Yitso 14
Yehowa Ŋwɛi Maŋtsɛsɛi lɛ Anunyam Lɛ
Ninaa 2—Kpojiemɔ 4:1–5:14
Saneyitso: Nibii ni yɔɔ gbeyei kɛ naakpɛɛ miiya nɔ yɛ Nyɔŋmɔ kojomɔ maŋtsɛsɛi lɛ hiɛ
Emlibaa Be: Nɛkɛ ninaa nɛɛ kɔɔ nibii ni ba kɛjɛ 1914 aahu kɛyashi afii akpe lɛ naagbee kɛ esɛɛ, yɛ be mli ni bɔɔ nɔ fɛɛ bɔɔ nɔ ni yɔɔ ŋwɛi kɛ shikpɔŋ nɔ baajie Yehowa yi lɛ he.—Kpojiemɔ 5:13
1. Mɛni hewɔ esa akɛ wɔnya Yohane ninai ni egbaa wɔ emli saji lɛ ahe waa lɛ?
YOHANE jeɔ shishi egbaa wɔ ninai ni kanyaa susuma lɛ mli saji. Eyɛ mumɔ mli yɛ Nuŋtsɔ lɛ gbi lɛ mli lolo. No hewɔ lɛ, nɔ ni etsɔɔ mli lɛ hiɛ shishinumɔ ko ni mli kwɔ waa kɛha wɔ mɛi ni wɔyɔɔ wala mli yɛ nakai gbi lɛ mli lɛ. Yehowa tsɔ nɛkɛ ninai nɛɛ anɔ ejie nɔ ni eha ŋwɛi ni anaaa jɛmɛ lɛ hiɛ lɛ diɛŋtsɛ ni ehaa wɔleɔ ekojomɔi ni ekɛbaaba shikpɔŋ lɛ nɔ lɛ mli. Agbɛnɛ, kɛ wɔji mɛi ni yɔɔ ŋwɛi loo shikpɔŋ nɔ hiɛnɔkamɔ lɛ, nɛkɛ kpojiemɔi nɛɛ yeɔ buaa wɔ ni wɔnaa wɔ gbɛhe yɛ Yehowa yiŋtoo mli. No hewɔ lɛ, esa akɛ wɔya nɔ ni wɔnya Yohane wiemɔ nɛɛ he akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi lɛ, kɛ mɛi ni ŋɔɔ nibii ni aŋma yɛ mli lɛ amɛtoɔ lɛ.”—Kpojiemɔ 1:3, New World Translation.
2. Mɛɛ niiashikpamɔ Yohane na agbɛnɛ?
2 Nɔ ni nyiɛ sɛɛ ni Yohane na lɛ fe nɔ fɛɛ nɔ ni adesai ni yɔɔ ŋmɛnɛŋmɛnɛ beaŋ lɛ naa yɛ video nɔ lɛ! Eŋma akɛ: “Nii nɛɛ asɛɛ lɛ mikwɛ ni naa, shinaa ko ni agbele yɛ ŋwɛi; ni klɛŋklɛŋ gbee ni minu ni tamɔ tɛtrɛmaŋtrɛ ni kɛ mi wie lɛ kɛɛ: Kwɔɔ kɛba biɛ nɛɛ, ni matsɔɔo nii ni sa akɛ aba mli yɛ nii nɛɛ asɛɛ.” (Kpojiemɔ 4:1) Yohane ni yɔɔ ninaa mli lɛ gbu shi kɛtee ŋwɛi ni anaaa jɛmɛ lɛ yɛ Yehowa hiɛ, he ni awo nɔ grɔŋŋ kwraa fe wɔ ŋwɛiniiaŋ shɔŋŋ ni ŋmɛnɛŋmɛnɛ beaŋ ŋulamiiaŋ shifolɔi eyakpa shi yɛ jɛmɛ lɛ, nɔ ni kwɔ kwraa fe wɔ jeŋ muu fɛɛ ŋulamii kuikui nɛɛ. Afɔ nine atsɛ Yohane koni ekɛ ehiŋmɛi abakwɛ naakpɛɛ nii ni tsakeɔ yɛ be fɛɛ mli yɛ ŋwɛi mumɔi ashihilɛ he ni kwɔ fe fɛɛ, yɛ he ni Yehowa diɛŋtsɛ ta maŋtsɛsɛi nɔ yɛ lɛ tamɔ shinaa ko ni agbele naa ni eetsɔ mli. (Lala 11:4; Yesaia 66:1) Mɛɛ hegbɛ po nɛ!
3. Mɛni “gbee ni tamɔ tɛtrɛmaŋtrɛ” lɛ kaiɔ wɔ, ni ŋwanejee ko bɛ he akɛ namɔ ji enɛ Jɛɛhe?
3 Biblia lɛ etsɔɔɔ nɔ ni “klɛŋklɛŋ gbee” lɛ ji. Taakɛ Yesu gbee ni wa ni anu kɛjɛ shishijee lɛ ji lɛ, egbɛɛmɔ tamɔ tɛtrɛmaŋtrɛ ni naa wa. (Kpojiemɔ 1:10, 11) Ehaa wɔkaiɔ tɛtrɛmaŋtrɛ gbɛɛmɔ ni fee okadi akɛ Yehowa eba Sinai Gɔŋ lɛ nɔ lɛ. (2 Mose 19:18-20) Ŋwanejee ko bɛ he akɛ, Yehowa ji famɔ fɛɛ Jɛɛhe kpeteŋkpele. (Kpojiemɔ 1:1) Egbele shinaa lɛ koni Yohane atsɔ ninaa mli abote Yehowa maŋtsɛyeli nɔyeli he kpeteŋkpele lɛ krɔŋkrɔŋ fe fɛɛ lɛ mli.
Yehowa Hiɛ ni Kpɛlɛɔ Kaŋkaŋ Lɛ
4. (a) Mɛni ji shishinumɔ ni Yohane ninaa lɛ yɔɔ kɛha Kristofoi ni afɔ amɛ mu lɛ? (b) Mɛɛ shishinumɔ ninaa lɛ yɔɔ kɛha mɛi ni yɔɔ hiɛnɔkamɔ akɛ amɛaahi shi kɛya naanɔ yɛ shikpɔŋ nɔ lɛ?
4 Mɛni Yohane naa? Bo toi, yɛ be mli ni egbaa wɔ eniiashikpamɔ ni yɔɔ nyam lɛ: “Ni amrɔ lɛ miyɛ mumɔ mli; ni naa, maŋtsɛsɛi ko ma shi yɛ ŋwɛi, ni mɔ ko ta maŋtsɛsɛi lɛ nɔ.” (Kpojiemɔ 4:2) Yɛ hiŋmɛitswaa mli lɛ, atsɔ Nyɔŋmɔ mumɔ ni tsuɔ nii lɛ nɔ akɛ Yohane tee Yehowa maŋtsɛsɛi lɛ hiɛ diɛŋtsɛ yɛ mumɔ mli. Kwɛ miishɛɛ ni enɛ ji kɛha Yohane! Aha etsɔ hiɛ ena ŋwɛi he ni asaa “gboshinii ni fiteee ni he bɛ kpa ko ni ekwaaa” ni kpɛlɛɔ kaŋkaŋ lɛ ato aha lɛ kɛ Kristofoi krokomɛi ni afɔ amɛ mu lɛ he ninaa ni kpɛlɛɔ. (1 Petro 1:3-5; Filipibii 3:20) Kɛha mɛi ni amɛhiɛnɔkamɔ ji ni amɛhi shi kɛya naanɔ yɛ shikpɔŋ nɔ lɛ, Yohane ninaa lɛ hu ji nɔ ko ni shishinumɔ yɔɔ mli waa kɛha amɛ. Eyeɔ ebuaa amɛ ni amɛnuɔ anunyam ni yɔɔ Yehowa hiɛ kɛ bɔ ni Yehowa kɛ ŋwɛi nɔyeli gbɛjianɔtoo lɛ tsuɔ nii ehaa ni ekɛkojoɔ jeŋmaji lɛ ni yɛ no sɛɛ lɛ ekɛyeɔ adesai awala nɔ yɛ shikpɔŋ nɔ lɛ shishi. Yehowa ji Nyɔŋmɔ ni toɔ gbɛjianɔ kpakpa fe fɛɛ lɛlɛŋ!
5. Mɛni diɛŋtsɛ ji nɔ ni Yohane naa ni akɛ kpaŋmɔ adeka lɛ kpatamɔ sɛi lɛ fee he mfoniri lɛ?
5 Nibii ni Yohane na yɛ ŋwɛi lɛ tamɔ nibii ni yɔɔ kpee buu ni yɔɔ ŋa lɛ nɔ lɛ mli lɛ. Atsɔ hiɛ ama enɛ aaafee afii 1,600 akɛ anɔkwa jamɔ kpee buu kɛha Israelbii lɛ. Nɔ ni yɔɔ nakai kpee buu lɛ Krɔŋkrɔŋ Fe Fɛɛ lɛ mli ji kpaŋmɔ adeka lɛ, ni nakai Adeka lɛ kpatamɔ sɛi ni akɛ shika ŋmiiŋmi efee lɛ nɔ Yehowa diɛŋtsɛ wieɔ kɛjɛɔ. (2 Mose 25:17-22; Hebribii 9:5) No hewɔ lɛ, Adeka lɛ kpatamɔ sɛi lɛ sɔmɔɔ akɛ Yehowa maŋtsɛsɛi lɛ he okadi. Yohane miina nakai okadi nibii lɛ pɔtɛɛ agbɛnɛ: Jeŋ Muu Fɛɛ Nuŋtsɔ Yehowa diɛŋtsɛ ni ta shi fɛfɛo yɛ anunyam fɛɛ mli yɛ eŋwɛi maŋtsɛsɛi ni kwɔ grɔŋŋ lɛ nɔ!
6. Mɛni Yohane haa wɔyooɔ loo wɔnaa yɛ Yehowa he, ni mɛni hewɔ enɛ sa lɛ?
6 Nɔ ni tamɔɔɔ gbalɔi ni tsɔ hiɛ ni na Yehowa maŋtsɛsɛi lɛ he ninai lɛ, Yohane etsɔɔɔ bɔ ni Mɔ Krɔŋkrɔŋ ni ta nɔ lɛ ji lɛ mli fitsofitso. (Ezekiel 1:26, 27; Daniel 7:9, 10) Shi Yohane haa wɔnaa bɔ ni esusuɔ Mɔ ni ta maŋtsɛsɛi lɛ nɔ lɛ he ehaa lɛ yɛ nɛkɛ wiemɔi nɛɛ amli: “Ni mɔ ni ta nɔ lɛ, kɛ akwɛ lɛ lɛ, etamɔ yaspi kɛ sardi tɛ, ni kwaabuɛtɛ bɔle maŋtsɛsɛi lɛ he, ni kɛ akwɛ lɛ, etamɔ smaragde tɛ.” (Kpojiemɔ 4:3) Mɛɛ anunyam ni anyɛŋ akɛ nɔ ko ato he nɛ! Yohane na nɔ ko ni yɔɔ fɛo ni kpɛlɛɔ tamɔ ojarawa tɛi ni asha he ni miikpɛlɛ. Kwɛ bɔ ni enɛ kɛ bɔ ni kaselɔ Yakobo tsɔɔ akɛ Yehowa ji lɛ mli eha akɛ “lai a-Tsɛ” lɛ kpaa gbee ehaa! (Yakobo 1:17) Beni eŋma Kpojiemɔ lɛ sɛɛ etsɛɛɛ ni Yohane diɛŋtsɛ jaje akɛ: “Nyɔŋmɔ lɛ, la ji lɛ, ni duŋ ko bɛ emli kwraa.” (1 Yohane 1:5) Mɛɛ anunyam Gbɔmɔ ni nɔ bɛ Yehowa ji diɛŋtsɛ nɛkɛ!
7. Mɛni wɔbaanyɛ wɔkase kɛjɛ anɔkwale ni eji akɛ kwaabuɛtɛ ebɔle Yehowa maŋtsɛsɛi lɛ he kɛkpe lɛ mli?
7 Kadimɔ akɛ Yohane na ni kwaabuɛtɛ ebɔle maŋtsɛsɛi lɛ he, ni esu tamɔ smaragde tɛ baa ŋmɔŋ. Hela wiemɔ ni atsɔɔ shishi yɛ biɛ akɛ kwaabuɛtɛ (irʹis) lɛ tsɔɔ nɔ ko ni yɔɔ kokoloo. Atsi kwaabuɛtɛ ta klɛŋklɛŋ yɛ Biblia lɛ mli akɛto Noa gbii lɛ ahe. Beni Nua Afua lɛ ba shi lɛ, Yehowa ha kwaabuɛtɛ pue yɛ atatui lɛ amli, ni etsɔɔ nɔ ni edamɔ shi kɛha lɛ mli yɛ nɛkɛ wiemɔi nɛɛ amli: “Miŋɔ mikwaabuɛtɛ mito atatui lɛ amli, ni efee kpaŋmɔ ni yɔɔ mi kɛ shikpɔŋ lɛ teŋ lɛ he okadi. Ni makai mikpaŋmɔ lɛ ni mikɛ nyɛ kɛ wala susuma fɛɛ wala susuma ni yɔɔ heloo fɛɛ mli ekpaŋ lɛ, ni nui lɛ tsɔŋ afua ni eeekpata heloo fɛɛ hiɛ dɔŋŋ.” (1 Mose 9:13, 15) Belɛ mɛni ji nɔ ni nɛkɛ ŋwɛi ninaa nɛɛ baaha Yohane akai? Kwaabuɛtɛ ni ena lɛ baakai lɛ yɛ bɔ ni ehe hiaa ni toiŋjɔlɛ wekukpaa akã Yehowa kɛ mɔ ko teŋ, tamɔ nɔ ni Yohane kuu lɛ naa mli ŋɔɔmɔ ŋmɛnɛ lɛ. Agbɛnɛ hu, bɔ ni Yehowa hiɛ baa yɔɔ kpoo ni toiŋjɔlɛ yɔɔ mli, kpoofeemɔ ni abaakpa mli aha adesai toibolɔi fɛɛ yɛ be mli ni Yehowa shiɔ ebuu ehaa adesai fɛɛ nɔ yɛ shikpɔŋ hee lɛ nɔ lɛ baaka ejwɛŋmɔ mli.—Lala 119:165; Filipibii 4:7; Kpojiemɔ 21:1-4.
Onukpai 24 lɛ ni Ayooɔ Amɛ
8. Namɛi Yohane na ni amɛbɔle maŋtsɛsɛi lɛ he lɛ, ni amɛdamɔ shi kɛha namɛi?
8 Yohane le akɛ ahalaa osɔfoi lɛ koni amɛsɔmɔ yɛ blema kpee buu lɛ mli. No hewɔ lɛ nɔ ni ena ni etsɔɔ mli kɛnyiɛ sɛɛ lɛ baaha enaa akpɛ ehe: “Ni maŋtsɛsɛi lɛ he lɛ maŋtsɛsɛii nyɔŋmai-enyɔ kɛ ejwɛ mamɔ shi kɛkpe, ni onukpai nyɔŋmai-enyɔ kɛ ejwɛ tara sɛii lɛ anɔ, amɛwo atadei yɛji ni shika akekerei fimɔ amɛyitsei.” (Kpojiemɔ 4:4) Hɛɛ, ni aaana osɔfoi moŋ lɛ, ana onukpai 24, ni amɛtara maŋtsɛsɛii anɔ ni akekerei bumɔ amɛyitsei tamɔ maŋtsɛmɛi. Namɛi ji onukpai nɛɛ? Amɛjeee mɛi komɛi akɛ Kristofoi asafo lɛ mli mɛi ni afɔ amɛ mu lɛ, ni atee amɛ shi ni amɛtara ŋwɛi gbɛhei ni Yehowa wo amɛ shi yɛ he lɛ. Te wɔfeɔ tɛŋŋ wɔleɔ enɛ?
9, 10. Te wɔfeɔ tɛŋŋ wɔleɔ akɛ onukpai 24 lɛ damɔ shi kɛha Kristofoi asafo ni afɔ amɛ mu lɛ ni yɔɔ eŋwɛi gbɛhe yɛ anunyam mli lɛ?
9 Klɛŋklɛŋ kwraa lɛ, amɛbumɔ maŋtsɛfaii. Biblia lɛ wieɔ Kristofoi ni afɔ amɛ mu lɛ ahe akɛ amɛnine shɛɔ ‘akekere ni fiteee nɔ,’ ni amɛnine shɛɔ naanɔ wala nɔ—wala ni gbele bɛ mli. (1 Korintobii 9:25; 15:53, 54) Shi akɛni nɛkɛ onukpai 24 nɛɛ tara maŋtsɛsɛii anɔ hewɔ lɛ, shika akekere ni fimɔ amɛyitsei lɛ damɔ shi kɛha odehei ahegbɛ. (Okɛto Kpojiemɔ 6:2; 14:14 he.) Enɛ fiɔ sanenaamuu akɛ onukpai 24 lɛ feɔ Yesu nanemaa hei asɛɛnyiɛlɔi ni afɔ amɛ mu lɛ he mfoniri yɛ amɛ ŋwɛi gbɛhe lɛ sɛɛ, ejaakɛ Yesu kɛ amɛ efee kpaŋmɔ koni amɛbatara maŋtsɛsɛii anɔ yɛ e-Maŋtsɛyeli lɛ mli. (Luka 22:28-30) Atsɔɔ mli akɛ Yesu kɛ nɛkɛ onukpai 24 nɛɛ pɛ—ni ŋwɛi bɔfoi lɛ po fataaa he—yeɔ maŋtsɛ yɛ ŋwɛi yɛ Yehowa hiɛ.
10 Enɛ kɛ shiwoo ni Yesu kɛha Laodikea asafo lɛ kpaa gbee: “Kunimyelɔ lɛ, maha lɛ hegbɛ ni ekɛ mi ata mimaŋtsɛsɛi lɛ nɔ.” (Kpojiemɔ 3:21) Shi ŋwɛi nitsumɔ ni akɛha onukpai 24 lɛ jeee nɔ ni aje he husu aha nɔyeli he nitsumɔ pɛ. Beni ekpaa Kpojiemɔ wolo lɛ hiɛ lɛ, Yohane kɛɛ yɛ Yesu he akɛ: “Eŋɔ wɔ efee maŋtsɛmɛi kɛ osɔfoi eha e-Tsɛ Nyɔŋmɔ lɛ.” (Kpojiemɔ 1:5, 6) Mɛnɛɛmɛi bafeɔ maŋtsɛmɛi kɛ osɔfoi fɛɛ. “Amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.”—Kpojiemɔ 20:6.
11. Mɛni hewɔ esa akɛ onukpai lɛ ayibɔ afee 24 lɛ, ni mɛni ji nɔ ni nakai yibɔ lɛ tsɔɔ?
11 Mɛni ji nɔ ni yibɔ okadi ni ji 24 lɛ tsɔɔ, yɛ nɔ ni Yohane na onukpai 24 ni ebɔle maŋtsɛsɛi lɛ he lɛ hewɔ? Akɛ blema Israel osɔfoi anɔkwafoi lɛ fee mɛnɛɛmɛi ahe mfoniri yɛ gbɛi sɔrɔtoi anɔ. Bɔfo Petro ŋma eyaha Kristofoi ni afɔ amɛ mu lɛ akɛ: “Shi nyɛ lɛ, weku ni ahala ji nyɛ, maŋtsɛmɛi ni yeɔ osɔfoi, jeŋmaŋ krɔŋkrɔŋ, maŋ ni eŋɔfee enɔ.” (1 Petro 2:9) Nɔ ni yɔɔ miishɛɛ ji akɛ, ajara blema Yudafoi osɔfoyeli lɛ mli afee lɛ kui 24. Kuu fɛɛ kuu yɛ otsii ni ekɛsɔmɔɔ yɛ Yehowa hiɛ yɛ afi lɛ mli, no hewɔ lɛ atsuɔ sɔɔmɔ krɔŋkrɔŋ lɛ he nii ni afooo mli. (1 Kronika 24:5-19) Belɛ eja mɔ akɛ aaafee onukpai 24 he mfoniri yɛ Yohane ninaa ni kɔɔ ŋwɛi osɔfoyeli lɛ he lɛ mli ejaakɛ nɛkɛ osɔfoyeli nɛɛ sɔmɔɔ Yehowa daa, ni afooo mli. Kɛ agbe naa lɛ, abaana kui 24, ni kuu fɛɛ kuu hiɛ kunimyelɔi 6,000, ejaakɛ Kpojiemɔ 14:1-4 kɛɔ wɔ akɛ 144,000 (24 x 6,000) lɛ ji mɛi ni “ahe kɛjɛ adesai ateŋ” koni amɛkɛ Toobi, Yesu Kristo adamɔ ŋwɛi Zion Gɔŋ lɛ nɔ. Akɛni yibɔ okadi 12 lɛ damɔ shi kɛha ŋwɛi gbɛjianɔtoo ni ŋmɛɔ pɛpɛɛpɛ hewɔ lɛ, 24 lɛ bɔɔ he toi enyɔ—aloo ewoɔ gbɛjianɔtoo ni tamɔ nɛkɛ mli hewalɛ.
Sarawai, Gbee kɛ Nugbɔshiimɔi
12. Mɛni Yohane na ni enu yɛ no sɛɛ, ni mɛni “sarawai kɛ gbee kɛ nugbɔshiimɔi” lɛ kɛbaa ojwɛŋmɔ mli?
12 Mɛni Yohane na ni enu hu yɛ enɛ sɛɛ? “Ni sarawai kɛ gbee kɛ nugbɔshiimɔi jɛ maŋtsɛsɛi lɛ mli.” (Kpojiemɔ 4:5a) Kwɛ bɔ ni enɛ haa wɔkaiɔ Yehowa ŋwɛi hewalɛ lɛ kpojiemɔ yɛ gbɛ ni yɔɔ gbeyei nɔ lɛ! Akɛ nɔkwɛmɔnɔ lɛ, beni Yehowa “kpeleke shi” kɛba Sinai Gɔŋ lɛ nɔ lɛ, Mose bɔ amaniɛ akɛ: “Ni eba mli akɛ gbi ni ji gbi etɛ lɛ nɔ leebi lɛ, nugbɔshiimɔi kɛ sarawa gbalamɔi kɛ atatu kpii ba gɔŋ lɛ nɔ, kɛ tɛtrɛmaŋtrɛ gbee ni naa wa naakpa; . . . Ni beni tɛtrɛmaŋtrɛ lɛ gbɛɛɔ waa kɛyaa nɔ lɛ, Mose wie ni Nyɔŋmɔ kɛ gbee here lɛ nɔ.”—2 Mose 19:16-19.
13. Sarawai ni baa kɛjɛɔ Yehowa maŋtsɛsɛi lɛ mli lɛ feɔ mɛni he mfoniri?
13 Yɛ Nuŋtsɔ lɛ gbi lɛ mli hu lɛ, Yehowa haa anuɔ ehewalɛ kɛ ba ni eba lɛ he yɛ gbɛ ni yɔɔ nyam nɔ. Dabi, jeee kɛtsɔ sarawa gbamɔ diɛŋtsɛ nɔ, ejaakɛ Yohane miina okadii. Belɛ mɛni ji nɔ ni sarawai lɛ damɔ shi kɛha? Ojogbaŋŋ, sarawa gbalamɔ lɛ baanyɛ akpɛlɛ, ni ebaanyɛ eyi mɔ ko nɔ ni egbe lɛ hu. No hewɔ lɛ, nɛkɛ sarawa ni faa kpo kɛjɛɔ Yehowa maŋtsɛsɛi lɛ mli lɛ feɔ hiɛtɛjemɔ loo shishinumɔ ni etee nɔ ekɛha ewebii lɛ yɛ be fɛɛ mli, kɛ agbɛnɛ nɔ ni jeɔ kpo yɛ faŋŋ mli lɛ, ekojomɔ shɛɛ saji ni tamɔ la lɛ.—Okɛto Lala 18:15; 144:5, 6; Mateo 4:14-17; 24:27 he.
14. Gbeei ejije ŋmɛnɛ yɛ mɛɛ gbɛ nɔ?
14 Ni gbee lɛ hu? Yɛ be mli ni Yehowa kpelekeɔ shi kɛbaa Sinai Gɔŋ lɛ nɔ lɛ, gbee ko wie tsɔɔ Mose. (2 Mose 19:19) Gbee ni jɛ ŋwɛi ji nɔ ni jaje famɔi kɛ saji sɔrɔtoi ni yɔɔ Kpojiemɔ wolo lɛ mli lɛ pii. (Kpojiemɔ 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Ŋmɛnɛ, Yehowa hu kɛ famɔi kɛ sane jajemɔi eha ewebii, ni eha shishinumɔ ni amɛyɔɔ yɛ Biblia mli gbalɛi kɛ shishitoo mlai ahe lɛ mli efee faŋŋ ni emli ekpɛ. Afɔɔ saji ni kɔɔ hiɛtɛjemɔ loo nibii ahe shishinumɔ he lɛ kɛhamɔ yɛ majimaji ateŋ kpeei ashishi, ni ajajeɔ nɛkɛ Biblia mli anɔkwalei nɛɛ hu atsɔɔ yɛ jeŋ muu fɛɛ. Bɔfo Paulo wie sanekpakpa lɛ shiɛlɔi anɔkwafoi lɛ ahe akɛ: “Lɛlɛŋ akɛ amɛgbee ejije kɛtee shikpɔŋ muu lɛ fɛɛ nɔ, ni amɛwiemɔi lɛ eshɛ jeŋ naagbee hei.”—Romabii 10:18.
15. Mɛɛ nugbɔshiimɔi eje kpo kɛjɛ maŋtsɛsɛi lɛ mli yɛ Nuŋtsɔ lɛ gbi nɛɛ mli?
15 Nugbɔshiimɔi ji nɔ ni fɔɔ sarawa gbalamɔi asɛɛ nyiɛmɔ. David wie nugbɔshimɔ diɛŋtsɛ he akɛ “Yehowa gbee.” (Lala 29:3, 4) Beni Yehowa fata David he ni ewuu eshi ehenyɛlɔi lɛ, awie akɛ nugbɔshiimɔ ba kɛjɛ E-ŋɔɔ. (2 Samuel 22:14; Lala 18:14) Elihu kɛɛ Hiob akɛ Yehowa gbee jijeɔ tamɔ nugbɔshiimɔ, beni E-feɔ “nibii wuji kpelei hu ni wɔnaaa naa” lɛ. (Hiob 37:4, 5) Yɛ Nuŋtsɔ lɛ gbi lɛ fa nɛɛ mli lɛ, Yehowa ‘eshimɔ,’ ni ekɛbɔ kɔkɔ yɛ nibii wuji ni ebaafee eshi ehenyɛlɔi lɛ ahe. Nɛkɛ okadi nugbɔshiimɔi nɛɛ ejije shii abɔ kɛbɔle shikpɔŋ lɛ fɛɛ nɔ. Miishɛɛ jio kɛ obo nɛkɛ nugbɔshiimɔi ni jijeɔ nɛɛ toi ni okɛ olilɛi miitsu nii yɛ nilee mli okɛmiifata amɛnaawalɛ lɛ he!—Yesaia 50:4, 5; 61:1, 2.
La Haai kɛ Ashwishwɛ Ŋshɔ
16. Mɛni “la haai kpawo ni tsoɔ” lɛ feɔ he mfoniri?
16 Mɛni hu Yohane na ekoŋŋ? Enɛ: “Ni la haai kpawo ni tsoɔ ni ji Nyɔŋmɔ mumɔi kpawo lɛ yɛ maŋtsɛsɛi lɛ hiɛ. Ni nɔ ko tamɔ ashwishwɛ ŋshɔ ni tamɔ kristalo yɛ maŋtsɛsɛi lɛ hiɛ.” (Kpojiemɔ 4:5b, 6a) Yohane diɛŋtsɛ kɛɔ wɔ nɔ ni la kpawo lɛ damɔ shi kɛha: “Ni la haai kpawo ni tsoɔ ni ji Nyɔŋmɔ mumɔi kpawo lɛ yɛ.” Yibɔ ni ji kpawo lɛ damɔ shi kɛha ŋwɛi emuuyeli; no hewɔ lɛ esa akɛ la haai kpawo lɛ hu adamɔ shi aha mumɔ krɔŋkrɔŋ lɛ hewalɛ ni haa hiɛtɛjemɔ loo shishinumɔ ni yeɔ emuu. Kwɛ shi ni Yohane kuu lɛ daa ŋmɛnɛ akɛ akɛ nɛkɛ hiɛtɛjemɔ loo shishinumɔ nɛɛ haa amɛ, kɛ hegbɛ hu ni amɛkɛha mɛi ni mumɔŋ hɔmɔ yeɔ amɛ yɛ shikpɔŋ lɛ nɔ lɛ! Kwɛ miishɛɛ ni wɔna akɛ yɛ daa afi lɛ, Buu-Mɔɔ wolo tɛtrɛɛ lɛ akpekpei ohai abɔ ni akalaa lɛ yaa nɔ ehaa nɛkɛ la nɛɛ kpɛɔ yɛ wiemɔi aaafee 200 mli!—Lala 43:3.
17. Mɛni “ashwishwɛ ŋshɔ ni tamɔ kristalo” lɛ feɔ he mfoniri?
17 Yohane na “ashwishwɛ ŋshɔ ni tamɔ kristalo” hu. Mɛni enɛ baanyɛ afee he okadi yɛ mɛi ni afɔ nine atsɛ amɛ kɛba Yehowa ŋwɛi gwabɔɔ lɛ mli lɛ ahe? Paulo wie gbɛ ni Yesu tsɔ nɔ etsuu asafo lɛ he lɛ akɛ, “ekɛ nu hejuu lɛ tsuu ehe yɛ wiemɔ mli.” (Efesobii 5:26) Dani Yesu aaagbo lɛ, ekɛɛ ekaselɔi lɛ akɛ: “Agbɛnɛ nyɛhe eje momo yɛ wiemɔ ni mikɛ nyɛ ewie lɛ hewɔ.” (Yohane 15:3) No hewɔ lɛ, esa akɛ nɛkɛ ashwishwɛ ŋshɔ ni tamɔ kristalo nɛɛ adamɔ shi aha Nyɔŋmɔ Wiemɔ lɛ ni juɔ mɔ he loo etsuuɔ mɔ he lɛ. Esa akɛ e-Wiemɔ lɛ eju osɔfoi aweku lɛ mlibii ni baa Yehowa hiɛ lɛ ahe jogbaŋŋ momo.
Naa—“Hiɛkalɔi Ejwɛ”!
18. Mɛni Yohane na yɛ maŋtsɛsɛi lɛ teŋ kɛ ehewɔ?
18 Agbɛnɛ Yohane na nɔ kroko. Eŋma akɛ: “Ni hiɛkalɔi ejwɛ ni hiŋmɛii eyimɔ amɛhiɛ kɛ amɛsɛɛ obɔ yɛ maŋtsɛsɛi lɛ teŋ kɛ ehewɔ.”—Kpojiemɔ 4:6b.
19. Hiɛkalɔi ejwɛ lɛ feɔ mɛni he mfoniri, ni te wɔfeɔ tɛŋŋ wɔleɔ enɛ?
19 Nɛkɛ bɔɔ nii loo hiɛkalɔi nɛɛ feɔ mɛni he mfoniri? Ninaa ko ni gbalɔ kroko, Ezekiel bɔ he amaniɛ lɛ yeɔ ebuaa wɔ ni wɔnaa hetoo lɛ. Ezekiel na ni Yehowa ta ŋwɛi shwiili ko nɔ ni bɔɔ nii ni ji hiɛkalɔi fata ehe ni sui ni ana yɛ amɛhe lɛ tamɔ nɔ ni Yohane tsɔɔ mli lɛ. (Ezekiel 1:5-11, 22-28) Yɛ sɛɛ mli lɛ, Ezekiel na nakai maŋtsɛsɛi ni tamɔ shwiili lɛ ekoŋŋ ni hiɛkalɔi lɛ fata he. Shi yɛ enɛ mli lɛ, etsɛ nɛkɛ hiɛkalɔi nɛɛ akɛ kerubim. (Ezekiel 10:9-15) No hewɔ lɛ esa akɛ hiɛkalɔi ejwɛ ni Yohane na lɛ adamɔ shi aha Nyɔŋmɔ kerubim babaoo lɛ—bɔɔ nii ni nɔ kwɔlɔ yɛ E-mumɔŋ gbɛjianɔtoo lɛ mli. Yohane susuŋ he akɛ eji nɔ ko ni ekaaa akɛ eeena kerubim ni damɔ Yehowa he kpaakpa nakai, ejaakɛ yɛ blema kpee buu lɛ mli gbɛjianɔtoo naa lɛ, afee shika kerubim enyɔ yɛ kpaŋmɔ adeka lɛ kpatamɔ sɛi ni damɔ shi kɛha Yehowa maŋtsɛsɛi lɛ nɔ. Yehowa gbee kɛ famɔi faa kpo kɛhaa maŋ lɛ kɛjɛɔ nɛkɛ kerubim enyɔ nɛɛ ateŋ.—2 Mose 25:22: Lala 80:2.
20. Yɛ mɛɛ gbɛ nɔ aaanyɛ akɛɛ akɛ hiɛkalɔi ejwɛ lɛ “yɛ maŋtsɛsɛi lɛ teŋ kɛ ehewɔ”?
20 Nɛkɛ hiɛkalɔi ejwɛ nɛɛ “yɛ maŋtsɛsɛi lɛ teŋ kɛ ehewɔ.” Mɛni pɔtɛɛ ji nɔ ni enɛ tsɔɔ? Ebaanyɛ etsɔɔ akɛ amɛdamɔ maŋtsɛsɛi lɛ he bɔ ni haa amɛjeɔ efa fɛɛ fa teŋ gbɛ. No hewɔ lɛ, mɛi ni tsɔɔ Today’s English Version lɛ shishi lɛ fo shishijee Hela wiemɔ lɛ kuku yɛ nɛkɛ gbɛ nɔ: “Amɛbɔle maŋtsɛsɛi lɛ he kɛkpe yɛ ekoŋ fɛɛ koŋ.” Yɛ gbɛ kroko nɔ lɛ, wiemɔ lɛ baanyɛ atsɔɔ akɛ hiɛkalɔi ejwɛ lɛ yɛ ŋwɛi teŋ diɛŋtsɛ yɛ he ni maŋtsɛsɛi lɛ yɔɔ lɛ. Ekolɛ, no hewɔ ni The Jerusalem Bible lɛ tsɔɔ wiemɔ lɛ shishi akɛ: “Yɛ teŋ gbɛ, amɛfee kutuu kɛbɔle maŋtsɛsɛi lɛ diɛŋtsɛ he” lɛ. Nɔ ni he hiaa lɛ ji bɔ ni kerubim lɛ bɛŋkɛ Yehowa maŋtsɛsɛi lɛ he kpaakpa lɛ, kɛ akɛto kerubim ni Ezekiel na yɛ Yehowa gbɛjianɔtoo ni tamɔ shwiili loo kokloloŋtoi lɛ koŋ fɛɛ koŋ lɛ he lɛ. (Ezekiel 1:15-22) Enɛɛmɛi fɛɛ kɛ wiemɔi ni yɔɔ Lala 99:1 lɛ kpaa gbee akɛ: “Yehowa miiye maŋtsɛ, . . . eta kerubim lɛ anɔ.”
21, 22. (a) Te Yohane tsɔɔ bɔ ni hiɛkalɔi ejwɛ lɛ yɔɔ lɛ mli eha tɛŋŋ? (b) Hiɛkalɔi ejwɛ lɛ ateŋ mɔ fɛɛ mɔ su damɔ shi kɛha mɛni?
21 Yohane tee nɔ akɛ: “Ni klɛŋklɛŋ hiɛkalɔ lɛ tamɔ jata, ni hiɛkalɔ ni ji enyɔ lɛ tamɔ tsina, ni hiɛkalɔ ni ji etɛ lɛ hiɛ tamɔ gbɔmɔ, ni hiɛkalɔ ni ji ejwɛ lɛ tamɔ okropɔŋ ni filikiɔ.” (Kpojiemɔ 4:7) Mɛni hewɔ nɛkɛ hiɛkalɔi ejwɛ nɛɛ yɔɔ sɔrɔto ni esoro mɔ nɛ ni esoro mɔ nɛ lɛ? Eka shi faŋŋ akɛ nɛkɛ bɔɔ nii ni yɔɔ sɔrɔtoi nɛɛ maa Nyɔŋmɔ gbeyeishemɔ mli sui pɔtɛɛ komɛi anɔ mi. Klɛŋklɛŋ lɛ, jata lɛ yɛ. Akɛ jata tsuɔ nii yɛ Biblia mli akɛ ekaafeemɔ he okadi, titri lɛ yɛ jalɛsaneyeli kɛ jalɛ nifeemɔ sɛɛdii mli. (2 Samuel 17:10; Abɛi 28:1) No hewɔ lɛ, jata lɛ damɔ shi kɛha Nyɔŋmɔ gbeyeishemɔ su ni ji ekaafeemɔ yɛ jalɛsaneyeli mli. (5 Mose 32:4; Lala 89:15) Hiɛkalɔ ni ji enyɔ lɛ tamɔ tsina. Mɛɛ su tsina kɛbaa ojwɛŋmɔ mli? Kɛha Israelbii lɛ tsina lɛ ji amɛnibii ni jara wa kɛha amɛ lɛ ateŋ ekome yɛ hewalɛ ni eyɔɔ lɛ hewɔ. (Abɛi 14:4; kwɛmɔ Hiob 39:9-11 hu.) Belɛ tsina lɛ damɔ shi kɛha hewalɛ, nyɛmɔ ni Yehowa kɛhaa.—Lala 62:12; Yesaia 40:26.
22 Bɔɔ nɔ ni ji etɛ lɛ hiɛ tamɔ gbɔmɔ hiɛ. Esa akɛ enɛ adamɔ shi aha Nyɔŋmɔ gbeyeishemɔ su ni ji suɔmɔ, akɛni yɛ shikpɔŋ nɔ lɛ gbɔmɔ pɛ ji mɔ ni abɔ lɛ yɛ Nyɔŋmɔ subaŋ nɔ, kɛ su ni kwɔ grɔŋŋ ni ji suɔmɔ lɛ hewɔ. (1 Mose 1:26-28; Mateo 22:36-40; 1 Yohane 4:8, 16) Ŋwanejee ko bɛ he akɛ kerubim lɛ jieɔ su ni tamɔ nɛkɛ kpo yɛ be mli ni amɛsɔmɔɔ kɛbɔleɔ Yehowa maŋtsɛsɛi lɛ he lɛ. Shi bɔɔ nɔ ni ji ejwɛ lɛ hu? Mɔ nɛ tamɔ okropɔŋ ni filikiɔ. Yehowa diɛŋtsɛ gbalaa jwɛŋmɔ kɛyaa nii ni okropɔŋ naa kɛyaa shɔŋŋ lɛ nɔ: “Ehiŋmɛii naa nii yɛ shɔŋŋ.” (Hiob 39:29) No hewɔ lɛ, okropɔŋ lɛ damɔ shi kɛha nilee ni naa nii kɛyaa shɔŋŋ. Yehowa ji nilee Jɛɛhe. Ni kerubim lɛ kɛ ŋwɛi nilee tsuɔ nii yɛ be mli ni amɛboɔ efamɔi atoi lɛ.—Abɛi 2:6; Yakobo 3:17.
Yehowa Yijiemɔ Jijeɔ Kɛjeɔ Kpo
23. Anɔkwale ni eji akɛ hiɛkalɔi ejwɛ lɛ “amli eyimɔ obɔbɔ kɛ hiŋmɛii sɔŋŋ” lɛ feɔ mɛni he mfoniri, ni fiji enyɔ-nyɔ sɔrɔtoi etɛ ni amɛyɔɔ lɛ feɔ mɛni he mfoniri?
23 Yohane yaa nɔ kɛ esane mlitsɔɔmɔ lɛ mli akɛ: “Ni hiɛkalɔi ejwɛ lɛ ateŋ mɔ fɛɛ mɔ yɛ fiji ekpaa-ekpaa, ni amɛhewɔ kɛ amɛmli eyimɔ obɔbɔ kɛ hiŋmɛii sɔŋŋ, ni amɛjɔɔɔ amɛhe nyɔɔŋ kɛ shwane ni amɛkɛɔ akɛ: Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ [Yehowa] Nyɔŋmɔ Ofe lɛ, mɔ ni yɛ lɛ kɛ mɔ ni yɔɔ lɛ kɛ mɔ ni baaba lɛ.” (Kpojiemɔ 4:8) Hiŋmɛii sɔŋŋ lɛ tsɔɔ ninaa ni eye emuu ni yaa shɔŋŋ. Hiɛkalɔi ejwɛ lɛ kɛ enɛ tsuɔ nii ni amɛkpaaa, ejaakɛ wɔɔ he ehiaaa amɛ. Amɛkaseɔ Mɔ ni aŋma yɛ ehe akɛ: “Ejaakɛ Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsuii ehi kɛwula shi yɛ egbɛfaŋ lɛ.” (2 Kronika 16:9) Akɛni amɛyɔɔ hiŋmɛii babaoo nɛkɛ hewɔ lɛ, kerubim lɛ baanyɛ ana he fɛɛ he. Nɔ ko nɔ ko bɛ ni amɛnaaa. No hewɔ lɛ awula amɛ jogbaŋŋ bɔ ni amɛbaanyɛ amɛsɔmɔ Nyɔŋmɔ yɛ ekojomɔ nitsumɔ lɛ mli. Awie yɛ ehe akɛ: “Yehowa hiŋmɛii yɛ he fɛɛ he, ni ekwɛɔ mɛi fɔji kɛ mɛi kpakpai fɛɛ.” (Abɛi 15:3) Ni akɛni amɛhiɛ fiji enyɔ-nyɔ sɔrɔtoi etɛ—akɛ yibɔ ni ji etɛ lɛ tsuɔ nii yɛ Biblia lɛ mli akɛmaa sane nɔ mi hewɔ lɛ—kerubim lɛ baanyɛ ni amɛkɛ oyaiyeli ni tamɔ sarawa gbamɔ atswa Yehowa kojomɔi ahe adafi ni amɛtsu he nii.
24. Kerubim lɛ jieɔ Yehowa yi yɛ mɛɛ gbɛ nɔ, ni mɛni ji nɔ ni no tsɔɔ?
24 Bo toi! Yijiemɔ lala ni kerubim lɛ laa amɛhaa Yehowa lɛ ŋɔɔ ni ekanyaa susuma: “Krɔŋkrɔŋ, krɔŋkrɔŋ, krɔŋkrɔŋ ji Nuŋtsɔ [Yehowa] Nyɔŋmɔ Ofe lɛ, mɔ ni yɛ lɛ kɛ mɔ ni yɔɔ lɛ kɛ mɔ ni baaba lɛ.” Kɛfata he lɛ, nɔ ni bɔ he etɛ nɛɛ tsɔɔ enaawalɛ ekoŋŋ. Kerubim lɛ kɛ hewalɛ maa krɔŋkrɔŋ ni Yehowa Nyɔŋmɔ ji lɛ nɔ mi. Lɛ ji krɔŋkrɔŋfeemɔ he Tɛi ni Afolɔ Ashwie Shi lɛ naagbee Jɛɛhe. Agbɛnɛ hu lɛ ji “naanɔ Maŋtsɛ” lɛ, kɛ “Alfa lɛ kɛ Omega lɛ, shishijee lɛ kɛ naagbee lɛ, klɛŋklɛŋ mɔ lɛ kɛ naagbee mɔ lɛ” yɛ be fɛɛ mli. (1 Timoteo 1:17; Kpojiemɔ 22:13) Kerubim lɛ ejɔɔɔ amɛhe yɛ be mli ni amɛjajeɔ Yehowa sui ni eko kɛ lɛ yeee egbɔ yɛ bɔɔ nii fɛɛ hiɛ lɛ.
25. Hiɛkalɔi ejwɛ lɛ kɛ onukpai 24 lɛ feɔ ekome amɛkɛjieɔ Yehowa yi yɛ mɛɛ gbɛ nɔ?
25 Ŋwɛi amli ŋwɛi jijeɔ kɛ Yehowa yijiemɔi lɛ! Yohane sane mlitsɔɔmɔ lɛ yaa nɔ akɛ: “Ni beni hiɛkalɔi lɛ ŋɔɔ anunyam kɛ agbojee kɛ shidaa amɛhaa mɔ ni ta maŋtsɛsɛi lɛ nɔ ni ehiɛ ka kɛjɛ naanɔ kɛyaa naanɔ lɛ, onukpai nyɔŋmai-enyɔ kɛ ejwɛ lɛ hoɔ gbeɔ shi yɛ mɔ ni ta maŋtsɛsɛi lɛ nɔ lɛ hiɛ, ni amɛjaa mɔ ni hiɛ ka kɛjɛ naanɔ kɛyaa naanɔ lɛ, ni amɛshɛrɛɔ amɛ kekerei lɛ amɛshwieɔ maŋtsɛsɛi lɛ hiɛ ni amɛkɛɔ akɛ: Nuŋtsɔ [Yehowa wɔ-Nyɔŋmɔ] bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔnaa amɛyɔɔ ni abɔ amɛ.” (Kpojiemɔ 4:9-11) Enɛ ji yijiemɔi ni yɔɔ nyam fe fɛɛ ni akɛha Yehowa, wɔ-Nyɔŋmɔ kɛ Jeŋ Muu Fɛɛ Nuŋtsɔ lɛ yɛ Ŋmalɛi lɛ fɛɛ mli lɛ ateŋ ekome!
26. Mɛni hewɔ onukpai 24 lɛ shɛrɛ amɛ akekerei lɛ amɛshwie Yehowa hiɛ lɛ?
26 Onukpai 24 lɛ yɛ jwɛŋmɔ loo su ni Yesu jieɔ lɛ kpo lɛ nɔŋŋ eko, ejaakɛ amɛshɛrɛ amɛ akekerei lɛ amɛshwie Yehowa hiɛ. Akɛ amɛaahole amɛhe nɔ yɛ Yehowa hiɛ lɛ ji sane ni yɔɔ shɔŋŋ yɛ amɛjwɛŋmɔ mli. Amɛkɛ heshibaa kpɛlɛɔ nɔ akɛ yiŋtoo ni yɔɔ maŋtsɛmɛi ni amɛyeɔ lɛ sɛɛ ji ni amɛkɛ woo kɛ anunyam abaha lɛ, taakɛ bɔ ni Yesu feɔ yɛ be fɛɛ mli lɛ. (Filipibii 2:5, 6, 9-11) Amɛkɛ heshibaa kpɛlɛɔ hewalɛ ni amɛ diɛŋtsɛ amɛbɛ lɛ nɔ ni amɛjajeɔ akɛ amɛ nɔyeli lɛ damɔ jeŋ muu fɛɛ maŋtsɛ Yehowa nɔ. No hewɔ lɛ, amɛjɛɔ amɛtsui mli amɛkɛ kerubim lɛ kɛ bɔɔ nii anɔkwafoi lɛ fɛɛ feɔ ekome ni amɛkɛ yijiemɔ kɛ anunyam haa Nyɔŋmɔ ni bɔ nibii fɛɛ lɛ.—Lala 150:1-6.
27, 28. (a) Te esa akɛ bɔ ni Yohane tsɔɔ ninaa nɛɛ mli eha lɛ asa wɔhe aha tɛŋŋ? (b) Mɛɛ sanebimɔi teɔ shi yɛ nɔ ni Yohane na ni enu kɛnyiɛ sɛɛ lɛ he?
27 Namɔ baanyɛ ahi shi akɛ mɔ ni nɔ ko tsirɛɛɛ lɛ yɛ be mli ni ekane Yohane sane ni kɔɔ ninaa nɛɛ he lɛ? Eyɛ fɛo, eyɛ nyam! Shi te bɔ ni eji diɛŋtsɛ lɛ baatamɔ tɛŋŋ? Esa akɛ Yehowa agbojee lɛ akanya mɔ fɛɛ mɔ ni ekɛ tsuiŋ hiɛsɔɔ afata hiɛkalɔi ejwɛ lɛ kɛ onukpai 24 lɛ ahe ni amɛkɛjie E-yi, yɛ sɔlemɔ mli kɛ agbɛnɛ kɛtsɔ E-gbɛi lɛ jajemɔ yɛ mɛi ahiɛ lɛ nɔ. Nyɔŋmɔ ni Kristofoi ena hegbɛ akɛ amɛaaye ehe odase ŋmɛnɛ lɛ nɛ. (Yesaia 43:10) Kaimɔ akɛ Yohane ninaa lɛ kɔɔ Nuŋtsɔ lɛ gbi nɛɛ he, he ni wɔyɔɔ bianɛ lɛ. “Mumɔi kpawo lɛ” efee klalo akɛ amɛbaakudɔ wɔ ni amɛwo wɔ hewalɛ. (Galatabii 5:16-18) Nyɔŋmɔ Wiemɔ lɛ yɛ ŋmɛnɛ ni baaye abua wɔ ni wɔfee krɔŋkrɔŋ yɛ Nyɔŋmɔ ni yɔɔ krɔŋkrɔŋ lɛ sɔɔmɔ mli. (1 Petro 1:14-16) Eka shi faŋŋ akɛ, eeefee wɔ miishɛɛ akɛ wɔɔkane gbalɛ wiemɔi nɛɛ waa ni anu. (Kpojiemɔ 1:3) Kwɛ bɔ ni amɛtsɔɔ wɔyiŋ koni wɔye Yehowa anɔkwale koni wɔkaŋmɛ gbɛ ni je lɛ miigbala wɔ kɛmiijɛ eyijiemɔ ni wɔɔla daa lɛ he!—1 Yohane 2:15-17.
28 Yɛ he ni wɔshɛ nɛɛ, Yohane etsɔɔ nɔ ni enaa beni afɔ nine atsɛ lɛ ni etsɔ shinaa ni agbele yɛ ŋwɛi lɛ mli lɛ mli. Nɔ ni ekaaa fe fɛɛ lɛ, ebɔ amaniɛ akɛ Yehowa ta E-ŋwɛi maŋtsɛsɛi lɛ nɔ yɛ E-gbojee kɛ woo kɛ nyam fɛɛ mli. Mɛi ni ebɔle ehe kɛkpe ji mɛi ni he wa fe fɛɛ yɛ gbɛjianɔtoi fɛɛ mli—ekpɛlɛɔ yɛ ehefɛo kɛ anɔkwayeli mli. Ŋwɛi Gwabɔɔ lɛ ekpe. (Daniel 7:9, 10, 18) Afee klalo aha nɔ ko ni ekaaa ni baaba. Mɛni ji no, ni mɛɛ gbɛ nɔ etsɔɔ esaa wɔhe ŋmɛnɛ yɛ? Nyɛhaa wɔkwɛa yɛ be mli ni ninaa lɛ jeɔ kpo lɛ!
[Baafa muu mfoniri ni yɔɔ baafa 75]
[Baafa muu mfoniri ni yɔɔ baafa 78]