Sanebimɔi Ni Jɛ Kanelɔi Adɛŋ

Eyɛ mli akɛ Kristofoi yɛ hegbɛ ni amɛbuɔ amɛhe moŋ, shi esa akɛ amɛkwɛ jogbaŋŋ ni amɛkafee nɔ ko ni teɔ shi ewoɔ Biblia shishitoo mlai. Shishitoo mlai nɛɛ hãa wɔnaa akɛ, ejaaa gbɛ akɛ Kristofoi baahiɛ tui yɛ amɛhe loo yɛ shĩa akɛ amɛkɛmiibu amɛhe kɛmiijɛ gbɔmɛi krokomɛi ahe. Susumɔ otii ni nyiɛ sɛɛ nɛɛ ahe:

Wala jara wa yɛ Yehowa hiɛ, titri lɛ, adesai awala. Lalatsɛ David wie yɛ Yehowa he akɛ: “Bo oŋɔɔ wala nubu yɔɔ.” (Lala 36:10) Enɛ hewɔ lɛ, kɛ́ Kristofonyo ko kpɛ eyiŋ akɛ ebaafee nɔ ko kɛbu lɛ diɛŋtsɛ loo nibii ni eyɔɔ lɛ ahe lɛ, esa akɛ efee bɔ fɛɛ bɔ ni ebaanyɛ koni ekagbe gbɔmɔ ní no hã eye lá yi sɔ̃.​—5 Mose 22:8; Lala 51:16.

Eyɛ mli akɛ jeee tu pɛ kɛ́ mɔ ko kɛbu ehe lɛ ebaanyɛ eye lá yi sɔ̃ moŋ, shi kɛ́ mɔ ko hiɛ tu lɛ, ewaaa kwraa akɛ ebaagbe gbɔmɔ, kɛ́ ejeee gbɛ akɛ eefee nakai po.a Kɛfata he lɛ, kɛ́ mɔ ko batutua bo ni ena akɛ ohiɛ tu lɛ, no baanyɛ ahã sane lɛ mli awo wu, ni mɔ ko wala tete aŋmɛɛ lɛ, ejaakɛ lɛ awuiyelɔ lɛ diɛŋtsɛ lɛ, etsui efã momo.

Gbi gbɛkɛ ni enɔ jetsɛremɔ lɛ abaagbe Yesu lɛ, ekɛɛ esɛɛnyiɛlɔi lɛ akɛ amɛkɔlɔ klantei, shi ekɛɛɛ amɛ nakai kɛ jwɛŋmɔ lɛ akɛ, amɛkɛ klantei lɛ baabu amɛhe. (Luka 22:36, 38) Moŋ lɛ, ehã amɛkɛba koni ekɛtsɔɔ amɛ akɛ, kɛ́ mɛi batutua amɛ kɛ tsei, klantei, loo nibii krokomɛi ni tamɔ nakai po lɛ, esaaa akɛ amɛyeɔ mɔ ko mɔ ko awui. (Luka 22:52) Be ni Petro kɛ klantei lɛ ekome pila osɔfonukpa lɛ nyɔŋ lɛ, Yesu fã Petro akɛ: “Ŋɔɔ oklante lɛ owo etoohe.” Kɛkɛ ni Yesu kɛ shishitoo mla ko hã, ni shishitoo mla nɛɛ ekudɔ esɛɛnyiɛlɔi kɛbashi ŋmɛnɛ. Ekɛɔ akɛ: “Mɛi fɛɛ ni gbalaa klante lɛ, klante naa amɛhiɛ baakpãtã yɛ.”​—Mat. 26:51, 52.

Tamɔ bɔ ni agba yɛ Mika 4:3 lɛ, Nyɔŋmɔ webii ‘kɛ amɛklantei sɔ̃ɔ kɔii, ni amɛkɛ amɛkpɔlɔi hu sɔ̃ɔ adedai.’ Enɛ ni amɛfeɔ lɛ kɛ wiemɔi ni Nyɔŋmɔ tsɔ bɔfo Paulo nɔ ewie lɛ kpãa gbee. Ewie akɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ. . . . Kɛ́ aaahi lɛ, nyɛgbɛfaŋ lɛ, nyɛfea bɔ fɛɛ bɔ ni nyɛaanyɛ koni toiŋjɔlɛ ahi nyɛ kɛ mɛi fɛɛ ateŋ.” (Rom. 12:17, 18) Paulo kɛ naagbai pii kpe. Akɛ nɔkwɛmɔnɔ lɛ, eyagbee “ojoyelɔi” loo julɔi awuiyelɔi ateŋ. Fɛɛ sɛɛ lɛ, efeee nɔ ko ni teɔ shi ewoɔ Biblia mli shishitoo mlai akɛ ekɛmiibu ehe. (2 Kor. 11:26) Yɛ no najiaŋ lɛ, ekɛ ehiɛ fɔ̃ Nyɔŋmɔ kɛ ŋaawoi kpakpai ni yɔɔ Ŋmalɛi lɛ amli lɛ anɔ. Biblia lɛ kɛɔ akɛ ŋaawoi ni tamɔ nɛkɛ lɛ “hi fe tawuu nii.”​—Jaj. 9:18.

Wala jara wa kɛhã Kristofoi kwraa fe heloonaa nibii. “Jeee gbɔmɔ nii ni ená ni eteke nɔ lɛ mli ewala yɔɔ.” (Luka 12:15) No hewɔ lɛ, kɛ́ julɔi awuiyelɔi batutua wɔ, ni wɔkɛ amɛ wie kɛ naajɔlɛ shi amɛbooo wɔ toi lɛ, nyɛhãa wɔkɛ ŋaa nɛɛ ni Yesu wo lɛ atsua nii, akɛ: “Nyɛkatea shi nyɛwoa efɔŋfeelɔ.” Ekolɛ enɛ baabi ni wɔshi julɔi lɛ ni amɛloo nɔ fɛɛ nɔ ni amɛtaoɔ ni amɛya. (Mat. 5:39, 40; Luka 6:29)b Shi tamɔ wɔ fɛɛ wɔle lɛ, kooloo ni le ehe nɔkwɛmɔ lɛ, etsɛɔ yɛ koo mli. No hewɔ lɛ, kɛ́ ‘wɔkɛ nibii ni wɔyɔɔ lɛ eshwãaa,’ ni mɛi le akɛ Yehowa Odasefoi ji wɔ ni wɔsumɔɔɔ wɔhe sane lɛ, ekolɛ julɔi awuiyelɔi baŋ wɔnɔ.​—1 Yoh. 2:16; Abɛi 18:10.

Kristofoi kwɛɔ jogbaŋŋ koni amɛkafee nɔ ko ni baagba mɛi krokomɛi ahenilee naa. (Rom. 14:21) Kɛ́ nyɛmimɛi ná amɛle akɛ nyɛmi ko yɛ tu kɛ jwɛŋmɔ lɛ akɛ ekɛmiibu ehe kɛmiijɛ gbɔmɛi krokomɛi ahe lɛ, ekolɛ amɛteŋ mɛi komɛi anaa baakpɛ amɛhe waa, ni ebaanyɛ etɔ̃tɔ̃ amɛnane. Kɛ́ wɔsumɔɔ wɔnyɛmimɛi lɛ, wɔfeŋ nɔ ni hi hã wɔ pɛ wɔhe, shi moŋ wɔbaasusu amɛhe klɛŋklɛŋ, kɛ́ no baabi ni wɔkɛ hegbɛ ko ni wɔyɔɔ lɛ ashã afɔle po.​—1 Kor. 10:32, 33; 13:4, 5.

Kristofoi miisumɔ ni amɛfee nɔkwɛmɔnɔ kpakpa. (2 Kor. 4:2; 1 Pet. 5:2, 3) Kɛ́ Kristofonyo ko yɛ tu akɛ ekɛmiibu ehe kɛmiijɛ gbɔmɛi krokomɛi ahe, ni ajɛ Biblia lɛ mli awo lɛ ŋaa yɛ he shi ebooo toi lɛ, nakai mɔ lɛ efeee nɔkwɛmɔnɔ kpakpa. No hewɔ lɛ, anyɛŋ ahã lɛ sɔɔmɔ hegbɛi yɛ asafo lɛ mli, ni anyɛŋ atuu nitsumɔ ko kwraa awo edɛŋ. Nakai nɔŋŋ eji yɛ nyɛmi ko ni enitsumɔ biɔ ni ehiɛ tu lɛ gbɛfaŋ. No hewɔ lɛ, ehi jogbaŋŋ akɛ ebaatao nitsumɔ kroko!c

Kristofonyo fɛɛ Kristofonyo baakpɛ lɛ diɛŋtsɛ eyiŋ yɛ nitsumɔ ni ebaasumɔ ni etsu, kɛ nɔ ni ebaasumɔ ni efee kɛbu lɛ diɛŋtsɛ, eweku lɛ, loo nibii ni eyɔɔ lɛ ahe. Shi esa akɛ yiŋkpɛi nɛɛ adamɔ Biblia mli shishitoo mlai anɔ. Nyɔŋmɔ hiɛ kã shi ni esumɔɔ wɔ, ni no hewɔ ehã wɔ shishitoo mlai nɛɛ. Shishitoo mlai nɛɛ ahewɔ lɛ, Kristofoi ni edara yɛ mumɔŋ lɛ kpɛɔ amɛyiŋ akɛ, amɛhiɛŋ tui yɛ amɛhe loo yɛ shĩa akɛ amɛkɛmiibu amɛhe kɛmiijɛ gbɔmɛi krokomɛi ahe. Amɛle akɛ, kɛ́ amɛkɛ amɛhiɛ fɔ̃ Nyɔŋmɔ nɔ, ni amɛkɛ Biblia mli shishitoo mlai tsu nii lɛ, amɛbaahi shi shweshweeshwe kɛya naanɔ.​—Lala 97:10; Abɛi 1:33; 2:6, 7.