Yitso Nyɔŋma Kɛ Kpawo
“Babel Egbee Shi!”
1, 2. (a) Mɛni ji Biblia muu lɛ fɛɛ saneyitso, shi mɛɛ saneyitso bibioo ní he hiaa jeɔ kpo yɛ Yesaia wolo lɛ mli? (b) Te Biblia lɛ wie saneyitso ni kɔɔ Babilon shigbeemɔ he lɛ he eha tɛŋŋ?
ABAANYƐ akɛ Biblia lɛ ato lala ni ŋɔɔ ní wieɔ saneyitso titri ko he, kɛ saneyitsei bibii ní akɛfataa he bɔni afee ni eha sane muu lɛ mli akã shi faŋŋ lɛ he. Yɛ gbɛ ní tamɔ nakai nɔŋŋ nɔ lɛ, Biblia lɛ hu wieɔ saneyitso titri ko he—no ji maŋtsɛ ni Yehowa ji lɛ bembuu kɛtsɔ Mesia Maŋtsɛyeli nɔyeli lɛ nɔ. Ehiɛ saneyitsei krokomɛi hu ní he hiaa, ní jeɔ kpo yɛ be kɛ bei amli. Enɛɛmɛi ateŋ ekome ji Babilon shigbeemɔ lɛ.
2 Awie nakai saneyitso lɛ he yɛ Yesaia yitsei 13 kɛ 14 lɛ. Asaa awie he ekoŋŋ yɛ yitso 21 lɛ, kɛ shikome ekoŋŋ yɛ yitsei 44 kɛ 45 lɛ. Afii oha sɛɛ lɛ, Yeremia wie nakai saneyitso lɛ he babaoo, ni Kpojiemɔ wolo lɛ kɛba naagbee yɛ gbɛ ni yɔɔ gbeyei waa nɔ. (Yeremia 51:60-64; Kpojiemɔ 18:1–19:4) Ehe miihia ní Biblia kaselɔi fɛɛ ní kɛ hiɛdɔɔ susuɔ saji ahe lɛ aha amɛjwɛŋmɔ ahi Nyɔŋmɔ Wiemɔ lɛ saneyitso lɛ fã ni ji enyɔ ní he hiaa waa nɛɛ nɔ. Yesaia yitso 21 lɛ yeɔ ebuaa yɛ enɛ gbɛfaŋ, ejaakɛ ekɛ saji otii ni yɔɔ miishɛɛ ni kɔɔ nakai jeŋ hewalɛ lɛ shigbeemɔ ní agba afɔ̃ shi lɛ he lɛ haa wɔ. Sɛɛ mli lɛ, wɔbaana akɛ Yesaia yitso 21 lɛ maa Biblia mli saneyitso kroko ni he hiaa nɔ mi—ni eyeɔ ebuaa wɔ ní wɔsusu bɔ ni wɔhiɛ yɔɔ wɔhe nɔ akɛ Kristofoi ŋmɛnɛ lɛ he.
“Ninaa ko ní Mli Wa”
3. Mɛni hewɔ atsɛɔ Babilon akɛ “ŋshɔnaa ŋã lɛ,” ni mɛni he okadi nakai gbɛi lɛ feɔ yɛ ewɔsɛɛ be he?
3 Yesaia yitso 21 lɛ jeɔ shishi kɛ nɔ ko ni yɔɔ gbeyei ni baaba he okadi: “Ŋshɔnaa ŋã lɛ kojomɔ he gbalɛ: Bɔ ni wuoyigbɛ ahum tswaa huu lɛ, nakai ebaajɛ ŋã lɛ nɔ kɛ shikpɔŋ ko ní he yɔɔ gbeyei nɔ kɛba.” (Yesaia 21:1) Eufrate Faa lɛ jaa Babilon maŋ lɛ mli enyɔ, ni ebokagbɛ fã lɛ yajeɔ kpokpaa ni kã faai wuji enyɔ, ni ji Eufrate kɛ Tigris teŋ lɛ nɔ. Ekɛ ŋshɔ lɛ diɛŋtsɛ teŋ jɛkɛ fioo. Belɛ, mɛni hewɔ atsɛɔ lɛ “ŋshɔnaa ŋã lɛ” mɔ? Ejaakɛ tsutsu lɛ kulɛ Babilon kpokpaa lɛ nɔ yiɔ kɛ nu afua daa afi, ni etsɔɔ ŋmɔtɔ “ŋshɔ” ní lɛɛ agbo. Shi, Babilonbii lɛ nyɛ amɛye nɛkɛ nu babaoo ní jeɔ ŋã nɛɛ nɔ kɛtsɔ nu jɔɔi bibii kɛ nu jɔɔi wuji ní amɛgbála amɛshwie shi koni nu atsɔ mli lɛ nɔ. Amɛtsɔ ŋaalee nɔ amɛkɛ nui nɛɛ tsu nii akɛ gbɛjianɔtoo ní amɛkɛbuɔ maŋtiase lɛ he lɛ fã. Shi kɛlɛ, adesai anitsumɔ ko nyɛŋ ahere Babilon yiwala kɛjɛ ŋwɛi kojomɔ mli. Tsutsu lɛ eji ŋã kpalanaa—ni ebaatsɔ ŋã kpalanaa ekoŋŋ. Amanehulu ko kã ehiɛ kɛmiiba, eewo tamɔ ahum ní naa wa waa ní bei komɛi lɛ etswaa kɛtsɔɔ Israel, kɛjɛɔ ŋã kpalanaa ni nɔ yɔɔ gbeyei ni yɔɔ wuoyigbɛ lɛ nɔ lɛ.—Okɛto Zakaria 9:14 he.
4. Kpojiemɔ wolo lɛ mli ninaa ní kɔɔ “Babilon kpeteŋkpele lɛ” he lɛ kɛ saji ní kɔɔ “nui” kɛ “ŋã nɔ” he lɛ fataa he yɛ mɛɛ gbɛ nɔ, ni mɛni “nui” lɛ tsɔɔ?
4 Taakɛ wɔkase yɛ wolo nɛɛ Yitso 14 lɛ, blema Babilon yɛ ŋmɛnɛŋmɛnɛ beaŋ henɔ—“Babilon kpeteŋkpele lɛ,” jeŋ apasa jamɔ maŋtsɛyeli lɛ. Afee Babilon Kpeteŋkpele lɛ hu he mfoniri yɛ Kpojiemɔ wolo lɛ mli yɛ sane ni kɔɔ “ŋã nɔ” kɛ “nui” ahe lɛ gbɛfaŋ. Aŋɔ bɔfo Yohane kɛtee ŋã nɔ he ko koni akɛ Babilon Kpeteŋkpele lɛ ayatsɔɔ lɛ. Akɛɛ lɛ akɛ ‘eta nui babaoo nɔ,’ ni enɛ damɔ shi kɛha “maji kɛ asafoi kɛ jeŋmaji kɛ majianɔ wiemɔi.” (Kpojiemɔ 17:1-3, 5, 15) Mɛi babaoo asɛɛfimɔ ní apasa jamɔ náa lɛ ji gbɛ titri ní etsɔɔ nɔ ehiɔ shi, shi yɛ naagbee lɛ, nɛkɛ “nui” nɛɛ ebuŋ ehe. Taakɛ ehenɔ ni hi shi blema lɛ ji lɛ, ebaaba naagbee yɛ shwɛmfeemɔ, kpoomɔ, kɛ amaŋfɔfeemɔ mli.
5. Te fee tɛŋŋ ni Babilon baná gbɛi akɛ ‘nihalɔ’ kɛ ‘nifitelɔ’ lɛ?
5 Yɛ Yesaia gbii lɛ amli lɛ, no mli lɛ Babilon ebatsɔko jeŋ hewalɛ ní yeɔ nɔ, shi Yehowa tsɔ hiɛ ena akɛ kɛ́ ebe shɛ lɛ, ekɛ ehewalɛ lɛ baatsu nii yɛ gbɛ fɔŋ nɔ. Yesaia tee nɔ akɛ: “Ajie ninaa ko ní mli wa atsɔɔ mi: Hàlɔ lɛ miihà nii, fitelɔ lɛ miifite nii.” (Yesaia 21:2a) Yɛ anɔkwale mli lɛ, Babilon baahà jeŋmaji ní eyeɔ amɛnɔ kunim, ní Yuda fata he lɛ anii, ni ebaafite amɛ. Babilonbii lɛ baahà Yerusalem, ni amɛbaahà esɔlemɔwe lɛ mli nibii, ni amɛbaaŋɔ emli bii lɛ nom kɛya Babilon. Jɛmɛ ji he ni akɛ nomii ni bɛ yelikɛbuamɔ nɔ̃ nɛɛ baaye kɛ kutumpɔo, ni abaaye amɛhe fɛo yɛ amɛhemɔkɛyeli lɛ hewɔ, ni amɛnaŋ hiɛnɔkamɔ ko kwraa akɛ amɛbaaku amɛsɛɛ kɛba amɛmaŋ shikpɔŋ nɔ.—2 Kronika 36:17-21; Lala 137:1-4.
6. (a) Mɛɛ kɛ̃ɛmɔ Yehowa baaha esɛɛ afo? (b) Mɛɛ jeŋmaji agba afɔ̃ shi akɛ amɛbaatutua Babilon lɛ, ni te enɛ ba mli eha tɛŋŋ?
6 Hɛɛ, Babilon sa ‘ninaa ní mli wa’ nɛɛ jogbaŋŋ diɛŋtsɛ, ni enɛ baafee jaramɔ bei kɛha lɛ. Yesaia tee nɔ akɛ: “Elam ba! Media, baabɔ nsara owo ehe! Maha amɛkɛ̃ɛmɔ fɛɛ sɛɛ afo.” (Yesaia 21:2b) Mɛi ni nɛkɛ kutumpɔfoi amaŋtsɛyeli nɛɛ nyɛɔ amɛnɔ lɛ baaná heyeli. Yɛ naagbee lɛ, amɛkɛ̃ɛmɔ lɛ sɛɛ baafo! (Lala 79:11, 12) Mɛɛ gbɛ nɔ heyeli nɛɛ baatsɔ aba? Yesaia tsĩ jeŋmaji enyɔ ní baatutua Babilon lɛ atã: Elam kɛ Media. Afii ohai enyɔ sɛɛ, yɛ afi 539 D.Ŋ.B. lɛ, Koresh ni ji Persianyo lɛ baanyiɛ Persiabii kɛ Mediabii atai ní efee ekome lɛ hiɛ kɛte shi amɛwo Babilon. Yɛ Elam gbɛfaŋ lɛ, kɛ hoo lɛ, Persia maŋtsɛmɛi lɛ baahi nakai shikpɔŋ lɛ fã ko akɛ amɛnɔ dani afi 539 D.Ŋ.B. baashɛ.a Enɛ hewɔ lɛ Elambii lɛ baafata Persiabii atai lɛ ahe.
7. Te Yesaia ninaa lɛ sa ehe eha tɛŋŋ, ni mɛni enɛ tsɔɔ?
7 Kadimɔ bɔ ni Yesaia tsɔɔ bɔ ni ninaa nɛɛ ná enɔ hewalɛ eha lɛ mli, akɛ: “No hewɔ lɛ mihɛ mli eyi obɔ kɛ piŋmɔ; kɔ̃ɔmɔ eta mihe tamɔ yoo ní baafɔ́ kɔ̃ɔmɔ; mishɔ̃ kwɛ̃kwɛ̃ɛkwɛ̃, hewɔ lɛ minuuu nii; mijijaa, hewɔ lɛ minaaa nii. Mitsui miitswa kpalakpala, ŋmiŋmi emɔ mi; hiɛbulɛ ní mishweɔ lɛ etsɔ hekpokpomɔ eha mi.” (Yesaia 21:3, 4) Etamɔ nɔ ni gbalɔ lɛ náa hiɛ tuutuu beaŋ he miishɛɛ, ejaakɛ eji dioofeemɔ be ni hi kɛha yiŋshwiemɔ. Shi amrɔ nɛɛ gbɛkɛ elaaje efɛo lɛ kwraa, ni ekɛ gbeyeishemɔ, piŋmɔ kɛ hekpokpomɔ moŋ pɛ baa. Eekɔ̃mɔ tamɔ yoo ní baafɔ́, ni etsui “miitswa kpalakpala.” Woloŋlelɔ ko tsɔɔ wiemɔ kuku nɛɛ shishi akɛ “mitsui miitswa oyayaayai,” ni etsɔɔ mli akɛ wiemɔ lɛ tsɔɔ “tsui ni tswaa oyayaayai, ni bɛ pɛpɛɛpɛ.” Mɛni hewɔ ena amanehulu ní tamɔ nɛkɛ? Eka shi faŋŋ akɛ, Yesaia henumɔi lɛ ji gbalɛ mli okadi. Yɛ October 5 loo 6, 539 D.Ŋ.B. gbɛkɛ lɛ, Babilonbii lɛ kɛ shihilɛ ko ni yɔɔ gbeyei ni tamɔ nakai baakpe.
8. Taakɛ agba afɔ̃ shi lɛ, eyɛ mli akɛ Babilonbii lɛ ahenyɛlɔi lɛ yɛ gbogboi lɛ asɛɛ moŋ, shi te amɛfee amɛnii amɛha tɛŋŋ?
8 Beni duŋ woɔ nakai gbɛkɛ ní amanehulu baaba lɛ, nɔ ni baaa Babilonbii lɛ ajwɛŋmɔ mli kwraa ji gbeyeishemɔ. Aaafee afii ohai enyɔ ní etsɔ hiɛ lɛ, Yesaia gba efɔ̃ shi akɛ: “Amɛŋmɛ okpɔlɔ, amɛto bulɔi, amɛmiiye nii, amɛmiinu dãai.” (Yesaia 21:5a) Hɛɛ, Maŋtsɛ Belshazar henɔwolɔ lɛ eŋmɛ okpɔlɔ. Ato sɛ̃ii kɛha enukpai lɛ ateŋ mɛi akpe, kɛ eŋamɛi kɛ ehemɛi babaoo hu. (Daniel 5:1, 2) Dãatɔlɔi ní mii eshɛ amɛhe nɛɛ le akɛ asraafoi yɛ gbogboi lɛ asɛɛ, shi amɛheɔ amɛyeɔ akɛ anyɛŋ atutua amɛmaŋtiase lɛ kɔkɔɔkɔ. Egbogboi wuji kɛ enujɔɔ ní mli kwɔ lɛ ha efee tamɔ nɔ ni anyɛŋ aye enɔ kunim; enyɔŋmɔi babaoo lɛ haa ajeɔ enɔ kunimyeli he ŋwane. No hewɔ lɛ “amɛmiiye nii, amɛmiinu dãai.” Belshazar etɔ dãa, ni ekolɛ jeee ekome pɛ etɔ dãa. Hiamɔ ní ehe bahia ní atsĩɛ lumɛi lɛ tsɔɔ bɔ ni amɛtɔrɔ dãa kpɔtɔɔ amɛha, taakɛ Yesaia wiemɔi ni nyiɛ sɛɛ lɛ tsɔɔ yɛ gbalɛ wiemɔ mli lɛ.
9. Mɛni hewɔ ehe bahia ní ‘afɔ tsɛ́ŋ lɛ mu’ lɛ?
9 “Nyɛ lumɛi, nyɛtea shi, nyɛfɔa tsɛ́ŋ lɛ mu!” (Yesaia 21:5b) Trukaa kɛkɛ ni okpɔlɔŋmɛɛ lɛ sɛɛ fo. Esa akɛ lumɛi lɛ diɛŋtsɛ aha amɛhiɛ atsɛ̃! Ayatsɛ gbalɔ Daniel nuumo lɛ kɛba nifeemɔ lɛ shishi, ni ena bɔ ni Yehowa eha ŋmiŋmi ní tamɔ nɔ ni Yesaia wie he lɛ emɔ Babilon Maŋtsɛ Belshazar lɛ. Maŋtsɛ lɛ onukpai lɛ ayiŋ futu amɛ beni Mediabii, Persiabii, kɛ Elambii atai ní efee ekome lɛ ye nibii ní buɔ maŋtiase lɛ he lɛ anɔ kunim lɛ. Babilon gbee shi oya! Shi kɛlɛ, ákɛ ‘aaafɔ tsɛ́ŋ lɛ mu’ lɛ tsɔɔ mɛni? Bei komɛi lɛ, Biblia lɛ wieɔ maŋtsɛ ní yeɔ maŋ nɔ lɛ akɛ maŋ lɛ tsɛ́ŋ ejaakɛ lɛ ji shikpɔŋ lɛ hefãlɔ kɛ ehebulɔ.b (Lala 89:19) No hewɔ lɛ ekolɛ ŋmalɛ kuku ní yɔɔ Yesaia wolo lɛ mli nɛɛ miigba hiamɔ ní ehia akɛ aná maŋtsɛ hee lɛ eefɔ̃ shi. Mɛni hewɔ? Ejaakɛ agbe Belshazar nakai “nyɔɔŋ lɛŋ nɔŋŋ.” Enɛ hewɔ lɛ, ehe miihia ní ‘afɔ tsɛ́ŋ lɛ mu,’ loo ahala maŋtsɛ hee.—Daniel 5:1-9, 30.
10. Mɛɛ miishɛjemɔ Yehowa jálɔi baanyɛ aná kɛjɛ Yesaia gbalɛ ní kɔɔ kutumpɔfo lɛ he lɛ mlibaa lɛ mli?
10 Mɛi fɛɛ ní sumɔɔ anɔkwa jamɔ lɛ náa miishɛjemɔ kɛjɛɔ sane nɛɛ mli. Ŋmɛnɛŋmɛnɛ beaŋ Babilon, ni ji Babilon Kpeteŋkpele lɛ ji kutumpɔfo kɛ nifitelɔ tamɔ bɔ ni ehenɔ ni hi shi blema lɛ ji lɛ pɛpɛɛpɛ. Jamɔ mli hiɛnyiɛlɔi ekpaŋ Yehowa Odasefoi ayinɔ aahu kɛbashi ŋmɛnɛ, koni atsĩ amɛnitsumɔ lɛ naa, ní awa amɛ yi, loo ní ahe amɛ too ní akɛgbala amɛtoi. Shi taakɛ gbalɛ nɛɛ kaiɔ wɔ lɛ, Yehowa naa nɛkɛ kutumpɔo ní amɛyeɔ nɛɛ fɛɛ, ni ehaŋ amɛye amɛhe kɛjɛ toigbalamɔ mli kɔkɔɔkɔ. Ebaakpata jamɔi ní gbeɔ ehe guɔ, ní amɛwaa ewebii ayi lɛ fɛɛ ahiɛ. (Kpojiemɔ 18:8) Ani nɔ ko ni tamɔ nɛkɛ baanyɛ aba? Kɛ́ wɔɔtswa wɔhemɔkɛyeli wɔma shi lɛ, no lɛ esa akɛ wɔna bɔ ni ekɔkɔbɔɔi ní kɔɔ blema Babilon kɛ ehenɔ ní yɔɔ ŋmɛnɛŋmɛnɛ beaŋ lɛ fɛɛ shigbeemɔ lɛ he lɛ eba mli momo eha.
“Egbee Shi ee Ei!”
11. (a) Mɛɛ gbɛnaa nii kã bulɔ lɛ nɔ, ni namɛi tsuɔ nii kɛ ekãa akɛ bulɔ ŋmɛnɛ? (b) Mɛni shwiilii kɛ tejii kɛ shwiilii kɛ yoomai lɛ damɔ shi kɛha?
11 Yehowa kɛ gbalɔ lɛ wie agbɛnɛ. Yesaia bɔ amaniɛ akɛ: “Bɔ ni [Yehowa, “NW” ] kɛɛ mi nɛ: Yaa ní oyato bulɔ: nɔ ni enaa lɛ, ha ejaje!” (Yesaia 21:6) Wiemɔi nɛɛ jeɔ yitso nɛɛ mli saneyitso kroko ní he hiaa—nɔ ni kɔɔ saralɔ, loo bulɔ he lɛ he wiemɔ shishi. Enɛ he hiaa anɔkwa Kristofoi fɛɛ ŋmɛnɛ, ejaakɛ Yesu wo esɛɛnyiɛlɔi lɛ hewalɛ ní ‘amɛsara.’ “Tsulɔ anɔkwafo kɛ nilelɔ” lɛ kpako nɔ ni enaa ní kɔɔ bɔ ni Nyɔŋmɔ kojomɔ gbi lɛ ebɛŋkɛ eha, kɛ osharai ní yɔɔ jeŋ ni efite nɛɛ mli lɛ he lɛ he wiemɔ. (Mateo 24:42, 45-47) Mɛni Yesaia ninaa lɛ mli bulɔ lɛ na? “Ena shwiilii, okpɔŋɔiatsɛmɛi enyɔnyɔ, shwiilii kɛ tejii, kɛ shwiilii kɛ yomai; ni eka etoi, ebo toi jogbaŋŋ.” (Yesaia 21:7) Ekolɛ nɛkɛ ta shwiilii komekomei nɛɛ damɔ shi kɛha ta shwiilii akui ní efã kɛmiiba yɛ ta gbamɔ naa kɛ foi ní tamɔ okpɔŋɔi ní atsɔse amɛ afoijee. Ta shwiilii kɛ tejii kɛ ta shwiilii kɛ yoomai lɛ damɔ shi kɛha hewalɛi enyɔ, ni ji Media kɛ Persia ni baafee ekome ní amɛkɛ tutuamɔ nɛɛ aba lɛ yɛ gbɛ ni sa nɔ. Kɛfata he lɛ, yinɔsane maa nɔ mi akɛ Persia asraafoi kɛ tejii kɛ yoomai fɛɛ tsuɔ nii kɛwuɔ ta.
12. Mɛɛ sui Yesaia ninaa mli bulɔ lɛ jie lɛ kpo, ni namɛi ehe hiaa ní amɛná sui nɛɛ eko ŋmɛnɛ?
12 Belɛ, sɔ̃ kã bulɔ lɛ nɔ akɛ ebɔ amaniɛ. “Ebo tamɔ jata akɛ: [Yehowa, “NW”], jenamɔ nɛɛ fɛɛ lɛ midamɔ buuhe lɛ, ni nyɔɔŋnyɔɔŋ fɛɛ lɛ midamɔ mibuu nɔ. Ni naa, shwiili kɛ gbɔmɛi kɛ okpɔŋɔiatsɛmɛi enyɔnyɔ miiba!” (Yesaia 21:8, 9a) Ninaa lɛ mli bulɔ lɛ bo waa kɛ ekãa, “tamɔ jata.” Ebiɔ ekãa dani abaanyɛ ajaje kojomɔ shɛɛ sane ashi maŋ ní he wa waa tamɔ Babilon. Yɛ no sɛɛ lɛ nɔ kroko hu he hiaa—no ji tsuishiŋmɛɛ. Bulɔ lɛ damɔ ebuuhe lɛ shwane kɛ nyɔɔŋ fɛɛ, ni egbɔjɔɔɔ bɔ ni ehiɛ yɔɔ ehe nɔ be fɛɛ be lɛ mli. Nakai nɔŋŋ ehe hiaa ní bulɔ kuu ni yɔɔ naagbee gbii nɛɛ amli lɛ hu aná ekãa ní amɛŋmɛ amɛtsui shi hu. (Kpojiemɔ 14:12) Nɛkɛ sui nɛɛ ahe hiaa anɔkwa Kristofoi fɛɛ.
13, 14. (a) Te blema Babilon yagbe naa tɛŋŋ, ni akumɔ emagai lɛ yɛ mɛɛ shishinumɔ naa? (b) Mɛɛ gbɛ nɔ, ni mɛɛ be Babilon Kpeteŋkpele lɛ hu ná shigbeemɔ ni tamɔ nakai?
13 Yesaia ninaa mli bulɔ lɛ na ta shwiili ní miiba kɛ foi. Mɛɛ adafitswaa ekɛba? “Ehere nɔ ekɛɛ: Egbee shi ee ei! Babel egbee shi! Ni enyɔŋmɔi lɛ amagai lɛ fɛɛ akumɔ ashwie shi!” (Yesaia 21:9b) Mɛɛ amaniɛbɔɔ ni yɔɔ miishɛɛ nɛ! Yɛ naagbee lɛ, Nyɔŋmɔ webii ayiwalɔ kutumpɔfo lɛ egbee shi!c Shi, mɛɛ shishinumɔ naa akumɔ Babilon amagai kɛ ewɔji lɛ ashwie shi yɛ? Ani Medo-Persiabii tutualɔi lɛ baashi akó kɛbote Babilon gbatsui lɛ amli ní amɛyakumɔ wɔji babaoo lɛ amɛshwie shi? Dabi, nɔ ko ní tamɔ nakai he ehiaaa. Abaakumɔ Babilon amaga nyɔŋmɔi lɛ ashwie shi kɛ shishinumɔ akɛ abaakpa amɛhe mama akɛ amɛbɛ hewalɛ ní amɛkɛaabu maŋtiase lɛ he. Ni Babilon baagbee shi yɛ be mli ni agbɛnɛ enyɛɛɛ enyɛ Nyɔŋmɔ webii anɔ dɔŋŋ lɛ hewɔ.
14 Shi Babilon Kpeteŋkpele lɛ hu? Etsɔ ŋaa fɔŋ ní etsɔ ní ekɛnyɛ Nyɔŋmɔ webii anɔ yɛ Jeŋ Ta I mli lɛ nɔ eŋɔ amɛ nom kɛmɔ shi yɛ be kplaŋŋ mli. Aha amɛshiɛmɔ nitsumɔ lɛ sɛɛ fo kwraa. Adamɔ apasa naafolɔmɔi wiemɔi anɔ awo Buu Mɔɔ Asafo lɛ sɛinɔtalɔ lɛ kɛ onukpai krokomɛi ni he hiaa lɛ atsuŋ. Shi tsakemɔ wulu ko ní sa kadimɔ waa ba yɛ afi 1919. Ajie onukpai nɛɛ kɛjɛ tsuŋwoo lɛ mli, ni agbele nitsumɔhe yitso lɛ naa, ni asaa aje shiɛmɔ nitsumɔ lɛ shishi ekoŋŋ. Enɛ hewɔ lɛ Babilon Kpeteŋkpele lɛ gbee shi ejaakɛ akumɔ hewalɛ ní eyɔɔ yɛ Nyɔŋmɔ webii anɔ lɛ kwraa.d Ŋwɛibɔfo ko kɛ adafitswaa ni yɔɔ Yesaia 21:9 lɛ mli wiemɔi lɛ tswa shigbeemɔ nɛɛ he adafi shii enyɔ yɛ Kpojiemɔ wolo lɛ mli.—Kpojiemɔ 14:8; 18:2.
15, 16. Yesaia maŋbii lɛ tamɔ ‘nii ní ágbee’ yɛ mɛɛ shishinumɔ naa, ni mɛni wɔbaanyɛ wɔkase kɛjɛ bɔ ni Yesaia fee enii yɛ amɛhewɔ lɛ mli?
15 Yesaia mu gbalɛ shɛɛ sane nɛɛ naa kɛ wiemɔ ni tsɔɔ musuŋtsɔlɛ ni eyɔɔ kɛha lɛ diɛŋtsɛ emaŋbii lɛ. Ekɛɛ akɛ: “Minii ní ágbee, miŋmãagbeemɔhe lɛ bi! Nɔ ni minu kɛjɛ Yehowa Zebaot ni ji Israel Nyɔŋmɔ lɛ naa lɛ, no nɔŋŋ mijajeɔ mitsɔɔ nyɛ nɛɛ.” (Yesaia 21:10) Bei pii lɛ akɛ ŋmãagbeemɔ feɔ Nyɔŋmɔ webii atsɔsemɔ kɛ amɛhetsuumɔ he okadi yɛ Biblia lɛ mli. Nyɔŋmɔ webii ní ekɛ amɛ efee kpaŋmɔ lɛ baatsɔmɔ ‘ŋmãagbeemɔhe lɛ bii,’ he ni ajieɔ ŋmãa lɛ kɛjɛɔ tutuu lɛ mli yɛ nɔnyɛɛ naa, ní ashĩɔ ŋmãa, ni ji nɔ̃ kpakpa ní asumɔɔ lɛ pɛ lɛ. Yesaia nyaaa yɛ toigbalamɔ ní akɛbaa amɛnɔ nɛɛ hewɔ. Shi moŋ, ejie musuŋtsɔlɛ kpo etsɔɔ ‘ŋmãagbeemɔhe lɛ bii’ ní baaba wɔsɛɛ, ní amɛteŋ mɛi komɛi baaye amɛwala be fɛɛ yɛ maŋsɛɛ shikpɔŋ nɔ akɛ nomii lɛ.
16 Enɛ baanyɛ afee kaimɔ nɔ̃ ni he yɔɔ sɛɛnamɔ kɛha wɔ fɛɛ. Ekolɛ mɛi komɛi yɛ Kristofoi asafo lɛ mli ŋmɛnɛ ní musuŋtsɔlɛ ní amɛjieɔ lɛ kpo amɛtsɔɔ efɔŋfeelɔi lɛ sɛɛ etsɛɛɛ. Ni ekolɛ bei pii lɛ, mɛi ni akɛ tsɔsemɔ haa amɛ lɛ jieɔ mlifu kpo yɛ he. Shi kɛlɛ, kɛ́ wɔkai akɛ Yehowa tsɔseɔ ewebii koni ekɛtsuu amɛhe lɛ, no lɛ wɔgbeŋ tsɔsemɔ lɛ kɛ mɛi ní akɛhaa lɛ ahe guɔ, ni kɛ́ eba akɛ akɛ tsɔsemɔ miiha wɔ lɛ, wɔteŋ shi wɔshiŋ. Nyɛhaa wɔkpɛlɛa tsɔsemɔ ni tsɔɔ Nyɔŋmɔ gbeyeishemɔ lɛ nɔ ákɛ Nyɔŋmɔ suɔmɔ lɛ kpojiemɔ.—Hebribii 12:6.
Bulɔ lɛ Sanebimɔ
17. Mɛni hewɔ atsɛɔ Edom yɛ gbɛ ní sa nɔ akɛ “Duma” lɛ?
17 Gbalɛ shɛɛ sane ni ji enyɔ ni yɔɔ Yesaia yitso 21 lɛ jieɔ nɔ ni bulɔ lɛ damɔ shi kɛha lɛ kpo faŋŋ. Ejeɔ shishi akɛ: “Duma kojomɔ he gbalɛ: Abo atsɛ́ mi kɛjɛ Seir akɛ: Bulɔ, nyɔɔŋ mɛɛ be nɛ? Bulɔ, nyɔɔŋ mɛɛ be nɛ?” (Yesaia 21:11) Nɛgbɛ Duma nɛɛ yɔɔ? Eka shi faŋŋ akɛ maji babaoo hiɛ nakai gbɛi lɛ yɛ Biblia bei amli, shi jeee amɛteŋ eko kwraa he awieɔ nɛɛ. Duma maŋ lɛ bɛ Seir, ni ji gbɛi kroko ní akɛtsɛɔ Edom lɛ. Shi kɛlɛ, “Duma” shishi ji “Dioofeemɔ.” No hewɔ lɛ etamɔ nɔ ni gbɛi ní akɛwo kpokpaa lɛ tsɔɔ nɔ ni baaba enɔ wɔsɛɛ, taakɛ eji yɛ sanejajemɔ ní tsɔ hiɛ lɛ mli lɛ. Edom, ni ji Nyɔŋmɔ webii ahenyɛlɔ kɛjɛ blema, ní sumɔɔ oweletɔɔ lɛ, baaba naagbee yɛ dioofeemɔ mli—yɛ gbele dioofeemɔ mli. Shi dani no baaba lɛ, mɛi komɛi kɛ yeyeeyefeemɔ baabi wɔsɛɛ be he saji.
18. Sanejajemɔ ni kɛɛ akɛ, “Je miitsɛre, shi je hu miina” lɛ ba mli yɛ Edom nɔ yɛ mɛɛ gbɛ nɔ?
18 Beni Yesaia ŋmaa ewolo lɛ, no mli lɛ Edom kã kpokpaa ní Ashurbii asraafoi ni he wa lɛ eye nɔ kunim lɛ nɔ. Mɛi ni yɔɔ Edom lɛ ekomɛi miishwe akɛ amɛaale be mli ni nyɔɔŋ ni ji nɔnyɛɛ ni amɛyɔɔ shishi lɛ sɛɛ baafo. Mɛɛ hetoo aha amɛ? “Bulɔ lɛ kɛɛ: Je miitsɛre, shi je hu miina.” (Yesaia 21:12a) Nibii ní ena lɛ etsɔɔɔ nɔ kpakpa kɛhaaa Edom. Jetsɛremɔ kpɛmɔ hɛrɛbii ko baaje kpo yɛ nɔ ni tamɔ ŋwɛi kɛ shikpɔŋ tsamɔhe lɛ, shi esɛɛ etsɛŋ kwraa, ebaalaka mɔ. Jenamɔ—ni ji duŋ ní tsɔɔ nɔnyɛɛ be kroko—baanyiɛ jetsɛremɔ lɛ sɛɛ oya nɔŋŋ. Mɛɛ Edom wɔsɛɛ be shihilɛ he mfoniri ní sa jogbaŋŋ nɛ! Ashurbii anɔnyɛɛ lɛ baaba naagbee, shi Babilon baaye Ashur sɛɛ akɛ jeŋ hewalɛ, ni ebaakpata Edombii pii ahiɛ. (Yeremia 25:17, 21; 27:2-8) Shihilɛ ní baa kɛtsaraa nɔ nɛɛ baaba ekoŋŋ. Persiabii kɛ Helabii anɔnyɛɛ baanyiɛ Babilonbii anɔnyɛɛ lɛ sɛɛ. No sɛɛ lɛ ‘jetsɛremɔ’ be kukuoo ko baaba yɛ Romabii abe lɛ mli, be mli ni Herodei lɛ—ní amɛsɛɛ jɛ Edom lɛ—yeɔ nɔ yɛ Yerusalem lɛ. Shi nakai ‘jetsɛremɔ’ lɛ sɛɛ etsɛŋ. Yɛ naagbee lɛ, Edom baama eyi shi kɛya dioofeemɔ mli kɛya naanɔ, ni ebaashi shihilɛ mli kwraa kɛjɛ yinɔsane mli. Yɛ naagbee lɛ, gbɛi Duma lɛ baafee gbɛi ní sa lɛ jogbaŋŋ.
19. Beni bulɔ lɛ kɛɛ akɛ, “Kɛ́ nyɛaabi lɛ, nyɛbia! nyɛkua nyɛsɛɛ, ní nyɛbaa!” lɛ, no mli lɛ mɛni ekolɛ etsɔɔ?
19 Bulɔ lɛ mu eshɛɛ sane kuku lɛ naa kɛ wiemɔi nɛɛ, akɛ: “Kɛ́ nyɛaabi lɛ, nyɛbia! nyɛkua nyɛsɛɛ, ní nyɛbaa!” (Yesaia 21:12b) Ekolɛ wiemɔ ni ji “nyɛkua nyɛsɛɛ, ní nyɛbaa!” lɛ miitsɔɔ ‘jenamɔi’ ní jwere Edom hiɛ, ní baatsara nɔ kɛba aahu ní esɛɛ efooo. Aloo akɛni abaanyɛ atsɔɔ wiemɔ lɛ shishi hu akɛ “sɛɛkuu” hewɔ lɛ, ekolɛ gbalɔ lɛ miitsɔɔ akɛ esa akɛ Edombii fɛɛ ní baasumɔ ni amɛje maŋ lɛ hiɛkpatamɔ ni baa lɛ mli lɛ ashwa amɛhe ní ‘amɛku amɛsɛɛ’ kɛba Yehowa ŋɔɔ. Yɛ shihilɛi enyɔ nɛɛ eko fɛɛ eko mli lɛ, bulɔ lɛ ha amɛ hegbɛ ní amɛbibii lɛ saji lolo.
20. Mɛni hewɔ sanejajemɔ ní aŋma yɛ Yesaia 21:11, 12 lɛ tsɔɔ nɔ ko ni he hiaa Yehowa webii ŋmɛnɛ lɛ?
20 Sanejajemɔ kuku nɛɛ he yɛ sɛɛnamɔ waa kɛha Yehowa webii ni yɔɔ ŋmɛnɛŋmɛnɛ beaŋ lɛ.e Wɔnuɔ shishi akɛ adesai ebote jenamɔ beaŋ duŋ kpii ni ji mumɔŋ shwilamɔ kɛ amɛhe ní amɛtsi kɛjɛ Nyɔŋmɔ he, ní kɛ nibii agbɛjianɔtoo nɛɛ hiɛkpatamɔ baaba lɛ mli vii diɛŋtsɛ. (Romabii 13:12; 2 Korintobii 4:4) Hiɛnɔkamɔi ní aaakpɛlɛ hɛrɛbii yɛ nɛkɛ duŋ be nɛɛ mli ákɛ adesai baanyɛ amɛkɛ toiŋjɔlɛ kɛ shweshweeshwe shihilɛ aba lɛ tamɔ nakai jetsɛremɔ kpɛmɔi hɛrɛbii ní lakaa mɔ, ní duŋ nyiɛɔ sɛɛ lolo lɛ nɔŋŋ pɛpɛɛpɛ. Anɔkwa jetsɛremɔ miibɛŋkɛ—Kristo Afii Akpe Nɔyeli ní baaye shikpɔŋ nɛɛ nɔ lɛ jetsɛremɔ lɛ. Shi shii abɔ ní jenamɔ yɔɔ lolo nɛɛ, esa akɛ wɔnyiɛ bulɔ kuu lɛ hiɛnyiɛmɔ sɛɛ kɛtsɔ wɔhiɛ ní aaahi wɔhe nɔ yɛ mumɔŋ be fɛɛ be kɛ ekãa ní wɔkɛaatswa bɛŋkɛmɔ ní nibii agbɛjianɔtoo fɔŋ nɛɛ naagbee lɛ ebɛŋkɛ lɛ he adafi lɛ nɔ.—1 Tesalonikabii 5:6.
Je Na yɛ Ŋa Kpataa lɛ Nɔ
21. (a) Mɛɛ shishinumɔi srɔtoi ekolɛ ataoɔ akɛha yɛ wiemɔ kuku ni ji “Arabia kojomɔ he gbalɛ” lɛ mli? (b) Mɛni ji Dedanim hii gbɛnyiɛlɔi akui lɛ?
21 Akɛ naagbee sanejajemɔ ni yɔɔ Yesaia yitso 21 lɛ shi “Arabia.” Ejeɔ shishi akɛ: “Arabia kojomɔ he gbalɛ: Nyɛ Dedanim gbɛnyiɛlɔi asafoi, nyɛwɔa Arabia koo lɛŋ!” (Yesaia 21:13) Eka shi faŋŋ akɛ ŋã kpataa ní awieɔ he nɛɛ ji Arabia, ejaakɛ akɛ sanejajemɔ lɛ shiɔ Arabiabii akutsei babaoo. Bei komɛi lɛ atsɔɔ wiemɔ kɛha ‘ŋã kpataa’ lɛ shishi akɛ “gbɛkɛ,” ni ji wiemɔ ko ní je lɛ waa yɛ Hebri wiemɔ mli. Mɛi komɛi kɛɔ akɛ eji wiemɔ ní hiɛ shishinumɔi pii, tamɔ nɔ ni gbɛkɛnaashi duŋ—ni ji haomɔ be—miihe aba kpokpaa nɛɛ nɔ. Sanejajemɔ lɛ jeɔ shishi kɛ nyɔɔŋ nifeemɔ ko ní miitsɔɔ Dedanim hii gbɛnyiɛlɔi akui, ni jɛ Arabiabii aweku ko ní ehe gbɛi waa lɛ mli. Nɛkɛ gbɛnyiɛlɔi akui nɛɛ nyiɛɔ jarayeli gbɛ̀i ní jɛɔ shia ŋã lɛ nɔ he kpakpa kome kɛyaa he kroko, ní amɛtere tsofa-kɛ-ŋmai ní akɛwoɔ niyenii amli, adiagbai, kɛ jwetrii krokomɛi. Shi wɔnaa amɛ yɛ biɛ ní aanyɛ amɛnɔ ní amɛshi gbɛ̀i ní amɛle ní afãa gbɛ waa yɛ nɔ lɛ, ní amɛyatao teemɔhei ní amɛwɔ jɛmɛ. Mɛni hewɔ?
22, 23. (a) Mɛɛ shihilɛ ní tamɔ jatsu ní tsii etsɛŋ ni ebaaba Arabiabii awekui anɔ, ni mɛɛ hewalɛ ebaaná yɛ amɛnɔ? (b) Bei enyiɛ ebaaye dani amanehulu nɛɛ baaba, ni namɔ kɛbaaba?
22 Yesaia tsɔɔ mli akɛ: “Nyɛ Tema shikpɔŋ lɛ nɔ bii, nyɛkɛ nu ayakpeea mɛi ni kumai yeɔ amɛ lɛ! Nyɛkɛ aboloo hu ayakpeea foijelɔi lɛ! Ejaakɛ klante naa foi amɛjoɔ, klante ní agbala kɛ gãi ní adɔ kɛ ta ní mli wa.” (Yesaia 21:14, 15) Hɛɛ, jatsu ní tsii, ni ji ta baanyiɛ nɛkɛ Arabiabii awekui nɛɛ asɛɛ. Esa akɛ Tema, ní yɔɔ shia ŋã lɛ nɔ shikpɔji kpakpai ní nu yɔɔ jɛmɛ waa fe fɛɛ lɛ ateŋ ekome nɔ lɛ, kɛ nu kɛ aboloo ayaha ta mli abobalɔi ní he bɛ nii kwraa nɛɛ. Mɛɛ be haomɔ nɛɛ baaba?
23 Yesaia tee nɔ akɛ: “Bɔ ni [Yehowa, “NW”] kɛɛ mi nɛ: Biɛ afi ní tamɔ apaafonyo afi lɛ Kedar anunyam lɛ aaatã kwraa, ni Kedarbii lɛ ateŋ gãitsɛ̃lɔi ekãalɔi ní aaashwɛ lɛ ayi fáŋ; ejaakɛ Yehowa, Israel Nyɔŋmɔ lɛ, ekɛɛ.” (Yesaia 21:16, 17) Kedar ji weku ko ní ehe gbɛi waa akɛ bei komɛi lɛ akɛdamɔɔ shi kɛhaa Arabia fɛɛ. Yehowa ekpɛ eyiŋ akɛ nɛkɛ weku nɛɛ mli bii ni ji gãitsɛ̃lɔi kɛ ekãalɔi lɛ anɔ baagbɔ kwraa kɛbashɛ shwɛɛnii fioo ko pɛ. Mɛɛ be? “Biɛ afi” mli pɛ, be ko fataaa he, tamɔ bɔ ni apaafonyo kɛ be ní abaawo lɛ nyɔmɔ yɛ he pɛ tsuɔ nii lɛ. Bɔ ni enɛɛmɛi fɛɛ ba mli ha lɛ, no lɛ aleee jogbaŋŋ kɛ nɔmimaa. Ashur nɔyelɔi enyɔ—Sargon II kɛ Sanherib—kɛ yijiemɔ haa amɛhe akɛ amɛ amɛye Arabia nɔ kunim. Ekolɛ mɛi enyɔ nɛɛ ateŋ mɔ fɛɛ mɔ kpata Arabiabii awekui henɔwolɔi nɛɛ amli babaoo hiɛ, taakɛ agba afɔ̃ shi lɛ.
24. Te wɔɔfee tɛŋŋ wɔná nɔmimaa akɛ Yesaia gbalɛ ní ekɛshi Arabia lɛ ba mli?
24 Shi kɛlɛ, wɔbaanyɛ wɔná nɔmimaa akɛ gbalɛ nɛɛ ba mli kɛmɔ shi. Nɔ kroko ko bɛ ní maa oti nɛɛ nɔ mi jogbaŋŋ fe wiemɔi ní akɛgbe sanejajemɔ lɛ naa lɛ, akɛ: “Yehowa, Israel Nyɔŋmɔ lɛ, ekɛɛ.” Kɛha gbɔmɛi ní hi shi yɛ Yesaia gbii lɛ amli lɛ, ekolɛ eeefee amɛ akɛ enyɛŋ eba akɛ Babilon nɔ baakwɔ kɛteke Ashur, kɛkɛ lɛ no sɛɛ lɛ abutu lɛ yɛ gbɛkɛnaashi kome mli dãanumɔ kɛ shwɛmɔ kɛ mlifilimɔ mli. Ekolɛ eeefee nɔ ni nyɛŋ aba mli nakai nɔŋŋ ákɛ Edom ní he wa lɛ baaba enaagbee yɛ gbele mli dioofeemɔ mli, aloo ákɛ jenamɔ ni ji amanehulu kɛ ohia shihilɛ aaaba Arabiabii awekui ní yɔɔ nii babaoo lɛ anɔ. Shi Yehowa kɛɛ ebaaba, ni nakai pɛpɛɛpɛ eba lɛ. Ŋmɛnɛ, Yehowa kɛɔ wɔ akɛ abaakpata jeŋ apasa jamɔ maŋtsɛyeli lɛ hiɛ. Enɛ jeee nɔ ko ní baanyɛ aba mli kɛkɛ; eji nɔ ko ní baaba mli lɛɛlɛŋ. Yehowa diɛŋtsɛ ekɛɛ!
25. Mɛɛ gbɛ nɔ wɔɔtsɔ wɔkase bulɔ lɛ nɔkwɛmɔnɔ lɛ?
25 Belɛ, nyɛhaa wɔtamɔa bulɔ lɛ. Nyɛhaa wɔyaa nɔ akɛ mɛi ni hiɛ yɔɔ amɛhe nɔ, tamɔ nɔ ni akɛ wɔ edamɔ buu mɔɔ ní nɔ kwɔ nɔ, ní wɔmiikwɛ he ni wɔhiŋmɛi naa nii kɛshɛɔ lɛ fɛɛ akɛ wɔɔna oshara ko ní miiba he okadi lo. Nyɛhaa wɔkɛ wɔhe abɔa bulɔ anɔkwafo kuu, ni ji Kristofoi ní afɔ amɛ mu lɛ ateŋ mɛi ní eshwɛ yɛ shikpɔŋ nɔ ŋmɛnɛ lɛ ahe gbagbalii. Nyɛhaa wɔkɛ ekãa afataa amɛhe kɛjajea nɔ ni wɔnaa lɛ wɔtsɔɔa—ni ji odaseyeli kpele ní tsɔɔ akɛ Kristo miiye maŋtsɛ yɛ ŋwɛi; ákɛ etsɛŋ ni ekɛ adesai aduŋ be kakadaŋŋ ni ji amɛhe ní amɛtsi kɛjɛ Nyɔŋmɔ he lɛ baaba naagbee; ni ákɛ no sɛɛ lɛ ekɛ anɔkwa jetsɛremɔ, ni ji Afii Akpe Nɔyeli yɛ paradeiso shikpɔŋ nɔ lɛ baaba!
[Shishigbɛ niŋmai]
a Bei komɛi lɛ atsɛɔ Persia Maŋtsɛ Koresh akɛ “Anshan Maŋtsɛ”—ni Anshan ji kpokpaa loo maŋtiase ko ni yɔɔ Elam. Ekolɛ Israelbii ni hi shi yɛ Yesaia gbii lɛ amli—ni ji afii ohai kpaanyɔ D.Ŋ.B. lɛ—leee Persia, yɛ be mli ni eeefee akɛ amɛle Elam. Ekolɛ enɛ tsɔɔ nɔ hewɔ ni Yesaia tsĩ Elam tã yɛ Persia najiaŋ lɛ.
b Biblia mli saji ahe wielɔi pii susuɔ akɛ wiemɔ ní awie akɛ “nyɛfɔa tsɛ́ŋ lɛ mu” lɛ kɔɔ blema asraafoi anifeemɔ ni ji mu ní akɛtsumɔɔ tsɛ́ŋi ní akɛ kooloi awolo fee lɛ anɔ dani akɛyaa ta, koni nibii ní tswiaa nɔ lɛ ashane yɛ nɔ lɛ he. Eyɛ mli akɛ enɛ baanyɛ afee eshishinumɔ moŋ, shi esa akɛ akadi akɛ nakai gbɛkɛ ní maŋtiase lɛ gbee shi lɛ, Babilonbii lɛ naaa be ní amɛkɛaawu amɛshi tutualɔi lɛ, aahu ní amɛaasaa amɛhe kɛha ta kɛtsɔ mu ní amɛkɛaatsumɔ amɛtsɛ́ŋi ahe lɛ nɔ!
c Yesaia gbalɛ ní kɔɔ Babilon shigbeemɔ he lɛ ja aahu akɛ mɛi ni wieɔ shiɔ Biblia lɛ ateŋ mɛi komɛi eka amɛyiŋ amɛwie akɛ ekolɛ aŋma yɛ be mli ní nifeemɔ lɛ eba sɛɛ. Shi taakɛ Hebri woloŋlelɔ F. Delitzsch tsɔɔ mli lɛ, kɛ́ wɔkpɛlɛɔ nɔ akɛ abaanyɛ akɛ mumɔ atsirɛ gbalɔ ní egba nɔ ni baaba afii ohai abɔ kɛtsɔ hiɛ lɛ, no lɛ yiŋsusumɔ ní tamɔ nɛkɛ he ehiaaa.
e Yɛ klɛŋklɛŋ afii 59 ní akala Buu-Mɔɔ lɛ fɛɛ mli lɛ, no mli lɛ wolo tɛtrɛɛ lɛ wieɔ Yesaia 21:11 lɛ he yɛ ehiɛ baafa lɛ. Nakai ŋmalɛ lɛ nɔŋŋ fee saneyitso kɛha naagbee shiɛmɔ wiemɔ ní Charles T. Russell, ni ji Buu Mɔɔ Asafo lɛ klɛŋklɛŋ sɛinɔtalɔ lɛ ŋma lɛ. (Kwɛmɔ mfoniri ni yɔɔ baafa ní tsɔ enɛ hiɛ lɛ.)
[Mfoniri ni yɔɔ baafa 219]
“Amɛŋmɛ okpɔlɔ . . . amɛmiiye nii, amɛmiinu dãai.”
[Mfoniri ni yɔɔ baafa 220]
Bulɔ lɛ ‘bo tamɔ jata’
[Mfoniri ni yɔɔ baafa 222]
“Jenamɔ nɛɛ fɛɛ lɛ midamɔ buuhe lɛ, ni nyɔɔŋnyɔɔŋ fɛɛ midamɔ mibuu nɔ”