Ha Yehowa Tsui Anya Kɛtsɔ Emuuyeli Mli Hiɛmɔ Nɔ!
“Wɔhiɛ ka jio, wɔgboi jio, Nuŋtsɔ Yehowa nii ji wɔ.”—ROMABII 14:8.
1, 2. (a) Mɛni hewɔ Yehowa Odasefoi tswa amɛfai shi akɛ amɛaahiɛ amɛ emuuyeli mli amɛha Nyɔŋmɔ lɛ? (b) Shi mɛɛ sanebimɔi teɔ shi?
KWƐ BƆ NI nakai bɔfo Paulo wiemɔi lɛ tsɔɔ anɔkwa emuuyeli mli hiɛlɔi ni yɔɔ afii ohai 20 nɛɛ mli lɛ ahenumɔi jogbaŋŋ ha! Kɛ́ wɔna hegbɛ akɛ wɔɔya nɔ wɔhi shi ni wɔna bɔ ni ŋmɛnɛŋmɛnɛ yiwalɛ nibii agbɛjianɔtoo nɛɛ kumɔɔ shwieɔ shi yɛ wɔ diɛŋtsɛ wɔhiɛ lɛ, kwɛ miishɛɛ ni wɔbaana! Ní kɛ́ wɔkɛ gbele aaakpe yɛ Nyɔŋmɔ sɔɔmɔ mli hu lɛ, eba lɛ nakai. Shi yɛ fɛɛ mli lɛ, wɔtswa wɔfai shi akɛ wɔbaafee wɔ Nyɔŋmɔ, Yehowa lɛ, odasefoi anɔkwafo. Wɔbaahiɛ wɔ emuuyeli mli wɔha lɛ. Mɛni hewɔ? Ejaakɛ wɔyɛ wala mli jio, wɔgboi jio, Yehowa nii diɛŋtsɛ ji wɔ!
2 Belɛ, mɛni ji emuuyeli mli hiɛmɔ? Mɛni ji nɔ ni ebiɔ yɛ wɔdɛŋ? Ni ani emuuyeli mli ni wɔɔhiɛ lɛ kɔɔ Nyɔŋmɔ he?
Emuuyeli Mli Hiɛmɔ Kɛ Nɔ Ni Ebiɔ
3. Taakɛ Biblia lɛ tsɔɔ lɛ, emuuyeli ni aaahiɛ mli lɛ tsɔɔ mɛni?
3 Yɛ Nyɔŋmɔ Wiemɔ lɛ mli lɛ, emuuyeli mli hiɛmɔ tsɔɔ jeŋba kpakpa, pɛpɛɛpɛ, shwamɔ kɛ fatɔɔ ni bɛ. Etsɔɔ he ni aaatu aha jalɛnifeemɔ. Yɛ anɔkwale mli lɛ, emuuyeli mli hiɛmɔ biɔ he ni aaatu aha mɔ ko—Yehowa Nyɔŋmɔ, ni akuuu mli kwraa. Hɛɛ, emuuyeli mli hiɛmɔ tsɔɔ Yehowa ŋwɛi suɔmɔnaa nii ni aaaya nɔ afee.
4. Namɔ ji klɛŋklɛŋ emuuyeli mlikulɔ, ni elaka klɛŋklɛŋ adesai enyɔ lɛ ni amɛfee mɛni?
4 Klɛŋklɛŋ emuuyeli mlikulɔ ji mumɔŋ bɔɔ nɔ ko ni nyiɛ klɛŋklɛŋ adesai enyɔ lɛ ahiɛ kɛbote atuatsemɔ gbɛ ni amɛkɛte shi amɛwo amɛ-Bɔlɔ lɛ mli lɛ. Adam kɛ Hawa ná hegbɛ akɛ amɛaajie amɛ emuuyeli kɛha Yehowa lɛ kpo kɛtsɔ mla ni Nyɔŋmɔ ewo ni kɔɔ nilee tso lɛ yeli he lɛ nɔ. Shi akɛni Henyɛlɔ lɛ nyɛ amɛ nɔ ni egbala amɛjwɛŋmɔ kɛtee pɛsɛmkunya akɔnɔ he hewɔ lɛ, amɛkpɛlɛ toigbele nɔ. Amɛtsui bafee nɔ ni yeee emuu yɛ Yehowa mlai ahe, ni amɛhiɛɛɛ amɛ emuuyeli mli amɛhaaa lɛ.—Lala 119:1, 80.
5. Satan atuatsemɔ lɛ tee mɛɛ saji ashi, ni jalɔ Hiob niiashikpamɔ lɛ yeɔ enɛ he odase yɛ mɛɛ gbɛ nɔ?
5 Satan atuatsemɔ lɛ tee sane ni kɔɔ hegbɛ ni Nyɔŋmɔ yɔɔ akɛ ayeɔ E-bɔɔnii fɛɛ anɔ, hegbɛ ni Yehowa yɔɔ akɛ ebiɔ ni amɛfee toiboo kwraa amɛha lɛ lɛ he lɛ shi. No hewɔ lɛ, sanebimɔ ni kɔɔ emuuyeli mli ni gbɔmɔ aaahiɛ aha Nyɔŋmɔ ŋwɛi suɔmɔnaa nii he lɛ bafee jeŋ muu fɛɛ maŋtsɛyeli he sane lɛ fã ni he hiaa waa. Anaa enɛ he odaseyeli yɛ Hiob, Nyɔŋmɔ tsulɔ ni shwamɔ ko bɛ ehe, eja, ni esheɔ Nyɔŋmɔ gbeyei lɛ sane lɛ mli. (Hiob 1:1) Hiob tsiii ehe kɛjɛɛɛ Nyɔŋmɔ gbɛ ni ja lɛ he. Ebɔɔɔ ajwamaŋ. Etsɔɔɔ sane hiɛ ebuuu shi, ni ejeee mɔ ni enaaa okulafoi, awusai aloo ohiafoi amɔbɔ. Ni ekɛ ehe aaafɔ heloo gbɛfaŋ nibii anɔ moŋ lɛ, Hiob kɛ ehe fɔ Ŋwɛi Flooflonyo lɛ nɔ kwraa. (Hiob 31:7-40) Ni kɛlɛ Abonsam kɛɛ akɛ Hiob sɔmɔɔ Nyɔŋmɔ yɛ pɛsɛmkunya yiŋtoi ahewɔ. Eyɛ mli akɛ Yehowa ŋmɛ gbɛ ni Abonsam kpakpala Hiob nibii kɛ ebii po yɛ ehe moŋ, shi Henyɛlɔ Nukpa lɛ nyɛɛɛ akumɔ emuuyeli mli ni nuu ni ja nɛɛ hiɛ lɛ. Hela ni waa mɔ he kɛ ahorabɔɔ ni jɛ epasa miishɛjelɔi lɛ aŋɔɔ lɛ po nyɛɛɛ afite Hiob, ejaakɛ Hiob jie ehe kpo akɛ emuuyeli mli hiɛlɔ.—Hiob 1:6–2:13; 27:5, 6; 31:6; 42:8, 9.
6. Mɛni ataoɔ yɛ mɛi ni ji ‘Yehowa nii’ lɛ adɛŋ?
6 Adesai yɛ hegbɛ kpeteŋkpele ko ni da waa yɛ yelikɛbuamɔ ni amɛkɛ aaaha yɛ Nyɔŋmɔ gbɛi krɔŋkrɔŋ lɛ ni aaatse he lɛ mli. Shi yɛ mɛɛ gbɛ nɔ? Kɛtsɔ emuuyeli mli ni amɛaahiɛ, amɛtsɔɔ akɛ amɛkɛ anɔkwayeli fiɔ Yehowa je muu fɛɛ maŋtsɛyeli lɛ sɛɛ lɛ nɔ. Belɛ, mɛni ji nɔ ni abiɔ yɛ mɛi ni ji “Yehowa nii” lɛ adɛ? Esa akɛ wɔsɔmɔ Nyɔŋmɔ yɛ hetuu kɛhamɔ kwraa mli, ni wɔhiɛ akakpa nɔ akɛ Yehowa ji “Nyɔŋmɔ ni biɔ he ni atuɔ ahaa ekome too.”—2 Mose 20:5.
Wɔbaanyɛ Wɔha Yehowa Tsui Anya
7, 8. (a) Akɛni wɔtɔɔ hewɔ lɛ, te wɔɔfee tɛŋŋ wɔhiɛ wɔ emuuyeli mli wɔha Nyɔŋmɔ lɛ? (b) Kɛ wɔji emuuyeli mli hiɛlɔi lɛ, belɛ Abɛi 27:11 baakɔ wɔhe yɛ mɛɛ gbɛ nɔ?
7 Akɛni wɔ fɛɛ wɔyeee emuu hewɔ lɛ, wɔnyɛɛɛ wɔhi shi yɛ Nyɔŋmɔ jalɛ tɛi ni efolɔ eshwie shi lɛ naa yɛ emuuyeli mli. No hewɔ lɛ, emuuyeli mli ni wɔɔhiɛ lɛ etsɔɔɔ akɛ tɔmɔ bɛ wɔnifeemɔ aloo wɔ wiemɔ he. Nɔ ni etsɔɔ moŋ ji tsui muu fɛɛ nifeemɔ, aloo tsui ni atu fɛɛ aha nifeemɔ kwraa. No hewɔ lɛ, eyɛ mli akɛ David fee esha ni hiɛdɔɔ yɔɔ mli moŋ, shi ‘enyiɛ yɛ tsui ni eye emuu mli.’ (1 Maŋtsɛmɛi 9:4) Akɛni ekpɛlɛ kamɔ nɔ hewɔ lɛ, ejaje egbɛ ni ekɛye odase akɛ nɔ ni eyi etsui mli obɔ ji suɔmɔ kɛha Yehowa. (Lala 26:1-12) Wɔ hu wɔbaanyɛ wɔjie suɔmɔ ni tamɔ nɛkɛ kpo ni wɔfee nii ‘yɛ tsuiŋ emuuyeli mli.’—Lala 78:72.
8 Wɔbaanyɛ wɔnyiɛ yɛ emuuyeli gbɛ nɔ ejaakɛ wɔyɛ hemɔkɛyeli babaoo yɛ Yehowa Nyɔŋmɔ mli ni wɔkɛ wɔhe fɔɔ lɛ kɛ ehewalɛ ni ekɛaahere wɔ lɛ nɔ kwraa. (Lala 25:21; 41:13) Emuuyeli mli ni wɔhiɛ lɛ bɛ mlɛo, ejaakɛ Satan Abonsam—Yehowa kɛ wɔ hu wɔhenyɛlɔ ni fe fɛɛ lɛ—miishwila mɛi ni heee yeee lɛ ajwɛŋmɔi ahiŋmɛi ni “eshishiuɔ jeŋ muu lɛ fɛɛ.” (Kpojiemɔ 12:9, 2 Korintobii 4:4) Shi wɔbaanyɛ wɔtsɔmɔ emuuyeli mli hiɛlɔi tamɔ Hiob. Wɔnyɛɔ wɔtɔɔ moŋ, shi wɔbaanyɛ wɔha wɔ suɔmɔ Nyɔŋmɔ lɛ tsui anya. Taakɛ Abɛi 27:11 kɛɔ lɛ: “Mi bi, feemɔ ohe nilelɔ, ni oha mitsui anyɔ mimli, ni mana hetoo maha mɔ ni bɔɔ mi ahora lɛ.” Yɛ miishɛɛ mli lɛ, ákɛ Yehowa tsuji anɔkwafoi lɛ, wɔbaanyɛ wɔkɛ hetoo ni sa aha lɛ ni ekɛha e-Henyɛlɔ ahorabɔlɔ lɛ. No hewɔ lɛ, wɔ emuuyeli mli hiɛmɔ lɛ kɛ sɔrɔtofeemɔ baa diɛŋtsɛ. Akɛ mɛi ni hiɛɔ amɛ emuuyeli mli lɛ, wɔbaanyɛ wɔha Yehowa tsui anya. Ni kwɛ miishɛɛ ni enɛ kɛbahaa wɔ!
Emuuyeli Mli Hiɛlɔi Ni Ato Amɛ Kakadaŋŋ
9. Namɛi ji Yehowa Odasefoi emuuyeli mli hiɛlɔi babaoo ni tamɔ “atatu” lɛ ateŋ mɛi komɛi, ni mɛɛ emuuyeli he kaa amɛŋmɛ amɛtsui shi yɛ mli?
9 Yɛ anɔkwale mli lɛ, Yehowa Odasefoi ni yɔɔ ŋmɛnɛ lɛ fata emuuyeli mli hiɛlɔi ni ato amɛ kakadaŋŋ lɛ ahe. Eyaa sɛɛ aahu kɛyashiɔ anɔkwafo Habel nɔ, ni gbɔmɛi ni fata amɛhe ji hii kɛ yei tamɔ Habel, Henok, Noa, Abraham, Sara, Isak, Yakob, Yosef, Mose, Rahab, Gideon, Barak, Samson, Yosef, David, kɛ Samuel Emuuyeli mli hiɛlɔi ni ji Shadrak, Meshak kɛ Abednego ni kpoo akɛ amɛaaja amaga ni Babilon maŋtsɛ Nebukadnezar kɛma shi lɛ ni ashɛrɛ amɛ awo la flɔnɔɔ ni aha edɔ fe nine lɛ mli lɛ ji mɛi ni awieɔ amɛhe akɛ mɛi ni “amɛgbe la hewalɛ” lɛ. Yehowa Odasefoi krokomɛi hu hi shi dani Kristofoi abe lɛ shɛ ni ‘aye amɛhe fɛo, ayi amɛ kpelebii, awo amɛ gboklɛi, awo amɛ tsuŋ, atswia amɛ tɛi, akɛ akpala gbala amɛmli, aka amɛ, akɛ klante gbe amɛ, amɛwo too gwantɛŋi kɛ too abotiai awoji kɛnyiɛ, awa amɛyi, afea amɛ niseniianii.’ Yɛ anɔkwale mli lɛ wɔkɛ nɔ ni Paulo ejaje nɛkɛ lɛ kpaa gbee: “Mɛi ni je nɛŋ esaaa amɛ lɛ.” Kwɛ miishɛɛ ni eji akɛ wɔyɛ odasefoi babaoo ni ji emuuyeli mli hiɛlɔi ni amɛbɔle wɔ tamɔ “atatu”!—Hebribii 11:1–12:1; kwɛmɔ Daniel, yitso 3.
10. Bɔfo Paulo ha Yehowa tsui nya yɛ mɛɛ gbɛ nɔ?
10 Yɛ ekãa kɛ hewalɛ ni Nyɔŋmɔ kɛha bɔfo Paulo hewɔ lɛ, enyɛ eŋmɛ etsui shi yɛ tsuŋwoi, yii, lɛlɛ kɛ shishamɔ, osharai pii, kpeshii, hɔmɔ, kumai, fɛi, yayainyiɛmɔ kɛ “gbelei amli kpitio kpitio” lɛ mli. (2 Korintobii 11:23-27) Etsɔ nɛkɛ naagbai nɛɛ amli yɛ sɔɔmɔ nitsumɔ lɛ hewɔ, ni eha Yehowa tsui nya yɛ enɛɛmɛi fɛɛ mli akɛ emuuyeli mli hiɛlɔ ni sheee gbeyei. Wɔ hu wɔbaanyɛ wɔfee nakai nɔŋŋ.
11. Yesu Kristo to okadi yɛ emuuyeli he yɛ mɛɛ gbɛ nɔ?
11 Mɔ ni ekaaa yɛ emuuyeli mli hiɛlɔi nɛɛ ateŋ ji “hemɔkɛyelii shishijelɔ kɛ naagbelɔ” Yesu Kristo. Beni Abonsam ka lɛ yɛ ŋa lɛ nɔ lɛ, Yesu kɛ ehe kpɛtɛ emuuyeli mli ni ehiɛ lɛ he, naagbee lɛ, ejaje akɛ: “Ho misɛɛ, Satan! Ejaakɛ aŋma akɛ: ‘Nuŋtsɔ, Yehowa o-Nyɔŋmɔ lɛ oja, ni lɛ kɛkɛ osɔmɔ!’” Eka shi faŋŋ akɛ akɛni ebɛ hewalɛ ko kwraa yɛ efaishitswaa ni Nyɔŋmɔ kɛha nɛɛ hiɛ hewɔ lɛ, Abonsam shi Yesu. Jeee enɛ ji nɔ ni feɔ Satan naagbee tutuamɔ ni ekɛba Yesu nɔ, shi Abonsam bɛ hewalɛ ko kwraa akɛ ekɛaafite emuuyeli mli ni Nyɔŋmɔ Bi lɛ hiɛ lɛ. ‘Yɛ nyamɔ ni ka Yesu hiɛ hewɔ lɛ, ena amanehulu yɛ sɛŋmɔtso lɛ nɔ,’ etsɔɔɔ mɔ ni kuɔ emuuyeli mli gbi ko gbi ko. Eba akɛ wɔɔnyiɛ enɔkwɛmɔ nɔ ni yɔɔ krɔŋŋ lɛ sɛɛ ni wɔha Yehowa tsui anya akɛ emuuyeli mli hiɛlɔi.—Hebribii 12:2, 3; Mateo 4:1-11.
12, 13. Mɛɛ emuuyeli he kaai klɛŋklɛŋ Kristofoi lɛ nyɛ amɛdamɔ naa yɛ omanyeyeli mli?
12 Yesu kɛɛ ekaselɔi akɛ: “Mɛi fɛɛ aaanyɛ nyɛ yɛ migbɛi lɛ hewɔ.” (Mateo 10:22) Kwɛ bɔ ni enɛ efee anɔkwale yɛ mɛi ni ji Kristofoi diɛŋtsɛ lɛ agbɛfaŋ! Yɛ ewolo, Christianity and the Roman Government lɛ mli lɛ, E. G. Hardy ŋma akɛ: “Ejeɔ kpo yɛ faŋŋ mIi, kɛjɛɔ wolo ni Pliny ŋma lɛ kɛ sane ni Trajan jaje lɛ mli akɛ abaanyɛ agbala Kristofoi toi yɛ nonem [gbɛi] lɛ pɛ hewɔ, aloo yɛ Kristo jamɔ ni mɔ ko kɛ ehe ewo mli lɛ pɛ kɛkɛ hewɔ, ni efɔŋ pɔtɛɛ ni mɔ lɛ efee kɔɔɔ he eko.”
13 Mɛɛ emuuyeli mli hiɛmɔ he kaa po nakai klɛŋklɛŋ Kristofoi lɛ nyɛ amɛdamɔ naa yɛ omanyeli mli yɛ hewalɛ ni no kɛha amɛ lɛ hewɔ lɛ nɛkɛ! Akɛ nɔkwɛmɔ nɔ lɛ, awie yɛ amɛteŋ mɛi komɛi ahe akɛ: “Bei komɛi lɛ afeɔ amɛ niseniianii ni akɛ amɛ haa kooloi awuyelɔi ni hɔmɔ miiye amɛ yɛ nikwɛmɔ he koni nikwɛlɔi akwɛ ni amɛkɛjie amɛhiɛtserɛ.” Yɛ nɛkɛ piŋmɔi nɛɛ fɛɛ sɛɛ lɛ, ayoo akɛ “nɔ ni yiwaa nɛɛ fee amɛ pɛ ji ni ewaje amɛhemɔkɛyeli ni eha mɛi pii bafata amɛgbɛ lɛ he moŋ.” (From the Old World to the New, ni Eugene A. Collingan kɛ Mazwell F. Littwin, ŋma 1932 baafai 90-1.) Nakai pɛ eji kɛha Yehowa Odasefoi emuuyeli mli hiɛlɔi ni yɔɔ afii ohai 20 nɛɛ mli lɛ. Abonsam najiaŋdamɔlɔi lɛ nyɛɛɛ adamɔ amɛhiɛ.
14, 15. Namɛi ji “odasefoi enyɔ” lɛ, ni mɛni ba amɛnɔ yɛ 1918 kɛ 1919?
14 Susumɔ nɔ ni Yehowa tsuji ni afɔ amɛ mu lɛ, mfonirifeemɔ mli “odasefoi enyɔ” lɛ na yɛ 1918 kɛ 1919, yɛ be mli ni amɛhenyɛlɔi tsɔ ‘mla nɔ amɛye sane fɔŋ’ lɛ he. (Kpojiemɔ 11:3, 7-10; Lala 94:20) Awo J. F. Rutherford (ni no mli lɛ eji Buu Mɔɔ Asafo lɛ sɛinɔtalɔ lɛ) kɛ enanemɛi kpawo tsuŋ yɛ gbɛ ni ejaaa nɔ. Yɛ nakai be lɛ mli lɛ, “odasefoi enyɔ” lɛ bafee mɛi ni agbe amɛ yɛ amɛgbalɛ nitsumɔ lɛ he, ni amɛhenyɛlɔi lɛ nya babaoo. Ray H. Abrams wie yɛ ewolo Preachers Present Arms lɛ mli akɛ: “Sane muu lɛ [ni kɔɔ Rutherford kɛ enanemɛi lɛ ahe lɛ] fɛɛ mli taomɔ haa amuɔ sane naa akɛ sɔlemɔi lɛ kɛ osɔfoi lɛ ji mɛi ni hɔ nifeemɔ akɛ agu [Biblia Kaselɔi] lɛ sɛɛ. . . . Beni jamɔŋ adafitswaa woji aŋmalalɔi lɛ nu akɛ awo amɛ tsuŋ afii nyɔŋmai enyɔ lɛ, amɛ adafitswaa woji wuji kɛ bibii lɛ fɛɛ nya babaoo yɛ nifeemɔ nɛɛ hewɔ. Minyɛɛɛ mana miishɛjemɔ wiemɔ ko kwraa yɛ nakai shishijee Nyɔŋmɔ jamɔi amli lɛ niŋmai lɛ amli.”
15 Yɛ be ni sa mli lɛ, ajie nakai Biblia Kaselɔi kpaanyɔ lɛ kɛjɛ tsuŋ ni ababu amɛ akɛ amɛye amɛhe kwraa, ni enɛ wo Satan kɛ mɛi ni eshishiu amɛ lɛ amlila waa. Akɛni Nyɔŋmɔ kɛ emumɔ lɛ ewo amɛmli ni amɛba wala mli hewɔ lɛ, “odasefoi enyɔ lɛ,” ni afɔ amɛ mu lɛ ata bibioo lɛ damɔ amɛnaji anɔ ekoŋŋ akɛ Maŋtsɛyeli jajelɔi. (Kpojiemɔ 11:11) Ni kɛjɛ nakai be lɛ nɔ kɛbaa nɛɛ Yehowa henyɛlɔi lɛ miiwu ta ko ni tsɔɔ akɛ amɛmiigbeegbee shi kwraa yɛ be fɛɛ mli yɛ emuuyeli mli hiɛlɔi nɛɛ ahiɛ.
16. Obalanyo emuuyeli mli hiɛlɔ ko tsɔɔ bɔ ni eji yɛ mɛɛ gbɛ nɔ?
16 Akɛ nɔkwɛmɔ nɔ lɛ: Susumɔ ekaaawoo wiemɔi ni obalanyo ko ŋma eweku lɛ yɛ be mli ni emɛɔ gbele yɛ Nazi yiwalɔi lɛ adɛŋ lɛ he okwɛ. Eŋma akɛ: “Nyɔɔŋ teŋ eho momo. Miyɛ be lolo ni manyɛ mikɛ tsake mijwɛŋmɔ. Ah! ani maná miishɛɛ ekoŋŋ yɛ nɛkɛ je nɛɛ mli yɛ he mli ni mikwa wɔ-Nuŋtsɔ lɛ? Dabida! Shi amrɔ nɛɛ lɛ oyɛ nɔmimaa akɛ miishi nɛkɛ je nɛɛ yɛ miishɛɛ kɛ toiŋjɔlɛ mli.” Ani enɛ jijeɔ tamɔ emuuyeli mlikulɔ ko ni ayi lɛ ni egbɔjɔ ni miishe gbeyei? Oh, dabida!
17. Yehowa Odasefoi ni amɔmɔ amɛ yɛ Soviet Union, Russia lɛ na mɛɛ hewalɛ yɛ amɛ Maŋtsɛyeli shiɛmɔ nitsumɔi anɔ?
17 Mɔdɛŋ ni abɔɔ akɛ aaafite emuuyeli mli ni Yehowa tsuji hiɛ lɛ etee nɔ. Akɛ nɔkwɛmɔ nɔ lɛ, yɛ ewolo, Religion in the Soviet Union lɛ mli lɛ, saneŋmalɔ Walter Kolarz gba bɔ ni amɔmɔ Yehowa Odasefoi babaoo diɛŋtsɛ yɛ 1951 shishijee mli ni ekɛɛ akɛ: “Odasefoi lɛ diɛŋtsɛ bɔ amaniɛ akɛ atwa gbɔmɛi aaafee 7,000 anane shi tu kɛtee Urals, Siberia, Vorkuta kɛ Kazhstan.” Ni ekɛfata he akɛ: “Enɛ jeee ‘Odasefoi’ ni yɔɔ Russia lɛ anaagbee, shi eji amɛ odaseyeli nitsumɔ lɛ moŋ shishijee hee yɛ maji krokomɛi anɔ. Amɛbɔɔ mɔdɛŋ po ni amɛgbɛ amɛhemɔkɛyeli lɛ amɛshwa kɛ amɛwa amɛdamɔ maji anɔ yɛ be mli ni akɛ amɛ yaa he ni ashwie amɛ akɛ amɛya lɛ. Soviet Nɔyeli lɛ nyɛŋ afee nɔ ko ni hi waa kɛha amɛhemɔkɛyeli lɛ gbɛɛ kɛ shwamɔ tamɔ amɛnaneshi tu lɛ ni atswa nɛɛ. Ajie ‘Odasefoi’ lɛ kɛjɛ amɛ akrowai ni yɔɔ hei banee lɛ ni akɛ amɛ tee je ko ni da ni lɛɛ mli, kɛji akɛ enɛ po ji je ni ji gboklɛfoi atsuŋ kɛ nyɔji asaraŋ ni jɛmɛ yɔɔ gbeyei lɛ.” Ni Yehowa tsuji na mɛi pii ni kɛ miishɛɛ kpɛlɛ Maŋtsɛyeli lɛ he sane lɛ nɔ yɛ jɛmɛ.—Okɛto Bɔfoi lɛ Asaji 11:19-21 he.
Tamɔ Asraafoi Ni Eye Kunim
18, 19. Te aaafee tɛŋŋ aye kunim akɛ emuuyeli mli hiɛlɔi lɛ?
18 Nyɔŋmɔ webii ayiwaa etee nɔ kɛbashi ŋmɛnɛ gbi nɛɛ. No hewɔ lɛ, te feɔ tɛŋŋ ni Yehowa Odasefoi yeɔ kunim akɛ emuuyeli mli hiɛlɔi lɛ? Wɔbaanyɛ wɔfee nakai, ejaakɛ wɔboɔ Nyɔŋmɔ Wiemɔ lɛ toi, ni ‘wɔtsɔse wɔ henumɔ nii koni wɔle ekpakpa kɛ efɔŋ mli kpamɔ.’ Ákɛ odasefoi ni yeɔ Yehowa anɔkwale lɛ, ‘wɔjeŋba tamɔɔɔ nibii agbɛjianɔtoo nɛɛ jeŋba, shi moŋ wɔkɛ jwɛŋmɔ ni etsɔ ehee etsake wɔhe.’ Wɔkɛ miishɛɛ teɔ nɔ ni sa Yehowa hiɛ, ni ehaa wɔyeɔ wɔhenyɛlɔi anɔ kunim, daimonioi kɛ adesai fɛɛ.—Hebribii 5:12-14; Romabii 12:1, 2.
19 Abaanyɛ akɛ wɔ mɛi ni “Nuŋtsɔ Yehowa nii ji wɔ” lɛ ato asraafoi ni eye kunim he. Shi wɔ nɔ lɛ ji mumɔŋ tawuu, ni wɔhe “waa yɛ Nuŋtsɔ lɛ kɛ ehewalɛ nyɛmɔ lɛ mli.” Wɔwo mumɔŋ tawuu nii lɛ fɛɛ ni jɛ Nyɔŋmɔ ŋɔɔ lɛ, ni ekɛ emumɔ krɔŋkrɔŋ lɛ fiɔ wɔsɛɛ. Ní no hewɔ ni wɔnyɛɔ “wɔdamɔɔ Abonsam ŋaatsɔɔi lɛ anaa” lɛ. (Efesobii 6:10-20; 2 Korintobii 10:3, 4) Hɛɛ, ni no hewɔ wɔbaaya nɔ wɔye kunim akɛ emuuyeli mli hiɛlɔi lɛ.
20. Mɛɛ yelikɛbuamɔ kɛ nɔmimaa wɔnaa yɛ be mli ni wɔtsuɔ nii koni wɔhiɛ wɔ emuuyeli mli lɛ?
20 Wɔji asraafoi ata ni ekaaa. Ejaakɛ “yei ni shiɛɔ kunimyeli lɛ fa babaoo” yɛ wɔteŋ. (Lala 68:12) Eyɛ mli akɛ wɔkɛ henyɛlɔi ni dara miikpe moŋ, shi ‘mɛi ni kɛ wɔ yɔɔ lɛ fa fe mɛi ni kɛ amɛ yɔɔ lɛ.’ (2 Maŋtsɛmɛi 6:16) Ŋwɛi bɔfoi lɛ kɛwɔ yɛ yɛ be mli ni wɔjajeɔ sanekpakpa lɛ wɔtsɔɔ shikpɔŋ lɛ nɔ bii lɛ. (Kpojiemɔ 14:6) Ní akɛ emuuyeli mli hiɛlɔi lɛ, wɔyɛ hekɛnɔfɔɔ akɛ ‘taawuu nii ni ashɔ ashi wɔ lɛ eko yeŋ omanye.’—Yesaia 54:17.
21. Yɛ yiwaa ni baa wɔnɔ lɛ fɛɛ sɛɛ lɛ, mɛni yaa nɔ?
21 Sanebimɔ ko bɛ he akɛ, asraafoi lɛ eto yɛ tawuu he lɛ. Satan tabilɔi lɛ etswa amɛfai shi akɛ amɛbaaha odaseyeli nitsumɔ lɛ aba naagbee. No hewɔ lɛ, nɔ ni eshwɛ kɛha wɔ ji ni “wɔya nɔ wɔwuu ta kpakpa lɛ.” (1 Timoteo 1:18, NW) Akɛni Yesu Kristo ni awo ehiɛ nyam lɛ ji wɔ Tatsɛnukpa kɛ Hiɛnyiɛlɔ hewɔ lɛ, nyɛhaa wɔteŋ mɔ fɛɛ mɔ asɔmɔa akɛ “Yesu Kristo tabilɔ kpakpa.” (2 Timoteo 2:3, 4) Eyɛ mli akɛ ayiɔ wɔ mai kɛjɛɔ he fɛɛ he moŋ, shi esa akɛ—ni yɛ Nyɔŋmɔ duromɔ naa lɛ—wɔdamɔ shi shiŋŋ akɛ emuuyeli mli hiɛlɔi. Wɔhiɛ miikpɛ kɛ miishɛɛ yɛ be mli ni wɔnaa shweremɔ loo yifalɛ ni yaa nɔ lɛ. “Jeŋmaji lɛ fɛɛ amli nii ni jara wa” lɛ babaoo diɛŋtsɛ miiba ni amɛkɛ anunyam miiwo Yehowa we lɛ obɔ. (Hagai 2:7) Yɛ yiwaa, tsuŋwoi, yii, nitsumɔ lɛ ni aguɔ yɛ shikpɔji babaoo nɔ, kɛ mɔdɛŋ ni abɔɔ babaoo koni amua wɔnaa lɛ fɛɛ sɛɛ lɛ, kaselɔ feemɔ nitsumɔ kpeteŋkpele lɛ miiya nɔ ni eeya nɔ kɛ foi.—Mateo 24:14; 28:19, 20.
22. Akɛ mɛi ni ji Yehowa nii lɛ, mɛni esa akɛ wɔfee?
22 Yɛ be mli ni yijiemɔ ni akɛhaa Yehowa lɛ jijeɔ waa yɛ yifalɛ hewɔ lɛ, enɛ bafeɔ yiŋkpɛɛ gbi kɛhaa mɔ fɛɛ mɔ yɛ shikpɔŋ lɛ nɔ. Kwɛ hegbɛ ni wɔna akɛ wɔɔgbɛ sanekpakpa lɛ wɔshwa ni wɔtsɔɔ mɛi ni mɔɔ anɔkwale jamɔ mli lɛ anii! No hewɔ lɛ, yɛ be mli ni “asafo babaoo” lɛ ayi faa babaoo lɛ, eba akɛ wɔɔya nɔ akɛ Ŋwɛi Flooflo Nyɔŋmɔ lɛ tsuji ni yɔɔ ekãa. (Kpojiemɔ 7:9) ‘Wɔyɛ wala mli jio, wɔgboi jio, Yehowa nii ji wɔ.’ No hewɔ lɛ, nyɛhaa wɔyaa wɔhiɛ kɛyashɛa wala oti lɛ he, ni wɔda shi daa yɛ hegbɛ kpeteŋkpele ni yɔɔ nyam ni ji Yehowa tsui ni wɔɔha aya nɔ anya kɛtsɔ emuuyeli mli hiɛmɔ ni wɔná lɛ nɔ lɛ hewɔ!a
[Shishigbɛ niŋmai]
a Ajie kɛjɛ February 1, 1986 Watchtower lɛ mli.
Ani Obaanyɛ Oha Hetoo?
◻ Mɛni ji emuuyeli?
◻ Emuuyeli mli hiɛmɔ kɛ mɛni fɔɔ Yehowa webii anɔ?
◻ Te aaafee tɛŋŋ atsɔɔ akɛ emuuyeli mli ni ooohiɛ lɛ kɔɔ Nyɔŋmɔ he?
◻ Mɛɛ gbɛi anɔ nɛkɛ mɛi komɛi ni hi shi yɛ blema lɛ jie amɛhe kpo akɛ emuuyeli mli hiɛlɔi yɛ?
◻ Te feɔ tɛŋŋ ni Yehowa Odasefoi nyɛɔ amɛhiɛɔ amɛ emuuyeli mli ŋmɛnɛ lɛ?
[Mfoniri ni yɔɔ baafa 23]
Yehowa tsuji ni yɔɔ ŋmɛnɛ lɛ fata odasefoi ni hiɛɔ amɛ emuuyeli mli ni ato amɛ kakadaŋŋ lɛ ahe. Ani ofata amɛhe?
Henok
Sara
Yefta
Paulo