Hii Nyɔŋmɔ Suɔmɔ lɛ Mli

1, 2. Nɛgbɛ wɔbaanyɛ wɔná abobaahe ni yɔɔ shweshweeshwe yɛ ŋmɛnɛ?

FEEMƆ he mfoniri akɛ onyiɛ gbɛjegbɛ ko nɔ gbi ko beni ahum miitswa. Ŋwɛi edĩ tũu. Sarawai bɔi gbalamɔ, nugbɔ bɔi shiimɔ, kɛkɛ ni nugbɔ bɔi nɛmɔ waa. Okɛ oyaiyeli kɛ hekpokpomɔ bɔi abobaahe ko taomɔ. Kɛkɛ ni ona abobaahe ko yɛ gbɛjegbɛ lɛ masɛi. Nɛkɛ hé nɛɛ yɛ shweshweeshwe, jɛmɛ egbi, ni jɛmɛ yɛ hiɛmɛɛ. Kwɛ bɔ ni ohiɛ baasɔ shweshweeshwe shihilɛhe nɛɛ he oha!

² Wɔyɛ jaramɔ bei ni tamɔ ahum ni miitswa lɛ amli. Shihilɛi ni yɔɔ je lɛ mli lɛ amli miiwo wu. Shi teemɔhe ko ni yɔɔ shweshweeshwe ni ji abobaahe ni baanyɛ abu wɔhe kɛjɛ efɔŋ ni yɔɔ daa lɛ he lɛ yɛ. Mɛni ji abobaahe nɛɛ? Kadimɔ nɔ ni Biblia lɛ tsɔɔ: “Makɛɛ Yehowa akɛ: Mibobaahe kɛ mimɔɔ jio, mi-Nyɔŋmɔ hu ní mihiɛ kã enɔ!”​—Lala 91:2.

 3. Mɛɛ gbɛ nɔ wɔɔtsɔ wɔkɛ Yehowa afee wɔbobaahe?

³ Susumɔ he okwɛ! Yehowa ni ji Bɔlɔ kɛ jeŋ muu fɛɛ Maŋtsɛ lɛ baanyɛ afee abobaahe ni baabu wɔhe. Ebaanyɛ eha wɔfee shweshweeshwe, ejaakɛ eyɛ hewalɛ fe mɔ fɛɛ mɔ loo nɔ fɛɛ nɔ ni baanyɛ aye wɔ awui. Ni kɛji aye wɔ awui tete po lɛ, Yehowa baanyɛ ajie hewalɛ fɔŋ ni enɛ baaná yɛ wɔnɔ lɛ kɛya. Mɛɛ gbɛ nɔ wɔɔtsɔ wɔkɛ Yehowa afee wɔbobaahe? Esa akɛ wɔná hekɛnɔfɔɔ yɛ emli. Kɛfata he lɛ, Nyɔŋmɔ Wiemɔ lɛ woɔ wɔ hewalɛ akɛ: “Nyɛtoa nyɛhe yɛ Nyɔŋmɔ suɔmɔ lɛ mli.” (Yuda 21) Hɛɛ, esa akɛ wɔhi Nyɔŋmɔ suɔmɔ lɛ mli, ni wɔhiɛ suɔmɔ tsakpaa ni kã wɔkɛ wɔŋwɛi Tsɛ lɛ teŋ lɛ mli. Kɛkɛ lɛ wɔbaanyɛ wɔná nɔmimaa akɛ eji wɔbobaahe. Shi te wɔɔfee tɛŋŋ wɔná wɔkɛ lɛ teŋ tsakpaa ni tamɔ nɛkɛ?

4, 5. Mɛni ji gbɛ̀i komɛi anɔ ni Yehowa etsɔ ejie esuɔmɔ kpo etsɔɔ wɔ?

⁴ Bɔni afee ni wɔhi Nyɔŋmɔ suɔmɔ lɛ mli lɛ, esa akɛ wɔyɔse bɔ ni Yehowa jieɔ esuɔmɔ lɛ kpo ehaa wɔ lɛ. Susumɔ Biblia mli tsɔɔmɔi ni wolo nɛɛ eye ebua bo ni okase lɛ ahe okwɛ. Ákɛ Bɔlɔ lɛ, Yehowa kɛ shikpɔŋ lɛ eha wɔ akɛ wɔshia ni yɔɔ fɛo. Ekɛ niyenii kɛ nu babaoo, adebɔɔ mli nibii, kooloi ni he yɔɔ miishɛɛ, kɛ nibii fɛfɛji ewo mli obɔ. Ákɛ Biblia lɛ ŋmalɔ lɛ, Nyɔŋmɔ ejie egbɛi kɛ esui lɛ akpo etsɔɔ wɔ faŋŋ. Kɛfata he lɛ, e-Wiemɔ lɛ haa aleɔ akɛ etsu esuɔmɔ Bi lɛ kɛba shikpɔŋ lɛ nɔ, ni eŋmɛ gbɛ ni Yesu na amanehulu ni egbo kɛha wɔ. (Yohane 3:16) Ni mɛni ji nɔ ni nakai nikeenii lɛ tsɔɔ kɛha wɔ? Ehaa wɔ hiɛnɔkamɔ kɛha wɔsɛɛ be ni yɔɔ miishɛɛ.

⁵ Wɔ wɔsɛɛ be he hiɛnɔkamɔ lɛ damɔ nɔ kroko hu ni Nyɔŋmɔ efee lɛ nɔ. Yehowa eto ŋwɛi nɔyeli ko shishi ema shi, no ji Mesia Maŋtsɛyeli lɛ. Etsɛŋ ni ekɛ piŋmɔi fɛɛ baaba naagbee, ni ebaafee shikpɔŋ lɛ paradeiso. Bo lɛ susumɔ he okwɛ! Wɔbaanyɛ wɔhi shi yɛ toiŋjɔlɛ kɛ miishɛɛ mli yɛ jɛmɛ kɛya naanɔ. (Lala 37:29) Shi dani nakai be lɛ aaashɛ lɛ, Nyɔŋmɔ kɛ gbɛtsɔɔmɔ ni tsɔɔ bɔ ni wɔɔfee wɔhi shi yɛ gbɛ kpakpa nɔ lɛ eha wɔ amrɔ nɛɛ. Ekɛ nikeenii ni ji sɔlemɔ hu eduro wɔ, ní wɔtsɔ no nɔ wɔkɛ lɛ agba sane daa. Gbɛ̀i ni Yehowa etsɔ nɔ ejie suɔmɔ kpo etsɔɔ adesai fɛɛ kɛ bo diɛŋtsɛ hu lɛ ateŋ fioo komɛi kɛkɛ nɛ.

 6. Mɛɛ gbɛ nɔ obaanyɛ otsɔ ofee onii yɛ suɔmɔ ni Yehowa ejie lɛ kpo etsɔɔ bo lɛ he?

⁶ Sane ni he hiaa ni sa akɛ osusu he ji akɛ: Te mafee minii yɛ Yehowa suɔmɔ lɛ he maha tɛŋŋ? Mɛi pii baakɛɛ akɛ, “Ojogbaŋŋ, ehe miihia ni mi hu masumɔ Yehowa.” Ani nakai ji bɔ ni onuɔ he? Yesu kɛɛ akɛ enɛ ji kitai lɛ ateŋ ewulu fe fɛɛ: “Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” (Mateo 22:37) Ekã shi faŋŋ akɛ oyɛ yiŋtoi babaoo ni ooodamɔ nɔ osumɔ Yehowa Nyɔŋmɔ. Shi ani bɔ ni onuɔ he akɛ oyɛ suɔmɔ ni tamɔ nɛkɛ lɛ pɛ ji nɔ ni esa akɛ ofee kɛtsɔɔ akɛ okɛ otsui muu fɛɛ, osusuma muu fɛɛ, kɛ ojwɛŋmɔ muu fɛɛ miisumɔ Yehowa?

 7. Ani suɔmɔ ni aaaná aha Nyɔŋmɔ lɛ biɔ babaoo fe henumɔ folo kɛkɛ ni aaaná aha lɛ? Tsɔɔmɔ mli.

⁷ Taakɛ Biblia lɛ tsɔɔ lɛ, suɔmɔ ni aaaná aha Nyɔŋmɔ lɛ fe henumɔ folo ko kɛkɛ. Yɛ anɔkwale mli lɛ, eyɛ mli akɛ suɔmɔ henumɔi ni aaaná aha Yehowa lɛ he miihia moŋ, shi nakai henumɔi lɛ ji suɔmɔ diɛŋtsɛ ni ayɔɔ kɛha lɛ lɛ shishijee nɔ̃ kɛkɛ. Apple wú he miihia koni anyɛ aná apple tso ni woɔ yibii. Shi kɛ́ ootao apple, ni mɔ ko kɛ ewú lɛ eko kɛkɛ ha bo lɛ, ani otsui baanyɔ omli? Dabi kwraa! Nakai nɔŋŋ suɔmɔ henumɔi ni aaaná aha Yehowa Nyɔŋmɔ lɛ ji shishijee nɔ ko kɛkɛ. Biblia lɛ tsɔɔ akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.” (1 Yohane 5:3) Kɛ́ suɔmɔ ni ayɔɔ kɛha Nyɔŋmɔ lɛ aaafee nɔ ni sa lɛ, no lɛ esa akɛ efee nɔ ni woɔ yibii. Esa ákɛ akɛ nifeemɔ ajie lɛ kpo atsɔɔ.​—Mateo 7:16-20.

8, 9. Mɛɛ gbɛ nɔ wɔbaanyɛ wɔtsɔ wɔjie suɔmɔ kɛ hiɛsɔɔ ni wɔyɔɔ kɛha Nyɔŋmɔ lɛ kpo wɔtsɔɔ?

⁸ Kɛji akɛ wɔye Nyɔŋmɔ kitai lɛ anɔ ni wɔkɛ eshishitoo mlai lɛ tsu nii lɛ, wɔkɛ no tsɔɔ akɛ wɔsumɔɔ lɛ. Enɛ feemɔ waaa. Yɛ nɔ najiaŋ ni Yehowa mlai lɛ aaafee jatsu lɛ, ato he gbɛjianɔ koni eye ebua wɔ ní wɔnyɛ wɔná shihilɛ kpakpa ni yɔɔ miishɛɛ, ni haa mɔ tsui nyɔɔ emli. (Yesaia 48:17, 18) Kɛji akɛ wɔhi shi yɛ Yehowa gbɛtsɔɔmɔ lɛ kɛ gbeekpamɔ naa lɛ, wɔhaa wɔŋwɛi Tsɛ lɛ naa akɛ wɔhiɛ sɔɔ nibii fɛɛ ni efee eha wɔ lɛ lɛɛlɛŋ. Dɔlɛ sane ji akɛ, ŋmɛnɛ lɛ mɛi fioo ko pɛ jieɔ hiɛsɔɔ ni tamɔ nɛkɛ kpo amɛtsɔɔ. Esaaa akɛ wɔfeɔ wɔhe mɛi ni hiɛ esɔɔɔ nii, taakɛ mɛi komɛi fee beni Yesu yɔɔ shikpɔŋ lɛ nɔ lɛ. Yesu tsá kpitiyelɔi nyɔŋma, shi amɛteŋ mɔ kome pɛ ba ni ebada lɛ shi. (Luka 17:12-17) Eka shi faŋŋ akɛ wɔbaasumɔ ni wɔtamɔ mɔ ni jie hiɛsɔɔ kpo lɛ, shi jeee mɛi nɛɛhu ni hiɛ esɔɔɔ nii lɛ!

⁹ Shi mɛni ji Yehowa kitai ni esa akɛ wɔye nɔ lɛ? Wɔsusu babaoo he yɛ wolo nɛɛ mli, shi ha wɔti fioo komɛi amli wɔkwɛ. Nyɔŋmɔ kitai lɛ anɔ ni wɔɔye lɛ baaye abua wɔ koni wɔhi Nyɔŋmɔ suɔmɔ lɛ mli.

10. Tsɔɔmɔ nɔ hewɔ ni ehe hiaa ni aya nɔ aná Yehowa Nyɔŋmɔ he nilee lɛ mli.

¹⁰ Yehowa he nii ni aaakase lɛ ji nifeemɔ ko ni he hiaa ni haa atsiɔ abɛŋkɛɔ lɛ. Eji nifeemɔ ko ni esa akɛ eya nɔ daa. Kɛji akɛ oyɛ agbonaa gbɛkɛ ko ni fɛ̃i miiye ni oowere la lɛ, ani obaaha la lɛ naa aba shi koni egbo? Dabi. Obaaya nɔ okɛ lai awo mli koni la lɛ aya nɔ atso koni enaa awa waa. Ekolɛ owala damɔ la lɛ ni oooha eya nɔ etso waa lɛ nɔ! Taakɛ lai haa la tsoɔ lɛ, nakai nɔŋŋ “Nyɔŋmɔ he nilee” haa suɔmɔ ni wɔyɔɔ kɛha Yehowa lɛ yaa nɔ emli waa.​—Abɛi 2:1-5.

11. Mɛɛ hewalɛ Yesu nitsɔɔmɔ lɛ ná yɛ esɛɛnyiɛlɔi lɛ anɔ?

¹¹ Yesu miisumɔ ni esɛɛnyiɛlɔi lɛ aya nɔ amɛha suɔmɔ ni amɛyɔɔ kɛha Yehowa kɛ Enɔkwa Wiemɔ ni jara wa lɛ aya hiɛ ni emli awa. Yɛ Yesu shitee lɛ sɛɛ lɛ, etsɔɔ ekaselɔi lɛ ateŋ mɛi enyɔ Hebri Ŋmalɛi lɛ amli gbalɛi komɛi ni ba mli yɛ egbɛfaŋ lɛ mli. Mɛɛ hewalɛ enɛ ná yɛ amɛnɔ? Sɛɛ mli lɛ amɛkɛɛ akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ ni etsɔɔ wɔ ŋmalɛi lɛ anaa lɛ?”​—Luka 24:32.

12, 13. (a) Mɛni eba suɔmɔ ni adesai babaoo ni yɔɔ ŋmɛnɛ lɛ yɔɔ kɛha Nyɔŋmɔ kɛ Biblia lɛ nɔ? (b) Mɛni wɔbaanyɛ wɔfee koni wɔsuɔmɔ lɛ he akajɔ?

¹² Beni okase nɔ diɛŋtsɛ ni Biblia lɛ tsɔɔ lɛ klɛŋklɛŋ kwraa lɛ, ani omli fili bo, ni oná ekãa kɛ suɔmɔ kɛha Nyɔŋmɔ? Ŋwanejee ko bɛ he akɛ nakai eba lɛ. Mɛi babaoo enu he nakai nɔŋŋ. Nɔ ni wa yɛ enɛ mli ji ní aaaya nɔ aha nakai suɔmɔ lɛ ahi shi ni emli awa hu. Wɔsumɔŋ akɛ wɔnyiɛ ŋmɛnɛŋmɛnɛ je lɛ nifeemɔ lɛ sɛɛ. Yesu gba akɛ: “Mɛi pii asuɔmɔ lɛ he aaajɔ.” (Mateo 24:12) Mɛni obaanyɛ ofee koni suɔmɔ ni oyɔɔ kɛha Yehowa kɛ Biblia mli anɔkwalei lɛ he akajɔ?

¹³ Yaa nɔ oná Yehowa Nyɔŋmɔ kɛ Yesu Kristo he nilee. (Yohane 17:3) Susumɔ nɔ ni okaseɔ yɛ Nyɔŋmɔ Wiemɔ lɛ mli lɛ he jogbaŋŋ kɛtsɔ saji nɛɛ ni ooobi ohe lɛ nɔ: ‘Mɛni enɛ tsɔɔ mi yɛ Yehowa Nyɔŋmɔ he? Mɛɛ yiŋtoi kroko enɛ kɛhaa mi koni masumɔ lɛ kɛ mitsui muu fɛɛ, mijwɛŋmɔ muu fɛɛ, kɛ misusuma muu fɛɛ?’ (1 Timoteo 4:15) Niianɔjwɛŋmɔ ni tamɔ nɛkɛ baaha suɔmɔ ni oyɔɔ kɛha Yehowa lɛ aya nɔ emli awa.

14. Mɛɛ gbɛ nɔ sɔlemɔ baanyɛ aye abua wɔ koni wɔha suɔmɔ ni wɔyɔɔ kɛha Yehowa lɛ akã he ahi shi?

¹⁴ Gbɛ kroko ni oootsɔ nɔ oha suɔmɔ ni oyɔɔ kɛha Yehowa lɛ akã he emli awa lɛ ji ni osɔle daa. (1 Tesalonikabii 5:17) Wɔkase yɛ wolo nɛɛ Yitso 17 lɛ mli akɛ, sɔlemɔ ji nikeenii ko ni jara wa ni jɛ Nyɔŋmɔ ŋɔɔ. Taakɛ bɔ ni sane ni adesai jɛɔ amɛtsuiiaŋ amɛgbaa daa lɛ haa amɛteŋ wekukpãai amli waa lɛ, nakai nɔŋŋ kɛji akɛ wɔsɔle wɔha Yehowa daa lɛ, ehaa wɔkɛ lɛ teŋ wekukpãa lɛ feɔ nɔ ni yɔɔ miishɛɛ ni yaa nɔ ehiɔ shi daa. Ehe miihia ni wɔkwɛ koni wɔkaha wɔsɔlemɔi bafee nɔ ko kɛkɛ ni afeɔ​—wiemɔi komɛi kɛkɛ ni wɔtiɔ mli wɔkɛɔ shii abɔ ni henumɔ ko loo shishinumɔ bɛ mli. Esa akɛ wɔkɛ Yehowa awie taakɛ gbekɛ ko kɛ etsɛ ni yɔɔ suɔmɔ baawie lɛ pɛpɛɛpɛ. Esa akɛ wɔkɛ bulɛ awie moŋ, shi esa akɛ wɔfee nakai yɛ heyeli kɛ anɔkwayeli mli, ní ejɛ wɔtsui mli hu. (Lala 62:9) Hɛɛ, mɔ diɛŋtsɛ Biblia kasemɔ kɛ sɔlemɔ ni jɛ tsui lɛ mli lɛ ji wɔjamɔ lɛ fãi komɛi ni he hiaa waa, ni amɛyeɔ amɛbuaa wɔ koni wɔkã he wɔhi Nyɔŋmɔ suɔmɔ lɛ mli.

15, 16. Mɛni hewɔ wɔbaanyɛ wɔbu Maŋtsɛyeli shiɛmɔ nitsumɔ lɛ yɛ gbɛ ni ja nɔ akɛ eji hegbɛ kɛ jwetri lɛ?

¹⁵ Mɔ diɛŋtsɛ Biblia kasemɔ kɛ sɔlemɔ ji jamɔ nifeemɔi ni ekolɛ wɔbaafee yɛ teemɔŋ. Shi agbɛnɛ ha wɔsusu jamɔ lɛ fã ko ni atsuɔ he nii yɛ faŋŋ mli lɛ he: mɛi krokomɛi ni wɔɔgba amɛ wɔhemɔkɛyelii lɛ ahe sane. Ani okɛ mɛi krokomɛi egba Biblia mli anɔkwalei komɛi ahe sane momo? Kɛ́ nakai ni lɛ, belɛ oná hegbɛ ko ni nɔ bɛ mli ŋɔɔmɔ. (Luka 1:74) Kɛji akɛ wɔgba mɛi krokomɛi anɔkwalei ni wɔkase yɛ Yehowa Nyɔŋmɔ he lɛ, belɛ wɔmiitsu nitsumɔ ko ni he hiaa waa ni akɛha anɔkwa Kristofoi fɛɛ akɛ amɛtsu lɛ he nii, ni no ji Nyɔŋmɔ Maŋtsɛyeli lɛ he sanekpakpa lɛ ni aaashiɛ lɛ.​—Mateo 24:14; 28:19, 20.

¹⁶ Bɔfo Paulo bu esɔɔmɔ nitsumɔ lɛ akɛ nɔ ko ni jara wa, ni etsɛ lɛ akɛ jwetri. (2 Korintobii 4:7) Yehowa Nyɔŋmɔ kɛ eyiŋtoi lɛ ahe sane ni okɛ mɛi aaawie lɛ ji nitsumɔ ni hi fee fɛɛ ni obaanyɛ otsu. Eji sɔɔmɔ ni akɛhaa Nuŋtsɔ ni fe nuŋtsɔmɛi fɛɛ lɛ, ni ekɛ sɛɛnamɔi ni nɔ bɛ baa. Ohe ni okɛwoɔ shiɛmɔ nitsumɔ nɛɛ mli lɛ haa oyeɔ obuaa mɛi ni hiɛ tsui kpakpa lɛ koni amɛtsi amɛbɛŋkɛ wɔŋwɛi Tsɛ lɛ, ní amɛje shishi amɛnyiɛ naanɔ wala gbɛ lɛ nɔ! Mɛɛ nitsumɔ haa mɔ tsui nyɔɔ emli fe enɛ? Kɛfata he lɛ, Yehowa kɛ e-Wiemɔ lɛ he odase ni oyeɔ lɛ haa ohemɔkɛyeli yaa hiɛ ni ewoɔ suɔmɔ ni oyɔɔ kɛha lɛ lɛ mli hewalɛ. Ni Yehowa hiɛ sɔɔ omɔdɛŋbɔɔ lɛ. (Hebribii 6:10) Hiɛdɔɔ ni okɛaaya nɔ otsu enɛ jogbaŋŋ lɛ baaye abua bo ní ohi Nyɔŋmɔ suɔmɔ lɛ mli.​—1 Korintobii 15:58.

17. Mɛni hewɔ Kristofoi ashiɛmɔ nitsumɔ lɛ he hiaa waa ŋmɛnɛ lɛ?

¹⁷ Ehe miihia ni wɔkai akɛ Maŋtsɛyeli shiɛmɔ nitsumɔ lɛ he miihia waa. Biblia lɛ kɛɛ akɛ: “Shiɛmɔ wiemɔ lɛ, kã he.” (2 Timoteo 4:2) Mɛni hewɔ enɛ feemɔ he hiaa waa ŋmɛnɛ lɛ? Nyɔŋmɔ Wiemɔ lɛ kɛɔ wɔ akɛ: “Yehowa gbi wulu lɛ ebɛŋkɛ, ebɛŋkɛ, ni eeye oyai naakpa.” (Zefania 1:14) Hɛɛ, be ni Yehowa kɛ nibii agbɛjianɔtoo nɛɛ fɛɛ baaba enaagbee lɛ miibɛŋkɛ oyayaayai. Esa akɛ abɔ gbɔmɛi kɔkɔ! Esa akɛ amɛle akɛ amrɔ nɛɛ ji be ni esa akɛ amɛhala Yehowa akɛ amɛ-Nɔyelɔ. Naagbee lɛ “ekpeŋ sɛɛ.”​—Habakuk 2:3.

18. Mɛni hewɔ esa akɛ wɔkɛ anɔkwa Kristofoi afee ekome kɛjá Yehowa yɛ faŋŋ mli lɛ?

¹⁸ Yehowa miisumɔ ni wɔkɛ anɔkwa Kristofoi ábɔ kɛsɔmɔ lɛ yɛ faŋŋ mli. No hewɔ ni e-Wiemɔ lɛ kɛɔ akɛ: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Hebribii 10:24, 25) Kɛ́ wɔkɛ nanemɛi heyelilɔi bua wɔhe naa yɛ Kristofoi akpeei ashishi lɛ, wɔnáa hegbɛ kpele kɛjieɔ wɔ-Nyɔŋmɔ ni wɔsumɔɔ lɛ lɛ yi koni wɔjá lɛ. Wɔkɛtswaa wɔhe hu wɔmaa shi, ni wɔwoɔ wɔhe hewalɛ.

19. Mɛɛ gbɛ nɔ wɔbaanyɛ wɔtsɔ wɔwaje suɔmɔ wekukpãa ni yɔɔ Kristofoi asafo lɛ mli lɛ?

¹⁹ Be mli ni wɔkɛ Yehowa jálɔi krokomɛi bɔɔ lɛ, ehaa wɔwajeɔ suɔmɔ kɛ naanyobɔɔ wekukpãa ni yɔɔ asafo lɛ mli lɛ. Ehe miihia ni wɔgbala wɔjwɛŋmɔ kɛya sui kpakpai ni yɔɔ mɛi krokomɛi amli lɛ anɔ, taakɛ bɔ ni Yehowa gbalaa ejwɛŋmɔ kɛyaa nɔ̃ kpakpa ni yɔɔ wɔmli lɛ nɔ lɛ. Kaakpa emuuyeli gbɛ kɛmiijɛ onanemɛi heyelilɔi adɛŋ. Kaimɔ akɛ esoro he ni mɔ fɛɛ mɔ eda yɛ mumɔŋ kɛyashɛ, ni ákɛ wɔteŋ mɔ fɛɛ mɔ tɔ̃ɔ. (Kolosebii 3:13) Taomɔ hegbɛ koni okɛtswa naanyobɔɔ ni mli wa waa yɛ okɛ mɛi ni sumɔɔ Yehowa waa lɛ ateŋ, ni obaana akɛ obaada yɛ mumɔŋ. Hɛɛ, omumɔŋ nyɛmimɛi hii kɛ yei lɛ ni okɛaafee ekome kɛjá Yehowa lɛ baaye abua bo koni ohi Nyɔŋmɔ suɔmɔ lɛ mli. Mɛɛ gbɛ nɔ Yehowa jɔ́ɔ mɛi ni jáa lɛ yɛ anɔkwayeli mli ni no haa amɛhiɔ esuɔmɔ lɛ mli lɛ?

20, 21. Mɛni ji ‘wala diɛŋtsɛ lɛ,’ ni mɛni hewɔ eji hiɛnɔkamɔ ni hi jogbaŋŋ lɛ?

²⁰ Yehowa kɛ wala keɔ etsuji anɔkwafoi lɛ, shi mɛɛ wala nɛkɛ ekɛkeɔ amɛ lɛ? Ojogbaŋŋ, ani amrɔ nɛɛ oyɛ wala mli? Eka shi faŋŋ akɛ wɔteŋ mɛi babaoo baaha hetoo akɛ, hɛɛ. Ejaakɛ kɛ hooo kwraa lɛ, wɔmuɔ, wɔyeɔ nii, ni wɔnuɔ nu. Eka shi faŋŋ akɛ wɔyɛ wala mli. Ni ekolɛ kɛ́ wɔmii shɛ wɔhe jogbaŋŋ lɛ wɔbaakɛɛ akɛ, “Ŋmɛnɛ lɛ wɔmiiye wala diɛŋtsɛ!” Shi Biblia lɛ tsɔɔ mli akɛ, yɛ shishinumɔ ko ni he hiaa naa lɛ, adesa ko bɛ ŋmɛnɛ ni miiye wala diɛŋtsɛ yɛ shihilɛ mli.

²¹ Nyɔŋmɔ Wiemɔ lɛ woɔ wɔ hewalɛ koni ‘wɔmɔ wala diɛŋtsɛ lɛ mli.’ (1 Timoteo 6:19) Nakai wiemɔi lɛ tsɔɔ akɛ ‘wala diɛŋtsɛ lɛ’ ji nɔ ko ni wɔhiɛ kã nɔ akɛ wɔnine baashɛ nɔ yɛ wɔsɛɛ be mli. Hɛɛ, kɛ́ wɔye emuu lɛ, wɔbaahi shi yɛ wiemɔ nɛɛ shishinumɔ diɛŋtsɛ naa, ejaakɛ wɔbaahi shi taakɛ bɔ ni Nyɔŋmɔ to eyiŋ kɛha wɔ akɛ wɔhi shi lɛ. Yɛ wɔsɛɛ be mli kɛji akɛ wɔyɛ paradeiso shikpɔŋ lɛ nɔ, ní wɔyɛ gbɔmɔtsoŋ hewalɛ ni yeɔ emuu, toiŋjɔlɛ, kɛ miishɛɛ lɛ, no mli agbɛnɛ wɔbaaná ‘wala diɛŋtsɛ lɛ’ ni ji naanɔ wala mli ŋɔɔmɔ. (1 Timoteo 6:12) Ani enɛ jeee hiɛnɔkamɔ ni hi jogbaŋŋ?

22. Te ooofee tɛŋŋ ni ‘omɔ wala diɛŋtsɛ lɛ mli’ lɛ?

²² Te wɔɔfee tɛŋŋ ‘wɔmɔ wala diɛŋtsɛ lɛ mli’ lɛ? Paulo wo Kristofoi hewalɛ yɛ kuku ni tsɔ nakai kuku lɛ hiɛ lɛ mli “ni amɛfee ejurɔ,” ‘ni amɛtsɔmɔ niiatsɛmɛi yɛ nitsumɔi kpakpai agbɛfaŋ.’ (1 Timoteo 6:18) Belɛ, eyɛ faŋŋ akɛ babaoo damɔ bɔ ni wɔkɛ anɔkwalei ni wɔkase yɛ Biblia lɛ mli lɛ tsuɔ nii wɔhaa lɛ nɔ. Shi ani Paulo miitsɔɔ akɛ wɔnitsumɔi kpakpai lɛ ji nɔ ni haa wɔnine shɛɔ ‘wala diɛŋtsɛ lɛ’ nɔ? Dabi, ejaakɛ gbɛkpamɔi ni yɔɔ miishɛɛ nɛɛ damɔ Nyɔŋmɔ “duromɔ” lɛ ni wɔnine aaashɛ nɔ diɛŋtsɛ lɛ nɔ. (Romabii 5:15) Shi kɛlɛ, Yehowa náa he miishɛɛ akɛ eeeke mɛi ni sɔmɔɔ lɛ yɛ anɔkwayeli mli lɛ nii. Eesumɔ ni ena akɛ oohi shi yɛ ‘wala diɛŋtsɛ lɛ’ mli. Mɛi ni hiɔ Nyɔŋmɔ suɔmɔ lɛ mli lɛ baaná naanɔ wala shihilɛ ni tamɔ nɛkɛ ni miishɛɛ kɛ toiŋjɔlɛ yɔɔ mli.

23. Mɛni hewɔ ehe hiaa akɛ ahi Nyɔŋmɔ suɔmɔ lɛ mli lɛ?

²³ Esa akɛ wɔteŋ mɔ fɛɛ mɔ abi ehe akɛ, ‘Ani miijá Nyɔŋmɔ yɛ gbɛ ni etsɔɔ yɛ Biblia lɛ mli akɛ atsɔ nɔ ajá lɛ lɛ nɔ?’ Kɛ́ wɔka wɔhe wɔkwɛ daa gbi ni wɔna akɛ wɔmiifee nakai lɛ, belɛ no tsɔɔ akɛ wɔnyiɛ gbɛ ni ja lɛ nɔ. Wɔbaanyɛ wɔná nɔmimaa akɛ Yehowa ji wɔbobaahe. Ebaabaa etsuji anɔkwafoi lɛ ayi shweshweeshwe kɛfo nibii agbɛjianɔtoo momo nɛɛ naagbee gbii ni haomɔi yɔɔ mli nɛɛ. Yehowa baabaa wɔyi hu kɛbote nibii agbɛjianɔtoo hee ni yɔɔ nyam ni ebɛŋkɛ amrɔ nɛɛ lɛ mli. Kwɛ bɔ ni wɔbaaná miishɛɛ kɛ́ wɔna nakai be lɛ! Ni kwɛ bɔ ni wɔmii baashɛ wɔhe aha akɛ wɔfee nihalamɔ ni ja lɛ yɛ naagbee gbii nɛɛ amli! Kɛ́ ohala nii ni tamɔ nakai amrɔ nɛɛ lɛ, obaaná ‘wala diɛŋtsɛ lɛ’ ni ji bɔ ni Yehowa Nyɔŋmɔ to eyiŋ akɛ wala aji aha lɛ mli ŋɔɔmɔ kɛya naanɔi anaanɔ!