Okadi Lɛ Ni Akɛ Shishinumɔ Aaana
“Beni eta shi yɛ Mu Gɔŋ lɛ nɔ lɛ, ekaselɔi lɛ ba eŋɔɔ yɛ teemɔŋ amɛkɛɛ: ‘Kɛɛmɔ wɔ, Mɛɛ be mli nibii nɛɛ baaba, ni mɛni baafee beni oba lɛ kɛ nibii agbɛjianɔtoo lɛ naagbee lɛ he okadi?’”—MATEO 24:3, NW.
1. Mɛni hewɔ saji ni hosoɔ je lɛ kɛjɛ 1914 lɛ jeee saji ni baa trukaa lɛ, ni mɛni ji nɔ ni Yesu kaselɔi lɛ bi lɛ?
1 SAJI ni ehoso je Iɛ kɛjɛ 1914-18 Jeŋ Ta I lɛ jeee no ko ni ba trukaa. Yesu Kristo gba fɔ shi afii ohai 19 ni eho nɛ. Ekɛɛ ekaselɔi lɛ nibii pii ni yɔɔ naakpɛɛ ni baaba, ni yɛ enɛ hewɔ lɛ amɛbi lɛ akɛ: “Kɛɛmɔ wɔ, Mɛɛ be mli nibii nɛɛ baaba ni mɛni baafee beni oba lɛ kɛ nibii agbɛjianɔtoo lɛ naagbee lɛ he okadi?”—Mateo 24:3, NW.
2. Mɛni hewɔ ni bɔfoi lɛ sumɔɔ ni amɛle babaoo fe nɔ ni baaba dani Yerusalem hiɛkpatamɔ yɛ afi 70 Ŋ.B. aba lɛ?
2 Nakai bɔfoi Iɛ miisumɔ ni amɛle babaoo fe nɔ ni baaba kɛjɛ nakai be lɛ mli kɛyashi Yerusalem hiɛkpatamɔ lɛ mli lɛ. Yesu ekuuu esɛɛ akɛ mɔ ni aana lɛ aloo anaaa lɛ yɛ nakai oshara gbi lɛ nɔ. Ni asaŋ nibii agbɛjianɔtoo ni ehi shi kɛjɛ Nu Afua lɛ mli kɛbashi Yerusalem hiɛkpatamɔ be yɛ afi 70 Ŋ.B. lɛ hu baaa naagbee. Yɛ anɔkwale mli lɛ, ‘ba ni [Yesu] eba’ ni [anaaa lɛ] lɛ kɛ “nibii agbɛjianɔtoo lɛ naagbee lɛ he okadi” lɛ baapue yɛ ebɔfoi lɛ agbele yɛ shikpɔŋ nɔ lɛ sɛɛ be kakadaŋŋ ko mli.
3. (a) Mɛni tsɔɔ akɛ Kristendom jamɔi lɛ eshiɛɛɛ “maŋtsɛyeli lɛ he sanekpakpa” lɛ yɛ bɔfoi lɛ agbele sɛɛ yɛ be mli ni hemɔkɛyeli kwamɔ lɛ ba lɛ? (b) Ani Nyɔŋmɔ Maŋtsɛyeli lɛ yeŋ omanye kɛ́ Jeŋmaji Ekomefeemɔ lɛ hu yeee omanye lɛ?
3 Yesu etsɔ gbalɛ abɛbuai ni kɔɔ Nyɔŋmɔ Maŋtsɛyeli lɛ he lɛ nɔ egba ebɔfoi lɛ jamɔ mli atuatsemɔ ni baaba yɛ be mli ni eku esɛɛ etee ŋwɛi lɛ kɛ amɛgbele sɛɛ lɛ he sane. Ani “Maŋtsɛyeli lɛ he sanekpakpa lɛ” shiɛmɔ yɛ jeŋ fɛɛ Iɛ baaya nɔ yɛ nakai hemɔkɛyeli kwamɔ be lɛ fɛɛ mli? (Mateo 24:14) Eka shi faŋŋ akɛ jeee Kristendom jamɔi lɛ baafee enɛ, yɛ be mli ni yɛ December 1918 mli ni Amerika Maŋ Sɔlemɔi Agwabɔɔ lɛ jie Jeŋmaji Akpaŋmɔ ni ato yiŋ yɛ he lɛ yi akɛ “Nyɔŋmɔ Maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɔ” lɛ. Yɛ jamɔ mli nɔkpɛlɛmɔ ni ena lɛ fɛɛ sɛɛ lɛ, Kpaŋmɔ lɛ yeee omanye yɛ be mli ni Jeŋ Ta II fɛ yɛ 1939 lɛ. Shi ani omanye ni eyeee nɛɛ tsɔɔ akɛ belɛ Nyɔŋmɔ Maŋtsɛyeli diɛŋtsɛ lɛ hu yeee omanye? Dabi! Ni asɛŋ efeŋ nɔ ni yeŋ omanye hu, kɛ Kpaŋmɔ lɛ sɛɛyelɔ ni ji Jeŋmaji Ekomefeemɔ lɛ hu gbee shi—yɛ be kukuoo nɛɛ mli lɛ. Shi moŋ, nakai ŋwɛi Maŋtsɛyeli lɛ baakpata Jeŋmaji Ekomefeemɔ lɛ hiɛ, ní ŋwɛibɔfoi abɔ ni ehe baahia ni akɛ amɛ atsu enɛ he nii lɛ kɔɔɔ he eko.
4. Mɛni hewɔ Maŋtsɛyeli shiɛmɔ nitsumɔ lɛ baafee “okadi” lɛ fa lɛ?
4 Enɛɛmɛi fɛɛ yeɔ buaa ni ehaa wɔnuɔ anɔkwasane nɛɛ shishi faŋŋ: “Okadi” ni abi lɛ ji nɔ ni ha Yesu kɛɛ esɛɛnyiɛlɔi lɛ akɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba” lɛ. (Mateo 24:14) Enɛ tsɔɔ akɛ Maŋtsɛyeli lɛ he shiɛmɔ yɛ jeŋ fɛɛ lɛ baafee “okadi” lɛ mli nibii lɛ fa ni baakadi “nibii agbɛjianɔtoo lɛ naagbee lɛ.” Ebaafee Yesu Kristo ‘ba ni eba’ ni anaaa lɛ lɛ he okadi ko ni anaa faŋŋ. Gbɛ ni Yesu tsɔ nɔ eto nibii ni baatsara nɔ aba lɛ naa kɛtsɔ egbalɛ ni kɔɔ Maŋtsɛyeli shiɛmɔ nitsumɔ lɛ hiɛ lɛ sa kadimɔ. Ekɛɛ yɛ efa ko mli akɛ:
5. Mɛni ji “okadi” ni Yesu tsi ta dani egba jeŋ fɛɛ Maŋtsɛyeli shiɛmɔ lɛ mli nibii lɛ ekomɛi?
5 “Shi nyɛaanu tai kɛ tai atatsii ahe; nyɛkahaa no miifa nyɛtsuii; shi ja nii nɛɛ fɛɛ eba mli da, shi kɛlɛ naagbee lɛ shɛko. Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔmɔ kɛ tsɛŋemɔhelai kɛ shikpɔŋhosomɔi aaaba hei sɔrɔtoi fɛɛ . . . . Ni nɔ ni mlakwamɔ baafa hewɔ lɛ, mɛi pii asuɔmɔ lɛ he aaajɔ. Shi mɔ ni hiɛɔ mli kɛyawulaa shi lɛ, lɛ aaahere eyiwala.”—Mateo 24:6-13.
6. Mɛni hewɔ “okadi” lɛ mli nibii lɛ jeee nibii ni ba yɛ blema lɛ nɔ tsamɔ kɛkɛ Iɛ?
6 Eji anɔkwale, tai, hɔmɔ, shikpɔŋhosomɔi kɛ tsɛŋemɔ helai hi shi kɛtsɔ wɔ Ŋmɛnɛŋmɛnɛ Beaŋ afii ohai abɔ lɛ amli aahu kɛbashi 1914. (Luka 21:11) Shi kɛlɛ, nɔ ko bɛ ni aaanyɛ akɛto nɔ ni eba kɛjɛ be mli ni Jeŋmaji Abei lɛ ba naagbee yɛ nakai afi ni sa kadimɔ lɛ mli kɛbaa nɛɛ lɛ he. Majimaji ateŋ béi ni atee lɛ shi yɛ naakpɛɛ gbɛ nɔ yɛ 1914 latsaa be mli lɛ da ni ebatsɔ tawuu ni jeŋmaji 28 kɛ amɛhe wo mli yɛ naagbee. Nɔ ni fata adesai abasabasafeemɔ nɛɛ he ba ji shikpɔŋhosomɔi diɛŋtsɛ. Hɔmɔ eba, ni yɛ nakai jeŋ ta lɛ naagbee afi lɛ mli lɛ, tsɛŋemɔ hela ko ni atsɛɔ lɛ Spanish Influenza pue tamɔ julɔ ni ebagbe adesai 20,000,000. Enɛɛmɛi fɛɛ jeee nibii ni tsɔ hiɛ ba Iɛ nɔtsaramɔ ko kɛkɛ. Eji nibii komɛi ni feɔ “okadi” ko ni tsɔɔ akɛ nibii agbɛjianɔtoo nɛɛ yɛ ‘enaagbee be’ ni agba afɔ shi lɛ mli. (Daniel 12:4) Biblia lɛ mli naagbee wolo lɛ—The Apocalypse, aloo Kpojiemɔ—feɔ enɛ faŋŋ.
7. Mɛni hewɔ aŋma Kpojiemɔ wolo lɛ mli saji lɛ afɔ shi lɛ, ni nibii pii ni yɔɔ mli ‘ni ajie lɛ kpo yɛ okadii amli’ lɛ tsɔɔ mɛni?
7 Afa bɔfo Yohane ni nine shɛ Kpojiemɔ lɛ nɔ lɛ akɛ eŋma efɔ shi eha yiŋtoo krɛdɛɛ ko. Mɛɛ yiŋtoo? Enɛ: “Ni ekɛtsɔɔ [Nyɔŋmɔ] etsuji nii ni sa akɛ aba mli oya.” Ni yɛ Kpojiemɔ lɛ naagbee lɛ, Nuŋtsɔ Yesu Kristo kɛɛ akɛ: “Hɛɛ, Miiba oya.” Kɛkɛ ni Yohane ha hetoo akɛ: “Amen! Ba Nuŋtsɔ Yesu.” No hewɔ lɛ nibii pii ni “akɛha . . . yɛ okadii amli” lɛ ni aaapue yɛ yinɔsane mli lɛ baatsɔɔ akɛ nibii agbɛjianɔtoo nɛɛ “naagbee be” lɛ mli wɔyɔɔ nɛɛ. (Kpojiemɔ 1:1; 22:20, NW) Hɛɛ, amɛbaaye amɛbua wɔ koni wɔkɛ shishinumɔ ana “okadi” ni nibii pii yɔɔ mli lɛ.
8. Namɔ ji okpɔŋɔnɔtalɔ ni ta “okpɔŋɔ yɛŋ” lɛ nɔ lɛ, ni mɛɛ be mli Nyɔŋmɔ ha lɛ hegbɛ akɛ efã kɛya ni eyatutua ehenyɛlɔi lɛ?
8 Anaa sane ni atsɛɔ lɛ akɛ “Kpojiemɔ okpɔŋɔiatsɛmɛi ejwɛ” lɛ anyiɛmɔ lɛ yɛ Kpojiemɔ yitso 6. Mɔ ni baa klɛŋklɛŋ ji okpɔŋɔnɔtalɔ, Yesu Kristo ni awo ehiɛ nyam lɛ ni ta “okpɔŋɔ yɛŋ” nɔ lɛ ni miiya ayawu ta ashi ehenyɛlɔi lɛ. Nyɔŋmɔ ha lɛ hegbɛ ni efee enɛ yɛ Jeŋmaji Abei lɛ naagbee, be mli ni Yesu henyɛlɔi ni yɔɔ ŋwɛi kɛ shikpɔŋ nɔ lɛ fɛɛ baaba amɛhe shi amɛha enɔyeli lɛ.—Lala 2:1-12.
9. Mɛni ji nɔ ni okpɔŋɔnɔtalɔ ni ta (a) okpɔŋɔ “tsuru” lɛ nɔ lɛ feɔ he mfoniri? (b) “okpɔŋɔ din” lɛ? (d) “okpɔŋɔ lamlu” Iɛ?
9 Mɔ ni ta okpɔŋɔ ni ji enyɔ ni “tsuɔ” lɛ nɔ lɛ feɔ majimaji ateŋ tawuu he mfoniri, ejaakɛ akɛ tawuu nii, “klante kpeteŋkpele ko” ha lɛ. Mɔ ni ji etɛ lɛ ta “okpɔŋɔ diŋ” ko nɔ. Ni okpɔŋɔnɔtalɔ nɛɛ feɔ hɔmɔ he mfoniri. Te wɔfeɔ tɛŋŋ wɔleɔ enɛ? Ejaakɛ ehiɛ nseni yɛ edɛŋ ni no ekɛsusuɔ niyenii ni anaa ayeɔ lɛ yɛ jara ni wa babaoo naa. Okpɔŋɔnɔtalɔ ni ji ejwɛ lɛ ta “okpɔŋɔ lamlu” ko ni tamɔ helatsɛ nɔ, ni efeɔ tsɛŋemɔ hela he mfoniri, ejaakɛ sane lɛ kaneɔ akɛ: “Ni mɔ ni ta enɔ lɛ gbɛi ji Gbele. Ni Hades [gbohiiaje] nyiɛ esɛɛ kpaakpa.” Eji anɔkwale ákɛ, akɛ hegbɛ ko ha okpɔŋɔnɔtalɔ ni ji ejwɛ nɛɛ ni ekɛ tawuu “klante kɛ hɔmɔ kɛ shikpɔŋ lɛ nɔ kooloi lɛ agbegbee amɛ.” Nɔ ni sa kadimɔ hu ji akɛ aha lɛ hegbɛ hu koni etsɔ “gbele hela” nɔ etao gbɔmɛi eha gbohiiaje (Hades) .—Kpojiemɔ 6:1-8.
10. Mɛni baaba yɛ be mli ni atse naasɔomɔ nii ni ji enumɔ kɛ ekpaa lɛ anaa lɛ, ni mɛni ji nɔ ni esa akɛ shikpɔŋ nɔ bii lɛ akpɛlɛ nɔ?
10 Beni Bɔfo Yohane ena “nibii agbɛjianɔtoo lɛ naagbee” lɛ mli nibii komɛi yɛ ninaai lɛ amli lɛ, ena ni aagbele gbalɛ wolokpo ni ji enumɔ kɛ ekpaa lɛ anaasɔomɔ nii lɛ. Biɛ ji he ni ena adebɔɔ mli nibii komɛi ni yɔɔ gbeyei yɛ ninaa lɛ mli, ni nɔ ni je shishi ji “shikpɔŋhosomɔ kpeteŋkpele.” Yɛ naagbee lɛ anyɛ shikpɔŋ lɛ nɔ bii lɛ anɔ ni amɛkpɛlɛ nɔ akɛ: “Ejaakɛ amɛ [Yehowa Nyɔŋmɔ kɛ Yesu Kristo] mlifu gbi wulu lɛ eshɛ.” Nakai okadi mlifu gbi lɛ naagbee baatsɔɔ akɛ mɛi ni fiɔ je nɛɛ sɛɛ lɛ naagbee kwraa eba agbɛnɛ.—Kpojiemɔ 6:9-17.
Mɛi Ni Abu Amɛ Akɛ Amɛsa Yiwalaheremɔ Lɛ Anaabuamɔ
11. Mɛɛ abɛbua Yesu kɛtsu nii ni ekɛtsɔɔ anɔkwale ni nɔ ni egba efɔ shi ni kɔɔ ‘beni eba’ Iɛ kɛ “nibii agbɛjianɔtoo lɛ naagbee” lɛ he lɛ ji lɛ mli?
11 Yɛ be mli ni ekɛ ‘ba ni eba’ lɛ kɛ “nibii agbɛjianɔtoo Iɛ naagbee” Iɛ he “okadi” Iɛ haa lɛ, Yesu kɛɛ: “Shi nyɛkasea agbamitso abɛ ni ebuɔ lɛ: beni eniji lɛ efrɔke ni ebɔi baai fumɔ lɛ, nyɛle akɛ latsaa be Iɛ eshɛ eta. Nakai nɔŋŋ nyɛ hu, beni nyɛaana nii nɛɛ fɛɛ lɛ, nyɛlea akɛ eshɛ agboi lɛ anaa eta. Lɛlɛŋ, miikɛɛnyɛ akɛ: Nɛkɛ yinɔ nɛɛ hoŋ, ja nii nɛɛ fɛɛ eba mli da. Ŋwɛi kɛ shikpɔŋ baaho aya; shi miwiemɔi lɛ hoŋ eyaŋ.”—Mateo 24:32-35.
12, 13. (a) Mɛni ji nɔ ni Yudafoi amaŋ oshara ni ba yɛ afi 70 Ŋ.B. lɛ etsɔɔɔ? (b) Nakai amanehulu ni ba lɛ ji mɛɛ gbalɛ mli mfoniri? (d) No hewɔ lɛ mɛni Yesu tee nɔ egba ni kɔɔ ebaa Iɛ he?
12 Beni Romabii Iɛ kpata Yerusalem kɛ esɔlemɔwe lɛ hiɛ yɛ afi 70 Ŋ.B. taakɛ Yesu gba fɔ shi lɛ, nɛkɛ amanehulu kpeteŋkpele ni ba Yudafoi lɛ anɔ nɛɛ etsɔɔɔ akɛ Yesu eba nɔ ni ji shii enyɔ, ni ákɛ ba ni eba ni anaaa lɛ lɛ eje shishi. (Mateo 24:15-21) Akɛni Biblia lɛ kɛ blema Yerusalem tsuɔ nii hewɔ lɛ, nakai amanehulu ni yɔɔ gbeyei ni ba afi 70 Ŋ.B. lɛ ji gbalɛ mfoniri diɛŋtsɛ. Efee nɔ ni baaba yɛ jeŋ fɛɛ yɛ Jeŋmaji Abei ni ba naagbee yɛ 1914 sɛɛ kɛ agbɛnɛ yɛ be mli ni Yesu Kristo eje ba ni eba ni anaaa lɛ lɛ shishi diɛŋtsɛ lɛ he mfoniri yɛ gbɛ bibioo nɔ. No hewɔ ni Yesu kɛɛ hu akɛ:
13 “Shi no gbii lɛ anɔ amanehului lɛ asɛɛ lɛ, etsɛŋ ni hulu aaawo duŋ, ni nyɔŋtsere kpɛŋ dɔŋŋ, ni ŋulamii aaatserɛ kɛaajɛ ŋwɛi atswia shi, ni ŋwɛi hewalɛi lɛ aaahoso. Kɛkɛ ni gbɔmɔ bi Iɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo. Ni eeetsu ebɔfoi lɛ kɛ tɛtrɛmantrɛ ni gbee wa, ni amɛaabua emɛi ni ahala lɛ anaa kɛaajɛ kɔɔyɔi ejwɛ Iɛ nɔ, kɛaajɛ ŋwɛi naagbee he kome nɔ kɛyashi naagbee he kroko lɛ nɔ.”—Mateo 24:29-31.
14. Mɛɛ kpaŋmɔ kɛ afɔle ewie he yɛ Lala 40:5 lɛ?
14 “Emɛi ni ahala” lɛ ni agba afɔ shi lɛ anaabuamɔ yɛ nibii agbɛjianɔtoo nɛɛ naagbee lɛ mli lɛ ji Nyɔŋmɔ famɔ nɛɛ mlibaa: “Nyɛbuaa mimɛi krɔŋkrɔŋi lɛ ni etsɔ afɔle nɔ amɛkɛ mi ekpaŋ lɛ anaa nyɛhaa mi!” (Lala 50:5) Akɛni Yehowa tsɛɔ enɛ akɛ ‘ekpaŋmɔ’ hewɔ lɛ, enyɛŋ efee henɔjɔɔmɔ ni mɔ aŋkro lɛ feɔ ehaa Nyɔŋmɔ beni ebatsɔ Kristofonyo ni ebaanyɛ ekɛfɔ̃ lɛ diɛŋtsɛ enɔ kɛtsɔ afɔle ni lɛ diɛŋtsɛ ekɛ ehe aaasha lɛ nɔ. Dabi, nɛkɛ kpaŋmɔ ni Yehowa kɛ “mɛi krɔŋkrɔŋi” lɛ fee lɛ ji “kpaŋmɔ hee” ni Nyɔŋmɔ ewo shi akɛ ekɛ mumɔŋ Israel we lɛ baafee lɛ. Afɔle ni nakai kpaŋmɔ hee lɛ damɔ nɔ ji “gbɔmɔ Bi” Yesu Kristo kpɔmɔ afɔleshaa lɛ.—Yeremia 31:31-34; Mateo 24:30.
15. Ŋamɛi ji “mɛi krɔŋkrɔŋi” aloo anɔkwafoi lɛ, ni amɛmiisɔmɔ akɛ mɛni bianɛ kɛha je lɛ?
15 “Mɛi krɔŋkrɔŋi” aloo anɔkwafoi ni aŋɔɔamɛ awoɔ kpaŋmɔ hee lɛ mli lɛ ji mumɔŋ Israelbii. (Luka 22:19, 20) Nyɔŋmɔ biɔ ni abua amɛnaa koni enyɛ eta mɛi ni abua amɛnaa nɛɛ amli, ni ekpɛlɛ anɔkwafoi loo amɛmli mɛi krɔŋkrɔŋi lɛ anɔ ni ekpoo mɛi ni ehiii shi yɛ nɔ ni amɛkɛɔ akɛ amɛyɛ kpaŋmɔ lɛ ni ji kpaŋmɔ hee lɛ mli lɛ naa lɛ. (Lala 50:16) Kɛjɛ Jeŋ Ta I kɛbaa nɛɛ, Kristendom ni kɛɔ akɛ eyɔɔ kpaŋmɔ hee lɛ mli lɛ ejieko ehe kpo akɛ mɔ ni Yehowa Nyɔŋmɔ ekpɛlɛ enɔ. Mɛi ni yɔɔ sɔrɔto kwraa yɛ amɛhe ji Yesu Kristo, kpaŋmɔ hee lɛ Teŋdamɔlɔ lɛ kaselɔi ni amɛjɔɔ amɛhe nɔ lɛlɛŋ ni abaptisi amɛ lɛ akuu loo shwɛɛnii fioo lɛ. Amɛjie amɛhe kpo akɛ amɛji mumɔŋ Israelbii. Nɛkɛ anɔkwafoi nɛɛ ni kɛ amɛhe kpɛtɛɔ kpaŋmɔ hee lɛ he lɛ ji “mɛi ni ahala” lɛ ni gbɔmɔ Bi lɛ buaa amɛnaa kɛbaa lɛ diɛŋtsɛ emasɛi kɛtsɔɔ ebɔfoi lɛ anɔ lɛ. Amɛtsũɔ kpaŋmɔ hee lɛ, ‘mikpaŋmɔ’ lɛ, taakɛ Nyɔŋmɔ tsɛɔ lɛ lɛ he gbɛnaa nii lɛ he nii. Yɛ nii ni amɛtsuɔ amɛkɛfiɔ Nyɔŋmɔ Maŋtsɛyeli kɛtsɔ Yesu Kristo nɔ lɛ sɛɛ lɛ hewɔ lɛ, ámɛbatsɔmɔ “okadii” amɛha je muu lɛ fɛɛ.—Yesaia 8:18; Hebribii 2:13, 14.
16. (a) Mɛɛ be mli “mɛi krɔŋkrɔŋi” loo anɔkwafoi lɛ ateŋ shwɛɛnii lɛ amumɔŋ shitee je shishi? (b) Namɔ ji Ayemforowu lɛ yɛ obalayei nyɔŋma lɛ he abɛbua lɛ mli lɛ, ni namɛi feɔ nɛkɛ okadi ayemforo lɛ?
16 Kɛha nakai shwɛɛnii ni ji “mɛi krɔŋkrɔŋi” lɛ, ehe bahia ni amɛhiɛ atsɛ̃ yɛ mumɔŋ yɛ “nibii agbɛjianɔtoo lɛ naagbee” lɛ shishijee fa lɛ mli. Enɛ ji “okadi” lɛ ni Yesu gba fɔ shi yɛ egbalɛ kpeteŋkpele lɛ mli lɛ fa ko ni sa kadimɔ jogbaŋŋ. Kɛha shwɛɛnii lɛ, nakai shitee loo hiɛtsɛ̃ɛ lɛ ji miishɛɛ kpele, miishɛɛ ni tamɔ obalayei nilelɔi enumɔ ni nyɔɔŋteŋ bolɔmɔ: “Naa, ayɛmforowu lɛ miiba eeei! Nyɛjea kpo, nyɛyakpeea lɛ!” lɛ tsiɛ amɛhiɛ lɛ nɔ̃. (Mateo 25:1-6) Nakai miishɛɛ shitee lɛ ba yɛ 1919 agbiɛnaa be mli, beni shwɛɛnii ni afɔ amɛ mu lɛ je shishi akɛ amɛmiite shi kɛmiijɛ yiwaa ni ba amɛnɔ yɛ jeŋ fɛɛ kɛ he ni akɛwo amɛnitsumɔ lɛ mli yɛ Jeŋ Ta I duŋ be lɛ mli lɛ. Nakai obalayei nyɔŋma lɛ abɛbua lɛ mli Ayemforowu lɛ ji Yesu Kristo, ni eyemforo yɛ okadifeemɔ mli lɛ ji enɔkwafoi asafo kɛ amɛmlibii 144,000 ni baafata ehe yɛ eŋwɛi Maŋtsɛyeli lɛ mli lɛ. (Kpojiemɔ 14:1-4) Biblia be akɔntaabuu kɛ ŋmɛnɛŋmɛnɛ beaŋ saji ni baa lɛ tsɔɔ akɛ Ayemforowu kɛ Maŋtsɛ lɛ ba mumɔŋ sɔlemɔwe lɛ yɛ 1918 agbiɛnaa be mli. Kɛkɛ ni eje shishi akɛ eeetee mumɔŋ ayemforo lɛ mlibii anɔkwafoi ni amɛgboi lɛ ashi koni amɛbafata ehe yɛ ŋwɛi Maŋtsɛyeli lɛ mli. Taakɛ ayemforo kuu lɛ mli shwɛɛnii, ni obalayei nilelɔi enumɔ lɛ fee amɛhe mfoniri lɛ wiemɔi lɛ tsɔɔ lɛ, Kpojiemɔ 19:7 jaje akɛ: “Nyɛhaa wɔmii ashɛa ni wɔmli afilia wɔ ni wɔwoa ehiɛ nyam! Ejaakɛ Toobi lɛ yookpeemɔ lɛ eshɛ, ni eŋa lɛ esaa ehe eto.”
17. (a) Mɛni hewɔ ‘obalayei nilelɔi’ akuu lɛ amli baanya afili amɛ lɛ? (b) Mɛni ji nɔ ni obalayei nilelɔi lɛ kɛfata amɛhe kɛba, no hewɔ lɛ mɛni amɛbaanyɛ amɛfee?
17 Hɛɛ, be ni ‘obalayei nilelɔi’ akuu lɛ ahiɛ tsɛ yɛ mumɔŋ ni amɛbanu nɔ ni “okadi” ni je shishi epue yɛ 1914 lɛ tsɔɔ lɛ shishi lɛ ji mlifilimɔ kɛ nyamɔ kpeteŋkpele be. Kɛkɛ ni nɛkɛ wiemɔi nɛɛ bakɔ amɛhe yɛ no be lɛŋ: “Ajɔɔ mɛi ni atsɛ amɛ kɛba toobi lɛ yookpeemɔ okpolɔ lɛ he lɛ.” (Kpojiemɔ 19: 9) Yɛ Yesu abɛbua lɛ mli lɛ, obalayei nilelɔi enumɔ lɛ kɛ mu ni fa fata amɛ kanei lɛ ahe ba bɔni afee ni amɛnyɛ amɛsu amɛkanei lɛ ni amɛyafata miishɛɛ ayemforo kuu lɛ he kɛ amɛ kanei ni amɛsusui lɛ. Beni Ayemforowu lɛ ba lɛ, “mɛi ni esaa amɛhe amɛto lɛ kɛ lɛ tee yookpeemɔ he lɛ, ni aŋa shinaa lɛ.”—Mateo 25:1-10.
18. (a) Yɛ Jeŋ Ta I sɛɛ lɛ, no mli lɛ shwɛɛnii ni afɔ amɛ mu lɛ yɛ Nyɔŋmɔ Wiemɔ lɛ ni haa mɔ nilee kɛ shishinumɔ kɛ mumɔ krɔŋkrɔŋ lɛ babaoo yɛ amɛmli bɔ ni no aaaha amɛfee mɛni? (b) Mɛni ji nɔ ni atsi tã yɛ amɛ klɛŋklɛŋ kpee yɛ ta lɛ sɛɛ lɛ shishi?
18 Taakɛ nɔ ni obalayei nilelɔi enumɔ lɛ fee he mfoniri lɛ ji lɛlɛŋ lɛ, shwɛɛnii ni afɔ amɛ mu lɛ tee nɔ amɛkɛ miishɛɛ kɛ la ni kpɛɔ here ŋwɛi Ayemforowu lɛ, mɔ ni be ni ekɛaakpee esafo ni ji eyemforo lɛ be eshɛ lɛ. Yɛ bɔ ni ágba amɛnaa yɛ mumɔŋ yɛ Jeŋ Ta I gbii lɛ amli lɛ fɛɛ sɛɛ lɛ, amɛyɛ Nyɔŋmɔ Wiemɔ lɛ ni kɛ shishinumɔ kɛ hiɛtɛjemɔ haa mɛi lɛ kɛ emumɔ krɔŋkrɔŋ lɛ pii yɛ amɛmli lolo ákɛ “sũ nii,” ni baatee amɛ nitsumɔ lɛ shi ekoŋŋ akɛ mɛi ni hɛleɔ adesai ashi kɛbaa Nyɔŋmɔ Maŋtsɛyeli lɛ ni yɔɔ Ayemforowu kɛ Maŋtsɛ lɛ dɛŋ lɛ he. (2 Korintobii 4:7) No hewɔ lɛ, Yɛ September 1-8, 1919 lɛ, ‘obalayei nilelɔi’ akuu lɛ fee amɛ klɛŋklɛŋ majimaji ateŋ kpee yɛ Cedar Point, Ohio. Jɛmɛ atswa yiŋ ni ato akɛ abaakala wolo tɛtrɛɛ hee afata Buu-Mɔɔ lɛ he lɛ he adafi yɛ. Abaatsɛ nɛkɛ Wolo hee nɛɛ akɛ The Golden Age, (Yinɔ Kpakpa) , gbɛi ni tsɔɔ nɔ̃ yinɔ ni adesai ni asaa ato amɛ gbɛjianɔ ekoŋŋ lɛ baana mli ŋɔɔmɔ yɛ Ayemforowu kɛ Maŋtsɛ, Yesu Kristo Afii Akpe Nɔyeli be lɛ mli lɛ. Aakala nɛkɛ wolo tɛtrɛɛ nɛɛ lolo, shi amrɔ nɛɛ kɛ gbɛi kroko ni ji Awake!
19. (a) Te fee tɛŋŋ ni ‘obalayei nilelɔi’ akuu lɛ batsɔ ‘ba ni Yesu eba’ lɛ he “okadi” lɛ fa ni ekaaa? (b) Ŋamɛi ji mɛi ni yɔɔ miishɛɛ agbɛnɛ yɛ shikpɔŋ nɔ lɛ?
19 Yɛ nakai kpee lɛ sɛɛ be fioo lɛ, akala The Golden Age lɛ—ni ji October 1, 1919 nɔ̃ lɛ—akɛ klɛŋklɛŋ nɔ̃. ‘Obalayei anɔkwafoi akuu’ lɛ kɛ nɛkɛ wolo nɛɛ kɛ Buu Mɔɔ Biblia kɛ Wolo Bibioo Asafo lɛ woji krokomɛi tee amɛ nitsumɔ ni ji kpɛmɔ ni amɛaakpɛ amɛha je lɛ nɔ. Amɛfã ‘maŋtsɛyeli lɛ he sanekpakpa lɛ shiɛmɔ koni akɛye jeŋmaji lɛ fɛɛ odase’ dani nibii agbɛjianɔtoo nɛɛ naagbee lɛ aba lɛ he ta yɛ jeŋ ta lɛ sɛɛ. (Mateo 24:14) Yɛ nɛkɛ gbɛ nɔ Iɛ, shwɛɛnii ni afɔ amɛ mu lɛ, ‘obalayei nilelɔi’ akuu lɛ batsɔ “okadi” ni nibii pii yɔɔ mli ni kadiɔ ‘ba ni Yesu eba’ ni anaaa lɛ akɛ Maŋtsɛ ni akɛ hewalɛ ewo edɛŋ lɛ kɛ “nibii agbɛjianɔtoo nɛɛ naagbee” lɛ mli nibii lɛ fã ko ni ekaaa. Nakai nitsumɔ ni haa nilee lɛ ji odaseyeli kroko ni tsɔɔ faŋŋ akɛ “naagbee be” lɛ je shishi yɛ Jeŋmaji Abei lɛ naagbee yɛ 1914. Miishɛɛ ji mɛi fɛɛ ni kɛ shishinumɔ naa nɛkɛ “okadi” ni agba afɔ shi nɛɛ fa nɛɛ kɛ nɔ ni etsɔɔ lɛ fɛɛ lɛ!a
[Shishigbɛ niŋmaa]
a Ajie kɛjɛ February 1, 1985 Watchtower lɛ mli.
Te Obaaha Hetoo oha Tɛŋŋ?
◻ Maŋtsɛyeli shiɛmɔ nitsumɔ lɛ ji mɛni fa?
◻ Namɔ loo mɛni ji nɔ ni okpɔŋɔnɔtalɔ ni ta okpɔŋɔ yɛŋ lɛ nɔ lɛ feɔ he mfoniri; okpɔŋɔ tsuru lɛ; okpɔŋɔ diŋ lɛ; okpɔŋɔ lamlu lɛ?
◻ Yudafoi amaŋ hiɛkpatamɔ ni ba yɛ afi 70 Ŋ.B. lɛ feɔ mɛɛ gbalɛ he mfoniri?
◻ Namɛi feɔ ‘obalayei nilelɔi’ akuu lɛ, ni mɛni hewɔ amɛmli baanyɛ afili amɛ lɛ?
[Akrabatsa ni yɔɔ baafa 20]
“Tee shi ni otso, shi ola lɛ miiba, Yehowa anunyam lɛ miikpɛ yɛ onɔ! Ejaakɛ naa, duŋ ha shikpɔŋ lɛ nɔ, duŋ kpii ha majimaji lɛ anɔ; shi bo lɛ Yehowa miikpɛ yɛ onɔ, ni enunyam lɛ epue yɛ onɔ. Ni majimaji aaanyiɛ kɛaaba ola lɛ he, ni maŋtsɛmɛi aaaba kpɛmɔ ni kpɛɔ yɛ onɔ lɛ hɛ. Holemɔ ohiŋmɛii anɔ ni okwɛ ohe kɛkpɛ: Amɛ fɛɛ amɛbua amɛhe ŋaa kɛmiiba oŋɔɔ! Obihii lɛ aaajɛ maŋsɛɛ shɔŋŋ aba, ni obiyei lɛ hu, aaahiɛ amɛ yɛ ŋmawuiaŋ kɛaaba.”—Yesaia 60:1-4.
[Mfoniri ni yɔɔ baafa 16]
‘Kɛɛmɔ wɔ, mɛni baafee beni oba lɛ he okadi?’