Bó ‘Kɔkɔbɔɔi Ni Akɛ Mamɔ Wɔhiɛ lɛ Toi”!
1, 2. Yuda wolo Iɛ kɛ mɛɛ tsɔsemɔ loo wiemɔ kɛ tsɔɔmɔ haa?
1 YEHOWA ji Nyɔŋmɔ ni bɔɔ kɔkɔ. (2 Maŋtsɛmɛi 17:12-15; Ezekiel 3:17-21) Ewebii lɛ le akɛ esumɔɔɔ ni mɔ ko atsɔ gbɛ ni kɛ mɔ yaa hiɛkpatamɔ mli nɔ ni mɔ lɛ alaaje. (Ezekiel 18:23, 32) Ni yɛ anɔkwale mli lɛ eŋɔɔ Yehowa Odasefoi anaa waa akɛ amɛŋwɛi Tsɛ lɛ bɔɔ mɛi ni sumɔɔ lɛ lɛ kɔkɔ, ekudɔɔ amɛ ni ehereɔ amɛyiwala.
2 Yuda wolo ni jɛ mumɔŋ lɛ kɛ kɔkɔbɔɔ kɛ gbɛtsɔɔmɔ nɛɛ fɛɛ haa. Wɔkase nɔ hewɔ ni Yuda wo enanemɛi heyelilɔi lɛ hewalɛ ni ‘amɛpele hemɔkɛyeli lɛ he waa’ lɛ yɛ nikasemɔ ni tsɔ hiɛ lɛ mli. Agbɛnɛ nyɛhaa wɔkɛ sɔlemɔ asusua ekɔkɔbɔɔi ni jɛ blema lɛ ahe—Romabii 15:4.
Nyɛkwɛa Ni Ahia Yɛ Hemɔkɛyeli Ni Aaalaaje He
3. Yuda ‘miitao akɛ ekaiɔ’ enanemɛi heyelilɔi Iɛ yɛ mɛni he?
3 Yuda tee nɔ kɛ kɔkɔbɔɔ ni kɔɔ hemɔkɛyeli he, akɛ:
“Shi miitao akɛ mikaiɔ nyɛ, nyɛ mɛi ni nyɛna enɛ pɛŋ lɛ, akɛ beni Nuntsɔ [Yehowa] lɛ jie maŋ lɛ kɛjɛ Mizraim lɛ, no sɛɛ lɛ ekpata mɛi ni heee yeee lɛ ahiɛ.” (Yuda 5)
4. Mɛɛ gbɛ nɔ ni mɛni hewɔ Yehowa ‘jie’ Israelbii ni amɛtsɔmɔ nyɔji lɛ?
4 Kɛji akɛ Kristofoi ‘epeleee hemɔkɛyeli lɛ he waa’ lɛ, amɛbaalaaje shidaamɔ kpakpa ni amɛhiɛ yɛ Yehowa Nyɔŋmɔ hiɛ lɛ. Bɔni afee ni etsi enɛ naa lɛ, Yuda ‘miitao akɛ ekaiɔ, nanemɛi heyelilɔi ni yɔɔ oshara mli lɛ nibii ni tsutsu lɛ amɛkase kɛ bɔ ni Nyɔŋmɔ kɛ mɛi ni yeee anɔkwale lɛ ye ha yɛ tsutsu bei amli.
5. Mɛni ji mfonirifeemɔ mli Mizraim lɛ, ni mɛni nɔ Yehowa damɔɔ ejieɔ mɛi kɛjɛɔ mli? (b) Mɛni esa akɛ Yehowa odasefoi ni amɛjɔɔ amɛhe nɔ lɛ afee kɛha naagbee yiwalaheremɔ?
5 Yuda tsɔ hiɛ etsɔɔ yɛ kuku enumɔ lɛ akɛ Yehowa Nyɔŋmɔ “jie” aloo ehere Israelbii ni amɛtsɔmɔ nomii yɛ Mizraim lɛ ayiwala kɛjɛ nyɔŋyeli mli. Nyɔŋmɔ fee nakai yɛ sɛɛ mli beni amɛkɛ toiboo eye klɛŋklɛŋ Hehoo lɛ. Yehowa kɛ naakpɛɛ yiwalaheremɔ kɛmiijɛ Mizraim nɛɛ ba akɛni gbɔmɛi ni tsutsu lɛ amɛji nyɔji lɛ tsu nii yɛ hemɔkɛyeli mli hewɔ.—2 Mose 12:1-14, 31.
6. (a) Mɛni ji bɔfoi lɛ ‘anukpayeli’ aloo amɛklɛŋklɛŋ gbɛhe ni mɛni ji “amɛ diɛŋtsɛ amɛshihilɛ he” ni sa amɛ? (b) Mɛɛ esha nɛkɛ ŋwɛibɔfoi nɛɛ ateŋ mɛi komɛi fee lɛ? (d) Kɛ akɛ eshafeemɔ gbɛ ni bɔfoi atuatselɔi lɛ tsɔ nɔ lɛ to “nɔshafeelɔi” aloo gbɔmɛi ni leee Nyɔŋmɔ ni Yuda tsi amɛta lɛ anɔ Iɛ he lɛ te anaa tɛŋŋ?
6 Kɛ akɛto he lɛ, Yehowa hereɔ gbɔmɛi ayiwala kɛjɛɔ mfonirifeemɔ mli Mizraim, adesai aje ni etse ehe kɛjɛ ehe lɛ. (Kpojiemɔ 11:8) Efeɔ enɛ ejaakɛ amɛyɔse lɛ akɛ amɛyiwala.heremɔ Nyɔŋmɔ, kɛ Yesu Kristo hu akɛ mfonirifeemɔ mli hehoo Toobi lɛ ni ela heɔ amɛ kɛjɛɔ je nɛŋ lɛ, yɛ hemɔkɛyeli mli. (1 Korintobii 5:7) Shi bɔni afee ni amɛna yiwalaheremɔ lɛ, yɛ ŋwɛi jio aloo shikpɔŋ nɛɛ nɔ jio, esa akɛ Yehowa Odasefonyo ko ni ejɔɔ ehe nɔ lɛ ahi shi akɛ anɔkwafo aha lɛ ni esaaa akɛ ekwaa hemɔkɛyeli lɛ, ni ekuɔ esɛɛ eyaa jeŋ fɔŋ nɛɛ kɛ esha nyɔŋyeli lɛ mli, taakɛ bɔ ni esaaa akɛ Israelbii ni ahere amɛyiwala yɛ blema lɛ kuɔ amɛsɛɛ amɛyaa Mizraim lɛ. (5 Mose 17:16; Mateo 24:13) Hemɔkɛyeli ni ma shi daa he miihia, ejaakɛ eyɛ mli akɛ Yehowa “jie” gbɔmɛi komɛi kɛjɛ Mizraim moŋ shi “no sɛɛ lɛ ekpata mɛi ni hee yeee lɛ ahiɛ,” hewɔ lɛ nɔ. (Yakobo 1:13-15) Nakai nɔŋŋ hu “nɔshafeelɔi” aloo mɛi ni leee Nyɔŋmɔ ni Yuda wie amɛhe lɛ shweɔ ni amɛkɛ mɛi krokomɛi ana bɔlɛ yɛ gbɛ ni jeŋba kpakpa eŋmɛɛɛ gbɛ lɛ nɔ.
7, 8. (a) Mɛni ba bɔfoi toigbolɔi lɛ anɔ? (b) No hewɔ lɛ, mɛni esa akɛ wɔfee ni wɔhi yiwalaheremɔ shihilɛ mli?
7 Nɔ ni ba ŋwɛibɔfoi toigbolɔi lɛ anɔ lɛ ji kɔkɔbɔɔ nɔ kɛha Kristofoi ni hi shi yɛ Yuda gbii lɛ amli lɛ, ni eji kɔkɔbɔɔ nɔ hu kɛha Yehowa Odasefoi ni yɔɔ ŋmɛnɛŋmɛnɛ bei amli lɛ. Eyɛ mli akɛ nakai bɔfoi lɛ baanyɛ ajo gbele naa foi yɛ nu afua lɛ mli kɛtsɔ tsakemɔ nɔ moŋ, shi atsi amɛ gbɛ koni amɛkaku amɛsɛɛ kɛmiiya “amɛnukpayeli” aloo klɛŋklɛŋ gbɛhe lɛ akɛ mumɔŋ bɔɔ nii ni yɔɔ Krɔŋkrɔŋ ni naa Nyɔŋmɔ ŋaawoo kɛ nɔkpɛlɛmɔ lɛ mli ŋɔɔmɔ. Shi moŋ, akɛ “naanɔ kpai,” Nyɔŋmɔ hewalɛ ni ekɛtsiɔ nii anaa efimɔ amɛ eto kɛyashi Nyɔŋmɔ “gbi wulu lɛ nɔ kojomɔ lɛ” ni ji amɛhiɛkpatamɔ be lɛ. Dani be nɛɛ aaashɛ lɛ, nɔ ko bɛ ni tsɔɔ akɛ amɛbaanyɛ amɛtsake amɛhe amɛtsɔmɔ heloo gbɔmɔtsei, ni amɛhiɔ shi hu akɛ mɛi ni bɛ Yehowa sɔɔmɔ mli, amɛyɛ mumɔŋ duŋ kpii mli, yɛ he ni akɛɛ atsɛɔ lɛ akɛ Tartarus aloo gbohiiajeŋ bu lɛ mli.—2 Petro 2:4.
8 Yɛ anɔkwale ni eji akɛ ajieee ŋwɛibɔfoi toigbolɔi kɛjɛɛɛ shi ni amɛaagbee kɛbote amɛhiɛkpatamɔ mli lɛ mli hewɔ lɛ, Yehowa Odasefoi ni yɔɔ ŋmɛnɛ lɛ yɔseɔ akɛ amɛbaanyɛ amɛhi yiwalaheremɔ shihilɛ lɛ mli pɛ kɛtsɔ ‘hemɔkɛyelii lɛ ni amɛaapele he waa’ lɛ nɔ. Esa akɛ wɔte shi wɔwo adesai ni baateke husui ni Nyɔŋmɔ kɛha lɛ ni amɛtao akɛ amɛaabule heloo lɛ.
9, 10. (a) Mɛɛ eshai nɛkɛ Sodom kɛ maji ni ebɔle he lɛ amlibii lɛ ye fɔ yɛ mli lɛ? (b) Sodom, Gomora kɛ maji ni ebɔle amɛhe lɛ kɛ mɛɛ kɔkɔbɔɔ okadi haa wɔ?
9 Be mli ni ekɛ kɔkɔbɔɔ he nɔkwɛmɔ nɔ ni ji etɛ lɛ haa lɛ, Yuda kɛɛ akɛ:
“Tamɔ bɔ ni Sodom kɛ Gomora kɛ maji ni jwere amɛhe lɛ, ni bɔ ajwamaŋ aahu tamɔ mɛnɛɛmɛi nɛɛ nɔŋŋ ni amɛyanyiɛ heloo kroko sɛɛ lɛ, kamɔ shi akɛ okadi, ni amɛnaa naanɔ la mli nyɔmɔwoo lɛ.” (Yuda 7)
Eka shi faŋŋ akɛ Adma kɛ Zeboim kɛ ekolɛ maji krokomɛi ni yɔɔ Kpokpaa lɛ nɔ lɛ fata “Sodom kɛ Gomora kɛ maji ni jwere amɛhe” lɛ ahe. Yɛ efɔŋ ni maji nɛɛ amlibii lɛ feɔ hewɔ lɛ Yehowa ha swɔɔ kɛ la nɛ kɛjɛ ŋwɛi ni ekɛ kpata nakai maji lɛ fɛɛ ahiɛ ja Zoar, ni “jalɔ Lot” kɛ ebiyei lɛ jo foi kɛtee jɛmɛ lɛ pɛ. (2 Petro 2:6-10; 1 Mose 14:2; 19:18-29; 5 Mose 29:22, 23) Yɛ wiemɔi ni ekɛtsu nii ni ji “tamɔ bɔ ni” lɛ hewɔ lɛ, eka shi faŋŋ akɛ Yuda kɛ nɔ ni ba nakai maji lɛ anɔ lɛ to nɔ ni ba ŋwɛibɔfoi toigbolɔi lɛ ni yafee nii ni adebɔɔ eŋmɛɛɛ gbɛ akɛ mumɔŋ bɔɔ nii afee ni ji yei ni amɛŋɔ amɛ akɛ amɛŋamɛi lɛ anɔ̃ lɛ he. The Jerusalem Bible lɛ kaneɔ yɛ biɛ akɛ: “Sodom kɛ Gomora kɛ maji ni ebɔle amɛhe kɛkpe lɛ ajwamaŋbɔɔ lɛ hu ji nɔ ni adebɔɔ eŋmɛɛɛ gbɛ.” Ni jeee akɛ maji nɛɛ amlibii lɛ kɛ yei bɔ ajwamaŋ kɛkɛ shi moŋ amɛkɛ hii hu gbe amɛkɔnɔ ni ekolɛ kɛ kooloi po. (Okɛto 3 Mose 18:22-25 he.) Sodom hii kɛ gbekɛbii hii asafo yuu ko yashwe akɛ amɛaana Lot gbɔi ni amɛsusuɔ akɛ amɛji gbɔmɛi foji kɛkɛ lɛ ni amɛkɛ amɛ abɔ ajwamaŋ, shi amɛnyɛɛɛ amɛfee nakai beni nakai ŋwɛibɔfoi enyɔ ni ebasara amɛ lɛ shwila amɛhiŋmɛi, ni no sɛɛ lɛ amɛjie Lot kɛjɛ maŋ ni abu lɛ fɔ aha hiɛkpatamɔ lɛ mli lɛ.—1 Mose 19:1-17.
10 Sodom, Gomora kɛ maji ni ebɔle amɛ lɛ kɛ kɔkɔbɔɔ he Okadi haa yɛ “[Yehowa Nyɔŋmɔ] naanɔ la mli nyɔmɔwoo” ni ji naanɔ hiɛkpatamɔ ni amɛna lɛ hewɔ. Asusuɔ akɛ Sodom, Gomora, Adma kɛ Zeboim maji ni shã lɛ eyaje Ŋoo Ŋshɔ (ni Egbo) lɛ mli nui lɛ ashishi yɛ ewuoyi gbɛ. No hewɔ lɛ maji nɛɛ kɛ amɛmlibii lɛ bɛ la mli lolo. Eka shi faŋŋ akɛ maji lɛ moŋ akpata hiɛ kɛtee naanɔ shi jeee maji lɛ amlibii lɛ, ejaakɛ etamɔ nɔ ni kɛ hoo lɛ aŋkroaŋkroi komɛi ni hi shi yɛ jɛmɛ lɛ baana gbohiiashitee (Mateo 10:15; 11:24; Kpojiemɔ 20:12, 13) Shi nɔ ni ba nakai maji ni ekpɔtɔ lɛ anɔ lɛ ji jeŋba shara he kɔkɔbɔɔ ni yɔɔ naakpɛɛ, nɔ ni esa akɛ Yehowa Odasefoi abo toi ŋmɛnɛ.
Kaaku Ohiɛ Oshwie Hegbɛi Ni Nyɔŋmɔ Kɛha Lɛ Nɔ
11. Kɛ akɛ “nɔshafeelɔi” aloo gbɔmɛi ni leee Nyɔŋmɔ ni ámɛju shi amɛbabote Nyɔŋmɔ webii ateŋ lɛ to Sodombii kɛ maji ni ebɔle amɛhe ni amɛba shi kwraa lɛ ahe Iɛ te anaa tɛŋŋ?
11 Agbɛnɛ Yuda wie “nɔshafeelɔi” aloo mɛi ni leee Nyɔŋmɔ lɛ ahe ekoŋŋ ni ekɛɛ akɛ:
“Nakai nɔŋŋ mɛnɛɛmɛi hu buleɔ heloo lɛ yɛ amɛlamɔi lɛ amli, ni amɛgbeɔ nɔyeli he guɔ, ni amɛwieɔ gbɔmɛi agboi ahe wiemɔi fɔji.” (Yuda 8)
Eka shi faŋŋ akɛ, bɔ ni gbɔmɛi ni ekpɔtɔ ni hi shi yɛ Sodom kɛ maji ni ebɔle amɛhe kɛkpe lɛ amli lɛ bule amɛheloo kɛ jeŋba shara kɛ ajwamaŋbɔɔ ni adebɔɔ eŋmɛɛɛ gbɛ lɛ, “nakai nɔŋŋ” gbɔmɛi ni hiɛ jwɛŋmɔ fɔŋ ni amɛju shi amɛbabote Nyɔŋmɔ webii ateŋ lɛ buleɔ heloo gbɔmɔtso lɛ. Amɛbɛ bulɛ ko kɛha bɔfoi lɛ aŋaawoo akɛ “nyɛjoa ajwamaŋbɔɔ naa foi” lɛ.—1 Korintobii 6:18-20.
12. (a) Nɔshafeelɔi ni leee Nyɔŋmɔ nɛɛ ‘kɛ amɛhe miiwo lamɔi amli’ yɛ mɛɛ gbɛ nɔ? (b) Mɛni yɔɔ ni baaba mɛi ni diɔ jeŋba shara sɛɛ ni tsakeee amɛtsui lɛ anɔ?
12 Mɛi ni eju shi amɛbabote mli nɛɛ ‘kɛ amɛhe woɔ lamɔi amli,’ ekolɛ akɛni amɛmiitao ni amɛkɛ apasa gbalɛ mli lamɔi afĩ amɛsusumɔi asɛɛ lɛ hewɔ. (Okɛto 2 Petro 2:1; 5 Mose 13:1-5 he.) Yɛ enɛ hewɔ lɛ, amɛlamɔi lɛ baanyɛ afee nɔ ni kɔɔ bɔlɛnamɔ mli saji ahe susumɔi ni he tseee he, aloo nɛkɛ wiemɔ nɛɛ baanyɛ atsɔɔ akɛ amɛtsɔɔmɔi lɛ ji “Iakamɔi” kɛkɛ. (JB) Yɛ fɛɛ mli lɛ, nakai “nɔshafeelɔi” aloo mɛi ni leee Nyɔŋmɔ lɛ taoɔ gbɛi ni amɛaatsɔ nɔ ni amɛna hegbɛ lɛ ni amɛkɛtsu amɛjeŋba shara lɛ he nii ni amɛsusuɔ akɛ amɛbaanyɛ amɛkɛ jeŋba ni he tseee nɛɛ aye amɛhe. Ekaba akɛ Yehowa Odasefoi ateŋ mɔ ko aaagbee nakai tsɔne lɛ mli ŋmɛnɛ! Ŋwanejee ko bɛ he akɛ jeŋ muu fɛɛ Kojolɔ lɛ kɛ fɔbuu kojomɔ baa mɛi ni diɔ jeŋba shara sɛɛ ni amɛtsakeee amɛtsui lɛ anɔ.—1 Mose 18:25.
13. Mɛɛ subaŋ ‘lalɔi’ ni bɛ jeŋba lɛ hiɛ yɛ hegbɛ ni Nyɔŋmɔ eto he gbɛjianɔ lɛ he?
13 Nakai ‘lalɔi’ ni bɛ jeŋba lɛ hu ‘ebuuu nɔyeli ni amɛwieɔ anunyam gbɔmɛi ahe efɔŋ.’ Amɛkɛ hetsɔɔmɔ kpoɔ hegbɛ ni ajɛ ŋwɛi ato he gbɛjianɔ lɛ. (Abɛi 21:4; 2 Petro 2:10) Nakai gbɔmɛi lɛ yɛ atuatsemɔ mumɔ tamɔ ŋwɛibɔfoi toigbolɔi lɛ, ni fɔbuu kojomɔ sa amɛ ejaakɛ amɛbɛ bulɛ ko kɛha jeŋ muu fɛɛ Maŋtsɛ kɛ esuɔmɔ Bi lɛ.
14. Namɛi ji “gbɔmɛi agboi” aloo anunyam gbɔmɛi lɛ?
14 Nakai gbɔmɛi ni leee Nyɔŋmɔ loo nɔshafeelɔi lɛ hu wieɔ shiɔ gbɔmɛi agboi aloo “anunyam gbɔmɛi” (ni eshishi diɛŋtsɛ ji “mɛi ni hiɛ yɔɔ nyam”) , ni eka shi faŋŋ akɛ amɛji mɛi ni Yehowa Nyɔŋmɔ kɛ Yesu Kristo ewo amɛhiɛ nyam yɛ gbɛ ko nɔ lɛ. (Yohane 17:22; 1 Petro 4:12-14) Shi akɛni nɛkɛ anunyam, aloo woo nɛɛ jɛ Nyɔŋmɔ ŋɔɔ hewɔ lɛ, akɛ enɛ he yijiemɔ ko haaa mɛi ni aduro amɛ yɛ shikpɔŋ nɔ ni naa mli ŋɔɔmɔ lɛ. Shi kɛlɛ, esa akɛ Yehowa Odasefoi lɛ fɛɛ kɛ bulɛ aha “anunyam” nɛɛ ni amɛwie he bɔ ni sa, ni amɛsusu Yehowa Nyɔŋmɔ he titri.—1 Samuel 2:30.
15. (a) Te ‘Lalɔi’ ni buleɔ heloo lɛ wieɔ “gbɔmɛi agboi” aloo anunyam gbɔmɛi Iɛ ahe amɛhaa tɛŋŋ? (b) Mɛni esa akɛ wɔfee kɛ wɔyɛ su ko ni baaha wɔku wɔhiɛ wɔshwie hegbɛ ni Nyɔŋmɔ kɛha lɛ nɔ lɛ?
15 Eka shi faŋŋ akɛ mɛi ni ji Kristo sɛɛnyiɛlɔi ni afɔ amɛ mu ni sɔmɔɔ yɛ anɔkwayeli mli akɛ nɔkwɛlɔi Kristofoi ni ahala amɛ lɛ ji mɛi ni awo amɛhiɛ nyam, aloo akɛ woo ewo amɛ. Esa akɛ nanemɛi Odasefoi lɛ kɛ amɛ afee ekome ni amɛfi amɛsɛɛ yɛ Nyɔŋmɔ sɔɔmɔ mli. Nyɛkahaa wɔtamɔa ‘lalɔi’ ni buleɔ heloo ni hi shi yɛ Yuda gbii lɛ amli ni gbe Yehowa nɔyeli he guɔ ni amɛbuuu gbɔmɛi agboi aloo anunyam gbɔmɛi ni jɛ eŋɔɔ shi moŋ amɛwie mɛi ni akɛ nɛkɛ anunyam nɛɛ eha amɛhe lɛ ahe efɔŋ lɛ. (Okɛto 3 Yohane 9, 10 he.) No hewɔ lɛ, kɛ wɔyɛ su ko ni baatsɔɔ akɛ wɔmiiku wɔhiɛ wɔshwie hegbɛ ni Nyɔŋmɔ kɛha lɛ nɔ lɛ, eba akɛ wɔɔtsɔ sɔlemɔ nɔ wɔtao Yehowa yelikɛbuamɔ ni wɔjaje wɔjwɛŋmɔ.
Mikael Nɔkwɛmɔ Nɔ Fɛfɛo Lɛ
16. Mɛɛ sɔrɔtofeemɔ ka bɔfonukpa Mikael kɛ ‘lalɔi’ ni bɛ bulɛ lɛ ateŋ?
16 Yuda tsi nɔkwɛmɔ nɔ fɛfɛo ko ta kɛha wɔsɛɛnamɔ, akɛ:
“Shi bɔfonukpa Mikael lɛ, beni ekɛ Abonsam kojoɔ ni ekɛ lɛ taa naa yɛ Mose gbonyo lɛ hewɔ lɛ, ekaaa loomɔ kojomɔ ko kɛ enɔfɔɔ, shi moŋ ekɛɛ: Kã, Nuŋtsɔ [Yehowa] lɛ aaakã ohiɛ!” (Yuda 9)
Mɛɛ sɔrɔtofeemɔ kã ‘lalɔi’ ni ebuuu nii lɛ kɛ Mikael, bɔfonukpa lɛ ni batsɔ wɔ-Nuŋtsɔ Yesu Kristo lɛ teŋ nɛkɛ! (Okɛto Abɛi 8:22-31; Yohane 6:62; Filipibii 2:5-11; 1 Tesalonikabii 4:15, 16 he.) Yɛ Nyɔŋmɔ tsuji ahe efɔŋ ni amɛwieɔ lɛ hewɔ lɛ, ‘lalɔi’ ni leee Nyɔŋmɔ ni ji nɔshafeelɔi lɛ ŋɔ hegbɛi komɛi ni Yehowa Bi lɛ po eŋɔɔɔ yɛ be mli ni ekɛ Satan jeɔ ŋwane yɛ Hebri gbalɔ Mose gbonyo lɛ he lɛ. Ŋmalɛ lɛ mli nɔ ko bɛ ni atsɔ hiɛ aŋma afɔ shi yɛ nɛkɛ naataamɔ nɛɛ he. Shi Yuda nine shɛ nɛkɛ amaniɛbɔɔ nɛɛ nɔ eyɛ mli akɛ etsɔɔɔ he ni ejɛ ni eŋma efɔ shi kɛha wɔsɛɛnamɔ.
17. (a) Mɛni Mikael efeee yɛ naataamɔ ni te shi yɛ Mose gbonyo Iɛ he Iɛ mli, ni mɛni hewɔ? (b) Te Mikael to okadi eha Yehowa weku Iɛ yɛ bulɔ ni akɛhaa ŋwɛi hegbɛ he nɔkwɛmɔ nɔ mli eha tɛŋŋ?
17 Ekolɛ eeenyɛ eba akɛ Abonsam miitao Mose gbonyo lɛ koni eto jamɔ ko ebɔle enɛ he ni etsɔ no nɔ efite Yehowa webii. Shi Mikael kɛ fɔbuu kojomɔ ko baaa Abonsam nɔ kɛ jɛmɔ. Mikael “ekaaa” nakai feemɔ akɛni esheɔ Yehowa gbeyei yɛ gbɛ ni ja nɔ lɛ hewɔ. Ni etsɔɔɔ be ni Yehowa eto ni ekɛ Satan baaye lɛ hu hiɛ. (Kpojiemɔ 12:7-9; 20:1-3, 7-10) Shi moŋ, Nyɔŋmɔ suɔmɔ Bi lɛ jie bulɛ kpo eha jeŋ muu fɛɛ Kojolɔ lɛ ni ekɛ hegbɛ lɛ ha lɛ akɛ lɛ ji mɔ ni esa akɛ ekã Abonsam. No hewɔ lɛ, Mikael wiemɔi lɛ amli waaa moŋ, shi kɛlɛ etsɔɔ akɛ eyɛ hewalɛ kɛtsɔ Mose gbonyo lɛ ni ehe eto lɛ hewɔ, ni Yehowa fu gbalɔ lɛ yɛ gbonyo bu ko ni akadiii mli. (5 Mose 34:1-6) Yɛ anɔkwale mli lɛ, Nyɔŋmɔ Bi lɛ to bulɛ kɛha ŋwɛi hegbɛ he nɔkwɛmɔ nɔ ni yɔɔ fɛo efɔ shi eha Nyɔŋmɔ webii lɛ yɛ enɛɛmɛi fɛɛ mli. Eba akɛ wɔhu wɔɔnyiɛ sɛɛ.
18. Mɛni hewɔ abaanyɛ akɛɛ akɛ mɛi ni buleɔ heloo lɛ bɛ mumɔ lɛ?
18 Nɔ ni kɛ sɔrɔtofeemɔ baa lɛ, Yuda tee nɔ ekɛɛ kɛnyiɛ sɛɛ akɛ:
“Shi mɛnɛɛmɛi lɛ nii fɛɛ ni amɛleee lɛ, amɛwieɔ he musubɔɔ wiemɔ, shi nii ni amɛle yɛ amɛfɔmɔsu lɛ naa tamɔ kooloi ni lee nii lɛ, nomɛi amli nɔŋŋ amɛfiteɔ amɛhe yɛ.” (Yuda 10)
Eyɛ mli akɛ mɛi ni buleɔ heloo nɛɛ baa shi ni amɛshɛɛɛ Mikael, ni kɛ fɔbuu kojomɔ baŋ Satan nɔ yɛ jɛmɔ mli lɛ he nɔ ko kwraa moŋ, shi jeee “gbɔmɛi agboi” aloo anunyamtsɛmɛi ahe efɔŋ kɛkɛ amɛwieɔ shi “[mumɔŋ] nii fɛɛ ni amɛleee” aloo amɛnuuu shishi lɛ. Akɛni amɛji “gbɔmɛi ni bɛ mumɔ” (Yuda 19) hewɔ lɛ, amɛnuuu mumɔŋ nibii ashishi. (1 Korintobii 2:6-16) Yehowa susumɔi, egbɛi, kɛ nifeemɔi kɛ nitsumɔi ji nii ni nɛkɛ “nɔshafeelɔi” loo gbɔmɛi ni leee Nyɔŋmɔ nɛɛ leee he nɔ ko nɔ ko kwraa.
19. Nɔshafeelɔi” loo gbɔmɛi ni leee Nyɔŋmɔ lɛ tamɔ “kooloi ni leee nii” yɛ mɛɛ gbɛ nɔ?
19 Yɛ bulɛ ni amɛyɔɔ kɛha Yehowa Nyɔŋmɔ hewɔ lɛ, bɔfonukpa Mikael loo ŋwɛibɔfoi krokomɛi ni ja lɛ ewieee mɛi ni Yehowa ewo amɛhiɛ nyam lɛ ahe wiemɔ fɔŋ. Shi nɛkɛ “nɔshafeelɔi” loo gbɔmɛi ni leee Nyɔŋmɔ nɛɛ fee nakai ejaakɛ amɛkɛ amɛhe eha kooloi akɔnɔ kwraa. Amɛnuuu mumɔŋ nibii ashishi shi moŋ nɔ ni ŋɔɔ amɛheloo akɔnɔi lɛ anaa pɛ. No hewɔ lɛ amɛtao akɛ amɛaagbe amɛhelooŋ akɔnɔ tamɔ kooloi ni diɔ heloo lɛ pɛ sɛɛ. Akɛni nɛkɛ hii nɛɛ ekpɛ amɛyiŋ akɛ amɛbaagbe bɔlɛnamɔ he akɔnɔ ni anyaŋeɔ waa ni ete shi yɛ amɛmli lɛ hewɔ lɛ, ‘amɛfite amɛ diɛŋtsɛ amɛhe’ yɛ heloo mli eshafeemɔi amli. No hewɔ lɛ amɛjie amɛhe kpo akɛ “kooloi ni leee wiemɔ ni afɔ amɛ aha mɔɔmɔ kɛ gbee yɛ amɛfɔmɔsu lɛ naa’ ni amɛbɛ gbohiiashitee he hiɛnɔkamɔ ko.—2 Petro 2:9-13.
20. Yɛ he ni wɔsusu Yuda wiemɔi lɛ ahe kɛbashɛ nɛɛ hewɔ lɛ, mɛɛ gbɛ esa akɛ Yehowa odasefoi anɔkwafoi lɛ atiu?
20 Kwɛ bɔ ni ehe hiaa waa akɛ Yehowa Odasefoi ni yɔɔ ŋmɛnɛ lɛ ate shi awo nɛkɛ apasa tsɔɔlɔi, mɛi ni buleɔ heloo lɛ ni amɛbuuu nɔyeli hegbɛ ni ajɛ ŋwɛi ato lɛ! No hewɔ lɛ, kɛ́ ŋaawoo ni asusu he kɛbashɛ he ni wɔshɛ yɛ Yuda wolo nɛɛ mli lɛ jieɔ tɔmɔ kpo yɛ wɔ aŋkroaŋkro sui kɛ gbɛi amli lɛ kpo lɛ, eba akɛ wɔhe aaafee oya ni wɔtsake wɔgbɛ, ni wɔtsɔ sɔlemɔ nɔ wɔtao wɔ-ŋwɛi Tsɛ lɛ yelikɛbuamɔ. Eba akɛ wɔɔya nɔ wɔna he sɛɛ yɛ mumɔŋ yɛ ‘kɔkɔbɔɔi ni akɛmamɔ wɔhiɛ’ lɛ atoiboo hewɔ.a
(Wɔbaasusu Yuda wolo lɛ he wɔgbe naa yɛ Buu-Mɔɔ ni banyiɛ enɛ sɛɛ lɛ mli.)
[Shishigbɛ niŋmai]
a Ajie kɛjɛ August 15, 1982 blɔfo Buu-Mɔɔ Iɛ mli.
Ani obaanyɛ okai nɛkɛ saji otii nɛɛ?
□ Yɛ mɛɛ gbɛ nɔ blema Israelbii lɛ aniiashikpamɔ yeɔ odase akɛ esa akɛ wɔna hemɔkɛyeli daa koni wɔnine ashɛ yiwalaheremɔ nɔ?
□ Ŋwɛibɔfoi toigbolɔi lɛ kɛ mɛɛ kɔkɔbɔɔ he nɔkwɛmɔ nɔ haa wɔ?
□ Sodom, Gomora kɛ maji ni ebɔle amɛhe lɛ kɛ mɛɛ kɔkɔbɔɔ he nɔkwɛmɔ nɔ haa Kristofoi?
□ Mɛni hewɔ esaaa akɛ wɔkuɔ wɔhiɛ wɔshwieɔ nɔyeli hegbɛ ni ajɛ ŋwɛi ato lɛ nɔ lɛ?
□ Mɛɛ bulɛ kɛha hegbɛ he nɔkwɛmɔ nɔ ŋwɛibɔfonukpa Mikael kɛfɔ shi ha wɔ, no hewɔ lɛ te esa akɛ wɔfee wɔnii wɔha tɛŋŋ?
[Mfoniri ni yɔɔ baafa 14]
Nɔ ni ba Sodom kɛ maji ni ebɔle he lɛ anɔ lɛ ji jeŋba shara he kɔkɔbɔɔ