‘Nibii ni Jɛ Abifabii Anaa’
BENI Samuel ji gbekɛ nuu fioo lɛ, edamɔ shi shiŋŋ eha jalɛ shishitoo mlai, yɛ nibii fɔji ni Osɔfonukpa Eli bihii lɛ feɔ lɛ fɛɛ sɛɛ. (1 Samuel 2:22; 3:1) Yɛ Elisha gbii lɛ amli lɛ, Israel gbekɛ yoo fioo ni aŋɔ lɛ nom kɛtee Aram lɛ ye ewura lɛ odase kɛ ekaa. (2 Maŋtsɛmɛi 5:2-4) Beni Yesu ye afii 12 lɛ, ekɛ Israel tsɔɔlɔi lɛ wie kɛ ekaa, ni ebibii amɛ saji ni eha saji ahetoo hu ni eha mɛi ni na lɛ lɛ anaa kpɛ amɛhe. (Luka 2:46-48) Yehowa jalɔi ni ji gbekɛbii hu kɛ anɔkwayeli esɔmɔ lɛ aahu yɛ yinɔsane be mli fɛɛ.
Ani gbekɛbii ni yɔɔ ŋmɛnɛ lɛ hu jieɔ nakai anɔkwayeli mumɔ lɛ kpo? Hɛɛ, amɛjieɔ lɛ kpo! Amaniɛbɔi ni jɛɔ Buu Mɔɔ Asafo lɛ nitsumɔ he niji lɛ kɛbaa lɛ tsɔɔ akɛ heyelilɔi ni ji gbekɛbii babaoo diɛŋtsɛ ‘jɛɔ amɛsuɔmɔ mli amɛkɛ amɛhe haa’ yɛ Yehowa sɔɔmɔ mli. (Lala 110:3) Nibii kpakpai ni jɛɔ amɛmɔdɛŋbɔi amli kɛbaa lɛ woɔ Kristofoi fɛɛ hewalɛ, gbekɛbii kɛ onukpai fɛɛ, ‘ní amɛkaha ekpakpa feemɔ miitɔ amɛ.’—Galatabii 6:9.
Nɔkwɛmɔ nɔ fɛfɛo ji Ayumi, ni ji Japan gbekɛ yoo fioo ko ni batsɔ shiɛlɔ beni eye afii ekpaa lɛ, ni ekɛfee oti ni ma ehiɛ akɛ ebaaye mɛi fɛɛ ni ekɛyɔɔ klas lɛ odase lɛ. Aha lɛ hegbɛ akɛ ekɛ woji babaoo ayashwie skul tsu lɛ mli woji atoohe lɛ, ni efee klalo akɛ ebaaha saji fɛɛ ni eskulbii lɛ baabi lɛ hetoo. Shwɛ fioo ni eklasbii lɛ fɛɛ kɛ etsɔɔlɔ lɛ hu ale nɛkɛ woji nɛɛ jogbaŋŋ. Afii ekpaa ni ekɛtee shishijee skul lɛ mli fɛɛ lɛ, Ayumi to gbɛjianɔ kɛha Biblia mli nikasemɔi 13. Abaptisi lɛ beni eyɔɔ sɛi ni ji ejwɛ nɔ, ni abaptisi enanemɛi ni ekɛkase nii lɛ ateŋ mɔ kome beni lɛ hu eyɔɔ sɛi ni ji ekpaa nɔ. Kɛfata he lɛ, akɛ nɛkɛ Biblia kaselɔ nɛɛ nyɛ̃ kɛ enyɛmimɛi yei onukpai enyɔ kase nii ni amɛ hu abaptisi amɛ.
Subaŋ Kpakpa Yeɔ Odase
Bɔfo Petro wie akɛ “nyɛbaa nyɛjeŋ jogbaŋŋ yɛ jeŋmajiaŋbii lɛ ateŋ,” ni Kristofoi ni ji gbekɛbii hu kɛ hiɛdɔɔ yeɔ nɛkɛ kita nɛɛ nɔ. (1 Petro 2:12) Nɔ ni enɛ kɛbaa ji akɛ, bei pii lɛ amɛjeŋba kpakpa lɛ yeɔ odase fɛfɛo. Yɛ Afrika maŋ ni ji Cameroon mli lɛ, nuu ko ba Yehowa Odasefoi asafoŋ kpee shishi nɔ ni ji shii enyɔ nɔ, ni eyata gbekɛyoo fioo ko masɛi. Beni wielɔ lɛ fɔ̃ toibolɔi lɛ nine ni amɛkɔlɔ amɛ Biblia lɛ ni amɛkɛ lɛ akane nɔ ko kɛjɛ mli lɛ, nuu lɛ na akɛ gbekɛ yoo fioo nɛɛ nyɛ egbele ŋmalɛ ni atsɛ lɛ oya nɔŋŋ yɛ lɛ diɛŋtsɛ e-Biblia lɛ mli ni ebo toi jogbaŋŋ beni akaneɔ lɛ. Subaŋ ni gbekɛ lɛ jie lɛ kpo nɛɛ sa nuu lɛ hiɛ aahu akɛ beni agbe kpee lɛ naa lɛ, etee wielɔ lɛ ŋɔɔ ni eyakɛɛ lɛ akɛ: “Gbekɛyoo fioo nɛɛ eha mifee mɔ ni miisumɔ ni akɛ mi akase Biblia lɛ.”
Skul ko yɛ South Africa ni gbekɛbii ni yɔɔ mli lɛ ateŋ mɛi 25 ji Yehowa Odasefoi abii. Amɛsubaŋ kpakpa lɛ eha ana gbɛi kpakpa waa aha Yehowa Odasefoi. Tsɔɔlɔ ko kɛ anɔkwayeli kɛɛ fɔlɔ ko ni ji Odasefonyo akɛ enuuu bɔ ni Odasefoi feɔ amɛtsɔseɔ amɛbii jogbaŋŋ lɛ shishi, ejaakɛ enaa faŋŋ yɛ lɛ diɛŋtsɛ esɔlemɔ ni eyaa lɛ he akɛ enyɛɛɛ eye ebua gbekɛbii lɛ kwraa. Tsɔɔlɔ hee ko ba skul lɛ mli koni ebaye ebua, ni amrɔ nɔŋŋ ni eyoo Odasefoi abii lɛ ajeŋba kpakpa lɛ. Ebi gbekɛbii hii ni ji Odasefoi lɛ ateŋ mɔ kome nɔ ni sa akɛ efee ni ebatsɔ Yehowa Odasefoi ateŋ mɔ ko. Egbala mli etsɔɔ lɛ akɛ esa akɛ akɛ lɛ akase Biblia lɛ, ni gbekɛ nuu nɛɛ to gbɛjianɔ koni efɔlɔi ayadi miishɛɛ ni tsɔɔlɔ nɛɛ ena lɛ sɛɛ.
Yɛ Costa Rica lɛ, Rigoberto na akɛ anɔkwale lɛ nɛ, beni eklasbii enyɔ kɛ Biblia lɛ tsu nii ni amɛkɛha saji ni ebibii amɛ yɛ Triniti, susuma, kɛ hɛl la he lɛ fɛɛ ahetoo lɛ. Nɔ ni amɛkɛɛ lɛ lɛ na enɔ hewalɛ kpakpa waa, jeee yɛ bɔ ni amɛnyɛɔ amɛkɛ Ŋmalɛi lɛ tsuɔ nii amɛhaa lɛ hewɔ kɛkɛ, shi moŋ akɛni esoro amɛjeŋba kpakpa lɛ kwraa yɛ nɔ ni enaa yɛ Kristendom sɔlemɔi lɛ amli lɛ hewɔ. Yɛ shitee-kɛ-woo ni eweku lɛ kɛba enɔ lɛ fɛɛ sɛɛ lɛ, Rigoberto miiya hiɛ waa yɛ e-Biblia mli nikasemɔ lɛ mli.
Yɛ Spain hu lɛ, Yehowa Odasefoi enyɔ—ni amɛteŋ mɔ kome eye afii nɛɛhu—tee amɛyasara nuu ko ni atsɛɔ lɛ Onofre. Eyɛ mli akɛ Odasefonyo ni eda saŋŋ yɛ afii amli lɛ ji mɔ ni wie saŋŋ moŋ, shi Odasefonyo fioo nɛɛ kwɛɔ Ŋmalɛi lɛ amli kɛnyiɛɔ ewiemɔ lɛ sɛɛ, ni ewieɔ Biblia mli ŋmalɛi komɛi ahe po kɛjɛɔ ejwɛŋmɔ mli. Onofre na he miishɛɛ waa. Ekpɛ eyiŋ akɛ eesumɔ ni ekase Biblia lɛ yɛ he ni gbekɛ nuu fioo nɛɛ kase bɔ ni akɛ Ŋmalɛi lɛ tsuɔ nii jogbaŋŋ nɛkɛ yɛ lɛ nɔŋŋ. No hewɔ lɛ, enɔ Hɔgbaa leebi mra lɛ, etee Maŋtsɛyeli Asa lɛ nɔ. Esa akɛ emɛ yɛ agbo lɛ naa aahu kɛyashi shwane mli tɔ̃ɔ, beni Odasefoi lɛ ba kɛha amɛkpee lɛ. Kɛjɛ no nɔ kɛyaa lɛ, etee hiɛ waa ni nyɛsɛɛ nɛɛ, efee ehenɔjɔɔmɔ lɛ he okadi kɛtsɔ nu mli baptisimɔ nɔ.
Odasefoi Gbekɛbii ni Nitsumɔ Mɔɔ Shi
Hɛɛ, Yehowa kɛ gbekɛbii kɛ onukpai fɛɛ tsuɔ nii koni amɛnine ashɛ mɛi ni yɔɔ heshibaa tsui lɛ anɔ. Ana enɛ jogbaŋŋ yɛ niiashikpamɔ ko ni jɛ Hungary lɛ mli. Jɛmɛ, ni helatsɛmɛi akwɛlɔ ko ni yɔɔ helatsamɔ he lɛ na akɛ be fɛɛ be ni mɛi basaraa helatsɛ ko ni eye afii nyɔŋma lɛ, amɛkɛ woji ni akaneɔ fataa niyenii ni amɛkɛbahaa lɛ lɛ he. Akɛni ena he miishɛɛ hewɔ lɛ, eesumɔ akɛ ele nɔ ni gbekɛ yoo fioo nɛɛ kaneɔ lɛ, ni ena akɛ Biblia lɛ ni. Helatsɛmɛi akwɛlɔ lɛ kɛ lɛ wie ni ekɛɛ yɛ sɛɛ mli akɛ: “Kɛjɛ shishijee mli tɔ̃ɔ lɛ, no mli po lɛ eetsɔɔ mi nii.” Beni ajie gbekɛ yoo nɛɛ kɛjɛ helatsamɔ he lɛ, efɔ helatsɛmɛi akwɛlɔ lɛ nine akɛ eba kpee ko shishi, shi helatsɛmɛi akwɛlɔ lɛ ekpɛlɛɛɛ ninefɔɔ lɛ nɔ. Shi, sɛɛ mli lɛ, ekpɛlɛ akɛ ebaaya “Wiemɔ Krɔŋŋ” Kpokpaa Wulu nɔ Kpee lɛ eko. No sɛɛ nɔŋŋ lɛ, akɛ lɛ je Biblia mli nikasemɔ shishi, ni afi sɛɛ lɛ, abaptisi lɛ—ni enɛ fɛɛ jɛ gbekɛyoo fioo ko ni kɛ ebe kaneɔ Biblia kasemɔ woji beni eka helatsamɔ he lɛ hewɔ.
Ana Ruth, yɛ El Salvadore, yɛ sɛi ni ji enyɔ nɔ yɛ nɔtsamɔ skul. Nɔ ni efɔɔ feemɔ ji akɛ, eshiɔ̃ Biblia kasemɔ woji eshwieɔ eskul okpɔlɔ lɛ nɔ koni mɛi krokomɛi akane kɛ amɛmiisumɔ. Beni ena akɛ woji lɛ yaa aahu, kɛkɛ lɛ be ko sɛɛ lɛ, eku sɛɛ eba ekoŋŋ lɛ, Ana Ruth yoo akɛ eskulbii lɛ eko, ni atsɛɔ lɛ Evelyn ji mɔ ni kaneɔ lɛ. Yɛ be ko sɛɛ lɛ, Evelyn kpɛlɛ nɔ akɛ akɛ lɛ akase nii, ni ebɔi asafoŋ kpeei hu yaa. Yɛ naagbee lɛ, abaptisi lɛ, ni amrɔ nɛɛ eesɔmɔ akɛ daa gbɛgbalɔi awalɔ. Ana Ruth hu miisɔmɔ akɛ daa gbɛgbalɔ.
Yɛ Panama lɛ, nyɛmiyoo ko kɛ yoo ko je nikasemɔ shishi, ni yoo nɛɛ wu bɔi nikasemɔ lɛ shitee-kɛ-woo aahu akɛ eyashɛ he ni nikasemɔ lɛ sɛɛ miihe afo kwraa. Shi, fiofio lɛ, wu lɛ su ni ekɔ nɛɛ he babɔi jɔɔ. Yɛ sɛɛ mli be ko lɛ, nuu lɛ heloonaa nyɛminuu onukpa, ni ji Odasefonyo, bakɛɛ lɛ akɛ ekɛ ŋmɛlɛ ni gbɛɔ waa kɛji julɔ bata nɔ ko he yɛ shia lɛ mli lɛ eko awo eshia lɛ mli. Beni ekɛ ŋmɛlɛ nɛɛ woɔ shia lɛ mli lɛ, kɛkɛ ni ewɔfaase gbekɛ yoo fioo ni eye afii nɛɛhu lɛ ba shia kɛ ehiɛ ni efee mɔbɔmɔbɔ. Etsɛkwɛ lɛ bi lɛ nɔ ni feɔ lɛ, ni ekɛɛ lɛ akɛ ekɛ enyɛmi yoo onukpa lɛ tee amɛkɛ mɔ ko yaafee shia Biblia mli nikasemɔ, shi mɔ lɛ bɛ shia, no hewɔ lɛ enyɛko efee nɔ ko eha Yehowa nakai gbi lɛ. Kɛkɛ ni etsɛkwɛ lɛ kɛɛ lɛ akɛ: “Mɛni hewɔ oshiɛɛɛ ohaaa mi mɔ? Kɛkɛ lɛ ofee nɔ ko oha Yehowa.” Ewɔfaase nɛɛ jo foi ni eyakɔ e-Biblia lɛ kɛba, ni amɛje nikasemɔ shishi.
No mli lɛ gbekɛ yoo lɛ nyɛ̃ (ni ji nuu lɛ ŋa-nukpa) miibo amɛ toi. Kulɛ esusu akɛ shwɛmɔ ko kɛkɛ amɛkɛ nikasemɔ lɛ shwɛɔ, shi be fɛɛ be ni nuu lɛ baaba eshia lɛ, ebiɔ ewɔfaase lɛ ni ekɛ lɛ abakase Biblia lɛ. Beni gbekɛ yoo lɛ nyɛ̃ na akɛ ewu-fioo lɛ hiɛ edɔ waa yɛ he, ni eyɛ sanebimɔi komɛi ni wa saŋŋ ni ebaasumɔ ni ebi lɛ, ekpɛ eyiŋ akɛ lɛ diɛŋtsɛ ekɛ lɛ baafee nikasemɔ lɛ beni ebiyoo lɛ fata amɛhe. Nuu lɛ bɔi nikasemɔ shii enyɔ yɛ otsi mli ni etee hiɛ oyayaayai. Yɛ naagbee lɛ, eyashɛ henɔjɔɔmɔ he, ni abaptisi lɛ yɛ kpee ni abaptisi eŋa lɛ yɛ lɛ nɔŋŋ shishi—ni enɛ fɛɛ jɛ subaŋ kpakpa ni ewɔfaase gbekɛ yoo fioo nɛɛ jie kpo lɛ hewɔ.
Ekaa ni Gbekɛbii lɛ Yɔɔ lɛ Yeɔ Odase Kpakpa
Biblia lɛ kɛɔ akɛ: “Wajemɔ ohe ni ona tsui, ni okwɛ Yehowa gbɛ.” (Lala 27:14) Wiemɔi nɛɛ kɔɔ Nyɔŋmɔ tsuji fɛɛ he, ni gbekɛbii kɛ onukpai fɛɛ kɛtsu nii yɛ afi ni ho lɛ mli. Yɛ Australia lɛ, beni gbekɛ yoo ko ni eye afii enumɔ lɛ bɔi skul hee ko yaa lɛ, enyɛ̃ tee amɛtsɔɔlɔ lɛ ŋɔɔ akɛ eyaagbála Yehowa Odasefoi ahemɔkɛyelii amli etsɔɔ lɛ. Kɛkɛ ni tsɔɔlɔ lɛ kɛɛ lɛ akɛ: “Mile nɔ ni nyɛheɔ nyɛyeɔ momo. Obiyoo lɛ egbala nɔ fɛɛ nɔ mli etsɔɔ mi momo.” Gbekɛ yoo fioo nɛɛ sheee gbeyei akɛ lɛ diɛŋtsɛ eeeya etsɔɔlɔ lɛ ŋɔɔ ni eyagbála ehemɔkɛyelii amli etsɔɔ lɛ.
Andrea ni eye afii enumɔ, ni yɔɔ Romania lɛ hu jie ekaa kpo nakai. Beni enyɛ̃ kpa Ortodɔks sɔlemɔ lɛ yaa ni ebatsɔ Odasefonyo lɛ, ekutsoŋbii lɛ sumɔɔɔ ni amɛboɔ lɛ toi. Gbi ko ni amɛtee Asafo Woloŋ Nikasemɔ lɛ, Andrea nu akɛ sɔɔmɔ nɔkwɛlɔ lɛ ma nɔ mi waa akɛ ehe miihia ni wɔshiɛ wɔtsɔɔ wɔkutsoŋbii. Gbekɛ yoo nɛɛ susu enɛ he waa diɛŋtsɛ, ni beni amɛku amɛsɛɛ kɛba shia lɛ, ekɛɛ enyɛ̃ akɛ: “Kɛ oshi shia kɛtee nitsumɔ lɛ, mi hu mate shi, ni mato woji mawo mibaagi lɛ mli tamɔ bɔ ni ofeɔ lɛ pɛpɛɛpɛ, Awó, ni masɔle maha Yehowa koni eye ebua mi ni mikɛ wɔkutsoŋbii lɛ agba anɔkwale lɛ he sane.”
Enɔ jetsɛremɔ lɛ, Andrea fee bɔ ni ewo shi lɛ. Kɛkɛ ni ena ekaa, ni ekɛtswa shia ni bɛŋkɛ amɛ lɛ ekome shinaa naa ŋmɛlɛ lɛ. Beni amɛkutsoŋnyo lɛ here ŋmɛlɛ lɛ nɔ lɛ, gbekɛ yoo fioo nɛɛ kɛɛ lɛ akɛ: “Mile akɛ kɛjɛ be mli ni mimami batsɔ Odasefonyo nɛɛ, nyɛsumɔɔɔ esane. Ebɔ mɔdɛŋ shii abɔ akɛ ekɛ nyɛ baagba sane, shi nyɛsumɔɔɔ ni nyɛboɔ lɛ toi. Enɛ miihao lɛ waa diɛŋtsɛ, shi miisumɔ ni nyɛle akɛ wɔsumɔɔ nyɛsane waa.” Kɛkɛ ni, Andrea tee nɔ eye lɛ odase fɛfɛo. Gbi kome mli lɛ, eha woji wuji ekpaa, woji tɛtrɛbii ekpaa, woji bibii ejwɛ, kɛ dɛhiɛmɔ woji hu ejwɛ. Kɛjɛ nakai beaŋ kɛbaa nɛɛ etee nɔ efee mɔ ni yaa shiɛmɔ daa.
Yɛ Rwanda hu lɛ, ehe ebahia ni wɔnyɛmimɛi lɛ ana ekaa waa, yɛ bei kɛ ta ni yaa nɔ yɛ jɛmɛ lɛ hewɔ. Be ko lɛ, akɛ Odasefoi aweku ko yawo tsu ko mli ni asraafoi fee klalo akɛ amɛbaagbe amɛ. Shi weku lɛ bi gbɛ akɛ aha amɛsɔle klɛŋklɛŋ dã. Aŋmɛ amɛ gbɛ, ni mɛi lɛ fɛɛ sɔle blɛoo yɛ amɛyitsoŋ ni anuuu, ja amɛbiyoo Deborah pɛ. Taakɛ amaniɛbɔɔ ko tsɔɔ lɛ, Deborah sɔle waa akɛ: “Yehowa, otsi nɛɛ mikɛ Papa fɛɛ ha woji tɛtrɛbii enumɔ. Te wɔbaafee tɛŋŋ wɔku wɔsɛɛ kɛya gbɔmɛi nɛɛ aŋɔɔ ni wɔtsɔɔ amɛ anɔkwale lɛ, ni wɔye wɔbua amɛ ni amɛna wala? Kɛfata he lɛ, agbɛnɛ te mafee tɛŋŋ matsɔ gbɛgbalɔ? Miitao ni maha abaptisi mi koni masɔmɔ bo.” Beni amɛnu nɔ ni ewie nɛɛ lɛ, asraafoi lɛ ekome wie akɛ: “Wɔnyɛŋ wɔgbe nyɛ yɛ gbekɛyoo fioo nɛɛ hewɔ.” Kɛkɛ ni Deborah to he eha lɛ akɛ: “Nyɛyiwala dɔŋŋ.” Aŋmɛɛ amɛweku lɛ he.
Beni Yesu kɛ kunimyeli bote Yerusalem yɛ eshikpɔŋ nɔ shihilɛ lɛ naagbee gbɛ lɛ, asafoi babaoo diɛŋtsɛ kɛ bolɔmɔ banya ehe. Gbekɛbii kɛ onukpai fɛɛ fata nɛkɛ asafoi babaoo nɛɛ he. Taakɛ nɔ ni aŋma afɔ shi lɛ tsɔɔ lɛ, no mli lɛ gbekɛbii hii bibii “[miibolɔ] yɛ sɔlemɔwe lɛ akɛ: ‘Hosiana, David bi lɛ!’ ” Beni osɔfonukpai lɛ kɛ woloŋmalɔi lɛ wie amɛshi enɛ lɛ, Yesu ku amɛnaa akɛ: “Ani nyɛkaneko dã akɛ: ‘Abifabii kɛ fufɔbii anaa ni osaa yijiemɔ oto yɛ’?”—Mateo 21:15, 16.
Ani ebɛ miishɛɛ akɛ ŋmɛnɛ po, Yesu wiemɔi nɛɛ eba mli anɔkwale? “Abifabii kɛ fufɔbii anaa”—ni, wɔbaanyɛ wɔkɛfata he akɛ, kɛ obalahii kɛ obalayei bibii hu anaa—Yehowa esaa yijiemɔ eto yɛ. Lɛlɛŋ, kɛ eba Yehowa yijiemɔ gbɛfaŋ lɛ, mɔ ko kwraa bɛ ni abaakɛɛ akɛ edako.—Yoel 3:1, 2.