• Mɛni Ji Nyɔŋmɔ Maŋtsɛyeli Lɛ?
    Oyi Aná Wala Kɛya Naanɔ!—Biblia Kasemɔ Ni Baafee Sanegbaa
    • Nikasemɔ 31. Yesu Kristo, ni ji ŋwɛi Maŋtsɛ lɛ, miikwɛ Yehowa anunyam lɛ.

      NIKASEMƆ 31

      Mɛni Ji Nyɔŋmɔ Maŋtsɛyeli Lɛ?

      Sane ni he hiaa fe fɛɛ ni Biblia lɛ wieɔ he ji Nyɔŋmɔ Maŋtsɛyeli lɛ. Yehowa baatsɔ nakai Maŋtsɛyeli lɛ nɔ ehã nɔ hewɔ ni ebɔ shikpɔŋ lɛ aba mli. Mɛni ji Maŋtsɛyeli nɛɛ? Te wɔfeɔ tɛŋŋ wɔleɔ akɛ eeye nɔ bianɛ lɛ? Mɛni Maŋtsɛyeli lɛ efee momo? Ni mɛni ebaafee wɔsɛɛ? Abaahã sanebimɔi nɛɛ hetoo yɛ nikasemɔ nɛɛ kɛ nikasemɔi enyɔ ni baanyiɛ sɛɛ lɛ amli.

      1. Mɛni ji Nyɔŋmɔ Maŋtsɛyeli lɛ? Namɔ ji e-Maŋtsɛ?

      Maŋtsɛyeli nɛɛ ji nɔyeli ko ni Yehowa Nyɔŋmɔ to shishi. Yesu Kristo, ni ji nɔyeli nɛɛ Maŋtsɛ lɛ, yeɔ nɔ kɛjɛɔ ŋwɛi. (Mateo 4:​17; Yohane 18:​36) Biblia lɛ wie Yesu he akɛ: “Ebaaye . . . Maŋtsɛ kɛya naanɔ.” (Luka 1:​32, 33) Yesu, ni ji Nyɔŋmɔ Maŋtsɛyeli lɛ Maŋtsɛ lɛ, baaye mɔ fɛɛ mɔ ni yɔɔ shikpɔŋ lɛ nɔ lɛ nɔ.

      2. Namɛi baafata Yesu he kɛye nɔ?

      Mɛi komɛi baafata Yesu he kɛye nɔ. Mɛi ni jɛ ‘weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli baaye shikpɔŋ lɛ nɔ akɛ maŋtsɛmɛi.’ (Kpojiemɔ 5:​9, 10) Mɛi enyiɛ baafata Kristo he kɛye nɔ? Kɛjɛ be ni Yesu ba shikpɔŋ lɛ nɔ kɛbashi amrɔ nɛɛ, mɛi akpekpei abɔ ebatsɔmɔ esɛɛnyiɛlɔi. Ani amɛ fɛɛ amɛbaafata ehe kɛye nɔ? Dabi. Amɛteŋ mɛi 144,000 pɛ baaya ŋwɛi ni amɛyafata Yesu he kɛye nɔ. (Kanemɔ Kpojiemɔ 14:​1-4.) Kristofoi krokomɛi fɛɛ ni baashwɛ yɛ shikpɔŋ lɛ nɔ lɛ, baatsɔmɔ Maŋtsɛyeli lɛ shishi bii.​—Lala 37:29.

      3. Mɛni hewɔ Nyɔŋmɔ Maŋtsɛyeli lɛ hi kwraa fe adesai anɔyelii lɛ?

      Kɛ́ nɔyelɔi ni ji adesai bɔ mɔdɛŋ akɛ amɛbaafee nibii kpakpai po lɛ, amɛnyɛŋ amɛfee nɔ fɛɛ nɔ ni amɛsumɔɔ akɛ amɛfee lɛ. Ni bei komɛi lɛ, nɔyelɔi ni bayeɔ amɛsɛɛ lɛ fóɔ amɛ pɛ amɛnɔ mli, ni amɛsumɔɔɔ ni amɛwaa maŋbii lɛ. Shi Yesu, ni ji Nyɔŋmɔ Maŋtsɛyeli lɛ Nɔyelɔ lɛ, kome too baaye nɔ daa. Nyɔŋmɔ eto “maŋtsɛyeli ko ni anyɛŋ hiɛ akpãtã lɛ shishi.” (Daniel 2:​44) Yesu baaye shikpɔŋ muu lɛ fɛɛ nɔ, ni ekɛ mɔ fɛɛ mɔ baaye jogbaŋŋ, ekwɛŋ hiɛiaŋ. Yesu sumɔɔ mɔ, emli hi, ni eyeɔ jalɛ sane, ni ebaatsɔɔ mɛi ni amɛ hu amɛsumɔ mɛi, amɛmli ahi, ni amɛye jalɛ sane.​—Kanemɔ Yesaia 11:9.

      KASEMƆ PII OFATA HE

      Obaana nɔ hewɔ ni Nyɔŋmɔ Maŋtsɛyeli lɛ hi kwraa fe adesai anɔyelii lɛ.

      Yesu Kristo ta emaŋtsɛ sɛi lɛ nɔ yɛ ŋwɛi, ni eeye shikpɔŋ lɛ nɔ. Mɛi ni kɛ lɛ yeɔ nɔ lɛ, tara esɛɛ. Yehowa anunyam lɛ miikpɛ waa yɛ amɛsɛɛ.

      4. Nɔyeli ko ni yɔɔ hewalɛ waa baaye shikpɔŋ muu lɛ fɛɛ nɔ

      Yesu Kristo yɛ hewalɛ kwraa fe nɔyelɔi ni ji adesai lɛ. Nyɛkanea Mateo 28:​18 lɛ, ni nyɛsusua sanebimɔ nɛɛ he:

      • Mɛɛ gbɛ nɔ Yesu nɔyeli lɛ hi kwraa fe nɔyelɔi ni ji adesai lɛ anɔ lɛ?

      Bei pii lɛ, atsakeɔ nɔyelɔi ni ji adesai lɛ, ni amɛteŋ mɔ fɛɛ mɔ yeɔ shikpɔŋ lɛ fã ko pɛ nɔ. Ni Nyɔŋmɔ Maŋtsɛyeli lɛ hu? Nyɛkanea Daniel 7:​14 lɛ, ni nyɛsusua sanebimɔi nɛɛ ahe:

      • Mɛni hewɔ ehi waa akɛ ‘akpãtãŋ Nyɔŋmɔ Maŋtsɛyeli lɛ hiɛ’ lɛ?

      • Mɛni hewɔ ehi waa akɛ ebaaye shikpɔŋ muu lɛ fɛɛ nɔ lɛ?

      5. Esa akɛ akɛ nɔyeli kroko abaye adesai anɔyelii anajiaŋ

      Mɛni hewɔ esa akɛ Nyɔŋmɔ Maŋtsɛyeli lɛ abaye adesai anɔyelii anajiaŋ lɛ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

      VIDIO: Mɛni Ji Nyɔŋmɔ Maŋtsɛyeli Lɛ?​—Vidio Lɛ Fã Ko (1:41)

      • Mɛɛ yibii adesai anɔyelii ewo?

      Nyɛkanea Jajelɔ 8:9 lɛ, ni nyɛsusua sanebimɔi nɛɛ ahe:

      • Kɛ́ okwɛ lɛ, esa akɛ Nyɔŋmɔ Maŋtsɛyeli lɛ abaye adesai anɔyelii anajiaŋ? Mɛni hewɔ okɛɔ nakai?

      6. Nyɔŋmɔ Maŋtsɛyeli lɛ yɛ nɔyelɔi ni nuɔ wɔ shishi

      Yesu, wɔ-Maŋtsɛ lɛ, bahi shi akɛ gbɔmɔ, hewɔ lɛ, ebaanyɛ ‘enu wɔgbɔjɔmɔi lɛ ahe ehã wɔ.’ (Hebribii 4:​15) Yehowa ji mɔ ni halaa hii kɛ yei anɔkwafoi 144,000 ni baafata Yesu he kɛye nɔ lɛ, kɛjɛɔ “weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli.”​—Kpojiemɔ 5:9.

      • Ani le ni ole akɛ, Yesu kɛ mɛi fɛɛ ni baafata ehe kɛye nɔ lɛ ehi shi pɛŋ akɛ adesai lɛ, shɛjeɔ omii? Mɛni hewɔ okɛɔ nakai?

      Hii kɛ yei ni afɔ amɛ mu ni jɛ yinɔi srɔtoi kɛ shihilɛi srɔtoi amli.

      Yehowa miihala hii kɛ yei ni jɛ shihilɛi srɔtoi fɛɛ amli koni amɛyafata Yesu he kɛye nɔ

      7. Nyɔŋmɔ Maŋtsɛyeli lɛ yɛ mlai ni hi kwraa fe adesai anɔyelii lɛ anɔ

      Adesai anɔyelii woɔ mlai ní amɛsusuɔ akɛ ebaabu amɛshishi bii lɛ ahe ni amɛbaaná he sɛɛ hu. Nyɔŋmɔ Maŋtsɛyeli lɛ hu yɛ mlai ni esa akɛ eshishi bii lɛ aye nɔ. Nyɛkanea 1 Korintobii 6:​9-11 lɛ, ni nyɛsusua sanebimɔi nɛɛ ahe:

      • Kɛ́ mɔ fɛɛ mɔ ye mlai ni Nyɔŋmɔ ewo lɛ anɔ lɛ, kɛ́ okwɛ lɛ, te je lɛŋ shihilɛ baafee tɛŋŋ?a

      • Kɛ́ okwɛ lɛ, eja gbɛ akɛ Yehowa baakpa gbɛ akɛ Maŋtsɛyeli lɛ shishi bii lɛ aye mlai nɛɛ anɔ? Mɛni hewɔ okɛɔ nakai?

      • Mɛni tsɔɔ akɛ mɛi ni yeee mlai nɛɛ anɔ lɛ baanyɛ atsake?​—Kwɛmɔ kuku 11 lɛ.

      Polisifonyo ko miiwa kar ko yɛ he ko ni mɛi pii foɔ gbɛ mli yɛ. Mɛi ni eye afii srɔtoi miifo gbɛ lɛ mli.

      Adesai anɔyelii woɔ mlai koni ebu maŋbii lɛ ahe, ní amɛná he sɛɛ hu. Nyɔŋmɔ Maŋtsɛyeli lɛ hu yɛ mlai ni hi kwraa fe adesai anɔ lɛ ni buɔ eshishi bii lɛ ahe, ni amɛnáa he sɛɛ hu

      EKOLƐ MƆ KO BAABI BO AKƐ: “Mɛni ji Nyɔŋmɔ Maŋtsɛyeli lɛ?”

      • Mɛni obaakɛɛ lɛ?

      EMLI OTI

      Nyɔŋmɔ Maŋtsɛyeli lɛ ji nɔyeli diɛŋtsɛ ni yɔɔ ŋwɛi, ni ebaaye shikpɔŋ muu lɛ fɛɛ nɔ.

      Mɛni Okase?

      • Namɛi ji Nyɔŋmɔ Maŋtsɛyeli lɛ nɔyelɔi lɛ?

      • Mɛni hewɔ Nyɔŋmɔ Maŋtsɛyeli lɛ hi kwraa fe adesai anɔyelii lɛ?

      • Mɛɛ nibii komɛi Yehowa kpaa gbɛ akɛ Maŋtsɛyeli lɛ shishi bii lɛ baafee?

      Nɔ Ni Obaanyɛ Ofee

      EHE SAJI KROKOMƐI

      Obaana nɔ ni Yesu wie yɛ he ni Maŋtsɛyeli lɛ yɔɔ lɛ he.

      “Ani Nyɔŋmɔ Maŋtsɛyeli lɛ yɛ Otsui Mli?” (jw.org lɛ nɔ sane)

      Mɛni hewɔ Yehowa Odasefoi naa akɛ, anɔkwa ni amɛbaaye Nyɔŋmɔ Maŋtsɛyeli lɛ he hiaa fe anɔkwa ni amɛbaaye adesai anɔyeli ko lɛ?

      Amɛfiɔ Nyɔŋmɔ Maŋtsɛyeli Lɛ Sɛɛ (1:43)

      Obaana nɔ ni Biblia lɛ ewie yɛ mɛi 144,000 lɛ ni Yehowa halaa ni amɛyafata Yesu he kɛye nɔ lɛ ahe.

      “Namɛi Baaya Ŋwɛi?” (jw.org lɛ nɔ sane)

      Mɛni hã yoo ko ni awo lɛ tsũŋ lɛ yiŋ tsɔ akɛ Nyɔŋmɔ pɛ ji mɔ ni baahã aye jalɛ sane yɛ jeŋ fɛɛ lɛ?

      “Mina Mɔ Ni Baahã Aye Jalɛ Sane Yɛ Jeŋ Fɛɛ” (Awake!, November 2011)

      a Abaasusu mlai nɛɛ ekomɛi ahe yɛ Fã 3 lɛ mli.

  • Nyɔŋmɔ Maŋtsɛyeli Lɛ Miiye Nɔ Bianɛ!
    Oyi Aná Wala Kɛya Naanɔ!—Biblia Kasemɔ Ni Baafee Sanegbaa
    • Nikasemɔ 32. Yesu Kristo etsɔ Maŋtsɛ yɛ ŋwɛi, ehiɛ maŋtsɛtso, ni eeye shikpɔŋ lɛ nɔ.

      NIKASEMƆ 32

      Nyɔŋmɔ Maŋtsɛyeli Lɛ Miiye Nɔ Bianɛ!

      Nyɔŋmɔ Maŋtsɛyeli lɛ bɔi nɔyeli yɛ ŋwɛi, yɛ afi 1914 mli. Nakai beiaŋ nɔŋŋ ni adesai anɔyeli lɛ naagbee gbii lɛ je shishi. Mɛni hewɔ wɔkɛɔ nakai? Biblia mli gbalɛi ni eba mli, je lɛŋ shihilɛ, kɛ sui ni mɛi ejie lɛ kpo kɛjɛ afi 1914 kɛbaa lɛ hewɔ wɔkɛɔ nakai lɛ.

      1. Mɛni Biblia lɛ egba efɔ̃ shi?

      Biblia mli wolo ni ji Daniel lɛ hãa wɔnaa akɛ, Nyɔŋmɔ Maŋtsɛyeli lɛ baabɔi nɔyeli be ni be ko ni atsɛɔ lɛ “bei kpawo” lɛ eba naagbee. (Daniel 4:​16, 17) Afii ohai abɔ sɛɛ lɛ, Yesu tsɛ nakai be lɛ nɔŋŋ akɛ, “jeŋmaji lɛ abei ni ato lɛ,” ni ehã ana akɛ, yɛ egbii lɛ amli lɛ no mli lɛ, ebako naagbee. (Luka 21:​24) Wɔbaana yɛ nikasemɔ nɛɛ mli akɛ, bei kpawo lɛ ba naagbee yɛ afi 1914 mli.

      2. Te je lɛŋ shihilɛ efee tɛŋŋ kɛjɛ afi 1914 kɛbaa, ni mɛɛ sui mɛi ejie lɛ kpo?

      Yesu kaselɔi lɛ bi lɛ akɛ: “Mɛni baafee be ni oba lɛ kɛ je lɛ naagbee gbii lɛ he okadi lɛ?” (Mateo 24:3) Be ni Yesu hãa amɛ hetoo lɛ, egba nibii pii ni baaba kɛ́ ebɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ Maŋtsɛ. Nibii nɛɛ ekomɛi ji ta, hɔmɔ, kɛ shikpɔŋhosomɔi. (Kanemɔ Mateo 24:7.) Biblia lɛ gba hu akɛ, sui ni mɛi baajie lɛ kpo yɛ “naagbee gbii lɛ” amli lɛ baahã je lɛŋ ‘shihilɛ awa.’ (2 Timoteo 3:​1-5) Kɛjɛ afi 1914 kɛbaa lɛ, nibii ni yaa nɔ yɛ je lɛŋ kɛ sui ni mɛi jieɔ lɛ kpo lɛ kɛ nɔ ni Biblia lɛ gba lɛ yaa pɛpɛɛpɛ.

      3. Kɛjɛ be ni Nyɔŋmɔ Maŋtsɛyeli lɛ bɔi nɔyeli lɛ, mɛni hewɔ je lɛŋ shihilɛ efite kwraa lɛ?

      Be ni awó Yesu Nyɔŋmɔ Maŋtsɛyeli lɛ Maŋtsɛ lɛ sɛɛ etsɛɛɛ lɛ, ekɛ Satan kɛ daimonioi lɛ wu ta yɛ ŋwɛi. Aye Satan nɔ kunim. Biblia lɛ kɛɛ “ashɛ lɛ afɔ̃ shikpɔŋ, ni ashɛrɛ ebɔfoi lɛ hu ashwie afata ehe.” (Kpojiemɔ 12:9, 10, 12) Satan mli efu waa diɛŋtsɛ, ejaakɛ ele akɛ abaakpãtã ehiɛ. No hewɔ lɛ, lɛ ehã mɛi piŋɔ ni amɛnaa nɔ yɛ je lɛŋ fɛɛ lɛ. Enɛ hãa wɔnaa nɔ hewɔ ni je lɛŋ shihilɛ efite kwraa lɛ. Nyɔŋmɔ Maŋtsɛyeli lɛ baahã naagbai nɛɛ fɛɛ sɛɛ afo.

      KASEMƆ PII OFATA HE

      Obaana nɔ hewɔ ni wɔkɛɔ akɛ Maŋtsɛyeli lɛ bɔi nɔyeli yɛ afi 1914 mli lɛ, kɛ nɔ ni esa akɛ no atsirɛ wɔ ni wɔfee.

      4. Biblia gbalɛ tsɔɔ akɛ, Maŋtsɛyeli lɛ bɔi nɔyeli yɛ afi 1914 mli

      Jiemɔ VIDIO lɛ.

      VIDIO: Nyɔŋmɔ Maŋtsɛyeli Lɛ Bɔi Nɔyeli Yɛ Afi 1914 Mli (5:02)

      Nyɔŋmɔ hã blema Babilon maŋtsɛ Nebukadnezar la lamɔ ko ni ji gbalɛ. Bɔ ni Daniel tsɔɔ nakai lamɔ lɛ mli ehã lɛ hãa wɔnaa akɛ, ekɔɔ Nebukadnezar nɔyeli lɛ kɛ Nyɔŋmɔ Maŋtsɛyeli lɛ fɛɛ he.—Nyɛkanea Daniel 4:​17 lɛ.a

      Nyɛkanea Daniel 4:​20-​26 lɛ, ni nyɛkɛ akrabatsa lɛ ahãa sanebimɔi ni nyiɛ sɛɛ nɛɛ hetoo:

      • (A) Mɛni Nebukadnezar na yɛ elamɔ lɛ mli?​—Kwɛmɔ kuku 20 kɛ 21 lɛ.

      • (B) Mɛni abaafee tso lɛ?​—Kwɛmɔ kuku 23 lɛ.

      • (D) Kɛ́ “bei kpawo” lɛ ba naagbee lɛ, mɛni baaba?​—Kwɛmɔ kuku 26 lɛ.

      Bɔ Ni Tso Lɛ He Lamɔ Lɛ Kɔɔ Nyɔŋmɔ Maŋtsɛyeli Lɛ He

      GBALƐ LƐ (Daniel 4:​20-​36)

      Nɔyeli

      (A) Tso ko ni da agbo

      Tso ko ni kwɔ waa diɛŋtsɛ.

      Afo nɔyeli lɛ sɛɛ

      (B) “Nyɛfoa tso lɛ nyɛfɔ̃a shi,” ni nyɛhãa ‘bei kpawo ahoa’

      Tsoku ko ni akɛ dade kɛ akɔɔble kɔsɔŋkɔsɔ efi lɛ.

      Ato nɔyeli lɛ shishi ekoŋŋ

      (D) “Omaŋtsɛyeli lɛ baatsɔ onɔ ekoŋŋ”

      Tso ko ni kwɔ waa diɛŋtsɛ.

      Yɛ gbalɛ nɛɛ klɛŋklɛŋ mlibaa lɛ mli lɛ . . .

      • (E)Namɔ tso lɛ damɔ shi kɛhã?—Kwɛmɔ kuku 22 lɛ.

      • (Ɛ)Mɛɛ gbɛ nɔ afo enɔyeli lɛ sɛɛ?—Nyɛkanea Daniel 4:​29-​33 lɛ.

      • (F)Be ni “bei kpawo” lɛ ba naagbee lɛ, mɛni ba Nebukadnezar nɔ?—Nyɛkanea Daniel 4:​34-​36 lɛ.

      GBALƐ LƐ KLƐŊKLƐŊ MLIBAA

      Nɔyeli

      (E) Nebukadnezar, Babilon maŋtsɛ

      Maŋtsɛ Nebukadnezar efu kɛdamɔ shi.

      Afo nɔyeli lɛ sɛɛ

      (Ɛ) Afi 606 D.Ŋ.B. sɛɛ lɛ, Nebukadnezar ye sɛkɛ, ni afii kpawo ho ni enyɛɛɛ eye nɔ

      Nebukadnezar ta shikpɔŋ, ni eekpe jwɛi tamɔ kooloo ko.

      Ato nɔyeli lɛ shishi ekoŋŋ

      (F) Nebukadnezar hiɛ tserɛ lɛ, ni ebɔi nɔyeli ekoŋŋ

      Maŋtsɛ Nebukadnezar ehole eniji anɔ, ni eekwɛ ŋwɛi.

      Yɛ gbalɛ nɛɛ mlibaa ni ji enyɔ lɛ mli lɛ . . .

      • (G) Namɛi tso lɛ damɔ shi kɛhã?—Nyɛkanea 1 Kronika 29:​23 lɛ.

      • (H) Mɛɛ gbɛ nɔ afo amɛnɔyeli lɛ sɛɛ? Te wɔfeɔ tɛŋŋ wɔleɔ akɛ be ni Yesu yɔɔ shikpɔŋ lɛ nɔ lɛ, no mli lɛ, atoko amɛnɔyeli lɛ shishi ekoŋŋ lɛ?​—Nyɛkanea Luka 21:​24 lɛ.

      • (I) Mɛɛ be ato nɔyeli nɛɛ shishi, ni nɛgbɛ ato shishi yɛ?

      GBALƐ LƐ MLIBAA NI JI ENYƆ

      Nɔyeli

      (G) Blema Israel maŋtsɛmɛi ni damɔ shi kɛhã Nyɔŋmɔ nɔyeli lɛ

      Maŋtsɛmɛi srɔtoi ni ye nɔ yɛ Israel tara maŋtsɛ sɛii anɔ. La ko miikpɛ amɛnɔ kɛmiijɛ ŋwɛi.

      Afo nɔyeli lɛ sɛɛ

      (H) Akpãtã Yerusalem hiɛ, ni no fo blema Israel maŋtsɛmɛi lɛ anɔyeli lɛ sɛɛ afii 2,520

      La miisha blema Yerusalem maŋ lɛ yɛ afi 607 D.Ŋ.B. No sɛɛ lɛ, afii 2,520 ho.

      Ato nɔyeli lɛ shishi ekoŋŋ

      (I) Yesu bɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ Maŋtsɛ

      Yesu ta emaŋtsɛ sɛi lɛ nɔ yɛ ŋwɛi, ni eeye shikpɔŋ lɛ nɔ kɛjɛ afi 1914 Ŋ.B. La miikpɛ kɛmiijɛ eŋɔɔ.

      Mɛni bei kpawo lɛ damɔ shi kɛhã?

      Biblia lɛ hei komɛi hãa wɔnuɔ ehei krokomɛi ashishi. Akɛ nɔkwɛmɔnɔ lɛ, Biblia mli wolo ni ji Kpojiemɔ lɛ kɛɛ bei etɛ kɛ fã feɔ gbii 1,260. (Kpojiemɔ 12:​6, 14) Bei kpawo ji nakai yibɔ lɛ toi enyɔ, loo gbii 2,520. Bei komɛi lɛ, Biblia lɛ kɛ gbi kome damɔɔ shi kɛhãa afi kome. (Ezekiel 4:6) No hewɔ lɛ, bei kpawo lɛ ni awie he yɛ Daniel wolo lɛ mli lɛ damɔ shi kɛhã afii 2,520.

      5. Je lɛŋ shihilɛ etsake kwraa kɛjɛ afi 1914 kɛbaa

      Jiemɔ VIDIO lɛ.

      VIDIO: Je Lɛŋ Shihilɛ Etsake Kwraa Kɛjɛ Afi 1914 Kɛbaa (1:10)

      Yesu gba bɔ ni je lɛŋ shihilɛ baaji kɛ́ ebatsɔ Maŋtsɛ. Nyɛkanea Luka 21:​9-11 lɛ, ni nyɛsusua sanebimɔ nɛɛ he:

      • Te shihilɛi nɛɛ ateŋ nɔ ni ona loo onu he lɛ?

      Bɔfo Paulo tsɔɔ sui ni mɛi baajie lɛ kpo yɛ adesai anɔyeli lɛ naagbee gbii lɛ amli. Nyɛkanea 2 Timoteo 3:​1-5 lɛ, ni nyɛsusua sanebimɔ nɛɛ he:

      • Te sui nɛɛ ateŋ nɔ ni onaa akɛ mɛi jieɔ lɛ kpo ŋmɛnɛ lɛ?

      Mfonirii ni ato naa: Mfonirii ni miitsɔɔ nibii ni yaa nɔ kɛ sui ni mɛi jieɔ lɛ kpo yɛ naagbee gbii lɛ amli. 1. Asraafonyo onukpa ko damɔ wiemɔ kpoku nɔ, ehole eniji anɔ ni eebolɔ. 2. Shikpɔŋhosomɔ ko eba, ni tsui ekumɔ. 3. Asraafoi a-ɛroplen. 4. Mɛi komɛi nyiɛ maŋ lɛ mli ni amɛbubuu mask. 5. Ayatutua ŋwɛitsui kakadaji enyɔ ni yɔɔ New York, ni atsɛɔ amɛ Twin Towers lɛ, ni amɛmiitso kɛ la. 6. Nuu ko kɛ tsofai miitsu nii yɛ gbɛ ni esaaa nɔ. 7. Nuu ko efi atswɛrɛ, ni eebolɔ eewo eŋa. 8. Tsofai kɛ daji srɔtoi. 9. Yei enyɔ komɛi ewo atadei ni eba nɔ kɛ jwinei, ni amɛmiisha sɛlfi. 10. Mɔ ko miitswa lala eeha mɛi yɛ nifeemɔ ko shishi. 11. Basabasafeelɔ ko miifɔ tɔ kɛ enaa la.

      6. Akɛni Nyɔŋmɔ Maŋtsɛyeli lɛ miiye nɔ hewɔ lɛ, mɛni esa akɛ wɔfee?

      Nyɛkanea Mateo 24:​3, 14 lɛ, ni nyɛsusua sanebimɔi nɛɛ ahe:

      • Mɛɛ nitsumɔ ni he hiaa hãa wɔnaa akɛ, Nyɔŋmɔ Maŋtsɛyeli lɛ miiye nɔ bianɛ?

      • Te ooofee tɛŋŋ okɛ ohe awo nitsumɔ nɛɛ mli lɛ?

      Nyɔŋmɔ Maŋtsɛyeli lɛ miiye nɔ bianɛ, ni etsɛŋ, ebaaye shikpɔŋ muu lɛ fɛɛ nɔ. Nyɛkanea Hebribii 10:​24, 25 lɛ, ni nyɛsusua sanebimɔ nɛɛ he:

      • Akɛni ‘wɔmiina akɛ gbi lɛ miibɛŋkɛ nɛɛ,’ mɛni esa akɛ wɔteŋ mɔ fɛɛ mɔ afee?

      Mfonirii ni ato naa: 1. Mɔ ko ni akɛ lɛ kaseɔ Biblia lɛ etee Yehowa Odasefoi akpee ko. 2. Nakai Biblia mli nikaselɔ lɛ nɔŋŋ miishiɛ eeha mɔ ko ni ele.

      Kɛ́ oná ole nɔ ko ni baanyɛ awa mɛi, ni ehere amɛyiwala lɛ, mɛni obaafee?

      EKOLƐ MƆ KO BAABI BO AKƐ: “Mɛni hewɔ Yehowa Odasefoi wieɔ afi 1914 he waa lɛ?”

      • Mɛni obaakɛɛ lɛ?

      EMLI OTI

      Biblia mli gbalɛ kɛ je lɛŋ shihilɛ hãa wɔnaa akɛ, Nyɔŋmɔ Maŋtsɛyeli lɛ miiye nɔ bianɛ. Kɛ́ wɔshiɛ sane nɛɛ ni wɔtee asafoŋ kpeei lɛ, no baatsɔɔ akɛ wɔheɔ enɛ wɔyeɔ.

      Mɛni Okase?

      • Be ni bei kpawo ni agba yɛ Biblia mli wolo ni ji Daniel lɛ mli lɛ ba naagbee lɛ, mɛni ba?

      • Mɛni hãa oheɔ oyeɔ akɛ Nyɔŋmɔ Maŋtsɛyeli lɛ bɔi nɔyeli yɛ afi 1914 mli?

      • Mɛni kɛ́ ofee lɛ, no baatsɔɔ akɛ oheɔ oyeɔ akɛ Maŋtsɛyeli lɛ miiye nɔ bianɛ?

      Nɔ Ni Obaanyɛ Ofee

      EHE SAJI KROKOMƐI

      Obaana nɔ ni blema saji ahe nilelɔi kɛ mɛi krokomɛi ewie yɛ tsakemɔ ni ba je lɛ mli kɛjɛ afi 1914 kɛbaa lɛ he.

      “Be Ni Mɛi Ajeŋba Fite Kwraa” (Awake!, April 2007)

      Obaana bɔ ni gbalɛ ni yɔɔ Mateo 24:14 lɛ tsake nuu ko shihilɛ.

      “Misumɔɔ Bezbɔl Fe Nɔ Fɛɛ Nɔ!” (Buu-Mɔɔ No. 3 2017)

      Te wɔfeɔ tɛŋŋ wɔleɔ akɛ, gbalɛ ni yɔɔ Daniel yitso 4 lɛ kɔɔ Nyɔŋmɔ Maŋtsɛyeli lɛ he?

      “Mɛɛ Be Nyɔŋmɔ Maŋtsɛyeli lɛ Bɔi Nɔyeli? (Fã 1)” (Buu-Mɔɔ, October 1, 2014)

      Mɛni tsɔɔ akɛ “bei kpawo” ni atsĩ tã yɛ Daniel yitso 4 lɛ ba naagbee yɛ afi 1914 mli?

      “Mɛɛ Be Nyɔŋmɔ Maŋtsɛyeli lɛ Bɔi Nɔyeli? (Fã 2)” (Buu-Mɔɔ, November 1, 2014)

      a Kwɛmɔ naagbee saji enyɔ ni yɔɔ nikasemɔ nɛɛ fã ni ji Ehe Saji Krokomɛi lɛ shishi lɛ.

  • Nɔ Ni Maŋtsɛyeli Lɛ Baafee
    Oyi Aná Wala Kɛya Naanɔ!—Biblia Kasemɔ Ni Baafee Sanegbaa
    • Nikasemɔ 33. Mɛi yɛ shikpɔŋ ni etsɔ paradeiso nɔ.

      NIKASEMƆ 33

      Nɔ Ni Maŋtsɛyeli Lɛ Baafee

      Nyɔŋmɔ Maŋtsɛyeli lɛ miiye nɔ bianɛ. Etsɛŋ, ekɛ tsakemɔi wuji baaba shikpɔŋ lɛ nɔ. Obaana nibii kpakpai komɛi ni Maŋtsɛyeli lɛ baafee wɔsɛɛ.

      1. Mɛni Nyɔŋmɔ Maŋtsɛyeli lɛ baafee koni toiŋjɔlɛ aba shikpɔŋ lɛ nɔ, ni aye jalɛ sane?

      Yesu, ni ji Nyɔŋmɔ Maŋtsɛyeli lɛ Maŋtsɛ lɛ, baakpãtã mɛi fɔji kɛ nɔyelii ahiɛ yɛ Harmagedon ta lɛ mli. (Kpojiemɔ 16:​14, 16) Nakai beiaŋ lɛ, Biblia mli shiwoo nɛɛ baaba mli kwraa. Ekɛɔ akɛ: “Eshwɛ be fioo kɛkɛ, ni onaŋ mɛi fɔji lɛ dɔŋŋ.” (Lala 37:​10) Yesu baatsɔ Maŋtsɛyeli lɛ nɔ ehã toiŋjɔlɛ aba shikpɔŋ lɛ nɔ, ni aye jalɛ sane hu yɛ he fɛɛ he.​—Kanemɔ Yesaia 11:4.

      2. Te shihilɛ baatamɔ tɛŋŋ, be ni mɛi fɛɛ miifee Nyɔŋmɔ suɔmɔnaa nii yɛ shikpɔŋ lɛ nɔ lɛ?

      “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ” yɛ Nyɔŋmɔ Maŋtsɛyeli lɛ shishi. (Lala 37:​29) Shihilɛ baafee miishɛɛ waa, ejaakɛ mɔ fɛɛ mɔ ni baahi shi yɛ nakai beiaŋ lɛ baafee jalɛ nii, ni ebaasumɔ Yehowa kɛ enyɛmi gbɔmɔ hu! Hela mɔŋ mɔ ko mɔ ko, ni mɔ fɛɛ mɔ baahi shi kɛya naanɔ.

      3. Kɛ́ akpãtã mɛi fɔji lɛ ahiɛ sɛɛ lɛ, mɛni Nyɔŋmɔ Maŋtsɛyeli lɛ baafee?

      Kɛ́ akpãtã mɛi fɔji lɛ ahiɛ sɛɛ lɛ, Yesu baaye maŋtsɛ afii 1,000. Nakai beiaŋ lɛ, lɛ kɛ mɛi 144,000 ni baafata ehe kɛye nɔ lɛ, baawa mɛi ni yɔɔ shikpɔŋ lɛ nɔ lɛ ni amɛye emuu, ní amɛfeee esha. Be ni afii 1,000 lɛ baaba naagbee lɛ, shikpɔŋ muu lɛ fɛɛ etsɔ paradeiso fɛfɛo, ni mɛi fɛɛ ni yɔɔ nɔ lɛ yɛ miishɛɛ, ejaakɛ amɛyeɔ Yehowa mlai lɛ anɔ. Kɛkɛ lɛ, Yesu kɛ nɔyeli lɛ baahã e-Tsɛ Yehowa ekoŋŋ. Ni Yehowa ‘gbɛ́i lɛ he baatse’ yɛ gbɛ ni nɔ bɛ kwraa nɔ. (Mateo 6:​9, 10) Mɔ fɛɛ mɔ baana akɛ, Yehowa ji Nɔyelɔ kpakpa ni jwɛŋɔ eshishi bii lɛ ahe. No sɛɛ lɛ, Yehowa baakpãtã Satan, daimonioi lɛ, kɛ mɔ fɛɛ mɔ ni baate shi awo enɔyeli lɛ hiɛ. (Kpojiemɔ 20:​7-10) Shihilɛi kpakpai ni Nyɔŋmɔ Maŋtsɛyeli lɛ kɛbaaba lɛ baahi shi kɛya naanɔ.

      KASEMƆ PII OFATA HE

      Obaana nɔ hewɔ ni wɔbaanyɛ wɔhe wɔye akɛ, Nyɔŋmɔ baatsɔ Maŋtsɛyeli lɛ nɔ ehã nibii fɛɛ ni Biblia lɛ ewie akɛ ebaaba wɔsɛɛ lɛ aba mli lɛ.

      4. Nyɔŋmɔ Maŋtsɛyeli lɛ baafo adesai anɔyelii fɛɛ sɛɛ

      “Gbɔmɔ yeɔ gbɔmɔ nɔ kɛyeɔ lɛ awui.” (Jajelɔ 8:9) Yehowa baatsɔ e-Maŋtsɛyeli lɛ nɔ ejaje tɔtɔmɔ nɛɛ.

      Nyɛkanea Daniel 2:​44 kɛ 2 Tesalonikabii 1:​6-8 lɛ, ni nyɛsusua sanebimɔi nɛɛ ahe:

      • Mɛni Yehowa kɛ e-Bi Yesu baafee nɔyelɔi ni ji adesai lɛ kɛ amɛsɛɛfilɔi lɛ?

      • Mɛni okase yɛ Yehowa kɛ Yesu he ni hãa onaa akɛ amɛbaaye jalɛ sane?

      Yesu etsɔ Maŋtsɛ yɛ ŋwɛi, ni eeye shikpɔŋ ni etsɔ paradeiso nɔ.

      5. Yesu ji Maŋtsɛ ni nɔ bɛ

      Yesu, ni ji Nyɔŋmɔ Maŋtsɛyeli lɛ Maŋtsɛ lɛ, baafee nibii kpakpai pii ehã mɛi ni baahi shikpɔŋ lɛ nɔ lɛ. Jiemɔ VIDIO lɛ koni ona bɔ ni Yesu ehã ana akɛ eesumɔ ni ewa mɛi, ni akɛ, Nyɔŋmɔ ehã lɛ hewalɛ hu ni ekɛfee nakai.

      VIDIO: Yesu Hã Ana Nɔ Ni Maŋtsɛyeli Lɛ Baafee (1:13)

      Nibii ni Yesu fee be ni eyɔɔ shikpɔŋ lɛ nɔ lɛ hã ana nɔ ni Maŋtsɛyeli lɛ baafee. Te jɔɔmɔi ni nyiɛ sɛɛ nɛɛ ateŋ nɔ ni okpaa gbɛ waa lɛ? Nyɛkanea ŋmalɛi ni atsɛ yisɛɛ ni wieɔ jɔɔmɔi lɛ ahe lɛ.

      BE NI EYƆƆ SHIKPƆŊ LƐ NƆ LƐ . . . 

      EBAAJƐ ŊWƐI . . .

      6. Nyɔŋmɔ Maŋtsɛyeli lɛ baafee nibii kpakpai pii

      Maŋtsɛyeli lɛ baahã adesai aná shihilɛ kpakpa ni Yehowa to hã amɛ lɛ. Amɛbaahi shi kɛya naanɔ yɛ shikpɔŋ ni etsɔ paradeiso nɔ. Jiemɔ VIDIO lɛ koni ona bɔ ni Yehowa baatsɔ e-Bi Yesu nɔ ehã eyiŋtoo lɛ aba mli.

      VIDIO: Nibii Kpakpai Ni Baaba Wɔsɛɛ Lɛ Ahe Mfoniri (4:38)

      Nyɛkanea Lala 145:​16 lɛ, ni nyɛsusua sanebimɔ nɛɛ he:

      • Te le ni ole akɛ Yehowa baahã ‘nɔ fɛɛ nɔ ni hiɛ kã lɛ atɔ kɛ nɔ ni etaoɔ’ lɛ hãa onuɔ he ohãa tɛŋŋ?

      MƐI KOMƐI KƐƆ AKƐ: “Kɛ́ wɔ fɛɛ wɔfee ekome lɛ, wɔbaanyɛ wɔtsu je lɛŋ naagbai lɛ ahe nii.”

      • Mɛɛ naagbai Nyɔŋmɔ Maŋtsɛyeli lɛ baatsu he nii ni adesai anɔyelii lɛ nyɛŋ atsu he nii?

      EMLI OTI

      Nyɔŋmɔ Maŋtsɛyeli lɛ baatsu Nyɔŋmɔ yiŋtoo lɛ he nii. Ebaahã shikpɔŋ muu lɛ fɛɛ atsɔ paradeiso, ni gbɔmɛi kpakpai baahi nɔ, ni amɛbaajá Yehowa kɛya naanɔ.

      Mɛni Okase?

      • Mɛɛ gbɛ nɔ Nyɔŋmɔ Maŋtsɛyeli lɛ baatse Yehowa gbɛ́i lɛ he?

      • Mɛni hewɔ wɔbaanyɛ wɔhe wɔye akɛ Nyɔŋmɔ Maŋtsɛyeli lɛ baahã shiwoi ni yɔɔ Biblia lɛ mli lɛ aba mli lɛ?

      • Te jɔɔmɔi ni Maŋtsɛyeli lɛ kɛbaaba lɛ ateŋ nɔ ni okpaa gbɛ waa lɛ?

      Nɔ Ni Obaanyɛ Ofee

      EHE SAJI KROKOMƐI

      Obaana nɔ ni Harmagedon ji.

      “Mɛni Ji Harmagedon Ta Lɛ?” (jw.org lɛ nɔ sane)

      Obaana nibii ni baaya nɔ yɛ afii 1,000 ni Yesu kɛbaaye nɔ lɛ mli, kɛ nibii ni baaya nɔ yɛ no sɛɛ nɔŋŋ.

      “Mɛni Ji Amanehulu Kpeteŋkpele Lɛ?” (jw.org lɛ nɔ sane)

      Obaana bɔ ni wekui baanyɛ afee ekome kɛfee jɔɔmɔi ni Maŋtsɛyeli lɛ kɛbaaba lɛ ahe mfoniri.

      Feemɔ Ohe Mfoniri Akɛ Oyɛ Paradeiso Lɛ Mli (1:50)

      Yɛ sane ni ji, “Saji Pii Hao Mi” lɛ mli lɛ, obaana bɔ ni nuu ko ni tse emaŋ lɛ hiɛ atua lɛ ná sanebimɔi ni haoɔ lɛ lɛ hetoo.

      “Biblia Lɛ Tsakeɔ Mɛi” (Buu-Mɔɔ, January 1, 2012)