Saji Ni Atsɛ Yisɛɛ Yɛ Wɔshiɛmɔ Kɛ Wɔshihilɛ Kpee Nifeemɔ Wolo Lɛ Mli
JANUARY 11-17
NYƆŊMƆ WIEMƆ LƐ MLI JWETRII | 3 MOSE 20-21
“Yehowa Ejie Ewebii Lɛ Eto Afã”
it-1 1199
Gboshinii
Eji nɔ fɛɛ nɔ ni mɔ ko ni egbo shiɔ ehãa ebii, ewekumɛi, loo mɛi ni yɔɔ hegbɛ akɛ amɛyeɔ esɛɛ. Hebri feemɔwiemɔ titri ni atsɔɔ shishi akɛ gboshinii lɛ ji, na·chalʹ (gbɛiwiemɔ, na·chalahʹ). Kɛ́ akɛ Hebri wiemɔ nɛɛ tsu nii lɛ, etsɔɔ ŋɔ ni mɔ ko ŋɔɔ nɔ ko akɛni lɛ ji niyelɔ lɛ hewɔ, loo nii ni akɛhãa mɔ ko akɛni lɛ ji mɔ ni baaye mɔ ko sɛɛ lɛ hewɔ. (4Mo 26:55; Eze 46:18) Bei komɛi lɛ, kɛ́ akɛ feemɔwiemɔ ni ji ya·rashʹ lɛ tsu nii lɛ, etsɔɔ akɛ “mɔ ko miiye mɔ ko sɛɛ akɛ niyelɔ,” shi bei pii lɛ kɛ́ akɛtsu nii lɛ, etsɔɔ akɛ “mɔ ko eŋɔ nɔ ko” jeee akɛni eji niyelɔ lɛ hewɔ. (1Mo 15:3; 3Mo 20:24) Shishinumɔ kroko ni ehiɛ ji, “ni ashɔ̃ nɔ ko kɛje mɔ ko dɛŋ; ashwie mɔ ko kɛje he ko,” kɛtsɔ tawuu nɔ. (5Mo 2:12; 31:3) Greek wiemɔi ni atsɔɔ shishi akɛ gboshinii lɛ kɛ Greek wiemɔ ni ji kleʹros lɛ yɛ tsakpaa; kleʹros shishinumɔ diɛŋtsɛ ji, “nɔ ko ni afɔ̃ɔ—tamɔ oshiki—ni hãa mɔ naa nɔ ni ebaaná,” sɛɛ mli lɛ shishinumɔ lɛ tsake ni ebatsɔ “gbɛfaŋnɔ,” ni no hu sɛɛ lɛ, ebatsɔ “gboshinii.”—Mat 27:35; Bɔf 1:17; 26:18.
it-1 317 kk. 2
Loofɔji
Be ni Nu Afua ni ba jeŋ fɛɛ lɛ sɛɛ fo lɛ, Noa kɛ “bɔɔ nii ni filikiɔ ni he tse” kɛ kooloi hu shã afɔle. (1Mo 8:18-20) No sɛɛ lɛ, Nyɔŋmɔ ŋmɛ gbɛ ni gbɔmɛi aye loofɔji, shi esaaa akɛ amɛyeɔ lá lɛ. (1Mo 9:1-4; okɛto 3Mo 7:26; 17:13 lɛ he.) Enɛ hewɔ lɛ, eeenyɛ efee akɛ nakai beiaŋ lɛ, Nyɔŋmɔ tsɔ gbɛ ko nɔ ehã ana loofɔji ni sa kɛhã afɔleshaa, ni no tsɔɔ akɛ ‘amɛhe tse’; Biblia lɛ hãa wɔnaa akɛ, Nyɔŋmɔ etsɔɔɔ akɛ loofɔlɔ ko “he tseee,” ni no hewɔ lɛ anyɛŋ aye, kɛyashi akɛ Mose Mla lɛ hã. (3Mo 11:13-19, 46, 47; 20:25; 5Mo 14:11-20) Biblia lɛ etsɔɔɔ nɔ ni adamɔɔ nɔ abuɔ loofɔlɔ ko akɛ “ehe tseee” lɛ mli faŋŋ. Loofɔji ni atsɔɔ akɛ amɛhe tseee lɛ ateŋ pii ji loofɔji ni gbɔbiɔ, loo loofɔji ni yeɔ kooloi ni egboi, shi jeee fɛɛ ni feɔ nakai. Be ni ato kpaŋmɔ hee lɛ shishi lɛ, Nyɔŋmɔ hã Petro na ninaa ko, ni no hã ana akɛ ebuuu kooloo ko akɛ ehe tse loo ehe tseee dɔŋŋ.—Bɔf 10:9-15.
Pɛimɔ Ŋmalɛi Lɛ Amli Jogbaŋŋ
it-1 563
Hewolonɔfolɔmɔ
Nyɔŋmɔ Mla lɛ gu hewolonɔ ni afolɔɔ yɛ mɔ ko ni egbo hewɔ. (3Mo 19:28; 21:5; 5Mo 14:1) Nɔ hewɔ lɛ ji akɛ, Israel ji maŋ krɔŋkrɔŋ hã Yehowa, enii ni eshwɛɛɛ he kwraa. (5Mo 14:2) No hewɔ lɛ, ehe bahia ni amɛtsi amɛhe kwraa kɛje amagajamɔ nifeemɔi fɛɛ ahe. Agbɛnɛ hu, akɛni amɛle akɛ kɛji gbɔmɔ gbo lɛ ewala sɛɛ efo, ni akɛ, wɔsɛɛ lɛ abaatee gbohii ashi hewɔ lɛ, efeŋ nɔ ni sa akɛ amɛbaaye awerɛho aahu akɛ, amɛkɛ kakla loo nɔ kroko ni naa ba baafolɔ amɛhewolonɔ. (Dan 12:13; Heb 11:19) Kɛfata he lɛ, gu ni Nyɔŋmɔ gu Israelbii lɛ akɛ amɛkafolɔ amɛhewolonɔ lɛ baahã amɛna akɛ, esa akɛ amɛkɛ woo ni sa ahã edebɔɔ nii ni ji amɛgbɔmɔtso lɛ.
JANUARY 18-24
NYƆŊMƆ WIEMƆ LƐ MLI JWETRII | 3 MOSE 22-23
“Nɔ Ni Wɔkaseɔ Yɛ Gbii Juji Ni Israelbii Lɛ Ye Lɛ Mli”
it-1 826-827
Blodo Ni Ashikishaŋ-sha Bɛ Mli Gbi Jurɔ
Yɛ Blodo Ni Ashikishaŋ-sha Bɛ Mli Gbi Jurɔ lɛ klɛŋklɛŋ gbi lɛ nɔ lɛ, afeɔ kpee krɔŋkrɔŋ, ni eji hejɔɔmɔ gbi hu. Yɛ Nisan 16, ni ji gbi ni ji enyɔ lɛ nɔ lɛ, akɛ barle ni akpa lɛ ke kome yahãa osɔfo lɛ; barle ji ŋmɔshi nii lɛ ateŋ nɔ ni saa klɛŋklɛŋ yɛ Palestina. Dani gbi jurɔ nɛɛ baashɛ lɛ, mɔ ko mɔ ko bɛ hegbɛ akɛ eyeɔ ŋmɔshi nii hee nɛɛ eko—ŋmɔshi nii lɛ diɛŋtsɛ jio, nɔ ni akɛfee blodo jio, nɔ ni ashĩ jio. Osɔfo lɛ fɔ̃ɔ barle lɛ ke kome, ni ji klɛŋklɛŋ yibii lɛ, kɛyaa kɛbaa, ni no tsɔɔ akɛ ekɛmiihã Yehowa yɛ mfonirifeemɔŋ. Akɛ gwantɛŋnuu ni náko fe afi ni kpa ko bɛ ehe hu hãa akɛ shãa afɔle, kɛ ehe ŋmaa afɔle ni akɛ mu efutu, kɛ dãa afɔle hu. (3Mo 23:6-14) Akɛ famɔ ko hãaa akɛ ashã ŋmaa lɛ loo eshikishaŋ lɛ eko yɛ afɔleshaa latɛ lɛ nɔ, tamɔ bɔ ni osɔfoi lɛ bɔi feemɔ sɛɛ mli lɛ. Akɛ klɛŋklɛŋ yibii hã akɛ afɔle yɛ maŋ muu lɛ fɛɛ najiaŋ, shi aŋmɛ gbɛ hu ni weku fɛɛ weku loo aŋkro fɛɛ aŋkro ni yɔɔ shikpɔŋ yɛ Israel lɛ kɛ shidaa afɔlei abahã Nyɔŋmɔ yɛ gbi jurɔ nɛɛ nɔ.—2Mo 23:19; 5Mo 26:1, 2.
Sɛɛnamɔi Ni Yɔɔ He. Yehowa tsɔ Mose nɔ ekɛ gbɛtsɔɔmɔi hã Israelbii lɛ akɛ, amɛye blodo ni ashikishaŋ-sha bɛ mli yɛ gbi jurɔ nɛɛ nɔ, taakɛ aŋma yɛ 2 Mose 12:14-20 lɛ, ni efã amɛ yɛ kuku 19 lɛ akɛ: “Akana ashikishaŋ-sha ko ashikishaŋ-sha ko yɛ nyɛshĩai lɛ gbii kpawo.” Atsɛ blodo ni ashikishaŋ-sha bɛ mli lɛ “nɔnaa blodo” yɛ 5 Mose 16:3 lɛ, ni daa afi lɛ, no hãa Yudafoi lɛ kaiɔ bɔ ni amɛkɛ oyaiyeli shi Ejipt shikpɔŋ lɛ nɔ lɛ (nakai beiaŋ lɛ, amɛnáaa hegbɛ amɛhã amɛshikishaŋ lɛ asha [2Mo 12:34]). Enɛ hãa amɛkaiɔ nɔnaa kɛ nyɔŋyeli shihilɛ ni akpɔ̃ Israelbii lɛ kɛje mli lɛ, tamɔ bɔ ni Yehowa diɛŋtsɛ wie lɛ akɛ, “koni owala gbii abɔ fɛɛ lɛ, okai gbi ni okɛshi Ejipt shikpɔŋ lɛ nɔ lɛ.” No hãa amɛnaa akɛ amɛji maŋ ni eye ehe, ni akɛ, Yehowa ji amɛ-Kpɔ̃lɔ, ni no saa amɛ etoɔ gbii juji etɛ ni amɛyeɔ daa afi lɛ ateŋ klɛŋklɛŋ nɔ lɛ.—5Mo 16:16.
it-2 598 kk. 2
Pentekoste
Esoro bɔ ni akɛ wiiti klɛŋklɛŋ yibii ni akpa lɛ tsu nii ahã yɛ barle klɛŋklɛŋ yibii lɛ he. Akɛ wiiti ashikishaŋ kpakpa efa mlijai nyɔŋma mli enyɔ (litai 4.4; kwat 4) ni ashikishaŋ-sha futu mli, fee blodoi enyɔ. Afã amɛ akɛ, amɛkɛ ‘blodoi enyɔ lɛ ajɛ amɛshihilɛhei lɛ kɛba,’ ni tsɔɔ akɛ, amɛshã lɛ tamɔ blodoi ni amɛyeɔ yɛ shĩa lɛ nɔŋŋ, shi jeee blodoi ni aje gbɛ ashã kɛhã Nyɔŋmɔjamɔ nifeemɔ. (3Mo 23:17) Ashãa shãa afɔlei kɛ esha afɔle afataa enɛ he, ni akɛ gwantɛŋbii enyɔ ni ji hii hu hãa akɛ naanyobɔɔ afɔle. Osɔfo lɛ kɛ eniji woɔ blodoi lɛ kɛ gwantɛŋbii ni asaa lɛ ashishi, ni efɔ̃ɔ kɛyaa kɛbaa yɛ Yehowa hiɛ, ni no tsɔɔ akɛ akɛhã Yehowa. Kɛ́ akɛ blodoi lɛ kɛ gwantɛŋbii lɛ hã Yehowa sɛɛ lɛ, fɛɛ batsɔɔ osɔfo lɛ nɔ, ni eyeɔ akɛ naanyobɔɔ afɔle.—3Mo 23:18-20.
JANUARY 25-31
NYƆŊMƆ WIEMƆ LƐ MLI JWETRII | 3 MOSE 24-25
“Heyeli Afi Lɛ Kɛ Heyeli Ni Abaaná Wɔsɛɛ Lɛ”
it-1 871
Heyeli
Heyeli Nyɔŋmɔ Lɛ. Yehowa ji heyeli Nyɔŋmɔ lɛ. Ehã Israelbii lɛ ye amɛhe kɛje nyɔŋyeli mli yɛ Ejipt. Ekɛɛ amɛ akɛ, kɛji amɛtee nɔ amɛye ekitãi lɛ anɔ lɛ, nɔ ko nɔ ko he ehiaŋ amɛ. (5Mo 15:4, 5) David wie akɛ, Yerusalem mɔji lɛ amli ‘baafee shweshweeshwe.’ (La 122:6, 7) Shi Mla lɛ ŋmɛ gbɛ koni kɛ́ nuu ko he fĩ lɛ lɛ, ehɔ̃ɔ ehe ehã akɛ nyɔŋ, bɔ ni afee ni enine ashɛ lɛ kɛ eweku lɛ hiamɔ nii anɔ. Shi yɛ Mla lɛ naa lɛ, kɛ́ Hebri nuu nɛɛ sɔmɔ afii ekpaa lɛ, esa akɛ ahã eye ehe yɛ afi ni ji kpawo lɛ mli. (2Mo 21:2) Yɛ Heyeli Afi lɛ (ni baa daa afii 50 lɛ) mli lɛ, ashiɛɔ heyeli yɛ shikpɔŋ lɛ nɔ ahãa enɔ bii lɛ fɛɛ. Ahãa Hebrinyo fɛɛ Hebrinyo ni ji nyɔŋ lɛ yeɔ ehe, ni ahãa nuu fɛɛ nuu kuɔ esɛɛ kɛyaa shikpɔŋ ni ji egboshinii lɛ nɔ.—3Mo 25:10-19.
it-1 1200 kk. 2
Gboshinii
Akɛni shikpɔŋ hiɔ weku kome dɛŋ kɛjɛɔ yinɔ kome nɔ kɛyaa yinɔ kroko nɔ hewɔ lɛ, anyɛŋ ahɔ̃ɔ ahã mɔ kroko ni etsɔ enɔ kwraa. No hewɔ lɛ, kɛ́ ahɔ̃ɔ shikpɔŋ ko lɛ, yɛ gbɛ ko nɔ lɛ, jeee shikpɔŋ lɛ diɛŋtsɛ ahɔ̃ɔ lɛ, shi moŋ ŋmɔshi nii falɛ ni ebaanyɛ ewo lɛ, ni adamɔɔ afii ni eshwɛ dani Heyeli Afi lɛ baashɛ lɛ nɔ atsɔɔ shikpɔŋ lɛ jara, ejaakɛ kɛji nakai be lɛ shɛ ni shikpɔŋtsɛ lɛ nyɛko ehé eshikpɔŋ lɛ ekoŋŋ, abaaku sɛɛ akɛhã lɛ. (3Mo 25:13, 15, 23, 24) Mla nɛɛ kɔɔ shĩai ni yɔɔ maji ni atswako gbogbo awoko he lɛ amli lɛ ahe, ejaakɛ abuɔ amɛ ashiɔ shikpɔji ni jwere shi efolo lɛ anɔ. Shi shĩa ni yɔɔ maŋ ni atswa gbogbo awo he mli lɛ, kɛ́ shiatsɛ lɛ hɔ̃ɔ ni afi ho ni eheko ekoŋŋ lɛ, no lɛ, etsɔ mɔ ni hé lɛ nɔ kwraa. Kɛ́ ahɔ̃ɔ shĩa ko ni yɔɔ Levibii lɛ amaŋ ko mli lɛ, shiatsɛ lɛ yɛ hegbɛ be fɛɛ be akɛ ehéɔ ekoŋŋ, ejaakɛ ahãaa Levibii lɛ shikpɔŋ ko akɛ gboshinii.—3Mo 25:29-34.
it-2 122-123
Heyeli Afi
Kɛji Israelbii lɛ ye Heyeli Afi lɛ he mla lɛ nɔ lɛ, ebaŋ lɛ kɔkɔɔkɔ akɛ abaaná kui titrii enyɔ yɛ maŋ lɛ mli—mɛi ni yɔɔ nii waa kɛ mɛi ni yeɔ ohia futaa—tamɔ wɔnaa yɛ maji pii anɔ ŋmɛnɛ lɛ. Heyeli Afi lɛ he mla lɛ hewɔ lɛ, nibii baaya nɔ jogbaŋŋ yɛ maŋ lɛ mli, ejaakɛ mɔ ko mɔ ko he fiŋ lɛ aahu akɛ, enyɛŋ ekɛ enyɛmɔi kɛ ehesai atsu nii koni maŋ lɛ ashwere. Kɛ́ Israelbii lɛ bo Yehowa toi ni amɛhã etsɔɔ amɛ nii lɛ, no lɛ, amɛbaaná nɔyeli kpakpa, ebaajɔɔ amɛŋmɔshi nibii lɛ anɔ, ni amɛbaashwere, ejaakɛ maŋ ni Nyɔŋmɔ yeɔ amɛnɔ lɛ pɛ ni baanyɛ aná shihilɛ ni tamɔ nɛkɛ.—Yes 33:22.
FEBRUARY 1-7
NYƆŊMƆ WIEMƆ LƐ MLI JWETRII | 3 MOSE 26-27
“Nɔ Ni Esa Akɛ Ofee Koni Yehowa Ajɔɔ Bo”
it-1 223 kk. 3
Woo Kpele
Nibii ni Yehowa tsɔ Mose nɔ efee, kɛ bɔ ni ekɛ lɛ ye ehã lɛ hewɔ lɛ, Nyɔŋmɔ webii lɛ kɛ woo kpele (Heb., moh·raʼʹ) hã Mose. (5Mo 34:10, 12; 2Mo 19:9) Mɛi ni yɔɔ hemɔkɛyeli lɛ na Mose akɛ mɔ ni Yehowa tsɔɔ enɔ ekɛ amɛ wieɔ, ni amɛbo lɛ toi. Ehe bahia ni Israelbii lɛ aná woo kpele amɛhã Yehowa jamɔhe lɛ hu. (3Mo 19:30; 26:2) Enɛ tsɔɔ akɛ, esa akɛ amɛjá Yehowa tamɔ bɔ ni etsɔɔ amɛ lɛ pɛpɛɛpɛ, ni amɛba amɛjeŋ yɛ emlai lɛ fɛɛ anaa.
Pɛimɔ Ŋmalɛi Lɛ Amli Jogbaŋŋ
it-2 617
Hela
Hela Ni Nyɔŋmɔ Mla Lɛ Nɔ Toigbele Kɛbaa. Abɔ Israel maŋ lɛ kɔkɔ akɛ, kɛ́ amɛyeee kpaŋmɔ ni yɔɔ amɛ kɛ Nyɔŋmɔ teŋ lɛ nɔ lɛ, ‘ebaahã hela aba amɛteŋ.’ (3Mo 26:14-16, 23-25; 5Mo 28:15, 21, 22) Yɛ Biblia lɛ mli fɛɛ lɛ, abu gbɔmɔtsoŋ hewalɛ kpakpa loo wekukpaa kpakpa ni yɔɔ mɔ kɛ Yehowa teŋ lɛ akɛ Nyɔŋmɔ jɔɔmɔ (5Mo 7:12, 15; La 103:1-3; Abɛ 3:1, 2, 7, 8; 4:21, 22; Kpo 21:1-4), ni abu hela akɛ nɔ ni jɛɔ esha loo emuu ni ayeee mli kɛbaa. (2Mo 15:26; 5Mo 28:58-61; Yes 53:4, 5; Mat 9:2-6, 12; Yoh 5:14) Hewɔ lɛ, eyɛ mli akɛ yɛ shihilɛi komɛi amli lɛ, Yehowa Nyɔŋmɔ hã helai mɔmɔ mɛi komɛi trukaa, tamɔ kpiti ni shwie Miriam, Uzia, kɛ Gehazi he lɛ nɛkɛ (4Mo 12:10; 2Kr 26:16-21; 2Ma 5:25-27), shi etamɔ nɔ ni yɛ shihilɛi pii amli lɛ, helai ni mɔmɔ aŋkroaŋkroi loo egbɛ eshwã yɛ maji amli lɛ jɛ jeŋba gbonyo ni amɛkɔ lɛ hewɔ. Amɛkpa nɔ ni amɛdu lɛ; amɛna nɔ yɛ amɛgbɔmɔtsei amli yɛ gbɛ gbonyo ni amɛkɔ lɛ hewɔ. (Gal 6:7, 8) Bɔfo Paulo wie mɛi ni kɛ amɛhe wo ajwamaŋbɔɔ mli vii lɛ ahe akɛ, Nyɔŋmɔ “ŋmɛɛ amɛhe ehã muji nii, koni amɛfite amɛ diɛŋtsɛ amɛgbɔmɔtsei lɛ . . . ni amɛ diɛŋtsɛ amɛnáa amɛtɔmɔ lɛ he toigbalamɔ ni sa.”—Ro 1:24-27.
FEBRUARY 8-14
NYƆŊMƆ WIEMƆ LƐ MLI JWETRII | 4 MOSE 1-2
“Yehowa Toɔ Ewebii Lɛ Ahe Gbɛjianɔ”
it-1 397 kk. 4
Nsara
Nsara ni Israelbii lɛ bɔ yɛ ŋa lɛ nɔ lɛ da waa diɛŋtsɛ. Be ni aŋmala hii ni eshɛ tayaa lɛ agbɛ́ii lɛ, aná mɛi 603,550, esoro yei kɛ gbekɛbii, mɛi ni egbɔlɔ kɛ mɛi ni eje kpa, Levibii 22,000 lɛ, kɛ “futufutu gbɔmɛi babaoo” ni ji gbɔi lɛ—hewɔ lɛ, ekolɛ amɛ fɛɛ amɛyibɔ aaafee 3,000,000 loo nɔ ni fe nakai. (2Mo 12:38, 44; 4Mo 3:21-34, 39) Aleee bɔ ni nsara nɛɛ da hã; mɛi hiɛ susumɔi srɔtoisrɔtoi yɛ he. Be ni amɛyabɔ nsara yɛ Yeriko hiɛ yɛ Moab ŋa kpataa lɛ nɔ lɛ, awie akɛ nsara lɛ jɛ “Bet-yeshimot aahu kɛyashi Abel-shitim.”—4Mo 33:49.
Pɛimɔ Ŋmalɛi Lɛ Amli Jogbaŋŋ
it-2 764
Aŋmala Mɛi Agbɛ́ii
Bei pii lɛ, aŋmalaa mɛi lɛ agbɛ́ii kɛ amɛwekutɔkpaa, yɛ amɛwekui kɛ amɛtsɛmɛi ashĩai lɛ anaa. Jeee mɛi lɛ ayifalɛ ni ataoɔ ana lɛ kɛkɛ hewɔ aŋmalaa amɛgbɛ́ii lɛ. Yiŋtoi srɔtoi ahewɔ aŋmala mɛi agbɛ́ii taakɛ Biblia lɛ bɔ he amaniɛ lɛ, ni ekomɛi ji, koni akɛna mɛi ni baanyɛ awo too, mɛi ni baanyɛ asɔmɔ akɛ asraafoi, loo (nɔ ni kɔɔ Levibii lɛ ahe lɛ) koni akɛna mɛi ni baanyɛ asɔmɔ yɛ jamɔhe lɛ.
FEBRUARY 15-21
NYƆŊMƆ WIEMƆ LƐ MLI JWETRII | 4 MOSE 3-4
“Nɔ Ni Levibii Lɛ Tsu”
it-2 683 kk. 3
Osɔfo
Yɛ Mla Kpaŋmɔ Lɛ Shishi. Be ni Israelbii lɛ ji nyɔji yɛ Ejipt, ni Yehowa tswia kromɔbii fɛɛ ni yɔɔ Ejipt lɛ nii yɛ haomɔ ni ji nyɔŋma nɔ lɛ mli lɛ, efee kromɔbi fɛɛ kromɔbi ni yɔɔ Israel lɛ krɔŋkrɔŋ ehã ehe. (2Mo 12:29; 4Mo 3:13) Enɛ hewɔ lɛ, kromɔbii nɛɛ fɛɛ ji Yehowa nii, ni akɛ amɛ baatsu nii yɛ esɔɔmɔ lɛ mli pɛ. Kulɛ, Nyɔŋmɔ baanyɛ ehã Israelbii lɛ akromɔ bihii nɛɛ fɛɛ asɔmɔ akɛ osɔfoi kɛ mɛi ni tsuɔ nii yɛ jamɔhe lɛ. Shi ekpɛ eyiŋ akɛ ebaahã Levi weku lɛ mli hii lɛ atsu nitsumɔ nɛɛ. Enɛ hewɔ lɛ, eŋmɛ gbɛ koni maŋ lɛ ahã Levibii ni ji hii lɛ aye wekui krokomɛi 12 lɛ akromɔ bihii lɛ anajiaŋ; abu Yosef bihii Efraim kɛ Manase seshibii lɛ akɛ wekui srɔtoi enyɔ. Aŋmala Israelbii lɛ akromɔbii ni ji hii ni eye kɛjɛ nyɔɔŋ kome kɛyaa lɛ agbɛ́ii, ni aŋmala Levibii ni ji hii ni eye kɛjɛ nyɔɔŋ kome kɛyaa lɛ hu agbɛ́ii, ni ana akɛ Israelbii lɛ akromɔbii lɛ ayifalɛ ni amɛkɛfe Levibii lɛ ayifalɛ lɛ ji 273. Enɛ hewɔ lɛ, Nyɔŋmɔ bi ni awo shekeli enumɔ (dɔlai 11) kɛhã mɛi 273 lɛ ateŋ mɔ fɛɛ mɔ akɛ kpɔmɔ shika, ní akɛ shika lɛ ahã Aaron kɛ ebihii lɛ. (4Mo 3:11-16, 40-51) Dani nifeemɔ nɛɛ baaya nɔ lɛ, no mli lɛ, Yehowa ehala Levibii ni ji hii ni jɛ Aaron weku lɛ mli lɛ momo akɛ amɛsɔmɔ akɛ osɔfoi yɛ Israel.—4Mo 1:1; 3:6-10.
it-2 241
Levibii
Amɛnitsumɔi. Levi bihii Gershon (Gershom), Kohat, kɛ Merari awekui etɛ lɛ ni feɔ Levibii lɛ. (1Mo 46:11; 1Kr 6:1, 16) Ahã wekui nɛɛ eko fɛɛ eko bɔ nsara yɛ sɔlemɔ buu lɛ masɛi yɛ ŋa lɛ nɔ. Aaron weku lɛ, ni amɛji Kohatbii lɛ, bɔ nsara yɛ sɔlemɔ buu lɛ hiɛgbɛ, yɛ bokã. Kohatbii krokomɛi lɛ bɔ nsara yɛ wuoyi, Gershonbii lɛ ye anai, ni Meraribii lɛ ye kooyi. (4Mo 3:23, 29, 35, 38) Levibii lɛ ji mɛi ni shĩɔ sɔlemɔ buu lɛ amɛmaa shi, ni amɛ nɔŋŋ amɛjieɔ, ni amɛtereɔ. Kɛ́ nsara lɛ baafã kɛya lɛ, Aaron kɛ ebihii lɛ jieɔ pateeshɛŋ lɛ ni jaa He Krɔŋkrɔŋ lɛ kɛ He Krɔŋkrɔŋ Fe Fɛɛ lɛ mli lɛ, ni amɛhaa Odaseyeli adeka lɛ, afɔleshaa latɛi lɛ, kɛ okpɔlɔi kɛ nibii krokomɛi ni akɛtsuɔ nii yɛ sɔlemɔ buu lɛ mli lɛ ahe. Kɛkɛ lɛ, Kohatbii lɛ etere nibii nɛɛ. Gershonbii lɛ tsiɔ sɔlemɔ buu lɛ mamai lɛ, enɔhaanɔi lɛ, pateeshɛŋ srɔtoi lɛ, kpo lɛ he pateeshɛŋi ni tsotsoroɔ shi lɛ, kɛ kpãi lɛ (eeenyɛ efee akɛ, sɔlemɔ buu lɛ diɛŋtsɛ he kpãi lɛ) yɛ shwiilii amli, ni Meraribii lɛ kwɛɔ mplaŋi lɛ, ekulashiŋi lɛ, enɔdaamɔnii ni fɔji yɔɔ mli lɛ, dadei kɛ amɛnaa piɔpiɔi lɛ, kɛ kpãi lɛ (sɔlemɔ buu lɛ kpo lɛ he kpãi lɛ) anɔ.—4Mo 1:50, 51; 3:25, 26, 30, 31, 36, 37; 4:4-33; 7:5-9.
it-2 241
Levibii
Yɛ Mose beiaŋ lɛ, ja Levinyo ko eye afii 30 dani ahãa etsuɔ nitsumɔi fɛɛ ni abiɔ ni Levinyo atsu lɛ, tamɔ sɔlemɔ buu lɛ kɛ ehe nibii lɛ ni atereɔ kɛ́ nsara lɛ miifã lɛ nɛkɛ. (4Mo 4:46-49) Nitsumɔi komɛi yɛ ni kɛ́ Levinyo ko ye kɛjɛ afii 25 kɛyaa lɛ ebaanyɛ etsu, shi etamɔ nɔ ni nitsumɔi ni wala, tamɔ sɔlemɔ buu lɛ ni ajieɔ kɛyaa he kroko lɛ, fataaa he. (4Mo 8:24) Yɛ Maŋtsɛ David beiaŋ lɛ, agbɔ afii lɛ nɔ kɛba afii 20. Ejaakɛ David tsɔɔ mli akɛ, ajieŋ sɔlemɔ buu lɛ (ni etsɛŋ, akɛ sɔlemɔ shĩa lɛ baaye najiaŋ lɛ) kɛjɛŋ he kome kɛyaŋ he kroko dɔŋŋ. Kɛ́ mɔ ko ye afii 50 lɛ, ahãa ekpaa nitsumɔ ni eji esɔ̃ akɛ etsu lɛ. (4Mo 8:25, 26; 1Kr 23:24-26) Ehe bahia ni Levibii lɛ ale Mla lɛ jogbaŋŋ, ejaakɛ bei pii lɛ, ahãa amɛkaneɔ amɛtsɔɔ maŋbii lɛ ni amɛgbálaa mli amɛtsɔɔ amɛ.—1Kr 15:27; 2Kr 5:12; 17:7-9; Ne 8:7-9.
FEBRUARY 22-28
NYƆŊMƆ WIEMƆ LƐ MLI JWETRII | 4 MOSE 5-6
“Mɛɛ Gbɛi Anɔ Obaanyɛ Okase Nazirmɛi Lɛ?”
it-2 477
Nazirnyo
Kɛ́ mɔ ko wo shi akɛ ebaahi shi akɛ Nazirnyo lɛ, nibii titrii etɛ komɛi yɛ ni esaaa akɛ efeɔ: (1) Esaaa akɛ enuɔ dãa ni wa ko kwraa; esaaa akɛ eyeɔ wain yibii hu, eŋmilikiti jio, nɔ ni etsu jio, nɔ ni egbi jio, ni esaaa akɛ enuɔ nɔ ko ni akɛ wain yibii fee, nɔ ni aŋa lɛ ehee jio, nɔ ni naa ewa jio, nɔ ni akɛfee viniga jio. (2) Esaaa akɛ ekuɔ eyitsɔi. (3) Esaaa akɛ etaa gbonyo ko he, kɛ́ mɔ lɛ ji ewekunyo kpaakpa po—epapa, emami, enyɛmi nuu, loo enyɛmi yoo.—4Mo 6:1-7.
Shiwoi Krɛdɛi. Kɛ́ mɔ ko wo shi krɛdɛɛ nɛɛ, esa akɛ etswa efai shi akɛ “ebaahi shi akɛ Nazirnyo [ni tsɔɔ akɛ, ajie lɛ ato afã; ejɔɔ ehe nɔ] ehã Yehowa,” shi jeee ni ebaatsĩ ehe naa yɛ nibii komɛi ahe koni mɛi ajie eyi. Hewɔ lɛ, “gbii abɔ fɛɛ ni eji Nazirnyo lɛ, eyɛ krɔŋkrɔŋ hã Yehowa.”—4Mo 6:2, 8; okɛto 1Mo 49:26 lɛ he.
Enɛ hewɔ lɛ, nibii ni agu Nazirmɛi lɛ sa kadimɔ ni amɛhe hiaa waa yɛ Yehowa jamɔ mli. Nitsumɔ ni osɔfonukpa lɛ tsuɔ lɛ ji nitsumɔ krɔŋkrɔŋ, ni no hewɔ lɛ, esaaa akɛ etaa gbonyo he, kɛji mɔ lɛ ji ewekunyo kpaakpa po, ni nakai nɔŋŋ eji yɛ Nazirnyo hu gbɛfaŋ. Akɛni nitsumɔi ni osɔfonukpa lɛ kɛ osɔfoi krokomɛi lɛ tsuɔ lɛ ahe hiaa waa hewɔ lɛ, afã amɛ akɛ, kɛ́ amɛyaatsu nitsumɔi krɔŋkrɔŋi nɛɛ yɛ Yehowa hiɛ lɛ, amɛkanu wain loo dãa kroko ni wa.—3Mo 10:8-11; 21:10, 11.
Agbɛnɛ hu, esa akɛ Nazirnyo lɛ (Heb., na·zirʹ) ‘akã he efee krɔŋkrɔŋ kɛtsɔ eyiteŋ tsɔi ni eeehã etsa lɛ nɔ,’ ni no baafee okadi ni baahã mɛi fɛɛ ana oya nɔŋŋ akɛ, eji Nazirnyo. (4Mo 6:5) Be ni awieɔ Hejɔɔmɔ Gbi krɔŋkrɔŋ lɛ kɛ Heyeli Afii lɛ ahe lɛ, akɛ Hebri wiemɔ ni ji na·zirʹ lɛ nɔŋŋ tsu nii kɛhã wain tsei ni “asako he” lɛ. (3Mo 25:5, 11) Nɔ kroko hu ni sa kadimɔ waa ji akɛ, atsɛ shika tsuru fɛtɛfɛtɛ ni kpɛtɛ osɔfonukpa lɛ yitsofiinɔ lɛ hiɛ, ni akpɛ́ wiemɔi ni ji, “Krɔŋkrɔŋ ji Yehowa” lɛ yɛ nɔ lɛ akɛ, “henɔjɔɔmɔ okadi krɔŋkrɔŋ [Heb., neʹzer, ni ekɛ wiemɔ ni ji, na·zirʹ lɛ yɛ tsakpaa].” (2Mo 39:30, 31) Ni atsɛɔ yitsofiinɔ, loo akekre, ni mɛi ni afɔɔ amɛ mu koni amɛye Israel nɔ maŋtsɛ lɛ buɔ lɛ hu akɛ neʹzer. (2Sa 1:10; 2Ma 11:12) Yɛ Kristofoi asafo lɛ mli hu lɛ, bɔfo Paulo tsɔɔ mli akɛ, ahã yoo yitsɔi kakadaŋŋ yɛ yitsofiinɔ najiaŋ. Eji adebɔɔ naa okadi ko ni baakai lɛ akɛ esoro egbɛnaa yɛ nuu nɔ he; esa akɛ ehã ehi ejwɛŋmɔ mli akɛ, yɛ Nyɔŋmɔ gbɛjianɔtoo mli lɛ, eyitso ji nuu. Hewɔ lɛ, bi ni abi ni Nazirnyo akaku eyi (nɔ ko ni hii efeee yɛ adebɔɔ naa), ekanu wain ko, ehã ehe atse ni ekabule ehe lɛ baahã ena akɛ, ehe nɔ ni ejɔɔ kwraa akɛ ebaafee Yehowa suɔmɔnaa nii lɛ ji nɔ ko ni he hiaa waa.—1Ko 11:2-16.