsumɔ?
◻ Mɛni nɔkwɛlɔi gbɛfalɔi baanyɛ afee ni amɛha asafoi lɛ afi shi shiŋŋ yɛ hemɔkɛyeli lɛ mli?
[Mfoniri ni yɔɔ baafa 10]
Gbɛfãa be fɛɛ be lɛ biɔ he-kɛ-afɔleshãa mumɔ
[Mfoniri ni yɔɔ baafa 13]
Ani ojie gbɔfeemɔ kpo otsɔɔ nɔkwɛlɔi gbɛfalɔi kɛ amɛ ŋamɛi lɛ?