Nɔ Hewɔ Ni Amɛlaaje Amɛshia Lɛ

KWƐMƆ nɔ ni yaa nɔ agbɛnɛ. Aashwie Adam kɛ Hawa kɛmiijɛ Eden abɔɔ fɛfɛo lɛ mli. Ani ole nɔ hewɔ?

No ji akɛ, amɛfee nɔ ko ni ehiii kwraa. No hewɔ lɛ, Yehowa miigbala amɛtoi. Ani ole nii ni ehiii ni Adam kɛ Hawa fee lɛ?

Amɛfee nɔ ko ni Nyɔŋmɔ ekɛɛ amɛ akɛ amɛkafee. Nyɔŋmɔ ekɛɛ amɛ akɛ amɛbaanyɛ amɛye tsei ni yɔɔ abɔɔ lɛ mli lɛ anɔ yibii lɛ eko. Shi Nyɔŋmɔ kɛɛ amɛ akɛ, amɛkaye tso kome ko nɔ yibii, ejaakɛ kɛ amɛfee nakai lɛ amɛbaagboi. Eha nakai tso lɛ hi shi akɛ ekome enɔ̃. Ni wɔle akɛ ehiii akɛ oookɔ nɔ ko ni ji mɔ kroko nɔ̃, aloo jeee nakai? Mɛni ba mɔ?

Gbi ko beni Hawa kome yɔɔ abɔɔ lɛ mli lɛ, onufu ko kɛ lɛ wie. Bo lɛ susumɔ he okwɛ! Ekɛɛ Hawa akɛ, eye tso ni Nyɔŋmɔ ekɛɛ amɛ akɛ amɛkaye enɔ yibii lɛ eko lɛ. Agbɛnɛ, beni Yehowa fee onufui lɛ, efeee amɛ ni amɛnyɛ amɛwie. No hewɔ lɛ, nɔ ni enɛ tsɔɔ ji akɛ, mɔ ko ji mɔ ni haa onufu lɛ wieɔ lɛ. Namɔ ni?

Jeee Adam ni. No hewɔ lɛ, esa akɛ efee mɛi ni Yehowa fee amɛ jeeŋmɔ dani efee shikpɔŋ lɛ ateŋ mɔ ko. Ŋwɛibɔfoi ji nakai gbɔmɛi lɛ, ni wɔnyɛɛɛ wɔna amɛ. Nɛkɛ ŋwɛibɔfo kome nɛɛ efee ehe henɔwolɔ. Eje shishi esusu eyiŋ akɛ, esa akɛ efee nɔyelɔ tamɔ Nyɔŋmɔ. Ni eesumɔ ni gbɔmɛi abo lɛ toi moŋ fe ni amɛaabo Yehowa toi. Lɛ ji ŋwɛibɔfo ni ha onufu lɛ wie lɛ.

Ŋwɛibɔfo nɛɛ nyɛ elaka Hawa. Beni ekɛɛ lɛ akɛ, kɛ eye aduawa lɛ ebaatsɔ tamɔ Nyɔŋmɔ lɛ, ehe eye. No hewɔ lɛ eye, ni Adam hu ye eko. Adam kɛ Hawa booo Nyɔŋmɔ toi, ni enɛ hewɔ ni amɛlaaje abɔɔ fɛfɛo ni ji amɛshia lɛ.

Shi gbi ko lɛ Nyɔŋmɔ baaha shikpɔŋ muu lɛ fɛɛ afee fɛo tamɔ Eden abɔɔ lɛ. Yɛ sɛɛ mli lɛ, wɔbaale bɔ ni ooofee ni oná nakai feemɔ lɛ mli gbɛfaŋnɔ. Shi agbɛnɛ ha wɔkwɛ nɔ ni ba Adam kɛ Hawa nɔ.