Ani Obaaya Nɔ Onyiɛ Yɛ Anɔkwale Lɛ Mli?
“MIBƐ miishɛɛ ni fa fe enɛ . . . akɛ mibii lɛ nyiɛɔ anɔkwale lɛ mli.” (3 Yohane 4) Nɛkɛ ji bɔ ni bɔfo Yohane kɛɛ yɛ eshihilɛ be kakadaŋŋ lɛ naagbee gbɛ. Bɔ ni ‘ebii’ ni ekɛ amɛ eba “anɔkwale lɛ” mli lɛ etee nɔ eŋmɛ amɛtsui shi lɛ haa enaa miishɛɛ waa. Kɛ mɛi ni jaa Yehowa lɛ hi anɔkwale lɛ mli lɛ, lɛ hu enaa miishɛ. Kwɛ bɔ ni eeena miishɛɛ waa ŋmɛnɛ akɛ eeena asafo babaoo, ni amɛyibɔ shɛɔ akpekpei abɔ, ni nyiɛɔ nakai nilee gbɛ lɛ sɛɛ lɛ!—Abɛi 27:11.
Shi kɛlɛ, eyɛ mli akɛ Nyɔŋmɔ webii lɛ fɛɛ kɛ amɛhe ekpɛtɛ anɔkwale lɛ he gbagbalii moŋ, shi Kristofoi aŋkroaŋkroi komɛi ahe jɔɔ aloo amɛshiɔ jamɔ krɔŋŋ lɛ po. Enɛ jeee nɔ ni akpaaa gbɛ, ejaakɛ eba mli nakai nɔŋŋ yɛ klɛŋklɛŋ afi oha lɛ mli. (2 Timoteo 4:10; Hebribii 2:1) Shi yɛ fɛɛ sɛɛ lɛ, anɔkwale ni eji akɛ mɛi komɛi ahe jɔɔ lɛ maa bɔ ni ehe hiaa ni wɔ fɛɛ wɔha wɔhiɛ ahi wɔ diɛŋtsɛ wɔmumɔŋ shihilɛ nɔ lɛ nɔ mi. Paulo wo Kristofoi fɛɛ ahewalɛ akɛ: “Nyɛkaa nyɛ diɛŋtsɛ nyɛhe nyɛkwɛa.” (2 Korintobii 13:5) Esa akɛ Kristofonyo fɛɛ Kristofonyo abi ehe nɛkɛ sane nɛɛ: “Te mafee tɛŋŋ manyɛ mama nɔ mi akɛ maya nɔ manyiɛ yɛ anɔkwale lɛ mli lɛ?’
Mɛi pii ahe ejɔ aloo amɛkpa anɔkwale lɛ mli nyiɛmɔ po ejaakɛ aha amɛnijiaŋ je wui—ekolɛ yɛ hewalɛnamɔ mli naagbai, aloo yɛ naataomɔi ni amɛkɛ mɛi krokomɛi naa lɛ ahewɔ. Mɛi komɛi hu ahe ejɔ ejaakɛ nibii komɛi gbala amɛjwɛŋmɔ. Amɛmiisumɔ ni amɛna yibii ni nibii agbɛjianɔtoo nɛɛ woɔ lɛ ekomɛi amli ŋɔɔmɔ yɛ be mli ni eyɔɔ lolo nɛɛ. Te wɔɔfee tɛŋŋ ni wɔhe akajɔ lɛ? Kɛ wɔɔnyɛ wɔha hetoo lɛ, nyɛhaa wɔsusua nɔkwɛmɔ nɔ ni Yesu fee efɔ shi eha wɔ lɛ he wɔkwɛa.
Nyiɛmɔ Yesu Nɔkwɛmɔ Nɔ lɛ Sɛɛ
Yesu kɛ naagbai kɛ shihilɛi ni mli wawai babaoo kpe. Ebi ni etsu naataomɔi ni ba esɛɛnyiɛlɔi lɛ ateŋ lɛ ahe nii, ni edamɔ nyɛɛ kɛ hefɛoyeli ni jɛɔ ehenyɛlɔi aŋɔɔ baa lɛ hu naa. Esa akɛ ete shi ewo kaai ni je nɛɛ kɛbaa lɛ hu. Lɛlɛŋ, ena hegbɛ hu akɛ eeena heloonaa nii kɛ gbɛi yɛ gbɛ ni mɛi fioo ko pɛ naa lɛ nakai lɛ nɔ. (Mateo 4:8-11; Yohane 6:14, 15) Shi kɛlɛ, Yesu tee nɔ enyiɛ yɛ anɔkwale lɛ mli. Mɛni ye ebua lɛ ni enyɛ efee enɛ?
Bɔfo Paulo yeɔ ebuaa wɔ koni wɔna hetoo lɛ yɛ be mli ni eŋma akɛ: “Wɔkɛ tsuishitoo ada foi ni ka wɔhiɛ lɛ, ni wɔkwɛ hemɔkɛyeli shishijelɔ kɛ naagbelɔ ni ji Yesu lɛ, mɔ ni nyamɔ ni ka ehiɛ lɛ hewɔ lɛ emia ehiɛ yɛ sɛŋmɔtso lɛ he amanehulu lɛ mli, ni ebuuu hiɛgbele lɛ, ni ekɛyata shi yɛ Nyɔŋmɔ maŋtsɛsɛi lɛ ninejurɔ nɔ lɛ.” (Hebribii 12:1, 2) Kɛha Yesu lɛ, akɛni eha “nyamɔ ni ka ehiɛ,” ni ji jweremɔ nii ni nɔ kwɔ ni mɛɔ lɛ lɛ hi ejwɛŋmɔ mli hewɔ lɛ, eye ebua lɛ ni etee nɔ enyiɛ yɛ anɔkwale lɛ mli. Nɛkɛ “nyamɔ ni ka ehiɛ” nɛɛ jara wa kwraa fe be kukuoo mli nijiaŋwujee kɛ nibii ni gbala ejwɛŋmɔ ni ekɛkpe lɛ fɛɛ eko. ‘
Kɛ wɔha jweremɔ nɔ lɛ hi wɔjwɛŋmɔ mli lɛ, ebaaye ebua wɔ ni wɔmia wɔhiɛ, taakɛ Yesu fee lɛ pɛpɛɛpɛ. (Kpojiemɔ 22:12) Kɛ wɔɔfee he nɔkwɛmɔ nɔ lɛ, susumɔ gbɛfalɔ ko ni nyiɛ gɔji anɔ gbɛ ko ni nɔ nyiɛmɔ wa nɔ lɛ he okwɛ. Etɔɔ lɛ ni enijiaŋ jeɔ wui. Enanefaa fɛɛ nanefaa biɔ mɔdɛŋbɔɔ, ni gbɛ lɛ feɔ tamɔ nɔ ni bɛ naagbee. Kɛkɛ lɛ ekwɔɔ kɛbaa he ko ni kwɔ ni enaa maŋ nɔ ni enyiɛɔ kɛyaa lɛ yɛ shɔŋŋ. Etsɛɛɛ ni enyiɛmɔ lɛ feɔ mlɛo fioo kɛhaa lɛ ekoŋŋ. Bɔ ni enaa he ni eyaa lɛ jogbaŋŋ lɛ yeɔ ebuaa lɛ ni ehiɛ kpaa etɔlɛ lɛ nɔ. Nakai nɔŋŋ kɛ Kristofonyo lɛ ha he ni eyaa lɛ fee faŋŋ yɛ ejwɛŋmɔ mli lɛ, ebaana lɛ mlɛo kwraa akɛ eeeya nɔ enyiɛ yɛ anɔkwale lɛ mli.
Kasemɔ Bɔfo Paulo
Mɔ kroko ni mia ehiɛ yɛ nibii ni kulɛ ebaanyɛ eha enijiaŋ aje wui lɛ amli hu ji bɔfo Paulo. Ebalɛ akɛ esa akɛ etsu mligbalamɔi kɛ naataomɔi ni ba nyɛmimɛi ateŋ lɛ ahe nii, kɛ hewalɛnamɔ mli naagbai ni mli wawai, yiwai, gbɔmɔtsoŋ jaramɔ shihilɛi, kɛ naagbai kɛ shitee-kɛ-woo ni jɛɔ asafoi lɛ diɛŋtsɛ amli po. (1 Korintobii 1:10; 2 Korintobii 10:7-12; 11:21-29; 12:7-10) Mɛni hewɔ ni Paulo nijiaŋ ejeee wui aahu kɛyashi eeebalɛ po akɛ eeeŋmɛɛ he lɛ? Etsɔɔ mli akɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.” (Filipibii 4:13) Ebɔɔɔ mɔdɛŋ akɛ lɛ ekometoo eeetere ejatsui lɛ fɛɛ. Shi moŋ, Paulo kwɛ Yehowa gbɛ koni ewaje lɛ.—Lala 55:23.
Hewalɛwoo jɛɛhe ni yɔɔ ŋwɛi ni Paulo kɛ ehe fɔ enɔ koni eye ebua lɛ lɛ yɛ ŋmɛnɛ hu. Biblia lɛ kɛɔ akɛ: “[Yehowa] haa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ faa. Obalahii ni eje nɔ lɛ, amɛgbɔjɔɔ ni etɔɔ amɛ, ni mɛi ni eshɛ obalahii tete lɛ, amɛgbegbeɔ shi; shi mɛi ni hiɛ ka Yehowa nɔ lɛ naa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.” (Yesaia 40:29-31) Kɛji wɔkwɛ Yehowa gbɛ ni eha wɔ hewalɛwoo kɛtsɔ teemɔŋ nikasemɔ nɔ, kpeei ni wɔɔya nɔ, Kristofoi asɔɔmɔ nitsumɔ ni ekaa yɔɔ mli, kɛ—titri lɛ—sɔlemɔ nɔ lɛ, no lɛ wɔɔnyɛ wɔdamɔ kaai kɛ nijiaŋwujei ni baanyɛ ate shi yɛ be kɛ bei amli lɛ anaa.—Lala 1:1-3; Romabii 10:10; 1 Tesalonikabii 5:16, 17; Hebribii 10:23-25.
Akpekpei Abɔ Miisaa Amɛhe Koni Amɛhi Paradeiso Mli
Satan ji nibii agbɛjianɔtoo nɛɛ, ni Kristofoi ji gbɔi loo maŋ kroko nɔ bii yɛ mli lɛ nyɔŋmɔ. (2 Korintobii 4:4) No hewɔ lɛ, kɛji wɔkɛ nijiaŋwujee loo nibii ni gbalaa wɔjwɛŋmɔ lɛ miikpe lɛ, esaaa ni efeɔ wɔ naakpɛɛ. Paulo ŋma yɛ Hebribii awolo lɛ mli akɛ: “Ejaakɛ wɔbɛ maŋ ni kaa shi yɛ biɛ, shi maŋ ni baaba lɛ moŋ sɛɛ gbɛ wɔtaoɔ.” (Hebribii 13:14) Kɛ wɔkai akɛ wɔhiɛnɔkamɔ bɛ je nɛɛ mli shi eyɛ nɔ ni baaba lɛ moŋ mli lɛ, no hu baaye ebua wɔ bɔni afee ni wɔhe akajɔ.
Yɛ gbɛi komɛi anɔ lɛ, Kristofoi tamɔ gbɛfalɔi ni eshi amɛ diɛŋtsɛ amɛjaku maŋ ni amɛnyiɛ amɛmiitao he kroko ni shihilɛ hi. Kɛ wɔɔŋɔ lɛ tamɔ mla ko lɛ, gbɛ ni tamɔ nɛkɛ lɛ kɔmɔ wa waa. Ebiɔ ni mɔ lɛ ato enibii fɛɛ aloo eshi enibii nɛɛ fɛɛ yɛ sɛɛ ni eshi shia ni ehi mli aahu lɛ, kɛ agbɛnɛ enanemɛi kɛ ewekumɛi fɛɛ hu. Agbɛnɛ hu ebiɔ ni eya maŋ hee ko kwraa mli, ni eyahi mɛi ni ekolɛ amɛhereŋ lɛ hiɛmɛɛ lɛ ateŋ, ni eyakase maŋ nɔ wiemɔ hee kɛ shihilɛ gbɛ ni eleko momo etoko. Shi kɛlɛ, mɛi pii fãa nakai kɛ hiɛnɔkamɔ akɛ no feemɔ baaha amɛheloonaa ninamɔ yɛ je nɛɛ mli lɛ aya hiɛ.
Yɛ gbɛ ko nɔ lɛ, mɛi ni faa gbɛ nɛɛ, kɛmiijɛ nɛkɛ nibii agbɛjianɔtoo momo nɛɛ mli ni amɛbatsɔmɔɔ Nyɔŋmɔ webii lɛ ateŋ mɛi komɛi kɛ shihilɛi ni mli wawai tamɔ nɛkɛ kpeɔ. Amɛfeɔ tsakemɔi yɛ amɛkusum nifeemɔi amli bɔni afee ni amɛhi shi yɛ Nyɔŋmɔ Wiemɔ lɛ mli shishitoo mlai ni he tse lɛ anaa, ni amɛkaseɔ anɔkwale lɛ he “wiemɔ krɔŋŋ” lɛ. (Zefania 3:9; 1 Korintobii 6:9-11) Amɛtsuɔ nii waa hu, bɔni afee ni amɛsɔmɔ Nyɔŋmɔ Maŋtsɛyeli lɛ nɔ Maŋtsɛ kpeteŋkpele lɛ, Yesu Kristo. Kɛfata he hu lɛ, yɛ shihilɛi pii amli lɛ, amɛwekumɛi kɛ tsutsu nanemɛi kɛ amɛ foɔ tako mli, ni tsɔɔ akɛ amɛ hu amɛkɛ amɛ egbala mli kwraa.
Shi Kristofoi yɛ nibii babaoo ni amɛbaana he sɛɛ fe mɛi ni faa gbɛ yɛ heloo naa nii ahe yiŋtoi ahewɔ lɛ. Nɔ kome ji akɛ, amɛbajeɔ gbɔmɛi akuu ko ni sumɔɔ amɛ ni amɛsusuɔ amɛhe hu lɛ ateŋ. (Luka 18:29, 30) Ni nɔ ni he hiaa fe fɛɛ ji akɛ, amɛkɛ Yehowa, mɔ ni ji jeŋ muu fɛɛ Nyɔŋmɔ lɛ naa wekukpaa ni bɛŋkɛ kpaakpa. Amɛnaa jwɛŋmɔŋ toiŋjɔlɛ ni amɛkɛ nɔmimaa kwɛɔ wɔsɛɛ be gbɛ yɛ be mli ni amɛkwɛɔ Nyɔŋmɔ shiwoi ni yɔɔ naakpɛɛ lɛ amlibaa gbɛ lɛ. (Filipibii 4:8, 9) Mɛi ni yɔɔ hiɛsɔɔ kpakpa kɛha anɔkwalei nɛɛ eŋmɛŋ gbɛ ni nibii agbala amɛjwɛŋmɔ loo nijiaŋwujee aha amɛhe ajɔ kwraa kɛyashi naagbee. Ehaŋ amɛku amɛsɛɛ kɛjɛ gbɛ fintɔŋŋ ni kɛ mɔ yaa wala mli lɛ nɔ.—Mateo 7:13, 14; 1 Yohane 2:15-17.
Buu Omumɔŋ Hewalɛnamɔ lɛ He
Kɛji wɔbuɔ wɔgbɔmɔtsoŋ hewalɛnamɔ he daa lɛ, no lɛ wɔyɛ shihilɛ kpakpa ni wɔɔdamɔ nɔ wɔku helai anaa lɛ mli. Kɛji hela mɔ wɔ lɛ, etsɛɛɛ ni wɔhe waa wɔ. Nakai nɔŋŋ hu, kɛji wɔbuɔ wɔmumɔŋ hewalɛnamɔ he, ni wɔkɛ hiŋmɛii ni nɔ tse kwɛɔ jɔɔmɔi ni wɔnaa mli ŋɔɔmɔ amrɔ nɛɛ kɛ nɔ ni mɛɔ wɔ lɛ hu, ni wɔkase bɔ ni wɔɔfee ni wɔkɛ wɔhe afɔ Yehowa hewalɛ nɔ ni jeee wɔ diɛŋtsɛ wɔhe nɔ lɛ, no lɛ ebaaha wɔyaje shihilɛ kpakpa mli bɔni afee ni wɔnyɛ wɔtsu naagbai ni teɔ shi lɛ ahe nii. Wɔnyɛŋ wɔjo nibii ni gbalaa wɔjwɛŋmɔ kɛ nibii ni jeɔ wɔnijiaŋ wui lɛ fɛɛ anaa foi kwraa. Shi kɛji wɔtsɔ hiɛ wɔbu wɔmumɔŋ hewalɛnamɔ he jogbaŋŋ momo lɛ, nɛkɛ nibii nɛɛ ebatiŋ wɔ shi trukaa ni eeeye wɔnɔ.
Kaimɔ akɛ, kɛ Yehowa jalɔi mia amɛhiɛ lɛ, enaa miishɛɛ. No hewɔ lɛ nyɛhaa wɔhaa etsui anyaa kɛtsɔ ya ni wɔɔya nɔ wɔnyiɛ yɛ anɔkwale lɛ mli lɛ nɔ.