Ani ‘Obaaya nɔ Obu’?

1, 2. (a) Mɛni Yesu wie yɛ naagbee gbii lɛ ahe? (b) Mɛɛ sanebimɔi ahe wɔbaasusu?

FEEMƆ Yesu he mfoniri ni eta Oliv Gɔŋ lɛ nɔ yɛ Yerusalem, ni eekwɛ sɔlemɔwe lɛ. Ebɔfoi ejwɛ: Petro, Andrea, Yakobo, kɛ Yohane, fata ehe. Yesu miigba amɛ nibii ni baaba wɔsɛɛ, ni amɛmiibo lɛ toi jogbaŋŋ. Eegba amɛ nibii ni baaba yɛ jeŋ fɔŋ nɛɛ naagbee gbii lɛ amli, be ni ebɔi nɔyeli akɛ Nyɔŋmɔ Maŋtsɛyeli lɛ nɔ maŋtsɛ lɛ. Yesu hã amɛle akɛ, yɛ nɛkɛ be ni sa kadimɔ nɛɛ mli lɛ, “nyɔŋ anɔkwafo kɛ hiɛshikalɔ” lɛ baadamɔ enajiaŋ yɛ shikpɔŋ lɛ nɔ, ni nyɔŋ nɛɛ baahã esɛɛnyiɛlɔi lɛ mumɔŋ niyenii yɛ be ni sa mli.​—Mateo 24:45-47.

² No sɛɛ lɛ, Yesu gba amɛ abɛbua ni kɔɔ oblayei froi nyɔŋma lɛ ahe lɛ. (Kanemɔ Mateo 25:1-13.) Yɛ nikasemɔ nɛɛ mli lɛ, wɔbaasusu sanebimɔi ni nyiɛ sɛɛ nɛɛ ahe: (1) Mɛni ji oti ni yɔɔ nakai abɛbua lɛ mli? (2) Mɛɛ gbɛ nɔ anɔkwafoi ni afɔ amɛ mu lɛ kɛ ŋaawoo ni yɔɔ mli lɛ etsu nii, ni mɛni ejɛ mli kɛba? (3) Mɛɛ gbɛ nɔ wɔteŋ mɔ fɛɛ mɔ baanyɛ aná Yesu abɛbua nɛɛ he sɛɛ ŋmɛnɛ?

 3. Tsutsu ko lɛ, te agbalaa abɛbua ni kɔɔ oblayei froi nyɔŋma lɛ ahe lɛ mli tɛŋŋ? Ni mɛni ejɛ mli kɛba?

³ Yɛ nikasemɔ ni tsɔ hiɛ lɛ mli lɛ, wɔkase akɛ, yɛ afii fioo ni eho nɛɛ amli lɛ, nyɔŋ anɔkwafo lɛ etsake bɔ ni egbalaa Biblia lɛ mli saji amli ehãa lɛ. Amrɔ nɛɛ, yɛ nɔ najiaŋ ni nyɔŋ anɔkwafo lɛ baagbala jwɛŋmɔ kɛya nɔ ni nibii ni atsĩtsĩi tã yɛ saji nɛɛ amli lɛ feɔ he mfoniri lɛ nɔ lɛ, egbalaa jwɛŋmɔ kɛyaa nɔ ni wɔbaanyɛ wɔkase yɛ mli lɛ moŋ nɔ. Akɛ nɔkwɛmɔnɔ lɛ, susumɔ Yesu abɛbua ni kɔɔ oblayei froi nyɔŋma lɛ ahe lɛ he okwɛ. Tsutsu ko lɛ, awieɔ yɛ wɔwoji lɛ amli akɛ, kanei lɛ, mu lɛ, kɛ tɔi lɛ fɛɛ feɔ nibii komɛi ahe mfoniri. Eeenyɛ efee akɛ enɛ hewɔ lɛ, mɛi ajwɛŋmɔ eyaaa oti ni he hiaa waa ni shishinumɔ waaa ni yɔɔ abɛbua nɛɛ mli lɛ nɔ. Oti ni yɔɔ abɛbua nɛɛ mli lɛ sa kadimɔ.

 4. (a) Yɛ abɛbua lɛ mli lɛ, namɔ ji ayemforo wu lɛ? Ni te wɔfeɔ tɛŋŋ wɔleɔ? (b) Namɛi ji oblayei froi lɛ? Ni te wɔfeɔ tɛŋŋ wɔleɔ?

⁴ Nyɛhãa wɔsusua oti ni yɔɔ Yesu abɛbua nɛɛ mli lɛ he. Klɛŋklɛŋ kwraa lɛ, susumɔ mɛi ni awie amɛhe yɛ abɛbua lɛ mli lɛ ahe okwɛ. Namɔ ji ayemforo wu lɛ? Lɛ ji Yesu. Wɔle enɛ ejaakɛ be ko lɛ Yesu tsɛ ehe ayemforo wu lɛ. (Luka 5:34, 35) Namɛi ji oblayei froi lɛ? Amɛji “tooku bibioo” lɛ, ni ji Kristofoi ni afɔ amɛ mu lɛ. Te wɔfeɔ tɛŋŋ wɔleɔ enɛ? Yɛ abɛbua lɛ mli lɛ, esa akɛ be ni ayemforo wu lɛ baaba lɛ, oblayei froi lɛ esu amɛkanei lɛ, ni amɛfee klalo kɛmiimɛ lɛ. Agbɛnɛ kadimɔ nɔ ni Yesu kɛɛ esɛɛnyiɛlɔi ni afɔ amɛ mu lɛ. Ekɛɛ amɛ akɛ: “Nyɛwoa nyɛtadei ni nyɛfea klalo ni nyɛhãa nyɛkanei lɛ hu atsoa, ni nyɛ diɛŋtsɛ hu nyɛfea tamɔ mɛi ni miimɛ koni amɛnuŋtsɔ ajɛ yookpeemɔ aba.” (Luka 12:32, 35, 36) Bɔfo Paulo hu kɛ Kristo sɛɛnyiɛlɔi ni afɔ amɛ mu lɛ to oblayei froi ahe. (2 Korintobii 11:2) No hewɔ lɛ, eyɛ faŋŋ akɛ sane ni yɔɔ Mateo 25:1-13 lɛ, ji ŋaawoo kɛ kɔkɔbɔɔ kɛhã Yesu sɛɛnyiɛlɔi ni afɔ amɛ mu lɛ.

 5. Mɛɛ be he abɛbua lɛ kɔɔ? Ni mɛni Yesu wie ni hãa wɔnaa nakai?

⁵ Agbɛnɛ, mɛɛ be he abɛbua lɛ kɔɔ? Nɔ ko ni Yesu wie yɛ abɛbua lɛ naagbee gbɛ lɛ hãa wɔnaa be ni ji. Ewie akɛ: “Ayemforo wu lɛ ba.” (Mateo 25:10) Yɛ July 15, 2013, Buu-Mɔɔ lɛ mli lɛ, wɔkase akɛ yɛ Yesu gbalɛ ni yɔɔ Mateo yitso 24 kɛ 25 lɛ mli lɛ, ewie ‘ebaa’ lɛ he shii kpaanyɔ. Be ni Yesu tsĩ ‘ebaa’ lɛ tã lɛ, no mli lɛ eewie be ni ebaaba yɛ amanehulu kpeteŋkpele lɛ mli, ní ebakojo jeŋ fɔŋ nɛɛ ní ekpata hiɛ lɛ he. No hewɔ lɛ, wɔbaanyɛ wɔmu sane naa akɛ, Yesu abɛbua lɛ kɔɔ naagbee gbii lɛ ahe, shi efã ni kɔɔ ayemforo wu lɛ baa lɛ he lɛ kɔɔ be ni Yesu ‘baaba’ yɛ amanehulu kpeteŋkpele lɛ mli lɛ he.

 6. Mɛni ji oti ni yɔɔ abɛbua lɛ mli?

⁶ Mɛni ji oti ni yɔɔ abɛbua lɛ mli? Ani okaiɔ nɔ ni Yesu wie dani egba abɛbua nɛɛ? Yɛ Mateo yitso 24 lɛ, Yesu wie “nyɔŋ anɔkwafo kɛ hiɛshikalɔ lɛ” he. Nakai nyɔŋ lɛ baafee mɛi ni afɔ amɛ mu lɛ ateŋ hii fioo komɛi ni baatsu nii akɛ kuu kɛnyiɛ Kristo sɛɛnyiɛlɔi lɛ ahiɛ yɛ naagbee gbii lɛ amli. Yesu bɔ hii nɛɛ kɔkɔ akɛ, esa akɛ amɛye anɔkwa be fɛɛ be. Yɛ yitso 25 lɛ mli lɛ, Yesu gba abɛbua ni kɔɔ oblayei froi nyɔŋma lɛ ahe lɛ, koni ekɛwo esɛɛnyiɛlɔi fɛɛ ni afɔ amɛ mu ni baahi shi yɛ naagbee gbii lɛ amli lɛ ŋaa. Oti ni yɔɔ abɛbua lɛ mli ji: esa akɛ ‘amɛya nɔ amɛbu,’ koni juromɔnɔ ni amɛnine baashɛ nɔ yɛ ŋwɛi lɛ akaŋmɛɛ amɛ. (Mateo 25:13) Agbɛnɛ, nyɛhãa wɔpɛia abɛbua lɛ mli, ni wɔkwɛ bɔ ni mɛi ni afɔ amɛ mu lɛ kɛ ŋaa ni awo amɛ yɛ mli lɛ etsu nii amɛhã.

7, 8. (a) Mɛni hewɔ oblayei froi hiɛshikalɔi lɛ nyɛ amɛfee klalo lɛ? (b) Mɛni tsɔɔ akɛ mɛi ni afɔ amɛ mu lɛ esaa amɛhe amɛto Yesu baa lɛ?

⁷ Yɛ abɛbua lɛ mli lɛ, Yesu wie akɛ, be ni ayemforo wu lɛ ba lɛ, no mli lɛ oblayei froi hiɛshikalɔi lɛ efee klalo, shi kwashiai lɛ efeko klalo. Mɛni hewɔ? Ejaakɛ oblayei froi hiɛshikalɔi lɛ saa amɛhe amɛto, ni amɛhã amɛhiɛ hi amɛhe nɔ. Ehe bahia ni oblayei froi nyɔŋma lɛ fɛɛ ahiɛ ahi amɛhe nɔ, ni amɛhã amɛkanei lɛ aya nɔ atso kɛyashi ayemforo wu lɛ baaba. Oblayei froi hiɛshikalɔi lɛ saa amɛhe amɛto ni amɛŋɔ mu amɛfata amɛkanei lɛ ahe, shi kwashiai lɛ efeee nakai. Mɛɛ gbɛ nɔ Kristofoi anɔkwafoi ni afɔ amɛ mu lɛ esaa amɛhe amɛto Yesu baa lɛ?

⁸ Mɛi ni afɔ amɛ mu lɛ esaa amɛhe amɛto koni amɛnyɛ amɛtsu nitsumɔ ni akɛwo amɛdɛŋ lɛ kɛyawula shi, taakɛ oblayei froi hiɛshikalɔi lɛ fee lɛ. Amɛle akɛ, sɔɔmɔ ni amɛsɔmɔɔ Nyɔŋmɔ lɛ hewɔ lɛ, amɛnaŋ ogbɔjɔ shihilɛ yɛ Satan je lɛ mli, shi fɛɛ sɛɛ lɛ, amɛmiisumɔ ni amɛfee nakai. Amɛtswa amɛfai shi akɛ, amɛkɛ anɔkwayeli baasɔmɔ Yehowa, jeee yɛ naagbee lɛ ni ebɛŋkɛ lɛ hewɔ, shi moŋ yɛ suɔmɔ ni amɛyɔɔ kɛhã Yehowa kɛ e-Bi lɛ hewɔ. Amɛyaa nɔ amɛyeɔ anɔkwa, ni amɛhãaa heloonaa nibii asɛɛtiumɔ, jeŋba sha, kɛ bɔ ni mɛi feɔ ŋkomeŋfa yɛ je lɛ mli lɛ aná amɛnɔ hewalɛ. Mɛi ni afɔ amɛ mu lɛ yaa nɔ amɛtsoɔ tamɔ kanei, ni kɛ́ efee tamɔ nɔ ni Ayemforo Wu lɛ sɛɛ miigbala shi po lɛ, amɛbaaya nɔ amɛto amɛtsui shi kɛmɛ lɛ.​—Filipibii 2:15.

 9. (a) Mɛni Yesu wie yɛ abɛbua lɛ mli ni ji kɔkɔbɔɔ kɛhã mɛi ni afɔ amɛ mu lɛ? (b) Mɛɛ gbɛ nɔ mɛi ni afɔ amɛ mu lɛ ehere bolɔmɔ ni abolɔ akɛ: “Naa ayemforo wu lɛ ee ei!” lɛ nɔ? (Kwɛmɔ shishigbɛ niŋmaa lɛ hu.)

⁹ Agbɛnɛ hu, oblayei froi hiɛshikalɔi lɛ nyɛ amɛfee klalo kɛhã ayemforo wu lɛ baa lɛ, ejaakɛ amɛhã amɛhiɛ hi amɛhe nɔ. Kɛ̃lɛ, yɛ abɛbua lɛ mli lɛ, be ni efee tamɔ nɔ ni ayemforo wu lɛ sɛɛ miigbala shi lɛ, “wɔ ye” oblayei froi nyɔŋma lɛ fɛɛ, “ni amɛwɔwɔi.” No hewɔ lɛ, ani ebaanyɛ eba akɛ Kristofoi ni afɔ amɛ mu lɛ ateŋ mɛi komɛi ‘baawɔ,’ ni tsɔɔ akɛ amɛbaahã nɔ ko agbala amɛjwɛŋmɔ be ni amɛmɛɔ Kristo baa lɛ? Hɛɛ. Yesu le akɛ kɛ́ mɔ ko miishwe ebaa lɛ waa po lɛ, ebaanyɛ egbɔjɔ yɛ mumɔŋ, ní ehã nibii krokomɛi agbala ejwɛŋmɔ. No hewɔ lɛ, Kristofoi ni afɔ amɛ mu lɛ etee nɔ amɛbɔ mɔdɛŋ fɛɛ ni amɛaanyɛ koni amɛya nɔ amɛbu. Yɛ mɛɛ gbɛ nɔ? Yɛ abɛbua lɛ mli lɛ, be ni abolɔ akɛ: “Naa ayemforo wu lɛ ee ei!” lɛ, oblayei froi lɛ fɛɛ te shi. Shi hiɛshikalɔi lɛ pɛ tee nɔ amɛhã amɛhiɛ hi amɛhe nɔ. (Mateo 25:5, 6; 26:41) Nakai nɔŋŋ yɛ naagbee gbii nɛɛ amli lɛ, Kristofoi anɔkwafoi ni afɔ amɛ mu lɛ ehere bo ni abo akɛ, “Naa ayemforo wu lɛ ee ei!” lɛ nɔ. Amɛkpɛlɛ odaseyelii ni yɔɔ faŋŋ ni tsɔɔ akɛ Yesu miiba lɛ nɔ, ni amɛfee klalo kɛmiimɛ ebaa lɛ.a (Kwɛmɔ shishigbɛ niŋmaa lɛ.) Shi nɔ ni Yesu wie yɛ abɛbua lɛ naagbee gbɛ lɛ kɔɔ be pɔtɛɛ ko he. Nyɛhãa wɔsusua he wɔkwɛa.

10. Mɛɛ sane wɔbaanyɛ wɔbi yɛ sanegbaa ni tee nɔ yɛ oblayei froi hiɛshikalɔi lɛ kɛ oblayei froi kwashiai lɛ ateŋ lɛ he?

¹⁰ Kɛmiiba abɛbua lɛ naagbee lɛ, oblayei froi kwashiai lɛ bi oblayei froi hiɛshikalɔi lɛ ni amɛhã amɛ mu kɛwo amɛkanei lɛ amli. Shi hiɛshikalɔi lɛ hãaa amɛ. (Kanemɔ Mateo 25:8, 9.) Ani Kristofoi anɔkwafoi ni afɔ amɛ mu lɛ ekpoo akɛ amɛbaaye amɛbua mɔ ko ni ehia lɛ lɛ pɛŋ? Wɔtsɔ hiɛ wɔwie be ni abɛbua lɛ kɔɔ he lɛ he. Wɔna akɛ Yesu, ni ji Ayemforo Wu lɛ, baaba ni ebakojo mɛi be ni eshwɛ fioo ni amanehulu kpeteŋkpele lɛ baaba naagbee. No hewɔ lɛ, eeenyɛ efee akɛ sanegbaa ni tee nɔ yɛ oblayei froi lɛ ateŋ lɛ kɔɔ nɔ ni baaya nɔ be ni eshwɛ fioo ni amanehulu kpeteŋkpele lɛ baaba naagbee lɛ he. Mɛni hewɔ wɔkɛɔ nakai? Wɔkɛɔ nakai, ejaakɛ be ni baashɛ nakai be lɛ, asɔo mɛi ni afɔ amɛ mu lɛ anaa nɔ ni ji naagbee nɔ.

11. (a) Kɛ́ eshwɛ fioo ni amanehulu kpeteŋkpele lɛ baaba lɛ, mɛni baaba? (b) Be ni oblayei froi hiɛshikalɔi lɛ kɛɛ oblayei froi kwashiai lɛ ni amɛyahe mu lɛ eko lɛ, no mli lɛ mɛni amɛtsɔɔ lɛ?

¹¹ No hewɔ lɛ, dani amanehulu kpeteŋkpele lɛ baaje shishi lɛ, no mli lɛ asɔo anɔkwafoi ni afɔ amɛ mu ni yɔɔ shikpɔŋ lɛ nɔ yɛ nakai beiaŋ lɛ fɛɛ anaa nɔ ni ji naagbee nɔ. (Kpojiemɔ 7:1-4) Kɛjɛ nakai beiaŋ kɛyaa lɛ, amɛbaanyɛ amɛná nɔmimaa akɛ bɔ fɛɛ bɔ ni fee lɛ, amɛbaaya ŋwɛi. Shi susumɔ nɔ ni baaba mɛi ni afɔ amɛ mu lɛ ateŋ mɛi ni baakpa buu ni yeŋ anɔkwa yɛ afii ni baatsɔ nakai be lɛ hiɛ lɛ mli lɛ ahe okwɛ. Mɛni baaba amɛnɔ? Asɔoŋ amɛnaa nɔ ni ji naagbee nɔ. No mli lɛ, afɔ Kristofoi anɔkwafoi krokomɛi mu yɛ amɛ najiaŋ. Kɛ́ amanehulu kpeteŋkpele lɛ je shishi, ni kwashiai lɛ na ni aakpata Babilon Kpeteŋkpele lɛ hiɛ lɛ, amɛnaa baakpɛ amɛhe. Ekolɛ nakai beiaŋ dani amɛbaayɔse akɛ amɛfeko klalo kɛhako Yesu baa lɛ. Mɛni baaba yɛ nakai beiaŋ kɛ́ amɛbi ni aye abua amɛ? Abɛbua lɛ hãa hetoo. Oblayei froi hiɛshikalɔi lɛ hãaa oblayei froi kwashiai lɛ mu lɛ eko, shi moŋ amɛkɛɛ amɛ ni amɛyahe eko. Akɛni sane nɛɛ ba “nyɔɔŋteŋ tuuntu” hewɔ lɛ, mɔ ko bɛ ni baahɔ̃ɔ mu lɛ eko ehã amɛ. Ekpe sɛɛ tsɔ!

12. (a) Yɛ amanehulu kpeteŋkpele lɛ mli lɛ, ani anɔkwafoi ni afɔ amɛ mu lɛ baanyɛ aye abua mɛi ni baaŋmɛɛ amɛnɔkwayeli lɛ he dani asɔo amɛnaa nɔ ni ji naagbee nɔ lɛ? Mɛni hewɔ? (b) Mɛni baaba mɛi ni baafee amɛnii tamɔ oblayei froi kwashiai lɛ anɔ?

¹² Yɛ amanehulu kpeteŋkpele lɛ mli lɛ, anɔkwafoi ni afɔ amɛ mu lɛ nyɛŋ amɛye amɛbua mɛi ni yeko Yehowa anɔkwa lɛ. No mli lɛ ekpe sɛɛ tsɔ. No hewɔ lɛ, mɛni baaba mɛi ni yeee anɔkwa lɛ anɔ? Kadimɔ nɔ ni ba oblayei froi kwashiai ni tee akɛ amɛyaahe mu lɛ anɔ: “Ayemforo wu lɛ ba. Oblayei froi ni esaa amɛhe amɛto lɛ kɛ lɛ tee yookpeemɔ okpɔlɔŋmɛɛ lɛ shishi, ni aŋa shinaa lɛ.” Kɛ́ eshwɛ fioo ni amanehulu kpeteŋkpele lɛ baaba naagbee lɛ, Yesu baaba yɛ anunyam mli ní ebabua anɔkwafoi ni afɔ amɛ mu lɛ anaa kɛya ŋwɛi. (Mateo 24:31; 25:10; Yohane 14:1-3; 1 Tesalonikabii 4:17) Shi Yesu baakpoo mɛi ni yeee anɔkwa lɛ. Amɛbaawie taakɛ oblayei froi kwashiai lɛ wie lɛ, akɛ: “Onukpa, Onukpa, gbelemɔ wɔ!” Shi te Yesu baahere nɔ tɛŋŋ? Dɔlɛ sane ji akɛ, nɔ ni ebaakɛɛ amɛ lɛ tamɔ nɔ ni ebaakɛɛ mɛi babaoo ni ebaabu amɛ akɛ abotiai lɛ nɔŋŋ, akɛ: “Lɛɛlɛŋ, miikɛɛ nyɛ akɛ, mileee nyɛ.”​—Mateo 7:21-23; 25:11, 12.

13. (a) Mɛni hewɔ esaaa akɛ wɔmuɔ sane naa akɛ Kristo sɛɛnyiɛlɔi anɔkwafoi lɛ ateŋ mɛi babaoo yeŋ anɔkwa lɛ? (b) Mɛni hewɔ wɔbaanyɛ wɔkɛɛ akɛ Yesu abɛbua lɛ tsɔɔ akɛ eyɛ hiɛkɛnɔfɔɔ yɛ Kristofoi ni afɔ amɛ mu lɛ amli lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

¹³ Ani nɔ ni Yesu wie yɛ abɛbua lɛ mli lɛ tsɔɔ akɛ mɛi ni afɔ amɛ mu lɛ ateŋ mɛi babaoo yeŋ anɔkwa, ni ehe baahia ni akɛ mɛi krokomɛi aye amɛ najiaŋ? Dabi. Yɛ Mateo yitso 24 lɛ, Yesu bɔ nyɔŋ anɔkwafo kɛ hiɛshikalɔ lɛ kɔkɔ ni ekatsɔ nyɔŋ fɔŋ. Enɛ etsɔɔɔ akɛ eekpa gbɛ akɛ nɔ ko nakai baaba. Nakai nɔŋŋ abɛbua ni kɔɔ oblayei froi nyɔŋma lɛ ahe lɛ ji kɔkɔbɔɔ. Oblayei froi lɛ ateŋ mɛi enumɔ ji kwashiai, ni amɛteŋ mɛi enumɔ hu ji hiɛshikalɔi. Ni tsɔɔ akɛ, esa akɛ Kristofoi ni afɔ amɛ mu lɛ ateŋ mɔ fɛɛ mɔ asaa ehe eto, ní ehã ehiɛ ahi ehe nɔ. Kɛjeee nakai lɛ, ebaaŋmɛɛ enɔkwayeli lɛ he, ni ebaatsɔ kwashia. Paulo wie nɔ ko ni tamɔ nakai nɔŋŋ kɛbɔ enyɛmimɛi ni afɔ amɛ mu lɛ kɔkɔ. (Kanemɔ Hebribii 6:4-9; okɛto 5 Mose 30:19 lɛ he.) Ekɔkɔbɔɔ lɛ yɛ tɛ̃ɛ, shi ewiemɔi lɛ tsɔɔ hu akɛ eyɛ nɔmimaa akɛ enyɛmimɛi lɛ anine baashɛ juromɔnɔ lɛ nɔ. Kɔkɔ ni Yesu bɔ mɛi ni afɔ amɛ mu lɛ yɛ abɛbua ni kɔɔ oblayei froi nyɔŋma lɛ ahe lɛ mli lɛ hãa wɔnaa akɛ, eyɛ hiɛkɛnɔfɔɔ ni tamɔ nakai nɔŋŋ yɛ amɛmli. Ele akɛ etsuji ni afɔ amɛ mu lɛ ateŋ mɔ fɛɛ mɔ baanyɛ aye anɔkwa, ní enine ashɛ juromɔnɔ ni nɔ bɛ lɛ nɔ!

14. Mɛni hewɔ “gwantɛŋi krokomɛi” lɛ baanyɛ aná abɛbua ni kɔɔ oblayei froi nyɔŋma lɛ ahe lɛ he sɛɛ lɛ?

¹⁴ Eyɛ mli akɛ Kristofoi ni afɔ amɛ mu lɛ ahewɔ Yesu gba abɛbua nɛɛ moŋ, shi ani “gwantɛŋi krokomɛi” lɛ hu baanyɛ aná he sɛɛ? (Yohane 10:16) Hɛɛ! Oti ni yɔɔ abɛbua lɛ mli lɛ yɛ faŋŋ, no ji: “Nyɛyaa nɔ nyɛbua.” Yesu wie be ko akɛ: “Nɔ ni mikɛɔ nyɛ nɛɛ, mɛi fɛɛ mikɛɔ lɛ: Nyɛyaa nɔ nyɛbua.” (Marko 13:37) Yesu miikpa gbɛ akɛ esɛɛnyiɛlɔi lɛ fɛɛ baasaa amɛhe amɛto ebaa lɛ, ni amɛhã amɛhiɛ ahi amɛhe nɔ. Mɛi ni afɔ amɛ mu lɛ kɛ shiɛmɔ nitsumɔ lɛ yeɔ klɛŋklɛŋ gbɛhe yɛ amɛshihilɛ mli, ni enɛ ji nɔkwɛmɔnɔ kpakpa ni Kristofoi fɛɛ baanyɛ akase. Oblayei froi kwashiai lɛ bi oblayei froi hiɛshikalɔi lɛ ni amɛhã amɛ amɛmu lɛ eko, shi amɛhãaa amɛ. Enɛ kaiɔ wɔ akɛ, esa akɛ wɔ diɛŋtsɛ wɔbɔ mɔdɛŋ akɛ wɔbaaya nɔ wɔye Nyɔŋmɔ anɔkwa, wɔsaa wɔhe wɔto, ní wɔya nɔ wɔbu. Mɔ ko nyɛŋ efee nakai ehã wɔ. Wɔteŋ mɔ fɛɛ mɔ baabu lɛ diɛŋtsɛ ehe akɔntaa ehã Yesu Kristo, ni ji Kojolɔ ni feɔ jalɛ nii lɛ. Etsɛŋ, Yesu baaba. No hewɔ lɛ esa akɛ wɔfee klalo!

15. Mɛni hewɔ Kristofoi fɛɛ yɔɔ yookpeemɔ ni baaya nɔ yɛ Kristo kɛ eyemforo lɛ teŋ lɛ he miishɛɛ lɛ?

¹⁵ Kristofoi fɛɛ yɛ yookpeemɔ ni Yesu tsĩ tã yɛ abɛbua lɛ mli lɛ he miishɛɛ waa. Wɔsɛɛ be ni awu Harmagedon ta lɛ agbe naa lɛ, Kristofoi ni afɔ amɛ mu lɛ baatsɔ Kristo ayemforo lɛ. (Kpojiemɔ 19:7-9) Mɛi ni yɔɔ shikpɔŋ lɛ nɔ lɛ fɛɛ baaná nakai yookpeemɔ ni baaya nɔ yɛ ŋwɛi lɛ he sɛɛ. Mɛni hewɔ? Ejaakɛ nakai yookpeemɔ lɛ baahã adesai aná nɔyeli kpakpa. No hewɔ lɛ, kɛ́ wɔhiɛnɔkamɔ ji wɔbaahi shi kɛya naanɔ yɛ ŋwɛi jio, shikpɔŋ lɛ nɔ jio, nyɛhãa wɔtswaa wɔfai shi akɛ wɔbaasaa wɔhe wɔto, ni wɔya nɔ wɔbu. Kɛ́ wɔfee nakai lɛ, wɔsɛɛ lɛ, wɔnine baashɛ jɔɔmɔi ni yɔɔ nyam ni Yehowa esaa eto wɔ lɛ anɔ!