Namɔ Ji Nyɔŋmɔ?

1, 2. Mɛɛ saji mɛi fɔɔ bimɔ?

GBEKƐBII biɔ saji waa. Bei pii lɛ, kɛ́ amɛbi bo nɔ ko, ni ogbala mli otsɔɔ amɛ lɛ, amɛtsui enyɔɔɔ amɛmli. No hewɔ lɛ, amɛbaabi bo akɛ, ‘Mɛni hewɔ?’ Ni kɛ́ obɔ mɔdɛŋ ohã amɛ hetoo lɛ, ekolɛ amɛbaasaa amɛbi bo akɛ, ‘Ni mɛni hewɔ?’

² Gbekɛbii ji wɔ jio, onukpai ji wɔ jio, wɔ fɛɛ wɔbiɔ wɔhe saji komɛi. Bei komɛi lɛ, wɔbiɔ wɔhe akɛ, mɛni niyenii miye? Mɛni atade miwo? Loo mɛni mihé? Shi wɔbiɔ saji yɛ shihilɛ kɛ bɔ ni nibii baaji wɔsɛɛ lɛ hu ahe. Sanebimɔi ni tamɔ nakai lɛ ahe miihia. Shi kɛ́ wɔnáaa sanebimɔi nɛɛ ahetoo lɛ, ekolɛ wɔgbaŋ wɔhe naa wɔtaoŋ dɔŋŋ.

 3. Mɛni hewɔ mɛi pii susuɔ akɛ amɛnyɛŋ amɛná sanebimɔi ni he hiaa amɛ waa lɛ ahetoo lɛ?

³ Ani wɔbaanyɛ wɔná sanebimɔi ni he hiaa wɔ waa lɛ ahetoo yɛ Biblia lɛ mli? Mɛi komɛi kpɛlɛɔ nɔ akɛ wɔbaanyɛ wɔná hetoi lɛ yɛ Biblia lɛ mli, shi efeɔ amɛ akɛ anyɛŋ anu Biblia lɛ shishi. Amɛsusuɔ akɛ tsɔɔlɔi, loo osɔfoi pɛ ni le sanebimɔi nɛɛ ahetoo. Ni mɛi komɛi hu lɛ, efeɔ amɛ hiɛgbele akɛ amɛbaahã ana akɛ amɛleee sanebimɔi nɛɛ ahetoo. Te bo hu osusuɔ tɛŋŋ?

4, 5. Mɛni ji sanebimɔi komɛi ni he hiaa ni obaasumɔ ni oná hetoo? Mɛni hewɔ esa akɛ oya nɔ otao hetoi lɛ?

⁴ Ekolɛ, obiɔ ohe akɛ, ‘Mɛni hewɔ Nyɔŋmɔ bɔ mi? Kɛ́ migbo lɛ, mɛɛ shihilɛ mli mayaje? Mɛɛ mɔ nɛkɛ Nyɔŋmɔ ji?’ ni ootao ole saji ni tamɔ nɛkɛ lɛ ahetoo. Yesu, ni ji Tsɔɔlɔ ni ehe gbɛ́i waa lɛ wie akɛ: “Nyɛyaa nɔ nyɛbia, ni abaahã nyɛ; nyɛyaa nɔ nyɛtaoa, ni nyɛbaana; nyɛyaa nɔ nyɛshia, ni abaagbele ahã nyɛ.” (Mateo 7:7) No hewɔ lɛ, kaahã onijiaŋ je wui. Yaa nɔ otao sanebimɔi nɛɛ ahetoo kɛyashi otsui baanyɔ omli.

⁵ Lɛɛlɛŋ, “kɛ́ otee nɔ otao” sanebimɔi nɛɛ ahetoo lɛ, obaana hetoi lɛ yɛ Biblia lɛ mli. (Abɛi 2:1-5) Obaanyɛ onu hetoi ni obaana yɛ Biblia lɛ mli lɛ ashishi. Ni nibii ni obaakase kɛjɛ Biblia lɛ mli lɛ baahã omii ashɛ ohe bianɛ, ni amɛbaahã oná hiɛnɔkamɔ kpakpa hu kɛhã wɔsɛɛ. Hã wɔsusu sanebimɔ ko ni mɛi pii leee ehetoo diɛŋtsɛ lɛ he wɔkwɛ.

 6. Mɛni hewɔ mɛi komɛi susuɔ akɛ Nyɔŋmɔ jwɛŋŋ shihilɛ ni amɛyɔɔ mli lɛ he lɛ?

⁶ Mɛi pii susuɔ akɛ Nyɔŋmɔ jwɛŋŋ wɔhe. Amɛkɛɔ akɛ, eji ejwɛŋɔ wɔhe lɛɛlɛŋ kulɛ, jeee nɛkɛ jeŋ shihilɛ baafee kwraa. Ŋmɛnɛ lɛ, tai, kɛ hetsɛ̃, kɛ nibii krokomɛi ni hãa mɛi yeɔ awerɛho lɛ miiya nɔ yɛ je lɛŋ he fɛɛ he. Helai mɔmɔɔ mɛi, ni amɛpiŋɔ, ni amɛgboiɔ. No hewɔ lɛ, mɛi komɛi biɔ amɛhe akɛ, ‘Kɛ́ Nyɔŋmɔ jwɛŋɔ wɔhe lɛɛlɛŋ lɛ, mɛni hewɔ efeee shihilɛ nɛɛ he nɔ ko?’

 7. (a) Mɛɛ gbɛ nɔ jamɔi komɛi ahiɛnyiɛlɔi kɛ osɔfoi ehã mɛi ená jwɛŋmɔ lɛ akɛ Nyɔŋmɔ yitsoŋ wa? (b) Mɛni hewɔ wɔyɔɔ nɔmimaa akɛ nibii fɔji ni yaa nɔ yɛ je lɛ mli lɛ jɛɛɛ Nyɔŋmɔ?

⁷ Bei komɛi lɛ, jamɔi komɛi ahiɛnyiɛlɔi kɛ osɔfoi hãa mɛi náa jwɛŋmɔ lɛ akɛ Nyɔŋmɔ yitsoŋ wa. Kɛ́ sane fɔŋ ko ba lɛ, amɛkɛɔ akɛ Nyɔŋmɔ ji mɔ ni to akɛ eba, ni akɛ, eji esumɔɔɔ ni ebaa kulɛ, ebaŋ. Yɛ gbɛ ko nɔ lɛ, amɛmiishwa Nyɔŋmɔ yɛ nɔ ni eba lɛ he. Shi Biblia lɛ hãa wɔleɔ akɛ, jeee Nyɔŋmɔ ji mɔ ni kɛ nibii fɔji baa. Yakobo 1:13 lɛ kɛɔ akɛ, Nyɔŋmɔ kɛ nibii fɔji ekaaa mɔ ko mɔ ko. Nakai ŋmalɛ lɛ kɛɛ akɛ: “Kɛ́ mɔ ko kɛ shihilɛ ni mli wa ko miikpe lɛ, ekakɛɛ akɛ: ‘Nyɔŋmɔ miika mi.’ Ejaakɛ anyɛŋ akɛ nibii fɔji aka Nyɔŋmɔ, ni lɛ diɛŋtsɛ hu ekaaa mɔ ko.” Enɛ tsɔɔ akɛ, eyɛ mli akɛ Nyɔŋmɔ efoko nibii fɔji ni yaa nɔ yɛ je lɛ mli lɛ asɛɛ moŋ, shi jeee lɛ ji mɔ ni kɛbaa. (Kanemɔ Hiob 34:10-12.) Hã wɔkɛ nɔkwɛmɔnɔ ni nyiɛ sɛɛ nɛɛ atsɔɔ mli.

8, 9. Mɛni hewɔ esaaa akɛ wɔshwaa Nyɔŋmɔ yɛ wɔnaagbai lɛ ahe lɛ? Okɛ nɔkwɛmɔnɔ ko atsɔɔ mli.

⁸ Ŋɔɔ lɛ akɛ, ole oblanyo ko ni eda ni kɛ efɔlɔi yɔɔ shĩa. Epapa sumɔɔ esane waa, ni etsɔɔ lɛ bɔ ni akpɛɔ yiŋ kpakpai yɛ shihilɛ mli. Shi gbi ko lɛ, oblanyo lɛ booo epapa toi ni eshi shĩa. Eyafee nibii gbohii pii, ni eyagbee amane mli. Akɛni oblanyo lɛ papa etsĩii ebi lɛ naa ni ekashi shĩa lɛ hewɔ lɛ, ani obaashwa lɛ yɛ nɔ ni eba oblanyo lɛ nɔ lɛ he? Dabi, ofeŋ nakai! (Luka 15:11-13) Wɔbaanyɛ wɔkɛ nakai papa lɛ ato Nyɔŋmɔ he. Be ni adesai booo Nyɔŋmɔ toi ni amɛbɔi nibii gbohii feemɔ lɛ, Nyɔŋmɔ etsĩii amɛnaa. No hewɔ lɛ, kɛ́ sane fɔŋ ko ba lɛ, esa akɛ wɔkai akɛ jeee Nyɔŋmɔ ni kɛba. Esaaa akɛ wɔshwaa Nyɔŋmɔ.

⁹ Yiŋtoo kpakpa ko hewɔ Nyɔŋmɔ efoko nibii gbohii ni yaa nɔ yɛ je lɛ mli lɛ asɛɛ lɛ. Wɔbaakase nɔ ni Biblia lɛ wieɔ yɛ sane nɛɛ he, yɛ Yitso 11 lɛ mli. Shi ná nɔmimaa akɛ, Nyɔŋmɔ sumɔɔ wɔ, ni jeee lɛ ji mɔ ni kɛ naagbai ni wɔkɛkpeɔ lɛ baa wɔnɔ. Yɛ anɔkwale mli lɛ, lɛ pɛ ji mɔ ni baanyɛ atsu wɔnaagbai lɛ ahe nii ehã wɔ.​—Yesaia 33:2.

10. Mɛni hewɔ wɔbaanyɛ wɔhe wɔye akɛ Nyɔŋmɔ baatsu naagbai fɛɛ ni mɛi fɔji kɛba lɛ ahe nii lɛ?

¹⁰ Nyɔŋmɔ yɛ krɔŋkrɔŋ. (Yesaia 6:3) Nɔ fɛɛ nɔ ni efeɔ lɛ he tse, sane ko kwraa bɛ he, ni ehi. No hewɔ lɛ, wɔbaanyɛ wɔkɛ wɔhiɛ afɔ̃ enɔ. Gbɔmɛi adesai bɛ nakai. Bei komɛi lɛ, amɛfeɔ nibii ni ehiii. Ni agbɛnɛ hu, adesa nɔyelɔ ni hi fe fɛɛ lɛ po nyɛŋ atsu naagbai fɛɛ ni mɛi fɔji kɛbaa lɛ ahe nii, ejaakɛ ebɛ nakai hewalɛ lɛ. Shi Nyɔŋmɔ yɛ hewalɛ fe mɔ fɛɛ mɔ. Ebaanyɛ etsu naagbai fɛɛ ni mɛi fɔji kɛbaa lɛ ahe nii, ni ebaafee nakai hu. Ebaafo nibii fɔji fɛɛ asɛɛ kɛya naanɔ.​—Kanemɔ Lala 37:9-11.

11. Te Nyɔŋmɔ nuɔ he ehãa tɛŋŋ yɛ naagbai ni okɛkpeɔ lɛ ahe?

¹¹ Kɛ́ Nyɔŋmɔ na naagbai ni okɛkpeɔ, kɛ nibii fɔji ni yaa nɔ yɛ je lɛ mli lɛ, te enuɔ he ehãa tɛŋŋ? Biblia lɛ kɛɔ akɛ, Nyɔŋmɔ “sumɔɔ jalɛ sane.” (Lala 37:28) No hewɔ lɛ, esumɔɔ ekpakpa, ni enyɛɔ efɔŋ. Kɛ́ ena akɛ mɛi miipiŋ lɛ, edɔɔ lɛ waa. Biblia lɛ kɛɛ akɛ, be ko be ni Nyɔŋmɔ na akɛ mɛi miifee nibii fɔji yɛ shikpɔŋ lɛ nɔ lɛ, “ewerɛ ho ehe yɛ etsui mli.” (1 Mose 6:5, 6) Nyɔŋmɔ tsakeee. (Maleaki 3:6) Biblia lɛ kɛɔ akɛ Nyɔŋmɔ jwɛŋɔ ohe waa diɛŋtsɛ.​—Kanemɔ 1 Petro 5:7.

12, 13. (a) Namɔ kɛ su ni ji suɔmɔ lɛ hã wɔ? Kɛ́ wɔna ni mɛi miipiŋ lɛ, te wɔnuɔ he wɔhãa tɛŋŋ? (b) Mɛni hewɔ wɔheɔ wɔyeɔ akɛ Nyɔŋmɔ baafo piŋmɔ kɛ efɔŋfeemɔ fɛɛ sɛɛ lɛ?

¹² Biblia lɛ kɛɔ hu akɛ, Nyɔŋmɔ bɔ wɔ tamɔ bɔ ni eyɔɔ lɛ. (1 Mose 1:26) Nɔ ni enɛ tsɔɔ ji akɛ, be ni Nyɔŋmɔ bɔ wɔ lɛ, ekɛ sui kpakpai ni eyɔɔ lɛ nɔŋŋ hã wɔ. Enɛ hewɔ lɛ, kɛ́ mɔ ko efeko efɔŋ ko, ni wɔna akɛ eepiŋ lɛ, edɔɔ wɔ. Ni nakai nɔŋŋ edɔɔ Nyɔŋmɔ. Edɔɔ lɛ waa po fe bɔ ni edɔɔ wɔ! Mɛni hewɔ wɔkɛɔ nakai?

¹³ Biblia lɛ kɛɔ wɔ akɛ, “Nyɔŋmɔ lɛ, suɔmɔ ji lɛ.” (1 Yohane 4:8) Nɔ fɛɛ nɔ ni Nyɔŋmɔ feɔ lɛ, efeɔ yɛ suɔmɔ ni eyɔɔ lɛ hewɔ. Wɔjieɔ suɔmɔ kpo ejaakɛ Nyɔŋmɔ jieɔ suɔmɔ kpo. Susumɔ enɛ he okwɛ: Eji obaanyɛ ofo piŋmɔ kɛ efɔŋfeemɔ ni yaa nɔ yɛ je lɛ mli lɛ fɛɛ sɛɛ kulɛ, obaafee loo ofeŋ? Obaafee aahu, ejaakɛ osumɔɔ gbɔmɛi asane. Shi Nyɔŋmɔ hu? Ebaafee aahu, ejaakɛ esumɔɔ wɔ, ni eyɛ hewalɛ hu ni ebaanyɛ ekɛjie piŋmɔ kɛ efɔŋfeemɔ kɛya. Yɛ wolo nɛɛ shishijee gbɛ lɛ, atsɔɔ wɔ nibii komɛi ni Nyɔŋmɔ ewo shi akɛ ebaafee ehã wɔ. Hemɔ oye akɛ Nyɔŋmɔ baaye eshiwoi lɛ fɛɛ anɔ! Shi dani obaanyɛ ohe oye akɛ ebaaye shiwoi nɛɛ anɔ lɛ, esa akɛ ole Nyɔŋmɔ jogbaŋŋ.

14. Mɛni ji Nyɔŋmɔ gbɛ́i? Ni mɛni hãa wɔnaa akɛ esa akɛ wɔkɛtsu nii?

¹⁴ Kɛ́ ootao otsɔ mɔ ko naanyo lɛ, bei pii lɛ, mɛni ji nɔ klɛŋklɛŋ ni otsɔɔ lɛ yɛ ohe? Otsɔɔ lɛ ogbɛ́i, aloo jeee nakai? Ani Nyɔŋmɔ yɛ gbɛ́i? Jamɔi pii kɛɔ akɛ egbɛ́i ji Nyɔŋmɔ loo Nuŋtsɔ. Shi Nyɔŋmɔ loo Nuŋtsɔ lɛ, jeee gbɛ́i diɛŋtsɛ ni. Amɛji gbɛnaa gbɛ́i kɛkɛ, tamɔ bɔ ni “maŋtsɛ” loo “maŋ hiɛnyiɛlɔ” ji gbɛnaa gbɛ́i lɛ. Nyɔŋmɔ ekɛɛ wɔ akɛ, egbɛ́i ji Yehowa. Lala 83:18 lɛ kɛɔ akɛ: “Hã mɛi ale akɛ, bo ni ogbɛ́i ji Yehowa lɛ, bo okome too ji Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ.” Mɛi ni ŋma Biblia lɛ kɛ Nyɔŋmɔ gbɛ́i lɛ tsu nii shii akpei abɔ. Yehowa miisumɔ ni ole egbɛ́i lɛ ni okɛtsu nii. Nyɔŋmɔ etsɔɔ bo egbɛ́i, ejaakɛ eetao ni obatsɔ enaanyo.

15. Mɛni gbɛ́i Yehowa lɛ tsɔɔ?

¹⁵ Shishinumɔ ni yɔɔ Nyɔŋmɔ gbɛ́i Yehowa lɛ sɛɛ lɛ yaa shɔŋŋ. Etsɔɔ akɛ, Nyɔŋmɔ baanyɛ aye eshiwoi fɛɛ anɔ, ni ebaanyɛ efee nibii fɛɛ ni ekpɛ eyiŋ akɛ ebaafee lɛ. Nɔ ko nɔ ko bɛ ni baanyɛ atsĩ enaa. Gbɛ́i nɛɛ esaaa mɔ ko mɔ ko akɛ ja lɛ pɛ.a

16, 17. (a) Kɛ́ akɛɛ Yehowa ji “Ofe lɛ,” te atsɔɔ tɛŋŋ? (b) Kɛ́ akɛɛ Yehowa ji “Naanɔi a-Maŋtsɛ” lɛ, te atsɔɔ tɛŋŋ? (d) Kɛ́ akɛɛ Yehowa ji “Bɔlɔ lɛ,” te atsɔɔ tɛŋŋ?

¹⁶ Lala 83:18 lɛ wie yɛ Yehowa he akɛ: “Bo okome too ji Mɔ Ni Nɔ Kwɔ Fe Fɛɛ.” Agbɛnɛ hu, Kpojiemɔ 15:3 lɛ kɛɔ akɛ: “Yehowa Nyɔŋmɔ, Ofe lɛ, onitsumɔi lɛ dara ni amɛyɛ naakpɛɛ. Naanɔi a-Maŋtsɛ, ogbɛi lɛ ja ni anɔkwa ji amɛ.” Mɛni gbɛnaa gbɛ́i ni ji “Ofe lɛ” tsɔɔ wɔ yɛ Yehowa he? Etsɔɔ wɔ akɛ, ŋwɛi jio, shikpɔŋ lɛ nɔ jio, mɔ ko mɔ ko bɛ ni yɛ hewalɛ fe Yehowa. Gbɛnaa gbɛ́i ni ji “Naanɔi a-Maŋtsɛ” lɛ tsɔɔ wɔ akɛ, ebɛ shishijee. Lala 90:2 lɛ kɛɔ akɛ, eyɛ kɛjɛ naanɔ kɛmiiya naanɔ. Ani enɛ bɛ naakpɛɛ?

¹⁷ Yehowa pɛ ji Bɔlɔ lɛ. Kpojiemɔ 4:11 lɛ kɛɔ akɛ: “Yehowa wɔ-Nyɔŋmɔ, bo ji mɔ ni sa akɛ akɛ anunyam lɛ kɛ woo lɛ kɛ hewalɛ lɛ ahã, ejaakɛ bo obɔ nibii fɛɛ, ni osuɔmɔ naa hewɔ amɛba shihilɛ mli ni abɔ amɛ.” Yehowa ji mɔ ni bɔ nibii fɛɛ. Lɛ ebɔ ŋwɛibɔfoi lɛ kɛ ŋulamii lɛ kɛ aduawai lɛ kɛ ŋshɔŋ loi lɛ kɛ nibii krokomɛi fɛɛ!

18. Mɛni hewɔ mɛi komɛi susuɔ akɛ amɛnyɛŋ amɛtsɔ Nyɔŋmɔ naanyo kɔkɔɔkɔ lɛ? Shi mɛni Biblia lɛ kɛɔ wɔ yɛ enɛ he?

¹⁸ Mɛi komɛi yɛ ni kɛ́ amɛkane bɔ ni Yehowa yɔɔ hã lɛ he sane lɛ, amɛsheɔ gbeyei, ejaakɛ kɛ́ amɛkwɛ bɔ ni Nyɔŋmɔ he wa, bɔ ni enɔ kwɔ, kɛ he ni eyɔɔ lɛ, efeɔ amɛ akɛ ejwɛŋ amɛhe. Shi ani nakai ji bɔ ni Nyɔŋmɔ sumɔɔ ni wɔna lɛ wɔhã? Dabi. Yehowa miisumɔ ni wɔtsɔ enaanyo. Biblia lɛ kɛɔ akɛ, Nyɔŋmɔ kɛ “wɔteŋ mɔ fɛɛ mɔ teŋ jekɛɛɛ.” (Bɔfoi 17:27) Nyɔŋmɔ miisumɔ ni otsi obɛŋkɛ lɛ, ni ewo shi akɛ, kɛ́ ofee nakai lɛ, ‘ebaatsi ebɛŋkɛ bo.’​—Yakobo 4:8.

19. (a) Mɛni esa akɛ ofee koni obatsɔ Nyɔŋmɔ naanyo? (b) Te Yehowa sui lɛ ateŋ nɔ ni osumɔɔ waa lɛ?

¹⁹ Mɛni esa akɛ ofee koni obatsɔ Nyɔŋmɔ naanyo? Yesu wie akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Kɛ́ otee nɔ okase Biblia lɛ, obaale Yehowa kɛ Yesu. Ni no baanyɛ ahã oná naanɔ wala. Akɛ nɔkwɛmɔnɔ lɛ, okase momo akɛ “Nyɔŋmɔ lɛ, suɔmɔ ji lɛ.” (1 Yohane 4:16) Shi Nyɔŋmɔ yɛ sui krokomɛi hu ni nɔ bɛ. Biblia lɛ kɛɔ akɛ, Yehowa ji “mɔbɔnalɔ kɛ musuŋtsɔlɔ, ní mli fuuu mra ni esuɔmɔ ni tsakeee kɛ enɔkwale fa babaoo.” (2 Mose 34:6) Yehowa ‘hi ni esumɔɔ waa akɛ ekɛ esha ake.’ (Lala 86:5) Nyɔŋmɔ toɔ etsui shi ni eyeɔ anɔkwa. (2 Petro 3:9; Kpojiemɔ 15:4) Kɛ́ okane Biblia lɛ, obaale Yehowa sui lɛ ahe saji babaoo.

20-22. (a) Kɛ́ wɔnyɛɛɛ wɔna Nyɔŋmɔ lɛ, te wɔbaafee tɛŋŋ wɔtsɔ enaanyo lɛ? (b) Kɛ́ mɛi bɔ mɔdɛŋ akɛ amɛbaatsĩ onaa koni okpa Biblia lɛ kasemɔ lɛ, mɛni esa akɛ ofee?

²⁰ Shi kɛ́ onyɛɛɛ ona Nyɔŋmɔ lɛ, te obaafee tɛŋŋ otsɔ enaanyo lɛ? (Yohane 1:18; 4:24; 1 Timoteo 1:17) Kɛ́ okane Yehowa he sane yɛ Biblia lɛ mli lɛ, obaana akɛ eji mɔ ko ni yɔɔ diɛŋtsɛ. (Lala 27:4; Romabii 1:20) Kɛ́ otee nɔ okase Yehowa he nii lɛ, suɔmɔ ni oyɔɔ kɛhã lɛ lɛ mli baawa, ni obaatsi obɛŋkɛ lɛ kpaakpa.

²¹ Obaana nɔ hewɔ ni Biblia lɛ wieɔ akɛ Yehowa ji wɔ-Tsɛ lɛ. (Mateo 6:9) Lɛ ehã wɔ wala, ni eesumɔ ni wɔná miishɛɛ yɛ shihilɛ mli. (Lala 36:9) Mɛɛ tsɛ kpakpa po yɔɔ ni sumɔŋ ni ebii amii ashɛ amɛhe? No hewɔ lɛ, Biblia lɛ hãa wɔnaa faŋŋ akɛ, obaanyɛ obatsɔ Yehowa naanyo. (Yakobo 2:23) Yehowa, ni ji mɔ ni bɔ je lɛ kɛ nibii fɛɛ ni yɔɔ mli lɛ miisumɔ ni obatsɔ enaanyo! Enɛ ji miishɛɛ sane diɛŋtsɛ!

²² Mɛi komɛi sumɔŋ ni oya nɔ okase Biblia lɛ, ejaakɛ amɛsusuɔ akɛ obaashi jamɔ ni oyɔɔ mli lɛ mli. No hewɔ lɛ, amɛbaabɔ mɔdɛŋ ni amɛtsĩ onaa koni okatsa nikasemɔ lɛ nɔ. Shi kaahã mɔ ko mɔ ko tsĩ onaa. Yaa nɔ okase Biblia lɛ, ejaakɛ kɛ́ ofee nakai lɛ, obaatsɔ Yehowa naanyo. Ni lɛ ji Naanyo ni hi fe fɛɛ ni obaanyɛ oná.

23, 24. (a) Mɛni hewɔ esa akɛ obi saji yɛ nɔ ni okaseɔ lɛ he? (b) Mɛni he wɔbaasusu yɛ yitso ni nyiɛ sɛɛ lɛ mli?

²³ Be ni okaseɔ Biblia lɛ, ekolɛ obaana nibii komɛi ni onuuu shishi. Kɛ́ onuuu nɔ ko shishi lɛ, bi koni agbala mli atsɔɔ bo. Kaahã efee bo hiɛgbele. Yesu kɛɛ wɔba wɔhe shi tamɔ gbekɛbii. (Mateo 18:2-4) Ni wɔle akɛ gbekɛbii biɔ saji waa. Nyɔŋmɔ miisumɔ ni onu nibii ashishi. No hewɔ lɛ, kasemɔ Biblia lɛ jogbaŋŋ, bɔ ni afee ni oná nɔmimaa akɛ nɔ ni okaseɔ lɛ ji anɔkwale lɛ.​—Kanemɔ Bɔfoi 17:11.

²⁴ Biblia lɛ ni obaakase lɛ ji gbɛ ni hi fe fɛɛ ni obaanyɛ otsɔ nɔ okase Yehowa he nii. Yɛ yitso ni nyiɛ sɛɛ lɛ mli lɛ, wɔbaana nɔ hewɔ ni esoro Biblia lɛ kwraa yɛ woji krokomɛi fɛɛ ni yɔɔ je lɛ mli lɛ ahe lɛ.