Yitso 27
Afɔ Nyɔŋmɔ Maŋtsɛyeli Lɛ!
Ninaa 7—Kpojiemɔ 12:1-17
Saneyitso: Ŋwɛi yoo lɛ fɔ, Mikael kɛ Satan wuu ni eshɛ lɛ efɔ shikpɔŋ nɔ
Emlibaa be: Kɛjɛ be mli ni akɛ Kristo Yesu ta maŋtsɛsɛi nɔ yɛ 1914 kɛyashi amanehulu kpeteŋkpele lɛ mli
1. Okadii ni atsɔɔ mli yɛ Kpojiemɔ yitsei 12 kɛyashi 14 lɛ ashishinumɔ baaye abua wɔ yɛ mɛɛ gbɛ nɔ?
AFƐNE Nyɔŋmɔ teemɔŋ sane krɔŋkrɔŋ lɛ. (Kpojiemɔ 10:7) Yehowa Maŋtsɛyeli kɛtsɔ e-Mesia lɛ nɔ lɛ ji nɔ ko ni eba mli agbɛnɛ. Eeye nɔ! Ba ni eba lɛ tsɔɔ hiɛkpatamɔ kɛha Satan kɛ eseshi lɛ kɛ anunyam kunimyeli kɛha Nyɔŋmɔ ŋwɛi gbɛjianɔtoo lɛ Seshi lɛ. Bɔfo ni ji kpawo lɛ egbeko etɛtrɛmaŋtɛrɛ lɛ kpamɔ naa moŋ, ejaakɛ eyɛ babaoo ni ebaajie lɛ kpo etsɔɔ wɔ yɛ kpoo ni ji etɛ lɛ he. (Kpojiemɔ 11:14) Okadii ni atsɔɔ mli yɛ Kpojiemɔ yitsei 12 kɛyashi 14 lɛ baaye abua wɔ ni eha shishinumɔ ni wɔyɔɔ yɛ nibii fɛɛ ni kɔɔ kpoo lɛ he lɛ mli alɛɛ koni ekɛ Nyɔŋmɔ teemɔŋ sane krɔŋkrɔŋ lɛ aba naagbee.
2. (a) Mɛɛ okadi kpeteŋkpele ko Yohane na? (b) Mɛɛ be mli ajie nɛkɛ okadi kpeteŋkpele nɛɛ shishinumɔ lɛ kpo?
2 Agbɛnɛ Yohane na okadi kpeteŋkpele ko—eko ni Nyɔŋmɔ webii lɛ yɔɔ he miishɛɛ waa. Ekɛ gbalɛ ninaa ko ni yɔɔ miishɛɛ ba, ni akala enɛ he shishinumɔ ni ji klɛŋklɛŋ nɔ kwraa lɛ aha yɛ March 1, 1925 The Watch Tower lɛ mli yɛ wiemɔ ni eyitso ji “Maŋ lɛ Fɔmɔ” mli kɛ agbɛnɛ hu, yɛ 1926 yɛ wolo ni ji Deliverance lɛ mli. Nɛkɛ Biblia mli shishinumɔ ni tamɔ la ni kpɛ nɛɛ bafee yinɔsane yɛ Yehowa nitsumɔ lɛ hiɛyaa mli. No hewɔ lɛ ha ni Yohane atsɔɔ nɔkwɛmɔnɔ ni baa nɛɛ mli taakɛ eje shishi ena lɛ: “Ni ana okadi kpeteŋkpele ko yɛ ŋwɛi: yoo ko ni kɛ hulu eha ehe, ni nyɔŋtsere yɔɔ enajiashi, ni ŋulamii nyɔŋma-kɛ-enyɔ akekere fi eyitso; ni ehiɛ musu, ni eebolɔ, ni eekɔmɔ ni eena nɔ ni ebaafɔ.”—Kpojiemɔ 12:1, 2.
3. Te wɔfeɔ tɛŋŋ wɔleɔ yoo ni ana yɛ ŋwɛi lɛ?
3 Klɛŋklɛŋ be mli ni Yohane ena yoo yɛ ŋwɛi nɛ. Ni kɛlɛ ejeee adesa yoo diɛŋtsɛ. Shi moŋ, eji okadi, loo mfoniri. (Kpojiemɔ 1:1) Mɛni he mfoniri efeɔ? Yɛ gbalɛi ni jɛ mumɔŋ lɛ amli lɛ, yɛ bei komɛi amli lɛ akɛ yei damɔɔ shi ahaa gbɛjianɔtoi ni amɛkɛ gbɔmɛi pɔtɛɛ “ebote gbalashihilɛ mli.” Awie Israel he yɛ Hebri Ŋmalɛi lɛ amli akɛ Yehowa Nyɔŋmɔ ŋa. (Yeremia 3:14) Yɛ Hela Ŋmalɛi lɛ amli lɛ, awieɔ Kristofoi ni afɔ amɛ mu lɛ asafo lɛ he akɛ Kristo ayemforo. (Kpojiemɔ 21:9-14) Yoo ni Yohane na yɛ biɛ lɛ hu kɛ mɔ ko ebote gbalashihilɛ mli, ni eehe efɔ. Namɔ ji ewu? Ojogbaŋŋ, yɛ sɛɛ mli lɛ, “asha ebi lɛ kɛtee Nyɔŋmɔ ŋɔɔ yɛ emaŋtsɛsɛi lɛ masɛi.” (Kpojiemɔ 12:5) No hewɔ lɛ Yehowa ŋɔ bi lɛ akɛ enɔ. No hewɔ lɛ, yoo ni Yohane na lɛ baafee Yehowa okadi ŋa lɛ.
4. Namɛi ji Nyɔŋmɔ okadi ŋa lɛ bii lɛ, ni te bɔfo Paulo tsɛɔ yoo ni Yohane na lɛ tɛŋŋ?
4 Aaafee afii ohai kpaanyɔ dani enɛ aaaba lɛ, no mli lɛ Yehowa kɛ nɛkɛ okadi ŋa nɛɛ ewie, akɛ: “Ni obii lɛ fɛɛ aaafee Yehowa kaselɔi.” (Yesaia 54:5, 13) Yesu tsɛ ŋmalɛ kɛjɛ nɛkɛ gbalɛ nɛɛ mli ni etsɔɔ akɛ nɛkɛ bii nɛɛ ji esɛɛnyiɛlɔi anɔkwafoi lɛ, mɛi ni yɛ sɛɛ mli lɛ amɛbafee Kristofoi ni afɔ amɛ mu lɛ asafo lɛ. (Yohane 6:44, 45) No hewɔ lɛ nɛkɛ asafo nɛɛ mli bii, ni awie amɛhe akɛ Nyɔŋmɔ bii lɛ hu ji Nyɔŋmɔ okadi ŋa lɛ bii. (Romabii 8:14) Bɔfo Paulo kɛ naagbee sane ni kɔɔ enɛ he lɛ fata he beni ekɛɔ akɛ: “Shi ŋwɛi Yerusalem lɛ ji odehe lɛ, mɔ nɔŋŋ ni ji wɔ fɛɛ wɔnyɛ lɛ.” (Galatabii 4:26) Belɛ “yoo” ni Yohane na lɛ lɛ ji “ŋwɛi Yerusalem” lɛ.
5. Akɛni akɛ ŋulamii 12 efee akekere aha Yehowa okadi ŋa lɛ hewɔ lɛ, mɛni diɛŋtsɛ ji ŋwɛi Yerusalem lɛ?
5 Shi mɛni pɔtɛɛ ji ŋwɛi Yerusalem lɛ? Akɛni Paulo wie ehe akɛ “ŋwɛi,” ni Yohane hu na lɛ yɛ ŋwɛi hewɔ lɛ, eka shi faŋŋ akɛ ejeee shikpɔŋ nɔ maŋ ko; ni asaŋ ejeee “Yerusalem Hee” lɛ hu, ejaakɛ nakai gbɛjianɔtoo lɛ ji Kristo ayemforo lɛ, jeee Yehowa ŋa lɛ. (Kpojiemɔ 21:2) Kadimɔ ákɛ akɛ ŋulamii 12 efi lɛ akekere. Yibɔ 12 lɛ damɔ shi kɛha emuuyeli yɛ gbɛjianɔtoo gbɛfaŋ.a No hewɔ lɛ, etamɔ nɔ ni nɛkɛ ŋulamii 12 nɛɛ miitsɔɔ akɛ eji ŋwɛi gbɛjianɔtoo, taakɛ blema Yerusalem ji yɛ shikpɔŋ nɔ lɛ. Ŋwɛi Yerusalem lɛ ji Yehowa jeŋ muu fɛɛ mumɔŋ bɔɔ nii agbɛjianɔtoo ni tsuɔ nii tamɔ eŋa, yɛ sɔɔmɔ ni ekɛhaa lɛ kɛ bii ni efɔɔ ehaa lɛ lɛ fɛɛ mli.
6. (a) Anɔkwale ni eji akɛ yoo ni Yohane na lɛ lɛ kɛ hulu eha ehe, nyɔŋtsere yɛ enajiashi, ni ŋulamii akekere fi eyitso lɛ tsɔɔ mɛni? (b) Yoo ni hiɛ musu lɛ fɔmɔ kɔɔmɔi lɛ feɔ mɛni he okadi?
6 Yohane na yoo nɛɛ ni tamɔ nɔ ni akɛ hulu eha ehe ni eyɛ nyɔŋtsere hu yɛ enajiashi. Kɛ wɔkɛ ŋulamii akekere ni ebu lɛ fata he lɛ, ebafeɔ mɔ ni ŋwɛi kanei ebɔle ehe. Nyɔŋmɔ duromɔ kpɛɔ shwieɔ enɔ jetsɛremɔ kɛ jenamɔ. Mɛɛ Yehowa ŋwɛi gbɛjianɔtoo ni yɔɔ fɛo lɛ he okadi ni sa po nɛ! Agbɛnɛ hu ehiɛ musu, ni eekɔmɔ. Ebolɔmɔ kɛha ŋwɛi yelikɛbuamɔ lɛ tsɔɔ akɛ be eshɛ ni ebaafɔ bi. Yɛ Biblia mli lɛ, akɛ kɔɔmɔi toɔ nitsumɔ ni wa ni he hiaa ni atsu koni nɔ ko ni he hiaa ajɛ mli aba lɛ he. (Okɛto Lala 90:2; Abɛi 25:23; Yesaia 66:7, 8 he.) Ŋwanejee ko bɛ he akɛ fɔmɔ kɔɔmɔi ni tamɔ nɛkɛ ba beni Yehowa ŋwɛi gbɛjianɔtoo lɛ saa ehe kɛhaa yinɔsane mli fɔmɔ nɛɛ.
Drako Tsuru Kpeteŋkpele Ko
7. Mɛni ji okadi kroko ni Yohane na yɛ ŋwɛi lɛ?
7 Mɛni Yohane na yɛ no sɛɛ? “Ni ana okadi kroko yɛ ŋwɛi, ni naa, drako tsuru kpeteŋkpele ni yɔɔ yitsei kpawo kɛ akoloŋtoi nyɔŋma, ni maŋtsɛfaii kpawo bumɔ eyitsei lɛ anɔ. Ni elei miigbala ŋwɛi ŋulamii amlijai etɛ mli ekome, ni etsirɛ amɛ eshwie shikpɔŋ lɛ nɔ. Ni drako lɛ badamɔ yoo lɛ ni baafɔ lɛ hiɛ, koni kɛ efɔ lɛ ni emi ebi lɛ.”—Kpojiemɔ 12:3, 4.
8. (a) Namɔ ji drako tsuru kpeteŋkpele lɛ? (b) Drako lɛ ni hiɛ yitsei kpawo kɛ akoloŋtoi nyɔŋma kɛ akekere yɛ eyitso fɛɛ yitso nɔ lɛ tsɔɔ mɛni?
8 Drako nɛɛ ji Satan, “shishijee onufu” lɛ. (Kpojiemɔ 12:9; 1 Mose 3:15) Eji hiɛkpatalɔ ni he yɔɔ gbeyei—drako ni yɔɔ yitsei kpawo, aloo mɔ ni miɔ nii ni baanyɛ ami mɔ ni enine aaashɛ enɔ lɛ kwraa. Kwɛ bɔ ni ehe yɔɔ naakpɛɛ ha! Nakai yitsei kpawo kɛ akoloŋtoi nyɔŋma lɛ tsɔɔ akɛ lɛ ji mɔ ni to maŋkwramɔŋ kooloo ni etsɛŋ ni abaatsɔɔ bɔ ni eji lɛ yɛ Kpojiemɔ yitso 13 lɛ. Nɛkɛ kooloo nɛɛ hu yɛ yitsei kpawo kɛ akoloŋtoi nyɔŋma. Akɛni Satan yɛ maŋtsɛfai yɛ yitso fɛɛ yitso nɔ—yɛ kpawo lɛ fɛɛ nɔ hewɔ lɛ—wɔbaanyɛ wɔna nɔmimaa akɛ jeŋ hewalɛi ni kooloo nɛɛ damɔ shi kɛha amɛ lɛ ehi enɔyeli shishi. (Yohane 16:11) Akoloŋtoi nyɔŋma lɛ feɔ hewalɛ ni yeɔ emuu ni ekɛtsu nii yɛ je nɛɛ mli lɛ he okadi ni sa.
9. Drako lɛ lei ni “miigbala ŋwɛi ŋulamii amlijai etɛ mli ekome” ni etsirɛ amɛ eshwie shikpɔŋ lɛ tsɔɔ mɛni?
9 Drako lɛ hu yɛ hewalɛ yɛ mumɔi ashihilɛ he lɛ. Ekɛ elei “gbala ŋwɛi ŋulamii amlijai etɛ mli ekome.” Ŋulamii baanyɛ adamɔ shi aha ŋwɛibɔfoi. (Hiob 38:7) “Mlijai etɛ mli ekome” ni atsi ta lɛ baanyɛ ama nɔ mi akɛ Satan elaka ŋwɛibɔfoi lɛ ateŋ mɛi pii. Kɛ mɛnɛɛmɛi baje ehewalɛ shishi pɛ lɛ, amɛnyɛŋ amɛjo foi dɔŋŋ. Amɛnyɛŋ amɛku amɛsɛɛ amɛya Nyɔŋmɔ asafo krɔŋkrɔŋ lɛ mli dɔŋŋ. Amɛbatsɔmɔ daimonioi, ni Satan, amɛmaŋtsɛ loo nɔyelɔ lɛ gbalaa amɛ kɛyaa. (Mateo 12:24) Satan hu shɛrɛ amɛ kɛjɛ ŋwɛi eshwie shikpɔŋ nɛɛ nɔ. Ŋwanejee ko bɛ he akɛ enɛ kɔɔ Noa gbii lɛ ahe dani Nu Afua lɛ ba, beni Satan laka Nyɔŋmɔ bii toigbolɔi lɛ koni amɛba shikpɔŋ nɔ ni amɛkɛ gbɔmɛi abiyei abana bɔlɛ lɛ. Akɛ toigbalamɔ lɛ, Nyɔŋmɔ eshɛrɛ nɛkɛ “bɔfoi ni fee esha” nɛɛ ewo gbokɛlɛfoi atsuŋ shihilɛ ni atsɛɔ lɛ Tartarus lɛ mli.—1 Mose 6:4; 2 Petro 2:4; Yuda 6.
10. Mɛɛ gbɛjianɔtoi loo asafoi ni teɔ shi woɔ amɛhe anaa agbɛnɛ, ni mɛni hewɔ drako lɛ bɔɔ mɔdɛŋ ni emi bi lɛ ni yoo lɛ fɔ lɛ lɛ?
10 No hewɔ lɛ, gbɛjianɔtoi enyɔ ni teɔ shi woɔ amɛhe ebaje kpo faŋŋ—Yehowa ŋwɛi gbɛjianɔtoo lɛ ni akɛ yoo lɛ fee ehe mfoniri lɛ kɛ Satan daimonioi agbɛjianɔtoo lɛ ni tswa jeŋ muu fɛɛ maŋtsɛ ni Nyɔŋmɔ ji lɛ he mpoa lɛ. Esa akɛ ana maŋtsɛyeli he sane kpeteŋkpele lɛ naa. Shi yɛ mɛɛ gbɛ nɔ? Satan, ni miigbala daimonioi lɛ kɛmiiya lɛ tamɔ kooloo ko ni hiɛ yɔɔ la ni miikwɛ koni enine ashɛ mɔ ko nɔ ni emɔ lɛ. Eemɛ koni yoo lɛ afɔ. Eesumɔ ni emi nɛkɛ abifao ni akpaa lɛ gbɛ nɛɛ ejaakɛ ele akɛ ewoɔ shihilɛ mli ni eeeya nɔ ehi kɛ jeŋ ni eyeɔ nɔ lɛ he gbeyei.—Yohane 14:30.
Binuu, Nuu
11. Te Yohane tsɔɔ yoo lɛ bi lɛ fɔmɔ lɛ mli eha tɛŋŋ, ni mɛni hewɔ atsɛɔ bi lɛ akɛ “binuu, nuu” lɛ?
11 Be ni ato aha jeŋmaji lɛ koni amɛye nɔ ni Nyɔŋmɔ kɛ ehe wooo mli lɛ ba naagbee yɛ 1914. (Luka 21:24) Kɛkɛ ni yoo lɛ fɔ ebi lɛ yɛ ebe naa pɛpɛɛpɛ: “Ni efɔ binuu, nuu, ni kɛ dadetso baakpala jeŋmaji lɛ fɛɛ lɛ. Ni asha ebi lɛ kɛtee Nyɔŋmɔ ŋɔɔ yɛ emaŋtsɛsɛi lɛ masɛi. Ni yoo lɛ jo foi kɛtee ŋa lɛ nɔ, he ni Nyɔŋmɔ esaa eha lɛ lɛ, koni amɛyalɛ lɛ yɛ jɛmɛ gbii akpe kɛ ohai enyɔ kɛ nyɔŋmai ekpaa.” (Kpojiemɔ 12:5, 6, New World Translation) Gbekɛ lɛ ji “binuu, nuu.” Mɛni hewɔ Yohane kɛ wiemɔi enyɔ nɛɛ bɔɔ he etsuɔ nii lɛ? Efeɔ nakai koni ekɛtsɔɔ bɔ ni gbekɛ lɛ sa ha, bɔ ni ehe esa akɛ ekɛ hewalɛ ni sa yeɔ jeŋmaji lɛ anɔ. Emaa bɔ ni fɔmɔ nɛɛ ji miishɛɛ kɛ nyamɔ be hu ha lɛ nɔ mi! Etsuɔ nɔ titri yɛ Nyɔŋmɔ teemɔŋ sane lɛ ni ekɛbaa naagbee lɛ mli. Ejaakɛ nɛkɛ binuu nɛɛ kɛ “dadetso baakpala jeŋmaji lɛ fɛɛ”!
12. (a) Mɛni Yehowa tsɔ gbalɛ mli ewo shi yɛ Yesu he yɛ Lalai lɛ amli? (b) Yoo lɛ ni fɔ binuu “ni kɛ dadetso baakpala jeŋmaji lɛ” tsɔɔ mɛni?
12 Ani nakai wiemɔ lɛ tamɔ nɔ ko ni onu pɛŋ? Hɛɛ, Yehowa ewo shi yɛ gbalɛ naa yɛ Yesu he akɛ: “Oookumɔ amɛ kɛ dadetso, ooojwara amɛ tamɔ gbɛshɔlɔ gbɛ!” (Lala 2:9) Agba yɛ ehe hu akɛ: “Ohewalɛ tso lɛ, Yehowa aaakpa mli kɛaajɛ Zion ahao: Ye lumɔ yɛ ohenyɛlɔi lɛ ateŋ!” (Lala 110:2) No hewɔ lɛ, fɔmɔ ni Yohane na lɛ kɔɔ Yesu Kristo he. Dabi, ejeee Yesu ni obalayoo foro ko miifɔ lɛ yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli lɛ kɛkɛ; ni asaŋ ekɔɔɔ Yesu ni aatee lɛ shi ekoŋŋ kɛmiiba mumɔŋ shihilɛ mli yɛ afi 33 Ŋ.B. lɛ he. Kɛfata he lɛ, ejeee tsakemɔ ko. Shi moŋ eji Nyɔŋmɔ Maŋtsɛyeli lɛ fɔmɔ yɛ 1914 ni eba mli diɛŋtsɛ, kɛ Yesu—ni yɔɔ ŋwɛi amrɔ nɛɛ yɛ nɔ ni miihe ashɛ afii ohai 20 lɛ—ni awo lɛ Maŋtsɛ agbɛnɛ.—Kpojiemɔ 12:10.
13. Binuu ni afɔ lɛ “ni asha . . . lɛ kɛtee Nyɔŋmɔ ŋɔɔ yɛ emaŋtsɛsɛi lɛ masɛi” lɛ tsɔɔ mɛni?
13 Yehowa eŋmɛŋ gbɛ koni Satan ami E-ŋa lɛ loo E-binuu ni afɔ lɛ ehee lɛ kɔkɔɔkɔ! Efɔmɔ mli ni “asha ebi lɛ kɛtee Nyɔŋmɔ ŋɔɔ yɛ emaŋtsɛsɛi lɛ masɛi.” No hewɔ lɛ ebaa Yehowa, ni baakwɛ e-Maŋtsɛyeli ni afɔ lɛ ehee nɛɛ nɔ lɛ hebuu shishi kwraa, akɛ edɛŋdade ni ekɛbaatsuu E-gbɛi krɔŋkrɔŋ lɛ he. Yɛ nakai beaŋ nɔŋŋ lɛ, yoo lɛ jo foi kɛtee he ko ni Nyɔŋmɔ esaa kɛha lɛ yɛ ŋa lɛ nɔ. Abaatsɔɔ enɛ mli babaoo yɛ sɛɛ mli! Yɛ Satan gbɛfaŋ lɛ, be eshɛ agbɛnɛ kɛha nifeemɔ ko ni hiɛdɔɔ yɔɔ mli ni haŋ enyɛ ewo Maŋtsɛyeli ni yɔɔ ŋwɛi lɛ he gbeyei gbi ko gbi ko dɔŋŋ. Mɛni ji nakai nifeemɔ lɛ?
Ta yɛ Ŋwɛi!
14. (a) Taakɛ Yohane gbaa wɔ lɛ, mɛɛ nifeemɔ haŋ Satan awo Maŋtsɛyeli lɛ he gbeyei gbi ko gbi ko dɔŋŋ lɛ? (b) Nɛgbɛ atsi Satan kɛ edaimonioi lɛ anaa yɛ?
14 Yohane gbaa wɔ: “Ni ta te shi yɛ ŋwɛi: Mikael kɛ ebɔfoi lɛ fa drako lɛ nɔ ta. Ni drako lɛ bɔfoi lɛ fata ehe kɛwu, ni amɛnyɛɛɛ, ni asaŋ amɛnaaa gbɛ dɔŋŋ yɛ ŋwɛi. Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo (naafolɔlɔ loo Abonsam) lɛ kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.” (Kpojiemɔ 12:7-9) No hewɔ lɛ akɛ nibii ni baa ni kɛ Nyɔŋmɔ teemɔŋ sane lɛ baa naagbee lɛ, afaa Satan, ashwieɔ lɛ kɛjɛɔ ŋwɛi, ni ashɛrɛɔ edaimonioi lɛ hu kɛ lɛ fɛɛ ashwieɔ shikpɔŋ lɛ nɔ. Atsiɔ mɔ ni eshishiu shikpɔŋ lɛ nɔ bii lɛ fɛɛ kɛyashi he ni ebatsɔ amɛnyɔŋmɔ lɛ naa yɛ naagbee kwraa awoɔ wɔshibɔlemɔ ŋulami nɛɛ nɔ he ko, yɛ he ni etuatsemɔ lɛ je shishi klɛŋklɛŋ yɛ lɛ.—2 Korintobii 4:3, 4.
15, 16. (a) Namɔ ji Mikael, ni te wɔfeɔ tɛŋŋ wɔleɔ enɛ hu? (b) Mɛni hewɔ eji nɔ ni sa akɛ Mikael feɔ mɔ ni shɛɔ Satan kɛjɛɔ ŋwɛi efɔɔ lɛ?
15 Namɔ yeɔ kunim kpeteŋkpele ni tamɔ nɛkɛ yɛ Yehowa gbɛi amli lɛ? Biblia lɛ kɛɔ akɛ lɛ ji Mikael kɛ ebɔfoi lɛ. Shi namɔ ji Mikael? Gbɛi “Mikael” lɛ shishi ji “Namɔ Tamɔ Nyɔŋmɔ?” No hewɔ lɛ Mikael baafee mɔ ni yɔɔ jeŋ muu fɛɛ maŋtsɛ ni Yehowa ji lɛ bembuu lɛ he miishɛɛ kɛtsɔ odase ni eye akɛ mɔ ko mɔ ko bɛ ni aaanyɛ akɛ lɛ ato Ehe lɛ nɔ. Yɛ Yuda kuku 9 lɛ, atsɛɔ lɛ yɛ jɛmɛ akɛ “bɔfonukpa Mikael.” Nɔ ni yɔɔ miishɛɛ lɛ, akɛ sabala “bɔfonukpa” lɛ tsuɔ nii yɛ he kroko yɛ Biblia lɛ mli akɛtoɔ mɔ kome pɛ he: Yesu Kristo.b Paulo kɛɔ yɛ ehe akɛ: “Nuŋtsɔ lɛ diɛŋtsɛ kɛ oshebɔɔ kɛ ŋwɛi bɔfonukpa gbee kɛ Nyɔŋmɔ tɛtrɛmaŋtɛrɛ baajɛ ŋwɛi akpeleke shi.” (1 Tesalonikabii 4:16) Sabala “bɔfonukpa” lɛ shishi ji “bɔfoi lɛ anɔ onukpa.” No hewɔ lɛ ebɛ naakpɛɛ akɛ Kpojiemɔ aaawie ‘Mikael kɛ e-bɔfoi’ lɛ ahe. Biblia lɛ mli hei krokomɛi ni tsiɔ bɔfoi ni ba amɛhe shi amɛha Nyɔŋmɔ tsulɔ jalɔ ko lɛ kɔɔ Yesu he. No hewɔ lɛ Paulo wieɔ “beni aaajie Nuŋtsɔ Yesu kpo kɛaajɛ ŋwɛi kɛ e-hewalɛ bɔfoi lɛ” he.—2 Tesalonikabii 1:7; kwɛmɔ Mateo 24:30, 31; 25:31 hu.
16 Enɛ kɛ ŋmalɛi krokomɛi nyiɛɔ wɔhiɛ ni wɔmuɔ sane naa ni ŋwanejee ko bɛ he akɛ Mikael jeee mɔ ko mɔ ko akɛ Nuŋtsɔ Yesu Kristo ni yɔɔ eŋwɛi gbɛhe lɛ. Agbɛnɛ, yɛ Nuŋtsɔ lɛ gbi lɛ mli nɛɛ, ekɛɛɛ Satan dɔŋŋ akɛ: “Kã, Nuŋtsɔ [Yehowa] aaakã ohiɛ.” Akɛni be ni akɛaakojo ji enɛ hewɔ lɛ, Yesu, akɛ Mikael lɛ, shɛrɛɔ Satan yiwalɔ lɛ kɛ edaimonioi bɔfoi lɛ kɛjɛɔ ŋwɛi eshwieɔ. (Yuda 9; Kpojiemɔ 1:10) Esa jogbaŋŋ akɛ Lɛ ji Mɔ ni esa akɛ efee enɛ, akɛ Lɛ ji Maŋtsɛ hee ni awo lɛ lɛ. Yesu ji Seshi lɛ hu, mɔ ni awo shi yɛ ehe yɛ Eden lɛ, mɔ ni yɛ naagbee lɛ, ebaatswa Onufu lɛ yitso nɔ, ni egbe lɛ kwraa kɛjɛ shihilɛ mli lɛ. (1 Mose 3:15) Akɛni eshwie Satan kɛjɛ ŋwɛi hewɔ lɛ, Yesu etsi kɛbɛŋkɛ nakai naagbee eyitso nɔ tswaa lɛ he.
“Nyɛ Ŋwɛii, Nyɛnaa Tsuijurɔ”
17, 18. (a) Mɛɛ nifeemɔ Yohane gba akɛ eba yɛ ŋwɛi yɛ Satan shigbeemɔ kɛmiijɛ ŋwɛi lɛ hewɔ? (b) Nɛgbɛ ji he ni eeenyɛ eba akɛ gbee wulu ni Yohane nu lɛ jɛ?
17 Yohane bɔ Satan shigbeemɔ kpeteŋkpele nɛɛ he nifeemɔ ni yɔɔ miishɛɛ ni ba ŋwɛi lɛ he amaniɛ: “Ni minu gbee wulu ko yɛ ŋwɛi miikɛɛ: Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ wɔ-Nyɔŋmɔ lɛ nɔ, ni akɛ hegbɛ lɛ eha e-Kristo (Mɔ ni efɔ lɛ mu) lɛ, ejaakɛ ashɛ wɔnyɛmimɛi lɛ anaafolɔlɔ lɛ ni folɔɔ amɛnaa yɛ wɔ-Nyɔŋmɔ lɛ hiɛ nyɔɔŋ kɛ shwane lɛ afɔ. Ni amɛ lɛ, toobi lɛ la lɛ kɛ amɛ diɛŋtsɛ amɛdaseyeli wiemɔ lɛ amɛkɛye enɔ kunim, ni amɛdɔɔɔ amɛ diɛŋtsɛ amɛwala he kɛyashi gbele mli tete. No hewɔ lɛ nyɛ ŋwɛii kɛ nyɛ mɛi ni nyɛyɔɔ jɛi, nyɛnaa tsuijurɔ!”—Kpojiemɔ 12:10-12a.
18 Namɛi agbee wulu Yohane nu lɛ? Biblia lɛ ekɛɛɛ. Shi bolɔmɔ ko ni tamɔ nakai ni abɔ he amaniɛ yɛ Kpojiemɔ 11:17 lɛ ba kɛjɛ onukpai 24 ni atee amɛ shi ni yɔɔ amɛŋwɛi gbɛhe lɛ mli, he ni amɛbaanyɛ amɛdamɔ krɔŋkrɔŋbii 144,000 lɛ naa agbɛnɛ yɛ lɛ aŋɔɔ. (Kpojiemɔ 11:18) Ni akɛni awieɔ Nyɔŋmɔ tsuji ni awaa amɛ yi ni afɔ amɛ mu ni yɔɔ shikpɔŋ nɔ lolo lɛ ahe yɛ biɛ akɛ “wɔnyɛmimɛi” hewɔ lɛ, nɛkɛ wiemɔi nɛɛ baanyɛ ajɛ he kome too lɛ nɔŋŋ. Ŋwanejee ko bɛ he akɛ nɛkɛ anɔkwafoi nɛɛ baanyɛ ni amɛkɛ amɛgbee afata he, ejaakɛ etsɛŋ ni amɛshitee lɛ baanyiɛ sɛɛ yɛ be mli ni ashɛrɛ Satan kɛ edaimonioi asafoi lɛ kɛjɛ ŋwɛi ashwie lɛ sɛɛ nɔŋŋ.
19. (a) Nyɔŋmɔ teemɔŋ sane krɔŋkrɔŋ lɛ ni baa naagbee lɛ gbeleɔ gbɛ kɛhaa Yesu koni efee mɛni? (b) Satan ni atsɛɔ lɛ “wɔnyɛmimɛi lɛ anaafolɔlɔ lɛ” tsɔɔ mɛni?
19 Nyɔŋmɔ teemɔŋ sane krɔŋkrɔŋ lɛ naagbee biɔ ni Yesu aŋɔ nɔyeli hegbɛ yɛ Yehowa Maŋtsɛyeli lɛ mli. Agbɛnɛ gbɛ egbele kɛha Nyɔŋmɔ koni etsu eyiŋtoo kpeteŋkpele akɛ eeehere adesai anɔkwafoi ayiwala lɛ he nii. Jeee Yesu kaselɔi ni sheɔ Nyɔŋmɔ gbeyei ni amrɔ nɛɛ amɛyɔɔ shikpɔŋ lɛ nɔ lɛ pɛ ekɛ yiwalaheremɔ bahaa amɛ, shi moŋ akpekpei abɔ ni amɛgboi ni anyɛɛɛ akane amɛ ni yɔɔ Nyɔŋmɔ kaimɔ mli lɛ hu. (Luka 21:27, 28) Akɛni atsɛɔ Satan akɛ “wɔnyɛmimɛi lɛ anaafolɔlɔ” lɛ tsɔɔ akɛ, eyɛ mli akɛ anaa akɛ bɔ ni efolɔ Hiob naa lɛ ji amale moŋ, shi etee nɔ etswa emuuyeli mli ni Nyɔŋmɔ tsuji ni yɔɔ shikpɔŋ nɔ lɛ hiɛ mli lɛ mpoa. Eka shi faŋŋ akɛ, eti naafolɔmɔ akɛ gbɔmɔ kɛ nɔ fɛɛ nɔ ni eyɔɔ lɛ baaha koni ekɛhere esusuma yiwala lɛ mli shii abɔ yɛ be babaoo mli. Kwɛ bɔ ni Satan hiɛ egbo kɛ hiɛshishwiemɔ!—Hiob 1:9-11; 2:4, 5.
20. Kristofoi anɔkwafoi eye Satan nɔ kunim yɛ mɛɛ gbɛ nɔ?
20 Kristofoi ni afɔ amɛ mu, ni abuɔ amɛ jalɔi ‘yɛ Toobi lɛ la lɛ hewɔ,’ lɛ miiya nɔ kɛmiiye Nyɔŋmɔ kɛ Yesu Kristo he odase yɛ yiwaa lɛ fɛɛ sɛɛ. Nɔ ni fe afii 120 nɛ, ni Yohane kuu lɛ etee nɔ amɛtsɔɔ saji wuji ni kɔɔ Jeŋmaji Abe lɛ naagbee yɛ 1914 he lɛ mli. (Luka 21:24) Ni asafo babaoo lɛ miisɔmɔ yɛ amɛmasɛi yɛ anɔkwayeli mli bianɛ. Mɛnɛɛmɛi ateŋ mɔ ko ‘sheee mɛi ni gbeɔ gbɔmɔtso lɛ shi amɛnyɛɛɛ susuma lɛ amɛgbe lɛ agbeyei,’ taakɛ Yehowa Odasefoi ashihilɛ diɛŋtsɛ mli niiashikpamɔi eye he odase shii abɔ yɛ wɔbe nɛɛ mli lɛ. Amɛtsɔ amɛdaaŋ wiemɔ kɛ Kristofoi ajeŋba nɔ amɛye Satan nɔ kunim, ni amɛtee nɔ amɛtsɔɔ shii abɔ akɛ eji amalelɔ. (Mateo 10:28; Abɛi 27:11; Kpojiemɔ 7:9) Kwɛ miishɛɛ ni Kristofoi ni afɔ amɛ mu lɛ baana yɛ be mli ni aaatee amɛ shi kɛaaya ŋwɛi lɛ, akɛni Satan bɛ jɛmɛ dɔŋŋ koni efolɔ amɛnyɛmimɛi lɛ anaa lɛ! Be eshɛ lɛlɛŋ, ni ŋwɛibɔfoi asafoi lɛ fɛɛ kɛ nyamɔ baahere tsɛmɔ nɛɛ nɔ: “Nyɛ ŋwɛii kɛ nyɛ mɛi ni nyɛyɔɔ jɛi, nyɛnaa tsuijurɔ!”
Kpoo Kroko!
21. Satan kɛ kpoo eba shikpɔŋ lɛ nɔ kɛ ŋshɔ hiɛ yɛ mɛɛ gbɛ nɔ?
21 Akɛni enaaa miishɛɛ yɛ kpoo ni ji etɛ lɛ he hewɔ lɛ, Satan eto eyiŋ akɛ ekɛ lɛ diɛŋtsɛ ekpoo ko baahao adesai. Ni no ji: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ Abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.” (Kpojiemɔ 12:12b) Satan ni ashwie lɛ kɛjɛ ŋwɛi lɛ tsɔɔ kpoo lɛlɛŋ kɛhaa shikpɔŋ nɛɛ diɛŋtsɛ, ni adesai pɛsɛmkunyatsɛmɛi ni yɔɔ ehewalɛ shishi lɛ fiteɔ nɔ lɛ. (5 Mose 32:5) Ni nɔ ni fe nakai lɛ, Satan yiŋkpɛɛ ni ji ‘aye nɔ loo afite lɛ’ lɛ kɛ kpoo baa okadi shikpɔŋ lɛ, ni ji bɔ ni ato adesai agbɛjianɔ aha lɛ nɔ, kɛ agbɛnɛ okadi ŋshɔ lɛ, adesai ni efee hamahama lɛ nɔ. Yɛ jeŋ tai enyɔ lɛ mli lɛ, Satan mlifu ji nɔ ni jeŋmaji ni hɔlɔ eshishi lɛ jie lɛ kpo lɛ, ni daimonioi amlifu ni te shi lɛ etee nɔ aahu kɛbashi ŋmɛnɛ—eyɛ mli akɛ esɛɛ etsɛŋ dɔŋŋ! (Marko 13:7, 8) Shi yɛ bɔ ni Abonsam ŋaatsɔi lɛ ehiii kwraa ha lɛ fɛɛ sɛɛ lɛ, enyɛŋ etamɔ nɔ ni baajɛ kpoo ni ji etɛ—ni ji Nyɔŋmɔ Maŋtsɛyeli lɛ nifeemɔ—lɛ mli aba Satan gbɛjianɔtoo ni anaa lɛ nɔ lɛ!
22, 23. (a) Mɛni Yohane kɛɛ eba yɛ be mli ni ashɛ drako lɛ afɔ shikpɔŋ nɔ lɛ sɛɛ? (b) Te feɔ tɛŋŋ ni drako lɛ nyɛɔ ewaa “yoo lɛ ni fɔ binuu lɛ” yi lɛ?
22 Kɛjɛ Satan shwiemɔ ni kɛ oshara ba enɔ lɛ sɛɛ nɛɛ, Kristo nyɛmimɛi ni yɔɔ shikpɔŋ nɔ lɛ etee nɔ amɛkpee emlifu ni naa wa lɛ naa. Yohane bɔ amaniɛ akɛ: “Ni beni drako lɛ na akɛ ashɛ lɛ afɔ shikpɔŋ lɛ, etiu yoo lɛ ni fɔ nuu lɛ. Ni aŋɔ okropɔŋ kpeteŋkpele lɛ fiji enyɔ lɛ aha yoo lɛ, koni efiliki kɛya ŋa lɛ nɔ yɛ egbɛhe lɛ, he ni alɛɔ lɛ yɛ be kɛ bei kɛ be fa kɛjɛ onufu lɛ hiɛ lɛ.”—Kpojiemɔ 12:13, 14.
23 Ninaa lɛ miiwie jwɛŋmɔ ni akɛba yɛ kuku 6, ni kɛɔ akɛ yɛ be mli ni efɔ ebi lɛ sɛɛ lɛ, yoo lɛ jo foi kɛtee ŋa nɔ, kɛjɛ drako lɛ he lɛ he ekoŋŋ yɛ biɛ. Eeefee wɔ naakpɛɛ akɛ wɔɔsusu bɔ ni drako lɛ aaanyɛ awa yoo lɛ yi lɛ he, ejaakɛ ŋwɛi eyɔɔ ni ashɛ drako lɛ afɔ shikpɔŋ nɔ bianɛ. Ojogbaŋŋ, kaimɔ akɛ yoo lɛ yɛ bii yɛ shikpɔŋ lɛ nɔ yɛ biɛ, eseshi lɛ. Akɛɔ wɔ yɛ sɛɛ mli yɛ ninaa nɛɛ mli akɛ Satan kɛ mlifu tutuaa yoo lɛ kɛtsɔɔ eseshibii ni yɔɔ shikpɔŋ nɛɛ nɔ lɛ ayiwaa nɔ. (Kpojiemɔ 12:17) Abaanyɛ akɛ nɔ ni baa yoo lɛ seshibii ni yɔɔ shikpɔŋ nɛɛ nɔ lɛ anɔ lɛ ato he akɛ eeba yoo lɛ diɛŋtsɛ nɔ. (Okɛto Mateo 25:40 he.) Ni seshibii lɛ nanemɛi ni yɔɔ shikpɔŋ nɛɛ nɔ ni amɛyi faa daa lɛ hu baatsɔ yiwai ni tamɔ nɛkɛ mli.
Maŋ Hee Ko
24. Mɛɛ niiashikpamɔ Biblia Kaselɔi lɛ na ni tamɔ Israelbii lɛ akpɔmɔ kɛmiijɛ Mizraim lɛ?
24 Beni awuɔ klɛŋklɛŋ jeŋ ta lɛ, Yesu nyɛmimɛi lɛ tee nɔ yɛ anɔkwayeli mli amɛtsu amɛ odaseyeli nitsumɔ lɛ kɛyashi he ni amɛbaanyɛ. Amɛtsu enɛ yɛ shitee-kɛ-woo ni mli wa ni jɛ Satan kɛ esamaŋfoi ni hiɛ edɔ lɛ adɛŋ ba amɛnɔ lɛ fɛɛ sɛɛ. Yɛ naagbee lɛ, atsi Biblia Kaselɔi lɛ odaseyeli yɛ faŋŋ mli lɛ naa kwraa. (Kpojiemɔ 11:7-10) Enɛ ji be mli ni amɛna niiashikpamɔ ko ni tamɔ nɔ ni ba Israelbii lɛ anɔ yɛ Mizraim ni ebabi ni amɛŋmɛ amɛtsui shi yɛ yiwaa babaoo shishi lɛ. No ni Yehowa kɛ amɛ ba he ko ni yɔɔ shweshweeshwe yɛ Sinai ŋa lɛ nɔ oya, tamɔ yɛ okropɔŋi afiji anɔ. (2 Mose 19:1-4) Nakai nɔŋŋ hu yɛ yiwaa ni mli wa ni ba amɛnɔ yɛ 1918-19 lɛ sɛɛ lɛ, Yehowa jie edasefoi lɛ, ni damɔ eyoo lɛ najiaŋ lɛ, kɛba mumɔŋ shihilɛ ko ni yɔɔ shweshweeshwe kɛha amɛ mli taakɛ shia ŋa lɛ ji kɛha Israelbii lɛ. Enɛ ba akɛ amɛsɔlemɔi lɛ ahetoo.—Okɛto Lala 55:6-9 he.
25. (a) Mɛni Yehowa to yɛ 1919, ni tamɔ Israelbii ni eto amɛ akɛ maŋ yɛ ŋa lɛ nɔ lɛ? (b) Namɛi feɔ nɛkɛ maŋ nɛɛ, ni mɛni mli akɛ amɛ eba?
25 Yehowa to Israelbii lɛ akɛ maŋ yɛ ŋa lɛ nɔ, ni eha amɛ nii yɛ mumɔŋ kɛ gbɔmɔtsoŋ fɛɛ. Nakai nɔŋŋ hu, kɛjɛ 1919 kɛbaa lɛ, Yehowa to yoo lɛ seshi lɛ ema shi akɛ mumɔŋ maŋ. Esaaa ákɛ akɛ enɛ futuɔ Mesia Maŋtsɛyeli lɛ ni yeɔ nɔ kɛjɛɔ ŋwɛi kɛjɛ 1914 lɛ. Shi moŋ, mɛi ni feɔ nɛkɛ maŋ hee nɛɛ ji odasefoi ni afɔ amɛ mu yɛ shikpɔŋ nɔ lɛ, ni akɛ amɛ baa anunyam mumɔŋ shihilɛ mli yɛ 1919 lɛ ateŋ shwɛɛnii lɛ. Akɛni ahaa amɛ “amɛniyenii yɛ be ni sa mli” hewɔ lɛ, awaje mɛnɛɛmɛi aha nitsumɔ ni ka amɛhiɛ lɛ.—Luka 12:42; Yesaia 66:8.
26. (a) Be ni atsi ta yɛ Kpojiemɔ 12:6, 14 lɛ feɔ mɛɛ be sɛɛjɛkɛmɔ? (b) Mɛni ji be kpalaŋŋ ni ji bei etɛ kɛ fa lɛ yiŋtoo, mɛɛ be eje shishi, ni mɛɛ be eba naagbee?
26 Be enyiɛ nɛkɛ hejɔɔmɔ kɛha Nyɔŋmɔ yoo lɛ seshi lɛ ye? Kpojiemɔ 12:6 kɛɔ wɔ akɛ gbii 1,260. Kpojiemɔ 12:14 tsɛɔ nakai be lɛ akɛ, be, bei kɛ be fa; yɛ gbɛ kroko nɔ lɛ bei etɛ kɛ fa. Yɛ anɔkwale mli lɛ, wiemɔi enyɔ lɛ fɛɛ damɔ shi kɛha afii etɛ kɛ fa, enɛ jeɔ shishi kɛjɛɔ Shikpɔŋ lɛ Fa ni Yɔɔ Kooyigbɛ lɛ nɔ kɛjɛ 1919 agbiɛnaa be mli kɛyashi 1922 gbo be mli. Enɛ ji hejɔɔmɔ kɛ hewalɛnamɔ kɛ gbɛjianɔ ni atoɔ ekoŋŋ ahaa Yohane kuu lɛ ni aku sɛɛ akɛ amɛ eba amɛtsutsu shihilɛ mli ekoŋŋ lɛ.
27. (a) Taakɛ Yohane amaniɛbɔɔ lɛ tsɔɔ lɛ, mɛni drako lɛ fee yɛ 1922 sɛɛ? (b) Mɛni ji Satan yiŋtoo yɛ yiwaa ni tamɔ nu afua ni efɛ̃ eshwie Odasefoi lɛ asɛɛ lɛ hewɔ?
27 Drako lɛ nijiaŋ ejeee wui! “Ni onufu lɛ fɛ̃ nu ko ni tamɔ faa ko kɛjɛ edaaŋ eshwie yoo lɛ sɛɛ, koni nu lɛ asha lɛ kɛya.” (Kpojiemɔ 12:15) Nɛkɛ “nu ko ni tamɔ faa,” aloo “nu afua” (The New English Bible) nɛɛ tsɔɔ mɛni? Blema Maŋtsɛ David wie efɔŋ feelɔi ni teɔ shi woɔ lɛ lɛ ahe akɛ “faai fɔji” [“mɛi ni sɛɛnamɔ bɛ amɛhe lɛ anujɔɔi,” Young]. (Lala 18:4, 5, 16, 17) Nɔ ni Satan jieɔ lɛ kpo agbɛnɛ hu ji yiwaa ni ‘mɛi fɔji kɛbaa.’ Yɛ 1922 sɛɛ pɛ kɛkɛ ni Satan fɛ yiwaa ko ni tamɔ nu afua eshi Odasefoi lɛ. (Mateo 24:9-13) Nɔ ni bafata enɛ he ji awui ni amɛyeɔ amɛ yɛ gbɔmɔtsoŋ, “efɔŋ feemɔ sɛi . . . ni tsɔɔ mla nɔ eyeɔ sane fɔŋ,” tsuŋwoi, kɛ amɛgbee kɛtsɔ sɛŋmɔ kɛ amɛyii ni afolɔɔ nɔ. (Lala 94:20) Akɛni aŋmɛɛɛ Abonsam ni aba lɛ shi lɛ gbɛ ni ebɛŋkɛ Nyɔŋmɔ ŋwɛi yoo lɛ he hewɔ lɛ, ekɛ mlifu yatutua yoo nɛɛ seshibii ni eshwɛ yɛ shikpɔŋ nɔ lɛ koni ekpata amɛhiɛ, yɛ gbɛ ni yɔɔ tɛɛ nɔ aloo kɛtsɔ Nyɔŋmɔ hiɛ duromɔ ni eeeha amɛ laaje kɛtsɔ emuuyeli mli ni amɛhiɛŋ dɔŋŋ nɔ. Shi amɛfaishitswaa lɛ yafee tamɔ Hiob nɔ lɛ: “Mibemyeli lɛ miŋmɛŋ he kɛyashi beyinɔ ni magbo.”—Hiob 27:5.
28. Yiwaa babaoo ni tamɔ nu afua lɛ shɛ he ni mli wa fe fɛɛ yɛ Jeŋ Ta II mli yɛ mɛɛ gbɛ nɔ?
28 Nɛkɛ yiwaa ni naa wa ni tamɔ nu afua nɛɛ yashɛ he ni naa wa fe fɛɛ yɛ Jeŋ Ta II be lɛ mli. Yɛ Europa lɛ, akɛ Odasefoi aaashɛ 12,000 wo Nazi nɔyeli lɛ gboklɛfoi aŋsraiaŋ kɛ tsuŋwoohei amli, ni amɛteaŋ mɛi aaafee 2,000 gboi yɛ jɛmɛ. Odasefoi anɔkwafoi na nɔ yɛ yiwaa ni tamɔ nakai nɔŋŋ mli yɛ tawuu mli nuŋtsɔmɛi ni yeɔ Italia, Japan, Korea, kɛ Taiwan nɔ lɛ ashishi. Yɛ shikpɔji ni akɛɛ atsɛɔ amɛ demokrase shikpɔji lɛ anɔ po lɛ, Catholic Action kui sɔrɔtoi fee Odasefoi lɛ niseniianii, akɛ ama kpa amɛhe ni akɛ tsɛji tsɛrɛ mli ni ashwie amɛ kɛjɛ maŋ. Afite Kristofoi akpeei ni ashwie Odasefoi lɛ abii kɛjɛ skul.
29. (a) Te Yohane tsɔɔ jiemɔ loo hejɔlɛ ni ba kɛjɛ jɛɛhe ni akpaaa gbɛ lɛ mli eha tɛŋŋ? (b) Te ebalɛ tɛŋŋ ni “shikpɔŋ lɛ ye bua yoo lɛ”? (d) Mɛni drako lɛ etee nɔ efee?
29 Jiemɔ loo hejɔlɛ ba kɛjɛ he ni akpaaa gbɛ yɛ: “Ni shikpɔŋ lɛ ye bua yoo lɛ; ni shikpɔŋ lɛ gbele edaaŋ ni emi faa lɛ ni drako lɛ fɛ̃ kɛjɛ edaaŋ eshwie lɛ. Ni drako lɛ mli fu yoo lɛ, ni eyiŋ etee ni ekɛ yoo lɛ seshibii ni eshwɛ ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ ayawuu.” (Kpojiemɔ 12:16, 17) “Shikpɔŋ lɛ”—gbɔmɛi loo nibii sɔrɔtoi ni yɔɔ Satan diɛŋtsɛ nibii agbɛjianɔtoo lɛ mli—je shishi akɛ amɛaami “faa lɛ,” loo “nu afua” lɛ. Yɛ 1940 afii lɛ amli lɛ, Odasefoi lɛ ye saji sɔrɔtoi amli kunim yɛ United States, Amerika Saneyeli He Wulu lɛ hiɛ, kɛ agbɛnɛ kɛjɛ nɔyelii krokomɛi ni yɔɔ shikpɔji krokomɛi anɔ ni efi jamɔ mli heyeli sɛɛ lɛ adɛŋ. Yɛ naagbee lɛ, maji ni Efee Ekome lɛ mi Nazi-Fascist naagba lɛ, ni eha Odasefoi lɛ ni ena amanehulu yɛ yiwalɛ nɔyelii ashishi lɛ he jɔ amɛ. Yiwai asɛɛ efooo shikome nyɔŋlo, ejaakɛ drako lɛ mlifu lɛ etee nɔ kɛbashi ŋmɛnɛ, ni ehaa ta lɛ yaa nɔ ekɛshiɔ mɛi ni “amɛhiɛ Yesu Kristo odase lɛ.” Odasefoi anɔkwafoi yɛ gboklɛfoi atsui amli lolo yɛ shikpɔji pii anɔ, ni amɛteŋ mɛi komɛi gboiɔ lolo yɛ amɛ emuuyeli mlihiɛmɔ hewɔ. Shi shikpɔji nɛɛ ekomɛi yɛ ni nɔyelɔi lɛ gbɔjɔɔ amɛ nɔnyɛɛ lɛ mli fioo, ehaa Odasefoi lɛ naa heyeli ko mli ŋɔɔmɔ.c No hewɔ lɛ, yɛ nakai gbalɛ lɛ mlibaa mli lɛ, shikpɔŋ lɛ yaa nɔ emiɔ yiwaa ni tamɔ faa lɛ.
30. (a) Shikpɔŋ lɛ kɛ hejɔlɛ saŋŋ eha koni mɛni aya nɔ? (b) Mɛni jɛɔ emuuyeli mli ni Nyɔŋmɔ webii lɛ hiɛ lɛ mli baa?
30 Shikpɔŋ lɛ kɛ hejɔlɛ ni fa eha yɛ nɛkɛ gbɛ nɔ, ni eŋmɛ gbɛ ni Nyɔŋmɔ nitsumɔ lɛ egbɛ eshwa kɛtee shikpɔji 235 komɛi anɔ ni amɛna sanekpakpa lɛ he shiɛlɔi anɔkwafoi fe akpekpei ekpaa. Jeŋmaji ateŋ asafo babaoo ko ni ji heyelilɔi heei kɛ yoo lɛ seshibii ni eshwɛ lɛ miiye Nyɔŋmɔ kitai akɛ atsi he kɛjɛ je lɛ he, ahi shi yɛ jeŋba hetsemɔ mli, ni asumɔ nyɛmimɛi lɛ anɔ, ni amɛmiiye odase amɛmiiha Mesia Maŋtsɛyeli lɛ. Amɛ emuuyeli mlihiɛmɔ lɛ kɛ hetoo haa Satan mpoatswaa kɛ heguɔgbee lɛ, no hewɔ lɛ aatswa Satan kɛ enibii agbɛjianɔtoo lɛ gbele he ŋmɛlɛ.—Abɛi 27:11.
[Shishigbɛ niŋmai]
a Okɛto heloo naa Israel akutsei 12 lɛ, bɔfoi 12 lɛ, mumɔŋ Israel akutsei 12 lɛ, kɛ agboi 12 lɛ, ŋwɛibɔfoi 12 lɛ, kɛ Yerusalem Hee lɛ shishitoo tɛi 12 lɛ he.—Kpojiemɔ 21:12-14.
b Shi, kadimɔ akɛ, Kpojiemɔ 12:9 wieɔ “drako kpeteŋkpele lɛ . . . kɛ bɔfoi” lɛ ahe. No hewɔ lɛ jeee akɛ Abonsam feɔ ehe amale nyɔŋmɔ ko kɛkɛ, shi moŋ ebɔɔ mɔdɛŋ hu ni etsɔ bɔfonukpa, eyɛ mli akɛ Biblia lɛ kɛ sabala ko ni tamɔ nakai haaa lɛ.
c Saneyeli hei wuji ni yɔɔ shikpɔji pii anɔ lɛ eŋmɛɛ Yehowa Odasefoi ahe; atsɔɔ yiŋkpɛɛ nɛɛ ekomɛi yɛ gbɛhe ni yɔɔ baafa 92 lɛ.
[Akrabatsa ni yɔɔ baafa 185]
“Ni Shikpɔŋ lɛ Gbele Edaaŋ”
Satan nu afua ni ji yiwaa lɛ efee nɔ ni ajie lɛ kpo yɛ shikpɔji pii anɔ ashi Kristofoi ni afɔ amɛ mu lɛ kɛ amɛhefatalɔi lɛ. Yɛ bei babaoo mli lɛ, nibii ni yaa nɔ yɛ Satan diɛŋtsɛ nibii agbɛjianɔtoo lɛ mli lɛ haa amiɔ nɛkɛ nu afua nɛɛ.
Asafo yuu ni feɔ basabasa tamɔ nu afua kɛ tsuŋwoi yɛ U.S.A lɛ bafee nɔ ni Saneyeli He Wulu lɛ mi yɛ eyiŋkpɛi amli yɛ 1940 afii lɛ amli.
1945: Yiwaa ni naa wa yɛ shikpɔji ni Germany kɛ Japan yeɔ nɔ lɛ anɔ lɛ ba naagbee beni Maji ni Efee Ekome lɛ ye Jeŋ Ta II mli kunim lɛ.
Beni agu nitsumɔ lɛ yɛ Dominican Republic lɛ, awo Yehowa Odasefoi ni yɔɔ jɛmɛ lɛ tsuŋ, ayi amɛ, ni akɛ tui asɛɛ tsei tswia amɛ. Yɛ afi 1960 mli lɛ, nɔyelɔ yiwalɔ Rafael Trujillo kɛ Roma Katolik Sɔlemɔ lɛ ni amɛteŋ efite lɛ ha aŋmɛ Yehowa Odasefoi lɛ agbɛ ekoŋŋ ni amɛshiɛ.
Tui ni atswia amɛ, amɛshiai ni ashaa, amɛyei ni amɔmɔɔ amɛ ekaa naa akɛ amɛ wɔɔ, amɛyii, niseniianifeemɔ kɛ gbee ni akɛba Odasefoi lɛ anɔ yɛ Nigeria maŋ lɛ mli lɛ ba naagbee beni yɛ 1970 lɛ, nɔyeli lɛ asraafoi ye maŋ fa ni tse amɛhe ni nɛkɛ nibii yaa nɔ yɛ jɛmɛ lɛ nɔ kunim lɛ.
Yɛ Spania lɛ, atutua shiai ni Kristofoi nɛɛ yɔɔ mli, abu amɛ fɔ ni ahe amɛ shika, awo amɛ tsuŋ kɛha “efɔŋ” ni ji Nyɔŋmɔ he ni amɛwieɔ kɛ Kristofoi akpeei ni amɛfeɔ hewɔ. Yiwaa nɛɛ ba naagbee yɛ 1970, beni nɔyeli lɛ tsake bɔ ni ekɛ jamɔi ni jeee Katolikbii lɛ yeɔ haa lɛ, ni enɛ ha aŋmɛ gbɛ ni akɛ Yehowa Odasefoi anitsumɔ lɛ wo mla shishi.
Yɛ Portugal lɛ, abote amɛshiai sɔrɔtoi amli ni gbɛbimɔ wolo bɛ mli. Afee Odasefoi lɛ niseniianii, awo amɛ tsuŋ, ahe amɛ-Biblia kɛjɛ amɛdɛŋ. ‘Ami’ nɛkɛ yiwaa nɛɛ beni yɛ 1974 lɛ, asraafoi ni butuɔ maŋ tsake nɔyeli lɛ ni afee mla akɛ aŋmɛ heyeli yɛ kpee mli gbɛ lɛ.
Yɛ Argentina lɛ, akɛni asraafoi anɔyeli yɔɔ jɛmɛ hewɔ lɛ, ashwie Yehowa Odasefoi abii kɛjɛ skul, ni amɔmɔ Odasefoi yɛ maŋ muu lɛ fɛɛ mli yɛ sanekpakpa lɛ ni amɛshiɛɔ hewɔ. Nɛkɛ yiwaa nɛɛ ba naagbee yɛ 1984 beni nɔyeli lɛ kpɛlɛ Yehowa Odasefoi Akpeei anɔ yɛ mla naa lɛ.
[Akrabatsa ni yɔɔ baafa 183]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
1914 Maŋtsɛyeli lɛ fɔmɔ
1919 Maŋ hee lɛ fɔmɔ
1919-1922 Hewalɛnamɔ ekoŋŋ be
1922- Yiwaa ni tamɔ nu afua
[Mfonirii ni yɔɔ baafa 182]
Kpoo kɛha shikpɔŋ lɛ