Oblahii kɛ Oblayei Nyɛnifeemɔ Haa Nyɛfɔlɔi Atsui Nyaa

BƆFO Yohane ni egbɔ lɛ ŋma akɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale mli lɛ.” (3 Yohane 4) Eyɛ mli akɛ bii ni atsĩ amɛ tã yɛ ŋmalɛ nɛɛ mli lɛ kɔɔ kaselɔi ni ji Kristofoi ahe moŋ, shi fɔlɔi ni sheɔ Nyɔŋmɔ gbeyei lɛ hu baanyɛ awie nɔ ni Yohane wie nɛɛ nɔŋŋ yɛ amɛbii ahe. Taakɛ bɔ ni fɔlɔi kɛ tsakemɔ ni he hiaa baa amɛbii ashihilɛ mli lɛ, nakai nɔŋŋ bii hu kɛ tsakemɔ kpele baa amɛfɔlɔi ashihilɛ mli.

Maŋtsɛ Salomo ni ye Israel nɔ lɛ le bɔ ni bii anifeemɔ baanyɛ asa amɛfɔlɔi ahe waa aha. Eŋma akɛ: “Bi nilelɔ haa etsɛ náa miishɛɛ; shi bi kwashia lɛ, ehaa enyɛ tsui yeɔ.” (Abɛi 10:1) No hewɔ lɛ, esa akɛ bii fɛɛ—ni mɛi ni edara lɛ po fata he lɛ—asusu bɔ ni amɛnifeemɔi baasa amɛtsɛmɛi kɛ amɛnyɛmɛi ahe lɛ he. Mɛni hewɔ esa akɛ amɛfee nakai?

Susumɔ kwɛmɔ ni ofɔlɔi ni sheɔ Nyɔŋmɔ gbeyei lɛ ekwɛ bo kɛjɛ ogbekɛbiiashi tɔɔ lɛ he okwɛ! Ohe ni amɛsusuɔ kɛ sɔlemɔ ni amɛsɔleɔ yɛ ohewɔ lɛ je shishi kwraa dani afɔ́ bo. Beni amɛfɔ́ bo lɛ, tsakpaa ni mli wa bakã okɛ amɛ teŋ, ni eeenyɛ efee akɛ amɛda Nyɔŋmɔ shi yɛ hegbɛ kpele ní kɛlɛ hiɛdɔɔ yɔɔ he ní ekɛwo amɛdɛŋ akɛ fɔlɔi lɛ hewɔ. Agbɛnɛ aha amɛ abifao ni amɛkwɛ lɛ, ni akɛni Yehowa jálɔi ji amɛ hewɔ lɛ, amɛbu enɛ akɛ eji hiɛdɔɔ sane.

Akɛni ofɔlɔi ji anɔkwa Kristofoi hewɔ lɛ, amɛtao gbɛtsɔɔmɔ kpakpa kɛjɛ Biblia lɛ kɛ Biblia kasemɔ woji amli, ni amɛbi mɛi ni etsɔse bii pɛŋ lɛ ŋaawoo. Agbɛnɛ hu, amɛtee nɔ amɛfɔse amɛnaagbai lɛ amɛshwie Nyɔŋmɔ hiɛ yɛ sɔlemɔ mli. (Kojolɔi 13:8) Beni odaa lɛ, ofɔlɔi lɛ yɔse osui kpakpai kɛ agbɛnɛ hu ofatɔɔi. (Hiob 1:5) Beni oye kɛjɛ afii 13 kɛyaa lɛ, naagbai krokomɛi bɔi baa. Bei komɛi lɛ, ekolɛ otse atũa, ni no ha ofɔlɔi lɛ sɔle waa, amɛkane nii babaoo, ni amɛtee nɔ amɛsusu gbɛ̀i anɔ ni amɛaatsɔ amɛye amɛbua bo koni oya nɔ ojá Yehowa, ni ji oŋwɛi Tsɛ lɛ he.

Ofɔlɔi lɛ dɔɔ ohe daa. Beni oda po lɛ, amɛyaa nɔ amɛsusuɔ ogbɔmɔtsoŋ, jwɛŋmɔŋ, henumɔŋ kɛ mumɔŋ hilɛ-kɛhamɔ he. Ni kɛlɛ, be fɛɛ be lɛ ofɔlɔi lɛ le akɛ oyɛ hegbɛ ni ohalaa nɔ ni osumɔɔ, ni akɛ amɛnyɛŋ amɛle bɔ ni obaahi shi oha wɔsɛɛ. Nɔ ni fe fɛɛ lɛ, bo diɛŋtsɛ obaakpɛ oyiŋ yɛ bɔ ni obaasumɔ ni ohi shi oha lɛ he.

Kɛ́ fɔlɔi ‘náa miishɛɛ’ waa kɛ́ amɛnu akɛ amɛbii lɛ ‘nyiɛɔ yɛ anɔkwale lɛ mli lɛ,’ ani edɔŋ amɛ kɛ amɛbii lɛ kpale kɛjɛ anɔkwale lɛ he? Eji anɔkwale akɛ gbekɛbii ni amɛfeee amɛnii yɛ nilee mli lɛ haa amɛfɔlɔi yeɔ awerɛho. Salomo kɛɛ akɛ: “Bi kwashia lɛ, etsɛ awerɛho ji lɛ kɛ yoo ni fɔ́ lɛ lɛ tsuiyeli.” (Abɛi 17:25) Kwɛ bɔ ni fɔlɔi awerɛ hoɔ amɛhe kɛ́ amɛbi ko kpoo akɛ eeeja anɔkwa Nyɔŋmɔ lɛ!

Eyɛ faŋŋ akɛ onifeemɔ saa oweku lɛ kɛ mɛi krokomɛi ahe yɛ gbɛ ko nɔ. Bɔ ni obaa ojeŋ ohaa lɛ náa ofɔlɔi anɔ hewalɛ waa. Kɛ́ okpoo Nyɔŋmɔ kɛ eshishitoo mlai lɛ, ofɔlɔi atsui baakumɔ. Shi kɛ́ ojá Nyɔŋmɔ ni okɛ eshishitoo mlai lɛ tsu nii lɛ, amɛbaaná miishɛɛ waa. Kɛ́ otee nɔ oye Yehowa anɔkwa ni obo lɛ toi lɛ, ofɔlɔi lɛ baanyá. No hewɔ lɛ, tswaa ofai shi akɛ obaaha ofɔlɔi atsui anyá! Mɛni po yɔɔ ni jara wa fe enɛ ní ooofee oha mɛi ni sumɔɔ bo, ní amɛtsɔse bo, ní amɛbu ohe lɛ?