Yitso Nyɔŋma Kɛ Ekome

Ajie Be Ni Mesia Lɛ Baa Lɛ Kpo

1. Akɛni Yehowa ji Be Bulɔ Kpeteŋkpele hewɔ lɛ, wɔbaanyɛ wɔná nɔmimaa yɛ mɛni he?

YEHOWA ji Be Bulɔ Kpeteŋkpele lɛ. Bei kɛ yinɔi fɛɛ ni kɔɔ enitsumɔ he lɛ yɛ ekudɔmɔ shishi. (Bɔfoi lɛ Asaji 1:7) Nibii fɛɛ ni eto kɛha nɛkɛ bei kɛ yinɔi nɛɛ baaba mli anɔkwale. Amɛfeŋ efolo.

2, 3. Mɛɛ gbalɛ Daniel gbala ejwɛŋmɔ kɛtee nɔ, ni mɛɛ maŋtsɛyeli yeɔ Babilon nɔ yɛ nakai be lɛ mli?

² Ákɛ mɔ ni kɛ hiɛdɔɔ kaseɔ ŋmalɛi lɛ, gbalɔ Daniel yɛ hemɔkɛyeli yɛ Yehowa nyɛmɔ ni ekɛaato saji ahe gbɛjianɔ ni eha amɛba mli lɛ mli. Nɔ ni Daniel yɔɔ he miishɛɛ waa ji gbalɛi ni kɔɔ Yerusalem hiɛkpatamɔ lɛ he lɛ. Yeremia eŋma Nyɔŋmɔ kpojiemɔ ni kɔɔ be sɛɛkɛlɛ ni maŋ krɔŋkrɔŋ lɛ baaya nɔ akã shi amaŋfɔ lɛ he lɛ efɔ̃ shi, ni Daniel susu nɛkɛ gbalɛ nɛɛ he jogbaŋŋ. Eŋma akɛ: “Ahashwerosh bi Dario ni jɛ Mediabii aseshi mli, ni awo lɛ maŋtsɛ yɛ Kaldeabii lɛ amaŋtsɛyeli lɛ nɔ lɛ klɛŋklɛŋ afi lɛ nɔ lɛ, emaŋtsɛyeli lɛ mli klɛŋklɛŋ afi lɛ nɔ lɛ mi, Daniel, mikwɛ woji lɛ amli, ni mina akɛ afii lɛ ni Yehowa wiemɔ ba gbalɔ Yeremia ŋɔɔ yɛ hewɔ, akɛ eeegbe Yerusalem amaŋfɔ lɛ naa lɛ, ji afii nyɔŋmai kpawo.”​—Daniel 9:​1, 2; Yeremia 25:11.

³ No mli lɛ Dario, Medianyo lɛ miiye maŋtsɛ yɛ “Kaldeabii lɛ amaŋtsɛyeli lɛ nɔ.” Nɔ ni Daniel tsɔ hiɛ egba beni etsɔɔ gbogbo he niŋmaa lɛ shishi lɛ eba mli oya kɛho. Babilonia Maŋtsɛyeli lɛ bɛ dɔŋŋ. “Aŋɔha Mediabii kɛ Persiabii” lɛ yɛ afi 539 D.Ŋ.B.​—Daniel 5:​24-28, 30; 6:1.

DANIEL KƐ HESHIBAA KPA YEHOWA FAI

4. (a) Mɛni he hiaa bɔni afee ni nine ashɛ Nyɔŋmɔ yiwalaheremɔ nɔ? (b) Mɛni Daniel fee koni eya Yehowa hiɛ?

⁴ Daniel yɔse akɛ Yerusalem afii 70 amaŋfɔfeemɔ lɛ miihe aba naagbee. Yɛ no sɛɛ lɛ mɛni ebaafee? Lɛ diɛŋtsɛ ekɛɔ wɔ: “Ni mitsɔ mihiɛ miha [Yehowa, anɔkwa Nyɔŋmɔ, NW] lɛ, koni mikɛ buadayeli kɛ kpekpe kɛ lamulu atao sɔlemɔ kɛ faikpamɔ sɛɛgbɛ. Ni mikpa Yehowa, mi-Nyɔŋmɔ lɛ fai.” (Daniel 9:​3, 4) Tsui mli shihilɛ kpakpa he miihia dani nine ashɛ Nyɔŋmɔ kpɔmɔ ni mɔbɔnalɛ yɔɔ mli lɛ nɔ. (3 Mose 26:​31-46; 1 Maŋtsɛmɛi 8:​46-53) Hemɔkɛyeli, heshibaa mumɔ, kɛ tsuitsakemɔ kwraa yɛ eshai ni kɛ amɛ tee nomŋɔɔ kɛ nyɔŋyeli mli lɛ ahe lɛ he miihia. No hewɔ lɛ, Daniel tee Nyɔŋmɔ hiɛ eha ewebii ni amɛ́fee esha lɛ. Yɛ mɛɛ gbɛ nɔ? Kɛtsɔ ŋmãahilɛ, awerɛhoyeli, kɛ kpekpe ni eeebu, ni feɔ heshwamɔ kɛ anɔkwa tsui krɔŋŋ he okadi lɛ nɔ.

5. Mɛni hewɔ Daniel baanyɛ aná hekɛnɔfɔɔ akɛ abaaha Yudafoi lɛ aku sɛɛ aya amɛmaŋ shikpɔŋ nɔ ekoŋŋ lɛ?

⁵ Yeremia gbalɛ lɛ kɛ hiɛnɔkamɔ eha Daniel, ejaakɛ etsɔɔ akɛ etsɛŋ ni abaaha Yudafoi lɛ aku sɛɛ aya amɛmaŋ Yuda ekoŋŋ. (Yeremia 25:12; 29:10) Ŋwanejee ko bɛ he akɛ Daniel ná hekɛnɔfɔɔ akɛ etsɛŋ ni kpɔmɔ baaba kɛha Yudafoi ni aba amɛ shi lɛ, ejaakɛ nuu ko ni atsɛɔ lɛ Koresh eje nɔyeli shishi momo akɛ maŋtsɛ yɛ Persia. Ani Yesaia egbako akɛ Koresh nɔ abaatsɔ ni akɛjie Yudafoi lɛ koni amɛsaa amɛtswa Yerusalem kɛ sɔlemɔtsu lɛ? (Yesaia 44:​28–45:3) Shi Daniel bɛ bɔ ni enɛ aaafee aba lɛ he jwɛŋmɔ ko kwraa. No hewɔ lɛ, etee nɔ ekpa Yehowa fai.

6. Mɛni Daniel kpɛlɛ nɔ yɛ sɔlemɔ mli?

⁶ Daniel gbala jwɛŋmɔ kɛtee Nyɔŋmɔ mɔbɔnalɛ kɛ eduromɔ nɔ. Ekɛ heshibaa kpɛlɛ nɔ akɛ Yudafoi lɛ efee esha kɛtsɔ atua ni amɛtse, ni amɛtsi amɛhe kɛjɛ Yehowa kitai ahe, kɛ egbalɔi ni amɛbooo amɛ toi lɛ nɔ. Nyɔŋmɔ ‘gbɛ amɛ eshwã yɛ anɔkwa ni amɛyeee hewɔ’ yɛ gbɛ ni ja nɔ. Daniel sɔle akɛ: “[Yehowa, NW] wɔsa hiɛgbele, wɔkɛ wɔmaŋtsɛmɛi lɛ kɛ wɔlumɛi lɛ kɛ wɔtsɛmɛi lɛ, ejaakɛ wɔfee esha wɔshio. Shi [Yehowa, NW] wɔ-Nyɔŋmɔ lɛ nɔ̃ ji musuŋtsɔlɛ kɛ eshaifaa. Ejaakɛ wɔtse ehiɛ atua, ni wɔbooo Yehowa, wɔ-Nyɔŋmɔ lɛ gbee toi, koni wɔnyiɛ emlai lɛ ni etsɔ etsuji, gbalɔi lɛ, anine nɔ eŋɔshwie wɔhiɛ lɛ amli; shi Israel fɛɛ etɔ̃ omla lɛ, ni amɛgba afã, koni amɛkabo ogbee toi; no hewɔ lɛ, afɔse loomɔ kɛ kitakamɔ ni aŋma yɛ Nyɔŋmɔ tsulɔ Mose mla lɛ mli lɛ ashwie wɔnɔ, ejaakɛ wɔfee esha wɔshi lɛ.”​—Daniel 9:​5-11; 2 Mose 19:​5-8; 24:​3, 7, 8.

7. Mɛni hewɔ abaanyɛ akɛɛ akɛ Yehowa fee nii ni ja yɛ Yudafoi lɛ ni eha amɛtee nomŋɔɔ mli lɛ hewɔ?

⁷ Nyɔŋmɔ ebɔ Israelbii lɛ kɔkɔ yɛ nɔ ni baajɛ etoi ni amɛboŋ kɛ kpaŋmɔ ni ekɛ amɛ efee lɛ ni amɛaaku amɛhiɛ amɛshwie nɔ lɛ mli aba lɛ he. (3 Mose 26:​31-33; 5 Mose 28:15; 31:17) Daniel kpɛlɛ ja ni Nyɔŋmɔ nifeemɔi lɛ ja lɛ nɔ, ni ekɛɛ akɛ: “Ni eye ewiemɔi lɛ ni ewie eshi wɔ kɛ wɔkojolɔi lɛ ni kojo wɔ lɛ anɔ, akɛni ekɛ efɔŋ kpeteŋkpele eba wɔnɔ lɛ; ejaakɛ ŋwɛi shishi fɛɛ lɛ afeko nɔ ni afee Yerusalem nɛɛ eko pɛŋ. Bɔ ni aŋma yɛ Mose mla lɛ mli lɛ, nakai nɛkɛ efɔŋ nɛɛ fɛɛ eba wɔnɔ nɛɛ; shi kɛlɛ wɔkpaaa Yehowa, wɔ-Nyɔŋmɔ lɛ, fai, koni wɔkpale kɛjɛ wɔnishaianii lɛ ahe, ni wɔjwɛŋ anɔkwale lɛ he. No hewɔ lɛ, Yehowa eshi efɔŋ lɛ he kpe, ni ekɛba wɔnɔ; ejaakɛ jalɔ ji Yehowa, wɔ-Nyɔŋmɔ lɛ, yɛ nii fɛɛ ni efeɔ lɛ mli; shi wɔbooo egbee toi.”​—Daniel 9:​12-14.

8. Daniel kɛ fai ni ekpa Yehowa lɛ damɔ mɛni nɔ?

⁸ Daniel taooo akɛ eeebu ewebii lɛ anifeemɔi lɛ bem. Amɛ nomŋɔɔ lɛ sa amɛ, taakɛ ejaje amrɔ nɔŋŋ lɛ: “Wɔfee esha, wɔfee nifɔjianii!” (Daniel 9:15) Asaŋ nɔ ni esusuɔ he lɛ jeee ni aye he kɛjɛ piŋmɔ mli kɛkɛ. Dabi, ekɛ efaikpamɔ lɛ damɔɔ Yehowa diɛŋtsɛ anunyam kɛ woo nɔ. Nyɔŋmɔ baaha eshiwoo ni etsɔ Yeremia nɔ ekɛha lɛ aba mli, ni ebaatse E-gbɛi krɔŋkrɔŋ lɛ he kɛtsɔ Yudafoi lɛ ahe eshai ni ekɛkeɔ amɛ ni ekɛ amɛ kuɔ sɛɛ kɛyaa amɛshikpɔŋ nɔ ekoŋŋ lɛ nɔ. Daniel kpa fai akɛ: “[Yehowa, NW] yɛ ojalɛ nitsumɔi lɛ fɛɛ naa lɛ, miikpao fai ni oha omlifu kɛ omlila lɛ aje omaŋ Yerusalem, ogɔŋ krɔŋkrɔŋ lɛ nɔ! Ejaakɛ wɔhe eshai lɛ kɛ wɔtsɛmɛi lɛ anishaianii lɛ ahewɔ lɛ Yerusalem kɛ omaŋ lɛ etsɔ ahorabɔɔnɔ̃ eha mɛi fɛɛ ni bɔle wɔ lɛ.”​—Daniel 9:16.

9. (a) Mɛɛ faikpamɔi Daniel kɛgbe esɔlemɔ lɛ naa? (b) Mɛni haoɔ Daniel, shi mɛɛ gbɛ nɔ etsɔ ejie bulɛ kpo yɛ Nyɔŋmɔ gbɛi lɛ he?

⁹ Daniel kɛ sɔlemɔ ni mli wa tee nɔ akɛ: “Ni agbɛnɛ, wɔ-Nyɔŋmɔ, bo otsulɔ sɔlemɔ kɛ efaikpamɔ lɛ toi, ni oha ohiɛ akpɛ yɛ ohé krɔŋkrɔŋ ni efee amaŋfɔ lɛ nɔ, yɛ [Yehowa, NW] hewɔ! Ba otoi shi mi-Nyɔŋmɔ, ni obo toi! Gbelemɔ ohiŋmɛii, ni okwɛ wɔmaŋfɔ̃i lɛ kɛ maŋ lɛ ni akɛ ogbɛi ewo lɛ lɛ! Ejaakɛ jeee wɔjalɛ nitsumɔi ahewɔ wɔkɛ wɔfaikpamɔi lɛ shwieɔ ohiɛ nɛɛ, shi moŋ yɛ omusuŋtsɔlɛ babaoo lɛ hewɔ. [Yehowa, NW] bo toi! [Yehowa, NW] ŋɔɔ fa! [Yehowa, NW] ka toi, ni ofee; kaatsɛ kwraa, yɛ bo diɛŋtsɛ ohewɔ, mi-Nyɔŋmɔ; ejaakɛ akɛ ogbɛi ewo omaŋ kɛ omaŋbii lɛ!” (Daniel 9:​17-19) Eji Nyɔŋmɔ kɛ eshai ekeee ni eshi ewebii lɛ yɛ nomŋɔɔ mli, ni eŋmɛ gbɛ ni emaŋ krɔŋkrɔŋ, Yerusalem, kã shi amaŋfɔ kɛtee naanɔ kulɛ, ani maji baabu lɛ akɛ Jeŋ Muu Fɛɛ Maŋtsɛ? Ani amɛmuŋ sane naa akɛ Yehowa bɛ hewalɛ ni ekɛaadamɔ Babilonia nyɔŋmɔi lɛ ahiɛ? Hɛɛ, abaabɔ Yehowa gbɛi lɛ ahora, ni enɛ haoɔ Daniel. Yɛ shii 19 ni anaa Nyɔŋmɔ gbɛi, Yehowa, yɛ Daniel wolo lɛ mli lɛ, emli 18 kɔɔ sɔlemɔ nɛɛ he!

GABRIEL KƐ OYAIYELI BA

10. (a) Namɔ atsu lɛ kɛtee Daniel ŋɔɔ lɛ, ni mɛni hewɔ? (b) Mɛni hewɔ Daniel wie Gabriel he akɛ “nuu” lɛ?

¹⁰ Beni Daniel kã he esɔleɔ lɛ, ŋwɛibɔfo Gabriel pue. Ekɛɛ akɛ: “Daniel, agbɛnɛ mije kpo miba ni mibatsɔɔo shishi. Beni oje ofaikpamɔ lɛ shishi lɛ, wiemɔ je kpo, ni mi miba mibatsɔɔo; ejaakɛ aasumɔ osane naakpa. No hewɔ lɛ, agbɛnɛ jwɛŋmɔ sane lɛ he, ni otɛ̃je ohiɛ okwɛ ninaa lɛ.” Shi mɛni hewɔ Daniel wieɔ ehe akɛ “nuu Gabriel lɛ”? (Daniel 9:​20-23) Ojogbaŋŋ, beni Daniel tao akɛ enu eklɛŋklɛŋ ninaa ni kɔɔ too kpakpo lɛ kɛ too agbo lɛ ahe lɛ shishi lɛ, ‘mɔ ko ni tamɔ gbɔmɔ’ badamɔ ehiɛ. Ŋwɛibɔfo Gabriel ni, ni atsu lɛ koni ekɛ sane shishinumɔ abaha Daniel. (Daniel 8:​15-17) Nakai nɔŋŋ hu yɛ Daniel sɔlemɔ lɛ sɛɛ lɛ, ŋwɛibɔfo nɛɛ ba emasɛi yɛ gbɔmɔ su mli, ni ekɛ lɛ wie tamɔ gbɔmɔ ko kɛ mɔ kroko wieɔ.

11, 12. (a) Eyɛ mli akɛ sɔlemɔtsu loo Yehowa afɔleshaa latɛ ko bɛ Babilon moŋ, shi mɛɛ gbɛ nɔ Yudafoi ni amɛtu amɛhe amɛha lɛ tsɔ amɛjie hiɛsɔɔ kpo yɛ afɔleshaai ni Mla lɛ biɔ lɛ ahe? (b) Mɛni hewɔ atsɛ Daniel akɛ ‘mɔ ni asumɔɔ esane naakpa’ lɛ?

¹¹ Gabriel bashɛ shi “aaafee gbɛkɛ afɔleshaa be lɛ mli.” Ákpata Yehowa afɔleshaa latɛ kɛ sɔlemɔtsu ni yɔɔ Yerusalem lɛ hiɛ, ni Yudafoi lɛ etsɔmɔ nomii amɛha Babiloniabii wɔŋjalɔi lɛ. No hewɔ lɛ Yudafoi ni yɔɔ Babilon lɛ eshãaa afɔlei amɛhãaa Nyɔŋmɔ. Shi kɛlɛ, kɛ bei ni áto áha afɔleshaai yɛ Mose Mla lɛ mli lɛ shɛ lɛ, efeɔ be ni sa kɛhaa Yudafoi ni amɛtu amɛhe amɛ́ha ni yɔɔ Babilon lɛ akɛ amɛaajie Yehowa yi ni amɛkpa lɛ fai. Ákɛ gbɔmɔ ni etu ehe eha Nyɔŋmɔ kwraa lɛ, atsɛ Daniel akɛ ‘mɔ ni asumɔɔ esane naakpa.’ Yehowa, ‘sɔlemɔ Toibolɔ’ lɛ ná ehe miishɛɛ, ni atsu Gabriel kɛ foi koni eyaha Daniel hemɔkɛyeli sɔlemɔ lɛ hetoo.​—Lala 65:3.

¹² Beni sɔlemɔ ni esɔleɔ ehaa Yehowa lɛ kɛ oshara ba ewala he po lɛ, Daniel tee nɔ esɔle eha Nyɔŋmɔ shii etɛ daa gbi. (Daniel 6:​11, 12) Ŋwanejee ko bɛ Yehowa ni basumɔ esane naakpa lɛ he! Kɛfata sɔlemɔ he lɛ, Nyɔŋmɔ Wiemɔ lɛ nɔ ni Daniel jwɛŋɔ lɛ hã enyɛ ena nɔ ni ji Yehowa suɔmɔnaa nii. Daniel kã sɔlemɔ he, ni ele bɔ ni efeɔ eyaa Yehowa ŋɔɔ yɛ gbɛ ni ja nɔ koni eha abo sɔlemɔi lɛ atoi. Ema Nyɔŋmɔ jalɛ nɔ mi. (Daniel 9:​7, 14, 16) Ni eyɛ mli akɛ ehenyɛlɔi lɛ enaaa tɔ̃mɔ yɛ ehe moŋ, shi Daniel le akɛ eji eshafeelɔ yɛ Nyɔŋmɔ hiɛ, ni ejaje ehe eshai lɛ amrɔ nɔŋŋ.​—Daniel 6:4; Romabii 3:23.

“OTSII NYƆŊMAI KPAWO” NI AKƐAASƆO ESHA NAA

13, 14. (a) Mɛɛ sane ko ni he hiaa Gabriel tsĩ tã etsɔɔ Daniel? (b) Be sɛɛkɛlɛ enyiɛ “otsii nyɔŋmai kpawo” lɛ feɔ, ni te wɔfeɔ tɛŋŋ wɔleɔ?

¹³ Mɛɛ hetoo Daniel ni sumɔɔ sɔlemɔ lɛ nine shɛ nɔ nɛkɛ! Jeee akɛ Yehowa ma nɔ mi kɛha lɛ akɛ Yudafoi lɛ baaku sɛɛ aya amɛmaŋ shikpɔŋ nɔ ekoŋŋ kɛkɛ, shi aha lɛ nɔ ko ni he hiaa babaoo he shishinumɔ​—Mesia ni agba ehe sane afɔ̃ shi lɛ puemɔ. (1 Mose 22:​17, 18; Yesaia 9:​5, 6) Gabriel kɛɛ Daniel akɛ: “Otsii nyɔŋmai kpawo ato aha omaŋbii lɛ kɛ omaŋ krɔŋkrɔŋ lɛ, ni akɛgbe mlatɔ̃mɔ lɛ naa, ni akɛsɔo eshai anaa, ni akɛkpata yɛ nishaianii ahewɔ, ni akɛ naanɔ jalɛ aba, ni akɛsɔo ninaa kɛ gbalɛ naa, ni akɛfɔ hé krɔŋkrɔŋ fe fɛɛ lɛ mu. No hewɔ lɛ ná ole, ni ojwɛŋ he, akɛ kɛjɛ beyinɔ ni wiemɔ aaaje kpo akɛ aku sɛɛ ayatswa Yerusalem ekoŋŋ lɛ kɛyashi mɔ ni afɔ lɛ mu ni ji lumɔ lɛ nɔ lɛ, efeɔ otsii kpawo, ni otsii nyɔŋmai ekpaa kɛ enyɔ mli lɛ aaaku sɛɛ ayatswa lɛ ekoŋŋ, blohu kɛ gbogbo fɛɛ yɛ fimɔ bei amli.”​—Daniel 9:​24, 25.

¹⁴ Sanekpakpa diɛŋtsɛ nɛ! Jeee akɛ abaaku sɛɛ atswa Yerusalem ekoŋŋ ni ato jamɔ ama shi ekoŋŋ yɛ sɔlemɔtsu hee ko mli kɛkɛ, shi ‘Mesia Lumɔ lɛ’ hu baapue yɛ be pɔtɛɛ ko mli. Enɛ baaba yɛ “otsii nyɔŋmai kpawo” lɛ mli. Akɛni Gabriel etsĩii gbii atã hewɔ lɛ, enɛɛmɛi jeee otsii ni eko fɛɛ eko feɔ gbii kpawo, ni baafee gbii 490​—afi kɛ nyɔji ejwɛ pɛ kɛkɛ. Yerusalem ni aaaku sɛɛ ayatswa lɛ ekoŋŋ kɛ “blohu kɛ gbogbo fɛɛ” lɛ hé be ni kɛ fe nakai. Otsii lɛ ji otsii ni ji afii. Ákɛ otsi fɛɛ otsi feɔ afii kpawo lɛ, ŋmɛnɛŋmɛnɛ beaŋ shishitsɔɔmɔi pii tsɔɔ nakai. Ákɛ nɔkwɛmɔnɔ lɛ, “otsii nyɔŋmai kpawo ni ji afii” ji bɔ ni shishigbɛ niŋmaa ni kɔɔ Daniel 9:24 he ni yɔɔ Tanakh​—The Holy Scriptures, ni The Jewish Publication Society lɛ fee lɛ kɛtsɔɔ mli. An American Translation lɛ kaneɔ akɛ: “Áto otsii nyɔŋmai kpawo ni ji afii aha owebii lɛ kɛ maŋ krɔŋkrɔŋ lɛ.” Wiemɔi ni tamɔ nakai jeɔ kpo yɛ Moffatt kɛ Rotherham shishitsɔɔmɔi lɛ amli.

15. Mɛɛ be kpalaŋŋi etɛ ajara “otsii nyɔŋmai kpawo” lɛ mli awo, ni mɛɛ be amɛbaaje shishi?

¹⁵ Bɔ ni ŋwɛibɔfo lɛ wiemɔi lɛ tsɔɔ lɛ, abaaja “otsii nyɔŋmai kpawo” lɛ mli afee lɛ bei kpalaŋŋi etɛ: (1) “otsii kpawo,” (2) “otsii nyɔŋmai ekpaa kɛ enyɔ,” kɛ (3) otsi kome. No baafee afii 49, afii 434, kɛ afii 7​—ni fɛɛ feɔ afii 490. Nɔ ni yɔɔ miishɛɛ lɛ, The Revised English Bible lɛ kaneɔ akɛ: “Ákadi afii nyɔŋmai kpawo toi kpawo aha omaŋbii lɛ kɛ maŋ krɔŋkrɔŋ lɛ.” Yɛ amɛ nomŋɔɔ kɛ piŋmɔ yɛ Babilon afii 70 lɛ sɛɛ lɛ, Yudafoi lɛ baaná Nyɔŋmɔ hiɛ duromɔ krɛdɛɛ ko afii 490, loo afii 70 ni akɛbɔ he toi 7. He ni ejeɔ shishi kɛjɛɔ lɛ baafee “kɛjɛ beyinɔ ni wiemɔ aaaje kpo akɛ aku sɛɛ ayatswa Yerusalem ekoŋŋ lɛ.” Mɛɛ be enɛ baafee?

“OTSII NYƆŊMAI KPAWO” LƐ JE SHISHI

16. Taakɛ etsɔɔ yɛ akpɔ ni ewo lɛ mli lɛ, mɛɛ yiŋtoo hewɔ Koresh ha Yudafoi lɛ ku amɛsɛɛ kɛtee amɛmaŋ shikpɔŋ nɔ ekoŋŋ lɛ?

¹⁶ Esa akɛ wɔsusu nibii etɛ ni ba ni sa kadimɔ yɛ “otsii nyɔŋmai kpawo” lɛ shishijee he lɛ he. Klɛŋklɛŋ nɔ̃ lɛ ba yɛ afi 537 D.Ŋ.B. beni Koresh kɛ akpɔ ni ewo lɛ ha akɛ Yudafoi lɛ aku sɛɛ aya amɛmaŋ shikpɔŋ nɔ ekoŋŋ lɛ. Ekaneɔ akɛ: “Bɔ ni Koresh, Persia maŋtsɛ lɛ, kɛɛ nɛ: Yehowa, ŋwɛi Nyɔŋmɔ lɛ, etuu shikpɔŋ lɛ nɔ maŋtsɛyelii lɛ fɛɛ ewo midɛŋ, ni efã mi akɛ miyama shia miha lɛ yɛ Yerusalem yɛ Yuda. Emaŋbii lɛ ateŋ mɔ fɛɛ mɔ ni yɔɔ nyɛteŋ lɛ, e-Nyɔŋmɔ lɛ afata ehe ni efã kɛya Yerusalem yɛ Yuda, ni eyama Yehowa, Israel Nyɔŋmɔ lɛ, shia lɛ. Lɛ ji Nyɔŋmɔ ni yɔɔ Yerusalem lɛ. Ni mɔ fɛɛ mɔ ni eshwɛ yɛ he fɛɛ he ni eyato gbɔ yɛ lɛ, jɛmɛ bii lɛ aye abua lɛ kɛ jwiɛtɛi kɛ shika kɛ nibii-nibii kɛ kooloi, ni asaŋ amɛha tsuijurɔnaa nikeenii yɛ Nyɔŋmɔ shia ni yɔɔ Yerusalem lɛ hewɔ.” (Ezra 1:​2-4) Eyɛ faŋŋ akɛ, yiŋtoo pɔtɛɛ ni yɔɔ akpɔ nɛɛ sɛɛ ji ni ehã aku sɛɛ ama​—“[Yehowa, NW] shia”​—lɛ yɛ he ni eyɔɔ tsutsu lɛ.

17. Mɛni wolo ni akɛha Ezra lɛ tsɔɔ akɛ no ji yiŋtoo hewɔ ni efãa gbɛ kɛyaa Yerusalem lɛ?

¹⁷ Sane ni ji enyɔ lɛ ba yɛ Persia Maŋtsɛ Artashasta (Artaxerxes Longimanus, Xerxes I binuu lɛ) nɔyeli afi ni ji kpawo lɛ mli. No mli lɛ, Ezra ni ji woloŋmalɔ lɛ fã gbɛ ni he nyɔji ejwɛ kɛjɛ Babilon kɛtee Yerusalem. Ehiɛ wolo krɛdɛɛ ko ni jɛ maŋtsɛ lɛ ŋɔɔ, shi efãaa akɛ aku sɛɛ atswa Yerusalem. Yɛ no najiaŋ lɛ, Ezra nitsumɔ pɛ ji ni ‘ewula Yehowa we lɛ fɛfɛo.’ No hewɔ ni wolo lɛ wie jwiɛtɛi kɛ shika, krɔŋkrɔŋ nii, ŋmãa, wein, mu, kɛ ŋoo ni akɛaaha koni akɛye abua jamɔ yɛ sɔlemɔwe lɛ, kɛ agbɛnɛ hu mɛi ni sɔmɔɔ yɛ jɛmɛ lɛ ni yeɔ amɛhe kɛjɛɔ onia loo too ni amɛaatsu lɛ he lɛ.​—Ezra 7:​6-27.

18. Mɛɛ saji gbá Nehemia naa waa lɛ, ni te fee tɛŋŋ ni Maŋtsɛ Artashasta bale enɛ?

¹⁸ Sane ni ji etɛ lɛ ba afii 13 sɛɛ, yɛ Persia Maŋtsɛ Artashasta nɔyeli afi ni ji 20 lɛ mli. No mli lɛ Nehemia miisɔmɔ akɛ edãawolɔ yɛ “Shushan mɔɔ lɛ mli.” Shwɛɛnii ni ku amɛsɛɛ kɛjɛ Babilon lɛ eku sɛɛ amɛtswa Yerusalem kɛyashɛ he ko. Shi jeee nibii fɛɛ yaa nɔ jogbaŋŋ. Nehemia nu akɛ ‘akumɔ Yerusalem gbogbo lɛ ashwie shi ni akɛ la eshã egbói lɛ.’ Enɛ gbá enaa waa, ni eye ŋkɔmɔ yɛ etsuiŋ. Beni abi lɛ nɔ hewɔ ni efee ehiɛ mɔbɔmɔbɔ lɛ, Nehemia ha hetoo akɛ: “Maŋtsɛ yi aná wala kɛya naanɔ! Mɛɛ hewɔ ni esaaa akɛ mihiɛ afee mɔbɔmɔbɔ, beni maŋ lɛ ni ji he ni mitsɛmɛi asãŋi yɔɔ lɛ etsɔ amaŋfɔ, ni ashã ehe agbói lɛ hu kɛ la lɛ?”​—Nehemia 1:​1-3; 2:​1-3.

19. (a) Beni Maŋtsɛ Artashasta bi lɛ sane lɛ, mɛni Nehemia fee klɛŋklɛŋ? (b) Mɛni Nehemia bi, ni ekpɛlɛ nɔ ni Nyɔŋmɔ tsuɔ yɛ sane lɛ mli lɛ nɔ yɛ mɛɛ gbɛ nɔ?

¹⁹ Sane ni kɔɔ Nehemia he lɛ tee nɔ akɛ: “Kɛkɛ ni maŋtsɛ lɛ kɛɛ mi akɛ: Mɛni ji nɔ ni otaoɔ? Kɛkɛ ni mikpa ŋwɛi Nyɔŋmɔ lɛ fai, ni mikɛɛ maŋtsɛ lɛ akɛ: Kɛji esa maŋtsɛ hiɛ, ni kɛji otsulɔ hiɛ eba nyam yɛ ohiɛ lɛ, ha maya Yuda yɛ maŋ ni mitsɛmɛi asãŋi yɔɔ mli lɛŋ koni mayato ekoŋŋ!” Yiŋtoo nɛɛ sa Artashasta hiɛ, ni etsu nɔ ni Nehemia bi ekoŋŋ lɛ he nii, akɛ: “Kɛji esa maŋtsɛ lɛ hiɛ lɛ, no lɛ aha mi woji miyaha amraloi ni yɔɔ [Eufrate] faa lɛ sɛɛ lɛ, koni amɛŋmɛ mi gbɛ ni mafo mli kɛyashi mashɛ Yuda, kɛ wolo ko hu ni mikɛyaha Asaf, maŋtsɛ koo lɛ kwɛlɔ lɛ, koni eha mi tsei ni mikɛfee mɔ̃ɔ ni yɔɔ shia lɛ he lɛ, kɛ maŋ lɛ he gbogbo lɛ kɛ shia ni miyahi mli lɛ naa agboi lɛ ahe mplaŋi.” Nehemia kpɛlɛ nɔ ni Yehowa tsuɔ yɛ enɛ mli lɛ fɛɛ nɔ, akɛ: “Ni maŋtsɛ lɛ ha mi [woji] yɛ mi-Nyɔŋmɔ lɛ mlihilɛ nine ni fata mihe lɛ hewɔ.”​—Nehemia 2:​4-8.

20. (a) Mɛɛ be wiemɔ ni je kpo akɛ “aku sɛɛ ayatswa Yerusalem ekoŋŋ” lɛ jeɔ shishi? (b) Mɛɛ be “otsii nyɔŋmai kpawo” lɛ je shishi, ni mɛɛ be eba naagbee? (d) Mɛɛ odaseyeli tsɔɔ bɔ ni bei ni je “otsii nyɔŋmai kpawo” lɛ shishi ni eba naagbee lɛ ja ha?

²⁰ Eyɛ mli ákɛ akɛ gbɛŋmɛɛ ha yɛ Nisan nyɔɔŋ lɛ nɔ, yɛ Artashasta nɔyeli afi ni ji 20 lɛ shishijee gbɛ moŋ, shi be krɛdɛɛ ‘ni wiemɔ je kpo akɛ aku sɛɛ ayatswa Yerusalem ekoŋŋ’ lɛ ba yɛ nyɔji komɛi asɛɛ. Enɛ ba yɛ be mli ni Nehemia yashɛ Yerusalem ni eje esaamɔ nitsumɔ lɛ shishi lɛ. Ezra gbɛfãa lɛ hé nyɔji ejwɛ, shi Shushan jɛkɛmɔ fe kilomitai 322 yɛ Babilon bokagbɛ, no hewɔ lɛ ekɛ Yerusalem teŋ jɛkɛ waa. No hewɔ lɛ, eeenyɛ eba akɛ, Nehemia yashɛ Yerusalem kɛmiiba Artashasta nɔyeli afi ni ji 20 lɛ naagbee gbɛ, aloo yɛ afi 455 D.Ŋ.B. No mli ni “otsii nyɔŋmai kpawo,” loo afii 490 ni agba afɔ̃ shi lɛ je shishi. Amɛbaaba naagbee yɛ afi 36 Ŋ.B. naagbee gbɛ.​—Kwɛmɔ “Mɛɛ Be Artashasta Nɔyeli lɛ Je Shishi?” yɛ baafa 197.

“MƆ NI AFƆ LƐ MU NI JI LUMƆ LƐ” PUE

21. (a) Mɛni abaatsu agbe naa yɛ klɛŋklɛŋ “otsii kpawo” lɛ mli, ni yɛ mɛɛ shihilɛi ni yɔɔ lɛ fɛɛ sɛɛ? (b) Mɛɛ afi mli esa akɛ Mesia [Lumɔ] lɛ apue, ni mɛni Luka Sanekpakpa lɛ kɛɛ eba yɛ nakai be lɛ mli?

²¹ Afii enyiɛ ho dani aku sɛɛ atswa Yerusalem diɛŋtsɛ? Ojogbaŋŋ, abaagbe maŋ lɛ saamɔ naa yɛ “fimɔ bei amli” yɛ naagbai ni yɔɔ Yudafoi lɛ diɛŋtsɛ ateŋ kɛ shitee kɛ woo ni jɛ Samariabii lɛ kɛ mɛi krokomɛi adɛŋ lɛ hewɔ. Eyɛ faŋŋ akɛ agbe nitsumɔ lɛ naa kɛyashɛ he ni ehe hiaa ni eyashɛ, aaafee afi 406 D.Ŋ.B.​—yɛ “otsii kpawo,” loo afii 49 lɛ mli. (Daniel 9:25) Be kpalaŋŋ ni ji otsii 62, loo afii 434 baanyiɛ sɛɛ. Yɛ nakai be lɛ sɛɛ lɛ, Mesia [Lumɔ] ni awo shi yɛ ehe jeeŋmɔ lɛ baapue. Kɛ akane afii 483 (49 ni akɛfata 434 he) kɛjɛ afi 455 D.Ŋ.B. lɛ, ekɛ wɔ baa afi 29 Ŋ.B. Mɛni ba yɛ nakai be lɛ mli? Sanekpakpa ŋmalɔ Luka kɛɔ wɔ: “Kaisare Tiberio maŋtsɛyeli afi ni ji nyɔŋma kɛ enumɔ lɛ mli, beni Pontio Pilato yeɔ amralo yɛ Yudea, ni Herode yeɔ tetrarke yɛ Galilea . . . lɛ, Nyɔŋmɔ wiemɔ ba Zakaria bi Yohane ŋɔɔ, yɛ ŋa lɛ nɔ. Ni eba Yordan niiaŋ fɛɛ, ni eshiɛɔ tsuitsakemɔ baptisimɔ ni akɛnáa eshaifaa.” No mli lɛ “maŋ lɛ miikpa” Mesia lɛ “gbɛ.”​—Luka 3:​1-3, 15, NW.

22. Mɛɛ be ni mɛni nɔ Yesu tsɔ ebafee Mesia [Lumɔ] ni ágba ehe sane áfɔ̃ shi lɛ?

²² Yohane jeee shiwoo Mesia lɛ. Shi yɛ nɔ ni ena yɛ Yesu ni jɛ Nazaret lɛ baptisimɔ, afi 29 Ŋ.B. lɛ gbo be mli lɛ hewɔ lɛ, Yohane kɛɛ akɛ: “Mina Mumɔ lɛ yi shi kɛjɛ ŋwɛi tamɔ okpo, ni ebahi enɔ. Ni mi lɛ, mileee lɛ, shi mɔ ni tsu mi akɛ mibabaptisi yɛ nu mli lɛ, lɛ nɔŋŋ ekɛɛ mi akɛ: Mɔ nɔ ni ooona akɛ Mumɔ lɛ yiɔ ni ehiɔ enɔ lɛ, lɛ ji mɔ ni baptisiɔ yɛ Mumɔ krɔŋkrɔŋ mli lɛ. Ni mina, ni miye he odase akɛ Nyɔŋmɔ bi lɛ nɛ.” (Yohane 1:32-34) Yesu batsɔ Mɔ ni Afɔ Lɛ Mu​—Mesia, loo Kristo lɛ. No sɛɛ etsɛɛɛ lɛ, Yohane kaselɔ Andrea kɛ Yesu ni afɔ lɛ mu lɛ kpe ni ekɛɛ Simon Petro akɛ: “Wɔna Mesia (eshishi ji Kristo, loo mɔ ni afɔ lɛ mu) lɛ.” (Yohane 1:41) No hewɔ lɛ “mɔ ni afɔ lɛ mu ni ji lumɔ lɛ” pue yɛ be naa pɛpɛɛpɛ​—yɛ otsii 69 lɛ naagbee!

NAAGBEE OTSI LƐ MLI SAJI

23. Mɛni hewɔ esa akɛ “mɔ ni afɔ lɛ mu [Mesia] ni ji lumɔ lɛ” agbo, ni mɛɛ be enɛ baaba mli?

²³ Mɛni abaatsu agbe naa yɛ otsi ni gbeɔ yi feɔ 70 lɛ mli? Gabriel kɛɛ akɛ ato be kpalaŋŋ ni ji “otsii nyɔŋmai kpawo” lɛ koni “akɛgbe mlatɔ̃mɔ lɛ naa, ni akɛsɔo eshai anaa, ni akɛkpata yɛ nishaianii ahewɔ, ni akɛ naanɔ jalɛ aba, ni akɛsɔo ninaa kɛ gbalɛ naa, ni akɛfɔ hé krɔŋkrɔŋ fe fɛɛ lɛ mu.” Bɔni afee ni anyɛ atsu enɛ lɛ, esa akɛ “mɔ ni afɔ lɛ mu ni ji lumɔ lɛ” agbó. Mɛɛ be? Gabriel kɛɛ: “Otsii nyɔŋmai ekpaa kɛ enyɔ lɛ sɛɛ lɛ, aaafo mɔ ni afɔ lɛ mu lɛ ashɛ afɔ̃, ni enáŋ mɔ ko; . . . Ni eeewaje kpaŋmɔ eha mɛi pii otsi kome; ni otsi lɛ teŋ lɛ eeeha afɔle kɛ niyenii afɔle sɛɛ afo.” (Daniel 9:26a, 27a) Be ni he jaraa waa lɛ ji “otsi lɛ teŋ lɛ,” ni ji naagbee otsi ni ji afii lɛ teŋ lɛ.

24, 25. (a) Taakɛ agba afɔ̃ shi lɛ, mɛɛ be Kristo gbo, ni egbele lɛ kɛ eshitee lɛ kɛ mɛni ba naagbee? (b) Yesu gbele lɛ kɛ mɛɛ hegbɛ ba?

²⁴ Yesu Kristo maŋ sɔɔmɔ lɛ je shishi yɛ afi 29 Ŋ.B. lɛ naagbee gbɛ, ni ehé afii etɛ kɛ fã. Taakɛ agba afɔ̃ shi lɛ, afi 33 Ŋ.B. lɛ mra mli ni ‘afo’ Kristo “ashɛ afɔ̃,” beni egbo yɛ piŋmɔ sɛŋmɔtso nɔ, ni ekɛ ewala akɛ adesa lɛ hã akɛ kpɔmɔnɔ kɛha adesai lɛ. (Yesaia 53:8; Mateo 20:28) Kooloi afɔleshaai ahehiamɔ kɛ nikeenii ni akɛshãa afɔle ni Mla lɛ biɔ lɛ sɛɛ fo beni Yesu ni atee lɛ shi lɛ kɛ ewala akɛ adesa ni ekɛshã afɔle lɛ jara lɛ yaha Nyɔŋmɔ yɛ ŋwɛi lɛ. Eyɛ mli akɛ Yudafoi osɔfoi lɛ tee nɔ amɛshã afɔlei aahu kɛyashi Yerusalem sɔlemɔtsu lɛ hiɛkpatamɔ yɛ afi 70 Ŋ.B. lɛ mli moŋ, shi Nyɔŋmɔ ekpɛlɛɛɛ afɔlei nɛɛ anɔ dɔŋŋ. Akɛ afɔleshaa ni hi, nɔ ni ehe ehiaaa ni ati mli afee eto nomɛi anajiaŋ. Bɔfo Paulo ŋma akɛ: “[Kristo] eshã eshai ahe afɔle shikome nyɔŋlo . . . Ejaakɛ afɔle kome ni eshã lɛ, ekɛha mɛi ni atsuu amɛhe lɛ ehi kɛwula shi nyɔŋlo.”​—Hebribii 10:​12, 14.

²⁵ Eyɛ mli akɛ esha kɛ gbele tee nɔ ehao adesai moŋ, shi Yesu ni afo lɛ ashɛ afɔ̃ yɛ gbele mli lɛ kɛ eshitee kɛmiiya wala mli lɛ ha gbalɛ ba mli. ‘Egbe mlatɔ̃mɔ lɛ naa, ekɛ esha ba naagbee, ekpata eha tɔ̃mɔ, ni ekɛ jalɛ ba.’ Nyɔŋmɔ ejie Mla kpaŋmɔ lɛ ni kpa Yudafoi lɛ ahe mama akɛ eshafeelɔi ni ebu amɛ fɔ lɛ kɛtee. (Romabii 5:​12, 19, 20; Galatabii 3:​13, 19; Efesobii 2:​15; Kolosebii 2:​13, 14) Abaanyɛ afo efɔŋfeelɔi ni tsakeɔ amɛtsui lɛ ahe eshai amli, ni abaajie toigbalamɔ lɛ kɛjɛ amɛnɔ agbɛnɛ. Kɛtsɔ Mesia lɛ afɔleshaa ni kpataa esha lɛ nɔ lɛ, abaanyɛ asaa mɛi ni jieɔ hemɔkɛyeli kpo lɛ kɛ Nyɔŋmɔ teŋ. Amɛbaanyɛ ni amɛkpa gbɛ akɛ amɛnine baashɛ Nyɔŋmɔ nikeenii ni ji ‘naanɔ wala kɛtsɔ Kristo Yesu nɔ’ lɛ nɔ.​—Romabii 3:​21-​26; 6:​22, 23; 1 Yohane 2:​1, 2.

26. (a) Eyɛ mli akɛ ajie Mla kpaŋmɔ lɛ kɛtee moŋ, shi mɛɛ kpaŋmɔ ‘etee nɔ ewaje lɛ otsi kome’? (b) Mɛni ba yɛ otsi ni gbeɔ yi feɔ 70 lɛ naagbee?

²⁶ Nɛkɛ ji bɔ ni Yehowa jie Mla kpaŋmɔ lɛ kɛtee kɛtsɔ Kristo gbele yɛ afi 33 Ŋ.B. mli lɛ nɔ. Shi te aaafee tɛŋŋ ni aaakɛɛ akɛ esa akɛ Mesia lɛ ‘awaje kpaŋmɔ eha mɛi pii otsi kome’ hu? Ejaakɛ eha Abraham kpaŋmɔ lɛ tee nɔ. Nyɔŋmɔ kpã nakai kpaŋmɔ lɛ mli jɔɔmɔi lɛ amli eha Abraham Hebri seshibii lɛ aahu kɛyashi otsi ni ji 70 lɛ ba naagbee. Shi “otsii nyɔŋmai kpawo” ni ji afii lɛ naagbee, yɛ afi 36 Ŋ.B. lɛ, bɔfo Petro shiɛ etsɔɔ Italianyo Kornelio ni etu ehe eha Nyɔŋmɔ lɛ kɛ eshiabii, kɛ Jeŋmajiaŋbii krokomɛi. Ni kɛjɛ nakai gbi lɛ nɔ kɛyaa lɛ, aje shishi ashiɛ sanekpakpa lɛ atsɔɔ gbɔmɛi ni jɛ jeŋmaji lɛ amli lɛ.​—Bɔfoi lɛ Asaji 3:​25, 26; 10:​1-​48; Galatabii 3:​8, 9, 14.

27. Mɛɛ “hé krɔŋkrɔŋ fe fɛɛ” afɔ jɛmɛ mu lɛ, ni yɛ mɛɛ gbɛ nɔ?

²⁷ Gbalɛ hu gba efɔ̃ shi akɛ abaafɔ “hé krɔŋkrɔŋ fe fɛɛ” lɛ mu. Enɛ kɔɔɔ Yerusalem sɔlemɔtsu lɛ mligbɛ tsũ lɛ Hé Krɔŋkrɔŋ Fe Fɛɛ lɛ he. Wiemɔ “Hé Krɔŋkrɔŋ Fe Fɛɛ” ni yɔɔ biɛ lɛ kɔɔ Nyɔŋmɔ ŋwɛi shihilɛhe lɛ he. Jɛmɛ Yesu kɛ efɔleshaa akɛ adesa lɛ jara lɛ yaha e-Tsɛ lɛ yɛ. Yesu baptisimɔ yɛ afi 29 Ŋ.B. lɛ fɔ nakai ŋwɛi, mumɔŋ shihilɛhe ni shikpɔŋ nɔ kpeebuu lɛ kɛ sɛɛ mli sɔlemɔtsu lɛ Hé Krɔŋkrɔŋ Fe Fɛɛ lɛ damɔ shi kɛha no lɛ mu loo etu ema afã.​—Hebribii 9:​11, 12.

NYƆŊMƆ MA GBALƐ LƐ NƆ ADUATSƆ

28. Mɛni ji ‘ninaa kɛ gbalɛ ni aaasɔo naa’ lɛ shishi?

²⁸ Mesia gbalɛ ni ŋwɛibɔfo Gabriel jaje lɛ hu wie ‘ninaa kɛ gbalɛ ni aaasɔo naa’ lɛ he. Enɛ tsɔɔ akɛ, akɛ ŋwɛi sɛɛfimɔ baasɔo nɔ fɛɛ nɔ ni agba afɔ̃ shi yɛ Mesia lɛ he​—nɔ fɛɛ nɔ ni etsɔ efɔleshaa, eshitee, kɛ ŋwɛi ni eyapue yɛ, kɛ agbɛnɛ nibii krokomɛi ni ba yɛ otsi ni gbeɔ yi feɔ 70 lɛ mli lɛ ni etsu fɛɛ he nii lɛ naa​—ebaaba mli anɔkwale, ni abaanyɛ ni akɛ he afɔ̃ nɔ. Abaasɔo ninaa lɛ naa, ebaafee nɔ ni kɔɔ Mesia lɛ pɛ he. Ebaaba mli yɛ emli, kɛ Nyɔŋmɔ nitsumɔ kɛtsɔ enɔ lɛ mli. Mesia ni agba ehe sane afɔ̃ shi lɛ nɔ pɛ wɔbaatsɔ wɔna ninaa lɛ shishitsɔɔmɔ ni ja. Nɔ kroko bɛ ni baatsɔɔ eshishinumɔ lɛ shishi.

29. Mɛni baaba Yerusalem ni aku sɛɛ atswa ama shi ekoŋŋ lɛ nɔ, ni yɛ mɛɛ yiŋtoo hewɔ?

²⁹ Gabriel etsɔ hiɛ egba akɛ abaaku sɛɛ ayatswa Yerusalem. Shi agbɛnɛ eegba nakai maŋtiase lɛ kɛ esɔlemɔtsu lɛ ni aku sɛɛ atswa lɛ hiɛkpatamɔ, akɛ: “Shi lumɔ ni baaba lɛ maŋbii lɛ aaafite maŋ lɛ kɛ hé krɔŋkrɔŋ lɛ, ni enaagbee lɛ aaatamɔ nu afua, ni ta aaakã he kɛyashi naagbee; ama amaŋfɔfeemɔ nɔ mi. . . . Ni fine nɔ amaŋfɔ nihii nii lɛ aaahi, kɛyashi beyinɔ ni aaafɔse nyɔmɔwoo kɛ kojomɔ ashwie fitelɔ lɛ nɔ.” (Daniel 9:26b, 27b) Eyɛ mli akɛ amaŋfɔfeemɔ nɛɛ baaba yɛ “otsii nyɔŋmai kpawo” lɛ sɛɛ moŋ, shi ebaafee nɔ ni jɛ nibii ni tee nɔ yɛ naagbee “otsi” lɛ mli ba lɛ diɛŋtsɛ, beni Yudafoi lɛ kpoo Kristo ni amɛha agbe lɛ lɛ.​—Mateo 23:​37, 38.

30. Taakɛ yinɔsane mli niŋmaa etsɔɔ lɛ, te Be Bulɔ Kpeteŋkpele lɛ akpɔ lɛ eba mli eha tɛŋŋ?

³⁰ Yinɔsane mli niŋmaai tsɔɔ akɛ afi 66 Ŋ.B. lɛ mli ni Roma asraafoi ni yɔɔ Siria Amralo Cestius Gallus shishi lɛ babɔle Yerusalem he kɛkpe. Yɛ shitee kɛ woo ni Yudafoi lɛ kɛba lɛ fɛɛ sɛɛ lɛ, Roma tabilɔi ni hiɛ amɛ wɔji akadimɔ nii loo aflaŋai lɛ bote maŋ lɛ mli, ni amɛje sɔlemɔtsu lɛ gbogbo ni yɔɔ bokagbɛ lɛ shishitsaa. Jɛmɛ ni amɛdamɔ lɛ fee amɛ “nihii nii” ni baanyɛ ekɛ amaŋfɔfeemɔ kwraa aba. (Mateo 24:​15, 16) Yɛ afi 70 Ŋ.B. lɛ, Romabii lɛ ni yɔɔ Tatsɛ Tito shishi lɛ ba tamɔ “nu afua” ni amɛfee maŋ lɛ kɛ esɔlemɔtsu lɛ amaŋfɔ diɛŋtsɛ. Nɔ ko nɔ ko bɛ ni tsĩ amɛ gbɛ, ejaakɛ Nyɔŋmɔ​—ewo akpɔ yɛ enɛ he​—‘ema nɔ mi.’ Be Bulɔ Kpeteŋkpele, Yehowa, eha ewiemɔ eba mli shikome ekoŋŋ!

MƐNI OYƆSE?

• Mɛɛ faikpamɔi Daniel kɛfɔ̃ Yehowa hiɛ beni Yerusalem amaŋfɔ afii 70 lɛ baa naagbee lɛ?

• “Otsii nyɔŋmai kpawo” lɛ sɛɛkɛlɛ feɔ enyiɛ, ni mɛɛ be mli amɛje shishi ni amɛba naagbee?

• Mɛɛ be ‘Mesia ni ji Lumɔ’ lɛ pue, ni mɛɛ be ni jaraa waa mli afo lɛ shɛ afɔ̃ lɛ?

• Mɛɛ kpaŋmɔ ‘awaje aha mɛi pii otsi kome’ lɛ?

• Mɛni ba yɛ “otsii nyɔŋmai kpawo” lɛ sɛɛ?

[Akrabatsa/Mfoniri ni yɔɔ baafa 197]

Mɛɛ Be Artashasta Nɔyeli lɛ Je Shishi?

YINƆSANEŊMALƆI kpaaa gbee yɛ afi nɔ ni Persia Maŋtsɛ Artashasta nɔyeli lɛ je shishi lɛ he. Mɛi komɛi kɛ nɔyeli hewalɛ ni ebaná lɛ haa akɛ afi 465 D.Ŋ.B., ejaakɛ etsɛ Xerxes, je nɔyeli shishi afi 486 D.Ŋ.B., ni egbo yɛ enɔyeli afi ni ji 21 lɛ mli. Shi kɛlɛ, odaseyeli yɛ ni tsɔɔ akɛ Artashasta bata maŋtsɛsɛi lɛ nɔ yɛ afi 475 D.Ŋ.B., ni eklɛŋklɛŋ nɔyeli afi lɛ je shishi yɛ afi 474 D.Ŋ.B.

Niŋmaai kɛ nibii ni ágbɔ loo áshɔ̃ ni atsa shi ana yɛ blema Persia maŋtiase Persepolis mli lɛ tsɔɔ akɛ Xerxes kɛ etsɛ, Dario I fɛɛ fee ekome kɛye maŋtsɛ. Kɛji akɛ maŋtsɛ ni afeɔ ekome kɛyeɔ nɛɛ he afii 10, ni Xerxes kome ye maŋtsɛ afii 11 yɛ Dario gbele sɛɛ yɛ afi 486 D.Ŋ.B. lɛ, enɛ baaha Artashasta klɛŋklɛŋ nɔyeli afi lɛ afee afi 474 D.Ŋ.B.

Odaseyeli ni ji enyɔ lɛ kɔɔ Ateene Tatsɛ Themistocles, ni ye Xerxes asraafoi lɛ anɔ kunim yɛ afi 480 D.Ŋ.B. lɛ he. Sɛɛ mli lɛ Helabii lɛ eyasumɔɔɔ esane dɔŋŋ ni afolɔ enaa akɛ maŋjwalɔ. Themistocles jo foi ni eyatao abobaahe yɛ Persia maŋtsɛwe lɛ, ni ahere lɛ jogbaŋŋ yɛ jɛmɛ. Taakɛ Hela yinɔsaneŋmalɔ Thucydides tsɔɔ lɛ, enɛ ba beni Artashasta “bata maŋtsɛsɛi lɛ nɔ etsɛko.” Hela yinɔsaneŋmalɔ Diodorus Siculus kɛɛ Themistocles gbo yɛ afi 471 D.Ŋ.B. Akɛni Themistocles bi ni aha lɛ afi kome ni ekɛkase Persia wiemɔ dani eya Maŋtsɛ Artashasta hiɛ hewɔ lɛ, belɛ eshɛ Asia Bibioo lɛ dani afi 473 D.Ŋ.B. shɛ. Jerome wolo ni ji Chronicle of Eusebius lɛ fiɔ nakai be lɛ sɛɛ. Akɛni Themistocles bashɛ Asia yɛ afi 473 D.Ŋ.B., beni Artashasta “bata maŋtsɛsɛi lɛ nɔ etsɛko” hewɔ lɛ, Germany woloŋlelɔ, Ernst Hengstenberg tsɔɔ yɛ ewolo ni ji Christology of the Old Testament lɛ mli akɛ, Artashasta nɔyeli lɛ je shishi yɛ afi 474 D.Ŋ.B. taakɛ woji krokomɛi tsɔɔ lɛ. Ekɛfata he akɛ: “Artashasta afi ni ji nyɔŋmai enyɔ lɛ ji afi 455 dani Kristo ba.”

[Mfoniri]

Themistocles ŋwɛigbɛ ni ashɔ̃

[Nitɛŋmɔ ni akɛmiitsɔɔ nɔ ko mli/Mfonirii ni yɔɔ baafa 188, 189]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

“OTSII NYƆŊMAI KPAWO”

455 D.Ŋ.B 406 D.Ŋ.B 29 Ŋ.B 33 Ŋ.B 36 Ŋ.B

otsii 7 62 otsii otsi 1

afii 49 434 afii afii 7

[Baafa muu mfoniri ni yɔɔ baafa 180]

[Baafa muu mfoniri ni yɔɔ baafa 193]