Ŋwɛi Bɔfoi Ashɛɛ Saji Kɛha Wɔgbii Nɛɛ
“Nyɔŋmɔ . . . tsu ebɔfo lɛ ni ekɛbatsɔɔ . . . yɛ okadii amli.”—KPOJIEMƆ 1:1, New World Translation.
1. Mɛni ji nɔ ni anuuu shishi yɛ gbɛi Apokalips loo Kpojiemɔ he, ni mɛni ji nɔ ni Kpojiemɔ lɛ jie lɛ kpo yɛ wɔsɛɛ be he?
KPOJIEMƆ. Kwɛ bɔni amɛnu nakai gbɛi lɛ he shii abɔ yɛ afii ohai 20 nɛɛ mli—shi kwɛ bɔni amɛnuuu shishi kwraa amɛha! Yɛ Biblia shishinumɔ naa lɛ, etsɔɔɔ adesai fɛɛ ahiɛ kpatamɔ yɛ nuklea tawuu mli. Shi moŋ nɛkɛ Hela wiemɔ nɛɛ shishi ji “nɔ ko he kpamɔ.” Biblia mli wolo ni ji Apokalips aloo Kpojiemɔ lɛ tsɔ gbalɛ mfonirii anɔ ejie loo ekpa nibii ni baaba ni baatsɔ naanɔ miishɛɛ yinɔ ko kɛha adesai lɛ hiɛ lɛ he mama. No hewɔ lɛ, Yesu bɔfo Yohane je Kpojiemɔ lɛ shishi kɛ nɛkɛ wiemɔi nɛɛ: “Miishɛɛ ji maŋ ni kaneɔ kɛ mɛi ni nuɔ gbalɛ nɛɛ mli wiemɔ lɛ, kɛ mɛi ni yeɔ nibii ni aŋmala yɛ mli lɛ anɔ; ejaakɛ be ni ato lɛ ebɛŋkɛ.”—Kpojiemɔ 1:3, New World Translation.
2, 3. Mɛni hewɔ miishɛɛ bɛ je nɛɛ mli lɛ, ni mɛni Yehowa ekpɛ eyiŋ akɛ ebaafee?
2 Je lɛ bɛ miishɛɛ ŋmɛnɛ. Atsɔɔ nɔ hewɔ ni ebɛ miishɛɛ lɛ yɛ lala ko ni Mose ŋma aaafee afii 3,460 ni eho nɛ lɛ mli: “Amɛyelɛ sane fɔŋ, jeee [Nyɔŋmɔ] ebii ni, amɛ diɛŋtsɛ amɛhe kpa ni; yinɔ kɔdɔŋ ni bɛ amɛŋɛlɛ nɔ ji amɛ.” (5 Mose 32:5) Kwɛ bɔ ni nakai wiemɔi lɛ sa ŋmɛnɛŋmɛnɛ yinɔ ni nibii ni mamɔ amɛhiɛ lɛ ekɔdɔ ni enɔ eha lɛ jogbaŋŋ ha! Akɛ nɔkwɛmɔ nɔ lɛ, wiemɔi ni akɛtsɔɔ wolo World Military and Social Expenditures 1987-88 lɛ mli lɛ tsɔɔ mli yɛ faŋŋ akɛ: “Tawuu nifeemɔ he foidamɔ lɛ etsɔmɔ yɛ maji lɛ fɛɛ ashihilɛ mli. U.S. America kɛ Soviet Union ni ji Russia fiteɔ dɔlai akpekpei toi akpei 1.5 daa gbi yɛ tawuu nifeemɔ ni amɛkɛfaa amɛhe lɛ he. Ni kɛlɛ U.S. America ji maŋ ni gbeɔ yi feɔ nyɔŋma kɛ kpaanyɔ, kɛ Russia hu ni gbeɔ yi feɔ nyɔŋmai ejwɛ kɛ ekpaa yɛ maji ni ato naa ni gbekɛbii gboiɔ babaoo yɛ mli lɛ mli. Maji ni kpaako amɛnaa nɔyaa lɛ fiteɔ shika toi ejwɛ yɛ tawuu nibii ahe fe bɔ ni amɛfiteɔ yɛ amɛmlibii agbɔmɔtsoŋ hewalɛ namɔ he. Ni kɛlɛ gbɔmɛi akpekpei ohai abɔ yɛ nakai maji lɛ amli ni hɔmɔ miiye amɛ; gbekɛbii ni afɔɔ amɛ lɛ oha fɛɛ mli 20 gboiɔ dani amɛyeɔ afi enumɔ.”
3 Nibii krokomɛi hu kɛ eko fataa nifitemɔ gbɛ nɛɛ he—jeŋba kpakpa ni fiteɔ kɛ agbɛnɛ yɛ weku lɛ mli, efɔŋfeemɔ kɛ awuiyeli ni ebɔle shikpɔŋ muu lɛ fɛɛ nɔ, suɔmɔ ni bɛ kɛ mla nɔ ni ayeee yɛ ŋmɛnɛŋmɛnɛ yinɔ nɛɛ mli. Kwɛ miishɛɛ ni wɔyɔɔ akɛ Yehowa eto eyiŋ akɛ “ebaafite mɛi ni fiteɔ shikpɔŋ lɛ.” (Kpojiemɔ 11:18) Biblia mli wolo ni ji Kpojiemɔ lɛ kɛ miishɛɛ tsɔɔ ninai sɔrɔtoi 16 ko mli fitsofitso ni ekɛtsɔɔ gbɛ ni ebaatsɔ nɔ etsu enɛ lɛ mli.
“Bɔfoi” kɛ “Okadii”
4. Kpojiemɔ lɛ kɔɔ bɔfoi ahe yɛ mɛɛ gbɛ nɔ, ni ninai lɛ jieɔ bɔfo ni fe fɛɛ lɛ kpo yɛ mɛɛ gbɛ nɔ?
4 Kpojiemɔ haa wɔnaa Biblia mli klɛŋklɛŋ gbalɛ ni yɔɔ 1 Mose 3:15 lɛ mli faŋŋ, ni etsɔɔ bɔ ni abaatsu nyɛɛ ni ka Satan kɛ Nyɔŋmɔ gbɛjianɔtoo ni tamɔ yoo lɛ kɛ agbɛnɛ amɛ ‘seshibii’ enyɔ lɛ teŋ lɛ he nii aha. Ejieɔ Yehowa kojomɔi ni ekɛbaaba henyɛlɔi kɛ mɛi ni sumɔɔ lɛ lɛ ni fiɔ emaŋtsɛyeli lɛ sɛɛ lɛ anɔ lɛ kpo. Atsɔ “okadii” anɔ akɛ Kpojiemɔ lɛ baha Yohane kɛtsɔ bɔfo ko nine nɔ. Bɔfoi loo tsuji krokomɛi naa nɛkɛ ninai ni ahaa aleɔ ni atsuɔ he nii nɛɛ mli gbɛfaŋ nɔ. Aha ale bɔfo ni fe fɛɛ lɛ yɛ Kpojiemɔ 1:5 akɛ: “Yesu Kristo, ‘Odasefonyo Anɔkwafo,’ ‘Gbohii ateŋ kromɔ bi,’ kɛ ‘Maŋtsɛmɛi lɛ Anɔyelɔ.’” “Okadii,” aloo ninai lɛ tsɔɔ akɛ eji “Jata,” akɛ “Toobi,” akɛ “Mikael,” kɛ shii abɔ akɛ bɔfo ni yɔɔ hegbɛ kpeteŋkpele.—Kpojiemɔ 5:5, 13; 9:1, 11; 10:1; 12:7; 18:1.
5. Mɛni jeɔ kpo yɛ Kpojiemɔ lɛ klɛŋklɛŋ ninaa lɛ mli, ni ekɔɔ wɔhe yɛ mɛɛ gbɛ nɔ?
5 Klɛŋklɛŋ ninaa, ni yɔɔ Kpojiemɔ 1:10—3:22 lɛ tsɔɔ shɛɛ saji ni kanyaa mɔ ni Yesu ni awo ehiɛ nyam lɛ kɛbaha “bɔfoi,” aloo nɔkwɛlɔi ni yɔɔ Eshia asafoi kpawo ni feɔ Yehowa Odasefoi asafoi ni yɔɔ jeŋ muu fɛɛ yɛ “Nuŋtsɔ lɛ gbi lɛ nɔ” lɛ amli lɛ he mfoniri. No hewɔ lɛ shɛɛ saji lɛ ji wɔ nɔ!. Esa akɛ wɔkɛ ekaa anu “nɔ ni mumɔ lɛ kɛɔ asafoi lɛ,” ejaakɛ nɛkɛ kɔkɔbɔi nɛɛ yɛ kɛha wɔ hewalɛwoo, koni ana wɔ akɛ anɔkwafoi—ni akpɛlɛ wɔ nɔ yɛ wɔ nitsumɔi kɛ wɔ “suɔmɔ lɛ kɛ sɔɔmɔ nitsumɔ lɛ kɛ hemɔkɛyeli lɛ kɛ tsuishiŋmɛɛ lɛ hewɔ.”—Kpojiemɔ 1:10; 2:7, 10, 19, New World Translation.
6. Shɛɛ saji kpawo ni atsu kɛtee Eshia asafoi kpawo lɛ he baanyɛ aba sɛɛnamɔ aha wɔ yɛ mɛɛ gbɛ nɔ?
6 Taakɛ asafo ni yɔɔ Efeso lɛ ji lɛ, ekolɛ wɔ kɛ anɔkwayeli egbo deŋme ni wɔnyɛ mɛi ni kɛ mligbalamɔ baa ni kwa hemɔkɛyeli lɛ anitsumɔi lɛ, shi kɛji akɛ wɔ diɛŋtsɛ lɛ wɔ sɔɔmɔ lɛ nɔ egbɔ yɛ gbɛ ko nɔ lɛ, nyɛhaa wɔkɛ tsuitsakemɔ akuɔ wɔsɛɛ kɛbaa wɔ klɛŋklɛŋ sɔɔmɔ lɛ he, kɛba emiishɛɛ ni kanyaa mɔ tamɔ la lɛ he! Taakɛ Smirna Kristofoi ni amɛtsɔmɔ niiatsɛmɛi yɛ mumɔŋ lɛ ji lɛ, nyɛhaa wɔkɛ ekaa apelea nyɔmɔwoo lɛ he ni gbeyeishemɔ bɛ mli, ni wɔjie wɔhe kpo akɛ ‘mɛi ni yeɔ anɔkwale kɛyashiɔ gbele mli,’ kɛ ehe baahia nakai. Taakɛ mɛi ni Satan ka amɛ yɛ Pergamo lɛ ji lɛ esa akɛ wɔtsake kɛjɛ tsutsu wɔŋ jamɔ, jeŋba shara, aloo apasa jamɔi sɔrɔtoi lɛ ahe. Abi ni Tiatirabii lɛ akwɛ amɛhe nɔ jogbaŋŋ yɛ lakamɔi ni tamɔ nakai nɔŋŋ he, titri lɛ hewalɛi ni mɛi ni tamɔ Jezebel baana yɛ wɔnɔ lɛ. Esa akɛ wɔhu wɔha wɔhiɛ ahi wɔhe nɔ! Mɔ fɛɛ mɔ ni egbo yɛ mumɔŋ, tamɔ Sarde Kristofoi lɛ ahɛle shi dani efee akɛ eeekpe sɛɛ tsɔ. Agbele sɔɔmɔ shinaa ko afɔ wɔhiɛ, taakɛ agbele afɔ Filadelfiabii lɛ ahiɛ lɛ; eba akɛ wɔna hewalɛ ni baaha wɔye kunim yɛ wɔkaa ŋmɛlɛtswaa be nɛɛ nɔ, taakɛ amɛfee lɛ! Kɛji akɛ wɔteŋ mɔ ko efee kulɔkulɔ tamɔ Laodikeabii lɛ fee lɛ, belɛ esa akɛ wɔhɛle shi ni wɔna bɔ ni wɔnyiɛ yayai yɛ mumɔŋ lɛ ni wɔtsake. Yesu damɔ shinaa lɛ sɛɛ eeshi. Eba akɛ wɔ fɛɛ wɔɔhere lɛ atuu ni wɔkɛ lɛ ana mumɔŋ niyenii ni yaa nɔ bianɛ lɛ mli ŋɔɔmɔ yɛ wɔ asafoi 55,000 ni ebɔle jeŋ fɛɛ lɛ mli!—Kpojiemɔ 1:11; 2:7, 10, 11, 17, 29; 3:6, 13, 22.
Nyɔŋmɔ Maŋtsɛsɛi lɛ, Wolo lɛ, kɛ Sanebimɔ Ko
7. Mɛɛ yijiemɔ lalai alaa yɛ ninaa ni ji enyɔ lɛ mli, ni mɛni ofeɔ yɛ he?
7 Yohane na Yehowa anunyam ŋwɛi maŋtsɛsɛi lɛ yɛ ninaa ni ji enyɔ lɛ mli. Wɔ Nyɔŋmɔ lɛ ni awo enɔ gojoo kɛ naakpɛɛ lɛ pueɔ yɛ agbojee ni yɔɔ fɛo fe fɛɛ mli, ni kerubim ejwɛ sɔmɔɔ lɛ, kɛ ŋwɛi bɔfoi akpei abɔ, kɛ Kristofoi asafo lɛ ni atee amɛ shi lɛ hu. Kwɛ bɔ ni amɛyijiemɔ lalai lɛ kanyaa mɔ susuma ha: “Nuŋtsɔ [Yehowa Nyɔŋmɔ], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.” Yehowa kɛ wolo ko ha Mɔ ni sa akɛ egbeleɔ lɛ—Jata ni jɛ Yuda akutso lɛ mli lɛ, Toobi ni agbe lɛ lɛ ni batsɔɔ wɔ Kpɔlɔ lɛ. Bɔɔ nii fɛɛ jie Yehowa kɛ Toobi lɛ yi.—Kpojiemɔ 4:1-1; 5:2-5, 11-14.
8. Mɛni wɔnaa yɛ Kpojiemɔ lɛ mli ninaa ni ji etɛ lɛ mli, ni ekɔɔ wɔgbii nɛɛ ahe yɛ mɛɛ gbɛ nɔ?
8 Agbɛnɛ ninaa ni ji etɛ lɛ! Toobi lɛ tee nɔ egbele wolo lɛ naasɔɔmɔi kpawo lɛ. Mɛni wɔnaa? Klɛŋklɛŋ lɛ, Yesu ni awo lɛ maŋtsɛ hee lɛ ta okpɔŋɔ yɛŋ nɔ yɛ ŋwɛi, ni enɛ damɔ shi kɛha jalɛ tawuu. Nɔ ni nyiɛ sɛɛ ji mɔ ni ta okpɔŋɔ ko ni tsuɔ nɔ ni tsirɛ jeŋ muu lɛ fɛɛ yisɛɛ ewo ta mli lɛ. Kɛkɛ ni hɔmɔ okpɔŋɔ diŋ lɛ hu nyiɛ sɛɛ ba, ni nɔ ni nyiɛ esɛɛ hu ji okpɔŋɔ lamulu ni kɛ hela baa lɛ, mɔ ni enɔtalɔ lɛ gbɛi ji Gbelei Gbohiiaje nyiɛɔ sɛɛ, koni ebami gbɔmɛi akpekpei ni agbe amɛ lɛ. Nɔ ni jeɔ enɛɛmɛi fɛɛ ashishi ji “kɔɔmɔi lɛ abɔimɔ” ni ba adesai anɔ yɛ 1914-1918 ni nakai yinɔ lɛ mli mɛi ni amɛgbɔlɔ lɛ kaiɔ enɛ jogbaŋŋ lɛ. (Mateo 24:3-8) Nakai okpɔŋɔ nɔtaralɔi lɛ tee nɔ yɛ amɛ tafaa lɛ mli! Ni be ni atse naasɔɔmɔi ni ji enumɔ kɛ ekpaa lɛ naa lɛ, nibii tsɔ kɛba ‘Yehowa kɛ Toobi lɛ mlifu gbi wulu lɛ nɔ.’ Sane ni abiɔ ji akɛ: “Namɔ aaanyɛ shi adamɔ?”—Kpojiemɔ 6:1-17.
Mɛi ni “Aaanyɛ Shi Adamɔ”
9. Mɛɛ miishɛɛ sane ko ajie lɛ kpo yɛ ninaa ni ji ejwɛ lɛ mli?
9 Agbele ninaa ni ji ejwɛ lɛ mli, ni miitsɔɔ mɛi ni baaje Nyɔŋmɔ mlifu gbi lɛ mli, kɛ nɔ hewɔ. Ŋwɛi bɔfoi hiɛ hiɛkpatamɔ kɔɔyɔi ejwɛ ni jɛ shikpɔŋ lɛ nɔ lɛ mli koni mumɔŋ Israel—144,000 lɛ—anaasɔɔmɔ lɛ anyɛ agbe naa. “Nii nɛɛ asɛɛ lɛ” ninaa lɛ mli kpa kɛtee nikwɛmɔ he ko ni yɔɔ naakpɛɛ ni tsakeɔ yɛ be fɛɛ mli lɛ mli: “Naa asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli damɔ [Nyɔŋmɔ] maŋtsɛsɛi lɛ hiɛ ni amɛwo atadei yɛji, ni amɛhiɛ blɛoi yɛ amɛdɛŋ, ni amɛbolɔ kɛ gbee waa amɛkɛɛ: Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ kɛ Toobi lɛ nɔ!” (Kpojiemɔ 7:1-10) Ani onaa bo diɛŋtsɛ ohe yɛ nɛkɛ mfoniri nɛɛ mli?
10. (a) Kɛ akɛ Kaimɔi lɛ shishi akɔŋtaabui kɛha 1935 kɛ 1987 lɛ to he lɛ—mɛni nomɛi tsɔɔ yɛ ninai ni ji ejwɛ lɛ mlibaa he? (b) Mɛɛ sanebimɔ kɔɔ wɔteŋ mɔ fɛɛ mɔ he, ni mɛni hewɔ?
10 Mɛi ni ba Yesu gbele lɛ Kaimɔ lɛ shishi yɛ 1935 yɛ jeŋ fɛɛ lɛ ji 32,795. Mɛnɛɛmɛi ateŋ 27,006 ye kaimɔ nii lɛ eko akɛ amɛji 144,000 lɛ ni yɔɔ ŋwɛi hiɛnɔkamɔ lɛ ateŋ mɛi ni eshwɛ yɛ shikpɔŋ lɛ nɔ. Yɛ sɛɛ mli, yɛ nakai afi lɛ nɔŋŋ mli lɛ, abayoo mɛi ni asafo babaoo lɛ ji lɛ yɛ faŋŋ mli, Nɛkɛ heshibalɔi, ni kpaa naanɔ wala gbɛ yɛ paradeiso shikpɔŋ nɔ lɛ hu naa Yesu kɛ ela ni efɔse eshwie shi lɛ mli hemɔkɛyeli; amɛbaa Yehowa ŋɔɔ yɛ henɔjɔɔmɔ mli, amɛkɛ amɛhe haa baptisimɔ ni amɛkɛ ekaa sɔmɔɔ Nyɔŋmɔ kɛ miishɛɛ gbɛkpamɔ akɛ amɛbaaje “amanehulu kpeteŋkpele” lɛ mli shweshweeshwe. Be ni ayeɔ 1987 Kaimɔ lɛ, mɛi ni ba shishi lɛ ayibɔ ji 8,965,221 ni mɛi 8,808 pɛ ye Kaimɔ nii lɛ eko. Enɛ tsɔɔ akɛ ŋmɛnɛ gbɔmɛi akpekpei abɔ yɛ ni amɛjɛ asafo babaoo lɛ mli aloo amɛyɛ miishɛɛ akɛ amɛ aaafata nakai yibɔ lɛ he. Ani ‘ooonyɛ shi odamɔ’ akɛ mɛnɛɛmɛi ateŋ mɔ kome yɛ ‘Yehowa kɛ Toobi lɛ mlifu gbi lɛ nɔ’? Ebaatsɔɔ oyibaamɔ kɛ oto gbɛjianɔ kɛha nakai feemɔ.—Kpojiemɔ 6:15—17; 7:14-17.
Nyɔŋmɔ Kojomɔi ni Akɛ Tɛtɛrɛmantɛrɛi Kpa
11. Mɛɛ kojomɔi ahe tɛtɛrɛmaŋtɛrɛi akpa yɛ ninaa ni ji enumɔ lɛ mli, ni enɛɛmɛi kɔɔ wɔgbii nɛɛ ahe yɛ mɛɛ gbɛ nɔ?
11 Agbele naasɔɔmɔ nɔ ni ji kpawo lɛ naa! Ni nɔ ni ana yɛ mli ji Kpojiemɔ ninaa ni ji enumɔ lɛ. Ŋwɛi bɔfoi kpawo damɔ Nyɔŋmɔ hiɛ. Aha amɛ tɛtɛrɛmaŋtɛrɛi kpawo, ni amɛtsɔ enɛ nɔ amɛjaje saji ni Yehowa webii ejaje yɛ shikpɔŋ muu lɛ fɛɛ nɔ kɛjɛ 1922 lɛ. Klɛŋklɛŋ ejwɛ lɛ jaje kojomɔi amɛshwie adesai “amlijai etɛ amli ekome” nɔ, eka shi faŋŋ akɛ mɛi ni yɔɔ Kristendom lɛ. Nɛkɛ “tɛtɛrɛmaŋtɛrɛi” nɛɛ tsɔɔ akɛ Kristendom fa ni ji “shikpɔŋ” (nɔ ni tamɔ Satan nibii gbɛjianɔtoo ni hiɔ shi daa) kɛ “ŋshɔ lɛ” (adesai ni efee hoo ni naaa hejɔɔmɔ lɛ) , kɛ agbɛnɛ ‘efaai kɛ nubui’ lɛ (Kristendom tsɔɔmɔi kɛ jeŋ nilee) lɛ kɛ eŋwɛi bɔɔnii ni ewo duŋ lɛ (osɔfoi lɛ, ni bɛ mumɔŋ la dɔŋŋ lɛ) fɛɛ ji nibii ni Nyɔŋmɔ mlifu baa nɔ. “Okropɔŋ” ko ni miifiliki, ni damɔ shi kɛha ŋwɛi bɔfo ko lɛ pue yɛ ŋwɛi teŋ, ni etswa adafi akɛ tɛtɛrɛmaŋtɛrɛi etɛ ni eshwɛ ni baagbɛɛ lɛ baatsɔ “kpoo, kpoo, kpoo ha mɛi ni hiɔ shikpɔŋ lɛ nɔ lɛ.”—Kpojiemɔ 8:1-13.
12. Namɔ gbeleɔ bu kwɔŋkwɔŋ lɛ, ni yɛ mɛɛ gbɛ nɔ yɛ ŋmɛnɛŋmɛnɛ beaŋ lɛ “baalabii” babaoo etsɛ̃rɛ̃ osɔfoi lɛ yɛ?
12 No hewɔ lɛ bɔfo ni ji enumɔ lɛ kpa etɛtɛrɛmaŋtɛrɛ lɛ. Ni naa! “Ŋulami ko”—Nuŋtsɔ Yesu—gbele bu kwɔŋkwɔŋ ni lasu eyi mli obɔ lɛ naa, ni baalabii babaoo fa kpo kɛjɛ mli. Nɔ ni gbalaa mɔ jwɛŋmɔ ji akɛ enɛ damɔ shi kɛha Yesu ni miijie Nyɔŋmɔ Odasefoi ni afɔ amɛ mu lɛ kɛmiijɛ nitsumɔ ni amɛbɛ tsumɔ yɛ 1919 lɛ mli. Akɛni akɛ ŋwɛi hegbɛ eha amɛ hewɔ lɛ, amɛfite osɔfoi lɛ alɛɛhei lɛ, amɛkpa amɛ apasa tsɔɔmɔi kɛ osatofeemɔ lɛ he mama “nyɔji enumɔ”—nɔ ni ji baalabii awala sɛɛ tsɛlɛ lɛ. Enɛ tsɔɔ akɛ ŋmɛnɛŋmɛnɛ beaŋ baalabii ayinɔ nɛɛ “hoŋ eyaŋ” ja Yehowa kɛ Kristo egbe jeŋmaji lɛ akojomɔ naa da. Nɛkɛ baalabii akuu nɛɛ eshi woji ni adamɔ Biblia lɛ nɔ aŋmala, kojomɔ shɛɛ saji ni tamɔ la ni tsɛ̃ɔ mɛi tamɔ nyɔŋmɔŋkaakroi alei akpekpei akpei abɔ amɛha gbɔmɛi lɛ momo. Yohane wie akɛ: ‘Klɛŋklɛŋ kpoo lɛ eho, naa, kpooi sɔrɔtoi enyɔ miiba lolo yɛ nii nɛɛ asɛɛ.’—Kpojiemɔ 91-12; Mateo 24:34; 25:31-33.
13. (a) Namɛi feɔ ŋwɛi bɔfoi ejwɛ ni afɛne amɛ kɛjɛ Eufrate Faa lɛ naa lɛ he mfoniri, ni mɛni nitsumɔ amɛyɔɔ? (b) Namɛi ji okpɔŋɔi anɔtaralɔi akpei nyɔŋmai abɔ lɛ, ni mɛni ji amɛhewalɛ ni yɔɔ “amɛdaaŋ kɛ amɛlei amli” lɛ?
13 Tɛtɛrɛmaŋtɛrɛ ni ji ekpaa lɛ gbɛɛ, ni ejie “kpoo” ni ji enyɔ lɛ kpo. Aŋmɛɛ ŋwɛi bɔfoi ejwɛ he kɛjɛ Eufrate Faa lɛ niiaŋ, ni enɛ fee ŋmɛɛmɔ ni aŋmɛɛ Nyɔŋmɔ odasefoi ni afɔ amɛ mu lɛ ahe kɛjɛ Babilon nomŋɔɔ mli yɛ 1919 lɛ he mfoniri. Amɛsaa amɛhe koni “amɛgbe gbɔmɛi amlijaa etɛ mli ekome”, koni amɛha ale akɛ Kristendom osɔfoi lɛ egboi yɛ Yehowa hiɛ. Shi yelikɛbuamɔ he miihia koni akɛkpa odaseyeli nitsumɔ nɛɛ mli, ni Yehowa kɛ enɛ haa kɛtsɔ asafo babaoo ko ni ji nanemɛi nitsulɔi ni akɛ amɛ ba lɛ anɔ. Nɛkɛ odasefoi ni afɔ amɛ mu nɛɛ kɛ nɛkɛ yelikɛbualɔi nɛɛ fɛɛ feɔ ekome kɛyaa amɛhiɛ tamɔ okpɔŋɔ nɔtaralɔi “akpei nyɔŋmai enyɔ toi akpei nyɔŋma.” Amɛ hewalɛ yɛ “amɛdaaŋ” ni ji akɛ amɛjajeɔ Yehowa shɛɛsane lɛ yɛ gbɔmɛi lɛ ashiai amli, ni eyɛ “amɛlei amli” ni no ji akɛ amɛshiɔ Biblia mli woji ni gbaa oweletɔɔ gbi ni baa kɛ foi lɛ yɛ amɛsɛɛ—Kpojiemɔ 9:13-21; Bɔfoi lɛ Asaji 20:20, 21.
14. (a) Namɔ “ji bɔfo ni he wa” ni yɔɔ ninaa ni ji ekpaa lɛ mli lɛ, ni mɛni efeɔ ni ekɛɔ hu? (b) Wolo bibioo lɛ ni ŋɔɔ “tamɔ wo” ni kɛlɛ ‘ejoɔ yɛ musuŋ’ lɛ, tsɔɔ mɛni?
14 Agbɛnɛ ninaa ni ji ekpaa lɛ mli gbele. Wɔ na “bɔfo kroko ni he wa,” ekashi faŋŋ akɛ Nuŋtsɔ Yesu yɛ gbɛhe krɛdɛɛ ko mli. Ehiɛ wolo bibioo ko yɛ edɛŋ. Anu gbee kɛ nyɔŋmɔ shiimɔi ahe, kɛkɛ ni ŋwɛi bɔfo lɛ ka Bɔlɔ Kpeteŋkpele lɛ kita akɛ: “Be ko be ko bɛ dɔŋŋ, shi moŋ bɔfo ni ji kpawo lɛ gbee lɛ gbii lɛ amli, be ni eheɔ ekpa lɛ, no lɛ agbe Nyɔŋmɔ teemɔŋ sane lɛ hu naa.” Akɛɛ Yohane ni ehe wolo bibioo lɛ ni eye. Eŋɔɔ yɛ edaaŋ “tamɔ wo,” taakɛ Maŋtsɛyeli lɛ he sane lɛ kɛ “ŋwɛi hee kɛ shikpɔŋ hee” lɛ he shiwoo kɛ jɔɔmɔi lɛ ŋɔɔ Yohane kuu ni afɔ amɛ mu lɛ kɛ amɛhefatalɔi ni yɔɔ ŋmɛnɛ lɛ anaa lɛ. Shi, nɔ ni tamɔɔɔ enɛ lɛ, nitsumɔ akɛ ajaje Nyɔŋmɔ oweletɔɔ gbi lɛ atsɔɔ “maji kɛ jeŋmaji kɛ maji anɔ wiemɔi kɛ maŋtsɛmɛi pii” lɛ wa kɛha mɛi komɛi akɛ amɛ aaakpɛlɛ nɔ. Shi na tsui! Feemɔ ekaa yɛ hemɔkɛyeli mli akɛ Yehowa kɛ hewalɛ ni he hiaa bo lɛ baaha yɛ bei abɔ ni ojajeɔ eweletɔɔ gbi lɛ nɛɛ.—Kpojiemɔ 10:1-11; 21:1, 4; 1 Yohane 5:4; Yesaia 40:29-31; 61:1, 2.
Tɛtrɛmaŋtɛrɛ Kpawo lɛ kɛ Kpoo ni ji Etɛ lɛ
15. (a) Mɛni ba beni atsi kpoo ni ji etɛ lɛ ta ni bɔfo ni ji kpawo lɛ kpa etɛtrɛmaŋtɛrɛ lɛ? (b) Maŋtsɛyeli lɛ jajemɔ lɛ ji kpoo yɛ mɛɛ gbɛ nɔ?
15 Yɛ be mli ni egba mɔdɛŋ ni ehenyɛlɔi lɛ bɔ yɛ 1918 koni “amɛgbe” Nyɔŋmɔ odasefoi lɛ, ni agbɛnɛ etsɔɔ bɔ ni naakpɛɛ “wala mumɔ jɛ Nyɔŋmɔ ŋɔɔ ba amɛmli” ni ekanya amɛ yɛ 1919 koni amɛye jeŋ muu fɛɛ odase sɛɛ lɛ, Yohane ŋma akɛ: “Kpoo ni ji enyɔ lɛ eho; naa, kpoo ni ji etɛ lɛ miiba oya.” Yɛ mɛɛ gbɛ nɔ? Nɔ ni aŋma lɛ tee nɔ akɛ: “Ni bɔfo ni ji kpawo lɛ kpa.” No hewɔ lɛ kpoo ni ji etɛ lɛ kɔɔ nakai naagbee tɛtɛrɛmantɛrɛ lɛ kpamɔ he. Ni bo toi! “Ni anu gbee wuji yɛ ŋwɛi miikɛɛ akɛ: ‘Je nɛŋ maŋtsɛyeli lɛ etsɔ wɔ-Nuŋtsɔ lɛ [Yehowa] kɛ e-Kristo (Mɔ ni efɔ lɛ mu) lɛ nɔ, ni eeeye maŋtsɛ kɛaatee naanɔi anaanɔ.’” Enɛ ji Nyɔŋmɔ Maŋtsɛyeli kɛtsɔ Kristo Yesu ni kɛ enanemɛi niyelɔi 144,000 lɛ kɛ Nyɔŋmɔ teemɔŋ sane lɛ baa naagbee, ni amɛbuɔ jeŋ muu fɛɛ maŋtsɛ, Yehowa Nyɔŋmɔ, Ofe lɛ bem lɛ. Ani nɛkɛ Maŋtsɛyeli jajemɔ nɛɛ ji kpoo? Kɛha efɔŋ feelɔi lɛ, eji hɛɛ! Ejaakɛ etsɔɔ bɔ ni Nyɔŋmɔ “baafite mɛi ni fiteɔ shikpɔŋ lɛ.”—Kpojiemɔ 11:1-19.
16. Mɛɛ nibii ni yɔɔ naakpɛɛ ajie lɛ kpo yɛ ninaa ni ji kpawo lɛ mli?
16 Ninaa ni ji kpawo lɛ kpɛ ni abɔi namɔ! Kwɛmɔ jɛmɛ, Nyɔŋmɔ ŋwɛi gbɛjianɔtoo ni tsuɔ nii waa lɛ, ‘eyoo’ lɛ. Ehiɛ musu ni eekɔmɔ koni efɔ binuu ni amɛlɛ aahu lɛ. Klɛŋklɛŋ be mli nɛ—shi jeee naagbee—yɛ Kpojiemɔ, ni darako tsuru kpeteŋkpele ko, “blema onufu lɛ ni atsɛɔ lɛ diabolo naafolɔlɔ loo abonsam lɛ kɛ Satan henyɛlɔ lɛ ni shishiuɔ jeŋ muu fɛɛ lɛ,” pue, ni efee klalo akɛ ebaami gbekɛ ni afɔ lɛ. “Nyɛɛ ni ka [onufu lɛ] kɛ yoo lɛ teŋ” lɛ eshɛ enaagbe nifeemɔ kwraa he! Yoo lɛ “fɔ binuu” ni asha binuu lɛ amrɔ nɔŋŋ kɛtee Nyɔŋmɔ maŋtsɛsɛi lɛ he.—Kpojiemɔ 12:1-6, 9; 1 Mose 3:15; Daniel 2:44; 7:13, 14.
17. (a) Namɔ ji Mikael, ni kɛjɛ 1914 kɛbaa nɛɛ yɛ mɛɛ gbɛ nɔ ehi shi yɛ egbɛi lɛ naa? (b) Tsɔɔmɔ sɔrɔtofeemɔ ni ka ‘kpooi sɔrɔtoi etɛ’ lɛ kɛ “kpoo ha shikpɔŋ” lɛ ni yɔɔ Kpojiemɔ 12:12 lɛ mli.
17 Enɛ ji gbekɛnuu Maŋtsɛyeli lɛ ni ato shishi yɛ ŋwɛi yɛ afi 1914 ni fee yinɔsane lɛ. Atsɛɔ e-Maŋtsɛ, Kristo Yesu hu akɛ Mikael, ni eshishi ji “Namɔ Tamɔ Nyɔŋmɔ?” Eha nakai sanebimɔ lɛ hetoo amrɔ nɔŋŋ ni shishashaomɔ ko bɛ mli yɛ ta ni ekɛ Satan wu ni eshɛ nakai blema drako lɛ kɛ edaimonioi asafoi lɛ eshwie shikpɔŋ nɔ lɛ. Kɛjɛ 1914 kɛbaa nɛɛ, etsɔ “kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.” No hewɔ lɛ nɛkɛ kpoo nɛɛ ha adesai yɔɔ shihilɛ ni yɔɔ mɔbɔ mli ŋmɛnɛ nakai lɛ, shi esaaa akɛ akɛ nɛkɛ kpoo nɛɛ futuɔ ‘kpooi sɔrɔtoi etɛ’ ni Yehowa kɛbaa efɔŋ feelɔi anɔ be ni ekojoɔ amɛ lɛ.—Kpojiemɔ 12:7-12.
18. (a) Mɛɛ kpoo Satan Abonsam bɔ mɔdɛŋ ni ekɛba Yehowa tsuji anɔkwafoi lɛ anɔ dani Jeŋ Ta II ba kɛ esɛɛ fɛɛ? (b) Mɛni ji nɔ ni abonsam etswa efai shi akɛ ebaafee lolo, ni mɛni ji nibii ni ninai ni eshwɛ lɛ baajie amɛ kpo?
18 Abonsam ebɔ mɔdɛŋ hu koni ekɛ kpoo aba Yehowa tsuji anɔkwafoi ni yɔɔ shikpɔŋ nɔ lɛ anɔ. Dani Jeŋ Ta II aaaba kɛ esɛɛ fɛɛ lɛ, efɛ̃ yiwaa babaoo eshwie amɛnɔ koni ekɛbɔ mɔdɛŋ ni emi “mɛi ni eshwɛ” yɛ Nyɔŋmɔ gbɛjianɔtoo ni tamɔ yoo lɛ—144,000 lɛ ateŋ mɛi ni sɔmɔɔ lolo yɛ adesai ateŋ lɛ anitsumɔ lɛ. No hewɔ lɛ, Yehowa kwɛ koni shikpɔŋ lɛ, Satan diɛŋtsɛ nibii agbɛjianɔtoo lɛ, ami nakai nu afua lɛ. Shi, Satan ni mli efu lɛ etswa efai shi akɛ ebaaya nɔ ewu eshi Yehowa Odasefoi (Kpojiemɔ 12:13-17) Mɛni baajɛ mli aba yɛ naagbee kwraa? Ninai sɔrɔtoi nɛɛhu yɛ lolo ni baaba, ni enɛɛmɛi baagba wɔ!—Habakuk 2:3.a
[Shishigbɛ niŋmai]
a Ajie kɛjɛ December 15, 1988 Watchtower lɛ mli.
SANEBIMƆI NI AKƐTIƆ MLI
□ Yehowa kɛ ŋwɛi bɔfoi tsu nii yɛ Kpojiemɔ wolo lɛ he yɛ mɛɛ gbɛ nɔ?
□ Te esa akɛ Yesu shɛɛ saji ni ekɛba asafoi kpawo lɛ asa wɔhe aha tɛŋŋ?
□ Mɛni ejɛ tɛtɛrɛmaŋtɛrɛi kpawo ni akpa lɛ mli eba?
□ Baalabii babaoo ni fa kpo lɛ kɛ okpɔŋɔ nɔtaralɔi ni anyɛɛɛ akane amɛ lɛ feɔ mɛni he mfoniri?
□ Mɛni hewɔ akɛ Nyɔŋmɔ Maŋtsɛyeli lɛ fɔmɔ toɔ “kpoo ni ji etɛ” lɛ he lɛ?
[Akrabatsa ni yɔɔ baafa 20]
NINAA FƐƐ NINAA YITSEI KƐ KUKUJI:
□ NINAA 1 Kpo 1:10–3:22
□ NINAA 2 Kpo 4:1–5:14
□ NINAA 3 Kpo 6:1-17
□ NINAA 4 Kpo 7:1-17
□ NINAA 5 Kpo 8:1–9:21
□ NINAA 6 Kpo 10:1–11:19
□ NINAA 7 Kpo 12:1-17
□ NINAA 8 Kpo 13:1-18
□ NINAA 9 Kpo 14:1-20
□ NINAA 10 Kpo 15:1–16:21
□ NINAA 11 Kpo 17:1-18
□ NINAA 12 Kpo 18:1–19:10
□ NINAA 13 Kpo 19:11-21
□ NINAA 14 Kpo 20:1-10
□ NINAA 15 Kpo 20:11–21:8
□ NINAA 16 Kpo 21:9–22:5
[Akrabatsa/Mfonirii ni yɔɔ baafa 21-24]
KPOJIEMƆ NINAI 16 LƐ—EMLI OTII KOMƐI
1 Yesu, eyɛ asafoi kanetsei kpawo lɛ teŋ, ekɛ shɛɛ saji ni suɔmɔ yɔɔ mli tsɔ ŋulamii kpawo lɛ ni ji nɔkwɛlɔi ni afɔ amɛ mu lɛ anɔ
2 Toobi kunimyelɔ lɛ nine shɛ wolo ni kojomɔ shɛɛ saji yɔɔ mli nɔ yɛ Yehowa ŋwɛi maŋtsɛsɛi lɛ hiɛ
3 Yesu Kristo ta okpɔŋɔ nɔ koni eyaye kunim, be ni okpɔŋɔ nɔtaralɔi krokomɛi kɛ amanehulu baa adesai anɔ ni Nyɔŋmɔ mlifu gbi lɛ bɛŋkɛɔ lɛ
4 Mɛi 144,000 lɛ kɛ asafo babaoo lɛ anaabuamɔ baa naagbee beni ŋwɛi bɔfoi lɛ tsiɔ amanehulu kpeteŋkpele lɛ naa lɛ
5 Ŋwɛi bɔfoi kpa tɛtɛrɛmaŋtɛrɛi ni ji kojomɔ shɛɛ saji ni Yehowa Odasefoi fa kpo tamɔ baalabii ni amɛkpa apasa jamɔ he mama
6 Beni akpa tɛtɛrɛmaŋtɛrɛ ni ji kpawo lɛ; Nyɔŋmɔ “odasefoi” lɛ na hewalɛ ekoŋŋ koni amɛtswa Yehowa kɛ e-Kristo lɛ Maŋtsɛyeli ni baa lɛ he adafi
7 Beni afɔ Maŋtsɛyeli lɛ sɛɛ yɛ 1914 lɛ, Kristo shɛ Satan kɛ edaimonioi lɛ eshwie shikpɔŋ lɛ nɔ
8 Kooloi wuji enyɔ ni hiɛ yɔɔ la fa kpo, ni maŋkwramɔŋ koolo ni ji enyɔ lɛ mu wala mumɔ ewo klɛŋklɛŋ nɔ lɛ amaga lɛ mli, Jeŋmaji Ekomefeemɔ lɛ
9 Akpaa adesai ateŋ mɛi ni “sheɔ Nyɔŋmɔ gbeyei ni amɛwoɔ ehiɛ nyam” lɛ tamɔ yibii haa naanɔ wala, mɛi krokomɛi lɛ kɛhaa hiɛkpatamɔ
10 Nyɔŋmɔ mlifu tɔi kpawo ni afɔse ashwie shi lɛ kɛ mɛi fɛɛ ni Satan “kɔɔyɔɔ” ni mli ewo muji lɛ tsirɛɔ amɛ lɛ ahiɛkpatamɔ baa
11 Ajwamaŋ kpeteŋkpele lɛ, apasa jamɔ, gbee shi kɛjɛ maŋkwramɔ “kooloo” lɛ nɔ ni kooloo lɛ kpata ehiɛ
12 Yɛ Babilon Kpeteŋkpele lɛ hiɛkpatamɔ lɛ sɛɛ lɛ, asaa he agbenaa aha Toobi lɛ kɛ eyɛmforo ni ji 144,000 lɛ akpeemɔ lɛ
13 Be ni akpata ajwamaŋ kpeteŋkpele lɛ hiɛ lɛ, Yesu nyiɛɔ ŋwɛi tabilɔi ahiɛ kɛkpataa Satan shikpɔŋ nɔ gbɛjianɔtoo ni eshwɛ lɛ hiɛ
14 Bu kwɔŋkwɔŋ lɛ mli ni akɛ Satan wo lɛ gbele gbɛ kɛha Kristo kɛ eyɛmforo lɛ ni ji 144,000 lɛ Afii Akpe Nɔyeli lɛ
15 Yɛ Kristo Yesu kɛ eyɛmforo lɛ “ŋwɛi hee” kɛ “shikpɔŋ hee” lɛ shishi lɛ, adesai fɛɛ baana jɔɔmɔi babaoo ni jɛ Yehowa ŋɔɔ lɛ mli ŋɔɔmɔ
16 Nyɔŋmɔ gbɛjianɔtoo kɛha tsamɔ kɛ wala kɛha adesai baaho kɛjɛ anunyam Yerusalem Hee lɛ mli