Kpojiemɔ Kooloi Lɛ​—Mɛni Amɛtsɔɔ?

YƐ Hɔɔ June 15, 1985 lɛ, shwane hulu ko tso waa yɛ Jeŋmaji Ekomefeemɔ lɛ tsui ni yɔɔ New York lɛ nɔ. Taakɛ afɔɔ feemɔ lɛ, gbɔi babaoo eba ni amɛmiiba amɛbakwɛ tsu ni yɔɔ naakpɛɛ nɛɛ, ni amɛteŋ mɛi pii nyɛɛɛ ni amɛkɛ nibii ni amɛna ni feɔ amɛ fɛo lɛ ato.

Shi, yɛ he ni Jeŋmaji Ekomefeemɔ lɛ ebashɛ nɛɛ fɛɛ sɛɛ lɛ, eyɛ shɔŋŋ diɛŋtsɛ yɛ jeŋmaji lɛ ni eeefee amɛ ekome lɛ mli. Taakɛ bɔ ni gbɛtsɔɔlɔ ko ni kɛ mɛi kpaa shi yɛ jɛmɛ shwane lɛ tsɔɔ mli lɛ: “Kɛjɛ Jeŋ Ta II sɛɛ kɛbaa nɛɛ, awu tai sɔrɔtoi 150, ni agbe gbɔmɛi fe akpekpei 20. Jeŋ nɔyeli ko bako lolo. Ekolɛ enɛ ji nɔ ni bɛŋkɛ lɛ kpaakpa.” No hewɔ lɛ, ani jeŋ nɔyeli ji lamɔ ko ni lakaa mɔ kɛkɛ? Oheɔ oyeɔ jio oheee oyeee jio abaanyɛ ana hetoo lɛ kɛjɛ Apokalips loo Kpojiemɔ kooloi lɛ amlitaomɔ mli.

Biblia he wielɔi komɛi enaaa gbalɛ shishinumɔ ko ni yɔɔ dã Kpojiemɔ wolo lɛ mli kooloi lɛ ahe. Shi moŋ, amɛkɛtoɔ nibii ni ba yɛ be mli ni bɔfo Yohane yɔɔ shihilɛ mli lolo lɛ ahe. Akɛ nɔkwɛmɔ nɔ lɛ, The Catholic Encyclopedia, lɛ wie Apokalips loo Kpojiemɔ kooloi lɛ ahe akɛ: “Nɔ ni kpojiemɔ mli niŋmalɔi fɔɔ feemɔ ji . . . ni amɛkɛ amɛninaai lɛ afee gbalɛi ni amɛha tamɔ nɔ ko ni ba jeeŋmɔ.”

Shi bɔfo Yohane jaje akɛ: “Miyɛ mumɔ mli yɛ Nuŋtsɔ lɛ gbi lɛ nɔ.” (Kpojiemɔ 1:10) Hɛɛ, jeee yinɔsane ni eho Kpojiemɔ wolo lɛ gbalaa jwɛŋmɔ kɛyaa nɔ, shi moŋ, wɔsɛɛ be mli “gbi” yɛ be mli ni Nuŋtsɔ Yesu Kristo baaje shishi aye maŋtsɛ kɛjɛ ŋwɛi lɛ nɔ. Taakɛ Kpojiemɔ yitso 6 lɛ tsɔɔ lɛ, nɔ ni kadiɔ “Nuŋtsɔ lɛ gbi” lɛ ji jeŋ ta, hɔmɔ ni egbɛ eshwa, kɛ helai ni gbeɔ mɛi. Nibii ni aye he odase yɛ shikpɔŋ nɛɛ nɔ yɛ wɔ afii ohai 20 nɛɛ mli lɛ kɛ odaseyeli ni tsɔɔ mɔ yiŋ haa akɛ “Nuŋtsɔ lɛ gbi” lɛ mli wɔyɔɔ kɛjɛ 1914 kɛbaa nɛɛ.​—Kpojiemɔ 6:​1-8.a

Nakai yinɔsane afi lɛ mli Yesu Kristo je e-Maŋtsɛyeli nɔyeli shishi. (Kpojiemɔ 11:​15, 18) No hewɔ lɛ, Apokalips loo Kpojiemɔ kooloi lɛ baje kpo waa kɛjɛ nakai be lɛ sɛɛ kɛbaa. Yɛ anɔkwale mli lɛ, nɛkɛ kooloi nɛɛ feɔ Nyɔŋmɔ henyɛlɔi ni tsiɔ gbɔmɛi agbɛ koni amɛkɛ amɛhiɛ akafɔ Nyɔŋmɔ Maŋtsɛyeli lɛ nɔ akɛ gbɛjianɔtoo kome pɛ ni baaha adesai ni shweɔ toiŋjɔlɛ lɛ atsui anyɔ amɛmli lɛ ahe mfoniri. Nɔ ni fata nɛkɛ henyɛlɔi nɛɛ ahe ji drako ko kɛ kooloi etɛ. Nyɛhaa wɔpɛia mli taakɛ ato naa lɛ.

Drako kpeteŋkpele Lɛ

Yohane bo akɛ, “ni naa drako tsuru kpeteŋkpele ni yɔɔ yitsei kpawo kɛ akolontoi nyɔŋma.” Mɛni ji nɔ ni nɛkɛ drako kpeteŋkpele nɛɛ damɔ shi kɛha? Yohane diɛŋtsɛ tsɔɔ mli akɛ jeee mɔ ko mɔ ko akɛ Satan Abonsam pɛ ji mɔ ni edamɔ shi kɛha. Taakɛ Yohane ninaa lɛ tsɔɔ lɛ, nɛkɛ drako tsuru nɛɛ te shi wo Nyɔŋmɔ Ŋwɛi Maŋtsɛyeli lɛ fɔmɔ yɛ 1914. Mɛni jɛ mli ba? “Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo (naaflɔlɔ loo Abonsam) lɛ kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.”​—Kpojiemɔ 12:​3, 7-9.

Yohane tsɔɔ akɛ enɛ baasa adesai ahe waa. “Kpoo ha mɛi ni yɔɔ shikpɔŋ lɛ nɔ kɛ Ŋshɔ hiɛ lɛ! Ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.” (Kpojiemɔ 12:12) Eyɛ mli akɛ atsi enaa awo shikpɔŋ nɛɛ nɔ he ko moŋ, shi Satan ka he ekɛ ehe miiwo Nyɔŋmɔ Maŋtsɛyeli ni ato ama shi lɛ mli lolo. Efeɔ enɛ kɛtsɔɔ adesai ni eshishiuɔ amɛ lɛ kɛ kooloi etɛ ni ekɛ amɛ tsuɔ nii lɛ hu nɔ. Susumɔ bɔ ni Yohane tsɔɔ klɛŋklɛŋ nɔ̃ lɛ mli eha lɛ he.

Ŋshɔ Mli Kooloo Lɛ

“Ni mina kooloo ko miije kpo kɛmiijɛ ŋshɔ lɛ mli kɛmiiba ni eyɛ akolontoi nyɔŋma kɛ yitsei kpawo . . . ni kooloo ni mina lɛ tamɔ mlaŋtswi, ni enaji tamɔ oshishibrishi naji, ni enaabu tamɔ jata naabu. Ni drako lɛ ŋɔ lɛ diɛŋtsɛ ehewalɛ lɛ kɛ emaŋtsɛsɛi lɛ kɛ hegbɛ kpeteŋkpele eha lɛ.”​—Kpojiemɔ 13:​1, 2.

Mɛni he mfoniri kooloo ni he yɔɔ gbeyei nɛɛ feɔ? Yɛ mumɔ naa lɛ, Yohane tsɔɔ okadi ko ni yɔɔ naakpɛɛ: “Ni aha lɛ hegbɛ yɛ akutso fɛɛ akutso kɛ maŋ fɛɛ maŋ kɛ majianɔ wiemɔ fɛɛ kɛ jeŋmaŋ fɛɛ jeŋmaŋ nɔ.” (Kpojiemɔ 13:⁠7) Mɛni naa hewalɛ yɛ gbɔmɔ fɛɛ gbɔmɔ ni hiɔ shikpɔŋ nɔ lɛ nɔ? Nɔ kome pɛ: jeŋ fɛɛ maŋkwramɔ nɔyeli gbɛjianɔtoo lɛ. Ani nɛkɛ gbɛjianɔtoo nɛɛ nine shɛɔ hewalɛ nɔ kɛjɛɔ “drako” Satan Abonsam dɛŋ lɛlɛŋ? Biblia lɛ haa hetoo akɛ hɛɛ. Akɛ nɔkwɛmɔ nɔ lɛ, bɔfo Yohane kɛɛ: “jeŋ muu lɛ fɛɛ ka mɔfɔŋ lɛ hewalɛ mli.” Belɛ ebɛ naakpɛɛ mɔ akɛ yɛ be mli ni Satan, kaa Yesu yɛ ŋa lɛ nɔ lɛ, ekɛ “je nɛŋ maŋtsɛyeli nɛɛ fɛɛ” nɔ hewalɛ ha lɛ ni ebo akɛ: “Mi aŋɔ [hegbɛ nɛɛ] aha.”​—1 Yohane 5:​19; Luka 4:​5, 6.

Shi mɛni feɔ nakai yitsei kpawo lɛ ahe mfoniri? Akɛ kooloo kroko ni he yɔɔ gbeyei ni eji enɛ he amaga pɛpɛɛpɛ tsɔɔ lɛ. No hu hiɛ yitsei kpawo. Atsɔɔ mli akɛ́ akɛ nɛkɛ amaga nɛɛ yitsei kpawo lɛ damɔ shi kɛha “maŋtsɛmɛi kpawo” loo jeŋ hewalɛi ni “emli enumɔ egbee shi ni ekome yɛ, ni ekroko lɛ nako aba.” (Kpojiemɔ 17:​9, 10, NW) Jeŋ hewalɛi enumɔ pue yɛ Biblia yinɔsane mli dani Yohane gbi lɛ shɛ: Mizraim, Asiria, Babilon, Media kɛ Persia kɛ Hela. Roma, ni ji ekpaa lɛ yɛ hewalɛ mli lolo beni Yohane yɔɔ wala mli lɛ.

Mɛni ji yitso ni ji kpawo lɛ? Akɛni ninaa lɛ kɔɔ “Nuŋtsɔ lɛ gbi” lɛ he hewɔ lɛ, esa akɛ efee nɔ ni kɔɔ jeŋ hewalɛ ni bayeɔ Roma najiaŋ yɛ naagbee be ni je shishi kɛjɛ 1914 lɛ he. Yinɔsane jieɔ lɛ kpo akɛ no ji jeŋ hewalɛ ni bɔ he enyɔ ni feɔ Britania kɛ U.S. Amerika. Dani 1914 aaashɛ lɛ, no mli lɛ Britania etswa maŋtsɛyeli ko ni da fe fɛɛ yɛ jeŋ yinɔsane mli ema shi. Yɛ afii ohai 19 lɛ mli lɛ, ekɛ U.S. Amerika hu bote maŋsaneyeli mli ŋaatsɔɔ kɛ jarayeli kpaŋmɔi amli. Nɛkɛ maji enyɔ nɛɛ fee ekome amɛkɛwo Jeŋ Ta I kɛ II, ni wekukpaa krɛdɛɛ ni ka amɛteŋ lɛ etee nɔ aaahu kɛbashi ŋmɛnɛ. Yɛ afi 1982 mli lɛ, U.S. Maŋnɔkwɛlɔ Nukpa Reagan wie etsɔɔ Ŋleshi mlawoo gwabɔɔ lɛ yɛ “naanyobɔɔ ni ekaaa ni ka wɔmaji enyɔ nɛɛ ateŋ” lɛ he. Nyɛsɛɛ nɛɛ nɔŋŋ, yɛ February 1985 mli lɛ, Ŋleshi maŋnɔkwɛlɔ nukpa lɛ wie etsɔɔ U.S. Amerika Mlawoo Gwabɔɔ kui enyɔ lɛ ni ekɛɛ: “Eba akɛ heloo naa wekukpaa ni ka wɔmaji enyɔ nɛɛ teŋ lɛ aaaya hiɛ yɛ ekomefeemɔ mli shiŋŋ yɛ yiŋtoo kome mli, ni wɔkpa gbee yɛ hemɔkɛyeli mli yɛ be mli ni wɔbɛŋkɛɔ afii akpei etɛ yɛ Kristofoi abe mli lɛ he lɛ.”

Yɛ hewalɛ kpele ni enaa yɛ jeŋ saji amli hewɔ lɛ, afee Anglo-Amerika jeŋ hewalɛ ni bɔ he enyɔ lɛ he mfoniri kroko yɛ Kpojiemɔ wolo lɛ mli. Yɛ mɛɛ gbɛ nɔ? Kɛtsɔ Apokalips aloo Kpojiemɔ wolo lɛ mli kooloo ni ji enyɔ lɛ nɔ.

Shikpɔŋ Nɔ Kooloo Lɛ

Yohane ŋma akɛ, “Ni mina kooloo kroko miije kpo kɛmiijɛ shikpɔŋ lɛ mli, ni eyɛ akolontoi enyɔ tamɔ toobi ni ehiɛ tamɔ drako.” Akɛni okɛɔ akɛ eji Kristofonyo ni eteee shi ewooo mɔ ko hewɔ lɛ, Anglo-Amerika jeŋ hewalɛ lɛ feɔ ehe tamɔ toobi. Shi éfee nii tamɔ drako diɛŋtsɛ. Yɛ mɛɛ gbɛ nɔ, ejaakɛ eye jeŋmaji pii anɔ ni ekɛ hiɛjoomɔ eha shikpɔŋ lɛ nɔ nibii. Agbɛnɛ, “ehaa shikpɔŋ lɛ kɛ mɛi ni yɔɔ enɔ lɛ jaa klɛŋklɛŋ kooloo lɛ ni atsa egbele pilamɔ lɛ . . . Ni ekɛɔ mɛi ni yɔɔ shikpɔŋ lɛ nɔ lɛ akɛ amɛfee amaga amɛha kooloo lɛ.” (Kpojiemɔ 13:​3, 11-15) Enɛ ba mli yɛ mɛɛ gbɛ nɔ?

Akɛ “gbele pilamɔ” pila Satan jeŋ fɛɛ maŋkwramɔ gbɛjianɔtoo lɛ yɛ klɛŋklɛŋ jeŋ ta lɛ mli. Bɔni fee ni atsi nii ni tamɔ nɛkɛ gbɛ koni ekaba ekoŋŋ lɛ, Britania kɛ Amerika bi ni “ajá” maŋkwramɔ gbɛjianɔtoo lɛ. Amɛfee enɛ kɛtsɔ jeŋmaji lɛ ni amɛha “amɛfee amaga amɛha kooloo lɛ” nɔ. Te enɛ ba lɛ nakai eha tɛŋŋ?

Kɛmiiba klɛŋklɛŋ jeŋ ta lɛ naagbee lɛ, U.S. Amerika Maŋnɔkwɛlɔ Nukpa Wilson je tafaa ko shishi ni ekɛmiifi Jeŋmaji Akpaŋmɔ ni ato ehee lɛ sɛɛ. Yɛ enɛ hewɔ lɛ ekɛɛ mɛi ni bakpe yɛ “Paris Peace Conference” (Paris Toiŋjɔlɛ Kpee) ni afee yɛ 1919 lɛ shishi lɛ akɛ: “U.S. Amerika najiaŋdamɔlɔi miifi nɛkɛ gbɛjianɔtoo kpeteŋkpele ni ji Jeŋmaji Akpaŋmɔ lɛ sɛɛ. Wɔbuɔ enɛ akɛ nɔ titri ni tsɔɔ wɔyiŋtoo muu lɛ fɛɛ . . . yɛ ta nɛɛ mli . . . Wɔba biɛ koni wɔbakwɛ, ni yɛ kukufoo mli lɛ, ajie nɛkɛ tawuu nɛɛ shishitoo nɛɛ kɛya kwraa.”

Beni Maŋnɔkwɛlɔ Wilson gbe ewiemɔ lɛ naa lɛ, jeee mɔ ko mɔ ko akɛ Ŋleshi maŋsɔɔlɔ nukpa Lloyd George ji mɔni wie: “Mite shi akɛ miifi nɛkɛ yiŋkpɛɛ nɛɛ sɛɛ. Beni U.S. Amerika Maŋnɔkwɛlɔ Nukpa lɛ gbe ewiemɔ fɛfɛo lɛ naa pɛ kɛkɛ ni minu he akɛ ehe ehiaaa ni mɔ ko akɛɛ nɔ ko dɔŋŋ akɛ akɛmiifi nɛkɛ kpee nɛɛ yiŋkpɛɛ lɛ sɛɛ, ni mi . . . miijaje bɔni gbɔmɛi ni yɔɔ Ŋleshi Maŋtsɛyeli lɛ mli lɛ fiɔ nɛkɛ yiŋtoo nɛɛ sɛɛ amɛhaa lɛ miitsɔɔ.”

Yɛ sɛɛ mli yɛ nakai afi lɛ nɔŋŋ mli, yɛ kpee ko ni afee yɛ London koni akɛkpɛlɛ nɛkɛ Jeŋmaji Akpaŋmɔ nɛɛ nɔ lɛ shishi lɛ, kpee lɛ nine shɛ wolo ko nɔ kɛjɛ Ŋleshi Ablotsiri Maŋtsɛ lɛ ŋɔɔ ni kaneɔ akɛ: “Wɔye kunim yɛ ta lɛ mli. Eji nifeemɔ kpeteŋkpele. Shi enɛ faaa. Wɔwuu koni wɔnine ashɛ naanɔ toiŋjɔlɛ nɔ, ni eji wɔnitsumɔ ni fe fɛɛ akɛ wɔkwɛ ni wɔfee nii ni wɔkɛbaa yi. Yɛ enɛ hewɔ lɛ, nɔ ko nɔ ko bɛ ni he hiaa fe Jeŋmaji Akpaŋmɔ ni he wa ni baahi shi daa. . . . Miijie nifeemɔ nɛɛ yi miiha Maŋtsɛyeli lɛ mli gbɔmɛi fɛɛ ni yɔɔ tsuijurɔ koni amɛ yelikɛbuamɔ naa lɛ, wɔtswa toiŋjɔlɛ hefamɔ ni baawo Nyɔŋmɔ hiɛ nyam . . . wɔma shi.”

No hewɔ lɛ, ato Jeŋmaji Akpaŋmɔ le ama shi yɛ January 16, 1920 kɛ jeŋmaji sɔrɔtoi 42 ni feɔ emli bii. Beni shɛɔ 1934 lɛ, no mli lɛ emli bii nɛɛ ayifalɛ eyashɛ maji 58. Shikpɔŋ nɔ kooloo ni hiɛ akolontoi enyɔ lɛ eye omanye yɛ je lɛ ni eha “amɛfee amaga amɛha kooloo” lɛ mli. Nɛkɛ amaga nɛɛ aloo nɔ ni damɔ shi kɛha Satan jeŋ fɛɛ maŋkwramɔ gbɛjianɔtoo lɛ feɔ naagbee kooloo ni yɔɔ Apokalips loo Kpojiemɔ lɛ he mfoniri.

Kooloo Ni Tsuɔ

Bɔ ni Yohane tsɔɔ naagbee kooloo nɛɛ mli eha nɛ: “Kooloo ni tsuɔ tamɔ muneele . . . ni ehe eyi obɔ kɛ musubɔɔ gbɛi ni eyɛ yitsei kpawo kɛ akolontoi nyɔŋma.” Akɛɛ Yohane yɛ nɛkɛ kooloo nɛɛ he akɛ: “Kooloo ni ona lɛ yɛ, ni ebɛ, ni ebaajɛ bu kwɔŋkwɔŋ lɛ mli eje kpo kɛbaho hiɛkpatamɔ mli lɛ ji mɔ ni ji kpaanyɔ.” (Kpojiemɔ 17:​3, 8, 11) Bɔ ni atsɔɔ mli aha nɛɛ ji anɔkwale, ejaakɛ Jeŋmaji Akpaŋmɔ lɛ bɔ mɔdɛŋ akɛ eeefee enii tamɔ jeŋ hewalɛ yɛ je lɛ nɔ. Shi enyɛɛɛ etsi Jeŋ Ta II ni je shishi yɛ 1939 lɛ naa. Kooloo lɛ laaje, taakɛ eji lɛ, kɛtee bu kwɔŋkwɔŋ.

Ŋleshi kɛ Amerika jeŋ hewalɛ ni bɔ he enyɔ lɛ tsu nii waa yɛ Jeŋ Ta II be lɛ mli koni etee majimaji ateŋ gbɛjianɔtoo lɛ shi. Yɛ afi 1914 lɛ, Ŋleshi Ablotsiri maŋsɔɔlɔ nukpa Winston Churchill, kɛ Amerika Maŋnɔkwɛlɔ Nukpa Franklin Roosevelt kpe yɛ ŋshɔshiɛ lɛlɛ ko mli yɛ Atlantik ŋshɔ lɛ nɔ. Amɛjaje “amɛhiɛnɔkamɔi kɛha wɔsɛɛ be kpakpa kɛha je lɛ” kɛ “shweshweeshwe shihilɛ he gbɛjianɔtoo kpakpa ni da ni aaato ama shi daa he lɛ amɛtsɔɔ.” Yɛ afi ni nyiɛ sɛɛ lɛ yɛ Washington, D.C. lɛ, jeŋmaji 26 kpɛlɛ nɛkɛ Ŋleshi kɛ Amerika yiŋtoo nɛɛ nɔ ni amɛtsɛ lɛ akɛ “Jeŋmaji Ekomefeemɔ Jajemɔ.” No ni nyiɛ enɛ sɛɛ ba ji Jeŋmaji Ekomefeemɔ Gbɛjianɔtoo lɛ ni ato ama shi October 24, 1945. Kooloo ni tsuɔ lɛ efa kpo kɛjɛ bu kwɔŋkwɔŋ lɛ mli kɛ gbɛi hee. Amrɔ nɛɛ, jeŋmaji komekomei 159 kɛ amɛhe ebɔ nɛkɛ gbɛjianɔtoo ni amɛhiɛnɔkamɔ ji akɛ, eeeha adesa maŋkwramɔ nɔyeli gbɛjianɔtoo ashwere lɛ he.

Shi enɛɛmɛi fɛɛ shiɔ Nyɔŋmɔ Mesia Maŋtsɛyeli ni ato ama shi yɛ Ŋwɛi yɛ 1914 lɛ yɛ sane lɛ mli. Esa akɛ adesa fɛɛ adesa ni yɔɔ shikpɔŋ nɛɛ nɔ ahala Nyɔŋmɔ nɔyeli aloo gbɔmɔ nɔyeli. Etsɛŋ, kooloo ni tsuɔ lɛ kɛ adesa nɔyelii fɛɛ kɛ amɛhe baawo ta ni amɛkɛ Maŋtsɛ Yesu Kristo ni Nyɔŋmɔ eto lɛ baawu lɛ mli. Mɛni baajɛ mli aba? “Toobi lɛ [Yesu Kristo] baaye amɛnɔ kunim, ejaakɛ lɛ ji nuŋtsɔmɛi a-Nuŋtsɔ kɛ maŋtsɛmɛi a-Maŋtsɛ.” Hɛɛ, kooloo ni tsuɔ lɛ kɛ adesa nɔyeli gbɛjianɔtoo lɛ fɛɛ ‘baaya hiɛkpatamɔ mli.’​—Kpojiemɔ 17:​11, kwɛmɔ Daniel 2:44 hu.

Mɛɛ jɔɔmɔ enɛ aaaji akɛ mɔ ko haaa ni drako lɛ kɛ ekooloi etɛ lɛ alaka lɛ! Mɛi ni amɛjie amɛhe kpo akɛ Nyɔŋmɔ Maŋtsɛyeli lɛ shishibii anɔkwafo lɛ baaje mli ni amɛbaafee “shikpɔŋ hee” lɛ fa. Nyɔŋmɔ “baatsumɔ amɛhiɛaŋ yafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (2 Petro 3:​13; Kpojiemɔ 21:​3, 4) No hewɔ lɛ, ba ohe shi oha Nyɔŋmɔ Maŋtsɛyeli lɛ, nɔyeli kome pɛ ni baanyɛ atsu nɔ ko lɛ. Kɛkɛ lɛ bo hu, obaanyɛ ona hegbɛ ni ona nɛkɛ naanɔ jɔɔmɔi nɛɛ amli ŋɔɔmɔ.

[Shishigbɛ niŋmai]