‘Etamɔ Sardi Tɛ’

BƆFO Yohane na anunyam maŋtsɛsɛi ko ni yɔɔ ŋwɛi he ninaa. Mɔ ni ta maŋtsɛsɛi lɛ nɔ lɛ su tamɔ “yaspi tɛ.” Esu tamɔ “sardi tɛ” hu. (Kpojiemɔ 4:2, 3) Mɛɛ tɛi ahe awieɔ nɛɛ?

Tɛi nɛɛ jeee tɛi komɛi ni hiɛ kpɛ́lɛɔ shi la kpɛmɔ nyɛɛɛ atsɔ mli. Yɛ blema beaŋ lɛ, akɛ Hela wiemɔ ni atsɔɔ shishi akɛ “yaspi” lɛ tsu nii kɛdamɔ shi aha tɛi ni hiɛ sui srɔtoi, ni ojarawatɛi ni la kpɛmɔ nyɛɔ etsɔɔ mli fata he. A. T. Robertson tsɔɔ mli yɛ wolo ni ji Word Pictures in the New Testament lɛ mli akɛ: “Ekã shi faŋŋ akɛ jeee ŋmɛnɛŋmɛnɛ beaŋ yaspi tɛ ni jara waaa” lɛ he awieɔ yɛ Kpojiemɔ 4:3 lɛ. Kɛfata he lɛ, Yohane wie ŋwɛi maŋ, ni ji Yerusalem lɛ he yɛ sɛɛ mli yɛ Kpojiemɔ wolo lɛ mli ni ekɛɛ akɛ: “Ekpɛ́ɔ tamɔ tɛ ni jara wa fe fɛɛ, tamɔ yaspi tɛ ni mli tse akɛ kristalo ashwishwɛ.” (Kpojiemɔ 21:10, 11) Eyɛ faŋŋ akɛ tɛi ni Yohane wieɔ he lɛ ji tɛi komɛi ni la kpɛmɔ nyɛɔ etsɔɔ mli.

Mɔ ni Yohane na yɛ ninaa lɛ mli ni eta maŋtsɛsɛi nɔ lɛ ji anunyam Mɔ ni fe fɛɛ yɛ je lɛŋ, ni ji Yehowa Nyɔŋmɔ. Ehe tse ni eyɛ krɔŋkrɔŋ hu fe mɛi fɛɛ yɛ jeŋ muu lɛ fɛɛ. Yɛ enɛ kɛ gbeekpamɔ naa lɛ, bɔfo Yohane ŋma akɛ: “Nyɔŋmɔ lɛ, la ji lɛ, ni duŋ ko bɛ emli kwraa.” (1 Yohane 1:5) No hewɔ lɛ, Yohane wo enanemɛi heyelilɔi lɛ hewalɛ koni ‘amɛtsuu amɛhe taakɛ Yehowa he tse lɛ.’—1 Yohane 3:3.

Mɛni esa akɛ wɔfee koni Yehowa abu wɔ akɛ mɛi ni he tse? Ehe miihia waa ni wɔná Kristo lá ni efɔse eshwie shi koni wɔná eshaifaa lɛ mli hemɔkɛyeli. Esa akɛ ‘wɔnyiɛ la lɛ mli’ hu kɛtsɔ Biblia lɛ ní wɔɔkase daa, ní wɔhi shi yɛ etsɔɔmɔi lɛ anaa lɛ nɔ.—1 Yohane 1:7.