Nyɛjiea Naanɔ Maŋtsɛ lɛ Yi!
“Yehowa ji Maŋtsɛ kɛjɛ naanɔ kɛyashi naanɔ.”—LALA 10:16.
1. Mɛɛ sanebimɔi teɔ shi yɛ naanɔ hesusumɔ gbɛfaŋ?
NAANƆ—mɛni obaakɛɛ eji? Ani osusuɔ akɛ be baanyɛ atsa nɔ aahu kɛya naanɔ lɛlɛŋ? Ojogbaŋŋ, ŋwanejee ko bɛ he akɛ be mli kpãa aahu kɛyaa naanɔ yɛ be ni eho lɛ amli. No hewɔ lɛ mɛni hewɔ emli nyɛŋ akpã aahu kɛya naanɔ yɛ wɔsɛɛ be mli? Lɛlɛŋ, New World Translation Biblia lɛ wieɔ Nyɔŋmɔ he akɛ ajieɔ eyi “kɛjɛɔ be ni aleee kɛyaa be ni aleee.” (Lala 41:13, NW) Mɛni wiemɔ nɛɛ tsɔɔ? Kɛ wɔsusu sane ko ni tamɔ no—ŋwɛiniiaŋ—he lɛ, ekolɛ ebaaye ebua wɔ ni wɔnu shishi.
2, 3. (a) Mɛɛ sanebimɔi kɔɔ ŋwɛiniiaŋ he, ni yeɔ ebuaa wɔ ni wɔnuɔ naanɔ he sane lɛ hesusumɔ shishi jogbaŋŋ? (b) Mɛni hewɔ esa akɛ wɔsumɔ akɛ wɔɔja naanɔ Maŋtsɛ lɛ?
2 Te ŋwɛiniiaŋ lɛɛ ha tɛŋŋ? Ani husu yɛ he? Kɛjɛ blema aahu kɛbashi afii 400 ni eho nɛ lɛ, kulɛ asusuɔ akɛ wɔ shikpɔŋ nɛɛ yɛ jeŋ muu lɛ fɛɛ teŋ tuuŋtu. Kɛkɛ ni Galileo fee shwɛde, ni no ha ebaná bɔ ni ŋwɛiniiaŋ shikãmɔ yɔɔ ha lɛ he shishinumɔ ni mli lɛɛ. Galileo nyɛ ena ŋulamii babaoo agbɛnɛ, ni enyɛ etsɔɔ akɛ shikpɔŋ lɛ kɛ shibɔlemɔ ŋulamii krokomɛi lɛ nyiɛɔ kɛbɔleɔ hulu lɛ. Anaaa ŋulamii akuu ni atsɛɔ lɛ Milky Way lɛ tamɔ mliki dɔŋŋ tamɔ bɔ ni kulɛ anaa lɛ tsutsu lɛ. Abana akɛ eji ŋulamii kushai, ni amɛyifalɛ baashɛ akpekpei akpei oha. Wɔnyɛŋ wɔkane ŋulamii ni fa babaoo nakai, wɔ wala bei abɔ fɛɛ po. Sɛɛ mli lɛ, ŋulamii ahe nikaselɔi tee nɔ amɛna ŋulamii kushai akpekpei akpei abɔ lolo. Enɛɛmɛi amli lɛɛɔ aahu kɛyaa ŋwɛiniiaŋ hei ni aleee, kɛyashɛɔ hei ni shwɛdei ni naa wa waa fe fɛɛ lɛ baanyɛ ana kɛyashi. Etamɔ nɔ ni husui bɛ ŋwɛiniiaŋ. Nakai nɔŋŋ eji yɛ naanɔ shihilɛ he—ebɛ husui.
3 Etamɔ nɔ ni naanɔ shihilɛ hesusumɔ tekeɔ bɔ ni wɔ adesai ajwɛŋmɔi ni he waaa nɛɛ baanyɛ anu shishi. Shi kɛlɛ, Mɔ ko yɛ ni nuɔ shishi jogbaŋŋ kɛmɔɔ shi. Ebaanyɛ ekane, hɛɛ, ebaanyɛ ekɛ ŋulamii akpekpei akpekpei abɔ ni yɔɔ amɛ kushai akpekpei akpei abɔ lɛ mli lɛ agbɛi atsɛ amɛ! Nɛkɛ Mɔ nɛɛ kɛɔ akɛ: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa. Namɔ bɔ enɛɛmɛi? Lɛ mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii; enyɛmɔ ni fa kɛ ehewalɛ kpele lɛ hewɔ lɛ, amɛteŋ ekome folo po eshwɛɛɛ. Ani oleee, ani onuko? Naanɔ Nyɔŋmɔ lɛ, Yehowa ní bɔ shikpɔŋ lɛ naagbee hei lɛ, egbɔjɔɔɔ ni asaŋ etɔɔɔ lɛ, ni ejwɛŋmɔ lɛ anyɛɛɛ mli atao.” (Yesaia 40:26, 28) Mɛɛ Nyɔŋmɔ ni he yɔɔ naakpɛɛ nɛ! Eka shi faŋŋ akɛ, lɛ ji Nyɔŋmɔ ni esa akɛ wɔsumɔ akɛ wɔɔja lɛ!
“Maŋtsɛ Kɛjɛ Naanɔ Kɛyashi Naanɔ”
4. (a) David jie hiɛsɔɔ kpo etsɔɔ naanɔ Maŋtsɛ lɛ yɛ mɛɛ gbɛ nɔ? (b) Te yinɔsane mli jeŋ nilelɔi kpele fe fɛɛ lɛ ateŋ mɔ kome mu sane naa yɛ jeŋ muu lɛ fɛɛ shishijee he eha tɛŋŋ?
4 David wie Nyɔŋmɔ, ni ji Bɔlɔ lɛ he yɛ Lala 10:16 akɛ: “Yehowa ji maŋtsɛ kɛjɛ naanɔ kɛyashi naanɔ.” Ni esaa etĩ mli yɛ Lala 29:10 akɛ: “Yehowa miiye maŋtsɛ kɛmiiya naanɔ.” Hɛɛ, Yehowa ji naanɔ Maŋtsɛ lɛ! Kɛfata he lɛ, David yeɔ odase akɛ nɛkɛ Maŋtsɛ ni awo enɔ gojoo nɛɛ ji nibii fɛɛ ni wɔnaa yɛ ŋwɛiniiaŋ lɛ ahe Gbɛjianɔtolɔ kɛ Feelɔ, ni ewie yɛ Lala 19:2 akɛ: “Ŋwɛi gbaa Mawu anunyam lɛ, ni atatu tsɔɔ eninenaa nitsumɔ lɛ.” Aaafee afii 2,700 sɛɛ lɛ, jeŋ nilelɔ ko ni he gbɛi waa, ni atsɛɔ lɛ Sir Isaac Newton, tsɔɔ akɛ ekɛ David kpaa gbee, beni eŋma akɛ: “Nɛkɛ hului, shibɔlemɔ ŋulamii kɛ ŋulamii kushai ahe gbɛjianɔtoo ni yɔɔ fɛo waa nɛɛ baanyɛ aba kɛjɛ hiɛkalɔ ko ni le nii waa, ni eji ofe hu lɛ, pɛ yiŋtoo kɛ maŋtsɛyeli hewalɛ mli.”
5. Mɛni Yesaia kɛ Paulo ŋma yɛ nilee Jɛɛhe he?
5 Kwɛ bɔ ni esa akɛ eha wɔhumi shi akɛ wɔɔle akɛ Nuntsɔ Maŋtsɛ Yehowa, mɔ ni “ŋwɛi kɛ ŋwɛii amli ŋwɛi” ni mli lɛɛ aahu nɛɛ “nyɛɛɛ ato” lɛ lɛ, hiɔ shi kɛyaa naanɔ! (1 Maŋtsɛmɛi 8:27) Yehowa, mɔ ni awie ehe yɛ Yesaia 45:18 akɛ “Mɔ ni bɔ ŋwɛi lɛ, . . . Mɔ ni shɔ̃ shikpɔŋ lɛ ni efee ni ekɛma shi” lɛ, ji nilee ni mli lɛɛ aahu tsɔ̃ fe bɔ ni adesa ni gboɔ nɛɛ jwɛŋmɔ baanyɛ anu shishi lɛ Jɛɛhe. Yehowa kɛɛ, taakɛ ama nɔ mi yɛ 1 Korintobii 1:19 akɛ: “Mafite nilelɔi anilee, ni ŋaalɔi aŋaa lɛ hu maha afee yaka.” Kɛkɛ ni bɔfo Paulo kɛfata he yɛ kuku 20 akɛ: “Nɛgbɛ nilelɔ yɔɔ? Nɛgbɛ woloŋmalɔ yɔɔ? Nɛgbɛ je nɛŋ naataalɔ yɔɔ? Ani Nyɔŋmɔ hako je lɛŋ nilee lɛ atsɔ kwashiai asane?” Hɛɛ, taakɛ Paulo tee nɔ ewie, yɛ yitso 3, kuku 19 lɛ, “je nɛŋ nilee lɛ ji kwashiai asane yɛ Nyɔŋmɔ hiɛ.”
6. Mɛni Jajelɔ 3:11 tsɔɔ yɛ “naanɔ” he?
6 Shibɔlemɔ ŋulamii ni yɔɔ ŋwɛiniiaŋ lɛ fata adebɔɔ nibii ni Maŋtsɛ Salomo wie he nɛkɛ lɛ ahe, akɛ: “[Nyɔŋmɔ] feɔ nɔ fɛɛ nɔ fɛfɛo yɛ ebe mli, asaŋ eŋɔ naanɔ hu ewo amɛtsui mli; na kɛkɛ gbɔmɔ enaaa nitsumɔ ni Nyɔŋmɔ tsuɔ kɛjɛɔ shishijee kɛyaa naagbee lɛ.” (Jajelɔ 3:11) Lɛlɛŋ, akɛwo gbɔmɔ tsui mli akɛ ebɔ mɔdɛŋ akɛ eeele “naanɔ,” ni ji, be ni bɛ naagbee lɛ shishi. Shi ani ebaanyɛ ena nilee ni tamɔ nɛkɛ gbi ko?
Wala Gbɛkpamɔ ko ni Yɔɔ Nyam
7, 8. (a) Mɛɛ gbɛkpamɔi ni yɔɔ nyam yɔɔ wɔsɛɛ be kɛha adesai, ni mɛɛ gbɛ nɔ aaatsɔ ni nine ashɛ nɔ? (b) Mɛni hewɔ esa akɛ wɔna miishɛɛ akɛ ŋwɛi tsɔsemɔ baaya nɔ aahu kɛyashi naanɔ lɛ?
7 Yesu Kristo wie yɛ sɔlemɔ ko ni esɔle eha Yehowa lɛ mli akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Mɛɛ gbɛ nɔ wɔɔtsɔ wɔna nilee ni tamɔ nɛkɛ? Ehe miihia ni wɔkase Nyɔŋmɔ Wiemɔ, ni ji Ŋmalɛ Krɔŋkrɔŋ, Biblia lɛ. Nakai gbɛ nɔ wɔɔtsɔ wɔna Nyɔŋmɔ yiŋtoi ni yɔɔ nyam, ní gbɛjianɔ ni eto kɛtsɔ e-Bi lɛ nɔ kɛha naanɔ wala namɔ yɛ paradeiso shikpɔŋ nɔ lɛ fata he lɛ, he anɔkwa nilee. No baafee “anɔkwa wala” ni awie he yɛ 1 Timoteo 6:19 lɛ. Ekɛ nɔ ni Efesobii 3:11 wieɔ he akɛ “naanɔ yiŋ ni [Nyɔŋmɔ] eto yɛ Kristo Yesu, wɔ Nuntsɔ lɛ mli lɛ” baakpa gbee.
8 Hɛɛ, wɔ adesai ni esha yɔɔ wɔhe nɛɛ baanyɛ ana naanɔ wala kɛtsɔ ŋwɛi tsɔsemɔ kɛ Yesu kpɔmɔ afɔleshaa lɛ mli hemɔkɛyeli namɔ nɔ. Be enyiɛ nɛkɛ tsɔsemɔ nɛɛ sɛɛ baatsɛ kɛyashi? Ebaatsa nɔ aahu kɛya naanɔi fɛɛ mli, beni ayaa nɔ atsɔɔ adesai anii fiofio yɛ wɔ Bɔlɔ lɛ nilee lɛ mli lɛ. Husui bɛ Yehowa nilee lɛ he. Bɔfo Paulo kpɛlɛ enɛ nɔ, ni ejaje akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ! Ekojomɔi lɛ anyɛɛɛ shishi ana, ni egbɛ̀i lɛ hu anyɛɛɛ sɛɛ mo aja!” (Romabii 11:33) Lɛlɛŋ, eja gbɛ jogbaŋŋ akɛ 1 Timoteo 1:17 tsɛɔ Yehowa akɛ ‘naanɔi a-Maŋtsɛ’!
Yehowa Nilee ni Ekɛbɔ Nii Lɛ
9, 10. (a) Mɛɛ nitsumɔi wuji Yehowa tsu ni ekɛsaa shikpɔŋ nɛɛ akɛ nikeenii kɛha gbɔmɛi adesai? (b) Yehowa nilee ni nɔ kwɔ fe fɛɛ lɛ jeɔ kpo yɛ enibɔɔ nii amli yɛ mɛɛ gbɛ nɔ? (Kwɛmɔ akrabatsa lɛ.)
9 Susumɔ gboshinii ni yɔɔ nyam ni naanɔ Maŋtsɛ lɛ kɛha wɔ adesai lɛ he okwɛ. Lala 115:16 kɛɔ wɔ akɛ: “Ŋwɛi lɛ Yehowa ŋwɛi ni, shi shikpɔŋ lɛ eŋɔha gbɔmɛi abii.” Ani osusuuu akɛ eji nɔ̃ ko ni yɔɔ nyam waa ni atuu awo wɔdɛŋ? Eka shi faŋŋ akɛ nakai eji! Ni kwɛ bɔ ni wɔhiɛ sɔɔ wɔ Bɔlɔ lɛ nilee ni yɔɔ sɔrɔto kwraa ni ekɛsusuɔ wɔsɛɛ he, ni ekɛsaa shikpɔŋ lɛ akɛ wɔ shia lɛ!—Lala 107:8.
10 Naakpɛɛ nibii ba yɛ shikpɔŋ lɛ nɔ yɛ adebɔɔ “gbii” ekpaa ni yɔɔ 1 Mose lɛ yitso 1 lɛ mli, ni gbi fɛɛ gbi sɛɛkɛlɛ heɔ afii akpei abɔ. Nɔ ni baajɛ Nyɔŋmɔ adebɔɔ nitsumɔi lɛ amli kɛba yɛ naagbee ji shikpɔŋ muu lɛ fɛɛ ni akɛ jwɛifɔ ni yɔɔ baa ŋmɔŋ eha nɔ fɛɛ fɛfɛo, kɛ kooi wuji, kɛ fɔfɔii ni hiɛ sui sɔrɔtoi fɛfɛji. Ebaayi obɔ kɛ ŋshɔ mli bɔɔ nii sɔrɔtoi fɛfɛji babaoo, kɛ loofɔji ni he yɔɔ fɛo ni filikiɔ, kɛ shia kooloi kɛ ŋa nɔ kooloi hu sɔrɔtoi babaoo, ni amɛteŋ eko fɛɛ eko fɔɔ “amɛ henɔ.” Yɛ bɔ ni afee abɔ nuu kɛ yoo he wiemɔ lɛ sɛɛ lɛ, 1 Mose 1:31 gbaa wɔ akɛ: “Ni Nyɔŋmɔ kwɛ nibii fɛɛ ni efee lɛ, ni naa, ehi naakpa.” Mɛɛ shihilɛ hé ni yɔɔ miishɛɛ ebɔle nakai klɛŋklɛŋ adesai lɛ nɛkɛ! Ani wɔnaaa Bɔlɔ ni yɔɔ suɔmɔ lɛ nilee, nii ni ekwɛɔ kɛyaa shɔŋŋ, kɛ mɔ hesusumɔ yɛ bɔɔnii nɛɛ fɛɛ mli?—Yesaia 45:11, 12, 18.
11. Salomo wó Yehowa adebɔɔ mli nilee lɛ nɔ gojoo yɛ mɛɛ gbɛ nɔ?
11 Mɔ ko ni naa kpɛ ehe waa yɛ naanɔ Maŋtsɛ lɛ nilee lɛ he ji Salomo. Egbala jwɛŋmɔ kɛtee Bɔlɔ lɛ nilee lɛ nɔ shii abɔ. (Abɛi 1:1, 2; 2:1, 6; 3:13-18) Salomo maa nɔ mi kɛhaa wɔ akɛ, “shikpɔŋ lɛ, ema shi kɛmiiya naanɔ.” Ehiɛ sɔ adebɔɔ mli naakpɛɛ nibii babaoo, kɛ gbɛfaŋnɔ ni atatui ni haa nugbɔ nɛɔ lɛ naa yɛ wɔ shikpɔŋ nɛɛ miishɛɛnamɔ mli lɛ. Enɛ hewɔ lɛ, eŋma akɛ: “Faai fɛɛ hoɔ kɛyaa ŋshɔŋ, kɛlɛ ŋshɔ yiii; he ni faai lɛ hoɔ kɛyaa lɛ, jɛi nɔŋŋ amɛhoɔ kɛyaa ekoŋŋ.” (Jajelɔ 1:4, 7) Nakai ji bɔ ni ebaa lɛ, ákɛ yɛ be mli ni nugbɔnɛmɔ kɛ faai eha shikpɔŋ lɛ hejɔɔmɔ sɛɛ lɛ, agbalaa amɛmli nui lɛ kɛjɛɔ ŋshɔŋ kɛkuɔ sɛɛ kɛyaa atatuiaŋ ekoŋŋ. Eji nɛkɛ nu mlitsemɔ kɛ eshibɔlemɔ he gbɛjianɔtoo nɛɛ bɛ kulɛ, te shikpɔŋ nɛɛ baatamɔ aha tɛŋŋ, ni kulɛ nɛgbɛ wɔ hu wɔbaahi?
12, 13. Mɛɛ gbɛ nɔ wɔɔtsɔ wɔjie hiɛsɔɔ kpo yɛ Nyɔŋmɔ adebɔɔ he?
12 Esa akɛ wɔha wɔ nifeemɔi afĩ hiɛsɔɔ ni wɔyɔɔ kɛha pɛpɛɛpɛ-ŋmɛɛ ni yɔɔ adebɔɔ mli lɛ sɛɛ, taakɛ Maŋtsɛ Salomo wie yɛ Jajelɔ wolo lɛ naagbee wiemɔi lɛ amli lɛ, akɛ: “Nyɛhaa wɔboa saji lɛ fɛɛ naagbee toi: She Nyɔŋmɔ gbeyei ni oye ekitai lɛ anɔ! Shi enɛ ji gbɔmɛi fɛɛ agbɛnaa. Ejaakɛ Nyɔŋmɔ baakojo nitsumɔ fɛɛ nitsumɔ kɛ teemɔŋ sane fɛɛ teemɔŋ sane hu, ekpakpa jio, efɔŋ jio.” (Jajelɔ 12:13, 14) Esa akɛ wɔshe gbeyei akɛ wɔɔfee nɔ ko ni esaŋ Nyɔŋmɔ hiɛ. Shi, esa akɛ wɔsumɔ akɛ wɔɔbo lɛ toi kɛ gbeyeishemɔ ni bulɛ yɔɔ mli.
13 Eka shi faŋŋ akɛ, esa akɛ wɔsumɔ akɛ wɔɔjie naanɔ Maŋtsɛ lɛ yi yɛ edebɔɔ nitsumɔi ni yɔɔ naakpɛɛ lɛ he! Lala 104:24 jajeɔ akɛ: “Yehowa, kwɛ bɔ ni onitsumɔi lɛ fa ha! Nilee okɛfee fɛɛ; shikpɔŋ lɛ nɔ eyi tɔ kɛ onibɔɔ nii lɛ!” Nyɛhaa wɔjɛa miishɛɛ mli wɔkɛ lala nɛɛ naagbee kuku lɛ akpa gbee, ni wɔkɛɛ wɔ diɛŋtsɛ wɔhe kɛ mɛi krokomɛi hu akɛ: “Jiemɔ Yehowa yi, misusuma! Haleluya!”
Shikpɔŋ nɔ Nibɔɔnii ni Nɔ Kwɔ Fe Fɛɛ
14. Nyɔŋmɔ adebɔɔ ni ji adesai anɔ kwɔ kwraa fe kooloi yɛ mɛɛ gbɛ nɔ?
14 Yehowa adebɔɔ lɛ fɛɛ hi jogbaŋŋ kɛwula shi. Shi shikpɔŋ nɔ bɔɔ nii ni sa kadimɔ fe fɛɛ ji wɔ—gbɔmɛi adesai. Abɔ Adam, no sɛɛ lɛ Hawa, ákɛ Yehowa adebɔɔ gbi ni ji ekpaa lɛ naagbee kwraa—bɔɔ nii ni nɔ kwɔ kwraa fe looi, loofɔji kɛ kooloi! Eyɛ mli akɛ nɛkɛ kooloi nɛɛ ateŋ babaoo yɛ henumɔŋ nilee moŋ, shi aha adesai hewalɛ ni akɛsusuɔ nii ahe, kɛ henilee ni baanyɛ ana sɔrɔtofeemɔ ni yɔɔ nɔ ni ja kɛ nɔ ni ejaaa teŋ, nyɛmɔ ni ekɛaato gbɛjianɔ kɛha wɔsɛɛ be, kɛ mligbɛ henumɔ akɛ ejá mɔ ko. Mɛɛ gbɛ nɔ tsɔ ni enɛɛmɛi fɛɛ ba? Yɛ nɔ najiaŋ ni eeetsake kɛba fiofio kɛjɛ kooloi komɛi ni bɛ jwɛŋmɔ mli lɛ, abɔ gbɔmɔ yɛ Nyɔŋmɔ subaŋ nɔ. Enɛ hewɔ lɛ, gbɔmɔ pɛ baanyɛ ajie Bɔlɔ lɛ sui akpo, mɔ ni wie lɛ diɛŋtsɛ ehe akɛ “Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii.”—2 Mose 34:6.
15. Mɛni hewɔ esa akɛ wɔkɛ heshibaa ajie Yehowa yi?
15 Nyɛhaa wɔjiea Yehowa yi ni wɔdaa lɛ shi yɛ bɔ ni efee wɔ gbɔmɔtsei yɛ naakpɛɛ gbɛ nɔ lɛ he. Lá ni yɔɔ wɔmli, ni he hiaa kɛha wala lɛ, hoɔ kɛbɔleɔ wɔgbɔmɔtso lɛ mli fɛɛ yɛ hiŋmɛitswaa 60 fɛɛ 60 mli. Taakɛ 5 Mose 12:23 kɛɔ lɛ, ‘lá lɛ ji susuma lɛ’—ni ji wɔ wala—ni ejara wa yɛ Nyɔŋmɔ hiɛ. Nɔ ni tá wui ni mli wa, fãji ni yɔɔ tswãa, kɛ nibii ni haa wɔgbɔmɔtso lɛ nuɔ nibii ahe lɛ fɛɛ nɔ ji aŋsɔ ko ni nɔ kwɔ kwraa fe kooloo fɛɛ kooloo aŋsɔ, ni yɔɔ nyɛmɔi hu ni kompiuta ni dalɛ aaashɛ ŋwɛitsu ŋsɔɔdoi babaoo nyɛŋ ekɛ lɛ aye egbɔ kɔkɔɔkɔ. Ani enɛ haaa onu he akɛ esa akɛ oba ohe shi? Esa akɛ eha onu he nakai. (Abɛi 22:4) Ni susumɔ enɛ hu he okwɛ: Wɔ fluflai, sɛ̃ tso, lilɛi, nyanyɔji, kɛ naabu feɔ ekome kɛfeɔ adesa gbee yɛ wiemɔi akpei abɔ ni awieɔ lɛ eko fɛɛ eko mli. David lá lala ko kɛjie Yehowa yi yɛ gbɛ ni ja nɔ akɛ: “Miidao shi, ejaakɛ bɔ ni atsɔ afee mi lɛ yɛ gbeyei kɛ naakpɛɛ; onitsumɔi lɛ yɛ naakpɛɛ, ni misusuma le enɛ krɛdɛɛ.” (Lala 139:14) Nyɛhaa wɔfataa David he ni wɔkɛ shidaa ajiea Yehowa, wɔ Feelɔ kɛ Nyɔŋmɔ ni he yɔɔ naakpɛɛ lɛ yi!
16. Mɛɛ lala lalafolɔ ko ni ehe gbɛi waa fo kɛjie Yehowa yi, ni mɛɛ ninefɔ̃ɔ ni kanyaa mɔ esa akɛ wɔhere nɔ?
16 Afii ohai 18 lɛ mli lala ko ni Joseph Haydn fo lɛ wieɔ kɛjieɔ Yehowa yi akɛ: “Nyɛdaa Lɛ shi, nyɛ E-nitsumɔi fɛɛ ni yɔɔ naakpɛɛ lɛ! Nyɛlaa kɛwoa Lɛ, nyɛlaa E-nunyam lɛ he lala, nyɛjɔɔa E-Gbɛi lɛ ni nyɛwoa nɔ gojoo! Yehowa yijiemɔ hiɔ shi kɛyaa naanɔ, Amen, Amen!” Ni mumɔ naa wiemɔi ni yɔɔ Lalai lɛ amli, ni atĩɔ mli shii abɔ, tamɔ ninefɔɔ ni akɛhaa shii ejwɛ sɔŋŋ yɛ Lala 107 lɛ yɛ miishɛɛ waa lɛlɛŋ, akɛ: “Esa akɛ amɛjie Yehowa yi yɛ emlihilɛ kɛ enaakpɛɛ nii ni etsuɔ ehaa gbɔmɛi abii lɛ ahewɔ.” Ani ofataa he yɛ nakai yijiemɔ lɛ kɛhamɔ mli? Esa akɛ ofata he, ejaakɛ nɔ fɛɛ nɔ ni yɔɔ fɛo jogbaŋŋ lɛlɛŋ lɛ jɛɛhe ji Yehowa, naanɔ Maŋtsɛ lɛ.
Nitsumɔ ni Dara ni Etsuɔ Lolo
17. ‘Mose kɛ Toobi lɛ lala lɛ’ jieɔ Yehowa yi yɛ mɛɛ gbɛ nɔ?
17 Naanɔ Maŋtsɛ lɛ je nitsumɔi ni dara babaoo po shishi yɛ afii akpei ekpaa ni eho lɛ mli. Yɛ Biblia mli naagbee wolo lɛ mli, yɛ Kpojiemɔ 15:3, 4 lɛ, wɔkaneɔ yɛ mɛi ni yɔɔ ŋwɛi ni amɛye amɛhenyɛlɔi daimonioi lɛ anɔ kunim lɛ ahe akɛ: “Amɛla Nyɔŋmɔ tsulɔ Mose lala lɛ kɛ toobi lɛ lala lɛ amɛkɛɛ: ‘Onitsumɔi lɛ dara ni amɛyɛ naakpɛɛ, [Yehowa] Nyɔŋmɔ Ofe; ogbɛ̀i lɛ ja ni anɔkwa ji amɛ, bo [naanɔ] Maŋtsɛ. Namɔ po sheŋo gbeyei, [Yehowa] ni ewoŋ ogbɛi lɛ hiɛ nyam? Ejaakɛ bo okometoo ji mɔ krɔŋkrɔŋ; ejaakɛ jeŋmaji lɛ fɛɛ aaaba ni amɛbaja yɛ ohiɛ, ejaakɛ ajie ojalɛ nii lɛ ashi faŋŋ.’ ” Mɛni hewɔ atsɛɔ lala nɛɛ akɛ ‘Mose lala lɛ kɛ Toobi lɛ lala lɛ’? Nyɛhaa wɔkwɛa.
18. Mɛɛ nitsumɔ kpeteŋkpele akaiɔ yɛ lala ni yɔɔ 2 Mose yitso 15 lɛ mli?
18 Aaafee afii 3,500 ni eho nɛ, beni Farao ta kpeteŋkpele lɛ hiɛ kpata yɛ Ŋshɔ Tsuru lɛ mli lɛ, Israelbii lɛ kɛ shidaa jie Yehowa yi yɛ lala mli. Wɔkaneɔ yɛ 2 Mose 15:1, 18 lɛ akɛ: “Kɛkɛ ni Mose kɛ Israelbii lɛ la nɛkɛ lala nɛɛ amɛha Yehowa, ni amɛkɛɛ: ‘Mala maha Yehowa, ejaakɛ ewo ehiɛ nyam; okpɔŋɔ kɛ enɔtalɔ lɛ etsirɛ amɛ eshwie ŋshɔŋ. Yehowa aaaye maŋtsɛ kɛaatee naanɔi anaanɔ!’ ” Nɛkɛ naanɔ Maŋtsɛ nɛɛ jalɛ akpɔi lɛ je kpo yɛ ekojomɔ kɛ hiɛkpatamɔ ni ekɛba ehenyɛlɔi ni tse emaŋtsɛyeli lɛ hiɛ atua lɛ anɔ lɛ mli.
19, 20. (a) Mɛni hewɔ Yehowa to Israel maŋ lɛ shishi? (b) Toobi lɛ kɛ mɛi krokomɛi eha Satan mpoatswaa lɛ hetoo yɛ mɛɛ gbɛ nɔ?
19 Mɛni hewɔ enɛ he bahia lɛ? Eden trom lɛ mli ji he ni Onufu ŋaalɔ kɛ shishiulɔ lɛ laka wɔ klɛŋklɛŋ fɔlɔi lɛ kɛyawo esha mli yɛ. Nɔ ni enɛ kɛba ji eshafeemɔ ni haaa aye emuu, ni akɛfɔ gbɔmɛi adesai fɛɛ. Shi naanɔ Maŋtsɛ lɛ fee he nɔ ko oya nɔŋŋ, yɛ eshishijee yiŋtoo, ni baaha eshwie ehenyɛlɔi fɛɛ kɛjɛ shikpɔŋ nɛɛ nɔyeli he lɛ, ni esaa ekɛ paradeiso shihilɛi aba ekoŋŋ lɛ kɛ gbeekpamɔ naa. Naanɔ Maŋtsɛ lɛ to Israel maŋ lɛ shishi ni ekɛ e-Mla ha amɛ, ni ekɛfee bɔ ni ebaatsu enɛ he nii eha lɛ he mfoniri.—Galatabii 3:24.
20 Shi, yɛ be ko sɛɛ lɛ, Israel diɛŋtsɛ gbee shi kɛbote anɔkwale ni ayeee mli, ni nɛkɛ shihilɛ ni yɔɔ mɔbɔ nɛɛ yashɛ he ni nɔ kwɔ fe fɛɛ beni ehiɛnyiɛlɔi lɛ ŋɔ Nyɔŋmɔ Bi koome lɛ amɛha Romabii lɛ ni amɛkɛ yiwalɛ diɛŋtsɛ piŋ lɛ ni amɛgbe lɛ lɛ. (Bɔfoi lɛ Asaji 10:39; Filipibii 2:8) Shi kɛlɛ, Yesu emuuyeli mlihiɛmɔ kɛtee gbele mli, ákɛ “Nyɔŋmɔ toobi” ni akɛshã afɔle lɛ ha mpoatswaa wiemɔ ko ni Nyɔŋmɔ blema Henyɛlɔ, Satan wie—akɛ adesa ko bɛ shikpɔŋ nɛɛ nɔ ni baaye Nyɔŋmɔ anɔkwale yɛ kaa ni mli wa waa shishi lɛ fee efolo yɛ gbɛ ni sa kadimɔ nɔ. (Yohane 1:29, 36; Hiob 1:9-12; 27:5) Eyɛ mli akɛ amɛna emuu ni ayeee kɛjɛ Adam ŋɔɔ moŋ, shi adesai krokomɛi akpekpei abɔ ni sheɔ Nyɔŋmɔ gbeyei enyiɛ Yesu nanemaa hei asɛɛ kɛtsɔ emuuyeli mlihiɛmɔ nɔ, yɛ Satan tutuamɔi ashishi.—1 Petro 1:18, 19; 2:19, 21.
21. Yɛ Bɔfoi lɛ Asaji 17:29-31 kɛ gbeekpamɔ naa lɛ, mɛni abaasusu he yɛ nikasemɔ ni nyiɛ sɛɛ lɛ mli?
21 Amrɔ nɛɛ, gbi ni Yehowa kɛbaawo nakai gbɔmɛi anɔkwafoi nɛɛ nyɔmɔ, koni ekojo anɔkwale kɛ jalɛ henyɛlɔi fɛɛ lɛ eshɛ. (Bɔfoi lɛ Asaji 17:29-31) Mɛɛ gbɛ nɔ enɛ baatsɔ aba? Wɔ nikasemɔ ni nyiɛ sɛɛ lɛ baatsɔɔ wɔ.
Emlitii He
◻ Mɛni hewɔ atsɛɔ Yehowa yɛ gbɛ ni sa nɔ akɛ “naanɔ Maŋtsɛ lɛ”?
◻ Yehowa nilee jeɔ kpo yɛ edebɔɔ nibii amli yɛ mɛɛ gbɛ nɔ?
◻ Adesai ji adebɔɔ nii ni nɔ kwɔ fe fɛɛ yɛ mɛɛ gbɛ nɔ?
◻ Mɛɛ nitsumɔi biɔ ni ala ‘Mose kɛ Toobi lɛ lala lɛ’?
[Akrabatsa ni yɔɔ baafa 12]
Yehowa Nilee ni Nɔ Kwɔ Fe Fɛɛ Lɛ
Naanɔ Maŋtsɛ lɛ nilee lɛ jeɔ kpo yɛ gbɛi sɔrɔtoi pii anɔ yɛ nibii ni efee yɛ shikpɔŋ nɛɛ nɔ amli. Kadimɔ Agur wiemɔi lɛ: “Náanyɔŋmɔ wiemɔ fɛɛ wiemɔ lɛ emli tsé; tsɛŋ ji lɛ ha mɛi ni baa lɛ abo lɛ.” (Abɛi 30:5) Kɛkɛ ni Agur wie Nyɔŋmɔ bɔɔ nii ni wala yɔɔ amɛmli lɛ babaoo he, agboi kɛ bibii fɛɛ. Akɛ nɔkwɛmɔ nɔ lɛ, yɛ kukuji 24 kɛyashi 28 lɛ nɛkɛ lɛ, ewie akɛ “nibii ejwɛ yɛ ni amɛdaraaa yɛ shikpɔŋ lɛ nɔ, shi amɛle nii pam.” Nomɛi ji tsatsu, afutuɔkɔ, baalabii, kɛ tsũnyɛ.
“Amɛle nii pam”—hɛɛ, afee kooloi lɛ nakai. Amɛsusuuu nii ahe tamɔ bɔ ni adesai susuɔ nii ahe lɛ, shi moŋ amɛkɛ amɛhe fɔ̃ɔ nilee ko ni akɛwo amɛmli lɛ nɔ. Ani enɛ efee bo naakpɛɛ dã? Mɛɛ bɔɔ nii ni ato amɛhe gbɛjianɔ jogbaŋŋ amɛji nɛkɛ! Akɛ nɔkwɛmɔ nɔ lɛ, ato tsatsubii ahe gbɛjianɔ akɛ kui ni hiɔ shi yɛ hekome, ni amɛyɛ maŋnyɛ, nitsulɔi, kɛ hii. Yɛ tsatsubii sɔrɔtoi lɛ ekomɛi agbɛfaŋ lɛ, tsatsubii nitsulɔi lɛ buaa tsatsubii ni yagbalaa niyenii amli nui amɛwoɔ amɛmli kɛbaa lɛ anaa amɛwoɔ tsũi ni amɛmamɔ lɛ amli. Amɛjieɔ nui nɛɛ kɛjɛɔ tsatsubii nɛɛ amli, yɛ be mli ni tsatsubii asraafoi lɛ shwieɔ henyɛlɔi fɛɛ ni batutuaa amɛ lɛ kɛyaa lɛ. Akɛ ŋaawoo haa yɛ Abɛi 6:6 akɛ: “Hejɔ̃lɔ, yaa tsatsu ŋɔɔ; jwɛŋmɔ egbɛ̀i lɛ ahe ni ole nii.” Ani esaaa ni nɔkwɛmɔ nii ni tamɔ enɛɛmɛi tsirɛɔ wɔ adesai koni “[wɔteke] nɔ yɛ Nuntsɔ lɛ nitsumɔ lɛ mli”?—1 Korintobii 15:58.
Adesa efee kɔɔyɔŋ lɛji agboi. Shi kwɛ bɔ ni loofɔji, ni loofɔlɔ bibioo, hummingbird, ni tamɔ tiitra, ni tsiimɔ shɛɛɛ nɔ ko kwraa lɛ fata he lɛ, ahe yɔɔ oya ni amɛfilikiɔ kɛyaa kɛbaa! Ehe hiaa ni kɔɔyɔŋ lɛlɛ ni atsɛɔ lɛ Boeing 747 lɛ atere mu falɛ ni naa shɛɔ galɔŋ 47,000, ni kɔɔyɔŋ lɛlɛ kudɔlɔi ni atsɔse amɛ jogbaŋŋ akudɔ lɛ, ni ekɛ gbɛfaa tsɔnei ahe gbɛjianɔtoo ni yɔɔ haŋtsii hu atsu nii, dani ebaanyɛ efa gbɛ kɛfo ŋshɔ. Ni kɛlɛ, hummingbird loofɔlɔ bibioo nɛɛ hiaa emli fɔ ni tsiimɔ ji gram kome pɛ kɛha hewalɛ ni ekɛfiliki kɛjɛ Amerika Kooyigbɛ tɔ̃ɔ, aahu kɛfo Mexico Ŋshɔnine lɛ kɛbashɛ Amerika Wuoyigbɛ. Mu babaoo ni tsii, tsɔnei ni akɛfilikiɔ yɛ kɔɔyɔŋ he tsɔsemɔ, kɛ gbɛtsɔɔmɔ he woji ni yɔɔ haŋtsii loo kompiutai ahe ehiaaa lɛ! Ani nɛkɛ nyɛmɔ ni eyɔɔ nɛɛ jɛ sutsakemɔ nifeemɔ ko ni ba trukaa kɛkɛ mli? Eka shi faŋŋ akɛ dabi! Nɛkɛ loofɔlɔ bibioo nɛɛ yɛ henumɔŋ nilee, ni e-Feelɔ, Yehowa Nyɔŋmɔ kɛwo emli kɛha nakai feemɔ.
[Mfoniri ni yɔɔ baafa 10]
“Naanɔ Maŋtsɛ lɛ” adebɔɔ nibii sɔrɔtoi lɛ jieɔ enunyam lɛ yi
[Mfoniri ni yɔɔ baafa 15]
Taakɛ Mose kɛ Israel fɛɛ ye Yehowa kunimyeli lɛ he gbijurɔ yɛ Ŋshɔ Tsuru lɛ naa lɛ, nakai nɔŋŋ abaana miishɛɛ babaoo yɛ Harmagedon sɛɛ