‘Nyɛwua Hemɔkɛyeli lɛ He Ta lɛ Waa’!
“Nyɛwua hemɔkɛyeli ni akɛha mɛi krɔŋkrɔŋi lɛ shikome nyɔŋlo lɛ he ta lɛ waa.”—YUDA 3, NW.
1. Mɛɛ shishinumɔ naa anɔkwa Kristofoi wuɔ ta ŋmɛnɛ?
ASRAAFOI ni etee ta lɛ etsu shihilɛ gbɛ ni wa waa he nii be fɛɛ be. Ŋɔɔ lɛ akɛ owo tawuu nibii lɛ fɛɛ ni oonyiɛ kilomitai babaoo yɛ bɔ ni kɔɔyɔŋ tsakemɔ lɛ ji ha lɛ fɛɛ sɛɛ, ni okɛ ohe miiwo tawuu nibii kɛ nitsumɔ he tsɔsemɔ dɛŋdɛŋ mli, loo ni oofã ohe kɛmiijɛ shihilɛi sɔrɔtoi fɛɛ ni yɔɔ gbeyei ni baanyɛ agbe bo loo epila bo lɛ he. Shi kɛlɛ, anɔkwa Kristofoi kɛ amɛhe wooo ta ni maji lɛ wuɔ lɛ mli. (Yesaia 2:2-4; Yohane 17:14) Shi, esaaa akɛ wɔhiɛ kpaa nɔ akɛ wɔ fɛɛ wɔmiiwuu ta yɛ shishinumɔ ko naa. Satan he tsɛ̃ɔ Yesu Kristo kɛ esɛɛnyiɛlɔi ni yɔɔ shikpɔŋ lɛ nɔ lɛ waa diɛŋtsɛ. (Kpojiemɔ 12:17) Yɛ shishinumɔ ko naa lɛ, mɛi fɛɛ ni kpɛɔ amɛyiŋ akɛ amɛaasɔmɔ Yehowa Nyɔŋmɔ lɛ kɛ amɛhe miiha akɛ asraafoi koni amɛwuu mumɔŋ ta.—2 Korintobii 10:4.
2. Mɛɛ gbɛ nɔ Yuda tsɔɔ bɔ ni Kristofoi atawuu lɛ yɔɔ ha, ni ewolo lɛ baanyɛ aye abua koni wɔŋmɛ wɔtsui shi yɛ mɛɛ gbɛ nɔ?
2 Esa jogbaŋŋ akɛ, Yesu nyɛ bi Yuda ŋma akɛ: “Suɔmɔ mɛi, eyɛ mli akɛ miibɔ mɔdɛŋ waa akɛ maŋma nyɛ wɔ fɛɛ wɔhemɔkɛyeli lɛ he sane moŋ, shi mina akɛ ehe miihia ni maŋma nyɛ koni mikɛwo nyɛ hewalɛ koni nyɛwua hemɔkɛyeli ni akɛha mɛi krɔŋkrɔŋi lɛ shikome nyɔŋlo lɛ he ta lɛ waa.” (Yuda 3, NW) Beni Yuda wo Kristofoi lɛ hewalɛ koni ‘amɛwuu ta lɛ waa’ lɛ, ekɛ wiemɔ ko ni eshishinumɔ tamɔ wiemɔ ni akɛtsu nii kɛha “piŋmɔ” lɛ tsu nii. Hɛɛ, nɛkɛ ta nɛɛ mli baanyɛ awa, nɔ ni piŋmɔ yɔɔ mli po! Ani ewaa kɛhaa bo bei komɛi akɛ oooŋmɛ otsui shi yɛ ta ni awuɔ nɛɛ mli? Yuda wolo ni sɛɛ kɛɛɛ ni mli wa lɛ baanyɛ aye abua wɔ. Ewoɔ wɔ hewalɛ koni wɔte shi wɔshi jeŋba shara, koni wɔkɛ bulɛ aha nɔyeli hegbɛ ni ajɛ ŋwɛi ato he gbɛjianɔ lɛ, ni wɔhi Nyɔŋmɔ suɔmɔ lɛ mli. Nyɛhaa wɔkwɛa bɔ ni wɔkɛ ŋaawoo nɛɛ baatsu nii wɔha.
Tee Shi Oshi Jeŋba Shara
3. Mɛɛ shihilɛ ni yɔɔ oshara Kristofoi asafo lɛ kɛkpe yɛ Yuda gbii amli?
3 Yuda baanyɛ ana akɛ jeee enanemɛi Kristofoi lɛ fɛɛ yeɔ kunim yɛ ta ni awuɔ ashiɔ Satan lɛ mli. Tooku lɛ kɛ shihilɛ ko ni yɔɔ oshara kpe. Yuda ŋma akɛ, gbɔmɛi fɔji komɛi ‘eju shi kɛbabote mli.’ Nɛkɛ gbɔmɛi nɛɛ tsɔɔ ŋaa gbɛ nɔ amɛteeɔ jeŋba shara shi. Ni amɛkɛ saji jieɔ amɛnaa yɛ ŋaa gbɛ nɔ yɛ amɛ nifeemɔi lɛ ahe, “ni amɛkɛ wɔ-Nyɔŋmɔ duromɔ ni esaaa wɔ lɛ jieɔ amɛnaa kɛha jeŋba shara nifeemɔ.” (Yuda 4, NW) Ekolɛ, taakɛ blema Jamɔ He Jeŋ Nilelɔi komɛi ji lɛ, amɛsusu akɛ kɛ́ mɔ ko fee esha babaoo lɛ, ehaa mɔ lɛ náa Nyɔŋmɔ duromɔ ni esaaa lɛ babaoo—no hewɔ lɛ, yɛ nakai feemɔ mli lɛ, sɛɛnamɔ yɛ he waa akɛ aaafee esha babaoo! Aloo ekolɛ amɛmu sane naa akɛ Nyɔŋmɔ ni naa mɔ mɔbɔ lɛ gbalaŋ amɛtoi kɔkɔɔkɔ. Yɛ fɛɛ sɛɛ lɛ, amɛ sane ejaaa kwraa.—1 Korintobii 3:19.
4. Mɛɛ Yehowa kojomɔi ni eho lɛ he Ŋmalɛ naa nɔkwɛmɔnii etɛ Yuda tsĩ tã?
4 Yuda bu amɛ susumɔi fɔji lɛ fɔ kɛtsɔ Yehowa kojomɔi ahe nɔkwɛmɔnii etɛ ni ba yɛ bei ni eho lɛ mli lɛ tã ni etsĩ lɛ nɔ: nɔ ni afee ashi Israelbii ni “heee yeee”; nɔ ni afee ashi ‘ŋwɛibɔfoi hu ni amɛshi amɛ diɛŋtsɛ amɛshihilɛhe’ lɛ, koni amɛkɛ yei afee esha; kɛ nɔ ni afee ashi mɛi ni yɔɔ Sodom kɛ Gomora ni “bɔ ajwamaŋ aahu . . . ni amɛyanyiɛ heloo kroko sɛɛ lɛ.” (Yuda 5-7; 1 Mose 6:2-4; 19:4-25; 4 Mose 14:35) Yɛ shihilɛ lɛ fɛɛ mli lɛ, Yehowa kɛ kojomɔ ni naa wa ba eshafeelɔi lɛ anɔ.
5. Mɛɛ blema gbalɔ ji mɔ ni Yuda tsɛ́ ewiemɔ sɛɛ, ni nakai gbalɛ lɛ tsɔɔ akɛ ebaaba mli anɔkwale lɛɛlɛŋ yɛ mɛɛ gbɛ nɔ?
5 Sɛɛ mli lɛ, Yuda wie kojomɔ ko ni naa wa kwraa fe nakai lɛ he. Etsɛ́ Henok gbalɛ ko sɛɛ—wiemɔ ko ni bɛ Ŋmalɛi ni jɛ mumɔŋ lɛ mli he kroko hu.a (Yuda 14, 15) Henok gba be ko ni Yehowa baakojo mɛi fɛɛ ni sheee Nyɔŋmɔ gbeyei kɛ amɛ nifeemɔi fɔji lɛ. Miishɛɛ sane ji akɛ, Henok kɛ wiemɔ ni tsɔɔ nɔ ko ni etee nɔ momo tsu nii, ejaakɛ Nyɔŋmɔ kojomɔi lɛ ba mli kɛ̃ tamɔ nɔ ni amɛba mli momo. Ekolɛ gbɔmɛi lɛ ye Henok he fɛo, ni sɛɛ mli lɛ amɛye Noa he fɛo, shi hefɛoyelɔi nɛɛ fɛɛ gboi yɛ jeŋ muu fɛɛ Nu Afua lɛ mli.
6. (a) Mɛni nii ehe hiaa ni akai Kristofoi lɛ yɛ he yɛ Yuda gbii amli? (b) Mɛni hewɔ esa akɛ wɔkɛ Yuda kaimɔ wiemɔi lɛ ato wɔtsui mli?
6 Mɛni hewɔ Yuda ŋma ŋwɛi kojomɔi nɛɛ ahe sane? Ejaakɛ ele akɛ mɛi komɛi ni kɛ Kristofoi asafoi ni yɔɔ egbii lɛ amli lɛ bɔɔ lɛ kɛ amɛhe miiwo eshafeemɔi ni yɔɔ nyaŋemɔ ni sa toigbalamɔ lɛ amli tamɔ nɔ ni ha nakai blema kojomɔi lɛ ba lɛ. No hewɔ lɛ, Yuda ŋma akɛ ehe miihia ni akai asafoi lɛ yɛ mumɔŋ anɔkwalei bibii komɛi ahe. (Yuda 5) Amɛhiɛ ekpa nɔ kwraa akɛ Yehowa Nyɔŋmɔ na nɔ ni amɛfeɔ lɛ. Hɛɛ, kɛ esɔɔlɔi lɛ je gbɛ amɛku emlai amli, ni amɛbule amɛ kɛ mɛi krokomɛi lɛ, enaa. (Abɛi 15:3) Nifeemɔi ni tamɔ nɛkɛ dɔɔ lɛ waa diɛŋtsɛ. (1 Mose 6:6; Lala 78:40) Eji susumɔ ni yɔɔ gbeyei akɛ wɔ ni ji adesai foji nɛɛ baanyɛ aná jeŋ muu fɛɛ Nuntsɔ Maŋtsɛ lɛ henumɔi anɔ hewalɛ. Ekwɛɔ wɔ daa, ni kɛ wɔfee bɔ fɛɛ bɔ ni wɔɔnyɛ ni wɔnyiɛ e-Bi, Yesu Kristo najifamɔi asɛɛ lɛ, kɛkɛ lɛ wɔ jeŋba haa etsui nyaa. Belɛ nyɛkahaa wɔnáa kaimɔ ni tamɔ nɛkɛ ni Yuda kɛhaa lɛ he mlifu, shi moŋ koni wɔbo toi.—Abɛi 27:11; 1 Petro 2:21.
7. (a) Mɛni hewɔ ehe hiaa waa koni mɛi ni kɛ amɛhe woɔ eshafeemɔ ni hiɛdɔɔ yɔɔ mli lɛ mli lɛ atao yelikɛbuamɔ amrɔ nɔŋŋ lɛ? (b) Wɔ fɛɛ wɔbaanyɛ wɔkwa jeŋba shara yɛ mɛɛ gbɛ nɔ?
7 Jeee akɛ Yehowa naa pɛ kɛkɛ, shi etsuɔ he nii hu. Akɛni eji Nyɔŋmɔ ni yeɔ jalɛ sane hewɔ lɛ, ekɛ toigbalamɔ baa mɛi fɔji anɔ—yɛ bei fioo ko sɛɛ loo yɛ sɛɛ mli. (1 Timoteo 5:24) Mɛi ni susuɔ akɛ ekojomɔi lɛ ji blema yinɔsane kɛkɛ, ni ákɛ efɔŋ ni amɛfeɔ lɛ kɔɔɔ ehe eko lɛ miishishiu amɛhe kɛkɛ. Kwɛ bɔ ni ehe hiaa ŋmɛnɛ akɛ mɔ fɛɛ mɔ ni kɛ ehe woɔ jeŋba shara mli lɛ aaatao yelikɛbuamɔ amrɔ nɔŋŋ kɛjɛ Kristofoi onukpai adɛŋ! (Yakobo 5:14, 15) Ekolɛ jeŋba shara ni woɔ wɔmumɔŋ tawuu lɛ he gbeyei lɛ baaha wɔ fɛɛ wɔsusu sane he waa diɛŋtsɛ. Daa afi lɛ, mɛi náa naagba—aŋkroaŋkroi ni ashwieɔ amɛ kɛjɛɔ wɔteŋ, ni ashwieɔ amɛteŋ mɛi babaoo yɛ jeŋba shara nifeemɔi ni amɛkɛ amɛhe woɔ mli ni amɛshwaaa amɛhe lɛ hewɔ. Esa akɛ wɔtswa wɔfai shi jogbaŋŋ koni wɔte shi wɔwo kaa fɛɛ kaa ni jeɔ shishi po akɛ ekɛ wɔ aaaya nifeemɔ ni tamɔ nɛkɛ mli lɛ.—Okɛto Mateo 26:41 he.
Okɛ Bulɛ Aha Nɔyeli Hegbɛ ni Ajɛ Ŋwɛi Ato He Gbɛjianɔ Lɛ
8. Namɛi ji “gbɔmɛi agboi” ni atsĩ amɛ tã yɛ Yuda 8 lɛ?
8 Naagba kroko ni Yuda wie he ji bulɛ ni abɛ kɛha nɔyeli hegbɛ ni ajɛ ŋwɛi ato he gbɛjianɔ lɛ. Ákɛ nɔkwɛmɔnɔ lɛ, yɛ kuku 8 lɛ mli lɛ, efolɔ nakai gbɔmɛi fɔji lɛ nɔŋŋ anaa akɛ “amɛwieɔ gbɔmɛi agboi ahe wiemɔi fɔji.” Namɛi ji nɛkɛ “gbɔmɛi agboi” nɛɛ? Amɛji hii ni yeee emuu ni Yehowa mumɔ krɔŋkrɔŋ lɛ kɛ gbɛnaa nii ewo amɛdɛŋ. Ákɛ nɔkwɛmɔnɔ lɛ, asafoi lɛ yɛ onukpai ní akɛ Nyɔŋmɔ tooku lɛ nɔkwɛmɔ he gbɛnaa nii ewo amɛdɛŋ. (1 Petro 5:2) Nɔkwɛlɔi gbɛfalɔi hu yɛ, tamɔ bɔfo Paulo. Ni onukpai akuu ni yɔɔ Yerusalem lɛ tsu nii akɛ nɔyeli kuu, ni amɛkpɛɔ amɛyiŋ yɛ saji ni kɔɔ Kristofoi asafo muu lɛ he. (Bɔfoi lɛ Asaji 15:6) Yuda hao waa akɛ mɛi komɛi ni yɔɔ asafo lɛ mli lɛ miiwie hii ni tamɔ nɛkɛ lɛ ahe wiemɔi fɔji loo amɛmiigbe amɛhe guɔ.
9. Mɛɛ bulɛ ni abɛ kɛha nɔyeli hegbɛ he nɔkwɛmɔnii Yuda tsĩ tã?
9 Bɔni afee ni Yuda awie ashi wiemɔ ni tamɔ nɛkɛ ni bulɛ bɛ mli lɛ, etsĩ nɔkwɛmɔnii krokomɛi atã yɛ kuku 11 lɛ mli akɛ kaimɔ wiemɔi: Kain, Bileam, kɛ Kora. Kain kpoo Yehowa ŋaawoo ni suɔmɔ yɔɔ mli lɛ ni eje gbɛ etiu lɛ diɛŋtsɛ egbɛ ni gbɔmɔgbee he hetsɛ̃ yɔɔ mli lɛ sɛɛ. (1 Mose 4:4-8) Bileam nine shɛ kɔkɔbɔi anɔ shii abɔ ni ŋwanejee ko bɛ he akɛ ejɛ he ko ni nɔ kwɔ fe adesai—lɛ diɛŋtsɛ etejiyoo po kɛ lɛ wie! Shi Bileam tee nɔ ekɛ pɛsɛmkunya tsɔ ŋaa eshi Nyɔŋmɔ webii lɛ. (4 Mose 22:28, 32-34; 5 Mose 23:5) Kora diɛŋtsɛ yɛ hegbɛ ni gbɛnaa nii yɔɔ mli, shi etsui enyɔɔɔ emli. Etée atuatsemɔ shi eshi Mose, nuu ni he jɔ fe fɛɛ yɛ shikpɔŋ lɛ nɔ lɛ.—4 Mose 12:3; 16:1-3, 32.
10. Mɛi komɛi baanyɛ agbee ‘gbɔmɛi agboi ni awieɔ amɛhe wiemɔi fɔji’ lɛ he tsɔne lɛ mli ŋmɛnɛ yɛ mɛɛ gbɛ nɔ, ni mɛni hewɔ esa akɛ akwa wiemɔ ni tamɔ nɛkɛ?
10 Kwɛ bɔ ni nɔkwɛmɔnii nɛɛ tsɔɔ wɔ koni wɔbo ŋaawoo toi ni wɔkɛ bulɛ aha mɛi ni Yehowa kɛ amɛ tsuɔ nii yɛ hegbɛi ni gbɛnaa nii yɔɔ mli lɛ yɛ faŋŋ mli! (Hebribii 13:17) Ewaaa kwraa akɛ aaaná tɔ̃mɔ yɛ onukpai ni ahala amɛ lɛ ahe, ejaakɛ amɛyeee emuu tamɔ bɔ ni wɔ fɛɛ wɔyeee emuu lɛ. Shi kɛ wɔdi amɛtɔ̃mɔi asɛɛ ni wɔba bulɛ ni wɔyɔɔ kɛha amɛ lɛ shi lɛ, ani ‘wɔwieŋ gbɔmɛi agboi ahe wiemɔi fɔji’? Yuda tsĩ mɛi ni “nii fɛɛ ni amɛleee lɛ, amɛwieɔ he musubɔɔ wiemɔ” lɛ tã yɛ kuku 10 lɛ mli. Bei komɛi lɛ, mɛi komɛi wieɔ amɛshiɔ yiŋkpɛɛ ko ni onukpai akuu loo saneyeli ajinafoi akuu ko efee lɛ. Ni kɛlɛ, amɛleee teemɔŋ sane ni tsɔɔ saji fɛɛ ni onukpai lɛ susu he ni ha amɛkpɛ amɛyiŋ nakai lɛ he nɔ ko. No hewɔ lɛ mɛni hewɔ esa akɛ amɛwie nibii ni amɛleee diɛŋtsɛ lɛ ahe saji fɔji? (Abɛi 18:13) Mɛi ni yaa nɔ amɛwieɔ wiemɔ ni ejaaa tamɔ nɛkɛ lɛ baanyɛ amɛkɛ mligbalamɔi aba asafo lɛ mli ni ekolɛ abaanyɛ akɛ amɛ ato “tɛi ni eteetee yɛ nu shishi,” ní yɔɔ oshara lɛ ahe po yɛ nanemɛi heyelilɔi ahenaabuamɔi amli. (Yuda 12, 16, 19, NW) Wɔsumɔŋ akɛ wɔɔfee mumɔŋ oshara wɔha mɛi krokomɛi kɔkɔɔkɔ. Shi moŋ, nyɛhaa wɔteŋ mɔ fɛɛ mɔ hiɛ asɔa hii ni gbɛnaa nii kã amɛnɔ lɛ yɛ nii ni amɛtsuɔ waa kɛ amɛhe ni amɛtuu amɛha Nyɔŋmɔ tooku lɛ hewɔ.—1 Timoteo 5:17.
11. Mɛni hewɔ Mikael tsi ehe kɛjɛ kojomɔ wiemɔi ni jɛmɔ yɔɔ mli ni ekɛaaba Satan nɔ lɛ he lɛ?
11 Yuda tsĩ mɔ ni kɛ bulɛ ha nɔyeli hegbɛ ni ajɛ ŋwɛi ato he gbɛjianɔ jogbaŋŋ lɛ nɔkwɛmɔnɔ tã. Eŋma akɛ: “Bɔfonukpa Mikael lɛ, beni ekɛ abonsam kojoɔ ni ekɛ lɛ taa naa yɛ Mose gbonyo lɛ hewɔ lɛ, ekaaa loomɔ kojomɔ ko kɛ enɔfɔ̃ɔ, shi moŋ ekɛɛ: Kã, [Yehowa, NW] aaakã ohiɛ!” (Yuda 9) Nɛkɛ sane ni yɔɔ miishɛɛ waa nɛɛ, ni Yuda pɛ ŋma yɛ Ŋmalɛi ni jɛ mumɔŋ lɛ mli lɛ, tsɔɔ wɔ nikasemɔi sɔrɔtoi enyɔ. Yɛ gbɛ kroko nɔ lɛ, etsɔɔ wɔ koni wɔshi kojomɔ wɔha Yehowa. Eka shi faŋŋ akɛ, Satan miisumɔ ni ekɛ anɔkwafo Mose gbɔmɔtso lɛ atsu nii yɛ gbɛ fɔŋ nɔ bɔni afee ni ekɛtee apasa jamɔ shi. Mɛɛ efɔŋ eji nɛkɛ! Ni kɛlɛ, Mikael kɛ heshibaa tsi ehe kɛjɛ kojomɔ ni ekɛaaba lɛ he, ejaakɛ Yehowa pɛ yɔɔ nakai hegbɛ lɛ. Belɛ, kwɛ bɔ ni esa akɛ wɔtsi wɔhe kɛjɛ kojomɔ ni wɔɔkojo hii anɔkwafoi ni bɔɔ mɔdɛŋ akɛ amɛaasɔmɔ Yehowa lɛ he.
12. Mɛi ni hiɛ hegbɛi ni gbɛnaa nii yɔɔ mli yɛ Kristofoi asafo lɛ mli lɛ baanyɛ akase mɛni kɛjɛ Mikael nɔkwɛmɔnɔ lɛ mli?
12 Yɛ gbɛ kroko nɔ lɛ, mɛi ni yɔɔ hegbɛ ko yɛ asafo lɛ mli lɛ hu baanyɛ akase nɔ ko kɛjɛ Mikael ŋɔɔ. Shi, yɛ fɛɛ sɛɛ lɛ, eyɛ mli akɛ Mikael ji “bɔfonukpa,” ŋwɛibɔfoi lɛ fɛɛ anɔ onukpa moŋ, shi ekɛ hewalɛ hegbɛ ni eyɔɔ lɛ tsuuu nii yɛ gbɛ ni ejaaa nɔ kɛ́ awo lɛ mlifu po. Onukpai anɔkwafoi lɛ nyiɛɔ nakai nɔkwɛmɔnɔ lɛ sɛɛ kpaakpa, ni amɛyɔseɔ akɛ amɛ nɔyeli hegbɛ ni amɛkɛaatsu nii yɛ gbɛ fɔŋ nɔ lɛ ji bulɛ ni abɛ kɛha Yehowa nɔyeli. Yuda wolo lɛ yɛ saji babaoo ni ebaawie he yɛ hii ni yɔɔ hegbɛi yɛ asafoi lɛ amli ni sa akɛ akɛ bulɛ aha amɛ ni kɛ amɛ hewalɛ tsuɔ nii yɛ gbɛ fɔŋ nɔ lɛ ahe. Ákɛ nɔkwɛmɔnɔ lɛ, kɛjɛ kuku 12 kɛyashi 14 (NW) lɛ, Yuda ŋma “tookwɛlɔi ni amɛ diɛŋtsɛ amɛyeɔ nii ni amɛsheee gbeyei” lɛ he fɔbuu sane ni mli wa. (Okɛto Ezekiel 34:7-10 he.) Yɛ gbɛ kroko nɔ lɛ, nɔ ni amɛmii shɛɔ he klɛŋklɛŋ ji ni amɛná sɛɛnamɔ ko kɛjɛ mli, shi jeee ni Yehowa tooku lɛ aaaná he sɛɛ. Onukpai ni yɔɔ ŋmɛnɛ lɛ baanyɛ akase nibii babaoo kɛjɛ nɔkwɛmɔnii ni ejaaa nɛɛ amli. Yɛ anɔkwale mli lɛ, Yuda wiemɔi lɛ kɛ nɔ ni wɔsumɔɔɔ ni wɔfee lɛ he mlitsɔɔmɔ ni yɔɔ faŋŋ haa. Kɛ wɔŋmɛɛ wɔhe wɔha pɛsɛmkunya lɛ, wɔnyɛŋ wɔfee Kristo asraafoi; wɔbaafee mɛi ni miiwuu kɛmiiha amɛhe ni amɛbɛ dekã kwraa. Shi moŋ, nyɛhaa wɔ fɛɛ wɔhia shi yɛ Yesu wiemɔi nɛɛ anaa akɛ: “Nɔ̃ hamɔ mli yɛ jɔɔmɔ fe hemɔ.”—Bɔfoi lɛ Asaji 20:35.
“Nyɛtoa Nyɛhe yɛ Nyɔŋmɔ Suɔmɔ lɛ Mli”
13. Mɛni hewɔ esa akɛ wɔ fɛɛ wɔkɛ ekãa atao akɛ wɔɔhi Nyɔŋmɔ suɔmɔ lɛ mli daa?
13 Kɛmiiya Yuda wolo lɛ naagbee gbɛ lɛ, ekɛ ŋaawoo ni taa mɔ tsuiŋ nɛɛ ha akɛ: “Nyɛtoa nyɛhe yɛ Nyɔŋmɔ suɔmɔ lɛ mli.” (Yuda 21) Nɔ ko kwraa bɛ ni baaye abua koni wɔwuu Kristofoi ata lɛ waa fe nɔ kome nɛɛ, ni wɔɔya nɔ wɔfee mɛi ni jieɔ Yehowa Nyɔŋmɔ suɔmɔ lɛ kpo wɔtsɔɔ. Yɛ fɛɛ sɛɛ lɛ, suɔmɔ ji Yehowa su ni nɔ kwɔ fe fɛɛ. (1 Yohane 4:8) Paulo ŋma kɛyaha Kristofoi ni yɔɔ Roma lɛ akɛ: “Miyɛ hewalɛ yɛ nɔ, akɛ gbele jio wala jio, ŋwɛibɔfoi jio nɔyelɔi jio hewalɛi jio, nii ni yɔɔ nɛɛ jio, nii ni baaba lɛ jio, ŋwɛi jio shishi jio, aloo nii ni abɔ lɛ amli nɔ kroko jio, amɛnyɛŋ amɛgbala wɔkɛ Nyɔŋmɔ suɔmɔ ni yɔɔ Kristo Yesu, wɔ-Nuntsɔ lɛ, mli lɛ mli.” (Romabii 8:38, 39) Shi yɛ mɛɛ gbɛ nɔ wɔyaa nɔ wɔhiɔ nakai suɔmɔ lɛ mli? Taakɛ Yuda tsɔɔ lɛ, kadimɔ nifeemɔi lɛ ateŋ etɛ ni wɔbaanyɛ wɔtsu he nii.
14, 15. (a) Wɔhe ni wɔɔtswa wɔma ‘wɔhemɔkɛyeli ni yɔɔ krɔŋkrɔŋ fe fɛɛ’ lɛ nɔ lɛ tsɔɔ mɛni? (b) Wɔbaanyɛ wɔpɛi bɔ ni wɔmumɔŋ tawuu nii lɛ yɔɔ ha lɛ mli yɛ mɛɛ gbɛ nɔ?
14 Klɛŋklɛŋ lɛ, Yuda kɛɔ wɔ koni wɔya nɔ wɔtswa wɔhe wɔma shi yɛ ‘wɔhemɔkɛyeli ni yɔɔ krɔŋkrɔŋ fe fɛɛ’ lɛ nɔ. (Yuda 20) Taakɛ wɔna yɛ nikasemɔ ni tsɔ hiɛ lɛ mli lɛ, enɛ ji nifeemɔ ni yaa nɔ aahu. Wɔtamɔ tsũi ni ehe miihia ni awaje wɔ babaoo diɛŋtsɛ yɛ kɔɔyɔŋ tsakemɔ ni tutuaa nii ni emli woɔ wu be fɛɛ be lɛ hewɔ. (Okɛto Mateo 7:24, 25 he.) No hewɔ lɛ nyɛkahaa wɔnáa nɔmimaa babaoo tsɔ kɔkɔɔkɔ. Shi moŋ, nyɛhaa wɔkwɛa he ni wɔbaanyɛ wɔtswa wɔhe wɔma shi yɛ wɔhemɔkɛyeli lɛ shishitoonɔ lɛ nɔ, ni wɔhe awa babaoo, ni wɔfee Kristo asraafoi ni yeɔ anɔkwa babaoo. Ákɛ nɔkwɛmɔnɔ lɛ, ekolɛ wɔbaasusu mumɔŋ tawuu nii lɛ fãi sɔrɔtoi ni yɔɔ Efesobii 6:11-18 lɛ ahe.
15 Mɛni ji wɔ diɛŋtsɛ wɔmumɔŋ tawuu nii lɛ shihilɛ? Ani ‘wɔhemɔkɛyeli tsɛŋ’ lɛ mli wa taakɛ esa akɛ efee? Be mli ni wɔkaiɔ nibii ni tee nɔ nyɛsɛɛ afii lɛ, ani wɔnaa okadii ni tsɔɔ shibaa tamɔ kpeeiyaa ni baa shi, ekãa ni abɛ kɛha sɔɔmɔ nitsumɔ lɛ, loo teemɔŋ nikasemɔ he miishɛɛ ni baa shi? Okadii ni tamɔ nɛkɛ baanyɛ ekɛ oshara aba! Ehe miihia ni wɔfee nii bianɛ koni wɔkɛtswa wɔhe wɔma shi ni wɔha wɔhe awa yɛ anɔkwale lɛ mli.—1 Timoteo 4:15; 2 Timoteo 4:2; Hebribii 10:24, 25.
16. Mumɔ krɔŋkrɔŋ ni wɔkɛaasɔle lɛ tsɔɔ mɛni, ni mɛɛ nɔ kome esa akɛ wɔbi Yehowa daa?
16 Gbɛ ni ji enyɔ ni wɔɔtsɔ nɔ wɔhi Nyɔŋmɔ suɔmɔ lɛ mli daa ji ni wɔya nɔ ‘wɔsɔle yɛ mumɔ krɔŋkrɔŋ lɛ mli.’ (Yuda 20) No tsɔɔ akɛ ni aaasɔle yɛ Yehowa mumɔ lɛ kanyamɔ naa yɛ e-Wiemɔ ni jɛ mumɔŋ lɛ kɛ gbeekpamɔ naa. Sɔlemɔ ji gbɛ ni he hiaa ni atsɔɔ nɔ abɛŋkɛɔ Yehowa diɛŋtsɛ ni wɔtsɔɔ bɔ ni wɔtuu wɔhe wɔha lɛ. Esaaa akɛ wɔkuɔ wɔhiɛ wɔshwieɔ hegbɛ ni yɔɔ naakpɛɛ nɛɛ nɔ kɔkɔɔkɔ! Ni kɛ wɔsɔle lɛ,—yɛ anɔkwale mli lɛ, wɔbaanyɛ wɔya nɔ wɔbi—koni aha wɔ mumɔ krɔŋkrɔŋ lɛ. (Luka 11:13) No ji hewalɛ ni naa wa fe fɛɛ ni yɔɔ kɛha wɔ. Kɛ wɔyɛ yelikɛbuamɔ ni tamɔ nɛkɛ lɛ, wɔbaanyɛ wɔhi Nyɔŋmɔ suɔmɔ lɛ mli daa be fɛɛ be, ni wɔŋmɛ wɔtsui shi akɛ Kristo asraafoi.
17. (a) Mɛni hewɔ nɔkwɛmɔnɔ ni Yuda fee yɛ mɔbɔnalɛ he sane lɛ mli lɛ sa kadimɔ nakai lɛ? (b) Wɔteŋ mɔ fɛɛ mɔ baanyɛ aya nɔ ajie mɔbɔnalɛ kpo yɛ mɛɛ gbɛ nɔ?
17 Nɔ ni ji etɛ lɛ, Yuda woɔ wɔ ekãa koni wɔya nɔ wɔjie mɔbɔnalɛ kpo. (Yuda 22) Lɛ diɛŋtsɛ enɔkwɛmɔnɔ ni efee yɛ enɛ gbɛfaŋ lɛ sa kadimɔ. Yɛ fɛɛ sɛɛ lɛ, yɛ gbɛ ni ja nɔ lɛ ehao waa yɛ juu-kɛ-fɔ̃, jeŋba shara, kɛ hemɔkɛyeli kwamɔ ni boteɔ Kristofoi asafo lɛ mli nigii lɛ hewɔ. Yɛ fɛɛ sɛɛ lɛ, etsui efaaa, ní eeesusu akɛ shihilɛi lɛ yɛ oshara babaoo yɛ gbɛ ko nɔ ni yɛ no hewɔ lɛ eeejie mɔbɔnalɛ su ni “mlijɔlɛ” yɔɔ mli nɛɛ kpo. Dabi, ewo enyɛmimɛi lɛ hewalɛ koni amɛya nɔ amɛjie mɔbɔnalɛ kpo be fɛɛ be ni amɛaanyɛ amɛjie mɔbɔnalɛ kpo lɛ, ni ekɛ mɛi ni náa yiŋkɔshikɔshifeemɔ mli amanehulu lɛ susuɔ saji ahe, ni ‘esháa’ mɛi ni sharaa shi yɛ esha ni hiɛdɔɔ yɔɔ mli lɛ he ‘kɛjɛɔ la lɛ mli’ po. (Yuda 23; Galatabii 6:1) Mɛɛ ŋaawoo kpakpa yɔɔ kɛha onukpai yɛ nɛkɛ bei ni naagbai yɔɔ mli lɛ mli nɛkɛ! Amɛ hu amɛbɔɔ mɔdɛŋ koni amɛjie mɔbɔnalɛ kpo yɛ he fɛɛ he ni ehe hiaa yɛ, yɛ be mli ni amɛyaa nɔ amɛfeɔ shiŋŋ kɛ́ ehe miihia. Wɔteŋ mɔ fɛɛ mɔ miisumɔ ni wɔjie mɔbɔnalɛ kpo wɔtsɔɔtsɔɔ wɔhe nakai nɔŋŋ. Ákɛ nɔkwɛmɔnɔ lɛ, yɛ nɔ najiaŋ ni wɔkɛ nibii bibii ahe mlifu aaawo wɔmli lɛ, wɔbaanyɛ wɔfee mɛi ni keɔ nii waa kɛtsɔ tɔ̃mɔi ni wɔkɛaake lɛ nɔ.—Kolosebii 3:13.
18. Wɔbaanyɛ wɔná nɔmimaa akɛ wɔbaaye kunim yɛ wɔmumɔŋ tawuu lɛ mli yɛ mɛɛ gbɛ nɔ?
18 Ta ni wɔwuɔ lɛ mli wa. Taakɛ Yuda kɛɔ lɛ, eji ‘ta ni mli wa.’ (Yuda 3, NW) Wɔ henyɛlɔi lɛ ahe wa waa. Jeee Satan kɛkɛ shi ejeŋ fɔŋ kɛ emuu ni wɔ diɛŋtsɛ wɔyeee lɛ fɛɛ teɔ shi ewoɔ wɔ. Ni kɛlɛ, wɔbaanyɛ wɔná nɔmimaa kwraa akɛ wɔbaaye kunim! Mɛni hewɔ? Ejaakɛ wɔyɛ Yehowa masɛi. Yuda kɛ ewolo lɛ ba naagbee kɛ kaimɔ wiemɔ ni ji akɛ Yehowa ji mɔ ni aŋɔɔ ‘anunyam kɛ agbojee, nɔyeli kɛ hegbɛ fɛɛ ahaa agbɛnɛ kɛ daa’ yɛ gbɛ ni ja nɔ. (Yuda 25) Ani jeee susumɔ ni teeɔ gbeyeishemɔ shi? Belɛ ani abaanyɛ aje ŋwane yɛ he akɛ nɛkɛ Nyɔŋmɔ nɛɛ nɔŋŋ ji “mɔ ni eyɔɔ hewalɛ ni ekɛaabu nyɛhe ni nyɛkatɛrɛ”? (Yuda 24) Dabida! Nyɛhaa wɔteŋ mɔ fɛɛ mɔ atswaa efai shi akɛ eeeya nɔ ete shi ewo jeŋba shara, ni ekɛ bulɛ aha nɔyeli hegbɛ ni ajɛ ŋwɛi ato he gbɛjianɔ lɛ, ni wɔya nɔ wɔhi Nyɔŋmɔ suɔmɔ lɛ mli. Yɛ nakai feemɔ mli lɛ, wɔ fɛɛ wɔbaaná kunimyeli ni yɔɔ nyam mli ŋɔɔmɔ.
[Shishigbɛ niŋmaa]
a Niiamlitaolɔi komɛi maa nɔ mi akɛ Yuda miitsɛ saji asɛɛ kɛmiijɛ Book of Enoch ni feɔ mɛi ayiŋ kɔshikɔshi lɛ mli. Shi kɛlɛ, R. C. H. Lenski kɛɛ: “Wɔmiibi akɛ: ‘Nɛgbɛ ji he ni wolo ni ji Book of Enoch ni aná emli saji fiofio kɛjɛ hei sɔrɔtoi lɛ jɛ kɛba?’ Nɛkɛ wolo nɛɛ mli saji ji saji ni akɛfataa he, ni mɔ ko kwraa nyɛŋ ana nɔmimaa yɛ gbii ni akɛfee efãi sɔrɔtoi lɛ he . . . ; mɔ ko kwraa nyɛŋ ana nɔmimaa akɛ ekolɛ anaaa emli wiemɔi lɛ ekomɛi kɛjɛɛɛ Yuda diɛŋtsɛ dɛŋ.”
Sanebimɔi Kɛha Emlitii:
◻ Yuda wolo lɛ tsɔɔ wɔ koni wɔte shi wɔshi jeŋba shara yɛ mɛɛ gbɛ nɔ?
◻ Mɛni hewɔ ehe hiaa waa akɛ wɔkɛ bulɛ aaaha nɔyeli hegbɛ ni ajɛ ŋwɛi ato he gbɛjianɔ lɛ?
◻ Mɛni yɔɔ hiɛdɔɔ waa yɛ asafoŋ nɔyeli hegbɛ ni akɛaatsu nii yɛ gbɛ fɔŋ nɔ lɛ he?
◻ Wɔbaanyɛ wɔbɔ mɔdɛŋ koni wɔhi Nyɔŋmɔ suɔmɔ lɛ mli daa yɛ mɛɛ gbɛ nɔ?
[Mfoniri ni yɔɔ baafa 15]
Ákɛ nɔ ni tamɔɔɔ Roma asraafoi lɛ, Kristofoi wuɔ mumɔŋ ta
[Mfoniri ni yɔɔ baafa 18]
Kristofoi tookwɛlɔi sɔmɔɔ yɛ suɔmɔ mli, shi jeee yɛ pɛsɛmkunya naa