Suɔmɔ Ni Wɔɔwo Ni Wɔha Ahi Wɔhe

 1. Mɛni esa akɛ wɔwo aloo wɔkɛhà wɔhe lɛ, ni mɛɛ be ehe kaa ni fe fɛɛ Iɛ baaba?

¹ AKƐNI suɔmɔ ji “ekomefeemɔ kpaa ni yeɔ emuu” hewɔ lɛ, eji su ko ni he hiaa fe fɛɛ ni esa akɛ wɔwo loo wɔkɛha wɔhe ni osatofeemɔ ko bɛ mli. Esa akɛ wɔwo yɛ be fɛɛ mli yɛ anɔkwayeli fɛɛ mli. Ejeee atade ko ni mɔ ko kɛhaa bɔ ni mɔ lɛ diɛŋtsɛ ji nɔ. Akɛ mumɔŋ wiemɔi nɛɛ to kɛha wɔ ŋaawoo ŋmɛnɛ: “Suɔmɔ lɛ osato akahi mli. . . . Nyɛkɛ nyɛmimɛi asuɔmɔ asumɔsumɔa nyɛhe.” (Romabii 12:​9, 10) Kaa ni fe fɛɛ ni kɔɔ bɔ ni wɔsuɔmɔ nɛɛ, nɛkɛ “ekomefeemɔ kpaa” nɛɛ yɔɔ krɔŋŋ ha lɛ baaba​—yɛ wɔsɛɛ be mli.

 2. Ani anyɛɔ anaa suɔmɔ ni ajeee shishi atooo he gbɛjianɔ kwraa?

² Belɛ agbɛnɛ enɛ ji be ni sa jogbaŋŋ ni esa akɛ wɔkɛtao suɔmɔ. Esa akɛ adi gbɛi fɛɛ ni atsɔɔ nɔ akɛnaa nakai su lɛ sɛɛ bianɛ. No hewɔ ni beni bɔfo Paulo ejie nibii sɔrɔtoi ni esa akɛ Yesu Kristo kaselɔi ni amɛjɔɔ amɛhe nɔ ni abaptisi amɛ lɛ afee lɛ ayi lɛ ekɛɛ enɛ kɛgbe naa akɛ: “Shi enɛɛmɛi fɛɛ sɛɛ lɛ nyɛwoa suɔmɔ, ejaakɛ eji ekomefeemɔ kpaa ni yeɔ emuu lɛ.” (Kolosebii 3:​14, NW) No hewɔ lɛ mɛni ji “enɛɛmɛi fɛɛ” ni yɛ nomɛi asɛɛ lɛ esa akɛ wɔwo suɔmɔ lɛ?

Nibii Ni Gbalaa Mɛi Amli Ni Esa Akɛ Wɔye Nɔ Kunim

 3. Taakɛ Kolosebii 3:​9-13 tsɔɔ lɛ, mɛni esa akɛ afee koni ana suɔmɔ?

³ Nibii komɛi yɛ ni baanyɛ afee nibii ni gbálaa mɛi amli yɛ blema bei lɛ amli, yɛ bɔfo Paulo kɛ Yohane gbii lɛ amli. Shi esa akɛ nakai be ko mli nihii ni sa ni adamɔɔ nɔ agbálaa mɛi amli lɛ afee nɔ ni akuɔ hiɛ ashwieɔ nɔ bianɛ, nɔ ni sɛɛnamɔ bɛ ehe hiamɔ kɛ etsiimɔ he dɔŋŋ. Kristofoi lɛ fɛɛ efee asafo kome, kuu kome yɛ mumɔŋ Yitso, Yesu Kristo shishi. Esa akɛ atsi heloonaa nibii fɛɛ ni adamɔɔ nɔ agbalaa mɛi amli lɛ ato afa. Esa akɛ mumɔŋ anɔkwalei ni feɔ mɛi ekome lɛ aba hiɛ agbɛnɛ. Yɛ enɛ kɛ gbeekpamɔ naa lɛ, bɔfo Paulo tee nɔ ekɛɛ akɛ: “Nyɛjiea gbɔmɔ momo lɛ kɛ enitsumɔi lɛ nyɛshwiea, ni nyɛwoa gbɔmɔ hee ni tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa he ni Helanyo kɛ Yudanyo, ketiafolɔ kɛ foolɔ, jekɔnyo kɛ Skitenyo, nyɔŋ kɛ odehe ko bɛ dɔŋŋ, shi moŋ Kristo ji nii fiaa yɛ mɛi fɛɛ mli lɛ. No hewɔ lɛ, akɛ nɔ ni Nyɔŋmɔ halamɔbii, mɛi krɔŋkrɔŋi kɛ suɔmɔmɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo, ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe.”​—Kolosebii 3:​9-13.

 4. Mɛni hewɔ ni ehe bahia ni mɛi kɛ amɛhe ahi shi yɛ toiŋjɔlɛ mli yɛ afii oha lɛ mli asafo lɛ mli lɛ, ni mɛni nɔ adamɔ ni ekolɛ aku hiɛ ashwie nibii komɛi anɔ?

⁴ Yɛ nɔ ni atsi ta yɛ yiteŋgbɛ nɛɛ fɛɛ ni kɔɔ maŋ nɔ ni mɔ ko jɛ, kɛ tsutsu jamɔ mli ni eyɔɔ, egbɛhe, wiemɔ kɛ hewolo nɔ su lɛ hewɔ lɛ, ebaawa akɛ amɛkɛ amɛhe aaahi shi yɛ toiŋjɔlɛ mli yɛ asafo lɛ mli. Ehe hiaa ni shishinumɔ aba ni aku hiɛ ashwie amɛnyɛmimɛi lɛ atɔmɔi anɔ. Ejaakɛ, eyɛ mli akɛ nakai nibii lɛ baafee sane ni he baahia helooŋ gbɔmɛi moŋ, shi ehe ehiaŋ Nyɔŋmɔ kɛ e-Bi Yesu Kristo ni gbo kɛha adesai fɛɛ yɛ be mli ni nɛkɛ sɔrɔtofeemɔ nɛɛ efa ni amɛyɔɔ lolo lɛ. Mɛi ni ŋmɛɔ mɛi krokomɛi asusumɔi agbɛ lɛ baanyɛ ajɛ mlihilɛ mli, ákɛ gbɔmɛi, aku amɛhiɛ amɛshwie sɔrɔtofeemɔi nɛɛ anɔ, yɛ shishitoo mlai ni kɔɔ mɛi fɛɛ he lɛ hewɔ. Nakai feemɔ baanyɛ afee nifeemɔ ni ja, ekolɛ mlihilɛ kpojiemɔ diɛŋtsɛ. Shi kɛlɛ suɔmɔ krɔŋŋ, ni pɛsɛmkunya bɛ mli bɛ nifeemɔ nɛɛ mli.

 5. Mɛɛ adesa he nibii nɛkɛ esa akɛ Yehowa Odasefoi ateke yɛ be mli ni amɛkuɔ amɛhiɛ amɛshwieɔ nibii ni gbalaa mɛi ateŋ nɔ lɛ, koni amɛkɛtsɔɔ akɛ amɛkɛ namɔ efee ekome?

⁵ Yɛ yiŋtoo nɛɛ hewɔ lɛ, esa akɛ wɔ ni wɔjɔɔ wɔhe nɔ, ni abaptisi wɔ, ni ji Mɔ ni kɛ ewala ákɛ adesa ni yeɔ emuu lɛ ha yɛ gbɔmɛi sɔrɔtoi fɛɛ ahewɔ lɛ sɛɛnyiɛlɔi lɛ aya shɔŋŋ fe nii ni afɔɔ feemɔ kɛkɛ, nɔkpɛlɛmɔ kɛkɛ, nibii ni yɔɔ fɛo, agwaseaŋ nifeemɔ, na ni anaa ahaa mɔ akɛ adesa kɛkɛ; esa akɛ suɔmɔ ni ji anɔkwale ni taooo nɔ ko haaa lɛ diɛŋtsɛ ehe ni tamɔ Yehowa Nyɔŋmɔ mumɔ lɛ yibii lɛ atsirɛ wɔ. Nɛkɛ yibii nɛɛ taoɔ mɛi krokomɛi asɛɛnamɔ koni ahi aha amɛ. Esumɔɔ ni eye ebua ni ahi aha mɛi krokomɛi yɛ mumɔŋ ni amɛna miishɛɛ. Etsɔɔ akɛ wɔkɛ Nyɔŋmɔ, ni ji suɔmɔ ni ejie ehe kpo yɛ gbɔmɔtso mli lɛ yɛ ekomefeemɔ mli. Hewalɛ ko ni gbalaa mɔ yɛ nɛkɛ suɔmɔ nɛɛ mli. Yɛ enɛ kɛ gbeekpamɔ naa lɛ 1 Yohane 4:19 kɛɔ akɛ: “Wɔsumɔɔ lɛ, ejaakɛ lɛ tsutsu esumɔ wɔ.”

 6. Mɛni nɔ “kuu kome” lɛ mlibii Iɛ damɔɔ ni amɛbɛŋkɛɔ amɛhe, ni Nyɔŋmɔ mumɔ lɛ yibii lɛ damɔɔɔ mɛni nɔ?

⁶ No hewɔ lɛ, kɛji akɛ gbɔmɛi sɔrɔtoi ni feɔ “kuu kome” yɛ “kwɛlɔ kome” shishi lɛ jie suɔmɔ kpo amɛtsɔɔ amɛhe lɛ, egbalaa amɛ kɛkpɛtɛɔ amɛhe gbagbalii ni ehaa nibii sɔrɔtoi ni gbalaa amɛmli yɛ he ni “kuu kome” nɛɛ mlibii sɔrɔtoi lɛ jɛ lɛ hewɔ lɛ feɔ yaka. Amɛnyɛɔ amɛbɛŋkɛɔ amɛhe akɛni amɛwo “gbɔmɔ hee” lɛ hewɔ. Amɛ fɛɛ amɛyɛ “mumɔ kome” ni faa kpo kɛjɛɔ ŋwɛi Jɛɛhe kome, Nyɔŋmɔ kɛ mɛi fɛɛ a-Wala Halɔ lɛ mli. Emumɔ lɛ yibii ni haa tsui nyaa lɛ ji suɔmɔ ni jeee bɔlɛnamɔ loo pɛsɛmkunya akɔnɔ taomɔ nii ko nɔ edamɔ, shi moŋ edamɔ “gbɔmɔ hee” lɛ,ni esui damɔ Nyɔŋmɔ nɔ lɛ tsuiŋ hiɛsɔɔ lɛ nɔ. No pɛ tsuɔ nii akɛ “ekomefeemɔ kpaa ni yeɔ emuu,” ni baa ekomefeemɔ kɛ gbeekpamɔ yi.

Ekome Ni Afeɔ Kɛhaa Nitsumɔ Krɛdɛɛ Ko

 7. Mɛni he hiaa yɛ Yehowa Odasefoi agbɛfaŋ kɛjɛ 1914 kɛbaa nɛɛ, ni enɛ he miihia yɛ mɛɛ nitsumɔ hewɔ?

⁷ Yɛ “nibii agbɛjianɔtoo nɛɛ naagbee” kɛjɛ 1914 ni ekpe sɛɛ tsɔ nɛɛ mli lɛ, ehe miihia ni Yehowa Odasefoi ni amɛjeee nibii agbɛjianɔtoo nɛɛ fa lɛ afee nii yɛ ekomefeemɔ mli. Eji sɔ ni ka amɛnɔ akɛ amɛye nii ni he hiaa fe fɛɛ yɛ adesa yinɔsane be ni eba lɛ mli lɛ he odase yɛ jeŋ fɛɛ. (Mateo 24:​14; Marko 13:10) Esa akɛ shihilɛ lɛ atamɔ nitsumɔ ko ni ekaaa ni bɔfo Paulo tsi ta akɛ akadi no jogbaŋŋ yɛ egbii lɛ amli lɛ. Yɛ be mli ni egbalaa jwɛŋmɔ kɛbaa enɛ nɔ yɛ Kolosebii 1:23 lɛ, ekɛɛ akɛ: “Sanekpakpa lɛ ni nyɛnu ni ashiɛɔ atsɔɔ bɔɔ nii fɛɛ ni yɔɔ ŋwɛi shishi lɛ, ni mi Paulo misɔmɔɔ yɛ he lɛ nɔhiɛkamɔ lɛ.” Ni agbɛnɛ, nyɛ mɛi fɛɛ ni nyɛjie sanekpakpa lɛ he sɔɔlɔi ŋmɛnɛ, te shihilɛ ni kɔɔ sanekpakpa lɛ he shiɛmɔ yɛ bɔɔ nii fɛɛ ateŋ ni asaa ato aha wɔ diɛŋtsɛ wɔbe ni he hiaa nɛɛ yɔɔ tɛŋŋ?

 8. Wɔmiina ni aatsu mɛɛ ninaa ni Yohane na yɛ Kpojiemɔ 14:​6-12 he nii ŋmɛnɛ?

⁸ Wɔ ni wɔyɔɔ ŋmɛnɛ lɛ miina ninaa ni akɛha bɔfo Yohane ni etsɔɔ mli yɛ Kpojiemɔ 14:​6-12 yɛ nɛkɛ wiemɔi nɛɛ amli lɛ mlibaa ŋmɛnɛ: “Ni mina bɔfo kroko miifiliki yɛ ŋwɛi teŋ, ni ehiɛ naanɔ sanekpakpa ni eyaajaje etsɔɔ mɛi ni yɔɔ shikpɔŋ lɛ nɔ kɛ jeŋmaŋ fɛɛ jeŋmaŋ kɛ akutso fɛɛ akutso kɛ maji anɔ wiemɔi fɛɛ kɛ maŋ fɛɛ maŋ, ni ekɛ gbee wulu kɛɛ: Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ. Ni bɔfo kroko ni ji enyɔ nyiɛ sɛɛ kɛɛ: Ejwa, Babilon maŋ Iɛ ejwa, ejaakɛ eha jeŋmaji fɛɛ enu ejwamaŋbɔɔ lɛ he mlifu daa lɛ eko. Ni bɔfo kroko ni ji etɛ nyiɛ amɛsɛɛ, ni ekɛ gbee wulu kɛɛ: Kɛ mɔ ko ja kooloo lɛ kɛ emaga lɛ, ni ehe ekadi lɛ yɛ ehiɛŋtso nɔ loo enine nɔ lɛ: lɛ hu eeenu Nyɔŋmɔ mlifu daa ni afutu lɛ krɔŋŋ awo emlifu kpulu lɛ mli lɛ eko, ni aaapiŋ lɛ yɛ la kɛ swɔɔ mli yɛ bɔfoi krɔŋkrɔŋi lɛ ahiɛ kɛ toobi lɛ hiɛ. Ni amɛpiŋmɔ lɛ lasu lɛ teɔ shi kɛyaa naanɔi anaanɔ; ni mɛi ni jaa kooloo lɛ kɛ emaga lɛ, kɛ mɔ fɛɛ mɔ ni ehé egbɛi okadi lɛ, naaa hejɔɔmɔ nyɔɔŋ kɛ shwane. Biɛ krɔŋkrɔŋbii lɛ ni yeɔ Nyɔŋmɔ kitai lɛ kɛ Yesu nɔ hemɔkɛyeli lɛ nɔ lɛ atsuishiŋmɛɛ lɛ yɔɔ.”

 9. Mɛɛ be mli Yehowa Odasefoi na nii ni esa akɛ amɛtsu yɛ bɔfo Yohane ninaa lɛ mli lɛ, ni mɛni hewɔ ni agbɛnɛ amɛye amɛhe kwraa ni amɛkɛaajaje sanekpakpa lɛ yɛ he fɛɛ he lɛ?

⁹ Ani shwɛɛnii lɛ ni afɔ amɛ mu ni bɔfo Yohane fee amɛhe mfoniri lɛ ena ŋmɛnɛŋmɛnɛ beaŋ nɔ ni damɔ shi kɛha nakai ŋwɛibɔfo ni miifiliki yɛ ŋwɛi teŋ kɛ “naanɔ sanekpakpa” ni esa akɛ ajaje atsɔɔ shikpɔŋ lɛ nɔ bii fɛɛ, hɛɛ, yɛ jeŋmaŋ fɛɛ jeŋmaŋ, akutso fɛɛ akutso, maji anɔ wiemɔi kɛ gbɔmɛi ni hiɛ hewolo nɔ sui sɔrɔtoi fɛɛ lɛ? Hɛɛ, kɛjɛ nakai ta lɛ sɛɛ afi ni ji 1919 lɛ latsaa be mli kɛyaa. Nakai be mli aje shishi atsu gbalɛ ni ji famɔ ni Yesu kɛha yɛ Mateo 24:14 lɛ he nii. Ani nakai shwɛɛnii lɛ ni je mli lɛ yɛ “naanɔ sanekpakpa” ni amɛbaajaje amɛtsɔɔ bɔɔ nii fɛɛ ni yɔɔ ŋwɛi shishi lɛ? Hɛɛ, eko yɛ lɛlɛŋ! Miishɛɛ sane ni kɔɔ Nyɔŋmɔ Maŋtsɛyeli kɛtsɔ Kristo nɔ ni ato ama shi yɛ ŋwɛi lɛ yɛ ni abaajaje akɛ enɛ ba mli yɛ Jeŋmaji Abe lɛ naagbee yɛ 1914. Ni, oh, mɛɛ miishɛɛ sane enɛ ji kɛha mumɔŋ Israel shwɛɛnii lɛ, akɛ aaatsɔ ta lɛ sɛɛ nibii ni ba lɛ nɔ abɔ amɛ amaniɛ akɛ mɔ ni wa amɛyi titri, ni ji, Babilon Kpeteŋkpele lɛ egbee shi, ni ebɛ Yehowa Odasefoi anɔ hewalɛ ko dɔŋŋ! Amɛye amɛhe agbɛnɛ koni amɛjaje nɛkɛ sanekpakpa nɛɛ amɛtsɔɔ gbɔmɛi fɛɛ ni yɔɔ jamɔ nyɔŋyeli mli, ni amɛkɛɛ amɛ ni amɛje kpo kɛjɛ Babilon Kpeteŋkpele lɛ mli ni amɛye amɛbua amɛ ni amɛfee nakai​—Kpojiemɔ 18:⁠4.

10. Mɛi ni amɛje kpo kɛjɛ Babilon Kpeteŋkpele lɛ mli lɛ kɛ amɛhe eyabɔ namɛi ahe, ni amɛba mɛɛ ekomefeemɔ kpaa mli?

¹⁰ “Asafo babaoo” ko ni sumɔɔ heyeli ehere “naanɔ sanekpakpa” lɛ nɔ ni amɛtsu tsɛmɔ ni eba yɛ ebe naa pɛpɛɛpɛ akɛ amɛje kpo kɛjɛ jeŋ fɛɛ Babilon apasa jamɔ maŋtsɛyeli lɛ mli lɛ he nii momo. Amɛfa yuu amɛbabua amɛhe naa yɛ mumɔŋ Israel shwɛɛnii ni aha amɛye amɛhe lɛ masɛi. No hewɔ lɛ amɛkɛ amɛhe ebɔ Yehowa gbɛjianɔtoo ni anaa lɛ he ni amɛ diɛŋtsɛ lɛ amɛbatsɔmɔ Yehowa Odasefoi. Amɛbabote nakai “ekomefeemɔ kpaa ni yeɔ emuu,” lɛ ni ji Nyɔŋmɔ mumɔ lɛ yibii ni ji suɔmɔ lɛ mli​—Kolosebii 3:​14; Galatabii 5:​22, NW.

11. Namɛi ahe suɔmɔ Kristendom jieɔ lɛ kpo lɛ, ni mɛɛ be mli Yehowa Odasefoi kɛ mlifilimɔ baawó wiemɔi ni yɔɔ Kpojiemɔ 19:​1, 2 lɛ nɔ?

¹¹ Babilon Kpeteŋkpele lɛ fa ni ale lɛ titri ji nɔ ni akɛɛ atsɛɔ lɛ Kristendom lɛ. Yɛ egbɛi lɛ fɛɛ sɛɛ lɛ etsuuu anɔkwale Kristojamɔ he nii, ni “ekomefeemɔ kpaa ni yeɔ emuu” lɛ fimɔɔɔ emlibii akpekpei ohai abɔ lɛ, taakɛ ejamɔ gbɛjianɔtoo ohai abɔ ni mli egbala lɛ yeɔ enɛ he odase lɛ. Suɔmɔ ni Kristendom ewo loo ekɛha ehe lɛ ji suɔmɔ ni eyɔɔ kɛha Babilon Kpeteŋkpele lɛ hemɛi lɛ, maŋkwramɔŋ kɛ mɛi ni hiɛ gbɛhei kpakpai yɛ je nɛŋ, ni ekɛ amɛ ebɔ jamɔŋ ajwamaŋ lɛ. Miishɛɛ kpeteŋkpele ji nɔ ni baaba, yɛ be mli ni jeee eshigbeemɔ kɛkɛ, shi moŋ Babilon Kpeteŋkpele lɛ ni Kristendom fata he lɛ hiɛkpatamɔ kwraa ni baaba yɛ Nyɔŋmɔ be ni sa ni ekɛ lɛ aaataa saji anaa lɛ mli lɛ. Kɛkɛ lɛ edasefoi lɛ kɛ mlifilimɔ baawo wiemɔi ni yɔɔ Kpojiemɔ 19:​1, 2 lɛ nɔ: “Haleluya! yiwalaheremɔ kɛ anunyam kɛ agbojee kɛ hewalɛ lɛ ji Nuŋtsɔ [Yehowa] wɔ-Nyɔŋmɔ lɛ nɔ! Ejaakɛ anɔkwa kɛ jalɛ ji ekojomɔi lɛ, akɛni ekojo ajwamaŋ kpeteŋkpele lɛ ni kɛ ejwamaŋbɔɔ lɛ efite shikpɔŋ lɛ, ni etɔ etsuji lɛ alá lɛ he owele yɛ enɔ lɛ.” Ehiɛkpatamɔ ni baaba tamɔ nɔ ni akɛ la baafee lɛ baaya nɔ kɛya “naanɔi anaanɔ.”​—Kpojiemɔ 19:⁠3.

12. Kɛyashi be mli ni Babilon kpeteŋkpele lɛ hiɛkpatamɔ aaaba lɛ, shihilɛ lɛ biɔ ni Yehowa Odasefoi ajie mɛɛ su kpo, ni te esa akɛ amɛfee tɛŋŋ ni amɛkɛte shi amɛwo mɛi ni nyɛɛɔ la lɛ?

¹² Dani enɛ aaaba, yɛ be mli ni Yehowa eŋmɛ Babilon Kpeteŋkpele lɛ gbɛ ni ehi shi nɛɛ, enɛ nyɛ̃ɔ mɛi ni “yeɔ Nyɔŋmɔ kitai lɛ kɛ Yesu nɔ hemɔkɛyeli lɛ nɔ lɛ” anɔ ni amɛna “tsuishiŋmɛɛ” yɛ shikpɔŋ nɔ. (Kpojiemɔ 14:12) Amɛyɛ nɔ ni amɛbaadamɔ nɔ ni amɛkɛ Yesu wiemɔi ni yɔɔ egbalɛ ni kɔɔ “nibii agbɛjianɔtoo nɛɛ naagbee” lɛ he yɛ Mateo 24:13 lɛ ato amɛhe, akɛ: “Shi mɔ ni hiɛɔ mli kɛyawulaa shi lɛ, lɛ aaahere eyiwala.” Wiemɔi nɛɛ ji nɔ ni nyiɛ Yesu wiemɔ ni tsɔ hiɛ lɛ sɛɛ nɔŋŋ akɛ: “Ni nɔ ni mlakwamɔ baafa hewɔ lɛ, mɛi pii asuɔmɔ lɛ he aaajɔ.” (Mateo 24:12) Suɔmɔ baaha Yehowa Odasefoi aya nɔ ato amɛtsui shi kɛyashi naagbee yɛ nibii agbɛjianɔtoo momo nɛɛ mli. Bei abɔ ni amɛjieɔ suɔmɔ babaoo kpo amɛtsɔɔ amɛhe kɛ mɛi ni taoɔ akɛ amɛkɛ Yehowa Nyɔŋmɔ aba wekukpaa mli lɛ, babaoo nakai “ekomefeemɔ kpaa ni yeɔ emuu” lɛ mli waa. No hewɔ lɛ nyɛ Yehowa odasefoi, nyɛyaa nɔ kɛ Maŋtsɛyeli lɛ he odaseyeli lɛ yɛ jeŋ fɛɛ yɛ shikpɔji 205 ni nyɛtsuɔ nii yɛ nɔ lɛ mli, kɛ shikpɔji krokomɛi hu ni nyɛbaakpã mli kɛyashɛ jɛmɛ lɛ anɔ! Be ni akɛaafee ekome ni akɛ henyɛlɔ lɛ akpe nɛ. Esa akɛ wɔtsimɔ wɔhe fɔji fɛɛ ni wɔkɛ ekomefeemɔ awuu wɔshi je nɛŋ duŋ kpii Iɛ mli hewalɛi lɛ.

13. Mɛɛ dɛŋdade loo gbɛjianɔtoo ni Nyɔŋmɔ kɛtsu nii esa akɛ wɔya nɔ wɔfi sɛɛ yɛ anɔkwayeli mli?

¹³ Aaafee afii oha nɛ ni Buu Mɔɔ kɛ Wolo Bibioo Asafo ni yɔɔ Pennsylvania, U.S.A. lɛ efee ekomefeemɔ gbɛjianɔtoo ni Yehowa kɛtsu nii yɛ edasefoi lɛ ahe. Efee dɛŋdade kpele ni “tsulɔ anɔkwafo kɛ nilelɔ” kuu lɛ kɛtsu nii koni amɛkɛ mumɔŋ “niyenii yɛ be ni sa mli” aha Yehowa Odasefoi (Mateo 24:​45-47) Yehowa jɔɔmɔ eje kpo yɛ nɔ kɛ enitsumɔhe niji agbɛjianɔtoo 95 ni yɔɔ shikpɔŋ lɛ nɔ fɛɛ lɛ anɔ. Bei abɔ ni Yehowa Nyɔŋmɔ sumɔɔ akɛ ekɛaatsu nii nɛɛ wɔbaaya nɔ ni wɔfi esɛɛ ni wɔkɛ lɛ afee ekome yɛ anɔkwayeli mli. Kwɛ nyɔmɔ babaoo ni wɔhiɛ nakai dɛŋdade lɛ!

Nyɛtsɔa Suɔmɔ Nɔ Nyɛhia Shi Yɛ Ekomefeemɔ Mli

14. Mɛɛ hehaa nɔ esa akɛ wɔya nɔ wɔwo loo wɔkɛha wɔhe, no hewɔ lɛ mɛɛ su esa akɛ Yehowa webii atsɔ nɔ ni amɛkɛtsɔɔ akɛ amɛji edasefoi?

¹⁴ Satan Abonsam kɛ eje ni nyɛɛɔ wɔ lɛ baabɔ mɔdɛŋ ni amɛgbala wɔ mli, shi suɔmɔ ni ji Nyɔŋmɔ mumɔ lɛ yibii lɛ ateŋ nɔ titri lɛ baaya nɔ ni ejie emuu ni eyeɔ lɛ kpo akɛ “ekomefeemɔ kpaa.” Kɛ wɔwo “gbɔmɔ hee” lɛ belɛ no tsɔɔ akɛ wɔkɛ suɔmɔ miiha wɔhe, taakɛ bɔfo Paulo kɛɛ wɔ akɛ wɔfee lɛ, esa akɛ wɔwo enɛ yɛ be fɛɛ mli akɛ wɔgbɔmɔtso su kɛ baŋ ni hiɛ Nyɔŋmɔ subaŋ lɛ fa. Yɛ be mli ni ekɛ enaagbee famɔi haa ekaselɔi lɛ, Nyɔŋmɔ Bi lɛ kɛɛ akɛ: “Kita hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔɔ nyɛ lɛ, nakai nyɛhu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:​34, 35) Kwɛ bɔ ni nakai wiemɔi ni jɛ Nyɔŋmɔ Bi lɛ ŋɔɔ lɛ sa jogbaŋŋ ha, ejaakɛ eŋwɛi Tsɛ, Yehowa, ji suɔmɔ ni ejie ehe kpo yɛ gbɔmɔtso mli, ni esa akɛ wɔha adesai fɛɛ ale akɛ wɔji E-dasefoi lɛlɛŋ, kɛtsɔ E-mumɔ lɛ yibii ni ji suɔmɔ ni wɔɔná nɔ!

15. Yɛ be mli ni amɛjieɔ amɛsuɔmɔ kɛha Nyɔŋmɔ kpo lɛ, namɛi hu esa akɛ Yehowa Odasefoi asumɔ amɛ?

¹⁵ Bɔni afee ni suɔmɔ ni wɔyɔɔ kɛha Yehowa lɛ afee nɔ ni kɛ ehe kpaa gbee lɛ, esa akɛ wɔsumɔ wɔnanemɛi odasefoi. Nɔ ni maa enɛ nɔ mi lɛ, 1 Yohane 4:​20, 21 kaiɔ wɔ akɛ: “Kɛji mɔ ko kɛɛ akɛ: Miisumɔ Nyɔŋmɔ, ni enyɛɛɔ lɛ diɛŋtsɛ enyɛmi lɛ, amalelɔ ji lɛ. Ejaakɛ mɔ ni sumɔɔɔ lɛ diɛŋtsɛ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni eeenyɛ lɛ esumɔ hu? Ni nɛkɛ kita nɛɛ wɔna kɛjɛ eŋɔɔ, koni mɔ ni sumɔɔ Nyɔŋmɔ lɛ asumɔ lɛ diɛŋtsɛ enyɛmi hu.”

16. Mɛni hewɔ Yehowa Odasefoi nyɛŋ akpa suɔmɔ ni amɛaaya nɔ amɛsumɔ amɛhe lɛ, ni mɛni hewɔ anyɛŋ atsumɔ suɔmɔ kɛjɛ shikpɔŋ lɛ nɔ kɔkɔɔkɔ lɛ?

¹⁶ Nɔ ni feɔ nakai shishitoo mla lɛ he nɔkwɛmɔ nɔ lɛ, kɛ Yehowa Odasefoi ni yɔɔ ŋmɛnɛ lɛ ji mɛi ni akɛ mumɔ efɔ amɛ ni amɛkɛ Maŋtsɛ Yesu Kristo baaye nɔ yɛ ŋwɛi aloo amɛji “asafo babaoo” ni jɛ “tooi krokomɛi” lɛ ateŋ ni amɛhiɛnɔkamɔ ji shikpɔŋ nɔ Paradeiso nɔ̃ jio, amɛkɛ anɔkwayeli sumɔɔ amɛ diɛŋtsɛ amɛhe. Te wɔɔfee tɛŋŋ wɔtse wɔhe kɛjɛ suɔmɔ ni wɔɔsumɔ mɛi ni sumɔɔ Yehowa Nyɔŋmɔ kɛ esuɔmɔ Bi Yesu Kristo lɛ ahe hu? Wɔsumɔɔ amɛ ni kɛtsɔ enɛ nɔ lɛ nakai “ekomefeemɔ kpaa ni yeɔ emuu” lɛ fimɔɔ wɔ efeɔ wɔ ekome. Yɛ nɔ fɛɛ nɔ ni Satan Abonsam kɛ eyiwalɛ je lɛ aaabɔ mɔdɛŋ ni amɛfee ni amɛkɛfite nɛkɛ Yehowa mumɔ lɛ yibii nɛɛ lɛ, amɛnyɛŋ amɛtsumɔ suɔmɔ kɛjɛ shikpɔŋ lɛ nɔ kɔkɔɔkɔ. Mɛi ni woɔ suɔmɔ nɛɛ aloo amɛkɛhaa amɛhe kɛyashiɔ Abonsam yiwalɛ nibii agbɛjianɔtoo nɛɛ hiɛkpatamɔ lɛ mli lɛ baafee mɛi ni amɛ-Nyɔŋmɔ anɔkwafo Iɛ baabaa amɛyi kɛtsɔ “amanehulu kpeteŋkpele” ni shikpɔŋ nɛɛ enako eko ni tamɔ nakai da lɛ mli. (Mateo 24:​21; Galatabii 5:22) Yɛ nɛkɛ gbɛ nɔ lɛ, mɛi ni sumɔɔ Nyɔŋmɔ kɛ eweku lɛ, egbɛjianɔtoo Iɛ pɛ baaje mli ni amɛyabote shikpɔŋ ni atsumɔ nɔ fɛfɛo ni abaatsake lɛ afee lɛ anunyam Paradeiso lɛ mli. Atsumɔŋ nakai Paradeiso lɛ kɛjɛŋ shikpɔŋ nɔ kɔkɔɔbɔ, shi moŋ suɔmɔ ni ejie ehe kpo yɛ adesai amli lɛ baahi mli ni amɛsaa nɔ fɛfɛo. Suɔmɔ baaye kunim kɛya naanɔ koni ekɛwo suɔmɔ Jɛɛhe ni yɔɔ krɔŋkrɔŋ, Yehowa Nyɔŋmɔ, hiɛ nyam.a

[Shishigbɛ niŋmai]

Ani Okadi Enɛ?

□ Mɛni hewɔ klɛŋklɛŋ afii oha lɛ mli Kristofoi lɛ nyɛ amɛhi shi yɛ ekomefeemɔ mli yɛ hei sɔrɔtoi ni amɛjɛ lɛ fɛɛ sɛɛ?

□ Te suɔmɔ naa kui enyɔ ni feɔ “kuu kome” ni ji Kristofoi lɛ anɔ hewalɛ ŋmɛnɛ ehaa tɛŋŋ?

□ Mɛɛ gbɛ nɔ atsɔɔ atsuɔ Kpojiemɔ 14:​6-12 he nii ŋmɛnɛ?

□ Mɛɛ dɛŋdade Nyɔŋmɔ kɛtsu nii ni ekɛye ebua ewebii?

□ Yɛ nɔ ni Kolosebii 3:14 lɛ tsɔɔ hewɔ lɛ, mɛni ji nɔ ni esa akɛ otswa ofai shi akɛ obaafee?

[Mfoniri ni yɔɔ baafa 18]

Yɛ ŋwɛibɔfoi agbɛtsɔɔmɔ shishi lɛ . . .

[Mfoniri ni yɔɔ baafa 19]

. . . Yehowa Odasefoi ni yɔɔ ŋmɛnɛ Iɛ hiɛ “naanɔ sanekpakpa ni amɛaajaje”