Yibaamɔ Loo Hiɛkpatamɔ Yɛ “Amanehulu Kpeteŋkpele” Lɛ Mli
“Ni aaafo mɛnɛɛmɛi ashɛ afɔ kɛya naanɔ, shi jalɔi lɛ aaaya naanɔ wala mli.”—Mateo 25:46, NW.
1, 2. Mɛɛ jwɛŋmɔ ji nɔ ni mɛi komɛi ejie lɛ kpo, ni mɛni hewɔ oshara yɔɔ enɛ mli ni esa akɛ akwa lɛ?
1 JWƐŊMƆ akɛ abaakpata mɛi komɛi ahiɛ kɛya naanɔ lɛ ji nɔ ni mɛi komɛi sumɔɔɔ. Enɛ ji anɔkwale yɛ mɛi ni kɛɔ akɛ abaahere mɛi fɛɛ yiwaIa ni heɔ yeɔ akɛ yɛ naagbee lɛ mɔ fɛɛ mɔ baana wala lɛ ahe. Yɛ Ŋ.B. afii ohai etɛ lɛ mIi tɔ̃ɔ ni jamɔ mli niŋmalɔ Origen kɛ jwɛŋmɔ ni ahiɛ akɛ yɛ naagbee lɛ yiwalaheremɔ baaba aha mɛi fɛɛ lɛ bɔi fɛoyeli. Ehe ehiaaa po ni wɔya shɔŋŋ nakai, ejaakɛ mɛi komɛi yɛ ni ŋmɛnɛ amɛkɛɔ akɛ amɛji Kristofoi ni hiɛ nakai jwɛŋmɔ lɛ nɔŋŋ akɛ ekolɛ abaatee adesai fɛɛ shi, ni mɛi ni “amanehulu kpeteŋkpele” lɛ baagbe amɛ lɛ po fata he.—Mateo 24:21, 22.
2 Mɛi ni hiɛ nɛkɛ jwɛŋmɔ nɛɛ miibɛŋkɛ Kristendom tsɔɔmɔ ni kɔɔ “mɛi fɛɛ ashitee” lɛ he ni amɛleee. Sɔlemɔi ni yɔɔ sɛɛnyiɛlɔi pii ni amɛhe gbɛi lɛ fɛɛ tsɔɔ akɛ abaatee gbohii lɛ, FƐƐ agbɔmɔtsei ashi ni amɛyafata amɛ susumai sɔrɔtoi lɛ ahe yɛ ŋwɛi aloo yɛ “hell.” Shi Biblia lɛ etsɔɔɔ “mɛi fɛɛ ashitee” ni tamɔ nɛkɛ, taakɛ Kristendom nuɔ shishi lɛ, aloo akɛ abaatee gbohii lɛ FƐƐ ni efɔŋfeelɔi po fata he lɛ ashi aloo ákɛ akɛ amɛ baaba wala mli.
Jeee Gbohii Lɛ Fɛɛ Baaná Shitee
3. Mɛɛ gbɛ nɔ Yesu tsɔɔ yɛ akɛ jeee mɛi fɛɛ baaná shitee?
3 Yesu tsɔɔ akɛ jeee mɔ fɛɛ mɔ baaná shitee. Eeha hetoo ko ni Sadukifoi lɛ ni heɔ yeɔ akɛ ateeŋ mɔ ko mɔ ko shi lɛ bi lɛ yɛ ŋaa mli lɛ hetoo. Ewie “mɛi ni baasa jeŋ ni baa lɛ kɛ gbohiiashitee lɛ namɔ lɛ” he. (Luka 20:35) Ewiemɔ lɛ tsɔɔ akɛ jeee mɛi fɛɛ baajie amɛhe kpo akɛ mɛi ni sa akɛ ateeɔ amɛ shi yɛ Nyɔŋmɔ nibii agbɛjianɔtoo hee ni ewo shi yɛ he lɛ mli.
4. Taakɛ Kpojiemɔ yitso 20 tsɔɔ lɛ, nɛgbɛ ji he ni gbohii lɛ baajɛ aba, shi mɛɛ okadi he ko kɛ egbohii lɛ haaa lɛ?
4 Yɛ Kpojiemɔ yitso 20, ni wieɔ “gbohii ni eshwɛ lɛ” ni naaa “klɛŋklɛŋ shitee” lɛ mli gbɛfaŋnɔ lɛ ashitee lɛ he lɛ, Biblia lɛ kɛɔ akɛ, “ŋshɔ” kɛ “Hades” (gbohiiaje) jie gbohii ni yɔɔ amɛmli lɛ amɛha. Ekɛɛɛ akɛ gbohii lɛ baa kɛjeɔ “la kpaakpo lɛ,” aloo “gbele ni ji enyɔ lɛ,” ni atsɛɔ lɛ yɛ he kroko akɛ “Gehena” (Geʹi Hinnom, Hebri) lɛ mli. (Luka 12:5) Taakɛ bɔ ni wiemɔ “ŋshɔ” tsɔɔ mɛi ni gboi yɛ ŋshɔ mli lɛ fɛɛ agbonyobu yɛ nu mli akɛni nine shɛɛɛ amɛgbohii lɛ anɔ koni afu amɛ yɛ shikpɔŋ gbiŋ nɔ hewɔ lɛ, nakai nɔŋŋ Hela wiemɔ Hades lɛ hu etsɔɔɔ gbɔmɔ aŋkro ko gbonyobu, shi moŋ adesai akwamaŋ gbɔnyobu ni yɔɔ shikpɔŋ nɔ. Ekɛ wiemɔ ni ji “Sheol” ni anaa yɛ Hebri Ŋmalɛi lɛ amli lɛ kpaa gbee. Yesu jaje akɛ: “Migbo ni naa, mihiɛ ka kɛmiiya naanɔi anaanɔ, ni mihiɛ gbohiiaje (hades) kɛ gbele naa samfei lɛ.” (Kpojiemɔ 1:18) Ekɛ nɛkɛ “samfei” nɛɛ baatsu nii yɛ e-afii akpe nɔyeli be lɛ mli ni eha “mɛi ni aaasa jeŋ ni baa lɛ kɛ gbohiiashitee lɛ namɔ lɛ” aye amɛhe.
5. “Gehena” feɔ mɛni he mfoniri?
5 Yɛ gbɛ kroko nɔ lɛ, he ko he ko bɛ ni Ŋmalɛi lɛ tsɔɔ yɛ akɛ Kristo hiɛ Gehena naa samfei. Ewie Gehena he akɛ: “Nyɛkashea mɛi ni gbeɔ gbɔmɔtso lɛ ni amɛnyɛɛɛ susumɔ lɛ amɛgbe lɛ agbeyei; shi moŋ nyɛshea [Yehowa] mɔ ni nyɛɔ susuma kɛ gbɔmɔtso fɛɛ hiɛ ekpataa yɛ gehena mli lɛ gbeyei.” (Mateo 10:28) Yɛ be mli ni ewieɔ kuku nɛɛ he yɛ ewolo Immortality of the Soul or Resurrection of the Dead? (French) lɛ mli lɛ, Nilelɔ Oscar CulImann ŋma akɛ: “psy·kheʹ [susuma] Iɛ etsɔɔɔ jwɛŋmɔ ni Helabii hiɛ yɛ susuma he lɛ yɛ biɛ, shi moŋ, esa akɛ atsɔɔ shishi akɛ ‘wala.’ . . . W. G. Kummel . . . hu kɛ yiŋtoo kpakpa ŋma akɛ: Mateo 10:28 ‘emaaa susuma lɛ ni gbooo nɔ mi, shi moŋ eema anɔkwale ni eji akɛ Nyɔŋmɔ pɛ ji mɔ ni baanyɛ akpata ŋwɛi wala lɛ hu hiɛ shi jeee shikpɔŋ nɔ wala pɛ lɛ hiɛ lɛ nɔ mi.’” Hɛɛ, Gehena damɔ shi kɛha hiɛkpatamɔ kwraa ni shitee ko nyɛŋ ajɛ mli aba. The New Bible Commentary (Second Edition, page 786) tsɔɔ Gehena mli akɛ “‘gbele ni ji enyɔ’ lɛ mlitsɔɔmɔ.”—Kpojiemɔ 21:8.
6. Tsɔɔmɔ kɛjɛ Biblia lɛ mli akɛ mɛi komɛi yaa Gehena dani afi 1,000 Kojomɔ Gbi Iɛ shɛɔ, ni yɛ enɛ hewɔ lɛ amɛbɛ hiɛnɔkamɔ ko akɛ abaatee amɛ shi.
6 Agbɛnɛ Biblia lɛ tsɔɔ diɛŋtsɛ akɛ mɛi komɛi boteɔ okadi Gehena lɛ mli dani afii 1,000 Kojomɔ Gbi lɛ jeɔ shishi. Yesu kɛɛ woloŋmalɔi lɛ kɛ Farisifoi lɛ ni tsakeee amɛtsui lɛ akɛ amɛ kɛ amɛ Jeŋmajiaŋbii ni amɛtsɔmɔ amɛ Yudafoi lɛ ji ‘Gehena shishibii’ aloo ‘Gehenabii’ diɛŋtsɛ. (Mateo 23:15, 33-35; kwɛmɔ Yohane 9:39-41; 15:22-24.) Kɛji akɛ mɔ ni atsake lɛ ni ebatsɔ Farisifonyo tsɔɔ Gehena bi ‘shii enyɔ fe amɛ diɛŋtsɛ amɛhe’ lɛ, shii enyiɛ enɛ efeŋ Yuda Iskariot, mɔ ni kɛ musubɔɔ kɛ amɛ kpaŋ koni etsɔɔ Nyɔŋmɔ Bi lɛ sɛɛgbɛ lɛ nɔ̃ lɛ nɔ babaoo! Nɛkɛ Yesu tsɔɔ beni etsɛ Yuda akɛ “laajemɔ bi” lɛ. (Yohane 17:12) Nakai nɔŋŋ hu mɛi ni amɛkwa hemɔkɛyeli lɛ ni amɛtsakeee amɛtsui lɛ yaa Gehena, yɛ gbele mli, shi jeee Sheol aloo Hades (gbohiiajeŋ) . (Hebribii 6:4-8; 2 Petro 2:1) Nakai nɔŋŋ eji anɔkwale yɛ Kristofoi ni amɛjɔɔ amɛhe nɔ ni jɛɔ amɛsuɔmɔ mli amɛfeɔ esha aloo “amɛkpaleɔ kɛyaa” lɛ ahe. (Hebribii 10:26-31, 38, 39) Mɛnɛɛmɛi ji nɔkwɛmɔ nii kɛkɛ ni tsɔɔ akɛ mɛi komɛi yɛ “nibii agbɛjianɔtoo nɛɛ mli” po ni ámɛfee esha ni akɛkeŋ amɛ, yɛ nibii agbɛjianɔtoo “ni baa” lɛ mli po. (Mateo 12:31, 32; Okɛto 1 Yohane 5:16 he.) No hewɔ lɛ amɛnaŋ shitee.
Bɔ Ni Yehowa Kojomɔ Ji Naagbee Nɔ Kwraa Hã
7. Mɛni yeɔ odase lolo akɛ Yehowa kɛ naagbee kojomɔ baa mɛi komɛi anɔ yɛ ŋmɛnɛŋmɛnɛ nibii agbɛjianɔtoo nɛɛ po mli?
7 Esa akɛ anɔkwale ni eji akɛ Yesu jaje akɛ aŋɔŋ “mumɔ lɛ he musubɔɔ” lɛ akeŋ “yɛ je nɛŋ loo jeŋ ni baaba lɛ mli” lɛ atsɔ̃ mɛi ni amɛyiŋ feɔ amɛ kɔshikɔshi yɛ sane nɛɛ he lɛ ayiŋ akɛ Yehowa kɛ naagbee kojomɔ baa mɛi komɛi anɔ yɛ nɛkɛ “jeŋ nɛɛ” mli po. Mɛnɛɛmɛi “eye fɔ kɛmiiya naanɔ.” Amɛnaŋ “faa kɛyashi naanɔ.” (Marko 3:28, 29) Belɛ mɛni hewɔ esa akɛ atee amɛ shi?
8. (a) Te esa akɛ wɔjie su ni Yehowa hiɛ lɛ nɔŋŋ kpo wɔha tɛŋŋ? (b) Mɛni hewɔ esa akɛ wɔna hekɛnɔfɔɔ yɛ Yehowa kɛ e-Bi lɛ mli akɛ Kojolɔi ni mɛɛ nɔkwɛmɔ nɔ wɔbaanyɛ wɔtsɛ ni wɔkɛtsɔɔ bɔ ni ŋwɛi kojomɔ ji naagbee nɔ kwraa ha lɛ?
8 No hewɔ lɛ, ákɛ wɔ Nyɔŋmɔ Yehowa lɛ odasefoi ni buɔ amɛhe lɛ, wɔkɛ hiɛkpatamɔ wooo gbɔmɛi ahe gbeyei. Jwɛŋmɔ ni Yehowa hiɛ yɛ nibii ahe lɛ wɔ hu wɔhiɛ lɛ. Aŋma yɛ ehe akɛ “etsui shi etoɔ,” ejaakɛ “esumɔɔɔ akɛ mɛi komɛi alaaje, shi moŋ ákɛ mɛi atsake amɛtsui.” (2 Petro 3:9) Yɛ gbɛ kroko nɔ lɛ, esa akɛ wɔkwa henumɔ tsɔ ni wɔkɛaatsu nii, ekolɛ ani wɔwie wɔshi gbɛ ni Yehowa tsɔɔ nɔ etsuɔ saji ahe nii ni wɔleee. Yehowa ji Kojolɔ ni yeɔ emuu. (5 Mose 32:4) Nakai nɔŋŋ eji anɔkwale yɛ Kristo Yesu he. (Yohane 5:30) Kɛji ákɛ akɛ sane ko bafɔ adesai kojolɔi ni yeee emuu lɛ ahiɛ ni aye sane lɛ aahu, kɛjɛ saneyeli he bibii amli kɛtee maŋ lɛ saneyeli he wulu lɛ agbe naa lɛ, gbɔmɛi buɔ akɛ átsu jalɛsane he nii, ni anyɛŋ abi ni atsɛ sane lɛ sɛɛ ekoŋŋ. Belɛ mɛni hewɔ esa akɛ wɔyiŋ afee wɔ kɔshikɔshi yɛ Yehowa kojomɔi kɛ bɔ ni amɛji naagbee nɔ kwraa ha lɛ ahe?—Lala 119:75.
9. Yɛ mɛɛ gbɛ nɔ Mateo 10:28 tsɔɔ bɔ ni Yehowa kojomɔi ji naagbee nɔ kwraa ha Iɛ?
9 Yɛ be mli ni Yehowa ejie ehe kpo akɛ naakpɛɛ ‘tsuishitolɔ’ akɛni eesumɔ “akɛ mɛi fɛɛ atsake amɛtsui” hewɔ lɛ, kɛ̃lɛ, ele akɛ jeee adesai fɛɛ baatsake amɛtsui. No hewɔ ni Yesu bɔ wɔ kɔkɔ akɛ “nyɛshea mɔ ni nyɛɔ susuma [wala] kɛ gbɔmɔtso fɛɛ hiɛ ekpataa yɛ gehena mli lɛ gbeyei” lɛ. Yɛ be mli ni ewieɔ kuku nɛɛ he lɛ, New International Dictionary of New Testament Theology lɛ kɛɛ akɛ: “Mat. 10:28 etsɔɔɔ bɔ ni susuma lɛ ji nɔ ni gbooo ha, shi moŋ bɔ ni atsakeee ŋwɛi kojomɔ ni akɛbaa mɔ ni tsakeee etsui lɛ nɔ lɛ.”
10. Mɛni Yesu wie yɛ “mɛi ni . . . fa pii lɛ kɛ “mɛi fioo lɛ ahe, ni mɛni ji Hela wiemɔ ni atsɔɔ shishi akɛ “hiɛkpatamɔ” Iɛ shishi diɛŋtsɛ?
10 Yesu wie yɛ e-Gɔŋ nɔ Shiɛmɔ lɛ mli akɛ: “Nyɛbotea agbo fintɔŋŋ lɛ mli! Ejaakɛ agbo ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ [Hela, apoleia] mli lɛ, ni mɛi ni boteɔ mli lɛ fa pii. Shi agbo fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.” (Mateo 7:13, 14) Hela wiemɔi komekomei ashishitsɔɔmɔ wolo tsɔɔ apoleia mli akɛ eshishi ji “hiɛkpatamɔ,” “naanɔ fitemɔ” (Arndt and Gingrich) aloo “hiɛkpatamɔ diɛŋtsɛ, shi jeee ni kɛ shishinumɔ akɛ gbɔmɔtso lɛ ji nɔ ni bɛ.” (Theological Dictionary of the New Testament) No hewɔ lɛ Biblia shishitoo nɔ̃ ko bɛ ni aaadamɔ nɔ ana henumɔ ko ni ahe aye akɛ gbɔmɛi ni yɔɔ ŋmɛnɛ, ni “amanehulu” ni fe fɛɛ kɛjɛ be mli ni je lɛ je shishi nɛɛ ka amɛhiɛ lɛ yɛ nɔ kroko ni amɛbaahala fe “wala” aloo “hiɛkpatamɔ.”—Mateo 24:21, 22.
Yibaamɔ Loo Hiɛkpatamɔ
11. (a) Mɛni ji wiemɔ “Yehowa gbi” lɛ shishi? (b) Mɛɛ “Yehowa gbi wulu” ji nɔ ni yɔɔ wɔhiɛ lolo, ni mɛni baaba yɛ nakai be lɛ mli?
11 “Yehowa gbi wulu lɛ ebɛŋkɛ.” (Zefania 1:14) Nɛkɛ wiemɔi nɛɛ efeko nɔ ni woɔ mɔ he gbeyei babaoo fe nɛkɛ da. Lɛlɛŋ, bei krɛdɛɛi komɛi eba yɛ yinɔsane mli ni Yehowa etsu ekojomɔ he nii ni ewo egbɛi krɔŋkrɔŋ lɛ hiɛ nyam, ni enɛɛmɛi fɛɛ fee “Yehowa gbi” bibioo. Yerusalem ni yeee anɔkwale, Babilon kɛ Mizraim na ‘gbii’ ni tamɔ nɛkɛ. (Yesaia 2:1, 6-17; 13:1-6; Yeremia 46:1-10) Shi “Yehowa gbi” wulu ni fe fɛɛ lɛ ka wɔhiɛ. Eji “gbi” ni Yehowa baatsu ekojomɔ he nii eshi Kristendom, Satan jeŋ apasa jamɔ maŋtsɛyeli ni eshwɛ lɛ kɛ eyiwalɛ gbɛjianɔtoo muu lɛ fɛɛ. “Mlifu gbi ji nakai gbi lɛ, fimɔ kɛ amanehulu gbi ni, amaŋfo kɛ amaŋfɔfeemɔ gbi ni.” Gbalɛ lɛ tee nɔ akɛ: “Ni mahao gbɔmɛi lɛ, . . . ejaakɛ amɛfee esha amɛshi Yehowa. Asaŋ amɛjwiɛtɛi kɛ amɛshika fɛɛ nyɛŋ amɛ ajie yɛ Yehowa mlifu gbi lɛ nɔ, shi ewuŋayeli la lɛ aaasha shikpɔŋ muu lɛ fɛɛ; ejaakɛ ekɛ pleneemɔ ni baa trukaa aaaplenee shikpɔŋ lɛ nɔ bii lɛ fɛɛ. . . . Dani Yehowa mlifu ni naa wa lɛ aaaha nyɛnɔ, dani Yehowa mlifu gbi lɛ aaaba nyɛnɔ! Nyɛtaoa Yehowa sɛɛgbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛgbɛ, nyɛtaoa heshibaa sɛɛgbɛ: ekolɛ aaaŋɔnyɛ atee yɛ Yehowa mlifu gbi lɛ nɔ!”—Zefania 1:15–2:3.
12. Ani Zefania gbalɛ lɛ kɔɔ Yuda pɛ he, aloo eshishinumɔ lɛ kɔɔ nibii krokomɛi ahe?
12 Kristendom Biblia mlipɛilɔi lɛ ateŋ mɛi pii po eyoo akɛ nɛkɛ gbaIɛ nɛɛ kɔɔɔ Yuda pɛ he, shi moŋ egbaa “jeŋ muu fɛɛ kojomɔ ni baaba je lɛ nɔ” (Keil-Delitszch) , “eshafeemɔ yinɔ ko naagbee” (French Ecumenical Bible) , “‘gbi’ ni akɛ jeŋ muu fɛɛ kojomɔ baaba efɔŋfeemɔ fɛɛ nɔ ni abaafɔse Nyɔŋmɔ mlifu ashwie mɛi fɛɛ ni leee Nyɔŋmɔ ni amɛboɔ wɔ-Nuŋtsɔ Yesu Kristo sanekpakpa lɛ toi lɛ anɔ” lɛ he.—New Bible Commentary, Second Edition.
13. (a) Taakɛ Paulo tsɔɔ lɛ, mɛɛ be mli “Yehowa gbi” lɛ baaba? (b) Mɛni ji “mlakwamɔ gbɔmɔ” lɛ, ni mɛɛ kojomɔ mɛɔ nakai okadi “gbɔmɔ” lɛ?
13 Bɔfo Paulo kɛ “Yehowa gbi” lɛ to “wɔ Nuŋtsɔ Yesu Kristo ba ni eba” lɛ he. (2 Tesalonikabii 2:1, 2, NW) Yɛ be mli ni ewie “Nyɔŋmɔjamɔ kwamɔ” ni kɛ “mlakwamɔ gbɔmɔ,”—Kristendom sɔlemɔi lɛ amli osɔfoi akuu ni amɛkwa hemɔkɛyeli lɛ ba lɛ he lɛ sɛɛ lɛ—Paulo kɛfata he akɛ: “Ni no dani aaajie mlakwalɔ lɛ kpo, mɔ ni Nuŋtsɔ Yesu kɛ edaaŋ mumɔ lɛ aaagbe, ni ekɛ ba ni eba lɛ puemɔ lɛ aaakpata ehiɛ lɛ.” (2 Tesalonikabii 2:3, 8, NW) ‘Abaajie’ osɔfoi ni amɛkwa hemɔkɛyeli lɛ ‘kɛya’ aloo ‘abaakpata amɛhiɛ’ yɛ “amanehulu kpeteŋkpele” lɛ shishijee diɛŋtsɛ. (Kpojiemɔ 17:1-5, 16, 17) Atsɛɔ nakai kuu lɛ hu akɛ “hiɛkpatamɔ bi [apoleia],” ni ashishi ji akɛ amɛmiiya “naanɔ hiɛkpatamɔ mli” yɛ Gehena, tamɔ mɛi ni tamɔ amɛ yɛ Yesu gbii lɛ amli lɛ.—2 Tesalonikabii 2:3; Mateo 23:33.
14. Mɛni hewɔ mɛi krokomɛi babaoo “laajeɔ” Iɛ, no hewɔ Iɛ mɛni jwere adesai fɛɛ hiɛ ni esa akɛ amɛhala?
14 Shi mɛi fɛɛ ni amɛnyiɛ osɔfoi lɛ kɛ amɛ “nii ni ejaaa lɛ fɛɛ ni akɛshishiuɔ mɛi” lɛ asɛɛ lɛ hu? Bɔfo Paulo wieɔ mɛnɛɛmɛi ahe akɛ “mɛi ni laajeɔ lɛ, [ni eshishi diɛŋtsɛ ji: “mɛi ni kpataa amɛ diɛŋtsɛ amɛhiɛ”] akɛ najiaŋtoo ejaakɛ amɛmɔɔɔ anɔkwale Iɛ he suɔmɔ lɛ mli ni akɛhere amɛyiwala. Enɛ hewɔ ni Nyɔŋmɔ ŋmɛɔ gbɛ ni tɔmɔ tsuɔ nii yɛ amɛnɔ lɛ, koni amɛhe amale lɛ amɛye, koni akojo amɛ fɛɛ ejaakɛ amɛheee anɔkwale lɛ amɛyeee shi moŋ amɛnyaa nii ni ejaaa gbɛ lɛ ahe lɛ hewɔ.” (2 Tesalonikabii 2:10-12, NW) Ŋmɛnɛ, je lɛ etsɔ tamɔ bu kɛ ŋmɔtɔ ni yiwalɛ, jeŋba shara kɛ fitemɔ eyi mli bɔ. Adesai ateŋ mɛi ni fa ‘nyaa nibii ni ejaaa gbɛ lɛ ahe’ ni amɛmɔɔɔ “anɔkwale lɛ he suɔmɔ lɛ mli ni akɛhere amɛyiwala.” (Okɛto Ezekiel 9:4-7 he.) No hewɔ lɛ, “abaakojo amɛ” ni amɛbaalaaje “ãkɛ najiaŋtoo.” Nɔ ni esa akɛ ahala yɛ “amanehulu kpeteŋkpele” ni baa lɛ mli lɛ mli ka shi faŋŋ. No ji yibaamɔ loo hiɛkpatamɔ.
Foijee Kɛmiiya Maŋtsɛyeli Lɛ Mli Kɛha Yibaamɔ
15. Yɛ mɛɛ gbɛ nɔ “gwantɛŋi” lɛ kɛ “abotiai” lɛ ahe abɛbua Iɛ tsɔɔ nɔ ni ka jeŋmaji lɛ amlibii lɛ fɛɛ ahiɛ ni esa akɛ amɛhala?
15 Hɛɛ, “Yehowa gbi wulu lɛ ebɛŋkɛ. Ebɛŋkɛ, ni eeye oyai naakpa.” (Zefania 1:14) Kojomɔ be ni akɛbuaa “jeŋmaji fɛɛ” anaa yɛ Kristo Yesu hiɛ lɛ mli wɔyɔɔ nɛɛ. Aagbala jeŋmaji fɛɛ amli gbɔmɛi lɛ ateŋ aafee amɛ kui enyɔ, “gwantɛŋi” kɛ “abotiai.” Átsɔɔ nɔ ni baajɛ mli aba lɛ yɛ faŋŋ mli: “naanɔ wala” kɛha “gwantɛŋi” lɛ, kɛ “naanɔ hiɛkpatamɔ”—kɛha “abotiai” lɛ.—Mateo 25:31-33, 46.
16, 17 (a) Yɛ mɛɛ gbɛ nɔ 2 Tesalonikabii 1:6-9 tsɔɔ bɔ ni Yehowa kojomɔi ni ekɛbaa yɛ “amanehulu kpeteŋkpele” lɛ mli lɛ ji naagbee nɔ kwraa? (b) Namɛi hu abaakpata amɛhiɛ afata mɛi ni waa Nyɔŋmɔ webii ayi lɛ ahe, ni mɛni hewɔ?
16 Yɛ be mli ni etsɔɔ bɔ ni Yehowa kojomɔ ji naagbee nɔ kwraa ha ekoŋŋ lɛ, Paulo ŋma akɛ: “Eja yɛ Nyɔŋmɔ hiɛ akɛ mɛi ni haoɔnyɛ lɛ eeehao amɛ eto najiaŋ, ni nyɛ mɛi ni ahaoɔnyɛ lɛ, eeeha nyɛ kɛ wɔ fɛɛ hejɔɔmɔ beni aaajie Nuŋtsɔ Yesu kpo [apokalypsis] kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ lɛ. Mɛi ni aaana nyɔmɔwoo ni ji naanɔ hiɛkpatamɔ.”—2 Tesalonikabii 1:6-9.
17 Kadimɔ akɛ jeee ‘mɛi ni haoɔ’ Nyɔŋmɔ webii lɛ pɛ nɔ akɛ “nyɔmɔwoo ni ji naanɔ hiɛkpatamɔ” lɛ baa, shi moŋ “mɛi ni leee Nyɔŋmɔ” kɛ “mɛi ni booo sanekpakpa lɛ toi lɛ” hu. Paulo tsɔɔ nɔ hewɔ ni “mɛi ni leee Nyɔŋmɔ” lɛ “bɛ naajiemɔ ko” kɛ nɔ hewɔ ni abaakojo amɛ lɛ mli yɛ wolo ni eŋma eyaha Romabii lɛ mli. (Romabii 1:18-20; 2:5-16) “Bɔfo kroko [ni] miifiliki yɛ ŋwɛi teŋ,” ni awie ehe yɛ Kpojiemɔ yitso 14 lɛ tsɛɔ mɛi fɛɛ “ni yɔɔ shikpɔŋ lɛ nɔ” lɛ akɛ “nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmlɛtswaa lɛ eshɛ.” No hewɔ lɛ awoɔ gbɔmɛi ahewalɛ akɛ “nyɛjaa mɔ ni fee ŋwɛi kɛ shikpɔŋ kɛ ŋshɔ” lɛ. Mɛi ni efeee nakai, kɛ mɛi fɛɛ ni kɛ amɛhemɔkɛyeli aaawo Satan maŋkwramɔŋ “kooloo” lɛ mli moŋ fe Nyɔŋmɔ Mesia maŋtsɛyeli lɛ mli lɛ, abaakpata amɛ kɛ “kooloo” lɛ hiɛ yɛ “Nyɔŋmɔ mli la lɛ weinŋaa nɔ kpeteŋkpele lɛ mli.”—Kpojiemɔ 14:6, 7, 9, 10, 14-20; 19:11-21.
18. (a) Mɛni esa akɛ mɔ fɛɛ mɔ ni hiɛ ka nɔ akɛ eeeje mli lɛ afee bianɛ? (b) Namɛi Biblia lɛ tsiɔ amɛ ta akɛ amɛjeɔ “amanehulu kpeteŋkpele” lɛ mli lɛ, ni mɛɛ gbɛkpamɔ ka amɛhiɛ?
18 Esa akɛ mɔ fɛɛ mɔ ni hiɛ ka nɔ akɛ “aaaŋɔ lɛ atee yɛ Yehowa mlifu gbi lɛ nɔ!” lɛ “atao jalɛ sɛɛgbɛ, atao heshibaa sɛɛgbɛ,” ni ‘amɛtsu Yehowa diɛŋtsɛ kojomɔ yiŋtoo he nii’ moŋ fe ni amɛaawie amɛshi. (Zefania 2:2, 3) Mɛi fɛɛ ni hiɛ ka nɔ akɛ Kojolɔ ni Yehowa ehala lɛ Iɛ aaabu amɛ akɛ “gwantɛŋi” ni abaa amɛyi yɛ “amanehulu kpeteŋkpele” lɛ mli lɛ ajieɔ amɛhe kpo amɛtsɔɔ akɛ amɛji “jalɔi” ni kɛ hiɛdɔɔ miiye kɛmiibua ni amɛmiifi Kristo “nyɛmimɛi” ni afɔ amɛ mu ni feɔ “tsulɔ anɔkwafo kɛ nilelɔ” kuu lɛ asɛɛ. (Mateo 25:33, 40, 46; 24:45-47) Mɛi pɛ ni Biblia lɛ kɛ hiɛnɔkamɔ haa akɛ amɛbaaje “amanehulu kpeteŋkpele” lɛ mli ji Kristofoi babaoo” ni ji “gwaŋtɛŋi” lɛ ni kɛ “sɔɔmɔ krɔŋkrɔŋ” haa daa ni amɛkɛɔ ni mɛi fɛɛ anu akɛ: “Wɔ yiwalaheremɔ jɛ Nyɔŋmɔ ni ta maŋtsɛsɛi lɛ nɔ lɛ kɛ Toobi lɛ.” Ákɛ kaselɔi ni abaptisi amɛ ni jɛ “shikpɔŋ nɔ jeŋmaji fɛɛ mli” lɛ, Toobi, Kristo Yesu kwɛɔ nɛkɛ “asafo babaoo” nɛɛ anɔ ni etsɔɔ amɛ gbɛ kɛyaa “wala nu bui” ni amɛmli nui etaŋ gbi ko gbi ko lɛ ahe. “Ni Nyɔŋmɔ baatsumɔ amɛhiŋmɛiiaŋ yaafonui fɛɛ.”—Mateo 24:21, 22; 25:34; 28:19, 20; Kpojiemɔ 7:9-17.a
[Shishigbɛ niŋmai]
a Ajie kɛjɛ April 1, 1982 Blɔfo Buu-Mɔɔ lɛ mli
SANEBIMƆI NI AKƐTIƆ MLI
□ Mɛni Kristendom sɔlemɔi lɛ tsɔɔ kɛ “mɛi fɛɛ ashitee” ni gbohii lɛ baana lɛ, shi ani nɛkɛ tsɔɔmɔ nɛɛ ji Biblia mli tsɔɔmɔ?
□ Mɛɛ ŋmalɛi tsɔɔ akɛ jeee gbohii lɛ fɛɛ baaná shitee?
□ Mɛni ji “Gehena”?
□ Mɛni tsɔɔ akɛ Yehowa Nyɔŋmɔ kojoɔ mɛi komɛi kwraa kɛyaa naanɔ yɛ ŋmɛnɛŋmɛnɛ nibii agbɛjianɔtoo nɛɛ po mli?
□ Mɛni baaba yɛ “Yehowa gbi” lɛ nɔ, ni ani abaatee mɛi ni abaakpata amɛhiɛ lɛ ashi lo?
□ Mɛni esa akɛ afee kɛha yibaamɔ, no hewɔ wɔ lɛ mɛɛ nitsumɔ he hiaa waa agbɛnɛ fe be fɛɛ?
[Mfoniri ni yɔɔ baafa 12]
Yuda, “hiɛkpatamɔ bi” lɛ fata mɛi ni baŋ yɛ gbohiiashitee lɛ mli lɛ ahe