Yitso 16

Okpɔŋɔnɔtaralɔi Ejwɛ ni Miiho!

Ninaa 3​—Kpojiemɔ 6:1-17

Saneyitso: Okpɔŋɔnɔtaralɔi ejwɛ lɛ anyiɛmɔ, la odasefoi ni yɔɔ afɔleshaa latɛ lɛ shishi lɛ, kɛ mlifu gbi kpeteŋkpele lɛ

Emlibaa be: Kɛjɛ 1914 kɛyashi nibii agbɛjianɔtoo nɛɛ

 1. Yehowa jieɔ wolo ni Yesu tseɔ naa lɛ mli saji lɛ kpo etsɔɔ Yohane yɛ mɛɛ gbɛ nɔ?

YƐ HAOMƆ gbii nɛɛ amli lɛ, ani wɔbɛ he miishɛɛ waa akɛ wɔɔle “nii ni sa akɛ aba mli oya”? Wɔmiisumɔ ni wɔle, ejaakɛ ekɔɔ wɔ diɛŋtsɛ wɔhe! No hewɔ lɛ nyɛhaa wɔfataa Yohane he yɛ be mli ni Yesu yaa nɔ egbeleɔ nakai wolo ni ataoɔ ale emli sane lɛ naa lɛ. Nɔ ni yɔɔ naakpɛɛ ji akɛ, ehe ehiaaa ni Yohane akane. Mɛni hewɔ? Ejaakɛ akɛ emli nibii lɛ ha lɛ “yɛ okadii amli” kɛtsɔ nibii sɔrɔtoi afeemɔ ni hewalɛ yɔɔ mli nɔ.—Kpojiemɔ 1:1, 10.

 2. (a) Mɛni Yohane na ni enu hu, ni kerubim lɛ puemɔ tsɔɔ mɛni? (b) Namɔ klɛŋklɛŋ kerubim lɛ kɛ efamɔ lɛ ha, ni mɛni hewɔ ohaa hetoo nakai?

² Bo Yohane toi beni Yesu tse wolo lɛ klɛŋklɛŋ naasɔomɔ nɔ lɛ naa lɛ: “Ni mina akɛ Toobi lɛ tse naasɔomɔi kpawo lɛ ekome; ni minu akɛ hiɛkalɔi ejwɛ lɛ ateŋ mɔ kome kɛ gbee ni tamɔ nugbɔshimɔ gbee kɛɛ: Ba ni obakwɛ!” (Kpojiemɔ 6:1) Enɛ ji klɛŋklɛŋ kerubim lɛ gbee. Bɔ ni ehiɛ tamɔ jata ha lɛ baaha Yohane anu shishi akɛ Yehowa gbɛjianɔtoo lɛ kɛ ekaa baatsu nii yɛ E-jalɛ fɔbuu kojomɔi lɛ ahe nitsumɔ mli. Ni namɔ akɛ famɔ nɛɛ ha? Enyɛŋ efee Yohane, ejaakɛ afɔ nine atsɛ Yohane momo akɛ eba ni ebana gbalɛ mli nibii nɛɛ amli gbɛfaŋnɔ. (Kpojiemɔ 4:1) Nakai “gbee ni tamɔ nugbɔshimɔ gbee” lɛ miitsɛ mɛi krokomɛi ni yɔɔ ninai sɔrɔtoi ejwɛ ni baaba lɛ mli klɛŋklɛŋ nɔ lɛ mli lɛ.

Okpɔŋɔ Yɛŋ kɛ Enɔtalɔ ni Ehe Gbɛi Lɛ

 3. (a) Mɛni Yohane tsɔɔ mli agbɛnɛ? (b) Yɛ nɔ ni kɛ Biblia mli okadii kpaa gbee lɛ, esa akɛ okpɔŋɔ yɛŋ lɛ afee mɛni he mfoniri?

³ Yohane, kɛ Yohane kuu lɛ kɛ amɛhefatalɔi ni yɔɔ ekaa ŋmɛnɛ lɛ ena hegbɛ akɛ amɛaana nɔkwɛmɔnɔ ko ni hoɔ oya kɛ foi! Yohane kɛɛ: “Ni mikwɛ, ni naa, okpɔŋɔ yɛŋ; ni mɔ ni ta enɔ lɛ hiɛ gai, ni aha lɛ akekere, ni eje kpo eeye kunim, koni egbe ekunimyeli lɛ naa.” (Kpojiemɔ 6:2, New World Translation.) Hɛɛ, yɛ nakai “ba ni obakwɛ!” lɛ ni gbɛɛ tamɔ nugbɔshiimɔ lɛ hetoohamɔ mli lɛ, okpɔŋɔ yɛŋ fa kɛ foi ba. Yɛ Biblia mli lɛ, afɔɔ okpɔŋɔ he mfonirifeemɔ akɛ tawuu. (Lala 20:8; Abɛi 21:31; Yesaia 31:1) Eka shi faŋŋ akɛ okpɔŋɔ nɛɛ he yɛ fɛo, ehe eyɛŋ ni ekpɛlɛɔ, ni tsɔɔ krɔŋkrɔŋfeemɔ ni muji ko bɛ mli. (Okɛto Kpojiemɔ 1:14; 4:4; 7:9; 20:11 he.) Kwɛ bɔ ni enɛ sa jogbaŋŋ ha, ejaakɛ etsɔɔ tawuu ni he tse ni ja yɛ Yehowa hiŋmɛii ni yɔɔ krɔŋkrɔŋ lɛ amli!—Kwɛmɔ Kpojiemɔ 19:11, 14 hu.

 4. Namɔ ji okpɔŋɔ yɛŋ lɛ Nɔtalɔ lɛ? Tsɔɔmɔ mli.

⁴ Namɔ ji okpɔŋɔ nɛɛ Nɔtalɔ lɛ? Ehiɛ gai, tawuu nii ni akɛtutuaa mɔ, shi aha lɛ akekere hu. Jalɔi pɛ ni ana ni amɛbumɔ akekerei yɛ Nuŋtsɔ lɛ gbi lɛ mli ji Yesu kɛ kuu ni onukpai 24 lɛ damɔ shi kɛha amɛ lɛ. (Daniel 7:13, 14, 27; Luka 1:31-33; Kpojiemɔ 4:4, 10; 14:14)a Enyɛŋ eba akɛ aaafee onukpai 24 akuu nɛɛ mli nyo ko he mfoniri akɛ enine miishɛ akekere nɔ yɛ lɛ diɛŋtsɛ ejalɛ naa. No hewɔ lɛ, esa akɛ nɛkɛ okpɔŋɔnɔtalɔ kome nɛɛ afee Yesu Kristo shi jeee mɔ kroko. Yohane na lɛ yɛ ŋwɛi yɛ 1914 ni fee yinɔsane be lɛ mli, yɛ be mli ni Yehowa jaje akɛ, “Miwo mimaŋtsɛ,” ni ekɛɔ lɛ akɛ yiŋtoo ni yɔɔ sɛɛ ji ni “maŋɔ jeŋmaji lɛ mahão akɛ ogboshinii” lɛ. (Lala 2:6-8)b No hewɔ lɛ, klɛŋklɛŋ naasɔomɔ ni Yesu tse naa lɛ jieɔ bɔ ni lɛ diɛŋtsɛ lɛ, akɛ Maŋtsɛ hee ni akɛ akekere ebu lɛ lɛ, eyaa ta yɛ be ni Nyɔŋmɔ eto lɛ naa lɛ kpo.

 5. Yɛ mɛɛ gbɛ nɔ Lalatsɛ lɛ tsɔɔ bɔ ni okpɔŋɔ Nɔtalɔ lɛ ji lɛ mli tamɔ nɔ ni yɔɔ Kpojiemɔ 6:2 lɛ pɛpɛɛpɛ?

⁵ Ninaa nɛɛ kɛ Lala 45:5-8, ni akɛ Maŋtsɛ ni Yehowa kɛ lɛ eta sɛi nɔ lɛ wie lɛ kpaa gbee fɛfɛo: “Anɔkwale kɛ mlijɔlɛ kɛ jalɛ hewɔ lɛ jee kpo ni oba yɛ ogbojee lɛ mli, ni oninejurɔ atsɔɔo nii ni yɔɔ gbeyei! Ogaimlibii lɛ anaa ba; maji lɛ tswiatswiaa shi yɛ ohiɛ; amɛtsurɔɔ maŋtsɛ lɛ henyɛlɔi lɛ atsuiaŋ! Nyɔŋmɔ, omaŋtsɛsɛi lɛ ma shi kɛmiiya naanɔi anaanɔ; omaŋtsɛyeli tso lɛ, jalɛ tso ni. Osumɔɔ jalɛ ni onyɛɔ nifɔji anii; hewɔ lɛ Nyɔŋmɔ, ni ji o-Nyɔŋmɔ lɛ, kɛ mlifilimɔ mu lɛ efoɔ fe onanemɛi.” Akɛni ele gbalɛ nɛɛ mlitsɔɔmɔ lɛ hewɔ lɛ, Yohane baayoo akɛ ekɔɔ Yesu nitsumɔ akɛ Maŋtsɛ lɛ he.—Okɛto Hebribii 1:1, 2, 8, 9 he.

Eeya Koni Eyaye Kunim

 6. (a) Mɛni hewɔ esa akɛ okpɔŋɔ Nɔtalɔ lɛ aya nɔ aye kunim lɛ? (b) Nɛkɛ kunimyeli tafaa nɛɛ yaa nɔ kɛtsɔɔ mɛɛ afii amli?

⁶ Shi, mɛni hewɔ esa akɛ Maŋtsɛ hee ni awo lɛ nɛɛ ata okpɔŋɔ nɔ kɛya ta lɛ? No ji akɛ ato emaŋtsɛyeli lɛ ama shi yɛ shitee-kɛ-woo ni naa wa ni jɛ Yehowa henyɛlɔ kpeteŋkpele, Satan Abonsam, kɛ mɛi ni yɔɔ shikpɔŋ nɔ ni—amɛle jio amɛleee jio—amɛsɔmɔɔ Satan nibii lɛ adɛŋ. Maŋtsɛyeli lɛ diɛŋtsɛ fɔmɔ biɔ ni ta wulu ko aba ŋwɛi. Yɛ be mli ni ewuɔ ta yɛ gbɛi ni ji Mikael (ni eshishi ji “Namɔ Tamɔ Nyɔŋmɔ?”) lɛ shishi lɛ, Yesu ye Satan kɛ edaimonioi lɛ anɔ kunim ni eshɛrɛ amɛ eshwie shikpɔŋ lɛ nɔ. (Kpojiemɔ 12:7-12) Yesu kunim ni eyeɔ lɛ yaa nɔ kɛtsɔɔ Nuŋtsɔ lɛ gbi lɛ mli shishijee afii nyɔŋmai abɔ lɛ amli yɛ be mli ni abuaa adesai ni tamɔ gwaŋtɛŋi lɛ anaa lɛ. Eyɛ mli akɛ jeŋ muu lɛ fɛɛ “ka mɔ fɔŋ lɛ hewalɛ mli” moŋ, shi Yesu yaa nɔ ekɛ suɔmɔ kwɛɔ enyɛmimɛi ni afɔ amɛ mu lɛ kɛ amɛhefatalɔi lɛ, ni eyeɔ ebuaa amɛteŋ mɔ fɛɛ mɔ koni enine ashɛ hemɔkɛyeli kunimyeli lɛ nɔ.—1 Yohane 5:19.

 7. Mɛɛ kunim Yesu eye yɛ shikpɔŋ nɔ yɛ Nuŋtsɔ lɛ gbi lɛ klɛŋklɛŋ afii nyɔŋmai abɔ lɛ amli, ni mɛni esa akɛ efee wɔfaishitswaa?

⁷ Mɛɛ kunimii krokomɛi Yesu eye yɛ afii 90 kɛ nɔ ni fe nakai ni eho kɛjɛ Nuŋtsɔ lɛ gbi lɛ mli kɛbaa nɛɛ lɛ mli? Yehowa webii kɛ haomɔi, nɔnyɛɛ kɛ yiwai sɔrɔtoi ekpe yɛ jeŋ muu fɛɛ, akɛ aŋkroaŋkroi kɛ asafoi, tamɔ nɔ ni bɔfo Paulo tsɔɔ mli yɛ be mli ni eyeɔ esɔɔmɔ nitsumɔ lɛ he odase lɛ. (2 Korintobii 11:23-28) “Hewalɛ ni fa kɛteke nɔ” he ehia Yehowa Odasefoi, titri lɛ yɛ tawuu kɛ awuiyeli be mli, bɔni afee ni amɛnyɛ amɛŋmɛ amɛtsui shi. (2 Korintobii 4:7) Shi yɛ shihilɛi ni mli wawai lɛ amli po lɛ, Odasefoi anɔkwafoi lɛ enyɛ ekɛɛ taakɛ bɔ ni Paulo kɛɛ lɛ: “Shi Nuŋtsɔ lɛ fi misɛɛ ni ewo mi hewalɛ, koni atsɔ minɔ ama shiɛmɔ lɛ nɔ mi.” (2 Timoteo 4:17) Hɛɛ, Yesu ye kunim yɛ amɛ hewɔ. Ni ebaaya nɔ eye kunim yɛ wɔ hewɔ, bei abɔ ni wɔtswa wɔfai shi akɛ wɔbaagbe wɔ hemɔkɛyeli ni yeɔ kunim lɛ naa lɛ.—1 Yohane 5:4.

8, 9. (a) Mɛɛ kunimyelii jeŋ muu fɛɛ Yehowa Odasefoi asafo lɛ ena mli gbɛfaŋnɔ? (b) Yehowa Odasefoi lɛ ayifalɛ lɛ eje kpo yɛ gbɛ ni ekaaa nɔ diɛŋtsɛ yɛ mɛni mli?

⁸ Yehowa Odasefoi asafo ni yɔɔ jeŋ muu fɛɛ lɛ ena kunimyelii pii amli gbɛfaŋnɔ yɛ e-Maŋtsɛ ni yeɔ kunim lɛ gbɛtsɔɔmɔ shishi. Nɔ ni ekaaa ji be mli ni ebu nɛkɛ Biblia Kaselɔi nɛɛ ahe koni akabule amɛshishi yɛ 1918 lɛ, yɛ be mli ni amɛ diɛŋtsɛ lɛ Satan maŋkwramɔŋ gbɛjianɔtoo lɛ ‘ye amɛnɔ kunim’ yɛ be kukuoo mli lɛ. Shi yɛ 1919 mli lɛ, ekumɔ gboklɛfoi atsui asɛɛ adabaŋi lɛ ni ejie amɛ, ni ewo amɛ hewalɛ koni amɛjaje sanekpakpa lɛ “kɛyashi shikpɔŋ lɛ naagbee hei lɛ.”—Kpojiemɔ 13:7; Bɔfoi lɛ Asaji 1:8.

⁹ Dani Jeŋ Ta II aaaba, kɛ no mli fɛɛ lɛ, Nɔyelɔi yiwalɔi ni efee ekome lɛ bɔ mɔdɛŋ ni amɛkpata Yehowa Odasefoi ahiɛ yɛ shikpɔji pii anɔ yɛ he ni jamɔ mli hiɛnyiɛlɔi, titri lɛ mɛi ni jɛ Roma Katolik nɔyeli kuu lɛ mli lɛ fi nɔyelɔi yiwalɔi nɛɛ asɛɛ koni amɛwa amɛ yi yɛ faŋŋ mli loo yɛ okadi gbɛ nɔ lɛ. Shi Odasefoi 71,509 ni shiɛɔ yɛ be mli ni ta lɛ je shishi yɛ 1939 lɛ ayifalɛ shɛ 141,606 yɛ be mli ni ta lɛ baa naagbee yɛ 1945, eyɛ mli akɛ amɛyibɔ ni fe 10,000 kɛ afii babaoo ehi gboklɛfoi atsui kɛ yiwalɛ ŋsraiaŋ ni agbe aaafee 2,000 hu. Odasefoi ni yɔɔ ekaa lɛ ayibɔ yɛ shikpɔŋ muu lɛ fɛɛ nɔ lɛ mli elɛɛ kɛyashɛ nɔ ni fe akpekpei ekpaa ŋmɛnɛ. Yifalɛ nɛɛ efee nɔ ni etee nɔ waa yɛ gbɛ ni ekaaa nɔ yɛ Katolik shikpɔji anɔ kɛ agbɛnɛ yɛ maji ni yiwaa lɛ mli wa waa yɛ mli lɛ anɔ—tamɔ Germany, Italia, kɛ Japan, ni Odasefoi ni yɔɔ jɛmɛ lɛ ayibɔ fe shiɛlɔi 600,000 ni yɔɔ ekaa lɛ.—Yesaia 54:17; Yeremia 1:17-19.

10. Mɛɛ kunimyelii Maŋtsɛ ni yeɔ kunim lɛ kɛjɔɔ ewebii lɛ yɛ “sanekpakpa lɛ hefamɔ kɛ enɔmimaa mli”?

¹⁰ Wɔ Maŋtsɛ ni yeɔ kunim lɛ hu ejɔɔ ewebii ni yɔɔ ekaa lɛ ejaakɛ enyiɛ amɛhiɛ kɛtee kunimyelii pii amli yɛ “sanekpakpa lɛ he famɔ kɛ enɔmimaa mli” yɛ saneyeli hei kɛ agbɛnɛ yɛ nɔyelɔi ahiɛ. (Filipibii 1:7; Mateo 10:18; 24:9) Enɛ etee nɔ yɛ majimaji babaoo mli—yɛ Australia, Argentina, Canada, Greece, India, Swaziland, Switzerland, Turkey, kɛ maji krokomɛi anɔ. Mla naa kunimyelii 50 ni Yehowa Odasefoi na yɛ U.S.A Kojomɔ He Wulu lɛ mli ekomɛi efee nɔ ni maa hegbɛ ni ayɔɔ akɛ akɛaajaje sanekpakpa “yɛ faŋŋ kɛ shia kɛ shia” lɛ nɔ mi ni agbɛnɛ amɛtsi amɛhe kɛjɛ maŋhedɔɔ nifeemɔi ni ji wɔŋjamɔ lɛ ahe. (Bɔfoi lɛ Asaji 5:42; 20:20; 1 Korintobii 10:14) No hewɔ lɛ, agbele gbɛ aha jeŋ muu fɛɛ odaseyeli nitsumɔ mlilɛɛmɔ.

11. (a) Okpɔŋɔ Nɔtalɔ lɛ “gbeɔ ekunimyeli lɛ naa” yɛ mɛɛ gbɛ nɔ? (b) Te esa akɛ naasɔomɔ ni ji enyɔ, etɛ kɛ ejwɛ lɛ naatsemɔ asa wɔhe aha tɛŋŋ?

¹¹ Mɛɛ gbɛ Yesu tsɔɔ nɔ “egbeɔ ekunimyeli lɛ naa” yɛ?c Efeɔ enɛ, taakɛ wɔbaana lɛ, kɛtsɔɔ apasa jamɔ ni ejieɔ kɛyaa kɛ agbɛnɛ Satan gbɛjianɔtoo ni anaa lɛ mli nɔ fɛɛ nɔ ni eshwɛ ni eshɛrɛɔ ewoɔ okadi “la kpaakpo” lɛ ni ji hiɛkpatamɔ mli lɛ nɔ, ni ekɛ nɛkɛ feemɔ buɔ jeŋ muu fɛɛ maŋtsɛ ni Yehowa ji lɛ bem. Wɔkɛ hekɛnɔfɔɔ miikpa nakai Harmagedon gbi lɛ gbɛ agbɛnɛ, yɛ be mli ni wɔ “maŋtsɛmɛi a-Maŋtsɛ” lɛ baaye naagbee kunim kwraa yɛ Satan maŋkwramɔŋ gbɛjianɔtoo ni waa mɛi ayi lɛ nɔ lɛ! (Kpojiemɔ 16:16; 17:14; 19:2, 14-21; Ezekiel 25:17) Dani enɛ aaaba lɛ, Kunimyelɔ ni anyɛɛɛ enɔ aye ni ta okpɔŋɔ yɛŋ lɛ nɔ lɛ yaa nɔ yɛ be mli ni Yehowa yaa nɔ ekɛ mɛi ni yɔɔ tsuijurɔ lɛ fataa E-jalɛ maŋ ni yɔɔ shikpɔŋ lɛ nɔ lɛ ahe lɛ. (Yesaia 26:2; 60:22) Ani okɛ Yohane kuu ni afɔ amɛ mu lɛ miina nakai Maŋtsɛyeli mlilɛɛmɔ ni miishɛɛ yɔɔ mli lɛ mli gbɛfaŋnɔ? Yɛ enɛ mli lɛ, nɔ ni bɔfo Yohane na yɛ be mli ni atserɛɔ naasɔomɔi etɛ ni nyiɛ sɛɛ lɛ anaa lɛ baakanya bo koni ona Yehowa nitsumɔ kɛha ŋmɛnɛ gbi nɛɛ lɛ mli gbɛfaŋnɔ babaoo.

Naa, Okpɔŋɔ ni Tsuɔ!

12. Mɛni Yesu kɛɛ akɛ ebaakadi ba ni eba akɛ Maŋtsɛ ni anaaa lɛ lɛ?

¹² Kɛmiiya Yesu shikpɔŋ nɔ sɔɔmɔ nitsumɔ lɛ naagbee lɛ, ekaselɔi lɛ bi lɛ yɛ teemɔŋ akɛ: “Mɛni ji beni oba lɛ kɛ nibii agbɛjianɔtoo lɛ naagbee lɛ he okadi?” Yɛ hetoohamɔ mli lɛ, egba amanehului babaoo ni baafee “kɔɔmɔi lɛ abɔimɔ.” Yesu kɛɛ: “Ni maŋ aaate shi awo maŋ, ni maŋtsɛyeli hu aaate shi awo maŋtsɛyeli; ni shikpɔŋhosomɔi ni naa wa aaaba hei sɔrɔtoi fɛɛ, kɛ hɔji kɛ gbelehelai, ni gbeyei nibii kɛ okadii wuji aaajɛ ŋwɛi aba.” (Mateo 24:3, 7, 8, New World Translation; Luka 21:10, 11) Nibii ni Yohane na beni atserɛ wolo lɛ naasɔomɔi ni eshwɛ lɛ anaa lɛ kɛ nɔ ko ni kɛ gbalɛ nɛɛ kpaa gbee ha. Agbɛnɛ kwɛmɔ yɛ be mli ni Yesu ni awo ehiɛ nyam lɛ tseɔ naasɔomɔ nɔ ni ji enyɔ lɛ naa lɛ!

13. Mɛɛ sɔrɔtofeemɔ ko Yohane baana agbɛnɛ?

¹³ “Ni beni etse naasɔomɔ nɔ ni ji enyɔ lɛ, minu akɛ hiɛkalɔ ni ji enyɔ lɛ kɛɛ: Ba ni obakwɛ!” (Kpojiemɔ 6:3) Kerubim ni ji enyɔ lɛ, mɔ ni hiɛ tamɔ tsina lɛ, lɛ ji mɔ ni kɛ famɔ lɛ ha. Hewalɛ ji nɔ ni afeɔ he mfoniri yɛ biɛ lɛ, shi hewalɛ ni akɛtsuɔ nii yɛ jalɛ naa. Nɔ ni tamɔɔɔ enɛ lɛ, agbɛnɛ Yohane baana hewalɛ kpojiemɔ ni yɔɔ gbeyei ni gbeɔ mɔ.

14. Mɛɛ okpɔŋɔ kɛ enɔtalɔ Yohane na yɛ enɛ sɛɛ, ni nɛkɛ ninaa nɛɛ feɔ mɛni he mfoniri?

¹⁴ Belɛ mɛɛ gbɛ nɔ ahaa famɔ ni ji enyɔ ni ji “Ba ni obakwɛ!” lɛ hetoo yɛ? Yɛ nɛkɛ gbɛ nɔ: “Ni okpɔŋɔ kroko ni tsuɔ je kpo, ni mɔ ni ta enɔ lɛ, aha lɛ hegbɛ koni ejie hejɔlɛ kɛjɛ shikpɔŋ lɛ nɔ ni amɛgbegbee amɛhe, ni aha lɛ klante kpeteŋkpele ko.” (Kpojiemɔ 6:4) Ninaa ko ni yɔɔ gbeyei lɛlɛŋ! Ni ŋwanejee ko bɛ nɔ ni efeɔ he mfoniri lɛ he: ta! Jeee Yehowa Maŋtsɛ ni yeɔ kunim lɛ jalɛ kunimyeli tawuu lɛ eko, shi moŋ adesai amajimaji ateŋ tawuu ni he ehiaaa ni fɔseɔ la babaoo eshwieɔ shi ni ekɛ piŋmɔ kɛ yiwalɛ baa lɛ. Belɛ kwɛ bɔ ni esa jogbaŋŋ akɛ nɛkɛ okpɔŋɔnɔtalɔ nɛɛ aaata okpɔŋɔ ni tsuɔ nɔ!

15. Mɛni hewɔ esaaa akɛ wɔtaoɔ okpɔŋɔnɔtalɔ ni ji enyɔ lɛ nyiɛmɔ lɛ?

¹⁵ Eka shi faŋŋ akɛ Yohane basumɔŋ ni ekɛ okpɔŋɔnɔtalɔ nɛɛ kɛ he ni eyaa lɛ ana nɔ ko feemɔ, ejaakɛ agba yɛ Nyɔŋmɔ webii lɛ ahe akɛ: “Ni amɛkaseŋ tawuu dɔŋŋ.” (Yesaia 2:4) Eyɛ mli akɛ “amɛyɛ je lɛ mli” lolo moŋ, shi Yohane, ni agbɛnɛ kɛ abaakpa mli lɛ, Yohane kuu lɛ kɛ asafo babaoo ni yɔɔ ŋmɛnɛ lɛ “jeee” gbɛjianɔtoo ni la ekpa mli fɛɛ nɛɛ “fa”. Wɔtawuu nii lɛ, mumɔŋ tawuu nii ni, kɛ “hewalɛ nii yɛ Nyɔŋmɔ hiɛ” koni akɛjaje anɔkwale lɛ yɛ ekaa naa, ni heloonaa tawuu bɛ mli.—Yohane 17:11, 14; 2 Korintobii 10:3, 4.

16. Mɛɛ be mli ni yɛ mɛɛ gbɛ nɔ akɛ “klante kpeteŋkpele ko” ha mɔ ni ta okpɔŋɔ tsuru lɛ nɔ lɛ yɛ?

¹⁶ Awuu tai pii dani 1914, afi nɔ ni Okpɔŋɔnɔtalɔ ni ta okpɔŋɔ yɛŋ lɛ nɔ lɛ nine shɛ ekekere lɛ nɔ lɛ ba. Shi agbɛnɛ aha okpɔŋɔnɔtalɔ ni ta okpɔŋɔ tsuru lɛ nɔ lɛ “klante kpeteŋkpele ko.” Mɛni ji nɔ ni enɛ tsɔɔ? Beni Jeŋ Ta I fɛ pɛ kɛkɛ ni adesa tawuu batsɔ nɔ ni shwieɔ la shi babaoo, nɔ ni fiteɔ nii babaoo fe fɛɛ. Yɛ 1914-18 la ni afɔse ashwie shi lɛ mli lɛ, akɛ tawuu tsɔnei, kɔɔyɔɔ ni ebɔɔ yɔɔ mli, kɔɔyɔŋ lɛji, ŋshɔ shishi lɛji, okpɛlɛmii wuji kɛ tawuu nii heei tsu nii ekolɛ yɛ klɛŋklɛŋ be mli kwraa aloo yɛ gbɛ ni da ni afeko nakai da lɛ nɔ. Maji 28 yɛ ni abua maŋ muu lɛ fɛɛ naa awo ta he mɔdɛŋbɔɔ lɛ mli, shi jeee asraafoi pɛ. Mɛi ni gboi lɛ yɛ gbeyei. Agbe asraafoi fe akpekpei nɛɛhu, ni maŋbii ni gboi lɛ ayifalɛ lɛ faa mɔ tsui. Beni ta lɛ ba naagbee po lɛ, akuuu sɛɛɛ ayaaa toiŋjɔlɛ he yɛ shikpɔŋ lɛ nɔ dɔŋŋ. Aaafee ta lɛ sɛɛ afii 50 lɛ, German maŋ onukpa Konrad Adenauer wie akɛ: “Shweshweeshwe shihilɛ kɛ kpoofeemɔ elaaje kɛjɛ gbɔmɛi ashihilɛ mli kɛjɛ 1914.” Lɛlɛŋ eji akɛ, akɛ hegbɛ ha okpɔŋɔ tsuru lɛ nɔtalɔ lɛ koni ejie toiŋjɔlɛ kɛjɛ shikpɔŋ lɛ nɔ kɛya!

17. “Klante kpeteŋkpele” lɛ kɛ nitsumɔ etee nɔ yɛ Jeŋ Ta I sɛɛ yɛ mɛɛ gbɛ nɔ?

¹⁷ Kɛkɛ ni, akɛni etee la he kumai ni yeɔ lɛ shi hewɔ lɛ, mɔ ni ta okpɔŋɔ tsuru lɛ nɔ lɛ kɛ ehe wo Jeŋ Ta II mli. Dɛŋdadei ni akɛgbe gbɔmɛi lɛ yɛ gbeyei fe nine, ni mɛi ni gboi lɛ ku bɔ Jeŋ Ta I nɔ lɛ he toi ejwɛ. Aŋmɛɛ atɔm okpɛlɛmii enyɔ he ashwie Japan nɔ, yɛ 1945, ni eko fɛɛ eko—yɛ hiŋmɛitswaa pɛ mli lɛ—kpata gbɔmɛi akpei nyɔŋma-nyɔŋmai abɔ hiɛ. Yɛ jeŋ ta ni ji enyɔ lɛ mli lɛ, mɔ ni ta okpɔŋɔ tsuru lɛ nɔ lɛ kpa ŋmaa diɛŋtsɛ ni ji wala akpekpei 55, ni yɛ no po mli lɛ etsui enyɔɔɔ emli. Abɔ amaniɛ ni anyɛɔ akɛ he fɔɔ nɔ akɛ susumai ni fa fe akpekpei 20 enyɔ yɛ “klante kpeteŋkpele” ni ekɛtsu nii kɛjɛ Jeŋ Ta II be lɛ sɛɛ nɛɛ lɛ mli.

18, 19. (a) Ni eeefee tawuu he nilee he kunimyeli moŋ lɛ, anɔkwale ni eji akɛ ágbe gbɔmɛi babaoo yɛ Jeŋ Ta II sɛɛ lɛ ji mɛni he odaseyeli? (b) Mɛɛ oshara kã adesai ahiɛ, shi mɛni ji nɔ ni okpɔŋɔ yɛŋ lɛ Nɔtalɔ lɛ baafee koni ekɛjie enɛ kɛya?

¹⁸ Ani wɔɔnyɛ wɔtsɛ enɛɛmɛi fɛɛ akɛ kunimyeli kɛha tawuu mli nilee? Eji odaseyeli moŋ ni tsɔɔ akɛ okpɔŋɔ tsuru lɛ ni enaaa mɔbɔ lɛ miiho lolo. Ni nɛgbɛ ji he ni eyaa nɛɛ baaya ayagbe naa yɛ? Jeŋ nilelɔi komɛi tsɔɔ akɛ nuklea tawuu baanyɛ aba trukaa—aahu ni nuklea tawuu ni aje gbɛ ato he gbɛjianɔ! Shi yɛ miishɛɛ mli lɛ, okpɔŋɔ yɛŋ lɛ Nɔtalɔ ni yeɔ kunim lɛ yɛ susumɔi krokomɛi yɛ enɛ he.

¹⁹ Bei abɔ ni gbɔmɛi damɔɔ maŋhedɔɔ henɔwomɔ kɛ nyɛɛ nɔ amɛhiɔ shi nɛɛ, esa akɛ adesai atara nuklea tutsofa ni yɔɔ gbeyei lɛ nɔ. Kɛji akɛ jeŋmaji lɛ baakpata amɛ nuklea tawuu nii lɛ fɛɛ ahiɛ yɛ hehiamɔ mli po lɛ, amɛbaaya nɔ amɛle bɔ ni afeɔ lɛ lɛ lolo. Kɛ afa yɛ be kukuoo mli lɛ, amɛbaanyɛ amɛku sɛɛ amɛfee amɛ nuklea tawuu nii ni yɔɔ gbeyei nɛɛ ekoŋŋ; no hewɔ lɛ, etsɛŋ ni ta ni akɛ tawuu nii memeji lɛ wuɔ lɛ baatsɔ nuklea tawuu. Esa akɛ nyɛɛ kɛ hetsɛ ni ebɔle jeŋmaji lɛ ahe ŋmɛnɛ kɛkpe lɛ anyiɛ adesai ahiɛ kɛya hegbee mli, ja—ah, hɛɛ, ja okpɔŋɔ yɛŋ lɛ Nɔtalɔ lɛ etsi okpɔŋɔ tsuru lɛ nyiɛmɔ yɛ sɛkɛyeli mli lɛ naa. Nyɛhaa wɔnaa hekɛnɔfɔɔ akɛ Kristo ni ji Maŋtsɛ lɛ baata okpɔŋɔ nɔ koni egbe jeŋ ni Satan kudɔɔ lɛ nɔ kunim ni eyeɔ lɛ naa kwraa koni eto jalɛ shikpɔŋ hee ni damɔ suɔmɔ nɔ ema shi—suɔmɔ kɛha Nyɔŋmɔ kɛ naanyo—ni ji hewalɛ kɛha toiŋjɔlɛ ni fe nuklea tawuu nii ni damɔɔɔ shi shiŋŋ ni akɛɛ akɛbaaku tawuu naa kwraa yɛ wɔ sɛkɛyeli be nɛɛ mli lɛ.—Lala 37:9-11; Marko 12:29-31; Kpojiemɔ 21:1-5.

Okpɔŋɔ Diŋ Fa Kpo

20. Mɛɛ nɔmimaa wɔyɔɔ akɛ okpɔŋɔ yɛŋ lɛ Nɔtalɔ lɛ baanyɛ adamɔ shihilɛi ni kɛ haomɔi baa lɛ fɛɛ naa?

²⁰ Agbɛnɛ Yesu tse naasɔomɔ ni ji etɛ lɛ! Yohane, mɛni onaa? “Ni beni etse naasɔomɔ ni ji etɛ lɛ, minu akɛ hiɛkalɔ ni ji etɛ lɛ kɛɛ: Ba ni obakwɛ!” (Kpojiemɔ 6:5a) Yɛ miishɛɛ mli lɛ, nɛkɛ kerubim ni ji etɛ nɛɛ “hiɛ tamɔ gbɔmɔ hiɛ,” ni eetsɔɔ su ni ji suɔmɔ. Suɔmɔ ni damɔ shishitoo mla nɔ baafa babaoo yɛ Nyɔŋmɔ jeŋ hee lɛ mli, taakɛ bɔ ni nakai su fɛfɛo lɛ egbɛ eshwa Yehowa gbɛjianɔtoo muu lɛ fɛɛ mli ŋmɛnɛ lɛ. (Kpojiemɔ 4:7; 1 Yohane 4:16) Wɔbaanyɛ wɔna nɔmimaa akɛ nakai okpɔŋɔ yɛŋ lɛ Nɔtalɔ lɛ, ni “ja eye maŋtsɛ kɛyashi beyinɔ ni eeeŋɔ ehenyɛlɔi lɛ fɛɛ eto enajiashi” lɛ kɛ suɔmɔ baajie amanehulu shihilɛ ni akɛtsɔɔ Yohane koni epɛi mli lɛ fɛɛ kɛya.—1 Korintobii 15:25.

21. (a) Okpɔŋɔ diŋ lɛ kɛ enɔtalɔ lɛ feɔ mɛni he mfoniri? (b) Mɛni yeɔ odase akɛ okpɔŋɔ diŋ lɛ miifite nii kɛmiiya lolo?

²¹ Belɛ mɛni ji nɔ ni Yohane naa, yɛ be mli ni ahaa famɔ ni ji etɛ akɛ “Ba ni obakwɛ!” lɛ hetoo lɛ? “Ni mikwɛ, ni naa okpɔŋɔ diŋ; ni mɔ ni ta enɔ lɛ hiɛ ŋsɛnii yɛ edɛŋ.” (Kpojiemɔ 6:5b) Hɔmɔ diɛŋtsɛ! No ji shɛɛ sane ni mli wa ni gbalɛ mfoniri nɛɛ kɛhaa. Etsɔɔ hiɛ etsɔɔ shihilɛ ni baaba yɛ Nuŋtsɔ lɛ gbi lɛ shishijee mli, nɔ be mli ni akɛ ŋsɛnii baaja niyenii lɛ. Kɛjɛ 1914 kɛbaa nɛɛ, hɔmɔ efee naagba ni miiya nɔ yɛ jeŋ muu lɛ fɛɛ mli. Ŋmɛnɛŋmɛnɛ beaŋ tawuu kɛ hɔmɔ baa, ejaakɛ akɛ shika kɛ nibii ni akɛlɛɔ gbɔmɛi ni hɔmɔ yeɔ amɛ lɛ feɔ tawuu nii amɛhaa ta lɛ. Abuaa okwaafoi anaa afeɔ amɛ asraafoi, ni okwaafoi amaji ni tawuu efite nɔ kɛ mlai ni yɔɔ keketee baa niyenii he nitsumɔ shi. Kwɛ bɔ ni enɛ ji anɔkwale yɛ klɛŋklɛŋ jeŋ ta lɛ mli, yɛ be mli ni akpekpei abɔ na amanehulu yɛ hɔmɔ hewɔ ni amɛgboi lɛ! Kɛfata he lɛ, hɔmɔ okpɔŋɔ diŋ lɛ nɔtalɔ lɛ tsui enyɔɔɔ emli yɛ be mli ni ta lɛ baa naagbee lɛ. Yɛ 1930 afii lɛ amli lɛ, gbɔmɛi akpekpei enumɔ gboi yɛ hɔmɔ kome pɛ ni ba Ukraine lɛ hewɔ. Jeŋ ta ni ji enyɔ lɛ hu kɛ hɔmɔ babaoo kɛ niyenii ni anaaa ba. Yɛ be mli ni okpɔŋɔ diŋ lɛ yaa nɔ enyiɛɔ lɛ, The World Food Council ni ji gwabɔɔ ni toɔ niyenii he gbɛjianɔ lɛ bɔ amaniɛ yɛ 1987 teŋ gbɛ akɛ hɔmɔ miiye gbɔmɛi akpekpei 512 ni ákɛ gbekɛbii 40,000 gboiɔ daa gbi yɛ hɔmɔ hewɔ.

22. (a) Mɛni ji nɔ ni gbee ko kɛɛ, ni mɛɛ hiamɔ nii ko he ewieɔ? (b) Ŋmaa susumɔ nɔ kome kɛ akoko susumɔ nii etɛ lɛ jara lɛ tsɔɔ mɛni?

²² Yohane yɛ babaoo ni ebaakɛɛ wɔ: “Ni minu gbee ko yɛ hiɛkalɔi ejwɛ lɛ ateŋ miikɛɛ: Ŋmaa susumɔ nɔ kome denario, ni akoko susumɔ nii etɛ denario; ni mu kɛ wein lɛ kaata he!” (Kpojiemɔ 6:6, New World Translation.) Kerubim ejwɛ lɛ fɛɛ efee ekome kɛmiiwie bɔ ni ehe hiaa akɛ aaakwɛ niyenii ni nine shɛɔ nɔ lɛ jogbaŋŋ—taakɛ bɔ ni ehe bahia ni gbɔmɛi lɛ “aŋmɛ aboloo amɛye kɛ tsuiyeli” beni eshwɛ fioo ni Yerusalem hiɛkpatamɔ baaba yɛ afi 607 D.Ŋ.B. lɛ. (Ezekiel 4:16) Yɛ Yohane be lɛ mli lɛ, abuɔ ŋmaa susumɔ nɔ kome akɛ daa gbi niyenii kɛha asraafonyo. Enyiɛ abaahe niyenii ni tamɔ nɛkɛ? Denario kome—apaafonyo gbi muu nyɔmɔwoo! (Mateo 20:2)d Shi kɛji akɛ nuu lɛ yɛ weku hu? Ojogbaŋŋ, ebaanyɛ ehe akoko ni akpɔko he susumɔ nii etɛ yɛ najiaŋ. Shi enɛ hu weku fioo ko pɛ ebaashɛ amɛnaa. Ni abuuu akoko akɛ niyenii kpakpa ko tamɔ ŋmaa.

23. Mɛni ji nɔ ni wiemɔ “Mu kɛ wein lɛ kaata he!” lɛ tsɔɔ?

²³ Mɛni ji nɔ ni nɛkɛ wiemɔ “Mu kɛ wein lɛ kaata he!” lɛ tsɔɔ? Mɛi komɛi esusu he akɛ eshishinumɔ ji akɛ be mli ni mɛi pii naŋ niyenii ni hɔmɔ po miigbe amɛ lɛ, ataŋ miishɛjemɔ nibii ni niiatsɛmɛi yeɔ lɛ ahe. Shi mu kɛ wein jeee miishɛjemɔ nibii yɛ Boka-Teŋgbɛ. Yɛ Biblia bei amli lɛ, abuɔ aboloo, mu kɛ wein akɛ niyenii titri. (Okɛto 1 Mose 14:18; Lala 104:14, 15 he.) Nu ni amɛnuɔ lɛ ehiii yɛ bei pii amli, no hewɔ lɛ afɔɔ wein numɔ ni yɛ bei komɛi amli hu akɛfeɔ tsofa. (1 Timoteo 5:23) Yɛ mu gbɛfaŋ lɛ, yɛ Elia gbii lɛ amli lɛ, Zarefat okulafo lɛ ji ohiafo moŋ, shi no mli lɛ eyɛ mu ko ni eshwɛ ni ekɛbaafata mamu ni eyɔɔ lɛ he ni ekɛfee niyenii. (1 Maŋtsɛmɛi 17:12) No hewɔ lɛ, famɔ akɛ “mu kɛ wein lɛ kaata he!” lɛ tamɔ ŋaa ko ni akɛmiiha akɛ akɛ nɛkɛ nibii nɛɛ fɛɛ akahoo nii mra tsɔ shi moŋ afee lɛ fiofio yɛ amɛ kɛ nitsumɔ mli. Kɛ jeee nakai lɛ, ‘abaata he,’ ni ji akɛ amɛbaata dani hɔmɔ lɛ baaba naagbee.

24. Mɛni hewɔ okpɔŋɔ diŋ lɛ nyɛŋ afo shi yɛ be kakadaŋŋ mli lolo lɛ?

²⁴ Kwɛ miishɛɛ ni wɔbaanyɛ wɔna akɛ etsɛŋ kwraa ni okpɔŋɔ yɛŋ lɛ Nɔtalɔ lɛ baaku nakai okpɔŋɔ diŋ lɛ naa! Ejaakɛ aŋma yɛ E-suɔmɔ gbɛjianɔtoo kɛha jeŋ hee lɛ he akɛ: “Jalɔ aaafrɔke yɛ egbii lɛ amli, ni hejɔlɛ aaafa kɛyashi beyinɔ ni nyɔŋtsere bɛ dɔŋŋ. . . . Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”—Lala 72:7, 16; kwɛmɔ Yesaia 25:6-8 hu.

Okpɔŋɔ Lamulu kɛ E-Nɔtalɔ Lɛ

25. Beni Yesu tse naasɔomɔ ni ji ejwɛ lɛ naa lɛ, namɔ gbee Yohane nu, ni mɛni enɛ tsɔɔ?

²⁵ Agbeko sane lɛ fɛɛ naa. Yesu tse naasɔomɔ ni ji ejwɛ lɛ naa, ni Yohane kɛɔ wɔ nɔ ni jɛ mli ba: “Ni beni etse naasɔomɔ ni ji ejwɛ lɛ, minu hiɛkalɔ ni ji ejwɛ lɛ gbee miikɛɛ: Ba ni obakwɛ!” (Kpojiemɔ 6:7) Enɛ ji kerubim ni tamɔ okropɔŋ ni filikiɔ lɛ gbee. Aatsɔɔ nilee ni naa nii kɛyaa shɔŋŋ, ni yɛ anɔkwale mli lɛ, ehe miihia ni Yohane, Yohane kuu lɛ, kɛ Nyɔŋmɔ tsuji krokomɛi fɛɛ ni yɔɔ shikpɔŋ lɛ nɔ lɛ ayoo ni amɛkɛ sanesɛɛkɔmɔ atsu nii yɛ nɔ ni atsɔɔ yɛ biɛ lɛ hewɔ. Kɛ wɔfee nakai lɛ, abaabaa wɔyi kɛjɛ haomɔi ni gbaa ŋmɛnɛŋmɛnɛ yinɔbii ni bɛ jeŋba ni kɛɛ amɛle nii lɛ anaa yɛ jeŋ ni woɔ amɛhe nɔ nɛɛ mli lɛ mli.—1 Korintobii 1:20, 21.

26. (a) Namɔ ji okpɔŋɔnɔtalɔ ni ji ejwɛ lɛ, ni mɛni hewɔ ekpɔŋɔ lɛ su sa lɛ lɛ? (b) Mɛni nyiɛ okpɔŋɔnɔtalɔ ni ji ejwɛ lɛ sɛɛ, ni mɛni baa mɛi ni egbeɔ amɛ lɛ anɔ?

²⁶ Mɛɛ nibii hee ni yɔɔ gbeyei ajie lɛ kpo agbɛnɛ, yɛ be mli ni okpɔŋɔnɔtalɔ ni ji ejwɛ lɛ hereɔ tsɛmɔ lɛ nɔ lɛ? Yohane kɛɔ wɔ: “Ni mikwɛ, ni naa, okpɔŋɔ lamulu; ni mɔ ni ta enɔ lɛ gbɛi ji Gbele, ni Gbohiiaje nyiɛ esɛɛ.” (Kpojiemɔ 6:8a) Mɔ ni ta naagbee okpɔŋɔ lɛ nɔ lɛ yɛ gbɛi: Gbele. Lɛ pɛ ji okpɔŋɔnɔtaralɔi ejwɛ ni yɔɔ Apokalips loo Kpojiemɔ lɛ mli lɛ ni jie mɔ ni eji diɛŋtsɛ lɛ kpo etsɔɔ. Yɛ gbɛ ni ja nɔ lɛ, Gbele ta okpɔŋɔ ko ni ehe tamɔ lamulu nɔ, ejaakɛ akɛ wiemɔ lamulu-lamulu (Hela, khlo·rosʹ) tsuɔ nii yɛ Hela woji amli akɛtsɔɔ hiɛi ni eyɛ futaa, tamɔ yɛ hela hewɔ. Nɔ ni sa hu ji akɛ, nɔ ni nyiɛ Gbele sɛɛ kpaakpa yɛ gbɛ ni anyɛɛɛ atsɔɔ shishi nɔ ji Gbohiiaje, ejaakɛ Gbohiiaje ji nɔ ni heɔ mɛi ni okpɔŋɔnɔtalɔ ni ji ejwɛ lɛ gbeɔ amɛ lɛ ateŋ mɛi ni fa. Yɛ miishɛɛ mli lɛ, gbohiiashitee yɛ kɛha mɛnɛɛmɛi, yɛ be mli ni ‘gbele kɛ Gbohiiaje baajie mɛi ni yɔɔ amɛmli lɛ amɛha lɛ.’ (Kpojiemɔ 20:13) Shi mɛɛ gbɛ nɔ Gbele tsɔɔ eheɔ nakai gbɔmɛi lɛ?

27. (a) Yɛ mɛɛ gbɛ nɔ okpɔŋɔnɔtalɔ ni ji Gbele lɛ nine shɛɔ mɛi ni egbeɔ amɛ lɛ anɔ yɛ? (b) “Shikpɔŋ lɛ mlijai ejwɛ mli ekome” ni Gbele yɔɔ hewalɛ yɛ nɔ lɛ tsɔɔ mɛni?

²⁷ Ninaa lɛ tsiɔ gbɛi lɛ ekomɛi ata: “Ni aha amɛ hegbɛ yɛ shikpɔŋ lɛ mlijai ejwɛ mli ekome nɔ, akɛ amɛkɛ klante kɛ hɔmɔ kɛ gbelehela kɛ shikpɔŋ lɛ nɔ kooloi lɛ agbegbee amɛ.” (Kpojiemɔ 6:8b) Ehe ehiaaa ni efee shikpɔŋ lɛ nɔ gbɔmɛi ayifalɛ mlijai ejwɛ mli ekome diɛŋtsɛ, shi moŋ amɛji shikpɔŋ lɛ nɔ bii lɛ ateŋ mɛi ni fa, kɛ mɛi pii yɛ shikpɔŋ lɛ fa ko nɔ aloo mɛi fioo hu yɔɔ efa kroko lɛ, amɛbaanu okpɔŋɔnɔtalɔ nɛɛ he. Nɛkɛ okpɔŋɔnɔtalɔ nɛɛ loɔ mɛi ni okpɔŋɔnɔtalɔ ni ji enyɔ lɛ klante kpeteŋkpele lɛ gbeɔ amɛ lɛ kɛ okpɔŋɔnɔtalɔ ni ji etɛ lɛ hɔmɔ ni gbe mɛi krokomɛi hu lɛ ewoɔ emli. Eloɔ mɛi ni lɛ diɛŋtsɛ egbe amɛ lɛ hu ewoɔ emli, kɛ nɔ ni jɛ gbelehela lɛ mli ba kɛ agbɛnɛ mɛi ni shikpɔŋhosomɔ ni atsɔɔ mli yɛ Luka 21:10, 11 lɛ gbeɔ amɛ lɛ hu.

28. (a) Gbalɛ ni kɔɔ “gbelehela” lɛ he lɛ mlibaa eba mli yɛ mɛɛ gbɛ nɔ? (b) Abu Yehowa webii ahe kɛjɛ helai babaoo he ŋmɛnɛ yɛ mɛɛ gbɛ nɔ?

²⁸ Nɔ ni he hiaa yɛ biɛnɛɛ hu ji “gbelehela” lɛ. Nɔ ni fite nii kɛnyiɛ Jeŋ Ta I sɛɛ ba ji Spanish flu ni gbe gbɔmɛi fe akpekpei 20 yɛ 1918-19 nyɔji fioo ko mli lɛ. Shikpɔŋkuku pɛ ni yɔɔ shikpɔŋ nɔ ni je nɛkɛ haomɔ nɛɛ mli ji ŋshɔkpɔ bibioo ni ji St. Helena. Yɛ he ni egbe gbɔmɛi lɛ ateŋ mɛi ni fa yɛ lɛ, abua gbohii lɛ anaa ni akɛ lai shwie nɔ ni asha. Ni ŋmɛnɛ, tsui hela kɛ heloo mli fala ni yɔɔ gbeyei lɛ hu he oshara lɛ yɛ, ni nɔ titri ni kɛ enɛ ba ji tawashɛremɔ ni woɔ kɔɔyɔɔ mli muji lɛ. Yɛ nɔ ni atsɔɔ mli akɛ eji “afii nyɔŋma taŋtaŋ” ni yɔɔ 1980 afii lɛ amli lɛ, shihilɛ gbɛ ni yeee mla kɛ tɛi ni Biblia lɛ efolɔ eshwie shi lɛ anɔ lɛ kɛ AIDS haomɔ lɛ bafata “gbelehela” lɛ he. Yɛ afi 2000 mli lɛ, abɔ amaniɛ akɛ U.S. maŋ lɛ helatsamɔhei anɔkwɛlɔ lɛ kɛɛ akɛ AIDS “baanyɛ afee tsɛŋemɔ hela ni ehiii fe fɛɛ ni eba jeŋ pɛŋ.” Ekɛɛ akɛ mɛi akpekpei 52 ená HIV kɛ AIDS yɛ jeŋ fɛɛ, ni amɛteaŋ akpekpei 20 egboi. Kwɛ bɔ ni Yehowa webii daa shi akɛ e-Wiemɔ lɛ mli ŋaawoo ni nilee yɔɔ mli lɛ jieɔ amɛ kɛjɛɔ ajwamaŋbɔɔ kɛ la ni akɛtsuɔ nii yɛ gbɛ fɔŋ nɔ, ni atsɔɔ nɔ akɛ helai pii haa ŋmɛnɛ lɛ mli!—Bɔfoi lɛ Asaji 15:28, 29; okɛto 1 Korintobii 6:9-11 he.

29, 30. (a) “Kojomɔi fɔji ejwɛ” ni yɔɔ Ezekiel 14:21 lɛ baakɔ mɛni he ŋmɛnɛ? (b) Mɛni esa akɛ wɔnu shishi kɛ wiemɔ ni ji “kooloi awuiyelɔi” ni yɔɔ Kpojiemɔ 6:8 lɛ? (d) Mɛni ji sane titri ni yɔɔ gbalɛ mfoniri nɛɛ mli?

²⁹ Yohane ninaa lɛ tsi kooloi awuiyelɔi atã akɛ nɔ ni ji ejwɛ ni kɛ trukaa gbele baa. Yɛ anɔkwale mli lɛ, nibii ejwɛ ni ana yɛ be mli ni agbele naasɔomɔ ni ji ejwɛ lɛ naa lɛ—tawuu, hɔmɔ, helai kɛ kooloi awuiyelɔi lɛ—ji nii ni abuɔ yɛ blema bei amli akɛ amɛkɛ trukaa gbele baa titri. No hewɔ lɛ amɛfeɔ nibii fɛɛ ni kɛ trukaa gbele baa ŋmɛnɛ lɛ he mfoniri. Etamɔ bɔ pɛ ni Yehowa bɔ Israel kɔkɔ lɛ: “Aahu ni mitsu mikojomɔi fɔji ejwɛ: klante kɛ hɔmɔ kɛ kooloi fɔji kɛ gbelehela kɛtee Yerusalem, koni akpata gbɔmɔ kɛ kooloo hiɛ yɛ mli.”—Ezekiel 14:21.

³⁰ Afɔɔɔ gbele ni kooloi awuiyelɔi kɛbaa yɛ ŋmɛnɛŋmɛnɛ beaŋ lɛ ahe adafitswaa yɛ woji amli, eyɛ mli akɛ yɛ shikpɔji ni hulutsoo kɛ nugbɔnɛmɔ fa yɛ jɛmɛ lɛ anɔ lɛ, kooloi awuiyelɔi etee nɔ egbe gbɔmɛi. Amɛbaanyɛ amɛgbe gbɔmɛi babaoo yɛ wɔsɛɛ be mli kɛji akɛ atsɔ tawuu nɔ afite shikpɔŋ lɛ nɔ nibii aloo kɛji akɛ hɔmɔ ye gbɔmɛi lɛ kɛyashɛ he ni amɛbɛ hewalɛ ni amɛkɛaashwie kooloi ni hɔmɔ yeɔ amɛ lɛ. Kɛfata he lɛ, adesai babaoo yɛ ŋmɛnɛ, ni tamɔ kooloi ni leee nii, ni jieɔ kooloi asu kpo ni kɛ nɔ ni atsɔɔ mli yɛ Yesaia 11:6-9 lɛ kpaaa gbee. Mɛnɛɛmɛi ji mɛi ni kɛ bɔlɛnamɔ he awuiyeli, gbɔmɔgbee, hegbeyeiwoo, kɛ okpɛlɛmii ni atswiaa akɛfiteɔ nii ŋmɛnɛŋmɛnɛ yɛ jeŋ muu fɛɛ lɛ baa titri. (Okɛto Ezekiel 21:31; Romabii 1:28-31; 2 Petro 2:12 he.) Okpɔŋɔnɔtalɔ ni ji ejwɛ lɛ hu nine shɛɔ emɛi ni egbeɔ lɛ anɔ. Yɛ anɔkwale mli lɛ, sane oti ni yɔɔ gbalɛ mfoniri nɛɛ mli lɛ ji akɛ mɔ ni ta okpɔŋɔ ni he tamɔ lamulu lɛ nɔ lɛ kɛ trukaa gbele baa adesai anɔ yɛ gbɛi pii anɔ.

31. Yɛ nibii ni okpɔŋɔ tsuru, ediŋ, kɛ okpɔŋɔ lamulu lɛ nɔtaralɔi lɛ efite lɛ fɛɛ sɛɛ lɛ, mɛni hewɔ wɔbaanyɛ wɔna ekaa lɛ?

³¹ Saji ni naasɔomɔi ejwɛ ni atserɛ naa lɛ ejie lɛ kpo lɛ maa saji anɔ mi kɛhaa wɔ ejaakɛ etsɔɔ wɔ akɛ wɔkahao yɛ tawuu, hɔmɔ, hela, kɛ nibii krokomɛi ni kɛ trukaa gbele baa ni egbɛ eshwa babaoo ŋmɛnɛ lɛ hewɔ; ni asaŋ esaaa akɛ wɔhiɛnɔkamɔ feɔ yaka akɛni adesai hiɛnyiɛlɔi nyɛɛɛ ana naagbai ni yaa nɔ lɛ ahe tsabaa hewɔ. Kɛji akɛ jeŋ shihilɛ ha efee faŋŋ akɛ okpɔŋɔ tsuru, ediŋ kɛ okpɔŋɔ ni he lamulu lɛ anɔtaralɔi lɛ eje kpo lɛ, kaaha ohiɛ miikpa nɔ akɛ okpɔŋɔ yɛŋ lɛ Nɔtalɔ lɛ ji klɛŋklɛŋ mɔ ni je etafaa lɛ shishi. Yesu ebatsɔ Maŋtsɛ, ni eye kunim momo kɛyashɛ he ni eshwie Satan kɛjɛ ŋwɛi. Nɔ ni fata ekunimyelii krokomɛi lɛ ahe ji mumɔŋ Israel shwɛɛnii lɛ anaabuamɔ kɛ asafo babaoo ni jɛ majimaji ateŋ, ni amɛ yifalɛ shɛɔ akpekpei abɔ lɛ hu anaabuamɔ kɛha yibaamɔ kɛtsɔ amanehulu kpeteŋkpele lɛ mli. (Kpojiemɔ 7:4, 9, 14) Esa akɛ ekpɔŋɔ nɔtamɔ lɛ aya nɔ aahu kɛyashi be mli ni eeegbe ekunimyeli lɛ naa.

32. Mɛni anaa ni kadiɔ klɛŋklɛŋ naasɔomɔi ejwɛ lɛ ni atserɛ naa lɛ eko fɛɛ eko?

³² Nɔ ni enyiɛ klɛŋklɛŋ naasɔomɔi ejwɛ lɛ eko fɛɛ eko naatsemɔ sɛɛ ji famɔ ni ji: “Ba ni obakwɛ!” Okpɔŋɔ kɛ enɔtalɔ faa kpo yɛ eko fɛɛ eko mli. Beni naasɔomɔ ni ji enumɔ lɛ jeɔ shishi lɛ, wɔnuuu nɛkɛ famɔ nɛɛ he dɔŋŋ. Shi okpɔŋɔnɔtaralɔi lɛ nyiɛ lolo, ni amɛbaaya nɔ amɛnyiɛ kɛtsɔ nibii agbɛjianɔtoo nɛɛ naagbee be lɛ fɛɛ mli. (Okɛto Mateo 28:20 he.) Mɛɛ nibii krokomɛi ni he hiaa Yesu jieɔ lɛ kpo yɛ be mli ni etseɔ naasɔomɔi etɛ ni eshwɛ lɛ anaa lɛ? Nibii ni ba lɛ ekomɛi bafee nibii ni gbɔmɔ hiŋmɛii enaaa. Ekrokomɛi ni anaa lɛ hu baaba yɛ wɔsɛɛ be mli. Ni kɛlɛ, amɛmlibaa lɛ baaba mli kɛ̃. Nyɛhaa wɔkwɛa nɔ ni amɛji.

[Shishigbɛ niŋmai]

[Akrabatsa ni yɔɔ baafa 92]

Maŋtsɛ lɛ Miiya yɛ Kunimyeli Mli

Yɛ 1930 kɛ 1940 afii lɛ amli lɛ, henyɛlɔi ni amɛtswa amɛfai shi bɔ mɔdɛŋ ni amɛha Yehowa Odasefoi asɔɔmɔ nitsumɔ lɛ afee tamɔ nɔ ni mla eŋmɛɛɛ gbɛ, efɔŋfeelɔi anifeemɔ, aloo ejwaa maŋ. (Lala 94:20) Yɛ afi 1936 pɛ mli lɛ, amɔmɔ amɛteŋ 1,149 yɛ U.S.A pɛ. Odasefoi lɛ wuu mla naa ta aahu kɛyashɛ U.S.A Kojomɔ He Wulu lɛ, ni nɔ ni nyiɛ sɛɛ nɛɛ ji amɛkunimyelii ni ekaaa lɛ ateŋ ekomɛi.

Yɛ May 3, 1943 lɛ, yɛ Kojomɔ He Wulu lɛ sane ni kɔɔ Murdock kɛ Pennsylvania he lɛ mli lɛ, akpɛ yiŋ akɛ gbɛbimɔ wolo he ehiaaa Odasefoi lɛ dani amɛhɔɔ amɛwolo amɛhe shika. Yɛ nakai gbi lɛ nɔ nɔŋŋ lɛ, akpɛ yiŋ yɛ Martin kɛ City of Struthers sane lɛ mli akɛ ejeee nɔ ni mla eŋmɛɛɛ gbɛ akɛ amɛaatswa shinaa naa ŋmɛlɛ yɛ be mli ni amɛkɛ amɛhe ewo shinaa naa kɛ shinaa naa nitsumɔ ni amɛkɛjaa dɛhiɛmɔ woji bibii kɛ woji krokomɛi amli lɛ.

Yɛ June 14, 1943 lɛ, Kojomɔ He Wulu lɛ kpɛ yiŋ yɛ Taylor kɛ Mississippi sane lɛ mli akɛ Odasefoi lɛ wooo hewalɛ akɛ akaye nɔyeli lɛ anɔkwale yɛ nɔ ni amɛshiɛɔ lɛ hewɔ. Yɛ nakai gbi lɛ nɔ nɔŋŋ lɛ, yɛ West Virginia State Board of Education kɛ Barnette sane lɛ mli lɛ, Saneyeli He lɛ ma nɔ mi akɛ skul onukpai lɛ bɛ hegbɛ akɛ amɛshwieɔ Yehowa Odasefoi abii ni kɛɛ amɛŋaaa aflaŋaa lɛ kɛjɛɔ skul. Enɔ jetsɛremɔ lɛ, Australia Saneyeli He Wulu lɛ ni kojolɔi lɛ fɛɛ kpe lɛ fo mla ni akɛgu Yehowa Odasefoi ni yɔɔ nakai maŋ lɛ mli lɛ mli, ni amɛtsɔɔ mli akɛ enɛ bafee sane ni “jwɛŋmɔ bɛ mli, ni anyɛɛɛ akɛ he afɔ nɔ ni eji yiwaa hu.”

[Akrabatsa ni yɔɔ baafa 94]

“Aha lɛ Hegbɛ Koni Ejie Hejɔlɛ Kɛjɛ Shikpɔŋ lɛ Nɔ”

Nɛgbɛ ji he ni tsɔnei ahe nilee kɛwɔ yaa? The Globe and Mail, Toronto, Canada adafitswaa wolo lɛ bɔ wiemɔ ni nyiɛ sɛɛ nɛɛ ni Ivan L. Head ni ji International Development Research Centre lɛ onukpa lɛ kɛha lɛ he amaniɛ yɛ January 22, 1987 nɔ lɛ mli akɛ:

“Anyɛɔ akɛ he fɔɔ akɔntaabuu akɛ jeŋ nilelɔi kɛ tsɔnei ahe nilelɔi ejwɛ fɛɛ ejwɛ mli ekome ni kɛ amɛhe ewo nibii amlipɛimɔ kɛ efeemɔ mli lɛ miitsu tawuu nii ahe nii lɛ nɔ. . . . Kɛ abu naa yɛ 1986 lɛ, shika ni afiteɔ yɛ enɛ he lɛ fe Amerika dɔla akpekpei 1.5 miniti kome. . . . Ani wɔ fɛɛ wɔyɛ shweshweeshwe babaoo yɛ nɛkɛ tsɔnei ahe nilee nɔmimaa nɛɛ hewɔ? Nuklea tawuu nii ni jeŋmaji ni yɔɔ hewalɛ lɛ hiɛ bianɛ lɛ shɛɔ tuŋtɛi ni akɛtsu nii yɛ Jeŋ Ta ni ji Enyɔ lɛ mli lɛ fɛɛ ni abua naa lɛ—toi 6,000. Ni ji akɛ Jeŋ Ta ni ji Enyɔ toi akpei ekpaa. Kɛjɛ 1945 kɛbaa nɛɛ, nɔ ni shɛɛɛ otsii kpawo pɛ je lɛ kɛhi shi ni tawuu nitsumɔ ko eyaaa nɔ yɛ mli. Awuu tai sɔrɔtoi fe 150 ni ji majimaji ateŋ nɔ aloo maŋ muu mli nɔ, ni kɛ abu naa lɛ mɛi ni amɛlaaje amɛwala yɛ enɛ mli lɛ ji akpekpei 19.3, ni amɛteŋ mɛi titri ji nɔ ni jɛ tsɔnei ahe nilee hee ni akɛtsuɔ nii yɛ gbɛ ni mɔɔ shi nɔ ni eba yɛ Jeŋmaji Ekomefeemɔ lɛ be nɛɛ mli lɛ hewɔ.”

Beni shɛɔ afi 2005 lɛ, no mli lɛ tawuu nifeemɔi ekpata mɛi ni fa fe akpekpei 20 ahiɛ.

[Akrabatsa ni yɔɔ baafa 98, 99]

Bɔ ni Ato Kpojiemɔ Wolo lɛ He Gbɛjianɔ Aha

Yɛ he ni wɔshɛ yɛ Kpojiemɔ wolo nɛɛ hesusumɔ mli lɛ hewɔ lɛ, wɔmiije shishi wɔmiina bɔ ni ato wolo nɛɛ he gbɛjianɔ aha lɛ yɛ faŋŋ mli. Yɛ hiɛkpamɔ ni kanyaa mɔ lɛ sɛɛ lɛ (Kpojiemɔ 1:1-9), abaanyɛ asusu Kpojiemɔ he akɛ ajara mli awo ninaai 16 ni nyiɛ sɛɛ nɛɛ amli:

NINAA 1 (1:10–3:22): Yohane tsɔ mumɔ lɛ tsirɛmɔ nɔ ena Yesu ni awo ehiɛ nyam, ni kɛ shɛɛ saji ni ji ŋaawoo ni miishɛɛ yɔɔ mli maje asafoi kpawo lɛ.

NINAA 2 (4:1–5:14): Yehowa Nyɔŋmɔ ŋwɛi maŋtsɛsɛi lɛ he ninaa ko ni yɔɔ fɛo. Mɔ nɛɛ kɛ wolo ko ha Toobi lɛ.

NINAA 3 (6:1-17): Atse wolo naasɔomɔi lɛ mli klɛŋklɛŋ ekpaa lɛ naa, Toobi lɛ jie ninaai sɔrɔtoi ni baaba mli yɛ Nuŋtsɔ lɛ gbi lɛ mli lɛ kpo fiofio. Apokalips loo Kpojiemɔ okpɔŋɔnɔtaralɔi ejwɛ lɛ je kpo, Nyɔŋmɔ tsuji ni agbe amɛ lɛ anine shɛ atadei yɛji anɔ, ni atsɔɔ gbi wulu ni he yɔɔ gbeyei lɛ mli.

NINAA 4 (7:1-17): Ŋwɛibɔfoi hiɛ hiɛkpatamɔ kɔɔyɔɔ lɛ mli kɛyashi aaasɔo mumɔŋ Israelbii 144,000 lɛ anaa da. Asafo babaoo ko ni jɛ jeŋmaji fɛɛ mli kɛ amɛ yiwalaheremɔ haa Nyɔŋmɔ kɛ Kristo ni abuaa amɛnaa kɛhaa yibaamɔ kɛtsɔɔ amanehulu kpeteŋkpele lɛ mli.

NINAA 5 (8:1–9:21): Beni atse naasɔomɔ nɔ ni ji kpawo lɛ naa lɛ, akpa tɛtrɛmaŋtɛrɛi kpawo, emli klɛŋklɛŋ ekpaa lɛ feɔ ninaa ni ji enumɔ lɛ. Nɛkɛ tɛtrɛmaŋtɛrɛi kpamɔi ekpaa nɛɛ tsɔɔ Yehowa kojomɔi ni ekɛbaa adesai anɔ. Tɛtrɛmaŋtɛrɛi kpamɔ ni ji enumɔ kɛ ekpaa lɛ hu kɛ klɛŋklɛŋ kpoo kɛ nɔ ni ji enyɔ lɛ baa.

NINAA 6 (10:1–11:19): Bɔfo ko ni he wa kɛ wolo bibioo ko ha Yohane, asusu sɔlemɔ we lɛ, ni wɔkaseɔ odasefoi enyɔ lɛ aniiashikpamɔi. Nɔ ni ekɛbaa naagbee ji tɛtrɛmaŋtɛrɛ ni ji kpawo lɛ kpamɔ, ni etswaa kpoo ni ji etɛ kɛha Nyɔŋmɔ henyɛlɔi lɛ—Yehowa kɛ e-Kristo lɛ Maŋtsɛyeli ni baa lɛ he adafi.

NINAA 7 (12:1-7): Enɛ tsɔɔ Maŋtsɛyeli lɛ fɔmɔ mli, ni nɔ ni jɛ mli ba ji Mikael ni shɛ onufu lɛ, Satan, efɔ shikpɔŋ nɔ.

NINAA 8 (13:1-18): Kooloo ko ni he wa fa kpo kɛjɛ ŋshɔŋ, ni kooloo ni hiɛ akolontoi enyɔ tamɔ toobi lɛ wo adesai ahewalɛ ni amɛja lɛ.

NINAA 9 (14:1-20): 144,000 lɛ ni yɔɔ Zion Gɔŋ lɛ nɔ lɛ he ninaa ni yɔɔ fɛo. Anu ŋwɛibɔfoi ashɛɛ saji kɛbɔle shikpɔŋ lɛ nɔ, shikpɔŋ lɛ weintso lɛ etsu ni akpaa, anaanaa Nyɔŋmɔ mlifu lɛ weinŋaanɔ lɛ nɔ.

NINAA 10 (15:1–16:21): Ŋwɛi gwabɔɔ lɛ he ninaa kroko, ni nɔ ni nyiɛ sɛɛ ji Yehowa mlifu kpuji kpawo ni afɔse ashwie shikpɔŋ nɔ. Efa nɛɛ hu baa naagbee kɛ gbalɛ mlitsɔɔmɔ ni kɔɔ Satan gbɛjianɔtoo lɛ naagbee he.

NINAA 11 (17:1-18): Ajwamaŋ kpeteŋkpele, Babilon Kpeteŋkpele lɛ, ta kooloo ni tsuɔ tamɔ muneele lɛ, ni yaa bu kwɔŋkwɔŋ lɛ mli fioo shi ebaa ekoŋŋ ni ekpata yoo lɛ hiɛ lɛ nɔ.

NINAA 12 (18:1–19:10): Atswa Babilon Kpeteŋkpele lɛ naagbee shigbeemɔ kɛ hiɛkpatamɔ he adafi. Kɛ akpata ehiɛ sɛɛ lɛ, mɛi komɛi foɔ lɛ, mɛi komɛi jieɔ Yehowa yi; atswaa Toobi lɛ yookpeemɔ he adafi.

NINAA 13 (19:11-21): Yesu nyiɛɔ ŋwɛi tabilɔi ahiɛ kɛtsuɔ Nyɔŋmɔ mlifu ni ekɛkojoɔ Satan gbɛjianɔtoo lɛ, etabilɔi, kɛ esɛɛfilɔi ahe nii; loofɔji yeɔ amɛloo.

NINAA 14 (20:1-10): Satan Abonsam ni akɛ lɛ wo bu kwɔŋkwɔŋ lɛ mli, Kristo kɛ enanemɛi Maŋtsɛmɛi Afii Akpe Nɔyeli lɛ, adesai anaagbee kaa, kɛ Satan kɛ edaimonioi lɛ ahiɛkpatamɔ.

NINAA 15 (20:11–21:8): Gbohiiashitee lɛ kɛ Kojomɔ Gbi kpeteŋkpele lɛ; ŋwɛi hee kɛ shikpɔŋ hee je kpo, kɛ naanɔ jɔɔmɔi kɛha adesai ni ji jalɔi.

NINAA 16 (21:9–22:5): Kpojiemɔ ba naagbee kɛ Yerusalem Hee lɛ, Toobi lɛ ŋa lɛ he anunyam ninaa. Nyɔŋmɔ gbɛjianɔtoo kɛha tsamɔ kɛ wala kɛha adesai hoɔ kɛjɛɔ nakai maŋ lɛ mli.

Kpojiemɔ baa naagbee kɛ ŋamɔi kɛ ŋaawoi ni miishɛɛ yɔɔ mli ni jɛ Yehowa, Yesu, kɛ bɔfo lɛ kɛ Yohane diɛŋtsɛ ŋɔɔ. Nine ni afɔɔ mɔ fɛɛ mɔ ji “Ba!”—Kpojiemɔ 22:6-21.