Wumɛi—nyɛkasea Kristo Yitsoyeli Lɛ
“Nuu fɛɛ nuu yitso ji Kristo.”—1 KORINTOBII 11:3.
1, 2. (a) Mɛni nɔ obaadamɔ kɛkɛɛ akɛ wu ko ji wu kpakpa? (b) Mɛni hewɔ ehe hiaa ni akpɛlɛ nɔ akɛ Nyɔŋmɔ ni to gbalashihilɛ shishi lɛ?
MƐNI nɔ obaadamɔ kɛkɛɛ akɛ wu ko ji wu kpakpa? Ani enilee kɛ nibii ni enyɛ etsu yɛ shihilɛ mli? Ani shika ni eyɔɔ, aloo nɔ̃ titri ni obaakwɛ ji kɛji mɔ lɛ kɛ eŋa kɛ ebii yeɔ yɛ suɔmɔ kɛ mlihilɛ mli? Kɛ́ aawie ŋamɛi kɛ bii ni akɛyeɔ yɛ suɔmɔ kɛ mlihilɛ mli lɛ he lɛ, wumɛi babaoo ebɔɔɔ enɛ he mɔdɛŋ ejaakɛ amɛhaa mɛi ni yɔɔ je lɛŋ lɛ asubaŋ náa amɛnɔ hewalɛ, ni asaŋ amɛhaa tɛi ni adesai efolɔ eshwie shi lɛ kudɔɔ amɛ. Mɛni haa ebaalɛ nakai? Nɔ̃ titri ni haa ebaalɛ nakai ji akɛ, amɛkpooɔ gbalashihilɛ Shishitolɔ ni ji Mɔ ni “ŋɔ ŋmawu ni ejie yɛ Adam mli lɛ efee yoo, ni ekɛ lɛ ba Adam ŋɔɔ” lɛ gbɛtsɔɔmɔi, ni amɛkɛtsuuu nii.—1 Mose 2:21-24.
2 Beni Yesu Kristo maa sane nɛɛ ni yɔɔ Biblia lɛ mli ní tsɔɔ akɛ Nyɔŋmɔ ni to gbalashihilɛ shishi lɛ nɔ mi lɛ, ekɛɛ mɛi ni hi shi yɛ egbii lɛ amli ni wie amɛshi lɛ lɛ akɛ: “Ani nyɛkaneko akɛ, mɔ ni bɔ gbɔmɔ yɛ shishijee lɛŋ lɛ, ‘nuu kɛ yoo ebɔ amɛ’? Ni ekɛɛ: ‘Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.’ Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.” (Mateo 19:4-6) Sane lɛ ji akɛ, nɔ̃ diɛŋtsɛ ni haa ayeɔ omanye yɛ gbalashihilɛ mli ji ni abaakpɛlɛ nɔ akɛ Nyɔŋmɔ ni to shishi ni ákɛ omanye ni aaaye yɛ gbalashihilɛ lɛ mli lɛ damɔ gbɛtsɔɔmɔi ni yɔɔ Nyɔŋmɔ Wiemɔ ni ji Biblia lɛ mli lɛ kɛ nitsumɔ nɔ.
Nɔ ni Haa Mɔ Tsɔɔ Wu Kpakpa
3, 4. (a) Mɛni hewɔ Yesu yɔɔ gbalashihilɛ he nilee babaoo lɛ? (b) Namɔ ji Yesu mfonirifeemɔŋ ŋa lɛ, ni te esa akɛ wumɛi kɛ amɛŋamɛi aye aha tɛŋŋ?
3 Nɔ ko ni baaye abua mɔ koni etsɔ wu kpakpa ji ni eeekase nibii ni Yesu wie lɛ, ni efee enii tamɔ Lɛ. Yesu yɛ gbalashihilɛ he nilee babaoo ejaakɛ eyɛ ni abɔ klɛŋklɛŋ adesai enyɔ lɛ, ni asaŋ eyɛ ni amɛbatsɔ wu kɛ ŋa. Yehowa Nyɔŋmɔ kɛɛ lɛ akɛ: ‘Nyɛhaa wɔfea gbɔmɔ yɛ wɔsubaŋ nɔ, tamɔ wɔhenɔ.’ (1 Mose 1:26) Hɛɛ, Mɔ ni no mli lɛ Nyɔŋmɔ kɛwieɔ lɛ ji mɔ klɛŋklɛŋ ni E-bɔ dani ebɔ adesai kɛ nibii krokomɛi fɛɛ lɛ, ni mɔ nɛɛ ‘hi emasɛi akɛ ŋaalɔ.’ (Abɛi 8:22-30) Nakai mɔ lɛ ji “bɔɔ nii fɛɛ ateŋ kromɔbi.” Lɛ ji “Nyɔŋmɔ nibɔɔ lɛ shishijee,” ni eyɛ shihilɛ mli dani abɔ jeŋ ni wɔnaa nɛɛ po.—Kolosebii 1:15; Kpojiemɔ 3:14.
4 Atsɛ́ɔ Yesu akɛ “Nyɔŋmɔ toobi,” ni awieɔ ehe yɛ mfonirifeemɔŋ shishinumɔ naa ákɛ wu. Be ko lɛ, bɔfo ko wie akɛ: “Ba, ni matsɔɔo ayemforo lɛ ni ji toobi lɛ ŋa lɛ.” (Yohane 1:29; Kpojiemɔ 21:9) Namɔ ji ayemforo lɛ, loo eŋa lɛ? “Toobi lɛ ŋa lɛ” ji Kristo sɛɛnyiɛlɔi anɔkwafoi ni akɛ mumɔ efɔ amɛ mu ni kɛ lɛ baaye maŋtsɛ yɛ ŋwɛi lɛ. (Kpojiemɔ 14:1, 3) No hewɔ lɛ, bɔ ni Yesu kɛ ekaselɔi lɛ ye eha beni eyɔɔ shikpɔŋ lɛ nɔ lɛ haa wumɛi naa bɔ ni esa akɛ amɛkɛ amɛŋamɛi aye aha.
5. Yesu to okadi efɔ̃ shi eha namɛi?
5 Eji anɔkwale akɛ Biblia lɛ wieɔ Yesu he akɛ mɔ ni esa akɛ esɛɛnyiɛlɔi fɛɛ akase lɛ, ejaakɛ wɔkaneɔ yɛ mli akɛ: “Kristo hu na amanehulu eha nyɛ ni ekɛto okadi efɔ̃ shi eha nyɛ, koni nyɛnyiɛ enanemaahei lɛ asɛɛ.” (1 Petro 2:21) Kɛlɛ, mɛi titri ni eto okadi efɔ̃ shi eha ji hii. Biblia lɛ kɛɔ akɛ: “Nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.” (1 Korintobii 11:3) Akɛni Kristo ji nuu yitso hewɔ lɛ, esa akɛ wumɛi akase nɔkwɛmɔnɔ kpakpa ni efee lɛ. No hewɔ lɛ, kɛ́ weku ko baaye omanye ni miishɛɛ hu ahi mli lɛ, ebaabi ni amɛkɛ yitsoyeli he gbɛjianɔtoo lɛ atsu nii. Bɔni afee ni miishɛɛ ahi weku lɛ mli lɛ, esa akɛ wumɛi kɛ amɛŋamɛi aye yɛ suɔmɔ mli taakɛ bɔ ni Yesu kɛ efonirifeemɔŋ ŋa ni ji ekaselɔi ni afɔ amɛ mu lɛ ye eha lɛ.
Bɔni Aaafee Atsu Gbalashihilɛ Mli Naagbai Ahe Nii
6. Te esa akɛ wumɛi kɛ amɛŋamɛi ahi shi aha tɛŋŋ?
6 Be ni wɔyɔɔ mli amrɔ nɛɛ ní naagbai efa yɛ je lɛŋ lɛ ji be titri ni esa akɛ wumɛi akase Yesu yɛ bɔ ni eto etsui shi ni efee enii yɛ suɔmɔ mli, ní asaŋ efee shiŋŋ yɛ jalɛ shishitoo mlai kɛ nitsumɔ mli lɛ. (2 Timoteo 3:1-5) Beni Biblia lɛ wieɔ nɔkwɛmɔnɔ ni Yesu fee efɔ̃ shi lɛ he lɛ, ekɛɛ akɛ: “Nakai nɔŋŋ kɛ̃ nyɛ wumɛi, nyɛkɛ amɛ [nyɛ ŋamɛi lɛ] ahia shi yɛ nilee naa.” (1 Petro 3:7) Hɛɛ, esa akɛ wumɛi kɛ nilee atsu naagbai ni amɛkɛkpeɔ yɛ gbalashihilɛ mli lɛ ahe nii taakɛ Yesu tsu naagbai ni ekɛkpe lɛ ahe nii lɛ. Kaai ni ekɛkpe lɛ amli wala fe kaai ni adesa ko kɛ kpe pɛŋ, ni kɛlɛ no mli lɛ ele akɛ Satan kɛ edaimonioi kɛ agbɛnɛ hu mɛi fɔji ni yɔɔ je lɛŋ lɛ ni hɔ kaai lɛ asɛɛ. (Yohane 14:30; Efesobii 6:12) Naagbai ni Yesu kɛkpe lɛ efeee lɛ naakpɛɛ, ni nakai nɔŋŋ esaaa akɛ gbalashihilɛ mli hefatalɔi anaa kpɛɔ amɛhe kɛ́ amɛkɛ “heloo gbɛfaŋ amanehulu” kpe yɛ amɛshihilɛ mli. Biblia lɛ bɔɔ mɛi ni boteɔ gbalashihilɛ mli lɛ kɔkɔ koni amɛkpa amanehulu ni tamɔ nakai gbɛ.—1 Korintobii 7:28.
7, 8. (a) Ákɛ mɔ kɛ eŋa aaahi shi yɛ nilee naa lɛ biɔ ni efee mɛni? (b) Mɛni hewɔ ŋamɛi sa woo lɛ?
7 Biblia lɛ kɛɛ esa akɛ wumɛi kɛ amɛŋamɛi ahi shi yɛ ‘nilee naa, ni amɛkɛ woo awo yoo ákɛ nɔ ni he waaa tuutu ko.’ (1 Petro 3:7) Wu ni hiɛ baa nyam yɛ Nyɔŋmɔ hiɛ lɛ kɛ woo haa eŋa ni eyeee enɔ dɛŋdɛŋ tamɔ bɔ ni Biblia lɛ egba efɔ̃ shi akɛ hii babaoo baafee lɛ. (1 Mose 3:16) Ehiɛɔ eŋa tamɔ nɔ ko ni jara wa, ni eyiii lɛ loo ni ebaapila lɛ akɛni eyɛ hewalɛ fe lɛ lɛ hewɔ. Shi nɔ moŋ ni efeɔ ji akɛ, esusuɔ eŋa lɛ henumɔi ahe, ni ekɛ lɛ yeɔ yɛ bulɛ kɛ woo mli be fɛɛ be.
8 Mɛni hewɔ esa akɛ wumɛi kɛ woo ni sa aha amɛŋamɛi? Biblia lɛ haa hetoo akɛ: “Akɛni amɛkɛ nyɛ fɛɛ ji wala duromɔ lɛ wɔfasei lɛ, koni akatsĩmɔ nyɛsɔlemɔi lɛ agbɛ.” (1 Petro 3:7) Esa akɛ wumɛi anu shishi akɛ, Yehowa ebuuu hii ni jáa Lɛ lɛ akɛ amɛnɔ kwɔlɔ fe yei ni jáa lɛ lɛ. Yei ni hiɛ baaba nyam yɛ Nyɔŋmɔ hiɛ lɛ hu baaná naanɔ wala tamɔ hii ni baaná nakai hegbɛ lɛ nɔŋŋ—ni yei nɛɛ ateŋ mɛi babaoo po baayahi ŋwɛi he ni “nuu bɛ lɛ, yoo hu bɛ” lɛ. (Galatabii 3:28) No hewɔ lɛ, esa akɛ wumɛi aha ehi amɛjwɛŋmɔ mli akɛ anɔkwa ni mɔ yeɔ Nyɔŋmɔ lɛ ni haa ehiɛ baa nyam yɛ ehiɛ ni ekɔɔɔ he eko akɛ mɔ lɛ ji nuu loo yoo, wu loo ŋa aloo gbekɛ po.—1 Korintobii 4:2.
9. (a) Taakɛ Petro tsɔɔ mli lɛ, mɛɛ yiŋtoo hewɔ esa akɛ wumɛi kɛ woo aha amɛŋamɛi lɛ? (b) Yesu kɛ yei ye yɛ woo mli yɛ mɛɛ gbɛ nɔ?
9 Beni bɔfo Petro maa nɔ̃ hewɔ ni ehe hiaa ni wumɛi kɛ amɛŋamɛi aye yɛ woo mli lɛ nɔ mi lɛ, ewie akɛ: “Koni akatsĩmɔ nyɛsɔlemɔi lɛ agbɛ.” Kwɛ oshara ni enɛ aaaji! Kɛ́ wu kɛ eŋa yeee yɛ woo mli lɛ, no baanyɛ aha atsĩmɔ esɔlemɔi anaa taakɛ ebalɛ yɛ Nyɔŋmɔ tsuji komɛi ni hi shi yɛ blema ní ku amɛhiɛ amɛshwie sane nɛɛ nɔ lɛ agbɛfaŋ lɛ. (Yaafo 3:43, 44) Kristofoi hii ni ji mɛi ni ebote gbalashihilɛ mli kɛ mɛi ni amɛmiito gbɛjianɔ kɛha nakai feemɔ ní le nii lɛ kaseɔ bɔ ni Yesu kɛ yei ye yɛ woo mli lɛ. Ekɛ amɛ fata kuu ni ekɛtsu nii yɛ eshiɛmɔ nitsumɔ lɛ mli lɛ ahe, ni ekɛ amɛ ye hu yɛ mlihilɛ kɛ bulɛ mli. Be ko po lɛ, Yesu ha yei tsutsu nále anɔkwale ko ni yɔɔ naakpɛɛ waa, ni ekɛɛ amɛ koni amɛyabɔ amɛnanemɛi hii lɛ amaniɛ!—Mateo 28:1, 8-10; Luka 8:1-3.
Nɔkwɛmɔnɔ Kɛha Wumɛi Titri
10, 11. (a) Mɛni hewɔ ehe hiaa ni wumɛi titri akase Yesu nɔkwɛmɔnɔ lɛ? (b) Te esa akɛ wumɛi asumɔ amɛŋamɛi aha tɛŋŋ?
10 Taakɛ wɔna kɛtsɔ hiɛ lɛ, Biblia lɛ kɛ tsakpãa ni yɔɔ wu kɛ eŋa teŋ lɛ toɔ tsakpãa ni yɔɔ Kristo kɛ “[e]yemforo” ni ji esɛɛnyiɛlɔi ni afɔ amɛ mu lɛ asafo lɛ teŋ lɛ he. Biblia lɛ kɛɔ akɛ: “Wu lɛ ji ŋa lɛ yitso, taakɛ bɔ ni Kristo hu ji asafo lɛ yitso” lɛ. (Efesobii 5:23) Esa akɛ sane nɛɛ awo wumɛi hewalɛ koni amɛpɛi bɔ ni Yesu kɛ esɛɛnyiɛlɔi lɛ ye eha ákɛ amɛyitso loo hiɛnyiɛlɔ lɛ mli. Ja wumɛi efee nakai dani amɛbaanyɛ amɛkase Yesu jogbaŋŋ ni amɛsumɔ amɛŋamɛi, amɛdɔ amɛhe ní asaŋ amɛkɛ gbɛtsɔɔmɔ ni sa aha amɛ taakɛ Yesu fee eha esafo lɛ.
11 Biblia lɛ woɔ Kristofoi hewalɛ akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ” lɛ. (Efesobii 5:25) Yɛ Efesobii yitso ejwɛ lɛ mli lɛ, atsɛ́ “asafo lɛ” akɛ “Kristo gbɔmɔtso.” Mfonirifeemɔŋ gbɔmɔtso nɛɛ yɛ henii srɔtoi ni ji hii kɛ yei, ni amɛ fɛɛ amɛyeɔ amɛbuaa ni gbɔmɔtso lɛ tsuɔ nii jogbaŋŋ. Taakɛ eji lɛ, Yesu ji “gbɔmɔtso lɛ ni ji asafo lɛ yitso.”—Efesobii 4:12; Kolosebii 1:18; 1 Korintobii 12:12, 13, 27.
12. Yesu jie suɔmɔ kpo etsɔɔ efonirifeemɔŋ gbɔmɔtso lɛ yɛ mɛɛ gbɛ nɔ?
12 Yesu jie suɔmɔ kpo etsɔɔ “asafo lɛ” ni ji efonirifeemɔŋ gbɔmɔtso lɛ, ni efee nakai titri kɛtsɔ mɛi ni batsɔmɔ esafo lɛ mlibii lɛ ahe ni esusu ní efee nibii ni he ba sɛɛnamɔ kɛha amɛ lɛ nɔ. Ákɛ nɔkwɛmɔnɔ lɛ, beni etɔ ekaselɔi lɛ, ekɛɛ amɛ akɛ: “Nyɛbaa wɔtea . . . he ko banee, ni nyɛyajɔɔa nyɛhe fioo.” (Marko 6:31) Beni Yesu bɔfoi lɛ ateŋ mɔ kome tsɔɔ nibii ni Yesu fee ní etsɛɛɛ ni agbe lɛ lɛ mli lɛ, eŋma akɛ: “Bɔ ni esumɔɔ emɛi [ni ji efonirifeemɔŋ gbɔmɔtso lɛ] . . . , nakai esumɔ amɛ kɛwulashi.” (Yohane 13:1) Kwɛ nɔkwɛmɔnɔ ni nɔ bɛ ni Yesu fee efɔ̃ shi eha wumɛi yɛ bɔ ni esa akɛ amɛkɛ amɛŋamɛi aye aha!
13. Te awoɔ wumɛi aŋaa koni amɛsumɔ amɛŋamɛi aha tɛŋŋ?
13 Beni bɔfo Paulo yaa nɔ ewieɔ nɔkwɛmɔnɔ kpakpa ni Yesu fee efɔ̃ shi eha wumɛi lɛ he lɛ, ewo amɛ ŋaa akɛ: “Sa akɛ wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛgbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛ̃ko lɛ diɛŋtsɛ eheloo dã, shi moŋ elɛ̀ɔ lɛ ni ehiɛɔ lɛ dɔdɔɔdɔ, taakɛ bɔ ni Nuŋtsɔ lɛ hiɛɔ asafo lɛ.” Paulo kɛfata he akɛ: “Nyɛteŋ mɔ fɛɛ mɔ asumɔ lɛ diɛŋtsɛ eŋa nakai, tamɔ lɛ diɛŋtsɛ ehe.”—Efesobii 5:28, 29, 33.
14. Te wu hiɛɔ egbɔmɔtso ni yeee emuu lɛ ehaa tɛŋŋ, ni mɛni no kɛɔ lɛ yɛ bɔ ni esa akɛ ekɛ eŋa aye aha lɛ he?
14 Susumɔ Paulo wiemɔi lɛ ahe okwɛ. Ani mɔ ko ni nɔ ko gbaaa ejwɛŋmɔ naa jeɔ gbɛ eyeɔ ehe awui? Kɛ́ mɔ tɛ lɛ, ani ekɔɔ kpãa etoɔ ewao ni tɛ lɛ nɔ? Kɔkɔɔkɔ! Ani wu ko shwieɔ lɛ diɛŋtsɛ ehiɛaŋ shi yɛ enanemɛi ahiɛ aloo etsĩɔ efãtɔɔi atã etsɔɔ amɛ? Dabi! Belɛ, ani esa akɛ kɛ́ eŋa tɔ̃ lɛ, esopaa lɛ aloo ewoɔ enine nɔ yɛ enɔ? Esaaa akɛ wumɛi susuɔ amɛ pɛ amɛhe, shi moŋ esa akɛ amɛsusu amɛŋamɛi lɛ hu ahe.—1 Korintobii 10:24; 13:5.
15. (a) Beni adesai agbɔjɔmɔi ni yɔɔ Yesu kaselɔi lɛ ahe lɛ je kpo lɛ, mɛni efee? (b) Mɛni wɔkaseɔ kɛjɛɔ nɔ ni efee lɛ mli?
15 Susumɔ bɔ ni Yesu dɔ ekaselɔi lɛ ahe eha yɛ gbi gbɛkɛ dani abaagbe lɛ lɛ he okwɛ. Nakai gbɛkɛ lɛ, adesai agbɔjɔmɔi ni yɔɔ ekaselɔi lɛ ahe lɛ je kpo. Eyɛ mli akɛ beni amɛyɔɔ Getsemane abɔɔ lɛ mli lɛ, ekɛɛ amɛ shii abɔ akɛ amɛsɔle moŋ, shi ebanina amɛ shii etɛ sɔŋŋ ni amɛmiiwɔ. Oona kɛ onaaa lɛ, gbɔmɛi ni hiɛ dadei kɛ awuiyeli nibii krokomɛi ebabɔle amɛhe kɛkpe. Yesu bi amɛ akɛ: “Namɔ nyɛtaoɔ?” Amɛhere nɔ akɛ: “Yesu, Nazarenyo lɛ,” kɛkɛ ni ekɛɛ amɛ akɛ: “Mi nɛ.” Shi akɛni ele akɛ “ŋmɛlɛtswaa lɛ eshɛ” ni abaagbe lɛ hewɔ lɛ, ekɛɛ amɛ akɛ: “No hewɔ lɛ, kɛji mi nyɛtaoɔ lɛ, nyɛhaa mɛnɛɛmɛi ayaa.” Yesu susuɔ ekaselɔi ni fata mɛi ni feɔ efonirifeemɔŋ ayemforo lɛ ahe lɛ ahilɛ-kɛhamɔ he daa, ni eje gbɛ eha amɛ ni amɛye amɛhe. Kɛ́ wumɛi kase bɔ ni Yesu kɛ ekaselɔi lɛ ye eha lɛ, amɛbaaná nibii pii ni baaye abua amɛ yɛ bɔ ni esa akɛ amɛkɛ amɛŋamɛi aye aha lɛ mli.—Yohane18:1-9; Marko 14:34-37, 41.
Yesu Suɔmɔ lɛ Damɔɔɔ Henumɔ Kɛkɛ Nɔ
16. Te Yesu kɛ Marta teŋ shihilɛ yɔɔ tɛŋŋ, ni kɛlɛ mɛɛ gbɛ nɔ Yesu tsɔ ejaje lɛ?
16 Biblia lɛ kɛɔ akɛ: “Yesu sumɔɔ Marta kɛ enyɛmi yoo lɛ kɛ Lazaro” ní efɔɔ amɛŋɔɔ too lɛ. (Yohane 11:5) Kɛlɛ, beni Marta fiteɔ be kɛhoɔ nii ni no haaa ená be kɛbo Nyɔŋmɔ he nii ni Yesu tsɔɔ lɛ toi lɛ, Yesu ekuuu ehiɛ eshwieee nɔ ni efee lɛ nɔ, shi moŋ ewo lɛ ŋaa. Ekɛɛ lɛ akɛ: “Marta, Marta! oogba ohe naa ni oohao ohe yɛ nibii pii ahewɔ; shi nɔ kome ehia.” (Luka 10:41, 42) Ekã shi faŋŋ akɛ, suɔmɔ ni Yesu yɔɔ kɛha Marta lɛ ha efee mlɛo kɛha lɛ akɛ eeebo eŋaawoo lɛ toi. Nakai nɔŋŋ esa akɛ wumɛi kɛ amɛŋamɛi aye yɛ mlihilɛ kɛ suɔmɔ mli ní kɛ́ amɛkɛ amɛ miiwie lɛ, amɛha amɛwiemɔi ahe aje ŋma. Kɛlɛ, kɛ́ ehe bahia ni amɛjaje amɛŋamɛi lɛ, esaaa akɛ amɛkuɔ amɛhiɛ amɛshwieɔ nɔ, shi moŋ esa akɛ amɛfee nakai taakɛ Yesu fee lɛ.
17, 18. (a) Mɛɛ gbɛ nɔ Petro tsɔ ekã Yesu hiɛ, ni mɛni hewɔ ehe bahia ni ajaje Petro lɛ? (b) Mɛɛ sɔ̃ kã wumɛi anɔ?
17 Yɛ be kroko mli lɛ, Yesu ha ekaselɔi lɛ le esa akɛ eya Yerusalem ni ákɛ kɛ́ etee lɛ, ebaaná amanehulu yɛ “onukpai lɛ kɛ osɔfonukpai kɛ woloŋmalɔi lɛ adɛŋ, ni [aba]agbe lɛ, ni gbi ni ji gbi etɛ lɛ eeete shi ekoŋŋ.” Nɔŋŋ kɛkɛ ni Petro tsɛ́ Yesu kɛtee afã ni ekã ehiɛ akɛ: “Naa ohe mɔbɔ, Nuŋtsɔ, enɛ akagbaleo fɔ̃ɔŋfɔ̃!” Eyɛ faŋŋ akɛ, bɔ ni Petro nu he eha Yesu lɛ haaa enyɛ esusu nii ahe jogbaŋŋ. Ehe bahia ni ajaje lɛ. No hewɔ lɛ, Yesu kɛɛ lɛ akɛ: “Ho misɛɛ, Satan! Ootɔ̃tɔ̃ minane: ejaakɛ ojwɛŋŋ Nyɔŋmɔ nii ahe, shi gbɔmɛi anii ahe moŋ ojwɛŋɔ.”—Mateo 16:21-23.
18 Sane lɛ ji akɛ, Yesu ha ekaselɔi lɛ le akɛ eji Nyɔŋmɔ suɔmɔnaa nii akɛ ena amanehulu pii ní agbe lɛ. (Lala 16:10; Yesaia 53:12) No hewɔ lɛ, esaaa ni kulɛ Petro kãa Yesu hiɛ. Hɛɛ, ehe bahia ni akɛ hiɛdɔɔ ajaje Petro, taakɛ bɔ ni bei komɛi lɛ ehe bahiaa ni afee wɔ lɛ. Ákɛ weku lɛ yitso lɛ, wu lɛ yɛ hegbɛ ni eji esɔ̃ hu akɛ ejaje eweku lɛ mlibii ní eŋa hu fata he lɛ. Eyɛ mli akɛ ehe baahia ni efee shiŋŋ yɛ amɛjajemɔ mli moŋ, shi esa akɛ ejaje amɛ yɛ mlihilɛ kɛ suɔmɔ mli. No hewɔ lɛ, taakɛ bɔ ni Yesu ye ebua Petro ni esusu nii ahe yɛ gbɛ ni ja nɔ lɛ, nakai nɔŋŋ bei komɛi lɛ, ehe baahia ni wumɛi hu ajaje amɛŋamɛi. Ákɛ nɔkwɛmɔnɔ lɛ, Ŋmalɛi lɛ kɛɔ akɛ wɔtadewoo kɛ wɔhesaamɔ afee nɔ ni yɔɔ hiŋmɛi nɔ. No hewɔ lɛ, kɛ́ ŋa ko miije eŋɛlɛ nɔ yɛ enɛ gbɛfaŋ lɛ, esa akɛ ewu kɛ mlihilɛ ahɛle lɛ shi koni efee tsakemɔi ni sa.—1 Petro 3:3-5.
Ehi akɛ Wumɛi Aaato Amɛtsui Shi
19, 20. (a) Mɛɛ naagba te shi yɛ Yesu bɔfoi lɛ ateŋ, ni te Yesu tsu he nii eha tɛŋŋ? (b) Mɛni jɛ Yesu mɔdɛŋbɔɔ lɛ mli kɛba?
19 Kɛ́ naagba ko yɛ ni esa akɛ atsu he nii lɛ, esaaa akɛ wumɛi kpaa gbɛ akɛ kɛ́ amɛtsu he nii lɛ, esɛɛ baafo amrɔ nɔŋŋ. Ehé Yesu be saŋŋ ni ekɛjaje ebɔfoi lɛ asubaŋ. Ákɛ nɔkwɛmɔnɔ lɛ, be ko lɛ, naataamɔ ko te shi yɛ amɛteŋ, ni nakai naataamɔ lɛ nɔŋŋ te shi ekoŋŋ beni eshwɛ fioo ni Yesu baagbe esɔɔmɔ lɛ naa lɛ. Amɛtaa saji anaa yɛ mɔ ni ji agbo fe fɛɛ yɛ amɛteŋ lɛ he. (Marko 9:33-37; 10:35-45) Sɛɛkpee naataamɔ lɛ sɛɛ etsɛɛɛ lɛ, Yesu to gbɛjianɔ koni ekɛ amɛ sɔŋŋ aye enaagbee Hehoo lɛ. Yɛ nifeemɔ lɛ shishi lɛ, amɛteŋ mɔ ko kɔɔɔ efɔ̃ɔɔ enɔ akɛ eeefɔ mɛi krokomɛi lɛ anaji ahe eha amɛ. Eji nifeemɔ ko ni baa shi ni afɔɔ feemɔ yɛ no beaŋ. Yesu fɔfɔlɔ amɛnaji ahe eha amɛ, kɛkɛ ni ekɛɛ amɛ akɛ: “Okadi mito miha nyɛ.”—Yohane 13:2-15.
20 Wumɛi ni baa amɛhe shi tamɔ Yesu lɛ aŋamɛi kɛ amɛ baafee ekome ni amɛbaaye amɛbua amɛ. Shi kɛlɛ, ebaabi ni amɛto amɛtsui shi. Yɛ nakai Hehoo gbi lɛ gbɛkɛnaashi lɛ, bɔfoi lɛ taa sane naa ekoŋŋ yɛ mɔ ni ji agbo fe fɛɛ yɛ amɛteŋ lɛ he. (Luka 22:24) Bei pii lɛ, ákɛ mɔ aaatsake esubaŋ kɛ enifeemɔ lɛ heɔ be, ni tsakemɔ lɛ baa lɛ fiofio. Kɛlɛ, kɛ́ mɔ lɛ fee tsakemɔi ni ataoɔ lɛ taakɛ ebalɛ yɛ bɔfoi lɛ agbɛfaŋ lɛ, kwɛ miishɛɛ ni no kɛbaa!
21. Kɛ́ wumɛi kɛ naagbai kpe ŋmɛnɛ lɛ, mɛni awoɔ amɛ hewalɛ koni amɛkai, ni asaŋ mɛni awoɔ amɛ hewalɛ koni amɛfee?
21 Ŋmɛnɛ lɛ, mɛi kɛ naagbai babaoo miikpe yɛ gbalashihilɛ mli fe be ni eho lɛ. Mɛi babaoo kɛ hiɛdɔɔ tsuuu kitãi ni amɛkãmɔɔ amɛhe yɛ gbalashihilɛ mli lɛ ahe nii. No hewɔ lɛ, wumɛi, nyɛhaa mɔ ni to gbalashihilɛ shishi lɛ ahia nyɛjwɛŋmɔ mli. Nyɛhiɛ akakpaa nɔ akɛ Yehowa ni ji wɔ-Nyɔŋmɔ ni yɔɔ suɔmɔ lɛ ni to gbalashihilɛ shishi. E-kɛ e-Bi Yesu haaa ákɛ wɔ-Kpɔ̃lɔ kɛ wɔ-Yiwalaherelɔ kɛkɛ, shi ekɛ lɛ ha hu koni wumɛi akase lɛ.—Mateo 20:28; Yohane 3:29; 1 Petro 2:21.
Te Obaaha Hetoo Oha Tɛŋŋ?
• Mɛni hewɔ ehe hiaa akɛ wɔkpɛlɛ mɔ ni to gbalashihilɛ shishi lɛ nɔ lɛ?
• Te awoɔ wumɛi hewalɛ ni amɛsumɔ amɛŋamɛi aha tɛŋŋ?
• Bɔ ni Yesu kɛ ekaselɔi lɛ ye eha lɛ haa wumɛi naa bɔ ni esa akɛ amɛtsu amɛyitsoyeli lɛ he nii tamɔ Kristo yɛ mɛɛ gbɛ nɔ?
[Mfoniri ni yɔɔ baafa 14]
Mɛni hewɔ esa akɛ wumɛi akase bɔ ni Yesu kɛ yei ye eha lɛ?
[Mfoniri ni yɔɔ baafa 15]
Beni etɔ Yesu kaselɔi lɛ enu he eha amɛ
[Mfoniri ni yɔɔ baafa 16]
Esa akɛ wumɛi ajɛ mlihilɛ mli amɛkɛ wiemɔi ni jeɔ ŋma ajaje amɛŋamɛi