Yitso 36
Akpata Maŋ Kpeteŋkpele lɛ Hiɛ
Ninaa 12—Kpojiemɔ 18:1–19:10
Saneyitso: Babilon Kpeteŋkpele lɛ shigbeemɔ kɛ ehiɛkpatamɔ; Toobi lɛ yookpeemɔ he adafitswaa
Emlibaa be: Kɛjɛ 1919 kɛyashi amanehulu kpeteŋkpele lɛ sɛɛ
1. Mɛni baakadi amanehulu kpeteŋkpele lɛ shishijee?
TRUKAA, hejɔmɔ, hiɛkpatamɔ—bɔ ni Babilon Kpeteŋkpele lɛ naagbee baafee nɛ! Ebaafee nii ni kpataa nii ahiɛ fe fɛɛ yɛ yinɔsane mli lɛ ateŋ ekome, ni enɛ baakadi “amanehulu babaoo [ni baaba], ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ” lɛ shishijee.—Mateo 24:21.
2. Eyɛ mli akɛ maŋkwramɔŋ maŋtsɛyelii etetee shi ni amɛgbeegbee shi moŋ, shi mɛɛ maŋtsɛyeli nɛkɛ etee nɔ ehi shi aahu lɛ?
2 Apasa jamɔ ehi shi yɛ be kakadaŋŋ mli. Ehi shi aahu ni nɔ ko efooo mli kɛjɛ Nimrod ni la he kumai yeɔ lɛ, ni te shi wo Yehowa ni ha gbɔmɛi je Babel Mɔɔ lɛ tswaa lɛ shishi lɛ gbii lɛ amli. Beni Yehowa futu nakai atuatselɔi lɛ awiemɔ ni egbɛ amɛ eshwa shikpɔŋ muu lɛ fɛɛ nɔ lɛ, Babilon apasa jamɔ lɛ hu fata amɛhe kɛtee. (1 Mose 10:8-10; 11:4-9) Kɛjɛ nakai be lɛ mli kɛbaa nɛɛ, maŋkwramɔŋ maŋtsɛyelii ete shi ni amɛgbee shi, shi Babilon jamɔ etee nɔ ehi shi. Eba yɛ sui sɔrɔtoi kɛ gbɛi sɔrɔtoi anɔ, ebatsɔ jeŋ apasa jamɔ maŋtsɛyeli, Babilon Kpeteŋkpele ni agba ehe sane afɔ shi lɛ. Efa titri ni ale ji Kristendom, ni da kɛjɛ futumɔ ni akɛ mra be mli Babilon tsɔɔmɔi futu “Kristojamɔ” ni ekwa hemɔkɛyeli lɛ tsɔɔmɔi lɛ hewɔ. Akɛni Babilon Kpeteŋkpele lɛ yɔɔ yinɔsane be ni etsɛ kakadaŋŋ hewɔ lɛ, ewa kɛha mɛi pii akɛ amɛaahe amɛye akɛ gbi ko baaba ni abaakpata ehiɛ.
3. Yɛ mɛɛ gbɛ nɔ Kpojiemɔ maa apasa jamɔ hiɛkpatamɔ lɛ nɔ mi yɛ?
3 No hewɔ lɛ esa akɛ Kpojiemɔ aaama apasa jamɔ hiɛkpatamɔ nɔ mi kɛtsɔ eshigbeemɔ kɛ agbɛnɛ nibii ni baanyiɛ sɛɛ aba ni kɛ ehiɛkpatamɔ loo amaŋfɔfeemɔ kwraa baaba lɛ mlitsɔɔmɔi enyɔ ni ekɛaaha nɔ. Wɔtsɔ hiɛ wɔna lɛ momo akɛ “ajwamaŋ kpeteŋkpele” lɛ ni etsutsu suɔlɔi ni jɛ maŋkwramɔŋ nɔyeli he lɛ kpataa ehiɛ yɛ naagbee. (Kpojiemɔ 17:1, 15, 16) Agbɛnɛ, wɔbaana lɛ akɛ maŋ, akɛ jamɔ ni fee blema Babilon he mfoniri yɛ ninaa kroko hu mli.
Babilon Kpeteŋkpele lɛ Tɛ ni Egbee Shi
4. (a) Mɛɛ ninaa Yohane na agbɛnɛ? (b) Te wɔɔfee tɛŋŋ wɔyoo bɔfo lɛ, ni mɛni hewɔ esa akɛ etswa Babilon Kpeteŋkpele lɛ shigbeemɔ he adafi lɛ?
4 Yohane tee nɔ egba sane lɛ, ni ekɛɛ wɔ akɛ: “Nii nɛɛ asɛɛ lɛ mina bɔfo kroko miikpeleke shi kɛmiijɛ ŋwɛi, ni eyɛ hewalɛ kpeteŋkpele, ni enunyam lɛ ha shikpɔŋ lɛ nɔ tse; ni ekɛ̃ ehe shi ebo kɛ gbee wulu ekɛɛ: Ejwa, Babilon Kpeteŋkpele lɛ ejwa!” (Kpojiemɔ 18:1, 2a) Enɛ ji shii enyɔ ni Yohane nuɔ nakai sane ni bɔfo lɛ jaje lɛ. (Kwɛmɔ Kpojiemɔ 14:8.) Shi yɛ nɛkɛ be nɛɛ mli lɛ, bɔfo lɛ ni jɛ ŋwɛi ni je agbo, ni enunyam ha shikpɔŋ muu lɛ fɛɛ nɔ kpɛ lɛ maa nɔ ni etsɔɔ lɛ nɔ mi! Shi namɔ bɔfo nɛɛ baanyɛ afee? Afii ohai abɔ dani enɛ aaaba lɛ, no mli ni gbalɔ Ezekiel, ni bɔ ŋwɛi ninaa ko he amaniɛ lɛ jaje akɛ “ni shikpɔŋ lɛ nɔ kpɛ kɛ [Yehowa] enunyam lɛ.” (Ezekiel 43:2) Bɔfo kome pɛ ni enunyam baanyɛ akpɛ tamɔ Yehowa nɔ lɛ baanyɛ afee Nuŋtsɔ Yesu, mɔ ni ji “[Nyɔŋmɔ] enunyam lɛ kpɛmɔ kɛ esu lɛ he nɔ lɛ.” (Hebribii 1:3) Yɛ afi 1914 mli lɛ, Yesu batsɔ Maŋtsɛ yɛ ŋwɛi, ni kɛjɛ nakai be lɛ mli kɛbaa nɛɛ, eeye shikpɔŋ lɛ nɔ maŋtsɛ akɛ Yehowa hefatalɔ Maŋtsɛ kɛ Kojolɔ. Belɛ esa akɛ efeɔ mɔ ni tswaa Babilon Kpeteŋkpele lɛ shigbeemɔ he adafi.
5. (a) Namɛi bɔfo lɛ kɛ amɛ tsuɔ nii koni amɛtswa Babilon Kpeteŋkpele lɛ shigbeemɔ he adafi? (b) Beni kojomɔ je shishi yɛ mɛi ni kɛɔ akɛ amɛji “Nyɔŋmɔ we” lɛ anɔ lɛ, te enɛ sa Kristendom he eha tɛŋŋ?
5 Namɛi ji mɛi ni bɔfo ni yɔɔ hegbɛ kpeteŋkpele lɛ kɛtsuɔ nii koni amɛtswa saji ni yɔɔ naakpɛɛ nɛɛ he adafi yɛ adesai ahiɛ? Gbɔmɛi ni akpɔɔ amɛ yɛ nakai shigbeemɔ lɛ nɔŋŋ mli lɛ feɔ nakai, mɛi ni afɔ amɛ mu lɛ ni amɛshwɛ yɛ shikpɔŋ nɔ lɛ, Yohane kuu lɛ. Mɛnɛɛmɛi na amanehulu babaoo kɛjɛ 1914 kɛbashi 1918 yɛ Babilon Kpeteŋkpele lɛ dɛŋ, shi yɛ 1918 mli ni Nuŋtsɔ Yehowa kɛ “[Abraham] kpaŋmɔ bɔfo lɛ,” Yesu Kristo je kojomɔ shishi yɛ “Nyɔŋmɔ we lɛ,” ni ji mɛi ni kɛɔ akɛ amɛji Kristofoi lɛ ateŋ. No hewɔ lɛ akɛ Kristendom ni ekwa hemɔkɛyeli lɛ ba saneyeli he. (Maleaki 3:1; 1 Petro 4:17) La yi sɔ babaoo ni eye yɛ klɛŋklɛŋ jeŋ ta lɛ mli, ehe ni ekɛwo Yehowa Odasefoi anɔkwafoi lɛ ayiwaa mli, kɛ e-Babilon hemɔkɛyelii lɛ yeee ebuaaa lɛ yɛ ekojomɔ be lɛ mli; ni asaŋ Babilon Kpeteŋkpele lɛ fa ko kwraa bɛ ni saa Nyɔŋmɔ hiɛ.—Okɛto Yesaia 13:1-9 he.
6. Mɛni hewɔ abaanyɛ akɛɛ akɛ Babilon Kpeteŋkpele lɛ gbee shi yɛ 1919 lɛ?
6 No hewɔ lɛ beni shɛɔ 1919 lɛ, Babilon Kpeteŋkpele lɛ egbee shi, ni egbele gbɛ koni aŋmɛɛ Nyɔŋmɔ webii lɛ ahe ni asaa ato amɛ gbɛjianɔ ekoŋŋ tamɔ yɛ gbi kome mli, yɛ amɛmumɔŋ shikpɔŋ ni shwereɔ lɛ nɔ. (Yesaia 66:8) Beni shɛɔ nakai afi lɛ mli lɛ, Yehowa Nyɔŋmɔ kɛ Yesu Kristo, Dario Kpeteŋkpele lɛ kɛ Koresh Kpeteŋkpele lɛ ekudɔ saji koni apasa jamɔ akana Yehowa webii anɔ hewalɛ dɔŋŋ. Enyɛŋ etsi amɛnaa yɛ Yehowa sɔɔmɔ he kɛ ha ni amɛaaha mɛi fɛɛ ni baasumɔ lɛ anu akɛ abu Babilon Kpeteŋkpele ni tamɔ ajwamaŋ lɛ gbele fɔ, ni akɛ Yehowa jeŋ muu fɛɛ maŋtsɛyeli lɛ bembuu lɛ eshɛ shi eta lɛ naa dɔŋŋ!—Yesaia 45:1-4; Daniel 5:30, 31.
7. (a) Eyɛ mli akɛ akpataaa Babilon Kpeteŋkpele lɛ hiɛ yɛ 1919 moŋ, shi te Yehowa buɔ lɛ tɛŋŋ? (b) Beni Babilon Kpeteŋkpele lɛ gbee shi yɛ 1919 lɛ, mɛni jɛ mli ba ha Yehowa webii lɛ?
7 Eji anɔkwale akɛ akpataaa Babilon Kpeteŋkpele lɛ hiɛ yɛ 1919—tamɔ bɔ pɛ ni blema Babilon maŋtiase lɛ hu hiɛ kpataaa yɛ 539 D.Ŋ.B. beni egbee shi yɛ Koresh Persianyo lɛ asraafoi ahiɛ lɛ. Shi yɛ Yehowa hiɛ lɛ, nakai gbɛjianɔtoo lɛ egbee shi. Akojo lɛ ni abu lɛ fɔ, ni nɔ ni emɛɔ ji hiɛkpatamɔ; no hewɔ lɛ, apasa jamɔ etsiŋ Yehowa webii anaa yɛ nyɔŋyeli mli dɔŋŋ. (Okɛto Luka 9:59, 60 he.) Aŋmɛɛ mɛnɛɛmɛi ahe koni amɛsɔmɔ akɛ Nuŋtsɔ lɛ tsulɔ anɔkwafo kɛ nilelɔ ni amɛkɛ mumɔŋ niyenii aha yɛ be ni sa mli. Amɛnine eshɛ kojomɔ ni ji “Aekoo” nɔ ni akɛ nitsumɔ ewo amɛdɛŋ ekoŋŋ yɛ Yehowa nitsumɔ mli.—Mateo 24:45-47; 25:21, 23; Bɔfoi lɛ Asaji 1:8.
8. Mɛɛ saji bulɔ ni yɔɔ Yesaia 21:8, 9 lɛ jaje, ni namɛi feɔ nakai bulɔ lɛ he mfoniri?
8 Afii akpei abɔ ni eho lɛ mli lɛ, Yehowa kɛ gbalɔi krokomɛi tsu nii koni amɛgba nɛkɛ nibii ni baa ni kadiɔ be pɔtɛɛ ko nɛɛ. Yesaia wie yɛ bulɔ ko ni “ebo tamɔ jata akɛ: Nuŋtsɔ [Yehowa] jenamɔ nɛɛ fɛɛ lɛ midamɔ buu he lɛ, ni nyɔɔŋnyɔɔŋ fɛɛ lɛ midamɔ mibuu nɔ” lɛ he. Ni mɛni nakai bulɔ lɛ naa ni no ha ekɛ ekaa bo tamɔ jata lɛ? Enɛ: “Egbee shi ee ee eei! Babel egbee shi! Ni enyɔŋmɔi lɛ amagai lɛ fɛɛ [Yehowa] akumɔ ashwie shi!” (Yesaia 21:8, 9) Nɛkɛ bulɔ nɛɛ feɔ Yohane kuu lɛ ni hiɛ etsɛ kwraa ŋmɛnɛ lɛ he mfoniri, yɛ be mli ni ekɛ Buu-Mɔɔ wolo tɛtrɛɛ lɛ kɛ teokrase woji krokomɛi tsuɔ nii ni ekɛtswaa adafi akɛ Babilon Kpeteŋkpele lɛ egbee shi yɛ he fɛɛ he lɛ.
Babilon Kpeteŋkpele lɛ Shibaa
9, 10. (a) Hewalɛ ni Babilon jamɔ naa yɛ mɛi anɔ lɛ eba shi kɛjɛ Jeŋ Ta I be lɛ mli yɛ mɛɛ gbɛ nɔ? (b) Mɛɛ gbɛ nɔ bɔfo ni he wa lɛ tsɔɔ Babilon Kpeteŋkpele lɛ shigbeemɔ shihilɛ lɛ mli eha yɛ?
9 Blema Babilon shigbeemɔ yɛ 539 D.Ŋ.B. lɛ je shibaa kakadaŋŋ ni yagbe naa kɛ emaŋfɔfeemɔ lɛ shishi. Nakai nɔŋŋ hu kɛjɛ klɛŋklɛŋ jeŋ ta lɛ nɔ kɛbaa nɛɛ, hewalɛ ni Babilon jamɔ naa yɛ mɛi anɔ lɛ eba shi diɛŋtsɛ yɛ jeŋ muu fɛɛ. Yɛ Japan lɛ, agu Shinto maŋtsɛ jamɔ lɛ yɛ jeŋ ta ni ji enyɔ lɛ sɛɛ. Yɛ China hu lɛ, Komunist nɔyeli lɛ ji nɔ ni yeɔ mɛi ni ahalaa amɛ awoɔ jamɔŋ gbɛhei amli lɛ kɛ nitsumɔi fɛɛ mli lɛ nɔ. Yɛ Europa kooyigbɛ hu lɛ, Protestantbii ni yɔɔ jɛmɛ lɛ ateŋ mɛi babaoo efee shikpilikpii ni jamɔ jeee amɛhe sane ko dɔŋŋ. Ni Roma Katolik Sɔlemɔ lɛ hu egbɔjɔ kɛtsɔ mligbalamɔ kɛ bei ni yaa nɔ yɛ amɛteŋ yɛ ejeŋ muu fɛɛ nɔyeli he lɛ mli lɛ hewɔ.—Okɛto Marko 3:24-26 he.
10 Nɛkɛ nibii nɛɛ fɛɛ ji ‘Eufrate faa lɛ ni miiɔ’ ni ŋwanejee ko kwraa bɛ he, koni akɛsaa gbɛ aha asraafoi ni baaba amɛbatutua Babilon Kpeteŋkpele lɛ. Nɛkɛ ‘nui ni miiɔ’ nɛɛ hu jeɔ kpo yɛ paapa lɛ sane ni ejaje yɛ October 1986 akɛ esa akɛ sɔlemɔ lɛ “aba shika ekoŋŋ”—yɛ nyɔmɔ ni da ni ehiɛ hewɔ lɛ mli. (Kpojiemɔ 16:12) Titri lɛ kɛjɛ 1919 kɛbaa nɛɛ ni akpa Babilon Kpeteŋkpele lɛ he mama koni mɛi fɛɛ ana lɛ akɛ efee shwɛm yɛ mumɔŋ, taakɛ bɔ ni bɔfo ni he wa lɛ jajeɔ yɛ biɛ lɛ: “Ni etsɔ daimonioi ashihilɛ he, kɛ mumɔi fɔji fɛɛ atsu, kɛ loofɔlɔ fɛɛ loofɔlɔ ni he tseee ni he yɔɔ taŋ hu tsu.” (Kpojiemɔ 18:2b) Etsɛŋ ni ebaatsɔ amaŋfɔ diɛŋtsɛ, tamɔ bɔ ni Babilon amaŋfɔ lɛ yɔɔ Iraq ni yɔɔ ŋmɛnɛ beaŋ lɛ.—Kwɛmɔ Yeremia 50:25-28 hu.
11. Babilon Kpeteŋkpele lɛ ebatsɔ “daimonioi ashihilɛ he” kɛ ‘mumɔi fɔji fɛɛ atsu kɛ loofɔlɔ fɛɛ loofɔlɔ ni he tseee hu tsu’ yɛ mɛɛ gbɛ nɔ?
11 Eka shi faŋŋ akɛ wiemɔ “daimonioi” ni yɔɔ biɛ lɛ miitsɔɔ wiemɔ “sasabonsamii” (se‘i·rimʹ) ni anaa yɛ bɔ ni Yesaia tsɔɔ Babilon shigbeemɔ lɛ mli eha lɛ mli: “Shi ŋaŋ kooloi aaakamɔ shi yɛ jɛi, ni amɛtsui lɛ amli aaayimɔ obɔbɔ kɛ patui, ni dugumai hu aaahi jɛi, ni sasabonsamii aaajo yɛ jɛi.” (Yesaia 13:21) Ekolɛ ekɔŋ daimonioi diɛŋtsɛ ahe shi moŋ ŋa nɔ kooloi kɛ amɛhe tsɔi kusuu ni haa mɛi ni naa amɛ lɛ susuɔ akɛ amɛji daimonioi. Yɛ Babilon Kpeteŋkpele lɛ amaŋfɔfeemɔ lɛ mli lɛ, jɛmɛ ni kooloi ni tamɔ nɛkɛ yɔɔ yɛ okadi gbɛ nɔ lɛ, kɛ kɔɔyɔɔ ni ebɔɔ yɔɔ mli ni tsakeee (“mumɔi fɔji”) kɛ loofɔji ni he tseee lɛ tsɔɔ bɔ ni emumɔŋ gbele shihilɛ lɛ yɔɔ. Ebɛ wala gbɛkpamɔ ko kwraa kɛha adesai.—Okɛto Efesobii 2:1, 2 he.
12. Shihilɛ ni Babilon Kpeteŋkpele lɛ yɔɔ mli lɛ tamɔ Yeremia gbalɛ ni yɔɔ yitso 50 lɛ yɛ mɛɛ gbɛ nɔ?
12 Eshihilɛ lɛ hu tamɔ Yeremia gbalɛ lɛ: “Klante aaaba Kaldeabii lɛ anɔ, Yehowa kɛɛ, kɛ Babelbii lɛ anɔ kɛ elumɛi lɛ anɔ kɛ enilelɔi lɛ anɔ! . . . Klante aaaba enui lɛ anɔ, ni amɛaamii! Ejaakɛ amagai ashikpɔŋ ni, ni gbeyei wɔji ahe sɛkɛ amɛyeɔ! No hewɔ lɛ ŋaŋ kooloi kɛ klaji aaahi jɛi, ni dugumai aaahi jɛi; ni ahiŋ jɛi dɔŋŋ kɛaatee naanɔ, ni asaŋ akɛ jɛi efeŋ shihilɛ he yɛ yinɔ ko yinɔ ko nɔ.” Amaga jamɔ kɛ jamɔ mli sɔlemɔi ni atiɔ mli akɛɔ nyɛŋ ahere Babilon Kpeteŋkpele lɛ yiwala kɛjɛ najiaŋtoo ni aaaba enɔ ni tamɔ bɔ ni Nyɔŋmɔ butu Sodom kɛ Gomora lɛ mli.—Yeremia 50:35-40.
Wein ni Teɔ Ajwamaŋbɔɔ he Akɔnɔ Shi
13. (a) Bɔfo ni he wa lɛ gbala jwɛŋmɔ kɛtee Babilon Kpeteŋkpele lɛ ajwamaŋbɔɔ babaoo lɛ nɔ yɛ mɛɛ gbɛ nɔ? (b) Mɛɛ ahoshwibɔɔ ni fa babaoo yɛ blema Babilon anaa ŋmɛnɛ yɛ Babilon Kpeteŋkpele lɛ hu mli?
13 Yɛ enɛ sɛɛ lɛ bɔfo ni he wa lɛ gbala jwɛŋmɔ kɛtee bɔ ni Babilon Kpeteŋkpele lɛ ajwamaŋbɔɔ lɛ da ha lɛ nɔ, ni ejaje akɛ: “Ejaakɛ eha jeŋmaji lɛ fɛɛ enu ejwamaŋbɔɔ lɛ he mlifu daa lɛ eko, ni shikpɔŋ lɛ nɔ maŋtsɛmɛi lɛ kɛ lɛ bɔ ajwamaŋ,a ni shikpɔŋ lɛ nɔ jarayelɔi lɛ tsɔmɔ niiatsɛmɛi yɛ elahoo lɛ hewalɛ lɛ mli.” (Kpojiemɔ 18:3) Efite jeŋmaji lɛ amli gbɔmɛi lɛ fɛɛ ajwɛŋmɔ yɛ ejamɔŋ gbɛi ni he tseee lɛ amli. Yɛ blema Babilon lɛ, taakɛ Hela yinɔsaneŋmalɔ Herodotus tsɔɔ lɛ, abiɔ ni obalayoo foro fɛɛ obalayoo foro afite ebalayeiaŋ yɛ sɔlemɔwe jamɔ mli. Ajieɔ bɔlɛnamɔ ni ni anyaŋeɔ kpo kɛbashi ŋmɛnɛ yɛ nibii ni ashɔshɔi ni ni yɔɔ Angkor Wat yɛ Kampuchea ni tawuu ekumɔ fai komɛi lɛ amli kɛ sɔlemɔ tsui ni yɔɔ Khajuraho, India, ni emli lɛ anaa Hindu nyɔŋmɔ Vishnu ni akɛ bɔlɛnamɔ mli nibii ni anyaŋeɔ ebɔle ehe fɛɛ kɛkpe lɛ. Yɛ United States, Amerika lɛ, ahoshwibɔɔ mli nibii ni ajie lɛ kpo ni hoso TV nɔ sanekpakpashiɛlɔi aje lɛ yɛ 1987, kɛ agbɛnɛ yɛ 1988, kɛ agbɛnɛ bɔ ni ajie lɛ kpo akɛ Nyɔŋmɔ jamɔ mli sɔɔlɔi kɛ amɛhe woɔ hii kɛ hii ni kɛ amɛhe feɔ yakayaka nii amli yɛ he fɛɛ he lɛ tsɔɔ akɛ Kristendom kpɛlɛɔ ajwamaŋbɔɔ diɛŋtsɛ ni afeɔ kɛtekeɔ nɔ lɛ nɔ. Ni kɛlɛ, jeŋmaji lɛ fɛɛ etsɔmɔ mɛi ni kɛ amɛhe woɔ ajwamaŋbɔɔ ko ni hiɛdɔɔ yɔɔ mli waa lɛ mli.
14-16. (a) Mɛɛ mumɔŋ jamɔŋ kɛ maŋkwramɔŋ wekukpaa ni tamɔ ajwamaŋbɔɔ tee nɔ yɛ Fascist Italia? (b) Beni Italia batutua Abyssinia lɛ, mɛɛ wiemɔi Roma Katolik Sɔlemɔ lɛ mli osɔfonukpai lɛ wie?
14 Wɔsusu jamɔŋ kɛ maŋkwramɔŋ naanyobɔɔ ni ehiii ni kɛ Hitler ba hewalɛ mli yɛ Nazi Germany lɛ he momo. Jeŋmaji krokomɛi hu na amanehulu yɛ jamɔ ni kɛ ehe wo jeŋ saji amli lɛ hewɔ. Akɛ nɔkwɛmɔnɔ lɛ: Yɛ Fascist Italia lɛ, yɛ February 11, 1929 lɛ, Mussolini kɛ Osɔfonukpa Cardinal Gasparri kɛ amɛwaonaa gbɛi wo Lateran Treaty ni ji kpaŋmɔ ko shishi, ni enɛ ha Vatican City bafee maŋ ni yeɔ ehe. Paapa Pius XI jaje akɛ “mikɛ Italia eha Nyɔŋmɔ, ni mikɛ Nyɔŋmɔ eha Italia.” Mɛni ji anɔkwale ni yɔɔ enɛ mli? Susumɔ nɔ ni ba yɛ enɛ sɛɛ afii ekpaa lɛ he. Yɛ October 3, 1935 lɛ, Italia yatutua Abyssinia, ni ekɛɛ akɛ “amɛji gbɔmɛi ni hiŋmɛii gbeleko ni heɔ ni amɛhɔɔ nyɔji lolo.” Shi namɔ diɛŋtsɛ ji mɔ ni hiŋmɛi gbeleko lɛ? Ani Katolik Sɔlemɔ lɛ bu Mussolini nifeemɔ ni etsɔɔɔ hiŋmɛigbelemɔ lɛ fɔ? Yɛ be mli ni paapa lɛ wieɔ wiemɔi ni shishinumɔ bɛ mli lɛ, esɔfonukpai lɛ kɛ naabu jɔɔ Italia “jakumaŋ” lɛ asraafoi lɛ anɔ. Anthony Rhodes bɔ amaniɛ yɛ wolo ni ji The Vatican in the Age of the Dictators lɛ mli akɛ:
15 “Yɛ Osɔfoi Awolo ni eŋma yɛ October 19 [1935] lɛ mli lɛ, Udine [Italia] Osɔfonukpa lɛ ŋma akɛ, ‘Ejeee nɔ ni be ŋmɛɔ gbɛ ni ejeee nɔ ni sa kɛha wɔ hu akɛ wɔɔtsɔɔ sane lɛ mli nɔ ni ja kɛ nɔ ni ejaaa. Wɔ nitsumɔ akɛ Italiabii kɛ agbɛnɛ babaoo akɛ Kristofoi ji ni wɔye wɔbua ni wɔtabilɔi lɛ aye omanye.’ Padua Osɔfonukpa lɛ hu ŋma yɛ October 21 akɛ, ‘Yɛ ŋmɛlɛtswai ni mli wawai ni wɔtsɔɔ mli nɛɛ hewɔ lɛ, wɔmiibi nyɛ ni nyɛna hemɔkɛyeli yɛ wɔmaŋ hiɛnyiɛlɔi lɛ kɛ wɔ asraafoi lɛ amli.’ Yɛ October 24 lɛ, Cremona Osɔfonukpa lɛ jɔɔ asraafoi aflaŋai babaoo nɔ ni ekɛɛ: ‘Nyɔŋmɔ jɔɔmɔ ahi nɛkɛ asraafoi ni yɔɔ Afrika shikpɔŋ nɔ ni baaye shikpɔji heei kɛ shikpɔji kpakpai anɔ kunim amɛha Italia nilelɔ lɛ nɔ, koni amɛtsɔ no nɔ amɛkɛ amɛ aba Roma kɛ Kristojamɔ kusum nifeemɔi ashishi. Eba akɛ Italia aaadamɔ shi shikome ekoŋŋ akɛ Kristofonyo ŋaawolɔ kɛha jeŋ muu lɛ fɛɛ.’”
16 Afee Abyssinia butuu, kɛ Roma Katolik osɔfoi lɛ ajɔɔmɔ. Ani mɛnɛɛmɛi ateŋ mɔ ko baanyɛ akɛɛ, yɛ shishinumɔ ko mli, akɛ amɛ tamɔ bɔfo Paulo “ni yeee mɔ ko la yi sɔ” lɛ?—Bɔfoi lɛ Asaji 20:26, New World Translation.
17. Mɛɛ piŋmɔ ba Spania nɔ akɛni esɔfoi lɛ nyɛɛɛ ni amɛkɛ “amɛ klantei aaasɔ kɔii” lɛ hewɔ?
17 Wɔkɛ maŋ kroko ni lɛ hu Babilon Kpeteŋkpele lɛ edu lɛ yɛ ejwamaŋbɔɔ lɛ mli—Spania—afata Germany, Italia kɛ Abyssinia he. Afi 1936-39 Maŋbii Ateŋ Ta ni tee nɔ yɛ nakai maŋ lɛ mli lɛ fa ko jɛ demokrase nɔyeli lɛ ni miito gbɛjianɔ koni eba Roma Katolik Sɔlemɔ lɛ hewalɛ kpeteŋkpele ni eyɔɔ lɛ shi lɛ hewɔ. Beni ta lɛ yaa nɔ lɛ, Katolik Fascist hiɛnyiɛlɔ ni nyiɛ maŋ hiɛ atuatselɔi lɛ ahiɛ, Franco, tsɔɔ akɛ lɛ diɛŋtsɛ lɛ eji “Kristofonyo Tatsɛ ni Wuɔ Ta Krɔŋkrɔŋ,” sabala ni yɛ sɛɛ mli lɛ eŋmɛɛ he. Spaniabii akpei ohai babaoo gboi yɛ nakai tawuu lɛ mli. Yɛ enɛ sɛɛ lɛ, taakɛ akɔntaabuu ko ni akpɛlɛɔ nɔ lɛ jie lɛ kpo lɛ, Franco Nationalist lɛ gbe Popular Front lɛ mlibii 40,000, yɛ be mli ni mɛnɛɛmɛi hu egbe osɔfoi—osɔfoi hii, yei kɛ mɛi heei 8,000. Nii ni yɔɔ gbeyei kɛ oshara ni jɛ maŋ ta lɛ mli ba nɛ, ni etsɔɔ nilee ni yɔɔ Yesu wiemɔi nɛɛ atoiboo mli lɛ: “Ŋɔɔ oklante lɛ oto etoo he; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 26:52) Kwɛ bɔ ni ehiii akɛ Kristendom kɛ ehe aaawo lashishwiemɔ babaoo ni tamɔ nɛkɛ mli! Lɛlɛŋ esɔfoi lɛ nyɛɛɛ ni “amɛkɛ amɛ klantei asɔ kɔii”—Yesaia 2:4.
Jarayelɔi Gbɛfalɔi
18. Namɛi ji “shikpɔŋ lɛ nɔ jarayelɔi” lɛ?
18 Namɛi ji “shikpɔŋ lɛ nɔ jarayelɔi” lɛ? Ŋwanejee ko bɛ he akɛ wɔbaatsɛ amɛ ŋmɛnɛ akɛ jarayelɔi, jarayeli nitsumɔi wuji, guɔyelɔi ni amɛna nii. Enɛ etsɔɔɔ akɛ ejaaa gbɛ akɛ mɔ ko kɛ ehe awo jarayeli nitsumɔ ni mla ŋmɛɔ gbɛ lɛ mli. Biblia lɛ hiɛ ŋaawoo ni nilee yɔɔ mli kɛha jarayelɔi, ebɔɔ amɛ kɔkɔ eshiɔ shishiumɔ, hiɛjoomɔ, kɛ nibii ni tamɔ nakai. (Abɛi 11:1; Zakaria 7:9, 10; Yakobo 5:1-5) Ninamɔ ni da fe fɛɛ lɛ ji “Nyɔŋmɔ jamɔ mli hetuu-kɛ-hamɔ, kɛji mɔ ko mii shɛ enii ahe lɛ.” (1 Timoteo 6:6, 17-19, New World Translation) Shi, Satan je lɛ ediii jalɛ shishitoo mlai asɛɛ. Shishiumɔ egbɛ eshwa. Anaa yɛ jamɔ mli, yɛ maŋkwramɔ mli—kɛ agbɛnɛ yɛ jarayeli nitsumɔi wuji amli. Yɛ be kɛ bei amli lɛ, adafitswaa woji kpaa hiɛshishwiemɔ nifeemɔi ni tamɔ nɛkɛ he mama, tamɔ nɔyeli lɛ mli onukpai ni juɔ kɛ tawuu nii ni ahɔɔ ni mla eŋmɛɛɛ gbɛ lɛ.
19. Mɛɛ anɔkwa sane ko ni kɔɔ je lɛ shika helɛtemɔ he nitsumɔ he yeɔ ebuaa ni etsɔɔ nɔ hewɔ ni atsiɔ shikpɔŋ lɛ nɔ jarayelɔi ata yɛ gbɛ fɔŋ nɔ yɛ Kpojiemɔ lɛ?
19 Tawuu nii ni ahɔɔ ni yaa nɔ yɛ majimaji ateŋ lɛ miiya hiɛ kɛmiiteke Amerika shika dɔlai 1,000,000,000,000 (dɔlai akpekpei toi akpekpei toi akpei abɔ) daa afi, yɛ be mli ni adesai akpekpei ohai abɔ anine shɛɛɛ amɛ daa gbi shihilɛ mli nibii ni he hiaa amɛ lɛ anɔ. Enɛ ehiii kwraa. Shi etamɔ nɔ ni tawuu nii afeemɔ ebatsɔ nɔ ni haa je lɛ shika helɛtemɔ nitsumɔi damɔɔ shi. Yɛ April 11, 1987 lɛ, sane ko je kpo yɛ London Spectator lɛ mli ni bɔ amaniɛ akɛ: “Kɛ aakane nitsumɔi ni kɔɔ he pɔtɛɛ lɛ, nitsumɔi sɔrɔtoi aaafee 400,000 kɛ amɛhe ewo mli yɛ U.S. Amerika kɛ nitsumɔi sɔrɔtoi 750,000 yɛ Europa. Shi nɔ ni yɔɔ naakpɛɛ ji akɛ, yɛ be mli ni shika helɛtemɔ mli nibii ni akɛfeɔ tawuu nii nɛɛ etee hiɛ lɛ, sanebimɔ lɛ diɛŋtsɛ ni ji akɛ ani tawuu nii nɛɛ buɔ mɛi ni feɔ lɛ ahe jogbaŋŋ lo lɛ efee nɔ ni abuuu he akɔntaa.” Anaa sɛɛnamɔi wuji kɛjɛɔ okpɛlɛmii kɛ tawuu nii krokomɛi ni ahɔɔ akɛ jarayeli nibii yɛ shikpɔŋ muu lɛ fɛɛ nɔ mli, kɛ nɔ ni ahɔɔ ahaa henyɛlɔi tete po. Gbi ko baaba ni nɛkɛ okpɛlɛmii nɛɛ baaku amɛsɛɛ amɛba yɛ hiɛkpatamɔ ni tamɔ la mli koni ebakpata mɛi ni hɔɔ enɛɛmɛi loo amɛkɛyeɔ jara lɛ ahiɛ. Mɛɛ nii ni kɛ ehe kpaaa gbee nɛ! Okɛ juu kɛ shishiumɔ ni ebɔle tawuu nii afeemɔ nitsumɔ lɛ he lɛ hu afata he. Yɛ United States, Amerika pɛ lɛ, taakɛ Spectator lɛ tsɔɔ lɛ, “Pentagon lɛ laajeɔ shika ni shɛɔ Amerika shika dɔlai akpekpei 900 daa afi yɛ tawuu nii ahɔɔmɔ mli yɛ gbɛ ni amɛnuuu shishi nɔ.” Belɛ ebɛ naakpɛɛ akɛ atsiɔ shikpɔŋ lɛ nɔ jarayelɔi agbɛi ata yɛ gbɛ fɔŋ nɔ yɛ Kpojiemɔ lɛ mli!
20. Mɛɛ nɔkwɛmɔnɔ tsɔɔ bɔ ni jamɔ kɛ ehe ewo jarayeli nitsumɔi ni efite mli lɛ mli?
20 Taakɛ anunyam bɔfo lɛ gba fɔ shi lɛ, Nyɔŋmɔ jamɔ kɛ ehe ewo jarayeli nitsumɔi ni ekpɔtɔ nɛɛ mli vii. Akɛ nɔkwɛmɔnɔ lɛ, Vatican ni kɛ ehe wo Italia Banco Ambrosiano (shikatoo he) ni bɔ nyɔmɔ yɛ 1982 mli lɛ yɛ. Saneyeli lɛ tee nɔ yɛ 1980 afii lɛ fɛɛ mli, ni sanebimɔ ni anyɛɛɛ aha hetoo lɛ ji: Nɛgbɛ ji he ni shika lɛ tee? Yɛ February 1987 mli lɛ, Milan kojolɔi kɛ amɛwaonaa gbɛi wo wolo shishi koni amɔmɔ Vatican osɔfoi etɛ, ni Amerika osɔfonukpa ko fata he, kɛ naafolɔmɔ akɛ amɛye amɛbua ni juu ni ha shikatoo he lɛ butu lɛ ba, shi Vatican kpoo enɛ akɛ eŋmɛŋ gbɛ ni amɔmɔ osɔfoi lɛ. Yɛ July 1987 mli lɛ, Italia Saneyeli he Wulu ni Kwɛɔ Saji Amli Ekoŋŋ lɛ damɔ blema kpaŋmɔ ni ka Vatican lɛ kɛ Italia nɔyeli lɛ teŋ lɛ nɔ amɛfo woji ni akɛbaamɔmɔ osɔfoi lɛ mli yɛ hoofeemɔ ni akɛte shi ashi lɛ fɛɛ sɛɛ.
21. Te wɔfeɔ tɛŋŋ wɔleɔ akɛ Yesu kɛ jarayeli nitsumɔi ni yaa nɔ yɛ egbii lɛ amli lɛ bɛ tsakpaa ko kwraa lɛ, shi mɛni wɔnaa ŋmɛnɛ yɛ Babilon jamɔ he?
21 Ani Yesu kɛ jarayeli nitsumɔi ni yeee anɔkwale yɛ egbii lɛ amli lɛ na tsakpaa ko? Dabi ejeee mɔ ni hiɛ gboshinii ko, ejaakɛ “ebɛ he ni ekɛ eyitso ŋmɛɔ.” Yesu wo obalanyo niiatsɛ nɔyelɔ ko ŋaa akɛ: “Yaahɔɔ onibii fɛɛ ni oyɔɔ lɛ ni oŋɔja ohiafoi, ni ooona jwetri yɛ ŋwɛi; ni oba obanyiɛ misɛɛ.” Ŋaawoo kpakpa nɛ, ejaakɛ nɔ ni baajɛ mli aba ji haomɔi kɛ yeyeeye feemɔi ni efeɔ yɛ nitsumɔ mli saji ahe lɛ ni fɛɛ sɛɛ aaafo. (Luka 9:58; 18:22) Nɔ ni tamɔɔɔ enɛ lɛ, Babilon jamɔ kɛ ehe woɔ nitsumɔi wuji amli yɛ gbɛ ni ehiii kwraa nɔ. Akɛ nɔkwɛmɔnɔ lɛ, yɛ 1987 mli lɛ, Albany Times Union lɛ bɔ amaniɛ akɛ Katolik kpokpaa wulu ni yɔɔ Miami, Florida, U.S. Amerika, lɛ shika nɔkwɛlɔ lɛ kpɛlɛ nɔ akɛ sɔlemɔ lɛ yɛ jarayeli nibii kɛ shika yɛ nitsumɔi ni feɔ nuklea tawuu nii, sinii ni ahaaa gbekɛbii akwɛ kɛ zigaretii sɔrɔtoi lɛ amli.
“Nyɛjea Emli, Mimaŋ”
22. (a) Mɛni gbee ni jɛ ŋwɛi lɛ kɛɔ? (b) Mɛni ha Nyɔŋmɔ webii lɛ amli fili amɛ yɛ 537 D.Ŋ.B. kɛ 1919 Ŋ.B.?
22 Yohane wiemɔi ni nyiɛ sɛɛ lɛ tsɔɔ gbalɛ nɔkwɛmɔnɔ lɛ mlibaa lolo: “Ni minu gbee kroko kɛjɛ ŋwɛi miikɛɛ: Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko.” (Kpojiemɔ 18:4) Yehowa famɔ ni ekɛha ewebii lɛ fata blema Babilon shigbeemɔ lɛ he gbalɛi ni yɔɔ Hebri Ŋmalɛi lɛ amli lɛ hu he: “Nyɛjoa foi kɛjɛa Babel teŋ.” (Yeremia 50:8, 13) Nakai nɔŋŋ hu yɛ Babilon Kpeteŋkpele lɛ amaŋfɔfeemɔ ni baa lɛ hewɔ lɛ, aawo Nyɔŋmɔ webii ahewalɛ bianɛ akɛ amɛjo foi. Hegbɛ ni ba koni ajo foi kɛjɛ Babilon mli yɛ afi 537 D.Ŋ.B. lɛ kɛ miishɛɛ babaoo ba Israelbii anɔkwafoi lɛ anɔ. Yɛ nakai gbɛ nɔ nɔŋŋ lɛ, bɔ ni akpɔ Nyɔŋmɔ webii kɛjɛ Babilon nyɔŋyeli mli yɛ 1919 lɛ kɛ mlifilimɔ ba amɛnɔ. (Kpojiemɔ 11:11, 12) Ni kɛjɛ nakai be lɛ mli kɛbaa nɛɛ, mɛi krokomɛi akpekpei abɔ ebo famɔ akɛ ajo foi lɛ toi.
23. Mɛɛ gbɛ nɔ gbee ni jɛ ŋwɛi lɛ maa bɔ ni ehe hiaa akɛ ajo foi kɛjɛ Babilon Kpeteŋkpele lɛ mli lɛ nɔ mi yɛ?
23 Ani ehe miihia waa lɛlɛŋ akɛ ajo foi kɛjɛ Babilon Kpeteŋkpele lɛ mli, agbala he shi kɛjɛ je lɛŋ jamɔi lɛ amlinyo ni mɔ ko aaatsɔ lɛ mli ni atse he kɛjɛ he kwraa? Nakai ni, ejaakɛ ehe miihia ni wɔna jwɛŋmɔ ni Nyɔŋmɔ hiɛ yɛ nɛkɛ blema jamɔ mli hegbeyeiwolɔ, Babilon Kpeteŋkpele lɛ he lɛ eko. Jeee shwɛ eshwɛɔ beni etsɛ lɛ akɛ ajwamaŋ kpeteŋkpele lɛ. No hewɔ lɛ gbee ni jɛ ŋwɛi lɛ kɛɔ Yohane nibii krokomɛi ni kɔɔ ajwamaŋ nɛɛ he: “Ejaakɛ ehe eshai lɛ eshɛ ŋwɛi tɔɔ ni Nyɔŋmɔ ekai enifɔjianii lɛ. Nyɛwoa lɛ nyɔmɔ taakɛ bɔ ni lɛ hu ewo nyɛ nyɔmɔ lɛ, ni nyɛkua nyɛbɔa he toi enyɔ nyɛhaa lɛ, taakɛ bɔ ni sa enitsumɔi lɛ; kpulu lɛ ni efutu eha nyɛ lɛ, nyɛfutua lɛ toi enyɔ nyɛhaa lɛ; babaoo bɔ ni ewo lɛ diɛŋtsɛ ehiɛ nyam ni eho la lɛ, nakai bɔ nɔŋŋ nyɛhaa epiŋmɔ kɛ ewerɛho lɛ atamɔa. Ejaakɛ ekɛɔ yɛ etsui mli akɛ: Mita shi akɛ maŋnyɛ ni mijeee okulafo ni minaŋ awerɛho ko. No hewɔ lɛ gbi kome nɔ ehaomɔi lɛ aaaba, gbele kɛ awerɛho kɛ hɔmɔ, ni akɛ la aaasha lɛ, ejaakɛ Nuŋtsɔ [Yehowa] Nyɔŋmɔ lɛ ni kojoɔ lɛ lɛ he wa.”—Kpojiemɔ 18:5-8.
24. (a) Esa akɛ Nyɔŋmɔ webii ajo foi kɛjɛ Babilon Kpeteŋkpele lɛ mli koni amɛkwa mɛni? (b) Mɛi ni ejooo foi kɛjɛɛɛ Babilon Kpeteŋkpele lɛ mli lɛ naa mɛɛ ehe eshai amli gbɛfaŋnɔ?
24 Wiemɔi ni mli wawai nɛ! No hewɔ lɛ aabi nifeemɔ. Yeremia wo Israelbii ni hi shi yɛ egbii lɛ amli lɛ hewalɛ akɛ amɛfee he nɔ ko, akɛ: “Nyɛjoa foi kɛjɛa Babel teŋ, . . . ejaakɛ Yehowa oweletɔɔ be ni: Ebaawo lɛ enifeemɔ nii lɛ ahe nyɔmɔ! Mimaŋ, nyɛjea kpo kɛjɛa eteŋ, nyɛteŋ mɔ fɛɛ mɔ ahere eyiwala kɛjɛ Yehowa mlifu ni naa wa lɛ mli!” (Yeremia 51:6, 45) Yɛ nakai gbɛ nɔ nɔŋŋ hu gbee ni jɛ ŋwɛi lɛ bɔɔ Nyɔŋmɔ webii lɛ kɔkɔ akɛ amɛjo foi kɛjɛ Babilon Kpeteŋkpele lɛ teŋ bɔni afee ni amɛnine akashɛ ehaomɔi lɛ eko nɔ. Aajaje Yehowa kojomɔi ni tamɔ haomɔi lɛ aashwie je nɛɛ nɔ, ni Babilon Kpeteŋkpele lɛ fata he. (Kpojiemɔ 8:1-9:21; 16:1-21) Ehe miihia ni Nyɔŋmɔ webii lɛ atsi amɛhe kɛjɛ apasa jamɔi ahe kɛji amɛ diɛŋtsɛ lɛ amɛsumɔɔɔ ni amɛnaa nɛkɛ haomɔi nɛɛ amli amanehulu ni enaagbee lɛ amɛkɛ lɛ agboi lɛ. Kɛfata he lɛ, nakai gbɛjiantoo lɛ mli ni amɛaahi lɛ baaha amɛna ehe eshai lɛ amli gbɛfaŋnɔ. Amɛbaafee mɛi ni yeɔ fɔ tamɔ bɔ ni eye fɔ yɛ mumɔŋ gbalafitemɔ mli kɛ agbɛnɛ yɛ “mɛi fɛɛ ni agbe yɛ shikpɔŋ lɛ nɔ lɛ ala” ni eye he fɔ lɛ mli lɛ.—Kpojiemɔ 18:24; okɛto Efesobii 5:11; 1 Timoteo 5:22 he.
25. Mɛɛ gbɛi Nyɔŋmɔ webii lɛ tsɔ nɔ amɛjo foi kɛjɛ blema Babilon?
25 Shi te Nyɔŋmɔ webii lɛ feɔ tɛŋŋ ni amɛjeɔ kpo kɛjɛɔ Babilon Kpeteŋkpele lɛ mli lɛ? Yɛ blema Babilon gbɛfaŋ lɛ, ehe bahia ni Yudafoi lɛ afa gbɛ diɛŋtsɛ kɛjɛ nakai Babilon maŋtiase lɛ mli aahu kɛku sɛɛ kɛya Shiwoo Shikpɔŋ lɛ nɔ. Shi babaoo hu he miihia fe nakai. Yesaia kɛɛ Israelbii lɛ yɛ gbalɛ mli akɛ: “Nyɛtsia nyɛhe, nyɛtsia nyɛhe! Nyɛjea kpo kɛjɛa jɛi! Nyɛkataa nɔ ko ni he tseee he! Nyɛjea kpo kɛjɛa emli! Nyɛ mɛi ni nyɛtereɔ Yehowa nibii lɛ, nyɛtsua nyɛhe!” (Yesaia 52:11) Hɛɛ, esa akɛ amɛshi Babilon jamɔ mli nifeemɔi ni he tseee ni baanyɛ awo jamɔ ni amɛkɛhaa Yehowa lɛ he muji lɛ fɛɛ.
26. Korinto Kristofoi lɛ bo wiemɔi, ‘nyɛjea kpo kɛjɛa eteŋ ni nyɛkataa nɔ ko ni he tseee he’ lɛ toi yɛ mɛɛ gbɛ nɔ?
26 Bɔfo Paulo tsɛ wiemɔi kɛjɛ Yesaia wiemɔi lɛ amli yɛ ewolo ni eŋma eyaha Korintobii lɛ mli, akɛ: “Nyɛkɛ mɛi ni heee yeee lɛ akagbalaa kɔŋtso kome ni yee egbɔ! Ejaakɛ mɛɛ bɔɔ jalɛ kɛ mlatɔmɔ yɔɔ? Aloo mɛɛ yeli la kɛ duŋ yɔɔ? . . . No hewɔ lɛ Yehowa kɛɛ, nyɛjea amɛteŋ, ni nyɛtsia nyɛhe, ni nyɛkataa muji nɔ ko he.” Ehe ehiaaa ni Korinto Kristofoi lɛ ashi Korinto koni amɛkɛbo nakai famɔ lɛ toi. Nɔ ni esa akɛ amɛfee ji ni amɛkwa nakai apasa jamɔ mli sɔlemɔtsui ni he tseee lɛ, kɛ agbɛnɛ ni amɛtsi amɛhe yɛ mumɔŋ kɛjɛ nakai amaga jalɔi lɛ anifeemɔi ni he tseee lɛ ahe. Yɛ 1919 lɛ, Nyɔŋmɔ webii lɛ je shishi akɛ amɛaajo foi kɛaajɛ Babilon Kpeteŋkpele lɛ mli yɛ nɛkɛ gbɛ nɔ, amɛtsuu amɛhe kɛjɛ tsɔɔmɔi kɛ nifeemɔi ni he tseee ni eshwɛ lɛ fɛɛ mli. Yɛ nɛkɛ gbɛ nɔ lɛ, amɛnyɛ amɛsɔmɔ lɛ akɛ ewebii ni amɛtsuu amɛhe.—2 Korintobii 6:14-17; 1 Yohane 3:3.
27. Mɛni nibii yɔɔ ni jejee amɛhe yɛ kojomɔi ni ba blema Babilon kɛ Babilon Kpeteŋkpele lɛ nɔ lɛ mli?
27 Blema Babilon shigbeemɔ kɛ enaagbee kɛ ehiɛkpatamɔ lɛ ji toigbalamɔ ni akɛba enɔ yɛ ehe eshai lɛ ahewɔ. “Ejaakɛ ekojomɔ lɛ eshɛ ŋwɛi tɔɔ.” (Yeremia 51:9) Nakai nɔŋŋ hu Babilon Kpeteŋkpele lɛ he eshai lɛ “eshɛ ŋwɛi tɔɔ,” no hewɔ lɛ Yehowa diɛŋtsɛ ekai. Eye fɔ yɛ jalɛsane ni ayeee mli, wɔŋjamɔ mli, jeŋba shara mli, nɔnyɛɛ mli, shishiumɔ mli, kɛ gbɔmɔgbee mli. Blema Babilon shigbeemɔ lɛ fa ko ji oweletɔɔ ni akɛba enɔ yɛ nɔ ni efee Yehowa sɔlemɔtsu lɛ kɛ enɔkwa jalɔi lɛ hewɔ. (Yeremia 50:8, 14; 51:11, 35, 36) Babilon Kpeteŋkpele lɛ shigbeemɔ kɛ enaagbee hiɛkpatamɔ kwraa lɛ hu ji oweletɔɔ nifeemɔi ni akɛba enɔ yɛ nɔ ni efee anɔkwa jalɔi yɛ afii ohai abɔ lɛ amli lɛ hewɔ. Yɛ anɔkwale mli lɛ, enaagbee hiɛkpatamɔ lɛ ji “wɔ-Nyɔŋmɔ lɛ oweletɔɔ gbi” lɛ shishijee.—Yesaia 34:8-10; 61:2; Yeremia 50:28.
28. Mɛɛ jalɛsane he tɛi ni afolɔ ashwie shi Yehowa kɛtsuɔ Babilon Kpeteŋkpele lɛ he nii, ni mɛni hewɔ?
28 Yɛ Mose Mla lɛ shishi lɛ, kɛji akɛ Israelnyo ju nɔ ko kɛjɛ enaanyo maŋnyo dɛŋ lɛ, kɛ hooo lɛ esa akɛ ewo nɔ ni eju lɛ toi enyɔ eha mɔ lɛ. (2 Mose 22:1, 4, 7, 9) Yɛ Babilon Kpeteŋkpele lɛ hiɛkpatamɔ ni baa lɛ mli lɛ, Yehowa kɛ jalɛ tɛi ni afolɔ ashwie shi ni tamɔ nakai baatsu nii. Enine baashɛ nɔ ni ekɛha lɛ nɔ toi enyɔ. Ajieŋ mɔbɔnalɛ kpo, ejaakɛ Babilon Kpeteŋkpele lɛ ejieee mɔbɔnalɛ ko kpo etsɔɔɔ mɛi ni enine shɛ amɛnɔ lɛ. Eye mɛi ni yɔɔ shikpɔŋ lɛ nɔ lɛ ahe nii yɛ ‘lɛ diɛŋtsɛ ehiɛ nyam ni ewo kɛ elahoo’ lɛ mli. Agbɛnɛ, piŋmɔ kɛ yaafo baaba enɔ. Blema Babilon nu he akɛ eyɛ shweshweeshwe shihilɛ ko mli, ni epupuu ehe akɛ: “Mitaŋ shi akɛ yoo okulafo, ni mileŋ bɔ ni akpakpaa mɔ bii yɛ ehe.” (Yesaia 47:8, 9, 11) Babilon Kpeteŋkpele lɛ hu nuɔ he akɛ eyɛ shweshweeshwe. Shi ehiɛkpatamɔ, ni Yehowa “ni he wa” lɛ efa lɛ baaba mli oya, tamɔ “yɛ gbi kome nɔ”!
[Shishigbɛ niŋmaa]
a New World Translation Reference Bible, shishigbɛ niŋmaa.
[Akrabatsa ni yɔɔ baafa 263]
“Shikpɔŋ lɛ nɔ Maŋtsɛmɛi lɛ kɛ lɛ Bɔ Ajwamaŋ”
Yɛ 1800 afii lɛ shishijee mli lɛ, no mli lɛ Europa jarayelɔi miiju shi amɛkɛ opium ni tamɔ wii lɛ babaoo miiya China. Yɛ March 1839 lɛ, China nɔyeli lɛ mli onukpai lɛ bɔ mɔdɛŋ ni amɛtsi jarayeli ni mla eŋmɛɛɛ gbɛ nɛɛ naa kɛtsɔ tsofa nɛɛ adekai wuji 20,000 ni amɛshɔ̃ kɛjɛ Ŋleshi jarayelɔi adɛŋ lɛ nɔ. Enɛ ha bei baka Britania kɛ China teŋ. Yɛ be mli ni wekukpaa ni ka maji enyɔ nɛɛ ateŋ lɛ tee nɔ efite lɛ, Protestant maŋsɛɛ sanekpakpashiɛlɔi komɛi wo Britania ŋaa koni amɛkɛ China awuu ta, kɛ wiemɔi ni tamɔ nɔ ni nyiɛ sɛɛ nɛɛ:
“Kwɛ bɔ ni nɛkɛ naagbai nɛɛ haa mitsui nyaa ejaakɛ misusuɔ akɛ Ŋleshi nɔyeli lɛ mli baafu, ni Nyɔŋmɔ hu, baajɛ E-hewalɛ lɛ mli akumɔ gbɛtsiinii ni haaa Kristo sanekpakpa lɛ abote China lɛ ashwie shi.”—Henrietta Shuck, Southern Baptist maŋsɛɛ sanekpakpashiɛlɔ.
Yɛ naagbee lɛ, ta lɛ fɛ—ta ni ŋmɛnɛ ale akɛ Opium (Wii) Ta lɛ. Maŋsɛɛ sanekpakpashiɛlɔi kɛ amɛtsui fɛɛ wo Britania hewalɛ kɛ wiemɔi ni tamɔ nɛkɛ:
“Aanyɛ minɔ koni maku misɛɛ makwɛ shihilɛ ni yɔɔ ŋmɛnɛŋmɛnɛ lɛ, ni jeee akɛ opium loo wii aloo Ŋleshi sane, shi moŋ akɛ Ŋwɛi gbɛjianɔtoo ni baaha gbɔmɔ yiwalɛ aba ehe shi aha E-mɔbɔnalɛ yiŋtoo ni eyɔɔ yɛ China he lɛ koni ekumɔ egbogbo ni ekɛtse ehe lɛ.”—Peter Parker, Congregationalist maŋsɛɛ sanekpakpashiɛlɔ.
Congregationalist maŋsɛɛ sanekpakpashiɛlɔ kroko, Samuel W. Williams kɛfata he akɛ: “Eka shi faŋŋ akɛ Nyɔŋmɔ nine yɛ nɔ ni etee nɔ lɛ fɛɛ mli yɛ naakpɛɛ gbɛ nɔ, ni wɔyiŋ efeee wɔ kɔshikɔshi akɛ Mɔ ni kɛɛ akɛ E-ba ni ekɛ klante aba shikpɔŋ lɛ nɔ lɛ eba biɛ koni ekɛ oyaiyeli akpata E-henyɛlɔi lɛ ahiɛ koni eto Lɛ diɛŋtsɛ emaŋtsɛyeli lɛ. Ebaabutu ni ebutu kɛyashi be mli ni eeeto Toiŋjɔlɛ Lumɔ lɛ ema shi.”
Maŋsɛɛ sanekpakpashiɛlɔ J. Lewis Shuck ŋma yɛ bɔ ni akpata Chinabii ahiɛ yɛ gbɛ ni yɔɔ gbeyei nɔ lɛ he akɛ: “Mibuɔ nɛkɛ nibii nɛɛ akɛ . . . Nuŋtsɔ lɛ dɛŋdade ni ekɛjie jwɛi ni tsiɔ Ŋwɛi Anɔkwale lɛ shweremɔ gbɛ lɛ kɛya.”
Congregationalist maŋsɛɛ sanekpakpashiɛlɔ Elijah C. Bridgman kɛfata he akɛ: “Nyɔŋmɔ fɔɔ maŋ nɔyeli lɛ nine ni shishi wa lɛ kɛ nitsumɔ koni ekɛsaa gbɛ eha E-maŋtsɛyeli lɛ . . . Nɔ ni akɛtsuɔ nii yɛ bei nɛɛ amli ji adesa nine; ŋwɛi hewalɛ ni kudɔɔ saji lɛ. Jeŋmaji fɛɛ nɔ amralo ni yɔɔ shɔŋŋ lɛ kɛ nitsumɔ ewo England dɛŋ koni eka ni eba China shi.”—Wiemɔi ni atsɛ yisɛɛ kɛjɛ “Ends and Means,” 1974, yɛ sane ko ni Stuart Creighton Miller ŋma yɛ wolo ni ji The Missionary Enterprise in China and America (Harvard Nikasemɔ ko ni John K. Fairbank kwɛ mli) lɛ mli.
[Akrabatsa ni yɔɔ baafa 264]
“Shikpɔŋ lɛ nɔ Jarayelɔi Tsɔmɔ Niiatsɛmɛi”
“Yɛ 1929 kɛ be mli ni Jeŋ Ta II fɛ lɛ teŋ lɛ, [Bernadino] Nogara [Vatican shika nɔkwɛlɔ] kɛ Vatican shika kɛ Vatican najiaŋdamɔlɔi tsu nii yɛ gbɛi sɔrɔtoi anɔ yɛ Italia shika helɛtemɔ mli—titri lɛ yɛ srawa hewalɛ nitsumɔ, telifon nitsumɔ, shikatoo hei kɛ shikafaa he nitsumɔ, oketeke gbɛi bibii, kɛ guɔyeli nibii afeemɔ, sɛmɛnti, kpãi sɔrɔtoi ni akɛloɔ atadei afeemɔ mli. Nɛkɛ nitsumɔi nɛɛ pii kɛ sɛɛnamɔi babaoo ba.
“Nogara mi nitsumɔi babaoo ni La Società Italiana della Viscosa, La Supertessile, La Società Meridionale Industrie Tessili, kɛ La Cisaraion fata he. Ebua enɛɛmɛi fɛɛ naa efee amɛ nitsumɔ kome, ni ewo lɛ gbɛi akɛ CISA-Viscosa ni ekɛwo Baron Francesco Maria Oddasso, ni ji Vatican hii ni akɛ he fɔɔ amɛnɔ fe fɛɛ lɛ ateŋ mɔ kome lɛ hewalɛ shishi, kɛkɛ ni Nogara tsɔ ŋaa ni eŋɔ nitsumɔ hee kroko ni Italia mamafeemɔ he nitsumɔ ni da fe fɛɛ lɛ kɛ ehe ewo mli lɛ, SNIA-Viscosa. Yɛ naagbee lɛ, shika ni Vatican yɔɔ yɛ SNIA-Viscosa mli lɛ batee nɔ eda agbo, ni yɛ be ni sa mli lɛ Vatican he nitsumɔ nɛɛ—ni nɔ ni yeɔ enɛ he odase lɛ, Baron Oddasso batsɔ esɛinɔtalɔ lɛ sɛɛmɔ.
“Nɛkɛ ji gbɛ ni Nogara tsɔ nɔ ekɛ ehe wo mamafeemɔ nitsumɔ lɛ mli. Ebote nitsumɔi krokomɛi amli yɛ gbɛi sɔrɔtoi anɔ, ejaakɛ Nogara yɛ ŋaa sɔrɔtoi babaoo ni ekɛto. Etamɔ nɔ ni nɛkɛ nuu ni susuuu lɛ diɛŋtsɛ ehe nɛɛ . . . fee babaoo ekɛkanya Italia shika helɛtemɔ nitsumɔ fe nitsumɔtsɛ fɛɛ nitsumɔtsɛ yɛ Italia yinɔsane mli . . . Benito Mussolini nyɛɛɛ aha enine ashɛ maŋtsɛyeli ni ela yɛ he lɛ nɔ, shi enyɛ eha Vatican kɛ Bernadino Nogara to nɔyeli kroko ko amɛma shi.”—The Vatican Empire, ni Nino Lo Bello ŋma lɛ, baafai 71-3.
Enɛ ji nɔkwɛmɔnɔ kome ko pɛ ni kɔɔ gbeekpamɔ ni ka shikpɔŋ lɛ nɔ jarayelɔi kɛ Babilon Kpeteŋkpele lɛ teŋ lɛ he. Ŋwanejee ko bɛ he akɛ nɛkɛ jarayelɔi nɛɛ baafo yɛ be mli ni amɛnitsumɔ hefatalɔ lɛ bɛ dɔŋŋ lɛ!
[Mfoniri ni yɔɔ baafa 259]
Beni adesai gbɛɔ shwaa shikpɔŋ muu lɛ fɛɛ nɔ lɛ, amɛkɛ Babilon jamɔ lɛ fata amɛhe kɛtee
[Mfonirii ni yɔɔ baafa 261]
Yohane kuu lɛ, ni tamɔ bulɔ lɛ, jajeɔ akɛ Babilon egbee shi
[Mfoniri ni yɔɔ baafa 266]
Blema Babilon amaŋfɔfeemɔ lɛ feɔ Babilon Kpeteŋkpele lɛ hiɛkpatamɔ ni baa lɛ he mfoniri