Akpa Ajwamaŋ Kpeteŋkpele Lɛ He Mama
ŊMƐNƐŊMƐNƐ jeŋ gbɛjianɔtoo lɛ ni yɔɔ Satan kudɔmɔ shishi lɛ yɛ emli nibii titrii etɛ ni “je nɛŋ nyɔŋmɔ” lɛ kudɔɔ. Enɛɛmɛi ji maŋkwramɔŋ nɔyeli, jarayeli nitsumɔi wuji kɛ hewalɛ ni amɛnaa yɛ mɛi anɔ, kɛ jamɔ. Yɛ yinɔsane bei afii akpei abɔ ni eho lɛ fɛɛ mli lɛ, nɛkɛ nibii etɛ nɛɛ efee nibii titrii yɛ nɔyeli gbɛjianɔtoi fɛɛ amli. Ni te nɛkɛ nibii ni yɔɔ hewalɛ nɛɛ ateŋ nɔ ni akɛ “ajwamaŋi lɛ . . . anyɛ lɛ” feɔ ehe mfoniri lɛ?—2 Korintobii 4:3, 4, The Jerusalem Bible; Kpojiemɔ 12:9; 17:5.
Taakɛ Yohane ninaa ni wɔsusuɔ he lɛ tsɔɔ lɛ, wɔna momo akɛ nɔyelɔi lɛ, “shikpɔŋ lɛ nɔ maŋtsɛmɛi” lɛ ejɛ amɛsuɔmɔ mli amɛtee ejwamaŋbɔɔ saatso lɛ he. (Kpojiemɔ 18:3) (Yinɔsane mli odaseyeli ni kɔɔ enɛ he lɛ baaje kpo yɛ baafai ni nyiɛ sɛɛ nɛɛ amli.) No hewɔ lɛ, Babilon Kpeteŋkpele lɛ nyɛŋ afee maŋkwramɔŋ nɔyeli he okadi yɛ je lɛŋ gbɛjianɔtoo lɛ mli.
Ejarayeli nitsumɔi wuji lɛ ni feɔ babaoo yɛ adesa shihilɛ mli ŋmɛnɛ lɛ hu? Eyɛ hewalɛ diɛŋtsɛ yɛ maji pii amli, ni yɛ enɛ hewɔ lɛ, ekpɛɔ eyiŋ yɛ mɔ ni baafee niiatsɛ kɛ mɔ ni baafee ohiafo he. Ani enɛ aaanyɛ afee Babilon Kpeteŋkpele lɛ? Ŋwɛibɔfo ko kɛ okadi titri ni baaha ana lɛ lɛ ha Yohane ni enɛ haa sanebimɔ lɛ hetoo. Etswa sane ko ni hɛleɔ mɔ shi lɛ he adafi—Babilon shigbeemɔ kɛmiijɛ anunyam mli! Elaaje enanemɛi kɛ ehemɛi lɛ fɛɛ ejaakɛ etsɛɛɛ ni amɛbanyɛ lɛ. Namɛi, akɛ ja “shikpɔŋ lɛ nɔ . . . maŋtsɛmɛi” lɛ ji mɛi ni saraa lɛ yɛ bei fɛɛ mli? Ŋwɛibɔfo lɛ jaje akɛ: “Ejaakɛ eha jeŋmaji lɛ fɛɛ enu ejwamaŋbɔɔ lɛ he mlifu daa lɛ eko, ni shikpɔŋ lɛ nɔ maŋtsɛmɛi lɛ kɛ lɛ bɔ ajwamaŋ, ni shikpɔŋ lɛ nɔ jarayelɔi lɛ tsɔmɔ niiatsɛmɛi yɛ elahoo lɛ hewalɛ lɛ mli.” Hɛɛ, je lɛŋ jarayelɔi lɛ ena ehe sɛɛ kɛtsɔ jara ni amɛkɛ lɛ ye ni amɛtao eyelikɛbuamɔ ni ha “elahoo” lɛ fa lɛ hewɔ. No hewɔ lɛ enyɛŋ edamɔ shi eha jarayeli nitsumɔi wuji ni yɔɔ je lɛ mli lɛ.—Kpojiemɔ 18:3.
No hewɔ lɛ, kɛ wɔɔjie amɛ ekomekomei yɛ mli lɛ, maŋkwramɔŋ nɔyeli kɛ jarayeli nitsumɔi wuji bɛ mli dɔŋŋ. Namɔ shwɛɔ kɛhaa wɔ? Efee hewalɛ lɛ fa ni sa naafolɔmɔ nɛɛ, “ejaakɛ okunyaayeli lɛ akɛshishiu jeŋmaji lɛ fɛɛ.” Lɛ ji mɔ ni be ko lɛ eyɔɔ hewalɛ waa ni agbɛnɛ enɔ gbɔɔ ni enyɛ ena jeŋmaji asusumɔi kɛ amɛnifeemɔi anɔ hewalɛ kɛjɛ blema Babilon lɛ. Lɛ ji mɔ ni “yeɔ shikpɔŋ lɛ nɔ maŋtsɛmɛi lɛ anɔ lɛ”—ni ji, apasa jamɔ!—Kpojiemɔ 17:18; 18:23.
Hɛɛ, yɛ bɔ ni eji hejɔmɔ sane kɛha gbɔmɛi ni yeɔ amɛjamɔi anɔkwale lɛ ateŋ mɛi komɛi lɛ, Babilon Kpeteŋkpele lɛ, ajwamaŋi lɛ anyɛ lɛ, ji Satan jeŋ apasa jamɔ maŋtsɛyeli lɛ he okadi. Lɛ ji je lɛŋ jamɔi ni yɛ gbɛ kome loo gbɛ kroko nɔ lɛ, amɛkɛ maŋkwramɔŋ kɛ mɛi ni bɔɔ jwetrii wuji amɛhaa amɛhe lɛ efee ekome kɛtsɔ yinɔsane be fɛɛ mli lɛ.
Babilon Ni Tsirɛɔ Mɛi Ayisɛɛ Ewoɔ Tawuu Mli Lɛ
Nɔ ni kɛ gbalɛ ninaa lɛ kpaa gbee lɛ, Babilon Kpeteŋkpele lɛ ji ajwamaŋ kpeteŋkpele lɛ, ni enyiɛ jeŋmaji, gbɔmɛi kɛ wekui ahiɛ kɛtee tawuu ni shwieɔ la shi babaoo, tai krɔŋkrɔŋi kɛ wekui atai amli ni ekɛ ŋkpaiyeli, nui krɔŋkrɔŋi, sɔlemɔi, kɛ maŋhedɔɔ wiemɔi ni taa mɔ mli ejɔɔ enɛɛmɛi anɔ.a—Kpojiemɔ 18:24.
Emli osɔfoi lɛ, titri lɛ tawuu mli osɔfoi lɛ, efee dɛŋdadei ni jɛɔ amɛsuɔmɔ mli amɛkɛ amɛhe haa nɔyelɔi lɛ ni amɛkɛbua gbɔmɛi lɛ anaa tamɔ tu naa loo amɛwo jeŋ tai enyɔ lɛ kɛ tai wuji krokomɛi ahiɛkpatamɔ mli. Katoleknyo egbe Katoleknyo, Protestantnyo ekpata Protestantnyo hiɛ akɛ ekɛmiifee nakai yɛ nitsumɔ ni akɛwo edɛŋ lɛ hewɔ, ni enɛ ha gbɔmɛi kɛjɛ akpekpei 50 kɛmiiya akpekpei 60 laaje amɛwala yɛ jeŋ tai enyɔ lɛ mli.
Yɛ afii ohai 20 ni hiŋmɛi egbele nɛɛ mli lɛ, nɔ ni jamɔ eshi yɛ esɛɛ lɛ yaa nɔ ekɛ hetsɛ kɛ gbele ba—jeee yɛ Kristendom nɔyeli he lɛ pɛ kɛkɛ mli yɛ he ni Katolekbii wuuɔ shiɔ Protestantbii lɛ, shi moŋ yɛ mɛi ni jeee Kristofoi aje lɛ hu mli he ni Islam kɛ Yudajamɔ wuuɔ, Hindu jamɔ kɛ Islam jamɔ wuuɔ, Buddha jamɔ kɛ Hindu jamɔ wuuɔ, Sikh jamɔ kɛ Hindu jamɔ wuuɔ, kɛ ekrokomɛi ni yaa nɔ lɛ.
Kɛfata he lɛ, jamɔ ebɔ mɔdɛŋ yɛ be fɛɛ mli akɛ eeena hewalɛ yɛ “shikpɔŋ lɛ nɔ maŋtsɛmɛi” lɛ anɔ, ni ebɔɔ mɔdɛŋ ni etsɔɔ amɛ nɔ ni baaba amɛ kɛ mɛi ni baaye amɛsɛɛ lɛ anɔ. Nyɛhaa wɔsusua nɔkwɛmɔ nii fioo komɛi ahe.
[Shishigbɛ niŋmai]
a Tai “krɔŋkrɔŋi” (1096-1270) , Afii Nyɔŋmai Etɛ Ta ni awuu yɛ Europa (1618-48) , jeŋ tai enyɔ lɛ, kɛ Hindubii kɛ Muslimbii 200,000 ni agbe amɛ yɛ be mli ni ajaa India mli (1948) lɛ ji la yi sɔ ni jamɔ eye lɛ he nɔkwɛmɔ nii fioo.
[Mfoniri ni yɔɔ baafa 4]
Nɛkɛ nibii nɛɛ ateŋ namɔ—maŋkwramɔ, jarayeli nitsumɔi wuji loo jamɔ—damɔ shi kɛha “Babilon Kpeteŋkpele” lɛ?