‘Nyɛshia Kpe Ni Nyɛhiɛ Akaa Shi’
“Nyɛkahaa wɔmiiwɔa tamɔ mɛi ni eshwɛ lɛ, shi moŋ nyɛhaa wɔshia kpe ni wɔhiɛ akaa shi.”—1 Tesalonikabii 5:6.
1. Mɛɛ Biblia gbalɛ mlibaa wɔbaanyɛ wɔkpa gbɛ yɛ be kukuoo nɛɛ mli?
1 BENI Yesu gba Yerusalem hiɛkpatamɔ yɛ eyinɔ lɛ mli lɛ, ejaje akɛ: “Oweletɔɔ gbii lɛ nɛ, koni nibii fɛɛ ni aŋma lɛ aba mli.” (Luka 21:22) Nyɔŋmɔ jalɛ kojomɔ ba mɛi ni ámɛbule egbɛi lɛ, ni ámɛku emlai lɛ amli ni amɛwa etsuji lɛ ayi lɛ anɔ yɛ afi 70 Ŋ.B. Nakai nɔŋŋ hu etsɛŋ ni Nyɔŋmɔ jalɛ kojomɔ he nii ni etsuɔ eshiɔ ŋmɛnɛŋmɛnɛ yiwalɛ nibii agbɛjianɔtoo nɛɛ baaba, ni ebaatsɔɔ shikome ekoŋŋ akɛ nibii fɛɛ ni aŋma yɛ Biblia gbalɛ mli lɛ baaba mli anɔkwale. Ni ákɛ kojomɔ baaba mɛi ni amɛsako amɛhe lɛ anɔ trukaa kɛ hejɔ̃mɔ, ejaakɛ Biblia lɛ ekɛɛ akɛ: “Ejaakɛ be mli ni amɛaakɛɛ akɛ: Hejɔlɛ yɛ ni wɔyɛ shweshweeshwe! lɛ no mli nɔŋŋ hiɛkpatamɔ aaabatua amɛ trukaa.”—1 Tesalonikabii 5:2, 3.
2. Mɛɛ ŋaawoo Nyɔŋmɔ Wiemɔ lɛ kɛhaa wɔ ni wɔbaanyɛ wɔkɛto wɔsɛɛ be ni ebɛŋkɛ kpaakpa lɛ he?
2 Ehe miihia waa ni Yehowa tsuji ahiɛ ahi amɛhe nɔ ni amɛkɛ amɛhe akpɛtɛ amɛyiŋtoo lɛ he gbagbalii kɛjɛ amrɔ nɛɛ kɛyashi be mli ni Nyɔŋmɔ aaatsu ekojomɔi ahe nii egbe naa. Bɔfo Paulo ni ŋma mumɔ naa gbalɛ ni yɔɔ 1 Tesalonikabii 5:2, 3 lɛ efɔ shi lɛ hu kɛɛ akɛ: “Belɛ no hewɔ lɛ, nyɛkahaa wɔmiiwɔa tamɔ mɛi ni eshwɛ lɛ, shi moŋ nyɛhaa, wɔshia kpe ni wɔhiɛ akaa shi.” (1 Tesalonikabii 5:6) Yesu wo ŋaa akɛ: “No hewɔ lɛ nyɛsraa be fɛɛ be ni nyɛsɔlea, ni nyɛnyɛ nii ni baaba nɛɛ fɛɛ mli nyɛje.” (Luka 21:36) Bɔfo Petro hu ŋma nakai nɔŋŋ: “Agbɛnɛ, akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋ kɛ Nyɔŋmɔ jamɔi amli?”—2 Petro 3:11.
YEHOWA ŊƆƆ NI AAABA BIANƐ
3. Mɛni esa akɛ mɔ ko afee dani enyɛ eje mli kɛyabote Nyɔŋmɔ gbɛjianɔtoo hee lɛ mli?
3 Ehe miihia waa ni mɔ fɛɛ mɔ ni sumɔɔ akɛ eje mli kɛyabote Nyɔŋmɔ jalɛ gbɛjianɔtoo hee lɛ mli lɛ kɛ Yehowa kɛ E-shikpɔŋ nɔ gbɛjianɔtoo lɛ abote wekukpaa kpakpa mli bianɛ. “Mɔɔ ni wa ji Yehowa gbɛi lɛ, no mli jalɔ shaa foi kɛyaa ni ehiɔ shi shweshweeshwe.” (Abɛi 18:10) “Ni aaaba mli akɛ naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ, ni aaawo enɔ fe gɔŋkpɔi lɛ; ni jeŋmaji fɛɛ aaaho kɛaaba he.” (Yesaia 2:2) Hɛɛ, esa akɛ jeŋmaji lɛ amli gbɔmɛi fɛɛ ni sumɔɔ akɛ amɛhiɔ shi yɛ paradeiso gbɛjianɔtoo he lɛ mli lɛ aho yuu kɛya Nyɔŋmɔ gɔŋ lɛ nɔ, enɔkwa jamɔ ni akɛma shi shiŋŋ ni awo nɔ fe jamɔi krokomɛi fɛɛ lɛ he bianɛ.
4. Mɛɛ gbɛ nɔ Yesu tsɔɔ yɛ akɛ ni mɔ ko aaamɛ yɛ be kakadaŋŋ mli dani eba Yehowa masɛi lɛ baanyɛ afee nɔ ni oshara yɔɔ mli?
4 Mɛni hewɔ hehiamɔ babaoo yɔɔ Yehowa anɔkwale jamɔ ni aaaba he bianɛ lɛ he lɛ? Ani esaaa akɛ gbɔmɔ anɔkwafo lɛ mɛɔ be fioo kɛyashi be mli ni eeena Yehowa hiɛkpatamɔ kojomɔi lɛ ashishijee diɛŋtsɛ dani ehe afee eya ni eba E-masɛi? Yɛ be mli ni enɛ baaŋɔɔ mɛi komɛi anaa lɛ, ani no baaha ona be bɔ ni sa ni okɛtswa wekukpaa kpakpa yɛ bo kɛ Yehowa teŋ? Odaseyeli ni jɛ Ŋmalɛ lɛ mli lɛ haa hetoo akɛ, Dabi. Yesu bɔ kɔkɔ akɛ: “Shi nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋmaa he haomɔi akahe nyɛtsuii ni nakai gbi lɛ miibatinyɛ shi trukaa; ejaakɛ ebaaba mɛi fɛɛ ni hiɔ shikpɔŋ muu lɛ fɛɛ nɔ lɛ anɔ tamɔ tsɔne.” (Luka 21:34, 35) Kadimɔ akɛ ebaa mɛi ni hiɛ etsɛko yɛ mumɔŋ lɛ anɔ ni amɛleee, ejaakɛ nakai “gbi” lɛ baa amɛnɔ “trukaa,” “tamɔ tsɔne,” tamɔ bɔ pɛ ni ‘hiɛkpatamɔ tutuaa’ mɛi ni kɛɔ akɛ “Hejɔlɛ yɛ ni wɔyɛ shweshweeshwe!” lɛ “trukaa” lɛ.
5. Mɛɛ Biblia mli nɔkwɛmɔ nii wɔyɔɔ ni tsɔɔ akɛ ehe miihia ni gbɔmɛi lɛ akase Yehowa he nii dani hiɛkpatamɔ lɛ aje shishi?
5 Yesu kɛ gbɔmɛi ni tamɔ nɛkɛ lɛ to kooloo ni yabote tsɔne mli ni eleee lɛ he. Ni agbɛnɛ ekɛ mɛi ni hiɛ bɛ amɛhe nɔ yɛ mumɔŋ lɛ to mɛi ni hi Noa gbii lɛ amli ni “amɛhiɛ bɛ amɛhe nɔ kɛyashi nu afua lɛ baloo amɛfɛɛ kɛtee” lɛ he. Ani be yɛ lolo kɛha nakai gbɔmɛi lɛ koni amɛbakase Yehowa he nii ni amɛba ehebuu shishi yɛ sɛɛ mli beni Nu Afua lɛ eje shishi lɛ? Dabi, ejaakɛ Yesu kɛɛ yɛ faŋŋ mli akɛ, be mli ni Nu Afua lɛ ba lɛ, “ebaloo amɛfɛɛ kɛtee.” No mli lɛ amɛbɛ hebuu adeka ni akɛbaa Noa kɛ eweku lɛ ayi lɛ mli. Agbɛnɛ hu, beni Nyɔŋmɔ kojomɔ ba Sodom kɛ Gomora nɔ lɛ, ani mɛi komɛi je mli yɛ sɛɛ mli beni la hiɛkpatamɔ ni nɛɔ kɛjɛɔ ŋwɛi lɛ eje shishi lɛ? Dabi, ejaakɛ akpata amɛfɛɛ amɛhiɛ ja Lot kɛ ebiyei lɛ ni ámɛshi jɛmɛ momo lɛ. Hiɛkpatamɔ lɛ hewalɛ lɛ po loo Lot ŋa ni eje shishi akɛ eeeshi jɛmɛ shi eshashao shi lɛ po kɛtee. Belɛ yiŋtoo kpakpa hewɔ ni Yesu kɛɛ akɛ: “Nyɛkaia Lot ŋa lɛ!”—Mateo 24:37-39; Luka 17:32.
6. Odaseyelii babaoo ni yɔɔ Ŋmalɛi lɛ amli lɛ teɔ shi ewoɔ mɛni ni aheɔ ayeɔ?
6 Shi kɛ̃lɛ, ani be ko baahi “Babilon kpeteŋkpele” ni ji jeŋ apasa jamɔ maŋtsɛyeli lɛ shigbeemɔ lɛ sɛɛ ni gbɔmɛi baaná hegbɛ ni amɛhiɛ atse yɛ mumɔŋ ni amɛtao Yehowa sɛɛgbɛ? Ŋmalɛi lɛ amli odaseyeli tsɔɔ akɛ ebaŋ lɛ nakai. Kɛfata odaseyelii ni wɔtsɔ hiɛ wɔna lɛ ahe lɛ, klɛŋklɛŋ afii oha lɛ mli Yuda maŋ lɛ nɔ̃ lɛ hu yɛ. Nakai Yudafoi Nyɔŋmɔ jalɔi lɛ nu he akɛ amɛmiija Nyɔŋmɔ bɔ ni sa no hewɔ lɛ ehe ehiaaa ni amɛbo Yesu loo esɛɛnyiɛlɔi lɛ ashiɛmɔ lɛ toi. Shi, no mli lɛ Yesu ebɔ kɔkɔ akɛ: “Shi kɛ nyɛna akɛ abɔ nsra awo Yerusalem he lɛ, belɛ nyɛnaa nyɛlea akɛ efitemɔ lɛ eshɛ. No mli lɛ mɛi ni yɔɔ Yudea lɛ ajo foi aya gɔji lɛ anɔ, ni mɛi ni yɔɔ mã lɛŋ lɛ aje kpo.” (Luka 21:20-22) Shi beni Roma asraafoi lɛ ni ebɔle Yerusalem he lɛ gbala amɛhe shi yɛ afi 66 Ŋ.B. lɛ, Yudafoi ni heɔ amɛhe amɛyeɔ tsɔ lɛ ‘ejeee shishi akɛ amɛaajo foi.’ Akɛni amɛyatutua Roma asraafoi lɛ ni kuɔ amɛsɛɛ lɛ yɛ amɛsɛɛgbɛ ni no ha amɛfee tamɔ amɛye amɛnɔ kunim hewɔ lɛ, Yudafoi lɛ nu he akɛ ehe ehiaaa ni amɛjo foi. Amɛhe amɛye akɛ Nyɔŋmɔ kɛ amɛ yɛ, ni amɛfee jwiɛtɛi shika hee po ni aŋma nii yɛ nɔ akɛ “Yerusalem, Krɔŋkrɔŋ Lɛ.” Shi Yesu mumɔ naa gbalɛ lɛ tsɔɔ akɛ Yerusalem jeee krɔŋkrɔŋ dɔŋŋ kɛha Yehowa.
7. Mɛni ba Yudafoi lɛ ni amɛfeee nɔ ni Yesu wo he ŋaa lɛ anɔ?
7 Akɛni apasa jamɔ laka amɛ hewɔ lɛ, Yudafoi lɛ shiii Yerusalem kɛ Yudea beni hegbɛ yɔɔ akɛ amɛaafee nakai lɛ. Yɛ anɔkwale mli lɛ, yɛ afi 70 Ŋ.B. agbiɛnaa be mli lɛ, amɛfee nɔ ko mɔ tamɔɔɔ nakai moŋ! Amɛbayi Yerusalem obɔ kɛha jamɔ gbijurɔyeli ko. Shi yɛ nakai be ni sa lɛ mli nɔŋŋ ni Roma asraafoi babaoo ko ni he wa ni yɔɔ Tatsɛ Tito shishi lɛ ku amɛsɛɛ ni amɛbabɔle Yerusalem he ni amɛsa gbɔmɛi lɛ fɛɛ yi tamɔ kooloi ni adu amɛ yɛ tsɔne mli. Hekawoo lɛ sɛɛ etsɛɛɛ ni akpata Yerusalem hiɛ. Mɔ ni kɛ ehiŋmɛi na nibii ni ba nɛɛ, yinɔsaneŋmalɔ Flavius Josephus ŋma akɛ: “Agbɛnɛ abu naa akɛ yibɔ ni aloo amɛ kɛtee nom mli yɛ nɛkɛ ta nɛɛ fɛɛ mli lɛ naa shiɔ akpei nyɔŋmai nɛɛhu kɛ kpawo; ni yibɔ ni hiɛ kpata yɛ nakai hekawoo lɛ fɛɛ mli ji akpeiakpe kome kɛ akpei oha [1,100,000] ni amɛteŋ mɛi ni fa ji mɛi ni jɛ nakai maŋ lɛ nɔŋŋ mli [kɛ Yerusalem bii], kɛ mɛi ni jɛɛɛ maŋtiase lɛ diɛŋtsɛ mli; ejaakɛ amɛfɛɛ amɛjɛ maji kɛ akrowai lɛ amli amɛba koni amɛbaye akpiti gbijurɔ lɛ, kɛkɛ ni asraafoi lɛ sa amɛyi trukaa . . .aŋa maŋ muu lɛ fɛɛ yi agbɛnɛ tamɔ shɛɛ mli sane ko yɛ gboklɛfoi atsuŋ, ni Roma asraafoi lɛ bɔle maŋ lɛ he kɛkpe.”—Wars of the Jews, Book VI, Chap. IX, pars. 3, 4, ni William Whiston tsɔɔ shishi.
8. Mɛni jɛ mli ba ha Kristofoi ni bo Yesu toi lɛ ni kɛ nɔ ni jɛ mli ba mɛi ni bɔ mɔdɛŋ akɛ amɛaajo foi yɛ naagbee kwraa lɛ anɔ lɛ kpaaa gbee?
8 Shi kɛ̃lɛ, Kristofoi ni amɛshi kpe ni amɛhiɛ ehi amɛhe nɔ lɛ eshi Yerusalem kɛ Yudea jeeŋmɔ ámɛtee, amɛjo foi kɛtee hei ni yɔɔ shweshweeshwe yɛ be mli ni hegbɛ lɛ ba yɛ afi 66 Ŋ.B. lɛ. Akɛni amɛhe Yesu gbalɛ wiemɔi lɛ amɛye ni amɛtsu he nii hewɔ lɛ, amɛje mli. Shi beni “amanehulu kpeteŋkpele” lɛ ba Yudafoi lɛ anɔ yɛ afi 70 Ŋ.B. lɛ, be bɛ dɔŋŋ ni amɛkɛaajo foi. Asraafoi lɛ mɔmɔ akpei babaoo ni bɔ mɔdɛŋ akɛ amɛaajo foi kɛjɛ maŋ lɛ mli kɛtsɔ Roma asraafoi lɛ ateŋ lɛ, ni amɛgbála Yudafoi lɛ amusuŋ amɛjie shika tsuru ni amɛteŋ mɛi pii emimii lɛ.
“AMANEHULU” NI NAA WA BABAOO FE NO LƐ MLI NI AAAJE
9, 10. (a) Te “amanehulu kpeteŋkpele” lɛ naa baawa aha tɛŋŋ? (b) Mɛni hewɔ hejɔlɛ be ko baŋ yɛ “Babilon kpeteŋkpele” lɛ hiɛkpatamɔ lɛ sɛɛ lɛ?
9 Eji “amanehulu” ni na wa diɛŋtsɛ ni ba Yudafoi lɛ anɔ, taakɛ bɔ pɛ ni Yesu gba fɔ shi lɛ. (Luka 19:43, 44) Shi Yesu wiemɔi lɛ tsɔɔ akɛ “amanehulu” ni da fe no kwraa baaba yɛ wɔbe nɛɛ mli, yɛ Yehowa “oweletɔɔ gbi” lɛ mli. Yɛ be mli ni ehaa sanebimɔ ko ni kɔɔ “ba ni eba” lɛ he “okadi” lɛ hetoo lɛ, Kristo jaje akɛ: “Ejaakɛ no be lɛ mli lɛ amanehulu babaoo aaaba, ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mateo 24:3, 21) Jeee “Babilon Kpeteŋkpele” lɛ pɛ nɔ nɛkɛ “amanehulu” nɛɛ baaba, shi moŋ ebaaba Satan gbɛjianɔtoo lɛ fɛɛ nɔ, ni emaŋkwramɔŋ, kwasafoŋ kɛ shikahelɛtemɔ gbɛjianɔtoo lɛ hu fata he.
10 Yɛ be mli ni hiɛkpatamɔ lɛ jeɔ shishi ‘trukaa’ kɛ apasa jamɔ hiɛkpatamɔ lɛ, eyaa nɔ ni ebaaa shi kɛyashiɔ enaagbee. (1 Tesalonikabii 5:3) Yɛ be mli ni eteɔ shi ewoɔ hejɔlɛ be ko ni aaaba yɛ “Babilon kpeteŋkpele” lɛ butumɔ sɛɛ lɛ, Biblia gbalɛ tsɔɔ akɛ hewalɛi ni teɔ shi woɔ Nyɔŋmɔ ni kpata ehiɛ lɛ enaŋ Yehowa Odasefoi ni amɛjɔɔ amɛhe nɔ lɛ mɔbɔ, shi moŋ asafoi ni teɔ shi woɔ Nyɔŋmɔ nɛɛ baanyɛ Nyɔŋmɔ webii lɛ ni amɛbaafa kɛba amɛnɔ. Biblia lɛ tsɔɔ akɛ ‘kooloo lɛ . . . ni yɔɔ akoloŋtoi nyɔŋma’ ni kpata “Babilon kpeteŋkpele” lɛ hiɛ lɛ hu kɛ “toobi” ni ji Yesu Kristo ni esɛɛnyiɛlɔi damɔ enajiaŋ yɛ shikpɔŋ lɛ nɔ lɛ “baawuu.” (Kpojiemɔ 13:1; 17:12-14,16; 19:19) Ŋwanejee ko bɛ he akɛ mɛi ni amɛye apasa jamɔ nɔ kunim nɛɛ baasusu Nyɔŋmɔ tsuji ahe akɛ amɛji jamɔ kroko ni esa akɛ ajie amɛ kɛjɛ gbɛteŋ kɛya beni afee ni nɔ ko akatsi amɛ gbɛ dɔŋŋ yɛ jeŋ fɛɛ nɔyeli ni amɛtaoɔ lɛ mli.—Ezekiel 38:14-16.
11. Te “amanehulu kpeteŋkpele” lɛ baa enaagbee ehaa tɛŋŋ?
11 Shi kɛ̃lɛ, nɛkɛ Nyɔŋmɔ tsuji nɛɛ atutuamɔ lɛ tamɔ ni aatutua Nyɔŋmɔ nɔŋŋ, ejaakɛ ekɛɔ akɛ: “Mɔ ni taa nyɛhe lɛ, eeta ehiŋmɛiaŋ ajaŋmalaatɛ he.” (Zakaria 2:12; Ezekiel 38:18, 19) Enɛ haa Yehowa feɔ he nɔ ko amrɔ nɔŋŋ. Ekanyaa emlifu ni teɔ shi yɛ Harmagedon lɛ ni efɔseɔ eshwieɔ mɛi ni tutuaa amɛ lɛ anɔ. (Kpojiemɔ 16:14, 16) Efaa e-Maŋtsɛ kɛ e-Bi Kristo Yesu kɛ eŋwɛi asafoi lɛ ni amɛyatutua! Kristo kɛ eŋwɛi asafoi lɛ kɛ kuumɔ kɛ nigbɛlɛmɔ hewalɛ baatswia shikpɔŋ lɛ nɔ maŋtsɛmɛi lɛ kɛ gbɛjianɔtoo ni leee Nyɔŋmɔ lɛ mli nibii krokomɛi ni eshwɛ lɛ fɛɛ anii, kɛ agbɛnɛ mɔ fɛɛ mɔ hu ni fiɔ sɛɛ lɛ. Ŋwɛibɔfo ko kɛ gbee wulu fɔ nine etsɛ ŋwɛi Ioofɔji fɛɛ akɛ: “Nyɛbaa ni nyɛbabuaa nyɛhe naa yɛ Nyɔŋmɔ okpɛlɛŋ kpeteŋkpele lɛ he, koni nyɛbaye maŋtsɛmɛi aloo kɛ asafoiatsɛmɛi aloo kɛ hewalɛi aloo kɛ okpɔŋɔi aloo kɛ mɛi ni tara amɛnɔ lɛ aloo kɛ odehei kɛ nyɔji kɛ mɛi bibii kɛ mɛi wuji fɛɛ aloo.” (Kpojiemɔ 19:17, 18) Nɛkɛ gbɛ nɔ “amanehulu kpeteŋkpele” lɛ shɛɔ enaagbee. Nyɔŋmɔ jalɛ “oweletɔɔ gbi” ni ekɛbaa Satan nibii agbɛjianɔtoo lɛ nɔ lɛ baa enaagbee.
12. Mɛɛ be mli esa akɛ gbɔmɛi anɔkwafoi ‘atao Yehowa sɛɛgbɛ’?
12 Kɛjɛ ‘hiɛkpatamɔ ni baa trukaa’ lɛ shishijee, ni jeɔ shishi kɛjɛɔ “Babilon kpeteŋkpele” lɛ hiɛkpatamɔ nɔ, ni tsaa nɔ kɛyaa jeŋmaji lɛ ni tutuaa Yehowa tsuji ni no teeɔ Nyɔŋmɔ ta ni ji Harmagedon lɛ shi kɛbaa lɛ fɛɛ mli lɛ, nɔ ko kwraa bɛ ni tsɔɔ akɛ, amɛ fioo yɛ “amanehulu kpeteŋkpele” nɛɛ mli. No ko bɛ ni abaadamɔ nɔ yɛ Ŋmalɛ lɛ mli ni amu sane naa akɛ be ni fa ni akɛaatsɔ he kɛya Nyɔŋmɔ ŋɔɔ yɛ apasa jamɔ hiɛkpatamɔ lɛ sɛɛ baahi shi. Shi moŋ, esa akɛ mɛi ni taoɔ ni amɛjo foi akɛ hiɛkalɔi kɛya Nyɔŋmɔ gbɛjianɔtoo hee lɛ mli lɛ atsɔ amɛhe kɛya Nyɔŋmɔ ŋɔɔ bianɛ. “Nyɛtaoa Yehowa, be mIi ni eeeha ana lɛ, nyɛtsɛa lɛ, be mli ni ebɛŋkɛ!” (Yesaia 55:6) Amrɔ nɛɛ ji be ni esa akɛ gbɔmɛi anɔkwafoi ashihilɛ afee nɔ ni hemɔkɛyeli, ekaafeemɔ, suɔmɔ kɛ sɔɔmɔ yɔɔ mli. Amrɔ nɛɛ ji be ni ehe miihia ni amɛsaa amɛhe ni amɛdamɔ nɔnyɛɛ sɔrɔtoi ni baaba Nyɔŋmɔ webii anɔ yɛ “amanehulu kpeteŋkpele” ni bɛŋkɛɔ oyayaayai lɛ mli lɛ anaa.
13. Akɛ Nyɔŋmɔ anɔkwa tsuji lɛ toɔ namɛi ahe, ni yɛ mɛɛ gbɛi anɔ?
13 Nyɔŋmɔ Wiemɔ lɛ kɛ etsuji anɔkwafoi lɛ toɔ asraafoi ni atsɔse amɛ jogbaŋŋ ni boɔ sane toi he, mɛi ni amɛkɛ amɛ tawuu nii lɛ ewula, ni amɛfee klalo akɛ amɛbaabo famɔ fɛɛ famɔ ni amɛ hiɛnyiɛlɔ lɛ kɛaaha amɛ lɛ toi. Amɛtamɔɔɔ asraafoi ni amɛsako amɛhe ni miiwɔ yɛ asraafoi ashihilɛ he yɛ oshara kɛ hebuunɔ be mli. Paulo kɛɔ akɛ: “No hewɔ lɛ nyɛkahaa wɔmiiwɔa tamɔ mɛi ni eshwɛ lɛ, shi moŋ nyɛhaa wɔshia kpe ni wɔhiɛ akaa shi. Ejaakɛ mɛi ni wɔɔ lɛ nyɔɔŋ amɛwɔɔ, ni mɛi ni tɔrɔɔ dãa lɛ, nyɔɔŋ amɛtɔrɔɔ dãa; shi wɔ lɛ, akɛni shwane bii ji wɔ hewɔ lɛ, nyɛhaa wɔhiɛ akaa shi ni wɔwo hemɔkɛyeli kɛ suɔmɔ dama lɛ, ni wɔbumɔ dade fai ni ji yiwalaheremɔ nɔhiɛkamɔ lɛ. Ejaakɛ Nyɔŋmɔ etooo wɔ ehaaa mlifu, shi moŋ eha yiwalaheremɔ namɔ yɛ wɔ Nuŋtsɔ Yesu Kristo mli.”—1 Tesalonikabii 5:6-9.
14. Mɛni tsɔɔ akɛ abaaha Nyɔŋmɔ tsuji lɛ ale nɔ ni esa akɛ amɛfee beni afee ni amɛnyɛ amɛfee Nyɔŋmɔ suɔmɔnaa nii?
14 Agbɛnɛ hu, Nyɔŋmɔ tsuji yɛ hekɛnɔfɔɔ kwraa akɛ ebaaha egbɛjianɔtoo lɛ ale nɔ fɛɛ nɔ ni he hiaa, beni afee ni amɛtsɔ gbɛ ni sa lɛ nɔ kɛha yiwalaheremɔ. Wɔbaanyɛ wɔna nɔmimaa yɛ enɛ he ejaakɛ mumɔnaa gbalɛ ni yɔɔ Kpojiemɔ, yitso kpawo lɛ tsɔɔɔ akɛ “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔwiemɔi amli je amanehulu kpeteŋkpele lɛ mli” ni amɛyi naa wala kɛboteɔ Nyɔŋmɔ gbɛjianɔtoo hee lɛ mli. (Kpojiemɔ 7:9, 14) Ni mɛni hewɔ “asafo babaoo” lɛ jeɔ mli lɛ? Ejaakɛ ‘amɛjaa Nyɔŋmɔ nyɔɔŋ kɛ shwane,’ ni yɛ enɛ hewɔ lɛ ‘eshiɔ ebuu ni ekɛbuɔ amɛhe lɛ etoɔ amɛnɔ.’ (Kpojiemɔ 7:15) Akɛni amɛkase nii amɛle hewɔ lɛ, amɛle bɔ ni asɔmɔɔ Nyɔŋmɔ ahaa kɛ nɔkpɛlɛmɔ. Amɛmɛɛɛ kɛkɛ ni amɛmiikwɛ nɔ ni baaba. Amɛle akɛ “mɔ ni feɔ Nyɔŋmɔ suɔmɔnaa nii lɛ” ji mɔ ni “hiɔ shi kɛyaa naanɔ.”—1 Yohane 2:17.
NITSUMƆI NI FAA BABAOO
15. Yehowa Odasefoi ebo famɔ akɛ ‘ashiɛ Nyɔŋmɔ maŋtsɛyeli lɛ he sanekpakpa lɛ yɛ shikpɔŋ ni ayɔɔ nɔ lɛ fɛɛ nɔ’ lɛ toi yɛ mɛɛ gbɛ nɔ?
15 Nɔ ni fata Nyɔŋmɔ suɔmɔnaa nii kɛha wɔgbi nɛɛ he lɛ ji Yesu gbalɛ nɛɛ mlibaa: “Ni aaashiɛ maŋtsɛyeli lɛ he sanekpakpa nɛɛ atsɔɔ jɛ nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Kɛha anɔkwale Kristofoi lɛ, nɛkɛ gbalɛ wiemɔi nɛɛ ji famɔ akɛ agba mɛi krokomɛi Nyɔŋmɔ maŋtsɛyeli lɛ kɛ gbɛjianɔtoo hee ni baa lɛ he sanekpakpa lɛ. Ni yɛ anɔkwale mli lɛ, Yehowa Odasefoi ebo enɛ toi yɛ “naagbee gbii” nɛɛ amli. (2 Timoteo 3:1; Okɛto Mateo 28:19, 20 he.) Amɛkɛ amɛ be kɛ amɛ heloo gbɛfaŋ nibii etsu nii ni amɛkɛtsɔɔ mɛi Nyɔŋmɔ yiŋtoo kɛha shikpɔŋ nɛɛ ni yɔɔ naakpɛɛ lɛ he nii ni pɛsɛmkunya bɛ mli. Nɔ ni ejɛ nitsumɔ ni wa nɛɛ fɛɛ mli eba ji akɛ mɛi ni fe akpekpei enumɔ tsɔɔ akɛ amɛyɛ Nyɔŋmɔ gbɛjianɔtoo hee lɛ kɛ eyiwalaheremɔ he gbɛjianɔtoo kɛtsɔ Yesu Kristo nɔ lɛ he miishɛɛ kɛtsɔ kpe ni amɛkpe yɛ nyɛsɛɛ afi ni ho lɛ mli yɛ April mli, koni amɛye Kristo gbele lɛ Kaimɔ yɛ jeŋ fɛɛ lɛ nɔ.
16, 17. (a.) Mɛɛ famɔi akɛha Israel maŋ lɛ dani Nyɔŋmɔ kpata Yeriko hiɛ? (b) Mɛɛ gbɛ nɔ atsɔ atsu nakai famɔi lɛ ahe nii yɛ?
16 Yɛ be mli ni Yehowa asafo ni shwereɔ kɛyaa ehiɛ lɛ bɛŋkɛɔ eshiɛmɔ nitsumɔ kɛha nɛkɛ jeŋ nɛɛ naagbee afii lɛ amli lɛ, ŋwanejee ko kwraa bɛ he akɛ nitsumɔ lɛ baada. Kanemɔ nɔ ni afa Israelbii lɛ ni amɛfee ní no sɛɛ nɔŋŋ ni Nyɔŋmɔ kpata Yeriko hiɛ lɛ. Klɛŋklɛŋ lɛ, afa amɛ ni amɛbɔle maŋ lɛ he shikome daa gbi kɛha gbii ekpaa. Shi kɛkɛ ni akɛɛ amɛ akɛ: “Ni gbi ni ji gbi kpawo lɛ, nyɛbɔlea maŋ lɛ shii kpawo, ni osɔfoi lɛ akpã tɛtrɛmantrɛ lɛ. Ni aaaba mli akɛ, kɛ akpã nyamɔ blɛ lɛ sɛɛ tsɛ aahu ni nyɛnu tɛtrɛmaŋtrɛ lɛ gbɛɛmɔ lɛ, maŋ muu lɛ fɛɛ abɔ oshe wulu, ni maŋ lɛ gbogbo lɛ aaagbee shi shwɛtɛɛ.”—Yoshua 6:2-5.
17 Yɛ nakai gbi kpawo kɛ naagbee gbi lɛ nɔ lɛ, Israelbii lɛ baaha amɛ nitsumɔ lɛ afa toi kpawo! Kɛkɛ lɛ amɛbaabɔ “oshe wulu.” Amɛfee bɔ ni afa amɛ lɛ pɛpɛɛpɛ. “Ni gbi ni ji gbi kpawo lɛ nɔ lɛ, eba mli akɛ amɛte shi mra, beni je bɔi tsɛremɔ lɛ, ni amɛbɔle maŋ lɛ nakai nɔŋŋ shii kpawo; Ni eba mli akɛ nɔ ni ji shii kpawo lɛ nɔ lɛ, beni osɔfoi lɛ kpa tɛtrɛmaŋtrɛ lɛ, Yoshua kɛɛ maŋ lɛ akɛ: Nyɛbɔa oshe! Shi Yehowa etu maŋ lɛ ewo nyɛdɛŋ. Kɛkɛ ni maŋ lɛ bɔ oshe ni amɛkpa tɛtrɛmantrɛ lɛ. Ni eba mli akɛ, beni mɛi lɛ nu tɛtrɛmaŋtrɛ lɛ agbɛɛmɔ lɛ, amɛbɔ oshe kpeteŋkpele, ni gbogbo lɛ gbee shi shwɛtɛɛ.”—Yoshua 6:15, 16, 20.
18. Mɛni wɔkpaa gbɛ yɛ shiɛmɔ nitsumɔ lɛ mlilɛɛmɔ kɛ gbɛ ni aaatsɔ nɔ atsu lɛ lɛ he dani gbɛjianɔtoo nɛɛ aba enaagbee?
18 Wɔbaanyɛ wɔkpa wɔ shiɛmɔ nitsumɔ lɛ mligbalamɔ bianɛ hu gbɛ, yɛ yinɔi lɛ anaagbee nɛɛ. Ŋwanejee ko bɛ he akɛ, dani “amanehulu’kpeteŋkpele” lɛ aaaba naagbee lɛ, wɔbaana Nyɔŋmɔ gbɛi kɛ maŋtsɛyeli lɛ he odase kpeteŋkpele ni abaaye yɛ je nɛɛ yinɔsane mli. Ni yɛ be mli ni amrɔ nɛɛ nɔ ni fata odaseyeli lɛ he ji nine ni afɔɔ akɛ aba Yehowa gbɛjianɔtoo lɛ mli kɛha yiwalaheremɔ lɛ, ŋwanejee ko bɛ he akɛ be lɛ baashɛ ni sane lɛ mli baawa waa, tamɔ “oshebɔɔ kpeteŋkpele.” Kpojiemɔ 16:21 tsɔɔ akɛ “nyɔŋmɔŋtɛi babaoo ni amɛtsiimɔ tamɔ talenta [aaafee niŋmɛɛ tɛi 100] jɛ ŋwɛi bashwie gbɔmɛi anɔ; ni gbɔmɛi lɛ wie musubɔɔ wiemɔi amɛshi Nyɔŋmɔ yɛ nyɔŋmɔŋtɛi lɛ ahaomɔ lɛ hewɔ, ejaakɛ amɛhaomɔ lɛ da tsɔ.” Nyɔŋmɔŋtɛi ji nui ni ewa tamɔ tɛ. No hewɔ lɛ enɛ feɔ bɔ ni yɛ naagbee lɛ Yehowa kojomɔ wiemɔi ni akɛbaa adesai toigbolɔi anɔ lɛ baafa babaoo ni ebaatswia amɛ waa hu tamɔ nyɔŋmɔŋtɛi lɛ he mfoniri. Yɛ anɔkwale ni eji akɛ awieɔ nyɔŋmɔŋtɛi ahaomɔ lɛ he akɛ nɔ ko ni “da tsɔ” lɛ tsɔɔ akɛ yɛ naagbee kwraa lɛ Yehowa tsuji baajaje “Yehowa oweletɔɔ gbi” lɛ he sane lɛ yɛ gbɛ ni mliwa waa nɔ.
19. Yɛ wɔsɛɛ be ni ka wɔhiɛ amrɔ nɔŋŋ lɛ hewɔ lɛ, ‘mɛɛ gbɔmɛi nɛkɛ esa akɛ wɔtsɔmɔ’?
19 No hewɔ lɛ, wɔbaafee jogbaŋŋ, kɛ wɔwie tamɔ bɔ ni Petro fee nɛɛ, “Akɛni nɛkɛ nibii nɛɛ fɛɛ baafite hewɔ lɛ, mɛɛ gbɔmɛi sa akɛ nyɛtsɔmɔ yɛ jeŋbai krɔŋkrɔŋi kɛ Nyɔŋmɔ jamɔi amli?” (2 Petro 3:11) Yɛ anɔkwale mli lɛ, ehe miihia ni ‘wɔtse wɔtsui wɔŋmɛ wɔmli,’ ni “mɔ aha enaanyo nane amɔ shi.” Esa akɛ ‘wɔnyiɛ ekpakpafeemɔ sɛɛ wɔha wɔhe kɛ mɛi fɛɛ’ daa nɛɛ. (1 Tesalonikabii 5:11, 15) “Belɛ akɛ nɔ ni wɔyɔɔ deka hewɔ lɛ, nyɛhãa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” (Galatabii 6:10) Yɛ enɛ hewɔ lɛ, ‘wɔkawɔ shi moŋ wɔshi kpe ni wɔhiɛ aka shi.’a—1 Tesalonikabii 5:6.
[Shishigbɛ niŋmai]
a Ajie kɛjɛ November 15, 1981 Blɔfo Buu-Mɔɔ lɛ mli
[Nikasemɔ lɛ he Sanebimɔi]
[Mfoniri ni yɔɔ baafa 11]
Esa akɛ mɛi fɛɛ ni sumɔɔ akɛ amɛje mli kɛyabote Nyɔŋmɔ gbɛjianɔtoo hee lɛ mli lɛ aho yuu kɛya Yehowa anɔkwa jamɔ lɛ he bianɛ
[Mfoniri ni yɔɔ baafa 13]
Kristofoi ni bo Yesu foi lɛ jo foi kɛjɛ Yerusalem yɛ be ni sa mli, ni nɔ ni ba enɔ yɛ afi 70 Ŋ.B. lɛ baaa amɛnɔ
[Mfoniri ni yɔɔ baafa 14]
Nyɔŋmɔ Wiemɔ lɛ kɛ etsuji ni hiɛ yɔɔ amɛhe nɔ lɛ toɔ asraafoi ni átsɔse amɛ jogbaŋŋ ni amɛwula amɛ tawuu nii ni buɔ amɛhe ni ámɛfee klalo akɛ amɛaafee toiboo lɛ ahe
[Mfoniri ni yɔɔ baafa 15, 16]
Beni Israelbii lɛ je shishi akɛ amɛaabɔ “oshe kpeteŋkpele” lɛ, Yeriko gbogboi lɛ gbee shi shwɛtɛɛ