Yitso 28

Mple ni Akɛ Kooloi Awuiyelɔi Enyɔ Shiɔ

Ninaa 8​—Kpojiemɔ 13:1-18

Saneyitso: Kooloo ni hiɛ yitsei kpawo lɛ, kooloo ni yɔɔ akoloŋtoi enyɔ lɛ, kɛ kooloo lɛ he amaga lɛ

Emlibaa be: Kɛjɛ Nimrod gbii lɛ amli kɛyashi amanehulu kpeteŋkpele lɛ mli

1, 2. (a) Mɛni Yohane kɛɔ yɛ drako lɛ he? (b) Te Yohane tsɔɔ bɔ ni gbɛjianɔtoo ni anaa ni drako lɛ kɛtsuɔ nii lɛ ji lɛ mli yɛ okadifeemɔ mli eha tɛŋŋ?

ASHƐ drako kpeteŋkpele lɛ afɔ shikpɔŋ lɛ nɔ! Kpojiemɔ he nii ni wɔkase lɛ feɔ lɛ faŋŋ akɛ aŋmɛŋ Onufu lɛ loo esɛɛnyiɛlɔi daimonioi lɛ agbɛ gbi ko gbi ko ni amɛku sɛɛ amɛya ŋwɛi. Shi wɔkɛ mɔ “ni atsɛɔ lɛ diabolo (naafolɔlɔ loo Abonsam) lɛ kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ” egbeko naa. Sane ni nyiɛ sɛɛ lɛ haa wɔleɔ nɔ ni Satan kɛtsuɔ nii koni ekɛwuu eshi ‘yoo lɛ kɛ eseshibii’ lɛ mli jogbaŋŋ. (Kpojiemɔ 12:9, 17) Yohane wieɔ yɛ nakai onufu ni tamɔ drako lɛ he akɛ: “Ni eyadamɔ ŋshɔ naa shia lɛ nɔ.” (Kpojiemɔ 12:18) No hewɔ lɛ nyɛhaa wɔwaa ni wɔpɛia nɔ ni drako lɛ tsɔɔ nɔ ekɛtsuɔ nii lɛ mli.

² Ba ni Satan kɛ edaimonioi lɛ eba lɛ yeee krɔŋkrɔŋbii ni yɔɔ ŋwɛi lɛ awui dɔŋŋ. Ashwie nakai mumɔŋ gbɔmɛi yiwalɔi lɛ kɛjɛ ŋwɛi ni atsi amɛnaa yɛ wɔshikpɔŋ nɛɛ nɔ he ko. Ŋwanejee ko bɛ he akɛ enɛ hewɔ ni mumɔi atsɛmɔ nifeemɔi efa babaoo yɛ ŋmɛnɛŋmɛnɛ beaŋ lɛ. Onufu ni hiɛ etɛ lɛ yɛ mumɔi agbɛjianɔtoo ko ni ekpɔtɔ lolo. Shi ani ekɛ gbɛjianɔtoo ni anaa tsuɔ nii koni ekɛshishiu adesai? Yohane kɛɔ wɔ: “Ni mina kooloo ko miije kpo kɛmiijɛ ŋshɔ lɛ mli kɛmiiba ni eyɛ akoloŋtoi nyɔŋma kɛ yitsei kpawo, ni maŋtsɛfaii nyɔŋma bumɔ ekoloŋtoi lɛ anɔ, ni musubɔɔ gbɛii yɛ eyitsei lɛ anɔ. Ni kooloo lɛ ni mina lɛ tamɔ mlaŋtswi, ni enaji tamɔ oshishibirishii naji, ni enaabu tamɔ jata naabu. Ni drako lɛ ŋɔ lɛ diɛŋtsɛ ehewalɛ lɛ kɛ emaŋtsɛsɛi lɛ kɛ hegbɛ kpeteŋkpele eha lɛ.”—Kpojiemɔ 13:1, 2.

 3. (a) Mɛɛ kooloi ni he yɔɔ gbeyei gbalɔ Daniel na yɛ ninai amli? (b) Kooloi agboi ni yɔɔ Daniel yitso 7 lɛ damɔ shi kɛha mɛni?

³ Mɛni ji nɛkɛ kooloo ni tamɔɔɔ adebɔɔ mli nɔ nɛɛ? Biblia lɛ diɛŋtsɛ haa hetoo. Dani Babilon aaagbee shi yɛ 539 D.Ŋ.B. lɛ, gbalɔ Daniel, Yudanyo lɛ na ninai ni kɔɔ kooloi awuiyelɔi ni hiɛ wa he. Etsɔɔ mli yɛ Daniel 7:2-8 akɛ kooloi ejwɛ fa kpo kɛjɛ ŋshɔŋ, klɛŋklɛŋ nɔ lɛ tamɔ jata, nɔ ni ji enyɔ lɛ tamɔ oshishibirishii, ni nɔ ni ji etɛ lɛ tamɔ kootsɛ, “ni naa kooloo ni ji ejwɛ lɛ, ehe yɛ gbeyei kɛ naakpɛɛ, ni ehe wa naakpa, . . . ni ehiɛ akoloŋtoi nyɔŋma.” Enɛ tamɔ kooloo awuiyelɔ ni Yohane na aaafee afi 96 Ŋ.B. lɛ nɔŋŋ yɛ gbɛ ni sa kadimɔ jogbaŋŋ nɔ. Nakai kooloo lɛ hu yɛ sui tamɔ jata, oshishibirishii, kɛ mlaŋtswi, ni eyɛ akoloŋtoi nyɔŋma. Te wɔfeɔ tɛŋŋ wɔleɔ nɔ ni kooloi wuji ni Daniel na lɛ damɔ shi kɛha? Ekɛɔ wɔ akɛ: “Nɛkɛ kooloi wuji ejwɛ nɛɛ, . . . ji maŋtsɛmɛi ejwɛ ni baate shi yɛ shikpɔŋ lɛ nɔ.” (Daniel 7:17) Hɛɛ, nakai kooloi lɛ damɔ shi kɛha “maŋtsɛmɛi,” loo shikpɔŋ lɛ nɔ maŋkwramɔŋ hewalɛi.

 4. (a) Too agbo lɛ kɛ too kpakpo lɛ ni yɔɔ Daniel yitso 8 lɛ feɔ mɛni he mfoniri? (b) Too kpakpo lɛ ni ekoloŋto lɛ ku ni akoloŋtoi ejwɛ baye najiaŋ lɛ tsɔɔ mɛni?

⁴ Yɛ ninaa kroko hu mli lɛ, Daniel na too agbo ko ni hiɛ akoloŋtoi enyɔ ni too kpakpo ko ni yɔɔ akoloŋto ni da bashi lɛ. Ŋwɛibɔfo Gabriel tsɔɔ nɔ ni enɛ damɔ shi kɛha lɛ mli etsɔɔ lɛ: “Too agbo lɛ, . . . ji Media kɛ Persia maŋtsɛmɛi lɛ. Ni too kpakpo tsɔiatsɛ lɛ ji Hela maŋtsɛ lɛ.” Gabriel tee nɔ egba akɛ too kpakpo lɛ akoloŋto agbo lɛ baaku ni akoloŋtoi ejwɛ baaba abaye no najiaŋ. Enɛ ba mli diɛŋtsɛ yɛ nɔ ni fe afii 200 sɛɛ beni Alexander Kpeteŋkpele lɛ gbo ni aja emaŋtsɛyeli lɛ mli ejwɛ aha etatsɛmɛi ejwɛ koni amɛye nɔ lɛ.—Daniel 8:3-8, 20-25.a

 5. (a) Mɛɛ shishinumɔi Hela wiemɔ kɛha kooloo lɛ hiɛ? (b) Kooloo lɛ ni yɔɔ Kpojiemɔ 13:1, 2 kɛ eyitsei kpawo lɛ damɔ shi kɛha mɛni?

⁵ Eka shi faŋŋ akɛ belɛ Biblia ni jɛ mumɔŋ lɛ Ŋmalɔ lɛ buɔ maŋkwramɔŋ hewalɛi ni yɔɔ shikpɔŋ nɔ lɛ akɛ kooloi. Mɛɛ kooloi nɛkɛ? Biblia he wielɔ ko tsɛɔ kooloi ni yɔɔ Kpojiemɔ 13:1, 2 lɛ ekome akɛ “brute,” ni ekɛfata he akɛ: “Wɔkpɛlɛɔ wiemɔi krokomɛi fɛɛ ni akɛtsɔɔ θηρίον [the·riʹon, Hela wiemɔ kɛha “beast” loo kooloo] shishi lɛ nɔ, tamɔ akɛ mɔ ni yi wa, mɔ ni kpataa nii ahiɛ, mɔ ni he yɔɔ gbeyei, fulɔ, k.e, nɔ ni faa mɔ tsui.”b Kwɛ bɔ ni enɛ tsɔɔ maŋkwramɔŋ gbɛjianɔtoo ni la ekpa he kpɔtɔɔ ni Satan etsɔ nɔ ekɛye adesai anɔ lɛ mli ehaa! Nɛkɛ kooloo nɛɛ yitsei kpawo lɛ damɔ shi kɛha jeŋ hewalɛi ekpaa ni je kpo yɛ Biblia yinɔsane mli kɛbashi Yohane gbii lɛ amli lɛ—Mizraim, Ashur, Babilon, Media kɛ Persia, Hela, kɛ Roma—kɛ jeŋ hewalɛ ni gbeɔ yi feɔ kpawo ni agba akɛ ebaapue yɛ sɛɛ mli lɛ.—Okɛto Kpojiemɔ 17:9, 10 he.

 6. (a) Kooloo lɛ yitsei kpawo lɛ enyiɛ hiɛ yɛ mɛni mli? (b) Yehowa kɛ Roma tsu nii ni ekɛ lɛ diɛŋtsɛ efɔbuu kojomɔ ba Yudafoi anibii agbɛjianɔtoo lɛ nɔ yɛ mɛɛ gbɛ nɔ, ni mɛni ba Kristofoi ni yɔɔ Yerusalem lɛ anɔ?

⁶ Eji anɔkwale akɛ, jeŋ hewalɛi krokomɛi ehi shi yɛ yinɔsane mli kɛfata kpawo lɛ he—tamɔ bɔ ni kooloo ni Yohane na lɛ hu yɔɔ gbɔmɔtso ni eyɔɔ yitsei kpawo kɛ akoloŋtoi nyɔŋma hu lɛ. Shi yitsei kpawo lɛ damɔ shi kɛha hewalɛi wuji kpawo ni amɛteŋ mɔ fɛɛ mɔ ena hegbɛ, ni mɔ nɛ nyiɛ mɔ nɛ sɛɛ, ni amɛkɛnyiɛ hiɛ ni amɛkɛnyɛ Nyɔŋmɔ webii anɔ lɛ. Yɛ afi 33 Ŋ.B., beni Roma yeɔ nɔ lɛ, Satan kɛ nakai kooloo lɛ yitso lɛ tsu nii ni ekɛgbe Nyɔŋmɔ Bi lɛ. Nakai be lɛ mli lɛ, Nyɔŋmɔ kpoo Yudafoi anibii agbɛjianɔtoo ni yeee anɔkwale lɛ, ni yɛ sɛɛ mli, yɛ afi 70 Ŋ.B. lɛ, eŋmɛ gbɛ ni Roma tsu efɔbuu kojomɔ he nii eshwie nakai maŋ lɛ nɔ. Yɛ miishɛɛ mli lɛ, atsɔ hiɛ abɔ anɔkwa Nyɔŋmɔ Israel lɛ, Kristofoi ni afɔ amɛ mu lɛ asafo lɛ kɔkɔ, ni mɛi ni yɔɔ Yerusalem kɛ Yudea lɛ jo foi kɛtee he ni yɔɔ shweshweeshwe yɛ Yordan Faa lɛ sɛɛ.—Mateo 24:15, 16; Galatabii 6:16.

 7. (a) Mɛni be shɛ ni baaba beni nibii agbɛjianɔtoo lɛ naagbee lɛ shɛ ni Nuŋtsɔ lɛ gbi lɛ je shishi lɛ? (b) Mɛni bafee kooloo lɛ ni yɔɔ Kpojiemɔ 13:1, 2 lɛ yitso ni ji kpawo lɛ?

⁷ Shi beni Ŋ.B. klɛŋklɛŋ afii oha lɛ baa naagbee lɛ, no mli lɛ nɛkɛ mra be mli asafo nɛɛ mli bii lɛ ateŋ mɛi pii ekpoo anɔkwale lɛ, ni jwɛi lɛ, ni ji “mɔ fɔŋ lɛ bii lɛ” eha anɔkwa Kristofoi ni ji ŋmaa loo dumɔ nii kpakpai, ni ji “maŋtsɛyeli lɛ mli bii” lɛ anɔ. Shi beni nibii agbɛjianɔtoo nɛɛ naagbee lɛ shɛ lɛ, kɛkɛ ni Kristofoi ni afɔ amɛ mu lɛ pue ekoŋŋ akɛ kuu ko ni ato amɛ gbɛjianɔ. Ni be eshɛ ni “jalɔi lɛ aaakpɛ tamɔ hulu” yɛ Nuŋtsɔ lɛ gbi lɛ nɔ. No hewɔ lɛ, ato Kristofoi asafo lɛ gbɛjianɔ aha nitsumɔ. (Mateo 13:24-30, 36-43) No mli lɛ, Roma Maŋtsɛyeli lɛ bɛ dɔŋŋ. Ŋleshi Maŋtsɛyeli ni da kpeteŋkpele lɛ kɛ United States, Amerika ni he wa waa lɛ, ebatsɔ jeŋ hewalɛ ni ale. Nɛkɛ jeŋ hewalɛ ni bɔ he enyɔ nɛɛ bafee kooloo lɛ yitso ni ji kpawo lɛ.

 8. Mɛni hewɔ esaaa akɛ efeɔ hejɔmɔ loo naakpɛɛ akɛ akɛ Anglo-Amerika jeŋ hewalɛ ni bɔ he enyɔ lɛ aaato kooloo he lɛ?

⁸ Ani ejeee nɔ ni haa mɔ he jɔ̃ɔ lɛ akɛ aaayoo maŋkwramɔŋ hewalɛi ni yeɔ nɔ lɛ akɛ kooloi? Nakai ji bɔ ni shitee-kɛ-wolɔi komɛi kɛɛ yɛ Jeŋ Ta II be lɛ mli, yɛ be mli ni ajeɔ Yehowa Odasefoi ashidaamɔ akɛ gbɛjianɔtoo kɛ agbɛnɛ akɛ aŋkroaŋkroi lɛ he ŋwane yɛ shikpɔŋ lɛ nɔ saneyeli hei fɛɛ lɛ. Shi wa ni osusu enɛ he! Ani jeŋmaji lɛ diɛŋtsɛ kɛ kooloi loo bɔɔ nii ni hiɛ wa efeee amɛmaŋ lɛ he okadii? Akɛ nɔkwɛmɔnɔ lɛ, Ŋleshi jata lɛ yɛ, Amerika okropɔŋ lɛ yɛ, kɛ China drako lɛ. No hewɔ lɛ mɛni hewɔ esa akɛ mɔ ko ate shi awo kɛji akɛ Ŋmalɛ Krɔŋkrɔŋ ni ji Biblia lɛ Ŋmalɔ ni jɛ ŋwɛi lɛ hu kɛ kooloi tsuɔ nii ni ekɛfeɔ jeŋ hewalɛi lɛ ahe mfoniri?

 9. (a) Mɛni hewɔ esaaa akɛ mɔ ko teɔ shi ewoɔ kɛɛmɔ ni Biblia lɛ kɛɔ akɛ Satan kɛ ehewalɛ kɛ hegbɛ kpeteŋkpele ha kooloo lɛ? (b) Te atsɔɔ bɔ ni Satan ji lɛ mli yɛ Biblia lɛ mli aha tɛŋŋ, ni mɛɛ gbɛ nɔ etsɔɔ enaa nɔyelii anɔ hewalɛ yɛ?

⁹ Kɛfata he lɛ, mɛni hewɔ esa akɛ mɔ ko ate shi awo akɛ Biblia lɛ miikɛɛ akɛ Satan ji mɔ ni kɛ hegbɛ kpeteŋkpele haa kooloo lɛ? Nyɔŋmɔ ji nakai wiemɔ lɛ Jɛɛhe, ni yɛ lɛ ehiɛ lɛ, ‘jeŋmaji lɛ tamɔ nu kuli yɛ goga he kɛ mulu kuli.’ Nakai jeŋmaji lɛ baafee jogbaŋŋ moŋ akɛ amɛaatao Nyɔŋmɔ hiɛ duromɔ fe ni amɛmli aaafu gbɛ ni egbalɛ Wiemɔ lɛ tsɔɔ bɔ ni amɛji lɛ mli ehaa lɛ. (Yesaia 40:15, 17; Lala 2:10-12) Satan jeee adesa mli gbɔmɔ ko ni akɛ nitsumɔ ewo edɛŋ akɛ epiŋ susumai ni amɛgboi yɛ hɛl la mli. He ko ni tamɔ nɛkɛ bɛ. Shi moŋ Ŋmalɛi lɛ tsɔɔ mli akɛ Satan ji “la bɔfo”—shishiulɔ ni fe fɛɛ ni naa hewalɛ kpele yɛ maŋkwramɔŋ saji amli.—2 Korintobii 11:3, 14, 15; Efesobii 6:11-18.

10. (a) Anɔkwale ni eji akɛ maŋtsɛfaii bumɔ akoloŋtoi nyɔŋma lɛ eko fɛɛ eko nɔ lɛ tsɔɔ mɛni? (b) Akoloŋtoi nyɔŋma lɛ kɛ maŋtsɛfaii nyɔŋma lɛ feɔ mɛni he mfoniri?

¹⁰ Kooloo lɛ yɛ akoloŋtoi nyɔŋma yɛ eyitsei kpawo lɛ nɔ. Ekolɛ yitsei ejwɛ hiɛ akoloŋtoi kome kome ni yitsei etɛ hu hiɛ akoloŋtoi enyɔnyɔ. Kɛfata he lɛ, eyɛ maŋtsɛfaii yɛ ekoloŋtoi lɛ anɔ. Atsɔɔ kooloi ni amɛhe yɔɔ gbeyei lɛ mli yɛ Daniel wolo lɛ mli ni esa akɛ anu amɛ akoloŋtoi lɛ akanemɔ kɛ amɛyifalɛ lɛ shishi akɛ nakai pɛpɛɛpɛ eji. Akɛ nɔkwɛmɔnɔ lɛ, too agbo lɛ akoloŋtoi enyɔ lɛ damɔ shi kɛha jeŋ hewalɛ ni mɛi enyɔ yɔɔ mli, Media kɛ Persia, yɛ be mli ni akoloŋtoi ejwɛ ni kwɛ̃ yɛ too kpakpo lɛ yiteŋ lɛ damɔ shi kɛha maŋtsɛyelii ejwɛ ni kɛ amɛhe hi shi ni fa kpo kɛjɛ Alexander Kpeteŋkpele lɛ Hela maŋtsɛyeli lɛ mli lɛ. (Daniel 8:3, 8, 20-22) Shi yɛ kooloo ni Yohane na lɛ lɛ gbɛfaŋ lɛ, etamɔ nɔ ni akoloŋtoi nyɔŋma lɛ ji okadifeemɔ mli nɔ. (Okɛto Daniel 7:24; Kpojiemɔ 17:12 he.) Amɛdamɔ shi kɛha maŋtsɛyelii ni eye emuu ni feɔ Satan maŋkwramɔŋ gbɛjianɔtoo muu lɛ fɛɛ lɛ. Akoloŋtoi nɛɛ fɛɛ yeɔ awui, ni amɛsumɔɔ tawuu, shi taakɛ yitsei kpawo lɛ tsɔɔ lɛ, yitsoyeli lɛ hiɔ shi yɛ jeŋ hewalɛ kome dɛŋ yɛ be kome mli. Nakai nɔŋŋ hu maŋtsɛfaii nyɔŋma lɛ tsɔɔ akɛ jeŋ hewalɛi ni yeɔ amɛhe lɛ fɛɛ baana hewalɛ ni amɛye nɔ yɛ be kome mli kɛ jeŋ hewalɛ ni ehe gbɛi, loo eyeɔ nɔ yɛ nakai be lɛ mli lɛ.

11. Anɔkwale ni eji akɛ kooloo lɛ yɛ “musubɔɔ gbɛi yɛ yitsei lɛ anɔ” lɛ tsɔɔ mɛni?

¹¹ Kooloo lɛ yɛ “musubɔɔ gbɛii yɛ yitsei lɛ anɔ,” ni etsɛɔ nibii ehaa lɛ diɛŋtsɛ ehe ni tsɔɔ akɛ ebɛ bulɛ ko kwraa kɛha Yehowa Nyɔŋmɔ kɛ Kristo Yesu. Ekɛ Nyɔŋmɔ kɛ Kristo gbɛi etsu nii ekɛshishiu koni enine ashɛ nɔ ni etaoɔ yɛ maŋkwramɔŋ lɛ anɔ; ni ekɛ apasa jamɔ hu etsu nii, ni eŋmɛ gbɛ po ni osɔfoi kɛ amɛhe ewo maŋkwramɔŋ saji amli. Akɛ nɔkwɛmɔnɔ lɛ, osɔfonukpai fata England House of Lords (Nɔyeli Bɛgwafoi) lɛ ahe. Katolik osɔfonukpai hu ena gbɛi yɛ maŋkwramɔŋ nitsumɔi amli yɛ France kɛ Italia, ni nyɛsɛɛ nɛɛ nɔŋŋ lɛ, osɔfoi hu ena maŋkwramɔŋ gbɛhe yɛ Latin Amerika. Nɔyelii kalaa jamɔŋ sabalai yɛ woji anɔ tamɔ “IN GOD WE TRUST,” (Nyɔŋmɔ nɔ Wɔkɛ Wɔhe Fɔɔ) yɛ amɛshika ni akɛ woji efee nɔ, ni amɛkɛɔ akɛ ŋwɛi kpɛlɛɔ amɛnɔyelɔi lɛ anɔ yɛ amɛjwiɛtɛi shikai anɔ, ni akɛ nɔkwɛmɔnɔ lɛ, amɛkɛɔ akɛ, “Nyɔŋmɔ duromɔ naa” ahala mɛnɛɛmɛi yɛ. Enɛɛmɛi fɛɛ ji musubɔɔ wiemɔi, ejaakɛ amɛmiibɔ mɔdɛŋ ni amɛgbala Nyɔŋmɔ amɛwo amɛ maŋkwramɔŋ maŋhedɔɔ ni he ewo muji ni efee kpɔtɔɔ lɛ mli.

12. (a) Kooloo lɛ ni je kpo kɛjɛ “ŋshɔ lɛ mli” lɛ tsɔɔ mɛni, ni mɛɛ be mli ebɔi kpojee? (b) Anɔkwale ni eji akɛ drako lɛ kɛ hegbɛ kpeteŋkpele ha okadi kooloo lɛ tsɔɔ mɛni?

¹² Kooloo lɛ je kpo kɛjɛ “ŋshɔ lɛ mli,” ni enɛ ji adesai ni efee hamahama lɛ ni adesai nɔyelii faa kpo kɛjɛɔ mli lɛ he okadi ni sa pɛpɛɛpɛ. (Yesaia 17:12, 13) Nɛkɛ kooloo nɛɛ je shishi akɛ eeefa kpo kɛaajɛ adesai ŋshɔ ni efee hamahama loo hoo lɛ mli yɛ Nimrod gbii lɛ amli tɔɔ (aaafee afii ohai 21 D.Ŋ.B.), beni Nu Afua lɛ sɛɛ nibii agbɛjianɔtoo ni teɔ shi woɔ Yehowa lɛ jie ehe kpo klɛŋklɛŋ lɛ. (1 Mose 10:8-12; 11:1-9) Shi yɛ Nuŋtsɔ lɛ gbi lɛ mli pɛ eyitsei kpawo lɛ mli naagbee nɔ lɛ ejie ehe kpo diɛŋtsɛ. Kadimɔ akɛ, drako lɛ ji mɔ ni “ŋɔ lɛ diɛŋtsɛ ehewalɛ lɛ kɛ emaŋtsɛsɛi lɛ kɛ hegbɛ kpeteŋkpele eha lɛ.” (Okɛto Luka 4:6 he.) Kooloo lɛ ji Satan maŋkwramɔŋ nibɔɔ yɛ adesai ateŋ. Satan ji “je nɛŋ lumɔ” lɛ diɛŋtsɛ.—Yohane 12:31.

Gbele Pilamɔ

13. (a) Mɛɛ oshara ba kooloo lɛ nɔ yɛ Nuŋtsɔ lɛ gbi lɛ shishijee mli? (b) Mɛni hewɔ kooloo muu lɛ fɛɛ na nɔ yɛ be mli ni akɛ gbele pilamɔ pila lɛ lɛ?

¹³ Nuŋtsɔ lɛ gbi lɛ shishijee mli tɔɔ, ni oshara ba kooloo lɛ nɔ. Yohane bɔ amaniɛ: “Ni mina eyitsei lɛ ateŋ ekome tamɔ nɔ ni epila gbele pilamɔ, ni atsa egbele pilamɔ lɛ, ni shikpɔŋ muu lɛ fɛɛ naa kpɛ amɛhe yɛ kooloo lɛ hewɔ.” (Kpojiemɔ 13:3) Nɛkɛ kuku nɛɛ kɛɔ akɛ apila kooloo lɛ yitso kome kɛ gbele pilamɔ, shi kuku 12 wieɔ tamɔ nɔ ni kooloo muu lɛ fɛɛ na nɔ lɛ. Mɛni hewɔ? Ojogbaŋŋ, kooloo lɛ yitsei lɛ fɛɛ baaa shikome. Kɛ eshɛ eko fɛɛ eko nɔ lɛ, eyeɔ gbɔmɛi lɛ anɔ nuŋtsɔmɛi asane, titri lɛ yɛ Nyɔŋmɔ webii lɛ anɔ. (Kpojiemɔ 17:10) No hewɔ lɛ, beni Nuŋtsɔ lɛ gbi lɛ jeɔ shishi lɛ, no mli lɛ yitso kome pɛ yɔɔ, kpawo nɔ lɛ, ni miiye lumɔ akɛ jeŋ hewalɛ. Gbele pilamɔ ni ba nakai yitso lɛ nɔ lɛ kɛ haomɔ kpele ba kooloo muu lɛ fɛɛ nɔ.

14. Mɛɛ be mli akɛ gbele pilamɔ lɛ pila lɛ, ni te asraafoi onukpa ko tsɔɔ bɔ ni enɛ sa Satan kooloo lɛ he lɛ mli eha tɛŋŋ?

¹⁴ Mɛni ji nakai gbele pilamɔ lɛ? Yɛ sɛɛ mli lɛ, abatsɛ enɛ akɛ klante naa pilamɔ, ni klante feɔ tawuu he okadi. Nɛkɛ klante naa pilamɔ nɛɛ, ni ba enɔ yɛ Nuŋtsɔ lɛ gbi lɛ shishijee mli lɛ, baanyɛ afee nɔ ni kɔɔ klɛŋklɛŋ jeŋ ta, ni fee Satan maŋkwramɔŋ kooloo lɛ butuu ni eshɔ enɔ fɛɛ nɔ yɛ edɛŋ lɛ he. (Kpojiemɔ 6:4, 8; 13:14) Niŋmalɔ Maurice Genevoix, ni eji asraafonyo nukpa yɛ nakai ta lɛ mli lɛ wie he akɛ: “Mɔ fɛɛ mɔ kpɛlɛɔ nɔ ni amɛyɔse akɛ yɛ adesai ayinɔsane be fɛɛ mli lɛ, be loo gbii fioo ko pɛ ebafee nɔ ni he hiaa tamɔ August 2, 1914. Klɛŋklɛŋ lɛ Europa, kɛkɛ lɛ yɛ no sɛɛ lɛ, etamɔ nɔ ni adesai fɛɛ bana akɛ amɛkɛ amɛhe ewo nifeemɔ ko ni yɔɔ gbeyei ni amɛsumɔɔɔ mli. Kpeei, kpaŋmɔi, jeŋba he mlai, shishitoi lɛ fɛɛ hoso; abi nɔ fɛɛ nɔ he sane beni gbi kome boteɔ gbi kroko mli lɛ. Nɔ ni ba lɛ baateke henumɔŋ kɔkɔbɔi ni tsɔɔ efɔŋ ni baa kɛ gbɛkpamɔi ni shishinumɔi diɛŋtsɛ yɔɔ mli fɛɛ. Eda naakpa, eyɛ basaa, eyɛ gbeyei, ni egbalaa wɔ kɛnyiɛɔ esɛɛ lolo.”—Maurice Genevoix, Académie Française lɛ mli nyo, ni atsɛ wiemɔ nɛɛ yisɛɛ kɛjɛ wolo ni ji Promise of Greatness (1968) lɛ mli.

15. Te fee tɛŋŋ ni kooloo lɛ yitso ni ji kpawo lɛ na egbele pilamɔ lɛ?

¹⁵ Nakai ta lɛ ji oshara kpeteŋkpele kɛha nakai kooloo lɛ yitso kpawo lɛ ni yeɔ nɔ lɛ. Britania kɛ Europa maji lɛ ekomɛi laaje amɛ obalaŋtai babaoo yɛ gbele mli. Yɛ ta lɛ ekome pɛ mli, ni ji nɔ ni amɛtsɛ lɛ Battle of the River Somme ni awu yɛ 1916 lɛ, Ŋleshi asraafoi ni gboi lɛ shɛɔ 420,000, ni French asraafoi 194,000, kɛ Germany asraafoi 440,000 hu gboi—mɛi ni gboi lɛ fa fe 1,000,000! Yɛ shika gbɛfaŋ hu lɛ, Britania—kɛ Europa fɛɛ—fee butuu. Ŋleshi Maŋtsɛyeli kpeteŋkpele lɛ hoso yɛ nɛkɛ atswɛrɛ nɛɛ shishi ni ehiɛ tserɛko lɛ jogbaŋŋ lolo. Yɛ anɔkwale mli lɛ, nakai ta, ni jeŋmaji 28 kɛ amɛhe wo mli lɛ ha jeŋ muu lɛ fɛɛ hoso tamɔ nɔ ni ama lɛ atswɛrɛ ko ni gbeɔ mɔ. Yɛ August 4, 1979, Jeŋ Ta I lɛ fɛmɔ sɛɛ afii 65 pɛpɛɛpɛ lɛ, adafitwaa wolo ni ji The Economist ni akalaa yɛ London, Ŋleshi Abolotsiri lɛ wie enɛ: “Afi 1914 mli ni je lɛ laaje bɔ ni eŋmɛɔ pɛpɛɛpɛ lɛ ni enyɛko edamɔ shi nakai dɔŋŋ kɛbashi bianɛ.”

16. Mɛɛ gbɛ nɔ U.S. Amerika tsɔ etsɔɔ akɛ eji jeŋ hewalɛ ni bɔ he enyɔ lɛ fa yɛ klɛŋklɛŋ jeŋ ta lɛ mli?

¹⁶ Yɛ nakai beaŋ nɔŋŋ lɛ, Ta Kpeteŋkpele lɛ, taakɛ atsɛ lɛ lɛ, gbele gbɛ koni U.S. Amerika ate shi akɛ Anglo-Amerika Jeŋ Hewalɛ lɛ fa ni ale lɛ jogbaŋŋ. Bɔ ni gbɔmɛi baasusu ehe aha hewɔ lɛ, U.S. Amerika tsi ehe kɛjɛ ta lɛ mli yɛ ta lɛ shishijee afii lɛ amli. Shi taakɛ yinɔsaneŋmalɔ Esmé Wingfield-Stratford ŋma lɛ, “fɛɛ damɔ kɛji akɛ yɛ amanehulu ni fe fɛɛ be nɛɛ mli lɛ, Britania kɛ U.S. Amerika baaŋmɛɛ mligbalamɔ ni ka amɛteŋ lɛ he koni amɛnine ashɛ amɛ ekomefeemɔ ni fe fɛɛ lɛ nɔ ni amɛbaa nɔ ni akɛwo amɛdɛŋ lɛ yi.” Taakɛ nibii ba ha lɛ, amɛfee nakai. Yɛ 1917 mli lɛ, U.S. Amerika kɛ eshika kɛ ehewalɛ ye bua Maji ni Efee Ekome ni nine heɔ anyɛ shi yɛ ta lɛ mli lɛ. No hewɔ lɛ yitso ni ji kpawo lɛ, ni feɔ Britania kɛ U.S. Amerika lɛ bafee fa ni ye kunim.

17. Mɛni ba Satan shikpɔŋ nɔ gbɛjianɔtoo lɛ nɔ yɛ ta lɛ sɛɛ?

¹⁷ Ebasoro ta lɛ sɛɛ je lɛ kwraa. Eyɛ mli akɛ gbele pilamɔ lɛ eha Satan shikpɔŋ nɔ gbɛjianɔtoo lɛ efee butuu moŋ, shi ena hewalɛ ekoŋŋ, ni ehe bawa kwraa fe be fɛɛ, no hewɔ lɛ enɛ ha adesai jie eyi yɛ ehewalɛ ni eku sɛɛ ena ekoŋŋ lɛ hewɔ.

18. Te aaafee tɛŋŋ akɛɛ akɛ adesai fɛɛ “anaa kpɛ amɛhe yɛ kooloo lɛ hewɔ”?

¹⁸ Yinɔsaneŋmalɔ Charles L. Mee, Jr., ŋma akɛ: “Gbɛjianɔtoo momo lɛ shigbeemɔ [ni klɛŋklɛŋ jeŋ ta lɛ kɛba] lɛ ji sane ni he hiaa ni tsɔ heyeli ni gbɛ eshwa, maji kɛ kui heei ni aha amɛye amɛhe, kɛ heyeli heei ni akɛha lɛ hiɛ.” Nɔ ni nyiɛ hiɛ yɛ ta lɛ sɛɛ nibii ni ba nɛɛ mli ji kooloo lɛ yitso ni ji kpawo lɛ, ni agbɛnɛ atsa epilamɔ lɛ, kɛ United States, Amerika, ni ba ebatsɔ mɔ ni ale lɛ waa yɛ jeŋ fɛɛ lɛ. Jeŋ hewalɛi ni bɔ he enyɔ lɛ nyiɛ hiɛ ni ato Jeŋmaji Akpaŋmɔ lɛ kɛ Jeŋmaji Ekomefeemɔ lɛ. Beni shɛɔ afi 2005 lɛ, no mli lɛ U.S. Amerika maŋkwramɔŋ hewalɛ lɛ enyiɛ maji ni amɛtee hiɛ lɛ ahiɛ ni amɛkɛna shihilɛ ni nɔ kwɔ, yɛ helai ni awuɔ ashiɔ lɛ mli, kɛ tsɔnei ahe nilee ni yaa hiɛ lɛ hu mli. Ekɛ hii 12 etee nyɔŋtsere lɛ nɔ po. Belɛ ebɛ naakpɛɛ mɔ akɛ “shikpɔŋ muu lɛ fɛɛ naa kpɛ amɛhe yɛ kooloo lɛ hewɔ” lɛ.

19. (a) Adesai etee nɔ kɛteke amɛnaa ni kpɛɔ amɛhe yɛ kooloo lɛ he lɛ yɛ mɛɛ gbɛ nɔ? (b) Namɔ yɔɔ hegbɛ ni ŋwanejee ko bɛ he yɛ shikpɔŋ nɔ maŋtsɛyelii fɛɛ nɔ, ni te wɔfeɔ tɛŋŋ wɔleɔ enɛ? (d) Satan kɛ hegbɛ loo hewalɛ haa kooloo lɛ yɛ mɛɛ gbɛ nɔ, ni te enɛ saa adesai ateŋ mɛi ni fa lɛ ahe ehaa tɛŋŋ?

¹⁹ Adesai po etee nɔ kɛteke amɛnaa ni kpɛ amɛhe kɛ yijiemɔ ni amɛkɛhaa kooloo nɛɛ, taakɛ Yohane tsɔɔ yɛ enɛ sɛɛ lɛ: “Ni amɛja drako lɛ ni ŋɔ hegbɛ lɛ eha kooloo lɛ, ni amɛja kooloo lɛ amɛkɛɛ: Namɔ tamɔ kooloo lɛ, ni namɔ aaanyɛ ekɛ lɛ awuu?” (Kpojiemɔ 13:4) Beni Yesu yɔɔ shikpɔŋ nɛɛ nɔ lɛ, Satan kɛɛ akɛ eyɛ hegbɛ yɛ shikpɔŋ lɛ nɔ maŋtsɛyelii fɛɛ nɔ. Yesu ejeee enɛ he ŋwane; yɛ anɔkwale mli lɛ, lɛ diɛŋtsɛ ewie Satan he akɛ je nɛŋ nɔyelɔ ni ekpoo akɛ ekɛ ehe aaawo nakai be lɛ mli maŋkwramɔŋ saji amli. Yɛ sɛɛ mli lɛ Yohane ŋma yɛ anɔkwa Kristofoi lɛ ahe akɛ: “Wɔle akɛ wɔjɛ Nyɔŋmɔ mli, ni jeŋ muu lɛ fɛɛ ka mɔ fɔŋ lɛ mli.” (1 Yohane 5:19; Luka 4:5-8; Yohane 6:15; 14:30) Satan kɛ hewalɛ haa kooloo lɛ, ni edamɔɔ maŋhedɔɔ nɔ efeɔ enɛ. No hewɔ lɛ, ni adesai aaafee ekome moŋ yɛ suɔmɔ ni damɔ Nyɔŋmɔ gbeyeishemɔ nɔ lɛ, weku, wiemɔ, kɛ maŋ nɔ ni mɔ ko jɛ he henɔwomɔ egbala adesai amli. No hewɔ lɛ adesai ateŋ mɛi ni fa jaa kooloo lɛ fa ni yɔɔ hewalɛ yɛ shikpɔŋ ni amɛhiɔ nɔ lɛ nɔ lɛ. No hewɔ lɛ, ajieɔ kooloo muu lɛ fɛɛ yi ni ajaa lɛ.

20. (a) Gbɔmɛi jaa kooloo lɛ yɛ mɛɛ shishinumɔ naa? (b) Mɛni hewɔ Kristofoi ni jaa Yehowa Nyɔŋmɔ lɛ kɛ amɛhe wooo jamɔ ni tamɔ nɛkɛ ni akɛhaa kooloo lɛ mli lɛ, ni namɔ nɔkwɛmɔnɔ sɛɛ amɛnyiɛɔ?

²⁰ Ajaa lɛ yɛ mɛɛ shishinumɔ naa? Yɛ shishinumɔ akɛ akɛ suɔmɔ kɛha maŋ lɛ yeɔ suɔmɔ kɛha Nyɔŋmɔ hiɛ. Mɛi pii sumɔɔ maŋ ni afɔ amɛ yɛ mli lɛ. Akɛ maŋbii kpakpai lɛ, anɔkwa Kristofoi hu kɛ bulɛ haa amɛ nɔyelɔi kɛ maŋ ni amɛyɔɔ mli lɛ okadii, amɛboɔ mlai atoi, ni amɛyeɔ amɛbuaa akutsoŋ he ni amɛyɔɔ lɛ kɛ amɛkuuŋbii ahilɛ-kɛ-hamɔ. (Romabii 13:1-7; 1 Petro 2:13-17) Shi amɛnyɛŋ ni amɛtuu amɛhe amɛha maŋ ko ni amɛkɛ nakai feemɔ ate shi awo ekrokomɛi fɛɛ kɛkɛ. “Wɔ maŋ lɛ, eja jio, ejaaa jio” lɛ jeee Kristofoi atsɔɔmɔ. No hewɔ lɛ Kristofoi ni jaa Yehowa Nyɔŋmɔ lɛ nyɛŋ ni amɛkɛ amɛhe awo maŋhedɔɔ jamɔ kɛ henɔwomɔ ni akɛhaa kooloo lɛ fa ko kwraa mli, ejaakɛ nɔ ni enɛ baatsɔɔ ji drako lɛ—kooloo lɛ hegbɛ loo hewalɛ jɛɛhe lɛ jamɔ. Amɛnyɛŋ ni amɛkɛ yijiemɔ abi akɛ: “Namɔ tamɔ kooloo lɛ?” Shi moŋ, amɛnyiɛɔ Mikael—ni egbɛi lɛ shishi ji “Namɔ Tamɔ Nyɔŋmɔ?”—lɛ nɔkwɛmɔnɔ lɛ sɛɛ yɛ be mli ni amɛfiɔ jeŋ muu fɛɛ maŋtsɛ ni Yehowa ji lɛ sɛɛ lɛ. Kɛ be ni Nyɔŋmɔ eto lɛ shɛ lɛ, Mikael nɛɛ, ni ji Kristo Yesu, kɛ kooloo lɛ baawuu ni ebaaye enɔ kunim, taakɛ eye kunim beni eshwie Satan kɛjɛ ŋwɛi lɛ.—Kpojiemɔ 12:7-9; 19:11, 19-21.

Ta ni Awuɔ Ashiɔ Krɔŋkrɔŋbii Lɛ

21. Yɛ mɛɛ gbɛ nɔ Yohane tsɔɔ bɔ ni Satan kudɔɔ kooloo lɛ ehaa lɛ mli?

²¹ Satan ni hiɛ etɛ lɛ yɛ ŋaa ni etsɔ ni ebaatsɔ nɔ ekɛkudɔ kooloo lɛ koni efee esuɔmɔnaa nii. Yohane tsɔɔ enɛ mli akɛ: “Ni aha lɛ [kooloo ni hiɛ yitsei kpawo lɛ] naabu ni wieɔ wiemɔi wuji kɛ musubɔɔ wiemɔi, ni aha lɛ hegbɛ akɛ eka he nyɔji nyɔŋmai-ejwɛ kɛ enyɔ. Ni egbele enaabu ewie musubɔɔ wiemɔi eshi Nyɔŋmɔ, ni ewie egbɛi lɛ kɛ ebuu lɛ kɛ mɛi ni hiɔ ŋwɛi lɛ ahe musubɔɔ wiemɔi. Ni aha lɛ hegbɛ ni ekɛ krɔŋkrɔŋbii lɛ awuu ni eye amɛnɔ kunim; ni aha lɛ hegbɛ yɛ akutso fɛɛ akutso kɛ maŋ fɛɛ maŋ kɛ majianɔwiemɔi fɛɛ kɛ jeŋmaŋ fɛɛ jeŋmaŋ nɔ. Ni mɛi fɛɛ ni yɔɔ shikpɔŋ lɛ nɔ lɛ aaaja lɛ, mɛi ni aŋmako amɛgbɛii yɛ toobi ni agbe lɛ wala wolo lɛ mli kɛjɛ jeŋ shishijee lɛ.”—Kpojiemɔ 13:5-8.

22. (a) Mɛɛ be kpalaŋŋ nyɔji 42 lɛ kɔɔ he? (b) ‘Aye’ Kristofoi ni afɔ amɛ mu lɛ ‘nɔ kunim’ yɛ nyɔji 42 lɛ mli yɛ mɛɛ gbɛ nɔ?

²² Etamɔ nɔ ni nyɔji 42 ni atsi ta yɛ biɛ lɛ tamɔ afii etɛ kɛ fa ni emli ni akoloŋto bibioo lɛ ni jɛ Daniel gbalɛ lɛ mli kooloo lɛ ekome yiteŋ lɛ kɛhao krɔŋkrɔŋbii lɛ. (Daniel 7:23-25; kwɛmɔ Kpojiemɔ 11:1-4 hu.) No hewɔ lɛ, kɛjɛ 1914 naagbee mli aahu kɛmiibote 1918 mli, yɛ be mli ni jeŋmaji ni kɛ amɛhe wuɔ ta lɛ tserɛɔ amɛhe tamɔ kooloi lɛ, anyɛ nakai maji lɛ amli bii lɛ anɔ koni amɛja kooloo lɛ, ni amɛkɛ amɛhe awo maŋhedɔɔ jamɔ mli, ni amɛfee klalo po akɛ amɛaagboi amɛha amɛmaŋ lɛ. Nɛkɛ nɔnyɛɛ nɛɛ kɛ piŋmɔ babaoo ba mɛi ni afɔ amɛ mu lɛ ateŋ mɛi pii ni nu he akɛ amɛtoiboo ni kwɔ fe fɛɛ ji nɔ ni amɛfeɔ amɛhaa Yehowa Nyɔŋmɔ kɛ e-Bi Kristo Yesu lɛ anɔ. (Bɔfoi lɛ Asaji 5:29) Amɛkaai lɛ shɛ he ni kwɔ fe fɛɛ yɛ June 1918, beni ‘aye amɛ nɔ kunim lɛ.’ Yɛ U.S. Amerika lɛ, akɛ onukpai lɛ kɛ mɛi krokomɛi ni damɔ Buu Mɔɔ Asafo lɛ najiaŋ lɛ wo tsuŋ yɛ gbɛ ni ejaaa nɔ, ni atsi nyɛmimɛi Kristofoi nɛɛ ashiɛmɔ nitsumɔ ni ato he gbɛjianɔ lɛ naa babaoo. Akɛni eyɔɔ hegbɛ yɛ “akutso fɛɛ akutso kɛ maŋ fɛɛ maŋ kɛ majianɔwiemɔi fɛɛ kɛ jeŋmaŋ fɛɛ jeŋmaŋ nɔ” hewɔ lɛ, kooloo lɛ tsi Nyɔŋmɔ nitsumɔ lɛ naa yɛ jeŋ fɛɛ.

23. (a) Mɛni ji “toobi . . . lɛ wala wolo lɛ,” ni mɛni etee nɔ kɛjɛ 1918 ni miiba naagbee? (b) Mɛni hewɔ kunim ni Satan gbɛjianɔtoo ni anaa lɛ aaaye yɛ “krɔŋkrɔŋbii” lɛ anɔ lɛ ji kunimyeli folo lɛ?

²³ Enɛ tamɔ kunimyeli ko kɛha Satan kɛ egbɛjianɔtoo lɛ. Shi ekɛ sɛɛnamɔi ni sɛɛ tsɛɔ bahaaa amɛ, ejaakɛ mɔ ko bɛ Satan gbɛjianɔtoo lɛ mli ni aŋma egbɛi yɛ “toobi lɛ wala wolo lɛ mli.” Yɛ okadifeemɔ gbɛ nɔ lɛ, mɛi ni gbɛi yɔɔ nɛkɛ wolo nɛɛ mli lɛ ji mɛi ni kɛ Yesu yeɔ maŋtsɛ yɛ eŋwɛi Maŋtsɛyeli lɛ mli lɛ. Aŋma klɛŋklɛŋ gbɛii lɛ yɛ mli yɛ Pentekoste yɛ afi 33 Ŋ.B. Ni kɛjɛ afii ni nyiɛ sɛɛ kɛbaa nɛɛ amli lɛ, aŋmala gbɛii nɛɛ babaoo afata he. Kɛjɛ 1918 kɛbaa nɛɛ, Maŋtsɛyeli niyelɔi 144,000 lɛ mli shwɛɛnii lɛ anaasɔomɔ ji nɔ ni etee nɔ aahu koni agbe naa. Etsɛŋ, ni abaaŋmala amɛ fɛɛ amɛgbɛi yɛ Toobi lɛ wala wolo lɛ mli ni anyɛŋ atsumɔ. Shi mɛi ni teɔ shi woɔ ni amɛjaa kooloo lɛ, aŋmaŋ amɛteŋ mɔ kome folo po gbɛi yɛ nakai wolo lɛ mli. No hewɔ lɛ kunim ko ni mɛnɛɛmɛi aaaye yɛ “krɔŋkrɔŋbii” lɛ anɔ lɛ baafee nɔ ni sɛɛnamɔ ko baŋ he, nɔ ni hiɔ shi be fioo ko kɛkɛ.

24. Yohane tsɛɔ mɛi ni yɔɔ sɛɛyoomɔ lɛ akɛ amɛbo mɛni toi, ni mɛni wiemɔi ni amɛnu lɛ tsɔɔ kɛhaa Nyɔŋmɔ webii lɛ?

²⁴ Agbɛnɛ Yohane tsɛ mɛi ni yɔɔ nilee lɛ ni amɛbo toi jogbaŋŋ: “Kɛ mɔ ko yɛ toi lɛ, ha ni enu!” Kɛkɛ ni etee nɔ ni ekɛɛ akɛ: “Kɛ mɔ ko bua nomŋɔɔ nii anaa lɛ, lɛ hu aaaŋɔ lɛ nom; kɛ mɔ ko kɛ klante gbe mɔ lɛ, ja akɛ klante gbe lɛ. Biɛ krɔŋkrɔŋbii lɛ atsuishiŋmɛɛ lɛ kɛ hemɔkɛyeli lɛ yɔɔ.” (Kpojiemɔ 13:9, 10) Yeremia ŋma wiemɔi komɛi ni tamɔ enɛ yɛ afii ni tsɔ 607 D.Ŋ.B. hiɛ lɛ mli, koni ekɛtsɔɔ akɛ Yehowa kpaleŋ kɛjɛŋ kojomɔi ni ekɛbaa Yerusalem maŋ lɛ ni yeee anɔkwa lɛ nɔ lɛ he. (Yeremia 15:2; kwɛmɔ Yeremia 43:11; Zakaria 11:9 hu.) Yɛ be mli ni akaa lɛ babaoo lɛ, Yesu fee lɛ faŋŋ eha esɛɛnyiɛlɔi lɛ akɛ esaaa akɛ amɛŋmɛɔ saji ahe amɛkɛsaa: “Mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 26:52) Nakai nɔŋŋ hu amrɔ nɛɛ ni wɔyɔɔ Nuŋtsɔ lɛ gbi lɛ mli lɛ, esa akɛ Nyɔŋmɔ webii lɛ amɔ Biblia shishitoo mlai amli kpɛŋŋ. Naagbee foijee ko bɛ kɛha mɛi ni tsakeee amɛtsui ni jaa kooloo lɛ. Tsuishiŋmɛɛ he baahia wɔ fɛɛ, kɛ hemɔkɛyeli ni hosooo, bɔni afee ni wɔnyɛ wɔje yiwaai kɛ kaai ni jwere wɔhiɛ lɛ amli.—Hebribii 10:36-39; 11:6.

Kooloo ni Yɔɔ Akoloŋtoi Enyɔ Lɛ

25. (a) Te Yohane tsɔɔ okadi kooloo kroko ni pue yɛ je lɛ mli lɛ mli eha tɛŋŋ? (b) Akoloŋtoi enyɔ lɛ ni kooloo hee lɛ hiɛ lɛ kɛ shikpɔŋ ni efa kpo kɛjɛ lɛ tsɔɔ mɛni?

²⁵ Shi agbɛnɛ, kooloo kroko pue yɛ je lɛŋ. Yohane bɔ amaniɛ: “Ni mina kooloo kroko miije kpo kɛmiijɛ shikpɔŋ lɛ mli, ni eyɛ akoloŋtoi enyɔ tamɔ toobi, ni ewieɔ tamɔ drako. Ni etsuɔ klɛŋklɛŋ kooloo lɛ hegbɛ lɛ fɛɛ he nii yɛ ehiɛ, ni ehaa shikpɔŋ lɛ kɛ mɛi ni yɔɔ enɔ lɛ jaa klɛŋklɛŋ kooloo lɛ ni atsa egbele pilamɔ lɛ. Ni efeɔ okadii wuji, ni ehaa la po jɛɔ ŋwɛi baa shikpɔŋ yɛ gbɔmɛi ahiɛ.” (Kpojiemɔ 13:11-13) Nɛkɛ kooloo nɛɛ yɛ akoloŋtoi enyɔ, ni tsɔɔ maŋkwramɔŋ hewalɛi enyɔ ni efee ekome. Ni atsɔɔ mli akɛ eje kpo kɛjɛ shikpɔŋ, jeee kɛmiijɛ ŋshɔŋ. No hewɔ lɛ, ebaa kɛjɛɔ Satan shikpɔŋ nɔ nibii agbɛjianɔtoo ni ato ama shi momo lɛ mli. Esa akɛ efee jeŋ hewalɛ, ni yɔɔ shihilɛ mli momo, ni ŋɔɔ hegbɛ ko ni haa ayɔseɔ lɛ yɛ Nuŋtsɔ lɛ gbi lɛ mli.

26. (a) Mɛni ji kooloo ni hiɛ akoloŋtoi enyɔ lɛ, ni mɛɛ wekukpaa ka ekɛ shishijee kooloo lɛ teŋ? (b) Kooloo lɛ akoloŋtoi enyɔ lɛ tamɔ toobi nɔ yɛ mɛɛ shishinumɔ naa, ni “ewieɔ tamɔ drako” yɛ mɛɛ gbɛ nɔ? (d) Mɛni gbɔmɛi ni diɔ maŋhedɔɔ sɛɛ lɛ jaa diɛŋtsɛ lɛ, ni akɛ maŋhedɔɔ eto mɛni he? (Kwɛmɔ shishigbɛ niŋmaa lɛ.)

²⁶ Mɛni ji enɛ? Anglo-Amerika Jeŋ Hewalɛ lɛ—lɛ nɔŋŋ eji klɛŋklɛŋ kooloo lɛ yitso ni ji kpawo lɛ shi yɛ nitsumɔ krɛdɛɛ ko mli! Bɔ ni ajie lɛ akɛ esoro lɛ yɛ ninaa lɛ mli ni eji kooloo hu lɛ yeɔ ebuaa wɔ ni wɔnaa bɔ ni efeɔ enii yɛ heyeli mli yɛ je lɛ mli lɛ yɛ faŋŋ mli. Maŋkwramɔŋ hewalɛi enyɔ, ni yeɔ amɛhe, shi amɛfeɔ ekome lɛ feɔ nɛkɛ okadi kooloo ni hiɛ akoloŋtoi enyɔ nɛɛ. Ekoloŋtoi enyɔ “ni tamɔ toobi” nɔ lɛ tsɔɔ akɛ ejieɔ ehe kpo akɛ mɔ ni he jɔ ni taooo sane, ni yɔɔ nɔyeli ko ni hiŋmɛi egbele ni esa akɛ jeŋ muu fɛɛ atsɔ he kɛba he. Shi ewieɔ “tamɔ drako” kɛ shishinumɔ akɛ ekɛ nɔnyɛɛ kɛ hegbeyeiwoo kɛ awuiyeli po tsuɔ nii yɛ he fɛɛ he ni akpɛlɛɛɛ enɔyeli lɛ nɔ yɛ lɛ. Ewoko heshibaa ni aaafee aha Nyɔŋmɔ Maŋtsɛyeli lɛ yɛ Nyɔŋmɔ Toobi lɛ nɔyeli shishi lɛ he hewalɛ, shi moŋ ewoɔ Satan, drako kpeteŋkpele lɛ moŋ nibii ahe hewalɛ. Nɔ ni eha eba ji maŋhedɔɔ mligbalamɔi kɛ nyɛɛ ni tsɔɔ klɛŋklɛŋ kooloo lɛ jamɔ lɛ.c

27. (a) Mɛɛ su ni kooloo ni yɔɔ akoloŋtoi enyɔ lɛ hiɛ hewɔ ni akɛɔ akɛ ehaa la jɛɔ ŋwɛi baa shikpɔŋ nɔ lɛ? (b) Te gbɔmɛi pii susuɔ ŋmɛnɛŋmɛnɛ beaŋ kooloo ni hiɛ akoloŋtoi enyɔ lɛ he amɛhaa tɛŋŋ?

²⁷ Nɛkɛ kooloo ni yɔɔ akoloŋtoi enyɔ nɛɛ feɔ okadii wuji, ni ehaa la po jɛɔ ŋwɛi baa. (Okɛto Mateo 7:21-23 he.) Nɛkɛ naagbee okadi nɛɛ kaiɔ wɔ Elia, Nyɔŋmɔ blema gbalɔ lɛ ni kɛ Baal gbalɔi lɛ shi mple lɛ. Beni ekɛ Yehowa gbɛi tsɛ la kɛjɛ ŋwɛi yɛ omanyeyeli mli lɛ, ebaye odase ni ŋwanejee ko kwraa bɛ he akɛ eji anɔkwa gbalɔ, ni akɛ Baal gbalɔi lɛ ji amalelɔi. (1 Maŋtsɛmɛi 18:21-40) Taakɛ nakai Baal gbalɔi lɛ ji lɛ, nakai kooloo ni hiɛ akoloŋtoi enyɔ lɛ nuɔ he akɛ eyɛ nibii ni ekɛbaatsɔɔ akɛ gbalɔ ji lɛ. (Kpojiemɔ 13:14, 15; 19:20) Ekɛɔ akɛ ekpata nɔyeli hewalɛi ni haa efɔŋfeemɔ faa lɛ ahiɛ yɛ jeŋ tai enyɔ mli, ni éye Komunisim ni leee Nyɔŋmɔ lɛ hu nɔ kunim! Lɛlɛŋ, mɛi pii buɔ ŋmɛnɛŋmɛnɛ beaŋ kooloo ni hiɛ akoloŋtoi enyɔ nɛɛ fa ni yɔɔ lɛ akɛ mɔ ni buɔ heyeli he kɛ heloo gbɛfaŋ nibii kpakpai ajɛɛhe.

Kooloo lɛ Amaga

28. Mɛɛ gbɛ nɔ Yohane tsɔɔ yɛ akɛ kooloo ni yɔɔ akoloŋtoi enyɔ lɛ jeee nɔ ni leee efɔŋ taakɛ ekoloŋtoi ni tamɔ toobi nɔ lɛ baatsɔɔ lɛ?

²⁸ Ani nɛkɛ kooloo ni hiɛ akoloŋtoi enyɔ nɛɛ ji kooloo ni yɔɔ kpoo ni sane ko bɛ ehe tamɔ ekoloŋtoi enyɔ ni tamɔ toobi nɔ lɛ taoɔ atsɔɔ wɔ lɛ? Yohane tee nɔ ekɛɛ akɛ: “Ni ekɛ okadii ni ena hegbɛ akɛ efee yɛ kooloo lɛ hiɛ lɛ eshishiu mɛi ni yɔɔ shikpɔŋ lɛ nɔ lɛ, ni ekɛɔ mɛi ni yɔɔ shikpɔŋ lɛ nɔ lɛ akɛ amɛfee amaga amɛha kooloo lɛ ni yɔɔ klante naa pilamɔ ni ehiɛ ka lɛ. Ni aha lɛ hewalɛ ni ekɛ mumɔ aha kooloo lɛ amaga lɛ, koni kooloo lɛ amaga lɛ awie tete, ni ehaa agbeɔ mɛi fɛɛ ni jaaa kooloo lɛ amaga lɛ.”—Kpojiemɔ 13:14, 15.

29. (a) Mɛni ji kooloo lɛ amaga lɛ yiŋtoo, ni mɛɛ be mli ato nɛkɛ amaga nɛɛ ama shi? (b) Mɛni hewɔ kooloo lɛ amaga lɛ jeee amaga folo ni wala bɛ mli lɛ?

²⁹ Mɛni ji nɛkɛ “kooloo lɛ amaga” nɛɛ, ni mɛni ji eyiŋtoo? Yiŋtoo lɛ ji ni eha kooloo ni yɔɔ yitsei kpawo lɛ ni eji ehe amaga lɛ jamɔ ashwere, ni ji akɛ aha shihilɛ mli ni kooloo lɛ yɔɔ lɛ agbɛ ashwa. Ashɔ nɛkɛ amaga nɛɛ beni atsa kooloo ni yɔɔ yitsei kpawo lɛ klante pilamɔ lɛ, ni ji akɛ, yɛ klɛŋklɛŋ jeŋ ta lɛ sɛɛ. Ejeee amaga ko ni wala bɛ mli, tamɔ nɔ ni Nebukadnezar to ema Dura ŋa lɛ nɔ lɛ. (Daniel 3:1) Kooloo ni yɔɔ akoloŋtoi enyɔ lɛ mu wala mumɔ ewo nɛkɛ amaga nɛɛ mli koni amaga lɛ ahi wala mli ni efee nii yɛ jeŋ yinɔsane mli.

30, 31. (a) Yinɔsane mli anɔkwalei haa ayɔseɔ nɛkɛ amaga nɛɛ akɛ eji mɛni? (b) Ani agbe mɛi komɛi akɛni amɛkpoo akɛ amɛaaja nɛkɛ amaga nɛɛ hewɔ? Tsɔɔmɔ mli.

³⁰ Bɔ ni yinɔsane etee nɔ eha lɛ haa ayɔseɔ nɛkɛ amaga nɛɛ akɛ gbɛjianɔtoo ni Britania kɛ United States, Amerika to he gbɛjianɔ, amɛkɛba, ni amɛfi sɛɛ, ni ale lɛ kɛjɛ shishijee akɛ Jeŋmaji Akpaŋmɔ lɛ. Yɛ sɛɛ mli lɛ, yɛ Kpojiemɔ yitso 17 lɛ, ebaaje kpo yɛ okadi kroko shishi, akɛ kooloo ni tsuɔ tamɔ muneele ni yɔɔ wala mli ni muɔ ni yɔɔ shihilɛ mli diɛŋtsɛ. Nɛkɛ majimaji ateŋ kuu nɛɛ ‘wieɔ’ kɛ shishinumɔ akɛ epupuuɔ ehe ekɛɔ akɛ lɛ pɛ ji gbɛjianɔtoo ni baanyɛ ekɛ toiŋjɔlɛ kɛ shweshweeshwe shihilɛ abaha adesai. Shi yɛ anɔkwale mli lɛ, ebatsɔ he ni emli bii lɛ kpeɔ yɛ koni amɛsopa ni amɛjɛ amɛhe. Ekɛ jeŋmaji agbɛi ni aaafo mli loo ni akɛ amɛ naaa nɔ ko feemɔ kwraa woɔ maŋ fɛɛ maŋ loo gbɔmɛi ni kulaaa shi haaa ehegbɛ lɛ he gbeyei. Yɛ anɔkwale mli lɛ Jeŋmaji Akpaŋmɔ lɛ mlibii shwie jeŋmaji ni sumɔɔɔ akɛ amɛkpɛlɛɔ ejwɛŋmɔ lɛ nɔ lɛ kɛjɛ amɛteŋ. Kooloo nɛɛ amaga lɛ tawuu “akoloŋtoi” lɛ baatsu hiɛkpatamɔ nitsumɔ ko he nii yɛ amanehulu kpeteŋkpele lɛ shishijee mli.—Kpojiemɔ 7:14; 17:8, 16.

³¹ Kɛjɛ Jeŋ Ta II sɛɛ kɛbaa nɛɛ, kooloo lɛ he amaga lɛ—ni agbɛnɛ ejie ehe kpo akɛ Jeŋmaji Ekomefeemɔ gbɛjianɔtoo lɛ—egbe gbɔmɛi diɛŋtsɛ. Akɛ nɔkwɛmɔnɔ lɛ, yɛ 1950 lɛ, Jeŋmaji Ekomefeemɔ lɛ asraafoi lɛ kɛ amɛhe wo tawuu ni yaa nɔ yɛ North Korea kɛ South Korea teŋ lɛ mli. Jeŋmaji Ekomefeemɔ asraafoi lɛ kɛ South Korea asraafoi lɛ gbe North Korea kɛ China asraafoi ni kɛ abu naa lɛ eshɛɔ 1,420,000. Nakai nɔŋŋ hu kɛjɛ 1960 kɛyashi 1964 lɛ, Jeŋmaji Ekomefeemɔ lɛ asraafoi tsu nii yɛ Congo (Kinshasa). Agbɛnɛ, je lɛ hiɛnyiɛlɔi ni paapai Paul VI kɛ John Paul II fata he lɛ etee nɔ amɛma nɔ mi akɛ nɛkɛ amaga nɛɛ ji adesa naagbee hiɛnɔkamɔ kɛha toiŋjɔlɛ ni hi fe fɛɛ. Amɛmaa nɔ mi akɛ, kɛji akɛ adesai sɔmɔɔɔ enɛ lɛ, adesa weku lɛ baakpata lɛ diɛŋtsɛ ehiɛ. No hewɔ lɛ, amɛha agbe adesai ni kpoo akɛ amɛkɛ nɛkɛ amaga nɛɛ aaanyiɛ ni amɛja lɛ lɛ yɛ okadi gbɛ nɔ.—5 Mose 5:8, 9.

Kooloo lɛ Okadi Lɛ

32. Yohane tsɔɔ bɔ ni Satan kudɔɔ egbɛjianɔtoo ni anaa lɛ fa ni ji maŋkwramɔ nɔ lɛ koni amɛha Nyɔŋmɔ yoo lɛ seshibii ni eshwɛ lɛ apiŋ yɛ mɛɛ gbɛ nɔ?

³² Agbɛnɛ Yohane na bɔ ni Satan kudɔɔ egbɛjianɔtoo ni anaa lɛ maŋkramɔŋ fai lɛ koni eha Nyɔŋmɔ yoo lɛ seshibii ni eshwɛ lɛ ana amanehulu babaoo lɛ. (1 Mose 3:15) Etee nɔ ekoŋŋ etsɔɔ bɔ ni “kooloo” lɛ ji diɛŋtsɛ: “Ni ehaa mɛi fɛɛ, mɛi bibii kɛ mɛi wuji, niiatsɛmɛi kɛ ohiafoi, odehei kɛ nyɔji kpɛlɛɔ ni akadiɔ amɛ yɛ amɛninejurɔ aloo amɛhiɛŋtsei anɔ; ni mɔ ko nyɛɛɛ nɔ ko ahe aloo ehɔɔ, akɛ ja mɔ ni yɔɔ okadi lɛ aloo kooloo lɛ gbɛi lɛ aloo egbɛi lɛ yibɔ lɛ kɛkɛ. Biɛ nilee lɛ yɔɔ. Mɔ ni yɔɔ jwɛŋmɔ lɛ abu kooloo lɛ yibɔ lɛ he akɔntaa; ejaakɛ gbɔmɔ yibɔ ni; ni eyibɔ lɛ ji ohai ekpaa kɛ nyɔŋmai ekpaa kɛ ekpaa.”—Kpojiemɔ 13:16-18.

33. (a) Mɛni ji kooloo lɛ gbɛi? (b) Akɛ yibɔ okadi ni ji ekpaa lɛ toɔ mɛni he? Tsɔɔmɔ mli.

³³ Kooloo lɛ yɛ gbɛi, ni egbɛi lɛ ji yibɔ okadi: 666. Ekpaa ji yibɔ okadi ko ni akɛleɔ Yehowa henyɛlɔi. Filisti nuu ko ni hi Refaim lɛ ji nuu “nyenyereŋŋ ko” kɛ “eniji waobii ekpaa ekpaa kɛ enaji waobii ekpaa ekpaa.” (1 Kronika 20:6) Maŋtsɛ Nebukadnezar fee shika amaga ko ni elɛɛmɔ ji ninetalɔi 6 ni ekwɔlɛ ji ninetalɔi 60, koni ekɛha emaŋkwramɔŋ onukpai lɛ afee ekome yɛ jamɔ kome mli. Beni Nyɔŋmɔ tsuji kpoo akɛ amɛaaja shika amaga lɛ, maŋtsɛ lɛ ha ashɛrɛ amɛ awo la flɔnɔɔ mli. (Daniel 3:1-23) Yibɔ okadi ni ji ekpaa lɛ shɛɛɛ kpawo, ni damɔ shi kɛha emuuyeli yɛ Nyɔŋmɔ hiɛ lɛ. No hewɔ lɛ, ekpaa ni bɔ he toi etɛ lɛ tsɔɔ emuuyeli ni bɛ kwraa.

34. (a) Anɔkwale ni eji akɛ kooloo lɛ yibɔ okadi lɛ ji “gbɔmɔ yibɔ” lɛ tsɔɔ mɛni? (b) Mɛni hewɔ 666 ji gbɛi ni sa Satan je lɛ maŋkwramɔ gbɛjianɔtoo lɛ jogbaŋŋ lɛ?

³⁴ Gbɛi haa ayɔseɔ mɔ ko. No hewɔ lɛ mɛɛ gbɛ nɔ yibɔ okadi nɛɛ haa ayɔseɔ kooloo lɛ yɛ? Yohane kɛɔ akɛ eji “gbɔmɔ yibɔ,” jeee mumɔŋ gbɔmɔ, no hewɔ lɛ gbɛi lɛ yeɔ ebuaa wɔ ni emaa nɔ mi akɛ kooloo lɛ ji shikpɔŋ nɔ nɔ̃, ni damɔ shi kɛha adesa nɔyeli. Taakɛ bɔ ni ekpaa shɛɛɛ kpawo lɛ, nakai nɔŋŋ 666—ekpaa ni bɔ he toi etɛ lɛ—ji gbɛi ni sa kɛha jeŋ maŋkwramɔŋ gbɛjianɔtoo kpeteŋkpele lɛ ni anaaa Nyɔŋmɔ emuuyeli he tɛi ni efolɔ eshwie shi lɛ yɛ ehe kwraa lɛ. Je lɛŋ maŋkwramɔŋ kooloo lɛ yeɔ lumɔ yɛ yibɔ okadi gbɛi 666 lɛ shishi, yɛ be mli ni maŋkwramɔ wulu, jamɔ wulu, kɛ jarayeli nitsumɔ wulu yaa nɔ amɛhaa nakai kooloo lɛ hiɔ shi akɛ adesai ahaolɔ kɛ Nyɔŋmɔ webii lɛ ayiwalɔ lɛ.

35. Akɛ akɛ kooloo lɛ gbɛi aaakadi mɔ ko yɛ ehiɛnaa loo eninejurɔ nɔ lɛ tsɔɔ mɛni?

³⁵ Ni akɛ kooloo lɛ gbɛi aaakadi mɔ ko hiɛnaa loo eninejurɔ nɔ lɛ tsɔɔ mɛni? Beni Yehowa kɛ Mla lɛ ha Israel lɛ, ekɛɛ amɛ akɛ: “No hewɔ lɛ nyɛŋɔa miwiemɔi nɛɛ nyɛtoa nyɛtsuii amli kɛ nyɛsusumai amli, ni nyɛŋɔfee kaimɔ nii nyɛfimɔ nyɛniji ashi, ni amɛtsɔmɔ hiɛnaataramɔ nii yɛ nyɛhiŋmɛii ateŋ.” (5 Mose 11:18) Enɛ tsɔɔ akɛ esa akɛ Israelbii lɛ aha Mla lɛ ahi amɛhiɛ yɛ be fɛɛ mli, koni ena hewalɛ yɛ amɛnifeemɔi kɛ amɛsusumɔi anɔ. Awie akɛ aŋmala Tsɛ lɛ kɛ Yesu gbɛi yɛ 144,000 lɛ ni afɔ amɛ mu lɛ ahiɛŋtsei anɔ. Enɛ haa ayɔseɔ amɛ akɛ amɛji Yehowa Nyɔŋmɔ kɛ Yesu Kristo nii. (Kpojiemɔ 14:1) Yɛ amɛkasemɔ mli lɛ, Satan kɛ daimonioi akadimɔ nii ni yɔɔ kooloo lɛ he lɛ tsuɔ nii. Mɔ fɛɛ mɔ ni kɛ ehe ewo daa gbi nitsumɔi amli tamɔ nihemɔ kɛ nihɔɔmɔ lɛ, anyɛɔ enɔ koni efee nibii yɛ gbɛ ni kooloo lɛ feɔ lɛ lɛ nɔ, akɛ nɔkwɛmɔnɔ lɛ, yɛ gbijurɔyelii amli. Akpaa amɛ gbɛ akɛ amɛbaaja kooloo lɛ, ni amɛha eye lumɔ yɛ amɛshihilɛi amli, bɔni afee ni amɛnine ashɛ ekadimɔ nɔ lɛ nɔ.

36. Mɛɛ naagbai eba mɛi ni kpooɔ akɛ amɛaahe kooloo lɛ okadi lɛ anɔ?

³⁶ Mɛi ni kpooɔ akɛ amɛaahe kooloo lɛ okadi lɛ kɛ naagbai kpeɔ daa. Akɛ nɔkwɛmɔnɔ lɛ, kɛjɛ 1930 afii lɛ amli kɛbaa lɛ, ehe bahia ni amɛwuu tai babaoo yɛ saneyeli hei ni amɛŋmɛ amɛtsui shi yɛ asafoi yuu ni haoɔ amɛ kɛ yiwaa krokomɛi ashishi. Yɛ yiwalɛ nɔyelii amaji lɛ amli lɛ, ashɛrɛɔ amɛ awoɔ gbokɛlɛfoi aŋsraiaŋ, he ni amɛteŋ mɛi pii gboi yɛ. Kɛjɛ Jeŋ Ta II lɛ sɛɛ kɛbaa nɛɛ, obalaŋtai babaoo ena nɔ yɛ tsuŋwoi kakadaji amli, afeɔ mɛi komɛi niseniianii ni agbeɔ amɛ po, akɛni amɛkpoo akɛ amɛaaŋmɛɛ amɛ Kristofoi ahe ni amɛkɛwooo maŋ saji amli lɛ he lɛ hewɔ. Shikpɔji krokomɛi hu yɛ ni Kristofoi nyɛɛɛ ahe nii loo ni amɛaahɔɔ nii; amɛteŋ mɛi komɛi nyɛɛɛ ana amɛ diɛŋtsɛ amɛgboshinii; amɔmɔɔ mɛi komɛi ekaa naa akɛ amɛ wɔɔ, agbeɔ amɛteŋ mɛi komɛi, aloo anyiɛɔ amɛsɛɛ ni awoɔ amɛ foi kɛjɛɔ amɛ diɛŋtsɛ amɛmaŋ shikpɔŋ nɔ. Mɛni hewɔ? Ejaakɛ amɛkɛ henilee kpakpa kpooɔ akɛ amɛaahe maŋkwramɔ kuu wolo.d—Yohane 17:16.

37, 38. (a) Mɛni hewɔ je lɛ ebatsɔ he ko ni emli hilɛ wa waa kɛha mɛi ni kpooɔ akɛ amɛaahe kooloo lɛ okadi lɛ? (b) Namɛi hiɛɔ amɛ emuuyeli mli lɛ, ni amɛtswa amɛfai shi akɛ amɛbaafee mɛni?

³⁷ Shikpɔŋ lɛ nɔ hei komɛi yɛ ni bɔ ni jamɔ ehe shi yɛ amɛ akutsoŋ shihilɛ mli eha sɔŋŋ hewɔ lɛ, mɔ fɛɛ mɔ ni damɔɔ shi ehaa Biblia mli anɔkwale lɛ bafeɔ mɔ ni ewekumɛi kɛ tsutsu nanemɛi kpooɔ lɛ. Ebiɔ hemɔkɛyeli ni wa dani mɔ ko aŋmɛ etsui shi yɛ enɛ mli. (Mateo 10:36-38; 17:22) Yɛ jeŋ ni mɛi ni fa ji mɛi ni jaa heloo gbɛfaŋ ninamɔ, ni anɔkwa ni ayeee egbɛ eshwa lɛ, yɛ be babaoo mli lɛ, ebiɔ ni anɔkwa Kristofonyo lɛ kɛ ehe afɔ Yehowa nɔ kwraa akɛ E-baaye ebua lɛ ni enyiɛ gbɛ ni ja lɛ nɔ. (Lala 11:7; Hebribii 13:18) Yɛ jeŋ ni jeŋba shara ekpa mli fɛɛ nɛɛ mli lɛ, ebiɔ faishitswaa diɛŋtsɛ dani mɔ ko ahi shi akɛ mɔ ni he tse ni yɔɔ krɔŋŋ. Yɛ be babaoo mli lɛ, datrɛfoi kɛ helatsɛmɛi akwɛlɔi nyɛɔ Kristofoi ni he yeɔ lɛ anɔ koni amɛku Nyɔŋmɔ mla ni kɔɔ krɔŋkrɔŋ ni la ji lɛ he lɛ mli; ehe bahiaa ni amɛnyɛ amɛdamɔ famɔ ni saneyeli he kɛhaa ni teɔ shi woɔ amɛhemɔkɛyeli lɛ po naa. (Bɔfoi lɛ Asaji 15:28, 29; 1 Petro 4:3, 4) Ni yɛ nɛkɛ gbii ni mɛi ni naaa nitsumɔ atsu lɛ ayi faa yɛ mli nɛɛ, eefee nɔ ni wa yɛ be fɛɛ mli kɛmiiha anɔkwa Kristofonyo akɛ eeekpoo nitsumɔ ni baaha ekwa emuuyeli mli ni ehiɛɔ ehaa Nyɔŋmɔ lɛ tsumɔ.—Mika 4:3, 5.

³⁸ Hɛɛ, je lɛ ebatsɔ he ko ni wa kɛha mɛi ni bɛ kooloo lɛ okadi lɛ. Eji Yehowa hewalɛ kɛ jɔɔmɔ lɛ kpojiemɔ yɛ gbɛ ni ekaaa nɔ akɛ yoo lɛ seshibii ni eshwɛ lɛ, kɛ agbɛnɛ asafo babaoo lɛ mlibii fe akpekpei ekpaa lɛ aaaya nɔ ahiɛ amɛ emuuyeli mli yɛ nɔnyɛɛ ni akɛbaa amɛnɔ koni amɛku Nyɔŋmɔ mlai amli lɛ fɛɛ sɛɛ. (Kpojiemɔ 7:9) Eba akɛ wɔ fɛɛ wɔɔya nɔ wɔwo Yehowa kɛ ejalɛ gbɛi lɛ anɔ gojoo yɛ ekomefeemɔ mli yɛ shikpɔŋ muu lɛ fɛɛ nɔ, yɛ be mli ni wɔkpooɔ akɛ wɔɔhe kooloo lɛ okadi lɛ.—Lala 34:1-3.

[Shishigbɛ niŋmai]

[Mfoniri ni yɔɔ baafa 195]

Akɛ hegbɛ ha lɛ koni ekɛ wala aha kooloo lɛ amaga lɛ