Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli

DECEMBER 2-8

NYƆŊMƆ WIEMƆ LƐ MLI JWETRII | KPOJIEMƆ 7-9

“Yehowa Jɔɔ Asafoku Babaoo Ko Ni Aleee Amɛyibɔ”

it-1 997 kk. 1

Asafoku Babaoo

Enɛ teɔ sanebimɔ nɛɛ shi akɛ: Kɛ́ “asafoku babaoo” lɛ ji mɛi ni abaahere amɛyiwala ni baahi shikpɔŋ lɛ nɔ lɛ, belɛ mɛni hewɔ mɔ ni akɛɛ ‘amɛdamɔ Nyɔŋmɔ maŋtsɛ sɛi lɛ hiɛ kɛ Gwantɛŋbi lɛ hiɛ’ lɛ? (Kpo 7:9) Yɛ Biblia lɛ mli lɛ, bei komɛi lɛ, kɛ́ mɔ ko hiɛ ba nyam yɛ mɔ ko loo kuu ko hiɛ lɛ, akɛɔ akɛ mɔ lɛ ‘damɔ’ mɔ ni ehiɛ eba nyam yɛ ehiɛ loo kuu ni ehiɛ eba nyam yɛ amɛhiɛ lɛ hiɛ. (La 1:5 kɛ shn.; 5:5; Abɛ 22:29; Luk 1:19) Anɔkwa, yɛ Kpojiemɔ yitso 6 lɛ mli lɛ, abɔ amaniɛ akɛ, “shikpɔŋ lɛ nɔ maŋtsɛmɛi lɛ kɛ abladei lɛ kɛ tatsɛmɛi lɛ kɛ niiatsɛmɛi lɛ kɛ hewalɔi lɛ kɛ nyɔŋ fɛɛ nyɔŋ kɛ mɛi fɛɛ ni jeee nyɔji” lɛ bɔ mɔdɛŋ akɛ amɛbaateetee amɛhe kɛje “mɔ ni ta maŋtsɛ sɛi lɛ nɔ lɛ hiɛ, kɛ Gwantɛŋbi lɛ mlifu lɛ naa, ejaakɛ amɛmlifu gbi wulu lɛ eshɛ, ni namɔ baanyɛ naa adamɔ?” (Kpo 6:15-17; okɛto Luk 21:36 lɛ he.) No hewɔ lɛ, etamɔ nɔ ni mɛi fɛɛ ni abaabaa amɛyi yɛ nakai mlifu be lɛ mli, ni amɛbaanyɛ ‘amɛdamɔ’ Nyɔŋmɔ kɛ Gwantɛŋbi lɛ “hiɛ” akɛni amɛhiɛ eba nyam yɛ amɛhiɛ lɛ hewɔ lɛ ji mɛi ni feɔ “asafoku babaoo” lɛ.

it-2 1127 kk. 4

Amanehulu

Aaafee afii 30 yɛ Yerusalem hiɛkpatamɔ lɛ sɛɛ lɛ, akɛɛ bɔfo Yohane nɔ ko yɛ asafoku babaoo ni jɛ jeŋmaŋ fɛɛ jeŋmaŋ, kɛ weku fɛɛ weku, kɛ gbɔmɛi srɔtoi fɛɛ amli lɛ ahe akɛ: “Mɛnɛɛmɛi ji mɛi ni je amanehulu kpeteŋkpele lɛ mli lɛ.” (Kpo 7:13, 14) Akɛni asafoku babaoo lɛ “je amanehulu kpeteŋkpele lɛ mli” hewɔ lɛ, no tsɔɔ akɛ abaa amɛyi. Wiemɔ ko ni tamɔ nakai nɔŋŋ ni akɛtsu nii yɛ Bɔfoi 7:9, 10 lɛ maa enɛ nɔ mi, jɛmɛ kɛɛ: “Nyɔŋmɔ kɛ [Yosef] yɛ, ni ejie lɛ kɛjɛ emanehului lɛ fɛɛ amli.” Jiemɔ ni Nyɔŋmɔ jie Yosef kɛjɛ emanehului lɛ fɛɛ amli lɛ tsɔɔ akɛ, ewaje lɛ ni enyɛ edamɔ naa, ni agbɛnɛ hu, ebaa eyi yɛ haomɔi ni ekɛkpe lɛ fɛɛ amli.

it-1 996-997

Asafoku Babaoo

Mɛi Ni Amɛji. Bɔ ni awie “asafoku babaoo” lɛ he yɛ Kpojiemɔ yitso 7 lɛ mli kɛ ŋmalɛi krokomɛi ni kɔɔ amɛhe lɛ amli lɛ yeɔ ebuaa wɔ ni wɔnaa mɛi ni amɛji. Awie yɛ Kpojiemɔ 7:15-17 lɛ akɛ, Nyɔŋmɔ ‘baalɛɛ emama tsũ lɛ mli kɛha amɛnɔ,’ ni abaatsɔɔ amɛ gbɛ kɛya “wala nuhiŋmɛii ahe,” ni Nyɔŋmɔ baatsumɔ “amɛhiŋmɛiiaŋ yaafonui fɛɛ.” Awie wiemɔi ni tamɔ nakai nɔŋŋ yɛ Kpojiemɔ 21:2-4 lɛ akɛ: “Nyɔŋmɔ mama tsũ lɛ yɛ gbɔmɛi ateŋ,” ni “ebaatsumɔ amɛhiŋmɛiiaŋ yaafonui fɛɛ,” ni “gbele bɛ dɔŋŋ.” Ninaa nɛɛ kɔɔɔ mɛi ni yɔɔ ŋwɛi, he ni ‘Yerusalem Hee lɛ baajɛ akpeleke shi’ kɛba lɛ ahe, shi moŋ, ekɔɔ mɛi ni yɔɔ shikpɔŋ lɛ nɔ lɛ ahe, yɛ gbɔmɛi ateŋ.

Pɛimɔ Ŋmalɛi Lɛ Amli Jogbaŋŋ

it-1 12

Abadon

Namɔ ji Abadon, bu kwɔŋkwɔŋ lɛ bɔfo lɛ?

Akɛ wiemɔ ni ji “Abadon” lɛ tsu nii yɛ Kpojiemɔ 9:11 lɛ akɛ, “bu kwɔŋkwɔŋ lɛ bɔfo lɛ” gbɛ́i. Atsɛɔ lɛ yɛ Greek mli akɛ Apolion, ni eshishi ji “Hiɛkpatalɔ.” Aaafee afii 200 ni eho nɛ lɛ, mɛi komɛi tsɔɔ gbalɛ nɛɛ shishi akɛ ekɔɔ aŋkroaŋkroi tamɔ Nɔyelɔ Vespasian, Muhammad, kɛ Napoleon po he, ni amɛtsɔɔ akɛ bɔfo nɛɛ ji Satan bɔfo. Shi esa akɛ wɔkadi akɛ, awie bɔfo ni hiɛ “bu kwɔŋkwɔŋ lɛ naa samfee lɛ” he yɛ Kpojiemɔ 20:1-3 lɛ akɛ eji Nyɔŋmɔ najiaŋdamɔlɔ ni jɛ ŋwɛi, ni ejeee Satan bɔfo, moŋ lɛ, akɛɛ efi Satan ni eshɛ lɛ efɔ̃ bu kwɔŋkwɔŋ lɛ mli. Awie Kpojiemɔ 9:11 lɛ he yɛ The Interpreter’s Bible lɛ mli akɛ: “Abadon jeee Satan bɔfo, shi moŋ Nyɔŋmɔ bɔfo, ni etsuɔ enitsumɔ akɛ hiɛkpatalɔ lɛ yɛ Nyɔŋmɔ gbɛtsɔɔmɔ naa.”

Yɛ Hebri ŋmalɛi ni asusu he lɛ amli lɛ, eyɛ faŋŋ akɛ, ʼavad·dohnʹ kɔɔ Sheol (Gbonyobu lɛ) kɛ gbele hu he. Kristo Yesu wie yɛ Kpojiemɔ 1:18 lɛ akɛ: “Mihiɛ kã kɛmiiya naanɔi anaanɔ, ni mihiɛ gbele kɛ Gbonyobu lɛ naa samfei lɛ.” Luka 8:31 lɛ hãa wɔnaa akɛ, eyɛ bu kwɔŋkwɔŋ lɛ nɔ hewalɛ. Hebribii 2:14 lɛ hu kɛɔ akɛ Yesu ŋɔ heloo kɛ lá, bɔ ni afee ni “etsɔ egbele lɛ nɔ ekpãtã mɔ ni baanyɛ agbe mɔ, ni ji Abonsam lɛ hiɛ,” ni enɛ hãa wɔnaa akɛ eyɛ hewalɛ ni ebaanyɛ ekɛkpãtã nii ahiɛ, ni Satan hu fata he. Awie ehe faŋŋ yɛ Kpojiemɔ 19:11-16 lɛ akɛ, Hiɛkpatalɔ ni Nyɔŋmɔ ehala.

DECEMBER 9-15

NYƆŊMƆ WIEMƆ LƐ MLI JWETRII | KPOJIEMƆ 10-12

“Agbe ‘Odasefoi Enyɔ’ Komɛi, Ni Ahã Amɛba Wala Mli Ekoŋŋ”

w14 11/15 30

Sanebimɔi Ni Jɛ Kanelɔi Adɛŋ

Namɛi ji odasefoi enyɔ lɛ ni atsĩ amɛtã yɛ Kpojiemɔ yitso 11 lɛ mli lɛ?

Kpojiemɔ 11:3 lɛ wie odasefoi enyɔ komɛi ni gba gbii 1,260 lɛ ahe. Atsɔɔ mli akɛ, no sɛɛ lɛ, kooloo awuiyelɔ lɛ ‘baaye amɛnɔ kunim ni ebaagbe amɛ.’ Shi “gbii etɛ kɛ fã” sɛɛ lɛ, abaahã odasefoi enyɔ nɛɛ aba wala mli ekoŋŋ, ni mɛi fɛɛ ni baana amɛ lɛ anaa baakpɛ amɛhe waa.​—Kpo. 11:7, 11.

Namɛi ji odasefoi enyɔ nɛɛ? Saji ni awie yɛ amɛhe lɛ waa wɔ ni wɔnaa mɛi ni amɛji. Klɛŋklɛŋ lɛ, akɛɛ amɛji mɛi ni “oliv tsei enyɔ lɛ kɛ kanetsei enyɔ lɛ feɔ amɛhe okadi lɛ.” (Kpo. 11:4) Enɛ kaiɔ wɔ kanetso lɛ kɛ oliv tsei enyɔ lɛ ni awie he yɛ Zakaria gbalɛ lɛ mli lɛ. Akɛɛ nakai oliv tsei enyɔ lɛ damɔ shi kɛhã “mɛi enyɔ ni afɔ amɛ mu,” ni ji, Amralo Zerubabel kɛ Osɔfonukpa Yoshua, “ni damɔ shikpɔŋ muu lɛ fɛɛ Nuŋtsɔ lɛ masɛi lɛ.” (Zak. 4:1-3, 14) Nɔ ni ji enyɔ lɛ, akɛɛ odasefoi enyɔ lɛ fee okadii ni tamɔ nɔ ni Mose kɛ Elia fee lɛ.​—Okɛ Kpojiemɔ 11:5, 6 lɛ ato 4 Mose 16:1-7, 28-35 kɛ 1 Maŋtsɛmɛi 17:1; 18:41-45 lɛ he.

Mɛni ji sane oti ko ni wɔnaa yɛ ŋmalɛi nɛɛ fɛɛ amli? Eko fɛɛ eko kɔɔ Nyɔŋmɔ tsuji ni afɔ amɛ mu, ní nyiɛ ewebii lɛ ahiɛ yɛ kaa be ko ni jaraa mli lɛ ahe. No hewɔ lɛ, Kpojiemɔ yitso 11 lɛ ba mli be ni nyɛmimɛi hii ni afɔ amɛ mu ni nyiɛɔ Nyɔŋmɔ webii lɛ ahiɛ be ni ato Nyɔŋmɔ Maŋtsɛyeli lɛ shishi yɛ ŋwɛi, yɛ afi 1914 mli lɛ, ‘bu kpekpe’ kɛshiɛ afii etɛ kɛ fã lɛ.

Be ni mɛi ni afɔ amɛ mu nɛɛ ebu kpekpe kɛshiɛ amɛgbe naa lɛ, agbe amɛ yɛ mfonirifeemɔŋ be ni awo amɛ tsuŋ be kukuoo ko, ní gbii etɛ kɛ fã lɛ feɔ he mfoniri lɛ. Nyɔŋmɔ webii lɛ ahenyɛlɔi lɛ nu he akɛ agbe amɛnitsumɔ lɛ, ni no hã amɛmii shɛ amɛhe waa.​—Kpo. 11:8-10.

Shi taakɛ agba lɛ, gbii etɛ kɛ fã lɛ sɛɛ lɛ, ahã odasefoi enyɔ lɛ ba wala mli ekoŋŋ. Ajie mɛi ni afɔ amɛ mu nɛɛ kɛjɛ tsuŋwoo mli, ni agbɛnɛ hu, Nyɔŋmɔ tsɔ amɛ-Nuŋtsɔ Yesu Kristo nɔ ekɛ hegbɛ krɛdɛɛ ko wo amɛteŋ mɛi ni tee nɔ amɛye anɔkwa lɛ adɛŋ. Amɛfata mɛi ni ahala yɛ afi 1919 mli ni amɛsɔmɔ akɛ “nyɔŋ anɔkwafo kɛ hiɛshikalɔ,” koni amɛhã Nyɔŋmɔ webii lɛ amɛmumɔŋ hiamɔ nii yɛ naagbee gbii lɛ amli lɛ ahe.​—Mat. 24:45-47; Kpo. 11:11, 12.

Nɔ ko ni sa kadimɔ ji akɛ, Kpojiemɔ 11:1, 2 lɛ tsɔɔ akɛ, nibii nɛɛ baaya nɔ be ni abaasusu, loo abaakwɛ bɔ ni mfonirifeemɔŋ sɔlemɔ shĩa lɛ yɔɔ lɛ. Maleaki yitso 3 lɛ hu wie be ko ni abaabasara mfonirifeemɔŋ sɔlemɔ shĩa lɛ, ni no sɛɛ lɛ, atsuu he lɛ he. (Mal. 3:1-4) Be enyiɛ saramɔ kɛ hetsuumɔ nɛɛ he? Eje shishi kɛjɛ afi 1914 mli kɛyashi afi 1919 shishijee gbɛ. Gbii 1,260 (nyɔji 42) kɛ mfonirifeemɔŋ gbii etɛ kɛ fã lɛ ni awie he yɛ Kpojiemɔ yitso 11 lɛ fɛɛ kɔɔ be nɛɛ he.

Eŋɔɔ wɔnaa waa akɛ Yehowa to gbɛjianɔ koni atsuu mɛi krɛdɛi komɛi ahe yɛ mumɔŋ kɛhã nitsumɔi kpakpai! (Tito 2:14) Kɛfata he lɛ, wɔhiɛ sɔɔ nɔkwɛmɔnɔ ni anɔkwafoi ni afɔ amɛ mu ni nyiɛ Nyɔŋmɔ webii lɛ ahiɛ yɛ nakai kaa be lɛ mli lɛ fee kɛtsɔɔ akɛ, amɛmiisɔmɔ akɛ mfonirifeemɔŋ odasefoi enyɔ lɛ.

Pɛimɔ Ŋmalɛi Lɛ Amli Jogbaŋŋ

it-2 880-881

Wolokpo

Bɔ Ni Akɛtsuɔ Nii Ahãa Yɛ Mfonirifeemɔŋ. Akɛ wiemɔ ni ji “wolokpo” lɛ etsu nii shii abɔ yɛ mfonirifeemɔŋ, yɛ Biblia lɛ mli. Ezekiel kɛ Zakaria fɛɛ na wolokpo ko ni aŋma nii yɛ ehiɛ kɛ esɛɛ fɛɛ. Akɛni bei pii lɛ, aŋmaa nii yɛ wolokpo hiɛ pɛ hewɔ lɛ, nii ni aŋma yɛ wolokpoi nɛɛ ahiɛ kɛ amɛsɛɛ fɛɛ lɛ baanyɛ atsɔɔ akɛ, kojomɔi ni yɔɔ mli lɛ tsii, amɛfa, ni amɛyɛ hiɛdɔɔ. (Eze 2:9–3:3; Zak 5:1-4) Yɛ ninaa ni yɔɔ Kpojiemɔ wolo lɛ mli lɛ mli lɛ, mɔ ni ta maŋtsɛ sɛi lɛ nɔ lɛ hiɛ wolokpo ko ni niianaasɔomɔ nii kpawo yɛ he, yɛ eninejurɔ, bɔ ni afee ni akana nɔ ni yɔɔ mli lɛ kɛyashi Nyɔŋmɔ Gwantɛŋbi lɛ baatserɛ niianaasɔomɔ nii lɛ. (Kpo 5:1, 12; 6:1, 12-14) Sɛɛ mli lɛ, akɛ wolokpo ko hã Yohane diɛŋtsɛ yɛ ninaa lɛ mli, ni afã lɛ akɛ eye. Wolokpo lɛ ŋɔɔ Yohane naa, shi ejoo yɛ emusuŋ. Akɛni no mli lɛ agbele wolokpo lɛ naa ni asɔoko naa hewɔ lɛ, eji nɔ ko ni abaanyɛ anu shishi. Sane ni yɔɔ wolokpo lɛ mli ni Yohane baale lɛ ‘ŋɔɔ’ enaa, shi eeenyɛ efee akɛ, nibii ni joɔ yɛ mli kɛhã lɛ ni ebaagba, tamɔ afã lɛ akɛ efee lɛ. (Kpo 10:1-11) Ezekiel hu kɛ shihilɛ ni tamɔ nakai nɔŋŋ kpe be ni akɛ wolokpo ni “yaafo lalai kɛ awerɛhoyeli kɛ yaafo” yɔɔ mli lɛ hã lɛ lɛ.​—Eze 2:10.

it-2 187 kk. 7-9

Kɔ̃ɔmɔi

Yɛ ninaa ni ajie atsɔɔ bɔfo Yohane yɛ Kpojiemɔ wolo lɛ mli lɛ mli lɛ, ena ŋwɛi yoo ko ni eebolɔ “ni eekɔmɔ ni eepiŋ ni ebaafɔ.” Efɔ “binuu, hɛɛ nuu, mɔ ni kɛ dadetso baakpala jeŋmaji lɛ fɛɛ tamɔ tookwɛlɔ feɔ lɛ.” Mɔdɛŋ ni drako lɛ bɔ akɛ ebaami gbekɛ lɛ fɛɛ sɛɛ lɛ, “ashá ebi lɛ kɛtee Nyɔŋmɔ ŋɔɔ kɛ emaŋtsɛ sɛi lɛ masɛi.” (Kpo 12:1, 2, 4-6) Yɛ blema lɛ, kɛ́ afɔ gbekɛ ko lɛ, akɛ lɛ hãa etsɛ koni ekpɛlɛ nɔ akɛ ebi ni, no hewɔ lɛ, shá ni Nyɔŋmɔ shá gbekɛ nuu lɛ kɛtee eŋɔɔ lɛ tsɔɔ akɛ, ekpɛlɛɔ nɔ akɛ ebi ni. Enɛ tsɔɔ akɛ, Nyɔŋmɔ “ŋa” ji “yoo” lɛ, ni lɛ ji “Yerusalem ni yɔɔ ŋwɛi lɛ,” Kristo kɛ emumɔŋ nyɛmimɛi lɛ ‘anyɛ’ lɛ.​—Gal 4:26; Heb 2:11, 12, 17.

Ekã shi faŋŋ akɛ, Nyɔŋmɔ “yoo” ni yɔɔ ŋwɛi lɛ eye emuu, ni no hewɔ lɛ, epiŋŋ diɛŋtsɛ yɛ efɔmɔ lɛ mli. Belɛ, kɔ̃ɔmɔi kɛ piŋmɔi lɛ ji mfonirifeemɔŋ nɔ, ni etsɔɔ akɛ, “yoo” lɛ ena akɛ fɔmɔ eshɛ lagbaŋ; eena akɛ etsɛŋ kwraa ebaafɔ.​—Kpo 12:2.

Namɔ “binuu, hɛɛ nuu” nɛɛ baafee? Akɛɛ ekɛ “dadetso baakpala jeŋmaji lɛ fɛɛ tamɔ tookwɛlɔ feɔ lɛ.” Agba enɛ yɛ Nyɔŋmɔ Mesia Maŋtsɛ lɛ he yɛ Lala 2:6-9 lɛ. Shi Yohane na ninaa nɛɛ be ni afɔ Kristo yɛ shikpɔŋ lɛ nɔ, ni egbo ni atee lɛ shi lɛ sɛɛ kwraa. Enɛ hewɔ lɛ, etamɔ nɔ ni ninaa lɛ kɔɔ Mesia Maŋtsɛyeli ni yɔɔ Nyɔŋmɔ Bi Yesu Kristo dɛŋ lɛ fɔmɔ lɛ he, mɔ ni be ni atee lɛ shi kɛje gbohii ateŋ lɛ, “eyata Nyɔŋmɔ ninejurɔ nɔ, kɛjɛ no nɔ kɛbaa lɛ, eemɛ kɛyashi be ni akɛ ehenyɛlɔi lɛ baafee enajiashi sɛi.”​—Heb 10:12, 13; La 110:1; Kpo 12:10.

DECEMBER 23-29

NYƆŊMƆ WIEMƆ LƐ MLI JWETRII | KPOJIEMƆ 17-19

“Nyɔŋmɔ Ta Ni Ekɛbaafo Tai Fɛɛ Asɛɛ Lɛ”

it-1 1146 kk. 1

Okpɔŋɔ

Yɛ Yohane mfonirifeemɔŋ ninaa lɛ mli lɛ, ena Maŋtsɛ Yesu Kristo ni eta okpɔŋɔ yɛŋ nɔ, ní asraafoi ni amɛ hu amɛtara okpɔŋɔi yɛji anɔ fata ehe. Ahã Yohane na yɛ ninaa nɛɛ mli akɛ ta ni Kristo baawu eshi e-Nyɔŋmɔ kɛ e-Tsɛ Yehowa henyɛlɔi lɛ fɛɛ lɛ ji jalɛ kɛ jalɛsaneyeli he ta. (Kpo 19:11, 14) Mra mli yɛ Yohane ninaa lɛ mli lɛ, akɛ okpɔŋɔi srɔtoisrɔtoi kɛ amɛnɔtaralɔi fee nibii ni Kristo fee akɛ Maŋtsɛ kɛ haomɔi ni jɛ mli kɛba lɛ ahe mfoniri.​—Kpo 6:2-8.

DECEMBER 30–JANUARY 5

NYƆŊMƆ WIEMƆ LƐ MLI JWETRII | KPOJIEMƆ 20-22

Pɛimɔ Ŋmalɛi Lɛ Amli Jogbaŋŋ

it-2 249 kk. 2

Wala

Yɛ famɔ ni Nyɔŋmɔ kɛhã Adam lɛ mli lɛ, etsɔɔ yɛ gbɛ ko nɔ akɛ, kɛji Adam bo lɛ toi lɛ, egboŋ. (1Mo 2:17) No hewɔ lɛ, kɛ́ afo gbɔmɔ naagbee henyɛlɔ ni ji gbele lɛ sɛɛ lɛ, esha ko tsuŋ nii dɔŋŋ yɛ adesai ni boɔ Nyɔŋmɔ toi lɛ agbɔmɔtsei amli ni baahã amɛgboi. Amɛbaahi shi kɛya naanɔ ni amɛgbooo. (1Ko 15:26) Gbele sɛɛ ni abaafo nɛɛ baaba mli yɛ Kristo nɔyeli lɛ naagbee, ni Kpojiemɔ wolo lɛ tsɔɔ akɛ enɔyeli lɛ baahe afii 1,000. Awie yɛ mɛi ni baafata Kristo he kɛye nɔ akɛ maŋtsɛmɛi kɛ osɔfoi lɛ ahe akɛ, “amɛba wala mli ni amɛkɛ Kristo lɛ ye nɔ akɛ maŋtsɛmɛi afii 1,000.” “Gbohii ni eshwɛ lɛ” ni akɛɛ amɛbaaa wala mli “kɛyashi be ni afii 1,000 lɛ ba naagbee” lɛ, ji mɛi ni baahi wala mli be ni afii 1,000 lɛ baaba naagbee lɛ, ni no sɛɛ lɛ, abaajie Satan kɛje bu kwɔŋkwɔŋ lɛ mli ní ekɛ kaa krɛdɛɛ ko aba adesai anɔ. Be ni afii 1,000 lɛ baakɛɛ ebaa naagbee lɛ, adesai ni yɔɔ shikpɔŋ lɛ nɔ lɛ eye emuu, tamɔ Adam kɛ Hawa ji dani amɛfee esha lɛ. Nakai beiaŋ lɛ, amɛbaaná wala ni eye emuu diɛŋtsɛ. Be ni ajie Satan kɛje bu kwɔŋkwɔŋ lɛ mli be kukuoo, ní eka adesai lɛ sɛɛ lɛ, mɛi ni baaye kaa lɛ mli kunim lɛ baanyɛ ahi shi kɛya naanɔ.​—Kpo 20:4-10.

it-2 189-190

La Kpaakpo

Akɛ wiemɔ nɛɛ tsu nii yɛ Kpojiemɔ wolo lɛ mli pɛ, ni ekã shi faŋŋ akɛ, eji mfonirifeemɔŋ wiemɔ. Biblia lɛ diɛŋtsɛ gbála mli, ni etsɔɔ nɔ ni edamɔ shi kɛhã akɛ: “Enɛ damɔ shi kɛhã gbele ni ji enyɔ lɛ, la kpaakpo lɛ.”​—Kpo 20:14; 21:8.

Hei krokomɛi ni awie la kpaakpo lɛ he yɛ Kpojiemɔ wolo lɛ mli lɛ hãa wɔnaa faŋŋ akɛ, eji mfonirifeemɔŋ wiemɔ lɛɛlɛŋ. Akɛɛ ashɛ gbele afɔ̃ la kpaakpo nɛɛ mli. (Kpo 19:20; 20:14) Ekã shi faŋŋ akɛ, anyɛŋ akɛ la diɛŋtsɛ ashã gbele. Ashɛ Abonsam, ni eji mumɔŋ bɔɔ nɔ ni anaaa lɛ lɛ hu afɔ̃ kpaakpo lɛ mli. Akɛni eji mumɔ hewɔ lɛ, la diɛŋtsɛ nyɛŋ afee lɛ nɔ ko.​—Kpo 20:10; okɛto 2Mo 3:2 kɛ Koj 13:20 lɛ he.

Akɛni la kpaakpo lɛ damɔ shi kɛhã “gbele ni ji enyɔ lɛ,” ni Kpojiemɔ 20:14 lɛ hu kɛɔ akɛ, ashɛrɛ “gbele kɛ Gbonyobu lɛ” fɛɛ ashwie mli hewɔ lɛ, ekã shi faŋŋ akɛ, kpaakpo lɛ nyɛŋ adamɔ shi kɛhã gbele ni adesai ná kɛjɛ Adam ŋɔɔ lɛ (Ro 5:12), ni enyɛŋ edamɔ shi kɛhã Gbonyobu lɛ (Hedis loo Sheol) hu. No hewɔ lɛ, efeɔ gbele kroko ko he mfoniri, gbele ni kɛ́ mɔ ko gbo lɛ ateŋ lɛ shi dɔŋŋ, ejaakɛ awieee yɛ Biblia lɛ mli he ko he ko akɛ, “kpaakpo” lɛ jie mɛi ni yɔɔ emli lɛ ehã tamɔ eji yɛ gbele ni wɔná kɛjɛ Adam ŋɔɔ kɛ Gbonyobu lɛ (Hedis loo Sheol) gbɛfaŋ lɛ. (Kpo 20:13) No hewɔ lɛ, mɛi ni anaaa amɛgbɛ́ii yɛ “wala wolo lɛ” mli, ni ji mɛi ni teɔ shi amɛwoɔ Nyɔŋmɔ nɔyeli lɛ ni amɛtsakeee amɛtsui lɛ, abaashɛrɛ amɛ ashwie la kpaakpo lɛ mli, ni tsɔɔ akɛ, abaakpãtã amɛhiɛ kɛya naanɔ, loo amɛbaagbo gbele ni ji enyɔ lɛ.​—Kpo 20:15.