Yitso 26

Nyɔŋmɔ Teemɔŋ Sane Krɔŋkrɔŋ Lɛ​—Enaagbee ni Yɔɔ Nyam!

 1. (a) Mɛɛ gbɛ nɔ Yohane tsɔ ni ekɛɛ wɔ akɛ akɛ teemɔŋ sane krɔŋkrɔŋ lɛ eba enaagbee? (b) Mɛni hewɔ ŋwɛibɔfoi asafo lɛ kɛ gbee ni naa wa wieɔ lɛ?

ANI okaiɔ kita ni bɔfo ni he wa lɛ jaje taakɛ aŋma afɔ shi yɛ Kpojiemɔ 10:1, 6, 7 lɛ? Ejaje akɛ: “Be ko be ko bɛ dɔŋŋ, shi moŋ bɔfo ni ji kpawo lɛ gbee lɛ gbii lɛ amli, beni eheɔ ekpa lɛ, no lɛ agbe Nyɔŋmɔ teemɔŋ sane lɛ hu naa, bɔ ni ejaje sanekpakpa lɛ etsɔɔ lɛ diɛŋtsɛ etsuji ni ji gbalɔi lɛ.” Yehowa diɛŋtsɛ be eshɛ ni ebaaha akpa nakai naagbee tɛtrɛmaŋtɛrɛ lɛ! Belɛ mɛɛ gbɛ nɔ atsɔɔ akɛ teemɔŋ sane krɔŋkrɔŋ lɛ baa naagbee yɛ? Yohane yɛ miishɛɛ diɛŋtsɛ akɛ eeegba wɔ! Eŋma akɛ: “Ni bɔfo ni ji kpawo lɛ kpa, ni anu gbee wuji yɛ ŋwɛi miikɛɛ akɛ: Je nɛŋ maŋtsɛyeli lɛ etsɔ wɔ Nuŋtsɔ lɛ kɛ e-Kristo (Mɔ ni efɔ lɛ mu) lɛ nɔ, ni eeeye maŋtsɛ kɛaatee naanɔi anaanɔ.” (Kpojiemɔ 11:15) Nakai ŋwɛibɔfoi asafoi lɛ yɛ nɔ ni amɛaadamɔ nɔ amɛwo amɛgbeei anɔ, tamɔ nugbɔshiimɔi agbee! Ejaakɛ nɛkɛ yinɔsane mli adafitswaa nɛɛ ji nɔ ko ni he hiaa yɛ jeŋ muu fɛɛ. Ehe hiaa waa kɛhaa bɔɔ nii ni yɔɔ wala mli lɛ fɛɛ.

 2. Mɛɛ be ni mɛni kɛ teemɔŋ sane krɔŋkrɔŋ lɛ ba enaagbee yɛ kunimyeli mli lɛ?

² Teemɔŋ sane krɔŋkrɔŋ lɛ baa enaagbee kɛ miishɛɛ! Akɛbaa naagbee yɛ kunimyeli mli yɛ 1914, yɛ anunyam mli, yɛ agbojee mli, beni Nuŋtsɔ Yehowa kɛ e-Kristo lɛ ta maŋtsɛsɛi nɔ akɛ Maŋtsɛ hefatalɔ lɛ. Akɛni eedamɔ e-Tsɛ lɛ najiaŋ hewɔ lɛ, Yesu Kristo ŋɔɔ nɔyeli lɛ he nitsumɔ lɛ yɛ adesai ajeŋ ni nyɛɔ lɛ lɛ teŋ. Akɛ shiwoo Seshi lɛ, enine shɛɔ Maŋtsɛyeli hewalɛ nɔ bɔni afee ni ekpata Onufu lɛ kɛ eshwiei lɛ ahiɛ ni eku sɛɛ ekɛ paradeiso toiŋjɔlɛ aba shikpɔŋ nɛɛ nɔ ekoŋŋ. (1 Mose 3:15; Lala 72:1, 7) Akɛ Mesia Maŋtsɛ lɛ, Yesu baaha Yehowa Wiemɔ lɛ aba mli ni ebu e-Tsɛ lɛ, “naanɔi a-Maŋtsɛ,” ni sa akɛ eye nɔ akɛ Jeŋ Muu Fɛɛ Nuŋtsɔ lɛ bem kɛya “naanɔi anaanɔ.”—1 Timoteo 1:17.

 3. Eyɛ mli akɛ Yehowa Nyɔŋmɔ ji Maŋtsɛ yɛ be fɛɛ mli moŋ, shi mɛni hewɔ eŋmɛ maŋtsɛmɛi krokomɛi agbɛ ni amɛhi shi lɛ?

³ Shi te fee tɛŋŋ ni “jeŋ nɛŋ maŋtsɛyeli lɛ . . . tsɔ wɔ Nuŋtsɔ lɛ [Yehowa] nɔ” hu? Ani Yehowa Nyɔŋmɔ jeee Maŋtsɛ yɛ be fɛɛ mli? Nakai eji, ejaakɛ Levinyo Asaf la lala nɛɛ akɛ: “Shi Nyɔŋmɔ ji mimaŋtsɛ kɛjɛ blema beebe.” Ni lalatsɛ kroko jaje akɛ: “Yehowa miiye maŋtsɛ! . . . Omaŋtsɛsɛi lɛ ma shi shiŋŋ kɛjɛ teteete; bo oyɔɔ kɛjɛ naanɔ beebe.” (Lala 74:12; 93:1, 2) Shi Yehowa etsɔ enilee nɔ eŋmɛ maŋtsɛyelii komɛi agbɛ ni amɛhi shi yɛ shikpɔŋ nɔ. No hewɔ lɛ aka sane ni atee lɛ shi yɛ Eden yɛ gbɔmɔ ni aaanyɛ aye lɛ diɛŋtsɛ ehe nɔ ni Nyɔŋmɔ bɛ mli lɛ akwɛ kɛmɔ shi. Gbɔmɔ nɔyeli efee yaka kɛ awerɛho. Nyɔŋmɔ gbalɔ lɛ wiemɔi lɛ ji anɔkwale diɛŋtsɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Kɛjɛ be mli ni wɔ klɛŋklɛŋ fɔlɔi lɛ gba afa nɛɛ, jeŋ muu lɛ fɛɛ ebaje Satan, “shishijee onufu lɛ” nɔyeli shishi. (Kpojiemɔ 12:9; Luka 4:6) No hewɔ lɛ be eshɛ agbɛnɛ, kɛha tsakemɔ kpele! Bɔni afee ni ebu egbɛhe ni ja lɛ bem lɛ, Yehowa je shishi akɛ ekɛ enɔyeli lɛ aaatsu nii yɛ shikpɔŋ lɛ nɔ yɛ gbɛ hee ko nɔ kɛtsɔ e-Mesia Maŋtsɛyeli ni ehala lɛ nɔ.

 4. Beni tɛtrɛmaŋtɛrɛi lɛ akpamɔ je shishi yɛ 1922 lɛ, mɛni aha eje kpo waa? Tsɔɔmɔ mli.

⁴ Beni tɛtrɛmaŋtɛrɛi kpawo lɛ kpamɔ je shishi yɛ 1922 lɛ, Biblia Kaselɔi lɛ akpee ni amɛfee yɛ Cedar Point, Ohio, lɛ to wiemɔ ni J. F. Rutherford ha ni damɔ ŋmalɛ ni ji “Ŋwɛi maŋtsɛyeli lɛ ebɛŋkɛ” lɛ nɔ lɛ he gbɛjianɔ. (Mateo 4:17) Ni ekɛba naagbee kɛ nɛkɛ wiemɔi nɛɛ: “Belɛ nyɛkua nyɛsɛɛ nyɛyaa ŋmɔ lɛ mli, Oh ŋwɛi flooflo Nyɔŋmɔ lɛ bii! Nyɛkɛ nyɛtawuu nii lɛ awulaa! Nyɛjwɛŋmɔŋ akaa shi, nyɛfea ekaa, nyɛtsua nii, nyɛtsui asaa. Nyɛfea Nuŋtsɔ lɛ anɔkwa odasefoi kɛ anɔkwayelɔi. Nyɛyaa nyɛhiɛ yɛ ta lɛ mli aahu kɛyashia be mli ni Babilon he nibii fɛɛ aaatsɔ amaŋfɔ. Nyɛtswaa sane lɛ he adafi kɛyaa shɔŋŋ kɛ he fɛɛ he. Esa akɛ je lɛ ale akɛ Yehowa ji Nyɔŋmɔ, ni akɛ Yesu Kristo ji maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ. Gbii fɛɛ amli gbi lɛ nɛ. Naa, Maŋtsɛ lɛ miiye nɔ! Nyɛji enajiaŋdamɔlɔi ni tswaa ehe adafi. No hewɔ lɛ nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.” Ama Nyɔŋmɔ Maŋtsɛyeli kɛtsɔ Kristo Yesu nɔ lɛ nɔ mi waa, ni enɛ tee Maŋtsɛyeli shiɛmɔ kpeteŋkpele ni kojomɔi ni ŋwɛibɔfoi atɛtrɛmaŋtɛrɛi kpawo lɛ fɛɛ kpamɔ ni jaje kojomɔi sɔrɔtoi amɛtsɔɔ lɛ fata he lɛ shi.

 5. Mɛni ba yɛ 1928 mli yɛ Biblia Kaselɔi lɛ akpee lɛ shishi ni maa tɛtrɛmaŋtɛrɛ kpamɔ ni ji kpawo lɛ nɔ mi?

⁵ Ŋwɛibɔfo ni ji kpawo lɛ tɛtrɛmaŋtɛrɛ lɛ kpamɔ je kpo yɛ Biblia Kaselɔi lɛ akpee ni amɛfee yɛ Detroit, Michigan, yɛ July 30-August 6, 1928 lɛ shishi, kɛtsɔ wiemɔi otii ni amamɔ nɔ mi yɛ mli lɛ nɔ. Yɛ nakai be lɛ mli lɛ, atsɔ redio nitsumɔ hei 107 nɔ ashiɛ yɛ be kome mli, ni enɛ ha The New York Times lɛ tsɔɔ mli akɛ eji ‘redio kpaa he nitsumɔ ni da fe fɛɛ ni ejara wa fe fɛɛ yɛ yinɔsane mli.’ Kpee lɛ kɛ miishɛɛ kpɛlɛ “Sanejajemɔ ni Akɛshiɔ Satan Ahaa Yehowa” ni mli wa lɛ nɔ, ni enɛ tsɔɔ Satan kɛ egbɛjianɔtoo fɔŋ lɛ fɛɛ ahiɛkpatamɔ yɛ Harmagedon kɛ mɛi fɛɛ ni sumɔɔ jalɛ nifeemɔ lɛ anɔwomɔ. Nyɔŋmɔ Maŋtsɛyeli lɛ shishibii anɔkwafoi lɛ na miishɛɛ waa akɛ amɛnine aaashɛ wolo ni ajie lɛ kpo yɛ kpee lɛ shishi ni hiɛ baafai 368 ni egbɛi ji Government lɛ nɔ. Enɛ kɛ odaseyeli ni mli ka shi faŋŋ ni tsɔɔ akɛ “Nyɔŋmɔ kɛ e-Maŋtsɛ ni Afɔ Lɛ Mu lɛ ta maŋtsɛsɛi nɔ yɛ 1914” lɛ ha.

Yehowa Ŋɔ Hewalɛ

 6. Mɛɛ gbɛ nɔ Yohane tsɔ etswa Kristo ni awo lɛ maŋtsɛ yɛ Nyɔŋmɔ Maŋtsɛyeli lɛ mli lɛ he adafi yɛ?

⁶ Kristo ni akɛ lɛ eta maŋtsɛsɛi nɔ yɛ Nyɔŋmɔ Maŋtsɛyeli lɛ mli—mɛɛ miishɛɛ sanejajemɔ nɛɛ kɛba nɛkɛ! Yohane bɔ amaniɛ: “Ni onukpai nyɔŋmai-enyɔ kɛ ejwɛ ni tara amɛmaŋtsɛsɛii anɔ yɛ Nyɔŋmɔ hiɛ lɛ kɛ amɛhiɛaŋ bumɔ shi, ni amɛja Nyɔŋmɔ amɛkɛɛ: Wɔmiidao shi, bo Nuŋtsɔ [Yehowa] Nyɔŋmɔ Ofe lɛ, bo mɔ ni oyɔɔ ni oyɛ ni obaaba lɛ, akɛ oŋɔ ohewalɛ kpeteŋkpele lɛ ni oye maŋtsɛ.”—Kpojiemɔ 11:16, 17.

 7. Akɛ shidaa ha Yehowa Nyɔŋmɔ (a) kɛtsɔ okadi onukpai 24 ni yɔɔ shikpɔŋ nɔ lɛ ateŋ shwɛɛnii lɛ anɔ yɛ mɛɛ gbɛ nɔ? (b) Kɛtsɔ nakai okadi onukpai 24 ni atee amɛ shi kɛtee amɛ ŋwɛi gbɛhei amli lɛ anɔ yɛ mɛɛ gbɛ nɔ?

⁷ Mɛi ni kɛ shidaa nɛɛ haa Yehowa Nyɔŋmɔ ji onukpai 24 lɛ, ni damɔ shi kɛha Kristo nyɛmimɛi ni afɔ amɛ mu yɛ amɛŋwɛi gbɛhei lɛ. Kɛjɛ 1922 kɛbaa nɛɛ ni 144,000 ni afɔ amɛ mu nɛɛ ateŋ shwɛɛnii ni yɔɔ shikpɔŋ nɔ lɛ kɛ amɛhe wo nitsumɔ ni tɛtrɛmaŋtɛrɛi kpamɔi lɛ tee lɛ shi lɛ mli. Amɛbayoo nɔ ni okadi ni yɔɔ Mateo 24:3-25:46 lɛ tsɔɔ lɛ diɛŋtsɛ. Shi mra mli yɛ Nuŋtsɔ lɛ gbi lɛ mli ni amɛnanemɛi odasefoi ni ‘amɛye anɔkwale kɛyashi gbele mli’ momo lɛ, atee amɛ shi kɛtee amɛŋwɛi gbɛhei lɛ, bɔni afee ni amɛnyɛ amɛdamɔ 144,000 kuu muu lɛ fɛɛ najiaŋ ni amɛkɛ amɛhiɛaŋ abumɔ shi ni amɛkɛ woo aha Yehowa. (Kpojiemɔ 1:10; 2:10) Kwɛ shidaa ni mɛnɛɛmɛi fɛɛ kɛhaa akɛ amɛ-Nuŋtsɔ Nyɔŋmɔ lɛ shashaooo shi yɛ eteemɔŋ sane krɔŋkrɔŋ lɛ ni ekɛbaa naagbee kwraa lɛ mli!

 8. (a) Tɛtrɛmaŋtɛrɛ ni ji kpawo lɛ kpamɔ sa jeŋmaji lɛ ahe yɛ mɛɛ gbɛ nɔ? (b) Jeŋmaji lɛ amli efu namɔ?

⁸ Yɛ gbɛ kroko nɔ lɛ, tɛtrɛmaŋtɛrɛ ni ji kpawo lɛ kpamɔ kɛ miishɛɛ ko bahaaa jeŋmaji lɛ. Be eshɛ ni Yehowa baajie emlifu kpo etsɔɔ amɛ. Taakɛ Yohane bɔ amaniɛ lɛ: “Ni jeŋmaji lɛ amli efu, ni omlifu eshɛ kɛ be ni abaakojo gbohii lɛ ni abaawo otsuji ni ji gbalɔi lɛ kɛ krɔŋkrɔŋbii lɛ kɛ mɛi ni sheɔ ogbɛi lɛ gbeyei, mɛi bibii kɛ mɛi wuji lɛ, anyɔmɔ, ni abaafite mɛi ni fiteɔ shikpɔŋ lɛ.” (Kpojiemɔ 11:18) Kɛjɛ 1914 kɛbaa nɛɛ, jeŋmaji lɛ kɛ hiɛdɔɔ ejie mlifu kpo amɛtsɔɔ amɛhe, amɛjie mlifu kpo amɛtsɔɔ Nyɔŋmɔ Maŋtsɛyeli lɛ, ni titri lɛ, amɛjie mlifu kpo amɛtsɔɔ Yehowa odasefoi enyɔ lɛ.—Kpojiemɔ 11:3.

 9. Jeŋmaji lɛ miifite shikpɔŋ lɛ yɛ mɛɛ gbɛ nɔ, ni mɛni Nyɔŋmɔ etswa efai shi akɛ ebaafee yɛ enɛ he?

⁹ Jeŋmaji lɛ etee nɔ amɛmiifite shikpɔŋ lɛ kɛtsɔ amɛtawuu ni baaa naagbee lɛ kɛ gbɛjianɔtoo fɔŋ yɛ yinɔsane be fɛɛ mli lɛ nɔ. Shi kɛjɛ 1914 kɛbaa nɛɛ, nɛkɛ shikpɔŋ lɛ fitemɔ nɛɛ etee nɔ waa kɛyashɛ he ni ekɛ tsuifaa eba. Hiɛjoomɔ kɛ fitemɔ eha shia ŋai miilɛɛ ni shikpɔŋ kpakpa miifite. Atatui ni ebɔɔ yɔɔ mli enɛ eshwie hei ni efite hei babaoo. Awo niyenii ajɛɛhei srɔtoi amli muji. Awo kɔɔyɔɔ ni wɔmuɔ kɛ nu ni wɔnuɔ lɛ mli muji. Guɔyeli nitsumɔi ni afeɔ lɛ miiwo wala ni yɔɔ shikpɔŋ lɛ nɔ lɛ kɛ ŋshɔ mli lɛ he gbeyei. Jeŋ hewalɛi ni fe fɛɛ lɛ anifeemɔi ha mɛi she gbeyei yɛ be ko mli akɛ hiɛkpatamɔ kwraa kɛtsɔ nuklea tawuu nii anɔ lɛ baanyɛ akpata adesai fɛɛ ahiɛ. Yɛ miishɛɛ mli lɛ, Yehowa “baafite mɛi ni fiteɔ shikpɔŋ lɛ”; ekɛ fɔbuu kojomɔ baaba adesai henɔwolɔi ni leee Nyɔŋmɔ ni shihilɛi ni yɔɔ mɔbɔ ni yɔɔ shikpɔŋ lɛ nɔ lɛ jɛ amɛ lɛ anɔ. (5 Mose 32:5, 6; Lala 14:1-3) No hewɔ lɛ, Yehowa to gbɛjianɔ koni kpoo ni ji etɛ lɛ aba ni ebakojo nɔ fɔŋ feelɔi nɛɛ.—Kpojiemɔ 11:14.

Kpoo ha Mɛi ni Fiteɔ Nii Lɛ!

10. (a) Mɛni ji kpoo ni ji etɛ lɛ? (b) Kpoo ni ji etɛ lɛ kɛ nɔ ni fe piŋmɔ kɛkɛ baa yɛ mɛɛ gbɛ nɔ?

¹⁰ Agbɛnɛ naa kpoo ni ji etɛ lɛ. Ebaa oya! No ji nɔ ni Yehowa baatsɔ nɔ ni efite mɛi ni buleɔ “enane shi maaŋoo,” ni ji shikpɔŋ fɛfɛo nɛɛ ni wɔyɔɔ nɔ lɛ. (Yesaia 66:1) Mesia Maŋtsɛyeli lɛ—Nyɔŋmɔ teemɔŋ sane krɔŋkrɔŋ lɛ, ji nɔ ni kɛbaa. Klɛŋklɛŋ kpooi enyɔ lɛ—ni jɛ baalabii ahaomɔi lɛ kɛ okpɔŋɔnɔtaralɔi lɛ adɛŋ titri lɛ epiŋ Nyɔŋmɔ henyɛlɔi lɛ, kɛ Kristendom hiɛnyiɛlɔi lɛ titri; shi kpoo ni ji etɛ lɛ, ni jɛ Yehowa Maŋtsɛyeli lɛ diɛŋtsɛ ŋɔɔ lɛ kɛ nɔ ni fe piŋmɔ kɛkɛ baa. (Kpojiemɔ 9:3-19) Ekɛ gbele ni akɛbaafa adesa weku lɛ kɛ enɔyelɔi ni efite lɛ shishi lɛ baa. Enɛ baaba akɛ Yehowa kojomɔ yɛ Harmagedon naagbee. Etamɔ bɔ pɛ ni Daniel gba efɔ shi lɛ: “Ni nɛkɛ maŋtsɛmɛi nɛɛ [nɔyelɔi ni fiteɔ shikpɔŋ lɛ] ayinɔ lɛ, Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.” Nyɔŋmɔ Maŋtsɛyeli lɛ baaye shikpɔŋ ni etsɔ anunyam nɔ lɛ fɛɛ nɔ tamɔ gɔŋ ni kwɔ ko, ebaabu maŋtsɛ ni Yehowa ji lɛ bem ni ekɛ naanɔ miishɛɛ abaha adesai.—Daniel 2:35, 44; Yesaia 11:9; 60:13.

11. (a) Mɛɛ nibii ni yɔɔ miishɛɛ ni yaa nɔ gbalɛ lɛ tsɔɔ mli? (b) Nine shɛɔ mɛɛ duromɔ nɔ, yɛ mɛɛ gbɛ nɔ, ni namɛi anine shɛɔ nɔ?

¹¹ Nɔ ni baafata kpoo ni ji etɛ lɛ he aba ji miishɛɛ saji ni baatsara nɔ aba ni baaya nɔ fiofio kɛtsɔ Nuŋtsɔ lɛ gbi lɛ fɛɛ mli. Eji be ‘ni abaakojo gbohii lɛ, koni Nyɔŋmɔ awo etsuji gbalɔi lɛ kɛ krɔŋkrɔŋbii lɛ kɛ mɛi ni sheɔ egbɛi lɛ gbeyei lɛ nyɔmɔ.’ No tsɔɔ shitee kɛmiijɛ gbohii ateŋ! Kɛha krɔŋkrɔŋbii ni afɔ amɛ mu lɛ ni amɛwɔ yɛ gbele mli momo lɛ, enɛ baa mli yɛ Nuŋtsɔ lɛ gbi lɛ shishijee mli. (1 Tesalonikabii 4:15-17) Yɛ be ni sa mli lɛ, krɔŋkrɔŋbii lɛ ateŋ mɛi ni eshwɛ lɛ hu yafataa mɛnɛɛmɛi ahe kɛtsɔɔ trukaa shitee nɔ. Abaawo mɛi krokomɛi hu nyɔmɔ, ni mɛi ni fata amɛhe ji Nyɔŋmɔ tsuji gbalɔi lɛ ni hi shi yɛ blema bei amli lɛ kɛ adesai krokomɛi fɛɛ ni sheɔ Yehowa gbɛi lɛ gbeyei lɛ, kɛji akɛ amɛji asafo babaoo lɛ ni jeɔ amanehulu kpeteŋkpele lɛ mli lɛ mlibii aloo amɛfata “gbohii lɛ, mɛi bibii kɛ mɛi wuji” ni ateɔ amɛ shi kɛbaa wala mli yɛ Kristo Afii Akpe Nɔyeli lɛ mli lɛ hu he jio. Akɛni Nyɔŋmɔ Mesia Maŋtsɛ lɛ hiɛ gbele kɛ Hades loo gbohiiaje naa samfele hewɔ lɛ, e-Maŋtsɛyeli nɔyeli lɛ gbeleɔ gbɛ kɛhaa lɛ koni ekɛ naanɔ wala aha mɛi fɛɛ ni nine shɛɔ nakai gbɛjianɔtoo ni nɔ bɛ lɛ nɔ lɛ. (Kpojiemɔ 1:18; 7:9, 14; 20:12, 13; Romabii 6:22; Yohane 5:28, 29) Kɛ eji naanɔ wala ni gbele bɛ mli yɛ ŋwɛi loo naanɔ wala yɛ shikpɔŋ nɔ hu lɛ, nɛkɛ nikeenii ni ji wala lɛ ji duromɔ ni jɛ Yehowa ŋɔɔ, ni mɔ fɛɛ mɔ ni nine shɛɔ nɔ lɛ baada shi yɛ he kɛya naanɔ!—Hebribii 2:9.

Naa E-Kpaŋmɔ Adeka Lɛ!

12. (a) Taakɛ Kpojiemɔ 11:19 tsɔɔ lɛ, mɛni Yohane na yɛ ŋwɛi? (b) Kpaŋmɔ adeka lɛ efee mɛni he okadi, ni mɛni ba nɔ yɛ be mli ni Israel tee nomŋɔɔ mli yɛ Babilon lɛ?

¹² Yehowa miiye maŋtsɛ! Etsɔ e-Mesia Maŋtsɛyeli lɛ nɔ eeye adesai anɔ maŋtsɛ yɛ naakpɛɛ gbɛ nɔ. Nɔ ni Yohane na kɛnyiɛ enɛ sɛɛ lɛ maa enɛ nɔ mi: “Ni agbele Nyɔŋmɔ sɔlemɔtsu lɛ naa yɛ ŋwɛi, ni ana ekpaŋmɔ adeka lɛ yɛ esɔlemɔtsu lɛ mli, ni sarawai kɛ gbeei kɛ nugbɔshiimɔi kɛ shikpɔŋhosomɔi kɛ nyɔŋmɔŋtɛi babaoo ba.” (Kpojiemɔ 11:19) Enɛ ji he kome pɛ ni atsi Nyɔŋmɔ kpaŋmɔ adeka lɛ ta yɛ Kpojiemɔ. Adeka lɛ efee Yehowa ni yɔɔ ewebii ni ji Israel teŋ lɛ he okadi ni anaa. Akɛto kpee buu lɛ mli, ni yɛ sɛɛ mli lɛ akɛto sɔlemɔtsu lɛ ni Salomo ma lɛ Krɔŋkrɔŋ Fe Fɛɛ lɛ mli. Shi beni Israel tee nom mli yɛ Babilon yɛ afi 607 D.Ŋ.B. lɛ, Yerusalem tsɔ amaŋfɔ, ni kpaŋmɔ adeka lɛ laaje. No ji be mli ni David we lɛ najiaŋdaamɔlɔi kpa ‘Yehowa sɛi ni ataa nɔ akɛ maŋtsɛ’ lɛ nɔtamɔ.—1 Kronika 29:23.a

13. Anɔkwale ni eji akɛ ana Nyɔŋmɔ kpaŋmɔ adeka lɛ yɛ Nyɔŋmɔ sɔlemɔtsu lɛ mli yɛ ŋwɛi lɛ tsɔɔ mɛni?

¹³ Agbɛnɛ, yɛ nɔ ni fe afii 2,600 sɛɛ lɛ, aku sɛɛ ana Adeka lɛ shikome ekoŋŋ. Shi Adeka lɛ bɛ shikpɔŋ nɔ sɔlemɔtsu ko mli yɛ Yohane ninaa lɛ mli. Ejeɔ kpo yɛ Nyɔŋmɔ sɔlemɔtsu lɛ mli yɛ ŋwɛi. Yehowa miiye maŋtsɛ shikome ekoŋŋ kɛmiitsɔ Maŋtsɛ ni jɛ David odehei awekukpaa lɛ mli lɛ nɔ. Shi yɛ nɛkɛ be nɛɛ mli lɛ, akɛ Maŋtsɛ, Kristo Yesu eta sɛi nɔ yɛ ŋwɛi Yerusalem—he ko ni kwɔ grɔŋŋ ni awo nɔ ni ebaajɛ jɛmɛ ni etsu Yehowa kojomɔi lɛ ahe nii lɛ. (Hebribii 12:22) Kpojiemɔ wolo lɛ mli yitsei ni nyiɛ sɛɛ nɛɛ baajie enɛɛmɛi akpo atsɔɔ wɔ.

14, 15. (a) Namɔ pɛ naa kpaŋmɔ adeka lɛ yɛ blema Yerusalem, ni mɛni hewɔ? (b) Namɛi naa ekpaŋmɔ adeka lɛ yɛ Nyɔŋmɔ sɔlemɔtsu ni yɔɔ ŋwɛi lɛ mli lɛ?

¹⁴ Yɛ blema shikpɔŋ nɔ Yerusalem lɛ, Israelbii lɛ loo osɔfoi ni sɔmɔɔ yɛ sɔlemɔtsu lɛ mli lɛ enaaa Adeka lɛ, ejaakɛ ehɔ Krɔŋkrɔŋ Fe Fɛɛ lɛ ni muhɔɔ ko foɔ ekɛ He Krɔŋkrɔŋ lɛ teŋ lɛ mli. (4 Mose 4:20; Hebribii 9:2, 3) Osɔfonukpa lɛ pɛ naa enɛ beni eboteɔ Krɔŋkrɔŋ Fe Fɛɛ lɛ yɛ daa afi Kpatamɔ Gbi lɛ nɔ lɛ. Ni kɛlɛ, beni agbele sɔlemɔtsu ni yɔɔ ŋwɛi lɛ naa lɛ, jeee Yehowa Osɔfonukpa, Yesu Kristo pɛ na okadi adeka lɛ, shi moŋ osɔfoi bibii lɛ, 144,000 lɛ ni Yohane fata he lɛ na.

¹⁵ Klɛŋklɛŋ bii ni atee amɛ shi kɛtee ŋwɛi lɛ na nɛkɛ okadi adeka nɛɛ jogbaŋŋ akɛni ebɛŋkɛ amɛ lɛ hewɔ, ejaakɛ amɛyatara amɛgbɛhei akɛ onukpai 24 ni ebɔle Yehowa maŋtsɛsɛi lɛ he lɛ ateŋ mɛi komɛi. Ni Yehowa mumɔ lɛ kɛ hiɛtɛjemɔ eha Yohane kuu ni yɔɔ shikpɔŋ lɛ nɔ lɛ koni amɛyoo ba ni E-ba E-mumɔŋ sɔlemɔwe lɛ. Akɛ okadii hu eha adesai koni akɛhɛle amɛ shi yɛ naakpɛɛ nibii ni yaa nɔ nɛɛ mli. Yohane ninaa lɛ wieɔ sarawai, gbeei, nugbɔshiimɔi, shikpɔŋhosomɔ ko kɛ nyɔŋmɔŋtɛi ahe. (Okɛto Kpojiemɔ 8:5 he.) Enɛɛmɛi damɔ shi kɛha mɛni?

16. Sarawai, gbeei, nugbɔshiimɔi, shikpɔŋhosomɔi kɛ nyɔŋmɔŋtɛi pii eba yɛ mɛɛ gbɛ nɔ?

¹⁶ Kɛjɛ 1914 kɛbaa nɛɛ, hosomɔ kpele ko etee nɔ yɛ jamɔ maŋtsɛyeli he lɛ mli. Yɛ miishɛɛ mli lɛ, nɔ ni efata nɛkɛ “shikpɔŋhosomɔ” nɛɛ he ji gbee ni ajɔɔ nɔ ni miijaje Nyɔŋmɔ Maŋtsɛyeli ni ato ama shi lɛ he sane lɛ yɛ faŋŋ mli. Ajaje nugbɔshiimɔi ni ji ‘ahum he kɔkɔbɔi’ ni jɛ Biblia lɛ mli lɛ atsɔɔ. Nyɔŋmɔ gbalɛ Wiemɔ lɛ mli shishinumɔ ni tamɔ sarawa ekpɛ ni ana ni ajaje atsɔɔ. Afɔse ŋwɛi kojomɔi ni yiɔ mɔ waa tamɔ “nyɔŋmɔŋtɛi” ashwie Kristendom kɛ apasa jamɔ fɛɛ nɔ. Kulɛ esa akɛ enɛɛmɛi fɛɛ agbala gbɔmɛi lɛ ajwɛŋmɔ. Shi nɔ ni yɔɔ mɔbɔ ji akɛ, gbɔmɛi lɛ ateŋ mɛi ni fa—tamɔ Yerusalembii ni hi shi yɛ Yesu gbii lɛ amli lɛ—enaaa nɛkɛ Kpojiemɔ okadii nɛɛ amlibaa lɛ.—Luka 19:41-44.

17, 18. (a) Tɛtrɛmaŋtɛrɛi lɛ ni bɔfoi kpawo lɛ kpa lɛ kɛ mɛɛ gbɛnaa nii ebafɔ Kristofoi ni amɛjɔɔ amɛhe nɔ lɛ anɔ? (b) Kristofoi lɛ miitsu amɛnitsumɔ lɛ he nii yɛ mɛɛ gbɛ nɔ?

¹⁷ Bɔfoi kpawo lɛ miikpa amɛ tɛtrɛmaŋtɛrɛi lɛ lolo, kɛmiitsɔɔ yinɔsane mli nibii ni baa yɛ shikpɔŋ nɛɛ nɔ lɛ he okadi. Gbɛnaa nii ni tsii ka Kristofoi ni amɛjɔɔ amɛhe nɔ lɛ anɔ akɛ amɛya nɔ amɛjaje nɛkɛ saji nɛɛ amɛtsɔɔ je lɛ. Kwɛ miishɛɛ ni amɛkɛtsuɔ nɛkɛ nitsumɔ nɛɛ! Nɔ ni tsɔɔ enɛ ji akɛ, yɛ nɔ ni fe afii nyɔŋma pɛ ni eho lɛ, kɛjɛ 1986 kɛbashi 2005 mli lɛ, shwɛ fioo ni ŋmɛlɛtswai abɔ ni amɛkɛtsuɔ nii daa afi yɛ amɛ jeŋ muu fɛɛ sɔɔmɔ nitsumɔ lɛ mli lɛ ku ebɔ he, kɛteke nɔ,—kɛjɛ 680,837,042 kɛyashi 1,278,235,504. Yɛ anɔkwale mli lɛ, aajaje “Nyɔŋmɔ teemɔŋ sane lɛ taakɛ sanekpakpa lɛ ji lɛ” kɛmiishɛ “jeŋ naagbee hei lɛ.”—Kpojiemɔ 10:7, New World Translation; Romabii 10:18.

¹⁸ Ninai krokomɛi miimɛ wɔ agbɛnɛ yɛ be mli ni ajieɔ Nyɔŋmɔ Maŋtsɛyeli lɛ yiŋtoi akpo kɛyaa nɔ lɛ.

[Shishigbɛ niŋmaa]

[Akrabatsa ni yɔɔ baafa 173]

Saji Otii ni Yɔɔ Yehowa Kojomɔ Jajemɔi ni Tamɔ Tɛtrɛmaŋtɛrɛi lɛ Amli

 1. 1922 Cedar Point, Ohio: Atswa Kristendom jamɔ mli hiɛnyiɛlɔi, maŋkwramɔŋ, kɛ nitsumɔi wuji amli hiɛnyiɛlɔi lɛ mpoa koni amɛbu amɛhe bem yɛ toiŋjɔlɛ, shweremɔ kɛ miishɛɛ ni amɛnyɛɛɛ amɛkɛba lɛ he. Mesia Maŋtsɛyeli lɛ ji haomɔi lɛ fɛɛ anaa tsabaa.

 2. 1923 Los Angeles, California: Maŋshiɛmɔ, “Jeŋmaji Fɛɛ Miishi Ako Kɛmiiya Harmagedom, shi Akpekpei Abɔ ni Yɔɔ Wala Mli Bianɛ lɛ Gboiŋ Gbi Ko Gbi Ko,” bi ni “gwantɛŋi” ni sumɔɔ toiŋjɔlɛ lɛ akwa adesai ni efee hamahama tamɔ ŋshɔ ni gbeɔ mɔ lɛ.

 3. 1924 Columbus, Ohio: Abu osɔfoi lɛ fɔ yɛ amɛ henɔwomɔ kɛ kpɛlɛmɔ ni amɛkpɛlɛɛɛ akɛ amɛaashiɛ Mesia Maŋtsɛyeli lɛ hewɔ. Esa akɛ anɔkwale Kristofoi ashiɛ Nyɔŋmɔ oweletɔɔ lɛ ni amɛshɛje adesai ni yeɔ ŋkɔmɔ lɛ amii.

 4. 1925 Indianapolis, Indiana: Shɛɛ sane ni hiɛnɔkamɔ yɔɔ mli ni tsɔɔ sɔrɔtofeemɔ ni yɔɔ mumɔŋ duŋ ni yɔɔ Kristendom lɛ kɛ Maŋtsɛyeli lɛ he shiwoo ni kɔɔ toiŋjɔlɛ, shweremɔ, gbɔmɔtsoŋ hewalɛnamɔ, wala, heyeli kɛ naanɔ miishɛɛ ni kpɛɔ kaŋkaŋ lɛ teŋ lɛ.

 5. 1926 London, England: Haomɔ ni tamɔ baalabii anɔ́ ni akɛba Kristendom kɛ esɔfoi lɛ anɔ, ni ekpa bɔ ni amɛkpoo Nyɔŋmɔ Maŋtsɛyeli lɛ amɛha lɛ he mama, ni ejie ŋwɛi nɔyeli lɛ fɔmɔ lɛ yi.

 6. 1927 Toronto, Canada: Nine ni afɔ, ni okpɔŋɔnɔtaralɔi tsu he nii, ni amɛmiitsɛ gbɔmɛi lɛ ni amɛshi ‘Kristojamɔ ni ato he gbɛjianɔ’ lɛ ni amɛjɛ amɛtsuiŋ amɛkɛ sɔɔmɔ aha Yehowa Nyɔŋmɔ kɛ e-Maŋtsɛ kɛ Maŋtsɛyeli lɛ.

 7. 1928 Detroit, Michigan: Sane ni ajaje ashi Satan aha Yehowa, ni aha efee faŋŋ akɛ Nyɔŋmɔ Maŋtsɛ ni afɔ lɛ mu lɛ, ni akɛ lɛ ta maŋtsɛsɛi nɔ yɛ 1914 lɛ baakpata Satan gbɛjianɔtoo fɔŋ lɛ hiɛ ni ewo adesai anɔ.

[Akrabatsa ni yɔɔ baafa 175]

Shikpɔŋ lɛ Fitemɔ

“Yɛ hiŋmɛitswaa etɛ fee etɛ mli lɛ, kooi ni nugbɔ nɛɔ yɛ mli waa lɛ dalɛ ni shɛɔ bɔɔlutswaa he kome laajeɔ. . . . Kooi ni laajeɔ nɛɛ miikpata kwɛ̃ɛnii kɛ kooloi sɔrɔtoi akpekpei abɔ hiɛ.”—Illustrated Atlas of the World (Rand McNally).

“Yɛ afii ohai enyɔ ni akɛbahi jɛmɛ lɛ mli lɛ, [the Great Lakes] (Kpaakpoi) lɛ ebatsɔ je lɛ kpaakpo ni nui gbohii hoɔ kɛyaa mli lɛ ateŋ nɔ ni da fe fɛɛ.—The Globe and Mail (Canada).

Yɛ April 1986 lɛ, U.S.S.R. (Russia) nuklea flɔnɔɔ ko ni fɛ yɛ Chernobyl lɛ “ji nuklea fɛlɛmɔ nɛɛ eko ni abayoo fe fɛɛ . . . kɛjɛ beni afɛ eko ashwie Hiroshima kɛ Nagasaki nɔ lɛ,” ni enɛ fɛ̃ “la kɛ dɔlɛ babaoo kɛtee je lɛ kɔɔyɔŋ, su mli kɛ nu mli, ni efalɛ lɛ kɛ nuklea he nibii kɛ okpɛlɛmii ni aka akwɛ lɛ fɛɛ falɛ yɛ la kɛ dɔlɛ mli lɛ yeɔ egbɔ.”—JAMA; The New York Times.

Yɛ Minamata, Japan lɛ, tsofa futumɔ nitsumɔ he ko fɔse methylmercury ewo ŋshɔ nine ko mli. Looi kɛ ŋshɔŋlooi ni yɔɔ ŋoŋoi ni tsofa nɛɛ yakpa amɛhe loo amɛyaye lɛ yeli kɛ hela ni ji Minamata hela (MD) lɛ ba, ni “eji faji amli hela ko ni ehiii tsamɔ. . . . Kɛbashi amrɔ nɛɛ [1985] lɛ, ana akɛ gbɔmɛi 2578 miiye MD hela nɛɛ yɛ Japan fɛɛ.”—International Journal of Epidemiology.

[Akrabatsa ni yɔɔ baafa 176]

Sanejajemɔi ni tsii ni yɔɔ Kpojiemɔ 11:15-19 lɛ ji nɔ ni tsɔ ninaai ni nyiɛ sɛɛ lɛ hiɛ. Kpojiemɔ yitso 12 lɛ haa atsɔɔ hiɛ anaa sanejajemɔi wuji ni yɔɔ Kpojiemɔ 11:15, 17 lɛ mli fitsofitso ni efeɔ faŋŋ. Yitso 13 lɛ haa atsɔɔ hiɛ aleɔ 11:18 lɛ mli, yɛ be mli ni etsɔɔ Satan maŋkwramɔŋ gbɛjianɔtoo lɛ shishijee kɛ bɔ ni eda ha kɛ bɔ ni ekɛ fitemɔ eba shikpɔŋ lɛ nɔ lɛ. Yitsei 14 kɛ 15 tsɔɔ Maŋtsɛyeli kojomɔi ni kɔɔ tɛtrɛmaŋtɛrɛi kpawo lɛ kpamɔ kɛ kpoo ni ji etɛ lɛ mli lolo.

[Mfonirii ni yɔɔ baafa 174]

Yehowa “baafite mɛi ni fiteɔ shikpɔŋ lɛ”