Yitso 32

Akɛ Nyɔŋmɔ Mlifu Ba Naagbee

 1. Mɛni baaba mli yɛ be mli ni afɔse tɔi kpawo lɛ mli nii lɛ ashwie shi agbe naa kwraa lɛ, ni mɛɛ sanebimɔi teɔ shi agbɛnɛ yɛ tɔi lɛ ahe?

YOHANE etsɔɔ bɔfoi ni akɛ nitsumɔ ewo amɛdɛŋ akɛ amɛfɔse tɔi kpawo lɛ amɛshwie shi lɛ. Ekɛɔ wɔ akɛ nomɛi “ji naagbee nii lɛ, ejaakɛ nomɛi akɛbaagbe Nyɔŋmɔ mlila lɛ naa.” (Kpojiemɔ 15:1; 16:1) Esa akɛ afɔse nɛkɛ haomɔi nɛɛ, ni jieɔ nɔ ni Yehowa efa ni akɛba shikpɔŋ nɔ yɛ yiwalɛ ni yaa nɔ hewɔ lɛ ashwie shi kwraa kɛgbe naa. Kɛ amɛsɛɛ fo lɛ, ebaafee Nyɔŋmɔ kojomɔi ahe nii ni atsu agbe naa. Satan je lɛ baafee nɔ ni bɛ dɔŋŋ! Mɛni ji nɔ ni nɛkɛ haomɔi nɛɛ tsɔɔ kɛhaa adesai kɛ yiwalɛ nibii agbɛjianɔtoo ni yɔɔ nɛɛ nɔyelɔi lɛ? Te Kristofoi aaafee tɛŋŋ ni amɛjo haomɔi ni aaaba amɛkɛ jeŋ ni abu lɛ fɔ nɛɛ nɔ lɛ naa foi hu? Sanebimɔi ni he hiaa nɛ, ni agbɛnɛ abaaha hetoo. Mɛi fɛɛ ni shweɔ ni jalɛ nifeemɔ aye kunim lɛ baana nɔ ni Yohane naa kɛnyiɛɔ enɛ sɛɛ lɛ he miishɛɛ waa.

Yehowa Mlifu ni Ekɛteɔ Shi Ewoɔ “Shikpɔŋ Lɛ”

 2. Mɛni jɛ klɛŋklɛŋ bɔfo lɛ ni fɔse etɔ lɛ mli nii lɛ eshwie shikpɔŋ lɛ nɔ lɛ mli ba, ni “shikpɔŋ” lɛ feɔ mɛni he mfoniri?

² Klɛŋklɛŋ bɔfo lɛ je nifeemɔ shishi! “Ni klɛŋklɛŋ mɔ lɛ yiŋ etee, ni eyafɔse etɔ lɛ mli nii lɛ eshwie shikpɔŋ lɛ nɔ; ni mɛi ni kooloo lɛ okadi yɔɔ amɛhe lɛ kɛ mɛi ni jaa amaga lɛ famɔ faji fɔji ni waa mɔ he.” (Kpojiemɔ 16:2) Taakɛ eji yɛ klɛŋklɛŋ tɛtrɛmaŋtɛrɛ kpamɔ lɛ mli lɛ, “shikpɔŋ” ni yɔɔ biɛ lɛ damɔ shi kɛha maŋkwramɔŋ gbɛjianɔtoo ni tamɔ nɔ ni damɔ shi shiŋŋ ni Satan je shishi etswa ema shikpɔŋ nɛɛ nɔ kɛjɛ Nimrod be lɛ mli, nɔ ni fe afii 4,000 ni eho nɛ lɛ.—Kpojiemɔ 8:7.

 3. (a) Yɛ mɛɛ gbɛ nɔ nɔ ni nɔyelii pii ebi lɛ tamɔ jamɔ ni amɛmiibi kɛmiijɛ amɛshishi bii lɛ adɛŋ? (b) Mɛni jeŋmaji lɛ kɛba akɛ amɛkɛmiito Nyɔŋmɔ Maŋtsɛyeli lɛ najiaŋ, ni mɛni baa mɛi ni jaa enɛ lɛ anɔ?

³ Yɛ naagbee gbii nɛɛ amli lɛ, nɔyelii pii ebi nɔ ni yafeɔ jamɔ kɛjɛɔ eshishibii adɛŋ, ni amɛmaa nɔ mi akɛ esa akɛ awo Maŋ lɛ nɔ kɛteke Nyɔŋmɔ loo anɔkwale ni aaaye nɔ kroko. (2 Timoteo 3:1; okɛto Luka 20:25; Yohane 19:15 he.) Kɛjɛ 1914 kɛbaa nɛɛ nɔ ni afɔɔ feemɔ ji ni jeŋmaji lɛ abua amɛ obalaŋtai lɛ anaa koni amɛwuu tai, aloo amɛfee klalo akɛ amɛbaawuu ta, nɔ ni tamɔ jeŋ fɛɛ ta ni kɛ la ekpa ŋmɛnɛŋmɛnɛ beaŋ yinɔsane baafai amli fɛɛ lɛ. Agbɛnɛ, jeŋmaji lɛ kɛ nɔ ko ni akɛtoɔ Nyɔŋmɔ Maŋtsɛyeli lɛ najiaŋ eba yɛ Nuŋtsɔ lɛ gbi lɛ mli, kooloo lɛ amaga lɛ—Jeŋmaji Akpaŋmɔ lɛ kɛ esɛɛyelɔ, Jeŋmaji Ekomefeemɔ lɛ. Mɛɛ musubɔɔ saji awieɔ nɛkɛ, taakɛ nyɛsɛɛ bei nɛɛ amli paapai lɛ efee lɛ, ákɛ nɛkɛ gbɛjianɔtoo ni adesa fee nɛɛ ji jeŋmaji lɛ ahiɛnɔkamɔ kome pɛ kɛha toiŋjɔlɛ! Eteɔ shi ewoɔ Nyɔŋmɔ Maŋtsɛyeli lɛ kwraa. Mɛi ni jaa enɛ lɛ bafeɔ mɛi ni he tseee yɛ mumɔŋ, mɛi ni efamɔ faji, taakɛ bɔ ni Mizraimbii ni te shi amɛwo Yehowa yɛ Mose gbii lɛ amli lɛ hu famɔ faji diɛŋtsɛ ni waa mɔ he lɛ.—2 Mose 9:10, 11.

 4. (a) Klɛŋklɛŋ Nyɔŋmɔ mlifu tɔ lɛ mli nii lɛ maa mɛni nɔ mi waa? (b) Te Yehowa buɔ mɛi ni kpɛlɛɔ kooloo lɛ okadi lɛ nɔ lɛ ehaa tɛŋŋ?

⁴ Nɔ ni yɔɔ nɛkɛ tɔi nɛɛ amli lɛ maa nɔ ni ka adesai ahiɛ ni amɛbaahala lɛ nɔ mi waa. Esa akɛ amɛna nɔ akɛ mɛi ni je lɛ sumɔɔɔ amɛsane aloo ni amɛkɛ Yehowa mlifu akpe. Anyɛ adesai anɔ koni amɛkpɛlɛ kooloo lɛ okadi lɛ nɔ, kɛ yiŋtoo akɛ “mɔ ko nyɛɛɛ nɔ ko ahe loo ehɔɔ, akɛ ja mɔ ni yɔɔ okadi lɛ aloo kooloo lɛ gbɛi lɛ aloo egbɛi lɛ yibɔ lɛ kɛkɛ.” (Kpojiemɔ 13:16, 17) Shi toigbalamɔ ko yɛ ni baaba amɛnɔ yɛ enɛ hewɔ! Yehowa buɔ mɛi ni kpɛlɛɔ kadimɔ nii lɛ nɔ lɛ akɛ “amɛfamɔ faji fɔji ni waa mɔ he.” Kɛjɛ afi 1922 kɛbaa nɛɛ, akadi amɛ yɛ mɛi fɛɛ ahiɛ akɛ amɛkpoo Nyɔŋmɔ hiɛkalɔ lɛ. Amɛ maŋkwramɔŋ gbɛjianɔtoi lɛ yeee omanye, ni amɛmiipiŋ. Yɛ mumɔŋ gbɛfaŋ lɛ, amɛhe tseee. Kɛji akɛ amɛtsakeee amɛtsui lɛ, nɛkɛ hela “ni waa mɔ he” nɛɛ baagbe amɛ, ejaakɛ Yehowa gbi kɛha kojomɔ lɛ mli wɔyɔɔ nɛɛ. Teŋgbɛ he ko ni aaadamɔ bɛ ni aaaha mɔ ko afee je lɛŋ nibii agbɛjianɔtoo lɛ fa ni agbɛnɛ esɔmɔ Yehowa yɛ Kristo masɛi.—Luka 11:23; okɛto Yakobo 4:4 he.

Ŋshɔ lɛ Tsɔ La

 5. (a) Mɛni ba beni afɔse tɔ ni ji enyɔ lɛ mli nii lɛ ashwie shi lɛ? (b) Te Yehowa buɔ mɛi ni hiɔ okadi ŋshɔ lɛ mli lɛ tɛŋŋ?

⁵ Esa akɛ afɔse Nyɔŋmɔ mlifu tɔ ni ji enyɔ lɛ ashwie shi agbɛnɛ. Mɛni ji nɔ ni enɛ baatsɔɔ eha adesai? Yohane kɛɔ wɔ akɛ: “Ni bɔfo ni ji enyɔ lɛ fɔse etɔ lɛ mli nii lɛ ewo ŋshɔŋ; ni etsɔ la tamɔ gbonyo nɔ, ni nɔ fɛɛ nɔ ni hiɛ ka yɛ ŋshɔ lɛ mli lɛ gbo.” (Kpojiemɔ 16:3) Taakɛ tɛtrɛmaŋtɛrɛ kpamɔ ni ji enyɔ lɛ ji lɛ, akudɔɔ nɛkɛ tɔ nɛɛ ahaa “ŋshɔ”—adesai ni efee hoo, atuatselɔi ni amɛtse amɛhe kɛjɛ Yehowa he lɛ. (Yesaia 57:20, 21; Kpojiemɔ 8:8, 9) Yɛ Yehowa hiɛ lɛ, nɛkɛ “ŋshɔ” nɛɛ tamɔ lá, esaaa akɛ bɔɔ nii hiɔ mli. No hewɔ ni esaaa akɛ Kristofoi feɔ je lɛ fa lɛ. (Yohane 17:14) Nyɔŋmɔ mlifu tɔ ni ji enyɔ lɛ fɔsemɔ kɛ shishwiemɔ lɛ jieɔ lɛ kpo akɛ adesai fɛɛ ni hiɔ nɛkɛ ŋshɔ nɛɛ mli lɛ egboi yɛ Yehowa hiɛ. Yɛ sɔ ni akɛfɔɔ kuu nɔ lɛ hewɔ lɛ, adesai eye la ni efeko nɔ ko ni afɔse ashwie shi yaka lɛ he fɔ. Kɛ Yehowa mlifu gbi lɛ shɛ lɛ, amɛbaagboi diɛŋtsɛ yɛ eblafoi tabilɔi lɛ adɛŋ.—Kpojiemɔ 19:17, 18; okɛto Efesobii 2:1; Kolosebii 2:13 he.

La ni Akɛhaa Amɛ Koni Amɛnu

 6. Mɛni ba beni afɔse tɔ ni ji etɛ lɛ mli nii lɛ ashwie shi lɛ, ni mɛɛ ŋwɛibɔfo ko wiemɔ anu kɛ agbɛnɛ kɛmiijɛ afɔleshaa latɛ lɛ mli?

⁶ Nyɔŋmɔ mlifu tɔ ni ji etɛ lɛ na hewalɛ yɛ nui anɔ taakɛ tɛtrɛmaŋtɛrɛ kpamɔ ni ji etɛ lɛ fee lɛ. “Ni bɔfo ni ji etɛ lɛ fɔse etɔ lɛ mli nii lɛ ewo faai kɛ nu bui lɛ amli; ni nu lɛ tsɔ la. Ni minu nui lɛ anɔ bɔfo lɛ miikɛɛ: Jalɔ jio, Nuŋtsɔ [Yehowa], mɔ ni yɔɔ kɛ mɔ ni yɛ kɛ mɔ ni ji krɔŋkrɔŋ mɔ lɛ akɛni okojo nɛkɛ nɛɛ, ejaakɛ amɛshwie krɔŋkrɔŋbii lɛ kɛ gbalɔi lɛ ala shi, ni la nɔŋŋ oha amɛ amɛnu; esa amɛ nakai. Ni minu afɔleshaa latɛ lɛ miikɛɛ: Hɛɛ, Nuŋtsɔ [Yehowa] Nyɔŋmɔ Ofe, anɔkwa kɛ jalɛ ji okojomɔi lɛ.”—Kpojiemɔ 16:4-7.

 7. “Faai kɛ nu bui” lɛ feɔ mɛni he mfoniri?

⁷ Nɛkɛ “faai kɛ nu bui” nɛɛ feɔ nɔ ni akɛɛ atsɛɔ lɛ gbɛtsɔɔmɔ kɛ nilee jɛɛhe hee ni je nɛɛ kpɛlɛɔ nɔ lɛ, tamɔ maŋkwramɔŋ, shika he lɛtemɔ mli, jeŋ nilee, woloŋlee, kwasafo shihilɛ, kɛ jamɔ mli jeŋ nilee sɔrɔtoi ni kudɔɔ adesa nifeemɔi kɛ yiŋkpɛi lɛ. Ni amɛaakwɛ Yehowa, wala Nu Bu lɛ, kɛha anɔkwalei ni haa wala lɛ, gbɔmɛi ‘etsatsaa bui ni nyɛɛɛ nu ato amɛha amɛ diɛŋtsɛ amɛhe’ ni amɛnu “je nɛŋ nilee ni ji kwashiai asane yɛ Nyɔŋmɔ hiɛ lɛ” babaoo diɛŋtsɛ.—Yeremia 2:13; 1 Korintobii 1:19; 2:6; 3:19; Lala 36:10.

 8. Adesai eye la yi sɔ yɛ mɛɛ gbɛi anɔ?

⁸ Nɛkɛ “nui” ni mli ewo muji nɛɛ enyiɛ gbɔmɛi lɛ ahiɛ kɛtee la yi sɔyeli he, akɛ nɔkwɛmɔnɔ lɛ, yɛ hewalɛ ni amɛwoɔ amɛ koni amɛfɔse la amɛshwie shi babaoo yɛ tai ni egbe gbɔmɛi fe akpekpei oha yɛ afii oha ni ho lɛ mli lɛ mli. Kristendom titri, he ni jeŋ tai enyɔ lɛ je shishi yɛ lɛ ji he ni gbɔmɛi “yeɔ oyai kɛ la ni eye bem lɛ shishwiemɔ yɛ,” ni nɔ ni fata enɛ he ji Nyɔŋmɔ diɛŋtsɛ odasefoi lɛ ala. (Yesaia 59:7; Yeremia 2:34) Adesai hu eye la yi sɔ yɛ la babaoo ni agbalaa awoɔ mɛi amli yaka, ni akɛkuɔ Yehowa jalɛ mlai amli lɛ hewɔ. (1 Mose 9:3-5; 3 Mose 17:14; Bɔfoi lɛ Asaji 15:28, 29) Yɛ enɛ hewɔ lɛ, awerɛho eba amɛnɔ momo po, kɛtsɔ la ni amɛgbalaa amɛwoɔ mɛi amli ni no hu haa AIDS helai, mlɛbo mli helai, kɛ helai krokomɛi gbɛɔ shwaa babaoo lɛ. Etsɛŋ ni la yi sɔyeli he nyɔmɔwoo ni yeɔ emuu baaba yɛ be mli ni akɛ toigbalamɔ ni da fe fɛɛ gbalaa mɛi ni etɔ yɛ enɛ mli lɛ atoi, ni anaanaa amɛnɔ yɛ “Nyɔŋmɔ mlila lɛ weinŋaanɔ kpeteŋkpele lɛ mli lɛ.”—Kpojiemɔ 14:19, 20.

 9. Tɔ ni ji etɛ ni afɔse ashwie shi lɛ kɔɔ mɛni he?

⁹ Yɛ Mose gbii lɛ amli, beni Nilo Faa lɛ tsɔ la lɛ, Mizraimbii lɛ yatao nui krokomɛi amɛnu koni amɛkɛhi wala mli. (2 Mose 7:24) Shi ŋmɛnɛ, he ko he ko bɛ Satan je nɛɛ mli ni gbɔmɛi baana nui hi haa wala lɛ yɛ, yɛ mumɔŋ haomɔ nɛɛ mli. Nɔ ni yɔɔ tɔ ni ji etɛ nɛɛ mli ni afɔseɔ ashwieɔ shi lɛ ji jajemɔ ni ajajeɔ akɛ je lɛ “faai kɛ nu bui” lɛ etsɔ la, ni ekɛ mumɔŋ gbele baa mɛi fɛɛ ni nuɔ lɛ anɔ. Kɛ gbɔmɛi tsɔɔɔ amɛhe kɛbaaa Yehowa ŋɔɔ lɛ, efɔbuu kojomɔ nɛɛ ji nɔ ni amɛbaakpa.—Okɛto Ezekiel 33:11 he.

10. Mɛni “nui lɛ anɔ bɔfo” lɛ ha ale, ni mɛɛ odaseyeli “afɔleshaa latɛ” lɛ kɛfataa he?

¹⁰ “Nui lɛ anɔ bɔfo lɛ,” ni ji akɛ, bɔfo ni fɔse etɔ lɛ mli nii lɛ eshwie nui lɛ anɔ lɛ, jieɔ Yehowa yi akɛ Jeŋ Muu Fɛɛ Kojolɔ, mɔ ni ejalɛ kojomɔi lɛ ji anɔkwa. No hewɔ lɛ, ewieɔ yɛ nɛkɛ kojomɔ nɛɛ he akɛ: “Esa amɛ nakai.” Ŋwanejee ko bɛ he akɛ bɔfo lɛ diɛŋtsɛ kɛ ehiŋmɛi na lashishwiemɔ kɛ yiwalɛ babaoo ni apasa tsɔɔmɔi kɛ yiwalɛ jeŋ nɛɛ mli nilee kɛba yɛ afii akpei abɔ ni eho lɛ amli lɛ. No hewɔ lɛ, ele akɛ Yehowa kojomɔ lɛ ja. Nyɔŋmɔ “afɔleshaa latɛ” lɛ po wie. Yɛ Kpojiemɔ 6:9, 10 lɛ, akɛɛ akɛ mɛi ni agbe amɛ lɛ asusumai yɛ afɔleshaa latɛ lɛ shishi. No hewɔ lɛ “afɔleshaa latɛ” lɛ kɛ odaseyeli ni mli wa ni kɔɔ bɔ ni Yehowa jalɛsaneyeli kɛ jalɛ nifeemɔ lɛ ja ha lɛ haa.a Eka shi faŋŋ akɛ, esa akɛ anyɛ mɛi ni amɛfɔse la babaoo amɛshwie shi ni amɛkɛtsu nii yɛ gbɛ ni ejaaa nɔ nɛɛ anɔ ni amɛ diɛŋtsɛ lɛ amɛye nɛkɛ la nɛɛ, ni akɛfee gbele fɔbuu ni Yehowa kɛbaa amɛnɔ lɛ he mfoniri.

La ni Akɛshaa Gbɔmɛi

11. Mɛni ji nɔ diɛŋtsɛ ni afɔseɔ Nyɔŋmɔ mlifu tɔ ni ji ejwɛ lɛ mli nii lɛ ashwieɔ nɔ, ni mɛni ba beni afɔse ashwie shi lɛ?

¹¹ Oti ni ma Nyɔŋmɔ mlifu tɔ ni ji ejwɛ lɛ hiɛ ji hulu lɛ. Yohane kɛɔ wɔ akɛ: “Ni bɔfo ni ji ejwɛ lɛ fɔse etɔ lɛ mli nii lɛ eshwie hulu nɔ; ni aha lɛ hewalɛ ni ekɛ la asha gbɔmɛi. Ni edɔlɛ babaoo lɛ sha gbɔmɛi, ni amɛwie musubɔɔ wiemɔi amɛshi Nyɔŋmɔ ni yɔɔ hewalɛ yɛ nɛkɛ haomɔi nɛɛ anɔ lɛ gbɛi lɛ, ni amɛtsakeee amɛtsui ni amɛwo ehiɛ nyam.”—Kpojiemɔ 16:8, 9.

12. Mɛni ji je lɛ “hulu” lɛ, ni mɛni akɛha okadi hulu nɛɛ akɛ efee?

¹² Ŋmɛnɛ, yɛ nibii agbɛjianɔtoo nɛɛ naagbee lɛ, Yesu mumɔŋ nyɛmimɛi lɛ “kpɛɔ tamɔ hulu yɛ amɛ-Tsɛ maŋtsɛyeli lɛ mli.” (Mateo 13:40, 43, New World Translation.) Yesu diɛŋtsɛ ji “jalɛ hulu.” (Maleaki 4:2) Shi adesai diɛŋtsɛ yɛ amɛ “hulu,” amɛ diɛŋtsɛ amɛ nɔyelɔi ni bɔɔ mɔdɛŋ akɛ amɛaakpɛ ni amɛkɛte shi amɛwo Nyɔŋmɔ Maŋtsɛyeli lɛ. Tɛtrɛmaŋtɛrɛ kpamɔ ni ji ejwɛ lɛ jaje akɛ ‘hulu, nyɔŋtsere, kɛ ŋulamii’ ni yɔɔ Kristendom ŋwɛi lɛ ji duŋ kpii jɛɛhe diɛŋtsɛ, shi jeee la ni kpɛɔ. (Kpojiemɔ 8:12) Nyɔŋmɔ mlifu tɔ ni ji ejwɛ lɛ tsɔɔ agbɛnɛ akɛ je lɛ “hulu” lɛ baadɔ babaoo ni anyɛŋ naa adamɔ. Mɛi ni akɛ hiɛ fɔɔ amɛnɔ akɛ hiɛnyiɛlɔi ni tamɔ hulu lɛ “baasha” adesai. Akɛ hegbɛ ni tamɔ nɛkɛ baaha okadi hulu lɛ. Yɛ gbɛ kroko nɔ lɛ, Yehowa baaŋmɛ enɛ gbɛ akɛ ekojomɔ ni tamɔ la ni ekɛbaa adesai anɔ lɛ fa. Nɛkɛ sha ni ashaa mɛi nɛɛ etee nɔ yɛ mɛɛ gbɛ nɔ?

13. Je nɛŋ nɔyelɔi ni tamɔ hulu lɛ “esha” gbɔmɛi lɛ yɛ mɛɛ gbɛ nɔ?

¹³ Yɛ klɛŋklɛŋ jeŋ ta lɛ sɛɛ lɛ, je nɛŋ nɔyelɔi lɛ to Jeŋmaji Akpaŋmɔ lɛ koni amɛkɛbɔ mɔdɛŋ ni amɛna je lɛ shweshweeshwe shihilɛ he tsabaa, shi amɛnine nyɛ shi. No hewɔ lɛ amɛka nɔyelii krokomɛi amɛkwɛ, tamɔ Fascist Nɔyeli kɛ Nazi Nɔyeli. Komunisim mlilɛɛmɔ lɛ tee nɔ. Ni eeeha adesai ashihilɛ aaahi moŋ lɛ, nɔyelɔi ni tamɔ hulu ni yɔɔ gbɛjianɔtoi nɛɛ amli lɛ je shishi akɛ ‘amɛkɛ dɔlɛ ni naa wa aaasha adesai.’ Tai ni ba Spania, Ethiopia, kɛ Manchuria tee jeŋ ta ni ji enyɔ lɛ shi. Ŋmɛnɛŋmɛnɛ beaŋ yinɔsane eŋma akɛ Mussolini, Hitler kɛ Stalin ni batsɔmɔ nɔyelɔi yiwalɔi lɛ bafee mɛi ni gbɔmɛi akpekpei nyɔŋmai abɔ agbele, ni amɛ diɛŋtsɛ amɛmaŋ bii fata he lɛ jɛ amɛ aloo amɛnɔ atsɔ ni akɛ enɛ ba. Yɛ nyɛsɛɛ nɛɛ nɔŋŋ lɛ, majimaji ateŋ bei loo maŋ teŋ bei “esha” maji tamɔ Vietnam, Kampuchea, Iran, Lebanon kɛ Ireland mli gbɔmɛi lɛ, kɛ agbɛnɛ maji ni yɔɔ Latin Amerika kɛ Afrika. Okɛ mpleshii ni yaa nɔ yɛ jeŋ hewalɛi wuji lɛ ni kɛ nuklea tawuu nii ni yɔɔ gbeyei ewula amɛhe ni baanyɛ akpata adesai fɛɛ ahiɛ lɛ afata he okwɛ. “Hulu” ni ji nɔyelɔi ni ejaaa lɛ esha adesai yɛ nɛkɛ naagbee gbii nɛɛ amli. Nyɔŋmɔ mlifu tɔ ni ji ejwɛ lɛ mli nii ni afɔse ashwie shi lɛ etsɔɔ nɛkɛ yinɔsane mli anɔkwalei nɛɛ, ni Nyɔŋmɔ webii ejaje amɛ kɛkpa shikpɔŋ muu lɛ fɛɛ nɔ.

14. Mɛni Yehowa Odasefoi etee nɔ etsɔɔ akɛ no pɛ ji adesai anaagbai lɛ anaa tsabaa, ni te adesai fɛɛ ehere enɛ nɔ amɛha tɛŋŋ?

¹⁴ Yehowa Odasefoi etee nɔ etsɔɔ akɛ adesai ahaomɔi ni amɛnaaa naa lɛ anaa tsabaa kome pɛ ji Nyɔŋmɔ Maŋtsɛyeli lɛ ni Yehowa eto eyiŋ akɛ ebaatsɔ nɔ etse egbɛi lɛ he lɛ. (Lala 83:5, 18, 19; Mateo 6:9, 10) Shi adesai, etsimɔ amɛtoi yɛ nɛkɛ tsabaa nɛɛ he. Mɛi ni kpooɔ Maŋtsɛyeli lɛ ateŋ mɛi pii hu wieɔ Nyɔŋmɔ gbɛi lɛ he musubɔɔ wiemɔ, taakɛ Farao fee beni ekpoo akɛ eeekpɛlɛ maŋtsɛ ni Yehowa ji lɛ nɔ lɛ. (2 Mose 1:8-10; 5:2) Akɛni amɛbɛ Mesia Maŋtsɛyeli lɛ he miishɛɛ ko hewɔ lɛ, nɛkɛ shitee-kɛ-wolɔi nɛɛ ehala akɛ amɛaana nɔ yɛ amɛ diɛŋtsɛ amɛ “hulu” ni ji adesa nɔyelii ni waa amɛyi ni shaa amɛ lɛ shishi.

Kooloo lɛ Maŋtsɛsɛi Lɛ

15. (a) Mɛni nɔ afɔse mlifu tɔ ni ji enumɔ lɛ ashwie? (b) Mɛni ji “kooloo lɛ maŋtsɛsɛi” lɛ, ni tɔ lɛ mli nii ni afɔse ashwie nɔ lɛ tsɔɔ mɛni?

¹⁵ Mɛni nɔ bɔfo ni nyiɛ sɛɛ lɛ fɔse etɔ lɛ mli nii lɛ eshwie? “Ni bɔfo ni ji enumɔ lɛ fɔse etɔ lɛ mli nii lɛ eshwie kooloo lɛ maŋtsɛsɛi lɛ nɔ.” (Kpojiemɔ 16:10a) “Kooloo” lɛ ji Satan nɔyeli gbɛjianɔtoo lɛ. Ebɛ maŋtsɛsɛi diɛŋtsɛ, taakɛ bɔ ni kooloo lɛ jeee kooloo diɛŋtsɛ lɛ. No hewɔ lɛ kɛ atsi maŋtsɛsɛi ta lɛ, etsɔɔ akɛ kooloo lɛ eye adesai anɔ hewalɛ akɛ maŋtsɛ; enɛ kɛ anɔkwale ni eji akɛ maŋtsɛfaii bumɔ kooloo lɛ akolontoi lɛ eko fɛɛ eko nɔ lɛ kpaa gbee. Yɛ anɔkwale mli lɛ, “kooloo lɛ maŋtsɛsɛi” lɛ ji nakai hegbɛ lɛ shishitoo loo ejɛɛhe.b Biblia lɛ jieɔ bɔ ni kooloo lɛ nɔyeli hewalɛ lɛ ji diɛŋtsɛ lɛ kpo beni ekɛɔ akɛ “ni drako lɛ ŋɔ lɛ diɛŋtsɛ ehewalɛ kɛ emaŋtsɛsɛi lɛ kɛ hegbɛ kpeteŋkpele eha lɛ” lɛ. (Kpojiemɔ 13:1, 2; 1 Yohane 5:19) No hewɔ lɛ tɔ lɛ mli nii ni afɔse ashwie kooloo lɛ maŋtsɛsɛi lɛ nɔ lɛ kɔɔ sane jajemɔ ni jieɔ nɔ ni Satan etsu diɛŋtsɛ ni ekãa he etsuɔ ni ekɛfiɔ kooloo lɛ sɛɛ lɛ kpo.

16. (a) Namɔ jeŋmaji lɛ sɔmɔɔ lɛ kɛ amɛle aloo amɛleee hu lɛ? Tsɔɔmɔ mli. (b) Je lɛ jieɔ Satan su kɛ baŋ kpo etsɔɔ yɛ mɛɛ gbɛ nɔ? (d) Mɛɛ be mli abaabutu kooloo lɛ maŋtsɛsɛi lɛ?

¹⁶ Mɛɛ gbɛ nɔ atsɔɔ ahiɛɔ wekukpaa ni ka Satan kɛ jeŋmaji lɛ ateŋ lɛ mli yɛ? Beni Satan ka Yesu lɛ, etsɔ ninaa mli etsɔɔ lɛ je nɛŋ maŋtsɛyelii lɛ fɛɛ akɛ ekɛ “nɛkɛ hegbɛ nɛɛ fɛɛ kɛ amɛnunyam lɛ” baaha lɛ. Shi ja efee nɔ ko da—klɛŋklɛŋ lɛ esa akɛ Yesu kɛ ehe awo jamɔ nifeemɔ ko mli yɛ Satan hiɛ. (Luka 4:5-7) Ani wɔsusuɔ akɛ je lɛŋ nɔyelii lɛ anine baashɛ amɛhegbɛ nɔ yɛ jara ni baa shi naa? Dabi kwraa. Taakɛ Biblia lɛ tsɔɔ lɛ, Satan ji nibii agbɛjianɔtoo nɛɛ Nyɔŋmɔ, no hewɔ lɛ, kɛji akɛ jeŋmaji lɛ le jio, amɛleee jio, lɛ ji mɔ ni amɛsɔmɔɔ. (2 Korintobii 4:3, 4)c Shihilɛ nɛɛ jeɔ kpo yɛ bɔ ni ato ŋmɛnɛŋmɛnɛ jeŋ gbɛjianɔtoo ni atswa ama maŋhedɔɔ ni kwɛɛɛ nii kɛyaaa shɔŋŋ, hetsɛ kɛ hesuɔmɔ nɔ lɛ he gbɛjianɔ aha lɛ nɔ. Ato he gbɛjianɔ yɛ bɔ ni Satan sumɔɔ lɛ lɛ nɔ—koni eha adesai ahi ekudɔmɔ shishi. Juu kɛ fɔ ni yaa nɔ yɛ nɔyeli mli, hewalɛ he akɔnɔ, maŋ saneyeli he ŋaa ni maleɔ, kɛ tawuu nii afeemɔ he foidamɔ lɛ—enɛɛmɛi fɛɛ jieɔ Satan su kɛ baŋ ni eba shi lɛ kpo. Je lɛ kpɛlɛɔ Satan tɛi ni efolɔ eshwie shi ni ejaaa lɛ anɔ, no hewɔ lɛ efeɔ lɛ enyɔŋmɔ. Abaabutu kooloo lɛ maŋtsɛsɛi lɛ beni akpataa nakai kooloo lɛ hiɛ kwraa kɛyaa naanɔ ni Nyɔŋmɔ yoo lɛ Seshi lɛ kɛ Satan diɛŋtsɛ woɔ bu kwɔŋkwɔŋ lɛ mli yɛ naagbee lɛ.—1 Mose 3:15; Kpojiemɔ 19:20, 21; 20:1-3.

Duŋ kɛ Piŋmɔ ni Tamɔ Lilɛi Kɔɔmɔ

17. (a) Tɔ ni ji enumɔ lɛ mli nii ni afɔse ashwie shi lɛ kɔɔ mumɔŋ duŋ ni eha kooloo lɛ maŋtsɛyeli lɛ he yɛ be fɛɛ mli lɛ he yɛ mɛɛ gbɛ nɔ? (b) Te gbɔmɛi feɔ amɛnii yɛ Nyɔŋmɔ mlifu tɔ ni ji enumɔ ni afɔse ashwie shi lɛ he amɛhaa tɛŋŋ?

¹⁷ Kooloo nɛɛ maŋtsɛyeli lɛ ehi mumɔŋ duŋ mli kɛjɛ eshishijee. (Okɛto Mateo 8:12; Efesobii 6:11, 12 he.) Tɔ ni ji enumɔ lɛ kɛ nɛkɛ duŋ nɛɛ he adafitswaa ni mli wa ba. Efee he nɔkwɛmɔnɔ po, ni no ji akɛ afɔseɔ nɛkɛ Nyɔŋmɔ mlifu tɔ nɛɛ mli nii lɛ ashwieɔ okadi kooloo lɛ maŋtsɛsɛi lɛ diɛŋtsɛ nɔ. “Ni emaŋtsɛyeli he lɛ wo duŋ, ni amɛkɔmɔ amɛlilɛi yɛ nɔnaa lɛ hewɔ. Ni amɛwie musubɔɔ wiemɔi amɛshi ŋwɛi Nyɔŋmɔ lɛ yɛ amɛnɔnai lɛ kɛ amɛfaji lɛ ahewɔ, ni amɛtsakeee amɛtsui kɛjɛɛɛ amɛ nitsumɔi lɛ amli.”—Kpojiemɔ 16:10b, 11.

18. Tɛtrɛmaŋtɛrɛ kpamɔ ni ji enumɔ lɛ kɛ Nyɔŋmɔ mlifu tɔ ni ji enumɔ lɛ ni afɔse ashwie shi lɛ je amɛhe yɛ mɛɛ gbɛ nɔ?

¹⁸ Tɛtrɛmaŋtɛrɛ kpamɔ ni ji enumɔ lɛ tamɔɔɔ Nyɔŋmɔ mlifu tɔ ni ji enumɔ lɛ pɛpɛɛpɛ, ejaakɛ tɛtrɛmaŋtɛrɛ kpamɔ lɛ tswa baalabii ahaomɔ ni baaba he adafi. Shi kadimɔ akɛ be mli ni baalabii lɛ ahaomɔ lɛ je shishi lɛ, hulu kɛ atatuiaŋ wo duŋ. (Kpojiemɔ 9:2-5) Ni wɔkaneɔ baalabii ni Yehowa kɛhao Mizraim lɛ he sane yɛ 2 Mose 10:14, 15 akɛ: “Ni baalabii lɛ ba Mizraim shikpɔŋ lɛ fɛɛ nɔ, ni amɛbashwie Mizraim kpokpai lɛ fɛɛ nɔ nyɛŋɛnyɛŋɛ, baalabii lɛ eko bako da ni tamɔ amɛ, ni amɛsɛɛ nɛɛ hu eko baŋ nakai dɔŋŋ. Ejaakɛ amɛha shikpɔŋ muu lɛ fɛɛ hiɛ ni shikpɔŋ lɛ nɔ wo duŋ.” Hɛɛ, duŋ! Ŋmɛnɛ, je lɛ mumɔŋ duŋ lɛ eje kpo faŋŋ yɛ tɛtrɛmaŋtɛrɛ kpamɔ ni ji enumɔ lɛ kɛ Nyɔŋmɔ mlifu tɔ ni ji enumɔ lɛ mli nii ni afɔse ashwie shi lɛ hewɔ. Shɛɛ saji ni tsurɔɔ mɔ ni ŋmɛnɛŋmɛnɛ beaŋ baalabii lɛ jajeɔ lɛ kɛ haomɔ kɛ piŋmɔ baa mɛi fɔji lɛ ni “sumɔɔ duŋ lɛ moŋ fe la lɛ” anɔ.—Yohane 3:19.

19. Yɛ Kpojiemɔ 16:10, 11 kɛ gbeekpamɔ naa lɛ, Satan ni akpaa ehe mama yɛ mɛi fɛɛ ahiɛ akɛ lɛ ji nibii agbɛjianɔtoo nɛɛ nyɔŋmɔ lɛ kɛ mɛni baa?

¹⁹ Akɛ jeŋ nɔyelɔ lɛ, Satan kɛ miishɛɛ ni bɛ kɛ piŋmɔ babaoo eba. Hɔmɔ, tai, awuiyeli, efɔŋfeemɔ, tsofai fɔji ni akɛtsuɔ nii, jeŋba shara, bɔlɛnamɔ mli helai ni gbɛɔ shwaa, anɔkwale ni ayeee, jamɔ mli osatofeemɔ—enɛɛmɛi kɛ babaoo ji Satan nibii agbɛjianɔtoo lɛ kadimɔ nii. (Okɛto Galatabii 5:19-21 he.) Yɛ enɛɛmɛi fɛɛ sɛɛ lɛ, Satan he mama ni akpaa akɛ gbɛjianɔtoo nɛɛ nyɔŋmɔ lɛ kɛ piŋmɔ kɛ hiɛgbele baa mɛi ni hiɔ shi yɛ etɛi ni efolɔ eshwie shi lɛ anaa lɛ anɔ. “Amɛkɔmɔɔ amɛlilɛii yɛ nɔnaa lɛ hewɔ,” titri yɛ Kristendom. Mɛi pii hiɔ anɔkwale lɛ ni kpaa amɛshihilɛ he mama lɛ. Mɛi komɛi susuɔ akɛ eewo amɛhe gbeyei, ni amɛwaa mɛi ni jajeɔ sane nɛɛ ayi. Amɛkpoɔ Nyɔŋmɔ Maŋtsɛyeli lɛ ni amɛbɔɔ Yehowa gbɛi krɔŋkrɔŋ lɛ ahora. Akpaa amɛ jamɔŋ helai ni ehiii tsamɔ shihilɛ lɛ he mama, no hewɔ lɛ amɛwieɔ musubɔɔ wiemɔi amɛshiɔ ŋwɛi Nyɔŋmɔ lɛ. Dabi, “amɛtsakeee amɛtsui kɛjɛɛɛ amɛnitsumɔi lɛ amli.” No hewɔ lɛ wɔnyɛŋ wɔkpa mɛi fɛɛ atsuitsakemɔ gbɛ dani nibii agbɛjianɔtoo nɛɛ aba naagbee.—Yesaia 32:6.

Eufrate Faa lɛ Mii

20. Tɛtrɛmaŋtɛrɛ kpamɔ ni ji ekpaa lɛ kɛ tɔ ni ji ekpaa lɛ mli nii ni afɔse ashwie shi lɛ fɛɛ kɔɔ Eufrate faa lɛ he yɛ mɛɛ gbɛ nɔ?

²⁰ Tɛtrɛmaŋtɛrɛ kpamɔ ni ji ekpaa lɛ tswa bɔ ni afɛne “bɔfoi ejwɛ lɛ ni afimɔ yɛ Eufrate faa kpeteŋkpele lɛ naa” lɛ he adafi. (Kpojiemɔ 9:14) Yɛ yinɔsane mli lɛ, Babilon ji maŋ kpeteŋkpele lɛ ni ta Eufrate faa lɛ nɔ lɛ. Ni yɛ 1919 lɛ, okadi ŋwɛibɔfoi ejwɛ lɛ ni afɛne amɛ lɛ kɛ nɔ ko fata Babilon Kpeteŋkpele lɛ shigbeemɔ lɛ he ba. (Kpojiemɔ 14:8) Nɔ ni sa kadimɔ hu ji akɛ, Nyɔŋmɔ mlifu tɔ ni ji ekpaa lɛ hu kɔɔ Eufrate faa lɛ he: “Ni bɔfo ni ji ekpaa lɛ fɔse etɔ lɛ mli nii lɛ ewo Eufrate faa kpeteŋkpele lɛ mli; ni emli nu lɛ mii, koni akɛsaa gbɛ aha maŋtsɛmɛi ni jɛ hulu shitee he lɛ.” (Kpojiemɔ 16:12) Enɛ hu ji sane fɔŋ kɛha Babilon Kpeteŋkpele lɛ!

21, 22. (a) Eufrate faa lɛ mli nui ni buɔ Babilon he lɛ mii ni egbi yɛ 539 D.Ŋ.B. yɛ mɛɛ gbɛ nɔ? (b) Mɛni ji “nui” ni Babilon Kpeteŋkpele lɛ ta nɔ lɛ, ni nɛkɛ okadi nui nɛɛ miitã bianɛ po yɛ mɛɛ gbɛ nɔ?

²¹ Beni blema Babilon yeɔ nɔ lɛ, no mli lɛ Eufrate faa lɛ mli nui babaoo lɛ ji gbɛjianɔtoo ni ekɛfaa ehe lɛ fa titri. Nakai nui lɛ mii yɛ afi 539 D.Ŋ.B., beni Persia nɔyelɔ Koresh kudɔ emli nui lɛ kɛtsɔ he kroko lɛ. No hewɔ lɛ, gbɛ baka kɛha Koresh, Persianyo lɛ kɛ Dario, Medianyo, ni ji maŋtsɛmɛi “ni jɛ hulu shitee he lɛ,” (ni ji akɛ, bokagbɛ lɛ), koni amɛbote Babilon ni amɛye enɔ kunim. Eufrate faa lɛ nyɛɛɛ afa nakai maŋ kpeteŋkpele lɛ he yɛ ehiamɔ be lɛ mli. (Yesaia 44:27-45:7; Yeremia 51:36) Nɔ ko ni tamɔ nakai miihe aba ŋmɛnɛŋmɛnɛ beaŋ Babilon, jeŋ fɛɛ apasa jamɔ gbɛjianɔtoo lɛ nɔ.

²² Babilon Kpeteŋkpele lɛ “ta nui babaoo anɔ.” Taakɛ Kpojiemɔ 17:1, 15 tsɔɔ lɛ, enɛ feɔ “maji kɛ asafoi kɛ jeŋmaji kɛ majianɔwiemɔi”—gbɔmɛi babaoo ni nyiɛɔ esɛɛ ni ebuɔ amɛ akɛ ehefamɔ nii lɛ ahe mfoniri. Shi “nui” lɛ miimii loo eegbi! Yɛ Europa Anaigbɛ, he ni tsutsu lɛ enaa mɛi pii anɔ hewalɛ yɛ lɛ, gbɔmɛi akpekpei ohai abɔ eku amɛhiɛ amɛshwie jamɔ nɔ yɛ faŋŋ mli. Yɛ maji komɛi anɔ lɛ, aje gbɛ ato yiŋ ni abɔ mɔdɛŋ afite hewalɛ ni Nyɔŋmɔ jamɔ yɔɔ lɛ yɛ afii babaoo mli. Gbɔmɛi ni yɔɔ nakai shikpɔji lɛ anɔ lɛ eteko shi akɛ amɛaafi esɛɛ. Nakai nɔŋŋ hu kɛ be lɛ shɛ kɛha Babilon Kpeteŋkpele lɛ hiɛkpatamɔ lɛ, emlibii ni tãa lɛ efeŋ hefamɔ nɔ ko kwraa kɛhaŋ lɛ. (Kpojiemɔ 17:16) Eyɛ mli akɛ ekɛɔ akɛ emlibii shɛɔ gbɔmɛi akpekpei toi akpei abɔ moŋ, shi Babilon Kpeteŋkpele lɛ baana ehe akɛ ebɛ nɔ ni ekɛbaafa ehe yɛ “maŋtsɛmɛi ni jɛ hulu shitee he” lɛ ni tutuaa lɛ lɛ mli.

23. (a) Namɛi ji maŋtsɛmɛi ni jɛ “hulu shitee he” lɛ yɛ afi 539 D.Ŋ.B. lɛ? (b) Namɛi ji “maŋtsɛmɛi ni jɛ hulu shitee he” lɛ yɛ Nuŋtsɔ lɛ gbi lɛ mli lɛ, ni mɛɛ gbɛ nɔ amɛbaatsɔ ni amɛkpata Babilon Kpeteŋkpele lɛ hiɛ yɛ?

²³ Namɛi ji nɛkɛ maŋtsɛmɛi nɛɛ? Yɛ afi 539 D.Ŋ.B. lɛ, no mli lɛ amɛji Dario, Medianyo lɛ kɛ Koresh, Persianyo lɛ, ni Yehowa kɛ amɛ tsu nii koni amɛye blema Babilon maŋtiase lɛ nɔ kunim lɛ. Yɛ Nuŋtsɔ lɛ gbi nɛɛ mli lɛ, adesai nɔyelɔi hu baakpata apasa jamɔ gbɛjianɔtoo ni ji Babilon Kpeteŋkpele lɛ hiɛ. Ni agbɛnɛ, enɛ hu baafee ŋwɛi kojomɔ. Yehowa Nyɔŋmɔ kɛ Yesu Kristo, “maŋtsɛmɛi ni jɛ hulu shitee he” lɛ kɛ “yiŋtoo” baawo adesai nɔyelɔi lɛ atsuiiaŋ koni amɛte shi amɛwo Babilon Kpeteŋkpele lɛ ni amɛkpata ehiɛ kwraa. (Kpojiemɔ 17:16, 17) Mlifu tɔ ni ji ekpaa lɛ ni afɔseɔ ashwieɔ shi lɛ jajeɔ yɛ faŋŋ mli akɛ aahe atsu nɛkɛ fɔbuu kojomɔ nɛɛ he nii!

24. (a) Ajaje Yehowa mlifu tɔi lɛ mli klɛŋklɛŋ ekpaa lɛ mli nii lɛ atsɔɔ yɛ faŋŋ mli yɛ mɛɛ gbɛ nɔ, ni mɛni ejɛ mli eba? (b) Dani eeegba wɔ Nyɔŋmɔ mlifu tɔ ni eshwɛ lɛ he sane lɛ, mɛni Kpojiemɔ jieɔ lɛ kpo?

²⁴ Yehowa mlifu tɔi lɛ amli klɛŋklɛŋ ekpaa nɛɛ hiɛ saji ni hiɛdɔɔ yɔɔ mli. Nyɔŋmɔ tsuji ni yɔɔ shikpɔŋ nɔ, ni ŋwɛibɔfoi fiɔ amɛsɛɛ lɛ kɛ hiɛdɔɔ ejaje emli saji lɛ yɛ shikpɔŋ muu lɛ fɛɛ nɔ. Atsɔ nɛkɛ gbɛ nɔ akɛ kɔkɔbɔɔ ni sa eha Satan jeŋ gbɛjianɔtoo lɛ fai lɛ fɛɛ, ni Yehowa kɛ hegbɛ eha aŋkroaŋkroi koni amɛtsɔ amɛhe kɛya jalɛ nifeemɔ he ni amɛya nɔ amɛhi wala mli. (Ezekiel 33:14-16) Ni kɛlɛ, Nyɔŋmɔ mlifu tɔ lɛ ekome eshwɛ lolo. Shi dani eeegba wɔ enɛ he sane lɛ, Kpojiemɔ jieɔ bɔ ni Satan kɛ eshikpɔŋ nɔ najiaŋdamɔlɔi lɛ bɔɔ mɔdɛŋ ni amɛte shi amɛwo Yehowa kojomɔi nɛɛ ni amɛjajeɔ lɛ kpo.

Naabuamɔ Kɛmiiya Harmagedon

25. (a) Mɛni Yohane kɛɔ wɔ yɛ “mumɔi fɔji” ni he tseee ni tamɔ kɔkɔdenei lɛ ahe? (b) Yɛ mɛɛ gbɛ nɔ “mumɔi fɔji” ni he tseee ni tamɔ kɔkɔdenei eba yɛ Nuŋtsɔ lɛ gbi lɛ mli, ni mɛni ejɛ mli eba?

²⁵ Yohane kɛɔ wɔ akɛ: “Ni mina mumɔi fɔji etɛ tamɔ kɔkɔdenei miije kpo kɛmiijɛ drako lɛ daaŋ kɛ kooloo lɛ daaŋ kɛ amale gbalɔ lɛ daaŋ; ejaakɛ daimonioi amumɔi ji amɛ, ni amɛfeɔ okadii, ni amɛyaa maŋtsɛmɛi ni yɔɔ jeŋ muu lɛ fɛɛ lɛ aŋɔɔ, koni amɛyabua amɛnaa kɛya Nyɔŋmɔ Ofe lɛ gbi wulu lɛ nɔ ta lɛ.” (Kpojiemɔ 16:13, 14) Yɛ Mose gbii lɛ amli lɛ, Yehowa kɛ kɔkɔdenei ahaomɔ ko ni anyaŋeɔ ba Farao Mizraim nɔ, no hewɔ lɛ eha “shikpɔŋ lɛ nɔ je fu.” (2 Mose 8:5-15) Yɛ Nuŋtsɔ lɛ gbi lɛ mli lɛ, nɔ ko ni tamɔ kɔkɔdenei ni anyaŋeɔ hu eba, shi kɛjɛ jɛɛhe kroko. Ni nomɛi ji Satan ‘wiemɔi ni jɛ mumɔŋ ni he tseee,’ ni eka shi faŋŋ akɛ edamɔ shi kɛha malemɔ wiemɔi ni ato he gbɛjianɔ koni akɛkudɔ shikpɔŋ lɛ nɔ nɔyelɔi, “maŋtsɛmɛi,” ni amɛte shi amɛwo Yehowa Nyɔŋmɔ. No hewɔ lɛ Satan bɔɔ mɔdɛŋ ekwɛɔ koni Nyɔŋmɔ mlifu tɔi lɛ amli nii ni afɔseɔ ashwieɔ shi lɛ akahoso amɛ, shi moŋ amɛdamɔ Satan masɛi kpɛŋŋ yɛ be mli ni “Nyɔŋmɔ Ofe lɛ gbi wulu lɛ nɔ ta” lɛ aaaje shishi lɛ.

26. (a) Mɛɛ jɛɛhei etɛ Satan lakamɔ wiemɔi lɛ baa kɛjɛɔ? (b) Mɛni ji “amale gbalɔ lɛ,” ni te wɔfeɔ tɛŋŋ wɔleɔ?

²⁶ Lakamɔ wiemɔi lɛ baa kɛjɛɔ “drako lɛ” (Satan) daaŋ kɛ “kooloo” (Satan shikpɔŋ nɔ maŋkwramɔŋ gbɛjianɔtoo) lɛ daaŋ, ni ji bɔɔ nii ni wɔkɛ amɛ ekpe momo yɛ Kpojiemɔ lɛ. Shi mɛni ji “amale gbalɔ lɛ”? Eji mɔ hee yɛ gbɛi amli pɛ. Atsɔ hiɛ atsɔɔ wɔ kooloo ko ni hiɛ akoloŋtoi bibii enyɔ tamɔ toobi ni feɔ okadii wuji yɛ kooloo ni yɔɔ yitsei kpawo lɛ hiɛ lɛ. Nɛkɛ kooloo ni lakaa mɔ nɛɛ fee enii tamɔ gbalɔ ko kɛha nakai kooloo lɛ. Ebi ni aja kooloo lɛ, ni eha afee ehe amaga po ama shi. (Kpojiemɔ 13:11-14) Esa akɛ nɛkɛ kooloo ni hiɛ akoloŋtoi enyɔ tamɔ toobi nɛɛ afee “amale gbalɔ lɛ” ni atsi eta yɛ biɛ lɛ nɔŋŋ. Yɛ be mli ni amaa enɛ nɔ mi lɛ, wɔkaneɔ yɛ sɛɛ mli akɛ amale gbalɔ lɛ, “fee okadii yɛ [kooloo ni hiɛ yitsei kpawo lɛ] ehiɛ ni ekɛshishiu mɛi ni he kooloo lɛ okadi lɛ kɛ mɛi ni jaa emaga lɛ” taakɛ okadi kooloo ni hiɛ akoloŋtoi enyɔ lɛ fee lɛ.—Kpojiemɔ 19:20.

27. (a) Mɛɛ kɔkɔbɔɔ ni akɛhaa yɛ ebe naa pɛpɛɛpɛ Yesu Kristo diɛŋtsɛ kɛha? (b) Mɛɛ kɔkɔbɔɔ Yesu kɛha beni eyɔɔ shikpɔŋ nɔ lɛ? (d) Bɔfo Paulo ti Yesu kɔkɔbɔɔ lɛ mli yɛ mɛɛ gbɛ nɔ?

²⁷ Akɛni Satan lakamɔ wiemɔi lɛ efa babaoo hewɔ lɛ, wiemɔi ni nyiɛ sɛɛ ni Yohane ŋmala eshwie shi lɛ ji wiemɔi ni amɛba yɛ ebe naa pɛpɛɛpɛ: “Naa, miiba taakɛ julɔ. Ajɔɔ mɔ ni saraa ni etoɔ etadei lɛ, koni ekanyiɛ yayai ni ana ehiɛgbele lɛ.” (Kpojiemɔ 16:15) Namɔ baa “taakɛ julɔ” lɛ? Yesu diɛŋtsɛ, ni miiba yɛ be ni atsiii ta mli akɛ Yehowa Blafo. (Kpojiemɔ 3:3; 2 Petro 3:10) Yɛ be mli ni Yesu yɔɔ shikpɔŋ nɔ lolo lɛ, ekɛ ebaa lɛ to julɔ he akɛ: “No hewɔ lɛ nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ Nuŋtsɔ lɛ baa. No hewɔ lɛ nyɛ hu nyɛsaa nyɛhe nyɛtoa, ejaakɛ nɔ ŋmɛlɛtswaa ni nyɛsusuuu lɛ nɔ gbɔmɔbi lɛ baa.” (Mateo 24:42, 44; Luka 12:37, 40) Yɛ be mli ni etiɔ nɛkɛ kɔkɔbɔɔ nɛɛ mli lɛ, bɔfo Paulo kɛɛ: “Ejaakɛ nyɛ diɛŋtsɛ nyɛle krɛdɛɛ akɛ Nuŋtsɔ lɛ [Yehowa] gbi lɛ baaba tamɔ julɔ baa nyɔɔŋ lɛ. Ejaakɛ be mli ni amɛaakɛɛ akɛ: Hejɔlɛ yɛ ni wɔyɛ shweshweeshwe! lɛ, no mli nɔŋŋ hiɛkpatamɔ aaabatutua amɛ trukaa.” Satan ji mɔ ni hɔ apasa sanejajemɔi fɛɛ ni tamɔ “Hejɔlɛ yɛ ni wɔyɛ shweshweeshwe!” lɛ sɛɛ.—1 Tesalonikabii 5:2, 3.

28. Mɛɛ kɔkɔbɔɔ Yesu kɛha yɛ bɔ ni wɔɔfee wɔku je lɛŋ nɔnyɛɛ naa lɛ he, ni mɛni ji “nakai gbi” lɛ ni Kristofoi sumɔɔɔ akɛ ebaa amɛnɔ “tamɔ tsɔne” lɛ?

²⁸ Yesu hu bɔ kɔkɔ yɛ nɔnyɛɛ ni je nɛɛ ni shishiumɔ wiemɔi eyi mli obɔ nɛɛ kɛbaaba Kristofoi anɔ lɛ he. Ekɛɛ: “Shi nyɛhiɛ ahia nyɛhe nɔ, koni fufeemɔ kɛ dãatɔɔ kɛ daaŋ ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa. . . . No hewɔ lɛ nyɛsaraa be fɛɛ be ni nyɛsɔlea, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ gbɔmɔbi lɛ hiɛ nyɛdamɔ.” (Luka 21:34-36) “Nakai gbi” lɛ ji “Nyɔŋmɔ Ofe lɛ gbi wulu lɛ.” (Kpojiemɔ 16:14) Yɛ be mli ni “nakai gbi” lɛ ni akɛbaabu jeŋ muu fɛɛ maŋtsɛ ni Yehowa ji lɛ bem lɛ bɛŋkɛɔ lɛ, ebafeɔ nɔ ni wa babaoo akɛ aaanyɛ adamɔ shihilɛ mli naagbai anaa. No hewɔ lɛ ehe miihia ni Kristofoi ahiɛ ahi amɛhe nɔ ni amɛsara, ni amɛhiɛ atsɛ̃ yɛ be fɛɛ mli kɛyashi be mli ni nakai gbi lɛ aaaba.

29, 30. (a) Mɛni Yesu kɔkɔbɔɔ akɛ mɛi ni anaa akɛ amɛmiiwɔ lɛ ahiɛ baagboi ejaakɛ abaajie amɛ “atadei” lɛ yɛ amɛhe lɛ tsɔɔ? (b) Kponɔgbɛ atade ni mɔ ko woɔ lɛ haa ayɔseɔ mɔ ni wo lɛ akɛ eji mɛni? (d) Mɔ ko baanyɛ alaaje ekponɔgbɛ okadi atadei lɛ yɛ mɛɛ gbɛ nɔ, ni mɛni baajɛ mli aba?

²⁹ Shi, mɛni ji nɔ ni kɔkɔbɔɔ akɛ mɛi ni aaana amɛ akɛ amɛmiiwɔ lɛ baalaaje amɛ “atadei” ni amɛhiɛ aaagboi lɛ tsɔɔ? Yɛ blema Israel lɛ, osɔfo fɛɛ osɔfo loo Levinyo fɛɛ Levinyo ni buɔ yɛ sɔlemɔ we lɛ hiɛ gbɛnaa nii ni tsii diɛŋtsɛ. Mɛi ni wieɔ Yudafoi ayinɔsane he lɛ tsɔɔ akɛ kɛ ana mɔ ko ni miiwɔ yɛ enitsumɔ nɔ lɛ, abaanyɛ ajie etadei yɛ ehe ni akɛwo la mli asha, no hewɔ lɛ awoɔ lɛ hiɛgbele yɛ mɛi ahiɛ.

³⁰ Yesu miibɔ kɔkɔ yɛ biɛ akɛ nɔ ko ni tamɔ nakai baanyɛ aba ŋmɛnɛ. Osɔfoi lɛ kɛ Levibii lɛ feɔ Yesu nyɛmimɛi ni afɔ amɛ mu lɛ he mfoniri. (1 Petro 2:9) Shi Yesu kɔkɔbɔɔ ni akpa mli lɛ hu kɔɔ asafo babaoo lɛ he. Kponɔgbɛ atadei ni awieɔ he yɛ biɛ lɛ haa ayɔseɔ mɔ ni wo lɛ akɛ Kristofonyo Yehowa Odasefonyo. (Okɛto Kpojiemɔ 3:18; 7:14 he.) Kɛji akɛ mɔ ko ŋmɛ gbɛ ni Satan je lɛ mli nɔnyɛɛ lɛ wɔle lɛ ni ewɔ loo ekpa nitsumɔ lɛ, eka shi faŋŋ akɛ amɛbaalaaje amɛ kponɔgbɛ atadei lɛ—yɛ gbɛ kroko nɔ lɛ, amɛbaalaaje le ni ale amɛ akɛ Kristofoi ni he tse lɛ. Shihilɛ ni tamɔ nɛkɛ kɛ hiɛgbele baaba. Oshara baanyɛ aba mɔ lɛ he akɛ ehiɛ baakpata kwraa.

31. (a) Kpojiemɔ 16:16 maa bɔ ni ehe hiaa akɛ Kristofoi ahiɛ aaatsɛ lɛ nɔ mi yɛ mɛɛ gbɛ nɔ? (b) Mɛni ji jamɔ mli hiɛnyiɛlɔi komɛi asusumɔ loo amɛwiemɔ yɛ Harmagedon he?

³¹ Bɔ ni ehe hiaa akɛ Kristofoi aaaha amɛhiɛ ahi amɛhe nɔ lɛ he hiaa babaoo yɛ be mli ni Kpojiemɔ lɛ mli wiemɔ ni nyiɛ sɛɛ lɛ bɛŋkɛɔ emlibaa he lɛ: “Ni amɛ [wiemɔi ni jɛ daimonioi adaaŋ lɛ] bua amɛnaa [shikpɔŋ lɛ nɔ maŋtsɛmɛi loo nɔyelɔi] kɛtee he ko ni atsɛɔ jɛmɛ yɛ Hebri wiemɔ mli akɛ Har-magedon lɛ.” (Kpojiemɔ 16:16) Nɛkɛ gbɛi, ni afɔɔ lɛ tsɛmɔ akɛ Armagedon lɛ, pueɔ shikome pɛ yɛ Biblia lɛ mli. Shi ekanya adesai asusumɔ diɛŋtsɛ. Je lɛ nɔyelɔi ebɔ nuklea Harmagedon ni baanyɛ aba lɛ he kɔkɔ. Akɛ Harmagedon hu toɔ blema Megido maŋtiase lɛ he, he ni awuu Biblia bei amli tai wuji babaoo yɛ lɛ, no hewɔ lɛ jamɔ mli hiɛnyiɛlɔi komɛi susuɔ akɛ naagbee ta ni baaba yɛ shikpɔŋ nɔ lɛ baaba yɛ nakai he ko bibioo lɛ. Amɛkɛ anɔkwale lɛ teŋ jɛkɛ naakpa yɛ enɛ mli.

32, 33. (a) Ni eeefee he ko pɔtɛɛ yɛ shikpɔŋ nɔ lɛ, mɛni ji nɔ ni gbɛi Har-Magedon, loo Armagedon damɔ shi kɛha? (b) Mɛɛ Biblia mli wiemɔi krokomɛi tamɔ “Harmagedon” aloo akɛtoɔ he? (d) Mɛɛ be mli be baashɛ ni bɔfo ni ji kpawo lɛ baafɔse Nyɔŋmɔ mlifu tɔ lɛ mli naagbee nɔ lɛ eshwie shi?

³² Gbɛi Har-Magedon lɛ shishi ji “Megido Gɔŋ.” Ni eeefee he ko pɔtɛɛ yɛ shikpɔŋ nɔ moŋ lɛ, edamɔ shi kɛha jeŋ shihilɛ ni abuaa jeŋmaji fɛɛ anaa koni amɛte shi amɛwo Yehowa Nyɔŋmɔ kɛ he ni yɛ naagbee lɛ ebaakpata amɛ fɛɛ amɛhiɛ yɛ lɛ. Enɛ baaba yɛ jeŋ muu fɛɛ. (Yeremia 25:31-33; Daniel 2:44) Etamɔ “Nyɔŋmɔ mlila lɛ weinŋaanɔ kpeteŋkpele lɛ” kɛ “atɛŋbuu jɔɔ lɛ,” aloo “Yehoshafat jɔɔ lɛ” ni abua jeŋmaji lɛ anaa yɛ jɛmɛ koni Yehowa akpata amɛhiɛ lɛ. (Kpojiemɔ 14:19; Yoel 4:12, 14) Ekɔɔ “Israel shikpɔŋ” lɛ, he ni akpataa Satan ni ji Gog ni jɛ Magog lɛ asraafoi lɛ ahiɛ yɛ, yɛ “ŋshɔi lɛ kɛ gɔŋ krɔŋkrɔŋ ni yɔɔ fɛo lɛ teŋ,” he ni kooyigbɛ maŋtsɛ lɛ baa “ni eeeshɛ enaagbee” yɛ Mikael lumɔ kpeteŋkpele lɛ dɛŋ lɛ he.—Ezekiel 38:16-18, 22, 23; Daniel 11:45-12:1.

³³ Kɛ lakamɔ wiemɔi ni kɔkɔdenei abolɔmɔ ni jɛ Satan kɛ eshikpɔŋ nɔ najiaŋdamɔlɔi lɛ aŋɔɔ lɛ bua jeŋmaji lɛ anaa kɛbote shihilɛi ni tamɔ nɛkɛ mli lɛ, kɛkɛ lɛ be baashɛ ni bɔfo ni ji kpawo lɛ baafɔse Nyɔŋmɔ naagbee mlifu tɔ lɛ mli nii lɛ eshwie shi.

“Agbe Naa!”

34. Mɛni nɔ bɔfo ni ji kpawo lɛ fɔseɔ etɔ lɛ mli nii lɛ eshwieɔ, ni mɛɛ sane jajemɔ jeɔ kpo kɛjɛɔ “sɔlemɔtsu lɛŋ kɛjɛ maŋtsɛsɛi lɛŋ”?

³⁴ “Ni bɔfo ni ji kpawo lɛ fɔse etɔ lɛ mli nii lɛ ewo kɔɔyɔɔ mli; ni gbee kpeteŋkpele ko jɛ ŋwɛi sɔlemɔtsu lɛŋ kɛjɛ maŋtsɛsɛi lɛŋ kɛɛ akɛ: Agbe naa!”—Kpojiemɔ 16:17.

35. (a) Mɛni ji “kɔɔyɔɔ” ni yɔɔ Kpojiemɔ 16:17 lɛ? (b) Mɛni bɔfo ni ji kpawo lɛ tsɔɔ yɛ tɔ lɛ mli nii ni efɔse eshwie kɔɔyɔɔ lɛ nɔ lɛ hewɔ?

³⁵ “Kɔɔyɔɔ” lɛ ji naagbee nii ni haa wala ni akɛ haomɔ ba nɔ. Shi enɛ jeee kɔɔyɔɔ diɛŋtsɛ ni wɔmuɔ nɛɛ. Nɔ ko nɔ ko bɛ kɔɔyɔɔ diɛŋtsɛ ni wɔmuɔ nɛɛ mli ni sa akɛ Yehowa fɔbuu kojomɔ aba nɔ, taakɛ bɔ ni shikpɔŋ diɛŋtsɛ nɛɛ, ŋshɔ, nu ŋmai ajɛɛhe, aloo hulu jeee nii ni sa Nyɔŋmɔ fɔbuu kojomɔ lɛ. Shi moŋ, enɛ ji “kɔɔyɔɔ” ni Paulo wieɔ he beni etsɛ Satan akɛ “kɔɔyɔɔ mli hewalɛ lɛ nɔ lumɔ lɛ.” (Efesobii 2:2) No ji Satan “kɔɔyɔɔ” ni jeŋ muu lɛ fɛɛ muɔ ŋmɛnɛ, mumɔ, aloo su fɔŋ loo jwɛŋmɔ, ni anaa yɛ eyiwalɛ nibii agbɛjianɔtoo muu lɛ fɛɛ he lɛ, Satan susumɔ ni egbɛ eshwa shihilɛ mli nibii fɛɛ mli yɛ Yehowa gbɛjianɔtoo lɛ sɛɛ lɛ. No hewɔ lɛ beni efɔseɔ etɔ lɛ mli nii lɛ eshwieɔ kɔɔyɔɔ lɛ nɔ lɛ, belɛ bɔfo ni ji kpawo lɛ miijaje Nyɔŋmɔ mlifu ni ekɛshiɔ Satan, egbɛjianɔtoo lɛ, kɛ nɔ fɛɛ nɔ ni kanyaa adesai koni amɛfi Satan sɛɛ ni amɛtse jeŋ muu fɛɛ maŋtsɛ ni Yehowa ji lɛ hiɛ atua lɛ.

36. (a) Mɛni feɔ haomɔi kpawo lɛ? (b) Yehowa wiemɔ: “Agbe naa!” lɛ tsɔɔ mɛni?

³⁶ Enɛ kɛ haomɔi ekpaa ni etsɔ hiɛ lɛ fɛɛ feɔ Yehowa kojomɔi ni ekɛshiɔ Satan kɛ egbɛjianɔtoo lɛ. Amɛji hiɛkpatamɔ saji ni ajajeɔ ashiɔ Satan kɛ eseshi lɛ. Kɛ afɔse naagbee tɔ nɛɛ mli nii lɛ ashwie shi lɛ, Yehowa diɛŋtsɛ jajeɔ akɛ: “Agbe naa!” Nɔ ko bɛ ni abaakɛɛ dɔŋŋ. Kɛ ajaje Yehowa mlifu tɔi lɛ amli nii lɛ fɛɛ agbe naa ni Yehowa tsui nyɔ emli lɛ, ashashaoŋ shi kwraa dɔŋŋ yɛ kojomɔi ni nɛkɛ shɛɛ saji nɛɛ kɛha lɛ he nitsumɔ mli.

37. Te Yohane tsɔɔ nɔ ni tee nɔ yɛ be mli ni afɔse Nyɔŋmɔ mlifu tɔ ni ji kpawo lɛ ashwie shi lɛ mli eha tɛŋŋ?

³⁷ Yohane tee nɔ akɛ: “Ni sarawai kɛ gbeei kɛ nugbɔshiimɔi ba, ni shikpɔŋ hoso waa, bɔ ni kɛjɛ beyinɔ ni gbɔmɛi yɔɔ shikpɔŋ lɛ nɔ nɛɛ, anako nakai shikpɔŋhosomɔ kpeteŋkpele koome ni tamɔ no da. Ni maŋ kpeteŋkpele lɛ mli gbala etɛ, ni jeŋmaji lɛ amaji lɛ wule, ni akai Babilon Kpeteŋkpele lɛ yɛ Nyɔŋmɔ hiɛ, koni aŋɔ emlifu ni naa wa lɛ kpulu lɛ mli daa lɛ aha lɛ. Ni ŋshɔkpɔ fɛɛ ŋshɔkpɔ jo foi, ni gɔji lɛ anaaa dɔŋŋ. Ni nyɔŋmɔŋtɛi babaoo ni amɛtsiimɔi tamɔ talenta jɛ ŋwɛi bashwie gbɔmɛi anɔ; ni gbɔmɛi lɛ wie musubɔɔ wiemɔi amɛshi Nyɔŋmɔ yɛ nyɔŋmɔŋtɛi lɛ ahaomɔ lɛ hewɔ, ejaakɛ amɛhaomɔ lɛ da tsɔ.”—Kpojiemɔ 16:18-21.

38. Mɛni ji nɔ ni nɛkɛ nibii nɛɛ feɔ he mfoniri (a) “shikpɔŋhosomɔ kpeteŋkpele koome” lɛ? (b) anɔkwale ni eji akɛ “maŋ kpeteŋkpele,” Babilon Kpeteŋkpele lɛ “mli gbala etɛ” lɛ? (d) anɔkwale ni eji akɛ “ŋshɔkpɔ fɛɛ ŋshɔkpɔ jo foi, ni gɔji lɛ anaaa dɔŋŋ” lɛ? (e) “nyɔŋmɔŋtɛi lɛ ahaomɔ” lɛ?

³⁸ Yehowa tsu adesai ahe nii shikome ekoŋŋ ni tɔmɔ ko bɛ he, ni nɔ ni kadi enɛ ji “sarawai kɛ gbeei kɛ nugbɔshiimɔi.” (Okɛto Kpojiemɔ 4:5; 8:5 he.) Abaahoso adesai yɛ gbɛ ni eko bako nakai da lɛ nɔ, tamɔ akɛ shikpɔŋhosomɔ ko ni kpataa nii ahiɛ miifee. (Okɛto Yesaia 13:13; Yoel 4:16 he.) Nɛkɛ hosomɔ ni tamɔ okpɛlɛm fɛmɔ nɛɛ baakumɔ “maŋ kpeteŋkpele,” Babilon Kpeteŋkpele lɛ kwraa, no hewɔ lɛ “emli gbala etɛ”—ni enɛ feɔ bɔ ni ebaakumɔ ni ebote amaŋfɔfeemɔ mli ni anyɛŋ atswa lɛ ama shi dɔŋŋ lɛ he okadi. Agbɛnɛ, “jeŋmaji lɛ amaji lɛ” hu baagbee shi. “Ŋshɔkpɔ fɛɛ ŋshɔkpɔ” kɛ “gɔji”—ni ji gbɔmɛi agbɛjianɔtoi kɛ asafoi ni tamɔ nɔ ni ma shi daa yɛ gbɛjianɔtoo nɛɛ mli lɛ—baaho aya. “Nyɔŋmɔŋtɛi babaoo,” ni dara fe nɔ ni hao Mizraim yɛ haomɔ ni ji kpawo lɛ mli lɛ, ni nyɔŋmɔŋtɛi lɛ eko fɛɛ eko tsiimɔ shɛɔ talenta kome lɛ ji nɔ ni akɛbaatswia adesai kɛ piŋmɔ.d (2 Mose 9:22-26) Eka shi faŋŋ akɛ nɛkɛ nui ni efimɔ kpɔbii ni akɛgbalaa toi nɛɛ feɔ Yehowa kojomɔ wiemɔi ni mli tsiitsii yɛ gbɛ ni ekaaa nɔ lɛ ahe okadi, ni eji okadi ni tsɔɔ akɛ nibii agbɛjianɔtoo nɛɛ naagbee eshɛ shi eta kwraa agbɛnɛ! Yehowa baanyɛ ni ekɛ nyɔŋmɔŋtɛi diɛŋtsɛ hu atsu nii yɛ ehiɛkpatamɔ nitsumɔ lɛ mli.—Hiob 38:22, 23.

39. Yɛ haomɔi kpawo lɛ ni afɔse ashwie shi lɛ fɛɛ sɛɛ lɛ, mɛɛ nifeemɔ gbɛ adesai ateŋ mɛi ni fa baakɔ?

³⁹ Nɛkɛ gbɛ nɔ Yehowa jalɛ kojomɔi baaba Satan je lɛ nɔ. Adesai ateŋ mɛi ni fa baaya nɔ atse Nyɔŋmɔ hiɛ atua ni amɛbɔ lɛ musu kɛyashi naagbee. Taakɛ blema Farao ji lɛ, haomɔi ni tsara nɔ ba amɛnɔ, aloo nakai haomɔi ni kɛ gbele baa lɛ anaagbee nɔ lɛ haaa amɛtsuii ahe ajɔ. (2 Mose 11:9, 10) Tsuitsakemɔ babaoo yɛ naagbee yɛ oyaiyeli mli baŋ. Amɛkɛ amɛgbele mumɔ fioo ni eshwɛ lɛ baalomɔ Nyɔŋmɔ ni jajeɔ akɛ: “Ni amɛaana amɛle akɛ mi ji Yehowa lɛ.” (Ezekiel 38:23) Ni fɛɛ sɛɛ lɛ, abu jeŋ muu fɛɛ maŋtsɛ ni Yehowa Nyɔŋmɔ Ofe lɛ ji lɛ bem.

[Shishigbɛ niŋmai]

[Akrabatsa ni yɔɔ baafa 221]

“Eshwie Shikpɔŋ lɛ Nɔ”

Yohane kuu lɛ etswa Yehowa mlifu ni ekɛshiɔ “shikpɔŋ lɛ” he adafi kɛ wiemɔi ni tamɔ nɔ ni nyiɛ sɛɛ nɛɛ:

“Yɛ afii ohai abɔ mli mɔdɛŋbɔɔ lɛ fɛɛ sɛɛ lɛ, maŋkwramɔŋ kui ejie amɛhe kpo akɛ amɛnyɛŋ amɛtsu ŋmɛnɛŋmɛnɛ beaŋ shihilɛi lɛ ahe nii ni amɛna haomɔi ni gbaa mɔ naa lɛ anaa tsabaa. Mɛi ni yɔɔ shika he lɛtemɔ he nilee kɛ maŋ nɔyelɔi, ni kwɛɔ sane lɛ jogbaŋŋ lɛ, naa akɛ amɛnyɛɛɛ amɛfee he nɔ ko nɔ ko.”—Millions Now Living Will Never Die, 1920, baafa 61.

“Nɔyeli ko bɛ shikpɔŋ lɛ nɔ ŋmɛnɛ ni haa je lɛ fa ko tsui nyɔɔ emli. Nɔyelɔi yiwalɔi ji mɛi ni yeɔ jeŋmaji lɛ babaoo nɔ. Jeŋ muu lɛ fɛɛ efee shwɛm.”—A Desirable Government, 1924, baafa 5.

“Nibii agbɛjianɔtoo nɛɛ naagbee ni akɛaaba . . . ji gbɛ koome pɛ ni aaatsɔ nɔ ajie efɔŋ kɛjɛ je lɛŋ ni eha gbɛ aka koni toiŋjɔlɛ kɛ jalɛ nifeemɔ ashwere.”—“Maŋtsɛyeli lɛ he Sanekpakpa Nɛɛ,” 1954, baafa 23.

“Ŋmɛnɛŋmɛnɛ jeŋ gbɛjianɔtoo lɛ ejie ehe kpo faŋŋ kɛtsɔ eshafeemɔ ni yaa hiɛ, jalɛ nifeemɔ ni bɛ kɛ atua ni atseɔ ashiɔ Nyɔŋmɔ kɛ esuɔmɔnaa nifeemɔ lɛ nɔ. . . . Enyɛŋ etsake. No hewɔ lɛ esa akɛ eya!”—Buu-Mɔɔ, September 1, 1982, baafa 4.

[Akrabatsa ni yɔɔ baafa 223]

“Ewo Ŋshɔŋ”

Nɔ ni nyiɛ sɛɛ nɛɛ ji wiemɔi ni Yohane kuu lɛ ŋma amɛha yɛ afii ni amɛkɛjaje Nyɔŋmɔ mlifu amɛshi adesai ni leee Nyɔŋmɔ ni amɛtsi amɛhe kɛjɛ Yehowa he lɛ “ŋshɔ” ni etse atua ni nyɛɛɛ afee dioo lɛ mli fioo ko:

“Maŋ fɛɛ maŋ yinɔsane etsɔɔ akɛ mpleshii ka kui ateŋ. Efee mɛi fio ni miite shi awo mɛi babaoo. . . . Nɔ ni ejɛ nɛkɛ mpleshii nɛɛ amli eba ji nɔyeli butumɔi, piŋmɔ babaoo, kɛ lashishwiemɔ babaoo.”—Government, 1928, baafa 244.

Yɛ jeŋ hee lɛ mli lɛ, “okadi ‘ŋshɔ’ ni ji adesai ni nyɛɛɛ afee dioo, atuatselɔi, mɛi ni sheee Nyɔŋmɔ gbeyei ni okadi kooloo lɛ fa kpo kɛjɛ amɛteŋ koni Abonsam kɛ lɛ atsu nii lɛ baafee nɔ ni eho etee.”—The Watchtower, September 15, 1967, baafa 567.

“Ŋmɛnɛŋmɛnɛ beaŋ adesa weku lɛ he miiye yɛ mumɔŋ. Wɔteŋ mɔ ko mɔ ko nyɛŋ ahere eyiwala, ejaakɛ Nyɔŋmɔ Wiemɔ lɛ tsɔɔ akɛ ehela lɛ kɛ lɛ miiya gbele mli.”—True Peace and Security—From What Source?, 1973, baafa 131.

[Akrabatsa ni yɔɔ baafa 224]

“Ewo Faai kɛ Nu Bui lɛ Amli”

Haomɔ ni ji etɛ lɛ kpa “faai kɛ nu bui” lɛ ahe mama kɛtsɔ sane jajemɔi ni tamɔ nɔ ni nyiɛ sɛɛ nɛɛ anɔ:

“Osɔfoi lɛ ni kɛɔ akɛ amɛji [Kristo] tsɔɔmɔi ahe tsɔɔlɔi lɛ etsuu tawuu he ni amɛfee lɛ nɔ krɔŋkrɔŋ. Amɛsumɔɔ ni akɛ amɛ mfonirii kɛ amagai ni ashɔshɔi amamɔ tabilɔi ni shwieɔ la shi lɛ anɔ lɛ masɛi.”—The Watch Tower, September  15, 1924,  baafa 275.

“Mumɔi atsɛmɔ [mumɔi fɔji ni akɛ amɛ wieɔ] ji nifeemɔ ko ni atswa ama amale wulu ko, wala yɛ gbele sɛɛ kɛ adesa susuma ni gbooo ni ji apasa lɛ nɔ.”—What Do the Scriptures Say About “Survival After Death?,” 1955, baafa 51.

“Adesa jeŋ nilee, mɛi ni kaa maŋkwramɔŋ gbɛjianɔtoi sɔrɔtoi amɛkwɛɔ, mɛi ni toɔ gbɔmɛi ahe gbɛjianɔ, shika he lɛtemɔ mli ŋaawolɔi kɛ mɛi ni fiɔ jamɔ mli blema saji asɛɛ kɛ miishɛjemɔ ko ni haa wala diɛŋtsɛ baaa . . . Nɛkɛ nui nɛɛ po eha mɛi ni nuɔ lɛ eku Bɔlɔ lɛ mla ni kɔɔ krɔŋkrɔŋ ni la ji lɛ he lɛ mli ni amɛkɛ amɛhe ewo jamɔ mli yiwai amli.”—Yiŋkpɛɛ ni akpɛlɛ nɔ yɛ “Naanɔ Sanekpakpa” Majimaji Ateŋ Kpee lɛ shishi, yɛ 1963.

“Jeee jeŋ nilee mli yiwalaheremɔ, shi moŋ adesa weku lɛ hiɛkpatamɔ ji nɔ ni esa akɛ akpa gbɛ kɛjɛ gbɔmɔ diɛŋtsɛ dɛŋ. . . . Wɔnyɛŋ wɔkɛ wɔhiɛ afɔ jwɛŋmɔ he nilelɔi kɛ jwɛŋmɔŋ hela he nilelɔi ni yɔɔ je lɛ mli lɛ anɔ ni amɛtsake gbɛ ni adesai tsɔɔ nɔ amɛsusuɔ nii ahe . . . Wɔnyɛŋ wɔkɛ wɔhiɛ afɔ majimaji ateŋ polisifoi ni aaato amɛ ko nɔ . . . koni amɛha shikpɔŋ nɛɛ afee he ko ni yɔɔ shweshweeshwe ni aaahi mli.”—Saving the Human Race—In the Kingdom Way, 1970, baafa 5.

[Akrabatsa ni yɔɔ baafa 225]

“Eshwie Hulu Nɔ”

Akɛni adesai anɔyeli “hulu” lɛ “esha” adesai yɛ Nuŋtsɔ lɛ gbi lɛ mli hewɔ lɛ, Yohane kuu lɛ etsɔ wiemɔi tamɔ nɔ ni nyiɛ sɛɛ nɛɛ anɔ egbala jwɛŋmɔ kɛtee nɔ ni yaa nɔ lɛ nɔ:

“Ŋmɛnɛ, Hitler kɛ Mussolini, ni fee amɛ diɛŋtsɛ amɛhe nɔyelɔi yiwalɔi lɛ miiwo jeŋ muu lɛ fɛɛ toiŋjɔlɛ he gbeyei, ni Roma Katolik Osɔfonukpai lɛ fiɔ heyeli ni amɛkpataa hiɛ nɛɛ sɛɛ kwraa.”—Fascism or Freedom, 1939, baafa 12.

“Yɛ yinɔsane be fɛɛ mli lɛ, nifeemɔ ni adesai nɔyelɔi yiwalɔi nyiɛɔ sɛɛ ji, Aye nɔ loo afite lɛ! Shi nifeemɔ gbɛ ni amrɔ nɛɛ Maŋtsɛ Yesu Kristo, ni Nyɔŋmɔ ewo lɛ lɛ kɛbaatsu shikpɔŋ lɛ fɛɛ he nii ji, Ha aye onɔ aloo akpata ohiɛ.”—When All Nations Unite Under God’s Kingdom, 1961, baafa 23.

“Kɛjɛ 1945 kɛbaa nɛɛ, agbe gbɔmɛi fe akpekpei 25 yɛ tai aaafee 150 ni awuu yɛ shikpɔŋ lɛ nɔ fɛɛ lɛ mli.”—The Watchtower, January 15, 1980, baafa 6.

“Jeŋmaji ni yɔɔ je lɛŋ lɛ . . . ebuuu gbɛnaa nii ni ka amɛnɔ yɛ majimaji ateŋ loo yɛ jeŋba he mlai ahe lɛ. Bɔni afee ni amɛnine ashɛ nɔ ni amɛtaoɔ lɛ nɔ lɛ, jeŋmaji lɛ ekomɛi nuɔ he akɛ amɛyeɔ bem akɛ amɛkɛ nɔ fɛɛ nɔ ni amɛsusuɔ akɛ ehe hiaa lɛ aaatsu nii—gbɔmɛi babaoo ahiɛkpatamɔ kɛkɛ, mɛi ni agbeɔ amɛ yɛ dujiaŋ, kɔɔyɔɔŋ lɛji ni akɛ ekaa shɔɔ, okpɛlɛmii ni atswiaa, kɛ nibii krokomɛi . . . Bei enyiɛ jeŋmaji lɛ baaya nɔ ni amɛŋmɛ amɛtsui shi amɛha amɛhe yɛ nɛkɛ nifeemɔ ni jwɛŋmɔ bɛ mli nɛɛ mli?”—The Watchtower, February 15, 1985, baafa 4.

[Akrabatsa ni yɔɔ baafa 227]

“Eshwie Kooloo lɛ Maŋtsɛsɛi lɛ Nɔ”

Yehowa Odasefoi ekpa kooloo lɛ maŋtsɛsɛi lɛ he mama ni amɛtswa bɔ ni Yehowa ebu enɛ fɔ eha lɛ he adafi kɛ wiemɔi ni tamɔ nɛkɛ:

“Hewalɛi ni ehiii ni nɔ kwɔlɔ fe adesai ni miikudɔ amɛ kɛmiiya amɛ diɛŋtsɛ amɛhiɛ ni amɛaakpata yɛ naagbee tawuu ni baaba yɛ Harmagedon mli ni anyɛɛɛ naa aku lɛ ji nɔ ni naa jeŋmaji lɛ amli nɔyelɔi kɛ maŋkwralɔi lɛ anɔ hewalɛ lɛ.”—After Armageddon—God’s New World, 1953, baafa 8.

“‘Kooloo lɛ’ ni adesa nɔyelii to shishi, shi jeee Nyɔŋmɔ lɛ na ehewalɛ, hegbɛ, kɛ maŋtsɛsɛi kɛjɛ Drako lɛ ŋɔɔ. No hewɔ lɛ esa akɛ amɛnyiɛ maŋkwramɔŋ kuu lɛ sɛɛ, Drako lɛ kuu lɛ.”—After Armageddon—God’s New World, 1953, baafa 15.

“He ni Jeŋmaji amaji lɛ baanyɛ atsɔɔ akɛ amɛyɔɔ pɛ ji . . . Nyɔŋmɔ Henyɛlɔ Kpeteŋkpele, Satan Abonsam masɛi.”—Yiŋkpɛɛ ni akpɛlɛ nɔ yɛ “Ŋwɛi Kunimyeli” Majimaji Ateŋ Kpee lɛ shishi, yɛ 1973.

[Akrabatsa ni yɔɔ baafa 229]

“Emli Nu lɛ Mii”

Amrɔ nɛɛ po, Babilon jamɔ sɛɛ ni afiɔ lɛ miita yɛ hei pii, ni etsɔɔ nɔ ni baaba beni “maŋtsɛmɛi ni jɛ hulu shitee he” lɛ tutuaa lɛ lɛ.

“Maŋ mli nibii amlipɛimɔ ko ha ayoo akɛ mɛi ni hiɔ hei ni gbɔmɛi pii yɔɔ [yɛ Thailand] lɛ ateŋ oha fɛɛ mli 75 eyaaa Buddhabii asɔlemɔtsui amli amɛyabooo shiɛmɔi atoi kwraa, ni mɛi ni yɔɔ akrowai ni yaa sɔlemɔ lɛ ayifalɛ hu miiba shi kɛmiishɛ aaafee oha fɛɛ mli nyɔŋmai enumɔ.”—Bangkok Post, September 7, 1987, baafa 4.

“Ŋkunyaayeli eshi Tao jamɔ yɛ shikpɔŋ [China] ni ato yɛ jɛmɛ aaafee afii akpei enyɔ ni eho nɛ lɛ nɔ. . . . Akɛni naakpɛɛ nii ni amɛkɛ mɛi ni tsɔ amɛhiɛ lɛ kɛtsu nii ni amɛkɛna mɛi babaoo amɛnyiɛ amɛsɛɛ lɛ eshi amɛ hewɔ lɛ, osɔfoyeli kuu lɛ ena akɛ amɛbɛ sɛɛyelɔi, ni enɛ tsɔɔ akɛ nɔ ni mɛɔ Tao jamɔ ji ehiɛkpatamɔ kwraa akɛ jamɔ ni ato he gbɛjianɔ yɛ shikpɔŋ lɛ nɔ.”—The Atlanta Journal and Constitution, September 12, 1982, baafa 36-A.

“Japan . . . ji he ni maŋsɛɛ sanekpakpashiɛlɔi fa yɛ, yɛ je lɛŋ, fe fɛɛ, amɛmiihe amɛshɛ 5,200, ni kɛlɛ . . . Japanbii ayifalɛ lɛ ateŋ nɔ ni shɛɛɛ oha fɛɛ mli 1 ji Kristofoi. . . . Franciscan osɔfo ni etsu nii yɛ biɛ kɛjɛ 1950 afii lɛ amli lɛ . . . heɔ yeɔ akɛ ‘maŋsɛɛ sanekpakpashiɛlɔi ni yɔɔ Japan lɛ agbi lɛ miihe ata.’”—The Wall Street Journal, July 9, 1986, baafa 1.

Yɛ Ŋleshi ablotsiri lɛ, yɛ afii nyɔŋmai etɛ ni eho nɛɛ mli lɛ, “aŋamɔ Anglican sɔlemɔtsui 16,000 lɛ mli nɔ ni miihe ashɛ 2,000 akɛni akɛtsuuu nii dɔŋŋ hewɔ. Mɛi ni baa sɔlemɔ lɛ eba shi kwraa yɛ Kristofoi amaji ni amɛkɛɛ amɛyɔɔ veveeve lɛ ateŋ. . . . [Durham Osɔfonukpa] lɛ kɛɛ, ‘amrɔ nɛɛ England jeee Kristofoi amaŋ dɔŋŋ taakɛ eji tsutsu lɛ.’”—The New York Times, May 11, 1987, baafa A4.

“Yɛ ŋmɛlɛtswai pii ni akɛje ŋwane kɛ hiɛdɔɔ lɛ sɛɛ lɛ, [Hela] Mlawoo Gwabɔɔ lɛ kpɛlɛ mla ko nɔ ŋmɛnɛ, ni mla lɛ ŋmɛɔ Nɔyeli lɛ gbɛ koni eshɔ tsui kɛ nibii babaoo ni Hela Orthodox Sɔlemɔ lɛ yɔɔ lɛ . . . Agbɛnɛ mla lɛ ŋmɛɔ gbɛ koni mɛi ni jeee osɔfoi akwɛ sɔlemɔ lɛ gwabɔɔ kɛ ajinafoi ni kwɛɔ shika ni sɔlemɔ lɛ kɛwo nitsumɔi sɔrɔtoi amli ni gbɔiatoo hei, hei ni atsaa tɛi kpakpai yɛ kɛ ɔfis tsui wuji fata he lɛ anɔ.”—The New York Times, April 4, 1987, baafa 3.

[Mfonirii ni yɔɔ baafa 222]

Klɛŋklɛŋ Nyɔŋmɔ mlifu tɔi ejwɛ lɛ kɛ haomɔi ni tamɔ nɔ ni jɛ klɛŋklɛŋ tɛtrɛmaŋtɛrɛi ejwɛ lɛ kpamɔ mli ba lɛ pɛpɛɛpɛ baa

[Mfoniri ni yɔɔ baafa 226]

Tɔ ni ji enumɔ lɛ kpaa kooloo lɛ maŋtsɛsɛi lɛ he mama akɛ hegbɛ ni Satan kɛha nakai kooloo lɛ

[Mfonirii ni yɔɔ baafa 231]

Daimonioi ashishiumɔ wiemɔi miibua shikpɔŋ lɛ nɔ nɔyelɔi anaa kɛmiiya he ko pɔtɛɛ, Har-Magedon, he ni abaafɔse Yehowa kojomɔi lɛ yɛ ashwie amɛnɔ

[Mfoniri ni yɔɔ baafa 233]

Mɛi ni Satan “kɔɔyɔɔ” ni mli ewo muji lɛ kanyaa amɛ lɛ ahiɛ baakpata yɛ Yehowa jalɛ kojomɔi ni ekɛbaaba amɛnɔ lɛ mli