Ŋwɛi Jɔɔmɔi Kɛha “Mɛi Ni Le Nii Lɛ”
“Ni mɛi ni le nii lɛ aaakpɛ tamɔ atatu kpɛmɔ, ni mɛi ni etsɔɔ mɛi pii ogbɛ kɛtee jalɛ mli Iɛ aaakpɛ tamɔ ŋulamii kɛaatee naanɔ”—DANIEL 12:3.
1. Yɛ be mli ni etsɔɔ fimɔ be ni baaba mɛi ni sumɔɔ tawuu lɛ anɔ lɛ sɛɛ lɛ, mɛni ekoŋŋ ŋwɛibɔfo lɛ gbala ejwɛŋmɔ kɛtee nɔ?
ŊWƐIBƆFO lɛ gbalɛ ni ekɛha Daniel lɛ kɛwɔ ejɛ efii ohai ejwɛ D.Ŋ.B. lɛ mli aahu kɛba Harmagedon Etsɔɔ akɛ Mikael kɛ toiŋjɔlɛ baaba shikpɔŋ nɔ yɛ gbɛ kome pɛ ni baahi lɛ nɔ: Kɛtsɔ mɛi ni sumɔɔ tawuu lɛ fɛɛ ahiɛkpatamɔ nɔ. Agbɛnɛ, akɛni wɔbote yinɔsane mli kɛtsɔ hiɛ yɛ nɛkɛ naakpɛɛ gbɛ nɔ hewɔ lɛ, bɔfo lɛ kuɔ sɛɛ egbaa jɔɔmɔi babaoo ni Nyɔŋmɔ webii naa mli ŋɔɔmɔ “yɛ naagbee gbii lɛ amli” lɛ he sane efɔɔ shi.—Daniel 10:14.
Be Kɛha Gbohiiashitee
2. Gbohii komɛi ‘te shi’ yɛ “naagbee gbii lɛ amli” yɛ mɛɛ gbɛ nɔ?
2 Ŋwɛibɔfo lɛ kɛɛ Daniel akɛ: “Ni mɛi ni wɔɔ yɛ shikpɔŋ su mli lɛ ateŋ mɛi pii hiɛ aaatsɛ; mɛi komɛi aaatee naanɔ wala mli, shi mɛi komɛi hu aaatee naanɔ hiɛgbele kɛ naanɔ nyaŋemɔ mli.” (Daniel 12:2) Eka shi faŋŋ akɛ, “naagbee gbii lɛ amli” lɛ ji be kɛha gbohiiashitee kɛha mɛi ni “wɔɔ yɛ shikpɔŋ su mli lɛ.” Nɛkɛ shitee nɛɛ ekome ba beni Yesu batsɔ Maŋtsɛ yɛ 1914 sɛɛ nɔŋŋ. (Mateo 24:3) Yɛ be mli ni ekwɛɔ nakai be lɛ gbɛ lɛ, bɔfo Paulo ŋma akɛ: “Wɔ mɛi ni wɔhiɛ kamɔ ni baashwɛ yɛ Nuŋtsɔ lɛ baabe lɛ mli lɛ, wɔtsɔŋ mɛi ni ewɔ lɛ ahiɛ . . . gbohii ni yɔɔ Kristo mli lɛ tsutsu baate shi.” (1 Tesalonikabii 4:15, 16;Kpojiemɔ 6:9-11) Eka shi faŋŋ akɛ, belɛ, 1914 sɛɛ mli nɔŋŋ ni Yesu tee “Nyɔŋmɔ Israel” lɛ mlibii ni amɛgboi yɛ anɔkwayeli mli momo lɛ ashi kɛtee mumɔŋ wala mli yɛ ŋwɛi.” (Galatabii 6:16) Kɛha amɛ lɛ, amɛshitee lɛ ji nɔ ni kɛ amɛ yaa “naanɔ wala mli.”
3, 4. Te fee tɛŋŋ ni Nyɔŋmɔ tsuji anɔkwafoi akuu ko ‘bagbo’ yɛ 1918?
3 Shi ŋwanejee ko bɛ he akɛ gbohiiashitee kroko fata ŋwɛibɔfo lɛ wiemɔi lɛ ahe. Aaafee afii 40 dani 1914 aaaba lɛ, no mli lɛ Kristofoi akuu fioo ko bɔ kɔkɔ akɛ nakai afi lɛ baakadi Jeŋmaji Abe ni Yesu gba fɔ shi lɛ naagbee (Luka 21:24) Nɛkɛ Kristofoi nɛɛ ha akɛ Zion’s Watch Tower Tract Society lɛ wo mla shishi yɛ 1884, kɛkɛ ni amɛkala nɔ ni ejɛ amɛbiblia lɛ kasemɔ kɛ shigbɛlɛmɔ mli eba lɛ yɛ wolo ni atsɛɔ lɛ Zion’s Watch Tower and Herald of Christ’s Presence lɛ mli.
4 Ama anɔkwale ni amɛsane Iɛ ji nɔ mi yɛ naakpɛɛ gbɛ nɔ yɛ 1914 be mli ni klɛŋklɛŋ jeŋ ta lɛ fɛ, ni “kɔɔmɔi lɛ abɔimɔ” ni Yesu gba fɔ shi lɛ je shishi lɛ. (Mateo 24:7, 8) Ni kɛlɛ, amɛjamɔ mli henyɛlɔi Iɛ kɛ tawuu mli yeyeeyefeemɔ lɛ tsu nii ni amɛwa amɛyi aahu kɛyashi yɛ naagbee, yɛ 1918 lɛ, ebafee tamɔ nɔ ni atsi amɛshiɛmɔ nitsumɔ lɛ naa kwraa, ni awo Buu Mɔɔ Asafo lɛ mli onukpai lɛ hu tsuŋ yɛ gbɛ ni ejaaa nɔ. Enɛ ha miishɛɛ ba yɛ hei komɛi. Eha gbalɛ ni agba afɔ shi yɛ Kpojiemɔ wolo lɛ mli lɛ hu ba mli akɛ: “Ni kɛ amɛgbe amɛdaseyeli lɛ naa lɛ, kooloo lɛ ni jɛ bu kwɔŋkwɔŋ lɛ mli lɛ kɛ amɛ baawu ta, ni eeeye amɛ nɔ kunim, ni eeegbe amɛ.”—Kpojiemɔ 11:7.
5, 6. Yɛ mɛɛ gbɛ nɔ nɛkɛ kuu nɛɛ aniiashikpamɔi yɛ 1919 lɛ kɛ gbalɛ lɛ mlibaa akɛ “mɛi ni wɔɔ yɛ shikpɔŋ su mli lɛ ateŋ mɛi pii hiɛ aaatsɛ” lɛ baa?
5 Taakɛ gbalɛ lɛ tsɔɔ lɛ, amɛhiŋ shi akɛ ‘gbohii.’ No hewɔ lɛ “yɛ gbii etɛ kɛ fa sɛɛ lɛ, wala mumɔ jɛ Nyɔŋmɔ ŋɔɔ ba amɛmli, ni amɛte shi amɛdamɔ amɛnaji anɔ, ni gbeyei kpeteŋkpele mɔmɔ mɛi ni na amɛ lɛ. . . . Ni amɛkwɔ kɛtee ŋwɛi yɛ atatu lɛ mli, ni amɛhenyɛlɔi lɛ na amɛ.” (Kpojiemɔ 11:11, 12; Ezekiel 37:1-14) Eka shi faŋŋ akɛ amɛ gbohiiashitee lɛ ji okadi nɔ, ejaakɛ gbohiiashitee diɛŋtsɛ kɛmiiya mumɔŋ wala mli yɛ ŋwɛi lɛ baafee nɔ ni amɛhenyɛlɔi lɛ enaŋ. Shi moŋ, atee amɛ shi kɛjɛ gbele shihilɛ ni tamɔ nɔ ni atsuuu nɔ ko lɛ mli kɛtee hewalɛnamɔ kɛ ekaa kɛ nitsumɔ mli ni mɛi ni tsɔ̃ nɔ ni ba amɛnɔ lɛ he ŋaa lɛ na amɛ. Afi 1919 mli ni ajie Buu Mɔɔ Asafo lɛ najiaŋdamɔlɔi lɛ kɛjɛ amɛtsuŋwoo lɛ mli, ni ato shiɛmɔ nitsumɔ lɛ he gbɛjianɔ ekoŋŋ ni je lɛ na Maŋtsɛyeli odaseyeli he tafaa kpeteŋkpele ni fe fɛɛ yɛ yinɔsane mli lɛ shishijee—Mateo 24:14.
6 Yɛ okadi shishinumɔ nɛɛ mli ni ‘mɛi pii ni amɛwɔ yɛ shikpɔŋ su mli lɛ te shi lɛ. Kɛkɛ ni kɛjɛ 1919 kɛyaa lɛ, nakai Biblia Kaselɔi akuu fioo ni amɛte shi lɛ je shishi akɛ amɛaatao ni amɛbua Yesu nyɛmimɛi lɛ ateŋ mɛi ni eshwɛ lɛ anaa koni amɛyibɔ lɛ fɛɛ ni ji 144,000 lɛ ashɛ ni asɔo amɛnaa (Mateo 23:31; Kpojiemɔ 7:1-3) Beni aŋkroaŋkroi lɛ kpɛlɛɔ nɔ lɛ, amɛjɔɔ amɛhe nɔ amɛha Nyɔŋmɔ kɛtsɔ Kristo nɔ ni amɛbatsɔmɔ Yehowa gbɛjianɔtoo ni anaa yɛ shikpɔŋ nɔ lɛ mlibii. Akɛni amɛnine shɛ mumɔ krɔŋkrɔŋ nikee nii lɛ nɔ yaka hewɔ lɛ, abu amɛ jalɔi yɛ hemɔkɛyeli ni amɛyɔɔ yɛ Yesu kpɔmɔ afɔleshaa lɛ mli lɛ hewɔ ni aŋɔ amɛ akɛ Nyɔŋmɔ bii yɛ mumɔŋ gbɛfaŋ.—Romabii 8:16; Galatabii 2:17; 3:8.
7. Yɛ mɛɛ gbɛ nɔ enɛ baatsɔ Shitee kɛmiiya “naanɔ wala mli” aha mɛi pii?
7 Amɛteŋ mɛi ni yeɔ anɔkwale kɛyashiɔ amɛshikpɔŋ nɔ wala lɛ naagbee lɛ yɛ gbɛkpamɔ ni ma shi shiŋŋ ákɛ akɛ amɛgbɛhe yɛ Yesu Kristo masɛi yɛ ŋwɛi lɛ baawo amɛdɛŋ. (1 Korintobii 15:50-53) No hewɔ lɛ, amɛmumɔŋ shitee lɛ ji nɔ ni kɛ amɛ yaa naanɔ wala mli. Beni amɛyɔɔ wala mli lolo yɛ shikpɔŋ nɔ lɛ, toiŋjɔlɛ hiɔ amɛteŋ eyɛ mli akɛ amɛyɛ je ni kɛ ehe wuɔ ta mli. (Romabii 14:19) Shi nɔ ni he hiaa fe fɛɛ lɛ, amɛnaa amɛkɛ Yehowa Nyɔŋmɔ diɛŋtsɛ teŋ toiŋjɔlɛ mli ŋɔɔmɔ, “Nyɔŋmɔ hejɔlɛ ni fe jwɛŋmɔi fɛɛ lɛ.”—Filipibii 4:7.
Shitee Kɛmiiya “Hiɛgbele” Mli
8, 9. Yɛ mɛɛ gbɛ nɔ nɛkɛ mumɔŋ shitee nɛɛ hu baatsɔ “naanɔ hiɛgbele kɛ naanɔ nyaŋemɔ” aha mɛi komɛi?
8 Belɛ, mɛni hewɔ mɛi komɛi teɔ shi kɛyaa “naanɔ hiɛgbele kɛ naanɔ nyaŋemɔ mli” lɛ? Anɔkwale lɛ ji akɛ jeee mɛi fɛɛ ni kpɛlɛɔ ninefɔɔ akɛ amɛbatee nakai Maŋtsɛyeli kuu lɛ mlibii lɛ fɛɛ hiɔ shi akɛ anɔkwafoi Mɛi komɛi haa amɛhemɔkɛyeli he jɔɔ, ni amɛnyɛɛɛ amɛŋmɛ amɛtsui shi. (Hebribii 2:1) Amɛteŋ mɛi fioo ko po batsɔmɔ hemɔkɛyeli kwalɔi ni ehe bahia ni ejie amɛ kɛjɛ Kristofoi asafo lɛ mli. (Mateo 13:41, 42) Yesu tsɔɔ bɔ ni mɛnɛɛmɛi fɛɛ ji akɛ “nakai tsulɔ fɔŋ lɛ” ni Nuŋtsɔ lɛ gbalaa etoi “waa diɛŋtsɛ lɛ,” ekɛ lɛ aaayafata osatofoi lɛ he. “Jɛi yaafo kɛ nyanyɔjiashishikpemɔ aaahi.”—Mateo 24:48-51, (NW) ; Efesobii 4:18; 5:6-8.
9 Mɛɛ oshera enɛ ji kɛ mɔ aaakpɛlɛ hegbɛ ni kwɔ fe fɛɛ ni akɛha adesai ni yeee emuu nɛɛ nɔ koni agbɛnɛ atsɔ he ni akpoo enɛ! Paulo wie mɛi ni feɔ nakai lɛ ahe akɛ: “Ejaakɛ mɛi ni la etso amɛnɔ pɛŋ ni amɛsa amɛnaa ŋwɛi nɔkee nɔ lɛ ni amɛna mumɔ krɔŋkrɔŋ lɛ eko ni amɛsa Nyɔŋmɔ wiemɔ kpakpa lɛ kɛ jeŋ ni baaba lɛŋ hewalɛi lɛ anaa, ni no sɛɛ ni amɛgbee shi lɛ, anyɛŋ amɛ atsake afee ehee ekoŋŋ aha tsuitsakemɔ, akɛni amɛmiisɛŋ Nyɔŋmɔ bi lɛ ekoŋŋ amɛmiiha amɛhe ni amɛmiibɔ lɛ ahora amɛmiitsɔɔ hewɔ lɛ.” (Hebribii 6:4-6) Yɛ enɛ hewɔ lɛ amɛshitee lɛ tsɔɔ “naanɔ hiɛgbele kɛ naanɔ nyaŋemɔ.” Amɛbɛ naanɔ wala he gbɛkpamɔ ko dɔŋŋ.
“Nyɛtsoɔ Tamɔ Kanei”
10. Ŋamɛi ji “mɛi ni le nii” lɛ, ni mɛɛ gbɛ nɔ amɛtsɔɔ ‘amɛkpɛɔ tamɔ atatu kpɛmɔ?
10 Shi kɛha mɛi ni hiɔ shi akɛ anɔkwafoi lɛ, gbalɛ lɛ kɛɛ: “Ni mɛi ni le nii lɛ aaakpɛ tamɔ atatu kpɛmɔ, ni mɛi ni etsɔɔ mɛi pii agbɛ kɛtee jalɛ mli lɛ aaakpɛ tamɔ ŋulamii kɛaatee naanɔ.” (Daniel 12:3) Eka shi faŋŋ akɛ “mɛi ni le nii lɛ” ji Kristofoi asafo lɛ ni afɔ amɛ mu Iɛ ateŋ shwɛɛnii anɔkwafoi lɛ, ni ‘esuɔmɔnaa nifeemɔ he anɔkwa nilee yɛ mumɔŋ nilee kɛ shishinumɔ fɛɛ mli eyimɔ amɛ obɔbɔ lɛ.’ Akɛni Yehowa wo amɛ hewalɛ hewɔ lɛ, ‘amɛto amɛtsui shi yɛ amanehului amli kɛ nyamɔ, ni amɛdaa Tsɛ lɛ ni ha amɛsa mɛi ni yeɔ krɔŋkrɔŋ bii agboshinii lɛ eko yɛ la mli lɛ shi.’ (Kolosebii 1:9, 11, 12) Kɛjɛ 1919 kɛbaa nɛɛ, eyɛ mli akɛ ‘duŋ kpii ha shikpɔŋ lɛ nɔ, ni duŋ ha majimaji lɛ anɔ’ moŋ, shi amɛtee nɔ amɛfee mɛi ni “tsoɔ tamɔ kanei” yɛ adesai ateŋ. (Yesaia 60:2; Filipibii 2:15; Mateo 6:14-16) ‘Amɛkpɛɔ tamɔ hulu yɛ amɛtsɛ maŋtsɛyeli lɛ mli.’—Mateo 13:43.
11. Yɛ mɛɛ bɛ nɔ “mɛi ni yɔɔ nilee” lɛ ejie amɛhe kpo akɛ “mɛi ni etsɔɔ mɛi pii agbɛ kɛtee jalɛ mli”?
11 Mɛɛ gbɛ nɔ amɛtsɔɔ amɛjieɔ amɛhe kpo akɛ “mɛi ni etsɔɔ mɛi pii agbɛ kɛtee jalɛ mli” lɛ? (Daniel 12:3) Shidaa aha amɛ odaseyeli yɛ anɔkwayeli mli, abua mumɔŋ Israel naagbee bii lɛ anaa kɛba mli ni abu amɛ jalɔi kɛha wala yɛ ŋwɛi. Kɛfata he lɛ, asafo babaoo ko ni ji “tooi krokomɛi” ejie amɛhe kpo ni amɛmiibua amɛhe naa kɛmiiba la ni jɛɔ Yehowa ŋɔɔ ni ‘Daniel maŋbii’ lɛ kpɛɔ shweɔ amɛnɔ lɛ mli. (Yohane 10:16; Zakaria 8:23) Nɛkɛ “tooi krokomɛi” nɛɛ ejɛ amɛsuɔmɔ mli amɛkɛ amɛhe ebɔ mɛi ni afɔ amɛ mu lɛ ahe yɛ amɛnitsumɔ ni ji “sanekpakpa” lɛ shiɛmɔ mli. (Mateo 24:14: Yesaia 61:5, 6) Amɛ hu amɛtsɔɔ hemɔkɛyeli yɛ Yesu Kristo lá ni efɔse eshwie shi lɛ mli, no hewɔ lɛ abu amɛ jalɔi koni amɛna amɛkɛ Nyɔŋmɔ teŋ naanyobɔɔ mli ŋɔɔmɔ. (Kpojiemɔ 7:9-15; Okɛto Yakobo 2: 23 he.) Kɛ́ amɛye anɔkwale kɛyashi naagbee lɛ, amɛgbɛi baafee nɔ ni abaaya nɔ “ana akɛ aŋma yɛ wolo lɛ mli.” No hewɔ lɛ, amɛbaakpa gbɛ akɛ amɛbaajo fimɔ be ni yɔɔ gbeyei fe fɛɛ ni baaba jeŋmaji lɛ anɔ lɛ mli.—Daniel 12:1; Mateo 24:13, 21, 22.
“Ni Amɛaakpɛ . . . Kɛaatee Naanɔ”
12, 13. (a) Te ebaa lɛ tɛŋŋ ni “mɛi ni yɔɔ nilee” lɛ nyɛɔ ‘amɛkpɛɔ kɛyaa naanɔ’ lɛ? (b) Yɛ mɛɛ gbɛ nɔ, amɛbaanyɛ amɛjie amɛhe kpo akɛ “mɛi ni etsɔɔ mɛi pii agbɛ kɛtee jalɛ mli” yɛ gbɛ kroko nɔ?
12 Ŋwɛibɔfo lɛ kɛɛ Daniel akɛ: “Ni mɛi ni yɔɔ nilee lɛ aaakpɛ tamɔ atatu kpɛmɔ . . . tamɔ ŋulamii kɛaatee naanɔ.” (12:3) Te aaafee tɛŋŋ ni mɛi ni afɔ amɛ mu nɛɛ aaakpɛ kɛaatee naanɔ, yɛ be mli ni yɛ naagbee lɛ amɛteŋ mɔ fɛɛ mɔ baagboi No ji akɛ amɛbaaya nɔ ‘amɛkpɛ’ yɛ amɛgbele sɛɛ po. Yɛ be mli ni Yesu tsɔɔ amɛgbɛhe yɛ ŋwɛi lɛ mli yɛ Kpojiemɔ wolo lɛ mli lɛ ekɛɛ: “Ni Nyɔŋmɔ kɛ toobi lɛ maŋtsɛsɛi lɛ aaama emli; etsuji lɛ aaasɔmɔ lɛ ni amɛaana ehiɛ, ni egbɛi lɛ aaahi amɛhiɛtsei anɔ. Nyɔɔŋ bɛ jɛi, ni kanei loo hulu kpɛmɔ ehiaŋ amɛ ejaakɛ Nuŋtsɔ Nyɔŋmɔ lɛ aaakpɛ aha amɛ, ni amɛaaye maŋtsɛ kɛaatee naanɔi anaanɔ.”—Kpojiemɔ 22:3-5.
13 Hɛɛ, mɛi ni atee amɛ shi nɛɛ baaye nɔ ákɛ maŋtsɛmɛi tamɔ ŋwɛi ŋulamii “kɛaatee naanɔ.” Amɛmumɔŋ kpɛmɔ lɛ kɛ jɔɔmɔi babaoo baaba adesai anɔ. (Kpojiemɔ 14:13) Yɛ be mli ni etsɔɔ akɛ amɛji “Yerusalem Hee” lɛ, Kpojiemɔ wolo lɛ bɔ amaniɛ akɛ: “Ni hulu loo nyɔɔŋtsere ehiaaa maŋ lɛ ni etso aloo ekpɛ yɛ mli; ejaakɛ Nyɔŋmɔ anunyam lɛ tsoɔ yɛ mli, ni toobi lɛ ji la ni kpɛɔ yɛ mli. Ni jeŋmaji [ni ahere amɛyiwala] lɛ aaanyiɛ yɛ ela lɛ mli, ni shikpɔŋ lɛ nɔ maŋtsɛmɛi lɛ aaaŋɔ amɛnunyam lɛ kɛba mli.” (Kpojiemɔ 21:2, 9, 23, 24) Mɛi ni atee amɛ shi nɛɛ baaye abua ni akɛ kpɔmɔ afɔleshaa lɛ mli sɛɛnamɔi lɛ atsu nii ni “akɛtsa jeŋmaji lɛ.” (Kpojiemɔ 22:2) Yɛ be mli ni yɛ Afii Akpe Nɔyeli lɛ naagbee lɛ, Yesu kɛ ehefatalɔi maŋtsɛmɛi kɛ osɔfoi 144,000 lɛ kɛ adesai anɔkwafoi lɛ eba emuuyeli mli ekoŋŋ lɛ, belɛ “amɛtsɔɔ mɛi pii agbɛ kɛtee jalɛ mli” lɛlɛŋ. Yɛ naagbee kaa lɛ sɛɛ lɛ, adesai ni ato amɛ gbɛjianɔ ekoŋŋ lɛ baatsɔ adesa weku ni yeɔ emuu ni hiɔ paradeiso shikpɔŋ nɔ kɛyaa naanɔ. (Kpojiemɔ 20:7-10; Lala 37:29) Yɛ nɛkɛ gbɛ nɔ lɛ, nɔ ni ejɛ ‘Daniel maŋbii’ lɛ ŋwɛi anunyam lɛ mli eba ni anaa faŋŋ lɛ hu baahi shi “kɛya naanɔi anaanɔ.”
Gbohiiashitee Kroko
14. Namɛi hu baafata mɛi ni gbalɛ lɛ kɛɔ akɛ “mɛi ni wɔɔ yɛ shikpɔŋ su mli lɛ ateŋ mɛi pii hiɛ aaatsɛ” lɛ ahe lɛ?
14 No hewɔ lɛ ŋwɛibɔfo lɛ wiemɔ lɛ kɛ wɔ tekeɔ be ni Mikael ‘teɔ shi edamɔɔ shi’ lɛ kɛ “fimɔ be” ni anako nɔ da lɛ kɛyaboteɔ nibii agbɛjianɔtoo hee lɛ mli. Agbɛnɛ hu, jɔɔmɔ ni abaatsɔ nɛkɛ mɛi ni kpɛɔ “tamɔ ŋulamii” nɛɛ anɔ akɛba lɛ baafee nɔ ni eyɔɔ kɛha mɛi pɛ ni jeɔ “fimɔ be” lɛ mli lɛ. Beni Yesu ji gbɔmɔ lolo yɛ shikpɔŋ nɔ lɛ, ekɛɛ: “Ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohiiabui lɛ amli lɛ baanu egbee, ni amɛaajɛ kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.” (Yohane 5: 28, 29) Nɛkɛ wiemɔ nɛɛ tsɔɔ adesai ni egboi lɛ ashitee diɛŋtsɛ, ni ŋwanejee ko bɛ he akɛ nɛkɛ gbohiiashitee nɛɛ hu ji ŋwɛibɔfo lɛ wiemɔi krokomɛi lɛ amlibaa ni akpã mli: “Ni mɛi ni wɔɔ yɛ shikpɔŋ su mli lɛ ateŋ mɛi pii ahiɛ aaatsɛ.”—Daniel 12:2.
15. Yɛ mɛɛ gbɛ nɔ aaana akɛ mɛi ni atse amɛ shi lɛ eshitee lɛ baafee nɔ ni kɛ amɛ “aaatee naanɔ wala mli”?
15 Mɛi ni fata nɛkɛ shitee diɛŋtsɛ pɔtɛɛ nɛɛ he ji Daniel diɛŋtsɛ. Ŋwɛibɔfo lɛ kɛɛ lɛ akɛ: “Shi bo lɛ, yaa kɛyashi naagbee lɛ aaashɛ, ni ooojɔɔ ohe [yɛ gbele mli] ni ooote shi ona ogbɛfaŋ nɔ yɛ gbii lɛ anaagbee lɛ mli.” (Daniel 12:13) Mɛi ni tamɔ Daniel ni atee amɛ shi ni kpɛlɛɔ Yesu kɛ enyɛmimɛi lɛ asɔɔmɔ ni jɛɔ ŋwɛi baa lɛ nɔ lɛ baafee mɛi ni abaawo amɛ nɔ kɛyashɛ adesa emuuyeli mli. Kɛ amɛye naagbee kaa lɛ mli omanye lɛ, abaaŋmala amɛgbɛi yɛ wala wolo lɛ mli kɛya naanɔ. (Kpojiemɔ 20:5) Kɛha amɛ hu lɛ, amɛshitee lɛ baafee nɔ ni kɛ amɛ “aaatee naanɔ wala mli.”
16. Ní namɛi hu amɛshitee yɛ nibii agbɛjianɔtoo hee lɛ mli lɛ baafee nɔ ni kɛ amɛ yaa “naanɔ hiɛgbele kɛ naanɔ nyaŋemɔ mli” lɛ?
16 Shi jeee mɛi fɛɛ baakpɛlɛ nɔ nakai. Eka shi faŋŋ akɛ mɛi komɛi baabɔ mɔdɛŋ ni amɛkɛ nifeemɔi ni eshɔ gbɔmɔ toiŋjɔlɛ kɛjɛ edɛŋ yɛ be kakadaŋŋ mli lɛ aba ekoŋŋ. Atsɔ hiɛ abɔ gbɔmɛi ni tamɔ nɛkɛ lɛ kɔkɔ jogbaŋŋ yɛ Biblia lɛ mli: “Shi mɛi ni tsui faa lɛ kɛ mɛi ni heee yeee kɛ mɛ ni feɔ nihii nii kɛ awuiyelɔi kɛ ajwamaŋbɔlɔi kɛ sulɔi kɛ wɔŋjalɔi kɛ amalelɔi fɛɛ lɛ, amɛaana amɛgbɛnaa yɛ kpaakpo lɛ ni tsoɔ kɛ la kɛ swɔɔ lɛ mli, nɔ ni ji gbele ni ji enyɔ lɛ.” (Kpojiemɔ 21:8) Nɛkɛ “gbele niji enyɔ” nɛɛ ji kojomɔ ni jɛɔ Yehowa ŋɔɔ diɛŋtsɛ ni gbohiiashitee ko bɛ mli. Eji kojomɔ ni hiɔ shi kɛyaa naanɔ, ebɛ naagbee kwraa. Mɛi ni ateɔ amɛ shi ni jieɔ amɛhe kpo akɛ amɛhiɛ esɔɔɔ nii lɛ baana gbele ni ji enyɔ nɛɛ mli amanehulu; no hewɔ lɛ, amɛshitee lɛ baafee “naanɔ hiɛgbele kɛ naanɔ nyaŋemɔ.”—Daniel 12:2.
“Anɔkwale Nilee Baafa Babaoo”
17. Te wɔfeɔ tɛŋŋ wɔleɔ akɛ gbalɛ ni kɔɔ kooyigbɛ maŋtsɛ lɛ kɛ wuoyigbɛ maŋtsɛ lɛ ahe ni aŋma afɔ shi lɛ ba lɛ nakai kɛha wɔsɛɛnamɔ titri yɛ ŋmɛnɛ?
17 Kɛkɛ ni ŋwɛibɔfo lɛ kɛ ŋaawoo wiemɔi ha Daniel akɛ: “Shi bo, Daniel lɛ, tsiimɔ wiemɔi nɛɛ anɔ, ni osɔo wolo lɛ naa kɛyashi naagbee be lɛ; mɛi pii aaakane fitsofitso, ni anɔkwale nilee aaafa babaoo.” (Daniel 12:4) Nɛkɛ wiemɔi nɛɛ gbalaa wɔjwɛŋmɔ. Eyɛ mli akɛ ŋwɛibɔfo lɛ gbalɛ ni kɔɔ maŋtsɛmɛi enyɔ lɛ ahe lɛ mlibaa je shishi aaafee afii 2,300 nɛ moŋ, shi eshishinumɔ diɛŋtsɛ lɛ mli bafee faŋŋ titri lɛ kɛjɛ “naagbee be” lɛ, titri kɛjɛ 1919. ‘Mɛi pii miikane aloo amɛmiikpa’ Biblia lɛ mli, ni anɔkwale nilee efa babaoo diɛŋtsɛ. Amrɔ nɛɛ ji be ni Yehowa kɛ nilee eha mɛi ni nuɔ shishi lɛ.
18. (a) Mɛɛ gbalɛ lɛ mli fai titrii komɛi miiba mli bianɛ aloo amɛmiihe amɛba mli lɛ? (b) Mɛɛ su ni haa wɔŋmɛɔ pɛpɛɛpɛ enɛ kɛhaa wɔ?
18 Anɔkwale ni eji akɛ gbalɛ nɛɛ mli nibii pii ba mli afi ohai abɔ ni eho lɛ wajeɔ wɔhemɔkɛyeli yɛ gbalɛ lɛ fai krokomɛi ni baaba mli lɛ mli. (Yoshua 23:14) Nɔ ni je lɛ kɛ ehe ewo mli ji agbalatseetse ni yaa nɔ yɛ kooyigbɛ maŋtsɛ lɛ kɛ wɔɔyigbɛ maŋtsɛ lɛ teŋ taakɛ bɔ ni ŋwɛibɔfo lɛ gba fɔ shi lɛ. Agbɛnɛ, gbalɛ lɛ bɔ oshara be ni mli wawai diɛŋtsɛ ni baaba hu he kɔkɔ. No hewɔ lɛ enɛ yeɔ ebuaa wɔ bɔni afee ni wɔŋmɛ pɛpɛɛpɛ ni maŋtsɛmɛi nɛɛ ateŋ mɔ ko lakamɔ wiemɔi akagbala wɔ. Enɛ ji be ni esa akɛ wɔkɛwaje hekɛnɔfɔɔ ni wɔyɔɔ yɛ Yehowa mli lɛ. Kaaha ohiɛ miikpa nɔ akɛ “Mikael . . . lumɔ kpeteŋkpele lɛ” “damɔ shi” kɛha Nyɔŋmɔ webii lɛ. Wɔyiwalaheremɔ kome pɛ ni yɔɔ ji ni wɔba wɔhe shi wɔha Nyɔŋmɔ Maŋtsɛyeli ni yɔɔ Kristo Yesu shishi lɛ.—Bɔfoi lɛ Asaji 4:12; Filipibii 2:9-11.
19. Mɛni ji nɔ ni ŋwɛibɔfo lɛ wiemɔi ni ekɛha Daniel lɛ tsɔɔ kɛha wɔteŋ mɔ fɛɛ mɔ?
19 No hewɔ lɛ, okɛ ohe akpɛtɛ “mɛi ni le nii” ni ‘miikpɛ tamɔ atatu kpɛmɔ’ lɛ ahe kpaakpa. Feemɔ ekaa yɛ nii ni otsuɔ ohaa Nyɔŋmɔ Maŋtsɛyeli lɛ mli. (1 Korintobii 15:58; Romabii 15:5, 6) Ha suɔmɔ ni oyɔɔ kɛha Nyɔŋmɔ Wiemɔ lɛ mli anɔkwale lɛ mli akwɔ ni obu toiŋjɔlɛ ni yɔɔ Nyɔŋmɔ gbɛjianɔtoo lɛ mli bianɛ lɛ akɛ jwetri ko ni jara wa waa. (Lala 119:165; Efesobii 4:1-3; Filipibii 2:1-5) Kɛkɛ lɛ, kɛ Mikael ‘te shi edamɔ shi’ koni ekpata Yehowa henyɛlɔi lɛ ahiɛ lɛ, eba akɛ oooje mli, kɛ Nyɔŋmɔ webii fɛɛ ni aaana amɛgbɛi akɛ ‘aŋma yɛ wolo lɛ mli’ lɛ.
[Shishigbɛ niŋmai]
Ajie kɛjɛ July 1, 1987 Watchtower lɛ mli.
Ani Obaanyɛ Oha Hetoo?
◻ Yɛ mɛɛ gbɛ nɔ “mɛi ni wɔɔ yɛ shikpɔŋ su mli lɛ ateŋ mɛi pii” ete shi momo po?
◻ Yɛ mɛɛ gbɛ nɔ nɛkɛ ‘shitee nɛɛ’ baanyɛ atsɔ “hiɛgbele”?
◻ Yɛ mɛɛ gbɛ nɔ “mɛi ni yɔɔ nilee lɛ” tamɔ kanei ni amɛkɛ mɛi pii hu baa jalɛ mli lɛ?
◻ Mɛɛ wɔsɛɛ he mlibaa baaba aha ‘mɛi ni ewɔ yɛ shikpɔŋ su mli’ lɛ ashitee?
◻ Daniel 12:4 baa mli yɛ mɛɛ gbɛ nɔ?
[Mfoniri ni yɔɔ baafa 18]
Kɛjɛ 1919 kɛbaa nɛɛ mɛi ni le nii Iɛ miiha anɔkwale ni haa wala kɛ akpa
[He ni Mfoniri ni yɔɔ baafa 18 lɛ Jɛ]
NASA photo