Jeŋ ni Esha Bɛ Mli—Yɛ Mɛɛ Gbɛ Nɔ?
BOLƆMƆ ni naa wa kɛha yelikɛbuamɔ fite leebi maaŋkpa dioo-feemɔ lɛ yɛ fɛ̃i be lɛ mli yɛ akutso ko ni yɔɔ toiŋjɔlɛ lɛ mli yɛ Tokyo. Mɛi nyɔŋma-kɛ-enyɔ nu yoo ko ni jaa adafitswaa woji lɛ bolɔmɔ kɛ tsuifaa beni akɛ foi nyiɛ esɛɛ aaashɛ minitii enumɔ kɛmiimɔ nyɔŋma, ni aatsurɔ lɛ kakla lɛ. Jeee mɔ ko he sane ko kwraa ji ni eje kpo ebakwɛ nɔ ni yaa nɔ. La ho yoo nɛɛ babaoo fe nine ni egbo. Saji amlipɛilɔ ko wie akɛ: “Eji beni amɛnu yoo lɛ bolɔmɔ lɛ nɔŋŋ, ni amɛteŋ mɔ kome po tswa polisifoi lɛ adafi kulɛ, abaanyɛ ahere eyiwala.”
Eyɛ mli akɛ mɛi ni nu yoo ni gboɔ nɛɛ bolɔmɔi lɛ efeee lɛ efɔŋ ko fe edaaŋ kɛkɛ ni amɛfooo lɛ moŋ, shi ani amɛbaanyɛ amɛkɛɛ yɛ gbɛ ni ja nɔ akɛ amɛyeee fɔ? Nuu ko ni nu yoo lɛ bolɔmɔi lɛ wie akɛ: “Mihenilee hao mi aahu nakai gbi Sohaa lɛ fɛɛ beni mina mile akɛ agbe lɛ lɛ.” Enɛ haa wɔsusuɔ akɛ, Mɛni diɛŋtsɛ ji esha?
Mɛni Ji Esha?
Beni egbalaa jwɛŋmɔ kɛbaa hiɛ ni hiɔ esha nɔ lɛ nɔ lɛ, woji amli kwɛlɔ kɛ tsɔɔlɔ ni eba hejɔɔmɔ Hideo Odagiri, ni yɔɔ Hosei University yɛ Tokyo, Japan lɛ wie, taakɛ atsɛ yisɛɛ yɛ Asahi Shimbun adafitswaa wolo lɛ mli lɛ akɛ: “Minyɛŋ majie esha henumɔi ni mikaiɔ jogbaŋŋ lɛ kɛjɛ mijwɛŋmɔŋ kwraa, tamɔ he suɔmɔ fɔŋ ni yɔɔ gbekɛ ko mli, awuŋayeli ni yɔɔ hiɛgbele, mɔ sɛɛgbɛtsɔɔmɔ nigii nɛkɛ lɛ. Aha nɛkɛ henumɔ nɛɛ ka mijwɛŋmɔ mli beni mije skul shishi kwraa lɛ, ni eeya nɔ eehao mi lolo.” Ani ona henumɔi ni tamɔ nɛkɛ da? Ani oyɛ mligbɛ gbee ko ni buɔ bo fɔ kɛji ofee nɔ ko ni ole akɛ ejaaa lɛ? Ekolɛ ofeko awuiyeli nii ko, shi henumɔ ko ni haaa ohe ajɔ bo yaa nɔ yɛ omli ni egbaa ojwɛŋmɔ naa waa diɛŋtsɛ. No ji ohenilee ni miitsu nii lɛ, ni Biblia lɛ wieɔ he yɛ ŋmalɛ kuku ni nyiɛ sɛɛ nɛɛ mli akɛ: “Kɛ jeŋmajiaŋbii ni bɛ mla lɛ kɛ amɛfɔmɔ mli su lɛ tsuɔ mla naa nii lɛ, amɛ ni amɛbɛ mla lɛ, amɛji mla ha amɛ diɛŋtsɛ amɛhe; no amɛkɛtsɔɔ akɛ aŋma mla lɛ nitsumɔ lɛ yɛ amɛtsuii amli, ni amɛhenilee hu yeɔ odase, ni amɛsusumɔi lɛ folɔfolɔɔ amɛnaa loo amɛjiejieɔ amɛnaa yɛ amɛteŋ.” (Romabii 2:14, 15) Hɛɛ, yɛ adebɔɔ su naa lɛ, gbɔmɛi babaoo haoɔ yɛ nifeemɔi tamɔ gbalafitemɔ, juu kɛ malemɔ he. Amɛhenilee miiye esha ni eji lɛ he odase.
Shi, kɛji atee nɔ aku hiɛ afɔ henilee gbee lɛ nɔ aahu lɛ, etsuuu nii akɛ nɔ ni kudɔɔ mɔ shweshweeshwe dɔŋŋ. Ebaanyɛ etsɔ nɔ ni nuuu nii ahe ni he tseee hu. (Tito 1:15) Bɔ ni anuɔ nɔ ni ji efɔŋ he ahaa lɛ laajeɔ kwraa. Yɛ anɔkwale mli lɛ, mɛi pii ahenilee egboi kwraa ŋmɛnɛ yɛ nɔ ni ji esha gbɛfaŋ.
Ani henilee pɛ akɛsusuɔ nɔ ni ji esha, aloo ani nɔ ko yɛ ni baanyɛ atsu nii akɛ shishitoo mla ni hi fe fɛɛ yɛ nɔ ni ji esha kɛ nɔ ni jeee esha he lɛ mli? Nɔ ni fe afii 3,000 ni eho nɛ lɛ, Nyɔŋmɔ ha emaŋ ni ehala lɛ mla gbɛjianɔtoo ko, ni kɛtsɔ nɛkɛ Mla nɛɛ nɔ lɛ, esha batsɔ nɔ ni “ayoo akɛ esha.” (Romabii 7:13, New International Version) Subaŋ ni tsutsu ko lɛ akpɛlɛɔ nɔ akɛ ehi bɔ ni sa lɛ ebaje kpo agbɛnɛ ni aana lɛ jogbaŋŋ bɔ ni eji—esha. Nyɔŋmɔ webii ni ehala, ni ji Israelbii lɛ baje kpo faŋŋ akɛ eshafeelɔi, ni no hewɔ lɛ amɛyɛ fɔbuu shishi.
Mɛni ji nɛkɛ eshai ni wɔhenilee haa wɔleɔ, ni Mose Mla lɛ je gbɛ etsĩ amɛ tã ni eto naa eŋmala hu nɛɛ? Yɛ bɔ ni Biblia kɛ wiemɔ nɛɛ tsuɔ nii haa lɛ naa lɛ, esha tsɔɔ oti ni Bɔlɔ lɛ etsɔɔ lɛ ni anyɛɛɛ ashɛ he. Nɔ fɛɛ nɔ ni kɛ esu, etɛi ni efolɔ eshwie shí, egbɛ̀i, kɛ esuɔmɔnaa nii kpaaa gbee lɛ, esha ni. Enyɛŋ eha bɔɔnɔ ko ni shɛɛɛ oti ni ekɛma shi lɛ he lɛ aya nɔ ahi wala mli kɛya naanɔ. No hewɔ lɛ mlalelɔ ko ni hi shi yɛ klɛŋklɛŋ afi oha lɛ mli bɔ Hebri Kristofoi lɛ kɔkɔ akɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ hiɛkalɔ lɛ he.” (Hebribii 3:12) Hɛɛ, hemɔkɛyeli ni anaŋ yɛ Bɔlɔ lɛ mli lɛ bafeɔ esha wulu diɛŋtsɛ. Enɛ hewɔ lɛ, he ni esha mli kpaa kɛyashɛɔ, taakɛ atsɔɔ mli yɛ Biblia lɛ mli lɛ mli lɛɛ kwraa fe nɔ ni afɔɔ he susumɔ akɛ eji esha lɛ. Biblia lɛ yaa shɔŋŋ po ni ekɛɔ akɛ: “Mɛi fɛɛ efee esha, ni Nyɔŋmɔ anunyam lɛ ebɔ amɛ.”—Romabii 3:23.
Esha Shishijee
Ani no tsɔɔ akɛ abɔ gbɔmɔ akɛ eshafeelɔ? Dabi, Yehowa Nyɔŋmɔ, adesai awala Shishijelɔ lɛ fee klɛŋklɛŋ gbɔmɔ lɛ akɛ bɔɔnɔ ni eye emuu. (1 Mose 1:26, 27; 5 Mose 32:4) Shi kɛlɛ, klɛŋklɛŋ adesai enyɔ lɛ ŋmɛɛ oti lɛ he beni amɛku naatsii koome pɛ ni Nyɔŋmɔ kɛfɔ shi lɛ mli, ni amɛyaye “ekpakpa kɛ efɔŋ lee tso” ni agu amɛ akɛ amɛkaye lɛ. (1 Mose 2:17) Eyɛ mli akɛ abɔ amɛ ni amɛye emuu moŋ, shi agbɛnɛ amɛshɛɛɛ oti ni ji toiboo kwraa ni amɛfeɔ amɛhaa amɛ-Tsɛ lɛ he dɔŋŋ, ni amɛtsɔmɔ eshafeelɔi, ni abu amɛ gbele fɔ yɛ no hewɔ.
Mɛni nɛkɛ blema yinɔsane nɛɛ kɛ esha yɔɔ feemɔ ŋmɛnɛ? Biblia lɛ tsɔɔ mli akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” (Romabii 5:12) Afɔ wɔ fɛɛ akɛ eshafeelɔi, ni mɔ ko kwraa bɛ ni jieɔ ehe kɛjɛɔ mli; no hewɔ lɛ, wɔbajeɔ gbele fɔbuu shishi—Jajelɔ 7:20.
Adesai Amɔdɛŋbɔɔ akɛ Amɛkɛaajie Esha
Adam kɛ esha lɛ fɔ eshwiei, shi kɛlɛ ekɛ jwɛŋmɔŋ hewalɛ ni Nyɔŋmɔ kɛbɔle ni ji henilee lɛ hu fɔ amɛ. Esha baanyɛ eha haomɔ henumɔ ko ate shi. Taakɛ wɔtsi ta momo lɛ, gbɔmɛi eto ŋaai sɔrɔtoi akɛ amɛkɛaajie nɛkɛ henumɔi nɛɛ kɛjɛ jɛmɛ. Shi, ani amɛnyɛ amɛye omanye lɛlɛŋ?
Boka kɛ Anai fɛɛ lɛ, gbɔmɛi eka akɛ amɛaatsu nɔ ni jɛɔ esha mli baa lɛ he nii kɛtsɔ tɛi ni amɛfolɔ lɛ atsakemɔ nɔ loo kɛtsɔ kpɛlɛmɔ ni amɛkpɛlɛɛɛ akɛ esha yɛ lɛ nɔ. (1 Timoteo 4:1, 2) Abaanyɛ akɛ adesa eshafeemɔ shihilɛ lɛ ato helatsɛ ko ni he miiye kɛ atridii he. Abaanyɛ akɛ esha lɛ ato muawai ni kɛ hela lɛ baa lɛ he, ni akɛ henilee ni ehao lɛ baato atridii ni haaa mɔ he ajɔ lɛ lɛ he. Glase ni akɛsusuɔ ehe dɔlɛ lɛ ni eeejwara lɛ lɛ tsakeee anɔkwale ni eji akɛ helatsɛ lɛ ena atridii lɛ. Jeŋba he tɛi ni ashɛrɛ ashwie, taakɛ mɛi ni yɔɔ Kristendom lɛ ateŋ mɛi pii efee lɛ, kɛ hiɛ ni akuɔ ashwieɔ mɔ diɛŋtsɛ henilee ni yeɔ odase eshiɔ lɛ lɛ nɔ lɛ jeee yelikɛbuamɔ ni akɛaajie esha lɛ diɛŋtsɛ kɛya.
Ekolɛ mɔ lɛ kɛ ais baafɔ ehiɛnaa koni ekɛha atridii lɛ aba shi. No bafeɔ tamɔ ni eebɔ mɔdɛŋ ni ejie ehenilee mli piŋmɔi kɛtsɔ ehe ni ekɛaawo Shinto jamɔ mli hetsuumɔ kusumii amli lɛ nɔ. Ais nɛɛ baanyɛ aha mɔ ni atridii emɔ lɛ nɛɛ he dɔlɛ lɛ aba shi, shi ejieŋ nɔ ni kɛ atridii lɛ ba lɛ kɛjɛŋ jɛmɛ. Osɔfoi kɛ gbalɔi ni hi shi yɛ Yeremia gbii lɛ amli lɛ ka tsamɔ ni tamɔ nakai nɔŋŋ kɛha nakai beaŋ Israelbii lɛ. Amɛtsa gbɔmɛi lɛ amumɔŋ kɛ jeŋba mli pilamɔi lɛ “hiɛaŋhiɛaŋ” kɛkɛ, ni amɛkɛɛ, “Nɔ fɛɛ nɔ hi, nɔ fɛɛ nɔ hi.” (Yeremia 6:14; 8:11, An American Translation) Ni akɛ he aaawo jamɔ mli nifeemɔi amli kɛkɛ ni aaakɛɛ wiemɔ komɛi kɛkɛ tamɔ “nɔ fɛɛ nɔ hi” lɛ tsaaa Nyɔŋmɔ webii lɛ ajeŋba mli fitemɔ lɛ, ni nakai nɔŋŋ hu hetsuumɔ kusumii tsakeee gbɔmɛi ajeŋba ŋmɛnɛ.
Kɛji mɔ ni he yeɔ kɛ atridii lɛ kɔlɔ atridii tsofai lɛ, ekolɛ ebaaha atridii lɛ aba shi, shi muawai lɛ yɛ ela mli lolo. Nakai nɔŋŋ eji yɛ gbɛ ni Konfushio jamɔ tsɔɔ nɔ etsuɔ efɔŋ he nii kɛtsɔ tsɔsemɔ nɔ lɛ he. Ekolɛ yɛ hiɛaŋhiɛaŋ lɛ, ebaanyɛ eye ebua gbɔmɛi lɛ ni amɛtsi amɛhe kɛjɛ efɔŋ he, shi li ni akɛ he woɔ mli lɛ nyɛɔ esha jeŋbai anɔ kɛkɛ, shi ejieee eshafeemɔ henumɔ ni akɛfɔ mɔ lɛ kɛjɛɛɛ emli, nɔ diɛŋtsɛ ni kɛ jeŋba fɔŋ baa lɛ.—1 Mose 8:21.
Ni Buddha tsɔɔmɔ ni kɔɔ Nirvana mlibotemɔ he, koni mɔ lɛ kɛjie eshafeemɔ henumɔi kɛjɛ ehe lɛ hu? Akɛɛ anyɛŋ atsɔɔ bɔ ni Nirvana shihilɛ, ni eshishinumɔ ji “shihilɛ mli jee” ji ha lɛ mli, ni ji akɛ eji nii ahe akɔnɔ kɛ miishɛɛ ni ayɔɔ lɛ sɛɛfoo. Mɛi komɛi kɛɔ akɛ eji mɔ aŋkro lɛ shihilɛ sɛɛfoo. Ani enɛ tamɔɔɔ nɔ ni aakɛɛ mɔ ko ni he miiye kɛ atridii lɛ akɛ egbo koni ehe ajɔ lɛ? Ni kɛfata he lɛ, asusuɔ akɛ Nirvana shihilɛ nɛɛ namɔ wa waa diɛŋtsɛ, aloo nine nyɛɛɛ ashɛ nɔ po. Ani nɛkɛ tsɔɔmɔ nɛɛ tamɔ yelikɛbuamɔ nɔ kɛha mɔ ni ehenilee haoɔ lɛ lɛ?
Kpɔmɔ Kɛmiijɛ Esha Mli
Eyɛ faŋŋ akɛ kɛji adesai ajeŋ nilee ni kɔɔ wala kɛ eshafeemɔ henumɔi ahe lɛ ebɔ he mɔdɛŋ aahu lɛ, ebaanyɛ ejɔɔ mɔ henilee he kɛkɛ. Amɛjieee esha shihilɛ lɛ kɛyaaa. (1 Timoteo 6:20) Ani gbɛ ko yɛ ni aaatsɔ nɔ afee enɛ? Wɔnaa gbɛ koome ni aaatsɔ nɔ ana kpɔmɔ kɛjɛ esha mli lɛ yɛ Biblia, ni ji blema wolo ko ni aŋma yɛ Bokagbɛ Kpaakpa lɛ mli. “Kɛ nyɛhe eshai lɛ tsuɔ tamɔ lá po, amɛaayɛ tamɔ snoo . . . Kɛ nyɛmiisumɔ ni nyɛbo toi lɛ, nyɛaaye shikpɔŋ lɛ nɔ nii kpakpai.” (Yesaia 1:18, 19) Yehowa kɛ Israelbii lɛ miiwie yɛ biɛ, mɛi ni, eyɛ mli akɛ amɛji ewebii ni ehala amɛ moŋ, shi amɛshɛɛɛ oti ni ji emuuyeli ni amɛaahiɛ mli amɛha lɛ lɛ he lɛ. Shi, nakai shishitoo mla lɛ kɔɔ adesai fɛɛ ahe nakai nɔŋŋ. Suɔmɔ ni wɔɔna akɛ wɔɔbo Bɔlɔ lɛ wiemɔi atoi lɛ ji gbɛ kome pɛ ni mɔ ko aaatsɔ nɔ eha atsumɔ ehe eshai lɛ, ni kɛji wɔɔkɛɛ lɛ, ajie kɛya kwraa.
Mɛni Nyɔŋmɔ Wiemɔ lɛ kɛɔ wɔ yɛ adesai ahe eshai ajiemɔ kɛyaa he? Taakɛ bɔ ni kɛtsɔ gbɔmɔ kome he esha nɔ ni adesai fɛɛ batsɔmɔ eshafeelɔi lɛ, nakai nɔŋŋ kɛtsɔ gbɔmɔ kome toiboo ni eye emuu ni efee kɛha Nyɔŋmɔ lɛ nɔ lɛ, abaaha adesai toibolɔi lɛ aye amɛhe kɛjɛ amɛ amanehulu lɛ mli, taakɛ Biblia lɛ kɛɔ lɛ. (Romabii 5:18, 19) Yɛ mɛɛ gbɛ nɔ? “Nyɔŋmɔ jieɔ lɛ diɛŋtsɛ esuɔmɔ ni ekɛsumɔɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” (Romabii 5:8) Yesu Kristo, ni afɔ lɛ akɛ gbɔmɔ ni eye emuu ni esha ko bɛ ehe, ni etamɔ klɛŋklɛŋ Adam lɛ pɛpɛɛpɛ dani ebatɔ̃ lɛ, bana hegbɛ akɛ eeejie adesai ahe eshai lɛ kɛya kwraa. (Yesaia 53:12; Yohane 1:14; 1 Petro 2:24) Yesu jie adesai kɛjɛ esha kɛ gbele nyɔŋyeli lɛ mli kɛtsɔ gbe ni agbe lɛ yɛ piŋmɔ tso nɔ tamɔ efɔŋfeelɔ ko lɛ nɔ. “Ejaakɛ,” Paulo tsɔɔ mli faŋŋ eha Kristofoi ni yɔɔ Roma lɛ akɛ, “be mli ni wɔhe waaa lɛ beebe Kristo bagbo yɛ be ni sa mli eha mɛi ni efeee Nyɔŋmɔ shishi nii lɛ. Koni bɔ nɔŋŋ ni esha lɛ ye maŋtsɛ yɛ gbele mli lɛ, nakai nɔŋŋ duromɔ lɛ atsɔ jalɛ nɔ aye maŋtsɛ hu kɛya naanɔ wala mli yɛ Yesu Kristo, wɔ-Nuŋtsɔ lɛ hewɔ.”—Romabii 5:6, 21.
Atsɛɔ gbele ni Kristo bagbo eha adesai fɛɛ ni ekɛha ŋsɛnii ni Adam ekpa lɛ afa lɛ ŋmɛ pɛpɛɛpɛ lɛ akɛ “kpɔmɔ nɔ” gbɛjianɔtoo lɛ. (Mateo 20:28) Abaanyɛ akɛto tsofa ni kuɔ muawai ni kɛ atridii baa lɛ anaa lɛ he. Kɛ akɛ Yesu kpɔmɔ nɔ lɛ jarawalɛ lɛ tsu adesai ahe nii lɛ, ebaanyɛ etsa adesai agbɔjɔmɔ shihilɛ ni esha—kɛ gbele diɛŋtsɛ hu—kɛbaa Iɛ kwraa. Awie nɛkɛ tsamɔ nifeemɔ nɛɛ he yɛ mfoniri-feemɔŋ yɛ Biblia mli naagbee wolo lɛ mli: “Faa lɛ toi biɛ kɛ biɛ fɛɛ lɛ, wala tsei lɛ mamɔ shi, ni ewoɔ yibii shii nyɔŋma kɛ enyɔ, ni nyɔŋ fɛɛ nyɔŋ nɔ lɛ ewoɔ yibii, ni tso lɛ yibaai lɛ akɛtsaa jeŋmaji lɛ.” (Kpojiemɔ 22:2) Susumɔ he okwɛ! Mfoniri-feemɔŋ wala nu faa ni miiho yɛ wala tsei ateŋ, kɛ enɔ baai hu, ni akɛ enɛɛmɛi fɛɛ tsaa adesai. Nɛkɛ okadii ni ajɛ Nyɔŋmɔ mumɔŋ mli akɛha nɛɛ damɔ shi kɛha gbɛjianɔ ni Nyɔŋmɔ eto koni atsɔ nɔ akɛ adesai aba emuuyeli mli ekoŋŋ kɛtsɔ Yesu kpɔmɔ afɔleshaa lɛ nɔ.
Etsɛŋ ni gbalɛ mli ninaai ni yɔɔ Kpojiemɔ wolo lɛ mli lɛ baaba mli diɛŋtsɛ. (Kpojiemɔ 22: 6, 7) Kɛkɛ lɛ, beni akɛ Yesu kpɔmɔ afɔleshaa lɛ jarawalɛ lɛ etsu adesai ahe nii kɛmɔ shi sɛɛ lɛ, gbɔmɛi ni yɔɔ jalɛ tsuii lɛ fɛɛ baaye emuu ni “amɛbaaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.” (Romabii 8:21) Biblia mli gbalɛi amlibaa tsɔɔ akɛ nɛkɛ anunyam kpɔmɔ nɛɛ ebɛŋkɛ kpaakpa. (Kpojiemɔ 6:1-8) Etsɛŋ ni Nyɔŋmɔ baajie nɔ fɔŋ fɛɛ kɛjɛ shikpɔŋ nɛɛ nɔ, ni adesai baana naanɔ wala mli ŋɔɔmɔ yɛ paradeiso shikpɔŋ nɔ. (Yohane 3:16) No baafee jeŋ ni esha bɛ mli lɛlɛŋ!
[Mfoniri ni yɔɔ baafa 7]
Yesu kpɔmɔ afɔleshaa lɛ baaha wekui ni tamɔ nɛkɛ ana hegbɛ ni amɛna naanɔ miishɛɛ mli ŋɔɔmɔ