Yehoshafat Kɛ Ehe Fɔ̃ Yehowa Nɔ

ANI ole mɛi ni nɛkɛ hii nɛɛ ji kɛ nɔ ni amɛfeɔ lɛ? Amɛmiiya ta, ni hii ni nyiɛ hiɛ lɛ miila. Shi ekolɛ obaabi akɛ: ‘Mɛni hewɔ ni lalɔi lɛ ehiɛɛɛ klantei kɛ akpɔlɔi ni amɛkɛbaawu ta lɛ?’ Hã ni wɔkwɛ.

Yehoshafat ji Israel akutsei enyɔ maŋtsɛyeli lɛ nɔ maŋtsɛ. Ehi shi yɛ be mli ni Maŋtsɛ Ahab kɛ Izebel yeɔ maŋtsɛ yɛ kooyigbɛ akutsei 10 lɛ nɔ lɛ nɔŋŋ mli. Shi maŋtsɛ kpakpa ji Yehoshafat, ni etsɛ Asa hu ji maŋtsɛ kpakpa nakai nɔŋŋ. No hewɔ lɛ mɛi ni yɔɔ wuoyigbɛ akutsei enyɔ maŋtsɛyeli lɛ mli lɛ ná shihilɛ kpakpa afii babaoo.

Shi agbɛnɛ nɔ ko ba ni ha gbɔmɛi lɛ she gbeyei. Tsuji babɔ Yehoshafat amaniɛ akɛ: ‘Ta babaoo ko ni jɛ Moab kɛ Amon maji lɛ anɔ kɛ Seir Gɔŋ lɛ nɔ lɛ miiba ni amɛkɛ bo abawu.’ Israelbii pii bua amɛhe naa yɛ Yerusalem koni amɛtao Yehowa dɛŋ yelikɛbuamɔ. Amɛtee sɔlemɔwe lɛ, ni Yehoshafat sɔle yɛ jɛmɛ akɛ: ‘Oo Yehowa wɔ-Nyɔŋmɔ, wɔleee nɔ ni wɔbaafee. Wɔnyɛŋ wɔhe wɔjie kɛjɛ nɛkɛ tai babaoo nɛɛ adɛŋ. Bo onɔ wɔhiɛ kã kɛha yelikɛbuamɔ.’

Yehowa bo toi, ni eha etsuji lɛ ateŋ mɔ kome kɛɛ gbɔmɛi lɛ akɛ: ‘Ta lɛ jeee nyɛ nɔ ni, shi moŋ Nyɔŋmɔ nɔ ni. Jeee nyɛ nyɛbaawu ta lɛ. Nyɛdamɔa shi ni nyɛkwɛa nyɛyiwala ni Yehowa baahere.’

No hewɔ lɛ enɔ jetsɛremɔ lɛ, Yehoshafat kɛɛ gbɔmɛi lɛ akɛ: ‘Nyɛkɛ nyɛhiɛ afɔ̃a Yehowa nɔ!’ Kɛkɛ ni ekɛ lalɔi lɛ ye esraafoi lɛ ahiɛ, ni beni amɛnyiɛ kɛmiiya lɛ amɛmiila kɛmiijie Yehowa yi. Ani ole nɔ ni ba beni amɛbɛŋkɛ he ni abaawu ta lɛ yɛ lɛ? Yehowa ha asraafoi henyɛlɔi lɛ kɛ amɛhe bɔi nɔmɔ. Ni beni Israelbii lɛ shɛɔ jɛmɛ lɛ, asraafoi henyɛlɔi lɛ ateŋ mɔ fɛɛ mɔ egbo!

Ani Yehoshafat jeee nilelɔ akɛ ekɛ ehe fɔ̃ Yehowa nɔ? Wɔ hu wɔbaafee nilelɔi kɛ wɔkɛ wɔhe fɔ̃ E-nɔ.