“Ye Obua Mihemɔkɛyeli Ni Mibɛ Lɛ!”
“Gbekɛ lɛ tsɛ lɛ bo kɛ ehiɛ yaafonui ekɛɛ: ‘Miihe miiye, Nuŋtsɔ, ye obua mihemɔkɛyeli ni mibɛ lɛ!’”—MARKO 9:24.
1. Mɛni ha tsɛ ko bolɔ akɛ “Ye Obua mihemɔkɛyeli ni mibɛ lɛ”?
GBEKƐ nuu ni daimonio haoɔ lɛ lɛ tsɛ yadamɔ Yesu Kristo hiɛ. Kwɛ bɔ ni nakai nuu lɛ shweɔ haa akɛ aaatsa ebi fioo lɛ hela lɛ! Yesu kaselɔi lɛ yanaaa hemɔkɛyeli ni fa bɔ ni sa ni aaaha amɛfa daimonio lɛ, shi tsɛ lɛ bo akɛ: “Miihe miiye, Nuŋtsɔ, ye ebua mihemɔkɛyeli ni mibɛ lɛ!” Kɛkɛ ni Yesu tsɔ hewalɛ ni Nyɔŋmɔ kɛha lɛ lɛ nɔ efa daimonio lɛ, ni ŋwanejee ko bɛ he akɛ enɛ waje gbekɛ nuu lɛ tsɛ lɛ hemɔkɛyeli—Marko 9:14-29.
2. Yɛ hemɔkɛyeli he lɛ, mɛɛ gbɛi enyɔ nɔ Kristofoi ahiɛ gbooo yɛ?
2 Taakɛ nakai gbekɛ nuu ni etsɛ lɛ yɔɔ hiɛnɔkamɔ lɛ ji lɛ, Yehowa tsulɔ anɔkwafo hiɛ gbooo akɛ eeekɛɛ akɛ: “Miihe miiye!” aloo akɛ ‘Miyɛ hemɔkɛyeli!’ Hefɛoyelɔi baaje hewalɛ ni Nyɔŋmɔ yɔɔ, anɔkwale ni e-Wiemɔ lɛ ji, kɛ shihilɛ mli ni eyɔɔ diɛŋtsɛ lɛ po he ŋwane. Shi anɔkwa Kristofoi kpɛlɛɔ nɔ amrɔ nɔŋŋ akɛ amɛyɛ hemɔkɛyeli yɛ Yehowa Nyɔŋmɔ mli. Ni kɛlɛ, kɛ amɛmiiwie yɛ teemɔŋ kɛmiitsɔɔ amɛ ŋwɛi Tsɛ lɛ yɛ sɔlemɔ mli lɛ, nɛkɛ gbɔmɛi aŋkroaŋkroi nɛɛ nɔŋŋ baakpa fai akɛ: “Ye obua mihemɔkɛyeli ni mibɛ lɛ!” Amɛfeɔ enɛ hu ni amɛhiɛ gbooo, ejaakɛ amɛle akɛ Yesu Kristo bɔfoi lɛ po kpa fai akɛ: “Fatamɔ wɔhemɔkɛyeli lɛ he oha wɔ.”—Luka 17:6.
3. Mɛni sa kadimɔ yɛ bɔ ni Yohane kɛ wiemɔ “hemɔkɛyeli” tsu nii yɛ e-Sanekpakpa lɛ mli lɛ he, ni mɛni hewɔ enɛ sa lɛ?
3 Kristofoi a-Hela Ŋmalɛi lɛ titri yɔɔ babaoo kɛɛmɔ yɛ hemɔkɛyeli he. Yɛ anɔkwale mli lɛ, Yohane Sanekpakpa lɛ kɛ Hela wiemɔi ni kɔɔ “hemɔkɛyeli” he ni atsɔɔ shishi yɛ gbɛi sɔrɔtoi anɔ lɛ tsuɔ nii shii abɔ fe oha fɛɛ mli 40 fe Sanekpakpai etɛ lɛ fɛɛ anɔ ni abua naa. Yohane ma nɔ mi akɛ hemɔkɛyeli ni ayɔɔ lɛ pɛ kɛkɛ faaa; ekɛ nitsumɔ he miihia. Yɛ be mli ni eŋmaa ewolo lɛ aaafee afi 98 Ŋ.B. mli lɛ, ena hemɔkɛyeli-kwamɔ niji babaoo ni ebɔɔ yɔɔ mli lɛ akɛ aakpa mli koni akɛtsɔ Kristofoi ni amɛhemɔkɛyeli waaa lɛ tsɔne. (Bɔfoi lɛ Asaji 20:28-30; 2 Petro 2:1-3; 1 Yohane 2:18, 19) No hewɔ lɛ ehe bahia ni akɛ hemɔkɛyeli atsu nii, akɛ enɛ he odaseyeli aha kɛtsɔ Nyɔŋmɔ jamɔ hetuu-kɛhamɔ nitsumɔi anɔ. Bei ni mli wawai ka amɛhiɛ.
4. Mɛni hewɔ nɔ ko bɛ ni mɛi ni yɔɔ hemɔkɛyeli lɛ nyɛŋ afee lɛ?
4 Hemɔkɛyeli haa Kristofoi nyɛɔ amɛdamɔɔ saji ni mli wawai anaa. Yesu kɛɛ ekaselɔi lɛ akɛ kɛji akɛ amɛyɛ “hemɔkɛyeli ni tamɔ sinapi wu lɛ,” nɔ ko bɛ ni amɛnyɛŋ amɛfee. (Mateo 17:20) Ema hewalɛ ni hemɔkɛyeli, ni ji mumɔ krɔŋkrɔŋ lɛ yibii lɛ yɔɔ lɛ nɔ mi yɛ nɛkɛ gbɛ nɔ. Belɛ Yesu ma nɔ ni Nyɔŋmɔ mumɔ lɛ, loo enifeemɔ hewalɛ lɛ baanyɛ afee lɛ nɔ mi, shi jeee nɔ ni gbɔmɔ baanyɛ afee. Mɛi ni enɛ kudɔɔ amɛ lɛ kɛ gbɛtsii nibii bibii kɛ naagbai bibii efee nibii wuji. Nilee ni Nyɔŋmɔ mumɔ lɛ kɛhaa amɛ lɛ kɛ nitsumɔ yeɔ ebuaa amɛ ni amɛna saji anaa yɛ gbɛ ni ja nɔ. Naagbai ni hiɛdɔɔ yɔɔ mli lɛ po feɔ bibioo kɛ akɛhɔ hemɔkɛyeli hewalɛ ni wajeɔ mɔ lɛ shishi lɛ.—Mateo 21:21, 22; Marko 11:22-24; Luka 17:5, 6.
Sɔlemɔ ni Asɔleɔ Koni Hemɔkɛyeli Akagbɔjɔ
5-7. (a) Mɛɛ kɔkɔbɔɔ wiemɔi ni kɔɔ hemɔkɛyeli he Yesu jaje yɛ be mli ni eto Kaimɔ lɛ? (b) Mɛɛ gbɛ nɔ Petro hemɔkɛyeli lɛ ye ebua lɛ koni ewaje enyɛmimɛi lɛ yɛ?
5 Yesu kɛ ekaselɔi lɛ ye Hehoo lɛ nɔ ni ji naagbee nɔ kwraa yɛ afi 33 Ŋ.B. Kɛkɛ ni yɛ be mli ni eshwie Yuda Iskariot sɛɛ lɛ, eto Kaimɔ lɛ yeli akɛ gbijurɔ, akɛ: “Mikɛ nyɛ miifee kpaŋmɔ, taakɛ bɔ ni mi-Tsɛ kɛmi efee kpaŋmɔ, kɛha maŋtsɛyeli lɛ . . . Simon, Simon, naa! Satan ebi koni asha nyɛmli tamɔ ŋmaa. Shi mikpa fai mihao koni ohemɔkɛyeli akata; ni bo hu beni okpale lɛ, wo onyɛmimɛi lɛ hewalɛ.”—Luka 22:28-32, New World Translation.
6 Yesu sɔle koni Simon Petro hemɔkɛyeli akata. Eyɛ mli akɛ Petro ni heɔ ehe eyeɔ tsɔ lɛ pupuu ehe akɛ ekwaŋ Yesu kɔkɔɔkɔ moŋ, shi efee nakai shii etɛ yɛ no sɛɛ nɔŋŋ. (Luka 22:33, 34, 54-62) Yɛ anɔkwale mli lɛ, akɛni agba akɛ abaatswa Tookwɛlɔ lɛ nɔ yɛ gbele mli hewɔ lɛ, tooi lɛ gbɛ amɛshwa. (Zakaria 13:7; Marko 14:27) Shi, beni Petro kpale kɛjɛ gbeyeishemɔ ni tamɔ tsɔne ni eyagbee mli lɛ mli lɛ, ewo emumɔŋ nyɛmimɛi lɛ hewalɛ. Lɛ ji mɔ ni kɛ sane lɛ ba akɛ akɛ mɔ kroko ato Yuda Iskariot ni yeee anɔkwale lɛ najiaŋ. Yɛ be mli ni etsuɔ nii akɛ bɔfoi lɛ anaawielɔ yɛ Pentekoste afi 33 Ŋ.B. lɛ, Petro kɛ “samfei” ni Yesu kɛha lɛ lɛ amli klɛŋklɛŋ nɔ lɛ tsu nii, ni ekɛgbele gbɛ koni Yudafoi lɛ abatsɔmɔ Maŋtsɛyeli lɛŋ bii. (Mateo 16:19; Bɔfoi lɛ Asaji 1:15–2:41) Satan ebi koni enine ashɛ bɔfoi lɛ anɔ koni esha amɛ tamɔ ŋmaa, shi Nyɔŋmɔ kwɛ koni amɛhemɔkɛyeli akata.
7 Susumɔ bɔ ni Petro aaanu he aha beni enu ni Yesu miikɛɛ: “Shi mikpa fai mihao koni ohemɔkɛyeli akata” lɛ he okwɛ. Bo lɛ susumɔ he okwɛ! Enuŋtsɔ lɛ esɔle koni Petro hemɔkɛyeli akata. Ni etaaa hu, aloo ni eeegbɔjɔ. Yɛ anɔkwale mli lɛ, Petro kɛ mɛi krokomɛi batsɔmɔ klɛŋklɛŋbii ni akɛ mumɔ krɔŋkrɔŋ lɛ fɔ amɛ mu koni amɛbatsɔmɔ Nyɔŋmɔ mumɔŋ bii, mɛi ni kpaa gbɛ akɛ amɛbaafee Kristo nanemɛi niyelɔi yɛ ŋwɛi anunyam mli, yɛ Pentekoste gbi lɛ nɔ. Akɛni mumɔ krɔŋkrɔŋ lɛ yɔɔ amɛnɔ babaoo fe be fɛɛ ni ale yɛ nakai be lɛ mli hewɔ lɛ, amɛnyɛ amɛjie eyibii, ni hemɔkɛyeli fata he lɛ kpo, fe be fɛɛ. Kwɛ hetoo ni yɔɔ naakpɛɛ ni akɛha amɛfaikpamɔ: “Fatamɔ wɔhemɔkɛyeli lɛ he oha wɔ” lɛ!—Luka 17:5; Galatabii 3:2, 22-26; 5:22, 23.
Hemɔkɛyeli ni Wɔkɛaadamɔ Kaai ni Jwere Wɔhiɛ lɛ Anaa
8. Mɛɛ kɔkɔbɔɔ ni akɛhaa yɛ ebe naa pɛpɛɛpɛ gbɛjianɔtoo lɛ kɛha wɔ yɛ 1 Tesalonikabii 5:3 mlibaa he?
8 Yɛ Biblia gbalɛ mlibaa mli lɛ, etsɛŋ ni wɔbaanu bolɔmɔ akɛ “Hejɔlɛ yɛ ni wɔyɛ shweshweeshwe!” (1 Tesalonikabii 5:3) Ani enɛ aaanyɛ aka wɔhemɔkɛyeli? Hɛɛ, ejaakɛ oshara yɛ wɔhiɛ ni aaanyɛ aje wɔhe nɔ yɛ na ni anaa faŋŋ akɛ ekolɛ jeŋmaji lɛ eye omanye yɛ toiŋjɔlɛ ni amɛkɛhaa lɛ mli lɛ hewɔ. Shi wɔkɛ wɔhe woŋ toiŋjɔlɛ loo hejɔlɛ jajelɔi nɛɛ asubaŋ lɛ mli kɛji akɛ wɔha ehi wɔjwɛŋmɔ mli akɛ Yehowa Nyɔŋmɔ kɛ je nɛŋ gbɛjianɔtoi lɛ eko tsuŋ nii ni ekɛ enɛ aba lɛ. Eyɛ lɛ diɛŋtsɛ egbɛ ni eeetsɔ nɔ ekɛ anɔkwa toiŋjɔlɛ aba, ni enɛ baaba kɛtsɔ e-Maŋtsɛyeli ni yɔɔ Yesu Kristo dɛŋ lɛ pɛ nɔ. No hewɔ lɛ, bɔ fɛɛ bɔ ni omanye ni jeŋmaji lɛ aaaye yɛ toiŋjɔlɛ ni amɛkɛaaha lɛ mli lɛ, ebaafee nɔ ni hiɔ shi yɛ be kuku mli kɛ hiɛaŋhiɛaŋ nɔ ko kɛkɛ. Bɔni afee ni aye abua wɔ ni wɔhiɛ ahi wɔhe nɔ yɛ enɛ mli lɛ, “tsulɔ anɔkwafo kɛ nilelɔ lɛ” baaya nɔ aŋmala kɔkɔbɔɔi ni baa yɛ ebe naa pɛpɛɛpɛ aha, koni ‘Toiŋjɔlɛ kɛ shweshweeshwe shihilɛ’ ni jeŋmaji ni yɔɔ nibii agbɛjianɔtoo momo nɛɛ mli lɛ kwaa amɛjajeɔ lɛ akabati Yehowa tsuji lɛ ashi trukaa—Mateo 24:45-47.
9. Mɛni hewɔ ebaabi ekãa kɛ hemɔkɛyeli yɛ wɔgbɛfaŋ yɛ Babilon Kpeteŋkpele lɛ hiɛkpatamɔ mli lɛ?
9 Bolɔmɔ akɛ “Hejɔlɛ yɛ ni wɔyɛ shweshweeshwe!” lɛ baafee okadi kɛha ‘hiɛkpatamɔ ni baa trukaa’ ni aaaba Babilon Kpeteŋkpele ni ji jeŋ apasa jamɔ maŋtsɛyeli lɛ nɔ lɛ. (Kpojiemɔ 17:1-6; 18:4, 5) Enɛ hu baaka Kristofoi ahemɔkɛyeli akwɛ. Beni apasa jamɔ kumɔɔ ni etsɔɔ amaŋfɔ lɛ, ani Yehowa Odasefoi aaanyɛ adamɔ shi shiŋŋ yɛ hemɔkɛyeli lɛ mli? Hɛɛ, amɛbaanyɛ. Nii ni baaba nɛɛ—ni gbɔmɛi pii kpaaa gbɛ ni amɛnuŋ shishi lɛ—efeŋ nɔ ni jɛ gbɔmɔ. Esa akɛ gbɔmɛi ale akɛ eji Yehowa kojomɔ diɛŋtsɛ, nɔ ni ekɛbaatse gbɛi ni apasa jamɔ ejɛ jeeŋmɔ beebe amɛwo he muji lɛ he. Shi te aaafee tɛŋŋ ni gbɔmɛi aaale akɛ ja mɔ ko ekɛɛ amɛ? Ni yɛ Yehowa Odasefoi asɛɛ lɛ namɛi akpaa amɛ gbɛ akɛ amɛbaakɛɛ amɛ?—Okɛto Ezekiel 35:14, 15; Romabii 10:13-15 he.
10. Mɛɛ mɛɛ gbɛ nɔ tutuamɔ ni Gog baatutua Yehowa webii Iɛ hu baafee wɔhemɔkɛyeli he kaa?
10 Yehowa Odasefoi ni afɔ amɛ mu lɛ kɛ amɛhefatalɔi ni yɔɔ shikpɔŋ nɔ hiɛnɔkamɔ lɛ yɛ ekãa ni he hiaa ni amɛkɛaagba mɛi krokomɛi Yehowa fɔbuu kojomɔ ni ekɛbaa Babilon Kpeteŋkpele lɛ kɛ Satan nibii agbɛjianɔtoo ni eshwɛ lɛ fɛɛ nɔ ni ebɛŋkɛ lɛ he sane. (2 Korintobii 4:4) Satan nitsumɔ akɛ Gog ni jɛ Magog, ni tsɔɔ gbɛhe ni aba lɛ shi ni eyɔɔ mli amrɔ nɛɛ lɛ mli ni ebaabua eshikpɔŋ nɔ tai lɛ fɛɛ anaa kɛha naagbee tutuamɔ ni ekɛaaba Nyɔŋmɔ webii lɛ anɔ lɛ. Abaaka hemɔkɛyeli ni ayɔɔ yɛ ŋwɛi hewalɛ ni buɔ Yehowa Odasefoi ahe lɛ mli lɛ akwɛ. Shi wɔbaanyɛ wɔna hemɔkɛyeli akɛ, taakɛ Nyɔŋmɔ Wiemɔ lɛ gba fɔ shi lɛ, ebaakpɔ ewebii lɛ.—Ezekiel 38:16; 39:18-23.
11, 12. (a) Mɛni ma Noa kɛ eweku lɛ yibaamɔ nɔ mi yɛ Nu Afua lɛ mli? (b) Mɛni esaaa akɛ wɔhaoɔ wɔhe yɛ he yɛ amanehulu kpeteŋkpele lɛ mli?
11 Ŋmɛnɛ, wɔleee gbɛ pɔtɛɛ ni Yehowa baatsɔ nɔ abu ewebii ahe yɛ “amanehulu kpeteŋkpele” lɛ mli, shi enɛ jeee nɔ ni aaaha oyiŋ afee bo kɔshikɔshi yɛ nakai ni eeefee lɛ he. (Mateo 24:21, 22) Shihilɛ ni Nyɔŋmɔ ŋmɛnɛŋmɛnɛ beaŋ tsuji lɛ yɔɔ mli lɛ baatamɔ nɔ ni Noa kɛ eweku lɛ na amɛhe yɛ mli yɛ Nu Afua lɛ mli lɛ. Akɛni aŋa amɛyi awo adeka lɛ mli ni hiɛkpatamɔ nui ni hoɔ kɛ foi lɛ ebɔle amɛhe kɛkpe hewɔ lɛ, eka shi faŋŋ akɛ ŋwɛi hewalɛ kpojiemɔ nɛɛ ha ŋmiŋmi kɛ gbeyeishemɔ mɔmɔ amɛ ni amɛkɛ hiɛdɔɔ baasɔle waa. Ŋmalɛ mli nɔ ko bɛ ni tsɔɔ akɛ amɛhao ni amɛbi amɛhe akɛ: ‘Ani adeka lɛ he wa bɔ ni aaaha eje hewalɛ ni kpataa nii ahiɛ nɛɛ mli? Ani wɔyɛ niyenii ni fa bɔ ni sa kɛyashi Nu Afua lɛ fɛɛ aaaba naagbee? Ani wɔbaanyɛ wɔdamɔ shihilɛi ni etsake yɛ shikpɔŋ nɔ lɛ naa yɛ enɛ sɛɛ?’ Nibii ni nyiɛ sɛɛ ba lɛ ye odase akɛ nɛkɛ haomɔi nɛɛ ahe ehiaaa.
12 Bɔni afee ni amɛma amɛyiwalaheremɔ nɔ mi lɛ, ehe miihia ni Noa kɛ eweku lɛ kɛ hemɔkɛyeli atsu nii. Enɛ tsɔɔ famɔi kɛ Nyɔŋmɔ mumɔ krɔŋkrɔŋ lɛ hiɛnyiɛmɔ sɛɛ ni amɛaanyiɛ. Yɛ amanehulu kpeteŋkpele lɛ mli hu lɛ, ebaafee nɔ ni he hiaa akɛ wɔɔdi mumɔ krɔŋkrɔŋ lɛ hiɛnyiɛmɔ sɛɛ ni wɔbo famɔi ni Yehowa tsɔɔ egbɛjianɔtoo lɛ nɔ ekɛhaa lɛ toi. Kɛkɛ lɛ nɔ ko bɛ ni wɔɔdamɔ nɔ wɔhao ni wɔbi akɛ: ‘Te wɔɔfee tɛŋŋ ni wɔnine aaashɛ wɔmumɔŋ kɛ heloo naa hiamɔ nii anɔ? Mɛɛ gbɛjianɔ abaato aha mɛi ni amɛdara yɛ afii amli lɛ loo mɛi ni tsofa-feemɔ krɛdɛɛ ko he hiaa amɛ lɛ? Mɛɛ gbɛ nɔ Yehowa aaatsɔ ni eha wɔnyɛ wɔje mli kɛyabote jeŋ hee lɛ mli?’ Yehowa tsuji anɔkwafoi lɛ fɛɛ kɛ hemɔkɛyeli ni wa baashi nɔ fɛɛ nɔ awo enyɛmɔ mli.—Okɛto Mateo 6:25-33 he.
13. Kɛ amanehulu kpeteŋkpele lɛ je shishi pɛ lɛ, mɛni hewɔ hemɔkɛyeli ni tamɔ Abraham nɔ lɛ he baahia wɔ lɛ?
13 Ŋwanejee ko bɛ he akɛ, kɛ amanehulu kpeteŋkpele lɛ na eje shishi pɛ lɛ, ebaawo hemɔkɛyeli ni wɔyɔɔ yɛ Nyɔŋmɔ mli lɛ mli hewalɛ waa. Yɛ fɛɛ sɛɛ lɛ, wɔbaana ni Yehowa miitsu nɔ ni ekɛɛ ebaatsu lɛ. Wɔkɛ wɔ diɛŋtsɛ wɔhiŋmɛii baana bɔ ni etsuɔ efɔbuu kojomɔ lɛ he nii ehaa lɛ! Shi ani wɔ diɛŋtsɛ lɛ wɔbaana hemɔkɛyeli ni fa bɔ ni sa ni aaaha wɔhe wɔye akɛ yɛ be mli ni Nyɔŋmɔ kpataa efɔŋfeelɔi lɛ ahiɛ lɛ, eeebaa ewebii ayi? Ani wɔbaatamɔ Abraham, ni na hemɔkɛyeli akɛ ‘shikpɔŋ lɛ fɛɛ nɔ Kojolɔ lɛ baafee nɔ ni ja,’ ni ekpataŋ jalɔi ahiɛ efataŋ efɔŋfeelɔi ahe lɛ?—1 Mose 18:23, 25.
14. Mɛɛ sanebimɔi esa akɛ eha wɔpɛi wɔhemɔkɛyeli mli ni wɔtsu nii waa ni wɔkɛwaje lɛ?
14 Kwɛ bɔ ni ehe hiaa akɛ wɔɔha wɔhemɔkɛyeli mli awa bianɛ! Akɛni nibii agbɛjianɔtoo fɔŋ nɛɛ naagbee ebɛŋkɛ kpaakpa hewɔ lɛ, nyɛhaa wɔŋmɛa Nyɔŋmɔ mumɔ lɛ gbɛ ni ekanyaa wɔ kɛyaa “jeŋbai krɔŋkrɔŋi kɛ Nyɔŋmɔ jamɔi amli.” (2 Petro 3:11-14) Kɛkɛ lɛ susumɔi ni gbaa mɔ jwɛŋmɔ naa tamɔ: ‘Ani misa mɔ ni enine shɛɔ Yehowa hebuu nɔ? Ani kulɛ manyɛ mafee babaoo yɛ esɔɔmɔ mli? Ani mitsu nii waa bɔ ni sa ni aaaha mawo “gbɔmɔ hee” lɛ? Ani miji gbɔmɔ ni Yehowa taoɔ yɛ ejeŋ hee lɛ mli?’ lɛ gbaŋ wɔnaa. Esa akɛ sanebimɔi ni hiɛdɔɔ yɔɔ mli ni tamɔ nɛkɛ lɛ aha wɔpɛi wɔhemɔkɛyeli mli ni wɔtsu nii waa ni wɔkɛwaje lɛ bianɛ!—Kolosebii 3:8-10.
Hemɔkɛyeli Baaha Wɔhe Awa Wɔ
15. Mɛni Yesu kɛɔ mɛi ni etsaa amɛ lɛ yɛ bei komɛi amli, shi mɛni hewɔ enɛ fiii ŋmɛnɛŋmɛnɛ beaŋ hemɔkɛyeli tsamɔ sɛɛ lɛ?
15 Yesu tsuuu gbɔmɔtsoŋ helatsamɔi anitsumɔi lɛ yɛ mɛi ni yɔɔ hemɔkɛyeli lɛ pɛ he. (Yohane 5:5-9, 13) No hewɔ lɛ enitsumɔi lɛ fiii hemɔkɛyeli tsamɔ tsɔɔmɔ ni bɛ Ŋmalɛ mli lɛ sɛɛ. Eji anɔkwale akɛ yɛ bei komɛi amli lɛ Yesu kɛɔ mɛi ni etsaa amɛ lɛ akɛ: “Ohemɔkɛyeli eha ohe ewao.” (Mateo 9:22; Marko 5:34; 10:52; Luka 8:48; 17:19; 18:42) Shi ekɛ enɛ kɛɛmɔ miitsɔɔ anɔkwale ko ni mli ka shi faŋŋ kɛkɛ: Kɛ mɛi ni he yeɔ lɛ bɛ hemɔkɛyeli yɛ Yesu nyɛmɔ ni ekɛtsaa mɛi lɛ mli lɛ, kulɛ amɛbaŋ eŋɔɔ koni etsa amɛ kwraa po.
16. Mɛɛ helatsamɔ gbɛjianɔtoo Yesu kudɔɔ ŋmɛnɛ?
16 Ŋmɛnɛ, Yesu Kristo miikudɔ mumɔŋ tsamɔ gbɛjianɔtoo ko, ni mɛi fe 4,000,000 kɛ amɛhe eha koni amɛna he sɛɛ. Akɛ Yehowa Odasefoi lɛ, amɛmiina mumɔŋ hewalɛnamɔ mli ŋɔɔmɔ yɛ gbɔmɔtsoŋ fatɔɔi ni ekolɛ amɛyɔɔ lɛ fɛɛ sɛɛ. Kristofoi ni afɔ amɛ mu ni yɔɔ amɛteŋ lɛ yɛ ŋwɛi hiɛnɔkamɔ, ni ‘amɛhaa amɛhiŋmɛii hiɔ nii ni anaaa ni hiɔ shi kɛyaa naanɔ lɛ anɔ.’ (2 Korintobii 4:16-18; 5:6, 7) Ni Kristofoi ni yɔɔ shikpɔŋ nɔ shihilɛ he hiɛnɔkamɔ lɛ miikpa gbɔmɔtsoŋ tsamɔi ni yɔɔ naakpɛɛ ni baaba mli yɛ Nyɔŋmɔ jeŋ hee lɛ mli lɛ gbɛ.
17, 18. Mɛɛ Yehowa gbɛjianɔtoo atsɔɔ mli yɛ Kpojiemɔ 22:1, 2, ni mɛɛ gbɛ nɔ ebiɔ hemɔkɛyeli dani wɔna he sɛɛ yɛ?
17 Bɔfo Yohane wie Nyɔŋmɔ gbɛjianɔtoo kɛha naanɔ wala lɛ he yɛ nɛkɛ wiemɔi nɛɛ amli yɛ Kpojiemɔ 22:1, 2: “Ni etsɔɔ mi wala nu faa krɔŋŋ ni mli tse tamɔ kristalo ashwishwɛ miijɛ Nyɔŋmɔ kɛ Toobi lɛ maŋtsɛsɛi lɛ mli. Ni eblohu lɛ teŋ kɛ faa lɛ toi biɛ kɛ biɛ fɛɛ lɛ, walatsei lɛ mamɔ shi, ni ewoɔ yibii shii nyɔŋma kɛ enyɔ, ni nyɔŋ fɛɛ nyɔŋ nɔ lɛ ewoɔ yibii, ni tso lɛ yibaai lɛ akɛtsaa jeŋmaji lɛ.” Nɔ ni fata “wala nu faa” lɛ he ji Nyɔŋmɔ anɔkwale Wiemɔ lɛ kɛ gbɛjianɔ fɛɛ gbɛjianɔ ni Yehowa eto koni akɛkpɔ adesai toibolɔi kɛjɛ esha kɛ gbele mli ni aha amɛ naanɔ wala yɛ Yesu kpɔmɔ afɔleshaa lɛ hewɔ lɛ. (Efesobii 5:26; 1 Yohane 2:1, 2) Beni amɛyɔɔ shikpɔŋ nɔ lɛ, Yesu sɛɛnyiɛlɔi 144,000 ni afɔ amɛ mu lɛ nuɔ Nyɔŋmɔ gbɛjianɔtoo kɛha wala kɛtsɔ Kristo nɔ lɛ nu lɛ ni atsɛɔ amɛ “jalɛ tsei.” (Yesaia 61:1-3; Kpojiemɔ 14:1-5) Amɛwo mumɔŋ yibii babaoo yɛ shikpɔŋ nɔ. Akɛ mɛi ni atee amɛ shi, ni yɔɔ ŋwɛi, yɛ Kristo Afii Akpe Nɔyeli be lɛ mli lɛ, amɛbaana kpɔmɔ nɔ lɛ he gbɛjianɔtoo ni akɛhaa ni atsɔɔ nɔ “akɛtsaa jeŋmaji lɛ” kɛjɛɔ esha kɛ gbele mli lɛ mli gbɛfaŋnɔ.
18 Kɛ wɔhemɔkɛyeli yɛ Nyɔŋmɔ gbɛjianɔtoi nɛɛ amli lɛ mli wa lɛ, babaoo hu wɔbaasumɔ akɛ wɔɔnyiɛ emumɔ lɛ gbɛtsɔɔmɔ sɛɛ ni wɔna mli gbɛfaŋnɔ. Eka shi faŋŋ akɛ emuuyeli yɛ gbɔmɔtsoŋ baaba yɛ be mli ni mɔ ko naa Kristo mli hemɔkɛyeli ni eyaa ehiɛ yɛ mumɔŋ lɛ. Eyɛ mli akɛ atsa aŋkro ko gbɔmɔtsoŋ fatɔɔi wuji lɛ yɛ naakpɛɛ gbɛ nɔ moŋ, shi akɛ lɛ baabɛŋkɛ emuuyeli he yɛ be mli ni etsuɔ nɔ ni ja lɛ. Ebaana Nyɔŋmɔ gbɛjianɔtoo kɛha tsamɔ kɛtsɔ Kristo afɔleshaa lɛ nɔ lɛ mli gbɛfaŋnɔ daa. No hewɔ lɛ hemɔkɛyeli baana hewalɛ yɛ tsamɔ ni atsaa wɔ kɛ emuu ni wɔyeɔ yɛ gbɔmɔtsoŋ lɛ nɔ.
“Ahere Nyɛyiwala Kɛtsɔ Hemɔkɛyeli Nɔ”
19. Mɛni hewɔ ehe hiaa akɛ wɔɔfee shiŋŋ yɛ hemɔkɛyeli mli lɛ?
19 Dani Nyɔŋmɔ jeŋ hee ni baa lɛ jetsɛremɔ lɛ aaakpata ŋmɛnɛŋmɛnɛ yiwalɛ jeŋ fɔŋ nɛɛ mli duŋ lɛ hiɛ kwraa lɛ, kwɛ bɔ ni ehe hiaa akɛ Yehowa tsuji aaafee shiŋŋ yɛ hemɔkɛyeli mli! Abaashɛrɛ gbɔmɛi “ni bɛ hemɔkɛyeli” lɛ awo “kpaakpo lɛ ni tsoɔ kɛ la kɛ swɔɔ,” ni ji gbele ni ji enyɔ lɛ mli. Enɛ baaba yɛ naagbee kaa ni baa yɛ Kristo Afi Akpe Nɔyeli lɛ sɛɛ lɛ mli. (Kpojiemɔ 20:6-10; 21:8) Kwɛ bɔ ni nɔ ni baajɛ mli aba mɛi ni yaa nɔ amɛnaa hemɔkɛyeli ni amɛjeɔ mli kɛyaboteɔ naanɔ wɔsɛɛ be lɛ mli ŋɔɔmɔ mli lɛ anɔ lɛ baafee nɔ ni ajɔɔ!
20. 1 Korintobii 13:13 baana shishinumɔ krɛdɛɛ ko yɛ Kristo Afii Akpe Nɔyeli lɛ naagbee yɛ mɛɛ gbɛ nɔ?
20 Kɛkɛ lɛ Paulo wiemɔi ni yɔɔ 1 Korintobii 13:13 lɛ baana shishinumɔ krɛdɛɛ ko: “Agbɛnɛ hemɔkɛyeli, hiɛnɔkamɔ, suɔmɔ, nɛkɛ nibii etɛ nɛɛ hiɔ shi; shi suɔmɔ ji amɛteŋ nɔ ni da fe fɛɛ.” Ehe ebahiaŋ ni wɔna hemɔkɛyeli akɛ gbalɛ shiwoo ni yɔɔ 1 Mose 3:15 lɛ baaba mli pɔtɛɛ aloo ni wɔhiɛ aaaka nɔ akɛ ebaaba mli diɛŋtsɛ. No mli lɛ eba momo. Akɛ emuuyeli mlihiɛlɔi lɛ, wɔbaaya nɔ wɔkɛ wɔhiɛ afɔ Yehowa nɔ, akɛ mɛi ni yɔɔ lɛ kɛ e-Bi lɛ mli hemɔkɛyeli, ni wɔsumɔ amɛ akɛ mɛi ni ha gbalɛ nɛɛ ba mli. Agbɛnɛ, suɔmɔ ni mli kwɔ kɛ tsuiŋ shidaa kɛha wɔyiwalaheremɔ lɛ baafimɔ wɔ akpɛtɛ Nyɔŋmɔ he yɛ hetuu-kɛhamɔ ni fiteee mli kɛya naanɔi fɛɛ mli.—1 Petro 1:8, 9.
21. Mɛni esa akɛ wɔfee ŋmɛnɛ koni “ahere wɔyiwala kɛtsɔ hemɔkɛyeli nɔ”?
21 Yehowa etsɔ esafo ni anaa lɛ nɔ eto gbɛjianɔ ni yɔɔ naakpɛɛ koni akɛwaje hemɔkɛyeli. Okɛ nakai hegbɛ lɛ fɛɛ atsu nii. Yaa Nyɔŋmɔ webii akpeei lɛ daa ni okɛ ohe awo mli. (Hebribii 10:24, 25) Okɛ hiɛdɔɔ akase e-Wiemɔ lɛ kɛ Kristofoi awoji lɛ. Kpa Yehowa fai ni eha bo emumɔ krɔŋkrɔŋ lɛ. (Luka 11:13) Kasemɔ mɛi ni kɛ heshibaa nyiɛɔ asafo lɛ hiɛ lɛ ahemɔkɛyeli lɛ. (Hebribii 13:7) Tee shi owo je lɛŋ kaai lɛ. (Mateo 6:9, 13) Hɛɛ, ni oha wekukpaa ni ka okɛ Yehowa teŋ lɛ mli akwɔ waa yɛ gbɛ fɛɛ gbɛ ni ooonyɛ nɔ. Nɔ ni fe fɛɛ lɛ, yaa nɔ yɛ hemɔkɛyeli ni ojieɔ lɛ kpo lɛ mli. Kɛkɛ lɛ obaanyɛ ofata mɛi ni saa Yehowa hiɛ ni amɛnine shɛɔ yiwalaheremɔ nɔ lɛ ahe, ejaakɛ Paulo jaje akɛ: “Ejaakɛ duromɔ aŋɔhere nyɛyiwala kɛtsɔ hemɔkɛyeli nɔ, ni enɛ lɛ jeee nyɛmli ejɛ, Nyɔŋmɔ nɔkeenɔ ni.”—Efesobii 2:8.
Mɛni Ji Ohetooi?
◻ Mɛɛ hemɔkeyeli he kaai jwere wɔhiɛ nɔŋŋ?
◻ Mɛɛ gbɛi sɔrɔtoi enyɔ nɔ wɔhemɔkɛyeli Iɛ baaha wɔhe awa wɔ yɛ?
◻ Taakɛ 1 Petro 1:9 tsɔɔ lɛ, esa akɛ wɔhiɛ wɔhemɔkɛyeli mli kɛyashi mɛɛ be?
◻ Mɛɛ gbɛjianɔtoi wɔyɔɔ ni baawaje wɔhemɔkɛyeli?
[Mfoniri ni yɔɔ baafa 15]
Taakɛ tsɛ ni Yesu tsa ebinuu Iɛ hela lɛ ji lɛ, ani oonu he akɛ hemɔkɛyeli babaoo he miihia bo?
[Mfoniri ni yɔɔ baafa 17]
Hemɔkɛyeli ni tamɔ Noa kɛ eweku lɛ nɔ he baahia koni aje “amanehulu kpeteŋkpele” lɛ mli