‘Nyɔŋmɔ Kojomɔ Ŋmɛlɛtswaa Lɛ Eshɛ’
“Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ.”—KPOJIEMƆ 14:7
1. Mɛni fata Kpojiemɔ shishijee yitsei lɛ ahe?
GBALƐI ni yɔɔ miishɛɛ ni amɛbɛ mli yɛ wɔgbii nɛɛ amli yɔɔ Kpojiemɔ wolo lɛ mli. Nikasemɔ ni tsɔ enɛ hiɛ lɛ esusu ekomɛi ahe, ni nɔ ni fata he ji okadi wolo naasɔomɔi ekpaa ni agbele naa lɛ. Nɛkɛ wolo naasɔomɔi ni agbele naa nɛɛ jieɔ nɔ ni jɛɔ okpɔŋɔ nɔtaralɔi ni yɔɔ Kpojiemɔ lɛ mli baa ni kpataa nii ahiɛ yɛ nɛkɛ “naagbee gbii” nɛɛ mli lɛ kpo. (2 Timoteo 3:1; Kpojiemɔ 6:1-8) Amɛgbaa mɛi ni kɛ Kristo baaye maŋtsɛ yɛ ŋwɛi lɛ kɛ mɛi ni baaje “amanehulu kpeteŋkpele” lɛ mli ni amɛhi nɔ kɛya naanɔ lɛ he sane. Naasɔomɔi ekpaa lɛ tsɔɔ akɛ Nyɔŋmɔ “be ni eto kɛha kojomɔ hiɛkpatamɔ lɛ “ebɛŋkɛ.”—Kpojiemɔ 1:3; 7:4, 9-17.
2. Mɛɛ gbɛ nɔ abaatsɔ ni akɛ okadi tɛtrɛmaŋtɛrɛi kpawo ni yɔɔ Kpojiemɔ yitso 8 lɛ atsu nii yɛ?
2 Shi naasɔomɔ nɔ lɛ ekome eshwɛ, kpawo lɛ. Kpojiemɔ 8:2 gbaa wɔ nɔ ni jeɔ kpo ye be mli ni atse naa lɛ: “Ni mina bɔfoi kpawo lɛ ni damɔ Nyɔŋmɔ hiɛ lɛ, ni aŋɔ tɛtrɛmaŋtɛrɛi kpawo aha amɛ.” Kpo 8 Kuku 6 lɛ kɛɔ akɛ: “Ni bɔfoi kpawo Iɛ ni hiɛ tɛtrɛmaŋtɛrɛi kpawo lɛ saa amɛhe koni amɛkpa.” Yɛ Biblia bei amli lɛ, akɛ tɛtrɛmaŋtɛrɛi tsuɔ nii akɛtsɔɔ saji ni he hiaa. Yɛ nakai gbɛ nɔ nɔŋŋ hu lɛ, nɛkɛ tɛtrɛmaŋtɛrɛi kpawo nɛɛ gbalaa jwɛŋmɔ kɛyaa saji ni he hiaa tamɔ wala kɛ gbele yɛ wɔbei nɛɛ amli lɛ nɔ. Ni yɛ be mli ni ŋwɛibɔfoi kpaa tɛtrɛmaŋtɛrɛi nɛɛ lɛ, adesai ni ji Odasefoi ni yɔɔ shikpɔŋ nɔ lɛ nyiɛɔ sɛɛ ni amɛgbɛɔ saji ni he hiaa ni tɛtrɛmaŋtɛrɛi nɛɛ eko fɛɛ eko ni akpaa lɛ tsɔɔ lɛ amɛshwaa.
Nɔ Ni Tɛtrɛmaŋtɛrɛi Akpamɔi Lɛ Tsɔɔ
3. Mɛni ji tɛtrɛmaŋtɛrɛi kpawo lɛ kpamɔi lɛ ashishi?
3 Nɛkɛ tɛtrɛmaŋtɛrɛi akpamɔi nɛɛ kaiɔ wɔ haomɔi ni Yehowa fɔse eshwie blema Mizraim nɔ lɛ. Nakai haomɔi lɛ ji Yehowa kojomɔi ni ekɛba nakai klɛŋklɛŋ jeŋ hewalɛ lɛ kɛ epasajamɔ nɔ lɛ kpojiemɔ, ni amɛgbele gbɛ hu kɛha Nyɔŋmɔ webii lɛ afoijee. Nakai nɔŋŋ hu tɛtrɛmaŋtɛrɛi akpamɔi ni yɔɔ Kpojiemɔ lɛ ji ŋmɛnɛŋmɛnɛ beaŋ haomɔi, yɛ nɛkɛ be nɛɛ mli lɛ, eji haomɔi ni baa Satan jeŋ muu lɛ fɛɛ apasa jamɔ nɔ. Shi amɛjeee haomɔi diɛŋtsɛ, shi moŋ Yehowa kojomɔ saji lɛ amli haomɔi. Ni amɛtsɔɔ gbɛ ni Nyɔŋmɔ webii lɛ hu baatsɔ nɔ ni amɛjo foi loo amɛje mli.
4. Tɛtrɛmaŋtɛrɛi kpawo lɛ kpamɔ eba mli yɛ wɔbei nɛɛ amli yɛ mɛɛ gbɛ nɔ?
4 Nɔ ni kɛ nɛkɛ tɛtrɛmaŋtɛrɛi kpamɔi kpawo nɛɛ kpaa gbee lɛ, ato yiŋkpɛi ni mli wawai ni akɛshiɔ Satan je lɛ he gbɛjianɔ yɛ kpeei krɛdɛɛi kpawo ni aje gbɛ ato he gbɛjianɔ daa afi aha Yehowa webii kɛjɛ 1922 kɛbashi 1928 lɛ shishi. Aja yiŋkpɛi nɛɛ akpei ohai abɔ aha mɛi. Shi, nakai shɛɛ saji ni naa wa lɛ akpamɔ jeee nɔ ni tee nɔ yɛ nakai afii lɛ pɛ mli, shi moŋ etee nɔ aahu kɛbashi naagbee gbii nɛɛ amli. Ni ŋmɛnɛ, amɛjajemɔ lɛ naa ewa fe bei fɛɛ, ejaakɛ “asafo babaoo” lɛ ateŋ mɛi akpekpei abɔ kɛ amɛgbee efata mɛi ni afɔ amɛ mu lɛ akuu fioo ni je shiɛmɔ lɛ shishi yɛ Jeŋ Ta I sɛɛ lɛ anɔ lɛ he. (Kpojiemɔ 7:9) Amrɔ nɛɛ, daa afi lɛ, nɛkɛ akpekpei abɔ nɛɛ jajeɔ akɛ abu Satan je lɛ fɔ aha hiɛkpatamɔ kwraa, ni amɛkɛ gbee ni fa ni naa wa feɔ nakai.
5. Mɛni ji je lɛ “mlijaa etɛ mli ekome” ni fɔbuu kojomɔ baa enɔ klɛŋklɛŋ lɛ, ni mɛni hewɔ?
5 Klɛŋklɛŋ tɛtrɛmaŋtɛrɛi ejwɛ lɛ jije yɛ Kpojiemɔ 8:6-12. Afɔse nyɔŋmɔŋtɛi, la, kɛ lá ashwie shi, ni nɔ ni jɛ mli ba ji hiɛkpatamɔ kɛha je lɛ mli nibii lɛ “amlijaai etɛ mli ekome.” Mɛni hewɔ atsiɔ je lɛ “mlijaai etɛ mli ekome” ta akɛ nɔ ni yeɔ fɔ ni baa fɔbuu kojomɔ shishi klɛŋklɛŋ lɛ? Ejaakɛ yɛ be mli ni Satan nibii agbɛjianɔtoo lɛ fɛɛ ji nɔ ko ni Nyɔŋmɔ hiɔ loo enyaŋeɔ lɛ, efa ko yɛ ni fe nakai. Te nɔ ni ji? Fa ni kɛ Kristo gbɛi efɔ lɛ diɛŋtsɛ enɔ lɛ—Kristendom. Yɛ be mli ni akɛ Nyɔŋmɔ fɔbuu kojomɔi lɛ shi lɛ yɛ Jeŋ Ta I sɛɛ lɛ, no mli lɛ Kristendom yifalɛ aaafee adesai amlijaa etɛ mli ekome.
6. Mɛni hewɔ Yehowa ekpoo Kristendom koni akpata ehiɛ lɛ?
6 Kristendom jamɔ lɛ ji yibii ni afii 1,900 hemɔkɛyeli kwamɔ kɛmiijɛ anɔkwale Kristojamɔ he ni Yesu kɛ bɔfoi lɛ gba fɔ shi lɛ ewo. (Mateo 13:24-30; Bɔfoi lɛ Asaji 20: 29, 30) Kristendom osɔfoi lɛ kɛ amɛhe haa akɛ Kristojamɔ tsɔɔlɔi, shi amɛtsɔɔmɔi lɛ kɛ Biblia mli anɔkwalei lɛ teŋ jɛkɛ naakpa, ni amɛnifeemɔi ni ekpɔtɔ lɛ yaa nɔ ekɛ ahorabɔɔ baa Nyɔŋmɔ gbɛi lɛ nɔ. Aha amɛ la yi sɔ ni amɛye yɛ tai ni amɛfi sɛɛ afii ohai 20 nɛɛ mli lɛ eje kpo faŋŋ. Kristendom fata Satan nibii agbɛjianɔtoo lɛ he diɛŋtsɛ. No hewɔ lɛ, enine shɛɔ shɛɛ saji ni tamɔ haomɔi ni mli wawai anɔ kɛjɛɔ Yehowa ŋɔɔ ni tsɔɔ akɛ ŋwɛi duromɔ ko kwraa esaaa lɛ. Yehowa eshi Kristendom we lɛ eha hiɛkpatamɔ, taakɛ eshi Yudafoi lɛ awe lɛ yɛ klɛŋklɛŋ afii oha lɛ mli lɛ!—Mateo 23:38.
Awaje Amɛ Aba Jeŋ Muu Fɛɛ Shiɛmɔ
7, 8. (a) Mɛni ji nɔ ni tɛtrɛmaŋtɛrɛ kpamɔ ni ji enumɔ lɛ jieɔ lɛ kpo yɛ Kpojiemɔ yitso 9? (b) Baalabii lɛ feɔ namɛi ahe mfoniri?
7 Bɔfo ni ji enumɔ lɛ kpa etɛtrɛmaŋtɛrɛ lɛ yɛ Kpojiemɔ 9:1, ni ninaa lɛ jie ŋulami ko ni jɛ ŋwɛi miiba shikpɔŋ nɔ lɛ kpo. Nɛkɛ ŋulami nɛɛ hiɛ samfele yɛ edɛ. Ekɛ samfele nɛɛ gbele bu ko ni atsi baalabii babaoo naa awo mli lɛ naa. Nakai ŋulami lɛ ji Yehowa ŋwɛi Maŋtsɛ hee ni ewo lɛ ni ji Yesu Kristo. Baalabii lɛ ji Nyɔŋmɔ tsuji ni awa amɛ yi ni etamɔ nɔ ni aŋa amɛyi yɛ be mli ni awo amɛ hiɛnyiɛlɔi lɛ atsuŋ yɛ 1918 lɛ. Shi Kristo, ni eba Maŋtsɛyeli hewalɛ mli yɛ ŋwɛi agbɛnɛ lɛ jie amɛ bɔni afee ni amɛje amɛ jeŋ muu fɛɛ shiɛmɔ nitsumɔ lɛ shishi, ni osɔfoi lɛ ni ekpaŋ akɛ amɛaagbe amɛnitsumɔ lɛ ahiɛ fee amɛ yaa.—Mateo 24:14.
8 Atsɔɔ bɔ ni baalabii lɛ ji lɛ mli yɛ Kpojiemɔ 9:7: “Ni baalabii lɛ asubaŋ tamɔ okpɔŋɔi ni asaa kɛyaa ta, ni nɔ komɛi fimɔ amɛyitsei tamɔ shika akekrei, ni amɛhiɛaŋ tamɔ gbɔmɛi ahiɛaŋ.” Kpo 9 Kuku 10 lɛ kɛfataa he akɛ: “Ni amɛyɛ leei tamɔ nyɔŋmɔŋkaakroi.” Nɛkɛ baalabii nɛɛ feɔ Maŋtsɛyeli lɛ mli niyelɔi lɛ mli shwɛɛ nii ni awaje amɛ ni kɛ amɛhe ewo mumɔŋ tawuu mli ekoŋŋ kɛjɛ 1919 kɛbaa nɛɛ he mfoniri. Amɛkɛ hewalɛ hee miijaje Nyɔŋmɔ kojomɔi ni tsurɔɔ mɛi lɛ, titri lɛ amɛkɛmiishi Kristendom ni ekpɔtɔ lɛ.
9, 10. (a) Tɛtrɛmaŋtɛrɛ kpamɔ ni ji ekpaa lɛ jieɔ mɛni kpo? (b) Namɛi fataa okpɔŋɔi akpekpei abɔ ni he wa lɛ ahe?
9 Nɔ ni nyiɛ sɛɛ lɛ, bɔfo ni ji ekpaa lɛ kpa etɛtrɛmaŋtɛrɛ lɛ. (Kpojiemɔ 9:13) Enɛ jieɔ okpɔŋɔ nɔtaralɔi atai babaoo ko ni aŋmɛɛ amɛhe lɛ kpo. Kpo 9 Kuku 16 (New World Translation) lɛ kɛɔ akɛ amɛyibɔ ji “akpei nyɔŋmai enyɔ toi akpei nyɔŋma,” ni feɔ akpekpei 200! Ni atsɔɔ bɔ ni amɛji lɛ mli yɛ Kpo 9 kukuji 17 kɛ 19 akɛ: “Ni okpɔŋɔi lɛ ayitsei tamɔ jatai ayitsei, ni la kɛ lasu kɛ swɔɔ faa kɛjɛɔ amɛdaaŋ . . . Ni amɛleei lɛ tamɔ onufui.” Nɛkɛ tabilɔi nɛɛ kɛ hewalɛ nyiɛɔ Maŋtsɛ Kristo Yesu gbɛtsɔɔmɔ sɛɛ. Ni kwɛ bɔ ni amɛkwɛmɔ woɔ mɔ he gbeyei ehaa!
10 Mɛni ji nɔ ni nɛkɛ okpɔŋɔi ni he wa waa nɛɛ damɔ shi kɛha? Akɛni amɛyifalɛ boteɔ akpekpei amli hewɔ lɛ, amɛnyɛŋ amɛfee shwɛɛnii ni afɔ amɛ mu lɛ, ni amɛteŋ mɛi ni eshwɛ yɛ shikpɔŋ nɔ lɛ aaafee 8,800 pɛ lɛ. Esa akɛ “asafo babaoo” lɛ ni yɔɔ Kpojiemɔ yitso 7 lɛ, ni yɔɔ hiɛnɔkamɔ akɛ amɛaahi shi kɛya naanɔ yɛ shikpɔŋ nɔ lɛ afata nɛkɛ okpɔŋɔi akpekpei abɔ nɛɛ ahe. Yɛ Biblia mli lɛ, kɛ aawie wiemɔ “akpekpei abɔ” he lɛ, yɛ be babaoo mli etsɔɔ yibɔ ni da ni anyɛŋ akane. No hewɔ lɛ, jeee mɛi ni afɔ amɛ mu lɛ ni amɛyibɔ nɔ gboɔ lɛ pɛ fata nɛkɛ okadi okpɔŋɔi nɛɛ ahe, shi moŋ “asafo babaoo” loo “toi krokomɛi” lɛ ni amɛyibɔ shɛɔ akpekpei abɔ lɛ ni amɛyi faa ni amɛgbee mli wa, ni yaa nɔ yɛ nɛkɛ maŋshiɛmɔ nitsumɔ ni shwɛɛnii ni afɔ amɛ mu ni tamɔ baalabii lɛ je shishi lɛ hu fata he.—Yohane 10:16.
11. Mɛni hewɔ akɛɔ akɛ “okpɔŋɔi lɛ ahewalɛ yɛ amɛdaaŋ” lɛ, ni amɛkɛ ‘amɛleei lɛ feɔ efɔŋ’ yɛ mɛɛ gbɛ nɔ?
11 Kpojiemɔ 9:19 jaje akɛ: “Ejaakɛ okpɔŋɔi lɛ ahewalɛ yɛ amɛdaaŋ,” ni “amɛleei amɛkɛfeɔ efɔŋ.” Amɛhewalɛ yɛ amɛdaaŋ yɛ mɛɛ gbɛ nɔ? No ji akɛ afii nyɔŋma-nyɔŋmai abɔ nɛ, ni atsɔ Teokrase Sɔɔmɔ Skul lɛ kɛ kpeei krokomɛi anɔ atsɔɔ Nyɔŋmɔ tsuji lɛ bɔ ni amɛkɛ hewalɛ ashiɛ ekojomɔ saji lɛ kɛ amɛnaabui amɛha. Ni mɛɛ gbɛ nɔ amɛtsɔɔ amɛkɛ amɛleei feɔ efɔŋ yɛ? No ji akɛ amɛja woji akpekpei toi akpei abɔ ni ajɛ Biblia lɛ mli aŋmala amɛha jeŋ fɛɛ, ni amɛshi shɛɛ saji ni tsurɔɔ Satan je lɛ yɛ amɛsɛɛ. Kɛha mɛi ni teɔ shi amɛwoɔ amɛ lɛ, nɛkɛ ŋwɛi tabilɔi nɛɛ ayifalɛ tamɔ akpekpei toi akpekpei abɔ diɛŋtsɛ.
12. Mɛni ji nɔ ni esa akɛ Okadi baalabii lɛ kɛ okpɔŋɔi lɛ aya nɔ afee, ni mɛni jɛɔ mli baa?
12 No hewɔ lɛ esa akɛ okadi baalabii lɛ kɛ okpɔŋɔi lɛ ajaje Nyɔŋmɔ kojomɔ saji lɛ yɛ faŋŋ mli ni enaa awa yɛ be mli ni egbi ni ji oweletɔɔ gbi lɛ bɛŋkɛɔ lɛ. Kɛha mɛi ni yɔɔ tsuijurɔ lɛ, nakai saji lɛ ji saji kpakpai ni fe fɛɛ yɛ shikpɔŋ nɔ. Shi kɛha mɛi ni sumɔɔ Satan je lɛ, amɛji saji gbohii, ejaakɛ nɔ ni amɛtsɔɔ ji akɛ etsɛŋ ni abaakpata amɛje lɛ hiɛ.
13. “Kpoo ni ji etɛ” ni fata tɛtrɛmaŋtɛrɛ kpamɔ ni ji kpawo lɛ he lɛ kɔɔ mɛni he, ni eji “kpoo” yɛ mɛɛ gbɛ nɔ?
13 Atsɔɔ akɛ baalabii ni haoɔ mɔ lɛ kɛ okpɔŋɔi akpekpei abɔ lɛ ji ŋwɛi “kpoo” sɔrɔtoi etɛ ni afa akɛ eba lɛ mli klɛŋklɛŋ nɔ kɛ nɔ ni ji enyɔ. (Kpojiemɔ 9:12; 11:14) Mɛni ji “kpoo ni ji etɛ” lɛ? Akɛɔ wɔ yɛ Kpojiemɔ 10:7 akɛ: “Shi moŋ bɔfo ni ji kpawo lɛ gbee lɛ gbii lɛ amli lɛ, . . .no lɛ agbe Nyɔŋmɔ teemɔŋ sane lɛ hu naa, bɔ ni ejaje sanekpakpa lɛ etsɔɔ lɛ diɛŋtsɛ etsuji ni ji gbalɔi lɛ.” Nɛkɛ teemɔŋ sane nɛɛ kɔɔ “seshi” lɛ ni awo shi yɛ ehe klɛŋklɛŋ yɛ Eden lɛ he. (1 Mose 3:15) Nakai “seshi” lɛ titri ji Yesu, shi ehefatalɔi ni afɔ amɛ mu ni kɛ lɛ baaye maŋtsɛ yɛ ŋwɛi lɛ hu fata he. No hewɔ lɛ teemɔŋ sane lɛ kɔɔ Nyɔŋmɔ ŋwɛi Maŋtsɛyeli lɛ he. Nɛkɛ Maŋtsɛyeli nɛɛ kɛ ŋwɛi yiŋtoo he “kpoo” ni ji etɛ nɛɛ baaba, ejaakɛ ebaatsu Nyɔŋmɔ fɔbuu kojomɔi ahe nii eshi Satan je lɛ kɛgbe naa kwraa.
Ato Maŋtsɛyeli Lɛ Ama Shi
14. Tɛtrɛmaŋtɛrɛ kpamɔ ni ji kpawo lɛ ni yɔɔ Kpojiemɔ 11:15 lɛ tswaa mɛni he adafi?
14 Kɛkɛ ni eba mli! Kpojiemɔ 11:15 kɛɔ akɛ: “Ni bɔfo ni ji kpawo lɛ kpa, ni anu gbee wuji yɛ ŋwɛi miikɛɛ akɛ: Je nɛŋ maŋtsɛyeli lɛ etsɔ wɔ-Nuŋtsɔ lɛ [Yehowa] kɛ E-Kristo (Mɔ ni efɔ lɛ mu) lɛ nɔ, ni eeeye maŋtsɛ kɛaatee naanɔi anaanɔ.” Hɛɛ, atswa he adafi akɛ ato Nyɔŋmɔ Maŋtsɛyeli kɛtsɔ Kristo nɔ lɛ ama shi yɛ ŋwɛi yɛ afi 1914. Ni beni awaje shwɛɛnii lɛ ekoŋŋ yɛ Jeŋ Ta I sɛɛ lɛ amɛha ale nɛkɛ sane nɛɛ.
15. Mɛɛ nifeemɔ kadi Maŋtsɛyeli shiɛmɔ kɛ hewalɛ hee yɛ 1922?
15 Beni Yehowa tsuji fee amɛ 1922 kpee lɛ yɛ Cedar Point, Ohio, U.S. Amerika lɛ, mɛi akpei abɔ ni ba lɛ nu adafitswaa ni yɔɔ miishɛɛ nɛɛ: “Gbii fɛɛ amli gbi lɛ nɛ. Naa, Maŋtsɛ lɛ miiye nɔ! Nyɛ ji enajiaŋdamɔlɔi ni tswaa ehe adafi. No hewɔ lɛ nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.” Enɛ tee Maŋtsɛyeli shiɛmɔ kpeteŋkpele ko shi ni nɔ ni fata he ji kojomɔi ni ŋwɛi bɔfoi kpawo ni hiɛ tɛtrɛmaŋtɛrɛi lɛ ekpa lɛ. Ŋmɛnɛ, Yehowa tsuji aaafee akpekpei etɛ kɛ fa ni yɔɔ asafoi fe 55,000 mli yɛ jeŋ fɛɛ lɛ kɛ amɛhe ewo nɛkɛ jeŋ muu fɛɛ Maŋtsɛyeli shiɛmɔ nɛɛ mli. Akpekpei abɔ lɛlɛŋ!
16. Mɛɛ nibii krokomɛi ni tee nɔ ni kɔɔ ŋwɛi kɛ shikpɔŋ he ni tɛtrɛmaŋtɛrɛ ni ji kpawo lɛ kpamɔ jie lɛ kpo anaa yɛ Kpojiemɔ yitso 12?
16 Shi ŋwɛi bɔfo ni ji kpawo lɛ yɛ babaoo ni ebaajie lɛ kpo. Kpojiemɔ 12:7 kɛɔ akɛ: “Kɛkɛ ni ta te shi yɛ ŋwɛi.” Kpo 12 Kuku 9 lɛ haa wɔ nɔ ni jɛ Kristo ni ji Maŋtsɛ lɛ nifeemɔ lɛ mli ba lɛ: “Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo (naafolɔlɔ loo Abonsam) kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi lɛ ashwie afata ehe.” Kpo 12 Kuku 12 kɛfataa he akɛ: “No hewɔ lɛ, nyɛ ŋwɛi kɛ nyɛ mɛi ni nyɛyɔɔ jɛi, nyɛnaa tsuijurɔ!” Hɛɛ, atsumɔ Satan hewalɛ lɛ kɛjɛ ŋwɛi kwraa, ni enɛ baafee nɔ ni ha ŋwɛi bɔfoi anɔkwafoi lɛ amli fili amɛ babaoo. Shi mɛni etsɔɔ kɛhaa adesai? Nakai kuku lɛ nɔŋŋ haa hetoo: “Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.”
17. Mɛni hewɔ jeŋ nɔyelii ni akɛ amɛ to “kooloo” he yɛ Kpojiemɔ yitso 13 lɛ sa jogbaŋŋ lɛ?
17 Kpojiemɔ 12:3 tsɔɔ bɔ ni Satan ji lɛ mli akɛ ‘drako kpeteŋkpele, kɛ eyitsei kpawo kɛ akoloŋtoi nyɔŋma,’ hiɛkpatalɔ ni tamɔ kooloo ni he yɔɔ gbeyei. Enɛ tsɔɔ akɛ lɛ ji mɔ ni to shikpɔŋ nɔ maŋkwramɔŋ “kooloo lɛ” ni atsɔɔ mli yɛ yitso 13, Kpo 13 kukuji 1 kɛ 2 lɛ ema shi. Nakai kooloo lɛ hu yɛ yitsei kpawo kɛ akoloŋtoi nyɔŋma, ni ekɛkaseɔ Satan. Kpo 13 Kuku 2 kɛɔ akɛ: “Ni drako lɛ [Satan] ŋɔ lɛ diɛŋtsɛ ehewalɛ lɛ kɛ emaŋtsɛsɛi lɛ kɛ hegbɛ kpeteŋkpele eha lɛ.” Ni aaatsɔɔ akɛ maŋkwramɔŋ nɔyelii lɛ tamɔ kooloo lɛ ja pɛpɛɛpɛ, ejaakɛ agbe gbɔmɛi fe akpekpei oha yɛ jeŋmaji lɛ atawuu mli yɛ afii ohai 20 nɛɛ pɛ mli.
18. Mɛni ji kooloo ni hiɛ akoloŋtoi enyɔ ni yɔɔ Kpojiemɔ 13:11 lɛ, ni enifeemɔi lɛ yeɔ buaa ni anaa lɛ jogbaŋŋ yɛ mɛɛ gbɛ nɔ?
18 Nɔ ni ba ni nyiɛ sɛɛ ni je kpo yɛ Kpojiemɔ 13:11 lɛ jieɔ nɔ ko kpo, taakɛ kuku 11 lɛ kɛɔ lɛ, “kooloo kroko miije kpo kɛmiijɛ shikpɔŋ lɛ mli, ni eyɛ akoloŋtoi enyɔ tamɔ toobi, ni ewieɔ tamɔ drako.” Nɛkɛ kooloo ni hiɛ akoloŋtoi enyɔ nɛɛ ji Ŋleshi kɛ Amerika maŋkwramɔŋ nɔyeli ni efee ekome lɛ. Etamɔ toobi, ni ji akɛ ekwaa efeɔ ehe mɔ ni gbaaa mɔ ko naa, nɔyeli ni hiŋmɛi egbele fe fɛɛ. Shi ewieɔ tamɔ drako, tamɔ Satan, ni atsɛɔ lɛ “kooloo kroko” ejaakɛ gbɛ ni etsɔɔ nɔ eyeɔ nɔ lɛ tamɔ kooloo. Enyɛɔ mɔ nɔ ni ewoɔ mɛi ahe gbeyei, ni ekɛ awuiyeli po tsuɔ nii kɛji akɛ akpɛlɛɛɛ gbɛ ni etsɔɔ nɔ eyeɔ nɔ lɛ nɔ lɛ. Ewooo hewalɛ koni aba he shi aha Nyɔŋmɔ Maŋtsɛyeli lɛ, shi moŋ, koni asɔmɔ Satan je lɛ. No hewɔ ni Kpo 14 kuku 14 kɛɔ akɛ: “Eshishiuɔ mɛi ni yɔɔ shikpɔŋ lɛ nɔ lɛ.”
19, 20. (a) Emuuyeli mli ni Yehowa tsuji hiɛ lɛ jieɔ mɛni kpo? (b) Te wɔfeɔ tɛŋŋ wɔleɔ akɛ shwɛɛnii ni afɔ amɛ mu lɛ baaye Satan je lɛ nɔ kunim kɛ̃?
19 Nɛkɛ jeŋ ni yɔɔ Satan nɔyeli shishi nɛɛ shishi ni aaahi lɛ wa waa kɛha mɛi ni jeee efa, ni amɛkɛ Yesu famɔ kɛha anɔkwale Kristofoi lɛ kpaa gbee lɛ. (Yohane 17:16) No hewɔ lɛ, eji Yehowa hewalɛ kɛ ejɔɔmɔ ni ekaaa lɛ kpojiemɔ akɛ etsuji ni yɔɔ jeŋ fɛɛ ŋmɛnɛ lɛ aaahiɛ amɛ emuuyeli mli ni amɛkɛ ekomefeemɔ aya nɔ ajie Yehowa kɛ ejalɛ gbɛ̀i lɛ ayi. Amɛfeɔ enɛ yɛ shitee-kɛ-woo kɛ yiwaa kɛ gbele ni mli wa lɛ po shishi.
20 Shwɛɛnii ni afɔ amɛ mu lɛ titri ji mɛi ni Satan etutua amɛ ejaakɛ amɛkɛ Kristo baaye maŋtsɛ yɛ ŋwɛi. Shi Kpojiemɔ yitso 14 tsɔɔ akɛ abua amɛyibɔ lɛ fɛɛ ni ji 144,000 lɛ naa yɛ kunimyeli mli kɛ Kristo yɛ Maŋtsɛyeli hewalɛ mli. Amɛkɛ anɔkwayeli ekpɛtɛ amɛ Nuŋtsɔ lɛ he, ejaakɛ taakɛ Kpo 14 kuku 4 lɛ kɛɔ lɛ: “Amɛnyiɛɔ Toobi lɛ sɛɛ kɛyaa he fɛɛ he ni eyaa lɛ”—yɛ yiwaa ni ehiii kwraa ni Satan kɛbaa amɛnɔ lɛ fɛɛ sɛɛ.
Nyɔŋmɔ Kojomɔi Lɛ Ni Nine Shɛɔ Nɔ Klɛŋklɛŋ
21, 22. (a) Mɛɛ adafi ŋwɛibɔfoi lɛ tswa yɛ Kpojiemɔ 14:7, 8? (b) Mɛni hewɔ ŋwɛibɔfo lɛ tswa jamɔ Babilon shigbeemɔ lɛ he adafi yɛ be mli ni eka he eyɛ shihilɛ mli lolo lɛ?
21 Bɔfo ko bo yɛ Kpojiemɔ 14:7 akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nu bui ni baa lɛ.” Namɛi Nyɔŋmɔ fɔbuu kojomɔi lɛ baa amɛnɔ klɛŋklɛŋ? Kpo 14 Kuku 8 haa hetoo: “Ni bɔfo kroko ni ji enyɔ nyiɛ sɛɛ ekɛɛ: Ejwa, Babilon maŋ kpeteŋkpele lɛ ejwa, ejaakɛ eha jeŋmaji fɛɛ enu ejwamaŋbɔɔ lɛ he mlifu daa lɛ eko.” Biɛ ji klɛŋklɛŋ be mli, shi jeee naagbee, ni Kpojiemɔ wieɔ “Babilon Kpeteŋkpele” ni ji jeŋ muu fɛɛ apasa jamɔ maŋtsɛyeli lɛ he.
22 Akɛni Nyɔŋmɔ jamɔ yaa nɔ enaa mɛi anɔ hewalɛ yɛ shikpɔŋ lɛ nɔ hei sɔrɔtoi hewɔ lɛ, mɛni hewɔ ŋwɛi bɔfo lɛ tswa adafi akɛ Babilon Kpeteŋkpele lɛ egbee shi momo lɛ? Ojogbaŋŋ, mɛni ba mli yɛ 539 D.Ŋ.B., beni blema Babilon gbee shi shi akpataaa ehiɛ kwraa lɛ? Yehowa tsuji ni yɔɔ nom mli lɛ ku amɛsɛɛ kɛtee amɛmaŋ no sɛɛ afii enyɔ ni amɛyasaa amɛtswa anɔkwale jamɔ amɛma shi! Yɛ nakai gbɛ nɔ nɔŋŋ lɛ, Nyɔŋmɔ tsuji ni asaa ato amɛ gbɛjianɔ ehee kɛba amɛsɔɔmɔ nitsumɔ kɛ mumɔŋ shweremɔ mli ni je shishi yɛ 1919 lɛ ji odaseyeli ni ka shi faŋŋ akɛ, yɛ 1919 mli lɛ, Babilon Kpeteŋkpele lɛ gbee ehi, ni nakai ji bɔ ni Yehowa naa lɛ. Kɛkɛ ni ebu lɛ fɔ yɛ jɛmɛ akɛ sɛɛ mli lɛ abaakpata ehiɛ.
23. (a) Aagba gbɛ aaha Babilon Kpeteŋkpele lɛ hiɛkpatamɔ yɛ mɛɛ gbɛ nɔ? (b) Mɛɛ gbalɛi krokomɛi abaasusu he yɛ Buu-Mɔɔ ni baanyiɛ enɛ sɛɛ aba lɛ mli?
23 Nɔ ni tsɔɔ ehiɛkpatamɔ kwraa ni baa lɛ hiɛ lɛ, wɔmiina akɛ ŋmɛnɛŋmɛnɛ beaŋ Babilon ebote haomɔ diɛŋtsɛ mli momo. Efitemɔ, jeŋba shara kwraa, anɔkwale ni eyeee kɛ maŋkwramɔŋ ni ekɛ ehe woɔ lɛ ji nɔ ko ni ana ni akpa he mama yɛ he fɛɛ he. Europa maji pii yɛ ni gbɔmɛi fioo ko pɛ yaa sɔlemɔ. Kwasafo maji pii yɛ ni buɔ jamɔ akɛ “ebɔɔ ni gbeɔ gbɔmɛi ajwɛŋmɔ.” Agbɛnɛ hu, ŋmɛnɛŋmɛnɛ beaŋ Babilon hiɛ eshwie shi yɛ mɛi fɛɛ ni Nyɔŋmɔ Wiemɔ lɛ mli anɔkwale lɛ he kumai yeɔ amɛ lɛ ahiɛ. No hewɔ lɛ, agbɛnɛ lɛ eemɛ, taakɛ eji lɛ, be mli ni abaakpata ehiɛ. Hɛɛ, “be ni ato lɛ eshɛ” kɛha nibii ni baahoso je lɛ ni baaba! Ni nikasemɔi ni baaje kpo yɛ Buu- Mɔɔ ni baanyiɛ enɛ sɛɛ aba lɛ mli lɛ baawie gbalɛi ni yɔɔ Kpojiemɔ lɛ ni kɔɔ jamɔ “ajwamaŋ” lɛ kɛ agbɛnɛ Satan nibii agbɛjianɔtoo muu lɛ fɛɛ hiɛkpatamɔ ni baa lɛ he lɛ he.
Te Obaaha Hetoo Oha Tɛŋŋ?
◻ Tɛtrɛmaŋtɛrɛi kpawo Iɛ akpamɔ ni jeɔ shishi yɛ Kpojiemo yitso 8 Iɛ tsɔɔ mɛni kɛha wɔbe nɛɛ?
◻ Mɛni hewɔ akɛ fɔbuu kojomo kojoɔ Kristendom klɛŋklɛŋ Iɛ?
◻ Te atsɔɔ shwɛɛnii ni afɔ amɛ mu Iɛ kɛ “asafo babaoo” Iɛ ashiɛmɔ nitsumɔ Iɛ mli yɛ Kpojiemɔ yitso 9 aha tɛŋŋ?
◻ Mɛni ji no ni adafi ni atswa yɛ Kpojiemɔ 11:15 lɛ tsɔɔ kɛhaa ŋwɛi kɛ shikpɔŋ?
◻ Taakɛ atsɔɔ mli yɛ Kpojiemɔ 14:8 Iɛ, te fee tɛŋŋ ni jamɔ Babilon gbee shi yɛ 1919, ni mɛni ji nɔ ni enɛ tsɔɔ kɛhaa Iɛ?